From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಮಂಗಳೂರು ಸಿಲ್ವಂಗಾರ್ ಬೇಕರಿ
Sunday, December 9, 2018
ಬೆಂಗಳೂರು ಐಯ್ಯಂಗಾರ್ ಬೇಕರಿ, ಹಾಸನ್/ಧಾರ್ವಾಡ್ ಐಯ್ಯಂಗಾರ್ ಬೇಕರಿ ಮ್ಹಣ್ ಹರ್ ಎಕಾ ಬಸ್‌ಸ್ಟೇಂಡಾಕ್ ಎಕಾ ಲೆಕಾರ್ ಸಗ್ಳ್ಯಾ ಕರಾವಳೆಂತ್ ಬೇಕರಿ ಉಗ್ತ್ಯೊ ಜಾಲ್ಲ್ಯೊ ಪಳವ್ನ್ ಮ್ಹಾಕಾಯ್ ಸರ್ಕಾರಿ ಕಾಮಾ ಥಾವ್ನ್ 'ರಿಟಾಯರ್ಡ್' ಜಾಲೆಲ್ಯಾಕ್, ಘರಾ ಬಸುನ್ ಮೂಸ್-ಜಳಾರಿ-ಉಂದಿರ್ ಮಾರ್ತಲ್ಯಾಕ್ ಏಕ್ 'ಬೇಕ್ರಿ-ಕಮ್-ರೆಸ್ಟುರಾ' ಚಲವ್ಯಾಂ ಮ್ಹಣ್ ಜಬ್ಬೊರ್ ಆಶಾ ಆಯ್ಲಿ. ಆಶಿಚ್ ಏಕ್ ಪಾವ್ಟಿಂ ತರ್ನಾಟ್ಯಾ ಪ್ರಾಯೆರ್ ಮ್ಹಾಕಾ 'ಕಾಜಾರ್ ಜಾವ್ಯಾಂ' ಮ್ಹಣ್ ಆಶಾ ಆಯಿಲ್ಲಿ ಆನಿ ತಿ ಸುಫಳ್ ಜಾಲ್ಲಿ. ಉಪ್ರಾಂತ್ 'ಭುರ್ಗಿಂ ಕರ್ಚಿ' ಜಬ್ಬೊರ್ ಆಶಾ ಜಾಲ್ಲಿ, ತೀಯ್ 'ಸಕ್ಸೆಸ್' ಜಾಲ್ಲಿ!
''ಹೊಟೆಲಾಂಕ್ ಜಾಯ್ ಆಸ್ಚಿಂ ವಿವಿಧ್ ರಿತಿಚಿಂ ಖಾಣಾಂ, ನಮೂನ್ಯಾವಾರ್ ಪೊಳಿ ಆನಿ ವರ್ಸ್ ಭರ್ ಖಾಂವ್ಕ್ ಜಾಂವ್ಚೊ ಕುಸ್ವಾರ್ ತಯಾರ್ ಕರುನ್ ಸಗ್ಳ್ಯಾ ಕೊಂಕಣ್ ಕರಾವಳೆಕ್ ವಾಂಟ್ಲ್ಯಾರ್ ಕಶೆಂ ಜಾಯ್ತ್?'' - ಮ್ಹಣ್ ಮ್ಹಜ್ಯಾ ಬಾಯ್ಲೆ-ಭುರ್ಗ್ಯಾಂ ಕಡೆನ್ ವಿಚಾರ್ ವಿನಿಮಯ್ ಕೆಲೊ.
''ಆಬ್ಬಾ! ಆತಾಂ ತರೀ ತುಕಾ ಬೂದ್ ಆಯ್ಲಿ'' ಮ್ಹಣಾಲಿ ಪತಿಣ್.
''ಡ್ಯಾಡ್, 'ಉಂದು ಆಂಡಾ ಫಸ್ಟ್ ಕ್ಲಾಸ್ ಐಡಿಯಾ' ಮುಕಾರ್ ಸರ್. 'ಸುರೂಚೆಂ ಕ್ಯಾಪಿಟಲ್' ಉಣೆಂ ಪಡ್ಲ್ಯಾರ್ ಯಾನ್ ಕೊರ್ಪೆ'' ಮ್ಹಣಾಲೊ ಕಾಲೇಜ್ ಸ್ಟೂಡೆಂಟ್ ಪೂತ್.
''ಹೆಂ ಜಾಲ್ಯಾರ್ 'ಬೆಸ್ಟ್ ಬಿಸ್ನೆಸ್, ಕೀಪ್ ಗೋಯಿಂಗ್ ಪೋಪ್', ತುಕಾ ಮ್ಹಜೊ 'ಫುಲ್ ಸಪೋರ್ಟ್' ದಿತಾಂ'' ಮ್ಹಣಾಲೆಂ 'ಟೀನೇಜ್' ಧುವ್.
''ಆತಾಂ ಜಾಲ್ಯಾರ್ ತುಂ ಏಕ್ 'ಬಿಜ್ನೆಸ್‌ಮ್ಯಾನ್' ಮ್ಹಣ್ ವಾಡ್ಯಾಂತ್ ಆನಿ ಫಿರ್ಗಜೆಂತ್ ತುಕಾ ವಳ್ಕಾತಲೆ. ಪೂಣ್ ಹೆಂ ತುಜೆಂ ಭಿಕ್ಣೆಶಿ 'ಬಿಜ್ನೆಸ್' ಖಂಯ್ಚೆ ಕಡೆನ್ ಕರ್ತಾಯ್? ಆಮ್ಚ್ಯಾ ಘರಾ ಭಿತರ್ ಜಾಗೊ ಪಾವಾನಾ'' ದುಬಾವ್ ಉಚಾರಿ ಬಾಯ್ಲ್.
''ಹಿತ್ಲಾಚ್ಯಾ ಮುಲ್ಯಾಂತ್ ಏಕ್ 'ಫೆಕ್ಟರಿ' ರಚ್ಚೆ ತಸಲೆಂ 'ಶೆಡ್' ಬಾಂದ್ಚೆಂ. ಚಾರ್ ಜಣಾಂ ಬಾಯ್ಲಾಂಕ್ ಕಾಮಾಕ್ ದವರ್ಚೆಂ. ಇಲ್ಲಿ ಸಾಹೆತ್-ಸಾಮಾಗ್ರಿ ಹಾಡ್ಚಿ. ಕಚ್ಚಾ ಸಾಮಾನ್ ಹಾಡುಂಕ್ ಆನಿ ತಯಾರ್ ಕೆಲ್ಲೊ ಮ್ಹಾಲ್ ಸಾಗ್ಸುಂಕ್ ಏಕ್ ಬಂಧ್ 'ವ್ಯಾನ್' ಕಾಣ್ಗೆಂವ್ಚೆಂ .....''
''ಲಾಯ್ಸನ್ಸ್ ಮೆಳಾತ್‌ಮೂ?'' ಪರತ್ ದುಬಾವ್ಲಿ ಮ್ಹಜಿ ಅರ್ಧಾಂಗಿ.
''ತೆಂ ಮ್ಹಜೆರ್ ಸೊಡ್. ಮ್ಹಜೆಂ ಸರ್ಕಾರಿ ಕಾಮಾಚೆಂ 'ಇನ್ಫ್ಲುಯೆನ್ಸ್' ಆನಿ ಕೆನ್ನಾಂ ಕಾಮ್ ಕರಿತ್?'' ಹಾಂವೆಂ ಗತ್ತ್ ದಾಕಯ್ಲೆಂ. ತಿ ವಗಿ ಜಾಲಿ. ಹಾಂವ್ ಕಾರ್ಯಾಳ್ ಜಾಲೊಂ.
ಮೊರ್ನೆಲಾಮಿ ಪಯ್ಲೆಂ ಬಿಡಿಯೊ ಬಾಂದ್ತಾಲಿ. ತಿಕಾ ಗೊಡ್ಶೆಂ ಕರ್ನ್ ಶೆಜಾರಾ ವಾಂಟ್ಚಿ ಬರಿ ಸವಯ್ ಆಸ್ಲಿ ಜಾಲ್ಲ್ಯಾನ್ ಕೊಣಾಯ್ ಘರಾ ಕಾಂಯ್ ಬರೆಂ ಫಲಾಣೆಂ ಜಾಲೆಂ ತರ್ ಗೋಡ್ ಖಾಣಾಂ ಕರುಂಕ್ ತಿಕಾ ಆಪಯ್ತಾಲಿಂ. ಹಾಂವೆಂ ತಿಕಾ 'ಎಪೋಂಯ್ಟ್‌ಮೆಂಟ್ ಕೋಲ್' ಕೆಲೆಂ. ತಾಂದ್ಳಾ ಲಾಡು, ಬೂಂದಿ ಲಾಡು, ಮಿಠಾಯ್ ಲಾಡು, ಬೇಸನ್ ಲಾಡು, ತಿಳಾ ಲಾಡು, ರವೆ ಲಾಡು, ಮೊತಿಚೂರ್ ಲಾಡು, ಲಾಯೊ ಲಾಡು, ಚಿರ್ಮುಲಿ ಲಾಡು, ಫೊವಾ ಲಾಡು, ಮೋಹನ ಲಾಡು, ಚರ್ಮುರಿ ಉಂಡೆ, ಜ್ಯಾಮ್, ಪುಡ್ಡಿಂಗ್, ಮಾಕ್ರೂನ್, ಜಿಲೇಬಿ, ಮಾಲ್ಪುರಿ, ಸಾಟ್, ರಸ್‌ಗುಲ್ಲಾ, ಬಾದುಷಾ, ಜ್ಹಾಗಿರ್, ಮೈಸೂರ್‌ಪಾಕ್, ಹೋಳಿಗೆ, ಗುಲಾಬ್ ಜಾಮೂನ್, ಕಾಲಾ ಜಾಮೂನ್, ಕಾಲಾಕುಂಡ್, ಷಿರ್ವ, ಸಂಜೀರ, ದೂದ್ ಪೇಡಾ, ಧವೆ-ಹಳ್ದುವೆ ಪೇಡಾ, ಆಗ್ರಾ ಪೇಟಾ, ಬರ್ಫಿ, ಕಾಜು ಬರ್ಫಿ, ನಾರ್ಲಾಚಿ ಬರ್ಫಿ, ಹಲ್ವಾ, ಕೆಳ್ಯಾಂ ಹಲ್ವಾ, ಕುವಾಳ್ಯಾ ಹಲ್ವಾ, ಕಾಂಳಿಂಗ್ ಹಲ್ವಾ, ಗೋದಿ ಹಲ್ವಾ, ಕಾಶಿ ಹಲ್ವಾ, ಕೇರೆಟ್ ಹಲ್ವಾ, ರುಲಾಂವ್ ಹಲ್ವಾ, ದುದೆಂ ಹಲ್ವಾ, ರಸಗುಲ್ಲಾ, ರಾಬ್ರಿ, ಸಂದೇಶ್, ಕಾಜು ಖಾತಿಲ್, ರಸ್‌ಮಲೈ, ಸೋನ್ ಪಾಪ್ಡಿ, ಗುಜಿಯಾ, ಕುಲ್ಫಿ ..... ತಸಲಿಂ ಖಾಣಾಂ ಕರ್ಚೆಂ ಕಾಮ್ ತಿಚ್ಯಾ ಮಾತ್ಯಾರ್ ಘಾಲೆಂ.
ಇಶೆಂತ್ ಪಯ್ಲೆಂ ಎಕಾ ಕ್ರೀಸ್ತಾಂವಾಂಚ್ಯಾ ಲ್ಹಾನ್‌ಶಾ ಬೇಕರಿಂತ್ ಕಾಮಾರ್ ಆಸ್‌ಲ್ಲೊ. ತಾಕಾ ಜಣ್ ಧಾಡುನ್ ಘರಾ ಆಪಯ್ಲೊ ಆನಿ ಮ್ಹಜ್ಯಾ ಬೇಕರಿಂತ್ ಮಂಗ್ಳೂರ್ ಬನ್, ಬನ್ಸ್, ಉಂಡೊ, ಪಾವ್, ರಸ್ಕ್, ಬಟ್ಟರ್, ಬೆಣ್ಣೆ ಬಟರ್, ಟೋಸ್ಟ್, ಕಚೋರಿ, ಖಾರಿ ಬಿಸ್ಕಿಟ್, ಗೋಡ್ ಬಿಸ್ಕಿಟ್, ಚಪ್ಪೆ ಬಿಸ್ಕಿಟ್, ಪೆಟಿಸ್, ಕಾಟ್ಲಿಸ್, ಗುಂಡಾಂ, ಪಾವ್ ಭಾಜಿ, ಡಬೇಲಿ, ಪಪ್ಸ್ - ತಾಂತಿಂ, ಪನೀರ್, ಬೀಫ್, ಕೊಂಬಿ, ಮಟನ್, ಸಿಮ್ಲಾ ಮಿರ್ಸಾಂಗ್/ರಾಂದ್ವಯ್ ಪಪ್ಸ್, ಕೇಕ್, ರಮ್ ಕೇಕ್, ಪ್ಲಮ್ ಕೇಕ್, ಪೇಸ್ಟ್ರಿ ..... ಕರುಂಕ್ ಸಾಂಗ್ಲೆಂ. ರಮ್ ಕೇಕ್ ನಾಂವ್ ಕಾನಾರ್ ಪಡ್‌ಲ್ಲೆಂಚ್ ಖುಶೇನ್ ವಪ್ವಾಲೊ.
ವ್ಯಾರ್ ಬರೋ ಚಲೊಂಕ್ ಲಾಗ್ತಾನಾ ಹಾಂವೆಂ ಹೊಟೆಲಾಂಚಿಂ ಖಾಣಾಂ ಆನಿ ಪೊಳಿ ತಯಾರ್ ಕರುನ್ ವಾಂಟುಂಕ್ ಸುರು ಕೆಲೆಂ. ಕೀರ್ತಿ ಮಹಲಾಂತ್ ಕಿಚನಾಂತ್ 'ಚೀಫ್ ಚೆಫ್' ಜಾವ್ನ್ ಆಸ್ಲಲೊ ಬೊನಾ ಆಜ್‌ಕಾಲ್ ಮಹಲ್ ಬಂದ್ ಪಡ್ಲ್ಯಾ ಉಪ್ರಾಂತ್ ಘರಾಚ್ ಬಸುನ್ ಇಸ್ಪಿಟಾಂ ಖೆಳ್ತಾ, ತಾಕಾ ಪೊಳಿ ಕರ್ಚ್ಯಾಕ್ ಲಾಗಯ್ಲೊ. ಸನ್ನಾಂ, ಉಡ್ದಾ ಸನ್ನಾಂ, ರೊಸಾ ಸನ್ನಾಂ, ಪುರ್ನಾ ಸನ್ನಾಂ, ಗೋಡ್ ಸನ್ನಾಂ, ಇಡ್ಲಿ, ಇಡಿಯೊ, ಇಟು, ಆಡೆ, ಪೊಳೆ, ಮಸಾಲೆ ಪೊಳೆ, ಪಿಯಾವಾಚೆ ಪೊಳೆ, ಟೊಮೆಟೊ ಪೊಳೆ, ರಾಗಿ ಪೊಳೆ, ಗೊಂವಾ ಪೊಳೆ, ಪರ್ತಾಪೊಳೆ, ನಾತ್ನ್ಯಾ ಪೊಳೆ, ತುಪಾ ಪೊಳೆ, ಮುಷ್ಟಿ ಪೊಳೆ, ತಾಂದ್ಳಾ ಪೊಳೆ, ಉಡ್ದಾ ಪೊಳೆ, ರುಲಾಂವ್ ಪೊಳೆ, ಧವ್ಯಾ ದಸ್ಮಿ ಪಾನಾಂಚಿ ಪೊಳೆ, ಮಯ್ದಾ ಪೊಳೆ, ಕುವಾಳೊ ಗೀರಾ ಪೊಳೆ, ಮೊಗ್ಯಾ ಪೊಳೆ, ತವ್ಶೆಂ ಪೊಳೆ, ಮೆತ್ಯೆ ಪೊಳೆ, ಸನ್ನಾ ಪೊಳೆ, ಮುಗಾ ಪೊಳೆ, ಚಣೆ ದಾಳಿ ಪೊಳೆ, ಮುಗಾ ದಾಳಿ ಪೊಳೆ, ಫೊಣ್ಣಾ ಪೊಳೆ, ತಿಕ್ಶೆ ಖರ್ಬಸಾ ಪೊಳೆ, ಪಾಲ್ಯಾ ಪೊಳೆ, ಶಂಕರ್ ಪೊಳೆ, ಪಾನ್ಪಾಳೆ, ಖಿಮಾ ಭರ್ನ್ ಪಾನ್ಪಾಳೆ, ರುಲಾಂವಾಚೆ ಪಾನ್ಪಾಳೆ, ಸುರ್ನಳಿ, ಆಪೆ, ಅಪಾಂ, ಚಿಟಿ ಅಪಾಂ, ಉತ್ತಪ್ಪ, ರುಲಾಂವಾಚೊ-ಗೊಡಾಚೊ ಬೋಲ್, ಪೊಂಗರ್‍ಯಾ ಪಾನಾಚಿಂ ಗೊಡ್ಡಾಂ, ಮುಟ್ಲೆಂ, ಗೋಡ್ ಮುಟ್ಲಿಂ, ಖುಬ್ಯಾಂ ಮುಟ್ಲಿಂ, ಪೊಣ್ಣಾ ಮುಟ್ಲಿಂ, ಉತ್ಕಾ ಮುಟ್ಲಿಂ, ಮಾಡಾಸ್, ತಾಡಾಸ್, ಮಾಂಡಾಸ್, ಪಾತ್ರಾಡೆ, ಕುಳ್ತಾ ಮುದೊ, ಲಾತಾಡ್ ಕರ್ಚೆಂ ಕಾಮ್ ಬೊನಾಕ್ ದಿಲೆಂ.
ಹಾಸನ್‌ಚೊ ಫಕೀರಪ್ಪ ಎಕಾ ತೆಂಪಾರ್ ಮ್ಹಜ್ಯಾ ಹಾತಾ ಸಕಯ್ಲ್ ಕಾಮ್ ಕರ್ತಾಲೊ. ರಿಟಾಯರ್ಡ್ ಜಾತಚ್ ಘರಾಚ್ ಆಸಾ ಮ್ಹಣ್ ಖಬರ್ ಮೆಳ್ಳಿ. ತೊ ಸಭಾರ್ ಪಾವ್ಟಿಂ ಮ್ಹಾಕಾ ಭಾಕ್ರಿ ಖಾವಯ್ತಾಲೊ. ತಾಕಾ ಗಾಂವಾಕ್ ಹಾಡ್ಲೊ ಆನಿ ಭಾಕ್ರಿ, ಫುಗ್ರಿ ಭಾಕ್ರಿ, ಗೋಡ್ ಭಾಕ್ರಿ, ತಾಂದ್ಳಾ ಭಾಕ್ರಿ, ತಾಂದ್ಳಾಚಿ ಫುಗ್ರಿ ಭಾಕ್ರಿ, ಜೋಳಾ ಭಾಕ್ರಿ, ರಾಗಿ ಭಾಕ್ರಿ, ಚಪಾತಿ, ಮಯ್ದಾ ಚಪಾತಿ, ಗೊಂವಾ ಚಪಾತಿ, ಪರೋಟಾ, ಬಟಾಟ ಪರೋಟಾ, ಸಿಲೋನಿ ಪರೋಟಾ, ಪೂರಿ ಗಸಿ, ಪೂರಿ ಬಾಜಿ, ಬಾದಾಮ್ ಪುರಿ, ಪೂರಣ್ ಪುರಿ, ಬೇಲ್ ಪುರಿ, ಸೇವ್ ಪುರಿ, ಧಂಯ್ ಪುರಿ, ಮಸಾಲೆ ಪುರಿ, ತೀಕ್ ರೊಟ್ಟಿ, ಬಿಸ್ಕುತ್ ರೊಟ್ಟಿ, ಸಮೋಸಾ ..... ತಸಲಿಂ ಖಾಣಾಂ ತಯಾರ್ ಕರ್ಚಿ 'ಝಿಮ್ಮೆದಾರಿ' ದಿಲಿ.
ಸೆರ್ಪಿನ್ ಬಾಯ್ ಹೆ 'ಕೇಟರಿಂಗ್'ಚೆ ಯೆಂವ್ಚ್ಯಾ ಪಯ್ಲೆಂ ವಾಡ್ಯಾಂನಿ ಜಾಂವ್ಚ್ಯಾ ಹರ್ಯೆಕ್ ಕಾಜಾರಾಂ-ಸೊಭಾಣಾಂಕ್ ರಾಂದ್ಪಿಣ್ ಜಾವ್ನ್ ವೆತಾಲಿ. ತಿಣೆಂ ರಾಂದ್‌ಲ್ಲೆಂ ಜೆವಣ್ ಮ್ಹಳ್ಯಾರ್ ಆಯಿಲ್ಲೆ ಸರ್ವ್ ವೊವ್ಳೆ ಫುಗಾರ್ತಾಲೆ. ಆತಾಂ ತಿ 'ಜೋಬ್‌ಲೆಸ್' ಜಾಲ್ಯಾ. ತಿಕಾ ಆಮ್ಗೆರ್ ಅಪವ್ನ್ ಹಾಡ್ಲೆಂ ಆನಿ - ಪೊಣ್ಸಾಚಿ, ವೊಡಾ ಖೊಲ್ಯಾಚಿ, ಹಳ್ದಿ ಖೊಲ್ಯಾಚಿ, ತೊವ್ಶಾಚಿ, ಕೆಂಳ್ಬ್ಯಾ, ಪೊಂಗೆರ್‍ಯಾ ಖೊಲ್ಯಾಚಿ ಪಾತೊಳಿ; ಉಪ್ಪಿಟ್, ರುಲಾಂವ್, ಸೂಜಿ, ಉಪ್ಮಾ, ಶೀರಾ, ಕೇಸರಿ ಬಾತ್, ಸಜ್ಜಿಗೆ, ಸುಕ್ರುಂಡೊ, ಬಿಸ್ಕುಟ್ ರೊಟ್ಟಿ, ತಾಂದ್ಳಾಚೆಂ, ಮುಗಾ ದಾಳಿಚೆಂ, ಚಣ್ಯಾ ದಾಳಿಚೆಂ, ಗೊಂವಾಂಚೆಂ, ಬೊಬ್ಳ್ಯಾಚೆಂ ವೋರ್ನ್, ಗುಳಿಯಾಂಚಿ ಖಿರ್, ಶೆವಿಯಾಂ ಖಿರ್, ಸಬ್ಬಕ್ಕಿ ಖಿರ್, ಸಾಬುದಾನಾ ಖಿರ್, ಮಾಣ್ಣಿ, ಕಿಚ್ಡಿ, ಚಣ್ಯಾಂ ದೋಸ್, ಆಲ್ಯಾ ದೋಸ್; ಕಾಲಯಿಲ್ಲೊ ಪೊವ್, ಉಪ್ಕರಿ, ಪೊವ್ ಉಪ್ಕರಿ, ಶೆವಿಯೊ ಉಪ್ಕರಿ, ಚಣೆ ಉಪ್ಕರಿ, ಮೂಗ್ ಉಪ್ಕರಿ, ಕಣ್ಗಿ ಉಪ್ಕರಿ, ಬಗ್ಡೊ ಉಪ್ಕರಿ, ಬಟಾಣೆ ಉಪ್ಕರಿ, ಕಡಂಬು, ಪೊಣ್ಸಾಟ್, ಚಿವ್ಡಾ, ಆಪೊಳ್ ..... ಕರುಂಕ್ ಘಾಲೆಂ.
ವಿಟಾಲಿನಾಕ್ ಆಮಿ ಲೀನಾ ಮ್ಹಣ್ತಾಂವ್. ಆಜ್‌ಕಾಲ್ ತಿಚ್ಯೊ ದೊಗೀ ಧುವೊ ಕಾಜಾರ್ ಜಾವ್ನ್ ಗಲ್ಫಾಕ್ ಉಬ್ಲ್ಯಾತ್. ತಿ ಕುಸ್ವಾರ್ ಕರ್ಚ್ಯಾಂತ್ ನಾಂವ್ ವ್ಹೆಲ್ಲಿ. ತಿಕಾ ಕಶೇಂಯ್ ರಂದುನ್ ರಂದುನ್ ಆಮ್ಗೆರ್ 'ಟಾಯ್ಮ್ ಪಾಸ್' ಕರ್ಚ್ಯಾ ನಿಬಾನ್ ಆಪಯ್ಲೆಂ ಆನಿ ತುಕ್ಡಿ, ಕಿಡಿ, ಗುಳಿಯೊ, ನೆವ್ರಿ, ಸುಕುರುಂಡೊ, ಖಾರಕಡ್ಡಿ, ನೆಯ್ಯಪ್ಪಮ್, ಶೆವಿಯೊ, ಸಂಡಿಗೆ, ಶೇಮೆ, ಚಾಕ್ಲಿ, ಕಯ್ಲೊಳ್ಯೊ, ಕೊಕ್ಕಿಸ್, ಪಾತೆಕ್, ಅತ್ರಾಸ್, ಕೆಳೆಂ ಘಾರಿಯೊ, ಪೊಣಸ್ ಘಾರಿಯೊ, ಗೋಳಿಬಜೆ, ಪಿಯಾವಾ ಭಾಜೆ, ಕೇಬೆಜ್ ಭಾಜೆ, ತರ್ನ್ಯಾ ಮಿರ್ಸಾಂಗೆ ಭಾಜೆ, ಪಾಲಕ್ ಪಕೋಡ, ಬಟಾಟೆ ವಡೆ, ಮಸಾಲೆ ವಡೆ, ಮೆತಿ ವಡೆ, ಉಡ್ದಾ ವಡೆ, ಧಂಯ್ ವಡೆ, ಪಿಯಾಚಾಚಿ ವಡೆ, ಕ್ಯಾಬೆಜಿಚೆ ವಡೆ, ಕೋಲಿ ಫ್ಲವರಾಚೆ ವಡೆ, ಭಾಜಿಯೆಚೆ ವಡೆ, ತಾಂದ್ಳಾ ವಡೆ, ಕುವಾಳ್ಯಾಚೆ ವಡೆ, ಮಸಾಲೆ ವಡೆ, ಆಂಬಾಡೆ, ತೀಕ್ ಅಂಬಾಡೆ, ಬಿಸ್ಕುಟ್ ಅಂಬಡೆ, ಚಟ್ಟಂಬಡೆ, ತಾಯ್ಕುಳ್ಯಾಚೆ ಅಂಬಡೆ, ಬೋಂಡ, ಮೈಸೂರ್ ಬೋಂಡ; ಪೋಡಿ - ಕಣ್ಗೆ ಪೋಡಿ, ಬಟಾಟೆ ಪೋಡಿ, ರೂಕ್ ಕಣ್ಗಿ, ಕೆಳೆಂ, ವಾಂಯ್ಗೆ, ಮಿರ್ಸಾಂಗ್, ಸಿಮ್ಲಾ ಮಿರ್ಸಾಂಗ್, ವಾಳ್ಚೆ ಭಾಜಿ, ದಿವಿ ಗುಜೊ ಪೋಡಿ, ಪಾತೆಕಾಂ ತಸಲಿಂ ಖಾಣಾಂ ಕರುಂಕ್ ದಿಲೆಂ.
ಹಾಂವೆಂ ಕಿಚನ್ ಫೆಕ್ಟರಿ ಪ್ರಾರಂಭ್ ಕೆಲ್ಲಿ ಖಬರ್ ಅಗೊಸ್ತಿನಾಕ್ ಪಾವ್ಲಿ ಆನಿ ತಾಣೆಂ ಕಾಮಾಕ್ ಅರ್ಜಿ ಘಾಲಿ. ಅಗುಸ್ತಿನ್ 'ಫೇಕು' ಮ್ಹಣ್ ನಾಂವಾಡ್ಲಾ ಆನಿ ತಾಚ್ಯಾ ಅರ್ಜೆಂತ್ ತಾಣೆಂ ಎಮ್. ಬಿ. ಎಸ್. ಮ್ಹಣ್ ಆಪ್ಲಿ ವಿದ್ಯಾ ಅರ್ಹತಾ ಬರಯಿಲ್ಲಿ. ರಾವೊಂಕ್ ಘರ್ ನಾ, ನ್ಹೆಸುಂಕ್ ಬರೆಂ ವಸ್ತುರ್ ನಾ, ಪೊಟಾಕ್ ಸಾರ್ಕೊ ಕೊಕೊ ಪಡಾನಾ ಆನಿ ಘೊಟುಂಕ್ ಸೊಡಾ ಪಿಯೆಂವ್ಚಿ ತಾಂಕ್ ನಾ - ಮ್ಹಣ್ ಭಿರ್ಮತ್ ಪಾವೊನ್ ತಾಕಾ'ವೆಂ ಮ್ಹಜ್ಯಾ ಕಂಪೆನಿಂತ್ ಕಾಮಾಕ್ ಲಾಯ್ಲೊ. ಕೆಳೆಂ, ಬಟಾಟೊ, ರೂಕ್ ಕಣ್ಗಿ, ಕಣ್ಗಿ, ಉಕಡ್‌ಲ್ಲಿ ಕಣ್ಗಿ, ಉಕಡ್‌ಲ್ಲಿ ರೂಕ್ ಕಣ್ಗಿಚೆ ಚಿಪ್ಸ್; ಭಾಜ್‌ಲ್ಲೆ ಪೊಣ್ಸಾ ಘರೆ, ಸಾಕ್ರಿ ಮೆಲಾಚೆ ಆವಾಳೆ, ತಾಕಾಂತ್ ಭಿಜವ್ನ್ ಸುಕಯಿಲ್ಲಿ ಮಿರ್ಸಾಂಗ್, ಸಂಡಿಗೆ, ಭಾಜ್‌ಲ್ಲೆಂ ಕಾರೆತೆಂ, ಸುಕಯಿಲ್ಲೆಂ ಮಸಾಲಾ ಕಾರೆತೆಂ, ಭಾಜ್‌ಲ್ಲೆ ಮೋಯ್, ಭಾಜ್‌ಲ್ಲೆ ಭುಂಯ್ ಚಣೆ, ಚಿಕ್ಕಿ, ಆಕ್ರುಟ್, ಕಾಲಯಿಲ್ಲೊ ಫೊವ್, ಕಾಲಯಿಲ್ಲ್ಯೊ ಲಾಯೊ, ಪಾಪಡ್, ತಾಂದ್ಳಾ ಪಾಪ್ಡೊ, ಕಣ್ಗೆ ಪಾಪ್ಡೊ, ಕೆಳೆಂ ಪಾಪ್ಡೊ, ಉಡ್ದಾಚೊ ಪಾಪ್ಡೊ, ಪೊಣ್ಸಾ ಪಾಪ್ಡೊ, ಆಂಬ್ಯಾ ರೊಸಾಚೆಂ ಸಾಟ್, ಚಿರ್ಮುಲ್ಯೊ, ಭಾಜ್‌ಲ್ಲೊ ತಾಂದುಳ್, ರಾಂದ್ವಯೆ ಪುಲಾವ್, ಲಿಂಬ್ಯಾ ಶಿತ್ ...... ಇತ್ಯಾದಿ ಕರ್ಚ್ಯಾಕ್ ತಾಕಾ 'ಇನ್ಚಾರ್ಜ್' ಕೆಲೊ.
ಸಿಸಿಲಿಯಾ ಮ್ಹಜ್ಯಾ ಆಕಯ್ಚಿ ಸುನ್, ಏಕ್ ದೀಸ್ ತಾಂಗೆರ್ ಗೆಲ್ಲೆ ವೆಳಾರ್ ಭಿಕ್ಣಾಂ ಭಾಜ್ತಾಲಿ. ''ಸೆಲ್ಲೇ, ಆಮ್ಗೆರ್ ತುಕಾ ಹೆಂ ಭಿಕ್ಣಾಚೆಂ 'ಜೋಬ್' ದಿಲೆಂ ತರ್ ಕರ್ಶಿಗೀ?'' ಮ್ಹಣ್ ವಿಚಾರ್‌ಲ್ಲ್ಯಾಕ್ ಗತ್ತಾರ್ ''ಹೋಯ್ಸ್'' ಮ್ಹಣಾಲಿ. ಪೊಣ್ಸಾಚಿಂ ಭಿಕ್ಣಾಂ ಇಂಗ್ಳ್ಯಾರ್ ಭಾಜ್ಚಿಂ, ಭಿಕ್ಣಾಂ ಮಿಟಾ ಉದ್ಕಾಂತ್ ಉಕಡ್ಚಿಂ ಆನಿ ಸುಕಂವ್ಚಿಂ, ಸೆವಿಯೊ ಸುಕವ್ನ್ ಡಬ್ಬ್ಯಾನಿ ಭರ್ನ್ ದವರ್ಚ್ಯೊ, ಪೊಣ್ಸಾಚೆ ಆಪೊಳ್ ಕರ್ನ್ ರಾಂದ್ಣಿ ಗೊಬ್ರಾಂತ್ ವಾ ತೆಲಾಂತ್ ಭಾಜ್ಚೆ, ಕಣ್ಗಿ ಉಕಡ್ನ್ ಮಿಟಾ ಉದಕ್ ಶೆಣಾವ್ನ್ ನಿಂವ್ಲ್ಯಾ ಉಪ್ರಾಂತ್ ಶಿಂದುನ್ ಫೊಡಿ ಸುಕವ್ನ್ ಮುಡೊ ಬಾಂದ್ಚೆಂ. ಪೊಣ್ಸಾಚೆ ಗರೆ ಮಿಟಾ ಉದ್ಕಾಕ್ ಘಾಲ್ಚೆ; ಚಿಂಚಾರೆ ಮಾತಿಯೆಚ್ಯಾ ಕಯ್ಲೆರ್ ಭಾಜ್ಚೆ; ಪಾತೊಳ್ಯೊ, ಗುಜ್ಯಾಚೆಂ ನಿಸ್ತೆಂ; ಪಿಕೆ ಗರೆ ಶಿಂದುನ್, ಉಕಡ್ನ್, ನಾರ್ಲಾ ರೊಸಾಂತ್ ತಾಂದ್ಳಾ ಪೀಟ್ ಭರ್ಸುನ್ 'ಚಂಗುಲಿ' ಕರ್ಚೆಂ; ತಾಯ್ಕುಳ್ಯಾಚಿ ಉಪ್ಕರಿ; ಆಳ್ವಾ ಪಾನಾಂ, ಮುಸ್ಕಾ ಪಾಲೊ, ಆಲ್ಸಾಂದ್ಯಾಚೊ ಪಾಲೊ ಘಾಲ್ನ್ ಪಾತ್ರಾಡೆ ರಾಂದ್ಚೆ; ತೆರ್‍ಯಾಚಿಂ ಪಾನಾಂ ಘಾಲ್ನ್ ನಿಸ್ತೆಂ ಕರ್ಚೆಂ; ಕೆಂಳ್ಬ್ಯಾಚಿ ಕಾಂಡಿ ಸೊಲ್ನ್ ತಾಚಿಂ ಕಾಣಾಂ-ಕಾಣಾಂ ಮಿಟಾ ಉದ್ಕಾಂತ್ ಘಾಲ್ಚೆಂ; ಖೊಳಾಕ್ ಘಾಲ್ಲೆ ಆಂಬೆ, ಪಾಲ್ಪೊಣಸ್, ರುಮ್ಡಾಂ, ಶಿಂಟಾಂ. - ಹೆಂ ಕಾಮ್ ತಿಚ್ಯಾ ಮಾತ್ಯಾರ್ ಘಾಲೆಂ.
ಮಯ್ನ್ಯಾ ಭಿತರ್ ಹಾಂವೆಂ ಬೇಕರಿಂಕ್ ಗರ್ಜ್ ಪಡ್ಚೆ ತಸಲಿಂ ಖಾಣಾಂ-ಪೊಳಿ ಆನಿ ಕುಸ್ವಾರ್ ತಯಾರ್ ಕರುಂಕ್ ಪ್ರಾರಂಭ್ ಕೆಲೆಂ ಆನಿ ಭಾರಿಚ್ ಉಣ್ಯಾ ಮೊಲಾಕ್ ಸಗ್ಳ್ಯಾ ದಕ್ಶಿಣ್ ಕನ್ನಡ್ ಆನಿ ಉಡುಪಿ ಜಿಲ್ಲ್ಯಾಂತ್ಲ್ಯಾ ಐಯ್ಯಂಗಾರ್ ನ್ಹಯ್ ಆಸ್ಚ್ಯಾ ಸಕ್ಕಡ್ ಬೇಕರಿ ಆನಿ ಆಂಗ್ಡಿಂಕ್ ತಿಂ 'ಸಪ್ಲಾಯ್' ಕೆಲಿಂ.
ಖಾಣಾಂ-ಪೊಳಿ-ಕುಸ್ವಾರ್ ಕರುಂಕ್ ಪ್ರಾರಂಭ್ ಕೆಲ್ಲ್ಯಾ ದುಸ್ರ್ಯಾ ದಿಸಾಚ್ ಮ್ಹಾಕಾ ಕಳಿತ್ ಜಾಲೆಂ ಕಿ ತ್ಯಾ ಶೆಡ್ಡಾಚ್ಯಾ ಮುಲ್ಯಾರ್ ಉಂದ್ರಾಂನಿ ಆಪ್ಲೆಂ ರಾಜ್ ಪರ್ಗಟ್ಲಾಂ ಮ್ಹಣ್. ತಾಂಕಾಂ ಸಾಂಗಾತಾಕ್ ಫೆಕ್ಟರಿಂತ್ ಕೊಳೆಂದ್ರ್, ಚಿಚೊಂದ್ರ್ಯೊ, ಬೆರುಂ ಆನಿ ಮುಂಗುಸ್ ಆಸಾತ್ ಮ್ಹಳ್ಳೆಂ ಮ್ಹಜ್ಯೆಂ ಧುವ್ ಆಂಗ್ಲೆಂ ಉಕಲ್ನ್ ಧರುನ್ ಧಾಂವ್ತಾನಾಂಚ್ ಮ್ಹಾಕಾ ಕಳಿತ್. ಜಳಾರಿ, ಪಿಕುಳ್, ಕೊಟಾರ್‍ಲಿ, ಮೊಂಟೆ, ವಾಗೊಣಿ, ಗಾಂಯ್ದೊಳ್, ನಾಕ್ಕುರ್, ಕಿಡಿ, ಕಿಡೆ, ಮುಯೊ, ಹುರ್ನಾಂ, ಕಾನ್ಪೊಯ್, ವಾಳಯ್ ..... ಶೆತಾ-ಗುಡ್ಯಾ ಥಾವ್ನ್ ಯೇವ್ನ್ ಆಮ್ಚ್ಯಾ ಖಾಣಾಂಕ್ ರೂಚ್ ದೀಂವ್ಕ್ ತ್ಯಾ ಶೆಡ್ಡಾಂತ್ ಬಿಡಾರ್ ಕರುಂಕ್ ಆಯಿಲ್ಲಿಂ.
ಆಮ್ಚಿಂ ಖಾಣಾಂ ಖೆಲ್ಲ್ಯಾಂಕ್ ತಾಳೊ ದೂಕ್ ಸುರು ಜಾತಾ, ಆಂಗಾರ್ ದಾಡ್ಕಾಂ ಪಡ್ತಾತ್, ಖೊರೊಜ್ ಲಾಗ್ತಾ, ಏಸಿಡಿಟಿ, ಪೋಟ್ ಬಾಫಾರ್, ವೋಂಕ್-ಉದ್ಕಾಡೆ, ತಕ್ಲೆಂತ್ ಫಡಾಫಡ್, ಪೊಟಾಂತ್ ಹುಲಪ್, ಅಜೀರ್ಣ್ ಇತ್ಯಾದಿ ಜಾತಾ ತೆಂ 'ಗ್ಯಾರಂಟಿ' ಮ್ಹಣ್ ಕಳಿತ್ ಆಸ್ಲ್ಯಾರೀ ಆಮಿ 'ಬಿಜ್ನೆಸ್' ಬಂದ್ ಕೆಲೆಂ ನಾ. ಆಮಿ ವಾಪಾರ್ಚ್ಯಾ ಅಜಿನೊಮೊಟೊಂತ್ಲೆಂ 'ಸೋಡಿಯಮ್ ಗ್ಲುಟೊಮೇಟ್' ಮ್ಹಳ್ಳೆಂ ರಸಾಯನ್ ಕ್ಯಾನ್ಸರಾಕ್ ಕಾರಣ್ ಜಾತಾ ತೆಂ ಕಳಿತ್ ಆಸ್‌ಲ್ಲ್ಯಾನ್ ಆಮಿ - ಕಂಪೆನಿಚ್ಯಾ ಧನಿಯಾಂನಿ ಜಾಂವ್ ಕಾಮಾಗಾರಾಂನಿ - ಮಾತ್ರ್ ಏಕ್ ಕುಡ್ಕೊ ಸಯ್ತ್ ಖಾಂವ್ನ್ ಪಳೆಲೊ ನಾ. ಪೂಣ್ ಆಮ್ಚೊ ಲೋಕ್ ತೊ ಮೊಲಾಕ್ ಘೆತಾ, ಘರಾ ವ್ಹರ್ತಾ, ಆನಿ ಖಾತಾ. ಪೊಟಾಂತ್ ಚಾಬ್ಲ್ಯಾರ್ ಕಾಕ್ಸಾಕ್ ವೆತಾ. 'ಎಸಿಡಿಟಿ' ಜಾಲ್ಯಾರ್ ದಾಕ್ತೆರಾ ಕಡೆನ್ ಧಾಂವ್ತಾ. 'ಮರ್ಕ್ ಸಂಕಡ್' ಜಾಲ್ಯಾರ್ ಪೂನ್ ಶೆತಾಕ್ ವಚೊನ್ ನವೆನ್ ಧರ್ತಾ! ಆನಿ ವಾಂಚೊನ್ ಉರ್ಲೊ ನಾ ತರ್ 'ಪುಕ್ಕ್' ಜಾತಾ!
ತಾಂಕಾಂ ಘರಾಚ್ ಖಾಣಾಂ-ಪೊಳಿ-ಕುಸ್ವಾರ್ ಕರುಂಕ್ ಫುರ್ಸತ್ ನಾ, ಮನ್‌ಯೀ ನಾ....
Tags:
Herolpius, Mangalore Bakery, Kuswaar, Kusvaar, Kusvar, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/9/2018 ಮಂಗಳೂರು ಸಿಲ್ವಂಗಾರ್ ಬೇಕರಿ...
-
10/30/2017 ನತಲಾಂಕ್ ಶಾಂತೆ ಖೆಳ್ ...
-
10/9/2017 ಆಮ್ಚೆ ಮನಿಸ್...
-
9/13/2017 ಶಾಂತಿ ಖಾತಿರ್ ಸ್ಪರ್ದೆ...
-
8/7/2017 ಆಶೆಂ ಏಕ್ ಸಂದರ್ಶನ್...
-
8/3/2017 ಹೆಂ ಮೆಲ್ಲೆಂ ಖಂಯ್ ಥಾವ್ನ್ ಆಯ್ಲೆಂ?...
-
7/19/2017 ವಿನ್ಸಿಚ್ಯೊ ಭಯ್ಣಿಂ...
-
6/8/2017 ನವಿಂ ನವಿಂ ಉದ್ಯಮಾಂ......
-
5/18/2017 ಕಷ್ಟ್ ಆಯ್ಲ್ಯಾತ್...
-
4/20/2017 ಹನಿಮೂನ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.