From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಲಗೇಜ್
Wednesday, July 13, 2016
ಸಂತೊಸ್, ಸಂಭ್ರಮ್ ಮೊಗಾಚ್ಯಾ ಮನ್ಶ್ಯಾಂಕ್, ಕುಟ್ಮಾಚ್ಯಾ ಸಾಂದ್ಯಾಂಕ್, ಬಾಯ್ಲೆ-ಭುರ್ಗ್ಯಾಂಕ್, ಇಶ್ಟಾಂ-ಮಿತ್ರಾಂಕ್ ಮೆಳೊಂಕ್ ವೆತಾಂವ್ ಮ್ಹಳ್ಳ್ಯಾ ಕಾರಣಾ ಪಾಸತ್. ಪುಣ್ ಬೆಜಾರಾಯ್, ವಿರಾರಾಯ್, ಗಲ್ಫಾಂತ್ಲ್ಯಾ ಆಪ್ಲ್ಯಾ ಶೆಜಾರ್ಚ್ಯಾಂನಿ, ಇಶ್ಟಾಂ-ಮಿತ್ರಾನಿ ಗಾಂವಾಂತ್ ಆಸ್ಚ್ಯಾ ತಾಂಚ್ಯಾ ಘರ್ಚ್ಯಾಂಕ್ ಪಾವಿತ್ ಕರುಂಕ್ ದಿಲ್ಲ್ಯಾ ಕಾಗ್ದಾಂ-ಪತ್ರಾಂಚ್ಯೊ, ಸಾಮಾನ್ ವಸ್ತುಂಚ್ಯೊ ಪೊಟ್ಲ್ಯೊ ಪಳೆವ್ನ್.
ಗಲ್ಫಾ ಥಾವ್ನ್ ಗಾಂವಾಕ್ ದೆಂವ್ತಾನಾ, ತಶೆಂಚ್ ಗಾಂವಾ ಥಾವ್ನ್ ಗಲ್ಫಾಕ್ ಉಬ್ತಾನಾ ಕಾಗ್ದಾಂ-ಪತ್ರಾಂ ಬಟ್ವಾಡೆ ಕರ್ಚ್ಯಾ ಕೊರಿಯರ್ ಸರ್ವಿಸಾ ಭಾಶೆನ್, ಸ್ಪೀಡ್ ಪೋಸ್ಟಾ ಭಾಶೆನ್ ವಾ ಪೋಸ್ಟ್ ಮೆನಾ ಭಾಶೆನ್ ಥೊಡೆ ದೀಸ್ ಕಾಮ್ ಕರಿಜೆ ಪಡ್ತಾ. ವರ್ಸಾಚ್ಯಾ ಇಕ್ರಾ ಮಯ್ನ್ಯಾಂನಿ ಕಾಗ್ದಾಂ ಪತ್ರಾಂಚಿ ರಾಸ್ ಅರ್ದೊ ಕಿಲೊಭರ್ ಆಸ್ಲ್ಯಾರ್, ಕ್ರಿಸ್‍ಮಸ್-ನವ್ಯಾ ವರ್ಸಾಚ್ಯಾ ಸಂದರ್ಭಾರ್ ಕ್ರಿಸ್‍ಮಸ್ ಕಾರ್ಡಾಂಚಿ ಜಡಾಯ್ ದೇಡ್ ಕಿಲೊ ಉತರ್ತಾ.
ಹಾಂವ್‍ಯಿ 'ಗಲ್ಫ್' ಮ್ಹಳ್ಳ್ಯಾ ಭಾಸಾ‍ಯಿಲ್ಲ್ಯಾ ಗಾಂವಾಂತ್ ದೋನ್ ಅಡೇಜ್ ವರ್ಸಾಂಭರ್ ಆಸ್‍ಲ್ಲೊಂ. ಪಯಿ‍ಲ್ಲೆಂ ಪಾವ್ಟಿಂ ಗಲ್ಫಾಕ್ ವೆಚೆಂ ಜಾಲ್ಲ್ಯಾನ್ ದಿಸಾಳ್ಯಾ ಪತ್ರಾಂನಿ 'ಬೋನ್ ವೊಯೆಜ್' ವಾ 'ಶುಭ ಪ್ರಯಾಣ' ವಾ 'ಸುಖಾಳ್ ಪಯ್ಣ್' ಮ್ಹಣ್ ಫೊಟೊ ಛಾಪುನ್ ಶುಭಾಶಯ್ ಪರ್ಗಟುಂಕ್ ಮನ್ ಆಸ್‍ಲ್ಲೆಂ ತರೀ ಹಾಂವೆಂ ತಶೆಂ ಕೆಲೆಂ ನಾ.
ಕಾರಣ್, ಗಲ್ಫಾಕ್ ವೆಚೆಂ ಮ್ಹಳ್ಯಾರ್ ಚಂದ್ರಾಕ್ ವೆಚೆಂ ತಿತ್ಲೆಂ ಕಶ್ಟಾಂಚೆಂ ಮಿಸಾಂವ್ ಕಾಂಯ್ ನ್ಹಂಯ್. ಮ್ಹಜೆ ತಸಲೆ ಹಜಾರಾಂನಿ, ಲಾಕಾಂನಿ ಗಲ್ಫಾಕ್ ಪಾವೊನ್ ಆರ್ಬ್ಯಾಂಚೆ 'ಕುಬೂಸ್' ಖಾವ್ನ್ ಚಾರ್ ಕಾಸ್ ಜೊಡ್‍ಲ್ಲೆ ಕಾಂಯ್ ಉಣೆಂ ನಾಂತ್.
ಹಾಂವ್ ಗಲ್ಫಾಕ್ ವೆತಾಂ ಮ್ಹಳ್ಳಿ ಖಬರ್ ಕಾರ್ಡಾಕ್ ಉಜೊ ಲಾಗ್‍ಲ್ಲೆಪರಿಂ ಪ್ರಸಾರುಂಕ್ ಲಾಗ್ಲಿ. ಮ್ಹಜ್ಯಾ ಒಳ್ಕಿಚ್ಯೆ, ಅಭಿಮಾನಿ, ಹಿತಚಿಂತಕ್, ಈಷ್ಟ್-ಮಿತ್ರ್, ಶೆಜಾರ್ಚೆ, ಸಯ್ರೆ ಇತ್ಯಾದಿ ಮ್ಹಾಕಾ ಬರೆಂ ಮಾಗೊಂಕ್ ಆಯ್ಲೆ. ಯೆತಾನಾ ಖಾಲಿ ಹಾತಾಂನಿ ಯೆಂವ್ಕ್ ನಾಂತ್. ಬೆತ್ಲೆಹೆಮಾಂತ್ ಜಲ್ಮಲ್ಲ್ಯಾ ಜೆಜು ಬಾಳ್ಕಾಕ್ ನಮಾನ್ ಕರುಂಕ್ ಆನಿ ಕಾಣಿಕೊ ಭೆಟಂವ್ಕ್ ಆಯಿಲ್ಲ್ಯಾ ತೆಗಾಂ ರಾಯಾಂಭಾಶೆನ್ ಹಾತಾಂನಿ ವಿವಿದ್ ಗಾತ್ರಾಂಚ್ಯೊ ಆನಿ ಥರಾವಳ್ ವಸ್ತುಂಚ್ಯೊ ಪೊಟ್ಲ್ಯೊ ಘೆವ್ನ್ಂಚ್ ಆಯ್ಲೆ.
"ಮ್ಹಜಿ ಧುವ್ ಫುಡ್ಲದ್ ಗುರ್ವಾರ್. ತಿಕಾ ಮಿಟಾಕ್ ಘಾಲ್ಲೆ ಘರೆ(ಖಳಾಚೆ ಘರೆ) ಖಾಂವ್ಕ್ ಆಶಾ ಆಸಾ ಖಂಯ್. ದೆಕುನ್ ಇಲ್ಲೆ ಘರೆ ಪ್ಯಾಕ್ ಕರ್ನ್ ಹಾಡ್ಲ್ಯಾತ್. ತಿಕ್ಕೆ ಪಾವಿತ್ ಕರ್ ಪುತಾ" ಮ್ಹಣೊನ್ ಜುವಾನ್ ಬಾಯೆನ್ ಪೊಟ್ಲಿ ಮ್ಹಜ್ಯಾ ಹಾತಿಂ ದೀವ್ನ್ ಮ್ಹಾಕಾ ದೋನ್ ಟಾಯ್ಟ್ ಕೀಸ್ ಮಾರ್ಲೆ.
"ಮ್ಹಜಿ ಸುನ್ ಬಾಳಾಂತ್ ಜಾಲ್ಯಾ ಪುತಾ. ತೇಲ್ ಪುಸುಂಕ್, ಬಾಳ್ಶ್ಯಾಕ್ ಆನಿ ಆವಯ್ಕ್ ನ್ಹಾಣಂವ್ಕ್ ಕಾಮಾಚಿ ಸ್ತ್ರಿ ಆಸಾ. ಪೂಣ್ ತಿಕಾ ತಿಕ್ಲೆಂ ವಾ ರಾಂದೊ ಕರುಂಕ್ ಕಳಾನಾ ಖಂಯ್. ಪಿಲಾಂಚೊ ಕಾಲ್ದ್ ಕಾಡ್ನ್ ದಿಂವ್ಯಾಂ ಮ್ಹಳ್ಯಾರ್ ಥಂಯ್ಸರ್ ಕುಂಕ್ಡಾಪಿಲಾಂ ಮೆಳಾನಾಂತ್ ಖಂಯ್... ದೆಕುನ್ ಶಾಸ್ತ್ರಿಚೊ ಏಕ್ ಕಿಲೊ ಬಾಂಳ್ತಿಚೊ ರಾಂದೊ ಹಾಡ್ಲಾ ಪುತಾ. ಬೊತ್ಲಿ ವರ್ಯ್ ಫೋನ್ ನಂಬರ್ ಬರಯ್ಲಾಂ. ಪೂತ್ ಯೇವ್ನ್ ವರ್ತೊಲೊ. ಬಾಳ್ಶ್ಯಾಕ್ ಬರೆಂ ಕರ್ನ್ ಪಳೆಂವ್ಕ್ ಸಾಂಗ್‍ಬಾ" ತೆಜ್ಜುಬಾಯೆನ್ ಮ್ಹಾಕಾ ಪೊಟ್ಲುನ್ ಧರ್ಲೊ - ನರೆಂದ್ರ ಮೋದಿನ್ ಒಬಾಮಾಕ್ ಪೊಟ್ಲುನ್ ಧರ್‌ಲ್ಲೆಪರಿಂ.
"ಪುತಾಕ್ ಇಲ್ಲೆಶೆಂ ಪಿಯೆರೆ ಮ್ಹಳ್ಯಾರ್ ಆಯ್ಕಾನಾ. ಕಾಳ್ಕಾಯ್ ಜಾಲ್ಯಾ ಮ್ಹಣ್ ಬರಯ್ಲಾಂ. ದೆಕುನ್ 'ಪೊರೆಸ್ಟಿಕಾ' ಹಾಡ್ಲಾಂ. ಸುನೆಕ್ ಪೊಟಾಂತ್ ಗುಳುಗುಳು ಜಾತಾ ಖಂಯ್. ತಿಕಾ 'ಫ್ಲೋರಾ' ಹಾಡ್ಲಾಂ. ಹಾವ್ಜ್ ಮೇಡಾಕ್ ಕೆದಾಳಾಯ್ ತಾಪ್‍ಲ್ಲಿ ಕಾಯ್ಲ್ ಲಾಗೊನ್ ಉಜ್ಯಾಚೆ ಫೊಡ್ ಯೆತಾತ್ ಖಂಯ್. ತಾಚೆಖಾತಿರ್ 'ಸಿಂಥ್' ಆಸಾ. ತಿಕ್ಕೆ ಪಾವಿತ್ ಕರ್ ಪುತಾ. ಹೆಪಟೆಯ್ಟಿಸ್ ಬಿ ಇಂಜೆಕ್ಶನಾ, ಆಸ್ತಲಿನ್ ಗುಳಿಯೊಯಿ ಆಸಾತ್, ದೀವ್ನ್ ಸೊಡ್." ಮಾರ್ಸೆಲಾಮಾನ್ ಆಯೆರ್ ಕೆಲೊ.
"ಆಮ್ಚ್ಯಾ ಸೆಲ್ಲಿಕ್ ಸುಕಿ ಮಾಸ್ಳಿ ಮ್ಹಳ್ಯಾರ್ ಜೀವ್‍ರೆ ಪುತಾ. ಅರ್ದೊ ಕಿಲೊ ಫಸ್ಟ್ ಕ್ಲಾಸ್ ಕಲ್ಮಾಡಿ ತಾಟೊ, ಕಾಲ್ದೊ ಕಿಲೊ ನಿತಳ್ ಗಾಂಲ್ಬಿ, ಇಲ್ಲೆಶೆ ಬಾಂಗ್ಡೆ, ಲೆಪೊ, ಯೆರ್ಲ್ಯೊ, ದಡಿಯಾರೆ, ಆನಿ ಕೊಲ್ಲಾಕೊರ್ವೊ ಹಾಡ್ಲ್ಯಾತ್. ಸುಕ್ಯಾ ಮಾಸ್ಳೆಚೆಂ ನಿಸ್ತೆಂ ಕೆಲ್ಲ್ಯಾ ದೀಸ್ ತುಂಯಿ ಜೆವ್ಣಾಕ್ ವಚ್‍ರೆ, ಸಿರಿಲಾ" ಮ್ಹಣಾಲಿ ಆಲ್ಲಿಪಾದೆಚಿ ಎಲ್ಲುಬಾಯ್. ಹಾಂವ್ ಗಲ್ಫಾಕ್ ವೆತಾಂ ಮ್ಹಣ್ ತಿಕಾ ಬಿದ್ರ್ಯಾಂ ಸಾಂತೆಂತ್ ಜಿಲ್ಲಿಬಾಯೆನ್ ಸಾಂಗ್‍ಲ್ಲೆಂ ಖಂಯ್.
''ಗಲ್ಫಾಂತ್ ಬರಿಶಿ ಆಮ್ಸಾಣ್ ಮೆಳಾನಾ ಖಂಯ್. ದೆಕುನ್ ದೋನ್ ಕಿಲೊ ಆಮ್ಸಾಣ್, ಇಲ್ಲೆಶಿಂ ಬಿಂಡಿ ಸೊಲಾಂ, ಇಲ್ಲೆಶಿಂ ಬಿಂಬ್ಲಿಂ ಆನಿ ಏಕ್ ಬೋತ್ಲ್ ಶಿರ್ಕೊ ಪ್ಯಾಕ್ ಕರ್ನ್ ಹಾಡ್ಲ್ಯಾಂತ್. ಮಾರ್ಕು ಆನಿ ತುಂ ಕ್ಲಾಸ್‍ಮೇಟ್ ನ್ಹಯ್‍ವೇ ಏಕ್ ಲ್ಹಾನ್‍ಸೊ ತೊಂದೊರ್ ಆನಿ ಆಕ್ ಆದೊಳೊಯಿ ಸಿರ್ಲಾಕಡೆ ಧಾಡ್ನ್ ದಿ ಮ್ಹಣ್ ಬರಯ್ಲಾಂ ತಾಣೆ'' ಬಿಜ್ಜಾಬಾಯೆಚೊ ಕಾಣಿಕೆಂಚೊ ಪುರ್ಶ್ಯಾಂವ್ ಭಿತರ್ ರಿಗ್ಲೊ.
"ಆಮ್ಚ್ಯಾ ಕಿಟ್ಟಿಕ್ ಆಂಬೆ ಮ್ಹಳ್ಯಾರ್ ಜೀವ್. ಏಕ್ ಡಜನ್ ಆಪೂಸ್ ಆಂಬೆ ಆಸಾತ್. ಮಾಗಿರ್ ಥೊಡೆ ಪಾಲ್ಪಣೊಸ್ ಆಸಾತ್. ಇಲ್ಲಿಶಿಂ ಬಿಂಡಾ..." ಪಿಂತಾಮಾನ್ ಪೊಟ್ಲಿ ಸೊಡಯ್ಲಿ.
"ಆಮ್ಚೊ ಪೆಚ್ಚಾ ಗಾಂವಾಕ್ ಆಯಿಲ್ಲ್ಯಾ ತೆದ್ನಾ ಆಮ್ಚೆಂ ದುಕೊಲ್ರೆಂ ಪಿಲಾಂ ಕಾಡ್ತಾ. ಬಿರ್ಮೊತ್ ಬಾವ್ಡ್ಯಾಕ್ ಕಾಳಿಜ್-ಅಣ್ಕಿಟಿ ಖಾಂವ್ಕ್ ಮೆಳಾನಾ. ಹೆ ಪಾವ್ಟಿಂ ಮೊಂತಿ ಫೆಸ್ತಾಕ್ ನವೆಂ ಜೆವ್ತಾನಾ ಕಾಳಿಜ್-ಅಣ್ಕಿಟಿ ರಾಂದಿಜೆ ಮ್ಹಣ್ ಎಸ್ತೆಲಾನ್ ಬರಯ್ಲಾಂ. ದೋನ್ ಕಿಲೊ ಕಾಳಿಗ್-ಅಣ್ಕಿಟಿ ರಾಂದುನ್ ಚ್ಯಾರ್ ಬೊತ್ಲಿನಿ ಭರ್ಲ್ಯಾ ಆನಿ ಭಾಯ್ಲ್ಯಾನ್ 'ಮ್ಯಾಂಗೊ-ಪಿಕ್ಕಲ್' ಮ್ಹಣ್ ಬರಯ್ಲಾಂ. ನಾ ತರ್ ತೆ ಆರ್ಬಿ 'ಹರಾಮ್' ಮ್ಹಣೊನ್ ಬೊತ್ಲಿ ಕಾಡ್ನ್ ಉಡಂವ್ಕ್ ಆಸಾತ್" ಲುಜ್ಯಾಮಿ ಲೊಜಿಕ್ ಉಲಯ್ಲಿ.
ಗುಸ್ತಿನಾಮ್ ತರ್ನೊ ಘಡಾಯ್ ಘೆವ್ನ್ ಭಿತರ್ ಸರ್ಲೊ. "ಗುಸ್ತಿನಾಮಾ" ಮ್ಹಳೆಂ ಹಾಂವೆಂ ಹಾತ್ ಜೊಡುನ್, "ಹಾಂವೆಂ ಪಯ್ಲೆ ಪಾವ್ಟಿಂ ಗಲ್ಫಾಕ್ ವೆಚೆಂ. ತುಜೊ ಘಡಾಯ್ ಘೆವ್ನ್ ಹಾಂವ್ ಗಲ್ಫಾಚ್ಯಾ ವಿಮಾನ್ ನಿಲ್ದಾಣಾರ್ ದೆಂವ್ಲ್ಯಾರ್ ಆರ್ಬಿ ಮ್ಹಾಕಾ ತುಜ್ಯಾ ಘಡಾಯಾ ಸಮೇತ್ ಆರ್ಬಿ ದರ್ಯಾಕ್ ಉಡಂವ್ಕ್ ಆಸಾತ್." ಗುಸ್ತಿನಾಮ್ ಘಡಾಯ್ ಘೆವ್ನ್ ಪಾಟಿಂ ಘುಂವ್ಲೊ.
"ಗುಡ್ ಮೊರ್ನಿಂಗ್ ಮಿಸ್ಟರ್ ಸಿಕ್ವೇರಾ" ಮುರ್ನಾಳ್ ಫಿರ್ಗಜೆಚೊ ವಿಗಾರ್, ಕಾಜಿತೊರ್, ಆನಿ ಗೊವ್ಳಿಕ್ ಮಂಡಳಿಚೊ ಉಪಾಧ್ಯಕ್ಶ್ ಭಿತರ್ ರಿಗ್ಲೆ.
"ಹಲೋ ಫಾದರ್, ಯೆಯಾ ಬಸಾ"
ತೆ ಬಸ್ಲೆ.
"ಇಗರ್ಜೆಚೆಂ ಪಾಕೆಂ ದುರಸ್ತಿ ಕರುನ್ ಫ್ಲೋರಿಂಗ್ ನವೆಂ ಕೆಲಾಂ. ಸಿಮಿಸ್ತ್ರೆಕ್ ದೊರೊ ಬಾಂದ್ಲಾ. ಆನಿ ಆಮ್ಚ್ಯಾ ಫಿರ್ಗಜೆಕ್ ಏಕ್ ಮಜ್ಬೂತ್ ಹೊಲ್ ಜಾಯ್, ಮಿಸ್ಟರ್ ಸಿಕ್ವೇರಾ. ಆಮ್ಚೆ ಇಗರ್ಜೆಂತ್ ಹಫ್ತ್ಯಾಕ್ ದೋನ್ ತೀನ್ ರೆಸ್ಪೆರಾಂ ಜಾತಾತ್. ಪುಣ್ ಲಗ್ನಾಚಿಂ ಸತ್ಕಾರ್ ಕಾರ್ಯಿಂ ಸಕ್ಕಡ್ ಗರ್ನಾಳ್ ಫಿರ್ಗಜೆಚ್ಯಾ ಹೊಲಾಂತ್ ಚಲ್ತಾತ್. ಹೊಲ್ ಬಾಂದ್ತಚ್ ಪಾದ್ರ್ಯಾಬಾಂಕ್ ರಾವೊಂಕ್ ಲ್ಹಾನ್‍ಶೆಂ ಏಕ್ ಘರ್ ಬಾಂದ್ಚಿ ಆಲೋಚನ್‍ಯಿ ಆಸಾ...'' ವಿಗಾರ್ ಬಾಪ್ ಸಾಂಗಾತ್ತ್ ಗೆಲೊ.
"ಕಿತ್ಲೊ ಖರ್ಚ್ ಬಸತ್, ಫಾದರ್?"
"ಹೊಲಾಕ್ ಕಾಂಯ್ ನಾ ತರೀ ದೇಡ್ ಕೊರೊಡ್ ಆನಿ ಪಾದ್ರ್ಯಾಬಾಂಚ್ಯಾ ಲ್ಹಾನ್‍ಶಾ ಘರಾಕ್ ಪನ್ನಾಸ್ ಲಾಕಾಂ ಭಿತರ್. ತುವೆಂ ಗಲ್ಫಾಕ್ ಪಾವ್ತಚ್ ಆಮ್ಚ್ಯಾ ಫಿರ್ಗಜ್‍ಗಾರಾಂಚೆಂ ಏಕ್ ಎಸೋಸಿಯೇಶನ್ ಕರಿಜೆ. ಹಾಂವ್ ಮುಕೆಲ್ ಸಯ್ರೊ ಜಾವ್ನ್ ಯೆತಲೊಂ..." ಪಾದ್ರ್ಯಾಬಾನ್ ಆಪ್ಲಿ ಖುಶಿ ಕಳಿತ್ ಕೆಲಿ.
ಇಲ್ಲೆಶೆಂ ಸುಖ್-ದುಖ್ ಉಲವ್ನ್ ತೆ ಪಾಟಿಂ ವೆತಾನಾ ದೊಗಾಂ ಸಿಸ್ಟರಾಂ ಭಿತರ್ ರಿಗ್ಲಿಂ.
"ಅಳೆಬಾ ಸಿರಿಲ್, ಹ್ಯಾ ವರ್ಸಾ ಆಮಿ ದುಬ್ಳ್ಯಾ ಭುರ್ಗ್ಯಾಂಖಾತಿರ್ ಗಾಗ್ರೊ-ಬಾಜು ಶಿಂವೊನ್ ದಿತಾಂವ್. ದೊನ್ಪಾರಾಂಚೆಂ 'ಅನ್ನ-ಸಾಂಬಾರ್' ಜೆವಣ್ ದಿತಾಂವ್. ತುಂ ಆಮ್ಚ್ಯಾ ಇಸ್ಕಾಲಾಚೊ 'ಹಳೇ ವಿದ್ಯಾರ್ಥಿ' ನ್ಹಂಯ್‍ಗೀಬಾ....? ತುವೆಂ ಆಮ್ಚ್ಯಾ ಹ್ಯಾ ಕಾಮಾಕ್ ಸಪೊರ್ಟ್ ಕರಿಜೆಬಾ..., ತುಜ್ಯಾ ಫ್ಯಾಮಿಲಿ ಖಾತಿರ್ ಆಮಿ ಮಾಗ್ತಾಂವ್ ಬಾ..." ಸಿಸ್ಟರಿನ್ ಲಕ್ಕಿಡಿಪ್ಪಾಚೆ ಧಾ ಬೂಕ್ ಕಾಡ್ನ್ ದಿಲೆ.
ತಿತ್ಲ್ಯಾರ್ ವಯ್ಲ್ಯಾ ಹಿತ್ಲಾಂತ್ಲಿ ಫುಲಾಬಾಯ್ ಆಯ್ಲಿ.
"ಅಳೆರೇ ಪುತಾ, ಹ್ಯಾ ಬ್ಯಾಗಾಂತ್ 'ಭುರ್ಗ್ಯಾಂಚಿ ಜತನ್', 'ಸಾಂಬಾರ್ಡೊ', 'ಕಾಜಾರಿ ಲಂಯ್ಗಿಕ್ ಜಿವಿತ್', 'ರಾಂದ್ಪಿ', 'ಭಲಾಯ್ಕೆ ದಾಯ್ಜ್' ಆನಿ ಹೆರ್ ಬೂಕ್ ಆಸಾತ್. ಆಮ್ಚ್ಯಾ ನಿಮ್ಮಿಕ್ ತುಜೆ ಜ್ಯೋಕ್ ಮ್ಹಳ್ಯಾರ್ ಭಾರಿ. ಆಸ್ಲ್ಯಾರ್ ತುಜೊಯಿ ಏಕ್ 'ಚಿರ್‌ಮುಲ್ಯೊ' ಬೂಕ್ ಹ್ಯಾ ಬುಕಾಂ ಸಂಗಿಂಚ್ ನಿಮ್ಮಿಕ್ ಪಾವಿತ್ ಕರ್. ಆನ್ಯೇಕಾ ಬ್ಯಾಗಾಂತ್ ಭುರ್ಗ್ಯಾಂ ಪಿಡೆಚ್ಯೊ ಗುಳಿಯೊ, ದುಶ್ಟಾಕಾಯೆಚ್ಯೊ ಗುಳಿಯೊ, ಸುಕಯಿಲ್ಲ್ಯೊ ಕಾಳ್ಯೊ ಆಂಕ್ರ್ಯೊ, ವೊಡಾಚಿಂ ಪಾಳಾಂ ಆನಿ ಏಕ್ ಪೆಳೊ ಸುರೆಚೆಂ ಗೋಡ್ ಆಸಾ..."
ಫುಲಾಬಾಯೆಚೊ ಗಾಗ್ರೊ ಫುಲ್‌ಲ್ಲೊ-ರೊವಾಣೆಚ್ಯಾ ಕೊಂಬಿಯೆಚೊ ಮುಲ್ಲೊ ಫುಲ್‌ಲ್ಲೆಪರಿಂ.
ಹಾಂವ್ ತುವಾಲೊ ಘೆವ್ನ್ ನ್ಹಾಣಿಯೆಕ್ ಗೆಲೊಂ. ಪಾಟಿಂ ಯೆತಾನಾ ಎಕ್ಲೊ ಸಂಪಾದಕ್, ದೋಗ್ ಜಣ್ ಪ್ರಕಾಶಕ್, ಲೇಖಕ್ ಆನಿ ಕವಿ ತಾಂಚ್ಯಾ ಬುಕಾಂಚಿ ಪೊಟ್ಲಿ ಹಾಡ್ನ್ ಆಯಿ‌ಲ್ಲೆ.
ಉದೆವ್ನ್ ಯೆಂವ್ಚ್ಯಾ ಸಂಗೀತ್‍ಗಾರಾನ್ ತಾಚ್ಯಾ ಪಯ್ಲ್ಯಾ ಕೊವ್ಳೆಂಚಿ ಪೊಟ್ಲಿ ಹಾಡ್‍ಲ್ಲಿ.
ಇತ್ಲಿ ಲಗೇಜ್ ಹಾಂವೆಂ ವರಿಜೆ ತರ್ ಏಕ್ ಸಗ್ಳೆಂ ಪ್ಲೇಯ್ನ್ ಚಾರ್ಟರ್ಡ್ ಕರಿಜೆ. ನಾ ತರ್ ಘಾಟ್ಗೆ ಪಾಟಿಲಾಚಿ ವಾ ಸಿಪಿಸಿ ಲೊರಿ ಬುಕ್ ಕರ್ನ್ ತಾರ್ವಾರ್ 'ಕಂಟೇಯ್ನರ್' ವ್ಹೆಲ್ಲೆಪರಿ ಗಲ್ಫಾಕ್ ವ್ಹರಿಜೆ.
ಗಲ್ಫಾಕ್ ವಚೊನ್ ತಾಂಚ್ಯೊ ಸಾಟ್ಲ್ಯೊ ಪೊಟ್ಲ್ಯೊ ವಾಂಟುನ್ ಜಾತಾನಾ ಏಕ್ ವರ್ಸ್ ಪುಣೀ ಕಾಬಾರ್ ಜಾತಾ. ಪರತ್ ಪಾಟಿಂ ಯೆತಾನಾ ಗಲ್ಫಾಥಾವ್ನ್ ಗಾಂವ್ಚ್ಯಾ ಮನ್ಶ್ಯಾಂಕ್ ದಿಂವ್ಚೆಖಾತಿರ್ ಪರತ್ ಪೊಟ್ಲ್ಯೊ ರಾಸ್ ಪಡ್ತೆಲ್ಯೊ.
ತವಳ್ ಮಿಸಸ್ ಪಿಂಟೊ ಏಕ್ ಪೊಟ್ಲಿ ಹಾಡ್ನ್ ಅಶೆಂ ಮ್ಹಣ್ತೆಲಿ:
"ಅಳೆ ಮಿಸ್ಟರ್ ಸಿಕ್ವೇರಾ, ಗಾಂವಾಂತ್ ಪಿಯಾವಾಚೆಂ ಮೊಲ್ ಕಿಲ್ಯಾಕ್ ಪನ್ನಾಸ್ ರುಪಯ್, ಬಟಾಟ್ಯಾಂಕ್ ತೀಸ್ ರುಪಯ್ ಆನಿ ಟೊಮೆಟೊಂಕ್ ಶೆಂಬೊರ್ ರುಪಯ್ ಖಂಯ್. ದೆಕುನ್ ಹಾಂವೆಂ ಪಾಂಪಾಂಚ್ ಕಿಲ್ಯಾಂಚ್ಯೊ ಪಿಯಾವ್, ಬಟಾಟೆ ಆನಿ ಟೊಮೆಟೊ ಅಶೆಂ ತೀನ್ ಪೊಟ್ಲ್ಯೊ ಹಾಡ್ಲ್ಯಾತ್. ಗಾಂವಾಕ್ ಪಾವ್‍ಲ್ಲ್ಯಾ ತಕ್ಶಣ್ ರಿಕ್ಶಾರ್ ವ್ಹರ್ನ್ ಆಮ್ಗೆರ್ ಘರಾ ಮಿಸ್ಟರ್ ಪಿಂಟೊಕ್ ಪಾವಿತ್ ಕರ್..."
ಮಿಸ್ಟರ್ ರೇಗೊ ಏಕ್ ಪೊಟ್ಲಿ ದೀವ್ನ್ ಮ್ಹಣೊಂಕ್ ಪುರೊ:
"ಆಮ್ಚ್ಯಾ ಪಿಂಕಿಕ್ ಸುಂಕ್ಟಾಂ ಮ್ಹಳ್ಯಾರ್ ಜೀವ್. ದೋನ್ ಕಿಲೊ ಟಾಯ್ಗರ್ ಪ್ರೊನ್ಸ್ ಪ್ಯಾಕ್ ಕರ್ನ್ ಹಾಡ್ಲ್ಯಾಂತ್. ಆಮ್ಗೆರ್ ಘರಾ ವೆತಾನಾ, ಕೊಂಕಣಾಂತ್ಲೊ ಏಕ್ ಕಿಲೊ ಸ್ಪೆಶಲ್ ಬಫಾತ್ ಪಿಟೊಯಿ ವ್ಹರುನ್ ದಿ..."
"ಹ್ಯಾ ಬ್ಯಾಗಾಂತ್ ಭುರ್ಗ್ಯಾಂಕ್ ಇಲ್ಲಿಶಿಂ ಚೊಕ್ಲೆಟಾಂ, ಚೀಜ್, ದುದಾ ಪಿಟೊ ಇತ್ಯಾದಿ ಆಸಾ. ಆನ್ಯೇಕ್ ಬ್ಯಾಗಾಂತ್ ಖಾಜೂರ್, ಗರಮ್ ಮಸಲೊ, ಬಾದ್ಮಾಂ, ಪಿಸ್ತಾ, ಜರ್ದಾಳಾಂ ಆನಿಂ ಹೆರ್ ಡ್ರಾಯ್ ಫ್ರೂಟ್ಸ್ ಆಸಾತ್. ಗಾಂವಾಕ್ ಪಾವ್ತಚ್ ಕೂಡ್ಲೆ ಆಮ್ಗೆರ್ ಪಾವಿತ್ ಕರ್ ಹಾಂ!"
"ಆಮ್ಗೆಲ್ಯಾಂಕ್ ಇಲ್ಲೆಶಿ ಉಸ್ಮಡ್ ಆಸಾ. ದೆಕುನ್ ಹಿಂ 'ವೆಂಟೊಲಿನ್ ಇನ್‍ಹೆಲರಾಂ' ತಿಕ್ಕೆ ಪಾವಿತ್ ಕರ್" ಮಿಸೆಸ್ ಫೆರ್ನಾಂಡಿಸ್ ಸಾಂಗೊಂಕ್ ಪುರೊ.
"ಹಾಂತುಂ ಥೊಡಿಂ ಜೀನ್ಸ್ ಪ್ಯಾಂಟಾಂ, ಟೋಪ್ಸ್ ಇತ್ಯಾದಿ ಆಸಾತ್. ಆಮ್ಚ್ಯಾ ಶಯ್ಲಾಕ್ ಫೊನ್ ಕೆಲ್ಯಾರ್ ಪುರೊ. ತಾಚೆಲಾಗಿಂ 'ಕೆನೆಟಿಕ್ ಹೊಂಡಾ' ಆಸಾ. ತೆಂ ಯೇವ್ನ್ ವ್ಹರ್ತೆಲೆಂ. ಚಾಯ್ನಾ ಸಿಲ್ಕ್ ಸಾಡಿಯೊ, ಶಾಂಪೂ, ಸಾಬು, ಫರ್‌ಫ್ಯೂಮ್, ರೇಜರ್ ಬ್ಲೆಡಿಂಚಿ ಲ್ಹಾನ್‍ಶಿ ಪ್ಯಾಕೆಟ್ ಆಸಾ. ತಿ ಮಣಿಪಾಲ್ ಎಮ್.ಆಯ್.ಟಿ. ಹೊಸ್ಟೆಲಾಚ್ಯಾ ವಾರ್ಡಾನಾಕ್ ಪಾವಿತ್ ಕೆಲ್ಯಾರ್ ಪುರೊ. ಎಡ್ರೆಸ್ ಬರಯ್ಲಾ..." ಮಿಸ್ಟರ್ ಆಂಡ್ ಮಿಸೆಸ್ ರೊಡ್ರಿಗ್ಸ್ ಸಾಂಗ್ತಲಿಂ...
ಹ್ಯೆ ವಿಶಿಂ ಚಿಂತುನ್ ಆಸ್ತಾನಾಂಚ್ ಫೋನ್ ವ್ಹಾಜಾಲಾಗ್ಲೆಂ.
"ಸಿಜ್ಯೆಸ್, ಆತಾಂ ವಿಪ್ರೀತ್ ಧಗ್ ಆನಿ ಇಸ್ಕೊಲಾಕ್ ರಜಾ ಜಾಲ್ಲ್ಯಾನ್ ಹೆ ಆರ್ಬಿ ಆಖ್ಖೊ ದೀಸ್ ಆನಿ ಸಾರ್ಕೆಂ ಕಾಮ್ ಕರಿನಾತ್. ತುಜಿ ವಿಜಾ ದೋನ್ ಮಯ್ನ್ಯಾಂಕ್ ಪಾಟಿಂ ಪಡೊಂಕ್ ಪುರೊ..." ಮ್ಹಜೊ ಮಿತ್ರ್ ಸಾಂಗಾಲಾಗ್ಲೊ.
ಮ್ಹಜಿ ತಕ್ಲಿ ವ್ಹಡ್ಲ್ಯಾ ಫೆಸ್ತಾಂತ್ಲ್ಯಾ ಗಿರ್ಗಿಟೆಭಾಶೆನ್ ಘುಂವೊಂಕ್ ಲಾಗ್ಲಿ. ಆತಾಂ ಕಿತೆಂ ಕರ್ಚೆಂ ಹಾಂವ್ ಚಿಂತುಕ್ ಪಡ್ಲೊಂ. ದಿಸಾಳ್ಯಾರ್ ಅಶೆಂ ಏಕ್ ಕ್ಲಾಸಿಫಾಯ್ಡ್ ಜಾಯ್ರಾತ್ ದಿಂವ್ಚೆಂ:
"ಜಾಯ್ ಪಡ್ಲ್ಯಾತ್: ಸಾಯ್ಕಲ್ ಕಳಿತ್ ಆಸ್‌ಲ್ಲೆ ದೋಗ್ ವಾ ತೇಗ್ ಭುರ್ಗೆ ಘರಾಂ ಘರಾನಿ ವಚೊನ್ ತಾಂಚ್ಯೊ ಪೊಟ್ಲ್ಯೊ ಪಾವಿತ್ ಕರುಂಕ್."
ನಾ ತರ್ ಹಿ ಲಗೇಜ್ ಘರಾಚ್ ಸೊಡ್ಲ್ಯಾರ್ ಆಮಿ ಜಾಲಾಂತ್ ನಿದಜೆ ಪಡಾತ್!!
Tags:
CGS Taccode, Konkani Humour, Vinod, Comedy, Luggage, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/9/2018 ಮಂಗಳೂರು ಸಿಲ್ವಂಗಾರ್ ಬೇಕರಿ...
-
10/30/2017 ನತಲಾಂಕ್ ಶಾಂತೆ ಖೆಳ್ ...
-
10/9/2017 ಆಮ್ಚೆ ಮನಿಸ್...
-
9/13/2017 ಶಾಂತಿ ಖಾತಿರ್ ಸ್ಪರ್ದೆ...
-
8/7/2017 ಆಶೆಂ ಏಕ್ ಸಂದರ್ಶನ್...
-
8/3/2017 ಹೆಂ ಮೆಲ್ಲೆಂ ಖಂಯ್ ಥಾವ್ನ್ ಆಯ್ಲೆಂ?...
-
7/19/2017 ವಿನ್ಸಿಚ್ಯೊ ಭಯ್ಣಿಂ...
-
6/8/2017 ನವಿಂ ನವಿಂ ಉದ್ಯಮಾಂ......
-
5/18/2017 ಕಷ್ಟ್ ಆಯ್ಲ್ಯಾತ್...
-
4/20/2017 ಹನಿಮೂನ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.