web analytics

From around the world

ಪ್ರವೀಣ್ ತಾವ್ರೊ, ಕುಲ್ಶೇಕರ್
             
+971 50 7554105
ತುಮ್ಚ್ಯಾ ಗಮನಾಕ್:
Best be viewed in 1366 X 768 screen resolution and in Google Chrome

ನೆಕೆತ್ರಾಂ ಪಾಟ್ಲೊ ಉಜ್ವಾಡ್

Wednesday, January 11, 2017  /  By Admin

ಬರಯ್ಣಾರಾ ವಿಶಿಂ ಜಾಣಾ ಜಾ...

80.5
User Rating
Konkani Horoscope

ನವೆಂ ವರಸ್ ಆರಂಭ್ ಜಾಲೆಂ. ಸರ್ವ್ ಪತ್ರಾಂಚೆರ್ ವರ್ಸಾಚಿ ಭವಿಶ್ಯ್'ವಾಣಿ ಛಾಪ್ತಾ. ನವೆಂ ವರ್ಸ್ ತುಮ್ಕಾಂ ಕಿತೆಂ ಭಾಸಯ್ತೆಲೆಂ ಮ್ಹಣ್ ಹರ್ಯೆಕ್ ಪತ್ರ್, ಗ್ರಹಾಂಚೆಂ ಅಧ್ಯಯನ್ ಕರ್ನ್ ಭವಿಶ್ಯ್'ವಾಣಿ ಸಾಂಗ್ತಾತ್. ಆಮಿಂಯ್ ಪಾಟಿಂ ನಾಂವ್. ತುಮ್ಚ್ಯಾ ನೆಕೆತ್ರಾಂಚೆಂ ಆನಿ ಗ್ರಹಾಂಚೆಂ ತುಲನ್ ಕೆಲೆಂ. ತುಮ್ಚ್ಯಾ ಜನನ್ ನಿಶಾನೆಕ್ ನೆಕೆತ್ರ್ ಮ್ಹಣ್ಯೆತ್ ಯಾ ಗ್ರಹ್ ಮ್ಹಣ್ ಆಪವ್ಯೆತ್ ತೆಂ ಆಮಿ ಸಾರ್ಕೆಂ ನೆಣಾಂವ್. ಇಲ್ಲಿಶಿ ಘುಸ್ಪಡ್ ಆಸಾ. ಇಂಗ್ಲೀಶಾಂತ್ ಜೊಡಿಯಾಕ್ ಸಾಯ್ನ್ ಯಾ ಸ್ಟಾರ್ ಸಾಯ್ನ್ ಮ್ಹಣ್ತಾತ್ ತರ್ ಕೊಂಕ್ಣೆಕ್ ಪಾವ್ತಾನಾ ಗ್ರಹಾಂ ಕಶಿಂ ಜಾಂವ್ಚಿಂ?

ನೆಕೆತ್ರಾಂ ಮುಕ್ಲ್ಯಾನ್ ಆಮ್ಕಾಂ ಕಾಳೊಕ್ ದಿಸ್ಲೊ. ಚಡಿತ್ ಪ್ರಯತನ್ ಕರ್ನ್ ನೆಕೆತ್ರಾಂ ಪಾಟ್ಲ್ಯಾ ಉಜ್ವಾಡಾಂತ್ ಕುರ್ವೊಂಚ್ಯಾ ಗ್ರಹಾಂಚೊ ಆಮಿ ಆಧಾರ್ ಘೆತ್ಲೊ. ಗ್ರಹಾಂಚ್ಯಾ ಮುಕ್ಲ್ಯಾನ್ ಪಾಟ್ಲ್ಯಾನ್  ಆಮಿ ತುಮ್ಚೆಂ (ಆಮ್ಚೆಂಯಿ) ಭವಿಶ್ಯ್ ಸೊಧ್ಲೆಂ. ತುಮಿ ಪಾತ್ಯೆಂವ್ಚೆಂ ನಾಂತ್. ಜನನ್ ನಿಶಾನೆಚ್ಯಾ ಆಧಾರಾಚೆರ್ ತುಮ್ಚೆಂ ಬರೆಂ ಆನಿ ವಾಯ್ಟ್ ಆಮ್ಕಾಂ ಸಾರ್ಕೆಂ ಕಳಿತ್ ಜಾಲೆಂ. ಆತಾಂ ಹಿಂ ಸತಾಂ (ಫಟಿ ಜಾಂವ್ಕ್'ಯಿ ಸಾಧ್ಯ್ ಆಸಾ!) ಉಗ್ತೆಂ ಕರ್ಚಿ ಘಡಿ ಉದೆಲ್ಯಾ.

ಮೇಷಾ (ಮಾರ್ಚ್ 21 ಥಾವ್ನ್ ಎಪ್ರಿಲ್ 20 ಪರ್ಯಾಂತ್) :

ಪಿಂತಾಚೆ ಉಪದ್ರ್ ಕಠಿಣ್ ಆಸ್ತೆಲೆ. ಪಿಂತಾಮಾಂಚೆ ನ್ಹಯ್. ವೋಂಕ್ ಆಸ್ಲ್ಯಾರ್ ಸೊರೊ ಪಿಯೆವ್ನ್ ವೊಂಕ್ತಾ ಮ್ಹಣ್ ಚೂಕ್ ಸಮ್ಜೊಂಚೆಂ ನ್ಹಯ್. ಭುಂಯ್'ಚಣೆ ಉಣೆ ಖೆಲ್ಲ್ಯಾ ತಿತ್ಲೆಂ ಬರೆಂ. ಮಾರ್ಸಾಚೊ (ಮಂಗಳ್ ಗ್ರಹ್) ಪ್ರಭಾವ್ ಆಸಾ ಜಾಲ್ಲ್ಯಾನ್ ಮಾರ್ಸ್ ಚೊಕ್ಲೆಟಾಂ ಖೆಲ್ಲ್ಯಾನ್ ಡಯಾಬಿಟಿಸ್ ಜಾಲ್ಯಾರೀ ಭಲಾಯ್ಕಿ ಹ್ಯಾ ವರ್ಸಾ ಭಿಗ್ಡೊಂಚಿ ನಾ. ಘರಾಂತ್ ಸುಣೆಂ-ಮಾಜಾರ್ ಆಸ್ಲ್ಯಾರ್ ಗುರ್ವಾಚಾರ್ ಯೆಂವ್ಚೊ ಸಂಭವ್ ಆಸಾ. ಕೋಣ್ ಗುರ್ವಾರ್ ಜಾತೆಲಿಂ, ಮನಿಸ್ ಯಾ ಮನ್ಜಾತ್ ಮ್ಹಣ್ ಸಾರ್ಕೆಂ ಕಳಿತ್ ನಾ. ಚೊರಾಂಚಿ ಈಷ್ಟಾಗತ್ ಕರ್ಯೆತ್. ಪೊಲಿಸಾಂ ಥಾವ್ನ್ ಸಂಚಿಕಾರ್ ಆಸ್ತೊಲೊ. ಪರೀಕ್ಶೆಂತ್ ನಕ್ಕಲ್ ಕಾಡ್ನ್ ಬರಯಿಲ್ಲ್ಯಾ ವಿದ್ಯಾರ್ಥಿಂಕ್ ರೇಂಕ್ ಮೆಳ್ತೆಲೆಂ.

ವೃಷಭ (ಎಪ್ರಿಲ್ 21 ಥಾವ್ನ್ ಮೇ 20 ಪರ್ಯಾಂತ್) :

ಶುಕ್ರಾನ್ (ವೀನಸ್) ಆಪ್ಲೆಂ ಜಾಳ್ ಪಾಂಗುರ್ಲಾಂ. ದಾದ್ಲ್ಯಾಂಕ್ ವರ್ಸ್‍ಭರ್ ಕಿತ್ಲೆಂ ಪ್ರಯತನ್ ಕೆಲ್ಯಾರೀ ಟಾಯೆಚಿ ಗಾಂಟ್ ಸಾರ್ಕೆಂ ಬಾಂದುಂಕ್ ಜಾಂವ್ಚಿ ನಾ. ಟಾಯೆ ಥಾವ್ನ್ ಪಯ್ಸ್ ರಾವ್ಲ್ಯಾರ್ ಬರೆಂ. ನಾ ತರ್ ವಿರಾರಾಯೆನ್ ಬಾಯ್ಲೆಂ ಲಾಗಿಂ ಝಗ್ಡೆಂ ಜಾಂವ್ಚಿಂ ಖುಣಾಂ ಆಸಾತ್. ಬಾಯ್ಲ್ ಸೊಡ್‍ದೊಡ್ ಕರ್ಚಿ ನಾ. ಗಾಳಿ ಸೊವ್ಯಾಂಚೆಂ ತೂಫಾನ್ ಉಬ್ಜೊಂಕ್ ಸಾಧ್ಯ್. ಬೊಬೆಕ್ ಘರ್ಚ್ಯಾ ವೊಣೊದಿಚೆರ್ ಫುಟ್ ಉದೆತೆಲಿ. ಮಾತ್ಯಾಚೆ ಕೇಸ್ ಝಡ್ತೆಲೆ. ತೊಪ್ಲಿಂ ಚೆಂಚ್ತೆಲಿಂ. ಬೊಶಿಯೊ ಫುಟ್ತೆಲ್ಯೊ, ವಸ್ತುರ್ ಪಿಂಜ್ತೆಲೆಂ. ಬಾಯ್ಲ್ ಗುರ್ವಾರ್ ಜಾತೆಲಿ, ಖರ್ಚ್ ಚಡ್ತೊಲೊ. ಸೆಜಾರ್ಚಿ ಬಾಯ್ಲ್ ಗುರ್ವಾರ್ ಜಾಯ್ನಾತ್‍ಲ್ಲ್ಯಾ ಪರಿಂ ಚತ್ರಾಯ್ ಸಾಂಬಾಳಿಜಾಯ್!

ಮಿಥುನಾ (ಮೇ 21 ಥಾವ್ನ್ ಜೂನ್ 20 ಪರ್ಯಾಂತ್) :

ಜೊವ್ಳ್ಯಾಂಚೆಂ ನಶೀಬ್ ಬರೆಂ ಆಸಾ. ಜೊವ್ಳ್ಯಾಂ ಚೆಡ್ಯಾಂನಿ ಜೊವ್ಳಿ ಚೆಡ್ವಾಂಲಾಗಿಂ ಕಾಜಾರ್ ಜಾಲ್ಯಾರ್ ಲೊಟ್ರಿ ಮೆಳ್ತೆಲಿ. ಲೊಟ್ರೆಚ್ಯಾ ದುಡ್ವಾ ಪ್ರಾಸ್ ಚಡ್ ಪಯ್ಶೆ ತಾಂಚಿಂ ಬಾಯ್ಲಾಂ ಶೊಪಿಂಗಾಚೆರ್ ವಿಬಾಡ್ತೆಲಿಂ. ಘೊವ್ ಕಂಗಾಲ್ ಜಾವ್ನ್ ರಿಣಾಂತ್ ಬುಡ್ತೆಲೆ. ಬುಧಾಚೊ ಪ್ರಭಾವ್ ಥೊಡ್ಯಾಂಕ್ ಪಾಡ್ ಆನಿ ಖೊಟ್ಯಾಂಕ್ ಬರೊ. ಸತ್ ಉಲಯ್ತೆಲೆ ಗಾಡ್ವಾ ಪರಿಂ ಪಾಟಿಂ ಉರ್ತೆಲೆ. ಫಟಿ ಉಲಯ್ತೆಲೆ ಘೊಡ್ಯಾ ಪರಿಂ ಮುಕಾರ್ ಧಾಂವ್ತೆಲೆ ಆನಿ ನಿಸ್ರೊನ್ ಕಸ್ತಾಳಾಂತ್ ಪಡ್ತೆಲೆ. ಆಫೀಸಾಂತ್ ಬೊಸಾಚಿ ಈಷ್ಟಾಗತ್ ಕರ್ನ್ 'ಚಮಚಾ' (ಸ್ಪೂನ್) ಮ್ಹಣ್ಚೆಂ ಆಡ್‍ನಾಂವ್ ಯೆಂವ್ಚೊ ಸಂಭವ್ ಆಸಾ. ಬೊಸಾಚೆ ಮೊಚೆ ಪೊಲಿಶ್ ಕರ್ನ್ ಸದಾಂ ಸಕಾಳಿಂ ಏಕ್ ಕೊಪ್ ಚಾ ತಯಾರ್ ಕರ್ನ್ ದಿಲಿ ತರ್ ಕಾಮಾಂತ್ ಭಡ್ತಿ ಖಂಡಿತ್ ಮೆಳ್ತೆಲಿ. ಬೊಸಾಚ್ಯಾ ಬಾಯ್ಲೆಚೊ ಬುಟ್ಟ್ಯೊ ಕೆಲ್ಲ್ಯಾಂತ್ ಚಡ್ ಫಾಯ್ದೊ. ಬೊಸಾಚೆಂ ಕಾರ್ ಚಲಂವ್ಚೊ ಆವ್ಕಾಸ್ ಪ್ರಾಪ್ತ್ ಜಾತೊಲೊ. ಕಾರ್ ಆಕ್ಸಿಡೆಂಟ್ ಜಾಲೆಂ ತರ್ ಕಾಮಾ ಥಾವ್ನ್ ಕಾಡ್ತೆಲೆ.

ಕರಕ (ಕ್ಯಾನ್ಸರ್ - ಜೂನ್ 21 ಥಾವ್ನ್ ಜುಲೈ 22 ಪರ್ಯಾಂತ್) :

ಕುರ್ಲ್ಯೊ ಖೆಲ್ಲ್ಯಾಂತ್ ಬರ್ಪೂರ್ ಫಾಯ್ದೊ ಆಸ್ತೊಲೊ. ಹಪ್ತ್ಯಾಕ್ ಏಕ್ ಪಾವ್ಟಿಂ ತರೀ ಕುರ್ಲ್ಯೊ ಖೆಲ್ಲ್ಯಾಂತ್ ಮತ್ ಆನಿ ಕುಡಿಂತ್ ಧಾದೊಸ್ಕಾಯ್ ಚರ್ತೆಲಿ. ಭೊಗ್ಣಾಂನಿ ರೊಮಾನ್ಸ್ ಉಮಾಳ್ತೆಲೆಂ. ಚಂದ್ರಾನ್ ಹ್ಯಾ ನಿಶಾನೆಚೆರ್ ಪ್ರಕಾಸ್ ಫಾಂಕಯ್ಲಾ ಜಾಲ್ಲ್ಯಾನ್ ಹನಿಮೂನಾಕ್ ವೆತೆಲ್ಯಾಂಕ್ ಸಾರ್ಕೊ ವೇಳ್. ಹನಿಮೂನಾಕ್ ವೆತೆಲ್ಯಾಂಕ್ ಕಾಜಾರ್ ಜಾಯ್ಜಯ್ ಮ್ಹಣ್ ನಾ. ಪ್ರಾಯೆಸ್ತಾಂನಿ ಹನಿಮೂನಾಕ್ ಗೆಲ್ಯಾರ್ ತಾಂಚಿ ಭಲಾಯ್ಕಿ ಸುಧ್ರಾತೆಲಿ. ಪುರಾಸಣೆನ್ ಖರಸ್ ಆಯ್ಲಿ ತರ್ ರಾತಿಂ ಉಟೊನ್ ಚಂದ್ರಾಚೆರ್ ಏಕ್ ದೀಷ್ಟ್ ಘಾಲ್ಯಾರ್ ಜಾಲೆಂ, ಖರಸ್ ಆಪ್ಶಿಚ್ ರಾವ್ತೆಲಿ. ನೈಟಿ ಆನಿ ನೈಟ್ ಡ್ರೆಸ್ಸಾಚೊ ಖರ್ಚ್ ಉಣೆ ಜಾತೊಲೊ. ಕುರ್ಲ್ಯಾಂಚೆಂ ಮೋಲ್ ಚಡ್ಚೊ ಸಂಭವ್ ಆಸಾ. ವಿದ್ಯಾರ್ಥಿಂನಿ ಕುರ್ಲಿ ಖೆಲ್ಯಾರ್ ಶಿಕ್ಪಾ ಥಾವ್ನ್ ತಾಂಚಿ ಮತ್ ಭಂಗ್ ಜಾಂವ್ಚಿ ಸಾಧ್ಯತಾ ಆಸಾ ಜಾಲ್ಲ್ಯಾನ್ ತಾಂಚೆ ಥಾವ್ನ್ ಕುರ್ಲ್ಯಾಂಚೆಂ ನಿಸ್ತೆಂ ಲಿಪವ್ನ್ ದವರ್ಲ್ಯಾರ್ ಬರೆಂ. ನಾ ತರ್ ಉಪ್ರಾಂತ್ ಘಡೊಂಕ್ ಆಸ್ಚ್ಯಾ ಅವ್ಘಡಾಂಕ್ ವ್ಹಡಿಲಾಂ ಜವಾಬ್ದಾರ್.

ಸಿಂಹಾ (ಜುಲೈ 23 ಥಾವ್ನ್ ಅಗೋಸ್ತ್ 22 ಪರ್ಯಾಂತ್) :

ರಾನಾಕ್ ವಚೊಂಕ್ ಜಾಯ್ನಾ ತರ್ Zooಕ್ ವಚೊನ್ ಶಿಂವಾಚಿ ಭೆಟ್ ಮ್ಹಯ್ನ್ಯಾಕ್ ಏಕ್ ಪಾವ್ಟಿಂ ತರೀ ಗರ್ಜೆಚಿ. ಘೊವಾಕ್ ಬಾಯ್ಲೆ ಮುಕಾರ್ ಉಲೊಂಕ್ ಧೈರ್ ಮೆಳ್ತೆಲೆಂ. ಆದ್ಲ್ಯಾ ವರ್ಸಾಪರಿಂ ಹ್ಯಾ ವರ್ಸಾ ಬಾಯ್ಲೆ ಲಾಗಿಂ ಉಲಯ್ತಾನಾ ಗಾಗ್ ಆನಿ ಕಾಂಪ್ ಆಸ್ಚಿ ನಾ. ದಫ್ತರಾಂತ್ ಕಾಮ್ ಕರ್ತೆಲ್ಯಾಂಕ್ ಬೊಸಾಚೆಂ ಭ್ಯೆಂ ದಿಸ್ಚೆಂ ನಾ. ಬೊಸ್ ನರ್ವಸ್ ಜಾತೆಲೆ. ಹ್ಯಾ ಮ್ಹಯ್ನ್ಯಾಂತ್ ಜಲ್ಮಾಲ್ಲ್ಯಾ ಬಾಯ್ಲಾಂನಿ ರಿಹರ್ಸಲ್ ಕೆಲ್ಯಾರ್ ಶಿಂವಾಂ ಪರಿಂ ಗೊರೊಜ್ ಮಾರ್ಚ್ಯಾಂತ್ ನಿಪುಣ್ ಜಾತೆಲಿಂ. ಹಾಂಚ್ಯಾ ಆವಾಜಾಕ್ ಘೊವಾಂಚಿ ಶಿಮ್ಟಿ ಲಿಪ್ತೆಲಿ. ಹ್ಯಾ ಬಾಯ್ಲಾಂಚೊ ತಾಳೊ ಆನಿ ಗೊರೊಜ್ ಆಯ್ಕೊನ್ ಸೆಜಾರ್ಚ್ಯಾಂಕ್ ಹಾರ್ಟ್ ಎಟ್ಯಾಕ್ ಯೇಂವ್ಕ್ ಫುರೊ. ಸುರ್ಯಾಚೊ ಪ್ರಭಾವ್ ಆಸಾ ಜಾಲ್ಲ್ಯಾನ್ ಸದಾಂ ಕರ್ಕಟ್ಯಾ ವೊತಾಕ್ ಏಕ್ ವೋರ್ ತರೀ ಚಲ್ಚೆಂ ಫಾಯ್ದ್ಯಾಚೆಂ. ಕಾತ್ ಕಾಳಿ ಜಾಲಿ ತರ್ ಸುರ್ಯಾನ್ ಬೆಸಾಂವ್ ದಿಲಾಂ ಮ್ಹಣ್ ಸಮ್ಜೊಂಚೆಂ. 'ಫೇರ್ ಎಂಡ್ ಲವ್‍ಲಿ' ಬಿಸ್‍ನೆಸ್ ಚಡ್ತೆಲೆಂ. ತಕ್ಲಿ ಘುಂವೊಳ್ ಆಸ್ಲ್ಯಾರ್ ಗೈನೊಕೊಲೊಜಿಸ್ಟಾಕ್ ಭೆಟ್ಯೆತ್. (ಸ್ತ್ರೀಯಾಂಕ್ ಮಾತ್ರ್, ದಾದ್ಲ್ಯಾಂನಿ ಬ್ಲಡ್ ಪ್ರೆಶರ್ ತಪಾಸಣ್ ಕರಿಜಾಯ್).

ಕನ್ಯಾ (ಅಗೋಸ್ತ್ 23 ಥಾವ್ನ್ ಸಪ್ತೆಂಬರ್ 22 ಪರ್ಯಾಂತ್) :

ಬುಧ ಗ್ರಹ್ ತುಮ್ಚ್ಯಾ ತಕ್ಲೆ ಭಂವ್ತಿಂ ಘುಂವೊನ್ ಆಸಾ. ದಾದ್ಲ್ಯಾಂಚೆ ಮತಿಂತ್ ಸೊಭಿತ್ ಸೊಭಿತ್ ಚೆಡ್ವಾಂ ಸೊಡ್ನ್ ದುಸ್ರೆಂ ಕಿತೆಂಚ್  ನಾ. ನಿಳ್ಶಿಂ ಪಿಂತುರಾಂ ಲಿಪೊನ್ ಲಿಪೊನ್ ಪಳೆಯ್ತಾತ್. ಆಂಕ್ವಾರ್ ಚಲಿಯಾಂಕ್ ಮಾದ್ರ್ ಯಾ ಮದರ್ ಜಾಂವ್ಚಿ ಆಶಾ ಯೆತಾ. ಕಾಜಾರಿ ಸ್ತ್ರೀಯಾಂಕ್ ಆಪ್ಣಾಚೊ ಘೊವ್ ಸಾದೊ ನ್ಹಯ್ ಮ್ಹಣೊನ್ ಕಾಜಾರಾ ಉಪ್ರಾಂತ್ ಕಳಿತ್ ಜಾತಾ. ಪೂಣ್ ವೇಳ್ ಉತ್ರಾತಾ. ಘೊವ್ ಆಫೀಸಾಕ್ ಗೆಲ್ಲ್ಯಾ ವೆಳಾರ್ ಇಂಟರ್'ನೆಟಾರ್ ತಿಂ ನಿಳ್ಶಿಂ ಪಿಂತುರಾಂ ಸೊಧ್ತಾತ್. ಕಂಪ್ಯೂಟರಾಂತ್ ಲಿಪೊನ್ ಆಸ್ಚ್ಯಾ ಎಕಾ ಫೈಲಾಂತ್ ಕಾಜಾರಾ ಆದಿಂ ಘೊವಾನ್ ಬಾಯೆಚ್ಯಾ ಬೆಸ್ಟ್ ಫ್ರೆಂಡಾಕ್ ಬರಯಿಲ್ಲೆಂ ಪತ್ರ್ ತಿಚ್ಯಾ ದೊಳ್ಯಾಂಕ್ ಸಾಂಪಡ್ತಾ. ಘೊವಾಚೊ ನಕ್ಲಿ ಮೋಗ್ ಪಾರ್ಕಿತಾನಾ ಹೊ ಸಂಸಾರ್ 'ಅಶಾಶ್ವಿತ್' ಮ್ಹಣ್ ತಿಕಾ ಸಮ್ಜತಾ. ವರ್ಸ್ ಆಕೇರ್ ಜಾತಾನಾ ಬಾಯ್ಲಾಂಕ್ ಸಂಸಾರಿ ವಸ್ತುಂಚೆರ್ ಆಶಾ ಚಡ್ತಾ. ನತಾಲಾಂಚೆಂ ಶೊಪಿಂಗ್ ಕರುಂಕ್ ದಾದ್ಲೊ ರೀಣ್ ಕಾಡ್ತಾ. ನವ್ಯಾ ವರ್ಸಾಚ್ಯಾ ಪಾರ್ಟೆಂತ್ ಡಾನ್ಸ್  ಕರ್ತಾನಾ ಪರ್ಕಿ ಸ್ತ್ರೀಯೆಚಿ ವೊಳಕ್ ಜಾತಾ. ಬಾಯ್ಲೆಚೆಂ ಭಯಾನಕ್ ರೂಪ್ ಚಿಂತುನ್ ದಾದ್ಲೊ ತಿ ಪರ್ಕಿ ವೊಳಕ್ ತಿತ್ಲ್ಯಾರ್ ವಿಸ್ರಾತಾ. ಬಾಯ್ಲ್ ಆಪುಣ್ ಕಿತ್ಯಾಕ್ ಮಾದ್ರ್ ಜಾಲಿನಾ ಮ್ಹಣ್ ಪಶ್ಚಾತ್ತಾಪ್ ಪಾವ್ತಾ.

ತುಲಾ (ಸಪ್ತೆಂಬರ್ 23 ಥಾವ್ನ್ ಅಕ್ತೋಬರ್ 22 ಪರ್ಯಾಂತ್) :

ಹ್ಯಾ ನಿಶಾನೆಂತ್ ಜಲ್ಮಾಲ್ಲೆ ದಾದ್ಲೆ ಚಡಾವತ್ ಕೊಮೊಡಾಂತ್ ಶೀದಾ ಮುತೊಂಕ್ ಕಷ್ಟಾತಾತ್. ಬಾಯ್ಲಾಂಕ್ ಹಿ ತಕ್ಲಿ ಫಡಾಫಡ್ ನಾ. ಕಂಜೂಸ್ ಘೊವಾಂಕ್ ಖರ್ಚಿ ಬಾಯ್ಲ್ ಮೆಳ್ತಾ. ಖರ್ಚಿ ಬಾಯ್ಲಾಂಕ್ ಕಂಗಾಲ್ ಘೊವ್ ಮೆಳ್ತಾತ್. ನಾಣ್ಯೆಂತ್ ಮುತಾಚಿ ಘಾಣ್ ಯೆತಾ ಮ್ಹಣ್ ಕೆದಾಳಾಯ್ ತಾಂಚೆ ಮಧೆಂ ಝಗ್ಡೆಂ ಜಾತಾ. ನಿದೊಂಕ್ ವೆತಾನಾ ಝಗ್ಡೆಂ ವಿಸ್ರಾತಾತ್. ಸಕಾಳಿಂ ಆಫೀಸಾಕ್ ವೆತಾನಾ ಪೆಂಟಾಚಿ ಜಿಪ್ಪ್ ಘಾಲುಂಕ್ ಜಾಯ್ತೆ ಪಾವ್ಟಿಂ ಉಡಾಸ್ ಆಸಾನಾ. ಸಗ್ಳೆಂ ದಫ್ತರ್ ಹಾಸ್ತಾ. ತುಂಯಿ ಪಿಶ್ಯಾಂಪರಿಂ ಕಾರಣ್ ನೆಣಾಸ್ತಾನಾ ಹಾಸ್ತಾಯ್. ತುಂ ಆನಿ ತುಜಿ ಬಾಯ್ಲ್ ದೊಗಾಂಯ್ ರಾಂದ್ಚ್ಯಾಂತ್ ಆಳ್ಶಿ. ರೆಸ್ಟೊರೆಂಟಾಚೆಂ ಖಾವ್ನ್ ಭಲಾಯ್ಕಿ ಭಿಗಡ್ತಾ. ಟೊಯ್ಲೆಟ್ ಘಾಣ್ತಾ. 'ಲೆಮೊಫೆನ್' ಗುಳಿಯಾಂಕ್ ಕಂಡಾಪಟ್ಟೆ ಡಿಮಾಂಡ್. ಆಫೀಸಾಕ್ ಗೈರ್ ಹಾಜ್ರಿ ಮ್ಹಣೊನ್ ತುಜೊ ಬೊಸ್ ಪಾಗ್ ಕಾತರ್ತಾ. ವಿರಾರ್ ಜಾವ್ನ್ ತುಂ ಬಾಯ್ಲೆಚೊ ಬ್ಲಾವ್ಸ್ ಕಾತರ್ತಾಯ್. ಶುಕ್ರಾ ದೆಸೆ ಚುಕ್‍ಲ್ಲೆಂ ನಾ.

ವೃಶ್ಚಿಕಾ [ಸ್ಕೊರ್ಪಿಯೊ] (ಅಕ್ತೋಬರ್ 23 ಥಾವ್ನ್ ನವೆಂಬರ್ 22 ಪರ್ಯಾಂತ್) :

ವಾಗೊಣೆ ಥಾವ್ನ್ ಸುಟ್ಕಾ ನಾ. ಜಿವ್ದಾಳಿ ಧೊಸ್ತಾತ್. ಖಬ್ರೆ ಸಂಸಾರಾಂತ್ ತುಂ ನಾಂವಾಡ್ಡಿಕ್. ಕಿತೆಂಯಿ ಖಬರ್ ಹೆರಾಂಕ್ ಸಾಂಗಾನಾ ತರ್ ತುಜೆಂ ಪೊಟ್ ಫುಗ್ತಾ. ವಾಯೆಚೆ ಉಪದ್ರ್, ತುಜಿ ವಾಯ್ ಗೂಣ್ ಕರುಂಕ್ ದಾಕ್ತೆರ್ ಸಲ್ವತಾತ್. ಕೊಡು ಕಸಾಯ್ ಪಿಯೆವ್ನ್ ವಿಪ್ರೀತ್ ಖರಾಯ್ ಜಾತಾ. ಹೆರಾಂ ವಿಶಿಂ ಪಾಡ್ ಉಲಯ್ತಾನಾ ವಾಯ್ ಭರೊನ್ ಯೆತಾ. ಬರೆಂ ಉತರ್ ಉಲಯ್ತಾನಾ ತುಂ ವಾಯೆ ಥಾವ್ನ್ ಮುಕ್ತ್ ಜಾತಾಯ್. ಪಾದ್ರಿ ಮಾದ್ರಿಂಚೊ ತುಕಾ ವಿಶೇಸ್ ಮೋಗ್. ಸೆಜಾರಾ 'ಕಟ್ಪಟಿ' ಚುಕ್‍ಲ್ಲಿ ನಾ. ವಾಗೊಣೆ ಥಾವ್ನ್ ಪಯ್ಸ್ ರಾವ್ಲ್ಯಾರ್ ಶಾಂತಿ ಸಮಾಧಾನ್ ಮೆಳ್ತೆಲೆಂ. ವಾಗೊಣೆಚ್ಯೊ ಧೊಶಿ ಚಡ್ತಾತ್. ಬೊಸಾಕ್ ತುಂ ಮ್ಹಳ್ಯಾರ್ ಭಾರಿ. ತಾಚಿಂ ಸರ್ವ್ ಭಾಯ್ಲಿಂ ಕಾಮಾಂ ತುಂ ಕರ್ತಾಯ್. ಪರ್ನಿ ಟಿವಿ ಪಾಡ್ ಜಾವ್ನ್ ನವಿ ಟಿವಿ ಹಾಡ್ಚೆಂ ಭಾಗ್ ಆಸಾ. ಭುರ್ಗ್ಯಾಂನಿ ಘರಾ ಭಿತರ್ ಕ್ರಿಕೆಟ್ ಖೆಳೊನ್ ನವಿ ಟಿವಿ ಫುಟ್ಚೊ ಸಂಭವ್ ಆಸಾ. ಕಾಳ್ಜಾಚಿ ಚಡಿತ್ ಜತನ್ ಘೆತ್ಲ್ಯಾರ್ ಬರೆಂ. ವೆಲೈಂಟೆನ್ ಡೇ ಆಚರಣ್ ಕರ್ನ್ ನೋವ್ ಮ್ಹಯ್ನ್ಯಾ ಉಪ್ರಾಂತ್ ಚಿಲ್ಡ್ರನ್ಸ್ ಡೇ ಕಿತ್ಯಾಕ್ ಆಚರಣ್ ಕರ್ತಾತ್ ಮ್ಹಣ್ ತುಕಾ ಹ್ಯಾ ಮಹಿನ್ಯಾಂತ್ ಜಲ್ಮಾಲ್ಲೆ ವರ್ವಿಂ ಕಳ್ತಾ.

ಧನು (ನವೆಂಬರ್ 23 ಥಾವ್ನ್ ದಸೆಂಬರ್ 21 ಪರ್ಯಾಂತ್) :

ತುಜೊ ಮೋಗ್ ಆನಿ ಉತ್ರಾಂ, ದೋನ್‍ಯಿ ಭಾಲಿಯೆಪರಿಂ. ಭಾರಿಚ್ ತೀಕ್ಷ್ಣ್. ತುಜೆಂ ಕಾಳಿಜ್ ಭಾರಿಚ್ ನಿತಳ್. ಮತಿಂತ್ ಕಿತೆಂಚ್ ಪಾಡ್ ನಾ. ಹೆರಾಂಕ್ ತೊಪ್ಚೆಂ ತುಂ ದಾಕ್ಷೆಣೆ ವಿಣೆ ಸಾಂಗ್ತಾಯ್. ಹೆರಾಂನಿ ದಾಕ್ಷೆಣ್ ವಿಸ್ರೊನ್ ಶೀದಾ ತುಕಾ ಸಾಂಗ್ಲ್ಯಾರ್ ತುಕಾ ರಾಗ್ ಯೆತಾ. ತಕ್ಲೆಂತ್ ಜುಪಿಟರ್ ಘುಂವ್ತಾ. ಹ್ಯಾ ಮ್ಹಯ್ನ್ಯಾಂತ್ ಜಲ್ಮಾಲ್ಲ್ಯಾ ಚೆರ್ಕ್ಯಾಕ್ ಪೀಟರ್ ಮ್ಹಣ್ ನಾಂವ್ ದಿಲ್ಯಾರ್ ನಾಂವಾಡ್ಡಿಕ್ ಜಾತಾತ್. ಜುಪಿಟರ್ ತಾಂಕಾಂ ಸಾಂಗಾತ್ ದಿತಾ. ಚೆಡ್ವಾಂಕ್ ಫಕತ್ 'ಜು' ಮ್ಹಣ್ಚೆಂ ಮಟ್ವೆಂ ನಾಂವ್ ದಿವ್ಯೆತ್. 'ಜು' ಆನಿ ಪೀಟರಾಚೆಂ ಕಾಜಾರ್ ಜಾಲೆಂ ತರ್ ಮುಕ್ಲ್ಯಾ ಜಲ್ಮಾಂತ್ ತಿಂ ಜುಪಿಟರಾಂತ್ ಜಲ್ಮೊನ್ ರಾಜ್ ಕರ್ತೆಲಿಂ. 'ಬಿಲ್ಲು ಬಾಣ' ಸ್ಪರ್ಧ್ಯಾಂತ್ ಹಾಂಕಾಂ ಒಲಿಂಪಿಕ್ಸಾಂತ್ ಭಾಂಗ್ರಾಳೆಂ ಪದಕ್ ಜೊಡ್ಚಿ ಶ್ಯಾತಿ ಆಸಾ. ಟಾರ್ಜನಾಚೆಂ ಜನನ್ ಹ್ಯಾಚ್ ಮ್ಹಯ್ನ್ಯಾಂತ್ ಜಾಲ್ಲೆಂ. ಹ್ಯಾ ವರ್ವಿಂ ತುಕಾ ರಾನ್ ಮ್ಹಳ್ಯಾರ್ ಭಾರಿ. ಮನ್ಜಾಂತಿಚೆರ್ ವಿಶೇಸ್ ಮೋಗ್. ಘರಾ ಭಿತರ್ ಟಾರ್ಜನಾ ಪರಿಂ ನೆಸ್ಚೆಂ ಮ್ಹಳ್ಯಾರ್ ಖಂಯ್ ನಾತ್‍ಲ್ಲಿ ಮಝಾ. ಟಾರ್ಜಾನಾ ಪರಿಂ ತುಜ್ಯೊ ಕಿಂಕ್ರಾಟ್ಯೊ ಆಯ್ಕೊನ್ ತುಜಿ ಬಾಯ್ಲ್ ನರ್ವಸ್ ಜಾತೆಲಿ, ಘರಾ ಥಾವ್ನ್ ಕುಟ್ಮಾ ಸವೆಂ ರಾನಾಕ್ ಶಿಫ್ಟ್ ಜಾತೊಲೊಯ್ ಮ್ಹಣ್ ಭಿಯೆತೆಲಿ.

ಮಕರಾ (ದಸೆಂಬರ್ 22 ಥಾವ್ನ್ ಜನೆರ್ 19 ಪರ್ಯಾಂತ್) :

ಶನಿಕಾಲ ಥಾವ್ನ್ ಮುಕ್ತ್ ಜಾಯ್ಜಾಯ್ ತರ್ ಹಫ್ತ್ಯಾಕ್ ಏಕ್ ಪಾವ್ಟಿಂ ಬೊಕ್ರ್ಯಾಚೆಂ ಮಾಸ್ ಖಾಂವ್ಚೆಂ ಗರ್ಜೆಚೆಂ. ಬೊಕ್ರ್ಯಾ ಪರಿಂ ಜಿಯೆತೊಲೊಯ್. ಘೊಟ್ಯಾಚೆ ಘಾಣಿಕ್ ತುಂ ಪರ್ಮಳ್ ಮ್ಹಣ್ತೊಲೊಯ್. ಬೊಕ್ರ್ಯಾಪರಿಂ ಫಾಲ್ಯಾಂಚಿ ತುಕಾ ಪರ್ವಾ ನಾ. ಸರ್ವ್ ದಾದ್ಲ್ಯಾ ಪರಿಂ ತುಂಯಿ ಬಾಯ್ಲೆಕ್ ಭಿಯೆತೊಲೊಯ್. ಸರ್ವ್ ಬಾಯ್ಲಾಂಪರಿಂ ಹ್ಯಾ ಮ್ಹಯ್ನ್ಯಾಂತ್ ಜಲ್ಮಾಲ್ಲಿಂ ಬಾಯ್ಲಾಂಯ್ ಆಪ್ಲ್ಯಾ (ಹೆರಾಂಚ್ಯಾ ನ್ಹಯ್!) ದಾದ್ಲ್ಯಾಂಕ್ ಕಂಟ್ರೋಲಾರ್ ದವರ್ತೆಲಿಂ. ದೊಗಾಂಯ್ಚೊ ಜಲ್ಮ್ ಹ್ಯಾಚ್ ಮ್ಹಯ್ನ್ಯಾಂತ್ ತರ್ ಮಹಾ ಭಾರತಾ ಥಾವ್ನ್ ಮುಕ್ತ್ ಜಾಂವ್ಚೆ ಅಸಂಭವ್. ರೈಲಾರ್ ಟಿಕೇಟ್ ನಾಸ್ತಾನಾ ಪಯ್ಣ್ ಕರ್ಯೆತ್. ಸಿಟಿ ಬಸ್ಸಾರ್ ಚತ್ರಾಯ್ ಗರ್ಜೆಚಿ. ಆಫೀಸಾಚೆಂ ರಿಸೆಪ್ಶನಿಸ್ಟ್ ತುಕಾ ಕಿತ್ಯಾಕ್ ಆತ್ಮೀಯ್ ಜಾತಾ ಮ್ಹಣ್ ತುಂ ನೆಣಾಂಯ್. ಹಿ ಫಕತ್ ಶನಿಕಾಲಚಿ ಸುರ್ವಾತ್ ಮ್ಹಣ್ ತುಂ ನಿಸ್ರಾಲ್ಲ್ಯಾ ಉಪ್ರಾಂತ್ ಜಾಣಾ ಜಾತಾಯ್. ಕ್ರಿಕೆಟಾಂತ್ ಬ್ಯಾಟಿಂಗ್ ಕರ್ತಾನಾ ಝೀರೊ ಘಾಲ್ತಾಯ್. ಬೆಟ್ಟಿಂಗ್ ಕೆಲೆಂ ತರ್ ಸರ್ವ್ ಹೊಗ್ಡಾಯ್ತೊಲೊಯ್. ಕಾಜಾರ್ ಜಾಯ್ನಾಸ್ತಾನಾ ಪಾದ್ರಿ ಯಾ ಮಾದ್ರಿಂ ಜಾಲ್ಯಾರ್ ಬರೆಂ ಭವಿಶ್ಯ್ ರಾಕೊನ್ ಆಸ್ತೆಲೆಂ.

ಕುಂಭಾ (ಜನೆರ್ 20 ಥಾವ್ನ್ ಫೆಬ್ರೆರ್ 19 ಪರ್ಯಾಂತ್) :

ನೋವ್ ಮ್ಹಯ್ನ್ಯಾ ಉಪ್ರಾಂತ್ ಚಿಲ್ಡನ್ಸ್ ಡೇ ಆಚರಣ್ ಜಾಯ್ಜಾಯ್ ತರ್ ಹ್ಯಾ ಮ್ಹಯ್ನ್ಯಾಂತ್ ಜಲ್ಮಾಲ್ಲ್ಯಾಂನಿ ಖುಶೆನ್ ಹ್ಯಾಚ್ ಮಹಿನ್ಯಾಂತ್ ವೆಲೆಂಟೈನ್ ಡೇ ಆಚರಣ್ ಕರ್ಚೆಂ ಗರ್ಜೆಚೆಂ. ಶನಿ ಥಾವ್ನ್ ಮುಕ್ತ್ ಜಾಯ್ಜಾಯ್ ತರ್ ಮ್ಹಯ್ನ್ಯಾಕ್ ಏಕ್ ಪಾವ್ಟಿಂ ತರೀ ಸ್ವಿಮ್ಮಿಂಗ್ ಪೂಲಾಂತ್, ತಳ್ಯಾಂತ್, ನಂಯ್ತ್ ಯಾ ದರ್ಯಾಂತ್ ಉಪ್ಯೆಂವ್ಚೆಂ ಫಾಯ್ದ್ಯಾಚೆಂ. ಶನಿ ಧುವ್ನ್ ವೆತೆಲಿ. ಉಪ್ಯೆಂವ್ಕ್ ಕಳಿತ್ ನಾ ತರ್ ಮ್ಹಯ್ನ್ಯಾಕ್ ಏಕ್ ಪಾವ್ಟಿಂ ತಡಿರ್ ರಾವೊನ್ ಉದ್ಕಾಂತ್ ತಕ್ಲಿ ಬುಡವ್ನ್ ಕಾಡ್ಲ್ಯಾರೀ ಚಲ್ತಾ. ಘರಾ ವಸ್ತುರ್ ಉಂಬಳ್ನ್ ಆನಿ ತೊಪ್ಲಿಂ ಘಾಸುನ್ ತುಂ ಥಕ್ಲಾಯ್. ಭುರ್ಗ್ಯಾಂಚೆಂ ಹೋಮ್‍ವರ್ಕ್ ಕರ್ನ್ ತುಜಿ ತಕ್ಲಿ ಪಿಸಾಂತುರ್ ಜಾಲ್ಯಾ. ಇಸ್ಕಲಾಂತ್ ಟೀಚರಾಂ ಭುರ್ಗ್ಯಾಂಕ್ ಹೋಮ್‍ವರ್ಕ್ ದಿತಾತ್ ಯಾ ಭುರ್ಗ್ಯಾಂಚ್ಯಾ ಬಾಪಾಯ್ಕ್ ದಿತಾತ್ ಮ್ಹಣ್ ತುಕಾ ಸಮ್ಜಾನಾ. ಬಾಯ್ಲ್ ಆಪ್ರೂಪ್‍ಶೆಂ ಇಲ್ಲೆಶೆಂ ಶೆಕ್ತಾ. ಪೂಣ್ ತುಕಾ ಸೊರೊ ಪಿಯೆಂವ್ಕ್ ಮಾತ್ರ್ ಸೊಡಿನಾ.

ಮೀನಾ (ಫೆಬ್ರೆರ್ 20 ಥಾವ್ನ್ ಮಾರ್ಚ್ 20 ಪರ್ಯಾಂತ್) :

ಶಿಳೊಣಿ ಮಾರ್ಚ್ಯಾಂತ್ ತುಂ ಸಿನೆಮಾ ನಟ್ ಗೋವಿಂದಾ ಪರಿಂ ನಂಬರ್ ವನ್. ವಾಟೆರ್ ವೆತಾನಾ ಚೆಡ್ವಾನ್ ಕಾನ್ಸುಲಾಕ್ ಥಾಪಡ್ ಮಾರ್ಲೆಂ ತರ್ Xray ಕಾಡ್ಚಿ ಗರ್ಜ್ ಆಸಾ. ಘರಾಂತ್ ಬಾಯ್ಲೆನ್ ಕುಟಿ ಘಾಲ್ಯೊ ತರ್ ತಕ್ಲೆಚೆಂ 'ಸ್ಕ್ಯಾನ್' ಚುಕಾನಾಸ್ತಾನಾ ಕರಿಜಾಯ್. ಹ್ಯಾ ಮ್ಹಯ್ನ್ಯಾಂತ್ ಜಲ್ಮಾಲ್ಲ್ಯಾ ಗೈನೊಕೊಲೊಜಿಸ್ಟಾಂಕ್ ವೋಂಕ್ ಆನಿ ತಕ್ಲಿ ಘುಂವಳ್ ಆಸ್ತೆಲಿ. ಡೆಂಟಿಸ್ಟಾಂಕ್ ದಾಂತ್ ದೂಕ್ ಚುಕ್‍ಲ್ಲಿ ನಾ. ಸ್ತ್ರೀಯಾಂಕ್ ತೆಲಾ ತುಪಾಚೆಂ ಖಾಂವ್ಕ್ ವಿಶೇಸ್ ಆಶಾ. ವರ್ಸ್ ಆಕೇರ್ ಜಾತಾನಾ ಮೊಟಾಯ್ ಆನಿ ವಜನ್ ಚಡೊನ್ ಖಾಟ್ ಮೊಡ್ಚೊ ಸಂಭವ್ ಆಸಾ. ಚಲ್ತಾನಾ ಭುಂಯ್ ಕಾಂಪ್ ಜಾಂವ್ಚೊ ಅಪಾಯ್ ಆಸಾ. ವ್ಯಾಯಮ್ ಕೆಲ್ಯಾರ್ 'ಸ್ಟೀಲ್ ಬೊಡಿ' ಜಾತೆಲಿ. ಜುಪಿಟರಾಚೆಂ ವಾರೆಂ ಹಾಂಕಾಂ ತವಳ್ ತವಳ್ ಆದಾಳ್ತಾ. ಸಪ್ಣಾಂಕ್ ಲಿಮಿಟ್ ನಾ. ಸಪ್ಣಾಂತ್ ಆಶೆಲ್ಲೆಂ ಸರ್ವ್ ಮೆಳ್ತೆಲೆಂ. ಕಬಡ್ಡಿ ಖೆಳಾಂತ್ ದಾದ್ಲೆ ಸ್ತ್ರೀಯಾಂ ಲಾಗಿಂ ಜಿಕ್ತೆಲೆ. ಘೊವಾಚಿಂ ಬಂಡಲಾಂ ಬಾಯ್ಲೆಕ್ ಕಳ್ತಾತ್. ಘೊವಾಚಿಂ ದೂರಾಂ ಬಾಯ್ಲ್ ಪಬ್ಲಿಕ್ ಕರ್ತಾ.

Tags:  Stan Ageira, Konkani Horoscope, Konkani, Mangalore, Mangalorean, Mother Tongue

1 Comment/s.

  1. Vinod Pais, Bantwal
    ಹಾಂವ್ ನವೆಂಬ್ರಾಚ್ಯಾ 23 ತಾರಿಕೆರ್ ರಾತಿಂ 12ಕ್ ಜಾಲ್ಲೊ. ಮ್ಹಜೆಂ ಭವಿಷ್ಯ್ ಕಶೆಂ? ವಾಚುನ್ ಖುಶಿ ಜಾಲಿ. ಬರಯ್ಣಾರಾಕ್ ಅಭಿನಂದನ್.

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :


Connect

Maibhaas

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE