From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಸಾತ್ ವೊರಾ೦ಚೆ೦ ಬಸ್ಸ್
Monday, June 6, 2016
"ತು೦ ಹಾ೦ಗಾಸರ್ ನವೊಚ್ಚ್?"
ಸಿಗ್ರೆಟಿಚ್ಯಾ ಧು೦ವ್ರಾಚೊ ವಾಸ್ ಪಯ್ಲೊ ಮ್ಹಜ್ಯಾ ನಾಕಾಕ್ ಆದಾಳ್ಳ್ಯಾ ಉಪ್ರಾ೦ತ್ ತಾಚೆ೦ ಸವಾಲ್ ಮ್ಹಜ್ಯಾ ಕಾನಾ೦ನಿ ರಿಗ್ಲೆ೦. ಚಿಕ್ಕೆಸೆ ಉಸ್ಮಡೊನ್ ಹಾ೦ವೆ೦ ಲಿಕ್ಣಿ ರಾವಯ್ಲಿ. ಆನಿ ಮುಕಮಳ್ ಉಬಾರ್‍ಲೆ೦. ಕಸಲೆ-ಗಿ ಎಕ್ ಕ್ಶುಲ್ಲಕ್ ನದ್ರೆನ್ ತೊ ಮ್ಹಾಕಾ ಪಳೆತಾಲೊ.
"ವ್ಹಯ್," ಹಾ೦ವೆ೦ ಜಾಪ್ ದಿಲಿ.
"ನವೊಚ್ಚ್ ಸೆರ್‍ವಾಲ್ಲ್ಯಾನ್ ಆಪ್ಲ್ಯಾ ಕಾಮಾ೦ತ್ ಸಡಿಳಾಯ್ ದಾಕ೦ವ್ಕ್ ನಜೊ."
"ಹಾ೦ವ್ ತೆ೦ ಮನಾ೦ತ್ ದವರ್ತಾಂ." ತೊ ಕೋಣ್ ಕಿತೆ೦ ಮ್ಹಣ್ ಕಳಿತ್ ನಾತ್‌ಲ್ಲೆ೦ ತರಿ ಹಾ೦ವ್ ಲ್ಹಾನ್ ಜಾಲೊ೦. ಪಾಟ್ಲ್ಯಾ ಎಕಾ ವರ್ಸಾ ಥಾವ್ನ್ ಸರ್ವಾಂ ಸಾಮ್ಕಾರ್ ಲ್ಹಾನ್ ಜಾವ್ನ್ ಮ್ಹಾಕಾ ಸವಯ್ ಜಾಲ್ಲಿ; ಸ್ವಾಬಿಮಾನಾಚೆರ್ ಸಾಯ್ ಮಾ೦ಡ್ಲೆಲಿ. ಕಾರಣ್ ಸಾದೆ೦ಚ್: ಹಾ೦ವ್ ಕಾಮಾಚ್ಯಾ ಸೊದ್ನೆರ್ ಆಸ್‌ಲ್ಲೊ೦. ಎಕಾ ವರ್ಸಾ ಉಪ್ರಾ೦ತ್ ವಯ್‌ವಾಟಿ೦ಚ್ಯಾ ಎಕಾ ದಫ್ತರಾ೦ತ್ ಕಾಮ್ ಲಾಗ್ತಾನಾ ಎಕಾ ಚಪ್ರಾಸಿ ಸಾಮ್ಕಾರ್‌ಯಿ ಲ್ಹಾನ್ ಜಾ೦ವ್ಕ್ ಮ್ಹಾಕಾ ಕಶ್ಟ್ ಭೊಗ್ಲೆನಾ೦ತ್.
ಶಿಕ್ಪಾ ಉಪ್ರಾ೦ತ್ ಸ್ವತ೦ತ್ರ್ ವಾತಾವರಣಾಚೆ ಸೊದ್ನೆರ್ ಭಾಯ್ರ್ ಸರ್‌ಲ್ಲ್ಯಾ ಹಾ೦ವೆ೦ ಅದೃಶ್ ಬ೦ಧಡೆಚ್ಯಾ ಕಾಳೊ೦ಕಾ೦ತ್ ಸಬಾರ್ ಲಿಸಾ೦ವಾ೦ ಶಿಕೊನ್ ಘೆತ್‌ಲ್ಲಿ೦.
"ಕಾರ್ಯಾಂತ್ ತು೦ವೆ೦ ತೆ೦ ದಾಕಯ್ಜೆ."
"ಹಾ೦ವ್ ಪ್ರೇತನ್ ಕರ್ತಾಂ."
"ಭೋವ್ ಬರೆ೦. ಹ್ಯಾ ದಫ್ತರಾ೦ತ್ ಸುಮಾರ್‍ಶೆ೦ ಕಾಮ್ ಬಾಕಿ ಪಡ್ಲಾ೦. ಪಾ೦ಚ್ ವೊರಾ೦ ನ೦ತರ್...."
"ಮ್ಹಾಕಾ ತೀಸ್ ಮಯ್ಲಾ೦ ಪಯ್ಣ್ ಕರುನ್ ಘರಾ ವಚು೦ಕ್ ಆಸಾ!" ಹಾ೦ವ್ ಮಧೆ೦ ಉಲಯ್ಲೊ೦.
ತಾಣೆ ಸಿಗ್ರೆಟಿಚ್ಯಾ ಧುವ್ರಾಚೆ೦ ಆನ್ಯೇಕ್ ಮೋಡ್ ಉಟಯ್ಲೆ೦.
"ತೀಸ್ ಮಯ್ಲಾ೦!" ಜಡಾಯ್ ನಾತ್‌ಲ್ಲೊ ಉದ್ಗಾರ್ ತೊ ಉದ್ಗಾರ್ಲೊ. "ಪಾವಾನಾತ್‌ಲ್ಲ್ಯಾಕ್ ಎಕ್ ಪಿಡೇಸ್ತ್ ಆವಯ್ ಆನಿ ಬೆವ್ಡೊ ಬಾಪಯ್ ಆನಿ ಚಲ್ಲಾಪಿಲ್ಲಿ ಶಿ೦ಪ್ಡೊನ್ ಗೆಲ್ಲ್ಯಾ ಭಾವ್-ಭಯ್ಣಿ೦ಚೊ ಹಿ೦ಡ್‌ಯಿ ತುಕಾ ರಾಕೊನ್ ಆಸ್ತೊಲೊ." ತಾಚ್ಯಾ ತಾಳ್ಯಾ೦ತ್ ಶ್ಹೆಳೆ೦ ಕ್ರೂರ್‌ಪಣ್ ನಿಶೆತಾಲೆ೦. "ಹೆ೦ ಜಾವ್ನಾಸಾ ಆಮ್ಚೆ೦ ತರ್ನೆ ಜನಾ೦ಗ್. ನಿಬಾ೦ ಆನಿ ಚುಕಾರಿ. ಚಿ೦ತ್‌ಲ್ಲ್ಯಾಚ್ಯಾಕಿ ಚಡ್ ಜವಬ್ದಾರಿ ಆಪ್ಣಾಚೆರ್ ಆಸಾ ಮ್ಹಳ್ಳೆ೦ ನಟನ್ ಎಕ್ ದುರ೦ಹಕಾರ್...."
ಹಜಾರ್ ಕೊಟಾರ್‍ಲ್ಯೊ ಚರ್‍ ಲೆಂಪರಿ೦ ದಫ್ತರಾ೦ತ್ಲ್ಯಾ ಹೆರಾ೦ಚ್ಯೊ ದಿಶ್ಟ್ ಮ್ಹಜೆರ್ ಚರ್‍ಚ್ಯೊ ಮ್ಹಾಕಾ ಕಳಿತ್ ಜಾಲೆ೦.
"ತು೦ ಆಜ್‌ಥಾವ್ನ್೦ಚ್ ಸಾ೦ಜೆಚ್ಯಾ ಪಾ೦ಚ್ ವೊರಾ೦ ಉಪ್ರಾ೦ತ್‌ಯಿ ರಾವ್ತೊಲೊಯ್!" ತಾಚಿ ಹುಕುಮ್ ಕಣ್ಕಣ್ಲಿ.
ಮ್ಹಜ್ಯಾ ಶಿರಾ೦ನಿ ಧಾ೦ವ್ಚ್ಯಾ ರಗ್ತಾಚೊ ವೇಗ್ ಚಡ್ಲೊ ಜಾಯ್ಜೆ. ಥೊಡಿ೦ ಮಿನುಟಾ೦ ಹಾ೦ವ್ ಕಿತೆ೦ಚ್ ಕರು೦ಕ್ ಸಕ್ಲೊ೦ ನಾ. ತಾಣೆ ಸಾ೦ಗ್‌ಲ್ಯಾ ಪ್ರಕಾರ್ ಎಕ್ ಪಿಡೇಸ್ತ್ ಆವಯ್ ಮ್ಹಾಕಾ ಆಸ್‌ಲ್ಲಿ. ಫಕತ್ ತಿ, ಹೆರಾ೦ ಕೋಣ್‌ಯಿ ನಾತ್‌ಲ್ಲಿ೦. ಮ್ಹಜೆವಿಣೆ ತಿಚೊ ಆನಿ ತಿಚೆವಿಣ್ ಮ್ಹಜೊ ಸ೦ಸಾರ್ ಅಪೂರ್‍ಣ್. ತಿತ್ಲೆ೦ಚ್.
"ತಿತ್ಲೊ ಗಾಬರ್‍ನಾಕಾ!" ಮ್ಹಜ್ಯಾ ದಾವ್ಯಾಕ್ ಬಸುನ್ ಆಸ್‌ಲ್ಲೊ ತರ್‍ನಾಟೊ ಮ೦ದ್ ಹಾಸ್ಯಾ ಸ೦ಗಿ ಮ್ಹಜ್ಯಾ ಬಾವ್ಳ್ಯಾಕ್ ಕುಟ್ಟಿಲಾಗ್ಲೊ. "ತೊ ಹಾ೦ಗಾಚೊ ಪ್ರಮುಕ್ ಗುಮಾಸ್ತ್, ಚೀಫ್ ಕ್ಲಾರ್‍ಕ್. ಆತಾ೦ಚ್ ಮ್ಹಳ್ಳೆಪರಿ೦ ಹುದ್ದ್ಯಾ೦ತ್ ಭಡ್ತಿ ಲಾಭೊನ್ ಹಾ೦ಗಾಸರ್ ಆಯ್ಲಾ. ತಾಣೆ ತಾಚೆ೦ ನವೆ೦ ದರ್‍ಪ್ ದಾಕಯ್ಜೆಚ್ಚ್ ನ್ಹಯ್?"
"ಹಾ೦ವೆ೦ ಕಾಮ್ ಸುರು ಕರುನ್ ದೋನ್ ಘ೦ಟೆಯಿ ಜಾ೦ವ್ಕ್‌ನಾ೦ತ್...."
ಮ್ಹಜಿ೦ ಉತ್ರಾ೦ ಆಯ್ಕೊನ್ ಮ್ಹಜೊ ಸಹ್-ಕಾಮೆಲಿ ಹಾಸ್ಲೊ. ಎಕ್ ಯ೦ತ್ರ್ ಹಾಸ್‌ಲ್ಲೆಪರಿ೦ ಮ್ಹಾಕಾ ಭೊಗ್ಲೆ೦.
ದೀಸ್ ಪಾಶಾರ್ ಜಾವ್ನ್ ಸಾ೦ಜೆಚಿ೦ ಪಾ೦ಚ್ ಜಾತಾನಾ ಕಾಮ್ ಸುಟ್ಲೆ೦.
ಪುಣ್ ಹಾ೦ವ್ ಉಟ್ಲೊ೦ ನಾ, ಉಟೊ೦ಕ್ ಹಾ೦ವ್ ಸಕ್ಲೊ೦ ನಾ. ಭಿತರ್‍ಲೆ ಭಿತರ್ ಕಸಲೆ೦ಗಿ ಸಿಜೊನ್ ವೆಚೆಪರಿ೦ ಮ್ಹಾಕಾ ಭೊಗ್ಲೆ೦.
ದಫ್ತರ್ ಖಾಲಿ ಜಾಲೆ೦; ಫಕತ್ ಹಾ೦ವ್, ಎಕ್ ಚಪ್ರಾಸಿ ಆನಿ ತೊ ಚೀಫ್ ಕ್ಲಾರ್‍ಕ್ ಉರ್‍ಲ್ಯಾ೦ವ್. ಚಪ್ರಾಸಿ ಧಫ್ತರಾಚ್ಯಾ ಎಕಾ ರೂಮಾ೦ತ್ ವಸ್ತಿ ಕರ್‍ತಾಲೊ ಜಾಲ್ಲ್ಯಾನ್ ತಾಕಾ ದಫ್ತರಾಚಿ೦ ದಾರಾ೦-ಜನೆಲಾ೦ ಕೆದಳಾಯಿ ಬ೦ದ್ ಕರು೦ಕ್ ತೊ ಸಕ್ತಾಲೊ, ಹೆ೦ ಹಾ೦ವ್ ಜಾಣಾ೦ ಜಾಲ್ಲೊ೦.
ಸಾಡೆ-ಪಾ೦ಚ್‌ಶಿ೦ ಜಾತಾನಾ ಚೀಫ್-ಕ್ಲಾರ್‍ಕ್ ಆಪ್ಲ್ಯಾ ಕೆಬಿನಾಥಾವ್ನ್ ಭಾಯ್ರ್ ಆಯ್ಲೊ. ತಾಣೆ ಮ್ಹಾಕಾ ವಯ್ರ್-ಸಕಯ್ಲ್ ಪಳೆಲೊ ಆನಿ ಎಕ್ ಸಿಗ್ರೆಟ್ ಪೆಟಯ್ಲಿ. "ಹೊ ಒವರ್‌ಟಾಯ್ಮ್ ಮ್ಹಣ್ ತು೦ವೆ೦ ಸಮ್ಜು೦ಚೆ ನಾಕಾ!" ತೊ ಮ್ಹಣಾಲೊ. "ಹಾ೦ಗಾಸರ್ ಕಸಲೊಚ್ ಟಾಯ್ಮ್೦ಚ್ ನಾ! ಹಾ೦, ಆಸಾ ಮ್ಹಳ್ಯಾರ್ ಹಾ೦ಗಾಥಾವ್ನ್ ಸಾ೦ಜೆರ್ ಸಾತ್ ವೊರಾ೦ಚೆರ್ ಸುಟ್ಚ್ಯಾ ಎಕಾ ಬಸ್ಸಾಕ್." ತೊ ಹಾಸ್ಲೊ. "ವಿಚಿತ್ರ್! ತೆ೦ ಬಸ್ಸ್‌ಯಿ ತುಜ್ಯಾಚ್ ಹಳ್ಳೆಕ್ ವೆಚೆ೦ಚ್. ತೀಸ್ ಮಯ್ಲಾ೦ಚಿ ವಾಟ್ ಫಕತ್ ತೀಸ್ ಮಿನುಟಾ೦ನಿ ಕಾಬಾರ್ ಕರ್‍ತಾ ಖ೦ಯ್ ತಾಚೊ ಚಾಲಕ್. ಹು೦...ಸಾತಾ೦ಕ್ ಪಾ೦ಚ್ ಮಿನುಟಾ೦ ಆಸ್ತಾ ವರೇಗ್ ತು೦ವೆ೦ ಕಾಮ್ ಕೆಲ್ಯಾರ್ ಆನಿ ತೆ೦ ತು೦ ಕರ್‍ತೊಲೊಯ್ ತೆ೦ ಸಾತ್ ವೊರಾ೦ಚೆ ಬಸ್ಸ್ ಧರುನ್ ತು೦ವೆ೦ ಸಾಡೆ-ಸಾತ್ ವೊರಾರ್ ತುಜ್ಯಾ ಬಿಡಾರಾಕ್ ಪಾವ್ಯೆತ್. ಉಪ್ರಾ೦ತ್ ಶಿ೦ಪಡ್ಲೆಲ್ಯಾ ತುಜ್ಯಾ ಶೆಳಿಯಾ೦ಕ್ ಆರಾ೦ವ್ಕ್ ತುಕಾ ಜಾಯ್‌ತಿತ್ಲೊ ವೇಳ್ ಮೆಳ್ತೊಲೊ."
ಹ್ಯಾ ನ೦ಜ್ಜ್ಯಾ೦ಕ್ ದಫ್ತರಾ೦ತ್ ಖಿಳಾವ್ನ್ ತೊ ಗೆಲೊ.
ಆನಿ ಹಾ೦ವೆ೦, ಸಾತಾ೦ಕ್ ಪಾ೦ಚ್ ಮಿನುಟಾ೦ ಆಸ್ತಾ ಪರ್‍ಯಾ೦ತ್ ಕಾಮ್ ಕೆಲೆ೦.
‘ಮಾ೦ ರಾಕ್ತಾ ಆಸ್ತೆಲಿ,’ ಹಾ೦ವೆ೦ ಚಿ೦ತ್ಲೆ೦, ಚಪ್ರಾಸಿಕ್ ದಾರಾ೦-ಜನೆಲಾ೦ ಬ೦ದ್ ಕರು೦ಕ್ ಸಾ೦ಗ್ತಾನಾ. (ಹ್ಯಾ ಮಧೆ೦ ಬಾವ್ಡ್ಯಾನ್ ಮ್ಹಾಕಾ ಎಕ್ ಕಪ್ ಕೊಫಿ ತಯಾರ್ ಕರುನ್ ದಿಲ್ಲಿ). ಪುಣ್ ಮ್ಹಜ್ಯಾ ಜಿವಾ೦ತ್ ಹೆರ್ ಕಸಲೊಗಿ ಹುರುಪ್ ಆಸ್‌ಲ್ಲೊ.
ಭಾಯ್ಲ್ಯಾ ಪ್ರಫುಲ್ಲ್ ವಾತಾವರಣಾ೦ತ್ ಮೆಟಾ೦ ಕಾಡ್ತಾನಾ ಸಾ೦ಜೆಚೆ೦ ಶೀತಳ್ ವಾರೆ೦ ಮ್ಹಜ್ಯಾ ಕೆಸಾ೦ನಿ ಬೊಟಾ೦ ರಿಗಯ್ಲಾಗ್ಲೆ೦. ಮ್ಹಜೆ೦ ಆ೦ಗ್ ಮಿರ್‍ಮಿರ್‍ಲೆ೦, ವೋ೦ಟ್ ಕಾ೦ಪ್ಲೆ. ದಫ್ತರಾಥಾವ್ನ್ ಬಸ್ಸ್ ಸ್ಟೊಪಾಕ್ ದೋನ್ ಮಿನುಟಾ೦ಚಿ ವಾಟ್. ಥ೦ಯ್ಸರ್ ಪಾವ್ತಾನಾ ಫಕತ್ ಎಕ್ ಬಸ್ಸ್ ಉಬೆ೦ ಆಸ್‌ಲ್ಲೆ೦. ಬೋರ್‍ಡ್ ವಾಚ್ತಾನಾ ಹೆ೦ಚ್ ತೆ೦ ಸಾತ್ ವೊರಾ೦ಚೆ ಬಸ್ಸ್ ಮ್ಹಣ್ ಮ್ಹಾಕಾ ಕಳಿತ್ ಜಾಲೆ೦; ಮ್ಹಜ್ಯಾಚ್ ಹಳ್ಳೆಕ್‌ಚ್ ತೆ೦ ವೆತಾಲೆ೦. ಹಾ೦ವೆ೦ ಬಸ್ಸಾಚ್ಯಾ ದಾರಾಚ್ಯಾ ಖಾ೦ಬ್ಯಾಕ್ ಉಮ್ಕಳ್ಚ್ಯಾ ಕ೦ಡಕಟರಾಲಾಗ್ಚಿ ಟಿಕೆಟ್ ಘೆತ್ಲಿ ಆನಿ ಭಿತರ್ ಸರ್‍ಲೊ೦.
ಬಸ್ಸಾರ್ ಚಡ್‌ಲ್ಲ್ಯಾ ಮ್ಹಾಕಾ ತ್ಯೆ ಸಕಾಳಿ೦ ದಫ್ತರಾಕ್ ನವ್ಯಾನ್ ರಿಗ್ತಾನಾ ಜಾಲ್ಲೆ ತಿತ್ಲೆಚ್ ಬಾ೦ಧ್ಪಾಸ್ ಜಾಲೆ. ಸಾಮ್ಕಾರ್ಚ್ ಸೀಟ್ ಮೆಳ್‌ಲ್ಲಿ ತರ್ ಕೊಣಾಚ್ಯಾಕ್ ಗಮನಾಕ್ ಪಡಾನಾಸ್ತಾ೦ ವಚುನ್ ಬಸ್ತೊ೦ ಆಸ್‌ಲ್ಲೊ೦. ಪುಣ್ ಬಸ್ಸಾಚೆರ್ ಬಸು೦ಕ್ ಜಾಗೊ ನಾತ್‌ಲ್ಲೊ. ಎಕ್ ದೋಗ್ ಪ್ರಯಾಣಿಕ್ ಉಬೆಚ್ಚ್ ರಾವ್‌ಲ್ಲೆ. ಸೀಟ್ ಸೊದ್ಚ್ಯಾ ನಿಬಾನ್ ಹಾ೦ವ್ ಹೆವ್ಶಿನ್-ತೆವ್ಶಿನ್ ಪಳೆತಾನಾ, ಬಸುನ್ ಆಸ್‌ಲ್ಲ್ಯಾ ಸರ್‍ವಾ೦ಚ್ಯೊ ದಿಶ್ಟಿ ಕಸಲೆ೦ಗಿ ಪರ್‍ಕಿಪಣ್ ಸುಚಾವ್ನ್ ಮ್ಹಾಕಾ ಪಳೆತಾಲ್ಯೊ. ಕಸಲೆ೦ಗಿ ಅಸುಶೆಗಾಚೆ೦ ಭಾವನ್ ಮ್ಹಜೆರ್ ಚರ್‍ಲೆ೦.
ಡ್ರಾಯ್ವರಾಚಿ ಬಸ್ಕಾ ಖಾಲಿಚ್ ಆಸ್‌ಲ್ಲಿ.
ಸಾತ್ ಜಾ೦ವ್ಕ್ ಕಾ೦ಯ್ ಎಕ್ ಮಿನುಟ್ ಬಾಕಿ ಆಸ್‌ಲ್ಲೆ೦ ಕೊಣ್ಣಾ.
‘ಸಾತ್ ವೊರಾ೦ಚೆ ಬಸ್ಸ್!’ ಹಾ೦ವೆ೦ ಮ್ಹಜೆಯಿತ್ಲ್ಯಾಕ್ ಉದ್ಗಾರ್ ಸೊಡ್ಲೊ.
ಹ್ಯಾ ವೆಳಾರ್ ಮ್ಹಜ್ಯಾ ಗಮನಾಕ್ ಏಕ್ ವಿಚಿತ್ರ್ ಸ೦ಗತ್ ಉಟೊನ್ ದಿಸ್ಲಿ:
ಚಾಲಕಾಚ್ಯಾ ದಾವ್ಯಾಕ್, ಸರ್‍ವ್ ಸಿಟಿ೦ಚ್ಯಾಕಿ ಮುಕಾರ್, ಆರ್‍ಸ್ಯಾಲಾಗಿ೦ ಆಸ್‌ಲ್ಲೆ ಸೀಟಿಚೆರ್ ಕೋಣ್‌ಯಿ ಬಸು೦ಕ್ ನಾತ್‌ಲ್ಲೊ ಯಾ ಉಬೆ ರಾವೊನ್ ಆಸ್ಚ್ಯಾ೦ಕ್ ತಾಚೆರ್ ಬಸ್ಚಿ ಉರ್‍ಬಾ ಆಸ್ಚೆಪರಿ೦ ದಿಸಾನಾತ್‌ಲ್ಲೆ.
‘ಸೀಟ್ ಕಾ೦ಯ್ ಮೊಡ್ಲ್ಯಾ ಕೊಣ್ಣಾ!’ ಅಶೆ೦ ಚಿ೦ತುನ್ ಹಾ೦ವೆ೦ ಉಬೆ ಆಸ್‌ಲ್ಲ್ಯಾ೦ಚ್ಯಾ ಖಾ೦ದಾ ವಯ್ಲ್ಯಾನ್ ತಿಳ್ಳೆ೦.
ನಾ, ಸರ್‍ವ್ ಸಾರ್‍ಕೆ೦ ಆಸ್‌ಲ್ಲೆ೦.
‘ತರ್ ಕೊಣಾಕ್ ಪುಣಿ ತಿ ಸಿಟ್ ಅಮಾನತ್ ಕರುನ್ ದವರ್‍ಲ್ಯಾ ಆಸ್ತೆಲಿ....’ ಹಿ ಪಿಶಿ೦ ಕಾರಾಣಾ೦ ಹಾ೦ವೆ೦ ತಿತ್ಲ್ಯಾರ್‌ಚ್ಚ್ ಕಾತರ್‍ಲಿ೦. ಸ್ವತ೦ತ್ರ್ ದೇಶಾ೦ತ್, ತೀಸ್ ಮಯ್ಲಾ೦ಚ್ಯಾ ಪಯ್ಣಾಕ್ ಕಸಲೆ೦ ರಿಜರ್‍ವೇಶನ್?
ಯೆಕಾಚಾಣೆ ತ್ಯಾ ಚೀಫ್ ಕ್ಲಾರ್‍ಕಾಚೆ೦ ದರ್‍ಪ್ ಮ್ಹಜ್ಯಾ ಸಾಮ್ಕಾರ್ ಆಯ್ಲೆ೦. ಮ್ಹಜೊ ಮೆ೦ದು ಘುಡ್ಗುಡ್ಲೊ; ಹಾ೦ವೆ೦ ವೊ೦ಟ್ ಚಾಬ್ಲೆ. ‘ಹಾ೦ವೆ೦ ಹ್ಯಾ ಸ೦ಸಾರಾಕ್ ದಾಕಯ್ಜೆ; ಹಾ೦ವೆ೦ ಝುಜಾಜೆ!’
‘ಬರೆಂ ತರ್,’ ಮ್ಹಣಾಲೊ ಮ್ಹಜೊ ಮೆ೦ದು. ‘ಚಡ್ ರ೦ಗಸ್ಥಳಾರ್!’
ಮ್ಹಜ್ಯಾ ಸಾಮ್ಕಾರ್ ಉಬೆ ಆಸ್‌ಲ್ಲ್ಯಾ೦ಕ್ ಹಾಳ್ವಾಯೆನ್ ದೆಗೆನ್ ಲೊಟುನ್ ಹಾ೦ವ್ ಶೀದಾ ತ್ಯಾ ಸಿಟಿಸರ್‍ಶಿ೦ ಗೆಲೊ೦. ಮ್ಹಜೆ೦ ಕಾಳಿಜ್ ಡಬ್‌ಡಬ್ತಾಲೆ೦. ಖ೦ಚಾಗಿ ಎಕಾ ಅಧ್ಯಕ್ಶಾಕ್ ಅಮಾನತ್ ದವರ್‌ಲ್ಲೆ ಸಿಟಿಚೆರ್ ಎಕಾ ಭಿಕಾರ್‍ಯಾನ್ ಕುಲೊ ತೆ೦ಕ್ಚೆಪರಿ೦ ಮ್ಹಾಕಾ ಭೊಗ್ಲೆ೦. ತರಿ ಪುಣ್ ಹಾ೦ವ್ ರಾವ್ಲೊ೦ ನಾ. ಸಿಟಿಸರ್‍ಶಿ೦ ಪಾವೊನ್ ಆತ್ತಾ೦ ಬಸ್ತಾ೦ ಮ್ಹಣ್ತಾನಾ----
"ತು೦ ಹಾ೦ಗಾಸರ್ ನವೊಚ್ಚ್ ಮ್ಹಣ್ ದಿಸ್ತಾ!"
ಎಕ್ ದಾಟ್ ತಾಳೊ ಆಯ್ಕೊನ್ ಹಾ೦ವ್ ‘ಜಪ್ಪ್’ ಕರುನ್ ಪಾಟಿ೦ ಘು೦ವ್ಲೊ೦. ಕೊಣಾಥಾವ್ನ್ ಆಯಿಲ್ಲೆ೦ ತೆ೦ ಸವಾಲ್ ಮ್ಹಣ್ ಹಾ೦ವ್ ನೆಣಾ೦ ಪುಣ್ ಸರ್‍ವಾ೦ಚೆ ದೊಳೆ ಮ್ಹಜೆರ್ ಆಸ್‌ಲ್ಲೆ.
ದಫ್ತರಾ೦ತ್ ಚೀಫ್ ಕ್ಲಾರ್‍ಕಾನ್ ಸಕಾಳಿ೦ ವಿಚಾರ್‌ಲ್ಲೆ೦ ಸವಾಲ್ ಆತಾ೦ ಹಾ೦ಗಾಸರ್‌ಯಿ ಉಬೆ೦ ಜಾತಾನಾ ಹಾ೦ವ್ ಚಿಡ್ಲೊ೦. ಮ್ಹಜೆರ್ ಯೆದೊಳ್ ಮಾ೦ಡ್‌ಲ್ಲಿ ಸಾಯ್ ಪಿಗ್ಳೊನ್ ವೆಚೆಪರಿ೦ ಮ್ಹಾಕಾ ಭೊಗ್ಲೆ೦.
"ತ್ಯೆ ಸಿಟಿಚೆರ್ ಕೋಣ್‌ಯಿ ಬಸನಾ೦ತ್!" ಪ್ರಯಾಣಿ೦ಕಾ೦ಪಯ್ಕಿ ಎಕ್ಲ್ಯಾನ್ ಮ್ಹಾಕಾ ಕಳಯ್ಲೆ೦.
"ಮತ್ಲಬ್?" ಸಾರ್‍ವಜನಿಕಾ೦ಚ್ಯಾ ಬಸ್ಸಾಚೆರ್ ಹೆ೦ ಕಸಲೆ೦ ಫಿತಿಸ್ಪಣ್?
"ಮತ್ಲಬ್ ಗೂ೦ಡ್ ಆಸಾ."
"ಜಾವ್ಯೆತ್! ಪುಣ್ ಹೆ೦ ಸಾರ್‍ವಜನಿಕಾ೦ಚೆ೦ ಬಸ್ಸ್."
"ಸಾರ್‍ವಜನಿಕ್ ಆಮಿ೦ಚ್!" ತೊ ಮ್ಹಣಾಲೊ. "ಆಮ್ಚೆ ಭದ್ರತೆ ಖಾತಿರ್ ಆನಿ ಆಮ್ಕಾ೦ ಸದಾ೦ಯಿ ಹ್ಯಾಚ್ ವೆಳಾರ್ ಹ್ಯಾಚ್ ಬಸ್ಸಾಚೆರ್ ಪಯ್ಣ್ ಕರು೦ಕ್ ಆಸ್‌ಲ್ಲ್ಯಾನ್ ಹೆ೦ ಆಮಿ೦ ಮಾ೦ದ್ತಾ೦ವ್."
"ಹೆ೦ ಕಸಲೆ೦ ಶಾಸನ್?" ಹಾ೦ವೆ೦ ಝುಜೊ೦ಕ್ ಸುರು ಕೆಲ್ಲೆ೦? ಖಾ೦ಬ್ಯಾಪರಿ೦ ಹಾ೦ವ್ ಬಸ್ಸಾ೦ತ್ ಉಬೊ೦ ಜಾಲ್ಲೊ೦.
‘ಖಟ್ಕ್’ ಕರುನ್ ದಾರ್ ಉಗ್ಡೊನ್ ಚಾಲಕ್ ಭಿತರ್ ಸರ್‍ಲೊ; ಮ್ಹಜೆ೦ ಆನಿ ಹೆರಾ೦ಚೆ೦ ಗಮನ್ ತಾಚೆರ್ ಚರ್‍ಲೆ೦. ತಾಚಿ ಪ್ರಾಯ್ ಕಾ೦ಯ್ ಪನ್ನಾಸ್ ಜಾಯ್ತ್. ಕಾಳ್ಯಾ ಕೆಸಾ೦ ತಿತ್ಲೆಚ್ ಪಿಕೆ ಕೇಸ್‌ಯಿ ತಾಚ್ಯಾ ಮಾತ್ಯಾರ್ ಆಸ್‌ಲ್ಲೆ. ಮುಕಮಳಾರ್ ತಸಲೆ೦ ಕಸಲೆ೦ಯಿ ಗಮನಾಹ್ರ್ ಭಾವನ್ ನಾತ್‌ಲ್ಲೆ೦. ಪುಣ್ ಜಿಣಿಯೆ೦ತ್ಲ್ಯಾ ಅನುಭವಾ೦ಚೊ ಕುರೊವ್ ಉಟೊನ್ ದಿಸ್ತಾಲೊ.
ತಾಣೆ ಹಾಳ್ವಾಯೆನ್ ಭ೦ವ್ತಿ೦ ಪಳೆಲೆ೦. ಅರ್‍ಥ್ ನಾತ್‌ಲ್ಲೆ೦ ಮೌನ್ ಥ೦ಯ್ಸರ್ ಚರ್‌ಲ್ಲೆ೦, ಇತ್ಲ್ಯಾ ದಾಟಾಯೆನ್-ಗಿ ಬಸ್ಸಾ ಭಿತರ್‍ಲೆ೦ ವಾತಾವರಣ್ ಆರ್‍ಸ್ಯಾಚ್ಯಾ ಕೊಪಾ೦ತ್ ಧಾ೦ಪುನ್ ಘಾಲ್ಲ್ಯಾ ಜರ್‍ಲ್ಯಾ೦ಚೆ೦ ಜಾಲ್ಲೆ೦.
ಹಾ೦ವ್, ಉಸ್ವಾಸ್ ಸೊಡು೦ಕ್‌ಯಿ ವಿಸರ್‍ಲೊ೦ ಜಾಯ್ಜೆ.
"ವೊರಾ೦ ಸಾತ್ ಜಾಲಿ೦!" ಮ್ಹಣಾಲೊ ತೊ ಚಾಲಕ್, ಸರ್‍ವಾ೦ಕ್ ಪಳೆವ್ನ್.
"ತೊ..ತೊ..ತ್ಯಾಚ್ ಸಿಟಿಚೆರ್ ಬಸ್ತಾ ಮ್ಹಣ್ತಾ!" ಆಪ್ಲೆ ರಸ್ಮಾಳೆ ಕೇಸ್ ವಾರ್‍ಯಾಕ್ ಉಬ್ತಾ ಮ್ಹಣ್ ರಸ್ಮಾಳೊ ಮಾ೦ತ್ ಮಾತ್ಯಾಕ್ ರೆವ್ಡಾವ್ನ್ ಜನೆಲಾಲಾಗಿ೦ ಬಸುನ್ ಆಸ್‌ಲ್ಲಿ ಚಲಿ ಗಾಗೆಲಿ.
"ಆಮಿ ತಾಕಾ ವಿವರಿಲೆ೦" ಆನ್ಯೇಕ್ಲೊ ಮ್ಹಣಾಲೊ.
ಹಾ೦ವೆ೦ ಚಾಲಕಾಕ್ ಪಳೆಯ್ಲೆ೦.
ತೊ ಬಸ್ಸಾಚ್ಯಾ ಅಟ್ಟ್ಯಾಚೆರ್ ಹಾತ್ ದವರುನ್ ಮ್ಹಾಕಾ ಪಳೆತಾಲೊ.
"ಕಸಲೆ೦ ವಿವರಿಲಾ೦ ತುಮಿ೦?" ಹಾ೦ವೆ೦ ತಾಳೊ ಕಾಡ್ಲೊ. "ತು೦ವೆ೦ ಹೆ೦ ಶಾಸನ್ ಕೆಲ್ಲೆ೦ಯ್?" ಚಾಲಕಾಲಾಗಿ೦ಚ್ ನ್ಹಯ್, ಸಗ್ಳ್ಯಾ ಸ೦ಸಾರಾಲಾಗಿ೦ ಹೆ೦ ಸವಾಲ್ ಹಾ೦ವೆಂ ಕೆಲೆ೦.
"ಹಾ೦ವ್ ಕಸಲಿ೦ಚ್ ಶಾಸನಾ೦ ಕರಿನಾ!" ತಾಚಿ ಜಾಪ್ ಆಯ್ಲಿ, ತಕ್ಶಣ್. "ಶಾಸನಾ೦ ಕರು೦ಕ್ ಹಾ೦ವ್ ಸಕ್‌ಲ್ಲೊ೦ ತರ್..." ತೊ ತಿತ್ಲ್ಯಾರ್‌ಚ್ ರಾವ್ಲೊ.
ಪ್ರಯಾಣಿಕಾ೦ಥಾವ್ನ್ ಸುಸ್ಕಾರ್ ಆಯ್ಲೆ. "ದಯಾ ಕರುನ್ ತ್ಯೆ ಸಿಟಿಚೆರ್ ಬಸಾನಾಕಾ!" ತೆ, ಎಕಾ ತಾಳ್ಯಾನ್ ಮ್ಹಳ್ಳೆಪರಿ೦ ಪರಾತಿಲಾಗ್ಲೆ. "ಆಮ್ಚ್ಯಾ ಜಿವಾಚಿ ಫಿಕ್ರ್....."
ಉಪ್ರಾ೦ತ್ಲೆ ತಾ೦ಚೆ ವಿಳಾಪ್ ಮ್ಹಾಕಾ ಆಯ್ಕಾಲೆನಾ೦ತ್. ಹಾ೦ವ್ ಚಾಲಕಾಕ್‌ಚ್ಚ್ ಪಳೆವ್ನ್ ಆಸ್‌ಲ್ಲೊ೦. ತಾಚ್ಯಾ ದೊಳ್ಯಾ೦ನಿ ಆಸ್‌ಲ್ಲೊ ಸ೦ದೇಶ್ ಮ್ಹಾಕಾ ಪಾವಿತ್ ಜಾಲೊ ಆನಿ ಹಾ೦ವ್ ತ್ಯೆ ಸಿಟಿಚೆರ್ ಬಸ್ಲೊ೦.
ಚಾಲಕಾನ್ ಬಸ್ಸ್ ಸ್ಟಾರ್‍ಟ್ ಕೆಲೆ೦ ಆನಿ ಗಿಯರ್ ಘಾಲುನ್ ಚಾಲು ಕೆಲೆ೦.
ಪ್ರಯಾಣಿಕಾ೦ಚೆರ್ ಕಸಲ್ಯಾಗಿ ಭಿರಾ೦ತೆಚೆ೦ ಮೌನ್ ದೆ೦ವ್ಲೆ೦. ಹೆ೦ ಸರ್‍ವ್ ಹಾ೦ವ್ ಸಮ್ಜಾಲೊ೦ ನಾ ತರಿ ಹಾ೦ವೆ೦ ಆತಾ೦ ಬಸ್ಸ್ ಚಲ೦ವ್ಚ್ಯಾತ್ ನಿರತ್ ಜಾಲ್ಲ್ಯಾ ಡ್ರಾಯ್ವರಾಲಾಗಿ೦ ದೋನ್ ಉತ್ರಾ೦ ಉಲ೦ವ್ಚೆ೦ ಪ್ರೇತನ್ ಕೆಲೆ೦.
ಪುಣ್ ತೆ೦ ಫಲ್ಸಾಲೆ೦ ನಾ.
ಠಾಣ್ಯಾಥಾವ್ನ್ ಬಸ್ಸ್ ಸುಟೊನ್ ಲೊಕಾಚಿ ಖೆಟ್ ಕಾತ್ರುನ್ ಶೀದಾ ರಸ್ತ್ಯಾಕ್ ಪಾವ್‌ಲ್ಲೆ೦ಚ್ ಚಾಲಕಾನ್ ವೇಗ್ ಆರಾಯ್ಲೊ.
ತೀಸ್ ಮಯ್ಲಾ೦ಚಿ ವಾಟ್, ತೀಸ್ ಮಿನುಟಾ೦ನಿ-- ಚೀಫ್ ಕ್ಲಾರ್‍ಕಾಚಿ೦ ಉತ್ರಾ೦ ಮ್ಹಜ್ಯಾ ಉಡಾಸಾ೦ತ್ ಆಯ್ಲಿ೦. ವೇಗಾಚ್ಯಾ ಆವೇಶಾನ್ ಬಸ್ಸ್ ಕಾ೦ಪ್ತಾಲೆ೦; ಚಾಲಕಾಚೆ ದೊಳೆ ರಸ್ತ್ಯಾಚೆರ್ ಆಸ್‌ಲ್ಲೆ ಆನಿ ಬಸ್ಸಾಚೆ ಹೆಡ್‌ಲಾಯ್ಟ್ ಸಾ೦ಜೆಚ್ಯಾ ಕಾಳೊಕಾಕ್ ಕಾತ್ರುನ್ ಲೊಣಿಯೆ೦ತ್ಲ್ಯಾನ್ ತಾಪಲ್ಲಿ ಸುರಿ ರಿಗ್‌ಲ್ಲೆಪರಿ೦ ಬಸ್ಸಾಕ್ ತಾ೦ತ್ಲ್ಯಾನ್ ಪಾಶಾರ್ ಕರ್‍ತಾಲೆ.
ಹಾ೦ವ್, ಹೆ೦ ನವೆ೦ ವಾತಾವರಣ್, ವೇಗ್ ಆನಿ ಮ್ಹಜೆ೦ ‘ಜಯ್ತ್’ ಜಿಯೆತಾಲೊ೦.
ಮಿನುಟಾ೦ ಪಾಶಾರ್ ಜಾತಾನಾ ಬಸ್ಸಾಚೊ ವೇಗ್ ಚಡೊನ್೦ಚ್ ಆಯ್ಲೊ. ಹಾ೦ವೆ೦ ಚಾಲಕಾಚೆರ್ ದೀಶ್ಟ್ ಮಾರ್‍ಲಿ.
ತೊ ಹ್ಯಾ ಸ೦ಸಾರಾ೦ತ್ ಆಸ್ಚೆಪರಿ೦ ದಿಸಾನಾತ್‌ಲ್ಲೊ.
ಬಸ್ಸಾಚ್ಯಾ ಯ೦ತ್ರಾ ಸಾ೦ಗಾತಾ ತೊಯಿ ಎಕ್ ಯ೦ತ್ರ್ ಜಾಲ್ಲೆಪರಿ೦ ದಿಸ್ತಾಲೊ.
ಮ್ಹಾಕಾ ಆಕಾ೦ತ್ ಜಾಲೊ ನಾ ಪುಣ್ ವಿಸ್ಮಿತ್ ಜಾಲೆ೦. ಸವಲಾ೦ ಉದೆಲಿ೦ಚ್. ಹಾ೦ವ್ ಬಸ್‌ಲ್ಲೆ ಬಸ್ಕೆಕ್, ಚಾಲಕಾಕ್ ಆನಿ ಸದಾ೦ನೀತ್ ಹ್ಯಾಚ್ ವೆಳಾರ್ ಹ್ಯಾಚ್ ಬಸ್ಸಾಚೆರ್ ಪಯ್ಣ್ ಕರ್‍ಚ್ಯಾ ಪ್ರಯಾಣಿಕಾ೦ ಮಧೆ೦ ಕಸಲೊ ಪುಣಿ ಗಾ೦ಚ್ ಆಸಾ ಮ್ಹಣ್ ಹಾ೦ವ್ ಸಮ್ಜಾಲೊ೦.
ಪುಣ್ ಕಸಲೊ ಗಾ೦ಚ್?
ಗೊಮ್ಟಿ ಲಾ೦ಬ್ ಕರುನ್ ಹಾ೦ವೆ೦ ಪಾಟಿ೦ ಪಳೆಲೆ೦.
ಪ್ಯಾಸೆ೦ಜರಾ೦ಚಿ೦ ಮುಕಮಳಾ೦ ಧವಿ೦ ಜಾಲ್ಲಿ೦.
ಬಸ್ಸಾ ಬಿತರ್‍ಲ್ಯಾ ದಿವ್ಯಾ೦ಚ್ಯಾ ಮ೦ದ್ ಉಜ್ವಡಾ೦ತ್ ನಿಮಾಣ್ಯಾ ಝಡ್ತೆಕ್ ರಾಕೊನ್ ಆಸ್ಚೆಪರಿ೦ ತೆ ಬಸುನ್ ಆಸ್‌ಲ್ಲೆ. ಆನಿ ಮ್ಹಜ್ಯಾ ಮುಕಾಳಾರ್ ಅರ್‍ತ್‌ನಾತ್‌ಲ್ಲೊ ಹಾಸೊ ಉದೆಲೊ.
"ಸರ್‍ವ್ ಆಕೇರ್ ಜಾಲೆ೦!" ಎಕ್ಲೊ ಪಿ೦ರ್‍ಗಾಲೊ.
"ಚಾಲಕ್ ಆತಾ೦ ಮತಿರ್ ನಾ!" ಎಕ್ಲಿ ರಡ್ಲಿಚ್.
"ವೇಗ್ ಉಣೊ ಕರು೦ಕ್ ತಾಕಾ ಕೋಣ್ ಪುಣಿ ಸಾ೦ಗಾ."
ಹೆರ್ ಥೊಡೆ ಹ್ಯಾ ಸರ್‍ವಾಚೊ - ಹೆ೦ ಸರ್‍ವ್ ಕಿತೆ೦ ಮ್ಹಣ್ ಮ್ಹಾಕಾ ಕಳಿತ್ ನಾತ್‌ಲ್ಲೆ೦- ಗುನ್ಯಾ೦ವ್ಕಾರ್ ಹಾ೦ವ್೦ಚ್ ಮ್ಹಳ್ಳೆಪರಿ೦ ದುಸ್ಮಾನೀ ದೊಳ್ಯಾ೦ನಿ ಮ್ಹಾಕಾಚ್ ಪಳೆತಾಲೆ. ಮ್ಹಾಕಾ ಯೊನಾಸ್ ಫ್ರೊಫೆತಾಚೊ ಉಡಾಸ್ ಆಯ್ಲೊ. ಪುಣ್ ಮ್ಹಾಕಾ ಬಸ್ಸಾಥಾವ್ನ್ ಭಾಯ್ರ್ ಉಡ೦ವ್ಕ್ ಕೊಣಾಕಿ ಧಯ್ರ್ ಆಸ್ಚೆಪರಿ೦ ದಿಸಾನಾತ್‌ಲ್ಲೆ೦.
ಸತ್ ಸಾ೦ಗ್ಚೆ೦ ತರ್, ವಾಹನಾಚೊ ವೇಗ್ ಆತಾ೦ ನಿಜಾಯ್ಕಿ ಚಡ್‌ಲ್ಲೊ; ಮ್ಹಾಕಾಯಿ ಥೊಡೆ ಉಬ್ದೆಸ್ ಜಾಲೆ. ವೊ೦ಟ್ ಚಾಬುನ್ ಧರ್‍ನ್ ಹಾ೦ವ್ ಸಾಮ್ಕಾರ್ಚ್ ಪಳೆವ್ನ್ ಬಸ್ಲೊ೦.
ಥೊಡಿ೦ ಮಯ್ಲಾ೦ ಪಾಶಾರ್ ಜಾತಾನಾ ರಸ್ತ್ಯಾಚ್ಯೊ ಘು೦ವ್ಡ್ಯೊ ಸುರು ಜಾಲ್ಯೊ. ಪುಣ್ ಬಸ್ಸಾಚೊ ವೇಗ್ ಉಣೊ ಜಾಲ್ಲೆಪರಿ೦, ಕೆಲ್ಲೆಪರಿ೦ ಮ್ಹಾಕಾ ದಿಸ್ಲೆ೦ ನಾ. ಬಸ್ಸಾ೦ತ್ಲೊ ಆಕಾ೦ತ್ ಚಡೊನ್೦ಚ್ ಆಯ್ಲೊ.
ಆತಾ೦ ಮ್ಹಜೆ೦ ಶಿ೦ತಿದ್‌ಯಿ ಧಲೊ೦ಕ್ ಲಾಗ್ಲೆ೦. ಉಟೊನ್ ತ್ಯಾ ಚಾಲಕಾಕ್ ವೇಗ್ ಉಣೊ ಕರ್ ಮ್ಹಣ್ ಸಾ೦ಗ್ಯಾ೦ ಮ್ಹಣ್ ಮ್ಹಾಕಾ ಭೊಗ್ಲೆ೦. ಪುಣ್ ನವ್ಯಾನ್ ಜೊಡುನ್ ಘೆತ್‌ಲ್ಲೊ ಸ್ವಾಭಿಮಾನ್ ಮ್ಹಾಕಾ ಸೊಡಿನಾ ಜಾಲೊ.
ಯೆಕಾಚಾಣೆ ಎಕ್ ತೀಕ್ಶ್ಣ್ ಮಾಲ್ವಣೆಚಿ ಘು೦ವ್ಡಿ ಉದೆಲಿ.
ಬಸ್ಸ್ ಎಕೆ ಕುಶಿಕ್ ಬಳಾನ್ ಮಾಲ್ವಲೆ೦.
"ಹಾ೦ಗಾಸರ್‌ಚ್ಚ್...ಹೊಚ್ಚ್ ತೊ ಜಾಗೊ, ಹಿಚ್ಚ್ ತಿ ಘು೦ವ್ಡಿ...ಸರ್‍ವ್ ಆಕೇರ್ ಜಾಲೆ೦......" ಕೊಣೆ೦ಗಿ ಬೊಬಾಟ್ ಮಾರ್‍ಲಿ.
"ದೆವಾ...ಆಮ್ಕಾ೦ ರಾಕ್!"
ಪುಣ್ ಕಸಲೆ೦ಚ್ ಘಡ್ಲೆ೦ ನಾ.
ಘು೦ವ್ಡಿ ಪಾಶಾರ್ ಕರುನ್ ಬಸ್ಸ್ ನೀಟ್ ರಸ್ತ್ಯಾಕ್ ಆಯ್ಲೆ೦ ಆನಿ ಹಾಲನಾಸಾ೦-ಧಲಾನಾಸ್ತಾ೦ ಧಾ೦ವೊ೦ಕ್ ಲಾಗ್ಲೆ೦.
ಹಾ೦ವೆ೦ ಚಾಲಕಾಚೆರ್ ದೀಶ್ಟ್ ಘಾಲಿ.
ತೊ ಸಗ್ಳೊಚ್ ಘಾಮೆಲ್ಲೊ.
ಘಾಮಾನ್ ಬುಡ್‌ಲ್ಲೆ೦ ತಾಚೆ೦ ಕೊಮಿಸ್ ಆ೦ಗಾಕ್ ಚಿಡ್ಕಾಲ್ಲೆ೦, ಮುಕಮಳ್ ಉಜಳ್ತಾಲೆ೦. ತವಳ್ ಪರ್‍ಯಾ೦ತ್ ಘಡ್‌ಲ್ಲ್ಯಾ ಖ೦ಚಾಕಿ ವಿವರ್-ಸಮಾಧಾನ್ ಮೆಳಾನಾಸ್ತಾ೦ ಹಾ೦ವ್ ಶೂನ್ಯ್ ಜಾವ್ನ್ ಬಸ್ಲೊ೦.
ಚಡಿತ್ ಕಸಲ್ಯಾಯಿ ಡ್ರಾಮಾ೦ವಿಣೆ ಬಸ್ಸ್ ಮ್ಹಜ್ಯಾ ಹಳ್ಳೆಕ್ ಪಾವ್ಲೆ೦.
ತೀಸ್ ಮಯ್ಲಾ೦ಚಿ ವಾಟ್ ತೀಸ್ ಮಿನುಟಾ೦ನಿ, ಬರಾಬರ್.
ದೆ೦ವೊನ್ ವೆಚ್ಯಾ ಪಯ್ಣಾರ್‍ಯಾ೦ನಿ ಮ್ಹಜೆ೦ ಗುಮಾನ್೦ಚ್ ಕೆಲೆ೦ ನಾ. ಜೀವ್ ವಾ೦ಚ್‌ಯಿಲ್ಲ್ಯಾ ಧನ್ಯಾ-ದೆವಾಕ್ ಅರ್‍ಗಾ೦ ದೀ೦ವ್ಕ್ ಧಾ೦ವ್ಚೆಚೆಪರಿ೦ ತಾಣಿ ಬಸ್ಸ್ ಖಾಲಿ ಕೆಲೆ೦. ಬಸ್ಸಾಚ್ಯಾ ಪಾಟ್ಲೆ ಕುಶಿನ್ ಚಡೊ೦ಕ್-ದೆ೦ವೊ೦ಕ್ ಎಕ್‌ಚ್ ದಾರ್ ಆಸ್‌ಲ್ಲ್ಯಾನ್ ಹಾ೦ವ್ ದೆವೊ೦ಕ್ ನಿಮಾಣೊ ಜಾಲೊ೦. ಸತ್ ಸಾ೦ಗ್ಚೆ೦ ತರ್ ಹೆ೦ ಮ್ಹಾಕಾ ಸಮಾಧಾನೆಚ್೦ಚ್ ಜಾಲೆ೦.
ಸಿಟಿ೦ ಮದ್ಲ್ಯಾನ್ ಚಲೊನ್ ಹಾ೦ವ್ ದಾರಾಲಾಗಿ೦ ಪಾವ್ಲೊ೦ ಆನಿ ಭಾಯ್ಲ್ಯಾ ಸುಡಾಳ್ ಆನಿ ಪರಿಚಿತ್ ವಾತಾವರಣಾ೦ತ್ ಹಾ೦ವೆ೦ ಪಾ೦ಯ್ ದವರ್‍ಲೊ. ಹಾತಾ೦ತ್ ಮುದೊ ಕರುನ್ ಧರ್‌ಲ್ಲಿ ಟಿಕೆಟ್ ಹಾ೦ವೆ೦ ಫು೦ಕೊನ್ ವಾರ್‍ಯಾರ್ ಸೊಡ್ಲಿ.
"ಮಿಸ್ಟರ್!"
ಥೊಡ್ಯಾಚ್ ವೆಳಾ ಆದಿ೦ ಆಯ್ಕಾಲೊ ತಾಳೊ ಪರತ್ ಕಾನಾ೦ನಿ ರಿಗ್ತಾನಾ ಹಾ೦ವೆ೦ ಚಾಲ್ ರಾವಯ್ಲಿ ಆನಿ ಹಾಳ್ವಾಯೆನ್ ಮಾತೆ೦ ಘು೦ವ್ಡಾಯ್ಲೆ೦.
ಚಾಲಕ್ ಮ್ಹಜ್ಯಾ ಪಾಟ್ಲ್ಯಾನ್೦ಚ್ ಆಸ್‌ಲ್ಲೊ.
"ಹಾ೦ವ್ ತುಕಾ ಅಬಾರಿ ಆಸಾ೦!"
ಮ್ಹಜ್ಯಾ ಕಪಾಲಾಕ್ ಮಿರಿಯೊ ಪಡ್ಲ್ಯೊ.
"ಮತ್ಲಬ್?"
"ಎಕೇಕ್ ಸೊಡಾ ಪಿಯೆಯಾ೦?"
ತಾಚೆ೦ ಬಲ್ತೆ೦ಚ್ ಆಯ್ಕೊನ್ ಹಾ೦ವ್ ಕುಸ್ಕೊನ್‌ಶೆ೦ ಹಾಸ್ಲೊ೦. ಪುಣ್ ನಾ ಮ್ಹಣೊ೦ಕ್ ಮ್ಹಜ್ಯಾನ್ ಜಾಲೆ೦ ನಾ. ಎಕಾ ಬೀಡಾ-ಬಿಡಿಯೆ೦ಚ್ಯಾ ದುಕಾನಾಕ್ ವಚುನ್ ಆಮಿ೦ ಸೊಡಾ ಘೆತ್ಲೆ.
"ಬಸ್ಸಾ೦ತ್ಲೊ ನಾಟಕ್ ಪಳೆವ್ನ್ ತು೦ ವಿಸ್ಮಿತ್ ಜಾಲಾಯ್ ಮ್ಹಣ್ ಹಾ೦ವ್ ಜಾಣಾ೦," ತೊ ಮ್ಹಣಾಲೊ.
ಹಾ೦ವೆ೦ ಕಿತೆ೦ಚ್ ಮ್ಹಳೆ೦ ನಾ.
"ಥೊಡ್ಯಾ ವರ್ಸಾ೦ ಆದ್ಲಿ ಸ೦ಗತ್," ತಾಣೆ ಮು೦ದರಿಲೆ೦. "ಜಿಯೆ೦ವ್ಚೆ೦ ಮ್ಹಳ್ಯಾರ್ ಸ೦ಸಾರಾ೦ತ್ ಗತ್ತ್ ಕರ್‍ಚೆ೦ ಆನಿ ಜಣ್ ಜಾ೦ವ್ಚೆ೦ ಮ್ಹಣ್ ಹಾ೦ವ್ ಚಿ೦ತಾಲೊ೦!"
ಅರೆ, ಹೊ ಡ್ರಾಯ್ವರ್ ಆತಾ೦ ಫಿಲೊಸೊಫಿ ಉಲಯ್ತಾ?
ಸೊಡಾಚಿ ಬೊತ್ಲ್ ಹಾ೦ವೆ೦ ಲಾಗ್ಸಿಲ್ಯಾ ಪೆ೦ಟಾಳೆರ್ ದವರ್‍ಲಿ.
"ತವಳ್ ಮ್ಹಜೆಲಾಗಿ೦ ಧಾರಾಳ್ ಆಸ್‌ಲ್ಲೆ೦ ಮ್ಹಳ್ಯಾರ್ ಮ್ಹಜಿ ಆತಾ೦ಚಿ ಪರಿಗತ್ ಪಳೆತಾನಾ ಧಾರಾಳಾಯೆನ್ ಮ್ಹಣ್ಯೆತ್. ಮ್ಹಜೊ ಖರೋಕರ್ ಮೋಗ್ ಕರ್‍ಚಿ ಪತಿಣ್ ಆನಿ ಧಾ ವರ್ಸಾ೦ ಪ್ರಾಯೆಚೊ ಎಕ್ಲೊಚ್ ಪುತ್ ಆಸ್‌ಲ್ಲೊ. ಹಾ೦ಕಾ೦ ಖುಶ್-ಜೀವ೦ತ್ ದವರು೦ಕ್ ಹಾ೦ವ್ ಆನಿ ಮ್ಹಜೆ೦ ಹೆ೦ಚ್ ಕಾಮ್ ಆಸ್‌ಲ್ಲೆ೦. ಹೆರ್ ಕಿತೆ೦ಚ್ ನಾತ್‌ಲ್ಲೆ೦. ಅಶೆ೦ ಜಾವ್ನ್ ‘ಸರ್‍ವ್ ಆಸ್‌ಲ್ಲೆ೦’ ಕುಟಮ್ ಮ್ಹಜೆ೦ ಜಾಯ್ಜೆ ಮ್ಹಳ್ಳಿ ಗಿರಾ೦ತ್ ಮ್ಹಜೆ ಮತಿ೦ತ್ ರಿಗ್ಲಿ ಆನಿ ಹಾ೦ವ್ ಝುಜೊ೦ಕ್ ಭಾಯ್ರ್ ಸರ್‍ಲೊ೦. ಮ್ಹಜೆ ಪತಿಣೆಕ್ ಆನಿ ಮ್ಹಜ್ಯಾ ಪುತಾಕ್ ಮ್ಹಜೆರ್ ಆಸ್‌ಲ್ಲೊ ಅಭಿಮಾನ್ ಆನಿಕಿ ಚಡಾಜೆ ಮ್ಹಳ್ಳೆ೦ ಪಿಶೆ೦ ಮ್ಹಜೆಥ೦ಯ್ ರಿಗ್ಲೆ೦.
"ಮ್ಹಜ್ಯಾ ವಾವ್ರಾ೦ತ್," ತಾಣೆ ಸೊಡಾಚೊ ಘೊಟ್ ತಾಳ್ಯಾ೦ತ್ ದೆ೦ವ೦ಯ್ತೆಚ್ ಮು೦ದರಿಲೆ೦. "ಮ್ಹಜ್ಯಾ ವಾವ್ರಾ೦ತ್ ವೇಗ್ ಜಾವ್ನಾಸ್‌ಲ್ಲೊ ಮ್ಹಜೆ೦ ಬದಿಕ್. ವೇಗಾಸ೦ಗಿ ಆಸ್‌ಲ್ಲೆ೦ ತೆ೦ ಥಿರ್‌ಪಣ್ ಮ್ಹಾಕಾ ಎಕ್ ಉತ್ತೀಮ್ ಡ್ರಾಯ್ವರ್ ಮ್ಹಣ್ ಥಿರಾಯ್ತಾಲೆ೦. ಹಿ ಸ೦ಗತ್ ಆಪ್ಲ್ಯಾ ಬಾಪಾಯ್ಚ್ಯಾ ‘ರು೦ಯ್ಯ್’ ಸ್ಪೀಡಾವಿಶಿ೦ - ಮ್ಹಜ್ಯಾ ಪುತಾನ್ ಆಪ್ಲ್ಯಾ ಧಾಕ್ಟುಲ್ಯಾ ಮಿತ್ರಾ೦ಥಾವ್ನ್ ಆಯ್ಕಾಲ್ಲಿ. ಆನಿ ತೊ ಮ್ಹಜೆಸ೦ಗಿ೦ ಬಸ್ಸಾರ್ ಯೆತಾ೦ ಮ್ಹಣ್ ಹಟ್ ಧರಿಲಾಗ್ಲೊ. ಯೆದೊಳ್‌ಚ್ ಕಳಯಿಲ್ಲ್ಯಾ ಕಾರಾಣಾ೦ಕ್ ಲಾಗೊನ್ ಹಾ೦ವ್ ವೊಪ್ಲೊ೦ ಆನಿ ತ್ಯಾ ಎಕಾ ದಿಸಾ ತಾಕಾ ಘೆವ್ನ್ ಹಾ೦ವ್ ಆಯ್ಲೊ೦. ಹ್ಯಾ ಹಳ್ಳೆಥಾವ್ನ್ ತು೦ವೆ೦ ಕಾಮ್ ಕರ್‍ಚ್ಯಾ ಶ್ಹೆರಾ ಪರ್‍ಯಾ೦ತ್ ತ್ಯಾ ದಿಸಾಚ್ಯಾ ನಿಮಾಣ್ಯಾ ಟ್ರಿಪ್ಪಾಚೆರ್ ಹಾ೦ವೆ೦ ತಾಕಾ ಸಾ೦ಗಾತಾ ಘೆತ್ಲೊ.
"ಕಸಲೆಚ್ ವಾ೦ದೆನಾಸ್ತಾ೦ ಆಮಿ೦ ಶ್ಹೆರಾಕ್ ಪಾವ್ಲ್ಯಾ೦ವ್ ಆನಿ ನಿಯಮಿತ್ ವೆಳಾರ್ ಪಾಟಿ೦ ಭಾಯ್ರ್‌ಸರ್‍ಲ್ಯಾ೦ವ್. ತು೦ ಬಸ್ಸ್‌ಲ್ಲ್ಯಾಚ್ ಸಿಟಿಚೆರ್ ಮ್ಹಜೊ ಪುತ್ ಬಸುನ್ ಆಸ್‌ಲ್ಲೊ. ತಾಚೆ ಅಭಿಮಾನಿ ದೊಳೆ ಖಿಣಾಕ್ ಮ್ಹಜೆರ್ ಆನಿ ಖಿಣಾಕ್ ಅಟ್ಟೆ೦ ಧರ್‌ಲ್ಲ್ಯಾ ಮ್ಹಜ್ಯಾ ಹಾತಾ೦ಚೆರ್ ಬಸ್ತಾಲಿ ಆನಿ ಹಾ೦ವ್ ಪುಳಕಿತ್ ಜಾತಾಲೊ೦ ಆನಿ ಮ್ಹಜೊ ಸ್ಪೀಡ್ ಸ೦ಸಾರಾ೦ತ್‌ಚ್ಚ್ ಅವ್ವಲ್ ಮ್ಹಣ್ ಚಿ೦ತಾಲೊ೦.
"ಆನಿ ಯೆಕಾಚಾಣೆ.....ತಿ೦ ಘು೦ವ್ಡಿ ಉದೆಲಿ....ಹಾ೦ವ್ ನೆಣಾ೦ ಕಿತೆ೦ ಜಾಲೆ೦....ಮ್ಹಜೆ೦ ಸ೦ಯಮ್ ಚುಕ್ಲೆ೦...ಪರಿಣಾಮ್ ಜಾವ್ನ್ ಘಡ್‌ಲ್ಲ್ಯಾ ಅವ್ಗಡಾ೦ತ್ ಮ್ಹಜೊ ಪುತ್ ಅ೦ತರ್‍ಲೊ...."ತಾಚೊ ತಾಳೊ ಕಾ೦ಪ್ಲೊ. "ಸ ಮಯ್‌ನೆ ಪರ್‍ಯಾ೦ತ್ ಆಸ್ಪತ್ರೆ೦ತ್ ಪಡೊನ್ ಹಾ೦ವ್ ಭಾಯ್ರ್ ಯೆತಾನಾ ಮ್ಹಜಿ ಪತಿಣ್ ಪುತಾಚ್ಯಾ ಖ೦ತಿನ್ ಕರ್‍ಗೊನ್ ಮೇಣ್ ಜಾವ್ನ್ ಪಿಗ್ಳೊನ್ ಅ೦ತರ್‍ಲಿ....."
ಆಪಾಪಿ೦ಚ್ ಮ್ಹಜೊ ಹಾತ್ ತಾಚ್ಯಾ ಖಾ೦ದಾರ್ ಬಸ್ಲೊ.
ತಾಣೆ ಮ್ಹಜೊ ಹಾತ್ ಹಾಳ್ವಾಯೆನ್ ಲೊಟುನ್ ನಿಸ್ರಾಯ್ಲೊ!
"ಪುಣ್ ಹಾ೦ವ್ ಜಿಯೆಲೊ೦!" ತಾಣೆ ಮು೦ದರಿಲೆ೦. "ಪುತಾಚ್ಯಾ ಆನಿ ಪತಿಣೆಚ್ಯಾ ಮರ್‍ಣಾ೦ನಿ ಮ್ಹಾಕಾ ಗರ್‍ಜೆವರ್‍ತಿ ಸಜಾ ದಿಲ್ಯಾ ಮ್ಹಣ್ ಲೆಕುನ್ ಕ೦ಪೆನಿಚ್ಯಾನ್ ಮ್ಹಾಕಾ ಮ್ಹಜೆ೦ ಕಾಮ್ ಪಾಟಿ೦ ದಿಲೆ೦. ಪರ್ತ್ಯಾನ್ ಹ್ಯಾ ‘ಲಾಯ್ನಿ’ಚೆರ್ ಹಾ೦ವ್ ಪಡ್ಲೊ೦. ದೀಸ್ ಪಾಶಾರ್ ಜಾಲೆ. ಮ್ಹಾಕಾ ಹ್ಯಾಚ್ ಬಸ್ಸಾಚೆರ್ ಪಳೆಯಿಲ್ಲ್ಯಾ ಥೊಡ್ಯಾ೦ನಿ ಕಾ೦ಯ್ ಥೊಡೆ ದೀಸ್ ಮ್ಹಜಿ ಬಿರ್‍ಮತ್ ಉಚಾರ್‍ಲಿ. ಪುಣ್ ಉಪ್ರಾ೦ತ್ ಸರ್‍ವಾ೦ಕ್ ತಾತಾ೦ಚ್ಯಾ ವೆಳಾ ಪರ್‍ಮಾಣೆ ವೆಳಾರ್ ಯೆ೦ವ್ಚ್ಯಾ ಬಸ್ಸಾಚೊ ಡ್ರಾಯ್ವರ್ ಹಾ೦ವ್ ಜಾಲೊ೦. ತುಕಾ ತುಜೆ೦ ಸಾತ್ ವೊರಾ೦ಚೆ೦ ಬಸ್ಸ್ ಆಸ್‌ಲ್ಲೆಪರಿ೦.
ತಾಚ್ಯಾ ಕೊಡ್ಸಾಣೆ೦ತ್ ಹಾ೦ವೆ೦ ಕಸಲಿಗಿ ಗೊಡ್ಸಾಣ್ ಚಾಕ್ಲಿ. ಮ್ಹಾಕಾ ಶಾಸನಾ೦ ಕರು೦ಕ್ ತಾ೦ಕ್‌ಲ್ಲೆ೦ ತರ್......
ಮ್ಹಾಕಾ ಅರ್‍ತ್ ಜಾಯಿತ್ತ್ ಯೆತಾಲೆ೦, ಹಾ೦ವ್ ಮ್ಹಾಕಾಚ್ ಸಮ್ಜು೦ಕ್ ಲಾಗ್‌ಲ್ಲೊ೦?
"ಎಕಾ ಸಾ೦ಜೆರ್ ಹೆ೦ಚ್ ಸಾತ್ ವೊರಾ೦ಚೆ೦ ಟ್ರಿಪ್ಪ್ ಹಾ೦ವ್ ಕರ್‍ತಾನಾ ತು೦ ಆಜ್ ಬಸ್‌ಲ್ಲೆ ಸಿಟಿಚೆರ್ ಎಕ್ಲೊ ಭುರ್‍ಗೊ ಯೆವ್ನ್ ಬಸ್ಲೊ. ಪ್ರಾಯ್ ಕಾ೦ಯ್ ಮ್ಹಜ್ಯಾಚಿ ಪುತಾಚಿಚ್ ಜಾಯ್ತ್. ಮ್ಹಜಿ೦ ಅ೦ತರ್‍ಮುಳಾ೦ ಉಡ್ಲಿ೦, ಹಾತ್ ಪಾ೦ಯ್ ಗಾ೦ಟೆಲೆ ಆನಿ ‘ತೆ೦’ ದೃಶ್ ದೊಳ್ಯಾ೦ ಸಾಮ್ಕಾರ್ ಉದೆಲೆ೦. ತ್ಯಾ ಭುರ್‍ಗ್ಯಾಕ್ ಥ೦ಯ್‌ಥಾವ್ನ್ ಉಟಯಾ೦ ಮ್ಹಣ್ ಹಾ೦ವೆ೦ ಚಿ೦ತ್ಲೆ೦ ತರಿ ಹಾ೦ವ್ ಹ್ಯಾ ವೊಡ್ಣೆಚ್ಯಾ ವಿರುದ್ ಉರ್‍ಡಾಲೊ೦. ಹಾ೦ವೆ೦ ಬಸ್ಸ್ ಚಾಲು ಕೆಲೆ೦ ಆನಿ ವೇಗ್ ಆರಾಯ್ಲೊ.
"ಪುಣ್ ಮ್ಹಜ್ಯಾನ್ ಸೊಸು೦ಕ್ ಜಾಲೆ೦ ನಾ. ತ್ಯಾ ಘು೦ವ್ಡೇಲಾಗಿ೦ ಪಾವ್ತಾನಾ ಹಾ೦ವ್ ಕೊಸಾಳ್ಳೊ೦, ರಡ್ಲೊ೦ ಆನಿ ಬೋವ್ ಕಶ್ಟಾ೦ನಿ ಹಾ೦ವೆ೦ ಆನ್ಯೇಕ್ ಅವ್ಗಡ್ ಚುಕಯ್ಲೆ೦. ಆನಿ ಹಾ೦ಗಾಸರ್ ಸುರು ಜಾಲೊ ತೊ ತುಕಾ ಅರ್‍ತ್ ಜಾ೦ವ್ಕ್‌ನಾತ್‌ಲ್ಲೊ ಗೊಟಾಳೊ. ತ್ಯಾ ಸಾ೦ಜೆಚ್ಯಾ ಟ್ರಿಪ್ಪಾಚೆರ್ ಚಡ್‌ಉಣೆ ಆಜ್ ಆಸ್‌ಲ್ಲೆಚ್ ಪ್ರಯಾಣಿಕ್ ಆಸ್‌ಲ್ಲೆ. ಸರ್‍ವಾ೦ಕ್ ಮ್ಹಜ್ಯಾ ಅವ್ಗಡಾಚಿ, ಪುತಾಚ್ಯಾ ಮರ್‍ಣಾಚಿ ಆನಿ ಮ್ಹಜ್ಯಾ ಪತಿಣೆಚ್ಯಾ ಅ೦ತ್ಯಾಚಿ ಸ೦ಗತ್ ಕಳಿತ್ ಆಸ್ಚಿಚ್.
"ತೊ ಭುರ್‍ಗೊ ತ್ಯಾ ಸಿಟಿರ್ ಬಸ್‌ಲ್ಲೆವೆಳಿ೦ ಮ್ಹಜೆ೦ ಸ೦ಯಮ್ ಚುಕ್‌ಲ್ಲೆ೦ ಪಳೆವ್ನ್ ತೆ ಭಿಯೆಲೆ ಪುಣ್ ಮ್ಹಜಿ ಬಿರ್‍ಮತ್ ಪರತ್ ಉಚಾರಿಲಾಗ್ಲೆ. ‘ತುಕಾ ತೆ೦ ಘಟನ್ ಪರತ್ ಉಡಾಸಾ೦ತ್ ಯೇನಾಶೆ೦ ಹ್ಯಾ ಸಾತ್ ವೊರಾ೦ಚ್ಯಾ ಬಸ್ಸಾರ್ ತ್ಯಾ ಸಿಟಿಚೆರ್ ಕೊಣೆ೦ಚ್ ಬಸಾನಾಶೆ೦ ಆಮಿ೦ ಶಾಸನ್ ಕರ್‍ತಾ೦ವ್’ ಅಶೆ೦ ತೆ ಮ್ಹಣಾಲೆ. ಹಿ ಮ್ಹಜಿ ಬಿರ್‍ಮತ್ ತಾಣಿ ದಾಕಯಿಲ್ಲಿ ನ್ಹಯ್ ಪುಣ್ ಭದ್ರ್ ಕೆಲ್ಲಿ ತಾ೦ಚಿಚ್ಚ್ ಭದ್ರತಿ!
"ತರ್‍ನಾಟ್ಯಾ, ಜಿಣಿಯೆ೦ತ್ ಎಕ್ ಹ೦ತ್ ಯೆತಾ. ತ್ಯಾ ಹ೦ತಾಚೆರ್ ತು೦ ಜಿಯೆ೦ವ್ಕ್ ಸಕ್ತಾಯ್, ಬೊಲ್ಪ್ಯಾ೦ ಮದೆ೦, ವಾಗ್ಟಾ೦-ಸರ್‍ಪಾ೦ ಮದೆ೦ ದೀಸ್ ಕಾಡು೦ಕ್ ಸಕ್ತಾಯ್. ಪುಣ್ ಜಿಯೆ೦ವ್ಚೆ೦ ಆನಿ ಝುಜ್‌ಚೆ೦, ಹ್ಯಾ೦ ಮದೆ೦ ಫರಕ್ ಆಸಾ. ಹೆ೦ ಹಾ೦ವ್ ತುಜೆಥಾವ್ನ್ ಶಿಕ್ಲೊ೦. ಕೋಣ್ ಜಾಣಾ೦ ಆಜ್ ತು೦ ತುಜ್ಯಾ ದಫ್ತರಾ೦ತ್ ವಾಗಾ೦-ಬೊಲ್ಪ್ಯಾ೦ ಮಧೆ೦ ಜಿಯೆಲಾಯ್ ಜಾ೦ವ್ಕ್‌ಯಿ ಪುರೊ; ಪುಣ್ ಹ್ಯಾ ಸಾ೦ಜೆರ್ ಝುಜ್ ತು೦ ಝುಜ್ಲೊಯ್.
"ಹ್ಯಾ ಪ್ರಯಾಣಿಕಾ೦ನಿ ಕೆಲ್ಲೆ೦ ಶಾಸನ್ ಮ್ಹಕಾ ಕಿತ್ಲೆ೦ ದಾ೦ಬುನ್ ಧರ್‍ತಾಲೆ೦ ಮ್ಹಳ್ಳೆ೦ ಮ್ಹಾಕಾ ಆಜ್ ಕಳಿತ್ ಜಾಲೆ೦. ತು೦ ಹಟ್ಟಾನ್ ಮ್ಹಳ್ಳೆಪರಿ೦ ತ್ಯಾ ಸಿಟಿಚೆರ್ ಬಸ್ಲೊಯ್‌ಚ್. ಪುಣ್ ಭಿರಾ೦ತ್ ಆನಿ ಅಪಧಯ್ರ್ ಉದೆಲ್ಲೆ೦ ಮ್ಹಜೆಥ೦ಯ್. ಹೆ೦ ಟ್ರಿಪ್ಪ್ ಹಾ೦ವ್ ಶಾಬಿತಾಯೆನ್ ಮಾರಿನ್ ವ ನಾ ಮ್ಹಳ್ಳೆ೦ ಭ್ಯೆಂ ಮ್ಹಾಕಾ ದೊಸ್ತಾಲೆ೦......."ತೊ ಮ್ಹಾಕಾ ಮಯ್ಪಾಸಾನ್ ಪಳೆಲಾಗ್ಲೊ. "ಮ್ಹಜೊ ಪುತ್ ಆಸ್‌ಲ್ಲೊ ತರ್ ತುಜ್ಯಾ ಪ್ರಾಯೆಕ್ ಪಾವ್ತೊ...." ತಾಚ್ಯಾ ದೊಳ್ಯಾ೦ನಿ ದುಕಾ೦ ಆಸ್‌ಲ್ಲಿ೦.
ತೊ ಘಾಮೆಲ್ಲೆ೦ ಕಾರಾಣ್ ಮ್ಹಾಕಾ ಆತಾ೦ ಕಳ್ತಾಲೆ೦.
ತಾಚ್ಯಾ ಖಾ೦ದಾರ್ ಹಾ೦ವೆ೦ ಆತಾ೦ ದವ್ರಿಲ್ಲೊ ಮ್ಹಜೊ ಹಾತ್ ತಾಣೆ ಪಾಟಿ೦ ಲೊಟ್ಲೊ ನಾ.
"ಮ್ಹಜೆ ಜಿಣಿಯೆಚೊ ಆನಿ ಝುಜಾಚೊ ಹೊ ಪಯ್ಲೊ ದೀಸ್!" ಹಾ೦ವೆ೦ ಕಳಯ್ಲೆ೦ ತಾಕಾ. "ಸೊಡಾಚೆ ಪಯ್ಶೆ೦ ಹಾ೦ವ್೦ಚ್ ದೀ೦ವ್?"
ತೊ ಹಾಸ್ಲೊ.
ಮ್ಹಜೆ೦ ಭುಜ್ ತಾಣೆ ಥಾಪುಡ್ಲೆ೦.
"ತಶೆ೦ ತರ್, ಎಕ್ ಕಾಟ್ ಬಿಡಿಯೆ೦ಚೆ ಪಯ್ಶೆಯಿ ದೀವ್ನ್ ಸೊಡ್," ಮ್ಹಣೊನ್ ತಾಣೆ ಬಿಡಿಯೆ೦ಚೊ ಎಕ್ ಕಾಟ್ ವಿ೦ಚ್ಲೊ..........
Tags:
Edwin JF Dsouza, Konkani Story, Konkani, 7 Oclock Bus, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/24/2020 ಉದೆಂತಿಚೆಂ ನೆಕೆತ್ರ್...
-
11/28/2020 ಚೂಕಿ ತಿದ್ವಿನಾ ಜಾಲ್ಯಾರ್!...
-
11/4/2020 ಅನಿವಾಸಿ ರಾಯ್...
-
10/23/2020 ಘಾಣ್...
-
-
9/13/2020 ರಾತ್ ಪಾಳಿ...
-
6/18/2018 ವೆಚಿಕ್ ಪುತಾಚೊ ದಾಟ್ಟು...
-
11/12/2017 ನ್ಯೂ ಐನ್‌ಸ್ಟೀನ್...
-
9/7/2017 ಮ್ಹಜ್ಯಾ ಮೊಗಾಚೆಂ ಮೆಲ್ಬಾ...
-
8/29/2017 ಕೊಲ್‍ಗರ್ಲ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
Our Address
Mangalore
 | Contact Person : Mr. Praveen Tauro |
Email : praveen@maibhaas.com
Phone : +91 99 80 184340
Address :
Daijiworld.com,
Airport Road,
opp. Bondel Church,
Mangalore - 575 008
Karnataka - India
Our Address
Udupi
 | Contact Person : Mr. Joel D'almeida |
Email : joel@maibhaas.com
Phone : +91 90 08 855392
Address :
Eventz Redefined,
Next to Vijaya Bank,
Holy Family Complex
1st Floor, NH -66
Brahmavara - 576213
Our Address
Dubai
 | Contact Person : Mr. Naveen Sequeira |
Email : editor@maibhaas.com
Phone : +97 150 755 4105
Address :
Master Mind IT Solutions,
UBL Building,
#402, 4th Floor
Bank Street - Bur Dubai
Dubai - UAE
0 Comment/s.