From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಕಾರ್ಗೊ
Tuesday, August 2, 2016
ಧಾ-ವೀಸ್ ವರ್ಸಾಂ ಆಧಿಂ ಗಲ್ಫ್ ದೇಶಾಕ್ ಅದೇವ್ಸ್ ಮಾಗೊನ್ ಮಾಂಯ್‌ಗಾಂವಾಕ್ ಯೆಂವ್ಚಿಂ ಚಡಾವತ್ ಕುಟ್ಮಾಂ, ಪರ್ನೊ ಆನಿ ನವೊ ಸಾಮಾನ್ ಕಂಟೇಯ್ನರಾಂತ್ ಘಾಲುನ್ ಗಾಂವಾಕ್ ಧಾಡ್ತಾಲಿಂ. ಘರ್ಚಿ ಟಿ.ವಿ. , ಫ್ರಿಡ್ಜ್, ಸ್ಟೋವ್, ಜೆವ್ಣಾಚೆಂ ಮೇಜ್, ಕದೆಲಾಂ, ಗ್ಲಾಸ್, ಬೊಶಿಯೊ, ಖಟ್ಲಿಂ, ಗಜ್ಡ್ಯೊ, ಉಶಿಂ, ವೊಲಿ, ಬ್ಲ್ಯಾಂಕೆಟಿ, ಆಯ್ದಾನಾಂ, ವಿ.ಸಿ.ಆರ್., ವಸ್ತುರ್ ಇತ್ಯಾದಿ ಜತ್ನೆನ್ ಪ್ಯಾಕ್ ಕರುನ್ ಕಂಟೇಯ್ನರಾಂತ್ ಘಾಲ್ನ್ ಮುಂಬಯ್ ಧಾಡ್ತಾಲಿಂ.
ಮುಂಬಯಿಂತ್ ಖಂಯ್ಚ್ಯಾಯಿ ಎಕಾ ಎಜೆಂಟಾಕ್ ಧರುನ್ ಕಾರ್ಗೊ ವಿಲೇಜಿಕ್ ವಚೊನ್, ಕಸ್ಟಮ್ಸ್ ಅಧಿಕಾರಿಂಕಡೆ ಇಲ್ಲೆಶೆಂ 'ಎಜೆಸ್ಟ್‌ಮೆಂಟ್' ಕರುನ್ ಸಾಮಾನ್ ಸೊಡವ್ನ್ ಹಾಡ್ತಾನಾ ಹಾಲ್-ಹವಾಲ್ ಜಾತಾಲೆ.
ಆರ್ಬ್ಯಾಂಚ್ಯಾ ಘರಾಂನಿ ಕಾಮ್ ಕರ್ನ್ ಆಸ್‌ಲ್ಲ್ಯಾ ಥೊಡ್ಯಾಂಕ್ ಬೊರೆ ಕಾರ್ಪೆಟಿ, ಬೆಡ್‍ಶಿಟಿ, ಸೊಭಿತ್-ಸೊಭಿತ್ ವಸ್ತುರಾಂ ಮೆಳ್ತಾಲಿಂ. ಶೆಖಾಂಗೆರ್ ವರ್ಸಾನ್ ವರಸ್ ಫರ್ನಿಚರ್ ಆನಿ ಹೆರ್ ವಸ್ತು ಬದ್ಲಿತಾತ್ ಜಾಲ್ಲ್ಯಾನ್ ಪರ್ನ್ಯೊ; ಪುಣ್, ಬರೆ ವಸ್ತು ಘರ್ ಕಾಮೆಲ್ಯಾಂಕ್, ಡ್ರಾಯ್ವರಾಂಕ್ ಮೆಳ್ತಾತ್.
ಸುಮಾರ್ ಚೊವೀಸ್ ವರ್ಸಾಂ ಆದಿಂ ಹಾಂವ್‌ಯಿ ಭಾಂಗಾರಾಚೆಂ ಶಿತ್ ಸೊಧುನ್ ಗಲ್ಫಾಕ್ ಪಾವ್‌ಲ್ಲೊಂ ಆನಿ ದೋನ್ ವರ್ಸಾಂ ಸುಕೆ ಕಬೂಸ್ ಖಾವ್ನ್ ಪಾಟಿಂ ಆಯಿ‌ಲ್ಲೊಂ.
ತವಳ್ ಗಲ್ಫಾಂತ್ ಬೋವ್ ಥೊಡಿಂ ಮೊಗಾಳ್ ಕುಟ್ಮಾಂ ಆಸ್‌ಲ್ಲಿಂ. ಹಫ್ತ್ಯಾಚ್ಯಾ ಅಖ್ರೇಕ್ ಮ್ಹಜೆ ತಸಲ್ಯಾ ಎಕ್ಸುರ್‍ಯಾಕ್ ಜೆವ್ಣಾಕ್ ಆಪಯ್ತಾಲಿಂ. ಬ್ರೇಸ್ತಾರಾಚ್ಯಾ ರಾತಿಂ 'ಶೆಂಭರ್' ಮಾರ್ನ್ ದುಕ್ರಾಮಾಸಾಚ್ಯೊ ದೋನ್ ಪೊಡಿ ಚಾಬ್ತಾನಾ, ಸರ್ಗಾರ್ ಉಭ್‌ಲ್ಲೆ ತಿತ್ಲೊ ಸಂತೋಸ್ ಭಗ್ತಾಲೊ.
ತೆದ್ನಾಂ ಎಕಾ ಮೊಗಾಳ್ ಮಯ್ಪಾಸಿ ಸ್ತ್ರೀಯೆನ್ ಗಲ್ಫ್ ಸೊಡ್ನ್ ವೆತಾನಾ ಕಾರ್ಗೊ ಧಾಡುಂಕ್ ಚಿಂತ್ಲೆಂ ಆನಿ ತಿಚ್ಯಾ ಬೊರ್‍ಯಾ ಮನಾಕ್ ಲಾಗೊನ್ ಮ್ಹಜೆ ತಸಲ್ಯಾ ಥೊಡ್ಯಾಂನಿ ವಿವಿಧ್ ವಸ್ತು ಪ್ಯಾಕ್ ಕರ್ನ್ ದಿಲ್ಯೊ.
ಥೊಡ್ಯಾಂನಿ ಆಪ್ಲ್ಯಾ ಆವಯ್ಕ್, ಬಾಯ್ಲೆಕ್, ಸಾಸುಕ್, ಮಾವ್ಶೆಕ್, ಮಾವೊಳ್ನಿಕ್, ಆಕಯ್ಕ್, ಮಿವ್ಣೆಂಕ್, ಭಯ್ಣಿಂಕ್ ಆನಿ ಮೊದೊರ್ನಿಕ್ ಚಾಯ್ನಾ ಸಿಲ್ಕ್ ಸಾಡಿಯೊ ಆನಿ ಹೆರ್ ವಸ್ತುರಾಂ ಧಾಡ್ತಾನಾ, ಥೊಡ್ಯಾಂನಿ ಮಾಂವಾಕ್ ಆನಿ ಸಾಸುಮಾಂಯ್ಕ್ ಪಾಂಗ್ರುನ್ ನಿದೊಂಕ್ ಬ್ಲ್ಯಾಂಕೆಟಿ ಧಾಡ್ಲ್ಯೊ. ಮಾಗಿರ್ ಥೊಡ್ಯಾಂನಿ ಆಪ್ಲ್ಯಾ ಬಾಪಾಯ್ಕ್, ಮಾಂವಾಕ್, ಭಾವೊಜಿಂಕ್, ಮಿವ್ಣ್ಯಾಂಕ್, ಸಾಡ್ವಾಂಕ್ ಆನಿ ಇಷ್ಟಾಂಕ್ ಪ್ಯಾಂಟಾಂಚಿಂ, ಶರ್ಟಾಂಚಿಂ ಲುಗ್ಟಾಂ, ಸಾಬು, ಬ್ಲೇಡಿ, ಪರ್ಮಳಿಕ್ ದ್ರವ್ಯಾಂ ಇತ್ಯಾದಿ ಧಾಡ್ಲಿಂ.
ಹೆರ್ ಥೊಡ್ಯಾಂನಿ ರಾಂದ್ಪಾ ಕುಡಾಕ್ ಜಾಯ್ ಜಾಲ್ಲಿಂ ಆಯ್ದಾನಾಂ, ಫಳಿಂ, ಸುರಿಯೊ, ಕುಲೆರಾಂ, ಧುಂವ್ಚಿಂ ಬುರುಸಾಂ, ಮೋಪ್, ಸಾರೊಣಿ ಇತ್ಯಾದಿ ಧಾಡುನ್ ದಿಲ್ಯೊ.
ಮಹಿನ್ಯಾಂ ಉಪ್ರಾಂತ್ ಕಾರ್ಗೊ ವ್ಹಾವವ್ನ್ ವ್ಹರುನ್ ಗೆಲ್ಲೆಂ ತಾರುಂ ಕಸೆಂಯಿ ಕೊಚ್ಚಿನ್ ಥಾವ್ನ್ ಪಣಂಬೂರ್ ಪಾವೊನ್ ಬಾಳಾಂತ್ ಜಾಲೆಂ. ತವಳ್ ಎಜೆಂಟಾ ಮಾರಿಫಾತ್ ಕಂಟೇಯ್ನರ್ ಕಸ್ಟಮ್ಸ್ ಘರಾಕ್ ಪಾವ್ಲೆಂ. ಥಂಯ್ಸರ್ ಸರ್ವ್ ವಸ್ತು ವೆವೆಗ್ಲ್ಯೊ ದವರ್ಚ್ಯೊ ಪಡ್ಲ್ಯೊ - ಮಾಸ್ಳೆ ಮಾರ್ಕೆಟಿಂತ್ ಮೊಗೊರ್ಲ್ಯಾಂನಿ ವಿವಿಂಗಡ್ ಕಾಂಟುಲಾಂನಿ ವಿವಿಂಗಡ್ ಮಾಸ್ಳಿ ದವರ್‌ಲ್ಲೆಪರಿಂ.
ಕಸ್ಟಮ್ಸ್ ಅಧಿಕಾರಿಂನಿ ಲಾಖಾ ವಯ್ರ್ ಸುಂಕ್ ಭರುಂಕ್ ಫರ್ಮಾಯ್ಲೆಂ. ನಿರ್ವೊಗ್ ನಾಸ್ತಾಂ ತೆ ಪರೋಪಕಾರಿ ಸ್ತ್ರೀಯೆನ್ ಸುಂಕ್ ಭರುನ್ ಸಾಮಾನ್ ಸೊಡಯ್ಲೊ.
ಪುಣ್, ಆತಾಂ ಕಾಳ್ ಬದಲ್ಲಾ. ಸಂಸಾರಾಚ್ಯಾ ಖಂಯ್ಚ್ಯಾಯಿ ಕೊನ್ಶ್ಯಾ ಥಾವ್ನ್ ಧಾಡ್‌ಲ್ಲೊ ಸಾಮಾನ್ ಆಮ್ಚ್ಯಾ ಘರಾ ಬಾಗ್ಲಾರ್ ಪಾವಂವ್ಚ್ಯೊ ಕಾರ್ಗೊ ಕಂಪೆನ್ಯೊ ಸುರು ಜಾಲ್ಯಾತ್.
ಖತಾರ್ ಥಾವ್ನ್‌ಯಿ ಹಾವೆಂ ಸಭಾರ್ ಪಾವ್ಟಿಂ ಕಾರ್ಗೊ ಧಾಡ್ಲಾ. ಆಮಿಂ ಧಾಡ್‌ಲ್ಲೊ ಕಾರ್ಗೊ ಶೀದಾ ಚೆನ್ನಾಯ್ ಪಾವ್ತಾ. ಥಂಯ್ಸರ್ ಗುದಾಂವಾಂನಿ ತಮ್ಳಾಂಚೆ ಚೆಡೆ ಕಾರ್ಗೊಚೆ ಕಾರ್ಡ್‌ಬೊರ್ಡ್ ಬೊಕ್ಸ್ ಬ್ಲೇಡಿಂನಿ ಕಾತ್ರುನ್ ಸಾಡಿಯೊ, ಪರ್ಮಳಿಕ್ ದ್ರವ್ಯಾಂ, ಶಾಂಪೂ, ಸಾಬು, ಚೊಕ್ಲೆಟಾಂ, ಚಿಕ್ಲೆಟಾಂ ಆನಿ ಹೆರ್ ವಸ್ತು ಚೊರ್ತಾತ್ ಮ್ಹಣುನ್ ಥೊಡ್ಯಾಂನಿ ಅಲ್ಯೂಮಿನಿಯಮ್ ಟ್ರಂಕಾಂನಿ ಕಾರ್ಗೊ ಧಾಡ್ಲ್ಯಾರ್, ಹೆರ್ ಥೊಡ್ಯಾಂನಿ ಕಾರ್ಡ್‌ಬೊರ್ಡ್ ಬೊಕ್ಸಾ ಭಿತರ್ ಅಲ್ಯೂಮಿನಿಯಮಾಚಿಂ ಪಾತಳ್ ತಗ್ಡಾಂ ದವರ್ನ್ ಕಾರ್ಗೊ ಪ್ಯಾಕ್ ಕರುಂಕ್ ಸುರು ಕೆಲಾಂ.
ಆಯ್ಲೆವಾರ್ ಕುವೇಯ್ಟ್, ದುಬಾಯ್, ಬಾಹ್ರೇಯ್ನ್, ಒಮಾನ್, ಸಾವ್ದಿ, ಖತಾರ್ ಆನಿ ಹೆರ್ ಗಲ್ಫ್ ದೇಶಾಂ ಥಾವ್ನ್ ಮಾಂಯ್‌ಗಾಂವಾಕ್ ಕಾರ್ಗೊ ಧಾಡುನ್ ದಿಂವ್ಚ್ಯೊ ಕಂಪ್ಣ್ಯೊ ಆಟಿಚ್ಯಾ ಘಡ್ಗಡ್ಯಾಂಕ್ ಉದೆಂವ್ಚ್ಯಾ ಆಳ್ಮ್ಯಾಂಪರಿಂ ಉದೆಲ್ಯಾತ್.
ಪುಣ್, ಥೊಡ್ಯಾ ಮಲ್ಬಾರ್‍ಯಾಂನಿ ಲೊಕಾಕಡ್ಚೊ ಕಾರ್ಗೊ ಜಮವ್ನ್ ಮಾಂಯ್‌ಗಾಂವಾಂಕ್ ಧಾಡಿನಾಸ್ತಾಂ ಲೊಕಾಕ್ ಬನಾಯಿ‌ಲ್ಲೆಂಯಿ ಆಸಾ. ಉಪ್ರಾಂತ್ ಪೊಲಿಸಾಂಕರ್ನಾ ತೊ ಕಾರ್ಗೊ ಪಾಟಿಂ ಘೆತ್‌ಲ್ಲೊಯಿ ಆಸಾ.
ಖತಾರಾಂತ್ ವಾವುರ್ನ್ ಆಸ್ತಾನಾ ಹಾಂವ್ ವರ್ಸಾಕ್ ದೋನ್ ಪಾವ್ಟಿಂ ಕಾರ್ಗೊ ಧಾಡ್ತಾಲೊಂ. ಕಾರ್ಗೊ ಧಾಡ್ಚ್ಯಾ ಸುಮಾರ್ ದೇಡ್-ದೋನ್ ಮಹಿನ್ಯಾಂ ಆಧಿಂ ಥಾವ್ನ್‌ಚ್ ತಯಾರಾಯ್ ಚಲ್ತಾಲಿ. ಗಾಂವಾಂತ್ ಸಿರಿಮತಿಕ್ ಫೊನ್ ಕರುನ್ ಕಾರ್ಗೊರ್ ಧಾಡುಂಕ್ ಜಾಯ್ ಜಾಲ್ಲ್ಯಾ ವಸ್ತುಂಚಿ ಪಟ್ಟಿ ಕರ್ನ್ ಧಾಡ್ ಮ್ಹಣ್ಚೆಂ.
ಸಿರಿಮತಿಚಿ ಪಟ್ಟಿ ಅಸಿ ಆಸ್ತಾ : ಚ್ಯಾರ್ ಸಾಡಿಯೊ, ಶಾಂಪೂ, ಫರ್‌ಪ್ಯೂಮ್, ಟಾಯ್ಗರ್ ಬಾಮ್, ಸಾಲೊನ್‍ಪಾಸ್, ಬ್ಯಾಂಡ್‌ಏಯ್ಡ್, ಕೊಟನ್ ಬಡ್ಸ್, ಕುಜ್ನಾಂತ್ ವಾಪರ್ಚ್ಯೊ ಧಾಕ್ಟ್ಯೊ ಸುರಿಯೊ, ಹಾಡಾಂ ಚಾಚಾಂವ್ಕ್ ಕೊಯ್ತೊ, ಜೆವ್ಣಾಚ್ಯಾ ಮೆಜಾಕ್ ಲುಗಾಟ್, ಆಲ್ತಾರಿಕ್ ಫುಲಾಂ, ಚೊಕ್ಲೆಟಾಂ, ಚಿಕ್ಲೆಟಾಂ, ಗರಮ್ ಮಸಾಲೊ, ತಿಕೆಸಾಲ್, ಲೊಂಗಾಂ, ಕೇಸರ್, ಖಾಜುರ್, ದಾಕೊ, ಕಾಜುಮೊಯ್ ಇತ್ಯಾದಿ. ಪುತಾಕ್ ಜೀನ್ಸ್ ಪೇಂಟಾ, ಬೆಲ್ಟ್, ಶೂಸ್, ಧುವೆಕ್ ಸಲ್ವಾರ್ ಕಮಿಸ್, ಟೊಪ್ಸ್, ವ್ಹಾಣ್ಯೊ, ಲಿಪ್‍ಸ್ಟಿಕ್, ನೇಯ್ಲ್ ಪೊಲಿಶ್ ಇತ್ಯಾದಿ. ಶಿವಾಯ್ ನಿಡೊ, ಟ್ಯಾಂಗ್, ಸೊಸೆಜ್, ನಗ್ಗೆಟ್ಸ್...
ಖತಾರಾಂತ್ ಆಮಿಂ ವಸ್ತಿ ಕರ್ನ್ ಆಸ್‌ಲ್ಲೆಕಡೆ ಆಮ್ಚೆ ಪಯ್ಕಿ ಕೋಣ್‌ಯಿ ಕಾರ್ಗೊ ಧಾಡುಂ, ಜೊನಿ ಆನಿ ಪಕ್ಕುಚಿ ಎಕೇಕ್ ಪೊಟ್ಲಿ ಆಸ್ತಾಲಿಚ್.
ಜೊನಿಚೊ ಪೂತ್ ಬ್ಯಾಡ್‌‍ಮಿಂಟನ್ ಖೆಳ್ಗಾಡಿ ಜಾಲ್ಲ್ಯಾನ್ ತಾಕಾ ರಾಕೆಟ್, ಬೊ, ಶೂಜ್, ಟಿ-ಶರ್ಟಾಂ, ಪ್ಲೇ ಸ್ಟೇಶನ್, ಡಿವಿಡಿ ಪ್ಲೇಯರ್ ಇತ್ಯಾದಿ ಧಾಡ್ಚಿ ವ್ಯವಸ್ತಾ ಕರ್ತಾಲೊ. ಗಾಂವಾ ಥಾವ್ನ್ ಪಾಟಿಂ ಯೆತೆಲ್ಯಾಂಕರ್ನಾ ಡಯಾಬೆಟಿಸ್, ಬ್ಲಡ್‍ಪ್ರೆಶರ್, ಶ್ಹೆಳ್, ಖೊಂಕ್ಲಿ ಆನಿ ತಾಪಾಚ್ಯೊ ಗುಳಿಯೊ ಹಾಡಯ್ತಾಲೊ.
ಪಕ್ಕು ತಾಚ್ಯಾ ಧಾಕ್ಟ್ಯಾ ಧುವೆಕ್ ನಿಡೊ, ಚೊಕ್ಲೆಟಾಂ, ವ್ಹಕ್ಲೆಕ್ ಮೊಬಾಯ್ಲ್, ಮೇಕಪಾಚ್ಯೊ ವಸ್ತು ಧಾಡ್ತಾಲೊ. ಪಾಟಿಂ ಯೆತೆಲ್ಯಾಂಕಡೆ ವಾಯೆಚ್ಯೊ ಗುಳಿಯೊ, ವಾಡ್‌‍ಲ್ಲೆಂ ಪೋಟ್ ದೆಂವಂವ್ಕ್ ಬ್ಯಾಟ್ರಿಚಾಲಿತ್ ಬೆಲ್ಟ್, ಇಂದಾಪೀಟ್ ಇತ್ಯಾದಿ ಹಾಡಯ್ತಾಲೊ.
ಇತ್ಲ್ಯಾರ್ ವಲ್ಲಿನ್‌ಯಿ ಕಾರ್ಗೊ ಧಾಡ್ಚಿ ವಿಲೆವಾರಿ ಕೆಲಿ. ದರ್‍ಯಾಂತ್ ಕಾರ್ಗೊ ಧಾಡ್ಲ್ಯಾರ್ ಗಾಂವಾಕ್ ಪಾವೊಂಕ್ ದೋನ್ ಮಹಿನೆ ಲಾಗ್ತಾತ್ ದೆಕುನ್ ಪಂದ್ರಾದಿಸಾಂ ಭಿತರ್ ಪಾಂವ್ಚೆಖಾತಿರ್ ವಾರ್‍ಯಾ ಕಾರ್ಗೊ ಧಾಡ್ಚಿ ಮಾಂಡ್ಣಿ ಕೆಲಿ. ಹ್ಯಾವಿಶಿಂ ಇಷ್ಟಾಂ-ಮಿತ್ರಾಂಕ್‌ಯಿ ಸಾಂಗ್ಲೆಂ.
ಸುಮಾರ್ ಪಾಂಚ್ ಜಣಾಂಚೊ ಚಡುಣೆ ಪಾಂಯ್ಶಿಂ ಕಿಲೊ ಸಾಮಾನ್ ತಯಾರ್ ಜಾಲೊ. ವಲ್ಲಿ ಆನಿ ಸಾಂಗಾತಿ ಜೊಸ್ತಿನ್ ವಚೊನ್ ಏಕ್ ವ್ಹಡ್ ಜಯ್ತ್ ಅಲ್ಯೂಮಿನಿಯಮಾಚಿ ಪೇಟ್ ಕರಯ್ಲಿ. ಹ್ಯಾ ಪೇಟೆಂತ್ ಮನ್ಶ್ಯಾಕ್ ನಿದಾವ್ನ್ ಹಾಡ್ಯೆತೆಂ.
ಪೇಟ್ ಲೇಬರ್ ಕ್ಯಾಂಪಾಕಡೆ ಯೇವ್ನ್ ಪಾವ್ಲಿ. ಚವ್ಗ್ ಜಣಾಂನಿ ತಿ ಉಕಲ್ನ್ ವಲ್ಲಿಚ್ಯಾ ಕುಡಾಂತ್ ದವರ್ಲಿ. ಕುಡಾಂತ್ ಭರ್ನ್ ಸಾಮಾನ್ ರಾಸ್ ಪಡ್‌ಲ್ಲ್ಯಾನ್ ಪೇಟೆ ವರ್ಯ್‌ಚ್ ಬಿಛಾಣೆ ಸೊಡಾವ್ನ್ ನಿದ್ತಾಲೊ ತೊ.
ವಲ್ಲಿಚ್ಯಾ ಕುಡಾಂತ್ ತೆಗಾಂ-ಚವ್ಗಾಂಚೊ ಕಾರ್ಗೊ ರಾಸ್ ಪಡ್‌ಲ್ಲೊ. ತಾಂಚ್ಯಾ ಇಡ್ಯಾಂತ್ ಜೊನಿ ಆನಿ ಪಕ್ಕುಚಿ ಪೊಟ್ಲಿ‌ಯಿ ಯೇವ್ನ್ ಪಡ್‌ಲ್ಲಿ.
ಕಾರ್ಗೊ ಧಾಡ್ಚ್ಯಾಂತ್ ಶ್ರೀಲಂಕಾಗಾರಾಂಕ್ ಮಿಕ್ವಾಲ್ಲೆ ಕೋಣ್‌ಯಿ ನಾಂತ್. ತಾಂಕಾಂ ಕಸ್ಟಮ್ಸ್ ಭರುಂಕ್ ನಾತ್‌ಲ್ಲ್ಯಾನ್ ಆನಿ ತಾಂಚ್ಯಾ ಗಾಂವಾಂತ್ ಮ್ಹಾರ್ಗಾಯ್ ವಿಶೇಷ್ ಜಾಲ್ಲ್ಯಾನ್ ತೆ ತಾಂದುಳ್, ಸಾಕರ್, ಗೊಂವಾಂಚೆಂ ಪೀಟ್, ಮಯ್ದಾ ಆನಿ ಹಾತಾಕ್ ಮೆಳ್‌ಲ್ಲ್ಯೊ ಚೊರಿ ಕೆಲ್ಲ್ಯೊ ಸರ್ವ್ ವಸ್ತು ಧಾಡ್ತಾತ್. ತಾಣಿಂ ಎಕೇಕ್ಲ್ಯಾನ್ ಧಾಡ್ಚ್ಯೊ ಕಾರ್ಗೊ ಉಣ್ಯಾರ್ ಪಾಂಯ್ಶಿಂ-ಸಯ್ಶಿಂ ಕಿಲೊ ತಿತ್ಲೊ.
ವಲ್ಲಿನ್ ಬಗ್ಲೆಚ್ಯಾ ಕುಡಾಂತ್ಲ್ಯಾ ಶ್ರೀಲಂಕನಾಂಕ್ ಆಪವ್ನ್ ಅಲ್ಯೂಮಿನಿಯಮಾಚ್ಯಾ ಪೇಟೆಂತ್ ಕಾರ್ಗೊ ಭರಯ್ಲೊ. ತಾಂಚ್ಯಾ ಮ್ಹಿನತೆಚಿ ಕೂಲ್ ಜಾವ್ನ್ ಶ್ರೀಲಂಕನ್ ಕಂಟ್ರಿ ವೊತುನ್ ದಿಲೊ.
ಕಾರ್ಗೊ ಕಂಪ್ಣೆಕ್ ಫೊನ್ ಕರುನ್ ಆಪಯ್ಲೆಂ. ಕಿಲ್ಯಾ ಪಾಟ್ಲ್ಯಾನ್ 10 ರಿಯಲ್ ಆನಿ ಕಸ್ಟಮ್ಸ್, ಇನ್ಶೂರೆನ್ಸ್ ಏಕ್ ರಿಯಲ್. ಪಿಕ್‌ಅಪ್ ಘೆವ್ನ್ ಆಯಿಲ್ಲ್ಯಾ ಕಾರ್ಗೊಚ್ಯಾ ಮನ್ಶ್ಯಾಂನಿ ಕ್ರೇನಿದ್ವಾರಿಂ ಸುಮಾರ್ 500 ಕಿಲೊ ಜಡಾಯೆಚಿ ಪೇಟ್ ವಯ್ರ್ ಉಕಲ್ಲಿ. ಪೇಟ್ ವಯ್ರ್ ಗೆಲಿ. ಪೇಟೆಚೊ ಹಾತಾಳೊ ಕುಡ್ಕೆ ಜಾವ್ನ್ ಪೇಟ್ ಸಕಯ್ಲ್ ಪಡೊನ್ ಸಾಮಾನ್ ಫಾಸಾಳ್ಳೊ, ಪಿಕೊ ಪಾಲ್ಪೊಣೊಸ್ ಫಾಸ್ಳಾಲ್ಲೆಪರಿಂ.
ತೀನ್ ಪೇಟೊ ಕೆಲ್ಯಾ ಶಿವಾಯ್ ಕಾರ್ಗೊ ಉಕ್ಲುಂಕ್ ಜಾಯ್ನಾ ಮ್ಹಣ್ ಆಯಿಲ್ಲೆ ಮನಿಸ್ ಪಾಟಿಂ ಪರ್ತಾಲೆ.
ವಲ್ಲಿ ಆನಿ ಜೊಸ್ಸಿ ವಚೊನ್ ಪೇಟ್ ಕರ್ನ್ ದಿಲ್ಲ್ಯಾ ಮನ್ಶ್ಯಾಕ್, ತಾಣೆ ಪೇಟೆಕ್ ಘಾಲ್ಲೊ ಹಾತಾಳೊ ಸಾರ್ಕೊ ನಾ ಮ್ಹಣ್ ಯೆಟುನ್, ನವ್ಯೊಚ್ ತೀನ್ ಪೇಟೊ ಘೆವ್ನ್ ಆಯ್ಲೆ.
ವ್ಹಡ್ಲಿ ಪೇಟ್ ಪಡೊನ್ ಫುಟೊನ್ ಗೆಲ್ಲ್ಯಾನ್ ಬರೆಂ ಜಾಲೆಂ. ನಾತರ್ ತಿ ಪೇಟ್ ಗಾಂವಾಕ್ ಪಾವ್‌ಲ್ಲಿ ತರ್, ಲೊರಿಯೆರ್ ಥಾವ್ನ್ ದೆಂವವ್ನ್ ಘರಾ ವ್ಹರುಂಕ್ ಧರ್ಮಸ್ಥಳಾಚ್ಯಾ ಹಸ್ತಿಕ್ ವ್ಹರಿಜಾಯ್ ಪಡ್ತೆಂ.
ಕಾರ್ಗೊ ಗಾಂವಾಕ್ ಪಾಂವ್ಚ್ಯಾ ಆಧಿಂಚ್ ಕಾರ್ಗೊ ಧಾಡ್ಲೆಲ್ಯಾಂ ಥಾವ್ನ್ ತಾಂಚ್ಯಾ ಘರ್ಚ್ಯಾಂಕ್-ಆವಯ್ಕ್-ಬಾಪಾಯ್ಕ್, ಬಾಯ್ಲೆಕ್, ಭಾವಾಕ್ ವ ಭಯ್ಣಿಕ್ ಫೊನಾಂಚ್ ಫೊನಾಂ.
ಕಾರ್ಗೊಚ್ಯಾ ಫಟಾಫಟ್ ಗಾಂವಾಕ್ ಪಾವ್‌ಲ್ಲ್ಯಾ ವಲ್ಲಿನ್ ತಾಚ್ಯಾ ಇಷ್ಟಾಂಚೊ ಸಾಮಾನ್ ಘೆವ್ನ್ ಕಲ್ಲಡ್ಕ, ಪುತ್ತೂರ್, ಮಾಣಿ, ವಿಟ್ಲಾ, ಸುರತ್ಕಲ್, ಕಾಪು, ಕಟ್ಟಾಡಿ ಆನಿ ಹೆರ್ ಗಾಂವಾಂಕ್ ವಚೊನ್ ಡೋರ್ ಡೆಲಿವರಿ ಕೆಲಿ.
"ಹಾಚ್ಯಾ ಉಪ್ರಾಂತ್ ಖತಾರ್ ಥಾವ್ನ್ ಕಾರ್ಗೊ ಧಾಡ್ಲಾಯ್‌ಗಿ ವಲ್ಲಿ?" ಮ್ಹಣ್ ವಿಚಾರ್ಲ್ಲ್ಯಾರ್, "ಉದ್ರಾಂಕ್ ಲೊಂಕ್ಡಾಚೊ ವ್ಯಾರ್ ನಾಕಾ ಅಂಕಲ್" ಮ್ಹಣ್ ಮಿಶಿಯಾಂ ಭಿತರ್ ಹಾಸ್ತಾ ತೊ!
Tags:
Cargo, CGS, Konkani, Humour, Vinod, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/9/2018 ಮಂಗಳೂರು ಸಿಲ್ವಂಗಾರ್ ಬೇಕರಿ...
-
10/30/2017 ನತಲಾಂಕ್ ಶಾಂತೆ ಖೆಳ್ ...
-
10/9/2017 ಆಮ್ಚೆ ಮನಿಸ್...
-
9/13/2017 ಶಾಂತಿ ಖಾತಿರ್ ಸ್ಪರ್ದೆ...
-
8/7/2017 ಆಶೆಂ ಏಕ್ ಸಂದರ್ಶನ್...
-
8/3/2017 ಹೆಂ ಮೆಲ್ಲೆಂ ಖಂಯ್ ಥಾವ್ನ್ ಆಯ್ಲೆಂ?...
-
7/19/2017 ವಿನ್ಸಿಚ್ಯೊ ಭಯ್ಣಿಂ...
-
6/8/2017 ನವಿಂ ನವಿಂ ಉದ್ಯಮಾಂ......
-
5/18/2017 ಕಷ್ಟ್ ಆಯ್ಲ್ಯಾತ್...
-
4/20/2017 ಹನಿಮೂನ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.