web analytics

From around the world

ಪ್ರವೀಣ್ ತಾವ್ರೊ, ಕುಲ್ಶೇಕರ್
             
+971 50 7554105
ತುಮ್ಚ್ಯಾ ಗಮನಾಕ್:
Best be viewed in 1366 X 768 screen resolution and in Google Chrome

ಮೋದಿ ಸರ್ಕಾರಾಚಿ ಅನಧಿಕ್ರತ್ ಎಮರ್ಜೆನ್ಸಿ

Thursday, February 18, 2016  /  By Admin

ಬರಯ್ಣಾರಾ ವಿಶಿಂ ಜಾಣಾ ಜಾ...

80.5
User Rating
ಡೆಲ್ಲಿ ಜವಾಹರ್ ಲಾಲ್ ನೆಹರು ಯುನಿವರ್ಸಿಟಿ, ಪಾಟ್ಲ್ಯಾ ದಿಸಾಂ ಥಾವ್ನ್ ಭಾರತ್ ಭರ್ ವಿಶೇಸ್ ಖಬ್ರೆರ್ ಅಸಾ. ಕೇಂದ್ರ್ ಸರ್ಕಾರ್ ಅನಿ ಸಂಘ್ ಪರಿವಾರ ಥಾವ್ನ್ ಸುರ್ವಾತ್ ಜಾಲ್ಲಿಂ ಆಕ್ರಮಣಾಂ ಅತಾಂ ವಾಮ್ ಪಂಥೀಯ್ ಸಂಘಟನಾಚಾ ನೆತಾಂಕ್ ಅನಿ ಕಾರ್ಯಕರ್ತಾಂಕ್ ಕಠೀಣ್ ಇಜಾ ದಿಂವ್ಚೆ ತಿತ್ಲ್ಯಾ ಮಟ್ಟಾಕ್ ಯೇವ್ನ್ ಪಾವ್ಲ್ಯಾಂತ್. ಭಾಜಪಾಚೆಂ ವಿಧ್ಯಾರ್ಥಿ ಸಂಘಟನ್ ಜಾವ್ನಾಸ್ಚ್ಯಾ ಎಬಿವಿಪಿನ್ ದಿಲ್ಲ್ಯಾ ಪಟ್ಟೆ ಪ್ರಕಾರ್ JNU0ತ್ಲ್ಯಾ ನಿರಪ್ರಾಧಿ ವಿಧ್ಯಾರ್ಥಿಂವಯ್ರ್ ದೇಶ್ ದ್ರೋಹ್ ತಸಲಿ ಕೇಜ್ ಧಾಕಲ್ ಕೆಲ್ಲ್ಯಾಚೆಂ ವಿರೋಧ್ ಕೆಲ್ಲ್ಯಾ ಸಿಪಿಐಎಂ ಜನರಲ್ ಸೆಕ್ರೆಟರಿ ಸೀತಾರಾಂ ಯಚೂರಿ ವಯ್ಲ್ಯಾ ರಾಗಾನ್ ಸಂಘ್ ಪರಿವಾರಚಾ ಸಾಂದ್ಯಾನಿಂ ಸಿಪಿಐಎಂ ಹಾಚಾ ಕೇಂದ್ರ್ ಕಮಿಟಿ ಧಫ್ತರಾ ಭಾಯ್ರ್ ”ಪಾಕಿಸ್ಥಾನಿ ಧಫ್ತರ್” ಮ್ಹಣ್ ಬರವ್ನ್ ಘಾಲುಂಕ್ ಘೆತ್ ಲ್ಲೆಂ ಧಯ್ರ್, ಡೆಲ್ಲಿಂತ್ಲ್ಯಾ ಕಾನೂನ್ ವೆವಸ್ಥೆಚಿ ಸಂಪೂರ್ಣ್ ಜೀರ್ಣತಾ ದಾಕಯ್ತಾ.

ಪಾಟ್ಲೆ ದಿಸಾನಿಂ ಡೆಲ್ಲಿಂತ್ ಭಾಜಪಾ, ಎಬಿವಿಪಿ ಅನಿ ಸಂಘ ಪರಿವಾರಾನ್ ಆಧಾರ್ ಲ್ಲೆಂ ಆಕ್ರಮಣ್, ಕಾನೂನ್ ಉಲ್ಲಂಘನ್. “ದೇಶ್ ಪ್ರೇಮ್ ಮ್ಹಳ್ಳೆಂ ದುಶ್ಕರ್ಮಿಂಚೊ ನಿಮಾಣೊ ಅಸ್ರೊ” ಮ್ಹಳ್ಳ್ಯಾ ಸಾಮುವೆಲ್ ಜೋನಾಚಿ ಉತ್ರಾಂ ಉಗ್ಡಾಸ್ ಕರ್ಚೆಂ ತಸಲೆಂ ಜಾವ್ನಾಸುಲ್ಲೆಂ ಮ್ಹಣ್ಯೆತ್. JNUಕ್ ಪಾವ್ ಲ್ಲ್ಯಾ ಮಾಲ್ಘಡೊ ಕಾಂಗ್ರೆಸ್ ನೇತಾ, ಆನಂದ್ ಶರ್ಮಾಚೆರ್ ಥಾಪಡ್ ಮಾರ್ ಲ್ಲೆಂ, ಕೋಂಗ್ರೆಸ್ ಉಪಾಧ್ಯಕ್ಶ್ ರಾಹುನ್ ಗಾಂಧಿಚೆಂ ವಾಹನ್ ಗಂಟೆಗಟ್ಲೆ ಆಡಾವ್ನ್ ದವರ್ ಲ್ಲೆಂ, JNU ೦ತ್ಲ್ಯಾ ವಾಮ್ ಪಂಥೀಯ್ ಸಂಘಟನಾಚಾ ಸಾಂದ್ಯಾಂಕ್ ಖುನಿಯೆ ಭೆಶ್ಟಾವ್ಣಿ ದಿಲ್ಲಿ. ಪಟಿಯಾಲ ಕೋಡ್ತೆಂತ್ ವಕೀಲಾನಿಂ ಮಾಧ್ಯಮ್ ಪ್ರತಿನಿಧಿಂಕ್ ಅನಿ ಯೂನಿಯನ್ ಲೀಡರ್ ಕನಯ್ಯಚೆರ್ ಹಲ್ಲ್ಯಾ ತಸಲಿ ರೌಡಿಸಂ ರಿತಿಚಿ ಕ್ರತ್ಯಾಂ ಘಡ್ಲಿಂ ತರೀ ಡೆಲ್ಲಿ ಪೋಲಿಸ್ ಅನಿ ಕೇಂದ್ರ್ ಘರ್ ಖಾತ್ಯಾನ್ ಹಾಂಕಾ ಸತ್ರಿ ಧರ್ಚೆಂ ಪ್ರೇತನ್ ಕೆಲ್ಲೆಂ ಶಿವಾಯ್ ಕಾನೂನ್ ಪಾಲನಾಚಿ ನಿಶಾನಿ ಖಂಯ್ಸರ್ ಯೀ ದಾಕಯ್ಲಿ ನಾ. ಹ್ಯಾ ಭಾಯ್ರ್ JNU ಲಷ್ಕರ್ ಆತಂಕ್ ವಾದಿಂಚಾ ಹಿಶಾರಾ ಪರ್ಮಾಣೆಂ ಚಲ್ತೆ ಅಸಾ ಮ್ಹಣೊನ್ ಹೋಮ್ ಮಿನಿಸ್ಟರ್ ರಾಜ್ ನಾಥ್ ಸಿಂಗಾನ್ ನವೆಂ ಏಕ್ ವಿಶೇಸ್ ಕಾರಣ್ ಸೊಧುನ್ ಕಾಡ್ಲಾಂ!!!

ಮೋದಿಚಾ ಪ್ರಸ್ತುತ್ ಆಡಳ್ತೆಂತ್ ಇಂದಿರಾ ಗಾಂಧಿಚಾ ಎಮರ್ ಜೆನ್ಸಿಕ್ ಸಮಾನ್ ಮ್ಹಣ್ ದಿಸ್ಚಿಂ ತಸಲಿಂ ಘಡಿತಾಂ ಪ್ರಸ್ತುತ್ ದಿಸಾನಿಂ ದೇಶಾಚಾ ವಿವಿಧ್ ವಿಶ್ವ್ ವಿದ್ಯಾನಿಲಯಾಂನಿ ಘಡ್ತೆ ಅಸಾತ್. ಭಾಜಪಾ ಮುಖೇಲ್ಪಣಾಚೊ ಸರ್ಕಾರ್ ಆಯ್ಲೆ ದಿಸಾಥಾವ್ನ್ ದೇಶ್ ಭರ್ ಆಸ್ಚ್ಯಾ ಯೂನಿವರ್ಸಿಟಿನಿಂಕ್ ಘುಟಾನ್ ಆನಿ ಉಗ್ತ್ಯಾನ್ ಮ್ಹಳ್ಳೆಂ ಪರಿಂ ಕಾವಿಚೊ ರೋಂಗ್ ದಿಂವ್ಚಿ ಪ್ರೇತನಾಂ ಚಲ್ತೆ ಅಸಾತ್. ಖಂಯ್ಚ್ಯಾಗಿ ಎಕಾ ಲ್ಹಾನ್ ಸಂಘಟನಾನ್ JNU೦ತ್ ಅಫ್ಜಲ್ ಗುರುಚೆಂ ಸ್ಮರಣ್ ಕಾರ್ಯೆಂ ಅಸಾ ಕೆಲ್ಲೆಂ ಮ್ಹಳ್ಳ್ಯಾ ಕಾರಣಖಾತಿರ್ ಎಬಿವಿಪಿಥಾವ್ನ್ ಪಯ್ಸ್ ಆಸ್ಚ್ಯಾ ನಿರಪ್ರಾಧಿಂ ವಯ್ರ್ ದೇಶ್ ದ್ರೋಹ್ ತಸಲೆ ಅರೋಪ್ ಮಾಂಡುನ್ ಜೈಲಾಕ್ ಲೊಟ್ಚೆಂ ಅಂಗೀಕಾರ್ ಕರುಂಕ್ ಜಾಂವ್ಚೆ ನಾ. ಥೊಡ್ಯಾ ವಿದ್ಯಾರ್ಥಿಂಚ್ಯಾ ಪಂಗ್ಡಾ ಮಧೆಂ ಘುಸೊನ್ ಎಬಿವಿಪಿ ಸಾಂದ್ಯಾನಿಂಚ್ “ಪಾಕಿಸ್ಥಾನ್ ಜಿಂದಾಬಾದ್” ಮ್ಹಳ್ಳೆ ಸ್ಲೋಗನ್ ಉಟಾಯಿಲ್ಲೆ ಮ್ಹಣ್ಚ್ಯಾಕ್ ಧಾಕ್ಲೆ ಎದೊಳ್ ಭಾಯ್ರ್ ಪಡ್ಲ್ಯಾತ್. ಪುಣ್ ಥೊಡ್ಯಾ ರಹಸ್ಯ್ ಕೇಂದ್ರಾಂನಿ ಭಾಯ್ರ್ ಸೊಡ್ಚ್ಯಾ ಫಟ್ ಖಬ್ರ್ಯಾಂಚೆರ್, ಪಾತ್ಯೆವ್ನ್ ಪೊಲಿಸಾನಿಂ ಕ್ರಮ್ ಘೆತ್ ಲ್ಲೆಂ ದೇಶ್ ಭರ್ ವ್ಹಡ್ ದುಬಾವಾಕ್ ಕಾರಣ್ ಜಾಲಾಂ. ಮಧ್ಯಾನೆ ರಾತಿಂ ಹೊಸ್ಟೆಲಾಂಕ್ ರಿಗೊನ್ ಥಂಯ್ಚ್ಯಾ ವಿಧ್ಯಾರ್ಥಿಂಕ್ ಅರೆಸ್ಟ್ ಕೆಲ್ಲಿಂ ಘಡಿತಾಂ ಹ್ಯಾ ಪಯ್ಲೆಂ ಎಮರ್ಜೆನ್ಸಿ ವೆಳಾರ್ ಘಡ್ ಲ್ಲಿಂ. ದೇಶಾಚೆ ಸುರಕ್ಷೆಖಾತಿರ್ ದೇಶ್ ದ್ರೋಹಿಂಕ್ ನಾಸ್ ಕರುಂಕ್ ಜಾಯ್ ಮ್ಹಳ್ಳೆಂ ಕಾರಣ್ ದೀವ್ನ್ ಇಂದಿರಾ ಗಾಂಧಿನ್ ತವಳ್ಚ್ಯಾ ಎಮರ್ಜೆನ್ಸಿಚೆಂ ಸಮರ್ಥನ್ ಕೆಲ್ಲೆಂ.  ಮೋದಿ ಸರ್ಕಾರ್ ಅತಾಂ ಪ್ರಕಟಣಾವಿಣೆಂಚ್ ಅಸಲಿ ಏಕ್ ಎಮರ್ಜೆನ್ಸಿ ಜಾರಿಯೆಕ್ ಹಾಡ್ತೆ ಅಸಾ. ನರೇಂದ್ರ ಮೋದಿ, ರಾಜ್ ನಾಥ್ ಸಿಂಗ್, ಸ್ಮ್ರತಿ ಇರಾನಿ ಆನಿ ಮೋಹನ್ ಭಾಗವತ್ ಹಾಂಣಿ ನಿರ್ಧಾರ್ ಕರ್ಚೆ ಪ್ರಕಾರ್ ದೇಶ್ ಪ್ರೇಮ್ ಆನಿ ದೇಶ್ ದ್ರೋಹ್ ತುಕುಂಕ್ ಆರಂಭ್ ಕೆಲ್ಯಾರ್ ಹ್ಯಾ ವಿಶಿಂ ಚಿಂತಾಪ್ ಆಟಾಂವ್ಚ್ಯಾ ಲೊಕಾಕ್ ಅರೆಸ್ಟ್ ಕರ್ನ್ ಭರ್ಚ್ಯಾಕ್ ಭಾರತಾಂತ್ಲಿ ಜೈಲಾಂ ಪಾಂವ್ಚಿ ನಾಂತ್. ಹಿಂದೂ ಫ್ಯಾಸಿಸಂ ವಿರೋಧ್ ಹರ್ ಸಂದ್ರಾಂಪಾನಿಂ ತಾಳೊ ಊಟೊಂವ್ಚ್ಯಾ ಯುನಿವರ್ಸಿಟಿಂಪಯ್ಕಿಂ JNU ಏಕ್ ಜಾವ್ನಾಸಾ. ವಾಮ್ ಪಂಥೀಯ್ ವಿಚಾರ್ ಪ್ರಚಾರ್ ಕರ್ಚ್ಯಾಕ್ ಆನಿ ಜಾತ್ಯತೀತ್ ಭಾಂದವ್ಪಣ್ ಉಚಾರ್ನ್ ಸಾಂಗ್ಚ್ಯಾಕ್ ಹಿ ಯುನಿವರ್ಸಿಟಿ ಆಪ್ಲ್ಯಾ ಸುರ್ವಾತೆ ಥಾವ್ನ್ ಫಾಮಾದ್ ಜಾವ್ನಾಸಾ. ಅಸಲ್ಯಾ ಎಕಾ ಸಂಸ್ಥ್ಯಾವಯ್ರ್ ಸಂಘ್ ಪರಿವಾರಂಕ್ ಧ್ವೇಶ್ ಆಸ್ಚೊ ಸಹಜ್. ಪಾಟ್ಲ್ಯಾ ಸಬಾರ್ ತೆಂಪಾಥಾವ್ನ್ ಭಾಜಾಪಾ ಅನಿ ಪೋಷಕ್ ಸಂಘಟನಾಂ ಹಾಂಗಾಸರ್ ಆಪ್ಲಿ ಪಾಳಾಂ ರೊಂಬಂವ್ಚೆ ಪ್ರೇತನಾಂ ಕರಿತ್ತ್ ಅಸಾತ್. ಭಾಜಪಾ ನೇತಾ ಆನಿ ಕೋಮ್ ಉದ್ರೇಕಿತ್ ಭಾಷಣಾಂಕ್ ನಾಂವ್ ವೆಲ್ಲ್ಯಾ ಸುಬ್ರಹ್ಮಣ್ಯ ಸ್ವಾಮಿಕ್ ಹಾಚೊ ವೈಸ್ ಚಾನ್ಸಲರ್ ಕರುಂಕ್ ಕೆಲ್ಲೆಂ ಪ್ರೇತನ್ ಹಾಚೊ ಭಾಗ್ ಜಾವ್ನಸುಲ್ಲೆಂ. ಪುಣ್ SFI ತಸಲ್ಯಾ ಸಂಘಟನಾನಿಂ ಹ್ಯಾ ವೆಕ್ತಿಕ್ ಕ್ಯಾಂಪಸಭಿತರ್ ಪಾಂಯ್ ತೆಂಕುಂಕ್ ಸೊಡ್ಚೆನಾಂವ್ ಮ್ಹಣೊನ್ ಪರ್ಗಟ್ಣಿ ದಿಲ್ಲಿ. ಹಾಕಾ ಲಾಗೊನ್ ಕೇಂದ್ರ್ ಸರ್ಕಾರಾನ್ ಹ್ಯಾ ನಿರ್ಧಾರಾಥಾವ್ನ್ ಪಾಟಿಂ ವಚಾಜೆಂ ಪಡ್ಲೆಂ. ಹಾಚೆಂ ಹಗೆಂ ತಿರ್ಸುಚೆಂ ಖಾತಿರ್ ಸಂಘ್ ಪರಿವಾರನ್ JNU ಆತಂಕ್ ವಾದಿಂಚೆ ಬಿಡಾರ್ ಮ್ಹಣೊನ್ ಪ್ರಚಾರ್ ಕರುಂಕ್ ಆರಂಭ್ ಕೆಲ್ಲೆಂ. JNU0ತ್ ಆತಂಕ್ ವಾದ್ ಆಡಾಂವ್ಕ್ ಪ್ರತ್ಯೇಕ್ ಪೋಲಿಸ್ ಏಯ್ಡ್ ಪೋಸ್ಟ್ ಸ್ಥಾಪನ್ ಕರಿಜೆ ಮ್ಹಣೊನೀ ಥೊಡ್ಯಾ ಭಾಜಾಪಾ ನೇತಾನಿಂ ವಾಕ್ಮೂಲ್ ದಿಲೆಂ. ದೇಶ್ ದ್ರೋಹಿ ಮ್ಹಳ್ಳೊ ಅರೋಪ್ ಮಾಂಡ್ತೆಚ್ ಆಪ್ಲಿ ದಾಳ್ ಶಿಜೊಂಕ್ ಸಲೀಸ್ ಮ್ಹಣ್ ಮನಾಂತ್ ಲೆಕ್ ಲ್ಲ್ಯಾ ಹ್ಯಾ ಸಕ್ತೆನಿಂ ಅಖ್ರೇಕ್ ಆಪ್ಲಿ ಚಾಲಕೀ ದಾಕವ್ನ್ ಚ್ ಸೊಡ್ಲಿ. ನೇತಾಂಚ್ಯಾ ಹುಕ್ಮೆಪರ್ಮಾಣೆ ಚಲ್ಚ್ಯಾಕ್ ಅಫ್ಜಲ್ ಸ್ಮರಣ್ ಪೊಲೀಸಾಂಕ್ ಏಕ್ ನೀಬ್ ಜಾಂವ್ಕ್ ಪಾವ್ಲೆಂ. ಅತಾಂ ಭಾಜಾಪಾಕ್ ಪಾಟಿಂಬೊ ದಾಕಂವ್ಚ್ಯಾ, ಕೋಮುವಾದಾಕ್ ಪ್ರೋತ್ಸಾಹಿತ್ ಕರ್ಚ್ಯಾ ಥೊಡ್ಯಾ ಟಿ.ವಿ ಚಾನೆಲಾನಿಂ “JNU ಧಾಂಪಿಜಾಯ್” ಮ್ಹಳ್ಳೊ ಪ್ರಚಾರ್ ಚಲತ್ತ್ ಅಸಾ.

ಪ್ರಸ್ತುತ್ ಪೊಲಿಸ್ ಬಂಧೆಂತ್ ಅಸ್ಚೊ ಕನಯ್ಯ ಕುಮಾರ್ ಎಲಿಸಾಂವಾಂತ್ ಎಬಿವಿಪಿಕ್ ಸಲ್ವೊನ್ JNU ಯೂನಿಯನ್ ಅಧ್ಯಕ್ಶ್ ಜಾವ್ನ್ ವಿಂಚೊನ್ ಆಯಿಲ್ಲೊ. ಬರೊ ಏಕ್ ಪ್ರಸಂಗ್ ದಾರ್ ಜಾವ್ನಾಸ್ಚೊ ಕನಯ್ಯ ವಾಮ್ ಪಂಥೀಯ್ ವಿಚಾರ್ ಪ್ರಚಾರ್ ಕರ್ಚ್ಯಾ ಅನಿ ಹಿಂದು ಫ್ಯಾಸಿಸಂ ವಿರೋಧ್ ಉಲೊಂವ್ಚ್ಯಾ ಥೊಡ್ಯಾಚ್ ವಿಧ್ಯಾರ್ಥಿ ನೇತಾಂ ಪಯ್ಕಿಂ ಪಯ್ಲ್ಯಾ ಸ್ಥಾನರ್ ಅಸ್ ಲ್ಲೊ. ಹ್ಯೆ ವಿಶಿಂ ಸಂಘ್ ಪರಿವಾರಕ್ ವಿಶೇಸ್ ಖೊರೊಜ್ ಅಸ್ ಲ್ಲಿ. ಹೈದರಾಬಾದ್ ಯುನಿವರ್ಸಿಟಿಂತ್ ರೋಹಿತ್ ವೆಮುಲಾಚೆಂ ಮರಣ್ ಘಡ್ತಾನಾಂಯ್ ಭಾಜಪಾ ನೇತಾನಿಂ ತೊ ದೇಶ್ ದ್ರೋಹಿ ಜಾವ್ನಾಸುಲ್ಲೊ ಮ್ಹಳ್ಳೊ ವಾದ್ ಮಾಂಡ್ ಲ್ಲೊ. ಭೀಫ್ ಫೆಸ್ಟಿವಲ್ ಅಸಾ ಕೆಲ್ಲ್ಯಾಕ್ ಆನಿ ಮುಸಫರಬಾದ್ ಘಡಿತಾಂ ವಯ್ರ್ ಡೋಕ್ಯುಮೆಂಟರಿ ತಯಾರ್ ಕೆಲ್ಲ್ಯಾ ಕಾರಣಾ ಖಾತಿರ್ ವೆಮುಲಾಕ್ ತೊ ದಲಿತ್ ನ್ಹಂಯ್ ಬಗಾರ್ ದೇಶ್ ದ್ರೋಹಿ ಮ್ಹಣ್ ಹಾಂಣಿ ವೊಲಾಯ್ಲೆಂ. ಭಾರತೀಯ್ ಫಿಲ್ಮ್ ಶೆತಾಕ್ ವಿಶೇಸ್ ತಾಲೆಂತಾಕ್ ತಯಾರ್ ಕರ್ನ್ ದಿಲ್ಲ್ಯಾ ಪುಣೆ ಫಿಲಿಂ ಇನ್ಸ್ಟಿಟ್ಯೂಟ್ ಚೇರ್ ಮೆನ್ ಜಾವ್ನ್ ಸಿನೆಮಾ ಶೆತಾಚಿ ಮೂರ್ ಸಯ್ತ್ ನಾತ್ ಲ್ಲ್ಯಾ ಸಂಘ್ ಪರಿವಾರ್ ಪಾಟ್ಲಾವಿ ಗಜೇಂದ್ರ ಚೌಹಾಣಕ್ ನೆಮಿಯಾರ್ತಾನಾ ಥಂಯ್ಚ್ಯಾ ವಿದ್ಯಾರ್ಥಿನಿಂ ವ್ಹಡ್ ಪ್ರತಿಭಟನ್ ಚಲಯಿಲ್ಲೆಂ. ತ್ಯೆ ವೆಳಾರೀ ಕೇಂದ್ರ್ ಸರ್ಕಾರ್ ಅನಿ ಸಂಘ್ ಸಕ್ತೆನಿಂ ಹಾಂಕಾ ದೇಶ್ ದ್ರೋಹಿ ಮ್ಹಣ್ ವೊಲಾಯಿಲ್ಲೆಂ.

ಜಾತಿವಾದ್ ಅನಿ ಕೋಮುವಾದಾಚೆಂ ವಿರೋಧ್ ಕರ್ಚ್ಯಾ ವಿದ್ಯಾರ್ಥಿಂಕ್ ದೇಶ್ ದ್ರೋಹಿ ಮ್ಹಣ್ ಬಿಲ್ಲೊ ದಿಂವ್ಚಿಂ ಘಡಿತಾಂ ಆಜ್ ಸಮಾನ್ಯ್ ಜಾವ್ನ್ ಗೆಲ್ಯಾಂತ್. ಕ್ರಿಯಾತ್ಮಕ್ ಜಾವ್ನ್ ಪ್ರತಿಕ್ರಿಯಾ ದಿಂವ್ಚ್ಯಾ ವಿದ್ಯಾರ್ಥಿಂಕ್ ಆಪ್ಲ್ಯಾ ಮುಟಿಭಿತರ್ ಹಾಡ್ಚೆಂ ಪ್ರೇತನ್ ಸಂಘ ಪರಿವಾರ್ ಅನಿ ಭಾಜಪಾ ಸರ್ಕಾರಥಾವ್ನ್ ಚಲ್ತೆ ಅಸಾ. ಎಬಿವಿಪಿ ಅನಿ ಸಂಘ್ ಮನೋಭಾವಾಚಾ ಶಿಕ್ಷಕಾಂದ್ವಾರಿಂ ಆಪ್ಲ್ಯಾ ವಿಚಾರಾಂಕ್ ವಿರೋಧ್ ಕರ್ಚ್ಯಾ ವಿದ್ಯಾರ್ಥಿಚಿಂ ನಾಂವಾ ಸಂಘ್ ಪರಿವಾರಂಚಾ ನೇತಾಂಕ್ ಪಾವ್ತಾತ್. ಹ್ಯಾ ಪರ್ಮಾಣೆ ಸಂಧರ್ಭಾನುಸಾರ್ ಕಿತೆಂ ತರೀ ಕಾರಣಾ ಘಡುನ್ ಪಟ್ಟೆರ್ ನಾಂವಾ ಅಸ್ಲ್ಯಾ ವಿಧ್ಯಾರ್ಥಿಂಚೆರ್ ಕಠೀಣ್ ಕಾನೂನ್ ಕ್ರಮ್ ಘೆಂವ್ಚಿ ರೀತ್ ಅತಾಂ ಚಾಲ್ತೆರ್ ಅಸಾ. ಹಾಕಾ ಲಾಗೊನ್ ಪ್ರಸ್ತುತ್ ಅತಾಂ ದೇಶಾಂತ್ಲ್ಯಾ ನಾಂವಾಡ್ದಿಕ್ ಯುನಿವರ್ಸಿಟಿನಿಂ ಅರಾಜಕತೆಚಿ ಖುಣಾಂ ದಿಸೊನ್ ಯೆತೆ ಅಸಾತ್. ಮೋದಿ ಸರ್ಕಾರಾಚಾ ಆವ್ದೆಂತ್ ವಿರ್ಧ್ಯಾರ್ಥಿ ಸ್ವತಂತ್ರವಯ್ರ್ ಖಾಡು ಪಡಾತ್ ತರ್ ತ್ಯಾ ವಿಶಿಂ ಪ್ರತಿಕ್ರಿಯಾ ದಿಂವ್ಚಿ ಜವಾಬ್ದಾರಿ ಹರ್ ಎಕ್ಲ್ಯಾಕಿ ಅಸಾ.  

ಲೇಖಕ್ ಸ್ಟ್ಯಾನಿ ಬೆಳಾನ್ ಆಪ್ಲ್ಯಾ ಶಿಕ್ಪಾ ಆವ್ದೆವೆಳಾರ್ ಸ್ಟುಡೆಂಟ್ ಫೆಡರೇಶನ್ ಆಫ್ ಇಂಡಿಯಾ ಹಾಚೊ ಕೇರಳ್ ರಾಜ್ಯ್ ಸಮಿತಿಚೊ ಸಾಂದೊ ಜಾವ್ನ್ ವಿದ್ಯಾರ್ಥಿಂಚಾ ಹಕ್ಕಾಂಚಾ ರಾಕಣೆಖಾತಿರ್ ವಿವಿಧ್ ಚಳ್ವಳೆಂಕ್ ಮುಖೇಲ್ಪಣ್ ದಿಲಾಂ. ತೀನ್ ವರ್ಸಾಂ SFI ಕಾಸರ್ಗೋಡ್ ಜಿಲ್ಲಾ ಸಮಿತೆಚೊ ಸಾಂದೊ ಜಾವ್ನ್ ವಾವ್ರ್ ಕೆಲಾ.

Tags:  Stany Bela, Konkani Article, JNU, Konkani, Mangalore, Mangalorean, Mother Tongue

0 Comment/s.

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :


Connect

Maibhaas

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE