From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ನ್ಯೂ ಐನ್‌ಸ್ಟೀನ್
Sunday, November 12, 2017
ಸಗ್ಳ್ಯಾ ಸಂಸರಾರ್ ವಾರ್ತಾ ಪತ್ರಾಂನಿ ಆನಿ ಸರ್ವ್ ಸಮೂಹ್ ಮಾದ್ಯಮಾಂನಿ, ಲೊಕಾಕ್ ಭಿರಾಂತ್ ಉಟಂವ್ಚಿ ಖಬರ್ ಪ್ರಸಾರ್ ಜಾತಾಲಿ. ಮ್ಹನಿಸ್ ದೇವ್ ಜಾಂವ್ಕ್ ಭಾಯ್ರ್ ಸರ್ಲಾ. ಮೆಲ್ಲ್ಯಾ ವಾ ಜೀವ್ ಆಸ್ಲೆಲ್ಯಾ ಮ್ಹನ್ಶಾಚ್ಯಾ ಕೂಡಿಚ್ಯಾ ಲ್ಹಾನ್ ಜಾಗ್ಯಾ ಥಾವ್ನ್, ಏಕ್ ಡಿ.ಎನ್.ಎ.(DNA) ಕಾಡ್ನ್, ತಸಲೊಚ್ಚ್ ಮ್ಹನಿಸ್ ರಚುಂಕ್ ಜಾತಾ. ವೆಗಿಂಚ್ ಸಂಸಾರಾರ್ ಹಿಟ್ಲರ್, ಸದ್ದಾಂ ಹುಸೇನ್, ಬಿನ್ ಲಾದೆನ್ ತಸಲಿ ಸಬಾರ್ ವೆಕ್ತಿ ಉದೆತಾಲೆ.... ಸಬಾರ್ ರಾಷ್ಟ್ರಾಂನಿ ಹೆಂ ಸಂಶೋದ್ ಚಾಲೂ ಆಸ್‍ಲ್ಲೊ. ಪಾಪ್‌ಸಾಯ್ಬಾನ್ ಆನಿ ಮುಸ್ಲಿಂ ಧಾರ್ಮಿಕ್ ಮುಕೆಲ್ಯಾಂನಿ ಅಸಲ್ಯಾ ಸಂಸೋಧ್ ಸಂಗ್ತಿಂಕ್ ನಿಷೇಧ್ ಘಾಲಿಜಾಯ್ ಮ್ಹಣ್ ಒತ್ತಡ್ ಘಾಲ್ಲೆಲ್ಯಾನ್, ಅಮೇರಿಕಾ ಆನಿ ಯುರೋಪಾಚ್ಯಾ ಸಬಾರ್ ರಾಷ್ಟ್ರಾಂನಿ ನಿಷೇಧ್ ಆಸ್‍ಲ್ಲೊ ತರೀ ಗುಪಿತ್ ಸಂಸೋಧ್ ಚಲೊನ್ ಆಸ್‍ಲ್ಲೊ. ಜರ್ಮನಿನ್ ಹ್ಯಾ ಸಂಸೊಧಾಕ್ ನಿಷೇಧ್ ಘಾಲುಂಕ್ ನಾತ್‍ಲ್ಲೊ.
ದಸೆಂಬರ್ 2005 ಇಸ್ವೆಚೊ ಪಯ್ಲೊ ಹಫ್ತೊ. ಹ್ಯಾ ವೆಳಾರ್, ಜರ್ಮನಿಚ್ಯಾ ಎಕಾ ಹಪ್ತಾಳ್ಯಾ ಪತ್ರಾರ್, ''ವರ್ಸಾಂ ಆದಿಂಚ್, ಜರ್ಮನಿಚ್ಯಾ ಎಕಾ ನಾಂವಾಡ್ದಿಕ್ ಸಂಶೋಧನ್ ಸಂಸ್ಥ್ಯಾನ್, ಅಲ್‌ಬರ್ಟ್ ಐನ್‌ಸ್ಟೆನಾಚೊ ಮೆಂದು ಸುರಕ್ಷಿತ್ ದವರ್ಲೆಲ್ಯಾ ಪ್ರಯೋಗಾಲಯಚ್ಯಾ ಮಜತೆನ್, ಮೆಂದ್ವಾ ಥಾವ್ನ್ ಡಿ.ಎನ್.ಎ. ಕಾಡ್ನ್ ಅನ್ಯೇಕ್ ಐನ್‌ಸ್ಟೇನ್ ರಚನ್ ಕೆಲಾ. ಎಕಾ ನಾಂವಾಡ್ದಿಕ್ ಉದ್ಯಮಿಚೊ ಪೊಸ್ಕೊ ಪೂತ್ ಜಾವ್ನ್ ತೊ ವಾಡೊನ್ ಆಸಾ. ತಾಕಾ ಆತಾಂ 26 ವರ್ಸಾಂ ಪ್ರಾಯ್.... ' ಅಶೆಂ ಮ್ಹಣ್ ಪತ್ರಾಚ್ಯಾ ಮುಖ್‌ಪಾನಾರ್ ಹಿ ಖಬರ್ ಛಾಪೊನ್ ಆಯಿಲ್ಲಿ.
ಝಗ್ಲಣ್ಯಾ ಪರಿಂ ಹಿ ಖಬರ್ ಸಗ್ಳ್ಯಾ ಸಂಸಾರಾರ್ ಪ್ರಸಾರ್ ಜಾಂವ್ಕ್ ಪಾವ್ಲಿ. ಟಿ.ವಿ.ಚೆರ್ ಆನಿ ಪತ್ರಾಂಚೆರ್ ವಿಜ್ಞಾನಿಂಚ್ಯೊ ಚರ್ಚಾ ಸುರು ಜಾಲ್ಯೊ, ಹೊ ನೊವ್ಯೊ ಸಂಗ್ತಿಂ ಉಜ್ವಾಡಾಕ್ ಯೆತಾಲ್ಯೊ. ದೇವ್-ಕಣ್, ಕಾಳಿ ಸಕತ್, ಗುರುತ್ವಾಕರ್ಷಣ್ ಕಣ್, ಗ್ಲೂವಾನ್ ಇತ್ಯಾದಿ, ವಿಜ್ಞಾನಿ ಅಭಿಪ್ರಾಯೊ ದೀಂವ್ಕ್ ಲಾಗ್ಲೆ.
''ಹೊ ಐನ್‌ಸ್ಟೀನ್ ಖಂಯ್ ಆಸೊಂಕ್ ಪುರೊ? ತ್ಯಾ ಐನ್‌ಸ್ಟೀನಾಕ್ ಆಸ್‍ಲ್ಲ್ಯಾ ಪರಿಂ, ಫಿಸಿಕ್ಸಾಂತ್ (Physics) ಹುಶಾರ್ ಆಸ್ಚೆಂ ಗರ್ಲ್-ಫ್ರೆಂಡ್ ಹಾಕಾಯಿ ಆಸಾಜಾಯ್?.....,'' ಹ್ಯಾ ವಿಶಿಂ ಚರ್ಚಾ ಜಾತಾಲಿ ಮಾತ್ರ್ ನ್ಹಯ್, 'ತೊ ಹಾಂಗಾ ಆಸಾ, ತೊ ಥಂಯ್ ಆಸಾ....' ಮ್ಹಳ್ಳಿ ಆತುರಾಯೆಚಿ ಖಬಾರ್ ಪ್ರಸಾರ್ ಜಾತಾಲಿ. ದುಸ್ರ್ಯಾ ದಿಸಾ ತಿ ಸಮಾ ನ್ಹಯ್, ಮ್ಹಣ್ ಸೃಷ್ಠೀಕರಣ್ ಯೆತಾಲೆಂ. ಜನೆರ್ 5, 2006 ಇಸ್ವೆಚ್ಯಾ ಜರ್ಮನ್ ಡೈಲಿ ಪತ್ರಾನ್, ನೊವ್ಯಾ ಐನ್‌ಸ್ಟೀನ್ ವಿಶಿಂ ಸಗ್ಳಿ ಖಬಾರ್, ಮುಖ್ ಪಾನಾರ್ ಪರ್ಗಟ್ ಕೆಲ್ಲಿ. ಹಾಚೆ ಉಪ್ರಾಂತ್ ಹಿ ಖಬಾರ್ ಹೆರ್ ಪತ್ರಾಂನಿ ಆನಿ ಟಿ.ವಿ. ಚಾನೆಲಾಂನಿ ಪ್ರಸಾರ್ ಜಾಲಿ. 'ಜರ್ಮನ್ ಡೈಲಿ' ಪತ್ರಾಚ್ಯಾ ಮಂಡಳಿಚೆಂ 'ಜರ್ಮನ್ ನ್ಯೂಸ್' ಚಾನೆಲಾಚಾರೀ ಹಿ ಖಬಾರ್, ನಿರಂತರ್, ಲೈವ್ ಪ್ರಸಾರ್ ಜಾಂವ್ಕ್ ಲಾಗ್ಲಿ. ಟಿ.ವಿ. ಪಡ್ದ್ಯಾರ್ 26 ವರ್ಸಾಂ, ಪ್ರಾಯೆಚ್ಯಾ ತರ್ನಾಟ್ಯಾಕ್ ದಾಕಾಯ್ತಾಲೆ. ತರ್ನ್ಯಾ ಪ್ರಾಯೆರ್ ಆಲ್ಬರ್ಟ್ ಐನ್‌ಸ್ಟಿನ್ ದಿಸ್ಚ್ಯಾ ಪರಿಂಚ್ಚ್ ತೊ ದಿಸ್ತಾಲೊ. ಹಾತಾಂತ್ ಗಿಟಾರ್ ತರ್ ಬಗ್ಲೆನ್, ಗರ್ಲ್‌ಫ್ರೆಂಡ್ ಮಿಲೀನಾ.
ಆಲ್ಬರ್ಟ್ ಐನ್‌ಸ್ಟೀನಾಕೀ ಸಂಗೀತಾಂತ್ ಅಭಿರೂಚ್ ಆಸ್‍ಲ್ಲಿ. ಶಿಕ್ಪಾ ವೆಳಾರ್, ತಾಕಾ ಮಿಲೇವಾ ಮ್ಹಳ್ಳೆಂ ಶಿಕ್ಪಾಂತ್ ಹುಶಾರ್ ಆಸ್ಚೆಂ ಸಾಂಗಾತಿಣ್ ಆಸ್‍ಲ್ಲೆಂ. ಖಂಡಿತ್ ಜಾವ್ನ್ ನವೊ ಐನ್‌ಸ್ಟೀನ್ ನವೆ ಸಿದ್ಧಾಂತ್ ಘೆವ್ನ್ ಯೆತಾಲೊ.... ಚಿಂತುಂಕ್ ಲಾಗ್ಲೊ ಲೋಕ್. ತಿತ್ಲ್ಯಾರ್, ಟಿ.ವಿ. ವರ್ದೆಗಾರಾನ್, ನೊವ್ಯಾ ಐನ್‌ಸ್ಟೇನಾಚಿ ಚರಿತ್ರಾ, ಪಡ್ದ್ಯಾರ್ ದಾಕಯ್ಲಿ.
'ಹಿ ವರ್ದಿ ಸಬಾರಾಂಕ್ ಸಂತೊಸಾಚಿ, ಥೊಡ್ಯಾಂಕ್ ನಿರಾಸೆಚಿ ಜಾಂವ್ಕ್ ಪಾವ್ತಾಲಿ', ಮ್ಹಣಾಲೊ ತೊ ಸುರ್ವೆರ್‌ಚ್ಚ್. ಫ್ರಾಂಕ್‌ಫರ್ಟ್ ಶೆರಾಂತ್ ಆಸ್ಚ್ಯಾ, ಮ್ಯಾಕ್ಸ್ ಪ್ಲಾಂಕ್ ಇನ್ಸ್‌ಟಿಟ್ಯೂಟ್ ಆಫ್ ಜನೆಟಿಕ್ಸ್ ಹಾಂಗಾಚ್ಯಾ ವಿಜ್ಞಾನಿಂನಿ, ಐನ್‌ಸ್ಟೀನಾಚ್ಯಾ, ಸುರಕ್ಷಿತ್ ಥರಾನ್ ದವರ್ಲೆಲ್ಯಾ ಮೆಂದ್ವಾಚೊ, ಸುವೆಚ್ಯಾ ತುದಿ ತೆದೊ ಭಾಗ್ ಘೆವ್ನ್, ತಾಂತ್ಲೆಂ ಡಿ.ಎನ್.ಎ. ಕಾಡ್ನ್, ಐನ್‌ಸ್ಟೀನಾಕ್ ಪರತ್ ಮನಿಸ್ ಕರ್ಚೊ ಪ್ರಯೋಗ್ ಸುರು ಕೆಲ್ಲೊ. ಜರ್ಮನಿಚ್ಯಾ ರೂಪರ್ಟ್ ಬೋಶ್ ಮ್ಹಳ್ಳ್ಯಾ ಕಂಪೆನಿನ್, ಹೊ ಸಗ್ಳೊ ಸಂಸೋಧ್, ಪ್ರಾಯೋಜನ್ ಕೆಲ್ಲೊ. ವಿಜ್ಞಾನಿ, ಡಿ.ಎನ್.ಎ. ಥಾವ್ನ್, ಏಕ್ ಭ್ರೂಣ್ ಉತ್ಪನ್ನ್ ಕರ್ಚ್ಯಾಂತ್ ಯಶಸ್ವಿ ಜಾಲ್ಲೆ. ಹೆ ಭ್ರೂಣ್, ಎಕಾ ಜುದೆವ್ ಸ್ತ್ರೀಯೆಚ್ಯಾ ಗರ್ಭಾಶಯ ಭಿತರ್ ಘಾಲ್ನ್, ಸಹಜ್ ರಿತಿರ್ ವಾಡಾಶೆಂ ಕೆಲೆಂ. ಗರ್ಭಾಶಾಯಾಂತ್ ಭುರ್ಗ್ಯಾಚಿ ಸಾರ್ಕಿ ವಾಡಾವಳ್ ಜಾತೆಚ್ಚ್ ಭುರ್ಗೆಂ ಭುಂಯ್ ಪಡ್ಲೆಂ. ಹ್ಯಾ ಭುರ್ಗ್ಯಾಕ್, ಕಂಪೆನಿಚ್ಯಾ ಮ್ಯಾನೆಜಿಂಗ್ ಡೈರಕ್ಟರಾನ್ ಪೊಸ್ಕೆಂ ಕರ್ನ್ ಘೆತ್ಲೆಂ. ಹ್ಯಾ ಭುರ್ಗ್ಯಾನ್, ಬುದ್ವಂತ್ ಜಾವ್ನ್ ವಾಡಾಜಾಯ್ ತರ್, ಹರ್ಯೇಕಾ ಕ್ಷಣಾರ್ ಕಿತೆಂ ಖಾಣ್ ದೀಜಾಯ್, ಕಿತ್ಲೆಂ ದೀಜಾಯ್, ಕಸೆಂ ದೀಜಾಯ್, ಕಿತೆಂ ಭಲಾಯ್ಕೆ ಖಾತಿರ್ ಕರಿಜಾಯ್ ಸಗ್ಳೆಂ ಕಂಪ್ಯೂಟರ್ ಪ್ರೋಗ್ರಾಂ ವಿಜ್ಞಾನಿಂನಿ ತಯಾರ್ ಕೆಲ್ಲೆಂ. ಏಕ್ ಭುರ್ಗೆಂ ಭಲಾಯ್ಕೆಭರಿತ್ ಜಾವ್ನ್, ಮಾನಸಿಕ್ ಆನಿ ಶಾರೀರಿಕ್ ರಿತಿರ್ ವಾಡಂವ್ಕ್, ಕಂಪ್ಯೂಟರ್ ಪ್ರೊಗ್ರಾಂ ಮಾರ್ಗದರ್ಶನ್ ದಿತಾಲೆಂ. ತೊ ಪಾಂಚ್ ವರ್ಸಾಚೊ ಆಸ್ತಾನಾ ತಾಕಾ, ದಿಕ್ಸೂಚಿ ಹಾಡ್ನ್ ಖೆಳೊಂಕ್ ದಿಲಿ. ಭುರ್ಗೊ ವ್ಹಡ್ ಆಸಕ್ತೆನ್, ತಿ, ಘೆವ್ನ್ ಖೆಳೊಂಕ್ ಲಾಗ್ಲೊ. ವಾಡೊನ್ ಯೆತಾನಾ ವಿಜ್ಞಾನಾಚ್ಯೊ ಮಾದರಿ, ಮತಿಚ್ಯಾ ವಿಕಾಸಾರ್ ಆಧಾರ್ ಜಾಂವ್ಚೆ, ಖೆಳ್, ಇತ್ಯಾದಿ ತಾಕಾ ದಿಲೆ. ಉಡಾಸಾಚಿ ಸಕತ್ ವಾಡಾಂವ್ಚ್ಯಾಕ್, ಇಂಡಿಯಾ ಥಾವ್ನ್, ಕಾರೆಣೊ ವರೊವ್ನ್, ತಾಚಿಂ ಪಾನಾಂ ತಾಕಾ ಸರಾಗ್ ಖಾವಾಯ್ಲಿಂ. ಸಂಗೀತಾಚಿ ತರ್ಬೆತಿ ತಾಕಾ ದಿಲಿ. ಸಗ್ಳೊ ಪ್ರಯೋಗ್ ಗುಪಿತ್ ಚಲ್ತಾಲೊ.
ಹೈಸ್ಕೂಲಾಚ್ಯಾ ಶಿಕ್ಪಾಕ್, ನಾಂವಾಡ್ದಿಕ್ ಫ್ರಾಂಕ್‌ಪರ್ಟ್ ಇಂಟರ್ನೆಶನಲ್ ಇಸ್ಕೊಲಾಕ್ ತಾಕಾ ದಾಖಲ್ ಕೆಲೊ. ಥಂಯ್ ಸಂಗೀತಾಂತ್, ನಾಚಾಂತ್ ತಾಕಾ ವಿಶೇಷ್ ಆಸಕ್ತ್. ಗಣಿತಾಂತ್ ಆನಿ ವಿಜ್ಞಾನಾಂತ್ ಹುಶಾರ್ ಆಸ್‍ಲ್ಲೊ ತರೀ, ಶಿಕ್ಪಾಂತ್ ಆಸಕ್ತ್ ನಾತ್‍ಲ್ಲಿ. ಇಸ್ಕೊಲಾಕ್ ಚಕ್ಕರ್ ಮಾರ್ನ್, ಗಾಂವ್ ಭಂವ್ತಾಲೊ. ಇಸ್ಕೊಲಾಂತ್ ಶಿಕ್ಷಕ್/ಶಿಕ್ಷಕಿಂಕ್ ತಕ್ಲೆ ಫಡಾಪಡಿಚೊ ಜಾಲ್ಲೊ. ಹಫ್ತ್ಯಾಕ್ ಏಕ್ ಪಾವ್ಟಿಂ ಇಸ್ಕೊಲಾ ಥಾವ್ನ್ ಘರಾ ದೂರ್ ವೆತಾಲೆಂ.
''ಆಲ್ಬರ್ಟ್ ಐನ್‌ಸ್ಟೀನ್ ತಸೆಂಚ್ ಆಸ್‍ಲ್ಲೊ . ಗಣಿತಾಂತ್ ಆನಿ ವಿಜ್ಞಾನಾಂತ್ ಸೊಡ್ನ್ ಉರುಲ್ಲ್ಯಾ ವಿಶಯಾಂನಿ ಫೇಯ್ಲ್ ಜಾತಾಲೊ'', ವಿಜ್ಞಾನಿಂನಿ ತಾಕಾ ಸಮಾಧಾನ್ ಕೆಲೆಂ. ''ತುಚೊ ಭುರ್ಗೊ ಶಿಕಾನಾ, ಕಾಂಯ್ ಪ್ರಯೋಜನ್ ನಾ ತಾಕಾ ಬರಿ ಬೂದ್ ಸಾಂಗ್...'', ಮ್ಹಣಾಲೊ ಪ್ರಿನ್ಸಿಪಾಲ್ ಉದ್ಯಮಿಕ್.
''ತುಜಾ ಶಿಕ್ಷಕಾಂಕ್ ತಾಕಾ ಶಿಕಂವ್ಕ್ ಕಳಿತ್ ನಾ. ವಿಶೇಸ್ ಬುದ್ವಂತ್ ಭುರ್ಗೊ ತೊ. ಥೊಡ್ಯಾಚ್ ವರ್ಸಾಂನಿ ಪಳೆಯಾ ತಾಚಿ ಶಾಥಿ'', ಮ್ಹಣಾಲೊ ಉದ್ಯಮಿ ಬಾಪಯ್. ಅಂತಿಮ್ ಪರೀಕ್ಷೆಂತ್ ಗಣಿತಾಂತ್ ಆನಿ ವಿಜ್ಞಾನಾಂತ್ ಮಾತ್ರ್ ಉತ್ತೀರ್ಣ್, ಹೆರ್ ವಿಶಯಾನಿಂ ಫೇಯ್ಲ್ ಜಾಲೊ. ಟ್ಯೂಶಾನ್ ದೀವ್ನ್ ತ್ರಾಸಾಂನಿಂ ಸಪ್ಲಿಮೆಂಟರಿಂತ್ ಉತ್ತೀರ್ಣ್ ಜಾಲೊ.
ನೊವ್ಯಾ ಐನ್‍ಸ್ಟೇನಾಕ್, ವಿಜ್ಞಾನಿಂಚ್ಯಾ ಅಪೇಕ್ಷೆ ಪ್ರಕಾರ್ ನಾಂವಾಡ್ದಿಕ್ ಸಂಸ್ಥೊ - ಮಾರ್ಕ್ಸ್ ಪ್ಲಾಂಕ್ ಇನ್ಸ್‌ಟ್ಯೂಟಿಚ್ಯಾ ಸ್ಟೂಡ್‌ಗಾರ್ಡ್ ಹಾಣಿ ಚಲಂವ್ಚಾ ಕೊಲೆಜಿಕ್ ಭರ್ತಿ ಕೆಲೊ. ಪೂಣ್ ವಿಜ್ಞಾನಿಂನಿ ತಸೆಂ ಬಾಪಾಯ್ನ್, ಚೆರ್ಕ್ಯಾಚಿ ಪಾಟ್ಲಿ ಚರಿತ್ರಾ ಗುಪಿತ್ ಸಾಂಬಾಳ್ಳಿ. ಹ್ಯಾಚ್ಚ್ ಕೊಲೆಜಿಕ್, ಮಿಲೇನಿಯಾ ನಾಂವಾಚಿ, ಜುದೆವ್ ಕುಳಿಯೆಚಿ ಚಲಿ ಶಿಕ್ಪಾಕ್ ಭರ್ತಿ ಜಾಲ್ಲಿ. ಪಳೆಂವ್ಕ್ ಬೋವ್ ಸೊಭಿತ್, ಶಿಕ್ಪಾಂತ್ ಚತುರ್, ಆಕರ್ಷಕ್ ವ್ಯಕ್ತಿತ್ವ್ ತಿಚೆಂ. ತಿತ್ಲೆಂಚ್ ನಾಜೂಕ್ ಉಲೊವ್ಣೆ. ಭೌತ್‌ಶಾಸ್ತ್ರಾಂತ್ ಆನಿ ಗಣಿತಾಂತ್ ತಿಚಿ ಆಸಕ್ತ್ ಆನಿ ಜಾಣ್ವಾಯ್ ವಿಶೇಸ್. ನವೊ ಐನ್‌ಸ್ಟೀನ್ ತಿಚಾ ಪಾಟಿಕ್ ಲಾಗ್ಲೊ. ಪಯ್ಲೆಂ ಮಿಲೇನಿಯನಾನ್ ನಿರ್ಲಕ್ಷ ದಾಕಯ್ಲಿ ತರೀ, ನವೊ ಐನ್‌ಸ್ಟೀನಾನ್ ತಿಚಿ ಪಾಟ್ ಸೊಡಿನಾತ್ಲೆಲ್ಯಾನ್, ಕ್ರಮೇಣ್ ಮಿಲೇನಿಯಾ ತಾಚ್ಯಾ ಮೊಗಾರ್ ಪಡ್ಲೆಂ. ಚೆಡ್ಯಾಕ್ ಶಿಕ್ಪಾಕ್ ಆಸಕ್ತ್ ನಾತ್‍ಲ್ಲಿ. ಫಕತ್ ನಾಚ್, ಸಂಗೀತ್, ಗಮ್ಮತ್ ಮಾರ್ಚೆಂ ಹಾಂತುಂಚ್ ತಾಚೊ ವೇಳ್ ಖರ್ಚತಾಲೊ. ಪೂಣ್ ಮಿಲೇನಿಯಾಕ್ ಆಪ್ಲೆ ಉದ್ದೇಶ್ ಸ್ಪಷ್ಟ್ ಆಸ್‍ಲ್ಲೆ. ಮೇರಿ ಕ್ಯೂರಿ ಪರಿಂ ಆಪ್ಣಾಕೀ ನಾಂವಾಡ್ದಿಕ್ ಭೌತ್ ವಿಜ್ಞಾನಿ ಜಾಯ್ಜಾಯ್ ಮ್ಹಳ್ಳಿ ತಿಚಿ ಆಶಾ ನಿರಂತರ್ ಆಸ್‍ಲ್ಲಿ ಜಾಲ್ಲ್ಯಾನ್, ಆಪುಣ್ ಶಿಕ್ತಾಲಿಂ ಮಾತ್ರ್ ನ್ಹಯ್, ಏಕ್ ಟ್ಯೂಶನ್ ಶಿಕ್ಷಕಿ ತಸೆಂ ಐನ್‌ಸ್ಟೀನಾಕೀ ಶಿಕಯ್ತಾಲಿ. ತಸೆಂ ಜಾಲ್ಲ್ಯಾನ್ ದೊಗಾಂಯ್ಚೆ ಭೌತ್‌ಶಾಸ್ತ್ರಾಂತ್ ಬಿ.ಎಸ್. ಆನಿ ಎಂ.ಎಸ್ ಜಾಲ್ಲೆಂ. ತಾಚೆ ಉಪ್ರಾಂತ್, ಮಿಲ್ಲೆನಿಯಾಕ್, ತ್ಯಾಚ್ಚ್ ಸಂಸ್ಥ್ಯಾಂತ್, ವಿದ್ಯಾರ್ಥಿವೇತನಾ ಸವೆಂ ಸಂಸೋಧ್ ಕರುಂಕ್ ಪ್ರವೇಶ್ ಲಾಭ್ಲೊ. ಹ್ಯಾಚ್ ಸಂಸ್ಥ್ಯಾಂತ್ ಪ್ರವೇಶ್ ಕರುಂಕ್ ಜಾಯ್ ಆಸ್ಚೆ ಅಂಕ್ ಜಾಂವ್, ಸಂಸೋಧ್ ಕರುಂಕ್ ಮೋನ್ ಜಾಂವ್ ನೊವ್ಯಾ ಐನ್‌ಸ್ಟೀನಾಕ್ ನಾತ್‍ಲ್ಲೆಂ . ಪೂಣ್ ತಾಚೆ ವಿಶಿಂ ಸಂಸೋಧ್ ಚಲಂವ್ಚೆ ವಿಜ್ಞಾನಿ ಹ್ಯಾಚ್ಯಾ ಮೂಳ್ ಸಂಸ್ಥ್ಯಾಕ್ ಸಂಬಂಧ್ ಜಾಲ್ಲೆ ಜಾಲ್ಲ್ಯಾನ್, ತಾಂಚ್ಯಾ ಪ್ರಭಾವಾನ್ ತಾಕಾ ಪ್ರವೇಶ್ ಲಾಭ್ಲೊ, 'ಕಾಳಿ ಸಕತ್' (Dark Energy) ವಿಶಯಾಂತ್, ಸಂಸೋಧ್ ಚಲಂವ್ಚ್ಯಾ ಪ್ರೊಜೆಕ್ಟಾಕ್ ತಿಂ ಭರ್ತಿ ಜಾಲಿಂ. ಹ್ಯಾಚ್ಚ್ ವೆಳಾರ್, ತಾಂಚೆಂ ಕಾಜಾರ್ ಗದ್ದಾಳಾಯೆನ್ ಜಾಲೆಂ.
ಮಿಲೇನಿಯಾ ಸಂಸೋಧಾಂತ್ ಮಸ್ತ್ ಆಸಕ್ತ್ ದಾಕಾಯ್ತಾಲೆಂ ಆನಿ ವಿಶೇಸ್ ಸಂಸೋಶ್ ತಾಣೆ ಕೆಲ್ಲೊ. ಪೂಣ್ ನೊವ್ಯಾ ಐನ್‌ಸ್ಟೇನಾನ್, ಸಂಸೋಧಾಂತ್ ಕಿತೆಂಚ್ ಮಹತ್ವಾಚೆಂ ಸಾಧನ್ ಕೆಲ್ಲೆಂ ನಾಂ. ಮಿಲೇನಿಯಾನ್ ಕೆಲ್ಲೊ ಸಂಸೋದ್ ಪರ್ಗಟ್ ಕರುಂಕ್, ಅಮೇರಿಕಾಚ್ಯಾ ನಾಂವಾಡ್ದಿಕ್ ಸಂಸೋಧ್ ಪತ್ರ್, ಫಿಸಿಕಲ್ ರಿವ್ಯೂ ಹಾಂತುಂ ಆವ್ಕಾಸ್ ಲಾಭ್‍ಲ್ಲೊ. ಹಿ ಖಬರ್, ಮಿಲೇನಿಯಾಚ್ಯಾ ಸಂಸೋಧ್ ಮಾರ್ಗದರ್ಶಕ್ ಮುಖಾಂತ್ರ್ ಐನ್‌ಸ್ಟೇನಾವಿಶಿಂ ಸಂಸೋಧ್ ಚಲಂವ್ಚ್ಯಾ ವಿಜ್ಞಾನಿಂಕ್ ಪಾವ್ಲೊ. ಸಂಸೋಧನ್ ಮಾರ್ಗದರ್ಶಕಿ ಜಾವ್ನ್ ಆಸ್‍ಲ್ಲಿ ಪ್ರೊ| ಮಾರ್ಗರೇಟ್. ಏಕ್ ಸ್ತ್ರೀ. ಪೂಣ್ ತಿಕಾ, ಹ್ಯಾ ನೊವ್ಯಾ ಐನ್‌ಸ್ಟೀನಾ ವಿಶಿಂ ಕಿತೆಂಚ್ ತೆದಾಳಾ ಕಳಿತ್ ನಾತ್‍ಲ್ಲೆಂ.
''ಹೊ ಸಂಸೋಧ್ ಪ್ರಬಂಧ್ ನ್ಯೂ ಐನ್‌ಸ್ಟೆನಾಚ್ಯಾ ನಾಂವಾನ್ ಪರ್ಗಟ್ ಕರಿಜಾಯ್.......'' ಮ್ಹಣಾಲೆ, ವಿಜ್ಞಾನಿ ಪ್ರೆ| ಮಾರ್ಗರೇಟಾ ಲಾಗಿಂ. ಪೂಣ್ ತಿ ವೊಪ್ವೊನಾ. ''ತರ್ ತಾಂಚ್ಯಾ ದೊಗಾಂಯ್ಚಾ ಜೋಡ್ ನಾಂವಾಖಾಲ್ ಪರ್ಗಟ್ ಕರ್ಯಾಂ'', ಮ್ಹಣಾಲೆ ತೆ.ಹಾಕಾಯೀ ತಿ ವೊಪ್ವೊಂಕ್ ನಾ. ಸಂಸ್ಥ್ಯಾಚ್ಯಾ ಮುಖಾಂತ್ರ್, ಉದ್ಯಮಿ ನ್ಯೂ ಐನ್‌ಸ್ಟೀನಾಚ್ಯಾ ಬಾಪಾಯ್ ಮುಖಾಂತ್ರ್, ಮಂತ್ರಿ ಮುಖಾಂತ್ರ್, ತಿಚೆರ್ ಆನಿ ಮಿಲೇನಿಯಾಚೆರ್, ದೊಗಾಂಯ್ಚಾ ನಾಂವಾರ್ ಸಂಸೋಧ್ ಪರ್ಗಟ್ ಕರುಂಕ್ ದಬಾವ್ ಘಾಲೊ. ಕಿತ್ಯಾಕ್ ಮ್ಹಳ್ಯಾರ್ ಹೊ ಸಂಸೋಧ್ ಪರ್ಗಟ್ ಜಾಲ್ಯಾರ್, 'ರಿಲೆಟಿವಿಟಿ' ಉಪ್ರಾಂತ್, ನಾಂವಾಡ್ದಿಕ್ ಸಂಸೋಧ್ ಜಾಂವ್ಕ್ ಪಾವ್ತಾಲೊ ಮ್ಹಳ್ಳೆಂ ಚಿಂತಾಪ್ ಆಸ್‍ಲ್ಲೆಂ. ಪ್ರೊ| ಮಾರ್ಗರೇಟಾಕ್, ಆಲ್ಬರ್ಟ್ ಐನ್‌ಸ್ಟೆನಾಚಿ ಚರಿತ್ರಾ ಕಳಿತ್ ಆಸ್‍ಲ್ಲಿ. ಪುಣ್, ರಿಲೆಟಿವಿಟಿ, ಪೋಟೊ ಇಲೆಕ್ಟ್ರಿಕ್ ಇಫೆಕ್ಟ್ ಸಂಸೋಧ್ ಮುಳಾವ್ಯಾನ್, ಮಿಲೇವಾನ್ ಕೆಲ್ಲೆ ಮ್ಹಳ್ಳೆ ತಿಚಿ ಪಾತ್ಯೆಣಿ!. ಸ್ತ್ರೀ ಮ್ಹಳ್ಳಾ ಎಕಾಚ್ಚ್ ಕಾರಣಾಕ್ ಲಾಗೊನ್ ಸಗ್ಳಿ ಕೀರ್ತ್ ಆಲ್ಬರ್ಟ್ ಐನ್‌ಸ್ಟೀನಾಕ್ ಗೆಲ್ಲಿ ಮ್ಹಳ್ಲೆಂ ತಿಚೆಂ ಖಚಿತ್ ಚಿಂತಾಪ್.
ಪ್ರೊ| ಮಾರ್ಗರೇಟಾನ್ ಸಗ್ಳಿ ಗಜಾಲ್ ಮಿಲೇನಿಯಾಕ್ ಸಾಂಗ್ಲಿ. ''ಆಲ್ಬರ್ಟ್ ಐನ್‍ಸ್ಟೇನಾಪರಿಂ ನಾಂವಾಡ್ದಿಕ್ ವಿಜ್ಞಾನಿ ಜಾಂವ್ಚೆಂ, ವ ಮಿಲೇನಾಪರಿಂ ನಾಂವ್ ನಾಸ್ತಾಂ ವೆಚೆಂ ತುಜೆರ್ ಆಸಾ. ದೆಕುನ್ ಸಂಸೋಧ್ ಪ್ರಬಂಧ್, ಥೊಡ್ಯಾ ತಿದ್ವಣಿ ಖಾತಿರ್ ಪಾಟಿಂ ಆಯ್ಲಾ. ತೊ, ತಿದ್ವಣ್ ಕರ್ನ್ ಆಜ್‌ಚ್ ಧಾಡ್ಯಾಂ, ಮಾಗಿರ್ ತುಂವೆಂ ಥೊಡೊ ತೇಂಪ್ ಹೊ ಗಾಂವ್ ಸೋಡ್ನ್ ವಚಜಾಯ್, ತಾಚಿ ವ್ಯವಸ್ಥಾ ಹಾಂವ್ ಕರ್ತಾಂ'' ಮ್ಹಣಾಲಿ ತಿ.
ಮಿಲೇನಿಯಾ ನಪಂಯ್ಚ್ ಜಾಲ್ಲೆಂ. 'ಕಾಳಿ ಸಕತ್' ಹ್ಯಾ ನಾ ದಿಸ್ತ್ಯಾ ಸಕ್ತೆವಿಶಿಂ ಉಜ್ವಾಡ್ ಫಾಂಕಂವ್ಚೊ ಸಂಸೋಧ್, ಮಿಲೇನಿಯಾಚ್ಯಾ ನಾಂವಾನ್ ಪ್ರಗಟ್ ಜಾಲ್ಲೊ. ಐನ್‌ಸ್ಟೇನಾ ಉಪ್ರಾಂತ್, ಬೋವ್ ಶ್ರೇಷ್ಟ್ ವಿಜ್ಞಾನಿ ಮ್ಹಣ್ ಸಂಸಾರ್ ತಾಕಾ ವೊಳ್ಕೊಂಕ್ ಲಾಗ್ಲೊ. ಪೂಣ್ ಮಿಲೇನಿಯಾ ಖಂಯ್ಸರೀ ದಿಸಾನಾತ್‍ಲ್ಲೆಂ .
ವಿಜ್ಞಾನಿಂಚೊ, ಐನ್‌ಸ್ಟೇನಾಚ್ಯಾ ಡಿ.ಎನ್.ಎ. ಥಾವ್ನ್ ಅನ್ಯೇಕ್ ವಿಜ್ಞಾನಿ ಉಟಂವ್ಚೆಂ ಪ್ರಯೋಗ್ ನಿರ್ಫಳ್ ಜಾಲ್ಲೊ. ನವೊ ಐನ್‌ಸ್ಟೀನ್ ಎಂ.ಎಸ್ ಪಾಸ್ ತರೀ, ಭೌತ್‌ಶಾಸ್ತ್ರಿರಾಚೆಂ ಎ, ಬಿ, ಸಿ, ಡಿ, ಗೂಂಡಾಯೆನ್ ಕಳಿತ್ ನಾತ್ಲೆಲ್ಯಾನ್, ಬಾಪಾಯ್ಚಾ ದಫ್ತರಾಂತ್ ಗುಮಾಸ್ತಾಚೆಂ ಕಾಮ್ ಕರ್ತಾ. ಬಾಪಯ್-ಉದ್ಯಮಿನ್, ವಿಜ್ಞಾನಿಂನಿ ಆಪ್ಣಾಕ್ ಮೋಸ್ ಕೆಲಾ ಮ್ಹಣ್ ಏಕ್ ಬಿಲ್ಲಿಯಾ ಡಾಲ್ಲರಾಂಕ್ ದಾವೊ ಮಾಂಡ್ಲಾ.
''ಹೊ ಪ್ರಯೋಗ್ ಸಲ್ವಣಿ ನ್ಹಯ್, ಜೀಕ್'' ಮ್ಹಣಾಲೊ ವರ್ದೆಗಾರ್, ''ಮ್ಹನ್ಶಾಚೆಂ ಜೀವನ್, ಸಾಧನ್, ಕೇವಲ್ ಡಿ.ಎನ್.ಎ. ವಾ ವಂಶಾವಳಿಚೆರ್ ಹೊಂದ್ವೊನ್ ನಾ. ಪರಿಸರಾಚೆರ್ ಹೆಂ ಹೊಂದ್ವೊನ್ ಆಸಾ. ಹಿಟ್ಲರಾಚ್ಯಾ ಡಿ.ಎನ್.ಎ. ಥಾವ್ನ್ ಮದರ್ ತೆರೆಸಾ ಜಲ್ಮೊಂಕ್ ಸಾಧ್ಯ್ ಆಸಾ......!!''
Tags:
Einstein, Dr. Gerry Niddodi, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/24/2020 ಉದೆಂತಿಚೆಂ ನೆಕೆತ್ರ್...
-
11/28/2020 ಚೂಕಿ ತಿದ್ವಿನಾ ಜಾಲ್ಯಾರ್!...
-
11/4/2020 ಅನಿವಾಸಿ ರಾಯ್...
-
10/23/2020 ಘಾಣ್...
-
-
9/13/2020 ರಾತ್ ಪಾಳಿ...
-
6/18/2018 ವೆಚಿಕ್ ಪುತಾಚೊ ದಾಟ್ಟು...
-
11/12/2017 ನ್ಯೂ ಐನ್‌ಸ್ಟೀನ್...
-
9/7/2017 ಮ್ಹಜ್ಯಾ ಮೊಗಾಚೆಂ ಮೆಲ್ಬಾ...
-
8/29/2017 ಕೊಲ್‍ಗರ್ಲ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
1 Comment/s.
Nice story and information. Kudos to Gerrybaab.