From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಆಮ್ಚೆ ಮನಿಸ್
Monday, October 9, 2017
ಟಿಚೆರಿಚಿ ತಸ್ವೀರ್
ಟಿಂಗುಕ್ ಭುರ್ಗಿಂ ಮ್ಹಳ್ಯಾರ್ ಭಾರಿ ಮೋಗ್. ತಶೆಂಚ್ ಭುರ್ಗ್ಯಾಂಕ್ ಟಿಂಗು ಅಂಕಲ್ ಮ್ಹಳ್ಯಾರ್ ಜೀವ್. ಸಳ್ ಕರ್ನ್ ರಡ್ಚಿಂ ಲ್ಹಾನ್ ಭುರ್ಗಿಂ ಟಿಂಗುಚೊ ತಾಳೊ ಆಯ್ಕೊನ್ ಶಾಂತ್ ಜಾತಾತ್. ಕೊಕೊ ಜೇಂವ್ಕ್ ನಾಕಾ ಮ್ಹಣ್ ಹಟ್ ಧರ್ಚಿಂ ಭುರ್ಗಿಂ ಟಿಂಗುಕ್ ಪಳೆಲ್ಲ್ಯಾ ತಕ್ಷಣ್ ಗಪಾ ಗಪ್ ಕರ್ನ್ ಜೆವ್ತಾತ್. ರಜೆ ದಿಸಾಂನಿ ಕಾಲ್ದಿ ಬಸವ್ನ್ ಜೇವ್ನ್ ದೊನ್ಫಾರಾಂ ಆಡ್ ಪಡ್ಲೆಲ್ಯಾ ವೆಳಾರ್ ಶಿಡ್ಯೆರ್ ಖೆಳೊನ್ ಆರಾಬಾಯೊ ದಿಂವ್ಚ್ಯಾ ಪೊಕ್ರಿ ಚೆಡ್ಯಾಂಕ್ ಟಿಂಗುನ್ ಮೊಗಾನ್ ಏಕ್ ಸಬ್ಧ್ ಸಾಂಗ್ಲ್ಯಾರ್ ಜಾಲೆಂ, ತಾಂಚೆಂ ಭಿರೆಂ ಪಯ್ಸ್ ವೆತಾಲೆಂ.
ತ್ಯಾ ಭುರ್ಗ್ಯಾಂ ಪಯ್ಕಿ ಪಂದ್ರಾ ವರ್ಸಾಂ ಪ್ರಾಯೆಚೊ ಹೆರಿ, ಟಿಂಗುಕ್ ಚಡ್ ಮೊಗಾಚೊ. ತೊ ಶಿಕ್ಪಾಂತ್ ಎಕ್ದಮ್ ಪಾಟಿಂ. ತಾಚೇ ಪ್ರಾಯೆಚೆ ಭುರ್ಗೆ ಧಾವೆಂತ್ ಶಿಕ್ತಾನಾ ಹೊ ಆನಿಕೀ ಸಾತ್ವೆಂತ್ ಆಸಾ. ಪಳೆಂವ್ಕ್ ಟಿಂಗುವರ್ನಿ ಉಬಾರ್ ಆಸಾ. ತಾಚೊ ಬಾಪಯ್ ಕುವೇಯ್ಟ್ ಘೊಳ್ತಾನಾ ಹಾಂಗಾ ಆವಯ್ ಕಾರೆಸ್ಮೆಟಿಕ್ ಮೀಟಿಂಗಾಂಕ್ ವಚುನ್ ಆತ್ಮೊ ಸಾಂಭಾಳ್ತಾ. ತಾಕಾ ಖರ್ಚಾ ಖಾತಿರ್ ದೀಂವ್ಕ್ ಪಯ್ಶೆ ಧಾರಾಳ್ ಆಸಾತ್, ಪುಣ್ ಬೂದ್ ಸಾಂಗುಂಕ್ ವೇಳ್ ಮಾತ್ರ್ ನಾ. ಹೆರಿ ಏಕ್ ಬರೊ ಕಲಾಕಾರ್. ಘಡ್ಯೆ ಭಿತರ್ ಕೊಣಾಚೆಂಯ್ ರುಪ್ಣೆಂ ಆಸಾ ತಶೆಂ ಕಾಗ್ದಾರ್ ಸೊಡಂವ್ಚೆಂ ದೆಣೆಂ ತಾಕಾ ಆಸಾ. ಏಕ್ ದೀಸ್ ತೊ ಏಕ್ ವ್ಹಡ್ಲೊ ಆರ್ಟಿಸ್ಟ್ ಜಾತಲೊ ಮ್ಹಳ್ಳಿ ಗಟ್ಟ್ ಪಾತ್ಯೆಣಿ ಟಿಂಗುಕ್ ಆಸಾ.
