From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಹೋಮ್-ಸ್ಟೇ ಎಟೆಕ್
Saturday, March 25, 2017
2012 ಇಸ್ವೆಚಾ ಜುಲೈ 28 ತಾರೀಕೆರ್ ಏಕಾ ಮೈನಾ ಸುಕ್ಣ್ಯಾ ಘೊಂಟೆರಾಚೆರ್ ಹಲ್ಲೊ ಜಾಲೊ ಮಣ್ಚಿ ಖಬರ್ ರಾನಾಚಾ ಸರ್ವ್ ಕುಶಿಂನಿ ಸುಕ್ಯಾ ಖೊಲಿಯೆಂಕ್ ಉಜೊ ಲಾಗ್‍ಲ್ಲೆ ಜಿನ್ಸಿಂ ವಿಸ್ತಾರ್ಲಿ. ರುಕಾಚೆರ್ ಚಾನಿಯೆಚೆಂ ಬಿಡಾರ್ ಆಸ್‍ಲ್ಲೆಂ ಆನಿ ಚಾನಿಯೆನ್ ಅಪ್ಲೆ ರುಕಾರ್ ತರ್ನ್ಯಾಂ ಮೈನಾಂಕ್ ಖೆಳೊಂಕ್ ಏಕ್ ಘೊಂಟೆರ್ ಕರ್ನ್ ಆಸ್ರೊ ದಿಲ್ಲೊ. ತ್ಯಾ ಸಾಂಜೆರ್ ಗೀದಾಂನಿ ತ್ಯಾ ಘೊಂಟೆರಾ ಭಿತರ್ ಖೆಳ್ಚಾ ಮೈನಾ ತಶೆಂ ತಾಂಚೆ ಸಾಂಗಾತಿ ಸುಕ್ಣ್ಯಾಂಚೆರ್ ಆಕ್ರಮಣ್ ಕೆಲೆಂ ಮಣ್ಚಿ ಹುನೊನಿ ವಾರ್ತಾ ಪಾರ್ವ್ಯಾಂನಿ ಕೊನ್ಶಾಂ ಕೊನ್ಶಾಂಕ್ ಪಾಟಯ್ಲಿ.
ಗೀದಾಚಾ ಕ್ರೂರ್ ಆಕ್ರಮಣಾಕ್ ವಳಗ್ ಜಾಲ್ಲ್ಯಾ ಘೊಂಟೆರಾಚೊ ಭಂಗೊಸ್ತೊಳ್ ಜಾಲ್ಲೊ. ಸೊಭಿತ್ ನಿವಾಸ್ ಅವೆವಸ್ಥಿತ್ ಜಾವ್ನ್ ಪರಿವರ್ತಿತ್ ಕೆಲ್ಲೊ. ಸುಕ್ಣ್ಯಾಂಚಿ ಸ್ಥಿತಿ ಚಿಂತಾಜನಕ್ ಜಾಲ್ಲಿ. ಮೈನಾಂನಿ ತಾಂಚಿಂ ಪಾಕಾಂ ಹೊಗ್ಡಾಯಿಲ್ಲಿಂ. ಫಾಪ್ಸಿಲ್ಲ್ಯಾ ಜಾಗ್ಯಾಂನಿ ರಗ್ತಾಚಿಂ ಖತಾಂ ಉಗ್ತೆಂ ದಿಸ್ತಾಲಿಂ. ದೈಹಿಕ್ ಆನಿ ಮಾನಸಿಕ್ ದಗ್ದೊಣೆನ್ ವಳ್ವಳ್‍ಲ್ಲ್ಯಾ ತರ್ನ್ಯಾಂ ಸುಕ್ಣ್ಯಾಂಕ್ ರಡ್ಚಾ ಶಿವಾಯಿ ಹೆರ್ ಕಿತೆಂ ಕರ್ಚೆಂ ಮಣ್ ಸುಸ್ತಾಲೆಂನಾ.
"ಗೀದಾಂನಿ ಆಕ್ರಮಣ್ ಕರ್ತಾನಾ ತುಮಿ ಕಿತ್ಯಾಕ್ ಮೌನ್ ರಾವ್ಲ್ಯಾತ್?" ಆವಯಿ ಸುಕ್ಣ್ಯಾನ್ ವಿಚಾರ್ ಕೆಲೊ.
"ಪ್ರಬಲ್ ಗೀದಾಂ ಸಾಮ್ಕಾರ್ ಆಮಿ ಅಬಲ್ ಜಾಲ್ಯಾಂವ್." ತರ್ನ್ಯಾಂ ಸುಕ್ಣ್ಯಾಂನಿ ದುಕಾಂ ಗಳಯ್ಲಿಂ.
"ಆಮ್ಕಾಂ ನೀತ್ ಜಾಯ್." ಮ್ಹಣಾಲೊ ಬಾಪಯಿ ಮೈನಾ.
ಮೈನಾಂಚಿ ಅಸಹಕತಾ ಸಮ್ಜಾಲ್ಲ್ಯಾ ಪಾರ್ವ್ಯಾಂನಿ ಅಪ್ಲೆಂ ಮೀಡಿಯಾ ಜಾಗೆಂ ದವರ್ಲೆಂ : 'ಗೀದಾಂಚಿ ಹಿ ಹಿಂಸಾತ್ಮಾಕ್ ಕರ್ನಿ ಖಂಡನಾರ್ಹ್ ಜಾವ್ನಾಸಾ ಆನಿ ರಾನಾಚಾ ಸಂವಿಧಾನಾಂತ್ ಕಾಣ್ಸಿಲ್ಲ್ಯಾ ಹಕ್ಕಾಂ ವಿರೋಧ್ ವೆತಾ. ಘೊಂಟೆರಾ ಭಿತರ್ ಕೋಣಾಕ್‍ಚ್ ಧೊಶಿನಾಸ್ತಾನಾ ಖೆಳ್ಚಾ ಮೈನಾ ಆನಿ ಸಾಂಗಾತಿ ಸುಕ್ಣ್ಯಾಂಚೆರ್ ಗೀದಾಂನಿ ಎಕಾ ರೀತಿನ್ ಬಲತ್ಕಾರ್ ಕೆಲಾ. ತಾಂಚೆ ಖಾಸ್ಗಿ ವಿಶ್ವ್ಯಾಂಚೆರ್ ಹಾತ್ ಘಾಲಾ. ಚೂಕಿದಾರ್ ಜಾವ್ನಾಸ್ಚಾ ಗೀದಾಂಕ್ ಫಾವೊತಿ ಶಿಕ್ಷಾ ಮೆಳಾಜಾಯಿ. ಕೇಂದ್ರ್ ಸರ್ಕಾರಾನ್ ಮೆತೆರ್ ಜಾವ್ನ್ ಪ್ರಾಂತ್ಯ್ ಸರ್ಕಾರಾಚೆರ್ ನೀತ್ ದೀಂವ್ಕ್ ವತ್ತಡ್ ಘಾಲಿಜಾಯಿ. ನಾಂ ತರ್, ಆಜ್ ಮೈನಾಂಚೆರ್ ಹಲ್ಲೊ ಕೆಲ್ಲೆ ಗೀದ್ ಫಾಲ್ಯಾಂ ಆಮ್ಚೆರ್ ಯಾ ದುಸ್ರ್ಯಾ ಸುಕ್ಣ್ಯಾಂ-ಮನ್ಜಾತಿಂಚೆರ್ ಆಕ್ರಮಣ್ ಕರುಂಕ್ ಆಸಾತ್. ರಾನಾಚಿ ಸಮರ್ಪಕ್ ಕಾನೂನ್ ವೆವೆಸ್ಥಾ ಮನ್ಶಾ ಸಮಾಜೆ ಪರಿಂ ಅಸಮರ್ಪಕ್ ಜಾಂವ್ಕ್ ವೇಳ್ ಲಾಗ್ಚೊನಾ. ಗೀದಾಂಚಿ ರೀತ್-ನೀತ್ ಮನ್ಶಾಂ ಪರಿಂ ಅಜಾನ್ವಾರ್ ಜಾಂವ್ಕ್ ಪಾವ್ಲ್ಯಾ. ಮನ್ಶಾ ಜಿಣ್ಯೆಚೆಂ ನಕ್ಕಲ್ ಕಾಡ್ನ್ ರಾನಾಕ್ ಹೆ ಗೀದ್ ವಾಯ್ಟ್ ದೇಕ್ ದೀವ್ನ್ ಆಸಾತ್.'
ರಾನಾಚೊ ಕೇಂದ್ರ್ ಸರ್ಕಾರ್ ಶಿಂವಾಚಾ ಅಧಿಕಾರಾರ್ ಆಸ್‍ಲ್ಲೊ ತರೀ ಹಲ್ಲೊ ಜಾಲ್ಲ್ಯಾ ಪ್ರಾಂತ್ಯಾಕ್ ಬೊಲ್ಪೊ ಗುರ್ಕಾರ್ ಜಾವ್ನಾಸ್‍ಲ್ಲೊ. ಬೊಲ್ಪೊ ಸರ್ಕಾರಾಚೆಂ ಕಾನೂನ್ ರಕ್ಷಣ್ ಕೊಲ್ಯಾಂಚಾ ಅಧೀನ್ ಆಸ್‍ಲ್ಲೆಂ. ಕೇಂದ್ರಿಯಿ ಗಡಿ ರಕ್ಷಣ್ ಆನಿ ಅಪ್ರಾಧ್ ವಿಚಾರಣ್ ವಾಗ್ ಕರ್ತಾಲೆ. ಚೋರ್ನ್ ಖಾಂವ್ಚಾಂತ್ ಗೀದಾಂ ಸಂಗಿಂ ಈಷ್ಟಾಗತೆಂತ್ ಆಸ್‍ಲ್ಲ್ಯಾ ಕೊಲ್ಯಾಂನಿ ಕ್ರಮ್ ಘೆಂವ್ಕ್ ಗಳಾಯಿ ಕೆಲ್ಯಾ ಮ್ಹಣ್ ಪಾರ್ವ್ಯಾಂನಿ ಅಪ್ಲೆ ಮಧ್ಯಮಾಂತ್ ಘಾಜಯ್ಲೆಂ.
ಸರ್ಕಾರಾಂತ್ ವಿರೋಧ್ ಪಾಡ್ತ್ ಜಾವ್ನಾಸ್ಚಾ ಮಾಂಕ್ಡಾಂನಿ ಹೆರ್ ಮನ್ಜಾತಿಂಚೊ ಸಹಕಾರ್ ಘೆವ್ನ್ ಬೊಲ್ಪ್ಯಾಂಚೆರ್ ವತ್ತಡ್ ಘಾಲ್ಲ್ಯಾನ್ ಕೊಲ್ಯಾಂನಿ ಅಪ್ಲೆ ಹಿಕ್ಮತೆನ್ ಥೊಡ್ಯಾ ಗೀದಾಂಕ್ ಕೈದ್ ಕರ್ನ್ ಲೊಕಪ್ಪಾಂತ್ ಘಾಲೆಂ.
"ಆಮಿ ರಾನಾಂಚಿ ಸಂಸ್ಕ್ರತಿ ಆನಿ ಪರಂಪರಾಚೆಂ ರಕ್ಷಣ್ ಕರುಂಕ್ ಏಕ್ ಜಾಗರಣ್ ವೇದಿ ರಚ್ಲ್ಯಾ." ಕೈದ್ ಜಾಲ್ಲ್ಯಾ ಗೀದಾಂನಿ ಅಪ್ಲೆಂ ಸ್ಪಷ್ಟೀಕರಣ್ ದಿಲೆಂ. "ಚಾನಿಯೆಚಾ ರುಕಾಚೆರ್ ಸುಕ್ಣ್ಯಾಂಚೊ ಅನೈತಿಕ್ ವ್ಹೆವಾರ್ ಚಲೊನ್ ಆಸ್‍ಲ್ಲೊ. ಸುಕ್ಣ್ಯಾಂನಿ ಜಿಯೆಂವ್ಚಿ ರೀತ್ ಸಾರ್ಕಿ ನಾ. ಮನ್ಶಾ ಗಾಂವಾಂಕ್ ವೊಚೊನ್ ನಾಕಾ ಜಾಲ್ಲೆಂ ಶಿಕೊನ್ ರಾನಾಂತ್ ಖೊಟ್ಯಾಪಣಾಚೆಂ ಭಿಂ ವೊಂಪೊನ್ ಆಸಾತ್. ಥಂಯ್ಸರ್ ಮೈನಾಂ ಸಂಗಿಂ ತರ್ನೆ ಕೊಗುಳ್ ಆಸ್‍ಲ್ಲೆ. ಆಮಾಲ್ ಆನಿ ಮಾದಕ್ ವಕ್ತಾಂ ಉಪಸ್ಥಿತ್ ಆಸ್‍ಲ್ಲಿಂ. ಕೊಗುಳೆಂಕ್ ಮೈನಾಂ ಸಂಗಿಂ ಕಸಲೆಂ ಕಾಮ್? ತಾಂಚಿ ಚಾಲ್ ಚಮ್ಕೊಣ್ ಸಾರ್ಕಿ ನಾ. ಚಾನಿಯೆನ್ ಅಪ್ಲೆ ರುಕಾರ್ ಮಝಾ ಭೊಗುಂಕ್ ಸುಕ್ಣ್ಯಾಕ್ ಆಸ್ರೊ ದಿಲ್ಲೆಂ ಚೂಕ್ ಜಾವ್ನಾಸಾ. ಚಾನಿ, ಮೈನಾ ಆನಿ ಕೊಗುಳೆಂಚಾ ವಾಯ್ಟ್ ಚಾಲಿಕ್ ಆಮಿ ಚತ್ರಾಯಿ ದಿಲ್ಯಾ."
"ಕೊಗುಳೆನ್ ಅಪ್ಲೊ ಜನ್ಮಾ ದೀಸ್ ಆಚರಣ್ ಕರುಂಕ್ ಮೈನಾಂಕ್ ಅಪಯಿಲ್ಲೆಂ. ಹಾಂವೆ ತಾಂಕಾಂ ಪರ್ವಣ್ಗಿ ದಿಲ್ಲಿ." ಮೈನಾಚಾ ಆವಯ್ನ್ ಸೊಡ್ನ್ ದಿಲೆಂ ನಾ. "ಆಮ್ಚಾ ಆಮ್ಚಾ ಘೊಂಟೆರಂತ್ ಕಾನೂನಿ ಪರಿಧಿ ಭಿತರ್ ಆಮಿಂ ಕಿತೆಂಯಿ ಮಝಾ ಭೊಗ್ತಾಂವ್. ಹೆಂ ಆಡಾಂವ್ಕ್ ತುಮಿ ಕೋಣ್? ಚಾನಿಯೆ ಲಾಗಿಂ ಘೊಂಟೆರಾಚಿ ವೆವಸ್ಥಾ ಕರುಂಕ್ ಹಾಂವೆ ವಿನಂತಿ ಕೆಲ್ಲಿ."
"ಗೀದಾಂನಿ ಘೊಂಟೆರಾಂತ್ ಚಲೊನ್ ಆಸ್‍ಲ್ಲ್ಯಾ ಸಂಭ್ರಮಾಚಿ ವೀದ್‍ವಾವ್ಳಿ ಕೆಲ್ಯಾ. ಮೈನಾ ಆನಿ ಕೊಗುಳೆಂಚೆರ್ ದೈಹಿಕ್ ಹಲ್ಲೊ ಕೆಲಾ. ತಾಂಚೆ ವಿಶ್ವ್ಯಾಂಚೆರ್ ಹಾತ್ ಘಾಲ್ನ್ ಕಾಮುಕಿ ಉದ್ರೇಕ್ ವೆಕ್ತ್ ಕೆಲ್ಯಾತ್. ತಾಂಚೆ ಅಪ್ರಾಧಾಕ್ ಫಾವೊತಿ ಶಿಕ್ಷಾ ದೀಜಾಯಿ." ವಿರೋಧ್ ಪಾಡ್ತಿಚಾ ಮಾಂಕ್ಡಾಂನಿ ಅಪ್ಲೊ ವಾದ್ ಮಾಂಡ್ಲೊ.
ಆದ್ಲೆ ಚುನಾವಾಂತ್ ಪ್ರಾಂತ್ಯಾಚೊ ಅಧಿಕಾರ್ ಮಾಂಕ್ಡಾಂನಿ ಹೊಗ್ಡಾಯಿಲ್ಲೊ. ಪಾಟಿಂ ಅಧಿಕಾರಾಚೆರ್ ಯೇಂವ್ಕ್ ಮಾಂಕ್ಡಾಚೆಂ ಪ್ರೇತನ್ ಚಾಲು ಆಸ್‍ಲ್ಲೆಂ. ಬೊಲ್ಪ್ಯಾಂ ವಿರೋಧ್ ಕಸಲೆಂಯಿ ಘಟನ್ ಫುಟ್ಲೆ ತರ್ ತರ್ ತೆಂ ವಿಸ್ಪೋಟಿತ್ ಕರ್ನ್ ಫಾಯ್ದೊ ಜೊಡುಂಕ್ ತೆ ರಾಕೊನ್ ಆಸ್‍ಲ್ಲೆ.
"ರಾನಾಚೆ ಪೋಲಿಸ್ ಜಾವ್ನಾಸ್ಚೆ ಕೊಲೆ ಪಾಂವ್ಚಾ ಪಯ್ಲೆಂ ಪಾರ್ವ್ಯಾಂಕ್ ಹಿ ಕಶಿ ಖಬರ್ ಮೆಳ್ಳಿ? ಬಹುಶಾ ಗೀದಾಂಚಾ ಕರ್ನೆಂತ್ ಪಾರ್ವ್ಯಾಂಚೊಯಿ ಹಾತ್ ಆಸಾ." ಬೊಲ್ಪ್ಯಾಂನಿ ಪಾರ್ವ್ಯಾಂಕ್ ಜವಾಬ್ದಾರ್ ಕೆಲೆಂ.
"ಚಾನಿಯೆನ್ ವಸ್ತಿ ಕರ್ಚಾ ರುಕಾ ಭಂವ್ತಿಂ ಉಬೊನ್ ಆಸ್ತಾನಾ ಆಮ್ಕಾಂ ಹೆಂ ಆಕ್ರಮಣ್ ಝಳ್ಕಾಲೆಂ." ಪಾರ್ವ್ಯಾಂನಿ ಜಾಪ್ ದಿಲಿ. "ಕೊಲ್ಯಾಂಕ್ ಸಂಪರ್ಕ್ ಕರ್ಚೆಂ ಪ್ರೇತನ್ ಕರ್ತಾನಾ ತೆ ನಿದೊನ್ ಪಡ್‍ಲ್ಲೆ. ತಶೆಂ ತಾಣಿಂ ತುರಂತ್ ಕ್ರಮ್ ಘೆಂವ್ಕ್ ಘಳಾಯಿ ಕೆಲಿ."
"ಸುಕ್ಣ್ಯಾಂಚಾ ಘೊಂಟೆರಾಚೆರ್ ಆಕ್ರಮಣ್ ಕರ್ನ್ ಗೀದಾಂನಿ ಪ್ರಜಾತಂತ್ರಾಚೊ ಬಲತ್ಕಾರ್ ಕೆಲಾ. ನೈತಿಕ್ ಆನಿ ಅನೈತಿಕ್ ಸಂಗ್ತಿಂಚೆಂ ವಿಚಾರಣ್ ಕರುಂಕ್ ಕಾನೂನ್ ಆಸ್ತಾನಾ ಗೀದಾಂಕ್ ಕೋಣೆಂ ಹೆಂ ಹಕ್ಕ್ ದಿಲಾಂ?" ಚಿತಾಳಾನ್ ಸುಕ್ಣ್ಯಾಂಚಿ ಪಾಡ್ತ್ ಘೆತ್ಲಿ.
"ಮೈನಾ ಕೊಗುಳೆಚಾ ಪಾರ್ಟೆಕ್ ಕೀರಾಂನಿ ಆಮಾಲಾಚಿ ವೆವಸ್ಥಾ ಕೆಲ್ಲಿ. ಆಮಾಲಾಚೆಂ ಸೇವನ್ ಮನ್ಶಾ ಸಮಾಜೆಚೆಂ ಮಾರೆಕಾರ್ ಖರ್ಗ್ ಜಾವ್ನಾಸಾ. ಹೆಂ ಆಮಾಲ್ ಪೀವನ್ ರಾನಾಚಾ ಕಾನೂನಾಂತ್ ಆಡ್ವಾರ್ಲಾಂ. ಚಾನಿ, ಮೈನಾ ಆನಿ ಕೊಗುಳೆಚೆರ್ ಕೇಜ್ ಘಾಲಿಜಾಯಿ." ಸರ್ಪಾನ್ ಮೊಸ್ರಾಚೆಂ ವೀಕ್ ವೊಂಕ್ಲೆಂ. ಸುಕ್ಣ್ಯಾಚಾ ಗುಪಿತ್ ಸಂಭ್ರಮಾಂತ್ ಆಪ್ಣಾಕ್ ಆಮಂತ್ರಣ್ ದೀಂವ್ಕ್ ನಾ ಮ್ಹಣ್ಚೊ ಶಿಣ್ ಸರ್ಪಾಕ್ ಆಸ್‍ಲ್ಲೊ.
"ಹಿ ಖರೋಕರ್ ಫಟ್ ಜಾವ್ನಾಸಾ. ಆಮಾಲ್ ಪೀವನಾಕ್ ಆನಿ ಆಮ್ಕಾಂ ಕಿತೆಂಚ್ ಸಂಬಂಧ್ ನಾ. ಮೈನಾ ಕೊಗುಳೆಚಾ ಪಾರ್ಟೆಚಿ ಆಮ್ಕಾಂ ಖಬರ್ ನಾತ್‍ಲ್ಲಿ." ಕೀರಾಂನಿ ನಿರಾಕರ್ಸಿಲೆಂ. "ಬೊಲ್ಪೆ, ಕೊಲೆ, ಸೊರೊಪ್ ಆನಿ ಗೀದ್ ಸಾಂಗಾತಾ ಮೆಳೊನ್ ಅಲ್ಪಸಂಖ್ಯಾತಾಂಕ್ ರಾನಾ ಥಾವ್ನ್ ಧಾಂವ್ಡಾಂವ್ಚೆಂ ಪ್ರೇತನ್ ಕರ್ನ್ ಆಸಾತ್. ಆಮ್ಕಾಂ ಹ್ಯಾ ಸರ್ಕಾರಾಚೆರ್ ಪಾತ್ಯೆಣಿ ನಾ."
"ಹಗೆಂ ಆನಿ ಮೊಸ್ರಾಚೊ ಪರಿಣಾಮ್ ಜಾವ್ನ್ ಗೀದಾಂನಿ ಆಕ್ರಮಣ್ ಕೆಲೆಂ." ಮ್ಹಣಾಲಿ ಕೊಗುಳ್. "ಗೀದಾಂನಿ ತಾಂಚೆ ಏಕಾ ಪಾರ್ಟೆಕ್ ನಾಚೊಂಕ್ ಮೈನಾಂಕ್ ಆನಿ ಆಮ್ಕಾಂ ಸಂಗೀತ್ ಸಜಂವ್ಕ್ ಆಮಂತ್ರಣ್ ದಿಲ್ಲೆಂ. ತಾಂಚೆಂ ಅಪವ್ಣೆ ಆಮಿ ನಿರಾಕರ್ಸಿಲ್ಲ್ಯಾಕ್ ತೆ ಹಲ್ಲೊ ಕರುಂಕ್ ಸಂದ್ರಾಪಾಕ್ ರಾಕೊನ್ ಆಸ್‍ಲ್ಲೆ. ಮೊಂವಾ ಶಿವಾಯಿ ಹೆರ್ ಕಿತೆಂಯಿ ಪಿಯೆಂವ್ಕ್ ಘೊಂಟೆರಾಂತ್ ನಾತ್‍ಲ್ಲೆಂ."
"ಗೀದಾಂಚಿ ಜಾಗರಣ್ ವೇದಿ ಕಾನೂನಾ ದ್ವಾರಿಂ ನಿಷೇಧ್ ಕರಿಜಾಯಿ." ಪಾಕ್ಯಾಂನಿ ಬೊಬಾಟ್ ಘಾಲಿ. "ಆಮಿ ಪಳೆಯ್ಲಾಂ, ಘೊಂಟೆರಾಂತ್ ಆಮಾಲ್ ಪೀವನಾಚಿ ಬಂದೋಬಸ್ತ್ ನಾತ್‍ಲ್ಲಿ."
"ಕಿತೆಂ ಘಡೊನ್ ಆಸಾ ಹ್ಯಾ ರಾನಾಂತ್?" ಎದೊಳ್ ಪರ್ಯಾಂತ್ ವೊಗೊ ಆಸ್‍ಲ್ಲಿ ಹಸ್ತ್ ಆತಾಂ ಜಾಗಿ ಜಾಲಿ.. "ಸ್ವ-ಘೋಷಿತ್ ಸಮಾಜೆಚೆ ರಾಕ್ವಾಲಿ ಜಾಂವ್ಕ್ ಪೆಚಾಡ್ಚಾ ಗೀದಾಂಚೆಂ ಧೋರಣ್ ಸಹ-ಆಸ್ಥಿತ್ವ್ ಸಮಾಜೆಕ್ ಸಂಚಿಕಾರ್ ಜಾವ್ನಾಸಾ. ತಾಂಚೆ ವಿರೋಧ್ ಕ್ರಮ್ ಘೇನಾಂತ್ ತರ್ ಆಮಿ ಉಪ್ರಾಟ್ತೆಲ್ಯಾಂವ್."
ಹಸ್ತ್ ಉಪ್ರಾಟ್ಲಿ ತರ್ ಪ್ರಾಂತ್ಯಾಚೊ ಸರ್ಕಾರ್ ಪಡ್ತೊಲೊ ಮ್ಹಣ್ ಬೊಲ್ಪೆ ಭಿಯೆಲೆ. ರೊವೊಣೆಕ್ ಬೊಸುಲ್ಲ್ಯಾ ರಾನ್ ಕೊಂಬಿಯೆಚಾ ಮುಕೇಲ್ಪಾಣಾಚೆರ್ ತಾಣಿಂ ಏಕ್ ಸಮಿತಿ ರಚ್ಲಿ. ಹ್ಯಾ ಸಮಿತಿನ್ ಸತಾಂಚೊ ವಿವರ್ ದೀಂವ್ಕ್ ಆದೇಶ್ ದಿಲೊ. ರೊವೊಣೆಚಿ ರಾನ್ ಕೊಂಬಿ ಅಪ್ಲಿಂ ತಾಂತಿಂಯಾಂ ಸಾಂಬಾಳ್ನ್ ಊಬ್ ದಿಂವ್ಚಾಂತ್ ಕಾರ್ಯ್ ನಿರತ್ ಜಾಲ್ಲ್ಯಾನ್ ವೇಳಾಚಾ ಅಭಾವಾನ್ ಚಡ್ಪಡ್ಲಿ. ಮಧೆಂ ಮೆಳ್ಚಾ ಲ್ಹಾನ್ ವಿರಾಮಾಚೆರ್ ತಿಣೆ ದರ್ವಡ್ಯಾನ್ ಏಕ್ ರಿಪೋರ್ಟ್ ತಯಾರ್ ಕೆಲೊ.
ಅಪ್ಲೆ ವಿವರಣಾಂತ್ ತಿಣೆ ಮೈನಾ ಆನಿ ಸಾಂಗಾತ್ಯಾಂಚೆರ್ ಆರೋಪ್ ಮಾಂಡ್ಲೊ: 'ಜುಲೈ 28ವೆರ್ ಮೈನಾ ಘೊಂಟೆರಾಚೆರ್ ದಾಡ್ ಘಾಲ್ನ್ ಗೀದಾಂನಿ ಮೈನಾಂಕ್ ಕೊಗುಳೆಂಚಾ ಅಸಹ್ಯ್ ಉದ್ಧೇಶಾಂ ಥಾವ್ನ್ ಬಚಾವ್ ಕೆಲಾಂ. ಮನ್ಶಾಂ ಲಾಗಿಂ ಸಂಬಂಧ್ ಆಸ್ಚಾ ಕೀರಾಂನಿ ಕೊಗುಳೆಂಕ್ ಮಾದಕ್ ವಸ್ತು ತಲಾಸ್ ಕರ್ನ್ ದಿಲ್ಯಾತ್ ಮಣ್ಚೆಂ ಫಟ್ ನಯ್. ತರ್ನ್ಯಾಂ ಮೈನಾಂನಿ ಗುಪಿತ್ ಕೊಗುಳೆಂಕ್ ಮೆಳೊನ್ ಪಾರ್ಟಿ ಕರ್ಚೆಂ ಆಮ್ಚಾ ರಾನಾ ಸಂಸ್ಕೃತೆಕ್ ತಾಳ್ ಪಡಾನಾ. ಹೆಂ ಗುಮಾನಾಂತ್ ದವರ್ಚೆಂ ಅವಶ್ಯ್. ಮನ್ಶಾ ಸಮಾಜೆ ಥಾವ್ನ್ ಸುಕ್ಣ್ಯಾ ಮನ್ಜಾತೆಂನಿ ಅಸಲ್ಯೊ ಅಸಹ್ಯ್ ರೀತಿ-ರಿವಾಜಿ ಶಿಕ್ಚೆಂ ಆಡಾಯ್ಜಾಯಿ. ಮನ್ಶಾಂ ಸಂಗಿಂ ಲಾಗ್ಶಿಲೊ ಸಂಬಂಧ್ ದವರ್ಚೆ ಕೀರ್‍ ಆನಿ ಕೊಗುಳೆ ತಸಲಿಂ ಸುಕ್ಣಿಂ ರಾನಾಚಾ ಪರ್ಜೆಕ್ ಏಕ್ ವಾಯ್ಟ್ ದೇಕ್ ದೀವ್ನ್ ಆಸಾತ್. ರಾನಾಂಚಾ ಪರ್ಜೆಕ್ ಅಪ್ಲಿಚ್ ಸಂಸ್ಕ್ರತಿ ಆನಿ ಜಿಯೆಂವ್ಚಿ ರೀತ್ ಆಸಾ. ಹಾಚೆಂ ಆಮಿ ಸಂರಕ್ಷಣ್ ಕರಿಜಾಯಿ. ಹಾಚೆಂ ರಕ್ಷಣ್ ಕರ್ಚಾ ಗೀದಾಂಚೊ ಹಾಂವ್ ಉಪ್ಕಾರ್ ಬಾವುಡ್ತಾಂ.'
"ಹೊ ಆನ್ಯಾಯಿ ಜಾವ್ನಾಸಾ. ಬೊಲ್ಪ್ಯಾಂಕ್, ಕೊಲ್ಯಾಂಕ್ ಆನಿ ಗೀದಾಂಕ್ ಖುಶ್ ಕರುಂಕ್ ಹೊ ರಿಪೋರ್ಟ್ ರಚ್ಲಾ." ಮೈನಾ, ಕೊಗುಳ್ ಆನಿ ಪಾರ್ವ್ಯಾಂನಿ ಬೊಬಾಟ್ ಘಾಲಿ.
ವಿರೋಧ್ ಪಾಡ್ತಿಚಾ ಮಾಂಕ್ಡಾಂನಿ ಕೇಂದ್ರ್ ಸರ್ಕಾರಾಚಿ ಮಜತ್ ವಿಚಾರ್ಲಿ. ಸತ್ ಭಾಯ್ರ್ ಪಡ್ಲೆಂ ತರ್ ಪ್ರಾಂತ್ಯಾಚೊ ಸರ್ಕಾರ್ ಹಾಲ್ತೊಲೊ ಮ್ಹಣ್ ತಾಂಚೊ ಭರ್ವಸೊ. ಕೇಂದ್ರ್ ಸರ್ಕಾರಾಚೊ ಮುಕೆಲಿ ಶಿಂವಾನ್ ವಾಗಾ ಸಂಗಿಂ ಮೆಳೊನ್ ಹ್ಯಾ ವಿಶಿಂ ಜಮಾತ್ ಚಲಯ್ಲಿ ಆನಿ ವಾಗಾನ್ ಅಪ್ಲೆ ಸಂಪರ್ಕಾನ್ ಹ್ಯಾ ವಿಶಿಂ ಸೊಧ್ನಾಂ ಕರುಂಕ್ ಸೂಚಿತ್ ಕೆಲೆಂ. ವಾಗಾನ್ ಸತ್ ತಲಾಸ್ ಕರುಂಕ್ ಸೊಸ್ಯಾಕ್ ಧಾಡ್ಲೆಂ. ಸೊಸ್ಯಾನ್ ಮೈನಾ ಘೊಂಟೆರಾಚಾ ಹಲ್ಲ್ಯಾಚೆರ್ ಚಡಿತ್ ಸೊಧ್ನಾಂ ಕರ್ನ್ ಆಶೆಂ ತೀರ್ಪ್ ದಿಲೆಂ:
'ಗೀದಾಂಚಾ ಆಕ್ರಮಣಾಚೊ ಖರೊ ಉಧ್ಧೇಶ್ ಅಲ್ಪ ಸಂಖ್ಯಾತಾಂಕ್ ಭೆಷ್ಟಾಂವ್ಚೊ ಜಾವ್ನಾಸಾ. ಅಪ್ಲೆ ಘೊಂಟೆರಾ ಭಿತರ್ ಖೆಳೊನ್ ಆಸ್ಚಾ ಮೈನಾ ಆನಿ ಕೊಗುಳೆಂಚೆರ್ ಹಲ್ಲೊ ಕರ್ನ್ ಗೀದಾಂನಿ ಪ್ರಜಾ ತಂತ್ರಾಂಚೊ ಬಲತ್ಕಾರ್ ಕೆಲಾ. ಘೊಂಟೆರಾ ಭಿತರ್ ಆಮಾಲ್ ಯಾ ಮಾದಕ್ ವಸ್ತು ನಾತ್‍ಲ್ಲ್ಯೊ. ಮೊಂವ್ ಖಂಡಿತ್ ಜಾವ್ನ್ ಆಸ್‍ಲ್ಲೆಂ. ಕೋಣಾಕ್‍ಚ್ ಧೊಶಿನಾಸ್ತಾನಾ ಗುಪ್ತಿಂ ಘೊಂಟೆರಾ ಭಿತರ್ ಮೊಂವ್ ಸೆಂವ್ಚಾಂತ್ ಚೂಕ್ ನಾ. ಹಾಚೊ ವಿಚಾರ್ ಕರುಂಕ್ ತಾಂಚಿಂ ವ್ಹಡಿಲಾಂ ಆಸಾತ್. ಆನೈತಿಕ್ ಸಂಬಂಧ್ ಮ್ಹಣ್ಚೊ ಹೊ ಏಕ್ ಫಟ್ಕಿರೊ ಆರೋಪ್ ಜಾವ್ನಾಸಾ. ಅಲ್ಪ ಸಂಖ್ಯಾತಾಂತ್ ಧೊಸ್ಚೆಂ ಆನಿ ಭೆಷ್ಟಾಂವ್ಚೆಂ ಫಕತ್ ಮನ್ಶಾ ಸಮಾಜೆಕ್ ಸೊಭಾಯಿ ದಿತಾ. ಪುಣ್ ರಾನಾಚಾ ಸಂಸ್ರತೆಕ್ ಆನಿ ಪರಂಪಾರಾಕ್ ಹೆಂ ಕಳಂಕ್ ಜಾವ್ನಾಸಾ. ಗೀದಾಂಚೆಂ ಆತಂಕ್‍ವಾದಿ ಧೋರಣ್ ಖಂಡನ್ ಕರಿಜಾಯಿ ಆನಿ ಫಾವೊತಿ ಸಜಾ ದೀಜಾಯಿ.'
ಸಾಮಾನ್ಯ್ ಪರ್ಜಾ, ಮಧ್ಯಮಾ ತರ್ಫೆನ್ ಪಾರ್ವೆ, ಪ್ರಾಂತ್ಯ್ ಸರ್ಕಾರಾಚೆ ಬೊಲ್ಪೆ, ಸರ್ಕಾರಾಚೆ ಪೋಲಿಸ್ ಕೊಲೆ, ವಿರೋಧ್ ಪಾಡ್ತಿಚೆ ಮಾಂಕೊಡ್, ಕೇಂದ್ರ್ ಸರ್ಕಾರಾಚೆಂ ಶಿಂವ್, ಕೇಂದ್ರ್ ರಕ್ಷಣ್ ಖಾತ್ಯಾಚೆ ವಾಗ್, ಸೊಧ್ನಾಂ ಸಮಿತಿಚಿ ರಾನ್ ಕೊಂಬಿ ಆನಿ ಸೊಸ್ಯಾ ಮಧೆಂ ತರ್ಕ್ ಆನಿ ಉತ್ರಾಂಚೆ ಫಾರ್ ಚಲೊನ್ ರಾವ್ಲೆ ತರೀ ಗೀದಾಂಚಾ ಕ್ರೂರ್ ಕರ್ನೆಕ್ ಫಾವೊತಿ ಸಜಾ ಲಾಭ್ಲಿನಾ. ಕ್ರಮೇಣ್ ಮೈನಾ ಆನಿ ಕೊಗುಳೆಂಕ್ ವಾಸ್ತವಿಕತೆಚೊ ಸ್ಪರ್ಶ್ ಜಾಲೊ..... ರಾಜಕೀಯಿ ವೇದಿಚೆರ್ ಅಸಲ್ಯಾ ಘಡಿತಾಂಕ್ ರಂಗ್ ದಿಂವ್ಚೆಂ ಸರ್ವ್ ಸಾಮಾನ್ಯ್. ಆಯ್ಕೊಂಕ್ ಮೆಳ್ಚೊ ಹುಸ್ಕೊ ಕೃತಕ್. ಘಡಿತಾಚೊ ಉಮಾಳೊ ಹುನೊನಿ ಆಸ್ತಾ ಪರ್ಯಾಂತ್ ಬೊಬಾಟ್. ಉಪ್ರಾಂತ್ ಸರ್ವ್ ಥಂಡ್. ನವಿಂ ಘಟನಾಂ ಘಡ್ತಾನಾ ಆದ್ಲಿಂ ಘಟನಾಂ ಮಾಜ್ವೊನ್ ವೆತಾತ್. ಅಪ್ರಾಧಿ ನಿಸ್ರೊನ್ ಹಾಸ್ತಾತ್. ವೇಳಾ ಸಂಗಿಂ ಸತಾಂ ಆನಿ ಖತಾಂ ಸರ್ವ್ ಲಿಪೊನ್ ಮಾಜ್ವಾತಾತ್. ಅನೀತೆಕ್ ಬಲಿ ಜಾಲ್ಲ್ಯಾಕ್ ನೀತ್ ದೀವ್ನ್ ಅಪ್ರಾಧ್ಯಾಕ್ ತುರಂತ್ ಸಜಾ ದಿಂವ್ಚಿ ಸಕತ್ ಹ್ಯಾ ಕಾನೂನಾಕ್ ನಾ. ಥೊಡ್ಯಾ ತೇಂಪಾನ್ ಲೊಕಪ್ಪಾಂತ್ ಆಸ್ಚೆ ಗೀದ್ ಸ್ವತಂತ್ರ್ ಜಾವ್ನ್ ಆನ್ಯೇಕಾ ಆಕ್ರಮಣಾಚಿ ತಯಾರಾಯಿ ಕರ್ತೆಲೆ ಆನಿ ರಾಜಕೀಯಿ ಶೆತಾಂತ್ ಅಪ್ಲಿ ಬುನ್ಯಾದ್ ಘಟ್ ಕರುಂಕ್ ಪೆಚಾಡ್ತೆಲೆ.
ವೇದನಾಚಿ ತೀವ್ರತಾ ಫಕತ್ ಬಲಿ ಜಾಲ್ಲ್ಯಾಕ್ ಕಳಿತ್. ರೊವಣೆಚಿ ರಾನ್ ಕೊಂಬಿಯೆಚಾ ಪಿಲಾಂಕ್ ಗೀದಾಂನಿ ಏಕಾ ದೀಸಾ ಆಕ್ರಮಣ್ ಕೆಲೆಂ ತರ್ ತಿಕಾ ದೂಕಿಚಿ ದಾವ್ ಲಾಗ್ತೆಲಿ. ತವಳ್ ಪರ್ಯಾಂತ್ ತಿ ರಾಜಕೀಯಾಂತ್ ಕುತಂತ್ರಿ ಜಾವ್ನ್ ಉರ್ತೆಲಿ ಆನಿ ಅಪ್ಲೆಂ ಕುಡ್ಡೆಪಣ್ ಸಾಂಬಾಳ್ತೆಲಿ.
ಸಂವಿಧಾನ್ ಆನಿ ಕಾನೂನ್ ಕಶೆಂಯಿ ಆಸೊಂ. ಹೆಂ ಜಾವ್ನಾಸಾ ರಾನ್. ಪ್ರಬಲಾಂ ಥಾವ್ನ್ ದುರ್ಬಲಾಂಚಿ ಹಿಂಸಾ ಆನಿ ಶೋಷಣ್ ಜಾವ್ನಾಸಾ ರಾನ್ವಾಟಿ ನೀತ್. ಸಾಧ್ಯ್ ತರ್ ಬಳ್ವಂತ್ ಜಾವ್ನ್ ಸಂರಕ್ಷಣ್ ಕರುಂಕ್ ಶಿಕಾಜಾಯಿ ಶಿವಾಯಿ ಬಲಿ ಜಾವ್ನ್ ರಡೊನ್ ನೀತ್ ಮಾಗೊನ್ ಫಾಯ್ದೊ ನಾ..... ಆಶೆಂ ಚಿಂತುನ್ ಮೈನಾ ಆನಿ ಕೊಗುಳೆಂನಿ ಅಪ್ಲೆಂ ಜಿಣ್ಯೆ ಪಯ್ಣ್ ಮುಕಾರ್ಸಿಲೆಂ. ಆಶೆಂ ತಿಂ ರಾನಾಂತ್ ಜಿಯೆಂವ್ಕ್ ಶಿಕ್ಲಿಂ.
Tags:
Stan Ageira, Home Stay Attack, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/24/2020 ಉದೆಂತಿಚೆಂ ನೆಕೆತ್ರ್...
-
11/28/2020 ಚೂಕಿ ತಿದ್ವಿನಾ ಜಾಲ್ಯಾರ್!...
-
11/4/2020 ಅನಿವಾಸಿ ರಾಯ್...
-
10/23/2020 ಘಾಣ್...
-
-
9/13/2020 ರಾತ್ ಪಾಳಿ...
-
6/18/2018 ವೆಚಿಕ್ ಪುತಾಚೊ ದಾಟ್ಟು...
-
11/12/2017 ನ್ಯೂ ಐನ್‌ಸ್ಟೀನ್...
-
9/7/2017 ಮ್ಹಜ್ಯಾ ಮೊಗಾಚೆಂ ಮೆಲ್ಬಾ...
-
8/29/2017 ಕೊಲ್‍ಗರ್ಲ್...
-
12/18/2021 ಕೆನಡಾಂತ್ 'ನವೊ ಭರ್ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.