From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಆಸ್ಲ್ಲೊ ಎಕ್ಲೊ ಝುಜಾರಿ....
Saturday, April 29, 2017ಬರಯ್ಣಾರಾ ವಿಶಿಂ ಜಾಣಾ ಜಾ...
1784 -1785 ಇಸ್ವಿ. ದೊನ್ಶ್ಯಾಂ ವಯ್ರ್ ವರ್ಸಾಂ ಆದ್ಲಿ ಗಜಾಲ್. ಮೈಸೂರ್ ಪ್ರಾಂತ್ಯ್ ಬಳಿಷ್ಠ್ ಜಾವ್ನ್, ಬ್ರಿಟಿಷಾಂ ವಿರೋಧ್ ತವಳ್ ತವಳ್ ಝಜಾಂ ಜಾಂವ್ಚೊ ವೇಳ್. ಮೈಸೂರಾಂತ್ ಹೈದಾರಾಲಿಚೊ ಪೂತ್ ಟಿಪ್ಪು ಅಧಿಕಾರಾಕ್ ಯೇವ್ನ್ ದರ್ಬಾರ್ ಚಲಂವ್ಚೊ ಕಾಳ್. ಜಾಯ್ತಿಂ ನವಿಂ ನವಿಂ ಕಾನೂನ್ ರಚುನ್ ಟಿಪ್ಪುನ್ ಆಪ್ಲ್ಯಾ ರಾಜ್ಯಾಂತ್ ಬದ್ಲಾವಣ್ ಹಾಡ್ಲಿ, ಕ್ರೀಸ್ತಾಂವಾಂಕ್ ತಾಣೆ ದಗ್ಧಿಲೆಂ. 1784 ಇಸ್ವೆಂತ್ ತಾಣೆಂ ಅಧಿಕಾರಾಕ್ ಆಯಿಲ್ಲೆಂಚ್ ಕ್ರೀಸ್ತಾಂವಾಂ ವಿರೋಧ್ ಚೀಟ್ ವಾಚ್ಲಿ. ಕ್ರೀಸ್ತಾಚ್ಯಾ ತತ್ತ್ವಾಂ ವಿರೋಧ್ ತೊ ಗೆಲೊ. ಇಗರ್ಜೆಚಿಂ ಬಾಂಧ್ಪಾಂ ತಾಣೆ ಫುಟಯ್ಲಿಂ. ಜಾಯ್ತ್ಯಾ ಕ್ರೀಸ್ತೀ ಲೊಕಾಕ್ ತಾಣೆ ಬಲಾತ್ಕಾರಾನ್ ಇಸ್ಲಾಮ್ ಧರ್ಮಾಕ್ ಕನ್ವಡ್ತೆರ್ ಕೆಲೆಂ. ಸಬಾರ್ ಕ್ರೀಸ್ತೀ ಮುಕೆಲ್ಯಾಂಚೆ ಜೀವ್ ತಾಣೆ ಕಾಡ್ಲೆ. ಮೈಸೂರ್ ನಹಿಂ ಆಸ್ತಾಂ ಕೊಂಕಣ್ ಕರಾವಳೆಂತ್ ಟಿಪ್ಪುಚ್ಯಾ ಶಿಪಾಯಾಂನಿ ದಾಡ್ ಘಾಲಿ. ಶಾಂತಿನ್ ಆನಿ ಸಮಾಧಾನೆನ್ ಜಿಯೆವ್ನ್ ಆಸ್ಲ್ಲ್ಯಾ ಕ್ರೀಸ್ತಾಂವ್ ಲೊಕಾಂಚೆರ್ ಅಂಧ್ಕಾರ್ ಫಾಂಕ್ಲೊ. ಇಗರ್ಜ್ಯೊ ಧರ್ಣಿಕ್ ಸಮಾ ಕರುನ್, ಸರ್ವ್ ಚಾರಿತ್ರಿಕ್ ಧಾಕ್ಲೆ ನಾಸ್ ಕರುನ್, 40,000 - 60,000 ಹಜಾರ್ ಕ್ರೀಸ್ತಾಂವ್ ಲೊಕಾಂಕ್ ಕೈದ್ ಕರ್ನ್ ಮೈಸೂರಾಕ್ ತೆ ವ್ಹರ್ನ್ ಗೆಲೆ. ವಾಟೆರ್ ವೆತಾಂ ವೆತಾಂ ಶಿಪಾಯಾಂಚ್ಯಾ ಮಾರಾಂಕ್ ಆನಿ ದಗ್ದೊಣೆಕ್ 20,000 ಲೊಕಾಂನಿ ಪ್ರಾಣ್ ಸೊಡ್ಲೊ. 1799 ಇಸ್ವೆಂತ್ ಬ್ರೀಟಿಷಾಂ ಸಂಗಿಂ ಝಜ್ತಾನಾ ಟಿಪ್ಪು ಮರಣ್ ಪಾವ್ಲೊ. ಅಶೆಂ ಬಂಧಡೆಂತ್ ಆಸ್ಲ್ಲ್ಯಾ ಕ್ರೀಸ್ತಾಂವಾಂಕ್ ಸುಟ್ಕಾ ಮೆಳ್ಳಿ!!
ಟಿಪ್ಪುಚ್ಯಾ ಶಿಪಾಯಾಂನಿ ಕೊಡ್ಯಾಳಾಕ್ ಯೇವ್ನ್ ದಾಡ್ ಘಾಲ್ನ್ ಲುಟ್‌ಲ್ಲ್ಯೊ ಇಗರ್ಜ್ಯೊ ಜಾಯ್ತ್ಯೊ. ಟಿಪ್ಪುಚ್ಯಾ ಶಿಪಾಯಾಂ ವಿರೋಧ್ ಝಜ್ ಮಾಂಡ್ಚೆಂ ತಿತ್ಲೆಂ ಸಲೀಸಾಯೆಚೆಂ ಕಾಮ್ ನಹಿಂ ಆಸ್‌ಲ್ಲೆಂ. ಶಾಂತಿನ್ ಜಿಯೆವ್ನ್ ಆಸ್ಲ್ಲ್ಯಾ ಸಾದ್ಯಾ ಲೊಕಾನಿಂ, ಹಾತೆರಾಂ ನಾಸ್ತಾಂ ಝಜ್ಚೆಂ ತರೀ ಕಶೆಂ? ಹಾತಿಂ ನಾಜೂಕ್ ತಲ್ವಾರಿ ಆನಿ ಭಾಲಿಯೊ ಘೇವ್ನ್ ಆಯಿಲ್ಲ್ಯಾ ಶಿಪಾಯಾಂಕ್ ಸಕ್ಕಡ್ ಸಲ್ವಲ್ಲೆ. ಥೊಡೆ ಇಗರ್ಜ್ಯೊ ಕ್ರೀಸ್ತಾಂವಾಂ ಸಂಗಿಂ ಅಕ್ರೀಸ್ತಾಂವಾನಿಂ ಹಾತ್ ಮೆಳೊನ್ ಉರಯಿಲ್ಲ್ಯೊ ಹಾಂತುನ್ ಮಂಗ್ಳುರ್ ದಿಯೆಸೆಜಿಂತ್ಲಿ, ಕಿನ್ನಿಗೋಳಿ ವಾರಾಡ್ಯಾಂತ್ ಪಳೆಂವ್ಕ್ ಮೆಳ್ಚಿ ದಾಮಸ್ ಕಟ್ಟೆಚಿ ರೆಮೆದ್ ಸಾಯ್ಬಿಣಿಚಿ ಇಗರ್ಜ್ ಏಕ್. ಪೂಣ್ ಇತರ್ ಜಾಯ್ತ್ಯೊ ಇಗರ್ಜ್ಯೊ ಬಲಿ ಜಾಲ್ಲ್ಯೊ. ಹ್ಯಾ ವೆಳಾರ್ ಆಪುಣ್ ಮೆಲ್ಯಾರೀ ವ್ಹಡ್ ನಾ, ಪೂಣ್ ಕ್ರೀಸ್ತಾ ಖಾತಿರ್ ಝಜ್ತಾಂ ಮ್ಹಣ್ ಟಿಪ್ಪುಚ್ಯಾ ಶಿಪಾಯಾಂ ವಿರೋಧ್ ಝಜ್ ಮಾಂಡ್‌ಲ್ಲೊ ಧೈರಾಧೀಕ್ ಮನಿಸ್ ಲೂವಿಸ್ ಲುದ್ರಿಗ್ಸ್. ಲುವಿಸ್ ಲುದ್ರಿಗ್ಸ್ ಹಾಂಚೆಂ ನಾಂವ್ ಇತಿಹಾಸಾಂತ್ ಖಂಯ್ಸರ್'ಯೀ ವಾಚುಂಕ್ ಮೆಳಾನಾ. ಚರಿತ್ರೆಚ್ಯಾ ಪಾನಾಂನಿ ತಾಣೆ ಮಾಂಡ್‍ಲ್ಲೆಂ ಝುಜ್ ನೋಂದಾಯಿತ್ ಜಾಂವ್ಕ್ ನಾ. ತಾಕಾ ಕಾರಣಾಂಯೀ ಆಸಾತ್. ತುಮ್ಕಾಂ ಮುಕಾರ್ ವಾಚ್ತಾನಾ, ನಿಮಾಣೆಂ ತೆಂ ಸಮ್ಜತೆಲೆಂ. ಲೂವಿಸ್ ಲುದ್ರಿಗ್ಸ್ ಹಾಂಚೆಂ ನಾಂವ್ ಆಜ್ ಫಕತ್ ಥೊಡ್ಯಾಂಕ್ ವಳ್ಕಿಂಚೆಂ, ತರ್ ಹಾಕಾ ಕಾರಣ್. ತಾಣೆಂ ಝಜ್ತಾನಾ ದೊಳ್ಯಾಂನಿಂ ದೆಕ್‌ಲ್ಲೊ ತಾಚೊ ನಾತು.
ಲೂವಿಸ್ ಲುದ್ರಿಗ್ಸ್, ಫಿರ್ಗಜೆಂತ್ ತೊ ಮಾನಾಚೊ ವ್ಯಕ್ತಿ. ಕೃಷೆಚ್ಯಾ ವಾವ್ರಾಂತ್ ತೊ ಪ್ರವೀಣ್. ಇಸ್ಕೊಲಾಚೆಂ ಶಿಕಾಪ್ ತಾಕಾ ಮೆಳೊಂಕ್ ನಾ ತರೀ ಬುದ್ವಂತ್ ಆನಿ ಶಾಣೊ. ವಾಡ್ಯಾಂತ್ ಗುರ್ಕಾರ್ ಮಾತ್ ನ್ಹಂಯ್ ಇಗರ್ಜೆಚ್ಯಾ ಸರ್ವ್ ಕಾರ್ಯಾಂತ್ ತಾಚೊ ಪಾತ್ರ್ ಸಕ್ರೀಯ್. ತಾಜೆಂ ಹಾಜರ್ಪಣ್ ನಾಸ್ತಾಂ ಜುಂತ್ ಜಾಯ್ನಾತ್ಲೆಂ. ಗಾಂವಾರ್ ಪಂಡಿತ್ ಜಾವ್ನಾಸ್‌ಲ್ಲ್ಯಾ ಆಪ್ಲ್ಯಾ ಬಾಪಯ್ಕ್, ತಾಣೆಂಯ್ ಸಾಂಗಾತ್ ದಿಲ್ಲೊ ಜಾಲ್ಲ್ಯಾನ್, ಬಾಪಾಯ್ಚ್ಯಾ ಮರಣಾ ನಂತರ್ ಶೆಳಿಚ್ಯಾ ಪಿಡೆಕ್, ತಾಪಾಕ್, ಕಳ್ಕಾಯೆಕ್, ದಂತಾಂಚ್ಯಾ ಉಪಾದ್ರಾಂಕ್, ಮುಳ್ವಾದೆಕ್, ವೀಕ್ ವೊಂಕೊಂವ್ಕ್... ಅಶೆಂ ಥೊಡಿಂ ಅಲ್ಯಾ ಪಾಲ್ಯಾಚಿಂ ವೊಕ್ತಾಂಯೀ ತೊ ದಿತಾಲೊ. ಅಕ್ರೀಸ್ತಾಂವಾಕೀ ತಾಚಿ ಸೆವಾ ಸದಾಂಚ್ ತಯಾರ್ ಆಸ್‌ಲ್ಲ್ಯಾನ್ ಗಾಂವಾರ್ ತಾಕಾ ವರ್ತೊ ಮಾನ್. ಅಮಾಲ್ ಪಿಯೊವ್ಣ್ಯಾಚೆಂ ಪಿಶೆಂ ತಾಕಾ ನಾತ್‌ಲ್ಲೆಂ ತರೀ, ಥಂಡಿಯೆಚ್ಯಾ ದಿಸಾಂನಿ ತಳ್ಟ್ಯಾ ಮುಳಾಂತ್, ಅಪ್ರೂಪ್ ಸುರ್ ಪಿಯೆಂವ್ಚಿ ಪಿಸಾಯ್ ತಾಕಾ ಆಸ್‌ಲ್ಲಿ. ಕೃಷಿ ಮಾತ್ ನ್ಹಂಯ್ ಆಸ್ತಾಂ ಶಿಕಾರೆಂತ್ ತಾಚೊ ಉಂಚ್ಲೊ ಹಾತ್. ಕೊಂಬ್ಯಾ ಕಾಟ್ ತಾಕಾ ಖುಶಿ ದಿಂವ್ಚೊ ಖೆಳ್. ಹೆರ್ ಕಸಲ್ಯಾಂತ್‌ ತಾಜೆಂ ಮೆತೆರ್ಪಣ್ ನಾತ್‌ಲ್ಲೆಂ. ಅಪುರ್ಬಾಯೆನ್ ಕುಟ್ಮಾಕ್ ಸಾಂಬಾಳ್ನ್ ಆಯಿಲ್ಲೊ , ದೆಖಿವಂತ್ ಮನಿಸ್ ತೊ.
ಆಪ್ಲ್ಯಾ ಲಾನ್ಪಣಾರ್ ಥಾವ್ನ್ ಗಾದ್ಯಾಂತ್ ಆನಿ ಗುಡ್ಯಾರ್ ಜಾಲ್ಲ್ಯೊ ಫಳ್ ವಸ್ತು ಖಾವ್ನ್, ವೆಳಾ-ಕಾಳಾಕ್ ಸರಿ ಜಾವ್ನ್ ಆಪ್ಲ್ಯಾ ಪಂಡಿತ್ ಬಾಪಯ್ನ್ ವಾಟ್‌ಲ್ಲೆ ಕೊಡು ಕಸಾಯ್ ಪಿಯೆವ್ನ್ ಕುಡಿಂತ್ ಸಕತ್ ತಾಣೆ ಆರಾಯಿಲ್ಲಿ. ಕಾಜಾರ್ ಜಾವ್ನ್, ಭುರ್ಗ್ಯಾಂಕ್ ಜನಮ್ ದೀವ್ನ್, ತೇಂಪ್ ಉತ್ರಾಲ್ಲೊ. ಪಾವೊಣ್ಶ್ಯಾಂ ವರ್ಸಾಂಚ್ಯಾ ಹುಂಬ್ರಾರ್ ಪಾವ್‌ಲ್ಲ್ಯಾ ಲೂವಿಸ್ ಲುದ್ರಿಗ್ಸಾಚ್ಯಾ ಹಾರ್ದ್ಯಾಂತ್ಲಿ ಊಬ್ ಅಜೂನ್ ಉಣಿ ಜಾಂವ್ಕ್ ನಾತ್‌ಲ್ಲಿ. ಅಕ್ರೀಸ್ತಾಂವಾಕ್ ಕೆದ್ನಾಂಯ್ ತೊ ಸೊಡ್ನ್ ಘಾಲಿನಾತ್‌ಲ್ಲೊ. ಸಬಾರ್ ಕುಟ್ಮಾಂಚಿ ಝಗ್ಡಿಂ, ಜಾಗ್ಯಾಚ್ಯಾ ಲಫ್ಡೆ, ವಾಟೆ ಖಾತಿರ್ ಜಾಂವ್ಚಿ ಲಡಾಯ್ ತಾಣೆಂಚ್ ಮುಕಾರ್ ರಾವುನ್ ಸಮಾ ಕೆಲ್ಲೆಂ ಜಾಲ್ಲ್ಯಾನ್ 'ಲೂಯಿಸಾಮ್' ಮ್ಹಣ್ ತಾಕಾ ಸಕ್ಕಡ್ ಮೊಗಾನ್ ವಳ್ಕತೆಲೆ ಪೂಣ್ ಜಾಯ್ತೆ ಮೊಸ್ರಾನ್ ಜಳ್ತೆಲೆ. ಪ್ರಾಯ್ ತಾಕಾ ಜಾಲ್ಲಿ ತರೀ ಎಕಾ ಸಾಂಜೆರ್ ಕೊಂಬ್ಯಾ ಕಾಟಾಕ್ ತೊ ಪಾವ್‌ಲ್ಲೊ. ಥಂಯ್ಸರ್ ಜಾಲ್ಲ್ಯಾ ಮನಾಸ್ತಾಪಾಕ್ ತಾಣೆಂಚ್ ಮುಕಾರ್ ಸರೊನ್ ಅಂತ್ಯ್ ದಿಲ್ಲೊ. ಪೂಣ್ ದಾಟ್ ಕಾಳೊಕಾಂತ್ ಘರಾ ವೆತಾನಾ ಚಾರ್ ಜಣಾಂನಿ ತೊಣ್ಕೆ ಘೆವುನ್ ತಾಜೆರ್ ಹಲ್ಲೊ ಕೆಲ್ಲೊ ತರೀ ಚವ್ಗಾಂಯ್ಕೀ ಆಡ್ ಘಾಲುನ್ ಘರಾ ವಚುನ್ ಶೆಳೆಂ ಉದಕ್ ಮಾತ್ಯಾರ್ ವೊತುನ್ ತೊ ನೀಸ್ ಪಿಯೆಲ್ಲೊ. ಲೂಯಿಸಮಾಚೆಂ ಹೆಂ ಧಯ್ರ್ ತಾಚ್ಯಾ ಭುರ್ಗ್ಯಾಂ ಥಯ್ ತಾಣೆಂ ದೆಕುಂಕ್ ನಾತ್‌ಲ್ಲೆಂ ತರೀ ತಾಚ್ಯಾ ಆಟ್ ವರ್ಸಾಂಚ್ಯಾ ನಾತ್ವಾನ್, ಸೆಜಾರ್ಚ್ಯಾ ಬಾರಾ ವರ್ಸಾಂಚ್ಯಾ ಚೆಡ್ಯಾಕ್ ಗಾದ್ಯಾಂತ್ ಆಸ್ಲ್ಲ್ಯಾ ದಾಟ್ ಕೆದಾಂತ್ ಮುರ್ಕೊನ್ ಧರ್ತಾನಾ ಆನಿ ಪಿಯೆವ್ನ್ ರಾತಿಂ ಘರಾ ಆಯಿಲ್ಲ್ಯಾ ಆಪ್ಲ್ಯಾ ಬಾಪಯ್ಕ್ ಬಾಗ್ಲಾರ್‌ಚ್ ಸವಾಲ್ ಉಡಯಿಲ್ಲೆಂ ದೆಕ್‌ಲ್ಲ್ಯಾ ಲೂಯಿಸಾಮಾನ್ ಮಿಶಿಯೊ ವೊಳಾಯಿಲ್ಲ್ಯೊ.
ಇಗರ್ಜೆಚ್ಯಾ ಜಾಯ್ತ್ಯಾ ಕಾರ‍್ಯಾಂನಿ ವಾಂಟೆಲಿ ಜಾಂವ್ಚ್ಯಾ ಲೂವಿಸಮಾಕ್ ಟಿಪ್ಪು ವಿಶಿಂ ಆನಿ ಕೊಂಕಣ್ ಕರಾವಳೆರ್ ಜಾಂವ್ಚ್ಯಾ ಆಕ್ರಮಣಾ ವಿಶಿಂ ಖಬರ್ ಮೆಳ್‌ಲ್ಲಿ. ಫಿರ್ಗಜ್ ಲೊಕಾಂಕ್ ಸಂಗಿಂ ಘೆವ್ನ್ ಸಲಹಾ ದಿಲ್ಲಿ ತರೀ ಟಿಪ್ಪುಚ್ಯಾ ಬಳಾ ವಿರೋಧ್ ವೆಚೆಂ ಸುಲಾಭಾಯೆಚೆಂ ನಹಿಂ ಮ್ಹಣ್ ತಾಕಾಯೀ ಕಳಿತ್ ಆಸ್‌ಲ್ಲೆಂ. ಲೂಯಿಸಾಮಾಚ್ಯಾ ಮತಿಂತ್ ಚಿಂತ್ನಾಂ ಧೊಸುಂಕ್ ಲಾಗ್‌ಲ್ಲಿಂ. ಪಾವೊಣ್ಶ್ಯಾಂಚಿ ಪ್ರಾಯ್. ಆಪ್ಣಾಚೆಂಚ್ ಮ್ಹಳ್ಳೆಂ ಸೈನ್ಯ್ ಬಾಂಧುನ್ ಝಜ್ಚೆಂ ಸ್ವಪಾಣ್ ತಾಕಾ ಆಸ್‌ಲ್ಲೆಂ ತರ್‌ಯೀ ಪ್ರಾಯೆಚಿ ಅಡ್ಕಳ್ ತಾಕಾ ಆಸ್‌ಲ್ಲಿ. ತವಳ್ ತವಳ್ ಆಪ್ಲ್ಯಾ ಮೊಗಾಚ್ಯಾ ನಾತ್ವಾಕ್ ಬಗ್ಲೆಕ್ ಬಸವ್ನ್ ತೊ ಪರ್ನ್ಯಾ ಸೊಲ್ಲ್ಯಾಂತ್ಲ್ಯೊ, ತೋಂಡ್ಪಾಶಿಂ ಥಾವ್ನ್ ಆಯಿಲ್ಲ್ಯೊ ಕಾಣಿಯೊ ಸಾಂಗೊನ್ ಧೈಯ್ರ್ ಭರ್ತಾಲೊ. ಪೂಣ್ ತ್ಯೆ ದೀಸ್ ರಾತಿಂ ತಾಕಾ ನೀದ್ ಆಯ್ಲಿ ನಾ. ಪರತ್ ಪರತ್ ಇಗರ್ಜೆ ಲಾಗಿಂ ಎಕಾ ವ್ಯಕ್ತಿನ್. ಟಿಪ್ಪುಚ್ಯಾ ಅಧಿಕಾರಾವಿಶಿಂ, ತಾಚ್ಯಾ ಸೈನಾ ವಿಶಿಂ ಆನಿ ಕ್ರೀಸ್ತಾಂವಾಕ್ ತಾಣೆಂ ದಿಂವ್ಚ್ಯಾ ದಗ್ಧೊವ್ಣೆ ವಿಶಿಂ ದಿಲ್ಲೊ ವಿವರ್, ಪರತ್ ಪರತ್ ತಾಜ್ಯಾ ಕಾನಾರ್ ಆಯ್ಕಾತಶೆಂ ತಾಕಾ ಭೊಗ್ತಲೆಂ. ಮಾಡ್ತಿರ್ ಮೆಲ್ಲ್ಯಾ ಜಾಯ್ತ್ಯಾ ಸಾಂತಾಚ್ಯೊ ಕಾಣಿಯೊ ಆಯ್ಕಲ್ಲ್ಯಾ ತಾಣೆಂ ಆಪುಣ್ ಮೆಲ್ಯಾರೀ ವ್ಹಡ್ ನಹಿಂ, ಕ್ರೀಸ್ತಾ ಖಾತಿರ್ ಮೊರ್ತಾಂ ಮ್ಹಣ್ ನಿಚೆವ್ ಕೆಲ್ಲೊ.
ದುಸ್ರೆ ದಿಸಾ ಸಕಾಳ್ ಜಾಲ್ಲೆಂಚ್ ಆಪ್ಲ್ಯಾ ವಾವ್ರಾಕ್ ತೊ ಲಾಗ್‌ಲ್ಲೊ. ದೆಳ್ಯಾಚ್ಯಾ ಸಾತ್ವ್ಯಾ ಖಿಳಿರ್ ಉಬೊ ಜಾವುನ್ ಪಾನಾಂ ಕಾಡ್ಚ್ಯಾ ತಾಚ್ಯಾ ಉಗ್ತ್ಯಾ ಆಂಗಾರ್ ಮಾನ್ ಧಾಂಪುಂಕ್ ಕಾಶ್ಟಿ ಆನಿ ಪೆಂಕ್ಟಾರ್ ತೊಟೆಂ ಉಮ್ಕೊಳ್ತೆಲೆಂ. ಸುರ್ಯಾಚಿಂ ಕೀರ್ಣಾಂ ತೀವ್ರ್ ಜಾವ್ನ್ ಯೆತಾಲಿಂ... ವೊರಾಂ ಸಕಾಳಿಂಚಿಂ ಸಾಡೆ ಆಟ್ ಜಾತಿತ್. ತೊಟೆಂ ಭರ್ತಚ್ ಆಪುಣ್ ಪೆಜೆ ಜೆವ್ಣಾಕ್ ದೆಂವ್ತಲೊ ಮ್ಹಣ್ ನಿರ್ಧಾರ್ ಕರ್ನ್ ಆಸ್ಲ್ಲ್ಯಾ ತಾಕಾ ತಾಚ್ಯಾ ಬಾಪ್ಲ್ಯಾಚ್ಯಾ ಪುತಾನ್ ಉಲೊ ದಿಲೊ. "ಅಳೆರೆ ಲುಯಿಸಾ, ಶಿಪಾಯ್ ಆಮ್ಚ್ಯಾ ಇಗರ್ಜೆಕ್ ಪಾವ್ಲ್ಯಾತ್ ಖಂಯ್..!!!" ಆಪ್ಣಾಚೊ ವ್ಹಡ್ ಭಾವ್ ಇನಾಸಾಚಿ ಬೊಬಾಟ್ ಆಯ್ಕಲ್ಲಿಚ್ ಲೂವಿಸಾಮ್ ಕಾಲು ಬುಲೊ ಜಾಲೊ. ತರೀ ತಾಣೆಂ ವೇಳ್ ಕಾಡ್ಲೊ ನಾ. ಸೈರಣ್ ತಾಣೆಂ ಸಾಂಬಾಳ್ಳೆಂ. ಕುಲ್ಯಾಂ ಮಧ್ಲ್ಯಾನ್ ಲಿಪ್‍ಲ್ಲಿ ಕಾಶ್ಟಿ ತಾಣೆಂ ಅಂರ್ಧಿಲಿ. ಕೊಲ್ವಾಚ್ಯಾ ಪಾಕ್ಯಾಕ್ ಶಿರ್ಕಾಯಿಲ್ಲೊ, ರಾನ್ ದುಕ್ರಾಚ್ಯಾ ಶಿಕಾರೆಕ್ ಮ್ಹಣ್ ತಯಾರ್ ಜಾಲ್ಲೊ ಭಾಲೊ ತಾಣೆ ಘೆತ್ಲೊ ಆನಿ ಲಾಗ್ಸರ್ ಆಸ್ಲ್ಲ್ಯಾ ಇಗರ್ಜೆಕ್ ತೊ ಪಾವ್ಲೊ. ಹೆಂ ಸರ್ವ್ ಪಳೆವ್ನ್ ಆಸ್ಲ್ಲೊ ಲೂಯಿಸಾಮಾಚೊ ನಾತುಯೀ ತಾಚ್ಯಾ ಪಾಟ್ಲ್ಯಾನ್ ಲಿಪುನ್ ಲಿಪುನ್ ಇಗರ್ಜೆ ಬಾಗ್ಲಾರ್ ಪಾವ್ಲೊ ಆನಿ ಎಕಾ ಬೊಲ್ಯಾಚ್ಯಾ ಆಡೊಸಾಕ್ ಲಿಪ್ಲೊ.
ಶಿಪಾಯಾಂನಿ ಎದೊಳ್‌ಚ್ ಇಗರ್ಜೆಚೆರ್ ದಾಡ್ ಘಾಲ್ಲಿ. ಇಗರ್ಜೆ ಲಾಗ್ಸಾರ್ ಆಸ್‌ಲ್ಲ್ಯಾಂನಿ ವಿರೋಧ್ ಕೆಲ್ಲೆಂ ತರೀ ಶಿಪಾಯಾಂನಿ ತಾಂಕಾಂ ಕೈದ್ ಕೆಲ್ಲೆಂ. ಥೊಡ್ಯಾಚೆಂ ಜೀವ್ ಗೆಲ್ಲೆ ತರ್ ಹೆರ್ ರಗ್ತಾಚ್ಯಾ ಕೊಂಡಾಂತ್ ಪಡ್‌ಲ್ಲೆ. ಲುಯಿಸಾಮಾಕ್ ಕಿತೆಂ ಘಡ್ಲಾಂ ತೆಂ ಕಳಿತ್ ಜಾಂವ್ಕ್ ನಾ. ಹಾತಿಂ ಆಸ್ಲ್ಲೊ ಭಾಲೊ ತಾಣೆ ಬಿಜಾಂವ್ಕ್ ಸುರು ಕೆಲ್ಲೊ. ಬೊಲ್ಯಾಂತ್ ರಾವುನ್, ಭಿಯೆವ್ನ್ ತಾಚೊ ನಾತು ಹೆಂ ಸರ್ವ್ ಪಳೆತಾಲೊ. ಅಸಲೆಂ ಘಡಿತ್ ಆಜ್ಯಾನ್ ಸಾಂಗ್ತಾನಾ ತಾಣೆಂ ಆಯ್ಕಾಲ್ಲೆಂ ತರೀ ಆಜ್ ದೊಳ್ಯಾಂ ಮುಕಾರ್ ಘಡೊನ್ ಆಸ್‌ಲ್ಲೆಂ. ಎದೊಳ್‌‌ಚ್ಚ್ ಲುಯಿಸಾಮಾಚ್ಯಾ ಚಲಾಕೆನ್ ಥೊಡೆ ಸೈನಿಕ್ ಧರ್ಣಿಕ್ ಶೆವ್ಟಾಲ್ಲೆ. ಪುಣ್ ಆಪ್ಲ್ಯಾ ಕುಡಿರ್ ಆಸ್‌ಲ್ಲೆ ಏಕ್ ಕಾಶ್ಟಿ ಮಾತ್ ಘೆವ್ನ್ ತೊ ಚಡ್ ವೇಳ್ ಶಿಪಾಯಾಂ ಮುಕಾರ್ ರಾವುಂಕ್ ಸಕ್ಲೊ ನಾ. ಪಾಟ್ಲ್ಯಾನ್ ಥಾವುನ್ ಎಕಾ ಶಿಪಾಯಾನ್ ಲುಯಿಸಾಮಾಚ್ಯಾ ಕುಡಿಭಿತರ್ ಧಾರಿಚಿ ತಲ್ವಾರ್ ತೊಪುನ್ ಜಾಲ್ಲಿ. ಜೆಜು ಕ್ರೀಸ್ತಾಚೆಂ ನಾಂವ್ ತೊಂಡಾರ್ ಘೆವುನ್ ಲುಯಿಸಾಮ್ ಧರ್ಣಿರ್ ಶೆವ್ಟಾಲ್ಲೊ. ಟಿಪ್ಪುಚ್ಯಾ ಶಿಪಾಯಾಂ ವಿರೋಧ್ ಝಜೊನ್ ತಾಣೆಂ ಪ್ರಾಣ್ ಸೊಡ್ಲೊ. ಹೆಂ ದೆಕ್‌ಲ್ಲ್ಯಾ ನಾತ್ವಾಕ್ ಕಿತೆಂ ಕರ್ಚೆಂ ತೆಂ ಸಮ್ಜಲೆಂ ನಾಂ. ಅಂಕಾಂತಾನ್ ಆನಿ ಭಿಯಾನ್ ತಾಣೆ ವ್ಹಡಾ ತಾಳ್ಯಾನ್ ಕಿಂಕ್ರಾಟ್ ಮಾರ್‌ಲ್ಲಿ!!!. ಸಗ್ಳೊಚ್ ತೊ ಘಾಮೆಲ್ಲೊ.
ಲೂಯಿಸಾಮಾಚ್ಯಾ ನಾತ್ವಾಚ್ಯಾ ಬೊಬೆಕ್ ಮಾಕಾ ಜಾಗ್ ಜಾಲ್ಲಿ. ಮಧ್ಯಾನೆ ರಾತಿಚೊ ವೇಳ್. ನಿದೆಚ್ಯಾ ಭ್ರಮೆಂತ್ ಹಾಂವ್ ಆಸ್‌ಲ್ಲೊಂ ತರೀ ಬಗ್ಲೆಚ್ಯಾ ಗಜ್ಡೆರ್ ನಿದ್‌ಲ್ಲ್ಯಾ ಮ್ಹಜ್ಯಾ ಮಿತ್ರಾನ್‌ಚ್ ಬೊಬಾಟ್ ಮಾರ್'ಲ್ಲಿ ಮ್ಹಣೊನ್ ಸಮ್ಜುಂಕ್ ವೇಳ್ ಗೆಲೊ ನಾ. ಗಾಢ್ ನಿದೆಂತ್ ಆಸ್ಲ್ಲೊ ತೊ ಪುರ್ತೊ ಘಾಮೆಲ್ಲೊ ಆನಿ ಪಿಂರ್ಗತಲೊ. ಗಜಾಲ್ ಕಿತೆಂ ಮ್ಹಣ್ ಸಮ್ಜುಂಕ್ ತಾಜೆ ಲಾಗಿಂ ಸರ್ಲೊಂ ಆನಿ ತಾಜ್ಯಾ ಆಂಗಾರ್ ಹಳೂ ಹಾತ್ ದವರ್ಲೊ ತಿತ್ಲೊಚ್ " ಮ್ಹಾಕಾ ಸೊಡ್ಯಾ......!!!!!" ಮ್ಹಣ್ ಆನ್ಯೇಕ್ ಬೊಬಾಟ್ ಜಾಲಿ. ಕುಡಾಂತ್ಲೊ ಆನ್ಯೇಕ್ ಸಾಂಗಾತಿ ಆತಾಂ ಜಾಗೊ ಜಾಲೊ, ಕುಡಾಂತ್ ಉಜ್ವಾಡ್ ಫಾಂಕ್ಲೊ. ಲುಯಿಸಾಮಾಚೊ ನಾತು ಆತಾಂ ಹಳ್ತಾರ್ ಜಾಗೊ ಜಾಲೊ. ಭಂವ್ತಿ ಪಳೆತಾನಾ ಆಪುಣ್ ಟಿಪ್ಪುಚ್ಯಾ ಕಾಳಾರ್ ನಾ, ಬಗಾರ್ ದುಬೈ ವಾವ್ರಾರ್ ಆಸಾಂ, ದೆಖ್‌ಲ್ಲೆಂ ಏಕ್ ಸ್ವಪಾಣ್ ಮ್ಹಣ್ ಸಮ್ಜತಚ್, ಸುಕ್‌ಲ್ಲ್ಯಾ ತಾಳ್ಯಾಕ್ ಶೆಳ್ ದಿವುನ್, ತಾಕಾ ಪಡ್‍ಲ್ಲೆಂ ಸ್ವಪಣ್ ಆಮ್ಕಾಂ ಸಾಂಗೊನ್, ಪರತ್ ನಿದೆಂತ್ ವಿಲೀನ್ ಜಾಲೊ!!
(ಮ್ಹಜ್ಯಾ ಆಪ್ತ್ ಮಿತ್ರಾಚ್ಯಾ ಮತಿಂತ್ಲೆಂ ಏಕ್ ಕಾಲ್ಪನಿಕ್ ಘಡಿತ್, ಕಾಣಿಯೆ ರುಪಾರ್ ಲಿಕ್ಲಾ. )
Tags:
Sannu Niddodi, Story, Tippu Sultan, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/24/2020 ಉದೆಂತಿಚೆಂ ನೆಕೆತ್ರ್...
-
11/28/2020 ಚೂಕಿ ತಿದ್ವಿನಾ ಜಾಲ್ಯಾರ್!...
-
11/4/2020 ಅನಿವಾಸಿ ರಾಯ್...
-
10/23/2020 ಘಾಣ್...
-
-
9/13/2020 ರಾತ್ ಪಾಳಿ...
-
6/18/2018 ವೆಚಿಕ್ ಪುತಾಚೊ ದಾಟ್ಟು...
-
11/12/2017 ನ್ಯೂ ಐನ್‌ಸ್ಟೀನ್...
-
9/7/2017 ಮ್ಹಜ್ಯಾ ಮೊಗಾಚೆಂ ಮೆಲ್ಬಾ...
-
8/29/2017 ಕೊಲ್‍ಗರ್ಲ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
1 Comment/s.
NIce wrtieup with historical background. All the best. Dr Jerry Niddodi