From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಕಷ್ಟ್ ಆಯ್ಲ್ಯಾತ್
Thursday, May 18, 2017
ಕಷ್ಟ್ ಯೆತಾತ್ ಆನಿ ವೆತಾತ್... ಹರ್ಯೆಕ್ಲ್ಯಾಚ್ಯಾ ಜಿಣ್ಯೆಂತ್ ಕಷ್ಟ್ ಸಭಾರ್ ಥರಾಂಚೆ. ಪಯ್ಶಾಂಚಿ ಗರ್ಜ್, ಭಿಗ್ಡಾಲ್ಲಿ ಭಲಾಯ್ಕಿ, ಕುಟ್ಮಾಂತ್ ಮರ್ಣಾಂ, ಯಾ ಹೆರ್ ಖಂಚಾಯೀ ರಿತಿಚಿ ಸಲ್ವಣ್. ಮನಿಸ್ ಜಾವ್ನ್ ಜಲ್ಮಾಲ್ಲ್ಯಾಕ್ ಹೆ ಕಷ್ಟ್ ಭೊಗಿಜಾಯ್ ಪಡ್ತಾತ್.
ಜೆರೊಮಾಚಾ ಜಿಣ್ಯೆಂತ್‍ಯೀ ಕಷ್ಟ್ ಆಯ್ಲ್ಯಾತ್. ಹ್ಯಾ ದಿಸಾಂನಿ ತಾಚಾ ಸಮಾಧಾನಿ ಜಿಣಿಯೆಕ್ ಗ್ರಹಣ್ ಲಾಗ್ಲಾಂ. ಜೆರೊಮಾನ್ ಆತಾಂ ಭೊಗುನ್ ಆಸ್ಚೆ ಕಷ್ಟ್ ಹ್ಯಾ ಖಂಚಾಯೀ ವರ್ಗಾಚೆ ನಹಿಂ!
ಜೆರೊಮಾಚಿ ಪಾತ್ರ್ ಪರಿಚಯ್ ಅಶಿ ಆಸಾ... ಜೆರೊಮ್ ತಾಚಾ ಬಾಪ್ತಿಜ್ಮಾಚೆಂ ನಾಂವ್. ತಾಚಾ ಬಾಯ್ಲೆನ್ ತಾಕಾ ಬೆಡ್‍ರೂಮಾಂತ್ ದವ್ರಿಲ್ಲೆಂ ನಾಂವ್ 'ಜೆಮ್ಮಾ' ಮ್ಹಣೊನ್. ನಾಬಾ, ಜೆಮ್ಮಾಕ್ ಬಾಯ್ಲೆಚೆ ಲಫ್ಡೆ ನಾಂತ್. ಆದಿಂ ತಿ ತಾಕಾ ಖೂಬ್ ಸತಯ್ತಾಲಿ. ಪುಣ್, ಗೆಲೆತ್ಯಾ ವರ್ಸಾ ಏಕ್ ಪಾವ್ಟಿಂ ತಾಣೆ ಟಾಯ್ಟ್ ಪಿಯೆವ್ನ್ ಯೇವ್ನ್ ತಿಚೊ ಶೆಂಡೊ ಮುಳಾ ಸಮೇತ್ ಕಾತರ್ನ್ ಉಡಯಿಲ್ಲ್ಯಾ ಉಪ್ರಾಂತ್ ಆಜ್‍ಕಾಲ್ ಜೆಮ್ಮಾನ್ ಏಕ್ ರಾಗಾಚಿ ದೀಷ್ಟ್ ಮಾರ್ಲ್ಯಾರ್ ಪುರೊ ತಿಚಾ ಗಾಗ್ರ್ಯಾಚೊ ನಾಡೊ ಸುಟ್ತಾ.
ಜೆಮ್ಮಾಚೆ ಕಷ್ಟ್ ತಾಚಾ ಬೊಸಾ ರುಪಾರ್ ಆಯ್ಲ್ಯಾತ್. ಆದಿಂ ಸೈತಾನ್ ಬಾಯ್ಲೆಚೆ ಉಪಾದ್ರ್ ಆಸ್ತಾನಾ ತಾಚೊ 'ಬೊಸ್' ತಾಚೊ ಕಿತ್ಲೊ ಮೋಗ್ ಕರ್ತಾಲೊ... ಅಪಾರ್ಥ್ ಕರಿನಾಕಾತ್. ಬೊಸಾಕ್ ತಾಚೆರ್ ಆಸ್‍ಲ್ಲೊ ಅಭಿಮಾನ್ ವರ್ಣುಂಚೊ ನ್ಹಂಯ್.
ದಫ್ತರಾಂತ್ ತಾಚೆ ಸರ್ವ್ ಸಾಂಗಾತಿ ತಾಕಾ ಕುಲೆರ್ 'ಚಮಚಾ' ಮ್ಹಣ್ತಾಲೆ ತರೀ ತಾಕಾ ಪರ್ವಾ ನಾತ್‍ಲ್ಲಿ. ಬೊಸಾಚಾ ವಾಂಟ್ಯಾಕ್ ತೊ ಮಯ್ಪಾಸಿ ನವ್ಕರ್ ಜಾವ್ನಾಸ್‍ಲ್ಲೊ. ತಾಚೆ ಸಾಂಗಾತಿ ಮುಕ್ಲ್ಯಾನ್ ಬೆಸಾಂವ್ ಮಾಗ್ತಾಲೆ, ಪಾಟ್ಲ್ಯಾನ್ ಸರ್ಸರಿತ್ತ್ ಯೆಟ್ತಾಲೆ.
ಜೆಮ್ಮಾಕ್ ಹೊ ವಿಷಯ್ ಕಳಿತ್ ಆಸ್‍ಲ್ಲೊ. ಪುಣ್ ತೊ ಕೇರ್ ಕರಿನಾತ್‍ಲ್ಲೊ. ಬೊಸ್ ಬೊಲ್ಸಾಂತ್ ಆಸ್ತಾನಾ ಚಿಲ್ಲರ್ ಸಾಂಗಾತ್ಯಾಂಕ್ ಕಿತ್ಯಾಕ್ ಕೇರ್ ಕರಿಜಾಯ್?
ಪುಣ್, ಅಚಾನಕ್ ದೄಶ್ಯ್ ಬದ್ಲಾಲೆಂ.
ಜೆಮ್ಮಾನ್ ಧರ್'ಲ್ಲ್ಯಾ ಆಂಗವ್ಣೆಂನಿ ಜಾಯ್ಜಯ್, ಸತ್ತ್ ಸಾಂಗ್ತಾ, ಬಾಯ್ಲೆಚೆಂ ಮೆಲ್ಲೆಂ ಸುಟ್‍ಲ್ಲೆಂ, ಸೈತಾನಾಚೆ ಉಪದ್ರ್ ರಾವ್‍ಲ್ಲೆ. ಆತಾಂ ತಿ ಲೊಣಿಯೆಪರಿಂ ಮೋವ್ ಜಾಲ್ಲಿ, ಹ್ಯಾ ಸಂತೊಸಾನ್ ತೊ ನಾಗ್ಡೊ ನಾಚ್‍ಲ್ಲೊ. ಘಡ್ಯೆ ಭಿತರ್ ತಾಚೊ ನಾಚ್ ಬ್ರೇಕ್ ಡಾನ್ಸ್ ಜಾಲ್ಲೊ. ದಫ್ತರಾಂತ್ ಗ್ರಹಣ್ ಲಾಗ್‍ಲ್ಲೆಂ. ಬೊಸ್ ತಾಚೆರ್ ರಾಗಾರ್ ಜಾಲ್ಲೊ. ಬಾಯ್ಲ್ ಸಮಾ ನಾತ್‍ಲ್ಲ್ಯಾ ಸಂದರ್ಭಿಂ ಬೊಸ್ ಸಮಾ ಆಸ್‍ಲ್ಲೊ, ಆತಾಂ ಬಾಯ್ಲ್ ಎಕಾ ವಾಟೆಕ್ ಯೆತಾನಾ ಬೊಸಾಚಾ ತಕ್ಲೆಚೊ ಸ್ಕ್ರೂ ಭಾಯ್ರ್ ಪಡ್‍ಲ್ಲೊ.
ಜೆಮ್ಮಾಚೆಂ ಬಾಯ್ಲ್ ಸಮಾ ಜಾಲ್ಲೊ ವಿಷಯ್ ಕಳೊನ್ ಬೊಸಾಕ್ ಬರೆಂ ದಿಸೊಂಕ್ ನಾ ಮ್ಹಣೊನ್ ಚೂಕ್ ಸಮ್ಜಾನಾಕಾತ್. ತಾಚಾ ಬಾಯ್ಲೆಕ್ ಆನಿ ಬೊಸಾಕ್ ಕಸಲೊಚ್ ಸಂಬಂಧ್ ನಾ. ಸಾಕ್ರಾಮೆಂತಾಂತ್ ಹಾತ್ ಧರ್'ಲ್ಲೊ ತೀನ್ ಕಾಸಾಂಚೊ ಘೊವ್ ಆಸ್ತಾನಾ ದುಸ್ರ್ಯಾ ಪರ್ಕಿ ದಾದ್ಲ್ಯಾವಿಶಿಂ ತಿಣೆ ಎದೊಳ್ ಚಿಂತುಂಕ್ ನಾ. ಪುಣ್ ಜೆಮ್ಮಾಚಾ ಬೊಸಾನ್ ಮಾತ್ರ್ ತಿಕಾ ಲಾಯ್ನ್ ಮಾರುಂಕ್ ಏಕ್ ಪಾವ್ಟಿಂ ಪ್ರಯತನ್ ಕೆಲ್ಲೆಂ ಆಸಾ, ತೆಂ ದೋನ್ ವರ್ಸಾಂ ಆದಿಂ.
ಬೊಸಾಚಾ ಬಾಯ್ಲೆಚ್ಯಾ ಬರ್ತ್‍ಡೇ ಪಾರ್ಟಿಕ್ ಜೆಮ್ಮಾ ಆಪ್ಲ್ಯಾ ಬಾಯ್ಲೆ ಸಾಂಗಾತಾ ಗೆಲ್ಲೊ. ಫುಂಕ್ಯಾಕ್ ಮೆಳ್‍ಲ್ಲಿ ವಿಸ್ಕಿ ಮ್ಹಣೊನ್ ಜೆಮ್ಮಾನ್ ಚಾರ್ ಲಾರ್ಜ್ ಪೆಗ್ಗ್ ಚಡಿತ್ ಘೆತ್‍ಲ್ಲ್ಯಾನ್ ತಾಚಿ ತಕ್ಲಿ ಸೋಲರ್ ಸಿಸ್ಟಮಾಂತ್ ಘುಂವ್ತಾಲಿ. 'ಸ್ಪಿರಿತ್ ಸಾಂತಾ'ಚಾ ಅಧೀನ್ ಜಾಲ್ಲೊ ತೊ ಲೇ ಲೇ ಕರ್ನ್ ಕುಡಿಚಿ ಅವಶ್ಯ್ ಗರ್ಜ್ ತಿರ್ಸುಂಕ್ ವೆತಾನಾ ಕಾಕ್ಸಾಂತ್‍ಚ್ ಪರ್ತಾಲ್ಲೊ. ಹ್ಯಾ ಸುಸಂದರ್ಭಾಚೊ ಫಾಯ್ದೊ ಉಟವ್ನ್ ಬೊಸಾನ್ ಜೆಮ್ಮಾಚಾ ಬಾಯ್ಲೆಕ್ ದೊಳೊ ಮೊಡುಲ್ಲೊ. ತಿತ್ಲೆಂಚ್.... ಜೆಮ್ಮಾಚಿ ಬಾಯ್ಲ್ ಕಿತ್ತೂರ್ ಚೆನ್ನಮ್ಮ ಜಾಲ್ಲಿ, ರಾಗಾನ್ ಪೆಟ್‍ಲ್ಲಿ. ತಿಚ್ಯಾ ದೊಳ್ಯಾಂತ್ಲೊ ಉಜೊ ಪಳೆವ್ನ್ ಬೊಸಾಚೆಂ ಪ್ಯಾಂಟ್ ಭಿಜ್‍ಲ್ಲೆಂ. ಹೊ ವಿಷಯ್ ಗುಪಿತ್ ಉರ್'ಲ್ಲೊ.
ಹ್ಯಾ ಘಟನಾ ನಂತರ್ ಜೆಮ್ಮಾಕ್ ಬೊಸ್ ಚಡಿತ್ ಬಿರ್ಮತ್ಕಾಯೆನ್ ಪಳೆಂವ್ಕ್ ಲಾಗ್ಲೊ. ಅಸಲ್ಯಾ ಸ್ತ್ರೀಯೆ ಸಾಂಗಾತಾ ಜಿಯೆಂವ್ಚಾ ಜೆಮ್ಮಾಚೆರ್ ತಾಕಾ ಚಡಿತ್ ದಯಾ ಉಬ್ಜಾಲ್ಲಿ. ಸರ್ವ್ ಸಾರ್ಕೆಂ ಚಲ್ತಾಲೆಂ...
ಅಚಾನಕ್ ಬೊಸ್ ವಾಗ್ ಜಾಲೊ.
ಆತಾಂ ಜೆಮ್ಮಾಕ್ ಉಟ್‍ಲ್ಲೆಂ ಬಸ್‍ಲ್ಲೆಂ ಪಳೆಂವ್ಕ್ ಜಾಯ್ನಾ. ಜೆಮ್ಮಾಚಾ ವಾಂಟ್ಯಾಕ್ ದಫ್ತರ್ ಯಮ್ಕೊಂಡ್ ಜಾಲಾಂ.
ಹರ್ಯೆಕಾ ದಿಸಾ ಹರ್ಯೆಕಾ ಘಡಿಯೆ ಬೊಸ್ ಚುಕಿ ಸೊಧ್ತಾ ಆನಿ ಗಾಳಿ ಯೆಟ್ತಾ. ಹ್ಯಾ ದಿಸಾಂನಿ 'ಈಡಿಯೆಟ್, ಸ್ಟುಪಿಡ್ ಆನಿ ರಾಸ್ಕಲ್...' ಮ್ಹಣ್ತಾ ಶಿವಾಯ್ ಹೆರ್ ನಾಂವಾಂನಿ ತೊ ತಾಕಾ ಆಪಯ್ನಾ. ನರ್ವಸ್ ಜಾಲ್ಲ್ಯಾ ಜೆಮ್ಮಾ ಥಾವ್ನ್ ಚಡಿತ್ ಚುಕಿ, ಆನಿ ಚಡಿತ್ ಗಾಳಿ... ತೊ ದುಖಾಂ ಗಳಯ್ತಾನಾ ತಾಚೆ ಸಾಂಗಾತಿ ನಕ್ಲಾಂ ಕರ್ನ್ ಹಾಸ್ತಾತ್. 'ಕುಲೆರ್ ಮಾತಿ ಖೆಲಾಂ...' ಮ್ಹಣ್ತಾತ್. ಏಕೇಕ್ ಪಾವ್ಟಿಂ ತಾಕಾ ರಾಜೀನಾಮ್ ದೀವ್ನ್ ಧಾಂವ್ಯಾಂ ಮ್ಹಣ್ ಭೊಗ್ತಾ.
ರಾಜೀನಾಮ್ ದಿಲ್ಯಾರ್ ಪೊಟಾಚಿ ಗತ್ ಕಿತೆಂ? ಆಪ್ಣಾ ತಿತ್ಲ್ಯಾ ಬುದ್ವಂತಾಕ್ ಹೆರ್ ಕೋಣ್‍ಯೀ ಕಾಮ್ ದೀತ್, ಪುಣ್ ಹೊ ಬೊಸ್ ಕಸೊ ವಾಗ್ ಜಾಲೊ, ಕಿತ್ಯಾಕ್ ಜಾಲೊ? ತೊ ಕಿತ್ಯಾಕ್ ಜೆಮ್ಮಾಕ್ ದ್ವೇಷಿತಾ?..... ಕಾರಣ್ ಆಸಾ. ಕಾರಣ್ ಆಸ್ಲ್ಯಾರ್'ಯೀ ಆಪುಣ್ ನಿರಾಪ್ರಾಧಿ ಮ್ಹಣ್ ಜೆಮ್ಮಾಚಿ ಅಭಿಪ್ರಾಯ್.
ತೆರಾ ದಿಸಾಂ ಅದಿಂ...
ಸಕಾಳಿಂಚೊ ವೇಳ್... ಅವ್ಚಿತ್ತ್ ಶಿರಾಂಧಾರಿಂಚೊ ಪಾವ್ಸ್... ಪಾವ್ಸಾಕ್ ಶಿರ್ಕೊನ್ ಭಿಜೊನ್ ದಫ್ತರಾಂತ್ ರಿಗ್ತಾನಾ ಬೊಸಾಚೆಂ ವಸ್ತುರ್ ಉದ್ಕಾನ್ ಮುದೊ ಜಾಲ್ಲೆಂ. ತಾಣೆ ಕೆಬಿನಾಂತ್ ಬಸ್ಕಾ ಘೆತಚ್ ಧಾ ಮಿನುಟಾಂನಿ ಸೆಕ್ರೆಟರಿ ಶೀಲಾ ಕೆಬಿನಾಕ್ ಗೆಲ್ಲೆಂ, ದೋನ್೦ಚ್ ಮಿನುಟಾಂನಿ ಭಾಯ್ರ್ ಆಯಿಲ್ಲೆಂ. ಭಾಯ್ರ್ ಯೆತಾನಾ ಶೀಲಾಚೊ ವಿಚಿತ್ರ್ ಹಾಸೊ ಜೆಮ್ಮಾನ್ ಪಾರ್ಕಿಲ್ಲೊ. ಬೊಸ್ ಆಜ್ ಬೊರ್‍ಯಾ ಮೂಡಾರ್ ಆಸಾ ಮ್ಹಣ್ ತೊ ಸಮ್ಜಾಲ್ಲೊ.
ಅಶೆಂ ಪಾಂಚ್ ಮಿನುಟಾಂ ಉಪ್ರಾಂತ್ ಜೆಮ್ಮಾಕ್‍ಯೀ ಬೊಸಾಚಾ ಕೆಬಿನಾಕ್ ವೆಚಿ ಗರ್ಜ್ ಪಡ್‍ಲ್ಲಿ. ಬೊಸ್ ಬೊರ್‍ಯಾನ್ ಉಲಯಿಲ್ಲೊ. ಜೆಮ್ಮಾ ಭಾಯ್ರ್ ವೆತಾಂ ಮ್ಹಣ್ತಾನಾ ಏಕ್ ಫೈಲ್ ದೀಂವ್ಕ್ ತೊ ಬಸ್ಕೆ ಥಾವ್ನ್ ನೀಟ್ ಜಾಲ್ಲೊ.
ಜೆಮ್ಮಾಕ್ ಅಜ್ಯಾಪ್! ಬೊಸಾಚೆಂ ಪ್ಯಾಂಟ್ ದಿಸಾನಾತ್‍ಲ್ಲೆಂ. 'ತಶೆಂ ಕಿತ್ಯಾಕ್ ಪಳೆಯ್ತಾಯ್?' ಬೊಸಾನ್ ಅಸಮಾಧಾನ್ ವ್ಯಕ್ತ್ ಕೆಲ್ಲೆಂ.
'ಸರ್...' ಪಿಂರ್ಗಾಲ್ಲೊ ಜೆಮ್ಮಾ. 'ತುಮ್ಚೆಂ ಪ್ಯಾಂಟ್....'
'ಪಾವ್ಸಾಕ್ ಪ್ಯಾಂಟ್ ಭಿಜ್‍ಲ್ಲೆಂ. ಟೊಯ್ಲೆಟಾಂತ್ ಸುಕಾತ್ ಘಾಲಾಂ...' ಬೊಸಾನ್ ವಿವರ್ಸಿಲೆಂ. 'ಪ್ಯಾಂಟ್ ನಾ ಜಾಲ್ಯಾರ್ ಕಿತೆಂ, ಶೊರ್ಟ್ಸ್ ಆಸಾತ್ ನಹಿಂಗಿ? ಹೆ ಚೈನೀಸ್ ಶೊರ್ಟ್ಸ್ ಹಾಂವೆಂ ಗೆಲೆತ್ಯಾ ಮಹಿನ್ಯಾಂತ್ ಸಿಂಗಾಪೂರ್ ಗೆಲ್ಲ್ಯಾ ಸಂದರ್ಭಿಂ ಘೆತ್‍ಲ್ಲೆ...'
ದೊಳೆ ಘಸ್ಟುನ್ ಗೊಮ್ಟಿ ನೀಟ್ ಕರ್ನ್ ಜೆಮ್ಮಾನ್ ಸಾರ್ಕಿ ನದರ್ ಮಾರ್'ಲ್ಲಿ.
'ಸರ್... ' ಜೆಮ್ಮಾ ನರ್ವಸ್ ಜಾಲ್ಲೊ. 'ಶೊರ್ಟ್ಸ್ ಆಸ್ಚೆಪರಿಂ ದಿಸಾನಾಂ...' ಹಳೂ ಮ್ಹಣಾಲೊ.
'ಕಿತೆಂ...?!' ಘಾಬ್ರೆಲ್ಲ್ಯಾ ಬೊಸಾನ್ ಸಕ್ಲಾ ಪಳೆಯಿಲ್ಲೆಂ... ಶೊರ್ಟ್ಸ್ ನ್ಹೆಸೊಂಕ್ ತೊ ನಿಜಾಯ್ಕೀ ವಿಸ್ರಾಲ್ಲೊ ವ ತೆ ಪಾತಳ್ ಚೈನೀಸ್ ಶೊರ್ಟ್ಸ್, ಪ್ಯಾಂಟ್ ಕಾಡ್ಟಾನಾ ಕಳನಾಸ್ತಾನಾ ಪ್ಯಾಂಟಾ ಸಾಂಗಾತಾ ಸಕಯ್ಲ್ ನಿಕ್ಳಾಲ್ಲೆ... ರಪ್ಪ್ ಕರ್ನ್ ಫೈಲ್ ವಿಂಚುನ್ ತಾಣೆ ಆಡ್ ಧರ್'ಲ್ಲೆಂ.
'ಸೊರ್ರಿ ಸರ್...' ಜೆಮ್ಮಾನ್ ಮಾಫ್ ಮಾಗ್‍ಲ್ಲೆಂ.
'ತರ್...' ಬೊಸ್ ಧೊವ್ಶೆಲ್ಲೊ.... ಸೆಕ್ರೆಟರಿ ಶೀಲಾ ಯೆತಾನಾಂಯೀ ಹಾಂವ್ ಅಶೆಂಚ್ ಆಸ್‍ಲ್ಲೊಂ. 'ಓಹ್ ಗಾಡ್... ಓಕೆ... ಓಕೆ... ಆತಾಂ ತುಂ ಕಿತೆಂ ಅಶೆಂಯೀ ಪಳೆವ್ನ್ ರಾವ್ಲಾಯ್.... ನಿಕಳ್ ಹಾಂಗಾಚೊ....'
ಬೊಸಾಚಿ ಮರ್ಯಾದ್ ರಾಕ್ಚೆ ದೃಷ್ಟೆನ್ ತಾಣೆ ಹೊ ವಿಷಯ್ ಕೊಣಾಕ್‍ಚ್ ಸಾಂಗ್ಲೊ ನಾ. ಪುಣ್ ಬೊಸಾಚೆಂ ಮನ್ ಆಪ್ಣೆಂ ದುಖಯ್ಲಾಂ ಜಾಂವ್ಕ್ ಪುರೊ ಮ್ಹಣ್ಚಿ ಕಾಂತವ್ಣಿ ತಾಕಾ ಧೊಸುಂಕ್ ಲಾಗ್ಲಿ. ಬೊಸಾಚಾ ಘರಾ ವಚೊನ್ ಸುಡಾಳ್ ಉಲವ್ಯಾಂ ಮ್ಹಣ್ ತಾಕಾ ಭೊಗ್‍ಲ್ಲೆಂ.
ವೊರಾಂ ಸಾಂಜೆಚಿಂ ಸ. ಜೆಮ್ಮಾನ್ ದಾರಾಕ್ ಠೊಕೆ ಮಾರ್ಲೆ. ಬೊಸಾಚ್ಯಾ ಪಹಿಲ್ವಾನ್ ಬಾಯ್ಲೆನ್ ದಾರ್ ಉಘಡ್ಲೆಂ.
'ಕಿತೆಂ ಜೆಮ್ಮಾ.... ಭಿತರ್ ಯೇ...' ತಿಣೆಂ ಯೆವ್ಕಾರ್ ಕೆಲ್ಲೊ. 'ಬಸ್, ತುಜೊ ಸಾಯ್ಬ್ ಆಜೂನ್ ಯೇಂವ್ಕ್ ನಾ.. ಆತ್ತಾಂ ಯೆತಾಲೊ. ಬಸ್. ಗಜಾಲ್ ಕಿತೆಂ? ಖಂತಿನ್ ಆಸ್ಚೆಪರಿಂ ದಿಸ್ತಾಯ್?'
'ತೆಂ... ಕಿತೆಂ ಜಾಲೆಂ ಜಾಣಾಂಯ್ .... ಇಲ್ಲಿ ಗಡ್ಬಡ್ ಜಾಲಿ....' ಜೆಮ್ಮಾಕ್ ಉಲಂವ್ಕ್ ಕಷ್ಟ್ ಮಾರ್ಲೆ.
'ಕಸಲಿ ಗಡ್ಬಡ್ ಜಾಲಿ?' ತಿಕಾ ಕುತೂಹಲ್ ಉಬ್ಜಾಲ್ಲೊ.
'ಬೊಸ್ ತ್ಯಾ ಎಕಾ ದಿಸಾ ಸಕಾಳಿಂ ಪಾವ್ಸಾಕ್ ಭಿಜ್‍ಲ್ಲೊ...' ತಾಣೆಂ ಮುಕಾರ್ಸಿಲ್ಲೆಂ. 'ಹಾಂವ್ ಕೆಬಿನಾಕ್ ವೆತಾನಾ ಬೊಸಾಚ್ಯಾ ಶರ್ಟಾ ಸಕಯ್ಲ್ ವಸ್ತುರ್ ನಾತ್‍ಲ್ಲೆಂ... ಪಾಂಚ್ ಮಿನುಟಾಂ ಪಯ್ಲೆಂ ಸೆಕ್ರೆಟರಿ ಶೀಲಾ ಕೆಬಿನಾ ಥಾವ್ನ್ ಭಾಯ್ರ್ ಆಯಿಲ್ಲೆಂ... ಹಾಂವ್...'
'ಕಿತೆಂ ಮ್ಹಣಾಲೊಯ್... ' ಶೂರ್ಪನಕಿಪರಿಂ ತಿಣೆಂ ಗರೊಜ್ ಮಾರ್ಲಿ. 'ಯೆಂಟ್ಯಾ ತೆದಿ ಕರಿಯಮಣಿ ಬಾಂಧ್‍ಲ್ಲಿ ಬಾಯ್ಲ್ ಹಾಂವ್ ಆಸ್ತಾನಾ ತಾಚೆಂ ಕಿತ್ಲೆಂ ಧಯ್ರ್ ಕೆಬಿನಾ ಭಿತರ್ ನಾಗ್ಡೊ ಜಾವ್ನ್ ಶೀಲಾ ಸಂಗಿಂ... ಶ್ಶೀ... ಶ್ಶೀ... ರಾವ್, ಖಂಚಾಕ್‍ಯೀ ತೊ ಘರಾ ಯೇಂವ್ದಿ. ತಾಕಾ ನಾಗ್ಡೊ ಕರ್ನ್ ಸರ್ಸರಿತ್ ಮಾರ್ನ್ ಮೊಂವ್ ವೊತುನ್ ಹುಂಬ್ಲೆ ಚರಯ್ನಾಂ ತರ್ ಹಾಂವ್ ಪಿರ್ಕಿ ಮಥಾಯಸಾಚಿ ಧುವ್ ಇಡ್ಲಿ ಲಿಲ್ಲಿಚ್ ನ್ಹಂಯ್...' ತಿಣೆಂ ಧರ್ಣಿಕ್ ಖೊಟ್ ಮಾರ್ಲಿಚ್!
ಅಪಾರ್ಥ್ ಜಾವ್ನ್ ಪರಿಸ್ಥಿತಿ ನಿಯಂತ್ರಣ್ ಚುಕ್ಚೆಂ ಜೆಮ್ಮಾಚಾ ಗುಮಾನಾಕ್ ಗೆಲೆಂ. 'ಮ್ಹಾಕಾ ಸಾರ್ಕೆಂ ಆಯ್ಕ್....' ಜೆಮ್ಮಾನ್ ಪರಾತ್ಲೆಂ. 'ಆತಾಂ ಆಯ್ಕೊಂಕ್ ಕಿತೆಂ ಬಾಕಿ ಉರ್ಲಾಂ?!' ತಿ ನಾಗಿಣ್ ಜಾಲ್ಲಿ.
ತಿತ್ಲ್ಯಾರ್ ದಾರಾಚಿ ಕಾಂಪಿಣ್ ಜಾಲ್ಲಿ. ಎಕಾ ಹಾತಿಂ ಸಾರೊಣ್ ಆನಿ ಆನ್ಯೇಕಾ ಹಾತಿಂ ಲಾಟ್ಲೆಂ ಘೇವ್ನ್ ತಿಣೆ ದಾರ್ ಉಗ್ತೆಂ ಕೆಲೆಂ. ಜೆಮ್ಮಾಕ್ ಶೆಳೊ ಘಾಮ್ ಸುಟ್‍ಲ್ಲೊ.
'ಹಾಯ್ ಡಾರ್ಲಿಂಗ್... ಮೈ ಬ್ಯೂಟಿಫುಲ್ ಲಿಲ್ಲಿ ಫ್ಲವರ್... ಪಳೆಯಾಂ, ಏಕ್ ಕೀಸ್ ದೀ ಪಳೆಯಾಂ....' ಬೊಸ್ ಭಿತರ್ ಸರ್'ಲ್ಲೊ.
ತಾಣೆಂ ಏಕ್ ಪಾವ್ಟಿಂ ನರ್ವಸ್ ಜೆಮ್ಮಾಕ್ ಆನಿ ಆನ್ಯೇಕ್ ಪಾವ್ಟಿಂ ರಾಗಾನ್ ಸುಂಯ್ಪುಚಾ ಆಪ್ಲ್ಯಾ ಬಾಯ್ಲೆಕ್ ಪಳೆಯ್ಲೆಂ.
ತಾಣೆಂ ಕಿತೆಂ ಮ್ಹಣ್ ಜಾಣಾ ಜಾಂವ್ಚೆ ಆದಿಂಚ್, ತಿಣೆಂ ಭಿರಾಂಕುಳ್ ಆಕ್ರಮಣ್ ಕೆಲ್ಲೆಂ. ಜೆಮ್ಮಾಕ್ ಆಮ್ಚಾ ಬಾಪಾ ಸಾರ್ಕೆಂ ಯೇನಾತ್‍ಲ್ಲೆಂ ತರೀ ದೊಳೆ ಧಾಂಪುನ್ ಆಮ್ಚಾ ಬಾಪಾ ಘುಣ್ಗುಣೊಂಕ್ ಲಾಗ್ಲೊ. ತೆವ್ಶಿಲ್ಯಾನ್ ಮಹಾಭಾರತಾ ಸುರು ಜಾಲ್ಲೆಂ.
ಲಿಲ್ಲಿನ್ ಆಪ್ಲಿಂ ಹಾತೆರಾಂ ಘೊವಾಚೆರ್ ಪ್ರಯೋಗ್ ಕೆಲ್ಲಿಂ... ಉಜ್ವ್ಯಾಕ್, ದಾವ್ಯಾಕ್... ದಾವ್ಯಾಕ್.... ಉಜ್ವ್ಯಾಕ್.... ವಯ್ರ್... ಸಕಯ್ಲ್ ..... ಧಾ ಮಿನುಟಾಂನಿ ಸಾರೊಣ್ ಆನಿ ಲಾಟ್ಣ್ಯಾಚಾ ಮಾರಾಂನಿ ಬೊಸ್ ಅರ್ಧೊ ಜೀವ್ ಜಾಲ್ಲೊ. ವಸ್ತುರ್ ಪಿಂಜ್‍ಲ್ಲೆಂ. ಸರ್ವಾಂಗ್ ಸುಜ್‍ಲ್ಲೆಂ. ಕಪಾಲಾಚೆರ್ ತೀನ್ ಧುಂಕುಂಟಾಂ ಉದೆಲ್ಲಿಂ. ಮುಕಮಳ್ ನಿಳ್ಶೆಂ ಜಾಲ್ಲೆಂ. ಬಾಯ್ಲ್ ಮಾರ್ನ್ ಥಕೊನ್ ರಡ್ತಾಲಿ.
ಬೊಸಾನ್ ಜೆಮ್ಮಾಚಾ ಕುಲ್ಯಾಂಕ್ ಖೊಟ್ ಮಾರ್ನ್ ಭಾಯ್ರ್ ಘಾಲ್ಲೆಂ.
ಹಾಚೆ ಉಪ್ರಾಂತ್ ಜೆಮ್ಮಾಚಾ ವಾಂಟ್ಯಾಕ್ ಬೊಸ್ 'ರಾವಣ' ಜಾಲ್ಲೊ. ಹ್ಯಾ ಕಷ್ಟಾಂ ಥಾವ್ನ್ ಬಚಾವ್ ಜಾಂವ್ಕ್ ತಾಕಾ ಆತಾಂ ವಾಟ್ ದಿಸಾನಾ ಜಾಲ್ಯಾ.
Tags:
Stan Ageira, Konkani Humour, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/9/2018 ಮಂಗಳೂರು ಸಿಲ್ವಂಗಾರ್ ಬೇಕರಿ...
-
10/30/2017 ನತಲಾಂಕ್ ಶಾಂತೆ ಖೆಳ್ ...
-
10/9/2017 ಆಮ್ಚೆ ಮನಿಸ್...
-
9/13/2017 ಶಾಂತಿ ಖಾತಿರ್ ಸ್ಪರ್ದೆ...
-
8/7/2017 ಆಶೆಂ ಏಕ್ ಸಂದರ್ಶನ್...
-
8/3/2017 ಹೆಂ ಮೆಲ್ಲೆಂ ಖಂಯ್ ಥಾವ್ನ್ ಆಯ್ಲೆಂ?...
-
7/19/2017 ವಿನ್ಸಿಚ್ಯೊ ಭಯ್ಣಿಂ...
-
6/8/2017 ನವಿಂ ನವಿಂ ಉದ್ಯಮಾಂ......
-
5/18/2017 ಕಷ್ಟ್ ಆಯ್ಲ್ಯಾತ್...
-
4/20/2017 ಹನಿಮೂನ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.