:: www.maibhaas.com - ಮಿರ್ಚಿ ಸಿಟಿ ::

ಖಂಚಾಯ್ ಎಕಾ ಹಳ್ಳೆಕ್ ಆಮಿ ಭೆಟ್ ದಿಲ್ಯಾರ್ ಜೆರಾಲ್ ರಿತಿನ್ ಆಮ್ಕಾಂ ಥಂಯ್ಚ್ಯಾ ಮಾತ್ಯೆಚೊ ವಾಸ್ ವ ಫುಲಾಂಚೊ ಪರ್ಮಳ್ ಸ್ವಾಗತ್ ಕರ್ತಾ. ಪುಣ್ ಹಾಕಾ ವ್ಯತಿರಿಕ್ತ್ ಜಾವ್ನ್, ಸಗ್ಳೊ ಗಾಂವ್ ತಾಂಬ್ಡ್ಯಾ ರಂಗಾಂತ್ ಬುಡೊನ್, ಘಾಟ್ ವಾಸ್ ಖಂಚಾಯೀ ಪುಣೀ ಗಾಂವಾ ಥಾವ್ನ್ ಯೇಂವ್ಕ್ ಸಾಧ್ಯ್ ಆಸಾಗೀ? ಪುಣ್ ಆಮ್ಚ್ಯಾ ಹ್ಯಾ ಗಾಂವಾಂತ್ ಸಾಧ್ಯ್ ಮ್ಹಣ್ತಾತ್, 'ಡೊಂಜಾ ಲಾಕೊಸ್ನಿಕಾ' ಮ್ಹಳ್ಳ್ಯಾ ಗಾಂವಾಚೊ ಲೋಕ್.

ಸೆರ್ಬಿಯಾ, ಯುರೋಪ್ ಭುಂಯ್‍ಖಂಡಾಚೊ ಏಕ್ ದೇಶ್. ಥಂಯ್ಚ್ಯಾ ಜಬ್ಲಾನಿಕಾ ಮ್ಹಳ್ಳ್ಯಾ ಜಿಲ್ಲ್ಯಾಂತ್ ಆಸ್ಚೊ ಗಾಂವ್‍ಚ್ ಲಾಕೊಸ್ನಿಕಾ. ಪಳೆಂವ್ಕ್ ಗೆಲ್ಯಾರ್ ಏಕ್ ಲ್ಹಾನ್ ಗಾಂವ್. ಪುಣ್ ಹ್ಯೆ ಎಕಾ ವಿಷ್ಯಾಂತ್ ಹೊ ಗಾಂವ್ ತ್ಯಾ ದೇಶಾಂತ್‍ಚ್ ಫಾಮಾದ್.

ಕಿತೆಂ ವಿಶೇಷ್?

ಹ್ಯಾ ಗಾಂವ್ಚೊ ಜನ್‍ಸಂಖೊ ಚಡುಣೆಂ ದೋನ್ ಹಜಾರ್. ಘರಾಂಕ್ ನಳೆ ಆನಿ ಧವೊ ಚುಣೊ ಕಾಡ್‍ಲ್ಲ್ಯೊ ವೊಣ್ತಿ ದೊಳ್ಯಾಂಕ್ ಪಳೆಂವ್ಕ್ ಬೋವ್ ಸೊಭ್ತಾತ್. ಪುಣ್ ಥಂಡಿಲ್ಯಾ ದಿಸಾಂನಿ ಹ್ಯಾ ಗಾಂವ್ಚಿ ಸೊಭಾಯ್ ವೆಗ್ಳಿಚ್. ಸಗ್ಳೊ ಗಾಂವಾಚ್ ಬದಲ್ತಾ.

ಕಿತೆಂ ವಿಶೇಷ್ ಮ್ಹಳ್ಯಾರ್, ಆಮ್ಚ್ಯಾ ಗಾಂವಾಂನಿ, ಮ್ಹಣ್ಜೆ 'ಧಾರಾವಾಡ ಪೇಡ', 'ಬಾರಕೂರು ಬದನೆಕಾಯಿ', 'ಮದ್ದೂರು ವಡೆ' ಆಸ್‍ಲ್ಲ್ಯಾ ಬರಿಂ ಹೊ ಗಾಂವ್ ಲೆಸ್ಕುವಾಕ್ ಮ್ಹಳ್ಳ್ಯಾ ನಾಂವಾಚ್ಯಾ ಮಿರ್ಸಾಂಗೆಚ್ಯಾ ಬೆಳ್ಯಾಕ್ ಫಾಮಾದ್. ಹಿ ಮಿರ್ಸಾಂಗ್ ಆಮ್ಚ್ಯಾ ಗಾಂವ್ಚ್ಯಾ ಲಂವ್ಗಾ ಆನಿ ಕೆಳ್ಯಾಚ್ಯಾ ಆಕಾರಾ ಬರಿಂ ವ್ಹಡ್ಲಿ ಜಾವ್ನಾಸಾ. ಮಿರ್ಸಾಂಗೆಚ್ಯಾ ಉತ್ಪತ್ತೆ ವಯ್ರ್ ತಾಂಚೆ ಜೀವನ್ ಅವಲಂಬಿತ್ ಜಾವ್ನಾಸಾ. ಚಡಾವತ್ ಜಾವ್ನ್ ಹ್ಯಾ ಗಾಂವ್ಚಿ ಸರ್ವಾಂ ಮಿರ್ಸಾಂಗ್ ಕರ್ನ್ ವಿಕುನ್‌೦ಚ್ ಜೀವನ್ ಸಾರ್ತಾತ್. ಥಂಡಿಲ್ಯಾ ದಿಸಾಂನಿ ಮಿರ್ಸಾಂಗೆಚೆ ಪೀಕ್ ತಯಾರ್ ಜಾತಾ. ಅಶೆಂ ಪಿಕ್‌ಲ್ಲಿ ಮಿರ್ಸಾಂಗ್ ತಿಂ ಹಾಡ್ನ್, ಆಪ್ಲ್ಯಾ ಘರ್ಚ್ಯಾ ಪಾಕ್ಯಾರ್, ವೊಣದಿಚೆರ್, ದೊರಿಯೆಚೆರ್... ಅಶೆಂ ಸುಕಾತ್ ಘಾಲ್ತಾತ್. ಅಶೆಂ ತೀನ್ ಮಹಿನೆ, ಫೆಬ್ರೆರಾಚ್ಯಾ ಆಕೇರಿ ವರೇಗ್ ಮಿಸಾಂಗ್ ಸುಕೊಂವ್ಚಿ ವ್ಯವಸ್ಥಾ ಬೋವ್ ತೆಂಪಾ ಥಾವ್ನ್ ಹಾಂಗಾಸರ್ ಚಲವ್ನ್ ಆಯ್ಲ್ಯಾ.

ಆಮ್ಚ್ಯಾ ಗಾಂವಾಂನಿ, ಆಮ್ಚ್ಯಾ ಆಂಗ್ಣ್ಯಾಂತ್ ವ ಟೆರೇಸಾಚೆರ್ ಮಿಸಾಂಗ್ ವೊತಾಕ್ ಘಾಲ್ಚಿ ಪದ್ಧತ್ ಆಸಾ. ಪುಣ್ ಥಂಯ್ಸರ್, ಮಿರ್ಸಾಂಗೆಕ್ ಸುವೆ ಥಾವ್ನ್ ಏಕ್ ಲ್ಹಾನ್ ಬುರಾಕ್ ಕರ್ನ್, ಏಕ್ ಗಟ್ಟ್ ಸುತ್ ಘಾಲ್ನ್ ಝೆಲೊ ಬರಿಂ ಕರ್ತಾತ್. ಅಶೆಂ ಎಕಾಚ್ ಲಾಂಬಾಯೆಚೆ ಝೆಲೆ ಕರ್ನ್ ಘರ್ಚ್ಯಾ ವೊಣದಿಚೆರ್ ವ ಪಾಕ್ಯಾಚೆರ್ ಲಾಂಬಾಯೆಕ್ ಸೊಡ್ತಾತ್. ಪುಣ್ ಪಯ್ಸಿಲ್ಯಾನ್ ಪಳೆತೆಲ್ಯಾಂಕ್ ಹೆಂ ತಾಂಬ್ಡ್ಯಾ ರಂಗಾಚಿ ಫುಲಾಂ ಉಮ್ಕಾಳಾಯಿಲ್ಲ್ಯಾ ಬರಿಂ ದಿಸೊನ್, ಸೊಭಿತ್ ದಿಸ್ತಾ. ತಾಂಬ್ಡೊ ರಂಗ್ ಸಗ್ಳ್ಯಾ ಗಾಂವಾಕ್ ಸೊಭಾಯ್ ದಿತಾ,

ಹಾಂಗಾಚ್ಯಾ ಮಿರ್ಸಾಂಗೆಕ್ ಆಖ್ಯಾ ಸಂಸಾರಾಕ್ ಭಾರಿಚ್ ಡಿಮ್ಯಾಂಡ್ ಆಸಾ. ಹಾಂಗಾಚಿ ಮಿರ್ಸಾಂಗ್ ಉಂಚ್ಲ್ಯಾ ಮಟ್ಟಾಚಿ ಜಾವ್ನಾಸೊನ್, ಭಲಾಯ್ಕೆಕ್ ಬೊರಿ ಮ್ಹಳ್ಳೆಂ ಚಿಂತಾಪ್ ಆಸಾ. ಹ್ಯಾ ಸರ್ವ್ ಕಾರಣಾಂ ಖಾತಿರ್ ಹೊ ಗಾಂವ್ 'ಮಿರ್ಚಿ ಸಿಟಿ' ಮ್ಹಳ್ಳ್ಯಾ ನಾಂವಾನ್ ಫಾಮಾದ್. ಹರ್ಯೆಕಾ ವರ್ಸಾ ಹಾಂಗಾಸರ್ 'ಮಿರ್ಚಿ ಫೆಸ್ತ್' ಚಲ್ತಾ. ಅತ್ಯಂತ್ ಉಂಚ್ಲ್ಯಾ ಮಟ್ಟಾಚಿ ಮಿರ್ಸಾಂಗ್ ಪಿಕಯಿಲ್ಲ್ಯಾ ಮಾನೇಸ್ತಾಕ್, ಮಿರ್ಸಾಂಗೆಚೊಚ್ ಝೆಲೊ ಘಾಲ್ನ್ ಸನ್ಮಾನ್ ಕರ್ತಾತ್ ಆನಿ ಪುರಸ್ಕಾರ್ ದಿತಾತ್. ಮಿರ್ಚಿ ಖಾಣಾ ಜೆವ್ಣಾಚೆ ಸ್ಪರ್ಧೆಯೀ ಚಲ್ತಾತ್. ಹ್ಯಾ ಫೆಸ್ತಾಂತ್ ವಾಂಟೆಲಿ ಜಾಂವ್ಕ್ ಆನಿ ಪಳೆಂವ್ಕ್ ದೇಶ್ ವಿದೇಶ್ ಥಾವ್ನ್ ಸಬಾರ್ ಲೋಕ್ ಯೆತಾ.