ಏಕ್ ದೀಸ್ ಇಸ್ಕೊಲಾಂತ್ಲೊ ಘರಾ ಯೆತಾನಾ ಹೆರಿ ಟಿಚೆರಿಚಿ ಚೀಟ್ ಹಾಢ್ನ್ ಆಯ್ಲೊ. ತಿ ಚೀಟ್ ಆವಯ್ಕ್ ದಾಕಂವ್ಚೆಂ ಧಯ್ರ್ ತಾಕಾ ನಾತ್ಲೆಂ. ಇಸ್ಕೊಲಾಂತ್ ಕ್ಲಾಸ್ ಚಾಲು ಆಸ್ತಾನಾ ತಾಣೆ ಕೆಲ್ಲೆಂ ಕಾರ್ಬಾರ್ ಆವಯ್ಕ್ ಕಳಾತ್ ಜಾಲ್ಯಾರ್ ಕಾರೆಸ್ಮೆಟಿಕ್ ಮೀಟಿಂಗಾಂತ್ ನಿತಳ್ ಜಾಲ್ಲೊ ತಿಚೊ ಭಾಗೆವಂತ್ ಆತ್ಮೊ ಘಡ್ಯೆ ಭಿತರ್ ತಿಚ್ಯೆ ಕುಡಿಂತ್ಲೊ ಮೆಕ್ಳೊ ಜಾಂವ್ಕ್ ಆಸಾ. ಚೀಟ್ ಬರವ್ನ್ ದಿತಾನಾ ಟಿಚೆರಿನ್ ಖಡಕ್ ವೊರ್ನಿಂಗ್ ದಿಲ್ಲೆಂ - ''ತುವೆಂ ಮಾಂಯ್ಕ್ ಆಪವ್ನ್ ಹಾಡಿನಾತ್ಲ್ಯಾರ್ ಕ್ಲಾಸಿ ಭಿತರ್ ಯೇಂವ್ಕ್ ನಜೊ''.
ಹೆರಿ ಕಾತ್ರಿಂತ್ ಪಾಂಯ್ ಶಿರ್ಕಲ್ಲ್ಯಾ ಉಂದ್ರಾಬರಿ ಜಾಲ್ಲೊ. ತಾಣೆ ಆಪ್ಲೆ ಬಾಂದ್ಪಾಸ್ ಟಿಂಗುಕ್ ಕಳಯ್ಲೆ ಆನಿ ಕಸಲಿ ತರಿ ವಾಟ್ ದಾಕಯ್ ಮ್ಹಣ್ ಪರಾತ್ಲೆಂ. ಆವಯ್ನ್ ಕಬಾಟಾಂತ್ ಕಾಪ್ಡಾಂಚ್ಯಾ ಇಡ್ಯಾಂತ್ ಚೆಪುನ್ ದವರ್ಲಲಿ ವ್ಯಾಟ್-69 ವ್ಹಿಸ್ಕೆಚಿ ಬೋತ್ಲ್ ಕಾಣಿಕ್ ದಿತಾಂ ಮ್ಹಣ್ ಟಿಂಗುಕ್ ಆಶಾ ದಾಕಯ್ಲಿ.
''ತುಂ ಕಾಂಯ್ ಭಿಯೆನಾಕಾ, ತುಜೆ ಟಿಚೆರಿಕ್ ಹಾಂವ್ ನೀಟ್ ಕರ್ತಾಂ,'' ಮ್ಹಣಾಲೊ ಟಿಂಗು ಆನಿ ದುಸ್ರೆ ದೀಸ್ ಇಸ್ಕೊಲಾಕ್ ವಚುನ್ ಟೆಚೆರಿಚ್ಯೆ ಮುಕಾರ್ ಉಬೊ ಜಾಲೊ.
''ಹಾಂವ್ ಹೆರಿಚೊ ಪೊದೊರ್ನ್, ತಾಕಾ ಸಾಂಭಾಳ್ಚಿ ಜವಾಬ್ದಾರಿ ಇಗರ್ಜ್ ಮಾತೆನ್ ಮ್ಹಾಕಾ ದಿಲ್ಯಾ. ಸಾಂಗ್ ತಾಣೆ ಕಸಲೊ ಗುನ್ಯಾಂವ್ ಕೆಲಾ?''
ಟಿಚೆರಿನ್ ಆಪ್ಲ್ಯಾ ಹೆಂಡ್ ಬ್ಯಾಗಾಂತ್ಲೆಂ ಏಕ್ ಧವೆಂ ಕಾಗಾದ್ ಕಾಡ್ನ್ ಟಿಂಗುಕ್ ದಿಲೆಂ.
ಹೆರಿನ್ ತಾಚೆರ್ ಟಿಚೆರಿಚಿ ವಿಣ್ಗಿ ತಸ್ವೀರ್ ಸೊಡಯಿಲ್ಲಿ. ಆಕರ್ಶಿತ್ ಆನಿ ಆಂಗ್ ಉಬೆಂವ್ಚೆ ತಶಿ ಆಸ್‍ಲ್ಲಿ ತಿ ತಸ್ವೀರ್.
''ಸೊಭಿತ್ ಆಸಾ, ತುಜೆಂ ರುಪ್ಣೆಂಗಿ ಹೆಂ?''
ಟಿಚೆರಿಚೆಂ ತೊಂಡ್ ತಾಂಬ್ಡೆಂ ಜಾಲೆಂ.
''ಹಾಂವೆ ಪಾದ್ರ್ಯಾಬಾಕ್ ದೂರ್ ದಿಜೆಗಿ?'' ವಿಚಾರ್ಲೆಂ ತಿಣೆ.
''ತುವೆಂ ದೂರ್ ದಿಂವ್ಚೆ ಪಯ್ಲೆಂ ಹಾಂವ್ಂಚ್ ದಿತಾಂ,'' ಮ್ಹಣಾಲೊ ಟಿಂಗು ಶಾಂತ್ ತಾಳ್ಯಾನ್. ''ಪಳೆ ಟಿಚೆರ್, ತುಕಾ ಸಾಂಬಾಳ್ ಮೆಳ್ತಾ ಭುರ್ಗ್ಯಾಂಕ್ ಲಿಸಾಂವ್ ಶಿಕಂವ್ಚ್ಯೆ ಖಾತಿರ್, ತಸ್ವೀರ್ ಸೊಡಂವ್ಚೆ ಖಾತಿರ್ ನೆಣ್ತ್ಯಾ ಭುರ್ಗ್ಯಾಂ ಮುಕಾರ್ ವಿಣ್ಗಿ ರಾವುಂಕ್ ನ್ಹಯ್. ಸಮ್ಜಾಲೆಂಮೂ? ಪುಣ್ ಹ್ಯೆ ಪಾವ್ಟಿಂ ತುಕಾ ಹಾಂವ್ ಭೊಗ್ಸಿತಾಂ.''
ಟಿಂಗುನ್ ತಸ್ವೀರ್ ಘಡಿ ಕರ್ನ್ ಆಪ್ಲ್ಯಾ ಬೊಲ್ಸಾಂತ್ ದವರ್ಲಿ ಆನಿ ಗತ್ತಾರ್ ಕ್ಲಾಸಿಂತ್ಲೊ ಭಾಯ್ರ್ ಗೆಲೊ.
ದುಸ್ರೆ ದೀಸ್ ಹೆರಿ ಕ್ಲಾಸಿ ಭಿತರ್ ಸರ್ತಾನಾ ತಾಕಾ ಖಬಾರ್ ಮೆಳ್ಳಿ, ಟಿಚೆರ್ ಏಕ್ ಮ್ಹಯ್ನ್ಯಾಚೆ ರಜೆರ್ ಗೆಲ್ಯಾ!
**********
ಸಾಸ್ಣಾಚೊ ವಿಶೆವ್
ಖರೋಡಿ ಥಾವ್ನ್ ಮಲಾಡ್ ವೆಚ್ಯಾ ಬಸ್ಸಾರ್ ಏಕ್ ಪ್ರಾಯೆಸ್ತ್ ಮಾನೇಸ್ತಾಚ್ಯಾ ಬಗ್ಲೆಕ್ ಆಮ್ಚೊ ಟಿಂಗು ಬಸ್ಲೊ. ಬಸ್ಸ್ ಒರ್ಲೆಮ್ ಇಗರ್ಜಿಲಾಗಿಂ ಪಾವ್ತಾನಾ ಸರ್ವ್ ಬರ್ಯಾ ಕಿರಿಸ್ತಾವಾಂಬರಿ ಟಿಂಗುನ್ ತಕ್ಲಿ ಬಾಗಾವ್ನ್ ಬಾಪಾಚೆ ನಾಂವಿ ಗುರ್ತ್ ಕಾಡ್ಲೊ. ತಾಚ್ಯೆ ಬಗ್ಲೆಕ್ ಬಸ್ಲಲ್ಯಾ ಮಾನೆಸ್ತಾನೀ ತಶೆಂಚ್ ಕೆಲೆಂ. ತಿತ್ಲ್ಯಾರ್ ತ್ಯಾ ಮಾನೆಸ್ತಾಚಿ ದೀಷ್ಟ್ ಹೆರಾಂಬರಿ ಇಗರ್ಜೆಚ್ಯಾ ಮುಕ್ಲ್ಯಾ ದಾರಾಲಾಗಿಂ ವೊಣ್ತಿಕ್ ತೆಂಕುನ್ ದವರ್ಲೆಲ್ಯಾ ಮೊರ್ನಾಚ್ಯೆ ಪೆಟೆಚ್ಯಾ ಧಾಂಪ್ಣ್ಯಾಚೆರ್ ಪಡ್ಲಿ. ಆಜ್ ಏಕ್ ಮೋರ್ನ್ ಆಸಾ ಮ್ಹಣ್ ತಾಚೊ ಆರ್ಥ್. ತಿತ್ಲ್ಯಾರ್ ತ್ಯಾ ಮಾನೆಸ್ತಾನ್ ಮೆಲ್ಲ್ಯಾಚ್ಯಾ ಅತ್ಮ್ಯಾ ಖಾತಿರ್ ಮಾಗುಂಕ್ ಶುರು ಕೆಲೆಂ. ತೆಂ ಮಾಗ್ಣೆಂ ಆಯ್ಕುನ್ ಟಿಂಗು ಚಕಿತ್ ಜಾಲೊ. ಮಾಗ್ಣೆಂ ಆಶೆಂ ಆಸ್‍ಲ್ಲೆಂ, ''ಸಾಸ್ಣಾಚೊ ವಿಶೆವ್ ದೀ ತಾತಿಕಾ ಏ ಸೊಮಿಯಾ ಆನಿ ನಿರಂತರ್ ಪ್ರಕಾಸ್ ತಾತಿಚೆರ್ ಫಾಂಕುಂದಿ. ಸಮಾಧಾನೆನ್ ತೊತೀ ವಿಶೆವ್ ಘೆಂವ್ದಿ, ಆಮೆನ್.''
ಸಸ್ಪೆನ್ಸ್ ತಡ್ವುಂಕ್ ಜಾಯ್ನಾಸ್ತಾನಾ ಟಿಂಗುನ್ ಲೋವ್ ತ್ಯಾ ಮಾನೇಸ್ತಾಕ್ ಕುಟ್ಟಿಲೆಂ.
''ಮಾಮಾ, ಆಜ್ ಕೊಣಾಚೆಂ ಮೋರ್ನ್ ಆಸಾ?''
''ಮ್ಹಾಕಾ ಗೊತ್ತುನಾ.''
''ಸ್ತ್ರೀಯೆಚೆಂ ಯಾ ಪುರುಷಾಚೆಂ?''
''ತೇಂಯ್ ಗೊತ್ತುನಾ.''
''ಆತ್ತಾಂ ತುಂವೆ ಖಂಚ್ಯೆ ಮಾಗ್ಣೆಂ ಮ್ಹಳೆಂ?''
''ಸಾಸ್ಣಾಚೊ ವಿಶೆವ್.''
''ತಾಂತುಂ ಆಸ್‍ಲ್ಲೆ ತಾತಿಕಾ ಆನಿ ತೊತಿ ಸಬ್ಧ್ ಕಸಲೆ?''
''ಅಳೆ ಆಪಾ,'' ಸಮ್ಜಾಯ್ಲೆಂ ತಾಣೆ ಟಿಂಗುಕ್. ''ದೆವಾಧಿನ್ ಜಾಲ್ಲೆಂ ದೆವಾಚೆಂ ರಚನ್ ದಾದ್ಲೊ ಯಾ ಸ್ತ್ರೀ ಮ್ಹಳ್ಳೆಂ ಮ್ಹಾಕಾ ಗೊತ್ತುನಾ. ತರ್ ಸಾರ್ಕೆಂ ಮಾಗ್ಣೆಂ ಕಶೆಂ ಮ್ಹಣ್ಚೆಂ? ದೆಕುನ್ಂಚ್ ಹಾಂವೆ ಅಶೆಂ ರಜಾರ್ ಕರ್ಚೆಂ. ತಾತಿಕಾ ಮ್ಹಳ್ಯಾರ್ ತಾಕಾ ಯಾ ತಿಕಾ. ತಾತಿಚೆರ್ ಮ್ಹಳ್ಯಾರ್ ತಾಚೆರ್ ಯಾ ತಿಚೆರ್. ತೊತಿ ಮ್ಹಳ್ಯಾರ್ ತೊ ಯಾ ತಿ. ಸಮ್ಜಾಲೆಂ?''
ಟಿಂಗುನ್ ವ್ಹಯ್ ಮ್ಹಣ್ ಮಾತೆಂ ಹಾಲಯ್ಲೆಂ. ಪುಣ್ ತ್ಯೆ ದೀಸ್ ಥಾವ್ನ್ ತಾಕಾ ಗ್ರಹಚಾರ್ ಲಾಗ್ಲೆ. ತ್ಯಾ ಮಾಗ್ಣ್ಯಾ ವರ್ವಿಂ ತೊ ಇತ್ಲೊ ಪ್ರಭಾವಿತ್ ಜಾಲೊ ಮ್ಹಳ್ಯಾರ್ ಕೊಣಾಚೆಂಯ್ ಮೋರ್ನ್ ಮುಕಾರ್ ಮೆಳ್ಳ್ಯಾರ್ ವಿಶೆವ್ ಮಾಗೊಂಕ್ ಶುರು ಕರ್ತಾ. ಮೊರ್ನಾಚ್ಯಾ ಘರಾ ಚುಕಾನಾಸ್ತಾನಾ ವಚುನ್ ತೇರ್ಸಾಂತ್ ವಾಂಟೆಲಿ ಜಾತಾ. ಪುಣ್ ವಿಚಿತ್ರ್ ಕಿತೆಂಗಿ ಮ್ಹಳ್ಯಾರ್ ಮರಣ್ ಪಾವ್‍ಲ್ಲಿ ವೆಕ್ತಿ ಕೊಣ್ ಮ್ಹಳ್ಳೆಂ ಜಾಣಾ ಆಸ್ಲ್ಯಾರೀ ತೊ ಜೊರಾನ್ ತಾತಿಕಾ, ತಾತಿಚೆರ್ ಆನಿ ತೊತಿ ಮ್ಹಳ್ಳೆ ಸಬ್ಧ್ ವಾಪಾರ್ತಾ. ಆಯ್ಕೊನ್ ದುಕೇಸ್ತ್ ಲೊಕಾಚೊ ಜಮೊ ಸ್ತಬ್ದ್ ಜಾತಾ. ತಾಂಚೆ ಮಧೆಂ ಉಚಾಂಬಳ್ ಸ್ವಭಾವಾಚೊ ಕೊಣೀ ಆಸ್ಲ್ಯಾರ್ ಟಿಂಗುಚ್ಯಾ ಕೊಲ್ಲರಾಕ್ ಧರ್ನ್ ಘರಾಭಾಯ್ರ್ ಆಂಬುಂಡ್ಣ್ ವರ್ತಾ ಆನಿ ಮ್ಹಣ್ತಾ, ''ಪಿಯೆಲಾಯ್ ರೇ ಯಾ ಮಾತ್ಯಾರ್ ವೊತುನ್ ಘೆತ್ಲಾಯ್? ನಿಕಳ್ ಹಾಂಗಾಚೊ.''
ತಶೆಂ ಜಾಲ್ಲ್ಯಾನ್ ಹ್ಯೆ ದಿಸಾಂನಿ ಟಿಂಗುಚೆಂ ಮನ್ ಎಕ್ದಮ್ ಮೊಡ್ಲಾಂ. ತೊ ಕೊಣಾಚ್ಯಾಯ್ ಮೊರ್ನಾಕ್ ವಚಾನಾ. ಘರಾ ಬಸೊನ್ಂಚ್ ಸುಶೆಗಾದ್ ವಿಶೆವ್ ಘೆತಾ. ಬರೊ ವಿಶೆವ್ ತಾಕಾ ಲಾಬೊಂದಿ.
**********
ಪೊಟ್ಟು ಇಂಗ್ಲೇಜ್
ಟಿಂಗು ದಾಕ್ಷೆಣೆಕ್ ಪಡಾನಾತ್‍ಲ್ಲೊ ಶೀದಾ ಮನಿಸ್. ಆಪ್ಣಾಕ್ ಭಗ್‍ಲ್ಲೆಂ ತೊ ಶೀದಾ ಸಾಂಗೊನ್ ಸೊಡ್ತಾ. ಹಿ ತಾಚಿ ಸವಯ್ ಥೊಡ್ಯಾಂಕ್ ಪಸಂದ್ ನಾ. ಥೊಡಿಂ ತಾಕಾ ಮೊಸ್ರಿ ಮ್ಹಣ್ತಾನಾ ಆನಿ ಕೊಣ್ ನಂಜ್ಯಾಳಿ ಮನಿಸ್ ಮ್ಹಣ್ ಕೊಲಾಯ್ತಾತ್. ಪುಣ್ ಟಿಂಗು ಕೊಣಾಚಿಯ್ ಪರ್ವಾ ಕರಿನಾ. ''ಕಿತ್ಯಾಕ್ ಮ್ಹಳ್ಯಾರ್ ಹಾಂವ್ ಕೊಣಾಚ್ಯಾಯ್ ಹಂಗಾರ್ ಜಿಯೆನಾ,'' ಮ್ಹಣ್ತಾ ತೊ. ದೆಕುನ್ ತಾಕಾ ವಳ್ಕುಂಚಿಂ ಥೊಡಿಂ ತಾಚೆಕಡೆ ಯಾ ತಾಚ್ಯೆ ಮುಕಾರ್ ಹೆರಾಂಕಡೆ ಉಲಯ್ತಾನಾ ಜಾಗ್ರುತ್ಕಾಯ್ ಸಾಂಬಾಳ್ತಾತ್.
ಟಿಂಗುಚೊ ಶೆಜಾರಿ ಮಿಂಗೆಲಿಚಿ ಪತಿಣ್ ಆಸ್ಪತ್ರೆಂತ್ ಪಯ್ಲ್ಯಾ ಚೆರ್ಕ್ಯಾ ಭುರ್ಗ್ಯಾಕ್ ಬಾಳಾಂತ್ ಜಾಲ್ಲಿ. ಸಕ್ಡಾಂಕೀ ಸಂತೊಸ್. ಥೊಡಿಂ ಸದಾಂಚೆಂ ಆಸ್ಪತ್ರೆಕ್ ವಚುನ್ ಭುರ್ಗ್ಯಾಚೊ ಕೊಂಡಾಟೊ ಕರ್ತಾಲಿಂ ಆನಿ ಟಿಂಗು ಸಂಯ್ಬಾನ್ಂಚ್ ಭುರ್ಗ್ಯಾಂಚೊ ಪಿಸೊ. ಸಾಂಜೆಚೆಂ ಮಿಂಗೆಲಿ ಸಾಂಗಾತಾ ತೋಯಿ ಆಸ್ಪತ್ರೆಕ್ ಭೆಟ್ ದಿತಾಲೊ ಆನಿ ಜಮೊ ಜಾಲ್ಲ್ಯಾ ಬಾಯ್ಲಾಂಚೊ ಹಿಂಡ್ ಪಾಟಿಂ ವೆಚಿ ವಾಟ್ ಪಳೆವ್ನ್ ಕೊನ್ಶಾಕ್ ಉಬೊ ರಾವ್ತಾಲೊ.
ಬಾಯ್ಲಾಂನಿ ಲ್ಹಾನ್ ಭುರ್ಗ್ಯಾಕಡೆ ಗೊದ್ದೆ ಭಾಶೆನ್ ಕೊಂಡಾಟೊ ಕರ್ನ್ ಉಲಂವ್ಚೆಂ ಆಯ್ಕುಂಕ್ ತಾಕಾ ಬರೆಂ ಲಾಗ್ತಾ. ಕೊಕೊ, ದುದು, ಮೊಮ್ಮೊ, ಕಾಕ್ಕಾ, ಸುಸು ಅಸಲೆ ಸಬ್ಧ್ ಭುರ್ಗ್ಯಾಂಕಡೆ ಉಲಯ್ತಾನಾ ತೊಯೀ ವಾಪರ್ತಾ. ಬಾಯ್ಲಾಂಚೊ ತಮಾಸೊ ಪಳೆವ್ನ್ ಆಮೊರ್ ಪಿಕೊ ಹಾಸ್ತಾ.
ಪುಣ್ ಥೊಡ್ಯಾ ಬಾಯ್ಲಾಂಚೆಂ ಉಲವ್ಣೆಂ ಆಯ್ಕುನ್ ತಾಚೆಂ ಮಸ್ತಕ್ ತಾಪ್ತಾ ಆನಿ ರಾಗಾನ್ ದಾಂತ್ ಕಿರ್ಲಿತಾ. ಇಷ್ಟಾಚೆರ್ ಜಾಂವ್ಚಿ ಹಿ ಬದ್ಲಾವಣ್ ಮಿಂಗೆಲ್ ಪಳೆತಾ. ಪುಣ್ ಅರ್ಥ್ ಕರುಂಕ್ ಸಕಾನಾ. ಥೊಡ್ಯಾ ಬಾಯ್ಲಾಂನಿ ಆಪ್ಲ್ಯಾ ಪುತಾಕಡೆ ಉಲಂವ್ಚೆಂ ಟಿಂಗುಕ್ ಕಿತ್ಯಾಕ್ ಪಸಂದ್ ನಾ ಮ್ಹಣ್ ತೊ ಚಿಂತಾಲೊ. ಆನಿ ಏಕ್ ದೀಸ್ ಟಿಂಗುಚ್ಯಾ ರಾಗಾಚೆಂ ಕಾರಣ್ ತಾಕಾ ಕಳ್ಳೆಂ.
ತ್ಯೆ ದೀಸ್ ಮಿಂಗೆಲಿಚ್ಯಾ ಭುರ್ಗ್ಯಾಕ್ ಪಳೆಂವ್ಕ್ ಸೆರ್ಪಿನ್ಬಾಯಯ್ ಆಯಿಲ್ಲಿ. ಪನ್ನಾಸ್ ಉತರ್ಲೆಲಿ ತರ್ನಾಟಿ ತಿ. ತಿಚಿಂ ನಾತ್ರಾಂ ಇಸ್ಕೊಲಾಕ್ ವೆತಾತ್. ಸುನ್ ಆಫಿಸಾಕ್ ಕಾಮಾಕ್ ವೆತಾ ಆನಿ ಪುತ್ ದುಬೈ ಕಾಮಾರ್ ಆಸಾ.
''ಭಲಾಯ್ಕಿ ಕಶೆ ಆಸಾ ಬಾಯೆ ತುಜಿ?'' ತಿಣೆ ಬಾಂಳ್ತಿಕ್ ವಿಚಾರ್ಲೆಂ.
''ಹಾಂವ್ ಬರಿಂ ಆಸಾಂ.''
''ಘರಾ ಕೆದಾಳಾ ವಚುಂಕ್?''
''ಫಾಲ್ಯಾಂ.''
ಉಪ್ರಾಂತ್ ತಿ ಭುರ್ಗ್ಯಾಲಾಗಿಂ ಉಲಂವ್ಕ್ ಲಾಗ್ಲಿ.
''ಹಾವ್ ಆರ್ ಯೂ ಬಾಬಾ, ವಾಟ್ ಯುವರ್ ನೇಮ್ ಬಾಬಾ? ಯುವಯ್ ಡೆಡಿ ವೇರ್? ಮಾಮ್ಮಿ ವೇರ್? ಯೂ ಕಾಕ್ಕಾ ಮೇಕಿಂಗ್? ಸುಸು ಮೇಕಿಂಗ್? ಬಿಸ್ಕಿಟ್ ವಾಂಟ್? ಮೈ ನೊಟ್ಟಿ ಬೊಯ್...''
ದಾಂತ್ ಕಿರ್ಲುನ್ ಆಸ್‍ಲ್ಲೊ ಟಿಂಗು ತಿತ್ಲ್ಯಾರ್ ಸಟ್ಟ್ ಕರ್ನ್ ಮಧೆಂ ಉಲಯ್ಲೊ, ''ಅಳೆಗೆ ಶೆರ್ಪಿನಾಮ್ಯೆ, ತಾಕಾ ಇಂಗ್ಲೇಜ್ ಯೇನಾಂಗೆ. ತೊ ಜಲ್ಮೊನ್ ಥೊಡೆ ದೀಸ್ ಜಾಲ್ಯಾತ್ ಮಾತ್ರ್. ಪಯ್ಲೆಂ ತೊ ಮಾಯ್‍ಭಾಸ್ ಕೊಂಕ್ಣಿ ಶಿಕ್ತಲೊ ಆನಿ ಪೊಟ್ಟು ಇಂಗ್ಲೇಜ್ ಶಿಕುಂಕ್ ತಾಕಾ ವೇಳ್ ಲಾಗ್ತಲೊ...''
ಮಿಂಗೆಲಿನ್ ಕಿತ್ಲೆಂ ಪರಾತ್ಲ್ಯಾರಿ ಸೆರ್ಪಿನಾಮಿ ಚೆರ್ಕ್ಯಾಚ್ಯಾ ವೊಲಾಕ್ ಆಯ್ಲಿನಾ.
Tags:
Walter Lasrado, Tingu, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/9/2018 ಮಂಗಳೂರು ಸಿಲ್ವಂಗಾರ್ ಬೇಕರಿ...
-
10/30/2017 ನತಲಾಂಕ್ ಶಾಂತೆ ಖೆಳ್ ...
-
10/9/2017 ಆಮ್ಚೆ ಮನಿಸ್...
-
9/13/2017 ಶಾಂತಿ ಖಾತಿರ್ ಸ್ಪರ್ದೆ...
-
8/7/2017 ಆಶೆಂ ಏಕ್ ಸಂದರ್ಶನ್...
-
8/3/2017 ಹೆಂ ಮೆಲ್ಲೆಂ ಖಂಯ್ ಥಾವ್ನ್ ಆಯ್ಲೆಂ?...
-
7/19/2017 ವಿನ್ಸಿಚ್ಯೊ ಭಯ್ಣಿಂ...
-
6/8/2017 ನವಿಂ ನವಿಂ ಉದ್ಯಮಾಂ......
-
5/18/2017 ಕಷ್ಟ್ ಆಯ್ಲ್ಯಾತ್...
-
4/20/2017 ಹನಿಮೂನ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.