web analytics

From around the world

ಪ್ರವೀಣ್ ತಾವ್ರೊ, ಕುಲ್ಶೇಕರ್
             
+971 50 7554105
ತುಮ್ಚ್ಯಾ ಗಮನಾಕ್:
Best be viewed in 1366 X 768 screen resolution and in Google Chrome

ಮಾಯ್-ಭಾಸ್ ಕೊಂಕ್ಣಿ ಕಿತ್ಯಾಕ್ ಗರ್ಜೆಚಿ??

Wednesday, December 23, 2015  /  By Admin

ಬರಯ್ಣಾರಾ ವಿಶಿಂ ಜಾಣಾ ಜಾ...

80.5
User Rating
ಆಮಿಂ ಪ್ರಸಕ್ತ್ ಕಾಳಾರ್ ನದರ್ ಭಂವ್ಡಾವ್ನ್ ಪಳೆಲೆಂ ತರ್, ಆಪ್ಲ್ಯಾ ಮಾಯ್-ಭಾಸೆಚೊ ಮೋಗ್ ಕರ್ನ್, ಖಂಯ್ಚ್ಯಾಯಿ ದೇಶಾಂನಿ ಗೆಲ್ಯಾರ್ಯಿ, ಭಾಸೆಕ್ ಉಲಂವ್ಕ್ ಲಜೆನಾಸ್ತಾಂ ಆಪ್ಲ್ಯಾ ಮಾಯ್-ಭಾಸೆನ್ ಪ್ರಧಾನತ್ವ್ ದೀವ್ನ್ ಉಲಂವ್ಚೊ ಏಕ್ ಸಮುದಾಯ್ ಕೇರಳಾಂತ್ಲ್ಯಾ ಮಲೆಯಾಳಿಂಚೊ. ಹಾಂಕಾಂ ಮಾಯ್-ಭಾಸೆಕ್ ಮೋಗಾಂತ್ ಪಯ್ಲ್ಯಾ ಫಂಗ್ತಿರ್ ದವರಿಜಾಯ್ ಆನಿ ನಿಮಾಣ್ಯಾ ಫಂಗ್ತಿರ್ ಬಸೊಂಕ್ ಜಾಯ್ ಆಸ್ಲಿ ಸಮಾಜ್ ಆಮಿಂ ಕೊಂಕ್ಣಿ ಕ್ರೀಸ್ತಾಂವಾಂ. ಸಾಂಗೊಂಕ್ ದುಃಖ್ ಭಗ್ತಾ ಜಾಲ್ಯಾರ್ಯಿ ನಿರಾಶೆನ್ ಸಾಂಗಾಜಾಯ್ ಪಡ್ತಾ. ಕಿತ್ಯಾಕ್ ಹೆಂ ಸತ್ ಕೋಣ್ ಯಿ ನೆಗಾರ್ ಕರಿನಾ. ಆಮಿಂ ಕೊಂಕ್ಣಿ ಕ್ರೀಸ್ತಾಂವಾಂ ಬಹುವಂಶ್ ಪಾಶ್ಚ್ಯಾತ್ ಫಿಂರ್ಗಿ ಸಂಸ್ಕ್ರತೆಚೆ ಗುಲಾಮ್ ಜಾವ್ನ್ ಆಸಾಂವ್.

ಆಮ್ಚ್ಯಾ ಕ್ರೀಸ್ತಾಂವ್ ಲೊಕಾಕ್ ಇಂಗ್ಲಿಷ್ ಮಾಧ್ಯಮಾಂನಿ ಶಿಕಾಪ್ ಜಾಯ್, ಬರೆಂಚ್. ಅನ್ಯ್ ಧರ್ಮಿಯ್ ಯಿ ಇಂಗ್ಲಿಷ್ ಮಾಧ್ಯಮಾಕ್ಚ್ ಆಶೆತಾತ್. ಪುಣ್ ತೆ ಆಪ್ಲ್ಯಾ ಮಾಯ್-ಭಾಸೆಚೊ ಬೇಪರ್ವೊ ಕರಿನಾಂತ್. ಪುಣ್ ಆಮಿಂ ಇಲ್ಲೆಶೆಂ ಶಿಕಾಪ್ ಮೆಳ್ ಲ್ಲೆಂಚ್, ಇಂಗ್ಲಿಷ್ ಭಾಸೆಂತ್ ಸಂಸ್ಕ್ರತಿ ಭರ್ಸುನ್ ಘೆತಾಂವ್. ಘರಾಂತ್ ಇಂಗ್ಲಿಷ್, ಇಸ್ಕೊಲಾಂನಿ ಇಂಗ್ಲಿಷ್, ಕಾರ್ಯಾಂ-ಸೊಭಾಣಾಂನಿ ಇಂಗ್ಲಿಷ್, ಖಾಂವ್ಚೆಂ, ಜೆಂವ್ಚೆಂ, ಪಿಯೆಂವ್ಚೆಂ ಇಂಗ್ಲಿಷಾನ್ಂಚ್. ಕೊಣಾಯ್ ಮುಖಾರ್ ಆಮ್ಕಾಂ ಕೊಂಕ್ಣಿ ಉಲಂವ್ಕ್ ಲಜ್ ದಿಸ್ತಾ. "ಐ ಡೋಂಟ್ ನೊ ಕೊಂಕಣಿ, ಐ ಹೇಟ್ ಕೊಂಕಣಿ" ಮ್ಹಣ್ ಕೊಂಕ್ಣೆಕ್ ಕಾಂಠಾಳ್ಚೆ ಮಾಯ್-ಭಾಸ್ ದ್ರೋಹಿ ಮನಿಸ್ ಯಿ ಆಮ್ಚೆಂ ಮಧೆಂ ಆಸಾತ್. ಪುಣ್ ಹ್ಯಾ ವರ್ವಿಂ ಕಿತೆಂ ಜಾತಾ ಮ್ಹಳ್ಳೆವಿಷಿಂ 2006 ವರ್ಸಾ ಮ್ಹಜ್ಯಾ ಎಕಾ ಸನ್ಮಾನ್ ಕಾರ್ಯಾವೆಳಿಂ ಅಧ್ಯಕ್ಷ್ ಸ್ಥಾನ್ ಸೊಭಯಿಲ್ಲೊ ಮಾ|ದೊ|ಡೊಮ್ನಿಕ್ ವಾಸ್(ಕಾರ್ಮೆಲಿತ್ ಕರ್ನಾಟಕ-ಗೊಂಯ್ಚೊಂ ಪ್ರೊವಿನ್ಶಿಯಲ್) ಬಾಪಾನ್ ದಿಲ್ಲ್ಯಾ ಭಾಷಣಾಂತ್ ಏಕ್ ಅಮೊಲಿಕ್ ಸತ್ ಸಭೆ ಹುಜ್ರಿಂ ದವರ್ನ್ ಮ್ಹಣಾಲೊ- "ಭಾಸ್ ಆನಿ ಸಂಸ್ಕ್ರತೆವಿಷಿಂ ಹರ್ಯೇಕಾ ನಾಗರಿಕಾನ್ ಅವಶ್ಯ್ ಜಾವ್ನ್ ಹೆಂ ಜಾಣಾಂ ಆಸೊಂಕ್ ಫಾವೊ. ಭಾಸೆಕ್ ಆನಿ ಸಂಸ್ಕ್ರತೆಕ್ ಗೂಂಡಾಯೆಚೊ ಸಂಬಂಧ್ ಆಸಾ. ತಿ ಸಂಸ್ಕ್ರತಿ ಆಮಿಂ ಆಮ್ಚ್ಯಾ ಭುರ್ಗ್ಯಾಂಕ್ ಶಿಕಯ್ತಾಂವ್. ಹಾಂತುಂ ಆಮ್ಚಿ ಜೀವನ್ ಶ್ಯೆಲಿ ಉಬ್ಜಾತಾ. ಹಿ ಜೀವನ್ ಶ್ಯೆಲಿ ಆಮಿಂ ಸಂತ್ತತಿಕ್ ಉಕಲ್ನ್ ದಿತಾಂವ್. ಜರ್ತರ್ ಆಮಿಂ ಆಮ್ಚಿ ಭಾಸ್ ಉಲಂವ್ಕ್ ಆನಿ ಆಮ್ಚ್ಯಾ ಭುರ್ಗ್ಯಾಂಕ್ ಶಿಕಂವ್ಕ್ ವಿಸ್ರಾಲ್ಯಾಂವ್, ತೆದ್ನಾಂ ಆಮ್ಚ್ಯಾ ಭಾಸೆ-ಸಂಸ್ಕ್ರತೆಚೆಂ ಅಸ್ಥಿತ್ವ್ ಆನಿ ಸಾಹಿತ್ಯ್ ಆಳ್ವೊನ್ಂಚ್ ವೆತಾ. ಆಮ್ಚಿ ಭಾಸ್, ಸಂಸ್ಕ್ರತಿ ಭುರ್ಗ್ಯಾಂ ಥಂಯ್ ಕಿರ್ಲಾವ್ನ್ ವಾಡಂವ್ಚೆ ಪ್ರಯತ್ನ್ ಆಮಿಂ ಕೆಲೆಂನಾ ತರ್, ಆಮ್ವಿ ಸಂಸ್ಕ್ರತಿ ಕೊಂಕ್ಣಿ ಸಂಸ್ಕ್ರತಿ ಜಾವ್ನ್ ಉರ್ಚಿನಾ. ತಿ ನಾಸ್ ಜಾತೆಲಿ ಆನಿ ಆಮಿಂ ಪರ್ಕ್ಯಾಂಚ್ಯಾ ಸಂಸ್ಕ್ರತಿಚಿ ಗುಲಾಮ್ ಜಾತೆಲ್ಯಾಂವ್.

ಮುಖಾರ್ಸುನ್ ಬಾಪ್ ಡೊಮ್ನಿಕ್ ಮ್ಹಣಾಲೊ "ಹಾಂವ್ ಬೆಂಗ್ಳೂರ್, ಮುಂಬಯ್, ಗಲ್ಫಾಕ್ ತಶೆಂಚ್ ಯುರೋಪ್ ದೇಶಾಂನಿ ಗೆಲ್ಲ್ಯಾ ವೆಳಾರ್, ಮ್ಹಾಕಾ ಜಾಯ್ತೆಂ ಮಂಗ್ಳುರಿ ಕ್ರೀಸ್ತಾಂವ್ ಪಳೆಂವ್ಕ್ ಮೆಳ್ ಲ್ಲೆ. ಹ್ಯಾ ಸುವಾತೆಂನಿ ತಾಂತ್ಲೆ ಜಾಯ್ತೆ ಆನಿ ಸಭಾರ್ ಜಣ್ ಮ್ಹಜೆಲಾಗಿಂ ಕೊಂಕ್ಣಿ ಉಲಂವ್ಕ್ ಲಜೆಂವ್ಚೆಂ ಹಾವೆಂ ಪಳೆಲೆಂ. ತಾಂತ್ಲ್ಯಾ ಸಭಾರಾಂನಿ ಕನ್ನಡ, ಹಿಂದಿ, ಮಲೆಯಾಳಿ ಉಲಂವ್ಚೆಂ ಆಯ್ಕಾತಾಲೆಂ. ತೆ ಆಪಾಪ್ಲ್ಯಾ ಮಾಯ್-ಭಾಸೆಕ್ ಗೌರವ್ ದಿಂವ್ಚೊ ವಿಷಯ್ ಮ್ಹಾಕಾ ಅಭಿಮಾನಾಚೊ ಜಾಲೊ. ತರಿ ಕೊಂಕ್ಣಿ ಕ್ರೀಸ್ತಾಂವ್ ಮಂಗ್ಲುರಿ ಮಾಯ್-ಭಾಸೆಕ್ ವಿಸ್ರೊನ್, ಇಂಗ್ಲಿಷ್ ಭಾಸಾಂನಿ ಉಲಂವ್ಚೆಂ ಆನಿ ಇಂಗ್ಲಿಷ್ ಸಂಸ್ಕ್ರತೆಕ್ ಪೊಟ್ಲುನ್ ಘೆವ್ನ್ ಜಿಯೆಂವ್ಚೆಂ ಮ್ಹಾಕಾಚ್ ಬೆಜಾರಾಯೆಕ್ ಕಾರಣ್ ಜಾಲೆಂ.
 
"ಏಕ್ ವಿಷಯ್ ಮ್ಹಜ್ಯಾ ಗಮಾನಾಕ್ ಆಯ್ಲೊ. ಹಾಂಗಾ ಆಸ್ ಲ್ಲ್ಯಾ ಸಭಾರಾಂಕ್ ಕನ್ನಡ,ಹಿಂದಿ,ಇಂಗ್ಲಿಷಾ ಶಿವಾಯ್ ಕೊಂಕ್ಣಿ ಉಲಂವ್ಚೊ ಆವ್ಕಾಸ್ ನಾತ್ಲೊ. ಮುಂಬಯ್, ಬೆಂಗ್ಳೂರ್ ಆನಿ ಬೆಂಗ್ಳೂರ್ಚ್ಯಾ ಇಗರ್ಜಾಂನಿ ಆಮ್ಚ್ಯಾ ಕ್ರೀಸ್ತಾಂವ್ ಲೊಕಾಕ್ ತಾಂಚ್ಯಾ ಭುರ್ಗ್ಯಾಂಕ್ ಕೊಂಕ್ಣಿ ಶಿಕ್ಚೆಂ ಭಾಗ್ ನಾ. ಕಳಿತ್ ಆಸ್ಲ್ಯರ್ಯಿ ಉಲಂವ್ಚೊ, ವಾಪರ್ಚೊ ಅವ್ಕಾಸ್ ಉಣೊ. ಕಿತ್ಯಾಕ್ ಮುಂಬಂಯ್ತ್ ಹಿಂದಿ,ಮರಾಠಿ ಭಾಸ್. ಬೆಂಗ್ಳುರಾಂತ್ ಕನ್ನಡ ಮ್ಹಣ್ತಚ್ ಆಮ್ಚ್ಯಾ ಭುರ್ಗ್ಯಾಂನಿ ಕೊಂಕ್ಣೆ ಥಂಯ್ ವಂಚಿತ್ ಜಾಂವ್ಚೆಂ ದಿಸ್ತಾ. ಅಸೆಂ ಜಾಲ್ಲ್ಯಾನ್ ಹ್ಯಾ ಕ್ರೀಸ್ತಾಂವ್ ಭುರ್ಗ್ಯಾಂಕ್ ಕೊಂಕ್ಣಿ ಭಾಸ್ ಯೇನಾ. ಕೊಂಕ್ಣಿ ವಾಚುಂಕ್-ಬರಂವ್ಕ್-ಉಲಂವ್ಕ್ ಯೇನಾ ಮ್ಹಣ್ತಚ್, ತಾಂಕಾಂ ಕೊಂಕ್ಣಿ ಸಂಸ್ಕ್ರತಿ, ಕೊಂಕ್ಣಿ ಸಾಹಿತ್ಯ್, ಕೊಂಕ್ಣೆಚ್ಯೊ ರೀತಿ-ರಿವಾಜಿ, ಕೊಂಕ್ಣೆಚಿಂ ಆಚಾರಣಾಂ ಕಾಂಯ್ಚ್ ಕಳಿತ್ ನಾಂತ್.

"ತಾಂಚ್ಯಾ ಆವಯ್-ಬಾಪಯ್, ವ್ಹಡಿಲಾಂಕ್ ಕೊಂಕ್ಣಿ ಕಳಿತ್ ಆಸ್ಲ್ಯಾರ್ಯಿ, ಆಪ್ಲ್ಯಾ ಭುರ್ಗ್ಯಾಂಕ್ ಇಂಗ್ಲೆಷ್ ಭಾಸೆಚೆಂ ಶಿಕ್ಷಣಾ ಸವೆಂ ಕೊಂಕ್ಣೆಕ್ ಪಯ್ಸ್ ದವರ್ನ್ ಇಂಗ್ಲೆಷ್ ಮ್ಹಳ್ಳ್ಯಾ ಪರ್ಕಿ ಸಂಸ್ಕ್ರತೆ ತೆವ್ಶಿಂ ವೊಡುನ್ ವ್ಹೆಲಾಂ. ಹ್ಯಾವರ್ವಿಂ ತಿಂ ಭುರ್ಗಿಂ ಇಂಗ್ಲಿಷ್ ಭಾಸ್ ಆಪ್ಣಾಯ್ತಾತ್. ತ್ಯಾ ಭಾಸೆ ಸಾಂಗಾತಾ ಇಂಗ್ಲಿಷ್ ಭಾಸೆಚ್ಯೊಯಿ ರೀತಿ-ರಿವಾಜಿ, ಸಂಸ್ಕ್ರತಿ ಶಿಕ್ತಾತ್. ಇಂಗ್ಲಿಷ್ ಕಾದಂಬರಿ, ಇಂಗ್ಲಿಷ್ ಸಂಗೀತ್, ಇಂಗ್ಲಿಷ್ ಪದಾಂ, ಇಂಗ್ಲಿಷ್ ನಾಚ್... ಸಗ್ಳೆಂ ಇಂಗ್ಲಿಷಾನ್ಂಚ್ ಆಪ್ಣಾಕ್ ಬುಡವ್ನ್ ಘೆತಾತ್. ಸಂಸ್ಕ್ರತಿ ಸವೆಂ ನ್ಹೆಸಾಣ್, ಉಗ್ತೆಂಪಣ್, ಮಾಣ್ಸುಗೆಕ್ ಖತ್ ಲಾಂವ್ಚಿ ಚಾಲ್-ಚಮ್ಕಾಣ್, ಇಂಗ್ಲಿಷ್ ಫಿಲ್ಮಾಂಚೆಂ ಅನುಕರಣ್ ತಿಚ್ ರೀತ್, ತಿಚ್ ಅನಿಸ್ಕಳ್ಪಣಾಕ್ ಪ್ರಚೋದಿತ್ ಕರ್ಚಿ ಸ್ಟಾಯ್ಲ್ ಆನಿ ಫೇಶನ್. ಕೋಣ್ ಘರಾಂತ್ ಇಂಗ್ಲಿಷ್ ಚ್ ಉಲಯ್ತಾ, ತಾಚೆಂ ಸಂಗ್ಳೆಂ ಜೀವಿತ್ ಇಂಗ್ಲಿಷ್ ಸಂಸ್ಕ್ರತಿಕ್ ವೆಂಗ್ತಾ ಆನಿ ಕೊಂಕ್ಣೆಕ್ ಸಹಜ್ ಕಾಂಠಾಳ್ತಾ." ಬಾಪ್ ಡೊಮ್ನಿಕ್ ಮುಂದರ್ಸುನ್ ಸಾಂಗ್ತಾ "ಹಾವೆಂ ಎಕಾ ಭುರ್ಗ್ಯಾಲಾಗಿಂ ವಿಚಾರ್ಲೆಂ ಕ್ರೀಸ್ತಾಂವ್ ಕುಟ್ಮಾಂತ್ಲೊ ಬಾಳ್ ತೊ. "ಕಿತೆಂ ತುಜೆಂ ಸ್ವಪಾಣ್ ಪುತಾ?" ತಾಕಾ ಭುರ್ಗ್ಯಾನ್ ಜಾಪ್ ದಿಲಿ "ಮ್ಹಾಕಾ ಅಮೇರಿಕಾಕ್ ವಚೊಂಕ್ ಜಾಯ್" ಆನಿ ತ್ಯಾ ಉತ್ರಾಂಚೆಂ ಉಚ್ಚಾರ್ಯಿ ತಸೆಂಚ್ ತೊಂಡಾಂತ್ ಉದಾಕ್ ಭರ್ನ್ ಉಲಯಿಲ್ಲ್ಯಾಬರಿ.

"ಇಂಗ್ಲಿಷ್ ಭಾಸ್ ಮ್ಹಳ್ಳೆಕ್ಷಣಾ ತಾಣಿಂ ಅಮೇರಿಕಾಕ್ ವಚಾಜಾಯ್, ಇಂಗ್ಲೆಂಡಾಕ್ ವಚಾಜಾಯ್. ಪುಣ್ ಕೊಂಕ್ಣಿ ಮಾಯ್-ದೇಶಾಂತ್ ತಾಕಾ ರಾವೊಂಕ್ ನಾಕಾ. ತಿ ಮಾಯ್-ಭಾಸ್ ಶಿಕೊಂಕ್, ಉಲಂವ್ಕ್ ನಾಕಾ. ಜರ್ ಆಮಿಂ ಆಮ್ಚಿ ಭಾಸ್ ವಿಸ್ರಾಲ್ಯಾಂವ್, ಸಗ್ಳೆಂ ಆಮ್ಚೆಂ ದಾಯ್ಜ್ ಆಳ್ವಾಲೆಂ, ಆಮ್ಚಿ ಸಂಸ್ಕ್ರತಿ ಆಳ್ವಾಲಿ. ಆಮ್ಚೆ ಕ್ರೀಸ್ತಾಂವ್ ಸಮುದಾಯ್, ಕ್ರೀಸ್ತಾಂವ್ ಸಮಾಜ್ ಚ್ ಆಳ್ವೊಂಚೆ ತೆವ್ಶಿ ಮೆಟಾಂ ಕಾಡ್ತೆಲಿ. 2005 ಇಸ್ವೆಂತ್ ಹಾಂವ್ ಸೌತ್ ಅಮೇರಿಕಾಕ್ ಪಾವಲ್ಲೊಂ. ಥಂಯ್ಸರ್ "ಚಿಲಿ" ಮ್ಹಳ್ಳೊ ದೇಶ್ ಆಸಾ. ಥಂಯ್ಸರ್ ಪಾವ್ ಲ್ಲ್ಯಾ ಹಾವೆಂ ಸಗ್ಳ್ಯಾ ಕಾರ್ಮೆಲಿತಾಂಚ್ಯಾ ಎಕಾ ಪ್ರೊವಿನ್ಶಿಯಲ್ ಸಮ್ಮೇಳನಾಂತ್ ವಾಂಟೊ ಘೆತ್ಲೊ. ಥಂಯ್ಸರ್ ಏಕ್ ವಿಧ್ವಾಂಸ್ ಥಂಯ್ಚ್ಯಾ ಆರ್ಥಿಕ್ ಪರಿಸ್ಥಿತೆವಿಷಿಂ ಉಲವ್ನ್ ಮ್ಹಣಾಲೊ. "ಆಧಿಂ ಮಾಗಾಂ 15ವ್ಯಾ ಶತಮಾನಾಂತ್ ಹಾಂಗಾಸರ್ ಸ್ಪೆನಿಶ್ ಆಯಿಲ್ಲೆ. ತ್ಯಾ ಆಧಿಂ ಥಂಯ್ಸರ್ ಚಿಲಿಯಾಂಚಿ ಮೂಳವಿ ಭಾಸ್ ಆನಿ ಮೂಳವಿ ಸಂಸ್ಕ್ರತಿ ಆಸ್ ಲ್ಲಿ. ಚಿಲಿಯಾಂಚಿ ಮೂಳಾವಿ ರೀತ್-ರಿವಾಜ್ ಆಸ್ ಲ್ಲಿ. ತ್ಯೊ ರೀತಿ-ರಿವಾಜಿ ಇತ್ಲ್ಯೊ ಬರ್ಯೊ ಆಸ್ ಲ್ಲ್ಯೊಕಿ, ತಾಂಚೆ ಮಧೆಂ ಮೊಗಾಚೊ ಬಾಂಧ್ ಆಸ್ ಲ್ಲೊ.

’ಟಾಯ್ಬ್’ ಜಾತ್ ತಿ ಜಾವ್ನಾಸ್ ಲ್ಲಿ. ತಾಂಚಿಂ ಲಗ್ನಾಂ ತುಟಾನಾತ್ ಲ್ಲಿಂ. ತಾಂಚೆ ಮಧೆಂ ಬರಿ ನ್ಯಾಯ್-ನೀತ್ ಆಸ್ ಲ್ಲಿ. ಅಸೆಂ ಏಕ್ ಜಾತ್, ಏಕ್ ಪಂಗಡ್ ಇತ್ಲೊ ಮಜ್ಭೂತ್ ಎಕ್ವಟ್ ತಾಂಚೊ ಸಂಸಾರಾಕ್ ಚ್ ಆದರ್ಶ್ ಜಾವ್ನಾಸ್ಲೊ.

"ಸ್ಪೆನಿಷ್ ಆಯ್ಲೆ. ತಾಂಚೆ ಸಾಂಗಾತಾ ಆಪ್ಲಿ ಭಾಸ್, ಆಪ್ಲಿ ಸಂಸ್ಕ್ರತಿ, ಆಪ್ಲ್ಯೊ ರೀತಿ-ರಿವಾಜಿ ಪೂರಾ ಹಾಡ್ಲ್ಯೊ ಆನಿ ಹ್ಯಾ ಗಾ೦ವ್ಚ್ಯಾ ಮೂಳ್ ನಿವಾಸಿಂಚೆರ್ ಥಾಪ್ಲ್ಯೊ. ಇಸ್ಕೊಲಾಂ, ಕೊಲೇಜಿ, ವಿವಿಧ್ ಶಿಕ್ಷಣ್ ಕ್ಷೇತ್ರಾಂ ಉಗ್ತಿಂ ಕೆಲಿಂ ಆನಿ ಸಗ್ಳೆಂ ಸ್ಪೆನಿಷ್ ಭಾಸೆ ಸಾಂಗಾತಾ ಸ್ಪೆನಿಷ್ ಸಂಸ್ಕ್ರತಿಚ್ ವಾಡಾವಳಿರ್ ಘಾಲೆಂ. ಆತಾಂ ಹ್ಯಾ ದೇಶಾಚಿ ವೀದ್ ವಾವ್ಳಿ ಜಾಲ್ಲಿ. ಮೂಳಾವ್ಯಾ ಲೊಕಾನ್ ಆತಾಂ ಸ್ಪೆನಿಷ್ ಹಾಂಚ್ಯಾ ದಭಾವಾರ್ ಜಿಯೆಂವ್ಚೆಂ ಪಡ್ಲೆ೦. ಹ್ಯಾ ವರ್ವಿಂ ಆತಾಂ ತಿ ಚಿಲಿಯನ್ಸ್ ನಹಿಂ ಆನಿ ಸ್ಪೆನಿಷ್ ಯಿ ನಹಿಂ. ಕಾವ್ಳ್ಯಾಕ್ ಕಿತ್ಲೊ ಘಾಸ್ಲ್ಯಾರ್ಯಿ ತೊ ಧವೊ ಜಾಯ್ನಾ. ಕಾವ್ಳೊ ತೊ ಕೆದ್ನಾಂಯಿ ಕಾವ್ಳೊಚ್. ತಸೆಂ ಆಮಿಂ ಕೊಂಕ್ಣಿ ಕ್ರೀಸ್ತಾಂವಾಂನಿ ಕಿತ್ಲಿ ಇಂಗ್ಲಿಷ್ ಭಾಸ್ ಉಲಯ್ಲ್ಯಾರ್ಯಿ, ಇಂಗ್ಲಿಷ್ ಸಂಸ್ಕ್ರತೆಂತ್ ಬುಡ್ಲ್ಯಾರ್ಯಿ, ಆಮಿಂ ಕೆದಿಂಚ್ ಅಮೇರಿಕನ್ ವ ಬ್ರಿಟಿಷ್ ಜಾಯ್ನಾಂವ್. ಆಮಿಂ ಕೊಂಕ್ಣಿ ಕ್ರೀಸ್ತಾಂವ್ಚ್. ಪುಣ್ ಆಮ್ಕಾಂ ಹಿ ಬೆಜಾರಾಯ್, ತಿ ಆಮಿ ಒಪುನ್ ಘೆತ್ಲ್ಯಾರ್ ಮಾತ್ರ್."

ಪೆಲ್ಯಾಚೆಂ ಉಸ್ಟೆಂ ಖೆಲ್ಲ್ಯಾನ್ ಆಮಿಂ ತಾಂಚೆಬರಿಂ ಜಾಯ್ನಾಂವ್. ಕೊಂಕ್ಣಿ ಕ್ರೀಸ್ತಾಂವ್ ಆಮಿಂ ಕೆದಿಂಚ್ ಇಂಗ್ಲಿಷ್ ಪರಿಪೂರ್ಣ್ ಥರಾನ್ ಆಪ್ಣಾಂವ್ಕ್ ಸಕಾನಾಂವ್. ಆಪಾಪ್ಲಿ ಮಾಯ್-ಭಾಸ್ ಉಲಂವ್ಚಿ ತಿ ಆಪಾಪ್ಣಾಕ್ ಗೌರವಾಚಿ ಮ್ಹಳ್ಳೆಂ ಉಗ್ಡಾಸ್ ದವರಿಜಾಯ್. ಆಮಿಂ ಇತರ್ ಭಾಸೊ ಶಿಕ್ಯಾಂ, ಜಾಣ್ವಾಯ್ ವಾಡವ್ಯಾಂ. ಪುಣ್ ಅನ್ಯ್ ಸಂಸ್ಕ್ರತಿ,ಅನ್ಯ್ ಭಾಸ್ ಆಮ್ಚಿ ಕರ್ನ್, ಆಮ್ಚ್ಯಾ ಭಾಸೆಕ್ ಕಾಡ್ನ್ ಉಡಂವ್ಚೆಂ ನಾಕಾ. ಜರ್ತರ್ ಆಮಿಂ ಅನ್ಯ್ ಭಾಸ್ ಸಂಪೂರ್ಣ್ ಪಣಿ ಆಪ್ಣಾಂವ್ಕ್ ಸಕನಾಂವ್ ಕಿ, ತವಳ್ ಥಂಯ್ಸರ್ ಉಬ್ಜಾತಾ ’ ಹಾಂವ್ ಕೋಣ್?’ ಏಕ್ ಉತಾರ್ ಹೆಂಚ್ ಹಾವೆಂ ಮ್ಹಾಕಾಚ್ ವಿಚಾರ್ಚೆಂ ’ ಹಾಂವ್ ಕೋಣ್?’ ತಾಚೆ ಥಂಯ್ ಐಡೆಂಟಿಟಿ ಕ್ರೈಸಿಸ್ ಯೆತಾಸ್ತಾನಾ, ತಾಚ್ಯಾ ಜೀವಿತಾಂತ್ ಕಷ್ಟ್ ಯೆತಾನಾ ’ಆಪುಣ್ ಕೋಣ್?’ ಮ್ಹಳ್ಳ್ಯಾ ಉತ್ರಾಕ್ ತಾಕಾ ಜಾಪ್ ಮೆಳ್ಳ್ಯಾರ್ ಮಾತ್ರ್ ತೊ ಮುಖಾರ್ ವಚಾತ್. ಜೆದ್ನಾಂ ಹಾಂವ್ ಕೋಣ್ ಯಿ ನಹಿಂ. ಇಂಗ್ಲಿಷ್ ಯಿ ನಹಿಂ, ತಿ ಸಂಸ್ಕ್ರತಿಯಿ ಮ್ಹಜಿ ನಹಿಂ. ತೊ ಮ್ಹಜೊ ದೇಶ್ ಯಿ ನಹಿಂ. ತೆ ಮ್ಹಜೆ ಸಂಬಂಧಿತ್ ಯಿ ನಹಿಂ, ತೊ ಮ್ಹಜೊ ಬಾಪ್ ಯಿ ನಹಿಂ, ಆವಯ್ ಯಿ ನಹಿಂ. ತೆದ್ನಾಂ ಹಾಂವ್ ಖಂಯ್ ವೆತಾಂ? ಖಂಯ್ ಪಾವ್ತಾಂ ತೆಂ ತೊಚ್ ನೆಣಾ.
ಹಾಂವ್ ಆಯಿಲ್ಲೊಂ ಖಂಯ್ ಥಾವ್ನ್? ಖಂಯ್ ಪಾವ್ಲೊ ವಚೊನ್? ಅಸಲ್ಯಾ ಪರಿಸ್ಥಿತೆನ್ ಮ್ಹಸ್ತು ಜಣ್ ಜೀವ್ಘಾತ್ ಕರುನ್ ಮೆಲ್ಯಾತ್. ಕಿತ್ಯಾಕ್ ಸ್ಪೆನಿಷ್ ಕಲ್ಚರ್, ಲವ್ ಮ್ಯಾರೆಜ್, ಡೈವೊರ್ಸ್, ಕಿಸ್ಸಿಂಗ್, ಓಪನ್ ಸೆಕ್ಸ್... ಹೆಂ ಚಿಲಿ ಲೊಕಾನ್ ಚಿಂತುಂಕ್ ಸಯ್ತ್ ನಾತ್ಲೆಂ. ಆತಾಂ ಹರ್ಯೇಕಾ ಬಸ್ಸಾರ್, ರೇಯ್ಲಾಂನಿ ಕಿಸ್ಸಿಂಗ್, ಪುಸ್ಸಿಂಗ್ ಹೆಂಚ್ ದಿಸ್ತಾ. ಇಂಗ್ಲೆಂಡ್- ಅಮೇರಿಕಾಪರಿಂಚಿ ಥಂಯ್ಚಿ ಸಂಸ್ಕ್ರತಿ. ನಿಮಾಣೆ ಆಜ್ ಎಕ್ಲೊ ಪತಿ, ಫಾಲ್ಯಾಂ ಡೈವೊರ್ಸ್, ಪೊರ್ವಾಂ ಆನ್ಯೇಕ್ ಕಾಜಾರ್. ಕೋಣ್ ಕೋಣಾಚಿ ಆವಯ್, ಕೋಣಾಚೊ ಕೋಣ್ ಬಾಪ್ ಮ್ಹಳ್ಳೆಂ ಕಳಿತ್ ನಾ. ನಿಮಾಣೆ ಕುಟ್ಮಾಂ ದೆಸ್ವಾಟ್ತಾತ್. ದೆಕುನ್ ಆಮ್ಚಿ ಮಾಯ್ ಭಾಸ್, ಆಮ್ಚಿ ಸಂಸ್ಕ್ರತಿ ಆಮ್ಕಾಂ ಮೊಗಾಚಿ. ಆಮ್ಕಾಂ ಗೌರವಾಚಿ. ಹ್ಯಾ ದ್ವಾರಿಂ ಆಮಿಂ ಆಮ್ಚೆಂ ಸಾಹಿತ್ಯ್ ರಚಿಜಾಯ್. ತ್ಯಾ ವರ್ವಿಂ ಭಾಸ್ ಆನಿ ಸಂಸ್ಕ್ರತಿ ಜಿವಾಳ್ತಾ, ವಾಡ್ತಾ. ಜರ್ತರ್ ಕೊಂಕ್ಣಿ ಬರವ್ಪಿ ಏಕ್ ಕಾದಂಬರಿ ಬರಯ್ತಾ ತರ್, ತಾಂತುಂ ತೊ ಕೊಂಕ್ಣಿ ಭಾಸೆನ್ ಸಂಸ್ಕ್ರತಿಚ್ಯೊ ರೀತಿ-ರಿವಾಜ್ಯೊ, ಕೊಂಕ್ಣಿ ವಾತಾವರಣಾಂತ್ಲೊ ವಿವರ್ ಲಿಖ್ತಾ. ಕ್ರೀಸ್ತಾಂವ್ ಕೊಂಕ್ಣೆಚಿ ಕಥಾವಸ್ತ್ ರಚ್ತಾ. ಪುಣ್ ತೊ ಇಂಗ್ಲಿಷಾನ್ ಕಾದಂಬರಿ ಬರಯ್ತ್ ತರ್, ತಾಂತುಂ ಪಾಶ್ಚ್ಯತ್ಯ್ ವಾತಾವರಣ್, ಕಥಾವಸ್ತ್, ರೀತಿ-ಸಂಸ್ಕ್ರತಿಂಚಿ ಕಾದಂಬರಿ ಲಿಖ್ತಾ. ದೆಕುನ್ ಆಮ್ಚಿ ಸಗ್ಳಿ ಸಂಸ್ಕ್ರತಿ ಆನಿ ತಿ ಆಮ್ಕಾಂ ಅಮೂಲ್ಯ್. ತಿ ಆಮಿಂ ಜಿವ್ಯಿಂ ಮಾರಿನಾಯೆ.

ಹೊ ಜಾಗತಿಕರಣಾಚೊ ವ್ಹಾಳೊ. ಆಯ್ಚೆಂ ಆಮ್ಚೆಂ ತರ್ನೆಂ ಜನಾಂಗ್ ಹ್ಯಾ ಪಾಶ್ಚಾತ್ಯ್ ವಿದೇಶಿ ವ್ಹಾಳ್ಯಾಚ್ಯಾ ವಿರೋಧ್ ಉಪ್ಯೆವ್ನ್ ಪಾಟಿಂ ಯೆಂವ್ಚೆ ಖಾತಿರ್ ಆಜ್ ಕೊಂಕ್ಣೆಚೆ ಫುಡಾರಿ ವದ್ದಾಡ್ತಾತ್. ಲೇಖಕಾಂಚೊ ಎಕ್ವಟ್, ಕೊಂಕ್ಣಿ ಅಕಾಡೆಮಿ , ಮಾಂಡ್-ಸೊಭಾಣ್, ಕೊಂಕ್ಣಿ ಭಾಷಾ ಮಂಡಳ್ ಇತ್ಯಾದಿ ಸಂಘಟನಾಂ ಭರಾಚೊ ವಾವ್ರ್ ಕರ್ತಾತ್. ಮಾನೆಸ್ತ್ ಎರಿಕ್ ಒಝೆರೊಚ್ಯೊ ಸಾಧನಾನ್ ಆನಿ ತಾಕಾ ಆಧಾರ್ಸಿಲ್ಲ್ಯಾ ವಿವಿಧ್ ಕೊಂಕ್ಣಿ ಸಾಹಿತ್ಯ್ ಶ್ಹೆತಾಂತ್ಲ್ಯಾ ಮೋಗಿಂಚ್ಯಾ ವಾವ್ರಾನ್ ಕೊಂಕ್ಣಿ ಮಾಯ್-ಭಾಸ್ ಇಸ್ಕೊಲಾಂನಿ ಶಿಕ್ಷಣಾಚ್ಯಾ ದಾಖ್ಲ್ಯಾರ್ ಪಾವ್ಲಿ. "ಕೊಂಕ್ಣಿ ನಿರಂತರಿ"ನ್ ಗಿನ್ನೆಸ್ ದಾಖ್ಲೊ ಜೊಡ್ಲೊ. ಹಿ ಆಮ್ಚಿ ಕೊಂಕ್ಣಿಚಿ ಗ್ರೇಸ್ತಕಾಯ್. ದೆಕುನ್ ಆಮ್ಚಿ ಭಾಸ್, ಲಿಖಿತಾಂ, ಕಾರ್ಯಕ್ರಮಾಂ ಕೊಂಕ್ಣೆನ್ ಜಾಂವ್ದಿತ್. ಘರಾಂನಿ ಭುರ್ಗ್ಯಾಂಕ್ ಆಮಿಂ ಕೊಂಕ್ಣಿಯಿ ಶಿಕಯಾಂ. ತವಳ್ ಮಾತ್ರ್ ಆಮಿಂ ಕೆದ್ನಾಂಚ್ ಐಡೆಂಟಿಟಿ ಕ್ರೈಸಿಸಾಂಕ್ ಬಲಿ ಜಾಂವ್ಚೆ ನಾಂವ್.

" ಖಂಯ್ಚ್ಯಾಯಿ ಜಾತಿಚಿ ಮಾಯ್-ಭಾಸ್ ಅಪಾಪ್ಣಾಕ್ ಕಿತ್ಯಾಕ್ ಗರ್ಜೆಚಿ ಮ್ಹಳ್ಳೆವಿಷಿಂ ಗೂಂಡಾಯೆನ್ ಚಿಂತುಂಕ್ ಗೆಲ್ಯಾರ್, ಖಂಯ್ಚ್ಯಾಚ್ ಸಮುದಾಯಾಚೊ ನಾಗರಿಕ್ ಕೆದ್ನಾಂಚ್ ಆಪ್ಣಾಚ್ಯಾ ಮಾಯ್-ಭಾಸೆ ಥಂಯ್ ಅಲಕ್ಷಾ ಕರಿಸೊನಾ. ಕಿತ್ಯಾಕ್ ಮ್ಹಳ್ಯಾರ್ ಆಮಿಂ ಖಂಯ್ಚ್ಯಾಯಿ ಗಾಂವಾಕ್ ಗೆಲ್ಯಾರ್ಯಿ ಆಮ್ಚ್ಯಾ ಭಾಸೆ ಆನಿ ಸಂಸ್ಕ್ರತೆದ್ವಾರಿಂ ಆಮಿಂ ಫಾಲಾಣ್ಯಾ ದೇಶಾಚಿ, ಫಾಲಾಣ್ಯಾ ಗಾಂವ್ಚಿ, ಫಾಲಾಣ್ಯಾ ಜಾತಿ-ಧರ್ಮಾಚಿ ವ್ಯಕ್ತಿ ಮ್ಹಳ್ಳೆಂ ವಳ್ಕುಂಕ್ ಆಮ್ಚಿ ಮಾಯ್-ಭಾಸ್ ಪ್ರಮುಖ್ ಸ್ಥಾನ್ ಘೆತಾ. ಹ್ಯಾ ದ್ವಾರಿಂ ಖಂಯ್ಚ್ಯಾಯಿ ದೇಶಾಂನಿ ಥಂಯ್ಚೊ ಲೋಕ್ ಆಮ್ಕಾಂ ವಳ್ಕುಂಕ್ ಸಕ್ತಾ. ಹೆಂ ಅಧಿಕ್ ಮುಖ್ಯ.

ಕೃಪಾ: ಕುಟಾಮ್ ಕೊಂಕಣಿ ಹಪ್ತ್ಯಾಳೆಂ

Tags:  Victor Rodrigues, Konkani Articles, Konkani, Mangalore, Mangalorean, Mother Tongue

0 Comment/s.

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :


Connect

Maibhaas

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE