From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಅನಿವಾಸಿ ರಾಯ್
Wednesday, November 4, 2020
ಹಿ ಏಕಾ ಗಾಂವ್ಚಿ ಕಥಾ. ಗಾಂವ್ಚಾ ರಾಯಾಚೆರ್ ಲೋಕ್ ಖುಶ್ ನಾತ್‍ಲ್ಲೊ. ಪದ್ವೆರ್ ಬೊಸೊನ್ ರಾಜ್ ಕರ್‍ಚಾ ಮಂತ್ರಿಂಚೆರ್‍ ರಾಯಾಕ್ ನಿಯಂತ್ರಣ್ ನಾತ್‍ಲ್ಲೆಂ. ಭ್ರಷ್ಟಾಚಾರ್ ಆನಿ ಅಧಿಕಾರಾಚಾ ದುರುಪುಯೊಗಾನ್ ಸಾಮಾನ್ಯ್ ಲೋಕ್ ಥಕ್‍ಲ್ಲೊ. ದುಬ್ಳ್ಯಾಂಚೊ ಸಂಕೊ ಚಡೊನ್ ಯೆತಾಲೊ. ಗಾಂವಾಂತ್ ವಸ್ತಿ ಕರ್‍ಚೆ ಥೊಡೆಚ್ ಗಿರೇಸ್ತ್, ಸರ್‍ಕಾರಾಚಾ ಮಜತೆನ್ ಬಜಾರಾಂತ್ ಸಾದ್ಯಾ ಲೊಕಾಕ್ ಲುಟ್ತಾಲೆ. ಹ್ಯಾ ಗಿರೇಸ್ತಾಂಚಿ ಸಂಪತ್ತಿ ವಾಡೊನ್ ಯೆತಾಲಿ. ದುಬ್ಳೆ ಲಾಚಾರ್ ಜಾಲ್ಲೆ. ರಾಯ್ ಆನಿ ತಾಚೆ ಸರ್‍ಕಾರಾಚೆರ್ ಲೊಕಾನ್ ವಿಶ್ವಾಸ್ ಹೊಗ್ಡಾಯಿಲ್ಲೊ.
ಏಕ್ ಕ್ರಾಂತಿ ಜಾವ್ನ್ ರಾಯಾಕ್ ಅಧಿಕಾರಾ ಥಾವ್ನ್ ಸಕ್ಲಾ ಘಾಲೊ ತರ್ ಗಾಂವಾಕ್ ಏಕ್ ಉಜ್ವಲ್ ಭವಿಶ್ಯ್ ಮೆಳ್ತೆಲೆಂ ಮ್ಹಣ್ ಸಾಮಾನ್ಯ್ ಲೊಕಾನ್ ಚಿಂತ್ಲೆಂ. ರಾಯಾಚಾ ಸೈನಿಕಾಂನಿ ಲೊಕಾಚೊ ಸಾಂಗಾತ್ ದಿಲೊ. ರಾವ್ಳೆರಾ ಭಿತರ್ ರಿಗೊನ್ ರಾಯಾಕ್ ಅಧಿಕಾರಾ ಥಾವ್ನ್ ಉಸ್ಳಾಯ್ಲೊ. ರಾಯ್ ಆಪ್ಲ್ಯಾ ಕುಟ್ಮಾ ಸವೆಂ ಗಾಂವ್ ಸೊಡ್ನ್ ಧಾಂವ್ಲೊ. ಆತಾಂ ಏಕ್ ಕ್ಲಿಷ್ಟ್ ಸವಾಲ್ ಉದೆಲೆಂ.
ಕೋಣಾಕ್ ರಾಯ್ ಕರ್‍ಚೆಂ?
ಸಾಮಾನ್ಯ್ ಲೊಕಾನ್ ರಾಯಾಕ್ ವಿಂಚುಂಕ್ ಏಕ್ ಸಮಿತಿ ರಚ್ಲಿ. ರಾಯ್ ಜಾಂವ್ಕ್ ಕೋಣ್ ತಯಾರ್ ಆಸಾ ಮ್ಹಣ್ ಸಮಿತಿನ್ ನಾಗರಿಕಾಂ ಲಾಗಿಂ ವಿಚಾರ್‍ಲೆಂ. ನಾಗರಿಕಾಂ ಥಾವ್ನ್ ಸಮಿತಿಕ್ ಅರ್ಜ್ಯೊ ಆಯ್ಲ್ಯೊ. ಗಾಂವ್ಚೊ ರಾಯ್ ಜಾಂವ್ಕ್ ಜಾಯ್ತೆ ಗಿರೇಸ್ತ್ ಆನಿ ಗಣ್ಯ್ ವ್ತೆಕ್ತಿ ತಯಾರ್ ಆ‍ಸ್‍ಲ್ಲೆ. ಹ್ಯಾ ಪಯ್ಕಿ ನಿಷ್ಟ್ ಆನಿ ಪ್ರಾಮಾಣಿಕ್ ಕಾಲೆತಿಚೊ ತಾಂಕಾಂ ಮೆಳ್ಳೊನಾ. ವಿಂಚೊಣ್ ಸಮಿತಿ ಕಿತೆಂ ಕರ್‍ಚೆಂ ಮ್ಹಣ್ ಸಮ್ಜಾನಾಸ್ತಾನಾ ತಕ್ಲಿ ಫಡಾಫಡೆರ್ ಆಸ್ತಾನಾ ಏಕ್ ಗರೀಬ್ ಆನಿ ಸಾದ್ಯಾ ಮನ್ಶಾಚಿ ಅರ್‍ಜಿ ಆಯ್ಲಿ.
ತೊ ದುಬ್ಳೊ ಆನಿ ಅಶಿಕ್ಪಿ. ಜೀವಂತ್ ಆಸ್ತಾನಾ ಬಾಪಯ್ಕ್ ಖಾಣಾಚಿ ಗಾಡಿ ಆ‍ಸ್‍ಲ್ಲಿ. ಬಾಪಯ್ಕ್ ಕುಮ್ಕೆಚೊ ಹಾತ್ ದೀವ್ನ್ ಕೊಬಾಚೊ ರೋಸ್ ವಿಕುನ್ ತೊ ವ್ಹಡ್ ಜಾಲ್ಲೊ. ತರ್ನಾಟ್ಪಣಾರ್ ದೇಸಾಂತರ್ ಗೆಲ್ಲ್ಯಾ ತಾಣೆ ಜಿಣ್ಯೆಂತ್ ಕಿತೆಂ ಕೆಲಾಂ ಮ್ಹಣ್ಚಾಕ್ ಸಾರ್‍ಕೊ ಧಾಕ್ಲೊ ನಾತ್‍ಲ್ಲೊ. ಪುಣ್ ಭುರ್‍ಗೊ ಆಸ್ತಾನಾ ನಿಷ್ಟ್ ಆನಿ ಪ್ರಾಮಾಣಿಕ್‍ಪಣಿಂ ತಾಣೆ ಬಾಪಾಯ್ಚೆ ಕಷ್ಟ್ ಸಮ್ಜೊನ್ ಕುಟ್ಮಾಚಿ ಮಜತ್ ಕೆಲ್ಯಾ ಮಣ್ಚಾ ಏಕಾ ವಿಷಯಾಚೆರ್ ಸಮಿತಿನ್ ಗಾಂವಾಂಕ್ ನವೊ ರಾಯ್ ಜಾಂವ್ಕ್ ಹೊ ರೋಸ್ ವಿಕ್ತೊಲೊ ಯೋಗ್ಯ್ ಮ್ಹಣ್ ಪಾಚಾರ್‍ಲೆಂ. ಬಾಯ್ಲ್ ಆನಿ ಕುಟಾಮ್ ನಾಸ್ತಾನಾ ಜಿಯೆಂವ್ಚೊ ಎಕ್ಲೊ ಎಕ್ಸುರೊ ಜಾಲ್ಲ್ಯಾನ್ ಭ್ರಷ್ಟಾಚಾರಾಕ್ ವೊಳೊಗ್ ಜಾಂವ್ಚೊ ನಾ ಮ್ಹಣ್ ತಾಣಿಂ ಚಿಂತ್ಲೆಂ.
ಅಶೆಂ ತ್ಯಾ ಗಾಂವಾಕ್ ಏಕ್ ನವೊ ರಾಯ್ ಮೆಳ್ಳೊ.
ರಾಯಾಕ್ ಪದ್ವೆರ್ ಬೊಸೊಯ್ಲೊ ಆನಿ ನವ್ಯಾ ರಾಯಾನ್ ಅಪ್ಲೆ ಸಾರ್‍ಕ್ಯಾ ಅಶಿಕ್ಪ್ಯಾಂಚಿ ಏಕ್ ಮಂತ್ರಿ ಮಂಡಳಿ ರಚ್ಲಿ. ಜಿಣಿಭರ್ ಕಷ್ಟಾಲ್ಲ್ಯಾ ರಾಯಾಕ್ ಅಚಾನಕ್ ಅಧಿಕಾರ್ ಮೆಳ್ತಾನಾ ಮಝಾ ಲಾಭ್ಲಿ. ರಾವ್ಳೆರಾಚಿ ಜಿಣಿ. ಜೆವಾಣ್, ಖಾಣ್ ಆನಿ ವಸ್ತಿ ಪುಕಟ್ಟಾಕ್. ಘಾಮ್ ಕಾಡ್ನ್ ಜೊಡ್ಚಿ ಗರ್ಜ್ ನಾತ್‍ಲ್ಲಿ. ರಾವ್ಳೆರಾಂತ್ ಮೆಟಾ ಮೆಟಾಕ್ ಕಾಮಾಚೆ ಮನಿಸ್. ಸರ್‍ಕಾರಾಚೆಂ ಖಜಾನ್ ರಾಯಾಚಾ ಅಧೀನ್. ಖರ್‍ಚುಂಕ್ ದರಬಸ್ತ್ ದುಡು. ರಾಕೊಣ್ ಕರುಂಕ್ ಅಂಗ್‌ರಕ್ಷಕ್. ಗಾಂವಾಂಕ್ ಖಂಚಾಯಿ ಜಮಾತೆಕ್ ತಾಕಾ ಪಯ್ಲೆಂ ಸ್ಥಾನ್. ತಾಚೆ ಉತ್ರಾಕ್ ಕೋಣ್‍ಯಿಂ ವಿರೋಧ್ ಕರಿನಾತ್‍ಲ್ಲೆ. ಸಂಸಾರ್ ಭೊಂವೊಂಕ್ ಆಡ್ಕಳ್ ನಾತ್‍ಲ್ಲಿ. ಸಂಸಾರಾಚಾ ಅನೇಕ್ ಗಾಂವ್ಚಿ ತಾಣೆ ಸರ್‍ಕಾರಿ ದುಡ್ವಾಚೆರ್ ಭೆಟ್ ಕೆಲಿ. ಸಯ್ರೊ ಜಾವ್ನ್ ಭೆಟ್ ಕರ್‍ತಾನಾ ಪರ್‍ಗಾಂವಾಂತ್ ಮೆಳ್ಚೊ ವಿಶೇಸ್ ಸತ್ಕಾರ್ ತಾಕಾ ಪಸಂದ್ ಜಾಲೊ. ತಾಚೊ ಚಡಿತ್ ವೇಳ್ ಪರ್‍ಗಾಂವ್ ಭಂವ್ಡೆಂತ್ ಖರ್‍ಚಾಲೊ. ತಾಕಾ ಅನಿವಾಸಿ ರಾಯ್ ಮ್ಹಣ್ಚೆಂ ಆಡ್ ನಾಂವ್ ಮೆಳ್ಳೆಂ. ಹೆರ್ ಗಾಂವ್ಚಾ ರಾಯಾಂಕ್ ಪೊಟ್ಲುನ್ ಧರ್‍ಚಿ ಸವೊಯಿ ತಾಣೆ ರುತಾ ಕೆಲ್ಲಿ. ಹೆಂ ಜಾಯ್ತ್ಯಾ ರಾಯಾಂಕ್ ಪಸಂದ್ ಜಾಯ್ನಾತ್‍ಲ್ಲೆಂ.
ಮೊರ್‍ತಾ ಪರ್‍ಯಾಂತ್ ಹಿ ಸುವಿಧಾಯಿ ಶಾಶ್ವತ್ ಕರ್‍ಚೆಂ ತಾಕಾ ಅವಶ್ಯ್ ಮ್ಹಣ್ ಭೊಗ್ಲೆಂ. ಅಧಿಕಾರಾಚೆಂ ಆಮಾಲ್ ಆನಿ ಮಝಾ ಹೊಗ್ಡಾಂವ್ಕ್ ತೊ ತಯಾರ್ ನಾತ್‍ಲ್ಲೊ. ಸ್ವಾಭಾವಿಕ್ ಜಾವ್ನ್ ಏಕ್ ಭೆಂ ತಾಕಾ ಧೊಸ್ತಾಲೆಂ. ಆದ್ಲೆ ರಾಯಾಕ್ ಅಧಿಕಾರಾ ಥಾವ್ನ್ ಲೊಟುನ್ ಘಾಲ್ಲೆ ಪರಿಂ ಅಪ್ಣಾಕ್‍ಯಿ ಲೊಕಾನ್ ರಾವ್ಳೆರಾ ಥಾವ್ನ್ ಕಾಡ್ನ್ ಭಾಯ್ರ್ ಉಡಯ್ಲೊ ತರ್? ಹ್ಯಾ ಸವಾಲಾಚಿ ಜಾಪ್ ಸಮ್ಜೊಂಚಾ ಖಾತಿರ್ ತಾಣೆ ಅಪ್ಲೆ ಮಂತ್ರಿ ಮಂಡಳೆಚಿ ಜಮತ್ ಅಪಯ್ಲಿ.
"ಲೋಕ್ ಮ್ಹಜೆವಿಶಿಂ ಕಿತೆಂ ಉಲಯ್ತಾ?" ತಾಣೆ ವಿಚಾರ್‍ಲೆಂ.
"ಲೋಕ್ ಸಂತುಷ್ಟ್ ನಾ!" ಖಾಸ್ ಮಂತ್ರಿನ್ ಧೈರ್ ಆರಾವ್ನ್ ಜಾಪ್ ದಿಲಿ. "ಖಜಾನ್ ಖಾಲಿ ಜಾವ್ನ್ ಯೆತಾ. ಗಾಂವ್ಚಿ ಅರ್‍ಥಿಕ್ ಪರಿಗತ್ ಭಿಗ್ಡಾಲ್ಯಾ. ದುಬ್ಳಿಕಾಯಿ ವಿಸ್ತಾರ್‍ಲ್ಯಾ. ನಿರುದ್ಯೋಗ್ ಚಡ್ಲಾ. ರಾಯ್ ಅಶಿಕ್ಪಿ ಜಾಲ್ಲ್ಯಾನ್ ಪ್ರಗತಿ ಅಸಾಧ್ಯ್ ಮ್ಹಣ್ ಲೋಕ್ ಉಲಯ್ತಾ."
"ಮ್ಹಳ್ಯಾರ್ ಹಾಂವ್ ಶಿಕ್ಪಿ ಜಾಲ್ಯಾರ್ ಲೋಕ್ ಮ್ಹಾಕಾ ಸ್ವೀಕಾರ್ ಕರ್‍ತೊಲೊ. ಮಜಾ ನಾಂವಾಚೆರ್ ಊಂಚ್ಲ್ಯಾ ಗುರುಕುಲಾಚೆಂ ಪದವಿ ಪತ್ರ್ ತಯಾರ್ ಕರಾ." ರಾಯಾನ್ ಅಪ್ಲೆ ಖಾಸ್ ಮಂತ್ರಿಕ್ ಫರ್‍ಮಾಯ್ಲೆಂ.
ರಾಯ್ ಅಶಿಕ್ಪಿ ನಯ್ ಮ್ಹಣ್ ರುಜು ಕರುಂಕ್ ಮಂತ್ರಿನ್ ರಾಯಾಚಾ ನಾಂವಾಚೆರ್ ನಾಮ್ಣೆಚಾ ಗುರುಕುಲಾಚೆಂ ಪದವಿ ಪತ್ರ್ ತಯಾರ್ ಕೆಲೆಂ. ಗಾಂವ್ಚಿ ಅರ್‍ಥಿಕ್ ಪರಿಗತ್ ಸುಧ್ರಾಲಿ ನಾ. ರಾಯಾ ವಿರೋಧ್ ಲೊಕಾ ಥಂಯ್ ನಾಸಮಧಾನ್ ಚಡೊಂಕ್ ಲಾಗ್ಲೆಂ. ಥೊಡ್ಯಾ ತೇಂಪಾನ್ ರಾಯಾನ್ ಪರತ್ ಅಪ್ಲೆ ಮಂತ್ರಿ ಮಂಡಳೆ ಸಂಗಿಂ ಜುಂತ್ ಚಲಯ್ಲೊ.
"ಆತಾಂ ಲೋಕ್ ಕಿತೆಂ ಮ್ಹಣ್ತಾ? ಹಾಂವ್ ಶಿಕ್ಪಿ ಮ್ಹಣ್ ಪಾತ್ಯೆತಾಗಿ?" ರಾಯಾನ್ ಕುತೂಹಲ್ ದಾಕಯ್ಲೊ.
"ಕೊಬಾಚೊ ರೋಸ್ ವಿಕ್ತೊಲೊ ರಾಯ್ ಜಾಂವ್ಕ್ ಯೋಗ್ಯ್ ನಯ್ ಮ್ಹಣ್ ಲೊಕಾಚಿ ಅಭಿಪ್ರಾಯ್. ಲೋಕ್ ಖುಬಾಳ್ಳಾ. ರಾಯ್ ಬದ್ಲಾಲೊ ತರ್ ಗಾಂವ್ಚೆಂ ಸುಧಾರಾಣ್ ಜಾತೆಲೆಂ ಮ್ಹಣ್ ಲೊಕಾಚಿ ಪಾತ್ಯೆಣಿ." ಖಾಸ್ ಮಂತ್ರಿನ್ ಖಬರ್ ಪಾಟಯ್ಲಿ.
"ಕಿತೆಂ ಮ್ಹಣ್ತಾಯಿ ತುಂ?" ಆವಾಕ್ಕ್ ಜಾಲೊ ರಾಯ್. "ರಾಯ್ ಬದ್ಲಾಲೊ ತರ್ ಪ್ರಗತಿ ಕಶೆಂ ಸಾಧ್ಯ್? ಹಾಂವ್ ಗೆಲೊಂ ತರ್ ಆನ್ಯೇಕ್ಲೊ ಯೇವ್ನ್ ಅಧಿಕಾರಾಚಿ ಮಝಾ ಚಾಕ್ತೊಲೊ. ಮಾಕಾ ಭೊಗ್ತಾ ಮ್ಹಜೆ ವಿರೋಧಿ ಮೊಸ್ರಾನ್ ಭರ್‍ಲ್ಯಾತ್. ತಾಣಿಂ ಉಪ್ರಾಟ್ಚಾ ಪಯ್ಲೆಂ ಆಮಿ ತಾಂಚೆಂ ಪೆಂಕಾಡ್ ಮೊಡಿಜಾಯಿ."
"ತೆಂ ಕಶೆಂ ಸಾಧ್ಯ್?" ಮಂತ್ರಿಕ್ ಸಮ್ಜಾಲೆಂನಾ.
"ವಿರೋಧಿಲಾಗಿಂ ಲಿಪೊನ್ ದವರ್‍‍ಲ್ಲೊ ದುಡು ಖಂಡಿತ್ ಆಸ್ತೊಲೊ. ತಾಂಚೊ ದುಡು ನಾಸ್ ಕೆಲೊ ತರ್ ತೆ ಅಸ್ಕತ್ ಜಾತೆಲೆ." ರಾಯಾನ್ ಪುಸ್ಪುಸೊನ್ ಸಾಂಗ್ಲೆಂ. "ವಾಟ್ ಆಸಾ. ಆತಾಂ ಚಲೊನ್ ಆಸ್ಚಿಂ ನಾಣಿಂ ರಧ್ದ್ ಕರ್ನ್ ನವಿಂ ನಾಣಿಂ ಬಜಾರಾಕ್ ಹಾಡ್ಚಿಂ. ಕೋಣ್ ಆಮ್ಚೆ ಕುಶಿನ್ ಆಸಾತ್ ತಾಂಚಿಂ ಸರ್ವ್ ನಾಣಿಂ ಸಲೀಸಾಯೆನ್ ಬದ್ಲುಂಚಿಂ. ಕೋಣ್ ಆಮ್ಚೆ ವಿರೋಧ್ ಆಸಾ ತಾಣಿಂ ತಿರ್‍ವೊ ದೀನಾಸ್ತಾನಾ ಸರ್‍ಕಾರಾಕ್ ಡೋಂಗಿ ಕರ್ನ್ ಪುಂಜಯಿಲ್ಲಿಂ ನಾಣಿಂ ಬದ್ಲುಂಕ್ ಜಾಯ್ನಾ ಮಣ್ ತೀರ್ಪ್ ದಿಂವ್ಚೆಂ."
"ಸಾಮಾನ್ಯ್ ಲೊಕಾಕ್ ಹೆಂ ಪಸಂದ್ ಜಾಂವ್ಚೆಂ ನಾ." ಮಂತ್ರಿನ್ ನಾಖುಶಿ ವೆಕ್ತ್ ಕೆಲಿ.
"ನಾಣಿಂ ಬದ್ಲುಂಚಾ ಗಡ್ಬಡೆಂತ್ ಲೋಕ್ ಗಾಂವ್ಚೆ ಸಮಸ್ಯೆ ವಿಸ್ರಾತೊಲೊ." ಅಪ್ಲೆಂ ಖಾಡ್ ಪೊಶೆವ್ನ್ ಮ್ಹಣಾಲೊ ರಾಯ್. "ನಿರುದ್ಯೋಗ್ ಆನಿ ಅರ್‍ಥಿಕ್ ಪರಿಗತೆವಿಶಿಂ ಚಿಂತುಂಕ್ ತಾಂಕಾ ವೇಳ್ ಮೆಳ್ಚೊನಾ."
ರಾಯಾಚಿ ಹುಕುಮ್ ಜ್ಯಾರಿ ಜಾಲಿ. ಗಾಂವಾಂತ್ ಚಲೊನ್ ಆಸ್ಚಿಂ ನಾಣಿಂ ಬಂಧ್ ಜಾಲಿಂ. ಪರ್‍ನಿಂ ನಾಣಿಂ ಬದ್ಲುನ್ ನವಿಂ ನಾಣಿಂ ಘೆಂವ್ಕ್ ವೆವಸ್ಥಾ ಕೆಲಿ. ಹೆರ್ ಉಪಾವ್ ನಾಸ್ತಾನಾ ನಾಣಿಂ ಬದ್ಲುಂಕ್ ಲೋಕ್ ರಾಯಾನ್ ಸೂಚಿತ್ ಕೆಲ್ಲ್ಯಾ ಜಾಗ್ಯಾಂಚೆರ್ ಉಬೊ ಜಾಲೊ. ಲೋಕ್ ವಿರಾರ್ ಜಾಲೊ. ವೊತಾಕ್ ಶಿರಿ ಸುಕೊನ್ ಕಷ್ಟಾಲೊ. ತಾಂಚೊ ವೇಳ್ ಪಾಡ್ ಜಾಲೊ. ನಾಣಿಂ ಬದ್ಲುಂಚಾ ಕಾರ್‍ಯಾಂತ್ ಮೆತೆರ್ ಜಾಲ್ಲ್ಯಾ ಸಾಮಾನ್ಯ್ ಲೊಕಾಕ್ ಚಿಂತುಂಕ್ ವೇಳ್ ಮೆಳ್ಳೊನಾ.
ಥೊಡೊ ತೇಂಪ್ ಪಾಶಾರ್ ಜಾಲೊ. ನಾಣಿಂ ಬದ್ಲುಂಚಾ ಕಾರ್‍ಯಾಂತ್ ಉಬ್ಜಾಲ್ಲಿ ಅವೆಸ್ಥಾ ಪರತ್ ಸವ್ಕಾಸ್ ಪಾಟಿಂ ನಿಯಂತ್ರಣಾರ್ ಆಯ್ಲಿ.
"ಆತಾಂ ಕಿತೆಂ ಮ್ಹಣ್ತಾ ಲೋಕ್ ಆಮ್ಚೊ? ಗಾಂವ್ಚೆ ಸಮಸ್ಯಾಂ ವಿಶಿಂ ಖಂತ್ ಕರ್‍ಚೆಂ ತಾಣಿಂ ಸೊಡ್ಲಾಂ ಆಸ್ತೆಲೆಂ" ದುಸ್ರ್ಯಾ ಗಾಂವಾಂಕ್ ಭಂವ್ಡೆಕ್ ಗೆಲ್ಲ್ಯಾ ರಾಯಾನ್ ಪಾಟಿಂ ಯೆತಾಚ್ ವಿಚಾರ್‍ಲೆಂ.
"ನಾಂ ಹುಜೂರ್." ಖಾಸ್ ಮಂತ್ರಿ ಮಣಾಲೊ. "ಗಾಂವ್ಚಿ ಅರ್‍ಥಿಕ್ ಪರಿಗತ್ ಭಿಗ್ಡೊನ್ ಯೆತಾ. ನಿರುದ್ಯೋಗಿ ಭರ್‍ಲ್ಯಾತ್. ದುಬ್ಳೊ ಲೋಕಾಚೊ ಸಂಕೊ ವಾಡೊನ್ ಯೆತಾ. ಲೋಕ್ ಖುಶ್ ನಾ."
"ವಿರೋಧಿಂಚಾ ಅಪಪ್ರಚಾರಾನ್ ಅಶೆಂ ಜಾಲಾಂ." ರಾಯ್ ಮ್ಹಣಾಲೊ. "ಸಾಮಾನ್ಯ್ ಲೊಕಾಚೆಂ ಗಮನ್ ದುಸ್ರ್ಯಾ ವಾಟೆಕ್ ಬದ್ಲಿಜಾಯಿ. ಸೆಜಾರಿ ಗಾಂವ್ಚೆ ಆಮ್ಚೆಂ ಪಾಡ್ ಆಶೆತಾತ್ ಆನಿ ಗಾಂವಾ ಭಿತರ್‍ಲೆ ವಿರೋಧಿ ದುಸ್ಮಾನ್ ಗಾಂವಾ ಸಂಗಿಂ ಮೆಳೊನ್ ಶಿಂತ್ರ್ಯೊ ಚಲೊವ್ನ್ ಆಸಾತ್ ಮ್ಹಣ್ಚೊ ಪ್ರಚಾರ್ ಕೆಲ್ಯಾರ್ ಕಶೆಂ?"
"ತುಮಿ ಸಾಂಗ್ಚೆಂ ಸಮಾ." ಮಂತ್ರಿನ್ ತಕ್ಲಿ ಹಾಲಯ್ಲಿ. "ದುಸ್ಮಾನ್ ಗಾಂವ್ಚೆ ಆಕ್ರಮಣಾಕ್ ತಯಾರ್ ಜಾಲ್ಯಾತ್ ಮ್ಹಣ್ ಲೊಕಾಕ್ ಜಾಗ್ರತ್ ಕರ್‍ಯಾಂ. ಕೋಣ್ ಸರ್‍ಕಾರಾ ವಿರೋಧ್ ಉಲಯ್ತಾ ತಾಂಕಾಂ ದ್ರೋಹಿ ಮ್ಹಣ್ ಭಿತರ್ ಘಾಲ್ಯಾಂ."
"ಸಾರ್‍ಕೆಂ ಉಲಯ್ಲೊಯಿ ತುಂ" ರಾಯ್ ಖುಶ್ ಜಾಲೊ. "ಹಾಂವ್ ಹ್ಯಾ ಗಾಂವ್ಚೊ ರಾಕ್ವಲಿ. ಹಾಂವ್ ಜೀವಂತ್ ಆಸ್ತಾ ಪರ್‍ಯಾಂತ್ ಮ್ಹಜೆ ಶಿವಾಯಿ ದುಸ್ರ್ಯಾ ಕೋಣೆಂಯಿ ರಾಯ್ ಜಾಂವ್ಕ್ ನಜೊ. ಲೊಕಾಚೆಂ ಗ್ಯಾನ್ ಕೊದೊಳ್ ಕರುಂಕ್ ಆನ್ಯೇಕ್ ವಾಟ್ ಆಸಾ. ಗಾಂವ್ಚಾ ಲೊಕಾಕ್ ತೆ ಅಧಿಕ್ರತ್ ನಿವಾಸಿ ಮ್ಹಣ್ ರುಜು ಕರುಂಕ್ ಸಾಂಗ್ಯಾಂ. ಕೋಣ್ ಆಮ್ಚೆ ಕುಶಿನ್ ಆಸಾತ್ ತೆ ನಿವಾಸಿ ಆನಿ ಕೋಣ್ ಆಮ್ಚೆ ವಿರೋಧ್ ಆಸಾತ್ ತಾಂಕಾಂ ಪರ್‍ಕಿ ಮಣ್ ತೀರ್ಪ್ ದಿವ್ಯಾಂ. ಆಮ್ಚೊ ಸರ್‍ಕಾರ್ ಸುರಕ್ಷಿತ್ ಉರೊಂಕ್ ಹಿ ಬೊರಿ ವಾಟ್."
ರಾಯಾಚಾ ಮಂತ್ರಿ ಮಂಡಳೆನ್ ಸರ್‍ಕಾರಾಚೆ ನಿರ್‍ಧಾರ್ ಕಾರ್‍ಯಾಗತ್ ಕೆಲೆ. ದುಸ್ಮಾನ್ ಗಾಂವ್ ಆಕ್ರಮಣಾಕ್ ತಯಾರ್ ಜಾಲಾ ಮ್ಹಣ್ ಲೊಕಾಕ್ ಭೆಷ್ಟಾಯ್ಲೆಂ. ವಿರೋಧಿಂಕ್ 'ದ್ರೋಹಿ' ಮ್ಹಣ್ಚೆಂ ನಾಂವ್ ದಿಲೆಂ. ಗಾಂವ್ಚಾ ಲೊಕಾಕ್ ನಿವಾಸಿ ಮ್ಹಣ್ ರುಜು ಕರ್‍ ಮ್ಹಣ್ತಾನಾ ಗಾಂವಾಂತ್ ಪಂಗಡ್ ಜಾಲೆ. ಗಲಾಟೊ ಜಾಲೊ. ಮಾರ್ನ್ ಪಡ್ಲೆ. ಜಾಯ್ತ್ಯಾಂಚಿ ಹತ್ತ್ಯಾ ಜಾಲಿ. ಪರ್‍ಗಾಂವಾಚಾ ಭಂವ್ಡೆರ್ ಆಸ್ಚಾ ರಾಯಾನ್ ಫಿಕಿರ್ ಕೆಲಿನಾ.
"ಕಸೊ ಆಸಾ ಮ್ಹಜೊ ಗಾಂವ್?" ಭಂವ್ದೆರ್‍ ಥಾವ್ನ್ ಪಾಟಿಂ ಆಯಿಲ್ಲ್ಯಾ ರಾಯಾನ್ ತಾಚೆಂ ಸದಾಂಚೆಂ ಸವಾಲ್ ಮಂತ್ರಿ ಮಂಡಳೆ ಹುಜ್ರಿ ದವರ್‍ಲೆಂ.
"ವಿಶೇಸ್ ಗಲಾಟೊ ಜಾಲಾ. ಲೊಕಾ ಮಧೆಂ ವಿಭಜನ್ ಆನಿ ಮಾರಾಮಾರಿ ಜಾವ್ನ್ ಥೊಡ್ಯಾಂಚೊ ಜೀವ್ ಗೆಲಾ." ಖಾಸ್ ಮಂತ್ರಿನ್ ವರ್‍ದಿ ದಿಲಿ.
"ಲೊಕಾ ಮಧೆಂ ಎಕ್ವಟ್ ನಾಸ್ತಾನಾ ಮಾರ್ನ್ ಪಡ್ಲೆ ತರ್ ಆಮ್ಚೆ ಸರ್‍ಕಾರಾಕ್ ಬಾಧಕ್ ನಾ. ಮ್ಹಳ್ಯಾರ್ ತಾಂಕಾಂ ಆಮ್ಚೆ ವಿಶಿಂ ಚಿಂತುಂಕ್ ವೇಳ್ ನಾ ಮ್ಹಣ್ ಜಾಲೆಂ. ಹೆರ್ ಕಿತೆಂಯಿ ಸಮಸ್ಯಾ?" ರಾಯಾನ್ ಹಾಸೊನ್ ಸವಾಲ್ ಕೆಲೆಂ.
"ವಯ್ ಹುಜೂರ್. ಏಕ್ ವಡ್ಲಿ ಸಮಸ್ಯಾ ಉದೆಲ್ಯಾ" ಖಾಸ್ ಮಂತ್ರಿ ನರ್‍ಗೊನ್ ಮ್ಹಣಾಲೊ. "ಪರ್‍ಗಾಂವಾಚಾ ಭಂವ್ಡೆಚೊ ಖರ್ಚ್ ಮೀತ್ ಚುಕೊನ್ ಖಜಾನ್ ಖಾಲಿ ಜಾಲ್ಯಾಂ. ಆಮ್ಕಾಂ ಧನಾಚಿ ಗರ್ಜ್ ಆಸಾ."
"ಹ್ಯಾ ಸಮಸ್ಯಾಕ್ ಮ್ಹಜೆಲಾಗಿಂ ಪರ್‍ಯಾರ್ ಆಸಾ." ರಾಯಾನ್ ಚಿರ್‍ಪುಟ್ ಮಾರ್‍ಲೆಂ.
"ಕಿತೆಂ ಕರ್‍ಚೆಂ ಹುಜೂರ್?"
"ಆದ್ಲೆ ರಾಯಾಂನಿ ಎಕ್ಟಾಂಯಿ ಕೆಲ್ಲಿ ಜಾಯ್ತಿ ಸಂಪತ್ತಿ ಸರ್‍ಕಾರಾಚಾ ಅಧೀನ್ ಆಸಾ. ತಿ ವಿಕುನ್ ಆಮಿ ಧನ್ ಜಮೊ ಕರ್‍ಯಾಂ. ಆಮ್ಚಾ ಖರ್‍ಚಾಕ್ ದರಬಸ್ತ್ ಪುರೊ." ರಾಯಾನ್ ಪರ್‍ಯಾರ್ ದಿಲೊ.
"ತಶೆಂಚ್ ಕರ್‍ಯಾಂ. ತುಮಿ ನಿಜಾಯ್ಕಿ ಬುಧ್ವಂತ್. ಹೊ ಪರ್‍ಯಾರ್ ತುಮ್ಚಾ ಮತಿಕ್ ಆಯ್ಲೊ ತರೀ ಕಸೊ?" ಖಾಸ್ ಮಂತ್ರಿ ಜಾಪ್ ಆಯ್ಕೊಂಕ್ ಆತುರಿತ್ ಜಾಲೊ.
"ಜಿಣ್ಯೆಚೊ ಆನ್ಬೋಗಾ ಪ್ರಾಸ್ ವರ್‍ತೊ ಮೇಸ್ತ್ರಿ ದುಸ್ರೊ ನಾ." ರಾಯಾನ್ ವ್ಹಡಾ ಅಭಿಮಾನಾನ್ ಕಳಿತ್ ಕೆಲೆಂ. "ಹಾಂವ್ ದುಬ್ಳೆ ಕುಟ್ಮಾಂತ್ ಜಲ್ಮಾಲ್ಲೊಂ. ಹಾಂವ್ ಲ್ಹಾನ್ ಆಸ್ತಾನಾ, ಆಮ್ಚೆ ಘರಾ ಖರ್‍ಚಾಕ್ ಪಯ್ಶೆ ನಾತ್‍ಲ್ಲ್ಯಾ ವೇಳಾರ್ ಮ್ಹಜೊ ಬಾಪಯಿ ಕಿತೆಂ ಕರ್‍ತೊಲೊ ಜಾಣಾಂಯಿ? ಘರ್‍ಚೊ ವಸ್ತು ವಿಕುನ್ ತಾಣೆಂ ಕುಟ್ಮಾಚಿ ಜತನ್ ಘೆತ್‍ಲ್ಲಿ. ತಾಣೆ ಘರ್‍ಚಿಂ ಮೆಜಾಂ-ಕದೆಲಾಂ ಮಾತ್ರ್ ನಯ್ ತೊಪ್ಲಿಂ ಸಮೇತ್ ವಿಕ್ಲ್ಯಾಂತ್. ಆಯ್ಚೆ ದೀಸಾ ಕಷ್ಟಾರ್ ಆಸ್ತಾನಾ ಆಮಿ ಪಯ್ಶಾಂ ಖಾತಿರ್ ಸರ್‍ಕಾರಾಚಿ ಸಂಪತ್ತಿ ವಿಕ್ಚಾಂತ್ ಕಿತೆಂ ಚೂಕ್?"
(ಷರೊ : ಹ್ಯಾ ಕಾಣ್ಯೆಚಿ ಕಥಾ ವಸ್ತ್, ಪಾತ್ರ್, ವರ್‍ಣನ್, ಸಂಭಾಷಣ್ ಆನಿ ಅಭಿವೆಕ್ತ್ ಕಾಲ್ಪನಿಕ್ ವರ್‍ಗಾಚೆಂ. ಜೀವಂತ್ ಯಾ ಮೆಲ್ಲ್ಯಾ ಮನ್ಶಾಂಕ್ ತಾಳ್ ಪಡ್ತಾ, ಪ್ರತ್ಯೇಕ್ ಜಾವ್ನ್ ನಿರ್‍ಜೀವ್ ಕೊಶೆಡ್ತಾಂಕ್ ಧೊಸ್ತಾ ತರ್ ತೆಂ ಆಕಸ್ಮಿಕ್ ಆನಿ ಉದ್ದೇಶ್‍ರಹಿತ್).
Tags:
NRI King, Stan Ageira, Konkani Short Story, Konkani Story, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/24/2020 ಉದೆಂತಿಚೆಂ ನೆಕೆತ್ರ್...
-
11/28/2020 ಚೂಕಿ ತಿದ್ವಿನಾ ಜಾಲ್ಯಾರ್!...
-
11/4/2020 ಅನಿವಾಸಿ ರಾಯ್...
-
10/23/2020 ಘಾಣ್...
-
-
9/13/2020 ರಾತ್ ಪಾಳಿ...
-
6/18/2018 ವೆಚಿಕ್ ಪುತಾಚೊ ದಾಟ್ಟು...
-
11/12/2017 ನ್ಯೂ ಐನ್‌ಸ್ಟೀನ್...
-
9/7/2017 ಮ್ಹಜ್ಯಾ ಮೊಗಾಚೆಂ ಮೆಲ್ಬಾ...
-
8/29/2017 ಕೊಲ್‍ಗರ್ಲ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.