From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಆಶೆಂ ಏಕ್ ಸಂದರ್ಶನ್
Monday, August 7, 2017
'ಫುಲ್' ಪ್ರಖ್ಯಾತ್ ಕೊಂಕಣಿ ಪತ್ರಾಚ್ಯಾ ಸಂಪಾದಕಾ ಥಾವ್ನ್ ಮ್ಹಾಕಾ ಫೋನ್ ಆಯ್ಲೆಂ.
"ಹೇಯ್ ಹೇ, ಆರ್ ಯು ಫ್ರೀ?" - ಮ್ಹಣ್ ಕೊಂಗ್ಲಿಷಾನ್ ವಿಚಾರಿ 'ಕೊನ್‌ಕನ್ನಿ' ಸಂಪಾದಕ್.
"ಓ ಯ್ಯಾ..." ಮ್ಹಾಕಾ ಮ್ಹಜ್ಯಾ ಭುರ್ಗ್ಯಾಂಚ್ಯಾ ಉಲವ್ಣ್ಯಾ ವರ್ವಿಂ ಇಲ್ಲೆಶೆಂ ಚಡ್‌ಚ್ ಇಂಗ್ಲೆಜ್ ಕಳಿತ್ ಜಾಲಾಂ. ಮರ್ತಾ ಪರ್ಯಾಂತ್ ಹಾಂವ್ ಕೊಂಕ್ಣೆ ಖಾತಿರ್ ಕೆದಾಳಾರೀ 'ಫ್ರೀ'ಚ್ ಮ್ಹಣ್ ದಾಕಂವ್ಚ್ಯಾಕ್ ಹಾಂವೆಂ ಜಾಪ್ ದಿಲಿ.
"ತರ್ ಡು ಮಿ ವನ್ ಫೇವರ್!" - ಮ್ಹಣ್ ಪ್ಲೀಜ್ ಮ್ಹಣಾನಾಸ್ತಾಂಚ್ ತಾಣೆಂ ಆದೇಶ್ ದಿಲೊ.
"ಓ ಕೆ ಸೂವರ್." ಹ್ಯಾ ಕೊಂಕ್ಣಿ ಸಂಪಾದಕಾಂನಿ ಇಗ್ಲಿಂಷಾನ್ಂಚ್ ಕಿತ್ಯಾಕ್ ಉಲಂವ್ಚೆಂ ತೆಂ ಮ್ಹಾಕಾ ಸಮ್ಜಾಲೆಂ ನಾ.
"ತ್ಯಾ ಕೊಂಕ್ಣಿ ಮೊಗಿ, ತ್ರಿ-ಭಾಷಾ ರಾಯ್ಟರ್ ಕಮ್ ಕವಿ ಕಮ್ ಲೇಖಕ್ ಕಮ್ ಸಿಂಗರ್ ಕಮ್ ಡ್ಯಾನ್ಸರ್ ಕಮ್ ಡ್ರಾಮಾ ಕಲಾಕಾರಾಚೆಂ ಏಕ್ ಇಂಟರ್‌ವ್ಯೂ ಕಾಣ್ಗೆಜೆ ಆಸ್‌ಲ್ಲೆಂ ಆಮ್ಚ್ಯಾ ಮೇಗಝೀನಾ ಖಾತಿರ್, ಸ್ಪೆಷಲ್ ಇಸ್ಸ್ಯೂ ಪಾಸುನ್" - ಮ್ಹಣಾಲೊ ತೊ ಆನಿ ಕುಡ್ಸಿಲಾಗ್ಲೊ - "ಹಪ್ತ್ಯಾ ಬಿತರ್ ಬರವ್ನ್ ಧಾಡ್!" ತಾಚ್ಯಾ ತಾಳ್ಯಾಂತ್ ಹುಕುಮ್ ಆಸ್‌ಲ್ಲಿ, ಏಕ್ ಭೆಶ್ಟಾಯಿಲ್ಲ್ಯೆ ಪರಿಂಚೊ ಆದೇಶ್ ಆಸ್ಲ್ಲೊ!
"ನೋ ಪ್ರೋಬ್ಲೆಮ್, ಆಜ್‌ಚ್ ತಾಂಗೆರ್ ವೆತಾಂ." ಹಾಂವೆಂ ತಾಚೊ ಕಾಮೆಲಿ ಮ್ಹಳ್ಳ್ಯೆ ಪರಿಂ ಮ್ಹಜಿ ಸಮ್ಮತಿ ದಿಲಿ.
ತೊ ತೀನ್ ಚಾರ್ ಸಂಘಟನಾಂಚೊ ಹುದ್ದೆದಾರ್/ಸಾಂದೊ ಆಸ್ಲ್ಲೊ. ನಾಂವಾಡ್ದಿಕ್ ಸಮಾಜ್ ಸೆವಕ್, ಕಾರ್ಯ ನಿರ್ವಾಹಕ್ ತಶೆಂ ನಾಂವ್ ವ್ಹೆಲ್ಲೊ ಯುವ ಮುಕೆಲಿ ಜಾವ್ನಾಸ್‌ಲ್ಲೊ. ಚಡ್ತಾವ್ ಕೊಂಕ್ಣಿ ಪತ್ರಾಂನಿ ಕಿತೆಂ ನಾ ಕಿತೆಂ ತಾಚೆಂ ಪ್ರಕಟ್ ಜಾತಾಲೆಂ. ಧರ್ಮಾರ್ಥ್ ನಾಸ್ಟೊ ಆನಿ ಜೆವಣ್ ಆಸ್‌ಲ್ಲ್ಯಾ ಹರ್ ಎಕಾ ಕೊಂಕಣಿ ಕಾರ್ಯಕ್ರಮಾಂನಿ ಆಸ್ತಾಲೊ. ಆಪ್ಲ್ಯಾ ಫಿರ್ಗಜೆಚ್ಯಾ ಕ್ರೀಸ್ತಾಂವ್ ಕಾರ್ಯಾಂನಿ ಕಾರ್ಯಾಳ್ ಜಾವ್ನ್ ನಾಂವ್ ವ್ಹೆಲ್ಲೊ. ಮ್ಹಾಕಾ ಖಂಯ್ ಪುಣೀ ಭೆಟ್ಲ್ಯಾರ್ ಆಪ್ಲೆಂ 'ಬಿಜ್ನೆಸ್ ಕಾರ್ಡ್' ದಿತಾಲೊ. ಹಾಂವೆಂ ಕಶೇಂಯ್ ತೆಂ ಸೊಧುನ್ ಕಾಡ್ಲೆಂ ಆನಿ ವಿಳಾಸ್ ಮತಿಂತ್ ಖಂಚವ್ನ್ ತಾಂಗೆರ್ ಘರಾಚ್ ವೆಚೆಂ ಮನ್ ಕೆಲೆಂ.
