From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಸಯ್ರಿಕ್ ಸರ್ಗಾರ್ ಘಡ್ಚಿ
Tuesday, June 5, 2018
ಕೆನರಾ ಕೊಂಕಣಿ ಕಾಥೊಲಿಕಾಂಚೆ ಲಗ್ನಾ ಸಂಪ್ರದಾಯ್ - 1 :
ಆಮ್ಚೊ ಕೆನರಾ ಕ್ರೀಸ್ತಾಂವ್ ಲೋಕ್ ಚಡ್ ಕರುನ್ ಕ್ಶಶಿಕ್ ಜಾವ್ನಾಸ್‌ಲ್ಲೊ. ಹಿತಲ್, ಗಾದೆ, ತೋಟ್, ಕುಮೆರ್, ಗುಡೊ ತಸಲಿ ಫಸಲ್ ದಿಂವ್ಚಿ ಭುಂಯ್ ಘೊಳ್ತಾಲೆ ಆನಿ ಕುಟಮ್ ಪೊಸ್ತಾಲೆ ಜಾಲ್ಲ್ಯಾನ್ ಸ್ತ್ರೀಯಾಂಕ್‌ಯೀ ಗಾದ್ಯಾ-ಶೆತಾ-ತೊಟಾಚ್ಯಾ ಕಾಮಾಕ್ ಘಾಲ್ತಾಲೆ. ಚೆಡ್ಯಾಂಕ್ ವೀಸ್ ವರ್ಸಾಂ ಭರ್ಚ್ಯಾ ಫುಡೆಂಚ್ ಕ್ಶಶೆ ಕಾಮಾಕ್ ಸಹಾಯ್ ಕರ್ಚ್ಯಾ ಖಾತಿರ್ 'ಘರ್ ಕಾಮಾಕ್ ಜಣ್' ಮ್ಹಣ್ ಚೆಡ್ಯಾಕ್ ಕಾಜಾರ್ ಕರವ್ನ್ ಘರಾಂತ್ ಚೆಡುಂ ಹಾಡಂವ್ಚೆಂ ಆಸ್‌ಲ್ಲೆಂ. ಘರಾಂತ್ ಚೆಡ್ಯಾಚಿ ಆವಯ್ ಆಸ್ಲ್ಯಾರೀ ನವಿ ಹೊಕಲ್ ಜಾವ್ನ್ ಆಯಿಲ್ಲೆಕ್ ಘರ್ಚೊ ಹಾರ್-ಭಾರ್ ಚಲಂವ್ಕ್ ದಿತಾಲಿಂ. ಚಲಿ 'ವ್ಹಡ್' ಜಾಲಿ ತರ್ ತಾಚ್ಯಾ ವ್ಹಡಿಲಾಂಕ್ ತಿಕಾ ಕಾಜಾರ್ ಕರ್ಚಿ ಖಂತ್ ಸುರು ಜಾತಾಲಿ. ಅಶೆಂ ತೆರಾ-ಚವ್ದಾ ವರ್ಸಾಂ ಭರ್ತಾನಾಂಚ್ ಚೆಡ್ವಾಕ್ ಸಯ್ರಿಕ್ ಸೊದುನ್ ಕಾಜಾರ್ ಕರಯ್ತಾಲೆ ಜಾಲ್ಲ್ಯಾನ್ ಚವ್ದಾ ವರ್ಸಾಂ ಪ್ರಾಯೆರ್‌ಚ್ ಸಬಾರಾಂಚ್ಯೊ ನವ್ಯೊ ಹೊಕ್ಲೊ ನವ್ರ್ಯಾ ಘರಾ 'ಘೊಳುಂಕ್' ಲಾಗ್ತಾಲ್ಯೊ. ಹಿತ್ಲಾಂತೀ ಕಾಮ್ ಕರುನ್ ಘರ್ಚ್ಯಾ ರಾಂದ್ಪಾ-ನಿತಳಾಯೆಕೀ ತಿಣೆಂಚ್ ಮಾತೆಂ ಮಾರಿಜೆ ಆಸ್ಲೆಂ. ಪೂಣ್ ಚಲಿಯೆನ್ 'ವ್ಹಡ್' ಜಾಲ್ಯಾ ಶಿವಾಯ್ ತಿಕಾ ನವ್ರ್ಯಾ ಕಡೆನ್ ಉಲಂವ್ಕ್ ಮಾತ್ರ್ ಸೊಡಿನಾತ್‌ಲ್ಲೆ. ರಾತ್ಚೆಂ ತೊ ಘರ್ಚ್ಯಾ ಸೊಪ್ಯಾರ್ ನಿದ್ತಾಲೊ ತರ್ ತಿಕಾ ಬಂದ್ ಬಾಗ್ಲಾ ಭಿತರ್ ಸಾಲಾಂತ್ ಮಾಂಯ್ ಸರ್ಶಿನ್ ಮಾಂದ್ರಿ ಘಾಲ್ತಾಲಿಂ.
ಕೆನರಾ ಕೊಂಕಣಿ ಕಾತೊಲಿಕ್ ಕುಟ್ಮಾಂತ್ 'ಚೆಡ್ಯಾನ್ಂಚ್ ಖುದ್ದ್ ಜಾವ್ನ್ ಸಯ್ರಿಕ್ ಸೊಧ್ಲಿ ತರ್ ತಾಂಚೆಂ ಲಗ್ನಾ ಜಿವಿತ್ ಸುಫಳ್ ಜಾಯ್ನಾ' - ಮ್ಹಣ್ ಆದ್ಲೆ ಸಬಾರ್ ಕ್ರೀಸ್ತಾಂವ್ ಪಾತ್ಯೆತಾಲೆ. ದೆಕುನ್ ಸಯ್ರಿಕ್ ವ್ಹಡಿಲಾಂನಿಂ ಸೊದ್ಚಿ ಆಸ್‌ಲ್ಲಿ. ನವ್ರ್ಯಾ ವರ್ನಿ ಹೊಕಲ್ ಪ್ರಾಯೆನ್ ಚಾರ್-ಸ ವರ್ಸಾಂ ಲ್ಹಾನ್ ಜಾಯ್ಜೆ ಆಸ್‌ಲ್ಲಿ. ಧಾ ವರ್ಸಾಂ ತಫಾವತ್‌ಯೀ ಆಸ್ತಾಲೊ. ಆತಾಂ ಎಕಾಚ್ ಪ್ರಾಯೆಚಿಂ ಜಾತಾತ್, ಚೆಡುಂ ಪ್ರಾಯೆನ್ ವ್ಹಡ್‌ಯೀ ಆಸ್ತಾ. ಸಯ್ರಿಕ್ ಸೊದ್ತಾನಾ ಬಾಮುಣ್, ಚಾರೊಡಿ, ಶೂದ್ರ್ ಆನಿ ಗೌಡ ಕುಳಿಯಾಂ ಮದೆಂ ಕುಳಿಯೆ ಭಾಯ್ರ್ ಕರಿನಾತ್‌ಲ್ಲೆ. ಆತಾಂ ಧರ್ಮ್ ಜಾತ್, ಕುಳಿ ಪಳಯ್ನಾಂತ್. ಚೆಡುಂ ಚೆಡ್ಯಾಚೆಕೀ ದೋನ್ ಇಂಚಾಂ ಪುಣೀ ಮಟ್ವಿ ಆಸಾಜೆ ಆಸ್‌ಲ್ಲಿ. ಆತಾಂ ಲಾಂಬಾಯೆಕ್ ಚಡ್ ಮಹತ್ವ್ ದೀನಾಂತ್. ಚೆಡ್ವಾಕ್ ರಾಂದಾಪ್ ಕಳಿತ್ ಆಸಾಜೆ ಆಸ್‌ಲ್ಲೆಂ, ಆತಾಂಚ್ಯಾ ಸಬಾರ್ ಚೆಡ್ವಾಂಕ್ ಶಿತ್ ಕರುಂಕೀ ಕಳಿತ್ ಆಸಾನಾ! ಶಿಕಪ್, ಸೊಬಾಯ್ ಪಳಯ್ನಾತ್‌ಲ್ಲಿಂ, ಪೂಣ್ ಗೂಣ್ ಬರೆ ಆಸಾಜೆ ಆಸ್‌ಲ್ಲೆ. ಆದ್ಲ್ಯಾ ಪಾತ್ಯೆಣೆ ಪ್ರಕಾರ್ ಖಾಸ್ ಸಂಬಂದಿಕಾಂ ಎಕಾಮೆಕಾ ಲಾಗಿಂ ಲಗಿನ್ ಜಾಯ್ನಾತ್ಲಿಂ. ಆದಿಂ ತ್ಯಾಚ್ ವಾಡ್ಯಾಂತ್ಲ್ಯಾ ಚೆಡ್ವಾ ಲಾಗಿಂ ಕಾಜಾರ್ ಕರುನ್ ಘೆಂವ್ಕ್ ಒಪ್ವಾನಾತ್‌ಲ್ಲೆ. ಕಾರಾಣ್ - ಏಕ್‌ಚ್ ಗೋತ್ರ್ ವಾ ಸಂಬಂದಿತ್ ಜಾಂವ್ಕ್ ಪುರೊ - ಮ್ಹಣ್ ದುಬಾವ್ ಕರ್ತಾಲೆ. ತಿ ವಿದವ್ ತರ್ ತಿಕಾ ಪರತ್ ಕಾಜಾರ್ ಕರಿಂಚ್ ನಾತ್‌ಲ್ಲೆ. ಆತಾಂ ವಿದವ್ ಸ್ತ್ರೀಯೆಕ್ ಪುನರ್ ಲಗ್ನ್ ಜಾಂವ್ಚ್ಯಾಕ್ ಸಹಾಯ್ ಕರ್ತಾತ್. ಭಾರತಾಂತ್ ಆತಾಂ ಚಲಿಯೆಕ್ ಕಾಜಾರ್ ಜಾಯ್ಜೆ ತರ್ ಕಾನೂನಾ ಪ್ರಕಾರ್ ಆಟ್ರಾ ವರ್ಸಾಂ ಭರಾಜೆ ಆನಿ ಚಲ್ಯಾಕ್ 21 ವರ್ಸಾಂ ಜಾಯ್ಜೆ. ಪಯ್ಲೆಂಚ್ ಏಕ್ ಪತಿ ವಾ ಪತಿಣ್ ಆಸ್ಲೆಲ್ಯಾನ್ ದುಸ್ರ್ಯಾ ಕಡೆನ್ ಪರತ್ ಕಾಜಾರ್ ಜಾಂವ್ಚೆಂ ಆಡ್ವಾರ್ಲಾಂ. 'ರೆಡ್ಯಾಕ್ ಗಳ್ ಹಾಡ್ ಸೆಜ್ರಾಚಿ, ಚಲಿ ಹಾಡ್ ವಾಡ್ಯಾ ಭಾಯ್ಲಿ' ಮ್ಹಣ್ತಾಲೆ. ಆತಾಂ ಶೆಜ್ರಾ ಘರ್ಚಿಂಯ್ ಮೊಗಾರ್ ಪಡೊನ್ ಕಾಜಾರ್ ಜಾತಾತ್. ದೆಕುನ್ಂಚ್ 'ಸಯ್ರಿಕ್ ಘಡ್ಚಿ ತಿ ಸರ್ಗಾರ್' ಮ್ಹಣ್ತಾತ್!
ಚಲ್ಯಾ-ಚಲಿಯೆಚೊ ಸಂಬಂದ್, ಜಾಂವ್ ತೊ ವ್ಹಡಿಲಾಂ ದ್ವಾರಿಂ ಸಯ್ರಿಕ್ ಸೊದುನ್ ವಾ ಮೊಗಾರ್ ಪಡೊನ್, ಫೇಸ್ ಬುಕಾರ್ ಪಳೆವ್ನ್ ವಾ ಇಗರ್ಜೆಂತ್ ಮಿಸಾ ವೆಳಾರ್ ದೊಳೊ ಮಾರ್ನ್ ..... ತೊ ಖರಾರಾ ದ್ವಾರಿಂ ಥಿರ್ ಜಾತಾ, ಆನಿ ಲಗ್ನಾ ಬಾಂದಾಂತ್ ಎಕ್ವಟೊನ್ ಘಟ್ ಜಾತಾ. ಸಯ್ರಿಕ್ ಘಟ್ ಜಾಲಿ ತರ್ ಹೊಕ್ಲೆ ಆನಿ ನವ್ರ್ಯಾಚ್ಯಾ ಕುಟ್ಮಾ ಮದೆಂ 'ಸೊಲ್ಲೊ' ಕರುಂಕ್ ಆಸ್ತಾ. ನವ್ರ್ಯಾಕ್ ಘೆವ್ನ್ ಖಾಸ್ ಥೊಡೆ ಆವಯ್-ಬಾಪಯ್ ಸಂಗಿಂ ಹೊಕ್ಲೆಕ್ ಪಳೆಂವ್ಕ್ ಹೊಕ್ಲೆ ಘರಾ ವೆತಾಲೆ ಆನಿ ಖರಾರಾಕ್ ದೀಸ್ ದವರ್ತಾಲೆ. ಹ್ಯಾ ವೆಳಾರ್ ದೋತ್ ಆನಿ ದೆಣೆಂ ವಿಶಯ್ ಇತ್ಯರ್ಥ್ ಜಾಂವ್ಕ್ ಆಸ್ತಾಲೆ.
ಹಿಂದೂ ರಿವಾಜೆಂ ಪ್ರಕಾರ್ ಸಯ್ರಿಕ್ ಘಟ್ ಜಾತಚ್ ಹೊಕ್ಲೆ-ನವ್ರ್ಯಾಚೆಂ 'ನಿಶ್ಚಯ' ದೊನೀ ಪಾಡ್ತಿಂಚ್ಯಾ ಧಾ-ಧಾ ಜಾಣಾಂ ಸಾಮ್ಕಾರ್ ಹೊಕ್ಲೆಚ್ಯಾ ಘರಾ ಚಲ್ತಾ. ಹೊಕಲ್ ನವ್ರ್ಯಾಕ್ ಭಾಂಗ್ರಾಳಿ ಮುದಿ ಘಾಲ್ತಾ ತರ್ ನವ್ರೊ ಹೊಕ್ಲೆಕ್ ಕಾಪಾಡ್ ಇನಾಮ್ ದಿತಾ. ಮಡಿಕೇರಿ, ಹಾಸನ್, ಶಿವಮೊಗ್ಗಾ, ಮಯ್ಸೂರ್, ದಾವಣಗೆರೆ, ಬೆಂಗಳೂರ್ ತೆಣೆಂ ಫುಲಾಂಚಿ ಬೊಶಿ ಅದಲ್-ಬದಲ್ ಕರ್ತಾನಾ ಖರಾರ್ ಜಾಲ್ಲೆಂ ಪತ್ರ್‌ಯೀ ದಸ್ಕತ್ ಕರ್ನ್ ಬದ್ಲವ್ನ್ ಘೆತಾತ್. ನವ್ರ್ಯಾನ್ ದಿಲ್ಲೆಂ ಕಾಪಾಡ್ ಹೊಕ್ಲೆನ್ ನ್ಹೆಸೊನ್ ಯೇವ್ನ್ ಸರ್ವಾಂಕ್ ವಂದನ್ ಕರುಂಕ್ ಆಸಾ.
ವಾಡ್‌ಲ್ಲ್ಯಾ ಚೆಡ್ವಾಕ್ ಸಯ್ರಿಕ್ ಜಾತಾ ಪರ್ಯಾಂತ್ ಅದಿಂ ಚಲಿ ಕೆಸಾಂಚೆರ್ ಫುಲಾಂ ಮಾಳ್ಳ್ಯಾರೀ ಆಬೊಲಿಂ ಮಾಳಿನಾತ್‌ಲ್ಲಿ. ಆದಿಂ 'ಬಾರಾ ಸರೊನ್ ತೆರಾ ಲಾಗ್ಲಿಂಗೆ ಮಾಂಯ್, ಕಾಜಾರ್ ಕರ್‌ಗೆ ಮ್ಹಾಕಾ' ತಸಲೆಂ ಪದ್ ಗಾಯ್ತಾಲಿಂ ತರೀ "ಮ್ಹಾಕಾ ಸಯ್ರಿಕ್ ಸೊದ್ ಮಾಂಯ್" ಮ್ಹಣ್ಚೆ ತಿತ್ಲೆಂ ಧಯ್ರ್ ಚೆಡ್ವಾಕ್ ಬಿಲ್ಕುಲ್ ಆಸಾನಾತ್‌ಲ್ಲೆಂ. ಚಲಿ ಆಪುಣ್ ಜಾವ್ನ್ ಸಯ್ರಿಕ್ ಸೊದಿನಾತ್‌ಲ್ಲಿ. ವಾಡ್‌ಲ್ಲ್ಯಾ ಚೆಡ್ವಾಕ್ ಸಯ್ರಿಕ್ ಸೊದುಂಕ್ ಚೆಡ್ವಾಚೊ ಬಾಪಯ್ ಹೆಣೆಂ-ತೆಣೆಂ ವೆವೆಗ್ಳ್ಯಾ ಫಿರ್ಗಜೆಂಕ್ ವಚೊನ್ ಕೊಣಾ ಘರಾ 'ವಾಡ್‌ಲ್ಲೊ ಪಾಡ್ಕೊ' ಆಸಾ ತೆಂ ಸಮ್ಜೊನ್ ಪಳೆವ್ನ್ ದವರ್ತಾಲೊ. ವೆಚ್ಯಾಕ್ ಮೋಟರ್ ವಾಹನಾಂ ನಾಸ್ಲೆಲ್ಯಾನ್ ಚಮ್ಕೊನ್ಂಚ್ 'ವಚೊನ್ ಬಾರಾ ಜೊಡಿ ವ್ಹಾಣೊ' ಝರಯ್ತಾಲೊ. ಸುಮಾರ್ ವರ್ಸಾಂ ಪುರ್ವಿಂ ಖರಾರ್ ಜಾಂವ್ಚ್ಯಾ ಚಲಿಯೆ ವಾ ಚಲ್ಯಾಚ್ಯಾ ಘರಾ ಬಾಗ್ಲಾರ್ ಘಡಾಯ್ ಘಾಲಿನಾತ್‌ಲ್ಲೆ ದೋನ್ ಕೆಂಳ್ಬೆ ವಾ ಮೊಕೆ ಉಬಾರುನ್ 'ಹ್ಯಾ ಘರಾ ಏಕ್ ಪಾಡಿ/ಪಾಡೊ ಆಸಾ, ಗಳ್ ಆಸ್ಲ್ಯಾರ್ ಸಾಂಗಾ' ಮ್ಹಣ್ ನಿಶಾನೆನ್ ತಿಳ್ಸಿತಾಲೆ ವಾ ತಾಕಾ/ತಿಕಾ 'ಖರಾರ್ ಜಾಂವ್ಚ್ಯಾರ್ ಆಸಾ' ಮ್ಹಣ್ ಲೊಕಾಕ್ ಕಳಾಶೆಂ ಕರ್ತಾಲೆ. ಬಾಪಯ್ ಸಯ್ರಿಕೆ ಮ್ಹಾಲ್ಯಾ/ಮ್ಹಾಲಿಣೆ ಕಡೆನ್ ಆಪ್ಲ್ಯಾ ಭುರ್ಗ್ಯಾಕ್ ಏಕ್ 'ಗಳ್' ಸೊದುಂಕ್ ಅಡ್ದೊಸ್ ಮಾಗ್ತಾಲೊ. ಸಯ್ರಿಕೆಚೊ ಮ್ಹಾಲೊ ವಾ ಮ್ಹಾಲಿಣ್ 'ಏಜಂಟ್' ಜಾವ್ನ್ ವಾವುರ್ತಾಲಿಂ. ತರ್ನಾಟ್ಯಾಂಚ್ಯಾ ವ್ಹಡಿಲಾಂ ಕಡೆನ್ ಉಲಯ್ತಾಲಿಂ ಆನಿ ಬೋವ್ ವಾಂವ್ಟ್ ಕಾಡುನ್ ಸಯ್ರಿಕ್ ಜಮಯ್ತಾಲಿಂ. ಸಯ್ರಿಕ್ ಘಟ್ ಜಾಲಿ ತರ್ ಮ್ಹಾಲ್ಯಾ/ಮ್ಹಾಲಿಣೆಕ್ ಪಯ್ಶೆ, ವಸ್ತು ವಾ ವಸ್ತ್ರಾಂ ಇನಾಮ್ ಜಾವ್ನ್ ದಿತಾಲೆ. ಆತಾ'ತಾಂ ಆಳ್ಮ್ಯಾ ಪರಿಂ ಉದೆಲ್ಲೆ 'ಮ್ಯಾರಿಯೆಜ್ ಬ್ಯೂರೊ' ಆಸಾತ್ ಆನಿ ಥರಾವಳ್ ರಿತಿಚೆ 'ಫೀಸ್' ಘೆತಾತ್. ಚೆಡೊ ವಾ ಚೆಡುಂ ಖುದ್ 'ಇಂಟರ್ ನೆಟ್' ಸಹಾಯೆನ್ ಆಪ್ಲ್ಯಾ ಜಿಣಿಯೆ ಸಾಂಗಾತ್ಯಾ\ಸಾಂಗಾತಿಣಿಕ್ ಸೊದ್ತಾ! ಆಧುನಿಕ್ ಸಂಸಾರಾಂತ್ ಇಂಟರ್‌ನೆಟಾರ್, ಫೇಸ್ ಬುಕಾರ್ ವಾ ವಾಟ್ಸ್‌ಆಪ್ ಚೆರ್ ಪಳೆವ್ನ್, 'ಚ್ಯಾಟ್' ಕರುನ್ ಲಗ್ನಾಂ ನಿಘಂಟ್ ಜಾತಾತ್. ವ್ಹಡಿಲಾಂಕ್ ಪಾಪ್ ಹಾಂಚೆಂ ಕಾಜಾರ್ ಘಟ್ ಜಾಲ್ಯಾ ಉಪ್ರಾಂತ್‌ಚ್ ಕಳ್ತಾ ಆನಿ ತಾಣಿಂ ನಿರ್ವೊಗ್ ನಾಸ್ತಾಂ ಲಗ್ನಾಕ್ ವಪ್ವಾಜೆ ಪಡ್ತಾ.
ಸಯ್ರಿಕೆಚಿ ರಾಟಾವಳ್ ಸಗ್ಳಿ ಮ್ಹಾಲ್ಯಾ-ಮ್ಹಾಲಿಣಿನ್ ತಶೆಂ ಗುರ್ಕಾರಾನ್ ಪಳೆಂವ್ಕ್ ಆಸ್‌ಲ್ಲಿ. ಸಯ್ರಿಕ್ ಘಟ್ ಕರುಂಕ್ ನವ್ರ್ಯಾಗೆಲಿಂ, ಚಡ್ತಾವ್ ಬಾಪಯ್, ಸಯ್ರಿಕೆ ಮ್ಹಾಲೊ/ಮ್ಹಾಲಿಣ್ ಆನಿ ನವ್ರ್ಯಾಚೊ ಪೊದೊರ್ನ್ ಹೊಕ್ಲೆಗೆರ್ ವೆತಾಲೆ. ಪಯ್ಲೆಂ ಯೆವೆಂ-ದೆವೆಂ ಉಲವ್ಣೆಂ ಆಸ್‌ಲ್ಲೆಂ. ಹೊಕ್ಲೆಚೊ ಬಾಪಯ್ ದೋತ್ ಕಿತ್ಲಿ ದಿತಾ ಆನಿ ಭಾಂಗಾರ್ ಕಿತ್ಲೆಂ ಘಾಲ್ತಾ ತೆಂ ನಖ್ಖಿ ಕರುಂಕ್ ಆಸ್‌ಲ್ಲೆಂ. ನಿಗದಿತ್ ಕೆಲ್ಲಿ ದೋತ್ ಕಾಜಾರಾಚ್ಯಾ 15 ದಿಸಾಂ ಪಯ್ಲೆಂ ನವ್ರ್ಯಾಗೆರ್ ಹಾಡುನ್ ದೀಂವ್ಕ್ ಆಸ್‌ಲ್ಲಿ. ತ್ಯಾ ಪಯ್ಶ್ಯಾಂನಿಂ ತೊ ಹೊಕ್ಲೆಕ್ ಮಣಿಯಾಂಚೊ ಸರ್ ಕರ್ತಾಲೊ. ನಿಘಂಟ್ ಕೆಲ್ಲೆಂ ಭಾಂಗಾರ್ ರೊಸಾ ಪಯ್ಲೆಂ ನವ್ರ್ಯಾಗೆರ್ ಹಾಡುನ್ ದೀಂವ್ಕ್ ಆಸ್‌ಲ್ಲೆಂ. ದೋತ್ ಪಾವಿತ್ ಕರ್ಚ್ಯಾ ದಿಸಾ 'ಪಾನ್‌ಫೊಡ್-ಇಡೊ' ಬದ್ಲವ್ನ್ ಘೆತಾಲಿಂ. ಕೆನರಾ ಕ್ರೀಸ್ತಾಂವ್ ಘರಾಣ್ಯಾಂತ್ ಪಾನ್‌ಫೊಡಿಕ್ ಬರೊಚ್ ಮಾನ್ ಆಸ್ಲೊ. ಪೊಪ್ಳಾಚೆ ಬರೇ ಕರುನ್ ತಾಸುನ್ ಕೆಲ್ಲೆ ಫೊಡಿ ಕುಡ್ಕೆ, ಬರೀಶಿ ಕಸರ್/ಪಾನಾಂ, ಇಲ್ಲಿಶಿ ಧುಮ್ಟಿ ಅನಿ ಖಾಂವ್ಚೊ ಚುನೊ ಮಾಂಡುನ್ ದವರ್‌ಲ್ಲೆಂ ತಾಂಬ್ಯಾಚೆಂ ತಬಾಕ್ ಮುಕಾರ್ ಧರುಂಕ್ ವಾ ದವರುಂಕ್ ಆಸ್‌ಲ್ಲೆಂ. ತಬಾಕ್ ವೊಡ್ಡಾಯ್ತಾನಾ ದುಸ್ರ್ಯಾ ಹಾತಾಂತ್ ಪಿಯೆಂವ್ಚ್ಯಾ ಉದ್ಕಾಚೊ ಚೆಂಬು ಆಸಾಜೆ ಆಸ್‌ಲ್ಲೊ. 'ಪಾನ್ ಫೊಡ್ ಉದಕ್ ಆಯ್ಲೆಂ ಮ್ಹಣ್ತಾತ್' ಮ್ಹಣ್ ವ್ಹಡ್ ತಾಳ್ಯಾನ್ ಸಾಂಗ್ತಾನಾ ತಬಾಕ್ ಆನಿ ಚೆಂಬು ಸ್ವೀಕಾರ್ ಕರ್ನ್ 'ಪಾವ್ಲೆಂ ಮ್ಹಣ್ತಾತ್' ಮ್ಹಣ್ ಜಾಪ್ ದೀಜೆ ಆಸ್‌ಲ್ಲಿ. ಘರಾ ಭಿತರ್ ಆಯಿಲ್ಲ್ಯಾ ಸಯ್ರ್ಯಾಂಕ್ ಹೊ ಪಾನ್‌ಫೊಡ್ ಉದ್ಕಾಚೊ ಯೆವ್ಕಾರ್ ಮೆಳಾನಾ ತರ್ ರಾಗ್-ಶಿಣ್ ದವರ್ತಾಲೆ ಆನಿ ಝಗ್ಡೆಂಯ್ ಚಲ್ತಾಲೆಂ! ಆಜ್‌ಕಾಲ್ ಬೊಶಿಯೆಂತ್ ಚಾರ್ ಕಸರ್-ಪಾನಾಂ ಆನಿ ತೀನ್ ಪೊಪ್ಳಾಂ ದವರ್ನ್ ವೊಡ್ಡಾಯ್ತಾತ್! ಪೊಪಾಳ್ ಭೆತುನ್ ಫೊಡಿ ಕರುಂಕೀ ಫುರ್ಸತ್ ನಾ ವಾ ಕಳಿತ್ ನಾ ದಿಸ್ತಾ! ಧುಮ್ಟಿ-ಚುನೊ ಮಾಯಾಗ್ ಜಾಲಾ.
ಸಯ್ರಿಕ್ ಕೆಲೆಲ್ಯಾ ಮ್ಹಾಲ್ಯಾ ವಾ ಮ್ಹಾಲಿಣಿಕ್ ಮೊಲಾದಿಕ್ ಕಾಪಾಡ್ ಇನಾಮ್ ದಿತಾಲೆ. ಆತಾಂ ಸರ್ವ್ ಪಯ್ಶಾಂನಿಂ ಮೆಜ್ತಾತ್. ಸಬಾರ್ ಕಡೆನ್ ಮ್ಹಾಲ್ಯಾ-ಮ್ಹಾಲಿಣ್ಯಾಂನಿ ಇತ್ಲೆಚ್ ಮ್ಹಣ್ ಫೀಸ್ ದವರ್ಲ್ಯಾತ್.
ಸಯ್ರಿಕ್ ಘಟ್ ಜಾಲಿ ತರ್ ಲಗಿನ್ ಜಾಂವ್ಕ್ ಒಪ್ವೊನ್ ಘೆವ್ನ್ ರೆಸ್ಪೆರಾಕ್ ವೆಚ್ಯಾ ಪಯ್ಲೆಂ ಹೊಕಲ್ ಆನಿ ನವ್ರೊ ಸುರ್ವಿಲಿ ಭಾಸಾಭಾಸ್ ಚಲಯ್ಲ್ಯಾ ಉಪ್ರಾಂತ್ ಲೊಕಾ ಮುಕಾರ್ ಆಪ್ಣಾಚಿ ಲಗ್ನಾಚಿ ಖುಶಿ ದಾಕವ್ನ್ ಎಕಾಮೆಕಾ ಭಾಸ್ ದಿಂವ್ಚ್ಯಾಚೊ ಸಂಭ್ರಮ್ಂಚ್ ಖರಾರ್. ಖರಾರಾಚಿಂ ಪತ್ರಾಂ ದೊದೋನ್ ಸಾಕ್ಶಿಂ ಸಾಮ್ಕಾರ್ ಹೊಕ್ಲೆ-ನವ್ರ್ಯಾನ್ ದಸ್ಕತ್ ಕೆಲಿಂ ತರ್ ಸಯ್ರಿಕ್ ಘಟ್ ಜಾಲ್ಲಿ ತಿ ಥಿರ್ ಜಾತಾ.
--------------------------------------------------
ಯೆದೊಳ್ಚಿಂ ಲೇಕನಾಂ :
ಕಥಾ/ವಿಡಂಬನಾಂ :
ಕವಿತಾ :
Tags:
Canara Catholics Wedding Traditions, Marriages Made In Heaven, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
2/27/2021 ಹೆರೊಲ್ಪಿಯುಸ್: ಏಕ್ ಅವ್ಚಿತ್ ಭೆಟ್...
-
12/20/2020 ಯುವಜಣಾಂಕ್ ಪ್ರೇರಣ್ - ಜೆಸ್ಸಿಕಾ ಆನ್ನಾ ಲಿಝಾ...
-
12/6/2020 ಆಸ್ತ್ ........
-
11/25/2020 ಭಾರತಾಚಿಂ ಖಬ್ರೆ ಟಿವಿ ಚಾನೆಲಾಂ ಮರಣ್ ಪಾವ್ಲ್ಯ...
-
11/9/2020 ನಾಂವ್ ಬದಲ್ಲ್ಯಾನ್ ಗಾಂವ್ ಬದಲ್ನಾಂ...!...
-
10/17/2020 ಮಂಗ್ಳುರ್‌ಚೊ ಖ್ಯಾತ್ ಗ್ರಾಫೊಲೊಜಿಸ್ಟ್, ಸ್ಟೇ&...
-
-
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.