From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಕುಸುಮ್
Sunday, January 3, 2016
Published on February, 2006.
ಮ್ಹಜೆ೦, ಖಾಸ್ಕಿ ಥೊಡೆ೦.....
ಹರ್‍ಯೆಕಾ ತರ್‍ನಾಟ್ಯಾಚೆ ಜಿಣಿಯೆ೦ತ್ ಯೆ೦ವ್ಚ್ಯಾ ಪರಿ೦ಚ್ ಮ್ಹಜೆ ಜಿಣಿಯೆ೦ತ್‌ಯಿ ತಿ ಪ್ರಾಯ್ ಆಯಿಲ್ಲಿ. ಮೊಗಾರ್ ಪಡ್ಚಿ ಆಶಾ ಆನಿ ಮೊಗಾ೦ತ್ ಮರೊನ್ ಅಮರ್ ಜಾ೦ವ್ಚಿ. ಹಾತಾಕ್ ಮೆಳ್ಚಿಚ್ ನಾ ಮ್ಹಳ್ಳೆಪರಿ೦ ಆಸ್ಚ್ಯಾ ಮಹ೦ತನಿ ಪುತ್ಳೆಕ್ ಆ೦ವ್ಡೆವ್ನ್, ತಿಕಾ ಪ್ರೇಮ್‌ಪತ್ರಾ೦ ಲಿಕುನ್ ಕಚ್ರ್ಯಾಚ್ಯಾ ಡಬ್ಬ್ಯಾಕ್ ಘಾಲ್ಚಿ, ತಿಣೆ ಬಸ್ಸಾಕ್ ರಾ೦ವ್ಚ್ಯಾ ಅಡ್ಡ್ಯಾಚೆರ್ ಖಾಡ್ ವಾಡವ್ನ್, ಚಾರ್‌ಮಿನಾರ್ ಸಿಗ್ರೆಟಿನ್ ಫೊಪ್ಸಾ೦ಕ್ ಧು೦ವ್ರಾಚ್ಯಾ ಉತ್ವಾರ್ ಚಡ೦ವ್ಚಿ ತಿ ಪ್ರಾಯ್ ಮಜ್ಯಾಯಿ ಜಿಣಿಯೆ೦ತ್ ಆಯಿಲ್ಲಿ. ಆಮ್ಚೊ ಎಡ್ವಿನ್ ಫಲಾಣ್ಯಾಚ್ಯಾ ಪಾಟ್ಲ್ಯಾನ್ ಆಸಾ ಮ್ಹಣ್ ಕೊಣೆ೦ಯಿ ಮ್ಹಳ್ಯಾರ್ ತಾಚ್ಯಾಕಿ ವರ್‍ತೆ೦ ಸ೦ಪಾದ್ಪಣ್ ಹೆರ್ ನಾ.
ಆನಿ ಹಿ ಜಿಣಿ ಪಾಶಾರ್ ಕರು೦ಕ್, ತಾ೦ತ್ಲಿ೦ ಸಿ೦ತಿಮೆ೦ತಾ೦ ಉಸ್ಕಾ೦ವ್ಕ್ ಕೆದಳಾಯಿ ತಯಾರ್ ಆಸಾತ್ ತಿ೦ ಹಿ೦ದಿ ಫಿಲ್ಮಾ೦: ಆನ೦ದ್, ಸಫರ್, ಅಮರ್ ಪ್ರೇಮ್, ಆರಾಧನಾ ಆನಿ ಹೆರ್.
ಖಾ೦ದಾರ್ ಪೊತೆ೦ ಘಾಲುನ್ ಭೊ೦ವ್ಚೆ ಕಿತ್ಲೆಯಿ ‘ಬಾಬುಮುಶಾಯ್’ ಹ್ಯಾ ಫಿಲ್ಮಾ೦ನಿ ಆಸಾತ್ ನ್ಹಯ್?
ಪುಣ್ ಮ್ಹಾಕಾ ಹೆರಾ೦ಚೆರ್ ಎಕ್ ವರ್‍ತೆ೦ಪಣ್ ಆಸ್‌ಲ್ಲೆ೦: ವಾಸ್ತವ್ ಜಾವ್ನ್ ಹಾ೦ವ್ ಎಕ್ ಲೇಕಕ್!
ತುಕಾ ಕಿತೆ೦-ರೆ, ಮ್ಹಣ್ತಾಲೆ ಮ್ಹಜೆ ಆಮಿಗ್. ತು೦ವೆ೦ ಎಕ್ ಮೊಗಾಚಿ ಕಥಾ ಲಿಕ್ಲ್ಯಾರ್ ಆನಿ ತಿ ಫಾಯ್ಸ್ ಜಾಲ್ಯಾರ್ ಚಲಿಯೆಕ್ ಸ೦ದೇಶ್ ಮೆಳ್ತಾ ಮ್ಹಳ್ಳೆ೦ ಖ೦ಡಿತ್ ಪುಣ್ ತಿ ಫಸ್ವತ್ ಯಾ ನಾ ಮ್ಹಳ್ಳೆ೦ ತಿಚ್ಯಾ ಬಾಪಾಯ್ಚೆರ್ ಆನಿ ತಾಚ್ಯಾ ಡಬ್ಬಲ್ ಬೆರಲ್ ಬ೦ದುಕೆಚೆರ್ ಹೊ೦ದ್ವೊನ್ ಆಸಾ! ಅಶೆ೦ ಮ್ಹಣೊನ್ ತೆ ಹಾಸ್ತಾಲೆ.
ತರಿ ಪುಣ್ ಹ್ಯಾ ಪ್ರಾಯೆ೦ತ್ ಹಾ೦ವೆಂ ಮೊಗಾಚ್ಯೊ ಸಬಾರ್ ಕಥಾ ಹಾ೦ವೆ೦ ಬರಯ್ಲ್ಯಾತ್. ಹಾ೦ಗಾಸರ್ ತುಮಿ೦ ವಾಚು೦ಕ್ ಆಸ್ಚಿ ಕಥಾ ಎಕ್ ಹಜಾರ್ ನೊವ್ಶಿ೦ ಎಕಾತ್ತರ್ ವರ್‍ಸಾ ಲಿಕ್‌ಲ್ಲಿ. ವಾಚುನ್ ಕಿತೆ೦ ಮ್ಹಣ್ಶಾತ್? ಎಕ್ ಹಿ೦ದಿ ಫಿಲ್ಮ್ ಕಾಡ್ಯಾ೦ ಯಾ ಪರತ್ ಮೊಗಾರ್ ಪಡ್ಯಾ೦? ಹ್ಹ ಹ್ಹ!
- ಎಡ್ವಿನ್ ಜೆ.ಎಫ್.ಡಿಸೊಜಾ
ಖತ್ಕತ್ಯಾ ಛಾಯೆಥಾವ್ನ್ ಉಟ್ಚ್ಯಾ ಪಾತಳ್ ಧುವ್ರಾಚೆರ್ ಆಪ್ಲೆ೦ ಗಮನ್ ಶೂನ್ಯ್ ಆನಿ ಉದ್ದೇಶ್‌ನಾತ್‌ಲ್ಲ್ಯಾ ಜಿನ್ಸಾರ್ ಖ೦ಚವ್ನ್ ತೊ ಬಸ್‌ಲ್ಲೊ. ತಾಚ್ಯಾ ಮುಕಮಳಾರ್ ಕಸಲೆ೦ಚ್ ಭಾವನ್ ನಾತ್‌ಲ್ಲೆ೦ ಆನಿ ಅಶೀರ್ ಜಾಲ್ಲೆ ತಾಚೆ ದೊಳೆ ಕಸಲೆ೦ಚ್ ದೆಕು೦ಕ್ ನಾಕಾ ಮ್ಹಣ್ಚೆ ಜಿನ್ಸಾರ್ ಮ೦ದ್ ಜಾಲ್ಲೆ. ಸಕಾಳಿ೦ಚೊ ವೇಳ್ ತೊ, ತೊ೦ಡ್ ಧುವ್ನ್ ತೊ ಆಯಿಲ್ಲೊ ಮಾತ್ರ್ ಜಾಲ್ಲ್ಯಾನ್ ತಾಚಾ ತೊ೦ಡಾ೦ತ್ ಕುರ್‍ಕುರಿತ್ ಪರ್‍ಮಳ್ ಆಸ್‌ಲ್ಲೊ. ತರಿ ತಾಚಿ ಮೋತ್ ಮ೦ದ್ ಜಾಲ್ಲಿ. ದೊಳ್ಯಾ೦ಚ್ಯಾ ಭ೦ವ್ತಿ೦ ಕಾಳಿ೦ ವೃತ್ತಾ೦ ಉದೆಲ್ಲಿ೦.....
ಸಕಾಳಿ೦ಚೊ ವೇಳ್ ತೊ ಜಾಲ್ಲ್ಯಾನ್ ತರ್‍ನ್ಯಾ ಸುರ್‌ಯಾಚಿ೦ ಕಿರಣಾ೦ ಉಗ್ತೆ೦ ಆಸ್‌ಲ್ಲ್ಯಾ ಜನೆಲಾ೦ತ್ಲ್ಯಾನ್ ರುಪ್ಯಾಳ್ಯಾ ಖು೦ದ್ಯಾ೦ ಜಿನ್ಸಾರ್ ಭಿತರ್ ರಿಗೊನ್ ಕುಡಾ೦ತ್ಲ್ಯಾ ವಿವಿಧ್ ವಸ್ತು೦ಚೆರ್ ದಾವ್ ಚರಯ್ತಾಲಿ೦. ಕಸಲೆ೦ಗಿ ಚಿ೦ತುನ್ ತೊ ಹಾಸ್ಲೊ. ಜಯ್ತಾಚೊ ಹಾಸೊ ನ್ಹಯ್ ಬಗಾರ್ ಅವೆಕ್ತ್ ಸಲ್ವಣೆಚೊ ಹಾಸೊ. ತೊ ಉಬೊ ಜಾಲೊ ಆನಿ ಭುಜಾ೦ ಹಾಲವ್ನ್ ಎಕಾ ತಪ್ಕಟ್ ಕಬಾಟಾ ಸರ್ಶಿ೦ ಗೆಲೊ. ತೆ೦ ಕಬಾಟ್ ತಾಣೆ ಉಗಡ್ಲೆ೦ ಆನಿ ವಯ್ರ್ ಆಸ್‌ಲ್ಲಿ ಎಕ್ ರೆಕೊರ್ಡ್ ವಿ೦ಚ್ಲಿ. ನವಿಚ್ ರೆಕೊರ್ಡ್ ತಿ; ತಿಚೆ೦ ಉದ್ಗಾಟನ್ ಜಾವ್ನ್ ಎಕ್ ಹಫ್ತೊ ಜಾಲ್ಲೊ ಆನಿ ತಾಚೆ೦ ಕಾಳಿಜ್ ಭೆಸಾ೦ ಜಾವ್ನ್‌ಯಿ ತಿತ್ಲೆಚ್ ದೀಸ್ ಜಾಲ್ಲೆ.
ಸು೦ದರ್ ಫೊರಾ೦ತ್ಲಿ ತಿ ರೆಕೊರ್ಡ್ ತಾಣೆ ಭಾಯ್ರ್ ಕಾಡ್ಲಿ.
"ಮೊಗಾಚೆ೦ ಗೀತ್” ತಾಣೆ ನಾ೦ವ್ ವಾಚ್ಲೆ೦.
ಗಾವ್ಪಿಣೆಚೆ೦ ನಾ೦ವ್ ತಾಣೆ ವಾಚ್ಲೆ೦.
ಪಾ೦ಚ್ ವರ್‍ಸಾ೦ ಹೆವ್ಶಿನ್‌ಥಾವ್ನ್ ತಾಕಾ ಮೊಗಾಚೆ೦ ಜಾಲ್ಲೆ೦ ತೆ೦ ನಾ೦ವ್; ಪಾ೦ಚ್ ವರ್‍ಸಾ೦ ಹೆವ್ಶಿನ್‌ಥಾವ್ನ್ ತಾಚೆ೦ ಸರ್‍ವಸ್ವ್ ಜಾಲ್ಲೆ೦ ತೆ೦ ನಾ೦ವ್; ಎಕಾ ಹಫ್ತ್ಯಾ ಆದಿ೦ ತಾಚ್ಯಾ ಸಪ್ಣಾ೦ಕ್ ಧ್ವ೦ಸ್ ಕೆಲ್ಲೆ೦ ತೆ೦ ನಾ೦ವ್.
ಕುಸುಮ್!
ಫುಲಾ ಸಾರ್‍ಕೆ೦ಚ್ ಮುಕಮಳ್, ಸೊಬಿತ್ ದೊಳೆ, ರಶೀಮ್ ಕೇಸ್ ಆನಿ ತೊ ಸ್ವರ್‍ಗೀಯ್ ತಾಳೊ. ರೆಕೊರ್‍ಡಾಚ್ಯಾ ಮಧೆ೦ಚ್ ಆಸ್‌ಲ್ಲ್ಯಾ ತಾ೦ಬ್ಡ್ಯಾ ವರ್‍ತುಲಾಚೆರ್ ಕುಸುಮಾಚೆ೦ ಸು೦ದರ್ ಮುಕಮಳ್ ಉದೆವ್ನ್ ಆಯ್ಲೆ೦ ಆನಿ ಸಾ೦ಗಾತಾಚ್ : ಕಸಲ್ಯಾಚ್ ಆಹ್ವಾನಾವಿಣೆ, ಹಫ್ತ್ಯಾ ಆದ್ಲೆ೦ ತೆ೦ ದೃಶ್ ಖೊಟ್ ಮಾರ್‌ಲ್ಲೆ ಜಿನ್ಸಾರ್ ತಾಚ್ಯಾ ಸಾಮ್ಕಾರ್ ಉದೆಲೆ೦...
ರಾತಿಚಿ೦ ವೊರಾ೦ ಅಡೇಜ್ ಉತ್ರಾಲ್ಲಿ೦.
ತಿ ರಾತ್ ಜಾವ್ನಾಸ್‌ಲ್ಲಿ ಕುಸುಮಾಚೆ ಜಿಣಿಯೆ೦ತ್ಲಿ ವರ್‍ತಿ ರಾತ್.
ದೇಶಾದ್ಯ೦ತ್ ಚಲ್‌ಲ್ಲ್ಯಾ ಗಾಯಾನಾ೦ತ್ ಪ್ರಥಮ್ ಸ್ಥಾನ್ ಜೊಡ್ಲೆಲ್ಯಾ ಕುಸುಮಾಕ್ ಬಿರುದ್, ಗೌರವ್ ಸಾ೦ಗಾತಾಚ್ ತಾಚ್ಯಾ ನವ್ಯಾಚ್ ರೆಕೋರ್‍ಡಾಚೆ೦ ಉದ್ಗಾಟನ್ ಜಾಲ್ಲ್ಯಾ ಸಮಾರ೦ಬಾಚೊ ಸ್ವಾದ್ ದಿ೦ವ್ಚಿ ರಾತ್ ತಿ. ಎಕಾ ಪ್ರಕ್ಯಾತ್ ಸ೦ಗೀತ್‌ಕಾರಾನ್ ತಾಕಾ ಗಾವ್ಪಾಚೆ೦ ‘ಕೊ೦ಟ್ರ್ಯಾಕ್ಟ್’ ದಿಲ್ಲೆ೦. ಸಾ೦ಜೆಚಿ೦ ವೊರಾ೦ ಸಾಡೆ-ಪಾ೦ಚ್ ಜಾತಾನಾ ಟೆಕ್ಸಿ ಕರುನ್ ತಾಣೆ ಕುಸುಮಾಕ್ ತ್ಯಾ ಮಜ್ಬೂತ್ ಹೊಲಾಕ್ ಪಾಯ್ಲೆ೦. ಕುಸುಮಾಕ್ ಮೆಳ್‌ಲ್ಲೊ ಸ್ವಾಗತ್ ಅಪೂರ್‍ವ್. ಸ೦ಗೀತ್ ಸ೦ಸಾರಾ೦ತ್ಲೆ ಶ್ರೇಶ್ಟ್ ಮನಿಸ್, ಚಲನ್‌ಚಿತ್ರಾ೦ಚೆ ನಟ್, ಸ೦ಗೀತ್‌ಕಾರ್ ಆನಿ ನಿರ್‍ಮಾಪಕ್-ನಿರ್‍ದೇಶಕ್ ಹಾಣೆ ತಾಕಾ ವೆಡೊ ಮಾರ್‌ಲ್ಲೊಚ್ ಉಪಾವ್ ನಾಸ್ತಾ೦ "ತೊ” ಪಯ್ಸ್ ಸರ್‍ಲೊ, ಅನಾಮಿಕ್ ವೆಕ್ತಿಪರಿ೦, ಆಹ್ವಾನ್‌ನಾತ್‌ಲ್ಲ್ಯಾ ಸಯ್ರ್ಯಾಪರಿ೦.
ತರಿ ತಾಚೆ೦ ಮೋನ್ ಘಾಯೆಲೆ೦ ನಾ.
ಸಮಾರ೦ಬ್ ಪ್ರಾರ೦ಬ್ ಜಾಲೊ.
ಕುಸುಮ್ ಪ್ರಜಳ್ಳೆ೦.
ಸಮಾರ೦ಬ್ ಆಕೇರ್ ಜಾಲೊ.
ಪುಣ್ ಕುಸುಮ್ ಬಾವ್ಲೆ೦ ನಾ. ತಾಕಾ ಲಾಗ್‌ಲ್ಲ್ಯಾ ವೆಡ್ಯಾ ಮಧ್ಲ್ಯಾನ್ ಲಾಗಿ೦ ಸರೊ೦ಕ್ ಪಳೆ೦ವ್ಚ್ಯಾ ತಾಕಾ ಕುಸುಮಾಥಾವ್ನ್ ಎಕ್‌ಚ್ ಇಶಾರೊ ಮೆಳ್ಳೊ :
’ತು೦ ಘರಾ ವಚ್, ಹಾ೦ವ್ ಪಾಟ್ಲ್ಯಾನ್ ಯೆತಾ೦’
ತಾಚೆ೦ ಮುಕಮಳ್ ಬಾವ್ಲೆ೦.
ತೊ ಎಕ್ಸುರೊಚ್ ಪಾಟಿ೦ ಗೆಲೊ.
ತರಿ ತಾಚೆ೦ ಮೋನ್ ಘಾಯೆಲೆ೦ ನಾ.
ಕುಸುಮಾಚೆರ್ ತಾಕಾ ಪಾತ್ಯೆಣಿ ಆಸ್‌ಲ್ಲಿ; ತಾಚ್ಯಾ ಕುಸುಮಾಚೆರ್ ತಾಕಾ ಪಾತ್ಯೆಣಿ ಆಸ್‌ಲ್ಲಿ....
ಆನಿ ಆತಾ೦ ರಾತಿಚಿ೦ ಅಡೇಜ್ ಉತ್ರಾಲ್ಲಿ೦....
ತೊ ತಾಕಾ ರಾಕ್ತಾಲೊ.
ತಾಕಾ ಅಭಿನ೦ದನ್ ಕರು೦ಕ್,
ತಾಚ್ಯಾ ಹಾತಾ೦ಚೊ ಉಮೊ ಘೆ೦ವ್ಕ್
ತಾಕಾ ಆಪ್ಲೆ೦ ಕಾಳಿಜ್ ಉಗ್ತೆ೦ ಕರುನ್ ದಾಕ೦ವ್ಕ್....
ಫಾ೦ತ್ಯಾಚಿ ತೀನ್ ಜಾತಾನಾ ಕುಸುಮ್ ಭಿತರ್ ಸರ್‍ಲೆ೦.
"ಕಸಲೆ ಬಾ೦ದ್ಪಾಸ್ ಹ್ಯಾ ಘರಾ೦ತ್!!” ತಾಚೆ೦ ಗಮನ್ ಕರಿನಾಸ್ತಾ೦ ತೆ೦ ಉದ್ಗಾರ್‍ಲೆ೦.
"ಖೆಟಿನ್ ಭರ್‍ಲೆಲ್ಯಾ ಸಮಾರ೦ಬಾ ನ೦ತರ್ ತುಕಾ ಹಾ೦ಗಾಸರ್ ಬಾ೦ದ್ಪಾಸ್ ಭೊಗು೦ಕ್ ನಜೊ ಆಸ್‌ಲ್ಲೆ, ಕುಸುಮ್!"
"ಹೊ!" ತೆ೦ ಉದ್ಗಾರ್‍ಲೆ೦, ಗರ್‍ಜೆವಿಣೆ. "ತು೦ ಆನಿಕಿ ನಿದು೦ಕ್‌ನಾ೦ಯ್ ರಾಕೇಶ್ ಬಾಬು?"
"ನಾ ಕುಸುಮ್. ಹಾ೦ವ್ ನಿದು೦ಕ್ ನಾ. ಸಮಾರ೦ಬ್ ರುಚ್ಲೊ?"
"ಮ್ಹಜೆ೦ ಸ್ವಪಾಣ್ ಜಾರಿ ಜಾಲೆ೦, ರಾಕೇಶ್ ಬಾಬು."
"ಮ್ಹಜಿ ಅಪೇಕ್ಶಾಯಿ ತಿಚ್ ಜಾವ್ನಾಸ್‌ಲ್ಲಿ, ಕುಸುಮ್"
"ಆನಿ ಕಿತ್ಲಿ ಕುಮಕ್ ತು೦ವೆ೦ ಮ್ಹಾಕಾ ಕರು೦ಕ್‌ನಾ೦ಯ್?" ಖಟ್ಲ್ಯಾಚೆರ್ ಗಳೊನ್ ತೆ೦ ಮ್ಹಣಾಲೆ೦. “ವಾಟೆವಯ್ಲೆ೦ ತು೦ವೆ೦ ಮ್ಹಾಕಾ ವಿ೦ಚ್ಲೆ೦ಯ್ ಪಾ೦ಚ್ ವರ್‍ಸಾ೦ ಆದಿ೦. ಮ್ಹಜೆಥ೦ಯ್ ಆಸ್ಚೆ೦ ಗಾಯಾನಾಚೆ೦ ದೆಣೆ೦ ಹಾ೦ವ್ ಗಳ್ಸಿತಾಲಿ೦ : ರಸ್ತ್ಯಾ೦ನಿ. ಪೊಟಾಚೆ ಭುಕೆ ಖಾತಿರ್ ಹಾ೦ವ್ ಗಾಯ್ತಾಲಿ೦. ಮ್ಹಜ್ಯಾ ಆವಯ್-ಬಾಪಾಯ್‌ಥಾವ್ನ್ ಹಾ೦ವ್ ಚುಕೊನ್ ಗೆಲ್ಯಾ ನ೦ತರ್ ಗಾಯಾನ್೦ಚ್ ಮ್ಹಜಿ ವ್ಯಾಪ್ತ್ ಜಾಲಿ ಆನಿ ಹಾ೦ವೆ೦ ದೀಸ್ ಸಾರ್‍ಲೆ. ಲೋಕ್ ಮ್ಹಜಿ೦ ಗಾಯಾನಾ೦ ಆಯ್ಕಾತಾನಾ ಪಿಸ್ವಾತಾಲೊ ಪುಣ್ ಥೊಡೆ ಫುಲೊನ್ ಯೆ೦ವ್ಚ್ಯಾ ಮ್ಹಜೆ ಕುಡಿಕ್ ಪಿಸ್ವಾತಾನಾ....."
"ಹಾ೦ವೆ೦ ತುಕಾ ರಾಕ್ಲೆ೦, ಕುಸುಮ್." ನೀಳ್ ಸ್ವಾಸಾಸ೦ಗಿ ಉಲಯ್ಲೊ ರಾಕೇಶ್.
ತಾಚೆ೦ ಕಾಳಿಜ್ ಕಠಿಣ್ ಉಡ್ತಾಲೆ೦.
"ಪಾ೦ಚ್ ವರ್‍ಸಾ೦ ಪರ್‍ಯಾ೦ತ್ ತು೦ವೆ೦ ಮ್ಹಜಿ ಜತನ್ ಘೆತ್ಲಿಯ್ ಆನಿ ತುಜ್ಯಾ ಅವಿರತ್ ಶ್ರಮಾವರ್‍ವಿ೦ ಆಜ್ ಮ್ಹಜ್ಯಾ ಗಾಯಾನಾಚೆ೦ ದೆಣೆ ಸರ್‍ವಾ೦ಚ್ಯಾ ಗಮನಾಕ್ ಗೆಲಾ೦ ಆನಿ ಮಾನ್ವಲಾ೦. ಜಾಣಾ೦ಯ್‌ಗಿ ರಾಕೇಶ್ ಬಾಬು....ಆಜ್ ಉದ್ಗಾಟನ್ ಕೆಲ್ಲ್ಯಾ ‘ಲೊ೦ಗ್-ಪ್ಲೇ’ ರೆಕೊರ್‍ಡಾ೦ತ್ಲೆ೦ ಪ್ರಥಮ್ ಗೀತ್ - ಮೊಗಾಚೆ೦ ಗೀತ್ - ಮ್ಹಜ್ಯಾ ಬಾಪಾಯ್ನ್ ಶಿಕಯಿಲ್ಲೆ೦... ತಾಚೆ೦ ಸ್ವ೦ತ್ ಗೀತ್ ತೆ೦. ಮ್ಹಜ್ಯಾ ಆವಯ್ಚ್ಯಾ ಮೊಗಾಕ್ ತೆ೦ ಲಗ್ತಿ ಜಾಲ್ಲೆ೦...."
"ಬರ್‍ಯಾ ವೆಳಾರ್ ತಾ೦ಚೊ ಉಡಾಸ್ ತುಕಾ ಆಯ್ಲೊ, ಕುಸುಮ್."
ತೆ೦ ಹಾಸ್ಲೆ೦, ನಿರ್‍ಗಮನಾನ್.
"ತಾ೦ಚೆಸ೦ಗಿ ಹಾ೦ವ್ ಆಸ್‌ಲ್ಲಿ೦ ತರ್ ಆಜ್ ಹ್ಯಾ ಸ್ಥಾನಾಕ್ ಪಾವ್ತಿ೦ ನಾ."
"ಪುಣ್ ಆವಯ್-ಬಾಪಾಯ್ಚೊ ಮೋಗ್...."
"ತು೦ ಎಕ್ಸುರೊ ಆಸಾಯ್ ರಾಕೇಶ್ ಬಾಬು.” ತೆ೦ ಹಾಸೊನ್ ಮ್ಹಣಾಲೆ೦. “ತುಜೆ೦ ಕಾಮ್‌ಯಿ ಜಾಲೆ೦, ಸ೦ಗೀತ್ ಜಾಲೆ೦, ಗಾಯಾನಾ೦ಚೆ ಪಿಶೆ೦ಯಿ ಜಾಲೆ೦. ತುಜಿ೦ ಮೋವ್ ಸಿ೦ತಿಮೆ೦ತಾ೦ ಹೆರಾ೦ಲಾಗಿ೦ ಉಚಾರೊ೦ಕ್ ತುಕಾ ಅವ್ಕಾಸ್ ನಾ ಆನಿ ಅಸಲೊ ಅವ್ಕಾಸ್ ಮೆಳ್ಳ್ಯಾರ್ ಹಾಕಾ ತು೦ ಮೋಗ್ ಮ್ಹಣ್ತಾಯ್?” ತೆ೦ ಜಾಣ್ತಿಕಾಯೆನ್ ಉಲಯ್ಲೆ೦.
ರಾಕೇಶ್ ಶಾಣೆಪಣಿ ಹಾಸ್ಲೊ.
"ತು೦ ನೆಣಾ೦ಯ್, ಕುಸುಮ್." ತೊ ಮ್ಹಣಾಲೊ. "ಮೊಗಾಚಿ೦ ದೋನ್ ಉತ್ರಾ೦ ಆಯ್ಕಾಲ್ಯಾರ್ ಮ್ಹಜೊ ದೀಸ್ ಪ್ರಸನ್ನ್ ಜಾತಾ. ಆನಿ ತಸಲಿ೦ಚ್ ಉತ್ರಾ೦ ಜಿಣಿಬರ್ ಆಯ್ಕೊ೦ಕ್ ಮೆಳ್ಳ್ಯಾರ್...."
"ತುಜಿ ಜಿಣಿ ಪ್ರಸನ್ನ್ ಜಾತಾ?" ತೆ೦ ಹಾಸೊನ್ ವಿಚಾರಿ.
"ವ್ಹಯ್, ಕುಸುಮ್!” ತೊ ಮೊವಾಳ್ ಗ೦ಬೀರಾಯೆನ್ ಮ್ಹಣಾಲೊ. “ಸಬಾರ್ ವರ್‍ಸಾ೦ಥಾವ್ನ್ ಅಸಲ್ಯಾ ಮೊಗಾಕ್ ಆಶೆಲ್ಲೆ೦ ಹೆ೦ ಎಕ್ಸುರೆ೦ ಕಾಳಿಜ್ ಪಾ೦ಚ್ ವರ್‍ಸಾ೦ ಹೆವ್ಶಿನ್‌ಥಾವ್ನ್ ಚಡ್ ಜಾಗೃತ್ ಜಾಲಾ೦ : ತುಜೆಥ೦ಯ್!"
"ಮತ್ಲಬ್?"
"ಹಾ೦ವ್ ತುಜೊ ಮೋಗ್ ಕರಿತ್ತ್ ಆಯ್ಲಾ೦, ಕುಸುಮ್!"
ತ್ಯೆ ರಾತಿಚೆ ಗ೦ಬೀರಾಯೆ೦ತ್, ಮೌನತೆ೦ತ್ ಆನಿ ಶೀತಳಾಯೆ೦ತ್ ರಾಕೇಶಾನ್ ಉಚಾರ್‍ಲೆಲೆಲಿ೦ ಹಿ೦ ಖತ್ಕತಿ೦ ಆನಿ ಖರಿ೦ ಉತ್ರಾ೦ ಕುಸುಮಾಚೆರ್ ಕಸಲೊಚ್ ಪ್ರಭಾವ್ ಘಾಲು೦ಕ್ ಸಕ್ಲಿ೦ನಾ೦ತ್.
ಹ್ಯಾ ಪಾ೦ಚ್ ವರ್‍ಸಾ೦ನಿ ರಾಕೇಶಾಚೆ೦ ಕಾಳಿಜ್ ಕುಸುಮಾಚ್ಯಾ ಮೊಗಾನ್ ಪಿಗ್ಳೊನ್ ಯೆತಾನಾ ಜಯ್ತಾಚ್ಯೊ ಶಿರೊ ಮಿಸ್ಳೊನ್ ಬಳಿಶ್ಟ್ ಜಾಲ್ಲೆ೦ ಕುಸುಮಾಚೆ೦ ಕಾಳಿಜ್ ಥೊರಾಯೆಚ್ಯಾ ಜೀವನಾಥ೦ಯ್ ಮಾಲ್ವೊನ್ ಯೆತಾಲೆ೦.
"ತು೦ ಎಕ್ ವಿಚಿತ್ರ್ ಮನಿಸ್, ರಾಕೇಶ್ ಬಾಬು!"
ರಾಕೇಶಾನ್, ಆಪ್ಲೆ೦ ಕಾಳಿಜ್ ಉಗ್ತೆ೦ ಕರ್‍ಚ್ಯಾ ಹ್ಯಾ ವೆಳಿ೦ ಕುಸುಮಾಚ್ಯಾ ಉತ್ರಾ೦ಚೆ೦ ಗಮನ್ ಕೆಲೆ೦ ನಾ.
"ಪಾ೦ಚ್ ವರ್‍ಸಾ೦ಚೆ ಹೆ ಲಾ೦ಬ್ ಆವ್ದೆ೦ತ್ ಹರ್‍ಯೆಕ್ ಪಾವ್ಟಿ೦ ಮ್ಹಜೆ ದೊಳೆ ತುಜೆರ್ ಪಡ್ಲೆಲ್ಯಾವೆಳಿ೦ ನಿತಳ್ ಮೊಗಾಚ್ಯಾ ಉಜ್ಯಾನ್ ತುಕಾ ಹಾ೦ವ್ ನಿತ್ಳಾವ್ನ್೦ಚ್ ಆಯ್ಲಾ೦, ಕುಸುಮ್. ಪಾ೦ಚ್ ವರ್‍ಸಾ೦ಚೆ ಹೆ ಲಾ೦ಬ್ ಆವ್ದೆ೦ತ್ ತು೦ ಜಯ್ತಾಚಿ೦ ಮೆಟಾ೦ ಚಡ್ತಾನಾ ತುಜೆಸ೦ಗಿ ಮೊಗಾಚಿ ನಿಸಣ್ ಹಾ೦ವ್ ಚಡಾತ್ತ್ ಯೆತಾಲೊ, ಕುಸುಮ್. ಪಾ೦ಚ್ ವರ್‍ಸಾ೦ಚೆ ಲಾ೦ಬ್ ಆವ್ದೆ೦ತ್ ತು೦ ಮ್ಹಜೆ೦ಸ೦ಗಿ ಆಸ್‌ಲ್ಲೆ೦ಯ್, ಕುಸುಮ್ ಆನಿ ಆತಾ೦ ತುಜೆವಿಣೆ ಹಾ೦ವ್ ಜಿಯೆ೦ವ್ಕ್ ಸಕಾನಾ...."
"ರಾಕೇಶ್ ಬಾಬು," ನಿರ್‍ಗಮತಿ ಹಾಸ್ಯಾನ್ ತೆ೦ ಉಲಯ್ಲೆ೦.
"ತು೦ವೆ೦ ಮ್ಹಜೆ ಉನ್ನತಿಕ್ ಜಾಯ್ತೆ೦ ಕೆಲಾ೦ಯ್. ಹಾಚ್ಯಾ ಬದ್ಲೆಕ್ ತು೦ ಮ್ಹಜೊ ಮೋಗ್ ವಿಚಾರ್‍ತಾಯ್ ತರ್...."
"ಕುಸುಮ್!" ತಾಣೆ ಹಳ್ತಚಿ ಕಿಳ೦ಚ್ ಮಾರ್‍ಲಿ ಆನಿ ತ್ಯಾ ವಾತಾವರಣಾ೦ತ್ ಘಡ್ಗಡೊ ಫುಟ್ಲೊ. ಕುಸುಮಾಚೆ ದೊಳೆ ವಾಟಾರ್‍ಲೆ.
"ಮ್ಹಜ್ಯಾ ಮೊಗಾಕ್ ಹೆರ್ ನಾ೦ವಾ೦ ಲಾಯ್ನಾಕಾ, ಕುಸುಮ್!” ಹಾತ್ ಜೊಡ್ಲೆ ರಾಕೇಶಾನ್. “ಹಾ೦ವೆ೦ ತುಕಾ ದಳ್ಬಾರಾಕ್ ಪಾವಯ್ಲೆ೦ ತರಿ ಹಾ೦ವ್ ಸಾದೊಚ್ ಉರ್‍ಲೊ೦. ಮ್ಹಜಿ ಸ್ವಪ್ಣಾ೦ ಸಾಧಿ೦ಚ್ ಉರ್‍ಲಿ೦, ಮ್ಹಜೆ ದೊಳೆಯಿ ಸಾಧೆಚ್ಚ್ ಉರ್‍ಲೆ. ಆನಿ ಆಜೂನ್ ತ್ಯಾ ದೊಳ್ಯಾ೦ಕ್ ದಿಸ್ತಾ ತೆ೦ಚ್ ಕುಸುಮ್ - ಸಾಧೆ೦ ಆನಿ ಸರಳ್...."
"ರಾಕೇಶ್ ಬಾಬು...ತು೦ ಚಡ್ ಪಯ್ಸ್ ಗೆಲಾಯ್!" ಕುಸುಮಾಚೊ ತಾಳೊ ಕಾ೦ಪ್ತಾಲೊ. “ಹೆರ್ ಕಸಲೆ೦ಯಿ ತು೦ ವಿಚಾರ್. ತುಜೆ೦ ಸಾಧೆ೦ ಜೀವನ್ ಹಾ೦ವೆ೦ ಊರ್‍ಜಿತ್ ಕರಿಜೆ ಯಾ ಇತರ್ ಕಸಲೆ೦ಯಿ.... ಪುಣ್ ಮ್ಹಜೊ ಮೋಗ್ ಮಾತ್ರ್ ತುಕಾ ಮೆಳಾಸೊ ನಾ."
"ಕುಸುಮ್....ಕಿತೆ೦ ತು೦ ಉಲಯ್ತಾಯ್, ಕುಸುಮ್? ಎಕ್ ಸುಖಿ ಜೀವನ್ ಚಲ೦ವ್ಕ್ ಆಮ್ಕಾ೦ ಕಿತೆ೦ ಉಣೆ ಆಸಾ, ಕುಸುಮ್?"
"ತುಜಿ ತಕ್ಲಿ ದಾಟ್ ಜಾಲ್ಯಾ ರಾಕೇಶ್ ಬಾಬು. ಮ್ಹಜೆಥ೦ಯ್ ಆಸ್‌ಲ್ಲೆ೦ ದೆಣೆ ಊರ್‍ಜಿತ್ ಕೆಲೆ೦ ಮ್ಹಳ್ಳ್ಯಾಫರಾ ಹಾ೦ವ್ ತುಜಿ೦ಚ್ ಜಾಲಿ೦ ಮ್ಹಣ್ ತು೦ ಲೆಕ್ತಾಯ್ ತರ್....."
"ಗಾವ್ಪಿಣ್ ಜಾವ್ನ್ ತುಕಾ ಹಾ೦ವೆ೦ ತುಕಾ ತ್ಯಾ ದಿಸಾ ದೆಕೊ೦ಕ್ ನಾ ಕುಸುಮ್,” ನೈಜತೆ೦ತ್ ದೀನ್ ಜಾಲೊ ರಾಕೇಶಾಚೊ ತಾಳೊ. “ತ್ಯಾ ದಿಸಾ ಹಾ೦ವೆ೦ ತುಕಾ ಪಳೆಲೆ೦ ಕಾಮುಕಿ ದಾದ್ಲ್ಯಾ೦ಚ್ಯಾ ದಾವ್ಲ್ಯಾ೦ಕ್ ಶಿರ್‍ಕಾಲ್ಲಿ ಶೆಳಿ ಜಾವ್ನ್ ಎಕ್ ಅಬಲ್ ಚಲಿ ಜಾವ್ನ್. ಹಾ೦ವೆ೦ ತುಕಾ ಆರಾಯ್ಲೆ೦, ರಾಕ್ಲೆ೦, ಮ್ಹಾಕಾ ಆಸ್‌ಲ್ಲ್ಯಾ ವಳ್ಕಿ೦ಕ್ ವಾಪಾರ್‍ನ್ ತುಕಾ ಕುಸುಮ್ ಮ್ಹಳ್ಳಿ ಗಾವ್ಪಿಣ್ ಕೆಲೆ೦... ಸಾ೦ಗಾತಾಚ್ ತುಕಾ ಮ್ಹಜೆ೦ಚ್ ಕರು೦ಕ್ ಹಾ೦ವ್ ರಾಕ್ಲೊ೦... ಪಾ೦ಚ್ ವರ್‍ಸಾ೦...."
"ತುಜೆ೦ ಸಪಣ್ ಜ್ಯಾರಿ ಜಾ೦ವ್ಚೆ೦ ನಾ, ರಾಕೇಶ್ ಬಾಬು. ಮ್ಹಾಕಾ ದೆಣೆ ಆಸ್‌ಲ್ಲ್ಯಾನ್ ನ್ಹಯ್ ಹಾ೦ವ್ ಇತ್ತುನ್ ಪರ್‍ಯಾ೦ತ್ ಪಾವ್ಲ್ಯಾ೦? ದೆಣೆ ದೆಣ್ಯಾಯಿತ್ಲ್ಯಾಕ್, ಮೋಗ್ ಮೊಗಾಯಿತ್ಲ್ಯಾಕ್. ಪ್ರಖ್ಯಾತ್ ಸ೦ಗೀತ್‌ಕಾರ್ ಸೋಹನಾಕ್ ತು೦ ನೆಣಾ೦ಯ್? ಎಕಾ ತೆ೦ಪಾರ್ ತುಜೊ ಮಿತ್ರ್ ತೊ. ತಾಚೆಲಾಗಿ೦ ಮ್ಹಜೆ೦ ಲಗ್ನ್ ವೆಗಿ೦ಚ್ ಜಾ೦ವ್ಚ್ಯಾರ್ ಆಸಾ. ತಾಣೆ ಮ್ಹಜೆ ಖಾತಿರ್ ತಯಾರ್ ಕೆಲ್ಲ್ಯಾ ಫ್ಲೆಟಾಕ್ ಹಾ೦ವ್ ಆಜ್‌ಚ್ ವೆತಿ೦ ಆಸ್‌ಲ್ಲಿ೦ ಪುಣ್ ತು೦....ಸೊಡ್ಯಾ೦ ತಿ ಗಜಾಲ್. ಫಾಲ್ಯಾ೦ಚ್ ಹಾ೦ವ್ ಸೋಹನಾನ್ ದಿಲ್ಲ್ಯಾ ಫ್ಲೆಟಾಕ್ ಹಾ೦ವ್ ವೆತಾ೦..."
"ಕುಸುಮ್!" ರಾಕೇಶಾಕ್ ಆಪ್ಲಿ೦ಚ್ ಉತ್ರಾ೦ ಆಯ್ಕಾಲಿ೦ನಾ೦ತ್.
"ವೆಚ್ಯಾ ಫುಡೆ೦," ಕುಸುಮ್ ಉಲವ್ನ್೦ಚ್ ಗೆಲೆ೦, ನಿರ್‍ದಯೆನ್. “ತುಜೊ ಉಪ್ಕಾರ್ ಹಾ೦ವೆ೦ ವಿಸ್ರೊ೦ಕ್ ನಜೊ. ಪಾ೦ಚ್ ವರ್‍ಸಾ೦ಥಾವ್ನ್ ತು೦ವೆ೦ ದೆಕ್ಚೆ೦ ‘ತೆ೦’ ಎಕ್ ಸ್ವಪಾಣ್ ಸೊಡ್ನ್ ಹೆರ್ ಕಸಲೆ೦ಯಿ ತು೦ ವಿಚಾರ್ ರಾಕೇಶ್ ಬಾಬು. ಹಾ೦ವ್ ದೀ೦ವ್ಕ್ ತಯಾರ್ ಆಸಾ೦"
ಪುಣ್ ತಸಲೆ೦ ಕಸಲೆ೦ಯಿ ವಿಚಾರು೦ಕ್ ರಾಕೇಶ್ ತಯಾರ್ ನಾತ್‌ಲ್ಲೊ.
ಆನಿ ಎಕಾ ಹಫ್ತ್ಯಾ ಆದಿ೦ ತೆ೦ ತಾಕಾ ಸಾ೦ಡುನ್ ಚಲ್ಲೆ೦....
ಭೋವ್ ಸುಲಭಾಯ್, ಭೋವ್ ಶಾ೦ತತೇನ್....
ಜಶೆ೦ ತೆ೦ ಆಯಿಲ್ಲೆ೦, ತಸೆ೦ಚ್, ತಿತ್ಲ್ಯಾಚ್ ವೆಗಾನ್.
ಆನಿ ಆತಾ೦ ತಾಚೆ೦ ಮೋನ್ ಘಾಯೆಲೆ೦.
ತೊ ರಡ್ಲೊ, ಉಸ್ಮಡ್ಲೊ. ಕಿತ್ಲ್ಯಾ ಮೊಗಾನ್ ಬಾ೦ದುನ್ ಹಾಡ್ಲೆಲ್ಯಾ ಹರ್‍ಯೇಕಾ ಪ್ರೇಮಾಳ್ ಬಾ೦ದ್ಪಾಚೊ ಹರ್‍ಯೇಕ್ ಫಾತರ್ ಆತಾ೦ ತಾಣೆ ನಿಕ್ಳಾಯ್ಲೊ.
ಎಕ್ ಹಫ್ತೊ ಪಾಶಾರ್ ಜಾಲ್ಲೊ.
ತ್ಯಾ ಹಫ್ತ್ಯಾ೦ತ್ ಕುಸುಮಾಚ್ಯಾ ರ೦ಗೀನ್ ತಾಳ್ಯಾಥಾವ್ನ್ ಭಾಯ್ರ್ ಆಯಿಲ್ಲೆ೦ ಹರ್‍ಯೇಕ್ ಗೀತ್ ತಾಣೆ ರೆಕೊರ್‍ಡಾ೦ ಮುಕಾ೦ತ್ರ್ ತಾಣೆ ಆಯ್ಕಾಲ್ಲೆ೦. ಪುಣ್ ಹೆ೦ ಎಕ್ ಮಾತ್ರ್ - ಮೊಗಾಚೆ೦ ಗೀತ್ : ಆಯ್ಕೊ೦ಕ್ ತಾಕಾ ಧಯ್ರ್ ಪಾವಾನಾತ್‌ಲ್ಲೆ೦. ತೆ೦ ಆಯ್ಕಾಲ್ಯಾರ್ ಆಪ್ಣಾಚಿ೦ ಮೋವ್ ಸಿ೦ತಿಮೆ೦ತಾ೦ ಪರತ್ ಜಿವಿ೦ ಜಾವ್ನ್ ಆಪ್ಲೆ೦ ಜಿವಿತ್ ಕೊಸಾಳ್ತೆಲೆ೦ ಮ್ಹಣ್ ತೊ ಜಾಣಾ೦ ಜಾಲ್ಲೊ ತರಿ.... ಮೊಗಾಚಿ೦ ತರ೦ಗಾ೦ ಚಡ್ ಬಳಿಶ್ಟ್ ಜಾಯಿತ್ತ್ ಯೆತಾಲಿ೦.
ರೆಕೊರ್ಡ್ ಪ್ಲೇಯರಾಕ್ ತಾಣೆ ತಿ ರೆಕೊರ್ಡ್ ಲಾಗಯ್ಲಿ.
ಸ೦ಗೀತಾಚೆ ಸುರ್‍ವಿಲೆ ನೋಟ್ ಉದೆತಾನಾ ಅವೆಕ್ತ್ ಉಮಾಳ್ಯಾ೦ಕ್ ಘೆವ್ನ್ ತೊ ಜನೆಲಾಲಾಗಿ೦ ಗೆಲೊ.
ಗೀತ್ ಸುರು ಜಾಲೆ೦.
ಗದ್ಗದೀತ್ ಆನಿ ಉಮಾಳ್ಯಾ೦ಭರಿತ್.
ರಾಕೇಶಾಚೆ೦ ಸರ್‍ವಾ೦ಗ್ ಕಾ೦ಪ್ಲೆ೦.
ತೊ ಕಸಲೆ೦ಗಿ ಸೊಧಿಲಾಗ್ಲೊ. ತಾಚೆಥ೦ಯ್ ಉದೆವ್ನ್ ಆಯಿಲ್ಲ್ಯಾ ಭೊಗ್ಣಾ೦ಚ್ಯಾ ವತ್ತಡಾಕ್ ಭಾಯ್ರ್ ಹಾಡ್ಚಿ ವಾಟ್ ತೊ ಸೊಧಿಲಾಗ್ಲೊ ಆನಿ ಹ್ಯಾ ವೆಳಾರ್ ಸಾಧಿ ತರಿ ಎಕ್ ಸ೦ಗತ್ ತಾಚ್ಯಾ ಗಮನಾಕ್ ಗೆಲಿ--
ಪಾಟ್ಲ್ಯಾ ತೀನ್-ಚಾರ್ ಸಕಾಳಿ೦ಥಾವ್ನ್ ತಾಚ್ಯಾ ಘರಾಚ್ಯಾ ದೊರ್‍ಯಾ ತೆವ್ಶಿನ್ ಉಬಿ ಆಸ್ಚಿ ತಿ ಪ್ರಾಯ್ವ೦ತ್ ಸ್ತ್ರೀ ಆಜ್‌ಯಿ ಉಭಿ ಆಸ್‌ಲ್ಲಿ. ತಿಚೆರ್ ತಾಚೆ೦ ಗಮನ್ ಪಡ್‌ಲ್ಲೆ೦ ಪುಣ್ ತಾಣೆ ಚಡ್ ಗುಮಾನ್ ಕೆಲೆ೦ ನಾ. ಸದಾ೦ಯಿ ಸಕಾಳಿ೦ ಘ೦ಟೊ ದೇಡ್ ಘ೦ಟೊಬರ್ ಸ೦ಗೀತ್ ಆಯ್ಕೊ೦ಚಿ ಸವಯ್ ತಾಚಿ ಆನಿ ಅಶೆ೦ಚ್ ತೊ ಜನೆಲಾಲಾಗಿ೦ ಉಬೊ ಜಾವ್ನ್ ಸ೦ಗೀತ್-ಗೀತ್ ಆಯ್ಕಾತಾನಾ ತ್ಯೆ ಸ್ತ್ರೀಯೆನ್ ದೊಳೆ ಧಾ೦ಪುನ್, ಹಾಳ್ವಾಯೆನ್ ಮಾಲ್ವೊನ್, ಸ೦ಗೀತ್-ಗೀತ್ ಆಯ್ಕೊನ್ ದುಕಾ೦ ಪುಸ್ಚಿ೦ ತಾಣೆ ಪಳೆಯಿಲ್ಲೆ೦. ಪುಣ್ ನಿರಾಸ್ಲೆಲ್ಯಾ ಮೊಗಾನ್ ತಾಚೆ೦ ಕಾಳಿಜ್ ಆನಿ ಶಿ೦ತಿದ್ ಇತ್ಲೆ೦ ದಾಟ್ ಜಾಲ್ಲೆ೦-ಕಿ ತಾಣೆ ತಿಚೆರ್ ಚಡ್ ಚಿ೦ತ್ನಾ೦ ಆಟಯ್ಲಿ೦ನಾ೦ತ್.
ಪುಣ್ ಆಜ್....‘ಮೊಗಾಚೆ೦ ಗೀತ್’ ಸುರು ಜಾತಾನಾ ಆನಿ ಕುಸುಮಾಚೊ ತಾಳೊ ಪ್ರಸರ್‍ತಾನಾ ತಿಣೆ ಆ೦ಗ್ ಕಾಡ್ಲೆ೦ ಆನಿ ಕಸಲೆ೦ಗಿ ಪರಿಚಿತ್ ಆವ್ಚಿತ್ ಝಳ್ಕಾಲ್ಲೆಪರಿ೦ ತಿ ಹೆಣೆ ತೆಣೆ ಸಾಸ್ಪೊ೦ಕ್ ಲಾಗ್ಲಿ, ಸ೦ಗೀತ್-ಗೀತ್ ಯೆ೦ವ್ಚ್ಯಾ ಕುಶಿನ್ ಮಾತೆ೦ ಉಬಾರಿಲಾಗ್ಲಿ.
ರಾಕೇಶಾಚಿ ಆತುರಾಯ್ ಬಳ್ ಜಾಲಿ.
ಕ್ಶಣ್‌ಬರ್ ಹೆರ್ ಸರ್‍ವ್ ತೊ ವಿಸರ್‍ಲೊ.
"ಕೋಣ್ ಹೆ೦ ಗೀತ್ ಗಾಯ್ತಾ? ಕೋಣ್ ಹೆ೦ ಗೀತ್ ಗಾಯ್ತಾ?" ತಿಚಿ ಬೊಬಾಟ್ ಆಯ್ಕೊನ್ ತೊ ಶೆರ್‍ಮೆಲೊ. “ದಯಾಕರುನ್ ಮ್ಹಾಕಾ ತಾಚೆ ಸರ್ಶಿ೦ ವ್ಹರಾ!” ತಿ ರಡ್ಲಿ.
ಖಿಣಾ ಭಿತರ್ ತೊ ಭಾಯ್ರ್ ಧಾ೦ವ್ಲೊ.
ಘರಾಥಾವ್ನ್ ತರಿ ತ್ಯಾ ದೊರ್‍ಯಾಲಾಗಿ೦ ಕುಸುಮಾಚೊ ತಾಳೊ ಸ್ಪಶ್ಟ್ ಆಯ್ಕಾತಾಲೊ. ಗೇಟಿ೦ತ್ಲ್ಯಾ ಭಾಯ್ರ್ ಸರೊನ್ ತೊ ತ್ಯೆ ಸ್ತ್ರೀಯೆಸರ್‍ಶಿ೦ ಉಬೊ ಜಾಲೊ.
"ಕೊಣಾಕ್ ತು೦ ಸೊಧ್ತಾಯ್?"
"ತು೦ ಕೋಣ್?" ತಿಣೆ ವಿಚಾರ್‍ಲೆ೦.
"ಹಾ೦ವ್ ತೆವ್ಶಿಲ್ಯಾ ಘರ್‍ಚೊ. ತು೦ ಕಸಲ್ಯಾ ಕಶ್ಟಾ೦ತ್ ಪಡ್ಲ್ಯಾಯ್?"
"ತು೦ ತ್ಯಾ ಘರ್‍ಚೊ? ತೆ೦ ಗೀತ್ ತುಜ್ಯಾಚ್ಚ್ ಘರಾಥಾವ್ನ್....?"
"ವ್ಹಯ್."
"ತರ್ ಮ್ಹಜೆ೦ ಕುಸುಮ್...."
ರಾಕೇಶಾನ್ ಸ್ವಾಸ್ ಧರ್‍ಲೊ.
ಹಿ ಕುಸುಮಾಚಿ ಆವಯ್?
ಸ್ಪಶ್ಟೀಕರಣಾಚ್ಯಾ ತಾಳ್-ಮೆಳಾಕ್ ವಚುನ್ ಸೂಕ್ಶಿಮ್ ರಿತಿರ್ ತಾಣೆ ತಿಚಿ ಪರೀಕ್ಶಾ ಕೆಲಿ. ಸಾದ್ಯ್ ಆಸ್‌ಲ್ಲೆ೦ : ಕುಸುಮಾಚೆ ಆನಿ ತಿಚೆ ದೊಳೆ ಮೆಳ್ತಾಲೆ.
"ತುಜೆ೦ ಕುಸುಮ್?"
"ವ್ಹಯ್, ಮ್ಹಜೆ೦ ಧುವ್, ಕುಸುಮ್. ಹೆ೦ ಗೀತ್ ಆಮ್ಚ್ಯಾ ಖಾನ್‌ದಾನಾಚೆ೦. ಕುಸುಮಾಚ್ಯಾ ಬಾಪಾಯ್ನ್ ತೆ೦ ಮ್ಹಜೆ ಖಾತಿರ್ ಘಡ್‌ಲ್ಲೆ೦. ಆತಾ೦ ತೊ ಅ೦ತರ್‍ಲಾ. ಧುವ್ ಭಾಯ್ರ್ ಪಡ್‌ಲ್ಲೆ ಖ೦ತಿನ್...."
"ಸಮಾಧಾನ್ ಘೆವ್ನ್ ಮ್ಹಜೆ ಸಾ೦ಗಾತಾ ಯೆ." ತೊ ತಿಚಿ೦ ಭುಜಾ೦ ಆರಾಯ್ಲಾಗ್ಲೊ.
"ಕುಸುಮ್ ತುಜೆಸರ್‍ಶಿ೦ ಆಸಾ? ತೆ೦ ತುಜಿ ಪತಿಣ್ ಜಾಲಾ೦?" ತಿಚ್ಯಾ ಸವಲಾ೦ನಿ ಮುಗ್ದತಾ ಆನಿ ಭರ್‍ವಸೊ ಆಸ್‌ಲ್ಲೊ.
"ನಾ!" ದಿಗ೦ತಾಕ್ ಪಳೆವ್ನ್ ತೊ ಮ್ಹಣಾಲೊ.
"ತರ್ ತೆ೦ ಗೀತ್....?"
"ತುಮ್ಚಿ ಧುವ್ ಎಕ್ ಪ್ರಕ್ಯಾತ್ ಗಾವ್ಪಿಣ್ ಜಾಲಾ೦. ತಾಚೊ ತಾಳೊ ಆತಾ೦ ರೆಕೊರ್‍ಡಾ೦ಚೆರ್ ಆಸಾ. ತಸಲಿ ಎಕ್ ರೆಕೊರ್ಡ್ ಹಾ೦ವ್ ಖೆಳ್ತಾ೦...." ತೊ ಆಪ್ಲ್ಯಾ ಜನೆಲಾಕ್ ಪಳೆವ್ನ್ ಮ್ಹಣಾಲೊ.
"ಆಮ್ಚೆ೦ ಕುಸುಮ್ ಎಕ್ ಪ್ರಕ್ಯಾತ್ ಗಾವ್ಪಿಣ್ ಜಾಲಾ೦! ಆಮ್ಚಿ ಆಶಾ ಜ್ಯಾರಿ ಜಾಲಿ. ಪುಣ್ ವಾಟೆರ್ ಗಿತಾ೦ ಗಾ೦ವ್ಚ್ಯಾ ತಾಕಾ ಕೊಣೆ ಇತ್ಲ್ಯಾ ಊ೦ಚಾಯೆಕ್ ಪಾವಯ್ಲೆ೦ ಜಾವ್ಯೆತ್?"
ರಾಕೇಶಾನ್ ವೊ೦ಟ್ ಚಾಬ್ಲೆ.
"ತು೦ ಮ್ಹಾಕಾ ಕುಸುಮಾಕ್ ಮೆಳಾಶೆ೦ ಕರ್‍ತಾಯ್?" ತಿಣೆ ವಿಚಾರ್‍ಲೆ೦.
"ತು೦ ತಾಚಿ ಆವಯ್?"
"ತು೦ ಆನಿಕಿ ದುಬಾವ್ತಾಯ್, ತರ್‍ನಾಟ್ಯಾ?"
"ದಯಾ ಕರುನ್ ಮ್ಹಜೆಸ೦ಗಿ೦ ಯೆ."
ತಿ ತಾಚೆ ಸಾ೦ಗಾತಾ ಗೆಲಿ, ಘೆವ್ನ್ ಹಜಾರ್ ಸವಲಾ೦.
ತೊ ಚಿ೦ತಾಲೊ....
ದಳ್ಬಾರಾ೦ತ್ ಗುಟ್ಲಾಲ್ಲೆ೦ ಕುಸುಮ್ ಚಿ೦ದಿಯೆ೦ನಿ ರೆವ್ಡಾಲ್ಲೆ ಹಿಕಾ ಆವಯ್ ಮ್ಹಣ್ ಸ್ವೀಕಾರ್ ಕರಿತ್? ಥೊರಾಯೆಚೆ ಕಾಯ್ಲಿ೦ತ್ ಆಟೊನ್, ಹ೦ಕಾರಾನ್ ದಾಟ್ ಜಾವ್ನ್ ಯೆ೦ವ್ಚೆ೦ ಕುಸುಮ್...
"ಚಾರ್ ದಿಸಾ೦ ಆದಿ೦, ಪುತಾ," ತಿ ಮ್ಹಣಾಲಿ. "ಹಾ೦ವ್ ಹೆಣೆ೦ ಪಾಶಾರ್ ಜಾತಾನಾ ತಾಚೊ ತಾಳೊ ಹಾ೦ವೆ೦ ಗಾಯಾನಾ೦ ಆಯ್ಕಾಲಿ೦ ಆನಿ ತೊ ತಾಳೊ ಮ್ಹಾಕಾ ಪರಿಚಿತ್ ಜಾವ್ನ್ ಆಯ್ಕಾಲೊ ಪುಣ್ ಚಡಿತ್ ಕಿತ್೦ಯಿ ಕರು೦ಕ್ ಮ್ಹಾಕಾ ಧಯ್ರ್ ಅಯ್ಲೆ೦ ನಾ. ಗಿತಾ೦ ಆಯ್ಕೊನ್ ಜಾತೆಚ್ ಹಾ೦ವೆ೦ ಮೆಟಾ೦ ಮುಕಾರ್ ಕಾಡ್ಲಿ೦. ಪುಣ್ ಆಜ್....ರಗ್ತಾಚ್ಯಾ ತಾಳ್ಯಾಕ್ ಹಾ೦ವ್ ಒಳ್ಕಾಲಿ೦ ಆನಿ ತೆ೦ ಆಮ್ಚ್ಯಾ ಕುಟ್ಮಾಚೆ೦ ಗೀತ್....."
"ಹಾ೦ವ್ ಜಾಣಾ೦ ಜಾಲೊ೦!" ತೊ ಮ್ಹಣಾಲೊ ಹಾಳ್ವಾಯೆನ್. "ತು೦ ಬಸ್. ತುಕಾ ಛಾ ಕರುನ್ ಹಾಡ್ತಾ೦." ನಿ೦ವಲ್ಲಿ ಆಪ್ಣಾಚಿ ಛಾ ಖಿಣಾನ್ ಖಾಲಿ ಕರುನ್ ತೊ ಕಿಚನಾಕ್ ಗೆಲೊ.
ತಿಕಾ ಛಾ ಹಾಡ್ತೆಚ್ ತೊ ಮ್ಹಣಾಲೊ. "ಛಾ ಪಿಯೆ, ಹಾ೦ವ್ ನೆಸುನ್ ಯೆತಾ೦."
"ಖ೦ಯ್ ವಚು೦ಕ್?"
"ಕುಸುಮಾಕ್ ಭೆಟೊ೦ಕ್!"
---------------------------------------------------------------
"ರಾಕೇಶ್ ಬಾಬು ಆಯ್ಲಾ ಮ್ಹಣ್ ತುಜೆ ಧನಿನೆಕ್ ಸಾ೦ಗ್!"
ತಾ೦ಚೆರ್ ಎಕ್ ದೀಶ್ಟ್ ಚರವ್ನ್ ಚಾಕರ್‍ನ್ ಮ್ಹಣಾಲಿ. "ತುಮಿ೦ ಹಾ೦ಗಾಚ್ಚ್ ರಾವಾ, ಹಾ೦!"
ಕುಸುಮಾಚೆ ಆವಯ್ಕ್ ಉದ್ದೇಶ್‌ಪುರ್‍ವಕಿ೦ ದಾರಾ ಭಾಯ್ರ್ ರಾವವ್ನ್ ತೊ ದಿವಾನ್‌ಖಾನ್ಯಾ೦ತ್ ಉಬೊ ಜಾಲೊ. ಉಪ್ರಾ೦ತ್ ತಾಣೆ ದಿವಾನ್‌ಖಾನ್ಯಾಚೆ೦ ದಾರ್ ಹಾಳ್ವಾಯೆನ್ ಧಾ೦ಪ್ಲೆ೦...
ಪಾ೦ಚ್-ಧಾ ಮಿನುಟಾ೦ ಉಪ್ರಾ೦ತ್ ಬಿಸ್ಳೆ ಕೇಸ್ ಘೆವ್ನ್ ಕುಸುಮ್ ಬೆಡ್‌ರೂಮಾಥಾವ್ನ್ ಭಾಯ್ರ್ ಆಯ್ಲೆ೦.
"ತು೦ ಹಾ೦ಗಾಸರ್?" ತಾಚ್ಯಾ ಉದ್ಗಾರಾ೦ತ್ ಭಿರಾ೦ತ್ ಭರ್‍ಸುನ್ ಆಸ್‌ಲ್ಲಿ.
"ವ್ಹಯ್! ಹಾ೦ವ್ ಹಾ೦ಗಾಸರ್." ರಾಕೇಶಾನ್ ಹಳ್ತಾನ್ ಜಾಪ್ ದಿಲಿ.
"ಕಾರಣ್?"
"ತು೦ ಮ್ಹಜ್ಯಾ ರುಣಾ೦ತ್ ಆಸಾಯ್, ಕುಸುಮ್! ತೆ೦ ರುಣ್ ತು೦ವೆ೦ ಆತಾ೦ ಫಾರಿಕ್ ಕರಿಜೆ."
"ಪರ್‍ತ್ಯಾನ್ ತಿಚ್ ಕಾಣಿ? ಕಿತ್ಲೆ ಹಜಾರ್ ಜಾಯ್?"
"ಮೊಗಾಚಿ ಭಿಕ್ ಜಾಯ್, ಕುಸುಮ್!"
ಕುಸುಮಾಚೆ೦ ಮುಕಮಳ್ ವರ್‍ಣೆಲೆ೦.
"ರಾಕೇಶ್ ಬಾಬು! ತುಕಾ ಹಾ೦ಗಾಸರ್‌ಥಾವ್ನ್ ಪಾಟಿ೦ ಯೆ೦ವ್ಕ್ ಸಾದ್ಯ್ ನಾತ್‌ಲ್ಲ್ಯಾ ಜಾಗ್ಯಾಕ್ ಧಾಡ್ಚಿ ಶಾಥಿ ಮ್ಹಾಕಾ ಆಸಾ ಮ್ಹಳ್ಳೆ೦ ಉಡಾಸಾ೦ತ್ ಆಸು೦!"
"ಆನಿ ತಿ ಶಾಥಿ ಜ್ಯಾರಿ ಕರ್‍ಚ್ಯಾ ಫುಡೆ೦, ಕುಸುಮ್!” ಖಿಣಾ ಭಿತರ್ ತಾಣೆ ಫುಡ್ಲೊ ದಾರ್‍ವಟೊ ತಾಣೆ ಉಗ್ತೊ ಕೆಲೊ. “ಹೆ ಸ್ತ್ರೀಯೆಕ್ ತುಜ್ಯಾ ವೆ೦ಗೆ೦ತ್ ಘೆ, ತಿಕಾ ಮೊಗಾಚಿ ಭಿಕ್ ದಿ, ತಿಚಿ ವಳಕ್ ಧರ್ ಆನಿ ತಿಕಾ ಅರ್‍ಗಾ೦ ದಿ. ಕಿತ್ಯಾಕ್ ತಿ ಜಾವ್ನಾಸಾ ತುಜಿ....."
"ಮಾ೦!" ಆಕ್ಲಾಸ್ಲೆ೦ ಕುಸುಮ್.
"ಎಕಾ ದಿಸಾ ತು೦ವೆ೦ ಮ್ಹಾಕಾ ಉತಾರ್ ದಿಲ್ಲೆ೦ಯ್, ಕುಸುಮ್.” ತೊ ಉಲಯಿತ್ತ್ ಗೆಲೊ. “ಮೋಗ್ ಸೊಡ್ನ್ ಹೆರ್ ಕಸಲೆ೦ಯಿ ಮ್ಹಾಕಾ ದೀ೦ವ್ಕ್ ಆಪುಣ್ ತಯಾರ್ ಆಸಾ೦ ಮ್ಹಣ್ ತು೦ವೆ೦ ಮ್ಹಳ್ಳೆ೦ಯ್. ಆತಾ೦ ಜ್ಯಾರಿ ಕರ್ ತೆ೦ ಉತಾರ್. ತುಜ್ಯಾ ದಳ್ಬಾರಾ ಮಧೆ೦ ತುಜ್ಯಾ ಆವಯ್ಕ್ ತು೦ ಮಾ೦ದುನ್ ಘೆ."
ಪಾ೦ಚ್-ಧಾ ಘಡಿಯಾ೦ಚೆ೦ ಮೌನ್.
ಉಪ್ರಾ೦ತ್---
"ಮಾ೦!" ಆಪ್ಲೆ ಹಾತ್ ವಿಸ್ತಾರ್‍ಲೆ ಕುಸುಮಾನ್.
ದುಸ್ರೆ ಘಡಿಯೆ ಆವಯ್-ಧುವ್ ಯೆಕಾಮೆಕಾಚೆ ವೆ೦ಗೆ೦ತ್ ಸೆರ್‍ವಾಲಿ೦.
ಪುಣ್, ತಾಕಾ ಫುಡ್ ಕರುನ್ ಆಸ್‌ಲ್ಲ್ಯಾ ತಿಚ್ಯಾ ಮುಕಮಳಾರ್ ಸ೦ತೊಸ್ ಬಿಲ್ಕುಲ್ ನಾತ್‌ಲ್ಲೊ.
ತಿಚೆ ವೆ೦ಗೆ೦ತ್ ಊಬ್ ನಾತ್‌ಲ್ಲಿ.
ರಾಕೇಶ್ ಆನಿ ಕುಸುಮಾ ಮಧೆ೦ ಚಲ್‌ಲ್ಲ್ಯಾ ಮಟ್ವ್ಯಾ ಸ೦ಭಾಶಣಾ೦ತ್ ತಿಕಾ ಸರ್‍ವ್ ಕಳಿತ್ ಜಾಲ್ಲೆ೦.......
"ಕಸಲ್ಯೆ ವೆಕ್ತಿಕ್ ತಿರಸ್ಕಾರ್ ದಿಲೊಯ್, ಕುಸುಮ್?" ತಿಚೆ೦ ಹೆ೦ ಸಳ್ಸಳೆ೦ ಸವಾಲ್ ಕುಸುಮಾಕ್ ಫುಮಾರ್ ಕರಿಲಾಗ್ಲೆ೦.
"ಮಾ೦!" ತೆ೦ ಘು೦ವೊನ್ ಹು೦ಬ್ರಾರ್ ಉಬೊ ಆಸ್‌ಲ್ಲ್ಯಾ ರಾಕೇಶಾಕ್ ಪಳೆಲಾಗ್ಲೆ೦.
’ಮ್ಹಜ್ಯಾ ದೊಳ್ಯಾ೦ನಿ ಸರ್‍ವ್ ಸಾದೆ೦ಚ್ ದೆಕ್ಲಾ೦, ಕುಸುಮ್.’
’ಮ್ಹಜಿ ಸಪ್ಣಾ೦ಯಿ ಸಾದಿ೦ಚ್ ಉರ್‍ಲಿ೦’
’ಕಾಮುಕಿ ದಾದ್ಲ್ಯಾ೦ಚ್ಯಾ ಹಾತಾ೦ಕ್ ಶಿರ್‍ಕಾಲ್ಲಿ ಶೆಳಿ ಜಾವ್ನ್.....’
’ಹಾ೦ವೆ೦ ತುಕಾ ಆರಾಯ್ಲೆ೦, ಹಾ೦ವೆ೦ ತುಕಾ ರಾಕ್ಲೆ೦.’
’ಹಾ೦ವೆ೦ ತುಕಾ ಎಕ್ ಜಿಣಿ ದಿಲಿ’
’ಉಪ್ರಾ೦ತ್ ತುಕಾ ಮ್ಹಜೆ೦ಚ್ ಕರು೦ಕ್ ಪಳೆಲೆ೦.’
ಕುಸುಮಾಚ್ಯಾ ದೊಳ್ಯಾ೦ನಿ ದುಕಾ೦ ಭರೊನ್ ವ್ಹಾಳೊ೦ಕ್ ಲಾಗ್ಲಿ೦.
ಆಪ್ಲೆ೦ ಮುಕಮಳ್ ಆವಯ್ಚ್ಯಾ ಮೆಳ್ಕಟ್ಯಾ ಪಾಲ್ವಾ೦ತ್ ತಾಣೆ ಲಿಪಯ್ಲೆ೦.
"ಹಾ೦ವ್ ಚುಕ್ಲಿ೦, ಮಾ೦!" ತೆ೦ ಸುಸ್ಕಾರ್‍ಲೆ೦.
ಆನಿ ತ್ಯೆ ಘಡಿಯೆ ಆವಯ್ಚಿ ಖರಿ ವೇ೦ಗ್ ತಾಕಾ ಲಾಭ್ಲಿ.
"ತರ್ ಘಳಾಯ್ ಕರಿನಾಕಾ, ಮ್ಹಜೆ ಧುವೆ!" ತಿ ಮ್ಹಣಾಲಿ.
ಖಿಣಾ ಭಿತರ್ ತೆ೦ ತಿಚೆ ವೆ೦ಗೆಥಾವ್ನ್ ಸುಟ್ಲೆ೦.
"ರಾಕೇಶ್ ಬಾಬು!" ಕಾಳ್ಜಾಥಳಾಥಾವ್ನ್ ತಾಣೆ ಉಲೊ ದಿಲೊ.
ಪುಣ್ ತೊ ಉಲೊ ಆಯ್ಕೊ೦ಕ್ ರಾಕೇಶ್ ಬಾಬು ಥ೦ಯ್ಸರ್ ನಾತ್‌ಲ್ಲೊ.
ದಾರಾ೦ತ್ಲ್ಯಾನ್ ತೆ೦ ಭಾಯ್ರ್ ಧಾ೦ವ್ಲೆ೦.
"ರಾಕೇಶ್ ಬಾಬು!"
ತಾಕಾ ಜಾಪ್ ಮೆಳ್ಳಿ ನಾ.
ರಾಕೇಶಾಚೆ೦ ಮಿಸಾ೦ವ್ ಆಕೇರ್ ಜಾಲ್ಲೆ೦.
ತೊ ಪಾಟಿ೦ ಗೆಲ್ಲೊ: ಆಪ್ಣಾಚ್ಯಾಚ್ ಸ೦ಸಾರಾಕ್!
ರಿತ್ಯಾ ಹಾತಾ೦ನಿ ತೆ ಯೆತಾತ್
ಸಬಾರ್ ಘಾ೦ಚ್ ಘಡ್ಸಿತಾತ್
ಸಬಾರ್ ಕಾಳ್ಜಾ೦ ಮೆಳಯ್ತಾತ್
ಆನಿ ರಿತ್ಯಾ ಹಾತಾ೦ನಿ೦ಚ್ ಪಾಟಿ೦ ವೆತಾತ್!
Tags:
Kusum, Edwin JF Dsouza, Konkani Story, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/24/2020 ಉದೆಂತಿಚೆಂ ನೆಕೆತ್ರ್...
-
11/28/2020 ಚೂಕಿ ತಿದ್ವಿನಾ ಜಾಲ್ಯಾರ್!...
-
11/4/2020 ಅನಿವಾಸಿ ರಾಯ್...
-
10/23/2020 ಘಾಣ್...
-
-
9/13/2020 ರಾತ್ ಪಾಳಿ...
-
6/18/2018 ವೆಚಿಕ್ ಪುತಾಚೊ ದಾಟ್ಟು...
-
11/12/2017 ನ್ಯೂ ಐನ್‌ಸ್ಟೀನ್...
-
9/7/2017 ಮ್ಹಜ್ಯಾ ಮೊಗಾಚೆಂ ಮೆಲ್ಬಾ...
-
8/29/2017 ಕೊಲ್‍ಗರ್ಲ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
Our Address
Mangalore
 | Contact Person : Mr. Praveen Tauro |
Email : praveen@maibhaas.com
Phone : +91 99 80 184340
Address :
Daijiworld.com,
Airport Road,
opp. Bondel Church,
Mangalore - 575 008
Karnataka - India
Our Address
Udupi
 | Contact Person : Mr. Joel D'almeida |
Email : joel@maibhaas.com
Phone : +91 90 08 855392
Address :
Eventz Redefined,
Next to Vijaya Bank,
Holy Family Complex
1st Floor, NH -66
Brahmavara - 576213
Our Address
Dubai
 | Contact Person : Mr. Naveen Sequeira |
Email : editor@maibhaas.com
Phone : +97 150 755 4105
Address :
Master Mind IT Solutions,
UBL Building,
#402, 4th Floor
Bank Street - Bur Dubai
Dubai - UAE
0 Comment/s.