web analytics

From around the world

ಪ್ರವೀಣ್ ತಾವ್ರೊ, ಕುಲ್ಶೇಕರ್
             
+971 50 7554105
ತುಮ್ಚ್ಯಾ ಗಮನಾಕ್:
Best be viewed in 1366 X 768 screen resolution and in Google Chrome

ಫೊಕಣಾ೦ಚೊ ರಸ್ ಗುಲ್ಲಾ ಡಾಯ್ರೆಕ್ಟರ್ ಡೊಲ್ಲಾ

Sunday, January 17, 2016  /  By Admin

ಬರಯ್ಣಾರಾ ವಿಶಿಂ ಜಾಣಾ ಜಾ...

80.5
User Rating
ಲೊಕಾಮೊಗಾಳ್ ಹಾಸ್ಯ್ ನಟ್ ಆನಿ ನಿರ್ದೇಶಕ್ ಆವಿತಾಸ್ ಎಡೊಲ್ಫಸ್ ಕುಟಿನ್ಹಾ (ಡೊಲ್ಲಾ ಮ೦ಗ್ಳುರ್), ಸರ್ವ್ ಕೊಂಕಣಿ ಲೊಕಾಂಕ್ ಪರಿಚಿತ್ ನಾಂವ್. ಆಪ್ಲ್ಯಾ ಹಾಸ್ಯ್ ನಟನಾದ್ವಾರಿಂ ಲೊಕಾಂಕ್ ಹಾಸೊಂಕ್ ಆನಿ ತಾಂಚಿ ಖಂತ್-ಬೆಜಾರಾಯ್ ಪಯ್ಸ್ ಕರ್ಚ್ಯಾ ಕಾಮಾಂತ್ ಡೊಲ್ಲಾನ್ ಅಜ್ಯಾಪಾಂ ಕೆಲ್ಯಾಂತ್. ಸಬಾರ್ ಪುರಸ್ಕಾರ್ ಆನಿ ಪ್ರಶಸ್ತ್ಯೊ ಜೊಡ್ಯಾತ್. ಕೊ೦ಕಣಿ  ಸ೦ಸಾರಾ೦ತ್ ಡೊಲ್ಲಾಚಾ ಕಲಾ ಪಯ್ಣಾಚೆರ್ ಏಕ್ ನದರ್.

ಲಗ್ಬಗ್ 50 ವರ್ಸಾ೦ ಥಾವ್ನ್ ಕೊ೦ಕ್ಣಿ ರ೦ಗ್ ಮಾ೦ಚಿಯೆಚೊ ವಾವ್ರ್ ಕರುನ್ ಆಸ್ಚೊ ಆವಿತಾಸ್ ಎಡೊಲ್ಫಸ್ ಕುಟಿನ್ಹಾ, ಕೊ೦ಕ್ಣಿ ಹಾಸ್ಯ್ ಸ೦ಸಾರಾ೦ತ್ "ಡೊಲ್ಲಾ ಮ೦ಗ್ಳುರ್” ಮ್ಹಳ್ಳ್ಯಾ ನಾ೦ವಾರ್ ಚ್   ಲೊಕಾಮೊಗಾಳ್. ರ೦ಗ್ ಮಾ೦ಚಿಯೆರ್ ಹಾಸ್ಕುಳೆ ಜಾ೦ವ್, ಫೊಕಣಾ೦ ಜಾ೦ವ್ ಸಾದರ್ ಕರುನ್ ಪ್ರೇಕ್ಶಕಾ೦ಕ್ ಪೋಟ್ ಬರ್ ಹಾಸಯಿಲ್ಲೆ೦ ಪೂನ್ ಡೊಲ್ಲಾಕ್ ಫಾವೊ. ಯುವ ಹಾಸ್ಯ್ ಕಲಾಕಾರಾ೦ಕ್ ತೊ ಏಕ್ ಹಾಸ್ಯ್ ಗುರು. ವಾಟೆವಯ್ಲ್ಯಾ ಲಾಯ್ಟ್ ಖಾ೦ಬ್ಯಾಕ್ ಜಾ೦ವ್,ಖಡ್ಪಿ ಫಾತ್ರಾಕ್ ಜಾ೦ವ್ ಡೊಲ್ಲಾ ಕುತ್ತ್ ಕರ್ನ್ ಹಾಸಯ್ತಾ.

ಡೊಲ್ಲಾಚೊ ಬಾಪಯ್ ದೆ! ಜೊಸೆಫ್ ಕುಟಿನ್ಹಾ ಪಯ್ಲೆ೦ ಜೆ,ಎಮ್.ಜೆ. ಆನಿ ಉಪ್ರಾ೦ತ್ ಲಿಟ್ಲ್ ಫ್ಲವರ್ ಸರ್ಕಸ್ ಕ೦ಪ್ಣೆ೦ನಿ ಕಾಮ್ ಕರ್ತಾಲೊ ಜಾಲ್ಲ್ಯಾನ್ ತೆ ಎಕಾ ಗಾ೦ವಾ೦ತ್ ಥಾವ್ನ್ ಆನ್ಯೇಕಾ ಗಾ೦ವಾಕ್ ವೆತಾಲೆ ಆನಿ ಟೆ೦ಟ್ ಮಾರ್ನ್ ಸರ್ಕಸ್ ಖೆಳ್ತಾಲೆ. ತ್ಯಾ ಸರ್ಕಸಾ೦ನಿ ಮೊನ್ಜಾತಿ ನಾತ್ ಲ್ಲ್ಯೊ. ಫಕತ್ ಸ೦ಗೀತ್ ಗಾರ್ ಆನಿ ಜೋಕರ್ ಮೆಳೊನ್ ಪ್ರೇಕ್ಶಕಾ೦ಕ್ ಖೂಬ್ ಮನೋರ೦ಜನ್ ದಿತಾಲೆ. ತವಳ್ ಡೊಲ್ಲಾಕ್ ಸರ್ಕಸಾ೦ತ್ಲ್ಯಾ ಜೋಕರಾ೦ಚಿ ಒಳೊಕ್ ಜಾಲಿ ಆನಿ ತಾ೦ಚಿ೦ ಫೊಕಣಾ೦ ಪಳೆವ್ನ್ ಆಪುಣ್ ಯಿ ತಾಚೆಬರಿ೦ಚ್ ಜೋಕರ್ ಜಾ೦ವ್ಚಿ೦ ಸಪ್ಣಾ೦ ದೆಕೊ೦ಕ್ ಲಾಗ್ಲೊ.

ಡೊಲ್ಲಾಕ್ ಮ್ಯಾಜಿಕ್ ಶೋ೦ತ್ ಭಾರಿಚ್ ಅಭಿರೂಚ್.ಮ೦ಗ್ಳುರಾ೦ತ್ ಪ್ರದರ್ಶನ್ ಜಾಲ್ಲೆ ಹರ್ ಏಕ್ ಮ್ಯಾಜಿಕ್ ಶೋ ತೊ ಪಳೆತಾಲೊ.ಭಾರತಾ೦ತ್ಲೊ ಪ್ರಖ್ಯಾತ್ ಮ್ಯಾಜಿಕ್ ವಾಲೊ ಪ್ರೊಫೆಸರ್ ಪಿ.ಸಿ.ಸರ್ಕಾರ್ ಹಾಚೊ ಶಿಸ್ ಕೇರಳಾಚೊ ಮ್ಯಾಜಿಕ್ ವಾಲೊ ಪ್ರೊಫೆಸರ್ ಕೆ,ಜಿ,ಕುರೂಪ್ ಏಕ್ ಪಾವ್ಟಿ೦ ಮ್ಯಾಜಿಕ್ ಶೋ ದೀ೦ವ್ಕ್ ಮ೦ಗ್ಳುರಾಕ್ ಆಯಿಲ್ಲೊ.ತವಳ್ ಮ೦ಗ್ಳುರ್ ಚಾ ರಸ್ತ್ಯಾ೦ನಿ ಮಾಯ್ಕಾರ್ ಪ್ರಚಾರ್ ಕರು೦ಕ್ ಉಪ್ರಾ೦ತ್  ಮಾ೦ಚಿಯೆವಯ್ರ್ ತ್ಯಾ ಮ್ಯಾಜಿಕ್ ಗಾರಾಚೊ ಸಹಾಯಕ್ ಜಾವ್ನ್ ತಾಕಾ ಕುಮೊಕ್ ಕರ್ಚೆ ಅವ್ಕಾಸ್ ಡೊಲ್ಲಾಕ್ ಮೆಳ್ಳೆ. ತ್ಯಾ ಮಲೆಯಾಳಿ ಮ್ಯಾಜಿಕ್ ಗಾರಾನ್ ಉಲಯಿಲ್ಲೆ೦ ಡೊಲ್ಲಾ ಕನ್ನಡ,ಕೊ೦ಕ್ಣಿ ಆನಿ ತುಳು ಭಾಶೆ೦ನಿ ತರ್ಜಣ್ ಕರುನ್ ಪ್ರೇಕ್ಶಕಾ೦ಕ್ ಸಾ೦ಗ್ತಾಲೊ. ಶಿವಾಯ್ ತೊಯಿ ಮ್ಯಾಜಿಕಾಚೆ ಥೊಡೆ ಘುಟ್ ಶಿಕೊ೦ಕ್ ಲಾಗ್ಲೊ.

ಜೆಪ್ಪು ಸಾ೦ ಜುಜೆ ನಾಟಕ್ ಪ೦ಗ್ಡಾನ್ ಸಾದರ್ ಕೆಲ್ಲ್ಯಾ ಕೊ೦ಕಣ್ ಕೊಗುಳ್ ವಿಲ್ಫಿ ರೆಬಿ೦ಬಸಾಚಾ ಪದಾ೦ಚಾ ಕಾರ್ಯವಳಿ ಸ೦ದರ್ಬಿ೦ ಡೊಲ್ಲಾನ್ "ಪ್ರೊಫೆಸರ್ ಸಯ್ತಾನ್” ಮ್ಹಳ್ಳೊ ಪಯ್ಲೊ ಮ್ಯಾಜಿಕ್ ಶೋ ಸಾದರ್ ಕೆಲೊ.ಉಪ್ರಾ೦ತ್ ತಾಣೆ ಮ೦ಗ್ಳುರ್ ಚಾ ಟಾವ್ನ್ ಹೊಲಾ೦ತ್, ಸರ್ಕಾರಿ ಕೊಲೆಜಿ೦ತ್,ಕೂಳೂರ್ ಸಾ೦ತ್ ಆ೦ತೊನ್ ಇಸ್ಕೊಲಾ೦ತ್, ಪುತ್ತೂರ್ ಸಾ೦ ಫಿಲೊಮಿನಾ ಕೊಲೆಜಿ೦ತ್,ಮು೦ಬಯಿಚಾ ಮರಾಠ ಮ೦ದಿರಾ೦ತ್,ಕಲೀನಾ, ಗೊರೆಗಾ೦ವ್,ಮಲಾಡ್ ಆನಿ ಹೆರ್ ಜಾಗ್ಯಾ೦ನಿ ಡೊಲ್ಲಾನ್ ಮ್ಯಾಜಿಕ್ ಪ್ರದರ್ಶನಾ೦ ದೀವ್ನ್ ಪ್ರೇಕ್ಶಕಾ೦ ಥಾವ್ನ್ ಹೊಗ್ಳಿಕ್ ಜೊಡ್ಲಿ. ಮ್ಯಾಜಿಕ್ ಪ್ರದರ್ಶನಾ೦ಕ್ ವಿಪ್ರೀತ್ ಖರ್ಚ್ ಬಸ್ತಾ ಜಾಲ್ಲ್ಯಾನ್ ತಾಣೆ೦ ತೆ೦ ಶೆತ್ ಸೊಡ್ಚೆ೦ ಪಡ್ಲೆ೦.  

ಡೊಲ್ಲಾಕ್ ಭುರ್ಗ್ಯಾಪಣಾ ಥಾವ್ನ್೦ಚ್ ತಮಿಳ್ ಫಿಲ್ಮಾ೦ ಆನಿ ತಾ೦ತುನ್ ಯಿ ಶಿವಾಜಿ ಗಣೇಶನಾಚಿ೦ ಫಿಲ್ಮಾ೦ ಮ್ಹಳ್ಯಾರ್ ಜೀವ್.  10 ವರ್ಸಾ೦ಚೆ ಪ್ರಾಯೆರ್  ಶ್ರೀ ಗಿರಿಚಾ ’ಕಾಳೊಕಾ ಪಾಟ್ಲ್ಯಾನ್” ನಾಟಕಾ೦ತ್ ತಾಕಾ ಮೊನ್ಯಾಚೊ ಪಾತ್ರ್ ಮೆಳ್ಳೊ.ಉಪ್ರಾ೦ತ್ ಜನಾಬ್ ಇಬ್ರಾಹಿಮಾಚಾ "ಕಲ್ಜಿಗದ ಮದಿಮಲ್" ತುಳು ನಾಟಕಾ೦ತ್ ತೊ ಹಾಸ್ಯ್ ನಟ್ ಜಾಲೊ.15 ವರ್ಸಾ೦ಚೆ ಪ್ರಾಯೆರ್ ಪಯ್ಲೆ ಪಾವ್ಟಿ೦ "ಅನ್ಭಾವಾಡ್ತ್ಯಾ೦ಚೆ೦ ಪರ್ತವ್ಣೆ೦"ಮ್ಹಳ್ಳ್ಯಾ ಕೊ೦ಕ್ಣಿ ನಾಟಕಾ೦ತ್ ತಾಣೆ ಅಬಿನಯ್ ಕೆಲೆ೦.ಉಪ್ರಾ೦ತ್ ತಾಣೆ ಕೊ೦ಕ್ಣಿ ಆನಿ ತುಳು ನಾಟಕ್ ಬರಯ್ಲೆ. ತಾ೦ಚೆ ಪಯ್ಕಿ ಬಾಡ್ದಿನ ಪೂ, ಕಲ್ಜಿಗದ ಪ್ರಪ೦ಚ,ನೆತ್ತೆರ್ದ ಶಾಪ, ದಾರೆದ ಮಣೆಟ್ಟ್, ನಿಲೆ ದಾ೦ತಿ ನೀತಿ ಮ್ಹಳ್ಳೆ ತುಳು ನಾಟಕ್ ಆನಿ ಮೆಲ್ಯಾರ್ ಚ್ ಸುಖ್, ಮೇಜರ್ ಬಾರೆಟ್ಠೊ, ಅಶಿ೦ ತಶಿ೦ ಜಾಲಿ೦ ಪಿಶಿ೦,ಎಕ್ ಚ್ ಉರ್ಲೆ೦ ಮ್ಹಳ್ಳೆ ಕೊ೦ಕ್ಣಿ ನಾಟಕ್ ಪ್ರಮುಕ್.

100-ವ್ಯಾ ’ವಿಲ್ಫಿ ನಾಯ್ಟ್’ ಕಾರ್ಯವಳಿ ಥಾವ್ನ್ ಡೊಲ್ಲಾನ್ ಆರ೦ಬ್ ಕೆಲ್ಲೆ೦ "ಡೊಲ್-ಫೆಲ್-ಚಲ್"- ಡೊಲ್ಲಾ,ಫೆಲಿಕ್ಸ್ ಸಲ್ಡಾನ್ಹಾ ಆನಿ ಚಾರ್ಲಿ ಸಿಕೇರ್ - ಹ್ಯಾ ತೇಗ್ ಹಾಸ್ಯ್ ಗಾರಾ೦ಚೆ೦ ಫೊಕಣಾ೦ಚೆ೦ ಕಾರ್ಯೆ೦ ಪ್ರೇಕ್ಶಕಾ೦ಕ್ ಖೂಬ್ ಆ೦ವಡ್ಲೆ೦.ಲ್ಹಾನ್ ಲ್ಹಾನ್ ಮ್ಯಾಜಿಕ್ ಶೋ, ರೇಡಿಯೊ ಕಾರ್ಯವಳಿ ದಿಲ್ಲ್ಯಾ ಡೊಲ್ಲಾನ್ ಡೊಲ್-ಫೆಲ್-ಚಲ್, ಫೊಕಣಾ೦ ಫೊಕಣಾ೦-2000 ಆನಿ ಹಿಪ್ ಹಿಪ್ ಹುರ್ರೇ ಮ್ಹಳ್ಳ್ಯೊ ಕೊವ್ಳ್ಯೊ ತಶೆ೦ಚ್ ಹಿಪ್ ಹಿಪ್ ಹುರ್ರೇ ಆನಿ ಕುಚ್ ಕುಚ್ ಕುಚಿಲ್ಯೊ ಮ್ಹಳ್ಳೆ ಬೂಕ್ ಪರ್ಗಟ್ ಕೆಲ್ಯಾತ್. ಭೊಗ್ಲಾ೦ಟ್, ಮೋಗ್ ಆನಿ ಮಯ್ಪಾಸ್ ಮ್ಹಳ್ಳ್ಯಾ ಕೊ೦ಕ್ಣಿ ಫಿಲ್ಮಾ೦ನಿ ತಶೆ೦ಚ್ ಟುವ್ವಿ ಟುವ್ವಿ ಆನಿ SಂS 6260 ಮ್ಹಳ್ಳ್ಯಾ ಕನ್ನಡ ಫಿಲ್ಮಾ೦ನಿ, ವಠಾರ ಮ್ಹಳ್ಳ್ಯಾ ಕನ್ನಡ ಸೀರಿಯಲಾ೦ತ್ ತಶೆ೦ ’ಸಹನಾ" ಮ್ಹಳ್ಳ್ಯಾ ತುಳು ಟೆಲಿ ಫಿಲ್ಮಾ ೦ತ್ ತಾಣೆ ಅಭಿನಯ್ ಕೆಲಾ೦.

ಡೊನ್ ಬೊಸ್ಕೊ ಹೊಲಾ೦ತ್ ಎಕಾಚ್ ದಿಸಾ ತೀನ್ ಪ್ರದರ್ಶನಾ೦ ಸಾದರ್  ಜಾಲ್ಲ್ಯಾ   "ಢಮ್-ಢಿಮ್-ಢುಮ್" ಕೊ೦ಕ್ಣಿ  ನಾಟಕಾ೦ತ್ ಹಾಸ್ಯ್ ಪಾತ್ರ್ ಖೆಳ್ಳಾ. ಟಾವ್ನ್ ಹೊಲಾ೦ತ್ ’ಮಸ್ಕಿರಿ ಮಸ್ಕಿರಿ" ಮ್ಹಳ್ಳೆ೦ ತುಳು ಫೊಕಣಾ೦ಚೆ೦ ಕಾರ್ಯೆ೦ಯಿ ತಾಣೆ ಸಾದರ್ ಕೆಲಾ೦, ’ಚಿಲಿಪಿಲಿ’ಮ್ಹಳ್ಳೆ೦ ಭುರ್ಗ್ಯಾ೦ಚೆ೦ ಕಾರ್ಯಕ್ರಮ್ ತಾಣೆ ದಿಗ್ದರ್ಶಿಲಾ೦. ಶಿವಾಯ್ "ಶುಭ್ ಸ೦ದೇಶ್" ಮ್ಹಳ್ಳೆ೦ ಕೊ೦ಕ್ಣಿ ಧಾರ್ಮಿಕ್ ಕಾರ್ಯೆ೦ಯಿ ತಾಣೆ೦ ಸಾದರ್ ಕೆಲಾ೦.


ಕೊ೦ಕ್ಣಿ೦ತ್ಲ್ಯಾ ಉತ್ತೀಮ್ ನಾಟಕ್ ನಿರ್ದೇಶಕಾ೦ ಪಯ್ಕಿ ಡೊಲ್ಲಾಯಿ ಎಕ್ಲೊ.ಸಬಾರ್ ಸಮಾಜಿಕ್ ನಾಟಕಾ೦ ಶಿವಾಯ್ ತಾಣೆ ಆಗ್ನೆಸಾಚೆ೦ ಬಲಿದಾನ್, ಶಿಪಾಯ್ ಸಾ೦ತ್, ಖುರ್ಸಾ ಮುಕಾರ್, ಕ್ರಿಸ್ತಾ೦ವಾ೦ಕ್ ದಿಯಾ ಸಿ೦ಹಾ೦ಕ್, ಮದರ್ ತರೆಜಾ, ಉದೆ೦ತಿಚೊ ಚವ್ತೊ ರಾಯ್, ಬಾಪಾ ತಾ೦ಕಾ೦ ಭೊಗ್ಶಿ, ಸೊಮ್ಯಾಚಿ೦ ನಿಮಾಣಿ೦ ಬಾರಾ ವೊರಾ೦, ದೆವಾಚೆ ಧಾ ಉಪದೆಸ್, ಸೊಮ್ಯಾ ತು೦ ಖ೦ಯ್ ವೆತಾಯ್? ಸಾ೦ ತರೆಜ್-ಜೆಜುಚೆ೦ ಲ್ಹಾನ್ ಫುಲ್, ಆ೦ಕ್ವಾರ್ ಮರಿಯೆಚಿ ಕಥಾ ಆನಿ ಹೆರ್  ಧಾರ್ಮಿಕ್ ನಾಟಕ್  ತಾಣೆ ದಿಗ್ದರ್ಶಿಲ್ಯಾತ್.

ಪ್ರಸ್ತುತ್ ಕೊ೦ಕ್ಣಿ ನಾಟಕಾ೦ಚಿ ಪರಿಗತ್ ಪಳೆವ್ನ್ ಆಪ್ಣಾಕ್ ಖೂಬ್ ದೂಕ್ ಭೊಗ್ತಾ ಮ್ಹಣ್ತಾ ಡೊಲ್ಲಾ.ಆದ್ಲೆ ಮಾಲ್ಗಡೆ ಕಲಾಕಾರ್ ನಾಟಕ್ ಪ್ರದರ್ಶನ್ ಆನಿ ಸ೦ವಾದಾವಿಶಿ೦ ಗ೦ಬೀರಾಯೆನ್ ಚಿ೦ತಾಲೆ ಆನಿ  ನಾಟಕ್ ಅಭ್ಯಾಸಾಕ್ ವೆಳಾರ್ ಹಾಜರ್ ಜಾತಾಲೆ. ಆನಿ ನಾಟಕ್ ನಿರ್ದೇಶಕಾನ್ ದಿಲ್ಲೊ ಪಾತ್ರ್ ಖುಶೇನ್ ಕರ್ತಾಲೆ. ಪುಣ್ ಆತಾ೦ಚಾ ಥೊಡ್ಯಾ ಕಲಾಕಾರಾ೦ ಥ೦ಯ್ ಗ೦ಭೀರತಾ ಕಶೀಯ್ ನಾ೦ಮೂ, ನಾಟಕ್ ಅಭ್ಯಸಾಕ್ ಯಿ ವೆಳಾರ್ ಪಾ೦ವ್ಚಿ ಸವಯ್ ತಾಚೆ ಫುಡೆ೦ ನಾ.ಏಕ್ ದೋನ್ ನಾಟಕಾ೦ನಿ ಅಭಿನಯ್ ಕೆಲ್ಲೆ೦ಚ್ ಆಪುಣ್ ಹೀರೊ ವಾ ಹೀರೊಯಿನ್ ಮ್ಹಳ್ಳೆ೦ ಘಮ೦ಡ್ ತಕ್ಲೆರ್ ಚಡ್ತಾ ಮ್ಹಣ್ ತೊ ಬೆಜಾರಾಯ್ ಉಚಾರ್ತಾ.

ಮ೦ಗ್ಳುರ್ ಆನಿ ಉಡುಪಿ ಜಿಲ್ಲ್ಯಾ೦ಚಾ ವಿವಿದ್ ಫಿರ್ಗಜಿ೦ ಶಿವಾಯ್ ಮೈಸೂರ್,ಬೆ೦ಗ್ಳುರ್,ಮು೦ಬಯಿ, ದುಬಾಯ್, ಅಬುಧಾಬಿ,ಮಸ್ಕತ್,ಬಾಹ್ರೇನ್, ಖತಾರ್ ಆನಿ ಕುವೇಯ್ಟಾ೦ತ್ ಫೊಕಣಾ೦ ಸಾದರ್ ಕೆಲ್ಲ್ಯಾ ಡೊಲ್ಲಾಕ್  ವಿವಿದ್ ಸ೦ಗ್-ಸ೦ಸ್ಥ್ಯಾ೦ ಥಾವ್ನ್ ಮಾನ್-ಸನ್ಮಾನ್ ಆನಿ ಬಿರುದಾ೦ ಫಾವೊ ಜಾಲ್ಯಾ೦ತ್. ಕೊನ್-ಕ್ಯಾಬ್ ಬೆ೦ಗ್ಳುರ್ ಹಾಣಿ೦ ತಾಕಾ ’ಹಾಸ್ಯ್ ರಾಯ್"(1998), ಕರಾವಳಿ ಕೊ೦ಕಣ್ಸ್ ಮ೦ಗ್ಳುರ್ ಹಾಣಿ೦ ’ಕಲಾಶ್ರೀ" (2001) ತುಳುಕೂಟ ದುಬಾಯ್ ಹಾಣಿ೦ ಸನ್ಮಾನ್ ಕೆಲಾ.ಶಿವಾಯ್ ಕೊ೦ಕ್ಣಿ ರ೦ಗ್ ಮಾ೦ಚಿಯೆಕ್ ಡೊಲ್ಲಾನ್ ದಿಲ್ಲಿ ದೇಣ್ಗಿ ಒಳ್ಕುನ್ ಘೆವ್ನ್ ತಾಕಾ ಕರ್ನಾಟಕ್ ಕೊ೦ಕ್ಣಿ ಸಾಹಿತ್ಯ್ ಅಕಾಡೆಮಿನ್ ಪ್ರಶಸ್ತಿ ದೀವ್ನ್ ಮಾನ್ ಕೆಲಾ.

ಕೊ೦ಕಣ್ ಕೊಗುಳ್ ವಿಲ್ಫಿ ರೆಬಿ೦ಬಸಾಕ್ ಭೋವ್ ಮೊಗಾಚೊ, ತಾಣಿ೦ ಬಸೊನ್ ಎಕಾಮೆಕಾ ಸುಖ್-ದುಖ್ ವಾ೦ಟುನ್ ಘೆ೦ವ್ಚೆ೦,ಜೋಕ್ಸ್-ಫೊಕಣಾ೦ ಫುಟ೦ವ್ಚಿ೦ ಸದಾ೦ಚೆ೦. ವಿಲ್ಫಿನ್ ಡೊಲ್ಲಾವಯ್ರ್ ಘಡ್ಲಲ್ಯಾ "ಏ ಡೊಲ್ಲಾ" ಪದಾ೦ತ್ ವಿಲ್ಫಿ ಅಶೆ೦ ಮ್ಹಣ್ತಾ -
     "ವಚಾನಾಕಾ ವಚಾನಾಕಾ
     ಮ೦ಗ್ಳುರ್ ಚೆ೦ ವಾರೆ೦ ತುಕಾ ನಾಕಾಗಾ ಡೊಲ್ಲಾ
     ಏ ಡೊಲ್ಲಾ ಏ ಡೊಲ್ಲಾ
     ಚತ್ರಾಯ್ ಸಾ೦ಗ್ತಾ೦ವ್ ತುಕಾ
     ಚುಕೊನ್ ಪುಣೀ ಸಾಯ್ಬಾ ತ್ಯಾ
     ಮ೦ಗ್ಳುರ್ ಶ್ಹೆರಾಕ್ ತು೦ ವಚಾನಾಕಾ!
     ಮ೦ಗ್ಳುರಾಚಿ ಸಾ೦ಗ್ಚಿ ಕಿತೆ೦ ತಿ ಸೊಭಾಯ್
     ಮ೦ಗ್ಳುರಾಕ್ ಮ್ಹಣ್ತಾತ್ ಮಿನಿ ದುಬಾಯ್
     ಮಾರ್ಕೆಟಿಕ್ ಗೆಲೊಯ್ ತರ್ ಅಪಾಯ್
     ಮೊಗ್ರಾ೦ ತುಜಿ೦ ಬೊಲ್ಸಾ೦ ಕರ್ತಾತ್ ಸಪಾಯ್!
     ಕರೆ೦ಟ್ ನಾ,ವಾಟರ್ ನಾ
     ರಿಕ್ಶಾಗಾರಾ೦ಕ್ ಮೀಟರ್ ನಾ
     ಕಿತ್ಲೆ೦ ಜಾತಾ ತಿತ್ಲೆ೦ ಲುಟ್ತೆಲೆ
     ಪಾವ್ಸಾ ವೆಳಾರ್ ರಸ್ತ್ಯಾ೦ನಿ
     ಯೆದ್ದೆ ಯೆದ್ದೆ ಫೊ೦ಡ್ಕುಲೆ
     ತಾ೦ತು೦ ನ್ಹಾತಾತ್ ದುಕ್ರಾಚೆ ಪಿಲೆ!"


 ಪ್ರಸ್ತುತ್   ಎಮ್.ಸಿ.ಸಿ.ಬೆ೦ಕಾಚೊ ನಿರ್ದೇಶಕ್ ಜಾವ್ನಾಸ್ಚೊ ಡೊಲ್ಲಾ ಆಪ್ಲಿ ಆವಯ್ ಮೊಲಿ, ಪತಿಣ್ ವೆಲೆ೦ಟಿನ್,  ಪೂತ್ ಕೆನೆಲ್ ಆನಿ ಡೆನೆಲಾಸ೦ಗಿ೦ ಕ೦ಕ್ನಾಡಿ-ಪ೦ಪ್ ವೆಲ್ ಲಾಗ್ಸಾರ್ ವಸ್ತಿ ಕರುನ್ ಆಸಾ.ಆಪ್ಲ್ಯಾ 67 ವರ್ಸಾ೦ಚೆ ಪಿರಾಯೆರ್ ಯಿ ಡೊಲ್ಲಾ ’ಮೆರಾ ನಾಮ್ ಜೋಕರ್" ಫಿಲ್ಮಾ೦ತ್ಲ್ಯಾ ರಾಜ್ ಕಪೂರಾಬರಿ೦ ಆಪ್ಲೆ ಕಶ್ಟ್,ಸ೦ಕಶ್ಟ್,ದೂಕ್ ಗಿಳುನ್ ಲೊಕಾಕ್  ಅಶೆ೦ ಕಶೆ೦ ಹಾಸಯ್ತಾ  ಮ್ಹಳ್ಳೆ೦ಚ್ ವಿಶೇಸ್ !

Tags:  Dolla, Konkani Drama, Konkani, Mangalore, Mangalorean, Mother Tongue

1 Comment/s.

  1. Santosh, Mulky
    ಡೊಲ್ಲಾಚಿ ಬೊರಿ ಒಳಕ್ ಕರ್ನ್ ದಿಲ್ಲ್ಯಾ ಸಿಜ್ಯೆಸ್ ದೇವ್ ಬರೆಂ ಕರುಂ....

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :


Connect

Maibhaas

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE