From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ನವಿಂ ನವಿಂ ಉದ್ಯಮಾಂ...
Thursday, June 8, 2017
ಕೋಣ್ ಮ್ಹಣ್ತಾ ಪೊರ್ಬುಗೆಲ್ಯಾಂಕ್ ಬಿಜ್ನೆಸ್ ಕರುಂಕ್ ಕಳಿತ್ ನಾ ಮ್ಹಣ್? ಸೊರೊ ಉಕಡ್ಚ್ಯಾಂತ್, ದುಕೊರ್ ಪೊಸ್ಚ್ಯಾಂತ್ ಆಮ್ಕಾಂ ಮಿಕ್ವಲ್ಲೆ ಕೊಣ್‍ಯೀ ಆಸಾತ್ ತರ್ ಸಾಂಗಾ. ಆಜ್‍ಚ್ ಮ್ಹಜ್ಯೊ ಮಿಶಿಯೊ ತಾಸ್ತಾಂ.
ಚಿಟ್‍ಫಂಡ್, ಫೈನಾನ್ಸ್ ಕಂಪ್ಣ್ಯೊ, ಸಾವ್ಲ್ಯಾಚೆ ರೂಕ್, ಸುಂಕ್ಟಾಂ ಪೊಸಾಪ್ - ಆನಿ ಹೆರ್ ಬಿಜ್ನೆಸಾಂನಿ ಆಮ್ಚೆಂ 'ಅಂಕ ಗಣಿತ' ಇಲ್ಲೆಶೆಂ ಚುಕ್ಲೆಂ. ಕನ್ನಡ ದಿಸಾಳೆಂ ಸುರು ಕರ್ಚ್ಯಾ ಬದ್ಲಾಕ್ ಆನಿ ಕೊಂಕ್ಣೆಂತ್ 'ಗೊಸಾಳೆಂ' ಮ್ಹಳ್ಳೆಂ ಪತ್ರ್ ಕಾಡ್‍ಲ್ಲೆಂ ತರ್ ಗೊಸಾಳ್ಯಾಚಿ ವಾಲ್ ತರೀ ರುಕಾರ್ ಚಡ್ತಿ.
ಆತಾಂ ತೆಂ ಸೊಡ್ಯಾಂ ಆನಿ ಹೆಂ ಧರ್ಯಾಂ...! ಎದೊಳ್ಚೆಪರಿಂ ಕುಂಕ್ಡಾಂ, ದುಕೊರ್ ವಾ ಗಾಯೊ ಪೊಸುನ್ ಕಾಂಯ್ ಫಾಯ್ದೊ ನಾ. ಆಯ್ಚ್ಯಾ ಕಾಳಾರ್ ಬಿಜ್ನೆಸ್ ಕರುಂಕ್ ಧಾರಾಳ್ ಆವ್ಕಾಸ್ ಆಸಾತ್ - ಮೊಳ್ಬಾ ವಯ್ಲ್ಯಾ ನೆಕೆತ್ರಾಂ ತಿತ್ಲೆ. ಹೊಟೆಲಾಂ, ಆಸ್ಪತ್ರ್ಯೊ, ಕೊಲೇಜಿ, ಐ.ಟಿ.ಐ. ಪೊಲಿಟೆಕ್ನಿಕಾಂ ಇತ್ಯಾದಿ ಸುರು ಕರುನ್ ಗಾಂವಾಂತ್ ಕೊರೊಡ್‍ಪತಿ ಜಾವ್ನ್ ಲೆಕ್ಸಸ್ ಗಾಡಿಯೆಚೆಂ ಆಟ್ಟೆಂ ಘುಂವ್ಡಾವ್ಯೆತ್.
ಸುಲಭಾಯೆಚೆಂ ಉದ್ಯಮ್ ಮ್ಹಳ್ಯಾರ್ ಹೊಲಿಡೇ ರಿಸೊರ್ಟ್... ರಜೆಚ್ಯಾ ದಿಸಾಂನಿ ಮಝಾ ಮಾರ್ಚೆಂ ಕೇಂದ್ರ್. ಗಾಂವಾಂತ್ ತೀನ್-ಚಾರ್ ಎಕ್ರೆ ಜಾಗೊ ಆಸ್ಲ್ಯಾರ್ ಧಾರಾಳ್ ಪುರೊ. ನಂಯ್ ದೆಗೆರ್ ಪುಣಿ ಜಾಗೊ ಆಸ್ಲ್ಯಾರ್ ಸಾಂಗ್ಚೆಂ ನಾಕಾ. ನಂಯ್ ನಾತ್ಲ್ಯಾರ್ ವ್ಹಾಳ್ಚೊ ಲ್ಹಾನ್‍ಸೊ ವ್ಹಾಳ್ ಆಸ್ಲ್ಯಾರೀ ಪುರೊ. ನಶೀಬಾಚೆಂ ದಾರ್ ಸದಾಂಚ್ ಉಗ್ತೆಂ - ದಿವ್ಳಾಚ್ಯಾ ಭೊಟಾಚೆಂ ಪೋಟ್ ಉಗ್ತೆಂ ಆಸ್‍ಲ್ಲೆಪರಿ.
ಆದಿಂ ಆಮಿ ರಿಣಾಖಾತಿರ್ ಬೆಂಕಾಂಕ್ ಧಾಂವಾಜೆ ಆಸ್‍ಲ್ಲೆಂ. ಆತಾಂ ಬೆಂಕಾಂಚ್ ಆಮ್ಚ್ಯಾ ಘರಾ ಬಾಗ್ಲಾರ್ ಧಾಂವೊನ್ ಯೇವ್ನ್ ರೀಣ್ ದಿತಾತ್. ಏಕ್ ಪ್ರೊಜೆಕ್ಟ್ ರಿಪೊರ್ಟ್ ತಯಾರ್ ಕರಾ ಆನಿ ಬೆಂಕಾಂತ್ಲೆಂ ರೀಣ್ ಕಾಡಾ.
ತುಮ್ಚ್ಯಾ ಜಾಗ್ಯಾರ್, ವ್ಹಾಳಾಚ್ಯಾ ದೆಗೆರ್ ವಾ ಗುಡ್ಯಾಚೆ ತಕ್ಲೆರ್ ಸಾತ್-ಆಟ್ ಝೊಪ್ಡಿಂ ಉಬಿಂ ಕರಾ. ಪಾಕ್ಯಾಕ್ ಮೊಡ್ಲಾಂ ವಾ ಕೊಲು ಘಾಲಾ. ವೊಣದಿ ಬದ್ಲಾಕ್ ಮೊಡ್ಲ್ಯಾಂಚ್ಯೊ ತಟ್ಟ್ಯೊ ಆಡ್ ಬಾಂದಾ. ಬಸೊಂಕ್ ತೀನ್ ಪಾಂಯಾಂಚಿಂ ಚ್ಯಾರ್ ಕದೆಲಾಂ, ಸಾಡೆತೀನ್ ಪಾಂಯಾಂಚೆಂ ಏಕ್ ಮೇಜ್ ಆನಿ ಆಡೇಜ್ ಪಾಂಯಾಂಚೆಂ ಏಕ್ ಖಟ್ಲೆಂ ಆಸ್ಲ್ಯಾರ್ ಪುರೊ.
ಮೆಜಾರ್ ಏಕ್ ಗುರ್ಗುಲೆತ್, ಏಕ್ ಚಿಮ್ಣಿ, ಸೊಪ್ಯಾರ್ ಏಕ್ ಲಾಂಪ್ಯಾಂವ್, ನ್ಹಾಂವ್ಕ್ ಮಾತಿಯೆಚೆಂ ಭಾಣ್. ಉದಕ್ ಭರುಂಕ್ ಲೊಂಕ್ಡಾಚಿ ಬಾಲ್ಡಿ, ಉದಕ್ ಉಸ್ಪೊಂಕ್ ಏಕ್ ವೊಣೊಕ್, ಶಿತ್ ಶಿಜಂವ್ಕ್ ಮೊಡ್ಕಿ, ಮಾಸ್ಳೆಚಿ ಕಡಿ ಕರುಂಕ್ ಕುಂಡ್ಲೆಂ, ಆಳೆನ್ ವಾಟುಂಕ್ ವಾನ್ ಆನಿ ಗಾಟ್ಣೊ, ಚಪಾತಿ ಲಾಟುಂಕ್ ಲಾಟ್ನೆಂ, ವಾಡುಂಕ್ ದೋಯ್ ಆನಿ ಚಾಳುಂಕ್ ತಾಸ್‍ಲ್ಲೊ ಪಿಡೊ.
ವ್ಹಾಳಾಂತ್ ಉದಕ್ ಸುಕ್ಲಾಂ ತರ್ ಟ್ಯಾಂಕರಾಂನಿ ಉದಕ್ ಹಾಡ್ನ್ ಭರ್ಚೆಂ. ಉದ್ಕಾಂತ್ ಪನ್ನಾಸ್ ದೆಂಕ್ಳೆ, ಧಾ-ವೀಸ್ ತಿಗುರ್, ಚ್ಯಾರ್-ಪಾಂಚ್ ಕಾಸೊವ್ ಆನಿ ಧಾ-ಬಾರಾ ಕುರ್ಲ್ಯೊ ಘಾಲ್ಚ್ಯೊ. ಕುಬೆ ವಾಂಚಾನಾತ್ಲ್ಯಾರ್ ದೊನ್ಶಿಂ ಶಿಂಪಿಯೊ ಶಿಂಪ್ಡಾಯ್ಲ್ಯಾರ್ ಸಯ್.
ಮಾಗಿರ್ ಮಾಸ್ಳಿ ಧರುಂಕ್ ಗರಿ, ಜಾಳಾಂ, ಉದ್ಕಾಂತ್ ಭೊಂವ್ಡಿಂ ಮಾರುಂಕ್ ಲ್ಹಾನ್‍ಶಿ ಏಕ್ ದೋಣ್, ಗರಿ ಘಾಲ್ತಾನಾ ಚಾಬೊಂಕ್ ಉಕಡ್ಲೆಲಿಂ ಭಿಕ್ಣಾಂ ಆನಿ ಭಾಜ್‍ಲ್ಲೆ ಚುಂಚಾರೆ.
ಮಾಗಿರ್ ಹೊಲಿಡೇ ರಿಸೊರ್ಟಾಕ್ ಏಕ್ ಬರೆಶೆಂ, ಆಕರ್ಶಿಕ್ ನಾಂವ್ ದವರ್ಚೆಂ. ಹೊಲಿವುಡ್, ಬೊಲಿವುಡ್, ಜೊಲಿವುಡ್, ಲೊಲಿವುಡ್, ಪೋಲಿವುಡ್ ವಾ ಖಾಲಿವುಡ್.
ಹೊಲಿಡೇ ರಿಸೊರ್ಟ್ ಉಗ್ತಾವ್ಣೆಚ್ಯಾ ಆದಿಂ ಏಕ್ ಪತ್ರಿಕಾಗೋಷ್ಠಿ ಆಪಯ್ಜೆ. ಪತ್ರಿಕಾ ಪ್ರತಿನಿಧಿಂಕ್ ಧಾದೊಶಿ ಭರಯ್ಜೆ ಆನಿ ಖಾವಯ್ಜೆ. ಮಾಗಿರ್ ತೆ ಉಟೊನ್ ಘರಾ ವೆತಾನಾ ಎಕೇಕ್ ಪೊಟ್ಲಿ ಕಾಜು ಬಿಯಾಂಚೆ ಮೋಯ್ ವಾ ಎಕೇಕ್ ಕಿಲೊ ಭುಂಯ್ ಚಾಣ್ಯಾಂಚಿ ಪೊಟ್ಲಿ ದೀಜೆ. 'ಕವರ್' ದಿಲ್ಯಾರ್ ಭಾರೀ ಬೊರೆಂ. ದುಸ್ರ್ಯಾ ದಿಸಾ ಸದಾಂಚ್ಯಾ ಪತ್ರಾಂಚ್ಯಾ ಮುಕ್ಲ್ಯಾ, ಮದ್ಲ್ಯಾ ವಾ ಪಾಟ್ಲ್ಯಾ ಪಾನಾರ್ ತುಮ್ಚ್ಯಾ ಹೊಲಿಡೇ ರಿಸೊರ್ಟಾಚಿಚ್ ಖಬರ್!
ಹೊಲಿಡೇ ರಿಸೊರ್ಟ್ ಉಗ್ತಾವಣ್ ಕಾರ್ಯಾಕ್ ಸೋನಿಯಾ ಗಾಂಧಿಕ್ ವಾ ಸಾನಿಯಾ ಮಿರ್ಜಾಕ್, ಸಿದ್ಧರಾಮಯ್ಯಾಕ್ ವ ಯಡ್ಯೂರಪ್ಪಾಕ್, ಓಸ್ಕರಣ್ಣಾಕ್ ವಾ ಭಾಸ್ಕರಣ್ಣಾಕ್ ಆಪಯ್ಲ್ಯಾರ್ ಜಾಲೆಂ.
ಆನ್ಯೇಕ್ ವಿಂಚ್ಣಾರ್ ಉದ್ಯಮ್ ಆಸಾ. ಹಾಂತುಂ ಬಂಡ್ವಾಳ್ ಉಣೆಂ, ಲಾಭ್ ಚಡ್. ಹಾಕಾ ಕಾರಣ್ ಆರ್ವಿಲ್ಯಾ ವರ್ಸಾಂನಿ ಸಂಸಾರ್‍'ಭರ್ ಆಮ್ಚ್ಯಾ ನರ್ಸಮ್ಮಾಂಕ್ ಆಸ್ಚೊ ವಿಶೇಸ್ ಡಿಮ್ಯಾಂಡ್. ಹ್ಯಾ ದಿಸಾಂನಿ ಪಿಡೇಸ್ತಾಂಪ್ರಾಸ್ ನರ್ಸಾಂ ಚಡ್. ಗಲ್ಫಾಂತ್ ತಿಂ ಚಡುಣೆಂ ಸಾಟ್ - ಸತ್ತರ್ ಹಜಾರ್ ರುಪಯ್ ಜೊಡ್ತಾತ್ ತರ್ ಇಂಗ್ಲೆಂಡ್, ಅಮೇರಿಕಾ ವಾ ಹೆರ್ ಪಾಶ್ಚಾತ್ಯ್ ದೇಶಾಂನಿ ತಾಂಚಿ ಜೋಡ್ ಮ್ಹಯ್ನ್ಯಾಕ್ ಏಕ್ ಲಾಕ್ ರುಪ್ಯಾಂಕ್ ಮಿಕ್ವತಾ ಮ್ಹಣ್ತಚ್ ತಾಂಚೊ ಹಾತ್ ಧರುಂಕ್ ಆಂಕ್ವಾರ್ ಚಲೆ ಲಾಯ್ನಿರ್ ರಾವ್ತಾತ್ - ರೇಶನಾಚಿ ಸಾಕರ್ ಘೇಂವ್ಕ್ ಲಾಯ್ನಿರ್ ರಾವ್‍ಲ್ಲೆಪರಿ.
ನರ್ಸಾಂಕಡೆ ಕಾಜಾರ್ ಜಾಲ್ಲ್ಯಾ ಚಲ್ಯಾಂನಿ ಭಾಯ್ರ್ ಕಾಮ್ ಕರಿಜಾಯ್ ಮ್ಹಣ್ ನಾ. ಘರ್ ಸಾಂಬಾಳ್ಳ್ಯಾರ್ ಪುರೊ. ರಡ್ತಾನಾ ಭುರ್ಗ್ಯಾಂಕ್ ದೂದ್ (ಬೊತ್ಲಿಚೆಂ) ದಿಲ್ಯಾರ್ ಜಾಲೆಂ. ನರ್ಸಮ್ಮಾ ಡ್ಯೂಟೆರ್ ಥಾವ್ನ್ ಘರಾ ಯೆತಾನಾ ತಿಕಾ ಫ್ರಿಜ್ಜಾಂತ್ಲೆಂ ಜೆವಣ್ ಹುನ್ ಕರ್ನ್ ವಾಡ್ಲ್ಯಾರ್ ಜಾಲೆಂ.
ಹ್ಯಾ ಕಾಳಾರ್ ಆಮ್ಚ್ಯಾ ಗಾಂವಾಂತ್ ಆಸ್‍ಲ್ಲಿಂ ನರ್ಸಿಂಗ್ ಇಸ್ಕೊಲಾಂ ಪಾವಾನಾಂತ್. ಆನಿಕ್‍ಯೀ ನವಿಂ ನವಿಂ ನರ್ಸಿಂಗ್ ಇಸ್ಕೊಲಾಂ ಉದೆವ್ನ್೦ಚ್ ಆಸಾತ್ - ಆಟಿಚ್ಯಾ ಘಡ್ಗಡ್ಯಾಕ್ ಫುಟ್ಚ್ಯಾ ಆಳ್ಮ್ಯಾಂ ಭಾಶೆನ್. ಹ್ಯಾ ನರ್ಸಿಂಗ್ ಇಸ್ಕೊಲಾಂಕ್‍ಯಿ ಸಾಯ್ಬಿಣಿಚಿಂ ವಿವಿದ್ ನಾಂವಾಂ. ನಿತ್ಯಾದಾರ್ ಸ್ಕೂಲ್ ಆಫ್ ನರ್ಸಿಂಗ್ ಧರ್‍'ಲ್ಲೆಂ, ಲೂರ್ಡ್ಸ್, ವೆಲ್ಲಂಕಣಿ ಶಿವಾಯ್ ಸಾಯ್ಬಿಣಿಚಿ ಆಜಿ ಸಂತಾನ್ ವ್ಹಡ್ಲಿಮಾಂಯ್ ಪರ್ಯಾಂತ್ ಸೊಭಿತ್ ಸೊಭಿತ್ ನಾಂವಾಂ.
ತುಮ್ಗೆರ್ ಏಕ್ ಹಜಾರ್ ಚದರ್ ಫುಟಿಚೆಂ ಉಗ್ತೆಂ ಟೆರೆಸ್ ಆಸ್ಲ್ಯಾರ್ ಪುರೊ. ನಾಂ ತರ್ ಘರಾ ಪಾಟ್ಲ್ಯಾನ್ ಲ್ಹಾನ್‍ಶೆಂ ಕೊಡ್ಕೆಂ ವಾ ಗೊಟೊ ಆಸ್ಲ್ಯಾರ್'ಯೀ ಚಲ್ತಾ. ತಾಕಾ ರಂಗ್ ರಂಗಾಳ್ ಪೇಂಯ್ಟ್ ವೊಡುನ್, ಫ್ಲೊರೆನ್ಸ್ ನೈಟಿಂಗೇಲ್ ವಾ ಹೆರ್ ಖಂಚೆಂಯಿ ನಾಂವ್ ದೀವ್ನ್ ಸ್ಕೂಲ್ ಆಫ್ ನರ್ಸಿಂಗ್ ಮ್ಹಳ್ಳೊ ಬೋರ್ಡ್ ಉಮ್ಕಾಳಾಯ್ಲ್ಯಾರ್ ಪುರೊ. ದುಸ್ರ್ಯಾ ದಿಸಾ ಸಕಾಳಿಂ ಕೇರಳಾ ಎಕ್ಸ್'ಪ್ರೆಸ್ ತುಮ್ಚ್ಯಾ ಘರಾ ಮುಕಾರ್ ಉಬೆಂ.
ಅಶೆಂಚ್ ಫಿಸಿಯೊ ಥೆರಪಿ, ಮಸ್ಸಾಜ್ (ತ್ಯಾಂಪಣ್ಣ ಭಂಡಾರಿಚೆಂ ದುಕಿಚೆಂ ತೇಲ್ ರಗಡ್ಚೆಂ), ಹೋಟೆಲ್ ಮೆನೆಜ್‍ಮೆಂಟ್, ಫ್ಯಾಶನ್ ಡಿಸಾಯ್ನಿಂಗ್, ಬ್ಯೂಟಿಶಿಯನ್ ವಾ ಹೆರ್ ಕಸ್ಲೆಯಿ ಮಟ್ವೆ ಆವ್ದೆಚೆ ಕೋರ್ಸ್ ಸುರು ಕರುನ್ ಲಾಂಬ್ ಆವ್ದೆಕ್ ಫಾಯ್ದೊ ಜೊಡ್ಯೆತ್.
ಪಾರಾ ಮೆಡಿಕಲ್ ಕೋರ್ಸ್ ಮ್ಹಣೊನ್ ಲ್ಯಾನ್ ಟೆಕ್ನಿಶಿಯನ್, ಎಕ್ಸ್'ರೇ ಟೆಕ್ನಿಶಿಯನ್ ತಸಲೆ ಕೋರ್ಸ್ ಸುರು ಕರುನ್‍ಯೀ ಪಯ್ಶೆ ಕರ್ಯೆತ್.
ಬಿ.ಎಸ್ಸ್. (ಆಗ್ರಿಕಲ್ಚರ್) ಸುರು ಕರುನ್ ವಿದ್ಯಾರ್ಥಿಂಕ್ ಕಣ್ಗಿ ಲಾಂವ್ಕ್ ಆನಿ ಆಳ್ಮಿಂ ಕಿರ್ಲಾಂವ್ಕ್ ಶಿಕವ್ಯೆತ್. ಶಿವಾಯ್ ಸಾವ್ಲ್ಯಾಂಚೆ ರೂಕ್ ಲಾಂವ್ಚಿ ತರ್ಬೆತಿ ದಿವ್ಯೆತ್. ಮಾಸ್ಳಿ ಪೊಸ್ಪಾವಿಶಿಂಯಿ ಕೋರ್ಸ್ ಸುರು ಕರುನ್ ದೆಂಕ್ಳೆ, ಸುಂಕ್ಟಾಂ, ಕುರ್ಲ್ಯೊ, ಎರ್ಲ್ಯೊ. ಕುಬೆ.... ಇತ್ಯಾದಿ ಪೊಸ್ಚೆವಿಶಿಂ ಮಾಹೆತ್ ದಿವ್ಯೆತ್. ಎಮ್.ಬಿ.ಎ. (ಫೈನಾನ್ಸ್) ಕೋರ್ಸ್ ಸುರು ಕರ್ನ್ ಫೈನಾನ್ಸ್ ಕಂಪ್ಣಿ ಕಶಿ ಸುರು ಕರುನ್ ಕಶಿ ಬುಡವ್ಯೆತ್ ಮ್ಹಳ್ಳಿ ತರ್ಬೆತಿ ದಿವ್ಯೆತ್.
ಫ್ಯಾಶನ್ ಡಿಸಾಯ್ನಿಂಗ್ ಕೊರ್ಸಾಂತ್ ಪಾಟ್ಲ್ಯಾನ್ ವಾ ಮುಕ್ಲ್ಯಾನ್ ಉಗ್ತಿ ಬ್ಲಾವ್ಜ್ ಶಿಂವ್ಚೆವಿಶಿಂ, ಪಾಟ್ಲ್ಯಾನ್, ಮುಕ್ಲ್ಯಾನ್ ವಾ ದೆಗೆನ್ ಚಿರ್'ಲ್ಲೆ ಸ್ಕರ್ಟ್ ಶಿಂವ್ಚೆವಿಶಿಂ ತರ್ಬೆತಿ ದಿವ್ಯೆತ್. ಹ್ಯಾ ಕೊರ್ಸಾಚೆ ಉಗ್ತಾವ್ಣೆಕ್ ಮಲ್ಲಿಕಾ ಶೆರಾವತ್, ಬಿಪಾಶಾ ಬಸು ವ ಸಾಧ್ಯ್ ಜಾಲ್ಯರ್ ಸನ್ನಿ ಲಿಯೋನಾಕ್ ಆಪವ್ಯೆತ್.
ಕೊರೊಡಾಂನಿ ಪಯ್ಶೆ ಆಸ್ಲ್ಯಾರ್ ಏಕ್ ಆಸ್ಪತ್ರ್ ಉಗ್ತಿ ಕರ್ಯೆತ್. ಪಿಡೇಸ್ತ್ ಮೆಳಾನಾಂತ್ ತರ್ ರಿಕ್ಷಾ ಡ್ರಾಯ್ವರಾಂಕ್ ಸಾಂಗ್ಲ್ಯಾರ್ ಜಾಲೆಂ. ತೆ ಬೊರ್‍ಯಾ ಸಾಮಾರಿಯಾಗಾರಾ ಭಾಶೆನ್ ರಸ್ತ್ಯಾರ್ ಅವ್ಘಡಾಕ್ ಸಾಂಪಡ್ಲಲ್ಯಾಂಕ್ ಶೀದಾ ವ್ಹರುನ್ ಆಸ್ಪತ್ರೆಂತ್ ದಾಖಲ್ ಕರ್ತೆಲೆ ಆನಿ ರಿಸೆಪ್ಶನಾಕಡೆಂ ವಚೊನ್ ತಾಂಚೆಂ 'ಇನಾಮ್' ಘೇವ್ನ್ ಚಲ್ತಲೆ.
ಇಂಜಿನಿಯರಿಂಗ್ ಆನಿ ಮೆಡಿಕಲ್ ಕೊಲೆಜ್ ಸುರು ಕೆಲ್ಯಾರ್ ಲೊಟ್ರೆಚೆಂ ಬಂಪರ್ ಇನಾಮ್ ಮೆಳ್‍ಲ್ಲೆಪರಿ. ಮೆಡಿಕಲ್ ಕೊಲೆಜೆಂನಿ ಎಮ್.ಬಿ.ಬಿ.ಎಸ್. ಸೀಟ್ ಮೆಳಾಜೆ ತರ್ ಭರ್ತಿ ಚಾಳೀಸ್ ಲಾಕ್ ಮೆಜಿಜೆ. ಪುಣ್ ಎಮ್.ಬಿ.ಬಿ.ಎಸ್. ದಾಕ್ತೆರಾಂ ಪ್ರಾಸ್ ಚಡ್ ಬಿ.ಎಸ್ಸಿ. ನರ್ಸಾಂ ಜೊಡ್ತಾತ್. ದೆಕುನ್ ಎಮ್.ಡಿ. ಕರಿಜೆ ತರ್ ಪರ್ತ್ಯಾನ್ ಪನ್ನಾಸ್ ಲಾಕ್ ಕಾಡ್ನ್ ದವ್ರಿಜೆ. ಮೆಡಿಕಲ್ ಕೊಲೆಜಿಂನಿ ಶೀದಾ ಗೆಲ್ಯಾರ್ ಸೀಟ್ ಮೆಳಾನಾ ದೆಕುನ್ ಖಂಚಾಯೀ ಎಕಾ ಮಲೆಯಾಳಿ ಏಜೆಂಟಾಕ್ ಧರ್ಲ್ಯಾರ್ ಬೊರೆಂ.
ಇಂಜಿನಿಯರಿಂಗ್ ಕೊಲೆಜಿಂನಿ ಸೀಟ್ ಮೆಳ್ತಾ. ವಿದ್ಯಾರ್ಥಿಂಕ್ ಅಂಕ್ ಉಣೆ ಆಸ್‍ಲ್ಲೆ ತಿತ್ಲೆಂ ಡೊನೇಶನ್ ಚಡ್. ಹೊಟೆಲ್ ಮೆನೆಜ್‍ಮೆಂಟ್ ಕೋರ್ಸ್ ಸುರು ಕರ್ನ್ ವಿದ್ಯಾರ್ಥಿಂಕ್ ಕಾಜಾರಾಂಚ್ಯಾ ಕೆಟರಿಂಗಾಕ್ ಧಾಡ್ಯೆತ್. ಕೆಟರಿಂಗ್ ನಾತ್‍ಲ್ಲ್ಯಾ ವೆಳಾರ್ ತಾಂಕಾಂ ಇಡ್ಲ್ಯೊ ಉಕ್ಡುಂಕ್, ಗುಳ್ಳ ಪೋಡಿ, ದೀಗುಜ್ಜೆ ಪೋಡಿ, ಕೆರೆಂಗ್ ಪೋಡಿ, ನೀರುಳ್ಳಿ ಬಜೆ, ಮೆಣಸಿನ ಬಜೆ, ಗೋಳಿ ಬಜೆ, ಬಿಸ್ಕುಟ್ ಆಂಬಡೆ, ಬಟಾಟೆ ಆಂಬಡೆ, ನೆಯ್ಯಪ್ಪ, ಉತ್ತಪ್ಪ... ಇತ್ಯಾದಿ ಭಾಜುಂಕ್ ಆನಿ ಸಜ್ಜಿಗೆ-ಬಜಿಲ್ ತಯಾರ್ ಕರುಂಕ್ ಶಿಕವ್ಯೆತ್.
ಐ.ಟಿ.ಐ. ವಾ ಪೊಲಿಟೆಕ್ನಿಕ್ ಸುರು ಕರುನ್ ವಿಮಾನ್ ಉಬಂವ್ಚೆಂ ಕಶೆಂ? ರೇಯ್ಲ್ ಸೊಡ್ಚೆಂ ಕಶೆಂ? ವಾ ತಾರುಂ ವ್ಹರ್ಚೆಂ ಕಶೆಂ? ಮ್ಹಳ್ಳೆವಿಶಿಂ ತರ್ಬೆತಿ ದಿವ್ಯೆತ್.
ಕಂಪ್ಯೂಟರ್ ಶಿಕ್ಪಾ ಕೇಂದ್ರಾಂ ಸುರು ಕರ್ನ್ 'ಜನೆಲಾಂ' (ವಿಂಡೋಸ್) ಉಗ್ತಿಂ ಕರ್ಚೆವಿಶಿಂ ಮಾಹೆತ್ ದಿವ್ಯೆತ್. ಸೋಫ್ಟ್'ವೇರ್, ಹಾರ್ಡ್'ವೇರ್, ನೆಟ್‍ವರ್ಕಿಂಗ್ ಇತ್ಯಾದಿ ಕೋರ್ಸ್ ಸುರು ಕರುನ್ ಸರ್ಟಿಫಿಕೆಟಿ ವಾಂಟ್ಯೆತ್.
ಶಿಕ್ಪಾ ಶೆತಾಂತ್‍ಚ್ ಮರ್ಯಾದೆನ್ ಪಯ್ಶೆ ಕರಿಜೆ ಮ್ಹಳ್ಳೆಂ ಮನ್ ಆಸಾ ತರ್ ಖಂಚಾಯೀ ಸಾಂತಾ-ಸಾಂತಿಣೆಚ್ಯಾ ವಾ ಸಾಯ್ಬಿಣಿಚ್ಯಾ ನಾಂವಾರ್ ಏಕ್ ಇಂಗ್ಲಿಶ್ ಮಾದ್ಯಮ್ ಇಸ್ಕೊಲ್ ಸುರು ಕರಾ. 'ಕಾನ್ವೆಂಟ್ ಶಾಲೆ' ಮ್ಹಣೊನ್ ಅಕ್ರಿಸ್ತಾಂವ್ ಭುರ್ಗಿಂಯಿ ಡೊನೇಶನಾಚಿ ಪೊಟ್ಲಿ ಘೇವ್ನ್ ಯೆತಾತ್.
ಟ್ಯುಟೋರಿಯಲ್ ವಾ ಕೋಚಿಂಗ್ ಕ್ಲಾಸಿ ಸುರು ಕೆಲ್ಯಾರ್ ಪಾಂಚ್ ವರ್ಸಾಂ ಭಿತರ್ ಸ್ವಂತ್ ಘರ್ ಆನಿ ಕಾರ್ ಘೆವ್ಯೆತ್. ಪತ್ರಾಂತ್ ಜಾಯ್ರಾತಾಂ ದಿತಾನಾ ಕಮಲಾಕ್ ಅಂಕಗಣಿತಾಂತ್ 98%, ಬಸವಾಕ್ ಫಿಸಿಕ್ಸಾಂತ್ 97%, ಆನಿ ಫಿಲೋಮಿನಾಕ್ ಕೆಮಿಸ್ಟ್ರಿ೦ತ್ 95% ಮ್ಹಣ್ ಕೋಣಾ ಕೊಣಾಚ್ಯೊ ಫೊಟೊ ಛಾಪ್ಲ್ಯಾರ್ ಜಾಲೆಂ.
ಆನ್ಯೇಕ್ ಫಾಯ್ದ್ಯಾಚೆಂ ಉದ್ಯಮ್ ಮ್ಹಳ್ಯಾರ್ ಲೇಡಿಸ್ ಹೊಸ್ಟೆಲ್ ವಾ ಪೇಯಿಂಗ್ ಗೆಸ್ಟ್ (ಪಿಜಿ). ಮಾರ್ಕೆಟಿಕ್ ವಚೊನ್ ಭರ್ಶಿಚಿ ಮಾಸ್ಳಿ, ದೊಳೆ ತಾಂಬ್ಡೆ ಜಾಲ್ಲಿಂ ಸೊಂರ್ಗುಲಾಂ ವಾ ಇಸೊಣ್ ಹಾಡ್ನ್ ಬರಿಶಿ ಕಡಿ ಕೆಲ್ಯಾರ್ ಜಾಲೆಂ. ಘರ್ಚ್ಯಾ ಮನ್ಶಾಂಚೊ ಜೆವ್ಣಾಚೊ ಖರ್ಚ್ ಕಸೊಯಿ ವೆತಾ, ಶಿವಾಯ್ ಮಹಿನ್ಯಾ ಮಹಿನ್ಯಾಂಕ್ ಬ್ಯಾಂಕ್ ಬೆಲೆನ್ಸ್'ಯೀ ವಾಡೊನ್೦ಚ್ ವೆತಾ.
ಇತ್ಲ್ಯೊ ಸಕ್ಕಡ್ ಬಿಜ್ನೆಸ್ ಐಡಿಯಾ ಆಸ್‍ಲ್ಲೊಂ ಹಾಂವ್ ಕಿತ್ಯಾಕ್ ಬಿಜ್ನೆಸ್ ಸುರು ಕರಿನಾ ಮ್ಹಣ್ ವಿಚಾರುಂಕ್ ಫುರೊ ತುಮಿ... ಆಮ್ಚೆ ಸಮಾಜೆಂತ್ ಕನ್ಸಲ್ಟೆಂಟ್ ಉಣೆ ಆಸಾ. ದೆಕುನ್ ವೆಗಿಂಚ್ ಹಾಂವ್ ಏಕ್ ಕನ್ಸಲ್ಟೆನ್ಸಿ ಸುರು ಕರ್ಚೆವಿಶಿಂ ಚಿಂತುನ್ ಆಸಾಂ.
Tags:
CGS Taccode, Konkani Humour, Vinod, Comedy, Konkani Business, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/9/2018 ಮಂಗಳೂರು ಸಿಲ್ವಂಗಾರ್ ಬೇಕರಿ...
-
10/30/2017 ನತಲಾಂಕ್ ಶಾಂತೆ ಖೆಳ್ ...
-
10/9/2017 ಆಮ್ಚೆ ಮನಿಸ್...
-
9/13/2017 ಶಾಂತಿ ಖಾತಿರ್ ಸ್ಪರ್ದೆ...
-
8/7/2017 ಆಶೆಂ ಏಕ್ ಸಂದರ್ಶನ್...
-
8/3/2017 ಹೆಂ ಮೆಲ್ಲೆಂ ಖಂಯ್ ಥಾವ್ನ್ ಆಯ್ಲೆಂ?...
-
7/19/2017 ವಿನ್ಸಿಚ್ಯೊ ಭಯ್ಣಿಂ...
-
6/8/2017 ನವಿಂ ನವಿಂ ಉದ್ಯಮಾಂ......
-
5/18/2017 ಕಷ್ಟ್ ಆಯ್ಲ್ಯಾತ್...
-
4/20/2017 ಹನಿಮೂನ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.