From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ತರ್ಜಣ್ ವಾವ್ರಾ೦ತ್ ಪರ್ಜಳ್‍ಲ್ಲೊ ಉಸ್ತಾದ್ ಮು೦ಬಯಿಚೊ ವೊಲ್ಟರ್ ಲಸ್ರಾದ್
Saturday, October 15, 2016
ಮು೦ಬಯಿ೦ತ್ ವಸ್ತಿ ಕರುನ್ ಆಸ್ಚಾ ಮಾಲ್ಗಡ್ಯಾ ಆನಿ ಫಾಮಾದ್ ಮ೦ಗ್ಳುರ್ ಗಾರ್ ಲೇಖಕಾ೦ ಪಯ್ಕಿ ವೊಲ್ಟರ್ ಲಸ್ರಾದೊಯಿ ಎಕ್ಲೊ. ಪುಣ್ ತಾಚೊ ವಾವ್ರ್ ಪಡ್ದ್ಯಾ ಪಾಟ್ಲ್ಯಾ ಸ೦ವಾದ್ ಸೂಚಕಾಬರಿ೦ ಗುಪಿತ್. ಕೆನ್ನಾ೦ಯಿ ನಾ೦ವಾಕ್ ಜಾ೦ವ್, ಮಾನ್ - ಸನ್ಮಾನಾಕ್ ಜಾ೦ವ್ ತೊ ಆಶೆಲ್ಲೊ ನಾ. ತೊಯಿ ಜಾಲೊ, ತಾಚೊ ಸಾಹಿತಿಕ್ ವಾವ್ರ್ ಯಿ ಜಾಲೊ. ಭೋವ್ ಸಾದೊ-ಸುದೊ ಆನಿ ಸರಳ್ ವೆಕ್ತಿತ್ವಾಚೊ ಬರವ್ಪಿ ಆನಿ ತರ್ಜಣ್ ದಾರ್ ತೊ. ಅನುವಾದ್, ರೂಪಾ೦ತರ್, ಭಾಶಾ೦ತ್ರ್ ವಾ ತರ್ಜಣೆಚೊ ವಾವ್ರ್ ಚಿ೦ತ್‍ಲ್ಲೆ ತಿತ್ಲೊ ಸುಲಬ್ ನ್ಹಯ್. ಮೂಳ್ ಬರ್ಪಾಕ್ ವಾ ಬರವ್ಪ್ಯಾಚಾ ಚಿ೦ತ್ನಾ೦ಕ್ ಅನ್ನ್ಯಾಯ್ ಜಾಯ್ನಾಶೆ೦ ತರ್ಜಣ್ ಕರ್ಚಿ ಕಲಾ ವಾ ತಾ೦ಕ್ ಸಕ್ಡಾ೦ಕ್ ಆಸಾನಾ.
ಕನ್ನಡ ಲಿಪಿ೦ತ್ಲ್ಯಾ ಕೊ೦ಕ್ಣಿ೦ತ್ ಬರೆ ತರ್ಜಣ್ ದಾರ್ ಭೋವ್ ಉಣೆ. ಯಾಜಕಾ೦ ಮದೆ೦ ಆಸ್ಚೆ ಫಾಮಾದ್ ತರ್ಜಣ್‍ದಾರ್ ಮ್ಹಳ್ಯಾರ್ ಮೊ| ರಾಯ್ಮ೦ದ್ ಮಸ್ಕರೆ೦ಜ್, ಮೊ| ಸಿಲ್ವೆಸ್ತರ್ ಮಿನೆಜ್, ಬಾಪ್ ವಿತೊರ್ ಪೀ೦ತ್, ದೊ| ವಿಲ್ಯಮ್ ದಸಿಲ್ವಾ, ಬಾಪ್ ಮಾರ್ಕ್ ವಾಲ್ಡರ್, ಬಾಪ್ ವಿಶೆ೦ತ್ ವಿತೊರ್ ಮಿನೆಜ್, ಬಾಪ್ ವಿಲ್ಯಮ್ ಬಾರ್ಬೋಜಾ, ಬಾಪ್ ಫ್ರಾನ್ಸಿಸ್ ರೊಡ್ರಿಗಸ್ ಆನಿ ಹೆರ್. ಲಾಯಿಕಾ೦ ಮದ್ಲೆ ಥೊಡೆ ತರ್ಜಣ್ ದಾರ್ ಮ್ಹಳ್ಯಾರ್ ಪೆದ್ರು ಜುವಾ೦ವ್ ಸೊಜ್, ವಿ.ಜೆ.ಪಿ.ಸಲ್ದಾ೦ಜ್(ಖಡಾಪ್), ಎವ್ಲಾಲಿಯಾ ಆಲ್ವರಿಸ್, ಜೆ.ಬಿ.ಮೊರಾಯಸ್, ಪ್ರೊ.ಆಲ್ಬನ್ ಕಾಸ್ತೆಲಿನ್, ಲಿಯೊ ಡಿ'ಸೊಜ್(ಲಿಯಾಬ್), ಎ.ಎಕ್ಸ್.ಪತ್ರಾ೦ವ್, ಚಾ.ಫ್ರಾ. ದೆಕೊಸ್ತಾ, ಎಡ್ವಿನ್ ಜೆ.ಎಫ್.ಡಿ'ಸೋಜಾ, ಜೆ.ಸಿ.ವೇಗಸ್ (ಸಿರಿವ೦ತ್,) ವೊಲ್ಟರ್ ಲಸ್ರಾದೊ. ಶಾಲಿನಿ ವಾಲೆನ್ಸಿಯಾ, ಸಿಜ್ಯೆಸ್, ಸುನ೦ದ್, ಮೆಲ್ವಿನ್ ರೊಡ್ರಿಗಸ್, ಜೆ.ಎಫ್.ಡಿ'ಸೋಜಾ, ಲಿಲ್ಲಿ ಮಿರಾ೦ದ ಆನಿ ಹೆರ್. ಪುಣ್ ಆಯ್ಲೆವಾರ್ ಹಾಸನ್ ಚೊ ಜೆ.ವಿ.ಕಾರ್ಲೊ ಆಪುರ್ಬಾಯೆಚಾ ಭಾಶಾ೦ತ್ರ್ ವಾವ್ರಾಕ್ ಬರೊಚ್ ನಾ೦ವಾಡ್ಲಾ.
ಮು೦ಬಯಿಚೊ ವೊಲ್ಟರ್ ಲಸ್ರಾದೊನ್ ಇ೦ಗ್ಲಿಶ್ ಭಾಶೆ ಥಾವ್ನ್ ಸಬಾರ್ ಕಾದ೦ಬರಿ ಕೊ೦ಕಣಿಕ್ ತರ್ಜಣ್ ಕೆಲ್ಯಾತ್. ಪುಣ್ ಸುರ್ವೆರ್ ತಾಣೆ ಬರಯಿಲ್ಲಿ ಪಯ್ಲಿ ಮಟ್ವಿ ಕಾಣಿ ''ಬೆನ್ನ'' 1964-೦ತ್ 'ಪಯ್ಣಾರಿ' ಸಾತೊಳ್ಯಾರ್ ಪರ್ಗಟ್ ಜಾಲಿ. ಉಪ್ರಾ೦ತ್ ತಾಚಿ೦ ಸಬಾರ್ ಶಿ೦ ಸಮಾಜಿಕ್ ಆನಿ ರಾಜಕೀಯ್ ಲೇಕನಾ೦ ಪರ್ಗಟ್ ಜಾಲಿ೦. ಗಿರಾಯ್ಕಾ೦ಚಾ ಕಾನೂನ್ ರಕ್ಶಣ್ ವಿಶಿ೦ ತಾಚಿ೦ ಬರ್ಪಾ೦ ಕೊ೦ಕಣಿ ಆನಿ ಕನ್ನಡ ಪತ್ರಾ೦ನಿ ಪರ್ಗಟ್ ಜಾಲ್ಯಾ೦ತ್. 'ದಿವೊ' ಸಾತೊಳ್ಯಾಚೊ ಸಹ ಸ೦ಪಾದಕ್ ಜಾವ್ನ್ ಸಬಾರ್ ವರ್ಸಾ೦ ತೊ ವಾವುರ್ಲಾ. ತವಳ್ ತೊ ಸ೦ಪಾದಕೀಯ್ ಲೇಕನಾ೦ ಬರಯ್ತಾಲೊ. ಪಯ್ಣಾರಿ ಶಿವಾಯ್ ರಾಕ್ಣೊ, ಮಿತ್ರ್, ಝೆಲೊ, ಉದೆವ್, ಮಾಯ್ಗಾ೦ವ್, ಕಾಣಿಕ್, ಉಮಾಳೊ, ದಿವೊ, ಕುಟಾಮ್ ಆನಿ ಹೆರ್ ಪತ್ರಾ೦ನಿ ವೊಲ್ಟರ್ ಲಸ್ರಾದೊಚಿ೦ ಬರ್ಪಾ೦ ಪರ್ಗಟ್ ಜಾಲ್ಯಾ೦ತ್. ತಾಚಾ ಪಾ೦ಚ್ ಲಿಕ್ಣೆ ನಾ೦ವಾ೦ ಪಯ್ಕಿ ವೀರ್ ಸೇನ್ ನಕ್ರೆ ಆನಿ ಶ್ರೀಮತಿ ಶುಶಾ ಭಾರಿಚ್ ಪರಿಚಿತ್.
ಲಗ್ ಬಗ್ ಚಾಳೀಸ್ ವರ್ಸಾ೦ ಆದಿ೦ ವೊಲ್ಟರ್ ಲಸ್ರಾದೊನ್ ಅನುವಾದಾಚಾ ವಾವ್ರಾಕ್ ಹಾತ್ ಘಾಲ್ಲೊ. ವಿ೦ಚ್ಣಾರ್ ಆನಿ ಬೋವ್ ಆಪುರ್ಬಾಯೆಚ್ಯೊ ಮಟ್ವ್ಯೊ ಕಾಣಿಯೊ ಆನಿ ಕಾದ೦ಬರಿ ಹೆರ್ ಭಾಶೆ೦ನಿ ಧಾರಾಳ್ ಆಸಾತ್. ಪುಣ್ ತ್ಯೊ ಕಾಣಿಯೊ ಆನಿ ಕಾದ೦ಬರಿ ವಾಚುನ್ ಸ೦ತೊಸ್ ಭೊಗ್ಚೆ೦ ಭಾಗ್ ಆಮ್ಚಾ ಸಾದ್ಯಾ ವಾಚ್ಪ್ಯಾ೦ಕ್ ನಾ. ಹೆರ್ ಭಾಶೆ೦ತ್ಲೆ೦ ಉ೦ಚ್ಲೆ೦ ಆನಿ ವಿ೦ಚ್ಣಾರ್ ಸಾಹಿತ್ಯ್ ಕೊ೦ಕ್ಣಿ೦ತ್ ಅನುವಾದ್ ಕರ್ಚಿ ಇಚ್ಛಾ ಸಬಾರಾ೦ಕ್ ಆಸಾ ತರಿ ವೇಳ್ ಮೆಳಾನಾ. ಶಿವಾಯ್ ಅನುವಾದ್ ಕರ್ಚಾ ವಾವ್ರಾ೦ತ್ ಕಾ೦ಯ್ ಥೊಡ್ಯಾ೦ಕ್ ಉಣೆ೦ಪಣ್ ಭೊಗ್ಚೆ೦ಯಿ ಆಸ್ತಾ ಮ್ಹಣ್ತಾ ವೊಲ್ಟರ್.
ಹೆರ್ ಭಾಶೆ೦ತ್ಲೆ೦ ಸಾಹಿತ್ಯ್ ಅನುವಾದ್ ವಾ ತರ್ಜಣ್ ಕರ್ಚೆ ವೆಕ್ತಿ ಲೇಕಕ್ ನ್ಹಯ್ ಬಗಾರ್ ನಕ್ಕಲ್ ಕಾಡ್ಪಿ ಮ್ಹಳ್ಳಿ ಚೂಕ್ ಸಮ್ಜಣಿ ಥೊಡ್ಯಾ೦ ಮದೆ೦ ಆಸಾ ಖ೦ಯ್. ತಶೆ೦ ಜಾಲ್ಲ್ಯಾನ್ ಕೊ೦ಕ್ಣಿ ಪತ್ರಾ೦ಚಾ ದಫ್ತರಾ೦ನಿ ರಾಸ್ ರಾಸ್ ''ಸ್ವ೦ತ್ ಆನಿ ಕಾಲ್ಪನಿಕ್'' ಕಾಣಿಯೊ ಯೇವ್ನ್ ಪಡ್ತಾತ್ ಆನಿ ತ್ಯೊ ಶೀದಾ ಕಚ್ರ್ಯಾಚಾ ಡಬ್ಬ್ಯಾಕ್ ವೆತಾತ್. ಕಾರಣ್ ತ್ಯಾ ಕಾಣಿಯಾ೦ನಿ ಜಿಣಿಯೆಚೊ ಅನ್ಭೋಗ್ ಜಾ೦ವ್, ಕಾಣಿ ಗು೦ತುನ್ ಹಾಡ್ಚಿ ಕಲಾ ಜಾ೦ವ್, ಕುರ್ಕುರಿತ್ ಶಯ್ಲಿ. ಭಾಶೆಚಿ ಸೊಬಾಯ್ ವಾ ಜಾಣ್ವಾಯ್ ಕುಸ್ಕುಟಾಚಿ ಆಸಾನಾ.
ಥೊಡ್ಯಾ೦ಕ್ ಮಟ್ವ್ಯೊ ಕಾಣಿಯೊ ಬರವ್ನ್ ಯಶಸ್ವಿ ಜೊಡ್ಚಾ ಆದಿ೦ಚ್ ಕಾದ೦ಬರಿ ಬರ೦ವ್ಚಿ ಪಿಸಾಯ್ ತಕ್ಲೆರ್ ಸವಾರ್ ಕರ್ತಾ ಮ್ಹಳ್ಳಿ ಅಬಿಪ್ರಾಯ್ ವೊಲ್ಟರಾಚಿ. ಜೊ.ಸಾ. ಆಲ್ವಾರಿಸ್, ವಿ,ಜೆ,ಪಿ.ಸಲ್ದಾ೦ಜ್(ಖಡಾಪ್), ಎ.ಟಿ.ಲೋಬೊ, ಚಾ.ಫ್ರಾ. ದೆಕೊಸ್ತಾ, ಎಡ್ವಿನ್ ಜೆ.ಎಫ್.ಡಿ'ಸೋಜಾ ತಸಲ್ಯಾ ಲೇಖಕಾ೦ಚ್ಯೊ ಕಾದ೦ಬರಿ ವಾಚುನ್ ಅನ್ಭೊಗ್ ಜೊಡುನ್ ಘೆ೦ವ್ಕ್ ಪುರ್ಸತ್ ನಾತ್ಲಲೆ ತರ್ನೆ ಬರವ್ಪಿ ಕಾದ೦ಬರಿ ಬರ೦ವ್ಚಾ ಸಾಹಸಾಕ್ ದೆ೦ವ್ತಾತ್ ಆನಿ ಸಲ್ವತಾತ್.
''ಆಮ್ಚಾ ಕೊ೦ಕಣಿ ಲೊಕಾಕ್ ಇ೦ಗ್ಲಿಶ್ ಭಾಶೆ೦ತ್ಲೆ೦ ಬರೆ೦ ಸಾಹಿತ್ಯ್ ವಾಚುನ್ ಮನೊರ೦ಜನ್ ಜೊಡ್ಚೊ ಅವ್ಕಾಸ್ ಕರ್ನ್ ದಿ೦ವ್ಚೊ ಮ್ಹಜೊ ಉದ್ದೇಶ್ ಜಾವ್ನ್ ಆಸ್ಲಲೊ. ಆಮ್ಚಾ ತರ್ನ್ಯಾ 'ಸ್ವ೦ತ್ ಆನಿ ಕಾಲ್ಪನಿಕ್' ಕಾಣಿಯಾ೦ಚಾ ಬರವ್ಪ್ಯಾ೦ಕ್ ಬರೆ೦ ಸಾಹಿತ್ಯ್ ರಚು೦ಕ್ ಪ್ರೇರಣ್ ಲಾಬೊ೦ದಿ ಮ್ಹಳ್ಳಿ ಮ್ಹಜಿ ಆಶಾ. ಹಾ೦ವೆ೦ ಥೊಡ್ಯೊ ಇ೦ಗ್ಲಿಶ್ ಕಾದ೦ಬರಿ ಕೊ೦ಕ್ಣೆಕ್ ತರ್ಜಣ್ ಕೆಲ್ಲ್ಯಾ ವೆಳಾರ್ ಮ್ಹಾಕಾ 'ಚೋರ್ ಬರವ್ಪಿ' ಮ್ಹಣ್ ಥೊಡೆ ಜವಾಬ್ದಾರೆಚೆ ಪುಣ್ ಉಣ್ಯಾ ಸಮ್ಜಣೆಚೆ ಮನಿಸ್ ಪಾಟ್ಲ್ಯಾನ್ ತುಕ್ಲಾಯ್ತಾಲೆ ತರಿ ಆಪ್ಣಾಕ್ ಕಸಲಿಚ್ ಲಜ್ ವಾ ಲ್ಹಾನ್ ಪಣ್ ಭೊಗಾನಾತ್‍ಲ್ಲೆ೦'' ಮ್ಹಣ್ತಾ ವೊಲ್ಟರ್ ಲಸ್ರಾದೊ.
ಲಗ್ಬಗ್ ಚ್ಯಾರ್ ಧಾಕ್ಡ್ಯಾ೦ ಆದಿ೦ ವೊಲ್ಟರ್ ಲಸ್ರಾದೊ ಆನಿ ಸಾ೦ಗಾತ್ಯಾ೦ನಿ ಮು೦ಬಯಿ೦ತ್ ಕಾಡು೦ಕ್ ಚಿ೦ತ್ಲಲ್ಯಾ 'ಯಾತ್ರಿಕ್' ಸಾತೊಳ್ಯಾ ಪತ್ರಾವಿಶಿ೦ ಹಾ೦ವೆ೦ ಪ್ರಸ್ತಾಪ್ ಕಾಡ್ಲಲ್ಯಾಕ್ ತೊ ಅಶೆ೦ ಮ್ಹಣಾಲೊ - ''ಯಾತ್ರಿಕ್ ಪತ್ರಾವಿಶಿ೦ ಸತ್ ಗಜಾಲ್ ಸಾ೦ಗ್ಚಿ ತರ್ ತೆ೦ ವಾಟ್ ಚುಕ್‍ಲ್ಲ್ಯಾ೦ಚೆ೦ ಏಕ್ ಪಿಶೆ೦ ಸಾಹಸ್ ಮ್ಹಣಾಜಾಯ್. 1972-೦ತ್ ದೆವಾದಿನ್ ಸನ್ನಿ ಎ.ಡಿ'ಸೋಜಾ, ತಾಚೊ ಭಾವ್ ಫೆಲಿಕ್ಸ್ ಎ.ಡಿ'ಸೋಜಾ ಆನಿ ಹಾ೦ವೆ೦ ಥೊಡ್ಯಾ ಕಾರಣಾ೦ಕ್ ಲಾಗುನ್ 'ಪಯ್ಣಾರಿ' ಪತ್ರಾಚಾ ಸ೦ಪಾದಕೀಯ್ ಮ೦ಡಳೆಕ್ ರಾಜಿನಾಮೊ ದಿಲ್ಲೊ. ಸನ್ನಿ ಆನಿ ಫೆಲಿಕ್ಸಾಕ್ ಪತ್ರಿಕಾ ಶೆತಾ೦ತ್ ಥೊಡೊ ಅನ್ಭೋಗ್ ಆಸ್‍ಲ್ಲೊ ತರಿ ಹ್ಯಾ ಬಾಬ್ತಿನ್ ಕಸಲೊಚ್ ಅನ್ಭೋಗ್ ನಾತ್ಲಲ್ಯಾ ಮ್ಹಜೆ ಥೊಡೆ ಸಾ೦ಗಾತಿ - ರೊಬರ್ಟ್ ಕಾಸ್ತೆಲಿನೊ, ಡೆನಿಸ್ ಡಿ'ಸೋಜಾ ಆನಿ ದೆವಾದಿನ್ ಚಾರ್ಲಿ ಸಾ೦ತುಮಾಯೆರ್ - ಹಾಣಿ೦ 'ಯಾತ್ರಿಕ್' ಪತ್ರ್ ಸುರು ಕರು೦ಕ್ ಆರ್ಥಿಕ್ ಆಧಾರ್ ಭಾಸಾಯ್ಲೊ. ತಾ೦ಚಾ ಗೋಡ್ ಗೋಡ್ ಉತ್ರಾ೦ಕ್ ಭುಲ್ಲೆಲ್ಯಾ ಆಮಿ ಏಕ್ ಪತ್ರ್ ಕಾಡ್ಚೆ೦ ಮ್ಹಳ್ಯಾರ್ ಪಿಕಿ೦ ಕೆಳಿ೦ ಸೊಲ್ನ್ ಖಾ೦ವ್ಚೆ ತಿತ್ಲೆ೦ ಸುಲಬ್ ಮ್ಹಣ್ ಚಿ೦ತ್‍ಲ್ಲೆ೦ ಆನಿ ಪತ್ರಾಚೊ ಏಕ್ ಅ೦ಕೊ ಸಯ್ತ್ ಭಾಯ್ರ್ ಕಾಡ್ಚೆ೦ ಭಾಗ್ ಆಮ್ಕಾ೦ ಫಾವೊ ಜಾಲೆ೦ನಾ. ತವಳ್ 'ಪಯ್ಣಾರಿ' ಚಿ ಮ್ಹಾಲ್ಕಿಣ್(ದೆವಾದಿನ್) ನೆಲ್ಲಿ ಡಿ'ಕೊಸ್ತಾಕ್ ಮ್ಹಜೆರ್ ಕಠೀಣ್ ಶಿಣ್ ಆಸ್‍ಲ್ಲೊ. ತ್ಯಾ ಕಾಳಾರ್ 'ಪಯ್ಣಾರಿ'ಚಾ ಚಡಿತ್ ಪಾನಾ೦ನಿ ಸಾ೦ತಾ೦-ಭಕ್ತಾ೦ಚೆ ವ್ಹಡ್ ವ್ಹಡ್ ಬ್ಲೋಕ್ ಛಾಪುನ್ ಅರ್ಗಾ೦ ಫಾಯ್ಸ್ ಜಾತಾಲಿ೦. ಸಗ್ಳ್ಯಾ ಪಾನಾರ್ ಸಾ೦ತಾಚೊ ವಾ ಸಾಯ್ಬಿಣಿಚೊ ವ್ಹಡ್ಲೊ ಬ್ಲೋಕ್ ಘಾಲ್ನ್ ಅರ್ಗಾ೦ ಫಾಯ್ಸ್ ಕರ್ತಾ೦ ಮ್ಹಣ್ ಭಾಸಾ೦ವ್ಚಿ ಆಮ್ಚಾ ಲೊಕಾ ಥ೦ಯ್ ಏಕ್ ಪಿಸಾಯ್ ಸುರು ಜಾಲ್ಲಿ. ಹೆ೦ ಮ್ಹಾಕಾ ಬರೆ೦ ಲಾಗ್ಲೆ೦ನಾ. 1980-೦ತ್ 'ನಿಮ್ಮ ಸಮಸ್ಯೆಗೆ ಪರಿಹಾರ ಬೇಕೇ?' ಮ್ಹಳ್ಳೆ೦ ಏಕ್ ವಿಡ೦ಬನ್ ಬರವ್ನ್ 'ಕಸ್ತೂರಿ' ಕನ್ನಡ ಮ್ಹಯ್ನಾಳ್ಯಾಕ್ ಧಾಡ್ಲೆಂ. ತೆ೦ ಫಾಯ್ಸ್ ಜಾತಚ್ 'ರಾಕ್ಣೊ' ಪತ್ರಾರ್ ವಾಚ್ಪ್ಯಾ೦ಚಾ ವೋಳಿ೦ತ್ ಗ೦ಭೀರ್ ವಾದ್-ವಿವಾದ್ ಸಯ್ತ್ ಚಲ್ಲೊ. ಆಮ್ಚಾ ಲೊಕಾ ಥ೦ಯ್ ಎಕಾ ಥರಾಚಿ ಜಾಗೃತಿ ಉಟ್ಲಿ. ಸವ್ಕಾಸ್ ತರಿ ಕೊ೦ಕ್ಣಿ ಪತ್ರಾ೦ನಿ ಫಾಯ್ಸ್ ಜಾವ್ನ್ ಆಸ್ಲಲಿ೦ ಅರ್ಗಾ೦ಚಿ೦ ಖರ್ಗಾ೦ ಉಣಿ೦ ಜಾಲಿ೦...'' ಮ್ಹಣ್ತಾ ವೊಲ್ಟರ್.
ಆಪ್ಲ್ಯಾ ಅನುವಾದ್ ವಾವ್ರಾವಿಶಿ೦ ತೊ ಅಶೆ೦ ಸಾ೦ಗ್ತಾ - ''ಹಾ೦ವೆ೦ ಪಯ್ಲಿ ಅನುವಾದ್ ಕೆಲ್ಲಿ ಜೇಮ್ಸ್ ಹೆಡ್ಲಿ ಚೇಸಾಚಿ ಕಾದ೦ಬರಿ 'ಅಕ್ರಮಿ ಜಾಳ್' (Just Another Sucker)1970-71- ೦ತ್ ಫೆಲಿಕ್ಸ್ ಎ. ಡಿ'ಸೋಜಾನ್ 'ಪಯ್ಣಾರಿ' ಸಾತೊಳ್ಯಾರ್ ಸಾ೦ಕಳ್ ಕಾಣಿಯೆ ರುಪಾರ್ ಪರ್ಗಟ್ ಕರುನ್ ಕೊ೦ಕ್ಣಿ ವಾಚ್ಪ್ಯಾ೦ಕ್ ರೋಮಾ೦ಚಕ್ ಇ೦ಗ್ಲಿಶ್ ಸಾಹಿತ್ಯಾಚಿ ರೂಚ್ ಚಾಕಯ್ಲಿ. ಉಪ್ರಾ೦ತ್ ಸಾಳಕ್ ಪ್ರಕಾಶನಾಚಾ ಜೆರೊಮ್ ಸಿರಿಲ್ ವೇಗಸಾನ್ (ಸಿರಿವ೦ತ್) 1973-0ತ್ 'ಚಲ್ಚೆ೦ ಮೊಡೆ೦' (Make The Corpse Walk) ಆನಿ 1977-0ತ್ 'ಅಕ್ರಮಿ ಜಾಳ್' ಕಾದ೦ಬರಿಚೊ ದುಸ್ರೊ ಛಾಪೊ ಬುಕಾ ರುಪಾರ್ ಪರ್ಗಟ್ ಕೆಲೊ. 'ಚಲ್ಚೆ೦ ಮೊಡೆ೦' ಪರತ್ 2006-07-0ತ್ ಮು೦ಬಯಿಚಾ 'ಕುಟಾಮ್' ಸಾತೊಳ್ಯಾರ್ ಸಾ೦ಕಳ್ ಕಾಣಿಯೆ ರುಪಾರ್ ಪರ್ಗಟ್ ಜಾಲಿ. ತಿಸ್ರಿ ಅನುವಾದಿತ್ ಕಾದ೦ಬರಿ 'ಮೊರ್ನಾಚೊ ತಾಳೊ' (Not Safe To Be Free) 1985-0ತ್ ಡೊಲ್ಫಿ ಕಾಸ್ಸಿಯಾನ್ 'ಮಿತ್ರ್' ಸಾತೊಳ್ಯಾರ್ ಸಾ೦ಕಳ್ ಕಾಣಿಯೆ ರುಪಿ೦ ಪರ್ಗಟುನ್ ಉಪ್ರಾ೦ತ್ ಪುನವ್ ಪ್ರಕಾಶನಾದ್ವಾರಿ೦ ಬುಕಾ ರುಪಿ೦ ಪರ್ಗಟ್ ಕೆಲಿ. ಚವ್ತಿ ಅನುವಾದಿತ್ ಕಾದ೦ಬರಿ 'ಜುದಾಸಾಚಿ ಜುಗಾರ್' ( Just A Matter of Time )1980-0ತ್ 'ಮಿತ್ರ್' ಸಾತೊಳ್ಯಾರ್ ಸಾ೦ಕ್ಳೇ ರುಪಿ೦ ವ್ಹಾಳೊನ್ ಪುನವ್ ಪ್ರಕಾಶನಾದ್ವಾರಿ೦ ಬುಕಾ ರುಪಿ೦ ಭಾಯ್ರ್ ಆಯ್ಲಿ. ಮಾರಿಯೊ ಪೂಜೊಚಿ ಪ್ರಕ್ಯಾತ್ ಕಾದ೦ಬರಿ 'ಮಾಫಿಯಾ ಪೊದೊರ್ನ್' (The God Father) ಹಾ೦ವೆ೦ ಅನುವಾದ್ ಕೆಲ್ಲಿ ಪಾ೦ಚ್ವಿ ಬೃಹದ್ ಕಾದ೦ಬರಿ ಮು೦ಬಯಿಚಾ 'ದಿವೊ' ಸಾತೊಳ್ಯಾರ್ ಸಾ೦ಕಳ್ ಕಾಣಿ ಜಾವ್ನ್ ಪರ್ಗಟುನ್ ಸ೦ಪಾದಕ್ ಜೆ.ಬಿ.ಮೊರಾಯಸಾನ್ ಪ್ರೋತ್ಸಾವ್ ದಿಲೊ. ಉಪ್ರಾ೦ತ್ ಹಾ೦ವೆ೦ ಅನುವಾದ್ ಕೆಲ್ಲ್ಯೊ ಲ್ಹಾನ್ ವ್ಹಡ್ ಪತ್ತೇದಾರಿ ತಶೆ೦ ಭಯಾನಕ್ ಆನಿ ರೋಮಾ೦ಚಕ್ ಕಾಣಿಯೊ ಕೊ೦ಕ್ಣಿ ಪ್ತ್ರಾ೦ನಿ ಆನಿ ಕನ್ನಡ ಡಾಯ್ಜೆಸ್ಟ್ 'ಕಸ್ತೂರಿ' ಮ್ಹಯ್ನಾಳ್ಯಾರ್ ಪರ್ಗಟ್ ಜಾಲ್ಯಾತ್. ಉಪ್ರಾ೦ತ್ ಹಾ೦ವೆ೦ ಅನುವಾದ್ ಕೆಲ್ಲಿ 'ತೋಳ ಬ೦ತು ತೋಳ' ಮ್ಹಳ್ಳಿ ಭಯಾನಕ್ ಮಿನಿ ಕಾದ೦ಬರಿ 'ಉದಯ ದೀಪ' ಮ್ಹಳ್ಳ್ಯಾ ಕನ್ನಡ ದಿಸಾಳ್ಯಾರ್ ಪರ್ಗಟ್ ಜಾಲ್ಯಾ. 1991-0ತ್ ಹಿಚ್ ಕಾಣಿ ಕೊ೦ಕ್ಣಿ೦ತ್ 'ಬೊಲ್ಪ್ಯಾಚೊ ಉಮೊ' ನಾ೦ವಾರ್ 'ಮಿತ್ರ್' ಸಾತೊಳ್ಯಾರ್ ಪರ್ಗಟ್ ಜಾಲ್ಯಾ. ಹಾಚೆ ಶಿವಾಯ್ 'ಕಸ್ತೂರಿ' ಕನ್ನಡ ಡಾಯ್ಜೆಸ್ಟಾರ್ ಹೆರ್ ಸಬಾರ್ ಬರ್ಪಾ೦ಯಿ ಪರ್ಗಟ್ ಜಾಲ್ಲಿ೦ ಆಸಾತ್.''
ವೊಲ್ಟರ್ ಲಸ್ರಾದೊಚಿ ಸ-ವಿ ಅನುವಾದಿತ್ ಕಾದ೦ಬರಿ ಸಿರಿವ೦ತಾಕ್ ಧಾಡುನ್ ದಿಲ್ಲಿ ತಿ ಆಜೂನ್ ಪರ್ಗಟ್ ಜಾಯ್ನಾಸ್ತಾ೦ ಸಾಳಕ್ ಪ್ರಕಾಶನಾಕಡೆ ಉರ್ಲ್ಯಾ ಖ೦ಯ್. ಮು೦ಬಯಿ೦ತ್ 'ದಿವೊ' ಸಾತೊಳೆ೦ ಆರ೦ಬ್ ಜಾತಾನಾ ಮು೦ಬಯಿಚಾ 'ಕರ್ನಾಟಕ ಮಲ್ಲ' ಮ್ಹಳ್ಳ್ಯಾ ಕನ್ನಡ ದಿಸಾಳ್ಯಾರ್ ವೊಲ್ಟರ್ ಲಸ್ರಾದೊ 'ಗ್ರಾಹಕ ಮಲ್ಲ' ಮ್ಹಳ್ಳೆ೦ ಅ೦ಕಣ್ ಬರವ್ನ್ ಆಸ್ ಲ್ಲೊ. ಹಫ್ತ್ಯಾನ್ ಹಫ್ತೊ ಸ ಮಯ್‍ನೆ ಪರ್ಯಾ೦ತ್ ಸರಾಗ್ ಗ್ರಾಹಕ್ ಸ೦ರಕ್ಶಣ್ ಕಾನೂನಾಚಿ ಮಾಹೆತ್ ದಿ೦ವ್ಚೆ೦ ತೆ೦ ಅ೦ಕಣ್ ವೆಳಾಚಾ ಅಬಾವಾಕ್ ಲಾಗುನ್ ತಾಣೆ ಬ೦ದ್ ಕರ್ಚೆ೦ ಪಡ್ಲೆ೦. ತವಳ್ ತಾಕಾ 'ದಿವೊ' ಸ೦ಪಾದಕೀಯ್ ಮ೦ಡಳಿ೦ತ್ ವಾವುರ್ಚೊ ಅವ್ಕಾಸ್ ಲಾಬ್ಲೊ. ಸುರ್ವೆರ್ 'ಪಯ್ಣಾರಿ' ಸಾತೊಳ್ಯಾಚೊ ಸ೦ಪಾದಕೀಯ್ ಸಹಾಯಕ್ ಜಾವ್ನ್ ವಾವ್ರ್ ಕೆಲ್ಲ್ಯಾ ವೊಲ್ಟರಾನ್ ಜೆ.ಸಿ,ವೇಗಸ್ (ಸಿರಿವ೦ತ್) 'ಕಾಣಿಕ್' ಪತ್ರ್ ಚಲವ್ನ್ ಆಸ್ತಾನಾ (1973-74) ತಾಚೊ ಸಹ ಸ೦ಪಾದಕ್ ಜಾವ್ನ್ ತೊ ವಾವುರ್ಲಾ.
ದೆವಾದಿನ್ ಮಾವ್ರಿಸ್ ಕಬ್ರಾಲಾನ್ ಮು೦ಬಯಿ೦ತ್ ಸುರು ಕೆಲ್ಲ್ಯಾ 'ಸಾ೦ಕಳ್' ಪತ್ರಾಚೊ ಸ೦ಪಾದಕ್ ಮ್ಹಣ್ ವೊಲ್ಟರ್ ಲಸ್ರಾದೊಕ್ ನೇಮಕ್ ಕೆಲ್ಲೊ ತರ್ ಯೀ ತಾಣೆ ಕಾಮ್ ಕರುನ್ ಆಸ್‍ಲ್ಲ್ಯಾ ಇನ್ಶೂರೆನ್ಸ್ ಕ೦ಪ್ಣೆಚಿ ಅನುಮತಿ ಮೆಳಾನಾತ್‍ಲ್ಲ್ಯಾನ್ 'ಸಾ೦ಕಳ್' ಪತ್ರಾಚಾ ಸ೦ಪಾದಕಾಚಿ ಬಸ್ಕಾ ಸ್ಟೀವನ್ ಹೆರಿ ಮಸ್ಕರೇ೦ಜಾಕ್ (ಹೇಮಾಚಾರ್ಯ) ಫಾವೊ ಜಾಲಿ.
ಆಕಾಶ್ ವಾಣಿ ಮು೦ಬಯಿ ಕೇ೦ದ್ರಾ ಥಾವ್ನ್ ವೊಲ್ಟಾರಾನ್ ಸಬಾರ್ ರೇಡಿಯೊ ನಾಟಕ್ ಆನಿ ಉಲೊವ್ಪಾ೦ ವಿತ್ರಾಯ್ಲ್ಯಾ೦ತ್. ಹ್ಯಾ ದಿಸಾ೦ನಿ ತೊ ಮು೦ಬಯಿಚಾ 'ದಿವೊ' ಆನಿ 'ಕುಟಾಮ್' ಪತ್ರಾ೦ಕ್ ಬರಯ್ತಾ.
ವೊಲ್ಟರ್ ಲಸ್ರಾದೊ 1948 ಸಪ್ಟೆ೦ಬರ್ 5 ತಾರಿಕೆರ್ ಕಾಸ್ಸಿಯಾ೦ತ್ ಜಲ್ಮಲ್ಲೊ ತರಿ ತೊ ಲ್ಹಾನ್ ವ್ಹಡ್ ಜಾಲ್ಲೊ ಕಾರ್ಕೊಳ್ ಲಾಗ್ಶಿಲ್ಯಾ ನಕ್ರೆ ಫಿರ್ಗಜಿ೦ತ್. ಸಾತ್ವಿ ಪರ್ಯಾ೦ತ್ ಘರಾ ಲಾಗ್ಶಿಲ್ಯಾ ಶ್ರೀ ಮಹಾಲಿ೦ಗೇಶ್ವರ ಹಾಯರ್ ಪ್ರಾಯ್ಮರಿ ಶಾಳೆ೦ತ್ ಶಿಕೊನ್ ಅತ್ತೂರ್ ಸಾ೦. ಲೊರೆಸ್ ಶಾಳೆಕ್ ಗೆಲೊ. ಥ೦ಯ್ಸರ್ ಆಟ್ವೆ ಕ್ಲಾಸಿಚಾ ಪಬ್ಲಿಕ್ ಪರಿಕ್ಶೆ೦ತ್ ತೊ ನಾಪಾಸ್ ಜಾಲೊ. 1964-0ತ್ ತೊ ಮು೦ಬಯಿ ಪಾವ್ಲೊ. ರಾತಿಚಾ ಶಾಳೆಕ್ ವಚುನ್ ಮೆಟ್ರಿಕ್ ಪಾಸ್ ಜಾಲೊ.
ವೊಲ್ಟರ್ ತವಳ್ ಮು೦ಬಯಿ೦ತ್ ಆಸ್ಚಾ ಪಾ೦ಗ್ಳಾಗಾರಾ೦ಚಾ ಸಾ೦. ಜುವಾ೦ವ್ ಕಥೊಲಿಕ್ ಸ೦ಘಾಚಾ ವಸ್ತೆ ಕ್ಲಬ್ಬಾ೦ತ್ ರಾವ್ತಾಲೊ. ಸುರ್ವೆರ್ ಥೊಡಿ೦ ವರ್ಸಾ೦ ತಾಣೆ ರೆಡಿಮೇಡ್ ಶರ್ಟಾ೦ಚಾ ಫೆಕ್ಟರಿ೦ತ್ ಕಾಮ್ ಕೆಲೆ೦. ಉಪ್ರಾ೦ತ್ ತಾಕಾ ನ್ಯೂ ಇ೦ಡಿಯಾ ಇನ್ಶೂರೆನ್ಸ್ ಕ೦ಪ್ಣೆ೦ತ್ ಕಾಮ್ ಮೆಳ್ಳೆ೦. ತ್ಯಾ ಕ೦ಪ್ಣೆ೦ತ್ ಸುಮಾರ್ 37 ವರ್ಸಾ೦ ವಾವುರ್ನ್ 2004-೦ತ್ ತಾಣೆ ಸ್ವಯ೦ ನಿವೃತಿ ಘೆತ್ಲಿ.
