From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ನಶೀಬಾಚೊ ಖೆಳ್
Thursday, October 20, 2016ಬರಯ್ಣಾರಾ ವಿಶಿಂ ಜಾಣಾ ಜಾ...
ನಿಳ್ಶ್ಯಾಸುಟಾಚೆರ್ ಸೊಬ್ಚ್ಯಾ ಮ್ಹಾಕಾ ಇಗರ್ಜೆಚಿಂ ಮೆಟಾಂ ಚಡ್ತಾಸ್ತಾನಾ ಅಘಾತ್ ರಾಕವ್ನ್ ಆಸ್ಲೊ! ಹಾಂವೆಂ ಮೋಗ್ ಕೆಲ್ಲೆಂ ಚೆಡುಂ ಆನಿಂ ಮ್ಹಜೊ ಮೋಗ್, ರೆಸ್ಪೆರಾಕ್ ಧವ್ಯಾ ಅಂಗ್ಲ್ಯಾಂಚೆರ್ ರಾಕೊನ್ ಆಸ್‍ಲ್ಲಿಂ. ಮ್ಹಜೆ ಆಪ್ತ್ ಇಷ್ಟ್ ಅಜಯ್ ಆನಿಂ ವಿಜಯ್ ಕಾಜರ್ ಜಾಂವ್ಕ್ ಮುಕಾರ್ ಸರುಲ್ಲೆ. ಆವಯ್ ಬಾಪಾಯ್ನ್ ಸೊದುನ್ ನಿಶ್ಚಯ್ ಕೆಲ್ಲ್ಯಾ ಚೆಡ್ವಾ೦ ಲಾಗಿಂ ಕಾಜಾರಾಕ್ ದೊಗಾಯ್ನಿ ಸಯ್ ಘಾಲ್ಲಿ. ಹಾಂವ್ ಏಕ್ ಫಾಮದ್ ಕಾರ್ಯೆ೦ ನಿರ್ವಾಹಕ್ ಆನಿಂ ಆಜ್ ಆಸಲೊ ಸಂದರ್ಬ್ ಉದೆಲ್ಲೊಗೀ ಮ್ಹಜ್ಯಾ ಹಾತಾಂನಿ ಶರಲ್ ಆನಿಂ ಕ್ಯಾರೊಲಾಕ್ ಕಾಜರ್ ಕರ್ನ್ ದಿಂವ್ಚೆ - ಖೊಟೆ೦ ನಶೀಬ್! ದೀಸ್ ಅಸೋಯ್ ಆಯಿಲ್ಲೊಗೀ, ಹಾಂವ್ ಇಷ್ಟಾಕ್ ಸಾಂಗ್ಚೆ ಬರಿ ನಾತ್‍ಲ್ಲೆಂ, ಆನಿಂ ಮ್ಹಜ್ಯಾ ಇಷ್ಟಾಕೀ ಕಳಿತ್ ನಾತ್‍ಲ್ಲೆಂಗೀ ತಾಚೆ೦ ಮುಕ್ಲೆ೦ ಪತಿಣ್ ಮ್ಹಜೊ ಆದ್ಲೊ ಮೋಗ್ ಮ್ಹಣೊನ್. ಕಾಳ್ಜಾಂತ್ ಥಾವ್ನ್ ಉಮಾಳ್ಚ್ಯಾ ಮೊಗಾ ಥೆಂಬ್ಯಾಂಕ್ ಮ್ಹಜ್ಯಾ ದೊಳ್ಯಾಂನಿಂ ಜಿರವ್ನ್ ಮುಕಾರ್ ಸರ್ಚೆಂ ಪ್ರಯತ್ನ್ ಕೆಲೆಂ. ಚೆಡ್ಯಾಕ್ ಆನಿಂ ಚೆಡ್ವಾಕ್ ಉಲ್ಲಾಸುನ್ ಹಾಂವೆಂ ಕಾಜಾರಾಚ್ಯಾ ಹೊಲಾಚಿ ವಾಟ್ ಧರ್ಲಿ. ಪುಣ್ ಕ್ಯಾರೊಲಾಚಿ ದೀಷ್ಟ್ ಮ್ಹಜೆರ್ ಖಂಚೊವ್ನ್ ಆಸ್ಲಿ ಆನಿಂ ಮ್ಹಕಾ ಭೊಗ್ತಾಲೆಂಗೀ ಹಾಂವ್ ತಾಚ್ಯಾ ದೊಳ್ಯಾಂನಿ ಬುಡೊನ್ ವೆಚ್ಯಾರ್ ಆಸ್‍ಲ್ಲೊಂ. ನಶೀಬ್ ಅಸಲೊ ಖೆಳ್ ಖೆಳ್ತಾ, ಮ್ಹಳ್ಯಾರ್, ಎಕಾ ದೊಳ್ಯಾಂತ್ ದೂದ್ ಆನಿಂ ಅನ್ಯೇಕಾ ದೊಳ್ಯಾಂತ್ ದೀಕ್ ಘಾಲ್ಲೆ ಬರಿ! ಎವ್ಶಿನ್ ದೂದಾಚಿ ಥಂಡಾಯ್ ಚಾಕೊಂಕೀ ನಾಂ ಆನಿಂ ತೆವ್ಶಿನ್ ದೀಕಾಚಿ ಹುಲೊಪ್ ಸೊಡುಂಕೀ ನಾಂ ಮ್ಹಳ್ಳೆ ಬರಿಂ.
ಹೊಲಾಂತ್ ಭಿತರ್ ಸರೊನ್ ವೊಕಾಲ್ ನವ್ರೊ ಯೇಂವ್ಕ್ ವೇಳ್ ಆಸಾ ಜಾಲ್ಲ್ಯಾನ್, ಹಾಂವ್ ಕಾದೆಲಾರ್ ಬಸ್ಲೊಂ ಆನಿಂ ಮ್ಹಜ್ಯಾ ಚಿಂತ್ಪಾಚ್ಯಾ ದರ್ಯಾಕ್ ನಿಸ್ರಾಲೊಂ. ಮಂಗ್ಳುರಾಂತ್ಲ್ಯಾ ಫಾಮಾದ್ ಕಂಪೆನಿಂತ್ ಮ್ಯಾನೇಜರ್ ಜಾವ್ನ್ ವಾವ್ರ್ ದೀವ್ನ್ ಆಸಾ ಮ್ಹಜೊ ಬಾಪಯ್, ರೋಕಿ ಅಬ್ರೇವ್ ಆನಿಂ ಸಿಟಿ ಭಿತರ್ ಆಸ್ಚ್ಯಾ ವೆನ್‍ಲೋಕ್ ಹಾಸ್ಪಿಟಾಲಾಂತ್ ಹೆಡ್ ನರ್ಸ್ ಜಾವ್ನ್ ವಾವ್ರ್ ದೀವ್ನ್ ಆಸ್‍ಲ್ಲಿ ಮ್ಹಜಿ ಆವಯ್ ಆನಿಂ ತಾಂಚ್ಯಾ ಮೊಗಾಚೊ ಎಕ್ಲೊಚ್ ಪುಸುನ್ ಘಾಲ್ಲೊ ಪೊಳೊ ಹಾಂವ್. ವಯ್ರ್ ದವರ್ಲ್ಯಾರ್ ಕಾವ್ಳೊ ವ್ಹರಿತ್ ಆನಿಂ ಸಕಯ್ಲ್ ದವರ್ಲ್ಯಾರ್ ಮುಯ್ ವ್ಹರಿತ್ ಮ್ಹಳ್ಳೆ ಬರಿಂ ಮ್ಹಕಾ ಬರೆಂ ಶಿಕಾಪ್ ದೀವ್ನ್ ವ್ಹಡ್ ಕೆಲ್ಲೊ.
ಹಾಂ! ವಿಸ್ರಾಲೊಂ, ಮ್ಹಜೆಂ ನಾಂವ್, ರೋಬಿನ್ ಅಬ್ರೇವ್. ಶಹರಾ ಭಿತರ್ ನಾಂವಾಡ್‍ಲ್ಲ್ಯಾ ಕೆ.ಎಂ.ಸಿ. ಆಸ್ಪತ್ರೆಂತ್ ಮೇಲ್ ನರ್ಸ್ ಜಾವ್ನ್ ಐ.ಸಿ.ಯು. ವಿಭಾಗಾಂತ್ ವಾವ್ರ್ ದೀವ್ನ್ ಆಸಾಂ. ಆಜ್ ಕಿತೆಂಗೀ ಉದೆಲ್ಲೊ ಸುರ್ಯೊ ಇಲ್ಲೊ ಚಡ್ ಪ್ರಕಾಸ್ ಭರಿತ್ ಜಾವ್ನ್ ಮ್ಹಾಕಾಚ್ ಪಳೆವ್ನ್ ಹಾಸ್ತಾ ತಸೊ ದಿಸ್ತಾಲೊ. ವ್ಹಯ್ ಆಜ್ ನಿಜಾಕೀ ಮ್ಹಜ್ಯಾ ಜಿವಿತಾಚ್ಯಾ ಸಂತೊಸಾಚೊ ದೀಸ್, ಆಸ್ಪತ್ರೆಕ್ ನವಿಂ ದೊಗಾಂ ನರ್ಸಾಂ ಭರ್ತಿ ಜಾಲ್ಲಿಂ. ತಾಂಚೆಂ ನಾಂವ್ ಶರಲ್ ಆನಿಂ ಕ್ಯಾರಲ್. ವ್ಹಯ್ ಶರಲಾಕ್ ಪಳೆವ್ನ್ ಮ್ಹಜೆಂ ಕಾಳಿಜ್ ವಾರ್ಯಾರ್ ಉಬೊಂಕ್ ಲಾಗ್ಲೆಂ ಆನಿಂ ಹಾಂವ್ ಮ್ಹಾಕಾಚ್ ವಿಸ್ರೊನ್ ಗೆಲ್ಲೊ೦. ತಾಕಾಚ್ ಕಳಾನಾಸ್ತಾನಾ ಹಾಂವೆಂ ಮ್ಹಾಕಾಚ್ ತಾಕಾ ಒಪುನ್ ದೀವ್ನ್ ಮೊಗಾರ್ ಪಡ್ಲೊಂ ಆನಿಂ ತಾಚೆಂ ಭಯ್ಣ್ ಮ್ಹಳ್ಯಾರ್ ಜವ್ಳ್ಯಾಂತ್ಲೆಂ ಅನ್ಯೇಕ್ಲೆಂ ಮ್ಹಜಿ ಸೊಭಾಯ್, ಉಲೊವ್ಣೆಂ ಆನಿಂ ಜೀವ್ ಪಳೆವ್ನ್ ಪಿಶ್ಯಾರ್ ಪಡ್‍ಲ್ಲೆಂ. ಪುಣ್ ಮ್ಹಕಾ ಶರಲಾಚೆರ್ ಮೋಗ್ ಜಾಲ್ಲೊ ಆತಾಂ ಹಾಂವ್ ಕಾತ್ರಿಂತ್ ಶಿರ್ಕಾಲ್ಲೊಂ.
ಸಗ್ಳೆಂ ಹಾಸ್ಪಿಟಲ್ ಮ್ಯಾನಿಪ್ಯಾಸ್ಟ್ ಸಂಭ್ರಮ್ ಚಲವ್ನ್ ಆಸ್‍ಲ್ಲೆಂ ಆನಿಂ ಹಾಂವ್ ಏಕ್ ಮೊಗಾ ಪತ್ರ್ ಬರವ್ನ್ ಮ್ಹಜೆ ಇಷ್ಟಿಣ್ ಅನುಶಾಚ್ಯಾ ಹಾತಿಂ ದೀವ್ನ್ ಸಾಂಗ್ಲೆಂ, 'ಹೆಂ ಕಾಗತ್ ಶರಲಾಕ್ ದಿ ಆನಿಂ ಆತಾಂಚ್ ವಾಚುಂಕ್ ಸಾಂಗ್' ಮ್ಹಳೆಂ. ತಾಣೆಂ ತೆಂ ಕಾಗತ್ ವ್ಹರ್ನ್ ಶರಲ್ ಮೆಳೊವ್ನಾ ಜಾಲ್ಲ್ಯಾನ್ ಕ್ಯಾರಲಾಚ್ಯಾ ಹಾತಿಂ ದಿಲೆಂ ಆನಿಂ ತಿಂ ದೊಗಾಂಯ್ ಪಳೆಂವ್ಕ್ ಎಕಾಚ್ ಸುರುಪಾಯೆಚಿಂ ದಿಸ್ತಾಲಿಂ. ಶರಲಾಚ್ಯಾ ಗೊಮ್ಟೆರ್ ಆಸ್‍ಲ್ಲ್ಯಾ ತ್ಯಾ ಕಾಳ್ಯಾ ತಿಳಾ ವರ್ವಿಂ ತಾಚಿ ವಳಕ್ ಧರುಂಕ್ ಸಕ್ತಾಲಿಂ ಸರ್ವಾಂ, ನಾಂ ತರ್ ರಾತಿಚ್ಯಾ ಕಾಳೊಕಾಂತ್ ತಾಂಚಿ ವಳಕ್ ಧರುಂಕ್ ಕಷ್ಟಾಂಚೆಂ ಜಾವ್ನ್ ಆಸ್ಲೆಂ.
ಹಾಂವೆಂ ಸಾಂಗ್‍ಲ್ಲ್ಯಾ ಬರಿಂ ತೆಂ ಹಾಸ್ಪಿಟಾಲಾಚ್ಯಾ ಟೆರೆಸಾಕ್ ಯೇವ್ನ್ ಪಾವ್ಲೆಂ ಪುಣ್ ಉಜ್ವಾಡಾಚೊ ಅಭಾವ್ ಆಸ್‍ಲ್ಲೆ ವರ್ವಿಂ ತಾಚೆಂ ಮುಕಾಮಳ್ ಸ್ಪಷ್ಟ್ ದಿಸ್ಲೆಂನಾ! ಉಲೊವ್ಣ್ಯಾಕ್ ಬುನ್ಯಾದ್ ಘಾಲಿ ಹಾಂವೆಂ.
'ಶರಲ್, ಹಾಂವ್ ರೋಬಿನ್, ಮ್ಹಜಿ ವಳಕ್ ಆಸೊಂಕ್ ಪುರೊ. ಶಹರಾಂತ್ಲ್ಯಾ ಕಾಜಾರಾಚ್ಯಾ ಕಾರ್ಯಾನಿಂ ಕಾರ್ಯಾ ನಿರ್ವಾಹಕ್ ಜಾವ್ನ್ ವೇಳ್ ಮೆಳ್ತಾನಾ ಮ್ಹಜಿ ಸೆವಾ ದಿತಾಂ. ಆಸ್ಪತ್ರೆಂತ್ ಹಾಂವ್ ಐ.ಸಿ.ಯುಂತ್ ಕಾಮ್ ಕರ್ನ್ ಆಸಾಂ, ತುಂ ಎಮರ್ಜೆನ್ಸಿ ವಿಭಾಗಾಂತ್ ಆಸಾಯ್‍ನೇ? ಮ್ಹಕಾ ಗೊತ್ತಾಸಾ...' ಮ್ಹಣ್ ತಾಕಾ ಉಲೊಂವ್ಕ್ ಆವ್ಕಾಸ್ ದೀನಾಸ್ತಾನಾ ಸಗ್ಳೊ ಲಾಡು ತೊಂಡಾಂತ್ ಘಾಲ್ನ್ ಚಾಬೊಂಕ್ ತ್ರಾಸ್ ಕಾಡ್ಚ್ಯಾ ಬರಿಂ ಹಾಂವ್ ಉಲಯ್ತೆ ಗೆಲೊಂ. 'ಹಾಂವ್ ತುಜೊ ಮೋಗ್ ಕರ್ತಾಂ ಶರಲ್', ನೀಜ್ ಮೊಗಾಚ್ಯಾ ಸೊಧ್ನೆಕ್ ಆಸ್‍ಲ್ಲ್ಯಾ ಮ್ಹಾಕಾ ಆಜ್ ತುಜೆ ರುಪಾರ್ ಮ್ಹಾಕಾ ಮೊಗಾಚಿ ಕಾಣಿಕ್ ಮೆಳ್ಳಿ ಆನಿಂ ಮ್ಹಕಾ ಅನಾಥ್ ಜಾವ್ನ್ ಸೊಡ್ನ್ ವಚನಾಕಾ...' ಮ್ಹಣ್ ಮ್ಹಜೆ ಬಾವ್ಳೆ ರುಂದ್ ಉಸ್ವಾಯ್ಲೆ ಆನಿಂ ತಾಣೆಂ ಧಾಂವೊನ್ ಯೇವ್ನ್ ಮ್ಹಕಾ ಪೊಟ್ಲುನ್ ಧರ್ಲೆಂ, ತಾಚ್ಯಾ ದೊಳ್ಯಾಂನಿಂ ದು:ಖಾಂ ಟಾಂಕ್ ಫುಟೊನ್ ಪಾಜಾರ್ಚ್ಯಾ ಬರಿಂ ವ್ಹಾಳೊನ್ ಆಸ್ಲಿಂ. 'ತುಂ ರಡಾನಾಕಾ ಶರಲ್ ಹಾಂವ್ ತುಜೊಚ್.. ಮ್ಹಜ್ಯಾ ಉತ್ರಾಂನಿಂ ಬೆಜಾರ್ ಜಾಯ್ನಾಕಾ...' ಮ್ಹಣ್ ತಾಕಾ ಸಮಾಧಾನ್ ಕೆಲೆಂ. ತೆಂ ಮ್ಹಜ್ಯಾ ಉತ್ರಾಂಕ್ ಕಿತೆಂಚ್ ಜಾಪ್ ದೀನಾಸ್ತಾನಾ ಅಮಾಸೆಚ್ಯಾ ರಾತಿಕ್ ಮೊಡಾ ಇಡ್ಯಾಂತ್ಲ್ಯಾನ್ ತಿಳ್ಚ್ಯಾ ಚಂದ್ರಾ ಬರಿಂ ನಪಂಯ್ಚ್ ಜಾಲೆಂ.
ತೆಂ ಶರಲ್ ನ್ಹಂಯ್ ಕ್ಯಾರಲ್ ಮ್ಹಣ್ ಪಾರ್ಕುಂಕ್ ಹಾಂವ್ ಸಕ್ಲೊನಾಂ. ದುಸ್ರ್ಯಾ ದಿಸಾ ಹರ್ಶೆಂಚ್ಯಾ ಬರಿಂ ಹಾಸ್ಪಿಟಾಲಾಂತ್ ಶರಲ್ ಮೆಳ್ಳೆಂ ಆನಿಂ ಹಾಂವೆಂ ತಾಕಾ ಹಾಸೊನ್ ಮ್ಹಜ್ಯಾ ದೊಳ್ಯಾಂನಿ ಸ್ವಾಗತ್ ಕೆಲೊ. 'ಡಾರ್ಲಿಂಗ್ ಹಾವ್ ಆರ್ ಯು' ಮ್ಹಣ್ ಮೊಗಾಚ್ಯಾ ತಾಳ್ಯಾನ್ ವಿಚಾರ್ಲೆಂ. ತೆಂ ರಾಗಾನ್ ಪೆಟವ್ನ್ ಮ್ಹಜ್ಯಾ ಕಾನ್ಸುಲಾರ್ ಆಪ್ಲಿಂ ಪಾಂಚ್ ಬೊಟಾಂ ಚಿಪ್ಕಾವ್ನ್ ಮ್ಹಣಾಲೆಂ, 'ತುಜಿಂ ಉತ್ರಾಂ ಸಾಂಬಾಳ್ನ್ ಉಲಯ್. ಹಾಂವ್ ಕಾಂಯ್ ತುಜೆಂ ಮೋಗ್ ಕರ್ಣಾರ್ ನ್ಹಯ್ ಆನಿಂ ಮುಕಾರ್ ಅಸಲಿಂ ಉತ್ರಾಂ ವಾಪಾರ್ಶಿ ಜಾಲ್ಯಾರ್ ಜಾಗ್ರುತ್ ಮ್ಹಣ್' ಚಲ್ತೆಚ್ ರಾವ್ಲೆಂ! ಹಾಂವ್ ಮಾತ್ರ್ ಘಡಾಯ್ ಘಾಲ್ಲ್ಯಾ ಕೆಂಳ್ಬ್ಯಾಕ್ ಘಡ್ಗಡೊ ಮಾರ್ಲೆಲ್ಯಾ ಬರಿಂ ಉಬೊ ಜಾಲ್ಲೊಂ. ಮ್ಹಜೆ ಹಾತ್ ಆನಿಂ ಪಾಂಯ್ ಕಾಂಪ್ತಾಲೆ ಆನಿಂ ಹಾಂವ್ ಸಗ್ಳೊಚ್ ಘಾಮಾನ್ ಭಿಜ್‍ಲ್ಲೊಂ
.
ಮ್ಹಕಾ ನಾಕಾ ಜಾಲ್ಯಾರೀ ಆಸಹಾಯಕ್ ರಿತಿನ್ ಮ್ಹಜಿಂ ಮೆಟಾಂ ಹಾಂವ್ ಐ.ಸಿ.ಯು. ಕುಶಿನ್ ಕಾಡುನ್ ಆಸ್‍ಲ್ಲೊಂ. ವ್ಹಯ್ ಮ್ಹಜೆಂ ನಶೀಬ್ ಮ್ಹಜೆಲಾಗಿಂ ಖೆಳ್ ಖೆಳ್‍ಲ್ಲೆಂ. ಮ್ಹಕಾ ಕಿತೆಂ ಜಾತಾಲೆಂ ಮ್ಹಾಕಾಚ್ ಕಳಿತ್ ನಾತ್‍ಲ್ಲೆಂ, ಸಕ್ಡಾಂ ಯೇವ್ನ್ ಮ್ಹಜೆಲಾಗಿಂ ಉಲಂವ್ಕ್ ಪ್ರಯತ್ನ್ ಕರ್ತಾಲಿಂ, ಹಾಂವ್ ಮಾತ್ರ್ ಮೊನೊ ಜಾಲ್ಲೊಂ. ತಿತ್ಲ್ಯಾರ್ ಅನುಶಾ ಮ್ಹಜೆ ಇಷ್ಟಿಣ್ ಸರ್ಶಿನ್ ಯೇವ್ನ್ ಕಿತೆಂ ಜಾಲೆಂ ಮ್ಹಣ್ ವಿಚಾರಿಲಾಗ್ಲೆಂ ಆನಿಂ ಹಾಂವ್ ತಾಕಾ ಪೊಟ್ಲುನ್ ಧರ್ನ್ ರಡಾಲಾಗ್ಲೊಂ ಆನಿಂ ಜಾಲ್ಲೆಂ ಘಡಿತ್ ವಿವರ್ಸಿಲಾಗ್ಲೊಂ, ತಿತ್ಲ್ಯಾರ್ ತೆಂ ಮ್ಹಕಾ ಏಕ್ ಕಾಗತ್ ಹಾಡ್ನ್ ಆಯಿಲ್ಲೆಂ, ತೆಂ ಕ್ಯಾರಲಾನ್ ಮ್ಹಕಾ ದಿಂವ್ಚ್ಯಾಕ್ ತಾಚೆಕಡೆನ್ ದಿಲ್ಲೆಂ ಖಂಯ್.
ವೆಗಿಂ ವೆಗಿಂ ತೆಂ ಕವರ್ ಉಗ್ತೆಂ ಕರ್ನ್ ಹಾಂವ್ ವಾಚಿಲಾಗ್ಲೊಂ. 'ಮೊಗಾಚ್ಯಾ ರೋಬಿನ್, ಹಾಂವ್ ಕ್ಯಾರಲ್. ಆನಿಂ ಕಾಲ್ಚ್ಯಾ ರಾತಿಕ್ ತುಕಾ ಮೆಳೊಂವ್ಕ್ ಆಯಿಲ್ಲೆಂ ಶರಲ್ ನ್ಹಂಯ್! ಹಾಂವ್ ತುಜೊ ಮೊಸ್ತು ಮೋಗ್ ಕರ್ನ್ ಆಸ್‍ಲ್ಲಿಂ ಪುಣ್ ತುಜಿಂ ಕಾಲ್ಚಿಂ ಉತ್ರಾಂ ಆಯ್ಕೊನ್ ಮ್ಹಜೊ ಹೊ ತರ್ನೊ ಮೋಗ್ ಉಜ್ಯಾರ್ ಹುಲ್ಪೊಂವ್ಚ್ಯಾ ತಣಾಂ ಬರಿಂ ಬಾವೊನ್ ಗೆಲೊ ಆನಿಂ ಕೆದಿಂಚ್ ಮ್ಹಕಾ ಮೆಳ್ಚೆಂ ಆನಿಂ ಉಲೊಂವ್ಚಿ ದಯಾ ಕರಿನಾಕಾ...' ಮ್ಹಣ್ ತಾಣೆಂ ಬರಯ್ಲೆಂ.
ಮ್ಹಕಾ ಆತಾಂ ಇಲ್ಲೆಂ ಇಲ್ಲೆಂ ಸಮ್ಜೊಂವ್ಕ್ ಲಾಗ್ಲೆಂ, ಹಾಂವೆಂ ಅನುಶಾಲಾಗಿಂ ಘಡ್‍ಲ್ಲಿ ಸಗ್ಳಿ ಗಜಾಲ್ ವಿಚಾರ್ಲಿ, ತಾಣೆಂ ಮ್ಹಜೆಲಾಗಿಂ ಸೊಡೊವ್ನ್ ಸಾಂಗ್ಲೆಂ, ತೆಂ ಶರಲಾಕ್ ಸೊಧುನ್ ಗೆಲ್ಲ್ಯಾ ವೆಳಾರ್ ತಾಕಾ ತೆಂ ಮೆಳೊಂವ್ಕ್ ನಾತ್ಲೆಂ ಆನಿಂ ಕಾಗತ್ ತುರ್ತಾನ್ ತಾಕಾ ದಿಂವ್ಚ್ಯಾ ಖಾತಿರ್ ಕ್ಯಾರಲಾಚ್ಯಾ ಹಾತಿಂ ದೀವ್ನ್ ಆಯಿಲ್ಲೆಂ, ಸಗ್ಳೆಂ ತಾಣೆಂ ಮ್ಹಾಕಾ ವಿವರ್ಸಿಲೆಂ. ಆಶೆಂ ಅನುಶಾನ್ ಕೆಲ್ಲ್ಯಾ ಎಕಾ ಲ್ಹಾನ್ಶಾ ಚುಕಿಂ ವರ್ವಿಂ ಮಜೆಂ ನಶೀಬ್ ಬದ್‍ಲ್ಲೆಂ! ಮತಿಚ್ಯಾ ಸಮಧಾನಾ ಖಾತಿರ್ ಇಲ್ಲ್ಯಾ ದಿಸಾಂಚ್ಯಾ ರಜೆರ್ ಹಾಂವ್ ಗೋವಾ ವಚೊವ್ನ್ ಭೊಂವೊನ್ ಪಾಟಿಂ ಆಯ್ಲೊಂ, ಪುಣ್ ಹಾಂವ್ ಪಾವ್ತಾನಾ ಶರಲ್ ಆನಿಂ ಕ್ಯಾರಲ್ ದೊಗಾಂಯ್ ಕಾಮಾಕ್ ರಾಜೀನಾಮ್ ದೀವ್ನ್, ಆಪ್ಲ್ಯಾ ಕುಟ್ಮಾದಾರಾಂ ಸಂಗಿಂ ದುಸ್ರ್ಯಾ ಗಾಂವಾಂಕ್ ಗೆಲ್ಯಾಂತ್ ಮ್ಹಳ್ಳಿ ಖಬರ್ ಮೆಳ್ಳಿ. ತಾಂಕಾಂ ಸೊದ್ಚೆಂ ಮ್ಹಸ್ತು ಪ್ರಯತ್ನ್ ಕೆಲೆಂ ಪುಣ್ ಸುಫಳ್ ಜಾಂವ್ಕ್ ನಾತ್‍ಲ್ಲೆಂ. ವರ್ಸಾಂ ಉತ್ರಾಲ್ಯಾರೀ ಶರಲಾಚೊ ಉಗ್ದಾಸ್ ಮತಿ ಪಡ್ದ್ಯಾರ್ ಥಾವ್ನ್ ಮಾಜ್ವೊಂಕ್ ನಾತ್ಲೊ. ಆಜುನೀ ತಾಚೊ ಹಾಂವ್ ಮೋಗ್ ಕರ್ನ್ ಆಸ್ಲೊಂ. ಆನಿಂ ಮಜ್ಯಾ ನಶೀಬಾಚ್ಯಾ ಖೆಳಾಂತ್ ಸಲ್ವಣಿಂ ಮಾನುನ್ ಘೆತ್ಲಿ!
ಎಕಾಚ್ಚಾಣೆಂ ಪಾಟ್ಲ್ಯಾನ್ ಆಯಿಲ್ಲ್ಯಾ ಕೋಣೆಗಿ ಅಪಡ್ನ್ ಉಟಯ್ತಾಸ್ತಾಂಚ್ ಹಾಂವ್ ಚಿಂತ್ನ್ಯಾಚಾ ಸಾಗೊರಾ ಥಾವ್ನ್ ಭಾಯ್ರ್ ಪಾವ್ಲ್ಲೊ ಆನಿಂ ವ್ಹೊಕಾಲ್ - ನವ್ರೊ ದೊಗಾಂಯಿಂ ಹೊಲಾಚ್ಯಾ ಮುಕ್ಲ್ಯಾ ದಾರಾರ್ ಉಬಿಂ ಜಾಲ್ಲಿಂ. ತಾಂಕಾ ಪಳೆವ್ನ್ ಮುಕ್ಲೆ ಕಾರ್ಯೆಂ ಚಲೊವ್ನ್ ವ್ಹರುಂಕ್ ಹಾಂವ್ ಆಯ್ತೊಂ ಜಾಲೊ.....
Tags:
Robin, Naxibacho khel, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/24/2020 ಉದೆಂತಿಚೆಂ ನೆಕೆತ್ರ್...
-
11/28/2020 ಚೂಕಿ ತಿದ್ವಿನಾ ಜಾಲ್ಯಾರ್!...
-
11/4/2020 ಅನಿವಾಸಿ ರಾಯ್...
-
10/23/2020 ಘಾಣ್...
-
-
9/13/2020 ರಾತ್ ಪಾಳಿ...
-
6/18/2018 ವೆಚಿಕ್ ಪುತಾಚೊ ದಾಟ್ಟು...
-
11/12/2017 ನ್ಯೂ ಐನ್‌ಸ್ಟೀನ್...
-
9/7/2017 ಮ್ಹಜ್ಯಾ ಮೊಗಾಚೆಂ ಮೆಲ್ಬಾ...
-
8/29/2017 ಕೊಲ್‍ಗರ್ಲ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.