From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಅಶಿ ಹಿ ಏಕ್ ಮನ್ಶಾ ಜೀಣ್
Saturday, July 23, 2016
ಜೆಬೆಲ್ ಆಲಿ ಆಸ್ಚ್ಯಾ ದಫ್ತರಾಥಾವ್ನ್ ಕರಾಮಾ ಪಾವ್ತಾನಾ ವೊರಾಂ ಆಡೇಜ್ ಜಾಲ್ಲಿಂ. ದೆಗೆಚ್ಯಾ ಬಾಂಧ್ಪಾಂತ್ಲ್ಯಾ 'ಬೇಬಿ ಸಿಟ್ಟರ್' ಶ್ರೀಮತಿ ಮೆಂಡೊನ್ಸಾಚ್ಯಾ ಘರಾ ಆಸ್‌ಲ್ಲ್ಯಾ ಮನಿಷಾಕ್ ಫಾಸ್ಳೆಂತ್ ಆರಾವ್ನ್ ಘರಾ ಹಾಡ್ನ್ ಪಾವ್ತಾನಾ ತೀನ್ ಉತ್ರಾಲ್ಲಿಂಚ್ಚ್ ಮ್ಹಣ್ಯೆತ್.
ಬ್ರೇಸ್ತಾರಾಚೊ ದೀಸ್ ಜಾಲ್ಲ್ಯಾನ್ ಆಜ್ ಎಕಾ ಸೆಕುಂಡಾಚೊ ಬೆಟ್ವೊಳ್ ನಾತ್‌ಲ್ಲೊ. ಹಫ್ತ್ಯಾಚೆಂ ಸೇಲ್ಸ್ ಮೀಟಿಂಗ್ ಆನಿ ಯೆಂವ್ಚ್ಯಾ ಹಫ್ತ್ಯಾಚಿ ತಯಾರಾಯ್ ಸರ್ವ್ ಕರ್ನ್ ದಫ್ತರ್ ಸೊಡ್ತಾನಾಂಚ್ಚ್ ಪಾವ್ಣೆ ದೋನ್ ಜಾಲ್ಲಿಂಚ್ಚ್.
ಸಕಾಳಿಂ ಥಾವ್ನ್ ಉಣೆಂ ಮ್ಹಳ್ಯಾರ್ ಧಾ ಪಾವ್ಟಿಂ ಮೆಲನಿಚೆಂ ಫೋನ್ ಆಯಿಲ್ಲೆಂ. ಹೆರಾಂ ದಿಸಾಂನಿ ದಿಸಾಕ್ ಏಕ್ ಪಾವ್ಟಿಂ ಪುಣಿ ಫೊನಾಚೊ ಉಡಾಸ್ ಆಸಾನಾತ್‌ಲ್ಲ್ಯಾ ತಾಕಾ ಆಜ್ ಹರ್ಯೆಕ್ ಪಾವ್ಟಿಂ ತಿಚ್ಚ್ ಖಬರ್... ತಿಂಚ್ಚ್ ಉತ್ರಾಂ... ತಿಂಚ್ಚ್ ಮಂತ್ರಾಂ... ತಿಚ್ಚ್ ಖಂತ್....
ಆಜ್ ಸಾಂಜೆರ್ ತಾಚಿ ಭಯ್ಣ್, ಮಿಲ್ಟ್ರೆಡ್ ಆನಿ ಬಾವೊಜಿ, ರೊಯ್ಸ್ ಅಬುಧಾಬಿ ಥಾವ್ನ್ ಯೆತಾತ್.... ಭಯ್ಣ್ ದುಸ್ರ್ಯಾಕ್ ಬಾಳಾಂತ್ ಜಾಲ್ಯಾ ಉಪ್ರಾಂತ್ ದುಬಾಯ್ ಯೆಂವ್ಚೆಂ ಪಯ್ಲ್ಯಾ ಪಾವ್ಟಿಂ, ಘರ್ ಬದ್ಲುಂಕ್ ಯೆಂವ್ಚ್ಯಾ ಬರಿ... ತಾಂಕಾ ಜಾಯ್ ಜಾಲ್ಲಿ ತಯಾರಾಯ್ ಕರ್ಚ್ಯಾ ವಿಶಿಂಚ್ಚ್ ಹಿಂ ಸರ್ವ್ ಫೊನಾಂ... ತಾಂಕಾ ಜಾಯ್ ಜಾಲ್ಲೆಂ ಜೆವಾಣ್... ಖಾಣ್... ಬಿಯರ್ ಸೊರೊ... ಇನಾಮಾಂ... ನವ್ಯಾ ಬಾಳ್ಶಾಕ್ ಖೆಳ್ಚೊ ವಸ್ತು.. ತಾಕಾ ಖಾಣ್... ಸುಕ್ರಾರಾ ದೀಸ್ ಭವೊಂಕ್ ವ್ಹರ್ಚ್ಯಾ ವಿಶಿಂ... ಶೀ.... ಮ್ಹಜಿ ತಕ್ಲಿ ವಿರಾರ್ ಕೆಲ್ಲಿ ತಾಣೆ.
ಎಕಾ ಹಫ್ತ್ಯಾ ಪಯ್ಲೆಂ ತಿಂ ಹಾಂಗಾಸರ್ ಯೆತಾತ್ ಮ್ಹಣ್ ಕಳ್‌ಲ್ಲ್ಯಾ ತವಳ್ ಥಾವ್ನ್ ಆಮ್ಗೆರ್ ಸಂತೊಸಾಚಿಂ ಲ್ಹಾರಾಂ ಫುಲ್ಲ್ಯಾಂತ್. ಸಕಾಳಿಂ ಥಾವ್ನ್ ರಾತಿ ವರೇಗ್ ತಿಚ್ಚ್ ಖಬಾರ್. ಏಕ್ ವಿಷಯ್ ಕಿತೆಂಗೀ ಮ್ಹಳ್ಯಾರ್, ಹ್ಯಾ ಹಫ್ತ್ಯಾಂತ್ ಆಮ್ಗೆರ್ ಲಡಾಯ್... ಉತ್ರಾಂಚೊ ಗೊಂದೊಳ್ ನಾ.... ಫುಗಸಾಂವ್ ಬಿಲ್ಕುಲ್ ನಾ... ಕಿತ್ಯಾಕ್ ತಾಚಿ ಭಯ್ಣ್ ಯೆತಾ ಆನಿ ತಾಚ್ಯಾ ತಯಾರಾಯೆಂತ್ ಝಗ್ಡ್ಯಾಕ್ ಪುರ್ಸತ್ ನಾ..
ಮಂಗ್ಳಾರಾ ದಿಸಾಚ್ಚ್ West Zone ತ್ಲೆಂ ದುಕ್ರಾ ಮಾಸ್ ಹಾಡುನ್ ಇಂದಾದ್ ಕರ್ನ್ ದವರ್‌ಲ್ಲೆಂ. ಕಾಲ್ ರಾತಿಂ ಸನ್ನಾ ಕೆಲ್ಲಿಂ. ಆಜ್ ಕುಂಕ್ಡಾ ಮಾಸ್ ಸುಕೆಂ, ಬೊಕ್ರ್ಯಾ ಮಾಸ್ ಕಡಿ, ಭೀಪ್ ಚಿಲ್ಲಿ... ಅಪಾಂ ಆನಿ ಹೆರ್ ಸರ್ವ್ ಆನಿ ಜಾಯ್ಜಯ್... ಕಾಂಯ್ ಪನ್ನಾಸ್ ಲೊಕಾಕ್ ಖಾವ್ಯೆತ್ ತಿತ್ಲೆಂ ಜೆವಾಣ್ ಆಮ್ಗೆರ್ ತಯಾರ್ ಜಾವ್ನ್ ಆಸ್‌ಲ್ಲೆಂ. ಹೆಂ ಸರ್ವ್ ಕರುಂಕ್ ಸೆಜಾರ್ಚ್ಯಾ ವಿಲ್ಲಿಕೆಲಿ ಕಾಮಾಚಿ ಮನಿಸ್ ಚಾರ್ ದೀಸ್ ಥಾವ್ನ್ ಆಮ್ಗೆರ್ ಕಾಮಾಕ್ ಆಸ್‌ಲ್ಲಿ.
ಮ್ಹಜೆಂ ಏಕ್‌ಚ್ಚ್ ಸವಾಲ್ - ಜರ್‌ತರ್ ಮ್ಹಜಿಂ ಮನ್ಶಾಂ ಆಯಿಲ್ಲಿ ತರ್ ಮಾಸ್ಳೆಚ್ಯಾ ಕಡಿಯೆನ್ ವಾಡ್ತೆಂ ನಾ ಹೆಂ? ಸುಕ್ರಾರಾ ಭಾಯ್ರ್ ವೆಚೆಂ ಮ್ಹಣ್ತಾನಾ ಹಾಚ್ಯಾ ಪೆಂಕ್ಟಾಂತ್ ದುಖಿಚಿಂ ಫೊಳಾಂ ಉದೆತಿನಾಂತ್? ಯೆದ್ಯಾ ಘರಾಂತ್ ತರ್‌ಯ್ ರಾವೊಂಕ್ ಜಾಗೊಚ್ಚ್ ಆಸ್ತೊನಾ ನಂಯ್? ಹೆಂ ಪುರಾ ಮ್ಹಜ್ಯಾ ತಕ್ಲೆಂತ್ ಬರೆಂ ಕರ್ನ್ ಜಮೊ ಜಾವ್ನ್ ಆಸಾ... ತಿಂ ಯೇವ್ನ್ ಗೆಲ್ಯಾ ಉಪ್ರಾಂತ್ ತಾಕಾ ಸಡ್ಸಡಿತ್ ಜಾವ್ನ್ ಕಾಡುಂಕ್ ಆಸಾ.... ಲಡಾಯ್ ನಂಯ್, ಮಾರ್ನ್ ಪಡ್ಲ್ಯಾರ್‌ಯ್ ಹೆಂ ಮಾತ್ರ್ ವಿಚಾರ್ ಕರಿನಾಸ್ತಾನಾ ಸೊಡಿಸೊನಾ...
*************************
ಮೆಲನಿಲಾಗಿಂ ಆಟ್ ವರ್ಸಾಂ ಪಯ್ಲೆಂ ಕಾಜಾರ್ ಜಾಲ್ಯಾ ಉಪ್ರಾಂತ್ ಆಮಿಂ ಮೊಗಾನ್ ಜಿಯೆಲ್ಲ್ಯಾಚ್ಯಾಕಿ ಲಡಾಯ್ ಕೆಲ್ಲಿಚ್ಚ್ ಚಡ್ ಮ್ಹಣ್ಯೆತ್.... ಥೊಡ್ಯಾ ಪಾವ್ಟಿಂ ಉತ್ರಾ ಉತ್ರಾಕ್ ಆಮ್ಚ್ಯಾ ಮಧೆಂ ಲಡಾಯ್..... ಉಲವ್ಣೆಂ... ಗಲಾಟೊ ಆನಿ ಉಪ್ರಾಂತ್ ಏಕ್ ಹಫ್ತೊ... ದೋನ್ ಹಫ್ತೆ ಉಲವ್ಣೆಂ ಬಂದ್... ಘರಾಂತ್ ಮುರ್‍ಮುರೊ...
ಭಾಯ್ರ್ ಹಾಂವ್ ಭಾರಿಚ್ಚ್ ಸಾದೊ ಮನಿಸ್. ಗೊರ್ವಾ ಬರಿಂ ಬೊಳೊ. ಧಾ ಜಣಾಂ ಮುಕಾರ್ ಕೊಣೆಂಯ್ ಹಾಗ್‌ಲ್ಲೆಂ ತರೀ ಕಾಡುಂಕ್ ಪಾಟಿಂ ಸರಾನಾ ಜಾಂವ್ಚ್ಯಾ ಭುರ್ಗ್ಯಾ ಸ್ವಭಾವಾಚೊ ತರ್‌ಯ್ ಘರಾಂತ್ ರಾಕ್ಕೊಸ್ ಮ್ಹಣ್ ಮೆಲನಿನ್ ಮ್ಹಾಕಾ ಸಾಂಗ್ಚೆಂ. ಕೊಣಾಕಡೆ ತರೀ ಸೊಡ್‌ದೊಡ್ ಆಸಾ... ಪುಣ್ ಬಾಯ್ಲೆಲಾಗಿಂ ಕಾಂಯ್‌ಚ್ಚ್ ಚಡುಣೆಂ ನಾ... ಬಾಯ್ಲೆನ್ ಉಲಯಿಲ್ಲ್ಯಾಂತ್ ಖಂಯ್ ಕಾಂಯ್ ಮೆಳ್ತಾಗೀ ಮ್ಹಣ್ ರಾಕೊನ್ ರಾಂವ್ಚೊ, ಕುಸ್ಡ್ಯಾ ಆಗ್ಗ್ಯಾಚ್ಯಾ ಸ್ವಭಾವಾಚೊ. ಅಸಲೊ ಮನಿಸ್ ಮ್ಹಣ್ ಕಳಿತ್ ಆಸ್‌ಲ್ಲೆಂ ತರ್ ಕಾಜಾರ್‌ಚ್ಚ್ ಜಾತಿಂನಾ.
ಪುಣ್ ಮ್ಹಜೆಂ ಚಿಂತಾಪ್ ವೆಗ್ಳೆಂ. ಮೆಲನಿಚ್ಯಾ ಚಿಂತ್ಪಾಕ್ ಬಿಲ್ಕುಲ್ ಸಮಾ ಪಡಾ ನಾತ್‌ಲ್ಲೆಂ. ಹಾಂವೆಂ ಮ್ಹಣ್ಚೆಂ ಇತ್ಲೆಂಚ್ಚ್ - ತಾಕಾ ಭಾಯ್ಲಿಂ ಮನ್ಶಾಂಚ್ಚ್ ಜಾಯ್ನಾಂತ್... ಘರಾಂತ್ ಮ್ಹಜಿಂ ಯಾ ಮ್ಹಜೆ ಇಷ್ಟ್ ಕೋಣ್‌ಯ್ ಆಯ್ಲ್ಯಾರ್ ಜಾಯ್ನಾ.... ಗೆಲ್ಯಾರ್ ಜಾಯ್ನಾ... ಭಾಯ್ಲ್ಯಾಂಕ್ ಉಪ್ಕಾರ್ ಕೆಲೊ ತರ್ ಹಾಚ್ಯಾ ಪೊಟಾಂತ್ ಉಕಡ್ತಾ... ಲಾಸ್ತಾ... ಶಿಜ್ತಾ.... ತಾಚಿಂ ಮನ್ಶಾಂ ಮ್ಹಳ್ಯಾರ್ ತಾಕಾ ಕಾಂಯ್ ಅಪವಾದ್ ನಾ.... ಮ್ಹಜ್ಯಾ ಮನ್ಶಾಂಕ್ ಪಳಯ್ಲ್ಯಾರ್‌ಚ್ಚ್ ಜಾಯ್ನಾ... ತಾಂಚೆರ್ ಕಾಂಠಾಳೊ... ದುರ್ಸೊಣೆಂ... ಪುಣ್ ಹಾಂವ್ ಹೆಂ ಸೊಸಿನಾ.. ಮ್ಹಾಕಾ ಭಾಯ್ಲಿಂ ಮನ್ಶಾಂ ಜಾಯ್... ಸಮಾಜ್ ಜಾಯ್.... ಮ್ಹಜಿಂ ಮನ್ಶಾಂ ಜಾಯ್...
ತಾಕಾ ಮ್ಹಜೆ ಚಿಂತಾಪ್ ಸಾರ್ಕೆಂ ಜಾಯ್ನಾ ಮ್ಹಣ್ ಹಾಂವ್ ಮ್ಹಜೆಂ ದಾದ್ಲೆಪಣ್ ಸಾಂಡುನ್, ಕೊಲ್ಗ್ಯಾ ಪಾಟ್ಲ್ಯಾನ್ ಪೆಟೊ ಗೆಲ್ಲ್ಯಾ ಬರಿ ಪುಣೀ ವೆಚೊನಾ... ಹೊ ಮ್ಹಜೊ ಘಟ್ಟ್ ನಿರ್ಧಾರ್...
ತಾಚೆಂ ಮನ್ ಆನಿ ಮತ್ ಬದ್ಲಿತಾ ಮ್ಹಣಾಸರ್ ಹಾಂವ್ ಝುಜ್ತಲೊಂ ಮ್ಹಳ್ಳೆಂ ಮ್ಹಜೆಂ ಮನ್... ಆನಿ ಮ್ಹಾಕಾ ಕಾಂಯ್‌ಚ್ಚ್ ಭಿಯೆನಾಸ್ತಾನಾ ಜಿಯೆತೆಲಿಂ ಮ್ಹಣ್ ತಾಚೆಂ ಹಟ್ಟ್..
ಆನಿ ತ್ಯಾಚ್ಚ್ ಖಾತಿರ್ ಆಮಿಂ ಝಗ್ಡೊನ್ ಪಡ್ಚೆಂ ಮ್ಹಳ್ಯಾರ್‌ಯ್ ಚೂಕ್... ಆನಿಕ್‌ಯ್ ಥೊಡಿಂ ಕಾರಣಾಂ ಆಸ್‌ಲ್ಲಿಂ...
ತಾಣೆ ಚಿಂತ್ಚೆಂ ಮ್ಹಾಕಾ ತಾಚೆರ್ ಮೊಸೊರ್ ಮ್ಹಣ್... ತಾಚಿ ಸೊಭಾಯ್... ತಾಚೆಂ ರೂಪ್... ತಾಕಾ ಬರೆಂ ಕಾಮ್ ಆಸಾ... ತೆಂಯ್ ಬೆಂಕಾಂತ್... ಮ್ಹಜ್ಯಾ ವೊರ್ನಿ ತೀನ್ ವಾಂಟೆ ಚಡ್ ಜೊಡ್ತಾ... ತಾಣೆ ಗೆಲ್ಲೆಂ, ಹಾಡ್‌ಲ್ಲೆಂ, ನ್ಹೆಸ್‌ಲ್ಲೆಂ ಮ್ಹಾಕಾ ಪಳಂವ್ಕ್ ಜಾಯ್ನಾ. ಘರಾಂತ್ ಕಿತೆಂ ಜಾಯ್ ತೆಂ ಹಾಡ್ಚೆಂ ತರ್ ಮ್ಹಜಿ ಪರ್ವಣ್ಗಿ ಗರ್ಜ್ ನಾ. ತೆಂ ಜೊಡ್ತಾ ಆನಿ ತೆಂ ಹಾಡ್ತಾ.. ತಾಕಾ ವಿಚಾರುಂಕ್ ಮಾಕಾ ಹಕ್ಕ್ ನಾ...
ಮ್ಹಾಕಾ ಭಗ್ಚೆಂ ವಿಂಗಡ್‌ಚ್ಚ್... ತೆಂ ಕಾಮ್ ಕರ್ತಾ ಜಾಂವ್ಕ್ ಪುರೊ... ಪುಣ್ ಘರಾಕ್ ಕಿತೆಂಯ್ ಹಾಡ್ತಾನಾ ಗರ್ಜ್ ನಾತ್‌ಲ್ಲೆಂ ಕಿತ್ಯಾಕ್ ಹಾಡಿಜಯ್? ಹಾಡ್ಚ್ಯಾ ಪಯ್ಲೆಂ ಘೊವ್ ಮ್ಹಳ್ಳೊ ಆಸ್ತಾನಾ ವಿಚಾರ್ಲ್ಯಾರ್ ಕಿತೆಂ ಜಾತಾ...?? ತಾಚಿ ಮರ್ಯಾದ್ ಉಣಿ ಜಾತಾ???
ಹರ್ಯೆಕ್ ವಸ್ತ್ ಘರಾ ಯೆತಾನಾ ಆಮ್ಗೆರ್ ಲಡಾಯ್ ಜಾತಾಚ್ಚ್... ಲಡಾಯ್ ಜಾತಾ ಮ್ಹಣ್ ತೆಂ ಕಾಂಯ್ ಹಾಡಿನಾಸ್ತಾನಾ ರಾವಾನಾ... ಉಲಯ್ಲ್ಯಾರ್ ಲಡಾಯ್ ಜಾತಾ ಮ್ಹಣ್ ಹಾಂವ್ ಕಾಂಯ್ ವೊಗೊ ರಾವಾನಾ..
ಹಾಂವೆಂ ಕಿತೆಂ ಉಚಾರುಂಕ್‌ಯ್ ತೊಂಡ್ ಉಗ್ತೆಂ ಕೆಲೆಂ ತರ್ ಉತ್ರಾಂಚೊ ಪಾವ್ಸ್ ತರೀ ಹಾಂವ್ ಉಲಯ್ತಲೊಂಚ್ಚ್... ದುಬಾಯ್ಚ್ಯಾ ಜಬೆಲ್ ಆಲಿಂತ್ ಕಾಮ್ ಕರ್ಚ್ಯಾ ಮ್ಹಾಕಾ ಮೆಲನಿಚಿ ವೊಳಕ್ ಜಾಲ್ಲಿ ಸೈಂಟ್ ಮೆರೀಸ್ ಇಗರ್ಜೆಂತ್. ತೆಂಯ್ ಕೊಂಕ್ಣಿ ಕೊಯರಾಂತ್ ಆಸ್‌ಲ್ಲೆಂ ಆನಿ ಹಾಂವ್‌ಯ್. ವೊಳಕ್ ಮೊಗಾರ್ ಬದ್ಲಾಲ್ಲಿ ಮ್ಹಣೊಂಕ್ ಜಾಯ್ನಾ. ಹಾಂವೆಂ ತಾಚೊ ಮೋಗ್ ಕೆಲ್ಲೊಗೀ ಮ್ಹಣ್ ಸವಾಲ್ ಮ್ಹಜ್ಯಾ ಇತ್ಲ್ಯಾಕ್ ವಿಚಾರ್ಲೆಂ ತರ್ ಜವಾಬ್ ಮೆಳೊಂಕ್‌ಚ್ಚ್ ಕಷ್ಟ್. ಮೆಲನಿಚ್ಯಾ ವ್ಹಡ್ಲ್ಯಾ ಭಾವಾನ್ ಆನಿ ಭಾವ್ಜೆನ್ ಮ್ಹಾಕಾ ಮೆಲನಿಲಾಗಿಂ ಘಾಂಟವ್ನ್ ಘಾಲ್ಲೆಂ ಮ್ಹಣ್ ಥೊಡ್ಯಾ ಪಾವ್ಟಿಂ ಭಗ್ತಾ. ತರೀ ಆತಾಂ ಉಚಾರುಂಕ್ ಕಷ್ಟ್. ಉಚಾರ್ಲೆಂ ತರ್ ಮುಕ್ಲೆ ಪಂದ್ರಾ ದೀಸ್ ಆಮ್ಕಾಂ ಝಗ್ಡೆಂ ಕರುಂಕ್ ಆನಿ ಮೆಲನಿಕ್ ರಡೊಂಕ್ ಈಟ್ ಮೆಳ್‌ಲ್ಲ್ಯಾ ಬರಿಂ.
ತಸೆಂ ಮ್ಹಳ್ಯಾರ್ ಆಮಿಂ ಮೋಗ್ ಕರುಂಕ್ ನಾ ಮ್ಹಣ್ ಬಿಲ್ಕುಲ್ ನಂಯ್. ದೊಗಾಂಯ್ ಆಮಿಂ ಎಕಾಮೆಕಾಕ್ ಆಶೆಲ್ಲ್ಯಾಂವ್. ತಾಚ್ಯಾ ವಿಶೇಸ್ ಖಾಸ್ತಾಚ್ಯಾ ಸೊಭಾಯೆಕ್ ಆನಿ ಕುಡಿಚ್ಯಾ ಸ್ತ್ರೀಪಣಾಚ್ಯಾ ದವ್ಲತೆಕ್ ಮ್ಹಜೊ ಜೀವ್‌ಯ್ ಆಶೆಲ್ಲೊ. ಆಮ್ಚ್ಯಾ ಸಂಯ್ಭಿಕ್ ತಾನೆಕ್ ಆನಿ ಆಶೆಕ್ ಥಾಂಬಂವ್ಕ್ ಆಮಿಂ ಜಾಯ್ ಜಾಲ್ಲೆಂ ಸರ್ವ್ ಕೆಲ್ಲೆಂ. ಆಮ್ಕಾಂ ಏಕ್‌ಚ್ಚ್ ಭುರ್ಗೆಂ ದೆವಾನ್ ದಿಲ್ಲೆಂ. ಪಯ್ಲೆಂ ಚೆಡುಂ ಜಾತಾನಾ ಮನಿಷಾ ಮ್ಹಣ್ ನಾಂವ್ ದವರ್‌ಲ್ಲೆಂ. ತೆಂ ನಾಂವ್ ಮ್ಹಾಕಾ ಬಿಲ್ಕುಲ್ ಪಸಂದ್ ಜಾಲ್ಲೆಂ ನಾ. ಹಿಂದಿ ಪಿಂತುರಾಂನಿ ಪಳಯಿಲ್ಲ್ಯಾ ಖಂಚಾಗಿ ನಟಿಚೆಂ ನಾಂವ್, ತೆಂ ನಾಕಾ ಮ್ಹಳೆಂ ತರ್ ಮೆಲನಿಚಿಂ ಉತ್ರಾಂ ತಯಾರ್ - ತುಂ ಆದ್ಲ್ಯಾ ಕಾಳಾಚ್ಯಾ ಬರಿ ಜಿಯೆಂವ್ಕ್ ಆಶೆತಾಯ್... ಮ್ಹಜ್ಯಾ ಭಯ್ಣಿನ್ ಸಾಂಗ್ಲಾಂ ಮ್ಹಣ್ ತುಕಾ ನಾಕಾ.... ಪಳೆಯಾಂ ತುಜ್ಯಾ ಭಯ್ಣಿನ್ ಯಾ ಭಾವಾನ್ ಸಾಂಗ್‌ಲ್ಲೆಂ ತರ್ ಕಿತ್ಲ್ಯಾ ಖುಶೆನ್ ವೊಪ್ವಾತೊಯ್...
ಮ್ಹಾಕಾ ತ್ಯಾ ನಾಂವಾಚೆರ್ ಖುಶಿ ನಾತ್‌ಲ್ಲಿ ಪರತ್ ಪರತ್ ಉಚಾರ್ಲಿ... ಝಗ್ಡೆಂ ಜಾಲೆಂ.... ಭುರ್ಗ್ಯಾಕ್ ಪಾಳ್ಣ್ಯಾಂತ್ ದವರ್ಚ್ಯಾ ದೀಸ್ ಮ್ಹಣಾಸರ್ ಆಮಿ ಉಲಂವ್ಕ್‌ನಾಂವ್ ಬಗಾರ್ ನಾಂವಾ ಖಾತಿರ್ ಝುಜ್ಲ್ಯಾಂವ್... ಪುಣ್ ಆಖ್ರೇಕ್ ತೆಂಚ್ಚ್ ಜಿಕ್ಲೆಂ ಆನಿ ತಾಣೆ ವಿಂಚ್‌ಲ್ಲೆಂಚ್ಚ್ ನಾಂವ್ ಖಂಚ್ಲೆ.
ಹಾಂವ್ ಸಲ್ವಾಲೊಂ ಮ್ಹಣ್ ಮ್ಹಾಕಾ ಭಗ್ಲೆಂ. ಮ್ಹಜೆಂ ದಾದ್ಲೆಪಣ್ ಆಳ್ಮ್ಯಾಬರಿ ಅಸ್ಕತ್ ಮ್ಹಣ್ ಭಗೊಂಕ್ ಲಾಗ್ಲೆಂ. ತಿತ್ಲ್ಯಾ ಕಠೀಣ್ ಸ್ತ್ರೀಯೆಲಾಗಿಂ ಉಲವ್ಣ್ಯಾನ್ ಜಿಕ್ಚೆಂ ತರೀ ಕಸೆಂ?
ಹಾಂವ್ ಘರಾಂತ್ ಲಡಾಯೆಚೆಂ ಪಟ್ಟ್ ಮ್ಹಣ್ ತಾಣೆ ಮ್ಹಾಕಾ ವೊಲಾಂವ್ಚೆಂ. "ತುಕಾ ಬಾಯ್ಲೆ ಲಾಗಿಂ ಸುಧಾರ್ಸುನ್ ಜಿಯೆಂವ್ಕ್ ಗೊತ್ತು ನಾ.... ಝಗ್ಡೆಂ ಮಾತ್ ಕಳಿತ್... ಮ್ಹಜ್ಯಾ ತೆಗಾಂ ಭಾವೊಜಿಂಕ್ ಪಳೆ... ಮ್ಹಜೆ ದೋಗ್ ಭಾವ್ ಪಳೆ... ಬಾಯ್ಲ್ ಮ್ಹಳ್ಯಾರ್ ಜೀವ್ ದಿತಾತ್... ಬಾಯ್ಲೆ ಮುಕಾರ್ ತಾಂಕಾ ಹೆರ್ ಕೋಣ್೦ಯ್ ನಾಕಾಚ್ಚ್.... ಮ್ಹಜೆ ಭಾವ್, ವ್ಹೊನಿಯೆಂಕ್ ಕೊಣೆಂಯ್ ಕಿತೆಂಯ್ ಮ್ಹಳೆಂ ತರ್ ಝುಜಾಕ್‌ಚ್ಚ್ ರಾವ್ತಾತ್... ಬಾಯ್ಲೆ ಭುರ್ಗ್ಯಾಂಖಾತಿರ್ ತೆ ಕಿತೆಂಯ್ ಕರುಂಕ್ ಆಸಾತ್ ಆನಿ ತುಕಾ ಬಾಯ್ಲ್ ಮ್ಹಳ್ಯಾರ್ ಕಾಂಟಾಳೊ... ಕಿತ್ಯಾಕ್ ತುಕಾ ಕುಟಾಂಬ್ ನಾಕಾ... ಕುಟ್ಮಾಂತ್ ಸಮಧಾನ್ ನಾಕಾ... ಕುಟ್ಮಾಂತ್ ಲಡಾಯೆನ್೦ಚ್ಚ್ ಜಿಯೆಂವ್ಕ್ ತುಕಾ ಜಾಯ್... ಆಮ್ಚೆಂ ಹೆಂ ಘರ್ ಸಾಸ್ಣಾಚ್ಯಾ ಸಾಸ್ಣಾಕ್ ಆಸೆಂಚ್ಚ್ ಉರ್ತೆಲೆಂ..."
"ಕುಟ್ಮಾಂತ್ ಸಮಧಾನ್ ಜಾಯ್ ತರ್ ಹಾಂವೆಂ ಮ್ಹಜೆಂ ದಾದ್ಲೆಪಣ್ ವಿಕಿಜಾಯ್? ತುಕಾ ಸಮಧಾನ್ ಘೇಂವ್ಕ್ ಜಾಯ್ನಾ? ಹಾಂವೆಂ ಉಲಯಿಲ್ಲ್ಯಾ ಹರ್ಯೆಕಾ ಉತ್ರಾಕ್ ತುಂವೆಂ ಪೋಂತ್ ಬಾಂದ್ಯೆತ್??? ಹಾಂವೆಂ ಮಾಂಕೊಡ್ ಶಿಲಾಬರಿ ಶಿಮ್ಟಿ ಪೊಂದಾಕ್ ಘಾಲ್ನ್ ವೊಗೊಚ್ಚ್ ಬಸಾಜಾಯ್?? ಹಾಂವೆಂ ತುಜ್ಯಾ ಭಾವೊಜಿ ಆನಿ ಭಾವಾಂ ಬರಿಂ ಬಾಯ್ಲೆಚೊ ಗುಲಾಮ್ ಜಾಯ್ಜಯ್??? ಹಾಂವ್ ತಸೆಂ ಕೆದಿಂಕ್‌ಚ್ಚ್ ಕರ್ಚೊ ನಾ! ಹೆಂ ಘರ್ ಅಸೆಂಚ್ಚ್ ಆಸ್ಲ್ಯಾರ್‌ಯ್ ವ್ಹಡ್ ನಾ .. ಯಾ ನಿಸ್ಸಂತಾನ್ ಜಾಲ್ಯಾರ್‌ಯ್ ಮ್ಹಾಕಾ ಪರ್ವಾ ನಾ.." ಮ್ಹಜಿ ತಾಕಾ ಕಡಾಕಡ್ ಪಾಟಿಂ ಜವಾಬ್...
ಹ್ಯೆಚ್ಚ್ ಜವಾಬಿಚೆರ್ ತ್ಯಾ ದೀಸ್ ಚಾರ್ ಪಾಂಚ್ ವೊರಾಂ ವೊದ್ದು ವೊರಾಂಟ್ ಆನಿ ಮುಕ್ಲೆ ಏಕ್ ದೋನ್ ಹಫ್ತೆ ಆಮ್ಚ್ಯಾ ಮಧೆಂ ಉಲವ್ಣೆಂ ನಾ!!!
*************************
ಸಾಂಜ್ ಜಾತಾನಾ ಮಿಲ್ಫ್ರೆಡ್, ರೊಯ್ಸ್ ಆನಿ ಭುರ್ಗಿಂ ಆಯ್ಲಿಂ. ಖಾತಾ ತಿತ್ಲೆಂ ಖಾವ್ನ್, ಜೆವ್ತಾ ತಿತ್ಲೆಂ ಜೇವ್ನ್ ಮಿಲ್ಫ್ರೆಡ್ ಆನಿ ಮೆಲನಿ ಭುರ್ಗ್ಯಾಂಕ್ ಘೇವ್ನ್ ಬೆಡ್‌ರೂಮಾಂತ್ ನಿದ್ಲಿಂ ತರ್ ಹಾಂವ್ ಆನಿ ರೊಯ್ಸ್, ಆಮ್ಚಿ ಬೊತ್ಲ್ ಖಾಲಿ ಜಾಂವ್ಕ್ ನಾ ಮ್ಹಣ್ ಭಾಯ್ರ್‌ಚ್ಚ್ ಬಸ್ಲ್ಯಾಂವ್. ಬ್ರೇಸ್ತಾರಾಚಿ ಏಕ್ ಬೊತ್ಲ್ ಖಾಲಿ ಕರ್ನ್‍ಚ್ಚ್ ಉಟ್ಚಿ ದಸ್ತುರ್ ಮ್ಹಣ್ ತೊ ಮ್ಹಣಾಲಾಗ್ಲೊ ಆನಿ ಹಾಂವೆಂ ನಾ ಮ್ಹಳೆಂ ನಾ.
ಹಾಂವ್ ಏಕ್ ಗ್ಲಾಸ್ ಆಕೇರ್ ಕರ್ತಾಂ, ರೊಯ್ಸ್ ದೋನ್ ಕಾಬಾರ್ ಕರ್ತಾಲೊ. ಆಕ್ರೇಕ್ ತಾಣೆ ತಾಚ್ಯಾ ಬಾಯ್ಲೆಚೆಂಚ್ ಕಾಡ್ಲೆಂ - "ಆಮಿಂ ಕಾಜಾರ್ ಜಾವ್ನ್ ಇತ್ಲಿಂ ವರ್ಸಾಂ ಜಾಲಿಂ... ಪುಣ್ ಎದೊಳ್ ವರೇಗ್ ಆಮಿ ಕೆದ್ನಾಂಯ್ ಲಡಾಯ್ ಕೆಲ್ಲಿಚ್ಚ್ ನಾ... ಲಡಾಯ್ ಕರುಂಕ್ ಕಾರಣ್೦ಚ್ಚ್ ಮೆಳಾನಾ.."
'ನಾಪಾಸ್ ದಾದ್ಲೊ ಹೊ. ಬಾಯ್ಲೆಚ್ಯಾ ಪಾಲ್ವಾಭಿತರ್ ಜಿಯೆಂವ್ಚೊ ಹಿಜ್ಡೊ ಖಂಚೊ..' ಮತಿಂತ್ ಚಿಂತ್ಲೆಂ, ಪುಣ್ ಜವಾಬ್ ದಿಲಿನಾ. ಗ್ಲಾಸ್ ಎಕಾಚ್ಚ್ ಘೊಟಾನ್ ಖಾಲಿ ಕೆಲೊ.
"ಮಿಲ್ಲಿನ್ ಚೂಕ್ ಕೆಲಿ ತರೀ ಹಾಂವೆಂಚ್ಚ್ ತಾಚ್ಯಾ ಲಾಗಿಂ ಮಾಫ್ ಮಾಗ್ಚೆಂ... ಹಾಂವೆಂಚ್ಚ್ ಖಾಲ್ತೆಂ ಜಾಂವ್ಚೆಂ.. ತ್ಯಾ ವರ್ವಿಂಚ್ಚ್ ಘರಾಂತ್ ಸಮಧಾನ್... ಕಾಜಾರ್ ಜಾಲ್ಯಾ ಉಪ್ರಾಂತ್ ಮ್ಹಜ್ಚ್ಯಾ ಸರ್ವ್ ಮನ್ಶಾಂಕ್, ಮ್ಹಜ್ಯಾ ಕುಟ್ಮಾಕ್, ಮ್ಹಜ್ಯಾ ಇಷ್ಟಾಂಕ್ ಆನಿ ತೆಂ ಕಿತ್ಯಾಕ್ ಮ್ಹಜ್ಯಾ ಘರ್ಚ್ಯಾಂಕ್ ಸಯ್ತ್ ಹಾಂವೆಂ ಪಯ್ಸ್ ಕೆಲೆಂ... ಕಾಜಾರಾ ಪಯ್ಲೆಂ ಆಸ್‌ಲ್ಲೆ ಇಷ್ಟ್ ಮ್ಹಾಕಾ ಕೆಂಡಿಲಾಗ್ಲೆ... ಬಾಯ್ಲೆಚೊ ಗಾಂಡು ಮ್ಹಣಾಲೆ.. ಹಾಂವೆಂ ಪರ್ವಾ ಕೆಲಿನಾ... ಕಿತ್ಯಾಕ್ ಮ್ಹಜ್ಯಾ ಹೊಕ್ಲೆಕ್ ತಾಂಚ್ಯಾ ಕೊಣಾಯ್ಚೆರ್ ಸಮಾ ಪಡಾನಾ... ಮ್ಹಜ್ಯಾ ಮಿಲ್ಲಿಕ್ ನಾಕಾ ಜಾಲ್ಲ್ಯಾ ಮನ್ಶಾಂಕ್ ಪುಣಿ ಹಾಂವ್ ಲಾಗಿಂ ಕರಿನಾ... ಲೋಕ್ ಮ್ಹಾಕಾ ಬಾಯ್ಲೆಚೊ ಗುಲಾಮ್ ಮ್ಹಣ್ತಾ... ಹಾಂವ್ ಕೋಣಾಯ್ಕಿ ಗುಮಾನ್ ಕರಿನಾ.... ಮ್ಹಾಕಾ ಘರಾಂತ್ ಸಮಧಾನ್ ಜಾಯ್... "
ಮ್ಹಜ್ಯಾ ತಕ್ಲೆರ್ ಆಸ್‌ಲ್ಲೆಂ ಆಮಾಲ್ ಚಿಕ್ಕೆ ದೆಂವೊನ್ ಯೆತಾಲೆಂ. ಹಾಂವೆಂ ಪರತ್ ಗ್ಲಾಸ್ ಭರ್ಲೊ ಆನಿ ತಸೊಚ್ಚ್ ಖಾಲಿ ಕೆಲೊ. ತಾಚ್ಯಾ ಉತ್ರಾಂನಿ ಮ್ಹಜೊ ರಾಗ್ ಚಡೊನ್ ಯೆತಾಲೊ.
"ಅಳೆ ಮಾರ್ಸೆಲ್... ಥೊಡ್ಯಾ ಪಾವ್ಟಿಂ ದಾದ್ಲ್ಯಾನಿ ಹಿಜ್ಡೆ ಜಾಯ್ಜಯ್‌ಚ್ಚ್ ಪಡ್ತಾ. ದಾದ್ಲೆಪಣ್ ಸಾಂಡ್‌ಲ್ಲೆ ಹಿಜ್ಡೆ..." ತೊ ಹಿಜ್ಡ್ಯಾಬರಿ ಮುಕಾರ್ಸುನ್ ಉಲಯ್ಲೊ. "ಬಾಯ್ಲಾಂಚೆ ಗುಲಾಮ್ ಜಾಯ್ಜೆ ಪಡ್ತಾತ್. ಪಯ್ಲೆಚ್ಯಾಂ ಕಾಳಾರ್ ಘೊವಾನ್ ಕಿತೆಂ ಕೆಲೆಂ ತರೀ ಬಾಯ್ಲಾಂ ಸೊಸ್ತಾಲಿಂ. ಪುಣ್.. ಆತಾಂ.... ತಿಂ ಆಯ್ಕಾನಾಂತ್. ತ್ಯಾ ವರ್ವಿಂ ಘರಾಂತ್ ಝಗ್ಡೆಂ ಆನಿ ನಾ ಸಮಧಾನ್.. ಭುರ್ಗ್ಯಾಂಕ್ ವಿರಾರಾಯ್... ತಾಚ್ಯಾಕೀ ಆಮಿ ದಾದ್ಲ್ಯಾಂನಿ ಆಮ್ಚೆಂ ದಾದ್ಲೆಪಣ್ ಸಾಂಡುನ್ ಘರಾಂತ್ ಸಮಧಾನ್ ಹಾಡ್ಲ್ಯಾರ್ ಕಿತ್ಲೆಂ ಬರೆಂ... ಲೋಕ್ ಉಲಯ್ತಾ... ಪುಣ್ ಲೋಕ್ ಆಮ್ಕಾಂ ಶೀತ್ ದಿತಾವೇ??? ಆಮ್ಕಾಂ ಜಾಯ್ ಆಮ್ಚೆಂ ಘರ್ ಆನಿ ತಾಂತ್ಲೆಂ ಸಮಧಾನ್..."
"ಮ್ಹಾಕಾ ಭುಕ್ ಲಾಗ್ಲ್ಯಾ ರೊಯ್ಸ್..." ಗ್ಲಾಸ್ ಖಾಲಿ ಕರ್ನ್ ಉಬೊ ಜಾಲೊಂ.
*************************
ಏಕ್ ಹಫ್ತೊ ಗೆಲೊ......
ಬುದ್ವಾರಾ ದೀಸ್ ಮಸ್ಕತಾಂತ್ ಆಸ್ಚ್ಯಾ ಮ್ಹಜ್ಯಾ ಭಾವಾಚೆಂ, ಸ್ಟೀವನಾಚೆಂ ಈ ಮೇಯ್ಲ್ ಆಯಿಲ್ಲೆಂ. ಯೆಂವ್ಚ್ಯಾ ಈದಿಚ್ಯಾ ರಜೆಂತ್ ಚಾರ್ ದಿಸಾಂಕ್ ದುಬಾಯ್ ಕುಟ್ಮಾ ಸಮೇತ್ ಯೆತಾತ್ ಮ್ಹಣ್... ಭಾವಾಚಿಂ ಬಾಯ್ಲ್ ಆನಿ ಭುರ್ಗಿಂ ಪಯ್ಲ್ಯಾ ಪಾವ್ಟಿಂ ಗಾಂವಾ ಥಾವ್ನ್ ಆಯ್ಲ್ಯಾಂತ್ ಆನಿ ತಾಂಕಾ ದುಬಾಯ್ ಪಳಂವ್ಚಿ ಆಶಾ ಆಸ್‌ಲ್ಲಿ....
ಸಾಂಜೆರ್ ಯೇವ್ನ್ ಮೆಲನಿಕ್ ವಿಷಯ್ ಕಳಯಿಲ್ಲೊ ಮಾತ್..
ಘಡ್ಘಡೊ ಫುಟ್ಲೊಚ್ಚ್...
"ಮ್ಹಜಿಂ ಭಯ್ಣ್ ಆಯಿಲ್ಲೆಂ ಮ್ಹಣ್ ತುವೆಂ ಸಾಂಗ್ಲೆಂಯ್ ಆಸ್ತೆಲೆಂ..." ತೆಂ ಉಚಾಂಬಳ್ ಜಾಲೆಂ. "ತಾಂಚ್ಯಾ ಪೊಟಾಂತ್ ಜಾಳ್ ಭರ್ತೆಲೆಚ್ಚ್... ಕುಸ್ಡಿಂ ಮೊಸ್ರಿ ಮನ್ಶಾಂ ತಿಂ... ಹ್ಯಾ ಈದಿಚ್ಯಾ ರಜೆಂತ್ ಬಾಹ್ರೇನ್ ಆಸ್ಚ್ಯಾ ಮ್ಹಜ್ಯಾ ದಾಟ್ಟುನ್ ಯೆತಾಂ ಮ್ಹಳಾಂ... ತಾಂಕಾ 'ನಾ' ಮ್ಹಣೊಂಕ್ ಜಾಯ್ನಾ... ಮಿಲ್ಫ್ರೆಡಾಕ್ ಪರತ್ ಚಾರ್ ದೀಸ್ ರಾವಜಯ್ ಖಂಯ್... ಬಿರ್ಮತ್ ಕೆದಾಳಾ ಆಯ್ಲ್ಯಾರ್‌ಯ್ ಆಮ್ಸೊರಾನ್೦ಚ್ಚ್ ಧಾಂವ್ತಾತ್.... ಹ್ಯಾ ಸರ್ವಾಂ ಮಧೆಂ ಹಿಂ ಖಂಯ್.."
ಹಾಂವ್ ಉಚಾಂಬಳ್ ಜಾಲೊ ನಾ.
ಮೆಲನಿಕ್ ಮ್ಹಜೊ ಸ್ವಭಾವ್ ಅಜ್ಯಾಪ್ ಕರುಂಕ್ ಲಾಗ್ಲೊ ಜಾಯ್ಜಯ್. ಹಾಂವ್ ಆತಾಂ ಲಡಾಯೆಕ್ ರಾವ್ತಾಂ ಮ್ಹಣ್ ತೆಂ ಚಿಂತ್ತಾಲೆಂ ಆಸ್ತೆಲೆಂ.. ಪುಣ್ ತಸೆಂ ಘಡ್ಲೆಂ ನಾ. ತೆಂ ತಾಚಿಂ ಉತ್ರಾಂ ರಾವವ್ನ್ ಮ್ಹಾಕಾಚ್ಚ್ ಪಳಯ್ಲಾಗ್ಲೆಂ.
"ತುಂ ಉಚಾಂಬಳ್ ಜಾಯ್ನಾಕಾ ಸಾಯ್ಬಿಣಿ... ಹಾಂವೆಂ ತಾಕಾ ಕಳಯ್ಲಾಂ.. ತುಜಿ ಭಲಾಯ್ಕಿ ಬರಿ ನಾ... ಆಮಿ ಘರ್ ಬದ್ಲಿತಾಂವ್ ಆನಿ ಯೆತಾತ್ ತರ್ ಯೆಂವ್ಚ್ಯಾ ವರ್ಸಾ ಯೆಯಾ ಆನಿ ಆಯ್ಲ್ಯಾರ್‌ಯ್ ಹೊಟೆಲಾಂತ್ ರಾಂವ್ಚಿ ಬಂದೋಬಸ್ತ್ ಕರಾ ಮ್ಹಣ್... ತುಕಾ ಪಸಂದ್ ನಾತ್‌ಲ್ಲ್ಯಾಂಕ್ ಘರಾಂತ್ ಯೆಂವ್ಚೆಂ ನಾಕಾ.."
ಮೆಲನಿ ಮ್ಹಜ್ಯಾ ಉತ್ರಾಂಕ್ ಪಾತ್ಯೆಲೆಂನಾ. ಪುಣ್ ಮ್ಹಜ್ಯಾ ಹಾತಿಂ ಸ್ಟೀವನಾಕ್ ಧಾಡ್‌ಲ್ಲ್ಯಾ ಈ ಮೇಯ್ಲ್ ಜವಾಬೆಚಿ ಪ್ರತಿ ಆಸ್‌ಲ್ಲಿ. ತಿ ಪ್ರತಿ ತಾಣೆ ವಾಚ್ಲಿ.
ಮೆಲನಿ ಅಮ್ರುಕೊ ಹಾಸೊ ಹಾಸ್ಲೆಂ. ಸಂತೊಸಾನ್ ಬುಡ್ಲೆಂ.
"ಪೊರ್ ಭಾವೊಜಿ ಯೇವ್ನ್ ಗೆಲ್ಯಾ ಉಪ್ರಾಂತ್ ತುಂ ಬದಲ್ಲಾಯ್ ಸಾಯ್ಬಾ..." ತಾಣೆ ಮ್ಹಾಕಾ ವೆಂಗೊನ್ ಧರ್ಲೆಂ ಆನಿ ಥೊಡೆಶೆ ಉಮೆ ದಿಲೆ.
ತಿ ವೇಂಗ್ ಆನಿ ಉಮೆ ಮ್ಹಾಕಾ ಬರೆ ಲಾಗ್ಲೆ... ಹಾಂವ್ ಕಿತ್ಯಾಕ್‌ಗೀ ವಿಚಿತ್ರ್ ಥರಾನ್ ಸಂತೊಸ್ಲೊಂ...
ಮತ್ ಮಾತ್ರ್ ವ್ಹಡ್ಲ್ಯಾನ್ ಉಚಾರ್ತಾಲಿ - 'ತುಂಯ್ ರೊಯ್ಸಾಬರಿ ಹಿಜ್ಡೊ ಜಾಲೊಯ್... ಪುಣ್ ಕಿತೆಂ ಕರ್ಚೆಂ ಕುಟ್ಮಾ ಸುಖ್ ಜಾಯ್ ತರ್ ಅಸೆಂ ಜಾಯ್ಜಾಯ್‌ಚ್ಚ್ ಪಡ್ತಾ ನಂಯ್‌ಗೀ..???'
"ಅಸೆಂ ಕೆಲ್ಯಾರ್ ಮಾತ್ ಕಾಜಾರಿ ಜೀವನ್ ಸುಖಾಚೆಂ ಜಾತಾ..." ಅಸೆಂ ಮ್ಹಣೊನ್, ಮನಿಷಾಕ್ ಟಿ.ವಿ. ಚೆರ್ ಕಾರ್‍ಟೂನ್ ಘಾಲ್ನ್, ಮೆಲನಿ ಮ್ಹಾಕಾ ವೊತ್ತಾಯೆನ್ ಬೆಡ್ ರೂಮಾಕ್ ವೋಡ್ನ್ ವ್ಹರ್ನ್ ಗೆಲೆಂ.....
Tags:
Clerence Kaikamba, Short Story, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/24/2020 ಉದೆಂತಿಚೆಂ ನೆಕೆತ್ರ್...
-
11/28/2020 ಚೂಕಿ ತಿದ್ವಿನಾ ಜಾಲ್ಯಾರ್!...
-
11/4/2020 ಅನಿವಾಸಿ ರಾಯ್...
-
10/23/2020 ಘಾಣ್...
-
-
9/13/2020 ರಾತ್ ಪಾಳಿ...
-
6/18/2018 ವೆಚಿಕ್ ಪುತಾಚೊ ದಾಟ್ಟು...
-
11/12/2017 ನ್ಯೂ ಐನ್‌ಸ್ಟೀನ್...
-
9/7/2017 ಮ್ಹಜ್ಯಾ ಮೊಗಾಚೆಂ ಮೆಲ್ಬಾ...
-
8/29/2017 ಕೊಲ್‍ಗರ್ಲ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.