From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ನಿಮಾಣ್ಯೆ ಘಡ್ಯೆಯಿ ಬದ್ಲುಂಕ್ ಕಳಾನಾತ್‌ಲ್ಲೊ ಸ್ವಭಾವ್
Tuesday, October 6, 2020
ಲ್ಯಾನ್ಸಿ ಲಾಸ್ರಾದೊ, ಆಪ್ಲ್ಯಾ ಕಾಜಾರಾಚೊ ಧಾ ವರ್‍ಸಾಂಚೊ ಜುಬ್ಲೆವ್ ಆಚಾರ್‍ಸುಂಕ್, ಬಾಯ್ಲ್ ವಿನ್ನಿ ಆನಿ ದೊಗಾಂ ಭುರ್ಗ್ಯಾಂ ಸಂಗಿಂ, ಮಸ್ಕತ್ ಥಾವ್ನ್ ಮುಂಬಯ್ ಆಯಿಲ್ಲೊ. ಆವಯ್ ಬಾಪಯ್ಕ್ ಪಳೆಂವ್ಕ್, ಗಾಂವಾಕ್ ಗೆಲ್ಲ್ಯಾ ಲ್ಯಾನ್ಸಿಲಾಗ್ಗಿಂ ಆವಯ್ ಸಾಂಗಾಲಾಗ್ಲಿ, ''ಪುತಾ, ರೆನಿಟಾ ತುಮ್ಕಾಂ ಚೋವ್ಗ್ ಭಾವಾಂಕ್ ಎಕ್ಲಿಚ್ ಭಯ್ಣ್. ಹ್ಯಾಚ್ ಮಹಿನ್ಯಾಂತ್ ತಾಚೊ ಫುಡ್ಲದ್ ಬಾಂಳ್ತೆರ್ ಆಸಾ ಆನಿ ತುಜ್ಯಾ ಆನಾಚಿ ಭಲಾಯ್ಕಿ ಬರಿ ನಾತ್‌ಲ್ಲ್ಯಾನ್, ಮ್ಹಾಕಾ ಮುಂಬಯ್ ತಾಚ್ಯಾ ಬಾಂಳ್ತೆರಾಕ್ ವಚುಂಕ್ ಜಾಂವ್ಚೆಂನಾ. ತುಂ ಕಸೊಯ್ ದೋನ್ ಮಹಿನ್ಯಾಂಚ್ಯಾ ರಜೆರ್ ಆಯ್ಲಾಯ್. ಮುಂಬಂಯ್ತ್ ಆಮ್ಚಿಂ ಹೆರ್ ಕೊಣ್‌ಯಿ ನಾಂತ್. ವಿನ್ನಿಕ್ ಸಾಂಗೊನ್ ರೆನಿಟಾಚೊ ಬಾಂಳ್ತೆರ್ ತುಜ್ಯಾ ಘರಾ ಕರ್...''
ಆವಯ್ಕ್ ಜಾಯ್ತ್ ಮ್ಹಣ್ ಸಾಂಗೊನ್, ಲ್ಯಾನ್ಸಿ ಗೆಲ್ಲೆಂ ಕಾಮ್ ಸಂಪವ್ನ್ ಮುಂಬಯ್ ಪಾಟಿಂ ಆಯ್ಲೊ.
ಲ್ಯಾನ್ಸಿನ್ ಆವಯ್ಚಿ ಇಚ್ಛಾ ಬಾಯ್ಲೆಕ್ ಸಾಂಗ್ತಾನಾ, ವಿನ್ನಿ ಉಚಾಂಬಳ್ ಜಾಲೆಂ.
''ಆಮಿ ರಜೆರ್ ಆಮ್ಚ್ಯಾ ಕಾಜಾರಾಚೊ ಜುಬ್ಲೆವ್ ಆಚಾರ್‍ಸುಂಕ್ ಆಯಿಲ್ಲ್ಯಾಂವ್. ಸುಮಾರ್ ಕಾಮಾಂ ಆನಿ ತಯಾರಿ ಕರುಂಕ್ ಆಸಾ. ತ್ಯಾ ಇಡ್ಯಾಂತ್ ತುಂ ಮ್ಹಜೆರ್, ತುಜ್ಯೆ ಭಯ್ಣಿಚ್ಯಾ ಬಾಂಳ್ತೆರಾಚಿ ಜಿಮ್ಮೆದಾರಿ ಘಾಲಿನಾಕಾ ...''
''ತುಂ ಜಾಣಾಂಯ್ ವಿನ್ನಿ, ಮುಂಬಂಯ್ತ್ ಆಮ್ಚೆ ಶಿವಾಯ್, ರೆನಿಟಾಚಿಂ ಹೆರ್ ಕೊಣ್‌ಯಿ ನಾಂತ್......''
''ತುಜ್ಯೆ ಆವಯ್ಕ್ ಆನಾಚಿ ಭಲಾಯ್ಕಿ ಬರಿ ನಾ ಮ್ಹಳ್ಳೆಂ ನೀಬ್ ದೀವ್ನ್, ಮುಂಬಯ್ ಯೇಂವ್ಕ್ ಜಾಯ್ನಾಂ. ಪುಣ್ ತುಜ್ಯಾ ಭಾವಾಂಚ್ಯಾ ಬಾಯ್ಲಾಂಕ್‌ಯಿ ಯೇಂವ್ಕ್ ಜಾಯ್ನಾಂಗಿ?''
''ಆತಾಂ ಆಮಿಂ ಕಸೆಂಯಿ ಮುಂಬಯ್ ಆಯಿಲ್ಲ್ಯಾಂವ್ ಆಸ್ತಾಂ, ಮಾಂಯ್ನ್ ಮ್ಹಾಕಾ ಸಾಂಗ್ಲೆಂ. ನಾ ಜಾಲ್ಯಾರ್ ತಿ ಸಾಂಗ್ತಿನಾ''
''ವ್ಹಯ್, ತಿಕಾ ಸಾಂಗ್ ಮ್ಹಾಕಾಯಿ ಸಬಾರ್ ರಠಾವಳಿ ಆಸಾತ್ ಮ್ಹಣ್! ತಿ ಹೆರಾಂಕ್ ಸಾಂಗೊಂನ್ ಬಂದೊಬಸ್ತ್ ಕರುಂದಿ...''
ಲ್ಯಾನ್ಸಿನ್ ಆಪ್ಲಿ ಅಸಹಾಯಕಥಾ ಭಯ್ಣಿಕ್ ಸಾಂಗೊನ್ ಹಾತ್ ವಯ್ರ್ ಕರ್‍ತಾನಾ, ರೆನಿಟಾನ್ ಕಾಂಯ್ ಮ್ಹಳೆಂನಾ. ಬಾಂಳ್ತೆರಾ ವೆಳಾರ್, ರೆನಿಟಾಚ್ಯಾ ಘೊವಾಕ್ ರಜಾ ಕಾಡುಂಕ್ ಜಾಲಿನಾ. ರೆನಿಟಾ ಎಕಾ ಚೆರ್ಕ್ಯಾ ಭುರ್ಗ್ಯಾಕ್ ಪ್ರಸೂತ್ ಜಾಲೆಂ. ಕೊಣಾಚೊಚ್ ಆಧಾರ್ ನಾತ್‌ಲ್ಲ್ಯಾ ಪರಿಸ್ಥಿತೆಂತ್, ಜಿವ್ಯಾ ಬಾಂಳ್ತಿಕ್‌ಚ್ಚ್ ಉಟೊನ್ ಘರ್‍ಚೆಂ ಕಾಮ್ ಆನಿ ರಾಂದಾಪ್ ಕರುಂಕ್ ಪಡ್ಲೆಂ.
ಪಯ್ಲೆಂ ಫಿಲ್ಯಾದ್ ಆವಯ್ಚ್ಯಾ ಕುಟ್ಮಾ ಪಯ್ಕಿ ಜೊಡ್ಚಿ ರಿವಾಜ್ ಆಸ್‌ಲ್ಲ್ಯಾನ್, ಮನ್ ನಾತ್ಲ್ಯಾರ್‌ಯಿ, ಭಯ್ಣಿಚ್ಯಾ ಭುರ್ಗ್ಯಾಚೆಂ ಫಿಲ್ಯಾದ್, ಲ್ಯಾನ್ಸಿಕ್ ಜೊಡುಂಕ್ ಪಡ್ಲೆಂ. ಮಸ್ಕತ್ ಬರ್‍ಯಾ ಜೊಡಿರ್ ಆಸೊನ್, ಕಸಲಿಚ್ ಆರ್ಥಿಕ್ ಅಡ್ಸಣಿ ನಾತ್‌ಲ್ಲ್ಯಾ ಲ್ಯಾನ್ಸಿನ್, ಭುರ್ಗ್ಯಾಚ್ಯಾ ಗಳ್ಯಾಂತ್, ಬಾರೀಕ್ ಚೇಯ್ನ್ ಘಾಲಿ ಶಿವಾಯ್ ಹೆರ್ ಕಸಲಿಚ್ ಅರ್ಥಿಕ್ ಸಸಾಯ್ ಭಯ್ಣಿಕ್ ದಿಲಿನಾ. ತ್ಯಾಚ್ ಹಫ್ತ್ಯಾ ಲ್ಯಾನ್ಸಿನ್ ಆಪ್ಲ್ಯಾ ಕಾಜಾರಾಚ್ಯಾ, ಧಾವ್ಯಾ ವರ್‍ಸಾಂಚೊ ಜುಬ್ಲೆವ್ ವ್ಹಡಾ ಗದ್ದಾಳಾಯೆನ್ ಆಚಾರ್ಸಿತಾನಾ, ಬಾಯ್ಲೆಚ್ಯಾ ಗಳ್ಯಾಂತ್ ಧಾ ತೊಲ್ಯಾಂಚೊ ನೆಕ್ಲೆಸ್ ಘಾಲೊ.
ರೆನಿಟಾಕ್ ವೊನಿಯೆಚ್ಯಾ ಗಳ್ಯಾಂತ್ ಘಾಲ್ಲೊ ನೆಕ್ಲೆಸ್ ಪಳೆವ್ನ್ ಅಜ್ಯಾಪ್ ಭಗ್ತಾನಾ, ಆಪ್ಲ್ಯಾ ಬಾಳ್ಶ್ಯಾಚ್ಯಾ ಗಳ್ಯಾಂತ್ ಶಿರ್ಕಾಯಿಲ್ಲಿ, ಸುತಾ ತಿತ್ಲಿ ಬಾರೀಕ್ಶಿ ಚೇಯ್ನ್ ಚಿಂತುನ್, ದೂಖ್ ಭಗ್ಲೆಂ.
ಕಾಳ್ ಪಾಶಾರ್‍ಲೊ, ರೆನಿಟಾಚೊ ಪೂತ್ ಸ ವರ್‍ಸಾಂಚೊ ಜಾಲ್ಲೊ. ಮಸ್ಕತ್ ಥಾವ್ನ್ ಲ್ಯಾನ್ಸಿ ಬಾಯ್ಲ್ ಭುರ್ಗ್ಯಾಂ ಸಂಗಿಂ ಮುಂಬಯ್ ಹರ್‍ಯೇಕಾ ವರ್‍ಸಾ ಯೆತಾಲೊ. ತರೀ, ಫಿಲ್ಯಾದಾಕ್ ತಾಣೆ ಆಜ್ ಪರ್‍ಯಾಂತ್, ಏಕ್ ಚೊಕ್ಲೆಟಾಚೊ ಡಬ್ಬೊ ಸಯ್ತ್ ಹಾಡುಂಕ್ ನಾತ್‌ಲ್ಲೊ. ಕೊಣಾಯ್ಕಿ ಕಾಂಯ್ ಹಾಡ್ಚೆಂ ವ ದಿಂವ್ಚೆಂ ತಾಣೆ ಬಾಯ್ಲೆಚ್ಯಾ ಜಿಮ್ಮೆದಾರಿರ್ ಸೊಡ್‌ಲ್ಲೆಂ ಜಾಲ್ಲ್ಯಾನ್, ಸ್ವಾರ್ಥಿ ವಿನ್ನಿಕ್ ಹೆರಾಂಚೆಂ ಕಾಂಯಿಂಚ್ ಪಡೊನ್ ವಚೊಂಕ್ ನಾತ್‌ಲ್ಲೆಂ.
ಹ್ಯಾ ವರ್‍ಸಾ ಲ್ಯಾನ್ಸಿ ಬಾಯ್ಲ್ ಭುರ್ಗ್ಯಾಂ ಸಂಗಿಂ ರಜೆರ್ ಯೆತಾನಾ, ರೆನಿಟಾ ಭಾವಾಚ್ಯಾ ಘರಾ ಆಪ್ಲ್ಯಾ ಚೆರ್ಕ್ಯಾಕ್ ಘೆವ್ನ್ ಗೆಲೆಂ. ಲ್ಯಾನ್ಸಿಚೆ ಚೆರ್ಕೆ ಬರೆಂ ವಸ್ತುರ್ ನ್ಹೆಸೊನ್, ಹಾತಾಂನಿ ವ್ಹಡ್ಲಿಂ ಕ್ಯಾಟ್‌ಬರಿ ಚೊಕ್ಲೆಟಾಂ ಘೆವ್ನ್ ಖಾವ್ನ್ ಆಸ್‌ಲ್ಲೆ. ರೆನಿಟಾಕ್ ತಾಚ್ಯಾ ಚೆರ್‍ಕ್ಯಾಸಂಗಿಂ ಆಯಿಲ್ಲೆಂ ಪಳವ್ನ್, ವಿನ್ನಿನ್ ಕೂಡ್ಲೆ ಆಪ್ಲ್ಯಾ ಭುರ್ಗ್ಯಾಂಕ್ ಭಿತರ್‍ಲ್ಯಾ ಕೂಡಾಕ್ ಧಾಡ್ಲೆಂ.
''ಕಸೆಂ ಆಸಾಯ್ ರೆನಿಟಾ? ಚೆರ್ಕೊ ಮಸ್ತು ವ್ಹಡ್ ಜಾಲಾ ತುಜೊ....'' ಇತ್ಯಾದಿ ಸವಾಲಾಂ ಗಜಾಲಿ ಕೆಲ್ಯೊ. ಲ್ಯಾನ್ಸಿನ್ ತರೀ, ಆಪ್ಲ್ಯಾ ಫಿಲ್ಯಾದಾಕ್ ಕಾಂಯಿಂಚ್ ದಿಲೆಂನಾ. ರೆನಿಟಾ ಭಾವಾ ಆನಿ ವೊನಿಯೆಕ್ ಮೆಳುನ್ ಜಾತಚ್ ವಚೊಂಕ್ ಉಟ್ತಾನಾ, ವಿನ್ನಿನ್ ಭಿತರ್ ಕುಜ್ನಾಂತ್ಲ್ಯಾ ಡಬ್ಬ್ಯಾಂತ್ ಆಸ್‌ಲ್ಲಿಂ, ಮೂಟ್‌ಭರ್ ಪರ್ನಿಂ ಪೆಪರ್ಮಿಟಾಂ ಹಾಡೂನ್, ರೆನಿಟಾಚ್ಯಾ ಚೆರ್ಕ್ಯಾಚ್ಯಾ ಹಾತಾರ್ ಘಾಲಿಂ.
''ಎಕ್‌ಚ್ ಪಾವ್ಟಿಂ ಖಾಯ್ನಾಕಾ ಪುತಾ, ಸದಾಂಯ್ ಎಕೇಕ್ ಖಾ ಹಾಂ....'' ಲ್ಯಾನ್ಸಿ ಚೆರ್ಕ್ಯಾಚೊ ಗಾಲ್ ಚಿರ್ಡುನ್ ಸಾಂಗಾಲಾಗ್ಲೊ.
''ಮಸ್ತು ದೇವ್ ಬರೆಂ ಕರುಂ ದಾಟ್ಟೂ.... ವೆತಾಂ ವೊನಿಯೆ...'' ಸಾಂಗೊನ್ ರೆನಿಟಾ, ಭಾವಾಚ್ಯಾ ಘರಾ ಥಾವ್ನ್ ಭಾಯ್ರ್ ಪಡ್ಲೆಂ.
''ಮಾಮ್ಮಿ ಮ್ಹಾಕಾ ಹಿಂ ನಾಕಾತ್. ತಾಣಿಂ ಖಾವ್ನ್ ಆಸ್‌ಲ್ಲೆಂ ಕ್ಯಾಟ್‌ಬರಿ ಚೊಕ್ಲೆಟ್ ಜಾಯ್...'' ಚೆರ್ಕೊ ಆವಯ್ಕ್ ಸಾಂಗಾಲಾಗ್ಲೊ.
ರೆನಿಟಾನ್ ಚೆರ್ಕ್ಯಾಕ್ ಲಾಗ್ಗಿಂಚ್ ಆಸ್ಚ್ಯಾ ದುಕಾನಾಕ್ ವ್ಹರುನ್, ವೀಸ್ ರುಪ್ಯಾಂಚೆಂ ಏಕ್ ಲಾನ್ಶೆಂ 'ಡೈರಿಮಿಲ್ಕ್' ಚೊಕ್ಲೆಟ್ ಘೆವ್ನ್ ದಿಲೆಂ. ಚೆರ್ಕ್ಯಾನ್ ಆಪ್ಲ್ಯಾ ಹಾತಾಂತ್ ಆಸ್‌ಲ್ಲಿಂ, ಪೆಪರ್ಮಿಟಾಂ ರಸ್ತ್ಯಾರ್ ಉಡಯ್ಲಿಂ!
ತ್ಯಾ ದಿಸಾ ಉಪ್ರಾಂತ್ ರೆನಿಟಾ ಭಾವಾಚ್ಯಾ ಘರಾ ಗೆಲಿನಾ, ವ ಲ್ಯಾನ್ಸಿನ್ ಜಾವ್ನ್‌ಯಿ ಭಯ್ಣಿಚೊ ಉಗ್ಡಾಸ್ ಕರುಂಕ್ನಾ. ರಜೆರ್ ಆಯಿಲ್ಲ್ಯಾ ಲ್ಯಾನ್ಸಿಕ್ ಕಾಮಾರ್ ಪಾಟಿಂ ಮಸ್ಕತ್ ವಚುಂಕ್, ಫಕತ್ತ್ ತೀನ್ ದೀಸ್ ಬಾಕಿ ಆಸ್ತಾನಾ, ಅಚಾನಕ್ ವಿನ್ನಿಚ್ಯಾ ಪೊಟಾಂತ್ ಸೊಸುಂಕ್ ನಜೊ ತಸಲಿ ದೂಕ್ ಸುರು ಜಾಲ್ಲ್ಯಾನ್, ಉಟಾಉಟಿಂ ಆಸ್ಪತ್ರೆಕ್ ವ್ಹೆಲೆಂ.
ಆಸ್ಪತ್ರೆಂತ್ ತಪಾಸ್ಣಿ ಜಾತಾನಾ, ವಿನ್ನಿಚ್ಯಾ ಪೊಟಾಂತ್ ಟ್ಯೂಮರ್ ಆಸ್‌ಲ್ಲೊ ಕಳೊನ್ ಆಯ್ಲೆಂ! ವಿನ್ನಿಚಿ ಪ್ರಾಯ್ ಫಕತ್ತ್ 42 ವರ್‍ಸಾಂ ಆನಿ ಇತ್ಲ್ಯಾ ಭಲಾಯ್ಕೆಂತ್ ಆಸ್‌ಲ್ಲ್ಯಾ ವಿನ್ನಿಕ್, ದಾಕ್ತೆರಾಂನಿ ಕ್ಯಾನ್ಸರ್ ಮ್ಹಣ್ ಸಾಂಗ್ತಾನಾ, ವಿನ್ನಿಚ್ಯಾ ಜಿಣ್ಯೆಚೆಂ ಆವ್ಕ್ ಮುಗ್ದಾಲ್ಲೆಂ!!!
ವಿನ್ನಿಚ್ಯಾ ಕುಟ್ಮಾಚಿಂ ಲಾಗ್ಸಿಲಿಂ ಮುಂಬಂಯ್ತ್ ಕೊಣ್‌ಯಿ ನಾತ್‌ಲ್ಲಿಂ. ಆನಿ ಲ್ಯಾನ್ಸಿಚ್ಯಾ ಪಕ್ಷೆನ್, ತಾಚಿ ಭಯ್ಣ್ ರೆನಿಟಾ ಎಕ್ಲಿ ಮಾತ್ರ್ ಆಸ್‌ಲ್ಲಿ. ರೆನಿಟಾಕ್ ಮೆಳುಂಕ್ ಲ್ಯಾನ್ಸಿ, ಉಟಾಉಟಿಂ ಘರಾ ಆಯ್ಲೊ. 'ಸುರ್ಯೊ ಕಸೊ ಉಲ್ಟ್ಯಾ ದಿಶ್ಯಾಂತ್ ಉದೆಲೊಗಾಯ್?' ರೆನಿಟಾ ಭಾವಾಕ್ ಪಳವ್ನ್ ಚಿಂತಾನಾ, ಲ್ಯಾನ್ಸಿ ಸಾಂಗಾಲಾಗ್ಲೊ, ''ರೆನಿಟಾ, ತುಜಿ ವೊನಿ ಹೊಲಿಸ್ಪೀರಿಟ್ ಆಸ್ಪತ್ರೆಂತ್ ಎಡ್ಮಿಟ್ ಆಸಾ. ತಿಚ್ಯಾ ಪೊಟಾಂತ್ ಕ್ಯಾನ್ಸರ್-ಟ್ಯೂಮರ್ ಜಾಲಾ ಮ್ಹಣ್ ದಾಕ್ತೆರಾಂನಿ ಸಾಂಗ್ಲಾಂ. ದಿಸಾಕ್ ಹಾಂವೆಂ ಕಸೆಂಯಿ ಆಸ್ಪತ್ರೆಂತ್ ರಾವ್ಯೆತ್, ರಾತಿಚೆಂ ತುಂ ರಾವ್ಶಿಗಿ?''
ಲ್ಯಾನ್ಸಿ ಭಯ್ಣಿಕ್ ವಿಚರ್ತಾನಾ, ರೆನಿಟಾ ಚೆರ್ಕ್ಯಾಕ್ ಸೆಜಾರ್‍ಯಾಂಗೆರ್ ವರುನ್, ಸಾಂಜೆರ್ ಘೊವ್ ಕಾಮಾಥಾವ್ನ್ ಯೆತಚ್, ಚೆರ್ಕ್ಯಾಕ್ ಘರಾ ವ್ಹರುನ್ ಸೊಡಾ ಮ್ಹಣ್ ಸಾಂಗೊನ್, ತಿ ಭಾವಾಸಂಗಿಂ ಆಸ್ಪತ್ರೆಕ್ ಭಾಯ್ರ್ ಸರ್‍ಲಿ.
ಆಸ್ಪತ್ರೆಂತ್ ವಿನ್ನಿಕ್, ದೂಕಿನ್ ವಳ್ವಳ್ಚೆಂ ಪಳವ್ನ್, ರೆನಿಟಾಕ್ ಮಸ್ತು ದೂಖ್ ಭಗ್ಲೆಂ. ದಿಸಾಕ್ ಆಸ್ಪತ್ರೆಂತ್ ವಿನ್ನಿಸಂಗಿಂ ಲ್ಯಾನ್ಸಿ ರಾವೊಂಕ್ ಲಾಗ್ಲೊ ಆನಿ ರಾತಿಂ ಸದಾಂಯ್ ರೆನಿಟಾ, ಘೊವ್ ಕಾಮಾ ಥಾವ್ನ್ ಯೆತಚ್, ಆಪ್ಲ್ಯಾ ಚೆರ್ಕ್ಯಾಕ್ ಘೊವಾಚ್ಯಾ ತಾಬೆನ್ ಸೊಡುನ್ ಮೂಲುಂಡ್ ಥಾವ್ನ್ ಹೊಲಿಸ್ಪೀರಿಟ್ ಆಸ್ಪತ್ರೆಕ್ ವಚೊನ್, ಆಪ್ಲ್ಯಾ ವೊನಿಯೆಚಿ ಚಾಕ್ರಿ ಕರುಂಕ್ ಲಾಗ್ಲೆಂ.
ತೀನ್ ಮಹಿನೆ ಚುಕಾನಾಸ್ತಾಂ, ರೆನಿಟಾನ್ ವಿನ್ನಿಚಿ ಚಾಕ್ರಿ, ತಿಚೊ ಗೂ-ಮೂತ್ ಕಾಡುನ್ ಕೆಲಿ. ನಿಮಾಣ್ಯಾ ದಿಸಾಂನಿ ವಿನ್ನಿನ್ ದೂಕಿನ್ ವಳ್ವಳ್ತಾನಾ, ರೆನಿಟಾ ತಿಕಾ ಸಾಂಗಾಲಾಗ್ಲೆಂ, "ವೊನಿಯೆ, ತುವೆಂ ಜಿಣ್ಯೆಂತ್ ಕೊಣಾಯ್ಕಿ ದುಖಯ್ಲಾಂಯ್ ತರ್, ತಾಂಚೆಲಾಗ್ಗಿಂ ಭಗ್ಸಾಣೆ ಮಾಗ್, ದೇವ್ ತುಜೆರ್ ಕಾಕುಳ್ತ್ ದಾಖಯ್ತಲೊ ...''
''ಹಾವೆಂ ಆಸ್ಚೆಂ ಮ್ಹಜ್ಯಾ ಘೊವಾಸಂಗಿಂ ಭಾಯ್ಲ್ಯಾ ಗಾಂವಾಂತ್. ಹಾಂವೆಂ ಕೊಣಾಯ್ಕಿಯಿ ದುಕಯ್ಲಾಂ ಜಾಂವ್ಕ್‌ಪುರೊ ಮ್ಹಣ್ ತುಕಾ ಭಗ್ತಾಗಿ? ಹಾಂವ್ ತಸಲ್ಯಾ ಕಾಸ್ತಾಚಿಂ ಮ್ಹಣ್ ತುಂ ಚಿಂತಾಯ್ಗಿ?''
''ಥೊಡೆ ಪಾವ್ಟಿಂ ಆಮ್ಚ್ಯಾ ಸಮ್ಜೊಣೆ ಭಾಯ್ರ್, ಆಮಿಂ ಹೆರಾಂಕ್ ದುಕಯ್ತಾಂವ್ ವೊನಿಯೆ. ಹಾಂವ್ ತುಕಾ, ತುಜ್ಯಾ ಹ್ಯೆ ಸ್ಥಿತೆರ್ ತುಂ ಪಾಡ್ ಮ್ಹಣ್ ಸಾಂಗಾನಾ. ಪುಣ್ ನೆಣಾರ್ಪಣಾನ್ ತರೀ, ಆಮಿಂ ಕೆಲ್ಲ್ಯಾ ಚುಕಿಂಕ್ ನಿಯಾಳ್ನ್, ದೆವಾಲಾಗಿಂ ಭಗ್ಸಾಣೆ ಮಾಗ್ಲ್ಯಾರ್, ಆಮ್ಚೆಂ ಮನ್ ಹಳೂ ಜಾಯ್ತ್ ನಹಿಂಗಿ ವೊನಿಯೆ?''
''ವ್ಹಯ್ ಸಮ್ಜಾತಾ ಮ್ಹಾಕಾ, ತುಂ ಸಾಂಗೊಕ್ ಕಿತೆಂ ಆಶೆತಾಯ್ ಮ್ಹಣ್....." ವಿನ್ನಿ ಚಿಕ್ಕೆ ರಾಗಾನ್ ರೆನಿಟಾಕ್ ಪಳವ್ನ್ ಸಾಂಗಾಲಾಗ್ಲೆಂ, ''ಹಾವೆಂ ಪಿಡೆಂತ್ ವಳ್ವಳ್ಚೆಂ ಪಳವ್ನ್ ತುಕಾ ಭಗ್ತಾ ಆಸ್ತೆಲೆಂ, ದೆವಾನ್ ಮ್ಹಜ್ಯಾ ಚುಕಿಂಕ್ ಶಿಕ್ಷಾ ದಿಲ್ಯಾ ಜಾಂವ್ಕ್ ಪುರೊ ಮ್ಹಣ್. ಉಣ್ಯಾ ಬಂಡ್ವಳಾಚಿಂ ವ ಅರ್ಥಿಕ್ ಸ್ಥಿತಿ ಪಾಡ್ ಆಸ್ಚಿಂ ಮನ್ಯಾಂ, ಗ್ರೇಸ್ತಾಂಕ್ ಪಾಡ್ ಆನಿ ಪಾತ್ಕಿಚ್ ಮ್ಹಣ್ ಲೆಕ್ತಾತ್. ತುವೆಂ ಅಸ್ಪಷ್ಟ್ ಉತ್ತಾಂನಿ ತೀರ್ ಸೊಡ್ಚೊ ನಾಕಾ ರೆನಿಟಾ. ಶೀದಾ ಸಾಂಗ್ಯೆತ್ ನಹಿಂಗಿ....?''
''ಚೂಕ್ ಜಾಲಿ ವೊನಿಯೆ......'' ರೆನಿಟಾ ವಿನ್ನಿಚೊ ಹಾತ್ ಪೊಶೆವ್ನ್ ಸಾಂಗಾಲಾಗ್ಲೆಂ. ''ತುವೆಂ ದುಕಿನ್ ವಳ್ವೊಳ್ಚೆಂ ಪಳವ್ನ್, ದೇವ್ ತುಜೆರ್ ದಯಾ ದಾಖಂವ್ದಿ ಮ್ಹಳ್ಳ್ಯಾ ಅರ್ಥಾರ್, ಹಾವೆಂ ತಶೆಂ ಮ್ಹಳೆಂ. ತುಕಾ ಬೆಜಾರ್ ಜಾಲೆಂ ತರ್, ಮ್ಹಾಕಾ ಮಾಫ್ ಕರ್.....''
ತಿತ್ಲ್ಯಾರ್ ವಿನ್ನಿಚೆಂ ವಸ್ತುರ್ ಬದ್ಲುನ್, ಕುಡಿಚಿ ನಿತಳಾಯ್ ಕರ್‍ಚಿ ಆಸ್ಪತ್ರೆಚೆ ಸ್ತ್ರೀ ಕೂಡಾಂತ್ ರಿಗ್ಲಿ. ರೆನಿಟಾಚಿ ನಿತಳಾಯ್ ಕರುನ್ ವಸ್ತುರ್ ಬದ್ಲುನ್ ಕಾಕುಸ್ ನಿತಳ್ ಕರುಂಕ್ ಕಾಕ್ಸಾಕ್ ರಿಗ್ತಾನಾ, ರೆನಿಟಾನ್ ವಿನ್ನಿಕ್ ಲೋವ್ ತಾಳ್ಯಾನ್ ಸಾಂಗ್ಲೆಂ, ''ವೊನಿಯೆ, ತಿಕಾ ಕಾಂಯ್ ತರ್‌ಯಿ ದೀ. ಮಸ್ತು ದೀಸ್ ಥಾವ್ನ್ ತಿ ಹಾಂಗಾ ಯೇವ್ನ್, ರೂಮಾಚಿ ನಿತಳಾಯ್ ಆನಿ ತುಜಿ ಚಾಕ್ರಿ ಕರ್‍ತಾ''
''ತಿ ಕಾಂಯ್ ಮ್ಹಜೆರ್ ಉಪ್ಕಾರ್ ಕರಿನಾ. ಆಪ್ಲೆಂ ಕಾಮ್ ಕರ್‍ತಾ. ತಾಂಕಾಂ ತಾಂಚ್ಯಾ ಕಾಮಾಚೊ ಪಾಗ್ ಮೆಳ್ತಾ....'' ವಿನ್ನಿ ಸಾಂಗಾಲಾಗ್ಲೆಂ.
ಕಾಕುಸ್ ಆನಿ ರೂಮ್ ನಿತಳ್ ಕರುನ್ ತಿ ಸ್ತ್ರೀ ವೆತಾನಾ, ರೆನಿಟಾನ್ ಆಪ್ಲ್ಯಾ ಪರ್ಸಿಂತ್ಲೆ 200 ರುಪಯ್ ಕಾಡುನ್, ತಿಕಾ ದಿಲೆ.
''ಓಹ್ ಮ್ಹಜೆಂ ಇನ್ಸಲ್ಟ್ ಕರುಂಕ್, ತುವೆಂ ತಿಕಾ ಪಯ್ಶೆ ದಿಲೆಯ್ಗಿ ವ ತುಜೆಲಾಗ್ಗಿಂ ಮಸ್ತು ಪಯ್ಶೆ ಆಸಾತ್ ಮ್ಹಣ್ ದಾಕಂವ್ಕ್?''
''ತುಜೆ ಮುಕಾರ್ ಹೆ ಚಿಲ್ಲಾರ್ ಪಯ್ಶೆ ಖಂಚಾ ಲೆಕಾಚೆ ವೊನಿಯೆ?' ರೆನಿಟಾ ಸಾಂಗಾಲಾಗ್ಲೆಂ. ''ಹೆಂ ಪಯ್ಲೆಪಾವ್ಟಿಂ ನಹಿಂ, ಪಯ್ಲೆಂಯಿ ದಿಲ್ಯಾತ್...''
ರೆನಿಟಾನ್ ವಿನ್ನಿಕ್ ತಿಚ್ಯೆ ನಿಮಾಣೆ ಘಡ್ಯೆ, ಆಬ್ಲೆಸ್ಪಣ್ ಆನಿ ಹಿಮ್ಟೆಂಪಣ್ ಸೊಡುಂಕ್ ಹಿಶಾರೊ ದಿಲ್ಲೊ. ಪುಣ್ ಫಾತ್ರೆವ್ನ್ ಗೆಲ್ಲ್ಯಾ ವಿನ್ನಿಚ್ಯಾ ಕಾಳ್ಜಾಕ್, ಆಪ್ಲ್ಯಾ ಸ್ವಾರ್ಥಿ ಆಬ್ಲೆಸ್ಪಣಾಂತ್ಲೆಂ ಭಾಯ್ರ್ ಯೇಂವ್ಕ್ ಕಳೊಂಕ್ ನಾತ್‌ಲ್ಲೆಂ. ಮರ್‍ಚ್ಯಾ ವೆಳಾರೀ ಬೋವ್ಶಾ, ಆಪ್ಲಿ ಗ್ರೇಸ್ತ್ ಕಾಯ್ ಸಾಂಗಾತಾ ವ್ಹರುಂಕ್ ಮೆಳ್ತೆಲಿ ಮ್ಹಳ್ಳ್ಯಾ ಚಿಂತ್ಪಾಂತ್ ಆಸ್‌ಲ್ಲಿ ಜಾಂವ್ಕ್ ಪುರೊ. ತಿಕಾ ತಿಣೆ ಕೆಲ್ಲ್ಯಾ ಚುಕಿಂಚೊ ನಿಯಾಳ್ ವ ಪಶ್ಚತಾಪ್ ಭಗೊಂಕುಚ್ ನಾ.
ತಸಲ್ಯಾಚ್ ವಳ್ವಳ್ಯಾಚ್ಯಾ ದುಕಿಂತ್, ವಿನ್ನಿನ್ ದಾಕ್ತೆರಾನ್ ದಿಲ್ಲ್ಯಾ ಆವ್ದೆಚ್ಯಾಕ್‌ಯಿ ಆದಿಂಚ್ ಪ್ರಾಣ್ ಸೊಡ್ಲೊ!
Tags:
HJ Govias, Konkani Writer, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/24/2020 ಉದೆಂತಿಚೆಂ ನೆಕೆತ್ರ್...
-
11/28/2020 ಚೂಕಿ ತಿದ್ವಿನಾ ಜಾಲ್ಯಾರ್!...
-
11/4/2020 ಅನಿವಾಸಿ ರಾಯ್...
-
10/23/2020 ಘಾಣ್...
-
-
9/13/2020 ರಾತ್ ಪಾಳಿ...
-
6/18/2018 ವೆಚಿಕ್ ಪುತಾಚೊ ದಾಟ್ಟು...
-
11/12/2017 ನ್ಯೂ ಐನ್‌ಸ್ಟೀನ್...
-
9/7/2017 ಮ್ಹಜ್ಯಾ ಮೊಗಾಚೆಂ ಮೆಲ್ಬಾ...
-
8/29/2017 ಕೊಲ್‍ಗರ್ಲ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.