From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ವಿನ್ಸಿಚ್ಯೊ ಭಯ್ಣಿಂ
Wednesday, July 19, 2017
ಮ್ಹಜ್ಯಾ ಬೋವ್ ಥೊಡ್ಯಾ ಖಾಸ್ ಮಿತ್ರಾಂಪಯ್ಕಿ ವಿನ್ಸಿಯಿ ಎಕ್ಲೊ. ಖುಶಾಲಿ, ಸಾದೊ, ಭೊಳೊ, ಧಾದೊಶಿ ಮನಿಸ್. ಮನ್ ತಾಚೆಂ ನೆಹರೂ ಮಯ್ದಾನಾಪರಿ ವಿಶಾಲ್. ಕಾಳಿಜ್ ಕಾಸುಳೆಚ್ಯಾ ಖೊಲ್ಯಾತೆದೆಂ ಧಾರಾಳ್, ಮೊಗಾಳ್, ಮೊವಾಳ್, ಮಯ್ಪಾಸಿ ಸಂಯ್ಬಾಚೊ ವಿನ್ಸಿ, ಚಡ್ ಕರುನ್ 'ಪರೋಪಕಾರಿ'.
ಹಾಂವೆಂ ಅಪ್ರೂಪ್ ತಾಕಾ ಮೆಳೊಂಕ್ ವೆಚೆಂ. ತಾಚ್ಯಾ ದುಕಾನಾಕ್ ಗೆಲ್ಲ್ಯಾ ತಕ್ಷಣ್ ಬೆಲ್ಜಿಯಮಾಚೆಂ ಏಕ್ ಚೊಕ್ಲೆಟ್ ಕಾಡ್ನ್ ದಿತಾ. ತಾಚ್ಯಾ ದುಕಾನಾಂತ್ ಕಿಲೊಕ್ ಧಾ ಥಾವ್ನ್ ಪಾಂಚ್ ಹಜಾರ್ ರುಪಯ್ ಮೊಲಾಚಿಂ ಚೊಕ್ಲೆಟಾಂಯಿ ಆಸಾತ್.
ಚೊಕ್ಲೆಟ್ ಚಾಬ್ತಾನಾ ವಿನ್ಸಿಚಿ ಸುಲೆಮಾನಿ ಚಾ ಆನಿ ಏಕ್ ಮಟನ್ ಸ್ಯಾಂಡ್‍ವಿಚ್ ಯೆತಾ. ತಿತ್ಲ್ಯಾರ್ ಫೊನಾಚಿ ಕಾಂಪಿಣ್ ವ್ಹಾಜ್ತಾ.
''ಹಲೋ, ಕಶೆಂ ಆಸಾಯ್ ಮಾ ತುಂ? ತಿಕ್ಕೆ ಬಿಝಿ ಆಸಾಮಾ. ಲೆಬನಾನಿ ಆಯ್ಲಾಮಾ, ದೋನ್ ಮಿನುಟಾಂ ಸೊಡ್ನ್ ಫೋನ್ ಕರ್ತಾಯ್‍ಗೀ ಮಾ?'' ವಿನ್ಸಿ ರಿಸೀವರ್ ಸಕಯ್ಲ್ ದವರ್ನ್ ಮ್ಹಜೆಲಾಗಿಂ ಪಟ್ಟಾಂಗಾಂ ಮಾರುಂಕ್ ಬಸ್ತಾ.
''ಕೋಣ್ ವಿನ್ಸಿ ತೆಂ?'' ಹಾಂವೆಂ ವಿಚಾರ್ಲೆಂ.
''ತೆಂ ಕಾಲ್‍ಚ್ ಗಾಂವಾ ಥಾವ್ನ್ ವಿಜಿಟ್ ವಿಜಾಚೆರ್ ಆಯ್ಲಾಂ. ಕಾಮ್ ಸೊಧ್ತಾ. ಖಂಯ್ ಪುಣೀ ಕಾಮ್ ಆಸ್ಲ್ಯಾರ್ ಪಳೆಜಾಯ್ ಖಂಯ್...'' ವಿನ್ಸಿ ಸಾಂಗತ್ತ್ ವೆತಾ.
ಥೊಡೆಪಾವ್ಟಿಂ ವಿನ್ಸಿಚೊ ಬೋಸ್ ದುಕಾನಾಂತ್ ಬಸೊನ್ ಆಸ್ತಾನಾ ಫೋನ್ ವ್ಹಾಜ್ಲ್ಯಾರ್ ತೊಚ್ ಉಕಲ್ತಾ ಆನಿ ''ಕೋಣ್ ಉಲಯ್ತಾ?'' ಮ್ಹಣ್ ವಿಚಾರ್ತಾ ಖಂಯ್.
ಫೊನಾವಯ್ಲಿ ಚಲಿ ಆಪುಣ್ ವಿನ್ಸಿಚಿ ಭಯ್ಣ್ ವಾ ಕಜನ್ ಮ್ಹಣ್ತಾ ಖಂಯ್. ತವಳ್ ವಿನ್ಸಿಚೊ ಬೋಸ್ ವಿನ್ಸಿಲಾಗಿಂ, ''ತುಕಾ ದುಬಾಯಿಂತ್ ಕಿತ್ಲ್ಯೊ ಭಯ್ಣಿ ಆಸಾತ್?'' ಮ್ಹಣ್ ವಿಚಾರ್ತಾ ಖಂಯ್. ತವಳ್ ವಿನ್ಸಿಚೆ ಗಾಲ್ ಲಜೆನ್ ತಾಂಬ್ಶೆತಾತ್ ಖಂಯ್.
ವಿನ್ಸಿಕ್ ಸಭಾರ್ ಭಯ್ಣಿಂ ವಾ ಕಜನಾಂ ಆಸಾತ್. ತಾಂಚೆಪಯ್ಕಿ ಥೊಡಿಂ - ಧೂಪದಕಟ್ಟೆಚೆಂ ದುಲ್ಸಿನ್, ಮಲ್ಲಿಕಟ್ಟೆಚೆಂ ಮೆರ್ಸಿನ್, ಗಂಟಾಲ್‍ಕಟ್ಟೆಚೆಂ ಜುಸ್ತಿನ್, ಸಿದ್ಧಕಟ್ಟೆಚೆಂ ಸೆಲೆಸ್ತಿನ್, ಕುಕ್ಕುದಕಟ್ಟೆಚೆಂ ಕ್ರಿಸ್ತಿನ್, ಕಕ್ಕೆಬೆಟ್ಟುಚೆಂ ಕಾರ್ಮಿನ್, ಶಾಂತಿಬೆಟ್ಟುಚೆಂ ಸೆವ್ರಿನ್, ತಾಕೊಡೆಚೆಂ ತೆಜ್ಜು, ಬಜ್ಪ್ಯಾಂಚೆಂ ಬುಲ್ಲಾ, ಬಿದ್ರ್ಯಾಚೆಂ ಬಿಜ್ಜು, ನೆಲ್ಲಿಕಾರ್'ಚೆಂ ನೆಲ್ಲಿ, ಆಜೆಕಾರ್'ಚೆಂ ಆಲ್ಲಿ, ಪಕ್ಶಿಕೆರೆಚೆಂ ಫೆಲ್ಸಿ, ನಾರಾವಿಚೆಂ ಪಾಲ್ಲಿ, ಮಡಂತ್ಯಾರ್'ಚೆಂ ಮೇರಿ, ಪಾಲಡ್ಕಾಚೆಂ ಪಾಸ್ಕಿನ್, ಕೊಡ್ಡ್ಯಡ್ಕಾಚೆಂ ಕಾತ್ರಿನ್, ಬೆಳ್ತಂಗಡಿಚೆಂ ಬೆನ್ನಿ, ಶಿರ್ವಾಂಚೆಂ ಸೆಲ್ಲಿ, ಮಿಯಾರ್‍'ಚೆಂ ಮಿಲ್ಲಿ, ಜಲ್ಲಿಗುಡ್ಡೆಚೆಂ ಜಿಲ್ಲಿ, ಮುದರಂಗಡಿಚೆಂ ಮಾರ್ಸೆಲಿನ್, ಮೆರ್ಲಾಪದ್ವಾಚೆಂ ಮರ್ಲಿನ್, ಕಿನ್ನಿಗೋಳಿಚೆಂ ಕಿಟ್ಟಿ ಆನಿ ಹೆರ್ ಸಬಾರ್.
ವಿನ್ಸಿಚೆಂ ಫೋನ್ ಮ್ಹಳ್ಯಾರ್ ಮದ್ರಾಸಾಂತ್ಲ್ಯಾ ಬ್ರದರ್ ದಿನಕರನಾಚ್ಯಾ 'ಪ್ರೆಯರ್ ಟವರಾ'ಪರಿ ಚೊವೀಸ್ ವೊರಾಂಯಿ ವ್ಹಾಜ್ತಾ. ವಿನ್ಸಿಚೆಂ ಫೋನ್ ಮಾಂಯ್‍ಗಾಂವಾಥಾವ್ನ್ ಆನಿ ಮಾಂಯ್-ಘೊವಾ ಥಾವ್ನ್ ಪಯ್ಸ್ ಆಸ್‍ಲ್ಲ್ಯಾಂಕ್ ಏಕ್ 'ಹೆಲ್ಪ್ ಲಾಯ್ನ್'.
ಎಕ್ಲೆಂ ಫೊನಾರ್ ವಿನ್ಸಿಲಾಗಿಂ ಸಾಂಗಾಲಾಗ್ಲೆಂ, ''ವಿನ್ಸಿ, ಮ್ಹಾಕಾ ಬಾಯ್ ಪುರ್ಪುರ್ತಾ. ಬಾಬಾಲಾಗಿಂ ಉಲಯ್ಲ್ಯಾರ್ ಕೆಪ್ಪ್ಯಾಕ್ ಮಾರ್ತಾ...''
''ತಿಕ್ಕೆ ಸೊಸುನ್ ವ್ಹರ್'ಬಾ'' ವಿನ್ಸಿಚಿ ಭುಜಾವಣ್. ''ತುಜೆರ್ ಬಾಯ್ ಕಿತ್ಯಾಕ್ ತಿತ್ಲಿಯೀ ಜಳ್ತಾಮಾ?''
''ಅಳೆ ವಿನ್ಸಿ, ಬಾಬಾನ್ ಏಕ್ ಪಾವ್ಟಿಂ ತಾಚೆ ಪಾಯ್ ದಾಂಬುಂಕ್ ಸಾಂಗ್ಲೆ. ಹಾಂವ್ ಪಾಂಯ್ ದಾಂಬ್ತಾನಾ ಬಾಯ್ ಭಿತರ್ ರಿಗ್ಲಿ. ಆನಿ ''ಘೊಡ್ಯಾ, ತುಕಾ ಕಾಮ್ ಕರುಂಕ್ ಹಾಡ್‍ಲ್ಲೆಂಗೋ, ಪಾಂಯ್ ದಾಂಬುಂಕ್? ಆನಿ ಕಿತೆಂ ದಾಂಬ್ಲೆಂಯ್‍ಗೊ ತುಂವೆಂ?'' ಮ್ಹಣೊನ್ ಮ್ಹಜ್ಯೆ ಪಾಟಿರ್ ಪೆಟ್ನ್ಯಾನ್ ಥಾಪುಡ್‍ಲ್ಲೆಪರಿ ಮಾರಿಲಾಗ್ಲಿ....''
''ರಡಾನಾಕಾಮಾ...'' ವಿನ್ಸಿನ್ ಭುಜಯ್ಲೆಂ. ''ಬಾಯ್ ನಾತ್‍ಲ್ಲ್ಯಾವೆಳಾರ್ ತುಂ ಬಾಬಾಚೆ ಹಾತ್-ಪಾಂಯ್ ದಾಂಬುಂಕ್ ವಚಾನಾಕಾ. ವ್ಹಡಾಂಗೆಲಿಂ ಮನ್ಶಾಂ ತಿಂ. ತುಂವೆಂ ಸತ್ತ್ಯಾನ್ ಪಾಂಯ್ ದಾಂಬ್ಲ್ಯಾರ್ ಆನಿ ದುಸ್ರೆಂ ಕಾಂಯ್ ಪುಣೀ ದಾಂಬ್ಲೆಂಯ್ ಮ್ಹಣೊನ್ ತುಜೆರ್ ಬದ್ಲಾಮ್ ಥಾಪ್ತಾತ್.... ದೆಕುನ್ ಇಲ್ಲಿಶಿ ಚತ್ರಾಯ್ ಕರ್'ಮಾ...''
''ವಿನ್ಸಿ, ಮ್ಹಜ್ಯೆ ನಂಡ್ಡೆಚೊ ಘೊವ್ ಕುಡ್ಚೆಲಾ. ತೆಗಾಂ ಭುರ್ಗಿಂ ಆಸಾತ್. ನಂಡ್ಡೆಕ್ ಏಕ್ ಹಾವ್ಜ್'ಮೆಡಾಚಿ ವೀಜಾ ಪಳೆ, ಪ್ಲೀಜ್...'' ಆನ್ಯೇಕ್ಲೆಂ ಉಪ್ಕಾರ್ ಮಾಗ್ತಾ.
ವಿನ್ಸಿಚೆಂ ಕಾಳಿಜ್ ಕಡ್ತಾ - ತುಪಾಂತ್ ನೇಯಪ್ಪ ಕಡ್‍ಲ್ಲೆಪರಿ.
''ತಿಚೆಂ ಮೆಡಿಕಲ್ ಗಾಂವಾಂತ್ ಕರವ್ನ್ ರಿಪೋರ್ಟ್ ಧಾಡುಂಕ್ ಸಾಂಗ್. ನಾ ತರ್ ಹಾಂಗಾ ಆಯಿಲ್ಲ್ಯಾ ಉಪ್ರಾಂತ್ ಪಾಟಿಂತ್ ಘಾರ್ ಆನಿ ಪೊಟಾಂತ್ ವಾಯ್ ಮ್ಹಣೊನ್ ಪಾಟಿಂ ವಚಾಜೆ ಪಡ್ತಾ...'' ವಿನ್ಸಿ ಮಾರ್ಗ್‍ದರ್ಶನ್ ದಿತಾ.
ಥೊಡ್ಯಾ ವೆಳಾನ್ ಪರತ್ ಫೋನ್ ವ್ಹಾಜ್ತಾ, ''ಹಲೋಮಾ...'' ವಿನ್ಸಿ ರಿಸೀವರ್ ಉಕಲ್ತಾ.
''ವಿನ್ಸಿ, ಮ್ಹಜೊ ಸಾಯ್ಬ್ ಬೊಂಗ್ಲೊ ಬದ್ಲಿತಾ. ಕಾರ್ಪೆಟ್, ವೊಶಿಂಗ್ ಮೆಶಿನ್, ಟಿವಿ, ವಿಸಿಆರ್, ಕಂಪ್ಯೂಟರ್, ಫರ್ನಿಚರ್.... ಇತ್ಯಾದಿ ಆಸಾ. ಹಾಂವೆಂ ಗಾಂವಾಕ್ ಕಾರ್ಗೊ ಧಾಡುಂಕ್ ಚಿಂತ್ಲಾಂ. ಇಲ್ಲೆಶೆ ಬೋಕ್ಸ್ ತಯಾರ್ ಕರ್. ಆನಿ ಸಾಂಜೆರ್ ಕೊಣಾಯ್ಚೆಂ ಪಿಕ್‍ಅಪ್ ಘೆವ್ನ್ ಹೆವ್ಶಿನ್ ಯೆ. ಬೋಕ್ಸ್ ಪೂರಾ ತುಜ್ಯಾ ಕುಡಾಂತ್ ದವರ್.''
''ಜಾಯ್ತ್'ಮಾ, ಪರ್ನಿ ಖಾಟ್ ಆಸ್ಲ್ಯಾರ್ ಮ್ಹಾಕಾ ದವರ್'ಮಾ'' ವಿನ್ಸಿ ವಿನತಿ ಕರ್ತಾ.
ಸಾಂಜೆರ್ ವಿನ್ಸಿಚೆಂ ಕಾರ್ಗೊ ಸರ್ವಿಸ್ ಸುರು. ಲೊಣ್ಚೆಂ ಲೂಸಿಚೆ ಸಾತಾಟ್ ಬೋಕ್ಸ್ ವಿನ್ಸಿಚ್ಯಾ ಕುಡಾಂತ್ ದಾಸ್ತಾನ್. ವಿನ್ಸಿಕ್ ಕುಡಾಂತ್ ಬಸೊಂಕ್ ಸಯ್ತ್ ಜಾಗೊನಾ. ರಾತಿಚೆಂ ಬಿರ್ಮೊತ್ ವೊಶಿಂಗ್ ಮೆಶಿನಾಚೆರ್ ನಿದ್ತಾ.
''ವಿನ್ಸಿ, ಮ್ಹಜೊ ಗ್ಯಾಸ್ ಕಾಬಾರ್ ಜಾಲಾ. ಮ್ಹಾಕಾ ಏಕ್ ಗ್ಯಾಸ್ ಸಿಲಿಂಡರ್ ಹಾಡ್ನ್ ದಿಶಿಗೀ?'' ವಿನ್ಸಿಚಿ ಆನ್ಯೇಕ್ಲಿ ಭಯ್ಣ್ ವಿನತಿ ಕರ್ತಾ.
''ಜಾಯ್ತ್'ಮಾ...'' ವಿನ್ಸಿ ತಾಚ್ಯಾ ಕುಡಾಂತ್ಲೆಂ ಸಿಲಿಂಡರ್ ಟೆಕ್ಸೆರ್ ಘಾಲ್ನ್ ತೆ ಭಯ್ಣಿಕ್ ಪಾವಿತ್ ಕರ್ತಾ.
ತೆ ರಾತಿಂ ವಿನ್ಸಿ ಎಕ್‍ಚ್ ಉಪಾಶಿಂ, ನಾ ತರ್ ಮಲಬಾರಿಚ್ಯಾ ಹೊಟೆಲಾಂತ್ ಚಿಕನ್ - ಪರೋಟಾ ಖಾವ್ನ್ ಉದಕ್ ಪಿಯೆವ್ನ್ ನಿದ್ತಾ.
''ವಿನ್ಸಿ, ಆಮ್ಗೆರ್ ಪೊರ್ವಾಂ ಬರ್ಥ್‍ಡೇ ಪಾರ್ಟಿ ಆಸಾ. ಪಾಂಚ್ ಕಿಲೊ ದುಕ್ರಾಮಾಸ್ ಜಾಯ್.'' ವಿನ್ಸಿಚಿ ಆನ್ಯೇಕ್ಲಿ ಭಯ್ಣ್ ಫೊನಾರ್ ಸಾಂಗ್ತಾ.
''ಜಾಯ್ತ್'ಮಾ, ಮಾಸ್ ಹಾಡ್ನ್ ದಿತಾಂ. ಲೊಸುಣ್, ಪಿಯಾವ್ ಆನಿ ಶಿರ್ಕೊ ಜಾಯ್‍ಗೀಮಾ?'' ವಿನ್ಸಿ ತಿಚೆಲಾಗಿಂ ವಿಚಾರ್ತಾ. ಆನಿ ನಮಿಯಾರ್ಲೆಲ್ಯಾ ದಿಸಾ ಸಕ್ಕಡ್ ವಸ್ತು ಪಾವಿತ್ ಕರ್ತಾ.
ವಿನ್ಸಿ ಇತ್ಲೊ ನಿಸ್ವಾರ್ಥಿ ಮನಿಸ್ ಕಿ, ತಾಚೆಲಾಗಿಂ ಶರ್ಟ್ ವಿಚಾರ್ಲ್ಯಾರ್ ತೊ ಆಪ್ಲೆಂ ಪ್ಯಾಂಟ್‍ಯೀ ಕಾಡ್ನ್ ದಿತಾ. ತಾಚೆಂ ಕಾಮ್ ಸಂಪ್ತಾನಾ ರಾತಿಚಿಂ ವೊರಾಂ ಧಾ ಜಾತಾತ್. ತಾಚ್ಯಾ ಉಪ್ರಾಂತ್ ವಿಜಿಟ್ ವೀಜಾ, ಹೆಲ್ತ್ ಕಾರ್ಡ್, ಪತಾಕಾ, ಕಾರ್ಗೊ ಮಾತ್ತಿಗೊಬೊರ್ ಮ್ಹಣೊನ್ ಹಾತಾಂತ್ಲೆ ಪಯ್ಶೆ ಘಾಲ್ನ್ ಟೆಕ್ಸೆರ್ ಘುಂವ್ತಾ.
ಪುಣ್ ಅಸಲ್ಯಾ 'ಪರೋಪಕಾರಿ' ಮನೋಭಾವಾಚ್ಯಾ ಮನ್ಶಾಚೊ ಉಪ್ಕಾರ್ ಭಾವುಡ್ತಾ ಕೋಣ್? 'ಕಾರ್ಯೆಂ ಜಾಲೆಂ, ವಯ್ಜ್ ಮೆಲೊ' ಮ್ಹಳ್ಳೆಪರಿ ವಿನ್ಸಿಚಿ ಗತ್.
ವಿನ್ಸಿ ಸಯ್ರಿಕೊ ಕರ್ಚ್ಯಾಂತ್‍ಯೀ ಹುಶಾರ್.
''ವಿನ್ಸಿ, 28 ವರ್ಸಾಂ ಪ್ರಾಯೆಚೊ ಏಕ್ ಬರೊ ತರ್ನಾಟೊ ಆಸಾ. ಯೋಗ್ಯ್ ಕುಟ್ಮಾಂತ್ಲಿ, ಕಾಮಾರ್ ಆಸ್ಚಿ, ಸೊಭಿತ್ ಚಲಿ ಆಸಾ ಜಾಲ್ಯಾರ್ ಸಾಂಗ್...'' ವಿನ್ಸಿಕ್ ಧಾಕ್ಟ್ಯಾ ಪಾದ್ರ್ಯಾಬಾಚೆಂ ಫೋನ್.
ವಿನ್ಸಿ ಚೆಡ್ವಾಂಚ್ಯಾ ತಸ್ವೀರೆಚೊ ಆಲ್ಬಮ್ ಘೆವ್ನ್ ದುಸ್ರ್ಯಾ ದಿಸಾಚ್ ಪಾದ್ರ್ಯಾಬಾಚ್ಯಾ ಕುಡಾಂತ್ ಹಾಜಿರ್.
''ಹಾಂತ್ಲೆಂ ಖಂಚೆಂಯ್ ಏಕ್ ವಿಂಚುನ್ ಕಾಡಾ ಫಾದರ್. ಅಳೆ, ಹೆಂ ಪಳೆಂವ್ಕ್ ದೀಪಿಕಾ, ಹೆಂ ಮಾಧುರಿ, ತೆಂ ಕಾಜೊಲ್, ಹೆಂ ಕಾತ್ರಿನಾ, ಹೆಂ ಮನಿಶಾ ಕೊಯ್ರಾಲಾ, ಹೆಂ ಶಿಲ್ಪಾ ಶೆಟ್ಟಿ, ತೆಂ ಉರ್ಮಿಳಾ....'' ವಿನ್ಸಿಚೊ ಆಲ್ಬಮ್ ಪಳೆವ್ನ್ ಪದ್ರ್ಯಾಬ್‍ಯೀ ಖುಶಿ, ನವ್ರೊಯೀ ಖುಶಿ, ವ್ಹಕಾಲ್ ಧಾದೊಶಿ!
ವಿನ್ಸಿ ಸಿಂತಿಮೆಂತಾಳ್ ಮನಿಸ್. 'ಮೋಗ್ ಆನಿ ಮಯ್ಪಾಸ್' ಪಿಂತುರಾಂತ್ ವಿಲ್ಫಿ ರೆಬಿಂಬಸಾನ್ ಗಾಯ್ಲೆಲೆಂ, 'ಮರಿಯಾ' ಪದ್ ತಾಕಾ ಭಾರಿಚ್ ಪಸಂದ್. ಹೆಂ ಪದ್ ಕಿತ್ಲೆ ಪಾವ್ಟಿಂ ಆಯ್ಕಾಲ್ಯಾರೀ ತಾಕಾ ಪಾವನಾ. ತೆಂ ಆಯ್ಕಾತಾನಾ ತೊ ಚಡ್ ಸಿಂತಿಮೆಂತಾಳ್ ಜಾತಾ.
''ವಿನ್ಸಿ, ತೊ ಸಮಾಜ್ ಸೆವಕ್ ಆನಿ ಪರೋಪಕಾರಿ ಮನಿಸ್. ತುಕಾ ಸಭಾರ್ ಭಯ್ಣಿಂ ಆನಿ ಕಜನಾಂ ಆಸಾತ್. ತುಂವೆಂ ಮನ್ ಕೆಲ್ಯಾರ್ ಆಮಿ 'ಸಿಸ್ಟರ್ಸ್ ಆಫ್ ಸೆಂಯ್ಟ್ ವಿನ್ಸೆಂಟ್' (ಸಾಂ. ವಿಶೆಂತಿಚ್ಯೊ ಭಯ್ಣಿಂ) ಮ್ಹಳ್ಳೊ ಏಕ್ ಮೇಳ್ ಘಡ್ಲ್ಯಾರ್ ಕಶೆಂ?'' ವಿಚಾರ್ಲೆಂ ಹಾಂವೆಂ.
ವಿನ್ಸಿ ಹಾಸ್ಲೊ. ಧಾದೊಶಿ ಹಾಸೊ, ಗಂಭೀರ್ ಹಾಸೊ - 'ಶೋಲೆ' ಪಿಂತುರಾಂತ್ ಗಬ್ಬರ್ ಹಾಸ್‍ಲ್ಲೆಪರಿ....
Tags:
CGS Taccode, Konkani Humour, Vinod, Comedy, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/9/2018 ಮಂಗಳೂರು ಸಿಲ್ವಂಗಾರ್ ಬೇಕರಿ...
-
10/30/2017 ನತಲಾಂಕ್ ಶಾಂತೆ ಖೆಳ್ ...
-
10/9/2017 ಆಮ್ಚೆ ಮನಿಸ್...
-
9/13/2017 ಶಾಂತಿ ಖಾತಿರ್ ಸ್ಪರ್ದೆ...
-
8/7/2017 ಆಶೆಂ ಏಕ್ ಸಂದರ್ಶನ್...
-
8/3/2017 ಹೆಂ ಮೆಲ್ಲೆಂ ಖಂಯ್ ಥಾವ್ನ್ ಆಯ್ಲೆಂ?...
-
7/19/2017 ವಿನ್ಸಿಚ್ಯೊ ಭಯ್ಣಿಂ...
-
6/8/2017 ನವಿಂ ನವಿಂ ಉದ್ಯಮಾಂ......
-
5/18/2017 ಕಷ್ಟ್ ಆಯ್ಲ್ಯಾತ್...
-
4/20/2017 ಹನಿಮೂನ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.