web analytics

From around the world

ಪ್ರವೀಣ್ ತಾವ್ರೊ, ಕುಲ್ಶೇಕರ್
             
+971 50 7554105
ತುಮ್ಚ್ಯಾ ಗಮನಾಕ್:
Best be viewed in 1366 X 768 screen resolution and in Google Chrome

ಲೊಟ್ರಿ

Tuesday, December 22, 2015  /  By Admin

ಬರಯ್ಣಾರಾ ವಿಶಿಂ ಜಾಣಾ ಜಾ...

80.5
User Rating
ಪೆದ್ರು ಆಯ್ಲಾಗಿ ನಾ ಮ್ಹಳ್ಳೆಂಚ್ ಕಳಿತ್ ನಾತ್‌ಲ್ಲೆಂ. ಕೆದಾಳಾಯ್ ಆಯಿಲ್ಲೊಚ್ ಮ್ಹಾಕಾ ಫೋನ್ ಕರ್ಚ್ಯಾ ಗ್ರಾಯ್ಕಾಚೊ ಪಾತ್ತೊ ನಾತ್‌ಲ್ಲೊ. ಮ್ಹಜೆಂ ಲೇಕ್ ಸಮಾ ತರ್ ತೊ ದೋನ್ ದಿಸಾಂ ಪಯ್ಲೆಂಚ್ ಅಬುಧಾಬಿ ಪಾವೊನ್, ತಾಣೆಂ ಕಾಮ್ ಕರ್ಚ್ಯಾ ’ರಿಗ್ಗಾ’ಕ್ ಪಾವಾಜೆ. ಪಯ್ಲೆಂ ಕೆದಾಳಾಯ್ ವೇಳ್ ಕರ್ನ್ ಆಯಿಲ್ಲೊ ಮನಿಸ್‌ಯೀ ನ್ಹಂಯ್. ದಪ್ತರಾಂತ್ ಬಸೊನ್ ರಾಕ್ಚಾ ಮ್ಹಾಕಾ, ಹರ್ಯೆಕಾ ಫೊನಾಂತ್ ಪೆದ್ರುಚೊ ತಾಳೊಚ್ ಆಯ್ಕಾತಾಲೊ. ಕಿತ್ಯಾಕ್ ಫೋನ್ ಕರುಂಕ್ ನಾ...? ಕಾಂಯ್ ಪಯ್ಶೆ ವಿಚಾರ್ಚಿ ಯೆವ್ಜಣ್ ಪುಣೀ ಆಸಾತ್‌ಗಾಯ್? ಹಾಂವ್ ಚಿಂತಾಲೊಂ... ವಿಚಾರಿತ್ ಜಾಲ್ಯಾರ್ ಸಾಂಗೊನ್ ಸೊಡ್ಚೆಂ, ಹಾಂವೆಂ ನಿರ್ಧಾರ್ ಘೆತ್‌ಲ್ಲೊ.

ಪಯಿಲ್ಲೆಂ ಪಾವ್ಟಿಂ ಹಾಂವೆಂ ಪೆದ್ರುಕ್ ಶೆಂಭರ್ ದಿರಾಮ್ ದಿಲ್ಲೆ ಉಪ್ರಾಂತ್ ಕಾಂಯ್ ಪೆದ್ರು ತೀನ್ ಪಾವ್ಟಿಂ ದುಬಾಯ್ ಯೇವ್ನ್ ಮ್ಹಾಕಾ ಮೆಳ್ಳಾಸ್ತಲೊ. ಏಕ್ ಪಾವ್ಟಿಂ ತರೀ ಪಯ್ಶ್ಯಾಂವಿಶಿಂ ತಾಣೆಂ ವಿಚಾರುಂಕ್ ನಾತ್‌ಲ್ಲೆಂ. ತೆದಾಳಾಚ್ ವಿಚಾರ್‌ಲ್ಲೆಂ ತರ್ ತಿನ್ಶಿಂ ಚಾರ್ಶಿಂ ದಿರಾಮ್ ದೀವ್ನ್ ’ಪುರೊ ಸಾಯ್ಬಾ’ ಮ್ಹಣ್ಯೆತೆಂ. ತಾಣೆಂ ವಿಚಾರುಂಕ್ ನಾತ್‌ಲ್ಲೆ ತರೀ ಹಾಂವೆಂಚ್ ಖಬರ್ ಕಾಡ್ನ್ ಗಜಾಲ್ ಏಕ್ ಪಾವ್ಟಿಕ್ ಸಂಪಯೆತ್ ಆಸ್‌ಲ್ಲಿ. ತವಳ್ ಅಶೆಂ ಕೆಲ್ಲೆಂ ತರ್ ಆಜ್ ಹೆಂ ವೊಜೆಂ, ಅಶೆಂ ಮಾತ್ಯಾರ್ ವಾವವ್ನ್, ಪೆದ್ರುಚ್ಯಾ ಫೊನಾಚಿ ವಾಟ್ ರಾಕ್ಚಿ ಪರಿಗತ್ ಯೆತಿನಾ. ಆತಾಂ ವೇಳ್ ಉತರ್ನ್ ಗೆಲ್ಲೊ. ಸತ್ರಾಶಿಂ ದಿರಾಮ್, ಸುಮಾರ್ ವೀಸ್ ಹಜಾರ್ ರುಪಯ್...ಎಕಾಚ್ ಗಾಂಟಿನ್... ತೇಯ್ ಫುಕಟಾಕ್?

ಅಬುಧಾಬಿ ದರ್ಯಾಂತ್ ’ರಿಗ್ಗಾ’ರ್ ಕಾಮ್ ಕರ್ಚ್ಯಾ ಪೆದ್ರುಕ್, ಮಹಿನ್ಯಾಚೆಂ ಕಾಮ್ ಆನಿ ಮಹಿನ್ಯಾಚಿ ಸುಟಿ, ಹಾತ್‌ಭರ್ ಕಮಾಯ್ ಆನಿ ಗಾಂವಾಂ ಪರ್ಯಾಂತ್ ಟಿಕೆಟ್ ಮೆಳ್ತಾಲಿ ಜಾಲ್ಲ್ಯಾನ್, ಮಹಿನ್ಯಾ ಮಹಿನ್ಯಾಕ್ ಗಂವಾಂಕ್ ವಚೊನ್ ಯೇಂವ್ಕ್ ಕಾಂಯ್ ಅಡ್ಡಿ ನಾತ್‌ಲ್ಲಿ. ಆಮ್ಚಿ ಕಂಪೆನಿ ಹಾಂಗಾ ದುಬಾಯಾಂತ್, ದೋನ್ ವರ್ಸಾಂಕ್ ಏಕ್ ಟಿಕೆಟ್ ದೀಂವ್ಕ್ ಬಿಕ್ಕಾತಾಲಿ. ಪಾಗ್‌ಯಿ ತಸೊಚ್. ಪೆದ್ರುಕ್ ಕಾಂಯ್ ಸಾತಾಟ್ ಹಜಾರ್ ದಿರಾಮ್ ಮೆಳ್ತಾನಾ ಆಮ್ಕಾಂ ಭಿಕೆಚೊ ಸಾಂಬಾಳ್. ಪೆದ್ರುನ್ ತಾಚ್ಯಾ ಪಾಗಾವಿಶಿಂ ಮ್ಹಾಕಾ ಕೆದಾಳಾಯ್ ಸಾಂಗೊಂಕ್ ನಾತ್‌ಲ್ಲೆಂ ತರೀ, ತಾಚೊ ಖರ್ಚ್ ಪಳೆವ್ನ್ ಅಂದಾಜ್ ಕೆಲ್ಲೊ.

ಪೆದ್ರುಕ್ ಪಯ್ಲೆಂ ಥಾವ್ನ್ ಪಯ್ಶ್ಯಾಂವಿಶಿಂ ಇಲ್ಲಿ ಸಡಿಳಾಯ್. ಹಾಂವೆಂ ಸುರ್ವೆರ್ ಥಾವ್ನ್‌ಚ್ ಪಳೆಯಿಲ್ಲೆಂ. ಕೊಲೆಜಿಂತ್ ತಾಚಿ ವಳಕ್ ಜಾವ್ನ್ ಇಷ್ಟಾಗತಿಂತ್ ಬದಲ್ತಾನಾಂಚ್ ಮ್ಹಾಕಾ ಅಂದಾಜ್ ಜಾಲ್ಲೊ. ಪಯ್ಶೆ ಯೆತಾತ್, ವೆತಾತ್ ಮ್ಹಣ್ಚೆಂ ಆಸ್‌ಲ್ಲೆಂ ತಾಣೆಂ. ಆತಾಂ ಹಾತ್‌ಭರ್ ಪಾಗ್ ಮೆಳ್ತಾನಾ, ತೊ ಉದ್ಕಾಬರಿಂಚ್ ಪಯ್ಶೆ ಖರ್ಚಿತಾಲೊ. ಚಡ್ತಾವ್ ತಾಚ್ಯಾ ಸಾಂಗಾತ್ಯಾಂನಿ ತಾಚೊ ಫಾಯ್ದೊ ಉಟಯಿಲ್ಲೊ. ಗಾಂವಾಂತ್ ಸುಮಾರ್ ತೀನ್ ಚಾರ್ ಲಾಖ್ ರುಪಯ್ ತಾಚೆ ಭಾಯ್ರ್ ರಿಣಾ ರುಪಾರ್ ಆಸ್‌ಲ್ಲೆ ತೆ ತಾಣೆಂ ಏಕ್ ದೀಸ್ ಬಿಯರಿಚ್ಯಾ ಅಮಾಲಾರ್ ಮ್ಹಾಕಾ ಸಾಂಗ್‌ಲ್ಲೆಂ. ಹೆ ಪಯ್ಶೆ ತೊ ಜಾವ್ನ್ ತಾಂಚೆಲಾಗಿಂ ವಿಚಾರುಂಕ್ ವಚಾನಾತ್‌ಲ್ಲೊ. ತಾಚೊ ಜಿನೊಸ್‌ಚ್ ತಸಲೊ. ಘೆತ್‌ಲ್ಲೆ ಮನಿಸ್ ಖುದ್ ಪಾಟಿಂ ದಿಂವ್ಚೆವಿಶಿಂ ಮ್ಹಾಕಾ ಭರ್ವಾಸೊ ನಾತ್‌ಲ್ಲೊ. 

ಚಡ್ತಾವ್ ಅಬುಧಾಬಿ ಥಾವ್ನ್‌ಚ್ ಬೊಂಬಯ್ ಆನಿ ಬೊಂಬಯ್ ಥಾವ್ನ್ ಗಾಂವಾಂಕ್ ವೆಚೊ ಪೆದ್ರು, ಅಪ್ರೂಪ್ ಆಪ್ಲ್ಯಾ ಇಷ್ಟಾಂಕ್ ಮೆಳೊಂಕ್ ದುಬಾಯ್ ಯೆತಾಲೊ. ಅಬುಧಾಬಿ ಥಾವ್ನ್ ದುಬಾಯ್ ಮಧೆಂ ಏಕ್ ವೊರಾಚಿ ವಾಟ್. ’ದುಬಾಯ್ ಶೊಪಿಂಗ್ ಫೆಸ್ಟಿವಲಾ’ವೆಳಾರ್ ಯಾ ಕಂಪ್ಯೂಟರಾಂಚೆಂ ಫೆಸ್ತ್ ’ಜಿಟೆಕ್ಸ್’ ವೆಳಾರ್ ಪೆದ್ರು ದುಬಾಯ್ ಯೇವ್ನ್ ಆಮ್ಕಾಂ ಮೆಳೊನ್ ಉಪ್ರಾಂತ್ ಗಾಂವಾಕ್ ವೆತಾಲೊ. ದುಬಾಯ್ ಆಯಿಲ್ಲೆ ತೆದಾಳಾ ತಾಣೆಂ ದುಬಾಂಯ್ತ್ ಮ್ಹಜಾ ಕುಡಾಂತ್‌ಚ್ ರಾಂವ್ಚೆಂ. ಆಂವ್ಸರಾರ್ ಇಲ್ಲೆಂ ಶೊಪಿಂಗ್ ಕರ್ನ್ ರಾತ್ಚ್ಯಾ ಫ್ಲೈಟಾರ್ ತೊ ಬೊಂಬಯ್ ಉಬ್ತಾಲೊ. ಥಂಯ್ ಥಾವ್ನ್ ಮಾಗಿರ್ ಕೊಡ್ಯಾಳಾಕ್. ಚಡ್ತಾವ್ ತಾಚೆಂ ’ಶೊಪಿಂಗ್’ ಹಾಂವ್ ಕರ್ನ್ ದವರ್ತಾಲೊಂ. ಹಾಡ್‌ಲ್ಲ್ಯೊ ವಸ್ತು ಸರ್ವ್ ಬಾಂದುನ್ ತಯಾರ್ ಜಾಲ್ಲೆ ಉಪ್ರಾಂತ್ ಆಮಿ ಬಸೊನ್ ಬಿಯರಿಚಿಂ ಟಿನ್ನಾಂ ಉಸಯ್ತಾಲ್ಯಾಂವ್. ಟಿನ್ನಾ ಸಾಂಗಾತಾ ಆದ್ಲೆ ಉಡಾಸ್ ಉಗಡ್ತಾಲೆ. ಚೆಡ್ವಾಂ... ಈಷ್ಟ್... ಫುಡಾರಾಚಿಂ ಸ್ವಪ್ಣಾಂ...

ಮ್ಹಾಕಾ ಆತಾಂಯ್ ಉಡಾಸ್ ಆಸಾ... ಅಶೆಂಚ್ ಏಕ್ ದೀಸ್ ಪೆದ್ರು ದುಬಾಯ್ ಆಯಿಲ್ಲೆ ತವಳ್ ಪ್ಯಾಕಿಂಗ್ ಕರ್ತಾನಾ ತಾಚ್ಯಾ ಸೂಟ್‌ಕೇಸಿಂತ್ ಭಾಂಗ್ರಾಳ್ಯಾದೆಗೆಚೆಂ ಏಕ್ ಕವರ್ ಹಾಂವೆಂ ಪಳಯಿಲ್ಲೆಂ. ತೆಂ ಕಿತೆಂಗೀ ಮ್ಹಣ್ ವಿಚಾರ್ತಾನಾ, ಪೆದ್ರುಚ್ಯಾ ಆನ್ಯೇಕ್ ಪಿಸಾಯೆಚಿ ಮ್ಹಾಕಾ ಒಳಕ್ ಜಾಲ್ಲಿ ಆನಿ ತಿಚ್ ಘಡಿ... ತ್ಯಾ ಘಡ್ಯೆ ಥಾವ್ನ್ ಹಿ ಕರಂದಾಯ್ ಮ್ಹಜಿ ಜಾಲ್ಲಿ.

ಪೆದ್ರುನ್ ತೆಂ ಕವರ್ ಉಗ್ತೆಂ ಕರ್ನ್, ಭಿತರ್ಲಿ ಭಾಂಗ್ರಾಳ್ಯಾ ರಂಗಾಚಿ ಏಕ್ ಟಿಕೆಟ್ ಮ್ಹಾಕಾ ದಾಕಯಿಲ್ಲಿ. ಅಬುಧಾಬಿ ವಾರ್‍ಯಾ ಥಳಾಚ್ಯಾ ಡ್ಯೂಟಿಫ್ರಿ ವಾಂಟ್ಯಾಂತ್ ಸಬಾರ್ ವರ್ಸಾಂ ಥಾವ್ನ್ ಚಲೊನ್ ಆಸ್‌ಲ್ಲ್ಯಾ ಲೊಟ್ರೆಂತ್ ತೊ ವಾಂಟೊ ಘೆತಾಲೊ. ಪಾಂಯ್ಶಿ ದಿರಾಮ್, ಮ್ಹಳ್ಯಾರ್ ಸುಮಾರ್ ಸ ಹಜಾರ್ ರುಪ್ಯಾಂಚಿ ತಿ ಟಿಕೆಟ್ ಕಾಣ್ಘೆವ್ನ್ ಜಿಕ್‌ಲ್ಲ್ಯಾಂಕ್ ಪಾಂಚ್ ಲಾಖ್ ದಿರಾಮ್, ಮ್ಹಳ್ಯಾರ್ ಸಾಟ್ ಲಾಖ್ ರುಪಯ್ ಇನಾಮ್ ಮೆಳ್ತಾಲೆಂ. ಪೆದ್ರು ಹರ್ಯೆಕ್ ಪಾವ್ಟಿಂ ಅಬುಧಾಬಿ ವಾರ್‍ಯಾಥಳಾ ಥಾವ್ನ್ ಪಯ್ಣ್ ಕರ್ತಾನಾ ತಿ ಟಿಕೆಟ್ ಕಾಣ್ಘೆತಾಲೊ. ವರ್ಸಾಕ್ ಸ ಪಾವ್ಟಿಂ ಆಶಾರ್ ಪಾಶಾರ್ ಜಾತಾನಾ ಮೊಲಾಕ್ ಘೆಂವ್ಚಾ ತ್ಯಾ ಲೊಟ್ರೆಕ್ ತಾಣೆಂ ಘಾಲ್ಲೆಚ್ ಪಯ್ಶೆ ಎಕ್ಟಾಂಯ್ ಕರ್ನ್ ದವರ್‌ಲ್ಲೆ ತರ್ ಇತ್ಲ್ಯಾ ವರ್ಸಾಂನಿ ಲ್ಹಾನ್ ಲೊಟ್ರೆಚೊ ಐವಜ್ ಜಮೊ ಜಾತೊ ಕೊಣ್ಣಾ! 

ಭಾಂಗ್ರಾಳ್ಯಾ ರಂಗಾಚಿ ತಿ ಲೊಟ್ರಿ ಟಿಕೆಟ್ ಹಾತಾಂನಿ ಪೊಶೆವ್ನ್ "ಏಕ್ ಪಾವ್ಟಿಂ ಹಿ ಲೊಟ್ರಿ ಲಾಗೊಂದಿ ಸಿರಿಲ್... ಸಾಟ್ ಲಾಖ್ ರುಪಯ್ ಘೆವ್ನ್, ಹ್ಯಾ ತೆಲಾ ಕಂಪೆನಿಕ್ ಆನಿ ಗಲ್ಫಾಕ್ ನಮಸ್ಕಾರ್ ಕರ್ತಾಂ. ಹ್ಯಾ ದರ್ಯಾ ಮಧೆಂ ಘಸ್ಟೊ ಕಾಡ್ಚೆಂ ಸೊಡ್ನ್ ಗಾಂವಾಂತ್ ರಾಯಾಬರಿಂ ರಾವ್ತಾಂ ಪಳೆ." ಬಿಯರಿಚ್ಯಾ ಅಮಾಲಾರ್ ಜೀಬ್ ಲೊಳ್ತಾಲಿ. ತ್ಯಾ ಆಯಿನ್ನ್ ಖಿಣಾಚ್ಯಾ ಅಮಾಲಾರ್ ಹಾಂವೆಂ ಬೊಲ್ಸಾಂತ್ಲೆ ಶೆಂಬರ್ ದಿರಾಮ್, ಸುಮಾರ್ ಬಾರಾಶಿಂ ರುಪಯ್ ಪೆದ್ರುಚ್ಯಾ ಹಾತಾಂತ್ ಚೆಪುನ್ ಮ್ಹಾಕಾಯ್ ಲೊಟ್ರೆಂತ್ ಭಾಗಿದಾರ್ ಕರುಂಕ್ ಸಾಂಗ್‌ಲ್ಲೆಂ. ತೊ ಜಿಕ್ಲೊ ತರ್ ಮ್ಹಾಕಾಯ್ ಸುಮಾರ್ ಬಾರಾಲಾಕ್ ರುಪಯ್ ಮೆಳ್ತಾತ್ ಆಸ್‌ಲ್ಲೆ!

ಸಗ್ಳೆಂ ಪೋರ್‌ಚ್ ಜಾಲ್ಲೆಬರಿಂ ಮ್ಹಜ್ಯಾ ಮತಿಂತ್ ಪರತ್ ಪರತ್ ಘೊಳ್ತಾಲೆಂ. ತಾಚೆ ಉಪ್ರಾಂತ್ಲೆ ದೀಸ್ ಮ್ಹಜೆ ಬಾರಾ ಲಾಖಾಂಚ್ಯಾ ಸಪ್ಣಾಂನಿ ಪಾಶಾರ್ ಜಾಲ್ಲೆ. ಪೆದ್ರುನ್ ಗಾಂವಾ ಥಾವ್ನ್ ಪಾಟಿಂ ಯೇವ್ನ್ ಮ್ಹಾಕಾ ಫೊನಾರ್, ಹರ್ಶೆಂಚ್ಯಾಬರಿಂಚ್ ಲೊಟ್ರಿ ದುಸ್ರ್ಯಾಂಕ್ ಲಾಗ್‌ಲ್ಲಿ ಗಜಾಲ್ ಕಳಯ್ತಾನಾ ಮ್ಹಜಿಂ ಸ್ವಪ್ಣಾಂ ಚೂರಾನ್ ಚೂರ್ ಜಾಲ್ಲಿಂ. ಹ್ಯಾ ಲೊಟ್ರೆಂತ್ ಥೊಡೊಸೊ ದುಡು ಹೊಗ್ಡಾವ್ನ್ ಘೆತ್‌ಲ್ಲ್ಯಾ ಪೆದ್ರುಕ್ ಹಾಂವೆಂ ಶೆಂಬರ್ ದಿರಾಮಾಂ ಖಾತಿರ್ ಚುರ್ಚುರ್ಚೆಂ ವಿಶೇಷ್ ದಿಸ್‌ಲ್ಲೆಂ. ಬಾರಾಶಿಂ ರುಪಯ್ ಹೊಗ್ಡಾವ್ನ್ ಘೆತ್‌ಲ್ಲ್ಯಾ ಉಸ್ಮಡಾಯೆರ್, ಹಾಂವೆಂ ಫೊನಾರ್‌ಚ್ ಪೆದ್ರುಲಾಗಿಂ ತಾಣೆಂ ಹರ್ಯೆಕ್ ಪಾವ್ಟಿಂ ಅಬುಧಾಬಿ ಏರ್‌ಪೊರ್ಟಾಂತ್ಲಿ ಲೊಟ್ರಿ ಟಿಕೆಟ್ ಕಾಣ್ಘೆತಾನಾ ಮ್ಹಜ್ಯಾ ಲೆಕಾರ್ ಶೆಂಭರ್ ದಿರಾಮ್ ಘಾಲುಂಕ್ ಸಾಂಗ್‌ಲ್ಲೆಂ. ತೊ ತಾಚಾ ಸದಾಂಚ್ಯಾ ಜಿನೊಸಾರ್, ಕಾಂಯ್ ಚಿಂತಿನಾಸ್ತಾನಾಂಚ್ ಒಪ್ವಾಲ್ಲೊ ಆನಿ ಹಿಚ್ ಗಜಾಲ್ ಆಜ್ ವ್ಹಡ್ಲಿ ಖ್ಯಾಸ್ತ್‌ಶಿ ಜಾವ್ನ್ ಮ್ಹಜ್ಯಾ ಮಾತ್ಯಾರ್ ರಡ್ತಾಲಿ.

ತಾಚ್ಯಾ ಉಪ್ರಾಂತ್ ಮ್ಹಜ್ಯಾ ಮತಿಂತ್ ಹರ್ಯೆಕ್ ಪಾವ್ಟಿಂ ಹಾಂವೆಂ ಖಳಾನಾಸ್ತಾನಾ ಘಾಲ್ಚಾ ಲೆಕಾ ಪರ್ಮಾಣೆಂ, ಪೆದ್ರುಕ್ ಹಾಂವೆಂ ಸತ್ರಾಶಿಂ ದಿರಾಮ್ ದೀಜೆ ಆಸ್‌ಲ್ಲೆ. ಸುಮಾರ್ ವೀಸ್ ಹಜಾರ್ ರುಪಯ್! ಪೆದ್ರುಕ್ ಕಾಂಯ್ ಫರಕ್ ಪಡ್ಚೊ ನ್ಹಂಯ್ ತರೀ ಮ್ಹಜ್ಯಾ ಲೆಕಾಕ್ ಕಾಂಯ್ ಉಣೆಂ ನ್ಹಂಯ್. ಹಾಂವೆಂ ಪಯ್ಲೆ ಪಾವ್ಟಿಂ ಪೆದ್ರುಕ್ ಶೆಂಬರ್ ದಿರಾಮ್ ದಿಲ್ಲೆ. ಉಪ್ರಾಂತ್ ಪೆದ್ರು ಕಾಂಯ್ ತೀನ್ ಪಾವ್ಟಿಂ ದುಬಾಯ್ ಯೇವ್ನ್ ಮ್ಹಾಕಾ ಮೆಳ್ಳಾ ಆಸ್ತಲೊ. ಏಕ್ ಪಾವ್ಟಿಂ ತರಿ ಪಯ್ಶ್ಯಾವಿಶಿಂ ತಾಣೆ ವಿಚಾರುಂಕ್ ನಾತ್‌ಲ್ಲೆಂ. ತೆದಾಳಾಚ್ ವಿಚಾರ್‌ಲ್ಲೆಂ ತರ್ ತಿನ್ಶಿಂಗಿ, ಚಾರ್ಶಿಂಗಿ ದಿರಾಮ್ ದೀವ್ನ್ ’ಪುರೊ ಸಾಯ್ಬಾ ಆನಿ ಮ್ಹಜ್ಯಾ ಲೆಖಾರ್ ಪಯ್ಶೆ ಘಾಲ್ನಾಕಾ’ ಮ್ಹಣಾಜೆ ಆಸ್‌ಲ್ಲೆಂ. ತಾಣೆಂ ವಿಚಾರುಂಕ್ ನಾತ್‌ಲ್ಲೆಂ. ತೊ ವಿಚಾರ್ಚೊ ಮನಿಸ್‌ಯೀ ನ್ಹಂಯ್. ಹಾಂವೆಂಚ್ ಖಬರ್ ಉಸ್ತುನ್, ಗಜಾಲ್ ಸಂಪಯೆತ್ ಆಸ್‌ಲ್ಲಿ. ಆತಾಂ ವೇಳ್ ಉತ್ರೊನ್ ಗೆಲ್ಲೊ. ಪೂರಾ ಪಯ್ಶೆ ಎಕಾಚ್ ಗಾಂಟಿನ್ ದಿಂವ್ಚೆ ಮ್ಹಣ್ತಾನಾ... ಹಾಂವ್ ಹಿ ಕಾಲ್ಸ್ ಮ್ಹಜ್ಯಾ ಮಾತ್ಯಾವಯ್ಲಿಂ ನಿವ್ರಾಂವ್ಚಿ ವಾಟ್ ಸೊಧ್ತಾಲೊ.

ಪೆದ್ರು ಪಯ್ಶೆ ವಿಚಾರಿತ್‌ಗಾಯ್? ಲ್ಹಾನ್ ಥಾವ್ನ್ ಒಳ್ಕಾತಾಂ ಹಾಂವ್ ತಾಕಾ. ತೊ ವಿಚಾರ್ಚೊ ಮನಿಸ್ ಖಂಡಿತ್ ನ್ಹಂಯ್. ಕೊಣಾ ಕೊಣಾಕ್ ತಾಣೆ ಪಯ್ಶೆ ದಿಲ್ಲೆ ಆಸಾತ್. ತಾಂಚೆಲಾಗಿಂಚ್ ವಿಚಾರಿನಾತ್‌ಲ್ಲೊ ತೊ ತಾಚೊ ಖಾಸ್ ಈಷ್ಟ್ ಮ್ಹಜಾಲಾಗಿಂ ಕೆದಾಳಾಯ್ ಪಯ್ಶಾಂಚೊ ಪ್ರಸ್ತಾಪ್ ಕಾಡ್ಚೊನಾ ತೆಂ ಖಂಡಿತ್... ಆನಿ ಹೊ ಯೇವ್ನಾ ಕಿತ್ಯಾಕ್... ಕೆದಾಳಾಯ್ ಡ್ಯೂಟೆಕ್ ವೇಳ್ ಕರ್ನ್ ಆಯಿಲ್ಲೊ ನಾ. ಗಾಂವಾಂಕ್ ಗೆಲ್ಲೆ ವೆಳಾರ್ ಈಷ್ಟ್, ಗಮ್ಮತಾಂ ಮ್ಹಣ್ ಸದಾಂ ಫೆಸ್ತ್ ಕರ್ನ್ ಆಸ್ತಾ ಮ್ಹಣ್ ಮ್ಹಾಕಾ ಖಬಾರ್ ಆಸ್‌ಲ್ಲಿ. ಪುಣ್ ಕಾಮಾಕ್ ಕೆದಾಳಾಯ್ ವೆಳಾರ್ ಪಾವ್ತಾಲೊ. ಉರ್‌ಲ್ಲ್ಯಾ ವೆಳಾರ್ ಎಕ್ದಂ ಖುಶಾಲಿ ತರೀ, ಕಾಮಾ ವಿಶಿಂ ಗಂಭೀರ್ ಆಸ್‌ಲ್ಲೊ. ಗಾಂವಾಂತ್ ಕಾಂಯ್ ಉಪಾದ್ರ್ ಜಾಲ್ಯಾತ್‌ಗಾಯ್? ಯಾ ಕಾಮಾಚೆ ಕಾಂಯ್ ರಗ್ಳೆ... ಆನಿ ಕಾಮಾಚೆ ಕಾಂಯ್ ರಗ್ಳೆ ಜಾತಿತ್ ತರ್ ಪಯ್ಶೆ ವಿಚಾರಿತ್‌ಗೀ... ?

ವಿಚಾರಿತ್ ಜಾಲ್ಯಾರ್ ಸಾಂಗೊನ್ ಸೊಡ್ಚೆಂ... ಹಾಂವೆಂ ನಿರ್ಧಾರ್ ಘೆತ್‌ಲ್ಲೊ. ಹಾಂವೆಂಚ್ ಜಾವ್ನ್ ಕೆದಾಳಾಯ್ ಲೊಟ್ರೆಚೊ ಪ್ರಸ್ತಾಪ್ ಕಾಡ್ಚೊ ನ್ಹಂಯ್. ತೊ ಖುದ್ ಕಾಂಯ್ ವಿಚಾರಿತ್ ತರ್... "ಹಾಂವೆಂ ಅಶೆಂಚ್ ತಮಾಶ್ಯಾಂಕ್ ಸಾಂಗ್‌ಲ್ಲೆಂ... ಲೊಟ್ರೆಚೆ ಪಯ್ಶೆ ಪಯ್ಲೆಂಚ್ ನಗ್ದಿ ದಿಲ್ಯಾ ಶಿವಾಯ್ ಲೊಟ್ರೆಂತ್ ಕೊಣಾಯ್ಕಿ ಭಾಗಿದಾರ್ ಕರುಂಕ್ ನಜೊ. ನಾ ತರ್ ಜಿಕ್ಲ್ಯಾ ಉಪ್ರಾಂತ್ ಪಯ್ಶೆ ವಾಂಟುನ್ ಘೆಂವ್ಕ್ ಕಷ್ಟ್ ಜಾತಾತ್. ಜಿಕ್‌ಲ್ಲ್ಯಾ ಉಪ್ರಾಂತ್ ಭಾಗಿದಾರಾ ಲಾಗ್ಚೆ ಶೆಂಭರ್ ದಿರಾಮ್ ಘೆವ್ನ್ ತಾಕಾ ಬಾರಾ ಲಾಖ್ ರುಪಯ್ ದಿಂವ್ಚೆಗಿ ಯಾ ತಾಚೆ ಶೆಂಬರ್ ದಿರಾಮ್ ತಾಕಾಚ್ ಆಸೊಂದಿ ಮ್ಹಣ್ ಸಾಂಗ್ಚೆ ವಿಶ್ಯಾಂತ್ಲಿಂ ವಿಂಚವ್ಣ್ ಭಾರಿ ಕಷ್ಟಾಂಚಿ... ತಶೆಂ ಜಾಲ್ಲ್ಯಾನ್ ಪಯ್ಲೆಂ ಪಾವ್ಟಿಂ ಏಕ್ ಶೆಂಭರ್ ದಿರಾಮ್ ನಗ್ದಿ ದಿಲ್ಲೆ ಸೊಡ್ಲ್ಯಾರ್ ಉಪ್ರಾಂತ್ಲ್ಯಾ ಲೊಟ್ರೆಂನಿ ಮ್ಹಜೊ ವಾಂಟೊ ನಾತ್‌ಲ್ಲೊಚ್ ಮ್ಹಣ್ ಚಿಂತ್" ಮ್ಹಣ್ ಪೆದ್ರುಕ್ ಸಾಂಗ್ಚೆಂ ಮ್ಹಣ್ ಹಾಂವೆಂ ಚಿಂತ್‌ಲ್ಲೆಂ. ಹ್ಯಾ ಲೊಟ್ರೆಚ್ಯೊ ಸಬಾರ್ ಕಾಣಿಯೊ ಅಬುಧಾಬಿ, ದುಬಾಯಾಂತ್ ಅಯ್ಕೊಂಕ್ ಮೆಳ್ತಾಲ್ಯೊ. ಭಾವಾಲಾಗಿಂ ಭಾಗಿದಾರ್ ಜಾವ್ನ್ ಉಪ್ರಾಂತ್ ಆಪ್ಲ್ಯಾ ಭಾವಾಕ್‌ಚ್ ವಾಂಟೊ ದೀನಾತ್‌ಲ್ಲ್ಯಾ ಎಕಾ ಭಯ್ಣಿಚಿ ಕಾಣಿ ಭಾರಿ ಲೊಕಾಮೊಗಾಳ್ ಆಸ್‌ಲ್ಲಿ. ಗರ್ಜ್ ಪಡತ್ ತರ್ ಹ್ಯೊ ಕಾಣಿಯೊ ಪೆದ್ರುಕ್ ಸಾಂಗ್ಚೆ ವಿಷ್ಯಾಂತ್‌ಯೀ ಹಾಂವೆಂ ಘಟ್ ಮನ್ ಕೆಲ್ಲೆಂ.

ಪೆದ್ರು ತಸಲ್ಯಾ ಖುಶಾಲಿ, ಬಿಂದಾಸ್ ಮನ್ಶಾಕ್ ಆನಿ ಮ್ಹಜ್ಯಾ ಭೋವ್ ಲಾಗ್ಶಿಲ್ಯಾ ಇಷ್ಟಾಕ್ ಅಶೆಂ ಫಟಂವ್ಚೆವಿಶಿಂ ಮ್ಹಜೆಂ ಅಂತಸ್ಕರ್ನ್ ಕಾಂತಯ್ತಾಲೆಂ ತರೀ ಅಶೆಂ ಕರಿನಾಸ್ತಾಂ ದುಸ್ರಿ ವಾಟ್ ನಾತ್‌ಲ್ಲಿ ಆನಿ ಪೆದ್ರು ಹ್ಯಾ ವಿಶಿಂ ಚಡ್ ಖಂತ್ ಕರ್ಚೊ ಮನಿಸ್‌ಚ್ ನ್ಹಂಯ್. ಸುಲಭಾಯೆನ್ ಹ್ಯಾ ರಾಜಾಂವಾಕ್ ಒಪ್ಪಾತಲೊ ಮ್ಹಳ್ಳೊ ಖೂಬ್ ಭರ್ವಸೊ ಮ್ಹಾಕಾ ಆಸ್‌ಲ್ಲೊ. ಚಾರ್ ಪಾಂಚ್ ಲಾಖ್ ರುಪಯ್ ರೀಣ್ ದೀವ್ನ್ ವಗೊಚ್ ಆಸ್‌ಲ್ಲ್ಯಾ ಮನ್ಶಾಕ್ ಆನ್ಯೇಕ್ ವೀಸ್ ಹಜಾರ್ ಕಾಂಯ್ ವ್ಹಡ್ ನ್ಹಂಯ್. ನ್ಹಂಯ್ ಆಸ್ತಾಂ, ಹಾಂವೆಂ ಮ್ಹಜ್ಯಾ ಲೆಕಾಚೆ ಪಯ್ಶೆ ಘಾಲ್ ಮ್ಹಣ್ ಸಾಂಗಾನಾತ್ಲ್ಯಾರೀ ತೊ ಖುದ್ ಟಿಕೆಟ್ ಕಾಡ್ತೊಚ್ ಆಸ್‌ಲ್ಲೊ ಶಿವಾಯ್ ತಿ ಸವಯ್ ಮೊಡ್ಚೆಬರಿ ನಾತ್‌ಲ್ಲೊ.

ಹಾಂವೆಂ ಮ್ಹಾಕಾಚ್ ಸಮ್ಜಾವ್ನ್ ತಯಾರ್ ಕೆಲ್ಲೊ. ಕಾಳಿಜ್ ಆಯ್ಕಾನಾತ್‌ಲ್ಲೆಂ ತರಿ ಮತ್ ಆಯ್ತಿ ಜಾಲ್ಲಿ. ಪುಣ್ ಹೊ ಯೆವ್ನಾ ಕಿತ್ಯಾಕ್‌ಗಾಯ್? ಮ್ಹಜಿ ಮತ್ ದಫ್ತರಾಂತ್ ಕರ್ಚ್ಯಾ ಕಾಮಾರ್ ನಾತ್‌ಲ್ಲಿ. ಗಾಂವಾಥಾವ್ನ್ ಆಯಿಲ್ಲೊಚ್ ಫೋನ್ ಕರ್ನ್ ಗಾಂವ್ಚಿ ಖಬರ್ ಸಾಂಗ್ತಾಲೊ. ಕಾಂಯ್ ಪಾರ್ಸೆಲಾಂ ಹಾಡ್ಲ್ಯಾಂತ್ ತರ್, ಹಪ್ತ್ಯಾ ಹಪ್ತ್ಯಾಕ್ ದುಬಾಯ್ ಯೆಂವ್ಚ್ಯಾ ಲ್ಯಾನ್ಸಿಕಡೆ ದಿಲ್ಯಾಂತ್ ಮ್ಹಣ್ ಕಳಯ್ತಾಲೊ, ಮ್ಹಜಿ ಖಬರ್ ವಿಚಾರ್ತಾಲೊ... ಗೆಲಾ ಖಂಯ್‌ಗಾಯ್?

ತ್ಯಾಚ್ ವೆಳಾರ್ ಫೋನ್ ವಾಜ್ಲೆಂ. ಆನ್ಯೆಕಾ ಪೊಂತಾ ಥಾವ್ನ್ ಪೆದ್ರು ಉಲಯ್ತಾಲೊ. ಬಾರಿಚ್ ಉತ್ಸುಕ್ ಲಾಗ್ತಾಲೊ. ಹಾಂವೆಂ ಫೋನ್ ಕರುಂಕ್ ಕಿತೆಂ ವೇಳ್ ಜಾಲೊಗಿ ವಿಚಾರ್ಲೆಂ.
"ದೋನ್ ದೀಸ್ ವೇಳ್ ಕರ್ನ್ ಆಯ್ಲೊಂ... ಇಲ್ಲೆಂ ಕಾಮ್ ಆಸ್‌ಲ್ಲೆಂ." ಮ್ಹಣಾಲೊ. "ತಸಲೆಂ ಕಿತೆಂ ಕಾಮ್ ತುಕಾ? ಡ್ಯೂಟೆಕ್ ವೇಳ್ ಕರ್ನ್ ಯೆಂವ್ಚ್ಯಾ ತಸಲೆಂ?"
"ಡ್ಯುಟೆಕ್ ಘಾಲ್ ಗುಳೊ. ಕಾಮ್ ಕೆದಾಳಾಯ್ ಆಸ್‌ಲ್ಲೆಂಚ್... ಆನಿ ಹಾಂವ್ ಯೆದೊಳ್ ಪರ್ಯಾಂತ್ ಏಕ್ ಪಾವ್ಟಿಂಯ್ ವೇಳ್ ಕರ್ನ್ ಆಯಿಲ್ಲೊಂ ನಾ."
"ಆಸೊಂ ಕಿತೆಂ ಖಬರ್? ಗಾಂವಾಂತ್ ಕಶೆಂ ಜಾಲೆಂ?" ಹಾಂವ್ ಗಾಂವ್ಚಿ ಖಬಾರ್ ಆಯ್ಕೊಂಕ್ ಅತ್ರೆಗ್ಲೊ. 
"ಗಾಂವಾಂತ್ ಕಿತೆಂ? ಆಸ್‌ಲ್ಲೆಂಚ್ ಪೂರಾ... ತುಕಾ ಗೊತ್ತುನಾಂಗಿ? ಈಷ್ಟ್...ಭೊಂವ್ಡಿ...ಗಮ್ಮತಾಂ..." 
"ಆನಿಕೀ ಸುಧ್ರೊಂಕ್‌ನಾಂಯ್ ತುಂ... ಘರಾ ಕಶಿಂ ಆಸಾತ್?"
"ಸಕ್ಕಡ್ ಬರಿಂ ಆಸಾತ್... ತುಕಾ ವಿಚಾರ್ತೆಲಿಂ... ಕೆನ್ನಾ ಗಾಂವಾಂಕ್ ಯೆತಾಯ್ಗೀ ಮ್ಹಣ್... ತುಜ್ಯಾ ಮಮ್ಮಿನ್ ತುಕಾ ಸಯ್ರಿಕ್ ಸೊಧುನ್ ದವರ್ಲ್ಯಾ ಖಂಯ್."
"ಪಯ್ಲೆಂ ತುಜೆಂ ಕಾಜಾರ್ ಜಾಂವ್ದಿ... ಉಪ್ರಾಂತ್ ಮ್ಹಜಿ ಗಜಾಲ್."
"ಮ್ಹಜ್ಯಾ ಕಾಜಾರಾಕ್ ಕಿತೆಂ? ಹಾಂವ್ ಕೆದಾಳಾಯ್ ರೆಡಿ" ಪೆದ್ರು ಎಕ್ದಂ ಖುಶ್ ಲಾಗ್ತಾಲೊ. ಕಿತೆಂ ವಿಶೇಷ್ ಜಾವ್ಯೆತ್... ಹಾಂವ್ ಚಿಂತಾಲೊಂ... ನಾ ತರಿ ತೊ ಕೆದಾಳಾಯ್ ಖುಶಾಲಿಚ್...
"ಹೆಂ ಸಿರಿಲ್... ತುಜೆಲಾಗಿಂ ಏಕ್ ಗಜಾಲ್ ವಿಚಾರಿಜೆ ಆಸ್‌ಲ್ಲಿ." ಪೆದ್ರುನ್ ಸಾಂಗ್ತಾನಾ ಮ್ಹಜ್ಯಾ ಕಾಳ್ಜಾಚಿ ಉಡಿ ರೇಗ್ರ್ ಚುಕ್‌ಲ್ಲಿ ಮ್ಹಜ್ಯಾ ಗಮನಾಕ್ ಆಯ್ಲಿ. ರಿಸೀವರಾಚೆರ್ ಹಾತ್ ಅಂರ್ದಾಲೊ.
"ಸಾಂಗ್ ಪೆದ್ರು..." ಹಾಂವೆಂ ಮ್ಹಳೆಂ, ಡ್ಯೂಟಿ ಫ್ರಿ ಲೊಟ್ರೆಚಿ ಖಬರ್ ಜಾಲ್ಯಾರ್ ತಾಕಾ ಆತಾಂ ಸಾಂಗೊನ್ ಸೊಡ್ಚೆಂ... ಹಾಂವೆಂ ಮನ್ ಘಟ್ ಕೆಲೆಂ.
"ತೆಂಚ್ ಸಿರಿಲ್ ವಿಶೇಷ್ ಕಾಂಯ್ ನಾ... ಡ್ಯೂಟಿ ಫ್ರಿ ರ್‍ಯಾಫಲಾಚಿ ಖಬಾರ್... ತುಜೆ..." 
ಹಾಂವೆಂ ಪೆದ್ರುಚ್ಯಾ ಉತ್ರಾಂಕ್ ಮದೆಂಚ್ ಕಾತರ್ಲೆಂ... "ಹಾಂವೆಂ ತೆಂ ಅಶೆಂಚ್ ತಮಾಶ್ಯಾಂಕ್ ತುಜೆಲಾಗಿಂ ಸಾಂಗ್‌ಲ್ಲೆಂ. ತುಕಾ ಹಾಂವೆಂ ಪಯಿಲ್ಲೆಂ ಏಕ್ ಪಾವ್ಟಿಂ ಶೆಂಭರ್ ದಿರಾಮ್ ದಿಲ್ಲೆ ಪಳೆ... ತೆ ಮಾತ್... ಉಪ್ರಾಂತ್ಲ್ಯಾ ಖಂಯ್ಚ್ಯಾಯ್ ಟಿಕೆಟಿಂತ್ ಮ್ಹಜೊ ವಾಂಟೊ ನಾ ಆನಿ ತೆಂ ನ್ಹಂಯ್ ಆಸ್ತಾಂ, ಪಯ್ಶೆ ನಗ್ದಿ ದಿಲ್ಯಾ ಶಿವಾಯ್ ಲೊಟ್ರೆಂತ್ ಕೊಣಾಯ್ಕಿ ಬಿಲ್ಕುಲ್ ಭಾಗಿದಾರ್ ಕರುಂಕ್ ನಜೊ... ಆನಿ ಕರ್ಚೆಂಯ್ ಸಮಾ ನ್ಹಂಯ್. ಕಿತ್ಲ್ಯಾಯ್ ಮೊಗಾಚೊ ಈಷ್ಟ್ ಜಾಲ್ಯಾರೀ ನ್ಹಂಯ್. ಹಾಂವೆಂ ಸಾಂಗ್ಚೆಂ ಸಾರ್ಕೆಂಮೂ?" ಮ್ಹಜಿಂ ಉತ್ರಾಂ ಅಪಾಪಿಂಚ್ ಭಾಯ್ರ್ ಪಡ್ತಾಲಿಂ. "ತುಂ ಜಿಕ್ಲ್ಯಾರೀ ಹಾಂವ್ ಕಾಂಯ್ ವಾಂಟ್ಯಾಕ್ ಯೆತೊನಾ ಪಳೆ" ಹಾಂವೆಂ ಗರ್ಜೆಭಾಯ್ರ್ ಕುಡ್ಸಿಲೆಂ.
ಇಲ್ಲೊ ವೇಳ್ ಪೆದ್ರು ಉಲಯ್ಲೊನಾ... ಮ್ಹಜಿಂ ಉತ್ರಾಂ ತಾಚೆರ್ ಕಸಲೊ ಪರಿಣಾಮ್ ಹಾಡ್ತಿತ್ ಮ್ಹಾಕಾ ಕಳಾನಾತ್‌ಲ್ಲೆಂ. ಪೆದ್ರು ವೀಸ್ ಹಜಾರಾಂಕ್ ಭಿಂಯೆಂವ್ಚೊ ಮನಿಸ್ ನ್ಹಂಯ್...
"ತೆಂಚ್ ಸಿರಿಲ್..." ಇಲ್ಲ್ಯಾ ಘಳಾಯೆನ್ ಪೆದ್ರು ಪರತ್ ಉಲಯ್ಲೊ. "ತಿಚ್ ಗಜಾಲ್ ಮ್ಹಾಕಾ ನಖ್ಖಿ ಕರುಂಕ್ ಜಾಯ್ ಆಸ್‌ಲ್ಲಿ." ರಿಸೀವರಾಂತ್ ಪೆದ್ರುಚಿಂ ಉತ್ರಾಂ ಆಯ್ಕಾತಾನಾ, ತಾಕಾ ಬೆಜಾರಾಯ್ ಜಾಂವ್ಕ್ ನಾ ತೆಂ ಮ್ಹಾಕಾ ಕಳ್ತಾಲೆಂ. "ಲೊಟ್ರೆಂತ್ ತುಜೊ ವಾಂಟೊ ಆಸಾ ಯಾ ನಾ ಮ್ಹಳ್ಳೆಂ ಮ್ಹಾಕಾ ಕನ್ಫರ್ಮ್ ಕರಿಜೆ ಆಸ್‌ಲ್ಲೆಂ... ತಿತ್ಲೆಂಚ್... ಪೋರ್ ಮ್ಹಾಕಾ ಅಬುಧಾಬಿ ಏರ್‌ಪೋರ್ಟಾ ಥಾವ್ನ್ ಫೋನ್ ಆಯಿಲ್ಲ್ಯಾನ್‌ಚ್ ಹಾಂವೆಂ ಯೇಂವ್ಕ್ ದೋನ್ ದೀಸ್ ವೇಳ್ ಕೆಲೊ... ತುಂ ಪಾತ್ಯೆಂವ್ಚೊನಾಂಯ್ ಸಿರಿಲ್... ಹ್ಯಾ ಪಾವ್ಟಿಂಚಿ ಅಬುಧಾಬಿ ಡ್ಯೂಟಿ ಫ್ರಿ ಲೊಟ್ರಿ ಮ್ಹಾಕಾ ಉಟ್ಲ್ಯಾ!" ಪೆದ್ರು ಸಾಂಗೊನ್‌ಚ್ ಆಸ್‌ಲ್ಲೊ...

Tags:  Kishoo, Konkani Story, Barkur, Konkani, Mangalore, Mangalorean, Mother Tongue

1 Comment/s.

  1. Jokim, Kirem
    ಕಿಶೂ.. ಕಾಣಿ ಭಾರಿ ಬೊರಿ ಆಸಾ... ಸುಮಾರ್ ಜಣಾಂಕ್ ಲೊಟ್ರಿ ಕಾಡ್ಚಿ ಪಿಸಾಯ್ ಆಸಾ....

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :


Connect

Maibhaas

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE