From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಕೊಂಕ್ಣೆಂತ್ಲಿ ಚಾನಿ, ದುಬಾಯ್ಚೊ ಟೋನಿ (ಆಂತೊನಾಮ್)
Monday, November 6, 2017
ಅಕ್ಬೋಬರಾಚ್ಯಾ 18 ತಾರಿಕೆರ್, ಟೋನಿ ಮೆಂಡೊನ್ಸಾ (ಅಂತೊನಾಮ್), ಆಪ್ಲ್ಯಾ ಪಾವುಣ್ಶ್ಯಾ ವರ್ಸಾಂಚೊ 'ಪ್ಲಾಟಿನಮ್ ಜನ್ಮಾ ಉತ್ಸವ್' ಆಚರ್ಸಿಲ್ಲ್ಯಾ ಸಂದರ್ಭಾರ್, ತಾಚೆರ್ ದೆವಾಚಿಂ ಧಾರಾಳ್ ಆಶೀರ್ವಾದಾಂ ಆನಿ ಬಳ್ - ಭಲಾಯ್ಕಿ ಮಾಗ್ತಾನಾ, ತಾಚ್ಯಾ ಸಾಮಾಜಿಕ್ ಆನಿ ಸಾಹಿತಿಕ್ ಲಗ್ತಿಕ್ ಜಾಲ್ಲಿಂ ಥೊಡ್ಯೊ ಸಂಗ್ತಿಂ ವಾಚ್ಪ್ಯಾಂ ಮುಕಾರ್ ದವರುಂಕ್ ಆಮಿ ಸಂತೊಸ್ ಪಾವ್ತಾಂವ್.
ಟೊನಿ ಮೆಂಡೊನ್ಸಾ, ನಿಡ್ಡೋಡಿ - ಕೊಂಕಣಿ ಸಾಹಿತ್ಯ್ ವರ್ತುಲಾಂತ್ ಏಕ್ ಪರಿಚಿತ್ ಲಿಕ್ಣೆ ನಾಂವ್. ದುಬಾಯಾಂತ್ ತಾಕಾ ವಳ್ಕಾನಾತ್‍ಲ್ಲೊ ಕೊಂಕ್ಣಿ ಮೊಗಿ ನಾ. ಜಾಂವ್ ಭುರ್ಗಿಂ ವ ವ್ಹಡಾಂ, ಸಗ್ಳಿ ಕೊಂಕಣ್ ಸಮಾಜ್‍ಚ್ ಟೊನಿ ಮೆಂಡೊನ್ಸಾಚ್ಯಾ ನಾಂವಾಕ್ ಸಲಾಮ್ ಮಾರ್ತಾ. ಕೊಂಕ್ಣಿ ಮಾತೆಕ್ ತಾಚಿ ದೇಣ್ಗಿ ವರ್ತಿ. ಖಂಯ್ಚ್ಯಾಯೀ ಕೊಂಕ್ಣಿ ಕಾರ್ಯಾಕ್ ಜರ್ ಟೋನಿ ಹಾಜರ್ ನಾಂ ತರ್, ಕಿತೆಂಗೀ ಚುಕ್‍ಲ್ಲ್ಯಾ ಚುಕ್‍ಲ್ಲ್ಯಾ ಬರಿಂ ಜಾತಾ.
ಆಪ್ಲ್ಯಾ ಭುರ್ಗ್ಯಾಪಣಾರ್'ಚ್ ಜೆಜುರಾಯ್ ಪತ್ರಾರ್, 'ಜೆಜುಚೆಂ ಬೆನ್ನಿ, ಮಾತಾಳ್ಯಾಚಿ ಕಿನ್ನಿ' ಕಾಣಿಯೆ ಥಾವ್ನ್ ಸುರು ಜಾಲ್ಲಿ ತಾಚಿ ಕೊಂಕ್ಣೆಚಿ ಸೆವಾ, ಆಜಿಕ್ ಚಾಳೀಸ್ ವರ್ಸಾಂ ಉಪ್ರಾಂತ್‍ಯೀ ತಿ ಉರ್ಬಾ ನಿಂವೊಂಕ್ ನಾ.
ಜರ್ ಹಾಂವ್ ವಿಚಾರಿ, ''ತುಜ್ಯಾ ಉರ್ಬೆಚೊ ಮಿಸ್ತೆರ್ ಕಿತೆಂ ಅಂತೊನಾಮಾ?''
''ಕೊಂಕ್ಣೆಚಿ ಕೀಡ್'' ಮ್ಹಣ್ತಾ ತೊ ಸಟ್ಟ್ ಕರ್ನ್, ಕಸಲಿಚ್ ಮುಲಾಜ್ ನಾಸ್ತಾಂ.
ಅಶೆಂ, ಕೊಂಕ್ಣಿ ಭಾಸೆ ಥಂಯ್ ತಾಚಿ ವೊಡ್ಣಿ ಇತ್ಲಿ ರೊಂಬ್ಲ್ಯಾಗೀ, ತಾಣೆಂ ಶೆಂಭರಾಂ ವಯ್ರ್ ಕವಿತಾಂ, ದೊನ್ಶ್ಯಾಂ ವಯ್ರ್ ಚುಟುಕಾಂ, ದಾಲಿಭರ್ ಕಾಣಿಯೊ ಆನಿ ಲೇಕ್ ನಾತ್‍ಲ್ಲಿಂ ಸಬಾರ್ ವಿಷಯಾಂಚಿ ಲೇಖನಾಂ ಬರವ್ನ್ ಕೊಂಕ್ಣಿ ಮಾತೆಕ್ ಶಾಲೊ ಪಾಂಗ್ರಾಯಿಲ್ಲೊ ಶಿಸ್ತೆಚೊ ಸಿಪಾಯಿ ತೊ.
ಆಂತೊನ್ ಮೆಂಡೊನ್ಸಾ, ನಿಡ್ಡೋಡಿ ಮ್ಹಳ್ಯಾ ಮಾತ್ಯಾ ನಾಂವಾನ್ ಪಯ್ಲೆಂ ಸರಾಗ್ ಪಯ್ಣಾರಿರ್, ಮಿತ್ರ್, ಕಾಣಿಕ್, ಝೆಲೊ, ಆಮ್ಚಿ ಸಮಾಜ್, ದಿವೊ, ಕುಟಾಮ್ ಆನಿ ಹೆರ್ ಪತ್ರಾಂನಿ ಲಿಕ್ಣಿ ಝರಯಿಲ್ಲೊ ಚಿಂತ್ಪಿ ಲೇಖಕ್. ತಾಣೆಂ ವಿಂಚಿನಾತ್‍ಲ್ಲೊ ವಿಷಯ್ ನಾ, ಚಿಂತಿನಾತ್‍ಲ್ಲೊ ಸಂಬಂಧ್ ನಾ. ಸದಾಂ ಹೆರಾಂಚೆಂ ಬರೆಂಚ್ ಚಿಂತ್ಚೊ ಆಂತೊನ್ ಮೆಂದೊಸ್, ಆತಾಂ ರಿಟಾಯರ್ಡ್'ಪಣಾರ್ ಆಪ್ಲ್ಯಾ ಎಕ್‍ಚ್ ಧುವ್-ಜಾಂವಯ್ ಆನಿ ನಾತ್ರಾಂ ಸಂಗಿಂ ದಾಧೊಸ್ಕಾಯೆಚೆಂ ಜೀವಿತ್ ಸಾರ್ತಾ.
ಹಾಸ್ಕುರೆಂ ಮುಖಮಳ್, ಮೊವಾಳ್ ಉತ್ರಾಂ, ಆನಿ ಸದಾಂ ತರ್ನಾಟ್ಪಣಾಚಿ ಸುಡ್ಸುಡಾಯ್ ಆಸ್‍ಲ್ಲೊ, ಕೊಂಕ್ಣೆಚೊ 'ದೇವಾನಂದ್' ತೊ.
ಮೂಡ್‍ಬಿದ್ರಿ ಆನಿ ಕಿನ್ನಿಗೋಳಿ ಮಧೆಂ ನಿಡ್ಡೋಡಿ ಫಿರ್ಗಜೆಚ್ಯಾ ಕುದ್ರಿಪದವ್ ಲಾಗ್ಸಾರ್ಚ್ಯಾ 'ದಾರೋಡೆ-ಹಿತ್ಲುಂತ್', 1942 ಇಸ್ವೆಂತ್, ಅಕ್ತೋಬರಾಚ್ಯಾ 18 ತಾರಿಕೆರ್ ಟೊನಿ ಮೆಂದೊಸಾಚೆಂ ಜನನ್ ಎಕಾ ಸಾದ್ಯಾ ಭೊಳ್ಯಾ ಬೇಸಾಯ್‍ಗಾರಾಚ್ಯಾ ಕುಟ್ಮಾಂತ್ ಜಾಲೆಂ. ಬಾಪುಯ್ ಆಲೆಕ್ಸ್ ಮೆಂದೊಸ್ ಆನಿ ಆವಯ್ ಫುಲಾ ಮೆಂದೊಸ್ ಹಾಂಚ್ಯಾ ಕಾಜಾರಿ ವೋಡ್ತಾಂತ್ ಜನ್ಮಾಲ್ಲ್ಯಾ ಪಾಂಚ್ ಭುರ್ಗ್ಯಾಂ ಪಯ್ಕಿ ಆಂತೊನ್ ಮೆಂದೊಸ್ ದುಸ್ರೊ.
ಮಾಲ್ಘಡೊ ಜೋಸೆಫ್, ಪ್ರಸ್ತುತ್ ಆಪ್ಲ್ಯಾ ಕುಟ್ಮಾ ಸಂಗಿಂ ಮುಂಬಂಯ್ತ್ ವಸ್ತಿ ಕರ್ತಾ. ನಿಮಾಣೊ ಭಾವ್ ಇನಾಸ್(ಬಾಬುಟಿ) ಮೆಂದೊಸ್, ನಿಡ್ಡೋಡಿ - ಕಿನ್ನಿಗೋಳಿ ಆನಿ ಮೂಡ್‍ಬಿದ್ರಾಂತ್ ಏಕ್ ಫಾಮಾದ್ ನಾಂವ್. ನಿಮಾಣಿ ಎಕ್ಲಿಚ್ ಭಯ್ಣ್ ಸಿಸ್ಟರ್ ವಿನೀತಾ, ಬೆಥನಿ ಮೆಳಾಂತ್ ಕ್ರೀಸ್ತಿ ಸೆವಾ ದೀವ್ನ್ ಆಸಾ. ಆಂತೊನಿ ಪಾಟ್ಲೊ ಏಕ್ ಭಾವ್ - ಆಂಬ್ರೊಜ್, ದೆವಾಧೀನ್ ಜಾಲಾ.
ಸಾಂತ್. ಅಂತೊನಿಚೆ ಭಾಗೆವಂತ್ ನಾಂವ್ ಆಪ್ಣಾವ್ನ್, ಖಾಲ್ತ್ಯಾ ಘರಾಣ್ಯಾಂತ್ ಜಲ್ಮಲ್ಲೊ ಆಂತೊನ್ ಮೆಂದೊಸ್, ಸಾಂ. ಆಂತೊನಿಚ್ಯಾ ಮೆಟಾಂನಿ ಚಲ್ಚೊ ಮಹಾನ್ ಭಕ್ತ್. ಹಾಕಾ ಸಾಕ್ಸ್ ಜಾವ್ನ್ ತಾಕಾ ಒಳ್ಕಾಲ್ಲೊ ಹರ್ಯೆಕ್ಲೊ ಗವಾಯ್ ದಿತಾ.
ಪ್ರಾರಂಭಿಕ್ ಶಿಕಪ್, ಕಿರೆಂತ್ಲ್ಯಾ ಪಟ್ಟೆ ಇಸ್ಕೊಲಾಂತ್, ಉಪ್ರಾಂತ್ ಪೊಂಪಯ್ ಇಸ್ಕೊಲಾಂತ್ ಶಿಕಪ್ ಮುಂದರ್ಸುನ್ ಸ-ವಿ ಯಶಸ್ವೆನ್ ಸಂಪಯ್ತಚ್, ಬೇಸಾಯ್‍ಗಾರಾಂಚೆಂ ವಠಾರ್ ಆಸ್ಲೆಲ್ಯಾ ಆಂತೊನಿಕ್, ಮುಕಾರ್ ಶಿಕೊಂಕ್ ಆಡ್ಕಳ್ ಆಯ್ಲಿ. ಇಸ್ಕೊಲಾಚೆಂ ಶಿಕಪ್ ತಿತ್ಲ್ಯಾರ್'ಚ್ ರಾವವ್ನ್, ಬಾಪಾಯ್ಕ್ ಆಧಾರ್ ಜಾವ್ನ್, ನಾಂಗೊರ್ ಘೇವ್ನ್, ಬೆಸಾಯ್ ಕರುಂಕ್ ಭಾಯ್ರ್ ಸರ್‍'ಲ್ಲೊ ಆಂತೊನಿ, ಪಾಂಚ್ ವರ್ಸಾಂ ಘೊಳೊನ್, 1960 ಇಸ್ವೆಂತ್ ಬೊಂಬಯ್ ಪಾವ್ಲೊ. ಸುರ್ವೆರ್ ರೆಸ್ಟೋರೆಂಟಾಂತ್, ಉಪ್ರಾಂತ್ ತ್ರೀ ಸ್ಟಾರ್, ಉಪ್ರಾಂತ್ ಫೈವ್ ಸ್ಟಾರ್ ಹೊಟೆಲಾಂನಿ ಸೆವಾ ದಿಲ್ಲಿ ವ್ಹಡ್ಪಣ್ ಬೇಸಾಯ್‍ಗಾರ್ ಆಂತೊನಿಚಿ. ಸುರ್ವೆರ್ ವೇಯ್ಟರ್, ಮಾಗಿರ್ ಮೆನೇಜರ್ ಆನಿ ಸಭಾರ್ ವರ್ಸಾಂ ಬಾರ್-ಮೆನೇಜರ್ ಜಾವ್ನ್ ಕಾಮ್ ಕೆಲಾ. ಹೊಟೇಲಾಚ್ಯಾ ಸರ್ವಿಸಾರ್ ಆಸ್‍ಲ್ಲ್ಯಾ ಆಂತೊನಿಕ್, ಮುಂಬಯ್ ಶಹರಾಂತ್ಲ್ಯಾ ನಾಂವಾಡ್ಡೀಕ್ ಕೊಂಕ್ಣಿ ಕಲಾಕಾರಾಂಚಿ ಒಳಕ್ ಜಾವ್ನ್, ತ್ಯೆ ತೆಕಿದ್ ಗಜಾಲಿ ಆಪ್ಲ್ಯಾ ಸಾಹಿತಿಕ್ ಪ್ರಾಕಾರಾಂನಿ ಹಾಡುನ್ ಸಮಾಜೆಚೊ ಕಚ್ರೊ ಲೊಕಾಂನಿ ಪಳೆಂವ್ಚ್ಯಾ ಬರಿಂ ಸುಫಳ್ ಪ್ರಯತ್ನ್ ಕೆಲ್ಲೊ ಆಂತೊನ್, ಮುಂಬಯಿಂತ್ಲ್ಯಾ ಏಕ್-ದೋನ್ ಯೂನಿಯನಾಂಚೊ ಮುಖೆಲಿಯೀ ಜಾಲೊ. ಕಾರ್ಮಿಕಾಂಚೆಂ ಹಕ್ಕ್, ಘರ್ ಕಾಮಾಗಾರಾಂಚ್ಯಾ ವೆಲ್ಫೇರಾ ಖಾತಿರ್ ಸದಾಂ ಝಗಡ್ಚೊ ಆಂತೊನ್, ತಾಂಚಿಂ ಹಕ್ಕಾಂ ಆನಿ ತಾಂಚ್ಯಾ ಕಷ್ಟಾಂ-ಸುಖಾಂತ್ ಭಾಗಿಯೀ ಜಾಲೊ. ದಾನ್ ಧರ್ಮ್, ಸಯ್ರಿಕೊ ಆನಿ ಸಮಾಜ್ ಸೇವೆ ಥಂಯ್ ಕಿತೆಂಯೀ ಆಪ್ಣೆ ಕರುಂಕ್ ಜಾತಾ, ಥಂಯ್ ನಿಸ್ವಾರ್ಥಿ ಸೇವಾ ದೀಂವ್ಕ್ ಭಾವ್ ಆಂತೊನ್ ಸದಾಂ ತಯಾರ್. ತೆದ್ನಾಂ ತಾಕಾ 'ದುಬ್ಳ್ಯಾಂಚಿ ಚಾನಿ, ಮಂಗ್ಳುರ್‍ಚೊ ಟೊನಿ' ಮ್ಹಳ್ಳೆಂ ಆಡ್ ನಾಂವ್, ದೆವಾಧೀನ್ ಬಾಮ್ಸಾನ್ ದವರ್ಲೆಲೆಂ ಆಂತೊನ್ ಮೆಂದೊಸಾಚ್ಯಾ 'ಸಮಕಾಲೀನ್' ಮಿತ್ರಾಂಚ್ಯಾ ಉಗ್ಡಾಸಾಂತ್ ಆತಾಂಯ್ ಆಸಾ.
ಮುಂಬಂಯ್ತ್ ಕಾಮಾರ್ ಆಸ್‍ಲ್ಲೊ ಆಂತೊನ್, ತಾಚ್ಯೆ ಪುರ್ಸತೆರ್, ತವಳ್‍ಚ್ಯಾ ಪಯ್ಣಾರಿ ಸಂಪಾದಕ್ - ಮಾರ್ಕ್ ಡಿಸೋಜಾ, ನೆಲ್ಲಿ ಡಿಕೋಸ್ತಾ, ಹಾಂಚೆ ಶಿವಾಯ್ ಪಿ. ಡಿಸೋಜಾ, ಸನ್ನಿ ಎ. ಡಿಸೋಜಾ, ಫೆಲಿಕ್ಸ್ ಎ. ಡಿಸೋಜಾ, ಹೆನ್ರಿ ಡಿ'ಪಾವ್ಲಾ... ಹಾಂಚ್ಯಾ ಮೆಳಿಂತ್ ಭರ್ಸೊನ್ ಸುರ್ವೆರ್ ಸವಲಾಂ ವಿಚಾರ್ನ್ ಉಪ್ರಾಂತ್ ಸವಾಲಾಂಕ್ ಜವಾಬಿ, ಚುಟುಕಾಂ, ಕವಿತಾಂ, ಲೇಖನಾ, ಮಟ್ವ್ಯೊ ಕಾಣಿಯೊ ಬರಂವ್ಕ್ ಸುರು ಕೆಲೆಂ. ಮಾತ್ರ್ ನಹಿಂ, ರೊಕಿ ಕಿರೆಂ, ಲಿಯೊ ಕಿರೆಂ, ಬಾಮ್ಸ್ ಕಿರೆಂ ಹಾಂಚೆಂ ಸಂಗಿಂ ರಂಗ್‍ಮಾಂಚಿಯೆರ್'ಯೀ ಚಡ್ಲೊ.
ಅಶೆಂ ನಾಟಕಾಂತ್ ನಟನ್ ಕರುಂಕ್ ಸುರು ಕೆಲ್ಲ್ಯಾ ಉಪ್ರಾಂತ್, 'ಬಾಮ್ಸ್' ಲಿಕ್ಣೆ ನಾಂವಾಚೊ ದೆ| ಬಾವ್ತಿಸ್ ಮೆಂದೊಸಾಚೊ 'ಶಿಸ್ತೆಚೊ ಶಿಪಾಯ್' ಜಾಲೊ, ಆಂತೊನ್ ಮೆಂದೊಸ್. ಮುಂಬಯ್ ಮಾಜ್ಗಾಂವ್ ಸೈಂಟ್ ಮೇರಿಸ್ ಹೊಲಾಂತ್ ಖೆಳಯಿಲ್ಲ್ಯಾ ಜೆ.ಬಿ. ಮೊರಾಯಾಸಾಚ್ಯಾ 'ಹಿ ವಾಟ್ ಯೆಮ್ಕೊಂಡಾಚಿ' ನಾಟಕಾಂತ್ ಪಾತ್ರ್ ಖೆಳ್ಳೊಲೊ ಉಗ್ಡಾಸ್ ಆಂತೊನಾಮ್ ಆತಾಂಯೀ ಕಾಡ್ತಾ. ಬಾಮ್ಸಾಚೆ ಜೆ ಕಿತ್ಲೆ ನಾಟಕ್, ಮಾಜ್ಗಾಂವ್ ಸೈಂಟ್ ಮೇರಿಸಾಂತ್ ಖೆಳಯ್ಲ್ಯಾತ್‍ಗೀ, ತಾಂತ್ಲ್ಯಾ ಚಡುಣೆಂ ಸರ್ವ್ ನಾಟಕಾಂಚ್ಯಾ ಯಶಸ್ವೆ ಪಾಟ್ಲ್ಯಾನ್ ಆಂತೊನಿ ಮೆಂದೊಸಾಚೊ ಹಾತ್ ಆಸ್ತಾಲೊಚ್. ಹಾಕಾ ಬಾಮ್ಸಾಚಿಚ್ ಗವಾಯ್ ಆಸಾ.
ಬಾಮ್ಸ್ ಗುರು ಆನಿ ಆಂತೊನಿ ಶಿಸ್ ಆನಿ ದೊಗಾಂಯ್ಚೆಂ ಆಲ್ಕುಂಜ್ 'ಮೆಂದೊಸ್', ದೊಗಾಂಯ್ಚೆಂ ಇಸ್ಕೊಲಾಚೆಂ ಶಿಕಾಪ್ ಉಣೆಂಚ್. ಬಾಮ್ಸ್ ತಿಸ್ರಿ ತರ್, ಟೊನಿ ಸವಿ. ತಾಂಣಿ ದೊಗಾಂಯ್ನಿ ತಿಸ್ರಿ+ಸವಿ=ನವಿ ಕರುನ್, ಕೊಂಕ್ಣಿ ನಾಟಕ್ ಶೆತಾಂತ್ ಸುಗ್ಗೆಚೊ ಪಾವ್ಸ್'ಚ್ ವೊತ್ಲೊ. ಬಾಮ್ಸ್ ಕೋಟಿ ತರ್, ಟೊನಿ ಚನ್ನಯ್ಯ! ಬಾಮ್ಸಾಚ್ಯಾ ನಿಮಾಣ್ಯಾ ಘಡಿಯೆ ಮ್ಹಣಾಸರ್ ತಾಚೆಲಾಗಿಂ ಸಂಪರ್ಕ್ ದವರ್ನ್ ಆಸ್ಲೆಲ್ಯಾ ಥೊಡ್ಯಾಚ್ ಮಿತ್ರಾಂ ಪಯ್ಕಿ ಟೊನಿ ಮೆಂದೊಸ್ ಪಯ್ಲ್ಯಾ ಪಂಗ್ತಿರ್ ಆಸಾ.
ಆಂತೊನಿಚ್ಯಾ ಸಾದ್ಯಾಪಣಾಕ್ ಆನಿ ಕಾಮಾಂತ್ ಆಸ್ಚ್ಯಾ ಉಮೇದಿಕ್ ಮೆಚ್ವೊನ್, ತಾಚ್ಯಾಚ್ ಮೆನೇಜರಾನ್ ಆಂತೊನಿಕ್ ದುಬಾಯ್ ಸಂಸಾರಾಕ್ ಧಾಡ್ಲೊ. ತವಳ್ಚೆಂ ಹೊಟೇಲ್, 'ಏರ್ ಲಾಯ್ನ್'೦ತ್ ವಾವ್ರ್ ಸುರು ಕೆಲ್ಲ್ಯಾ ಆಂತೊನಿನ್, ಮುಕಾರಿಂ ಧಾ-ಬಾರಾ ವರ್ಸಾಂ ಮ್ಹಣಾಸರ್ ತ್ಯೆಚ್ ಹೋಟೆಲಾಂತ್ ಠಿಕ್ಲೊ ಆನಿ ಉಂಚಾಯೆಕ್ ಪಾವ್ಲೊ. ಹೋಟೆಲ್ ವಾವ್ರಾನ್ ತಾಕಾ ಸಾಂಡ್ಲೊನಾ ಆನಿ ಹೋಟೆಲ್ ವಾವ್ರಾಕ್ ಆಂತೊನಿನ್ ಸೊಡ್ಲೆಂನಾ.
ಉಪ್ರಾಂತ್ ತಾಣೆಂ ಆನಿ ತಾಚ್ಯಾ ಸಾಂಗಾತ್ಯಾಂನಿ ಮೆಳೊನ್ ದುಬಾಯ್ ಡೇರಾಂತ್ 'ಕೆನರಾ ರೆಸ್ಟೋರೆಂಟ್' ಸುರು ಕರುನ್ ಥೊಡೊ ತೇಂಪ್ ಚಲಯ್ಲೆಂ. ಲೊಕಾಮೊಗಾಳ್ ಜಾಲ್ಲೆಂ 'ಕೆನರಾ ರೆಸ್ಟೋರೆಂಟ್' ಸಾಂಗಾತ್ಯಾಂಚೊ ಸಾಂಗಾತ್ ತುಟ್ತಚ್ ಬಂಧ್ ಪಡ್ಲೆಂ. ಪುಣ್ ಆಂತೊನಿ ನಿರಾಸ್ ಜಾಂವ್ಕ್ ನಾ... ತಾಣೆಂ ಆಪ್ಲಿ ವಾಟ್ ವಿಂಚ್ಲಿ ಆನಿ ಕುವೇಯ್ಟ್ ಪಾವ್ಲೊ.
'ಏರ್ ಲಾಯ್ನ್ಸ್' ಹೋಟೆಲಾಚ್ಯಾ ಜನರಲ್ ಮೆನೇಜರಾಚ್ಯಾ ವಿನಂತೆಕ್ ಲಾಗೊನ್ ಪರತ್ ಕುವೇಯ್ಟ್ ಥಾವ್ನ್ ದುಬಾಯ್ ಪಾವ್ಲೊ. ಆತಾಂ 'ಪಾಮ್ ಬೀಚ್' ಹೋಟೆಲಾಚ್ಯಾ ಬಾರಾಂತ್ ಬಾರ್ ಮೆನೇಜರ್ ಜಾವ್ನ್ ಜವಾಬ್ದಾರಿ ವಹ್ಸಿಲಿ. ತ್ಯೆ ವೆಳಾರ್ ಪುರ್ಸತೆಕ್ ಆನಿ ಗಿರಾಂತೆಕ್ ಮ್ಹಣೊನ್ ಇಲ್ಲೊ-ಇಲ್ಲೊ ಚಾಕೊಂಕ್‍ಯೀ ಸುರು ಕೆಲೆಂ. ಆತಾಂಯೀ ಅಪ್ರೂಪ್ ತರೀ ಇಲ್ಲೆಂ ಇಲ್ಲೆಂ ಹೋಟೆಲ್ ಶೈಲಿರ್ ಪಾರ್ಟ್ಯಾಂಕ್ ಗೆಲ್ಲ್ಯಾ ತವಳ್ ಏಕ್ ದೋನ್ ಥೆಂಬೆ ಆಪುರ್ಬಾಯೆನ್ ಮಾರ್ತಾ ಆನಿ ಹೆರಾಂಕ್‍ಯೀ ವಾಂಟ್ತಾ. ಪಾರ್ಟ್ಯೊ ಸಂಭ್ರಮಾಕ್ ಹಾಂವೆಂ ಆನಿ ತಾಣೆಂ ಸಾಂಗಾತಾಚ್ ಬಸ್ಕಾ ವಿಂಚ್ಚಿ ಆನಿ ಸಾಂಗಾತಾಚ್ ಭಲಾಯ್ಕಿ ಮಾಗ್ಚಿ ಆನಿ 'ಚಿಯರ್ಸ್' ಮ್ಹಣೊನ್ ಬರೆಂ ಮಾಗ್ಚೆಂ!
ಗಾಂವಾಂತ್ ಕೊಂಕ್ಣೆಚಿ ಕೀಡ್ ಲಾಗ್‍ಲ್ಲೊ ಆಂತೊನಿ, ದುಬಾಯ್ ಸಂಸಾರಾಂತ್ ವಗೊ ಬಸ್ತಾಲೊ ತರೀ ಕಶೆಂ? ಕೊಂಕ್ಣಿ ಖಾತಿರ್ ತಾಚೊ ವಾವ್ರ್ ರಾವ್ಲೊನಾ.
'ಪಯ್ಣಾರಿ'ಚ್ಯಾ ವಿಕ್ರ್ಯಾ ಖಾತಿರ್ ಸತತ್ ವಾವುರ್ಲೊ. ತಾಚೊ ಫಳ್ ಜಾವ್ನ್ ದುಬಾಯಾಂತ್ 'ಮಾಲಿಕ್ ನೀವ್ಸ್ ಏಜೆನ್ಸಿ' ಮುಕಾಂತ್ರ್ ಪಯ್ಲೆ ಪಾವ್ಟಿಂ ದುಬಾಯ್ಚ್ಯಾ ವಾಚ್ಪ್ಯಾಂಕ್ ಕೊಂಕ್ಣಿ ಪತ್ರ್ ವಾಚುಂಕ್ ಮೆಳ್ಳೆಂ.
ತಿತ್ಲ್ಯಾರ್ ಆಂತೊನಿ ಖುಶ್ ಪಾವ್ಲೊನಾ. ವಿಕ್ರ್ಯಾ ಖಾತಿರ್ ಘರಾಂ-ಘರಾಂನಿ ವಚೊನ್ ಸುಖ್-ದುಖ್ ವಿಚಾರ್ನ್, 'ಪಯ್ಣಾರಿ'ಚೊ ವಿಕ್ರೊ ಅಂತ್ರಳಾಕ್ ಪಾವಯಿಲ್ಲೊ 'ಪಯ್ಣಾರಿ ಪೈಲೆಟ್' ಜಾಲೊ. ಸಾಂಗಾತಾಚ್ ಇಸ್ತಿಹಾರಾಂ, ಜಾಯ್ರಾತಾಂ, ಸಂದೇಶ್, ಶುಭಾಶಯ್ ಮ್ಹಣೊನ್ 'ಪಯ್ಣಾರಿ'ಕ್ ಘಟಾಯ್ ಆನಿ ಪಾಟಿಂಬೊ ದಿಲೊ ಆಂತೊನಿ ಮೆಂದೊಸಾನ್.
ತವಳ್ ತಾಚೆ ಮಿತ್ರ್ ಮಾಯ್ಕಲ್ ಮಿನೇಜಸ್ ಆನಿ ಜೆ.ಎಕ್ಸ್. ಮಥಾಯಸ್ ಸಂಗಿಂ ಮೆಳೊನ್ ಏಕ್ 'ತ್ರಿಮೂರ್ತಿ' ಪಂಗಡ್ ಘಡ್ಲೊ. ತ್ಯೆ ಶಿವಾಯ್ ಕೊಂಕ್ಣಿ ವಾಚ್ತೆಲ್ಯಾಂ ಖಾತಿರ್'ಚ್ ಸೀಮಿತ್ ಜಾಲ್ಲಿ ಕೊಂಕ್ಣಿ ವಾಚನಾಲಯ್‍ಯೀ ಸ್ಥಾಪನ್ ಕೆಲೆಂ ಆನಿ ಯಶಸ್ವೆನ್ ಚಲಯ್ಲೆಂ.
ಕೊಂಕ್ಣೆಚೊ ಫಾಮಾದ್ ನಾಟಕಿಸ್ತ್ ಫ್ರಾನ್ಸಿಸ್ ಫೆರ್ನಾಂದ್, ಕಾಸ್ಸಿಯಾ ಹಾಚೊ 'ದೆವಾನ್ ಕೆಲ್ಲೊ ಗುನ್ಯಾಂವ್' ನಾಟಕ್ 1979 ಇಸ್ವೆಂತ್, 'ಇಂಡಿಯನ್ ಎಸೋಸಿಯೇಶನ್' ಹೊಲಾಂತ್ ಖೆಳವ್ನ್ ಧಾಕ್ಲೊ ಮಾರ್'ಲ್ಲೊ ಆಂತೊನಿ ಮೆಂದೊಸಾಚ್ಯಾಚ್ ಮುಖೇಲ್ಪಣಾರ್! ಮಾತ್ರ್ ನಹಿಂ, ಪಾತ್ರ್ ಘೇವ್ನ್ ಲೊಕಾಚಿಂ ಮನಾಂ ಜಿಕ್ಲೊಲೊ ಏಕ್ ಆಪುಟ್ ಕಲಾಕಾರ್ ಆಂತೊನಿ ಮೆಂದೊಸ್. ಆಜೂನ್‍ಯೀ ತೊಚ್ 'ಜೋಶ್' ಆನಿ ತಿಚ್ ಶಿಸ್ತ್ ಆಂತೊನಿ ಮೆಂದೊಸಾಲಾಗಿಂ ಆಸಾ ಮ್ಹಣ್ಚಿ ವಿಷಯ್ ಹೊಗ್ಳಿಕೆಕ್ ಫಾವೊ.
ವಿಲ್ಫಿ ರೆಬಿಂಬಸ್, ಹೆನ್ರಿ ಡಿಸಿಲ್ವಾ, ಫ್ರಾನ್ಸಿಸ್ ಫೆರ್ನಾಂಡೀಸ್ ಕಾಸ್ಸಿಯಾ, ಸಂಗೀತ್‍ಕಾರ್ ಹೆನ್ರಿ ಡಿಸೋಜಾ, ಲೊರೆನ್ಸ್ ಸಲ್ಡಾನ್ಹಾ... ಅಸಲ್ಯಾ ಸಬಾರಾಂಚ್ಯಾ ಸಿಡಿ, ಕೆಸೆಟ್ಯೊ ಆನಿ ಬೂಕ್ ವಿಕ್ರ್ಯಾಕ್ ಪಾಟಿಂಬೊ ದೀವ್ನ್, ಕಿತೆಂಚ್ ಮುನಾಫೊ ನಾಸ್ತಾಂ, ಫಕತ್ ಕೊಂಕ್ಣಿ ಭಾಸೆ ಖಾತಿರ್ ವಾವುರ್ನ್, ಕೊಂಕ್ಣೆಚೊ ಬಳ್ವಂತ್ ಪಾಟಿಂಬೊ ಜಾವ್ನ್ ಆಂತೊನಿ ಮೆಂದೊಸಾನ್ ನಾಂವ್ ಕೆಲೆಂ.
2005 ಇಸ್ವೆಂತ್, 'ದಾಯ್ಜಿ ದುಬಾಯ್' ಸಂಘಟನಾನ್, ಆಂತೊನಿ ಮೆಂದೊಸಾಕ್ ಸನ್ಮಾನಿತ್ ಕರುನ್ ಮಾನ್ ಕೆಲಾ. ದಾಯ್ಜಿ ದುಬಾಯ್ ಸಂಘಟನಾಚೊ ತೊ ಏಕ್ ಕಾರ್ಯಾಳ್ ಸಾಂದೊ ಮಾತ್ರ್ ನಹಿಂ, ಹರ್ಯೆಕ್ಲ್ಯಾ ದಾಯ್ಜಿ ದುಬಾಯ್ ಸಾಂದ್ಯಾಂಕ್ ಆಂತೊನಿ ಮೆಂದೊಸಾಚೆರ್ ವಿಶೇಷ್ ಗೌರವ್ ಆನಿ ಅಭಿಮಾನ್. ಟಾಯ್ಮ್ ಮೆನೇಜ್‍ಮೆಂಟ್ ಆನಿ ದಿಲ್ಲಿ ಜವಾಬ್ದಾರಿ ವೇಳಾರ್ ಆಂತೊನಿ ಮೆಂದೊಸ್ ಫಾಮಾದ್. ತಿಚ್ ತಾಚಿ ಸಕತ್ ಆನಿ ಗಿರೇಸ್ತ್'ಕಾಯ್.
ಪತಿಣ್ ದೆ| ಬೆನೆಡಿಕ್ಟಾ, ನಿಡ್ಡೋಡಿಚ್ಯಾ ದಡ್ಡಾಂತ್ಲಿ ಜಾವ್ನಾಸೊನ್, ಏಕ್ ಧುವ್ ಜೊಯ್ಸ್ ಆನಿ ತೆಗಾಂ ನಾತ್ರಾಂ ಅಂತೊನಾಮಾಕ್.
ಪತಿಣೆಚ್ಯಾ ಅಸ್ವಸ್ಥ್'ಪಣಾಕ್ ಲಾಗೊನ್ 1997 ಇಸ್ವೆಂತ್ ನಿವೃತ್‍ಪಣ್ ಕಾಣ್ಘೆವ್ನ್, ಮುಂಬಯ್ಚ್ಯಾ ಆಪ್ಲ್ಯಾ ಘರಾ ಪಾವ್ಲೊ ಆನಿ ಪತಿಣೆಕ್ ಸಾಂಗಾತ್ ದಿಲೊ ಆಂತೊನಾಮಾನ್. ದೆವಾಚ್ಯಾ ನಿರ್ಮೊಣ್ಯಾಕ್ ಕೋಣ್ ಆಡಾಂವ್ಕ್ ಸಕ್ತಾ? 2001 ಇಸ್ವೆಂತ್ ಪತಿಣ್ ಬೆನೆಡಿಕ್ಟಾನ್ ಆಪ್ಲೊ ನಿಮಾಣೊ ಉಸ್ವಾಸ್ ಸೊಡ್ತಚ್, ಜಿಣಿಯೆಂತ್ ಎಕ್ಸುರೊ ಜಾಲೊ ಆಂತೊನಿಬಾಬ್. ಪುಣ್, ಜಾಂವಯ್ ಡೆರಿಕ್ ಆನಿ ಧುವ್ ಜೊಯ್ಸ್ ಹಾಂಚ್ಯಾ ಒತ್ತಾಯೆಕ್ ಲಾಗೊನ್ ಪರತ್ ದುಬಾಯ್ ಯೇವ್ನ್ ಪಾವ್ಲೊ. ಆತಾಂ ದುಬಾಯ್ - ಕರಾಮಾ ಮ್ಹಳ್ಳ್ಯಾ ಜಾಗ್ಯಾರ್ ಧುವ್-ಜಾಂವಯ್ ಆನಿ ತೆಗಾಂ ನಾತ್ರಾಂ ಸಾಂಗಾತಾ ನಿವೃತ್‍ಪಣಾಚಿ ಜಿಣಿ ಜಿಯೆವ್ನ್ ಆಸಾ ಆಂತೊನಾಮ್.
ಜೀವಿತಾಚ್ಯೊ ಹರ್ಯೆಕ್ ಘಡಿಯೊ ತುಕುನ್ ಆನಿ ಮಾಪುನ್ ಕಳಿತ್ ಆಸ್‍ಲ್ಲೊ ಆಂತೊನಾಮ್, ಜಾಂವ್ ಉಲವ್ಣ್ಯಾಂತ್ ವ ರಿತಿ-ರೇಗ್ರಾಂತ್ ಏಕ್ ಶಿಸ್ತೆಚೊ ಶಿಪಾಯಿ!
- ಪ್ರೀತಮ್ ಕಿರೆಂ
[ ಕೊಂಕ್ಣಿ ಭಾಸ್ ಆನಿ ಲೊಕಾಂ ಖಾತಿರ್ ಆಪ್ಲ್ಯಾ ತಾಂಕಿವರ್ತಿ ಸೆವಾ ದೀವ್ನ್, ಹಜಾರೊಂ ಕೊಂಕ್ಣಿ ಲೊಕಾಂಚಿ ಮನಾಂ ಜಿಕ್ಲೆಲ್ಯಾ ಆಂತೊನಾಮಾಕ್, ತಾಚ್ಯೆ ಜಿಣ್ಯೆಚಿ 75 ವರ್ಸಾಂ ಸಂಪಯಿಲ್ಲ್ಯಾ ಆಂತೊನಾಮಾಕ್ ಪಯ್ಲ್ಯಾ ಸುವಾತೆರ್ ಅಭಿನಂದನ್ ಪಾಠಯ್ತಾಂವ್ ಆನಿ ಬೊರ್‍ಯಾ ಭಲಾಯ್ಕೆಂತ್ ಭರ್'ಲ್ಲೆಂ ಲಾಂಬ್ ಆವ್ಕ್ ಮಾಗ್ತಾಂವ್ ]
Tags:
Tony Niddodi, Anthonaam, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
2 Comment/s.
ತುಜ್ಯಾ ಕೆಲ್ಲ್ಯಾ ಕೊಂಕಣಿ ಕಾಮಾಂಕ್ ಹೊಗ್ಳಿಕ್ ಫಾವೊ. ಮುಂಬಯ್ ಆಸ್ತಾನಾ ಥೊಡ್ಯಾ ನಾಟಕಾಂಕ್ ಹಾಂವೆಂ ಪಳೆಯ್ಲಾಂ.
ಶಹಬ್ಬಾಸ್ ಅಂತೊನಿ. ತುಕಾ ಬೊರೆಂ ಮಾಗ್ತಾ, ಬರಿ ಭಲಾಯ್ಕಿ ಮಾಗ್ತಾ. ತುಜಿಂ ಕಾಮಾಂ ಮೆಚ್ವಣೆಕ್ ಫಾವೊ.