ಸಂದರ್ಶನ್ ಬರವ್ನ್ ಘೆತಾನಾ ಪೆನ್ನಾಂತ್ಲೆಂ 'ಇಂಕ್' ಕಾಂಯ್ ಖಾಲಿ ಜಾಯ್ತ್ ಮ್ಹಳ್ಳ್ಯಾ ದುಬಾವಾನ್ ದೋನ್ ಪೆನ್ನಾಂ ಬೊಲ್ಸಾಕ್ ಶಿರ್ಕಾವ್ನ್, ಪುತಾಚ್ಯಾ ಬೂಕಾಚಿಂ ಚಾರ್ ಪಾನಾಂ ಪಿಂಜುನ್ ಘಡಿ ಕರುನ್ ಬೊಲ್ಸಾಕ್ ಚೆಪುನ್ ಹಾಂವ್ ಸಕಾಳಿಂ ಫುಡೆಂಚ್ ತಾಂಚ್ಯಾ ಘರಾ ವೆಚ್ಯಾಕ್ ತಯಾರ್ ಜಾಲೊಂ.
ಹವೊ ಪ್ರಶಾಂತ್ ಆಸ್ಲ್ಲೊ. ಪಾವ್ಸಾಳ್ ತರೀ ಅಂತ್ರಳಿಂ ಮೊಡಾಂ ನಾತ್‍ಲ್ಲಿಂ. ಪೂಣ್ ಸುರ್ಯಾಚಿಯ್ ಝಳಕ್ ನಾತ್‌ಲ್ಲಿ. ಸತ್ರೆಚಿ ಗರ್ಜ್ ದಿಸ್ಲಿ ನಾ. ತಾಚಿ ಏಕ್ ಕಾಡಿಯೀ ತುಟ್‌ಲ್ಲಿ ಆನಿ ಮುಳಾಂತ್ಲೆಂ ಆರಾಮ್ ಕುಂಬು ಜಾಲ್ಲೆಂ!
"ಖಂಯ್ ಸವಾರಿ, ಫಾಂತ್ಯಾಫರಾರ್?" ಪಾಂಯಾಂಕ್ ಕಡ್ತಾರಾಂ ಶಿರ್ಕಾಯ್ತಾನಾ ಭಿತರ್ ಥಾವ್ನ್ ತಾಳೊ ಆಯ್ಕಾಲೊ. "ವೋಕ್ ಕರುಂಕ್ ವೆತಾಯ್ ತರ್ ಪಾಟಿಂ ಯೆತಾನಾ ಆರ್ದೆಂ ಲೀಟರ್ ದೂದ್ ಆನಿ ಏಕ್ ಪೆಕೇಟ್ ಧಂಯ್ ಹಾಡುನ್ ಯೇ. ಭಾಕ್ರಿ ಕರುನ್ ದವರ್ತಾಂ." ಪತಿಣೆನ್ ಹುಕುಮ್ ದಿಲಿ.
ಕಿತೆಂಚ್ ಜಾಪ್ ದೀನಾಸ್ತಾಂ ಹಾಂವ್ ಧರ್ಮಾರ್ಥ್ ಕೊಂಕ್ಣಿ ಸೆವಾ ಕರ್ಚ್ಯಾಕ್ ಬಸ್ಸ್ ರಾಂವ್ಚ್ಯೆ ಕಡೆನ್ ಚಮ್ಕಾಲೊಂ.
ಫಾಮಾದ್ ಕಲಾಕಾರಾಚ್ಯಾ ಘರಾ ಸರ್ಶಿಲ್ಯಾ ಬಸ್ಸ್ ಠಿಕಾಣ್ಯಾಚೆಂ ನಾಂವ್ ಸಾಂಗೊನ್ ಕಂಡಕ್ಟರಾಕ್ ಪಯ್ಶೆ ದಿಲೆ. ತಾಣೆಂ ಉರ್'ಲ್ಲೆ ಚಿಲ್ಲರ್ ದಿಲೆ ನಾಂತ್, ಟಿಕೆಟ್‌ಯೀ ದಿಲಿ ನಾ! ಹಾಂವೆಂ ಕಾಂಯ್ ಮ್ಹಳೆಂ ನಾ. ಬಸ್ಸಾ ಥಾವ್ನ್ ದೆಂವೊನ್ ಸಿಂಗರ್ - ಏಕ್ಟರ್ - ರಾಯ್ಟರಾಚ್ಯಾ ಘರಾ ಕುಶಿಕ್ ಚಮ್ಕಾತಾನಾ ಏಕ್ ಚಾಲ್ಪಾಟ್ ಸುಣೆಂ ವಾಟೆರ್ ಆಡ್ ಆಯ್ಲೆಂ ಆನಿ ವಾಟ್ ಉತ್ರೊನ್ ಗೆಲೆಂ. ಹಾಂವೆಂ ತಾಚಿ ಪರ್ವಾ ಕೆಲಿ ನಾ. ಮಾಜಾರ್ ಜಾಲ್ಲೆಂ ತರ್ ಮ್ಹಜೆಂ ಆಜ್ ಕರುಂಕ್ ಆಸ್ಚೆಂ ಕಾಮ್ ಭಿಗ್ಡಾತೆಂ. ಪೂಣ್ ಹೆಂ ಕೊಲ್ಗೆಂ!
ಫಾಂಕಿವಂತ್ ಬರವ್ಪ್ಯಾಗೆರ್ ಬರೋ ನಾಸ್ಟೊ (ಬ್ರೇಕ್‌ಫಾಸ್ಟೊ?) ಮೆಳ್ತಲೊ ಮ್ಹಣ್ ಆಶೆನ್ ಸಕಾಳಿಂ ಚಾಯ್ ಸಯ್ತ್ ಪಿಯೆಂವ್ಕ್ ನಾತ್‌ಲ್ಲಿ. ಆತಾಂ ಭುಕೆನ್ ಪೊಟಾಂತ್ ಚುರ್ರ್ ಜಾತಾಲೆಂ - ಎಕಾ ರಿತಿರ್ ಪರತ್ ಕಾಕ್ಸಾಕ್ ವಚಾಜೆ ಪಡ್ತಾ ಮ್ಹಳ್ಳ್ಯೆ ಪರಿಂ ಭೊಗಾಪ್ ದೀಲಾಗ್ಲೆಂ. ತಾನ್-ಭುಕೆಚ್ಯಾ ವೊಡಿಂಕ್ ದಾಮುನ್ ದವರುನ್ ಹಾಂವ್ ಯುವ ಮುಕೆಲ್ಯಾಚ್ಯಾ ಆಂಗ್ಣಾಕ್ ಪಾವ್ಲೊಂ.
'ಕೋಲ್ ಬೆಲ್ಲ್' ದಾಮುನ್ ದೋನ್ ಮಿನುಟಾಂ ರಾಕ್ಲೊಂ ತರೀ ಭಿತರ್ ಥಾವ್ನ್ ಕಸಲೆ - ಕಸಲೆ ಆವಾಜ್ ಮಾತ್ರ್ ಆಯ್ಕಾತಾಲೆ ಶಿವಾಯ್ ಕೊಣೇಂಯ್ ಬಾಗಿಲ್ ಉಗ್ತೆಂ ಕೆಲೆಂಚ್ ನಾ. ಬಾಗ್ಲಾ ಥಾವ್ನ್ ಚಿಕ್ಕೆಶೆ ಪಯ್ಸ್ ಬಾಂದುನ್ ಘಾಲ್ಲೊ ಪೊಮೇರಿಯನ್ ಪೆಟೊ ಮ್ಹಾಕಾಚ್ ಪಳೆತಾಲೊ. ತೊ ಘೊಂಕ್ಲ್ಯಾರ್ ಪುಣೀ ಘರಾ ಭಿತರ್ಲ್ಯಾಂಕ್ ಆಯ್ಕೊನ್ ದಾರ್ವಾಟೊ ಉಗ್ತೊ ಜಾತೊ ಕೊಣ್ಣಾ! ಹಾಂವೆಂ ಪರತ್ ದಾಮೂನ್ ಬೆಲ್ಲ್ ವ್ಹಾಜಂವ್ಕ್ ಬುತಾಂವಾಚೆರ್ ಬೊಟಾಂ ದವರ್ಲಿಂ. ಚಾರ್ ಕದಮಾಂ ಪಾಟಿಂ ಯೇವ್ನ್ ಘರಾಚೆರ್ ಏಕ್ ನದರ್ ಭೊಂವ್ಡಾಯ್ಲಿ.
ಘರ್ ಭಾರಿ ಬರೆಂ ಆಸ್ಲೆಂ. ಕೊಂಕ್ಣಿ ಕಲಾಕಾರಾಚೆಂ ಮ್ಹಣ್ ಕೊಣೆಂಯ್ ಸಾಂಗ್ಚೆಂ ಸಾದ್ಯ್‌ಚ್ ನಾತ್‍ಲ್ಲೆಂ. ಫಕತ್ ಕೊಂಕ್ಣೆಚಿ ಸೆವಾ ಕರ್ಚ್ಯಾ ಹ್ಯಾ ಮನ್ಶಾನ್ ಎದೆಂ ಜಯ್ತ್ ಘರ್ ಕಶೆಂ ಬಾಂದ್ಲೆಂಗಾಯ್ ಮ್ಹಣ್ ದುಬಾವ್ ಜಾಲೊ. ಹಾಣೆಂ ಬರಯಿಲ್ಲ್ಯಾ ಬರ್ಪಾಂ ಖಾತಿರ್ ಹಾಕಾ ಮೆಳ್‌ಲ್ಲ್ಯಾ ಸಂಭಾವನಾಚ್ಯಾ, ಪ್ರಶಸ್ತೆಂಚ್ಯಾ, ಪುರಾಸ್ಕಾರಾಂಚ್ಯಾ ದುಡ್ವಾನ್ ಜಾಂವ್ಕ್ ಪುರೊ!?
ಮ್ಹಜೆಂ ಸಂಯಮ್ ತುಟ್ಲೆಂ. ಪರತ್ ಆರ್ದೆಂ ಮಿನುಟ್ ಭರ್ ಬುತಾಂವ್ ದಾಂಬುನ್ಂಚ್ ಧರ್ಲೊ. ಊಹೂಂ. ಬಾಗಿಲ್ ಉಗ್ತೆಂ ಜಾಲೆಂಚ್ ನಾ. ದೆಕುನ್ ಬಹುಶಃ ಕರೆಂಟ್ ನಾ ಜಾಯ್ಜೆ ಮ್ಹಣ್ ದುಬಾವೊನ್ ಸಾಗ್ವೊಣಿಚ್ಯಾ ದಾರ್ವಟ್ಯಾಕ್ ದೋನ್ ಮುಟಿ ಆನಿ ತೀನ್ ಗುದ್ದು ಘಾಲೆ. ಹಾಕಾ ಬಾಗಿಲ್ ಕಟ್ಕಟಾಂವ್ಚೆಂ ಮ್ಹಣ್ತಾತ್.
"ಕೋಣ್?" - ಮ್ಹಣ್ ಏಕ್ ದೊರಗ್ ದಾದ್ಲೊ ತಾಳೊ ಭಿತರ್ ರಾಂದ್ಪಾ ಕುಡಾ ತೆಣೆಂ ಥಾವ್ನ್ ಆಯ್ಕಾಲೊ. ಫಟಾಫಟ್ "ಭಾಸ್ ನಾತ್‌ಲ್ಲ್ಯಾಂಕ್ ಬಾಗಿಲ್ ಬಡಂವ್ಕ್‌ಯೀ ಕಳಾನಾ. ನಾಪಾಸ್ ಖಂಯ್ಚೆ, ಸಕಾಳಿಂ ಫುಡೆಂ ಯೇವ್ನ್ ಹಾಜರಿ ದಿತಾತ್, ಕಾಟ್ ಖಂಯ್ಚೆ!" - ಮ್ಹಳ್ಳ್ಯೆ ಫುಸ್ಫುಸೆ-ಪುರ್ಪುರೆಯ್ ಮ್ಹಜ್ಯಾ ಕಾನಿಂ ಪಡ್ಲೆ.
ಉಗ್ತ್ಯಾ ಬಾಗ್ಲಾರ್ ತೊ ಉಬೊ ಆಸ್ಲ್ಲೊ - ಸಣಸ್ ಚಾಬೊನ್ ಬುರಾಕ್ ಜಾಲ್ಲೆಂ ಸಿಂಗ್ಲೆಟ್ ನ್ಹೆಸೊನ್ ಆನಿ ಪೊಪ್ಳ್ಯಾಂಚಿ ಮಾಪ್ಳ್ಯಾಂಚಿ ಲುಂಗಿ ವಯ್ರ್ ಬಾಂಧುನ್! ವ್ಹಾವ್ 'ಗ್ರೇಟ್ ಕೊಂಕಣಿ ಮೇನ್!'
ಮ್ಹಾಕಾ ಪಳೆವ್ನ್ ತಾಣೆಂ ದಾಂತ್ ಸೊಡ್ಲೆ ಆನಿ ಉಕಲ್ನ್ ಬಾಂದ್‌ಲ್ಲಿ ಲುಂಗಿ ತಾಣೆ ಸಕಯ್ಲ್ ಸೊಡ್ಲಿ. ಮರ್ಯಾದ್‌ವಂತ್ ಬರವ್ಪಿ.
ಹಾಂವೆಂ "ಹಾಂವ್ ಹೆ." - ಮ್ಹಳೆಂ ಮ್ಹಜೆ ಮುಕ್ಲೆ ದಾಂತ್ ತಾಕಾ ದಿಸಾಶೆಂ ತೋಂಡ್ ರುಂದಾವ್ನ್. ಆನಿ ಮ್ಹಜೊ ಉಜ್ವೊ ಹಾತ್ ಮುಕಾರ್ ವೊಡ್ಡಾವ್ನ್ ''ದೇವ್ ಬರಿ ಸಕಾಳ್ ದೀಂವ್." - ಮ್ಹಣ್ ಕುಡ್ಸಿಲೆಂ.
"ತುಂ ಹೇಯ್ ..... ಗೊತ್ತಾ, ಗೊತ್ತಾ, ಗುಡ್ ಮೋರ್ನಿಂಗ್, ಯೇ, ಯೇ ಭಿತರ್ ಯೇ ....." ಮ್ಹಣಾಲೊ ತೊ ಹಾತ್ ಮೆಳಯ್ನಾಸ್ತಾನಾಂಚ್.
ತಾಣೆ ಬಾಗಿಲ್ ಬಂದ್ ಕರ್ತಾನಾ ಹಾಂವೆಂ ಸೋಫಾಚೆರ್ ಕುಲೊ ತೆಂಕ್ಲೊ ಆನಿ ಘರಾಂತ್ ನದರ್ ಭೊಂವ್ಡಾಯ್ಲಿ. ವೊಣ್ತಿಂತ್ ಕಂತ್ರಾಳಾ ಭಿತರ್ ದವರ್‌ಲ್ಲಿ ಜೆಜು ಮರಿ ಜುಜೆಚಿ ಆಲ್ತಾರ್ ಭಾರಿಚ್ ಸೊಬಿತ್ ಆಸ್‌ಲ್ಲಿ. ಜನೆಲಾಂಚೆ ಪಡ್ದೆ ಉಂಬಳ್ನಾಸ್ತಾಂ ತಶೆ ಜಾಲ್ಯಾತ್‌ಗೀ ವಾ ತಿಚ್ ಕಾಂಯ್ 'ಸ್ಟಾಯ್ಲ್' ಕೊಣ್ಣಾ ಮ್ಹಣ್ ಚಿಂತಾಪ್ ಆಯ್ಲೆಂ.
"ಹಾಂವ್ 'ಫುಲ್' ಪತ್ರಾ ತರ್ಫೆನ್ ತುಜೆಂ ಸಂದರ್ಶನ್ ಘೆಂವ್ಕ್ ಆಯ್ಲಾಂ." - ಮ್ಹಳೆಂ ಹಾಂವೆಂ.
"ವ್ಹಯ್‌ಗೀ? ಭಾರಿ ಬರೆಂ ಜಾಲೆಂ. ಮ್ಹಜೆಂ ಕಾಮ್ ಉರ್ಲೆಂ." - ಮ್ಹಣಾಲೊ ತೊ.
"ಕಸಲೆಂ ಕಾಮ್?" ಹಾಂವ್ ಘುಸ್ಪಡ್ಲೊಂ.
"ಆತ್ತಾಂ ತ್ಯಾ ಸಂಪಾದಕಾಚೆಂ ಫೋನ್ ಆಯಿಲ್ಲೆಂ. ತಾಣೆಂ ತುಜೆಂ ಮ್ಹಳ್ಯಾರ್ ಕುರ್ಲ್ಯೊ ಬರಯ್ಣಾರಾಚೆಂ ಸಂದರ್ಶನ್ ಕಾಣ್ಗೆವ್ನ್ ಧಾಡ್ ಮ್ಹಣ್ ಮ್ಹಾಕಾ ಸಾಂಗ್ಲಾಂ." ಭಿತರ್ ಕೊಣೆಂಗೀ ಏಕ್ ಕೊಳ್ಸೊ ಉದಕ್ ಎಕಾಚ್‌ಫರಾ ವೊತ್‌ಲ್ಲ್ಯೆ ಪರಿಂ ಆವಾಜ್ ಜಾಲೊ. ಕಾಕ್ಸಾಚೊ ಫ್ಲಶ್ ಪಾಡ್ ಜಾಲಾ ಆಸ್ತಲೊ ಮ್ಹಣ್ ಚಿಂತ್ಲೆಂ ಹಾಂವೆಂ.
"ಹೋ ಎಕಾಚ್ ಫಾತ್ರಾನ್ ದೋನ್ ಆಂಬೆ ಝಡಯ್ಲೆ ತ್ಯಾ ಎಡಿಟರಾನ್!" - ಮ್ಹಳೆಂ ಹಾಂವೆಂ.
ತಿತ್ಲ್ಯಾರ್ ತಾಚಿ ಪತಿಣ್ - ತಿ ಹೆರ್ ಕೊಣೀ ಖಂಡಿತ್ ನ್ಹಯ್ - ದಾವೊ ಹಾತ್ ಆಪ್ಲ್ಯಾ ಹೌಸ್‌ಕೋಟಾಕ್ ಪುಶಿತ್ತ್ ದೆಗೆಚೆಂ ಬಾಗಿಲ್ ಉಘಡ್ನ್ ಭಾಯ್ರ್ ಆಯ್ಲಿ. ಆನಿ ಏಕ್ ಸೊಬಿತ್ತ್ ಹಾಸೊ ಪಾಟವ್ನ್ ಮ್ಹಾಕಾ ಆಪ್ಲೊ ಉಜ್ವೊ ಹಾತ್ ವೊಡ್ಡಾಯ್ಲಾಗ್ಲಿ.
"ಹೊ ಹೆ." - ಮ್ಹಣಾಲೊ ತೊ.
"ಹಾ ಹು." - ಮ್ಹಣಾಲಿ ತಿ ಹಾತ್ ಮೆಳವ್ನ್ - ಹಾಲಯಿತ್ತ್.
"ಹೀ, ಹಾಯ್." - ಮ್ಹಣಾಜೆ ಪಡ್ಲೆಂ ಮ್ಹಾಕಾ, ಆಮ್ಚಿ ಮಿಲಾಗತ್ ಆರ್ಥಾಭರಿತ್ ಕರುಂಕ್. "ಹಾಂವ್ ಹಾಚೆಂ ಸಂದರ್ಶನ್ ಕಾಣ್ಗೆಂವ್ಕ್ ಆಯ್ಲಾಂ." ಕುಡ್ಸಿಲೆಂ ಹಾಂವೆಂ.
"ಹಾಂವ್ ಚಿಂತಾಲಿಂ, ಆಜ್ ಪರ್ಯಾಂತ್ ಹಾಚೊ 'ಇಂಟರ್‌ವ್ಯೂ' ಕಾಣ್ಗೆಂವ್ಕ್ ಎಕ್ಲೊ ಸಯ್ತ್ ಕಿತ್ಯಾಕ್ ಯೇಂವ್ಕ್ ನಾ ಮ್ಹಣ್. ತುಂ ಪುಣೀ ಆಯ್ಲೊಯ್ ಮ್ಹಳ್ಳೆಂಚ್ ವ್ಹಡ್ಲೆಂ! ಖಂಯ್ಚ್ಯಾ ಆಂಕ್ಯಾಂತ್ ಪರ್ಕಟ್ ಜಾತಾ?" ವಿಚಾರಿ ತಿ.
"ಹ್ಯಾಚ್ ವಿಶೇಷ್ ಆಂಕ್ಯಾರ್ ಯೆತಲೆಂ."
ಆಯ್ಕೊಂಕ್ ನಾತ್‌ಲ್ಲ್ಯೆ ಪರಿಂ ಕರುನ್ ತಿ ಭಿತರ್ ಗೆಲಿ ಆನಿ ಘಡ್ಯೆನ್ ಎಕಾ ಚೆಂಬಾಂತ್ ಉದಕ್ ಹಾಡುನ್ ಆಯ್ಲಿ. ಹ್ಯಾ ಘರಾಂತ್ ಮಾಲ್ಘಡ್ಯಾಂ ಥಾವ್ನ್ ದೆಂವೊನ್ ಆಯಿಲ್ಲ್ಯಾ ರಿವಾಜೆಕ್ ಪಳೆವ್ನ್ ಹಾಂವ್ ಆವಾಕ್ಕ್ ಜಾಲೊಂ. ತಾನ್ ಭುಕ್ ಜಿರಂವ್ಕ್ ಚೆಂಬಾಂತ್ಲೆಂ ಉದಕ್ ವಯ್ರ್ ಧರುನ್ ಗಳ್ ಗಳ ಕರುನ್ ತೊಂಡಾಕ್ ವೊತ್ಲೆಂ. ತಾಂತ್ಲೆಂ ಥೊಡೆಂ ಸೋಫಾಚೆರ್ ಆನಿ ಮ್ಹಜ್ಯಾಚ್ ಆಂಗಾರ್ ಪಡ್ಲೆಂ.
"ವೊನ್ನಿ, ವೊಡ್ನಿ, ವೊಣ್ಣಿ ....." - ಮ್ಹಣಾಲಿ ತಿ ಆಪ್ಲಿ ಕೊಂಕ್ಣಿ ಭಾಸ್ ಅಪುಟ್ ಕರುನ್.
ಉಪ್ರಾಂತ್ ಆಮಿ ವರ್‌ಭರ್ ಗಜಾಲಿ ಕೆಲ್ಯೊ. ಓದುವ ಆಟ, ಪೊಣ್ಸಾಚೆ ಅಪೊಳ್, ಬಿಂಡಾಂ ಆನಿ ಬಿಂಡಿ ಸೊಲಾಂ, ಕುಡ್ಪಾಚ್ಯೊ ಕುರ್ಲ್ಯೊ, ಬಿದ್ರ್ಯಾಂಚೆಂ ಗೋಡ್, ಪಾಂಗ್ಳಾಚೆ ಕಳೆ, ಮಲ್ಪೆಚೆ ತಾರ್ಲೆ, ರಾಂದ್ಲ್ಯಾ ಉಪ್ರಾಂತ್ ಶಿಂದಾಪ್ ಕರ್ಚ್ಯೆ ವಿಶಿಂ, ಪೆಂಕಡ್ ದೂಕ್ ಆನಿ ಸ್ಲಿಪ್ ಡಿಸ್ಕ್, ಕೊಂಕ್ಣಿ ಲಿಪಿ ವಿಶ್ಯಾಂತ್, ಇಮಾಜಿಚೊ ಹಾತ್ ಮೊಡ್‌ಲ್ಲೆಂ ಥಾವ್ನ್ ಧೊಬಿ ಮೆಲ್ಲ್ಯಾ ಪರ್ಯಾಂತ್ಲಿಂ ಘಟನಾಂ, ಮಂಗಳೂರ್‌ಚೆಂ ನಾಂವ್ 'ಕೊಂಕಣಿಸ್ತಾನ್' ಮ್ಹಣ್ ಬದ್ಲುಂಚೆ ವಿಶಿಂ, ಮೊಂತಿ ಫೆಸ್ತಾಕ್ ಸರ್ಕಾರಿ ರಜಾ ದಿಂವ್ಚ್ಯಾ ವಿಶಯಾಚೆರ್, ಬೀಫಾ ಸಂಗಿಂ ದುಕ್ರಾ ಮಾಸ್ ನಿಶೇದ್ .....
ಹಾಂವ್ ಸದ್ದ್ಯಾಕ್ ಉಟೊನ್ ವೆಚ್ಯಾರ್ ನಾ ತೆಂ ಸಮ್ಜೊನ್ ತಿ ಭಿತರ್ ಗೆಲಿ ಆನಿ ಕುಜ್ನಾಂತ್ ಆವಾಜ್ ಕರಿಲಾಗ್ಲಿ. ಆಮ್ಚೆಂ ಉಲವ್ಣೆಂ ಮುಕಾರುನ್ ವೆತಾನಾ ತಿಣೆಂ ನಿಂವ್‌ಲ್ಲೆ ದೊದೋನ್ ಪೊಳೆ ಆಮ್ಚೆ ಮುಕಾರ್ ದೋನ್ ಪ್ಲೇಟಿಂನಿ ದವರ್ಲೆ ಆನಿ ಪುದಿನಾಚಿ ಚೆಟ್ಣಿ! ಪೊಳ್ಯಾಂಕ್ ಶೆಂಭರ್ ಬುರಾಕ್ ಆಸ್ಲೆ ಆನಿ ಚೆಟ್ನಿ ಸಾರ್ಕಿ ವಾಟುಂಕ್‌ಚ್ ನಾತ್‌ಲ್ಲಿ. ಅರ್ದಿ ವಾಟ್ತಾನಾ ಕರೆಂಟ್ 'ಪುಕ್ಕು' ಜಾಲ್ಲೊ ಆಸ್ತಲೊ. ವೀಜ್ ನಾ ಮ್ಹಣ್ ಆಲ್ತಾರಿರ್ ಪೆಟಾನಾಸ್ತಾಂ ಆಸ್ಲ್ಲೊ ದಿವೊ ಸಾಂಗ್ತಾಲೊ. ಅನ್ಯೇಕ್ ಪೊಳೊ ಮೆಳ್ಚೊ ನಾ ಮ್ಹಣ್ ಖಚಿತ್ ಜಾಲ್ಲ್ಯಾನ್ ಹಾಂವ್ ಉಟೊನ್ ವಚೊಂಕ್ ತಯಾರ್ ಜಾಲೊಂ.
ತೋಯ್ ಲುಂಗಿ ಸಾಂಬಾಳುನ್ ಉಬೊ ಜಾಲೊ. ಆಮಿ ಬಾಗ್ಲಾ ಭಾಯ್ರ್ ಪಾವ್ಲ್ಯಾಂವ್.
"ಹೆ, ಹೇ, ಹೇಂ ಫಾಯ್ಸ್ ಕರ್ತಾನಾ ಚಿಕ್ಕೆಶೆ ಬರೆಂಚ್ ಬರಯ್" - ಮ್ಹಣಾಲೊ.
"ಖಂಯ್ಚೆಂ ಫಾಯ್ಸ್ ಕರ್ತಾನಾ?"
"ಸಂದರ್ಶನ್!"
"ಹೋ! ಆತಾಂ ಹಾಂವ್ ಮುಖ್ಯ 'ಪೋಂಯ್ಟ್' ವಿಸರ್ಲೊಂಮೂ? ಶೇ, ಚೇ, ಛೆ!"
"ಕಾಂಯ್ ವೊಣ್ಣಿ, ಚಾರ್ ಲಾಯ್ನಿ ತುಂಚ್ ಬರಯ್."