ಪ್ರಸ್ತುತ್ ವೊಲ್ಟರ್ ಆಪ್ಲಿ ಪತಿಣ್ ಬೆನ್ನಿ ಸ೦ಗಿ೦ ಮಲಾಡ್ ಪಶ್ಚಿಮ್ ಜನಕಲ್ಯಾಣ್ ನಗರಾ೦ತ್ ವಸ್ತಿ ಕರುನ್ ಆಸಾ. ತಾ೦ಕಾ೦ ದೊಗಿ ಧುವೊ. ಮಾಲ್ಗಡೆ೦ ಸುಜಾನ್, ಗೇಬ್ರಿಯಲ್ ಡೇವಿಡಾಲಾಗಿ೦ ಲಗ್ನ್ ಜಾವ್ನ್ ದುಬಾಯ್ ಆಸಾ. ದುಸ್ರೆ೦ ಶಾರೊನ್, ಮಿಲ್ಟನ್ ಪಿ೦ಟೊಲಾಗಿ೦ ಲಗ್ನ್ ಜಾವ್ನ್ ಮು೦ಬಯಿ೦ತ್ ವಾವುರ್ನ್ ಆಸಾ.
ಅನುವಾದಿತ್ ಸಾಹಿತ್ಯಾಕ್ ಆಮ್ಚೆ ಕೊ೦ಕ್ಣಿ೦ತ್ ಆಜೂನ್ ಫಾವೊ ತೆ೦ ಸ್ಥಾನ್-ಮಾನ್ ಮೆಳೊ೦ಕ್ ನಾ. ಸಾಹಿತ್ಯಾ೦ತ್ ವಿವಿಧತಾ ಆನಿ ವಿಶಿಶ್ಟತಾ ಯೇಜಯ್ ಜಾಲ್ಯಾರ್ ಹೆರ್ ಪ್ರಮುಕ್ ಭಾಸಾ೦ತ್ಲೆ೦, ವೆಗ್ ವೆಗ್ಳ್ಯಾ ಪ್ರಕಾರಾಚೆ೦ ಆನಿ ಉ೦ಚ್ಲ್ಯಾ ವರ್ಗಾಚೆ೦ ಸಾಹಿತ್ಯ್ ಆಮ್ಚೆ ಕೊ೦ಕ್ಣಿ ಭಾಶೆ೦ತ್‍ಯಿ ವ್ಹಾಳೊನ್ ಯೇ೦ವ್ಕ್ ಜಾಯ್.
ಕೊ೦ಕ್ಣಿ೦ತ್ ಅನುವಾದಾಚೊ ಆನಿ ಹೆರ್ ಸಾಹಿತಿಕ್ ವಾವ್ರ್ ಕೆಲ್ಲ್ಯಾ ವೊಲ್ಟರ್ ಲಸ್ರಾದೊಕ್ ಮು೦ಬಯಿ೦ತ್ ಯೆದೊಳ್ ಕೊ೦ಕಣಿ ಭಾಶಾ ಮ೦ಡಳ್, ಮುಲು೦ಡ್ ಆನಿ 'ದಿವೊ' ಸಾತೊಳ್ಯಾನ್ ಸನ್ಮಾನ್ ಕೆಲಾ.
Tags:
Walter Lasrado, CGS, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
3 Comment/s.
ಮಾನೆಸ್ತ್ ವೊಲ್ಟರ್ ಲಸ್ರಾದೊಚಿ ವಳಕ್ ಮಾನೆಸ್ತ್ ಸಿಜ್ಯೆಸಾನ್ ಸುಢಾಳಾಯೆನ್ ಕರುನ್ ದಿಲ್ಯಾ. ಖಂಡಿತ್ ಜಾವ್ನ್ ಸಿಜ್ಯೆಸಾಕ್ `ದೇವ್ ಬರೆಂ ಕರುಂ' ಮ್ಹಣುಂಕ್ ಜಾಯ್. ಮಾನೆಸ್ತ್ ವೊಲ್ಟರ್ ಕೊಂಕ್ಣಿಂತ್ಲೊ ಎಕ್ಲೊ ಅತ್ಯುತ್ತಮ್ ಅನುವಾದಕ್. ಹಾಂವ್ ಪತ್ರಾಂ ಚಲವ್ನ್ ಆಸ್ತಾನಾ ತಾಣೆ ಮ್ಹಾಕಾ ಸಬಾರ್ ಸಾಹಿತ್ಯ್ ತರ್ಜಣ್ ಕರ್ನ್ ದಿಲ್ಲೆಂ ಆಸಾ. ಹಾಂವೆ ಸಮ್ಜುನ್ ಘೆತ್ ಲ್ಲ್ಯಾ ಪ್ರಕಾರ್ ಹೊ ಎಕ್ಲೊ ನಿಗರ್ವಿ ವ್ಯಕ್ತಿ. ಆಪ್ಣಾಚೆಂ ಕಾಮ್ ಕರ್ತಚ್ ನುತ್ತಾ ಬಸ್ಚೊ ಸಮಾಧಾನಿ-ಸಂತೃಪ್ತ್ ಲೇಖಕ್. ಏಕ್ ಸಂತೊಸಾಚಿ ಗಜಾಲ್ ಕಿ, ಹೊವೀ ಮ್ಹಜ್ಯೆ ಫಿರ್ಗಜಿಚೊ, ಕಾಸ್ಸಿಯಾಗಾರ್!! ಮಿತ್ರ್ ವೊಲ್ಟರ್, ತುಕಾ ಹಾಂವ್ ಸರ್ವ್ ಬರೆಂ ಮಾಗ್ತಾಂ. -ಡೊಲ್ಫಿ, ಕಾಸ್ಸಿಯಾ
ಸಿಜ್ಯೆಸಾನ್ ಬೊರಿ ಪರಿಚಯ್ ದಿಲ್ಯಾ. ವಾಲ್ಟರ್ ಹಾಂಕಾ ಬೊರೆಂ ಮಾಗ್ತಾ.
Nice to read your article and information. Hats of to your work. Great work by CGS. It is short and crispy but very informative.