"ದೋನ್ ಪುಣೀ ಸವಾಲಾಂ ವಿಚಾರ್ನಾಕಾ? ರಾವ್, ಪಯ್ಲೆಂ ಸಾಂಗ್ ....."
"ಯೇ ಭಿತರ್ ಬಸ್ ....."
"ನಾಕಾ, ಬಸ್ಲ್ಯಾರ್ ಜೇಂವ್ಕ್ ರಾವಾಜೆ ಪಡಾತ್. ತುಜ್ಯಾ ಹ್ಯಾ ಕಲಾ ಜಿವಿತಾಕ್ ಪ್ರೇರಣ್ ಖಂಯ್ಚೆಂ ಮೆಳ್ಳೆಂ?" ಹಾಂವೆಂ ಪೆನ್ನ್ ಭಾಯ್ರ್ ಕಾಡ್ಲೆಂ.
"ಹಿ ಎಕ್ಲಿ ಆಸಾ ನ್ಯೇಂ ಘರಾಚ್, ತಿಚೆ ಪುರ್ಪುರೆ ಚುಕಂವ್ಚ್ಯಾಕ್ ಮ್ಹಾಕಾಚ್ ಹಾಂವ್ ಹೆರ್ ಸಂಗ್ತಿನಿಂ 'ಬಿಝೀ' ಜಾಂವ್ಕ್ ಆಶೆಲೊಂ. ಆನಿ ಸಲೀಸಾಯೆಚಿ ವಾಟ್ ಮೆಳ್ಳಿ ಕೊಂಕಣಿ ಭಾಶೆಚಿ ಸೆವಾ ಕರ್ಚಿ!"
"ತುಜಿ ಮುಕ್ಲಿ ಆಲೋಚನ್ ಖಂಯ್ಚಿ?"
"ಕೊಂಕಣಿಕ್ ಅಂತರಾಷ್ಟ್ರೀಯ್ ಮಟ್ಟಾರ್ ಸಾಂಸ್ಕೃತಿಕ್ ಭಾಸ್ ಮ್ಹಣ್ ಮಾನ್ ದಿವಂವ್ಚೊ!" ತಾಣೆಂ ಧೃಡ್ ಮನಾನ್ ಸಾಂಗ್ತಾನಾ ತಾಚ್ಯಾ ಆಶೆನ್ ಮ್ಹಾಕಾಯ್ ಪಾಕಾಂ ಫುಟ್‌ಲ್ಲ್ಯೆ ಭಾಶೆನ್ ಧಯ್ರ್ ಆಯ್ಲೆಂ. "ಆನಿ ಮಂಗಳಾಪುರಮಾಕ್ ಕೊಂಕಣಿಸ್ತಾನ್ ಮ್ಹಣ್ ನಾಂವ್ ದಿವವ್ನ್ ಸಗ್ಳ್ಯಾ ಸಂಸಾರಾರ್ ಅಫ್ಗಾನಿಸ್ತಾನ್ ಆನಿ ಪಾಕಿಸ್ತಾನಾ ಸವೆಂ ಆಮ್ಚ್ಯಾ ಜಿಲ್ಲ್ಯಾಚೆಂ ನಾಂವ್‌ಯೀ ಘಾಜಾ(ಣಾ)ಶೆಂ ಕರ್ಚೆಂ!" ತಾಣೆ ಕುಡ್ಸಿಲೆಂ. ಹಾಂವೆಂ ದಾಂತ್ ದಾಕಯ್ಲೆ.
"ಫುಲಾಕ್ ತುಜಿ ಸಲಹಾ ಕಸಲಿ?"
"ಫುಲ್ ಪರ್ಮಳಿಕ್, ಸುಂದರ್, ರಂಗಾಳ್, ಜೀವಾಳ್ ಆಸಾಜೆ. ತೆದಾಳಾ ಮಾತ್ರ್ ತಾಕಾ ರೂಚ್ ....."
"ಛೆ! ತ್ಯಾ ಫುಲಾಕ್ ನ್ಹಯ್, ಫುಲ್ ಪತ್ರಾಕ್?"
"ಹೋ ಕಾಗದ್ ಚಿಕ್ಕೆ ನಿಸ್ರಾಳೆಂ ಆಸಾಜೆ, ಕಲರ್ ಅನಿಕೀ ಡಾರ್ಕ್ ಆಸಾಜೆ, ಹರ್ ಅಂಕೊ ಪಾಂಚ್ ಲಿಪಿನಿಂ ಪಬ್ಲಿಶ್ ಕರಿಜೆ!"
"ದೇವ್ ಬರೆಂ ಕರುಂ. ಫುಲ್ ವಾಚ್ಪ್ಯಾಂಕ್ ತುಜೊ ಕಾಂಯ್ ಸಂದೇಶ್?"
"ವಾಚ್ಪ್ಯಾಂನಿ ಆಪ್ಲೆಂ ಮಟ್ಟ್ ಸುಧ್ರಾಯ್ಜೆ. ಕನ್ನಡ ಪತ್ರಾಂ ವಾಚ್‌ಚಿಂ ಸೊಡಿಜೆ. ಗೊಂಯ್ಚಿಂ ಆನಿ ಕೇರಳಾಚಿಂ ಪತ್ರಾ ಚಡ್ ವಾಚಿಜೆ ....."
"ಅನಿ ಲೇಕಕಾಂಕ್?"
"ಆಪ್ಲ್ಯಾ ಬರ್ಪಾಂನಿ ಆಸ್ಚಿ ಶೆಣಾಚಿ ಘಾಣ್ ಪಯ್ಸ್ ಕರುನ್ ಮಾತಿಯೆಚಿ ಮೂರ್ ಆಸಾಶಿ ಕರಿಜೆ!"
"ಫೋಟೊ ಘಾಲಿನಾಂಯ್ಗೀ?" ತಿ ಮದೆಂಚ್ ಯೇವ್ನ್ ವಿಚಾರಿಲಾಗ್ಲಿ.
"ಥಂಯ್ ಪ್ರೆಸ್ಸಾಂತ್ ಆದಿಂ ದಿಲ್ಲೊಚ್ ಆಸಾ, ತೊಚ್ ಘಾಲ್ಚೊ." - ಮ್ಹಳೆಂ ಹಾಂವೆಂ.
"ತೊ ಹಾಚ್ಯಾ ಪಯ್ಲ್ಯಾ ಕುಮ್ಗಾರಾಚೊ. ಧರ್ ಹೊ ಘಾಲ್, ನವೊಚ್ ಆಸಾ. ಸೂಟ್ ನ್ಹೆಸೊನ್ ಡಿಜಿಟಲ್ ರಿತಿರ್ ಕಾಡ್ಲಾ. ತಾಳ್ವೆರ್ ನಾತ್‌ಲ್ಲೆ ಕೇಸ್ ಸೊಡಯ್ಲ್ಯಾತ್. ಬೋರ್ ಮಾಂಡ್ಡೊ ಮ್ಹಣ್ ಕಳಾನಾ. ದುಸ್ರೊ ಏಕ್ ಧರ್. ಹಾಂತುಂ ಹಾಂವೀಂ ಆಸಾಂ - ಹಾಚೆಂ ಪ್ರೇರಣ್!" - ಮ್ಹಣೊನ್ ತಿಣೆ ದೋನ್ ಫೊಟೊ ಮ್ಹಜ್ಯಾ ಹಾತಾಂತ್ ದಾಂಬ್ಲೆ. "ಮ್ಹಜ್ಯೆ ವಿಶ್ಯಾಂತ್‌ಯೀ ದೋನ್ ಗೀಟ್ ಬರಂವ್ಕ್ ವಿಸ್ರಾನಾಕಾ."
"ಖಂಡಿತ್ ಬರಯ್ತಾಂ ..... ಬಾಯ್ ....." ಹಾಂವೆಂ ವ್ಹಾಣೊ ಗುಡ್ಡಾಯ್ಲ್ಯೊ.
"ಸೀ ಯೂ ....." - ಮ್ಹಣಾಲಿ ತಿ.
ಪೋಮೆರಿಯನಾಚೆರ್ ಏಕ್ ದೀಷ್ಟ್ ಘಾಲುನ್ ಹಾಂವ್ ಸಂಪಾದಕಾಕ್ ಮೆಳೊಂಕ್ ಮ್ಹಣ್ ಥಂಯ್ ಥಾವ್ನ್ ನಿಕ್ಳಾಲೊಂ. ರಸ್ತ್ಯಾಕ್ ಪಾವ್ತಾ ಪರ್ಯಾಂತ್ ತಿಂ ದೊಗಾಂಯ್ ಮ್ಹಾಕಾಚ್ ಪಳೆವ್ನ್ ಆಸ್ಲಿಂ.
ಸಂಪಾದಕಾಕ್ ಹ್ಯಾ ಕೊಂಕ್ಣೆ ಖಾತಿರ್ ದೀಸ್ ರಾತ್ ಝರಂವ್ಚ್ಯಾ ಯುವಕಾ ವಿಶಿಂ ವರ್‌ಭರ್ ಪೊಕ್ಳೆ ಸಾಂಗೊನ್ ನಿಮಾಣಿಂ ಉತ್ರಾಂ ಆಶಿಂ ಬರಯ್ಲಿಂ : 'ಫುಲ್ ಪತ್ರ್ ಹ್ಯಾ ನಾಂವಾಡ್ದಿಕ್, ಮಹಾನ್, ಫಾಂಕಿವಂತ್ ಕಲಾಕರಾಕ್, ಬರಯ್ಣಾರಾಕ್, ಲೇಕಕಾಕ್, ಸಂಗೀತ್‌ಗಾರಾಕ್, ಕವಿಕ್, ನಾಟಕಿಸ್ತಾಕ್ ಆನಿ ಕೊಂಕ್ಣಿ ಭಾಶೆಚ್ಯಾ ವೀರ್ ಸೊಜೆರಾಕ್ ಚೆಪೆಂ ಉಕಲ್ತಾ ಆನಿ ತಾಚ್ಯಾ ಮುಕ್ಲ್ಯಾ ಯೋಜನಾಕ್ ಸರ್ವ್ ಬರೆಂ ಮಾಗ್ತಾ. ತಾಕಾ ವೆಗಿಂಚ್ ಕೇಂದ್ರ್ ಸಾಹಿತ್ಯ್ ಎಕೆಡೆಮಿಚಿ ತಶೆಂ ಜ್ಝಾನ್ ಪೀಠ್ ಪೃಶಸ್ತಿ ಲಾಭೊಂ ಮ್ಹಣ್ ಆಶೆತಾಂ...'
Tags:
Herolpius, Konkani Writer, Interview, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/9/2018 ಮಂಗಳೂರು ಸಿಲ್ವಂಗಾರ್ ಬೇಕರಿ...
-
10/30/2017 ನತಲಾಂಕ್ ಶಾಂತೆ ಖೆಳ್ ...
-
10/9/2017 ಆಮ್ಚೆ ಮನಿಸ್...
-
9/13/2017 ಶಾಂತಿ ಖಾತಿರ್ ಸ್ಪರ್ದೆ...
-
8/7/2017 ಆಶೆಂ ಏಕ್ ಸಂದರ್ಶನ್...
-
8/3/2017 ಹೆಂ ಮೆಲ್ಲೆಂ ಖಂಯ್ ಥಾವ್ನ್ ಆಯ್ಲೆಂ?...
-
7/19/2017 ವಿನ್ಸಿಚ್ಯೊ ಭಯ್ಣಿಂ...
-
6/8/2017 ನವಿಂ ನವಿಂ ಉದ್ಯಮಾಂ......
-
5/18/2017 ಕಷ್ಟ್ ಆಯ್ಲ್ಯಾತ್...
-
4/20/2017 ಹನಿಮೂನ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.