From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಅತ್ತೂರ್-ಕಾರ್ಕಳ್ ಸಾಂ ಲೊರೆಸಾಚಿ ಬಸಿಲಿಕಾ
Saturday, July 30, 2016
ಅತ್ತೂರ್-ಕಾರ್ಕಳ್ ಸಾಂ ಲೊರೆಸಾಚೆಂ ದೆವಾಳ್ ಬಾಸಿಲಿಕೆಚ್ಯಾ ಸ್ಥಾನಾಕ್ ಉಬಾರ್ಲಾಂ ಆಸ್ತಾಂ ಥಳಾವ್ಯಾ ಪಾಂವ್ಡ್ಯಾರ್ ಹಾಚಿ ಪರ್ಗಟ್ಣಿ ಆನಿ ಸಮರ್ಪಣಾಚೆಂ ಕಾರ್ಯೆಂ ಅಗೊಸ್ತ್ ಪಯ್ಲೆರ್ ಸಂಭ್ರಮಾನ್ ಚಲ್ತಲೆಂ.
ಮೊಗಾ ಬಾಂದಾವಳಿಚೆಂ ಕಾರ್ಕಳ್ ಅತ್ತೂರ್ಚೆಂ ಸಾಂ ಲೊರೆಸಾಚೆಂ ಪೂನ್‌ಶೆತ್ - ಧರ್ಮಾಂ ಮಧೆಂ ನಾಸೊಸ್ಣಿಕಾಯ್ ವಾಡುನ್ ಯೆಂವ್ಚ್ಯೆ ಆತಾಂಚ್ಯೆ ಪರಿಗತಿಂತ್ ವಿವಿಧ್ ಧರ್ಮಾಂಕ್ ಲಾಗಿಂ ಹಾಡ್ಚೆಂ ಥಳ್. ಸಾಂ ಲೊರೆಸಾಕ್ ಹರ್ಯೆಕಾ ಧರ್ಮಾಚೆ ಭಕ್ತಿಕ್ ವ್ಹಡ್ ಸಂಖ್ಯಾನ್ ಆಸಾತ್. ಕಥೊಲಿಕಾಂ ಪ್ರಾಸ್ ಹೆರಾಂಚೊ ಸಂಖೊ ದೊಡ್ತೊ ಆಸಾ ತೆಂ ಹಾಕಾ ರುಜ್ವಾತ್ ದಿತಾ. 2001 ಇಸ್ವೆಂತ್ ದೋನ್ ಶೆಕ್ಡ್ಯಾಂಚ್ಯಾ ಉಗ್ಡಾಸಾಕ್ ನವಿ ಇಗರ್ಜ್ ಬಾಂದ್ತಾನಾ, ಮುಕ್ಲ್ಯೆ ಕುಶಿನ್ 90 ಫಿಟ್ ಉಬಾರಾಯೆಚಿ ಜೊವ್ಳಿ ತೋರ್ ಬಾಂದ್ಲಿ. ಹಿಂದೂ, ಕ್ರಿಸ್ತಾಂವ್ ಆನಿ ಮುಸ್ಲಿಮ್ ಕಲಾ ವಿನ್ಯಾಸಾನ್ ಉಬಾರ್‌ಲ್ಲಿ ತೋರ್, ಅತ್ತೂರ್ ಸಾಂ ಲೊರೆಸಾಚೆಂ ಪೂನ್‌ಶೆತ್ ವಿವಿಧ್ ಧರ್ಮಾಂ ಮಧೆಂ ಮೊಗಾ ಬಾಂದಾವಳ್ ಆಸಾ ಕರ್ತಾ ಮ್ಹಣ್ ಪಾಚಾರ್ತಾ.
1784 ವರ್ಸಾ ಕರಾವಳಿ ಕ್ರಿಸ್ತಾಂವಾಂಕ್ ಬಂಧಿ ಕರುನ್ ಶ್ರಿರಂಗಪಟ್ನಾಕ್ ವ್ಹೆಲ್ಲೆಂ ಆಮಿ ಜಾಣಾಂವ್. ಅಟ್ರಾವ್ಯಾ ಶೆಕ್ಡ್ಯಾಚ್ಯೆ ಆಕೆರಿಕ್ ಮ್ಹಳ್ಯಾರ್ ಟಿಪ್ಪುಚ್ಯಾ ಮರ್ಣಾ ಉಪ್ರಾಂತ್ (ಕ್ರಿ.ಶ. 1799), ಬಂಧಿಂತ್ ಥಾವ್ನ್ ಸುಟ್ಕಾ ಮೆಳ್‌ಲ್ಲೆ, ವಾಂಚುನ್ ಉರು‌‌ಲ್ಲೆ ಕರಾವಳಿಚೆ ಕ್ರಿಸ್ತಾಂವ್ ಆಪ್ಲ್ಯಾ ಕುಟ್ಮಾಕ್ ಮೆಳುಂಕ್, ಆಪಾಪ್ಲ್ಯಾ ಮಾಯ್ ಗಾಂವಾಂಕ್ ಆಯ್ಲೆ. ಹಾಂಗಾಸರ್ ಯೆತಾನಾ ತಾಂಚಿ ಕೃಷಿ ಭುಂಯ್ ಅಕ್ರಿಸ್ತಾಂವಾಂಚ್ಯಾ ಬಳಿಷ್ಟ್ ಕುಳ್ವಾರಾಂಚ್ಯಾ ಹಾತಾಕ್ ಪಾವ್‌ಲ್ಲಿ. ಸ್ವತಾಚಿ ಕೃಷಿ ಭುಂಯ್ ನಾಸ್ತಾನಾ, ದಿಸ್ಪೊಡ್ತ್ಯಾ ಗ್ರಾಸಾ ಖಾತಿರ್ ಕೃಷಿ ಕೂಲಿ ಕಾರ್ಮಿಕ್ ಜಾವ್ನ್ ವಾವ್ರಿಜೆ ಪಡ್ಲೆಂ. ಕಾಮಾ ಖಾತಿರ್ ತಾಂದ್ಳಾ ರುಪಾರ್ ಕೂಲ್ ಮೆಳ್ತಾಲಿ ಜಾಲ್ಲ್ಯಾನ್, ಭುಕ್ ಥಾಂಬ್ತಾಲಿ ತರ್‌‍ಯಿ, ಹೆರ್ ಗರ್ಜಾಂಕ್ ಪಯ್ಶೆ ಮೆಳಾನಾತ್‌ಲ್ಲೆ. ಘಾಟಾರ್ ಕಾಫಿಯೆ ತೊಟಾಂನಿ ಪಯ್ಶಾಂ ರುಪಾರ್ ಕೂಲ್ ಮೆಳ್ತಾಲಿ ಜಾಲ್ಲ್ಯೆ ವರ್ವಿಂ, ತೊಟಾಂನಿ ಕಾಮ್ ಕರುಂಕ್ ವೆತಾಲೆ. ಜೂನ್ - ಜುಲಾಯ್ ಮಹಿನ್ಯಾಂತ್ ಯೆಣೆಲ್ ಬೆಳ್ಯಾಚಿ ಸಾಗ್ವಳಿ ಕೆಲ್ಯಾ ಉಪ್ರಾಂತ್ ಘಾಟಾಕ್ ವಚುನ್, ದಶೆಂಬರ್ ಪರ್ಯಾಂತ್ ತೊಟಾಂತ್ ವಾವುರ್ನ್, ಸಾವ್ಕಾರಾ ಥಾವ್ನ್ ಪಯ್ಶಾಂ ರುಪಾರ್ ಮಜುರಿ ಘೆವ್ನ್ ಗಾಂವಾಕ್ ಯೆತಾಲೆ. ಜನೆರಾಚ್ಯಾ ನಿಮಾಣ್ಯಾ ಹಫ್ತ್ಯಾಂತ್ ಸಾಂ. ಲೊರೆಸಾಚೆಂ ಫೆಸ್ತ್. ಅಶೆಮ್ ಆತಾಂಯೀ ಜನೆರಾಚ್ಯಾ ನಿಮಾಣ್ಯಾ ಹಫ್ತ್ಯಾಂತ್ ಧಾ ಗಾಂವ್ಚೆ ಸಾಂ ಲೊರೆಸಾಚೆ ಭಕ್ತ್ ಅತ್ತೂರಾಕ್ ಪಾವ್ತಾತ್.
ಅಕ್ರಿಸ್ತಾಂವಾಂಚೊ 'ಅತ್ತೂರ್ದ ದೇವೆರ್' :
1994 ಆನಿ 1997 ವ್ಯಾ ಪಾವ್ಸಾಳ್ಯಾಂತ್ ಬಗ್ಲೆಚ್ಯಾ ಗುಡ್ಯಾಚಿ ಮಾತಿ ಕೊಸ್ಳಲ್ಲ್ಯೆ ವರ್ವಿಂ, ಪರ್ನ್ಯೆ ಇಗರ್ಜೆ ಮುಕ್ಲೊ ತಗ್ಡಾಂಚೊ ಮಾಟವ್ ಪಡುನ್, ಪಾವ್ಸಾಚೆಂ ಉದಕ್ ವ್ಹಾಳುಂಕ್ ಅಡ್ಕಳ್ ಜಾಲಿ. ಹಾಚೊ ವಾಯ್ಟ್ ಪರಿಣಾಮ್ ಪರ್ನ್ಯೆ ಇಗರ್ಜೆಕ್ ಪಡ್ತೊ ಆಸ್‌ಲ್ಲೊ. ತ್ಯಾ ವೆಳಾರ್ ಕಾರ್ಕಳ್ ಆಸ್‌ಪಾಸ್ಚೆ ಹರ್ಯೆಕಾ ಧರ್ಮಾಚೆ ಭಕ್ತಿಕ್ ಯೇವ್ನ್, ದೀಸ್ ರಾತ್ ವಾವುರ್ನ್ ಉದಕ್ ಸೊಡೊವ್ನ್ ದಿಲೆಂ ಆನಿ ಪರ್ನ್ಯೆ ಇಗರ್ಜೆಕ್ ಜಾಂವ್ಕ್ ಆಸ್‌ಲ್ಲೊ ಅಪಾಯ್ ಚುಕಯ್ಲೊ. ಸಾಂ. ಲೊರೆಸಾ ಮುಕಾಂತ್ರ್ ದೆವಾ ಥಾವ್ನ್ ಲಾಬ್‌ಲ್ಲ್ಯಾ ಉಪ್ಕಾರಾಂಕ್ ಅರ್ಗಾಂ ಪಾಟೊಂವ್ಕ್ ಕ್ರಿಸ್ತಿ ಪರ್ಜಾ ಅತ್ತೂರು ಪೂನ್ ಶೆತಾಕ್ ಯೆತಾ ತರ್, ಅಕ್ರಿಸ್ತಾಂವ್ ಭಕ್ತಿಕ್ 'ಕಾರ್ಲದ ದೇವೆರ್' ಸಾಂ ಲೊರೆಸಾ ಕಡೆ ಮಾಗ್ಲ್ಯಾರ್ ಮೆಳ್ತಾ ಮ್ಹಳ್ಳ್ಯಾ ಭರ್ವಶ್ಯಾನ್, ಆಪ್ಲ್ಯಾ ಕಷ್ಟಾಂ ಆಕಾಂತಾ ವೆಳಾರ್ ಸಾಂ. ಲೊರೆಸಾಕ್ ಉಲೊ ಮಾರ್ನ್ ವಿವಿಧ್ ಆಂಗೊವ್ಣ್ಯೊ ಆಂಗಯ್ತಾತ್. ಕಾರ್ಲದ ದೇವೆರ್‌ಚೊ ಉಪ್ಕಾರ್ ಭಾವ್ಡುಂಕ್ ಪಯ್ಶಿಲ್ಯಾ ಗಾಂವಾಂತ್ ಥಾವ್ನ್ ಎಕೊಡೆಂ ವಾ ಪಂಗ್ಡಾನ್ 'ಪಾದಯಾತ್ರೆ' ಕರುನ್ ಫೆಸ್ತಾ ವೆಳಾರ್ ಹ್ಯಾ "ಕಾರ್ನಿಕದ ಜಾಗ" (ಕಾರಣಿಕ ಸ್ಥಳ)ಕ್ ಯೆವ್ನ್ ಪಾವ್ತಾತ್. ಮುಕ್ಲ್ಯೆ ಗೆಟಿ ಥಾವ್ನ್ ಇಗರ್ಜೆ ಭಿತರ್ಲ್ಯಾ ಆಲ್ತಾರಿ ಪರ್ಯಾಂತ್ ದಿಂಬಿಯಾಂನಿ ವೆಚೆಂ, ಭುರ್ಗ್ಯಾಂಚ್ಯಾ ದೆಣ್ಯಾ ಖಾತಿರ್ ನಾಣ್ಯಾಂನಿ 'ತುಲಾಭಾರ' ಕರ್ಚೆಂ, ಮರಣಾಂತಿಕ್ ಪಿಡಾ ಗೂಣ್ ಜಾಲ್ಲ್ಯಾಕ್ ಮನ್ಶಾಚ್ಯೆ ಉಬಾರಾಯೆ ತಿತ್ಲಿ ಲಾಂಬ್ ಮೆಣಾಚಿ ವಾತ್ ಜಳೊಂವ್ಚಿ, ಬಾಂಯ್ತ್ ಉದಕ್ ಮೆಳ್‌ಲ್ಲ್ಯಾ ಖಾತಿರ್ ತೆಂ ಉದಕ್ ಬಯಲು ಸೀಮೆ ಥಾವ್ನ್ ಜೊಗಸಾಣೆನ್ ಹಾಡುನ್ ಸಾಂ. ಲೊರೆಸಾಚ್ಯೆ ಆಲ್ತಾರಿಚಿಂ ಮೆಟಾಂ ನಿತಳ್ ಕರ್ಚೆಂ... ಅಸಲ್ಯೊ ವಿಶಿಷ್ಟ್ ಆಂಗೊವ್ಣ್ಯೊ ಅತ್ತೂರಾಂತ್ ಮಾತ್ರ್ ಪಳೆವ್ಯೆತ್. ಜಾಗ್ಯಾಚೆ ವಾ ಹೆರ್ ತಕ್ರಾರಾ ವೆಳಾರ್ 'ಕಾರ್ಲದ ದೇವೆರ್ ತೂಪೆರ್' ಮ್ಹಳ್ಳೆಂ ಉತರ್ ಆಯ್ಲೆಂ ತರ್ ತಾಂಚ್ಯೆ ಮಧ್ಲೊ ನ್ಯಾಯ್ ಸೊಂಪ್ಲೊ ಮ್ಹಣ್‌ಚ್. ಅಶೆಂ ಮಾಡ್ತಿರ್ ಸಾಂ. ಲೊರೆಸ್ ಅತ್ತೂರಾಂತ್ 'ಕಾರ್ಲದ ದೇವೆರ್' ಜಾವ್ನ್ ಸಕ್ಡಾಂಕ್ ಆಕರ್ಷಿತ್ ಕರ್ಚ್ಯೆ ಸಂಗಿಂ ಸುವಾರ್ತಾ ಪ್ರಸಾರ್ ಜಾವ್ನ್‌‌ಚ್ ಆಸಾ.
ದುಬ್ಳೆ ಪವಿತ್ರ್ ಸಭೆಚಿ ಆಸ್ತ್ :
ರೊಮಾಚ್ಯಾ ಆಡಳ್ತ್ಯಾ ಅಧಿಕಾರಿನ್ ಪವಿತ್ರ್ ಸಭೆಚಿ ಆಸ್ತ್ ಆನಿ ಗ್ರೇಸ್ತ್‌ಕಾಯ್ ಹಾಡ್ನ್ ದಿಂವ್ಕ್ ಪ್ರಧಾನ್ ದಿಯಾಕೊನ್ ಸಾಂ. ಲೊರೆಸಾಕ್ ಫರ್ಮಾಯ್ಲೆಂ. ಸಾಂ. ಲೊರೆಸಾನ್ ಕುರ್ಡೆ ಥೊಂಟೆ, ಆಂಗ್ಳೆ - ಪಾಂಗ್ಳೆ, ಕೊಡ್ಕಾರ್, ನಿರಾಧಾರಿ ಹಾಂಕಾಂ ಅಧಿಕಾರಿ ಮುಕಾರ್ ಹಾಡುನ್ "ಹೆ ದುಬ್ಳೆಚ್ ಪವಿತ್ರ್ ಸಭೆಚಿ ಆಸ್ತ್" ಮ್ಹಣ್ ಸಾಂಗ್ಲೆಂ, ಹ್ಯಾ ಖಾತಿರ್ ಸಾಂ. ಲೊರೆಸಾಕ್ ಮಾಡ್ತಿರ್ ಮಾರ್ಲೊ. ಅತ್ತೂರ್ ಸಾಂ. ಲೊರೆಸಾಚ್ಯಾ ಪೂನ್‌ಶೆತಾಂತ್ ಶೆಕ್ಡ್ಯಾಂ ಥಾವ್ನ್ ಫೆಸ್ತಾ ವೆಳಾರ್ ಹಜಾರಾಂನಿ ಭಿಕಾರಿ ಯೆತಾಲೆ ಆನಿ ತಾಂಕಾ ಆಂಗೊವ್ಣ್ ಆಂಗಯಿ‌ಲ್ಲೆ ಭಕ್ತಿಕ್ ಆಂಗೊವ್ಣ್ ಘಾಲ್ತಾಲೆ. ವರ್ಸಾಂ ಗೆಲ್ಲ್ಯೆ ಪರಿಂ ಭಿಕಾರಿಂಚೊ ಸಂಖೊ ಚಡತ್ ಯೆವ್ನ್, ಕಾನುನ್ ಆನಿ ಶಿಸ್ತ್ ಸಾಂಬಾಳುಂಕ್ ಆನಿ ಯಾತ್ರಿಕಾಂಕ್ ಸಲೀಸಾಯೆನ್ ಚಲುನ್ ವಚುಂಕ್ ಸಮಸ್ಯೆ ಉಬ್ಜಲೆ. ಸಂಬಂಧಿತ್ ಸರ್ಕಾರಿ ಇಲಾಖೆ ಆನಿ ಪೂನ್‌ಶೆತಾಚ್ಯಾ ಆಡಳ್ತ್ಯಾನ್ ಭಿಕ್ ಮಾಗ್ಚೆಂ ಆಡಾಂವ್ಕ್ ಆನಿ ಭಕ್ತಿಕಾಂನಿ ಆಂಗಯಿ‌ಲ್ಲಿ ಭಿಕಾರ್ಯಾಂಚಿ ಆಂಗೊವ್ಣ್ ಜಮೊವ್ನ್, ಫೆಸ್ತಾ ಉಪ್ರಾಂತ್ ವಾಂಟುಂಕ್ ನಿರ್ಧಾರ್ ಘೆತ್ಲೊ. 2000 ಇಸ್ವೆ ಥಾವ್ನ್ ಭಿಕಾರ್ಯಾಂಕ್ ಆಂಗಯಿ‌ಲ್ಲೆಂ ಭಿಕಾರ್ಯಾಂಚೆಂ ದಾನ್ ಜಮೊವ್ನ್ ಫೆಸ್ತಾ ಉಪ್ರಾಂತ್ಲ್ಯಾ ಸುಕ್ರಾರಾ ಭಿಕಾರ್ಯಾಂಚ್ಯೆ ಕಾಲೆತಿಕ್ ಸರಿ ಜಾವ್ನ್ 'ಅನ್ನದಾನ' ಸಂಗಿಂ ವಾಂಟುನ್ ದಿಂವ್ಚೆಂ ವಿಧಾನ್ ವಾಪರ್ತಾತ್. ಹ್ಯಾ ವರ್ಸಾಂನಿ ಭಿಕಾರ್ಯಾಂಚೊ ಸಂಖೊ ದೋನ್ ಹಜಾರಾಂ ಪರ್ಯಾಂತ್ ಪಾವ್ಲಾ. ಅಶೆಂ ಸಾಂ. ಲೊರೆಸಾ ಪರಿಂ, ತಾಚ್ಯಾ ನಾಂವಾಚೆಂ ಅತ್ತೂರ್ ಪೂನ್‌ಶೆತ್ ಪವಿತ್ರ್ ಸಭೆಚ್ಯೆ ಆಸ್ತಿ ಥಂಯ್ ಆಪ್ಲೊ ಹುಸ್ಕೊ ದಾಕೊವ್ನ್ ಆಸಾ. ಮಾತ್ರ್ ನ್ಹಯ್ ಅಶೆಂ ಭಿಕಾರ್ಯಾಂಕ್ ದಾನ್ ಜಮೊವ್ನ್ ಜೆವ್ಣಾ ಸಂಗಿಂ ದಾನ್ ವಾಂಟುನ್ ದಿಂವ್ಚೆಂ ಏಕ್ ಮಾತ್ರ್ ಪೂನ್‌ಶೆತ್ ಹೆಂ.
ಬಸಿಲಿಕಾ - ಮೇಜರ್ (ವ್ಹಡ್ಲಿ) ಆನಿ ಮಾಯ್ನರ್ (ದಾಕ್ಟಿ)...
ಬಸಿಲಿಕಾ ಮ್ಹಳ್ಳ್ಯಾ ಗ್ರೀಕ್ ಉತ್ರಾಚೊ ಮುಳಾವೊ ಅರ್ಥ್ "ರಾಯಾಳ್ ಘರ್". ರೊಮಾಗಾರಾಂನಿ ವ್ಹಡ್ ಆನಿ ಸೊಬಾಯೆನ್ ಸುಂರ್ಗಾರಾಯ್ಲ‌ಲ್ಯಾ ಘರಾಂಕ್ ವಾ ಸಾಲಾಂಕ್ ಆನಿ ಚಡ್ ಕರುನ್ ಚಕ್ರವರ್ತಿಂಚ್ಯಾ/ರಾಯಾಂಚ್ಯಾ ಘರಾಂಕ್/ರಾವ್ಳೆರಾಂಕ್ ಹೆಂ ನಾಂವ್ ದಿಲ್ಲೆಂ. ಕ್ರಿಸ್ತಾಂವಾಂನಿ ಹೆಂ ನಾಂವ್ ಭೊವ್ ಸೊಬಿತ್ ಇಗರ್ಜಾಂಕ್, ದೆವಾಚ್ಯಾ, ಸರ್ಗಾ ಸಂಸಾರಾಚ್ಯಾ ರಾಯಾಚ್ಯಾ, ಘರಾಂಕ್ ದಿಲೆಂ.
ಆತಾಂಚ್ಯಾ ಸಂದರ್ಭಾರ್ ಬಸಿಲಿಕಾ ಮ್ಹಳ್ಳ್ಯಾ ಉತ್ರಾಕ್ "ದಯ್ವಿಕ್ ರಾವ್ಳೆರ್" ಮ್ಹಳ್ಳೊ ಅರ್ಥ್ ಆಸಾ. ಕಾತೊಲಿಕ್ ಸನ್ನಿವೆಶಾಂತ್ ಬಸಿಲಿಕಾ ಮ್ಹಳ್ಯಾರ್ ಪಾಪಾ ಸಾಯ್ಬಾನ್ ವಿಶೇಸ್ ಸ್ಥಾನ್‌ಮಾನ್ ದಿಲ್ಲೆಂ ದೆವಾಳ್. ಬಸಿಲಿಕಾಕ್ ಕೊಂಕ್ಣಿಂತ್ ಮಹಾ ಮಂದಿರ್ ಮ್ಹಣ್ಯೆತ್. ಹಾಂತುಂ ವ್ಹಡ್ಲಿ (ಮೇಜರ್) ಆನಿ ದಾಕ್ಟಿ (ಮಯ್ನಾರ್) ಬಸಿಲಿಕಾ ಮ್ಹಣ್ ದೋನ್ ಥರ್ ಆಸಾತ್. ಸಂಸಾರಾರ್ ಫಕತ್ ಚಾರ್ ವ್ಹಡ್ಲ್ಯೊ ಬಸಿಲಿಕಾ ಆಸಾತ್. ತ್ಯೊ ಸಕ್ಕಡ್ ರೊಮಾಂತ್ ಆಸಾತ್ : ಸಾಂ ಜುವಾಂವ್ಚಿ ಲಾತೆರಾನ್ (ರೋಮ್ ದಿಯೆಸೆಜಿಚೆಂ ಕಾತೆದ್ರಾಲ್), ಸಾಂ ಪೆದ್ರುಚಿ, ಸಾಂ ಪಾವ್ಲುಂಚಿ, ಮರಿಯೆಚಿ. ತಾಂತುಂ ಪಾಪಾನ್ ಮಿಸಾಂ ಭೆಟೊಂವ್ಚಿ ವೆದಿ ಆನಿ ಪವಿತ್ರ್ ದಾರ್ವಾಟೆ ಆಸಾತ್.
ಸಂಸಾರಾರ್ 1739 ಧಾಕ್ಟ್ಯೊ ಬಸಿಲಿಕಾ ಆಸಾತ್ ಮ್ಹಣ್ ಲೆಕಾಂ ಸಾಂಗ್ತಾತ್. ಆತಾಂ ಭಾರತಾಂತ್ 22 (ಏಶಿಯಾಂತ್‌ಚ್ ಚಡ್) ಆಸಾತ್. ಹಾಂತ್ಲ್ಯೊ 18 ಲಾತಿನ್ ರಿತಿಚ್ಯೊ, 3 ಸಿರೊ ಮಲಬಾರ್ ರಿತಿಚ್ಯೊ ಆನಿ 1 ಸಿರೊ ಮಲಂಕರಾ ರಿತಿಚಿ. ಅತ್ತೂರ್ ಕರ್ನಾಟಕಾಂತ್ಲಿ ದುಸ್ರಿ ಬಸಿಲಿಕಾ. ಬೆಂಗ್ಳುರ್ಚಿ ಸೆಂಯ್ಟ್ ಮೇರಿ ಬಸಿಲಿಕಾ ಪಯ್ಲಿ.
ಅಜಾಪಿ ರಿತಿರ್ ಸ್ಥಾಪ್ಲಲ್ಯಾ, ಯಾತ್ರಿಕಾಂಚ್ಯೊ ಆಂಗೊವ್ಣೊ-ಇರಾದೆ ಸುಫಳ್ ಜಾಂವ್ಚ್ಯಾ, ಖುಬ್ ಭಕ್ತಿಕ್ ಆಸುನ್ ಧಾರ್ಮಿಕ್ ಆನಿ ಸೆವೆ ಕಾಮಾಂತ್ ಮೆತೆರ್ ಜಾವ್ನ್ ಆಸ್ಚ್ಯಾ ಇಗರ್ಜಾಂಕ್ ಪಾಪಾ ಖೆರಿತ್ ಪ್ರಕ್ರಿಯೆ ಉಪ್ರಾಂತ್ ಬಸಿಲಿಕಾಚ್ಯಾ ಸ್ಥಾನಾಕ್ ಉಬಾರ್ತಾ. ವಿಂಚ್ಲಲೆಂ ದೆವಾಳ್/ಇಗರ್ಜ್ ಮಯ್ನಾರ್ ಬಸಿಲಿಕಾ ಮ್ಹಣ್ ಪರ್ಗಟ್ಲ್ಯಾ ಉಪ್ರಾಂತ್ ರಿತಿಂ ಪರ್ಮಾಣೆಂ ತಾಚೆಂ ಸಮರ್‌ಪಣ್ ಚಲ್ತಾ. ತಸಲ್ಯೊ ಇಗರ್ಜೊ ಪಾಪಾ ಆನಿ ಭಕ್ತಿಕಾಂ ಮಧ್ಲ್ಯಾ ಬಾಂದಾಚೆಂ ಹಾತೆರ್ ಕಶೆಂ ಚಲ್ತಾತ್. ಅಸಲ್ಯಾ ಮಯ್ನಾರ್ ಬಸಿಲಿಕಾಂಕ್ ಫಲಾಣ್ಯಾ ಸಂಭ್ರಮಿಕ್ ದಿಸಾಂನಿ ಭೆಟ್ ದಿವ್ನ್ ಥಂಯ್ ಆಪ್ಲ್ಯಾ ಪಾತ್ಕಾಚಿ ದುಖ್ ಧರುನ್, ಭಾವಾರ್ಥ್ ಉಚಾರುನ್, ಪಾಪಾಚ್ಯಾ ಇರಾದ್ಯಾಂ ಖಾತಿರ್ ಮಾಗ್ತಾತ್ ತಾಂಕಾಂ ಪಾತ್ಕಾಚಿ ಶಿಕ್ಶಾ ಮಾಫಿ (ಇಂದುಲ್ಜೆನ್ಸ್) ಫಾವೊ ಜಾತಾ.
ಬಸಿಲಿಕೆಚ್ಯಾ ವಠಾರಾಂತ್ ಯಾತ್ರಿಕಾಂ ಖಾತಿರ್...
* ಹ್ಯಾ ಸಾಂ ಲೊರೆಸಾಚ್ಯಾ ಪೂನ್ ಶೆತಾಂತ್ ಸಕ್ಕಡ್ ಭಕ್ತಿಕಾಂಕ್‌ಯಿ ಸಮಾಧಾನ್, ಎಕ್ಯೆ ರಿತಿಚೊ ಸುಶೆಗ್ ಮೆಳ್ತಾ.
* ವರ್ಸಾ ಮಧೆಂಯ್ ಹಾಂಗಾ ಯೆತಲಿಂ ಭಕ್ತಿಕಾಂ ಭೊವ್ ಉಮೆದಿನ್ ಆನಿ ಅತ್ಮಿಕ್ ಅನ್ಭೊಗ್ ಜೊಡ್ಚ್ಯೆ ಉಮೆದಿನ್ ಹಾಂಗಾ ಭೆಟ್ ದಿತಾತ್. ತ್ಯಾ ಭಾಯ್ರ್ ರಜೆಚ್ಯಾ ಆನಿ ಹೆರಾಂ ದಿಸಾಂನಿಯ್ ಧರ್ಮಾಚೊ ಬೇಧ್ ನಾಸ್ತಾಂ ಲೋಕ್ ಹ್ಯಾ ಪೂನ್‌ಥಳಾಕ್ ಭೆಟ್ ದಿವ್ನ್‌ಚ್ ಆಸಾ. ಜಿಂ ಹಾಂಗಾ ಯೆತಾತ್ ತಿಂ ಅತ್ಮಿಕ್ ಧಾದೊಸ್ಕಾಯ್ ಜೊಡುನ್ ಪಾಟಿಂ ವೆತಾತ್.
* ಫೆಸ್ತಾ ವೆಳಾರ್ ಹಾಂಗಾ ಉಡುಪಿ ದಿಯೆಸೆಜಿಚೆ ಆನಿ ಹೆರ್ ದಿಯೆಸೆಜಿಂಚೆ ಯಾಜಕ್ ಕುಮ್ಸಾರಾಚಿ ಸೆವಾ ದಿತಾತ್ ತರ್ ಧರ್ಮ್‌ಭಯ್ಣಿ ಆನಿ ಲಾಯಿಕ್ ವ್ಯಕ್ತಿಂ ಥಾವ್ನ್ ವೆವೆಗ್ಳಿ ಸೆವಾ ಮೆಳ್ತಾ. ಸಕ್ಡಾಂ ಬೊರ್‍ಯಾ ಮನಾನ್ ಆನಿ ಸಂತೊಸಾನ್ ಸೆವಾ ದಿತಾತ್.
* ವರ್ಸಾ ಮಧೆಂ ಆನಿ ಫೆಸ್ತಾ ವೆಳಾರ್ ಕುಮಕ್ ವಿಚಾರುನ್ ಆಯ್ಲಲ್ಯಾಂಕ್ ಪೂನ್‌ಶೆತಾ ಥಾವ್ನ್ ಆಧಾರ್ ಮೆಳುನ್‍ಚ್ ಆಸಾ. ಗೆಲೆತ್ಯಾ ಫೆಸ್ತಾಂ ವೆಳಾರ್ ಜಾಯ್ತ್ಯಾ ಕುಟ್ಮಾಂಕ್ ಪಾವಾಶೆಂ ಆಧಾರ್ ದಿಲ್ಲೊ ಆಸಾ. ಪಿಡೆಸ್ತಾಂಕ್ ವಕ್ತಾಕ್, ಭುರ್ಗ್ಯಾಂಕ್ ಶಿಕ್ಪಾಕ್ ಆನಿ ಆಪ್ಲೆಂ ಘರ್ ನಾತ್ಲಲ್ಯಾಂಕ್ ವಸ್ಥಿ ಆಸಾ ಕರುಂಕ್ ಹೊ ಆಧಾರ್ ಗೆಲಾ.
* ಪೂನ್‌ಶೆತಾಂತ್ ಭಕ್ತಿಕಾಂಕ್ ನವಿ ಸೌಲತ್ ಕರುನ್‌ಚ್ ಆಸಾತ್.
* ಕಾರ್ಕಳ್ ಥಾವ್ನ್ ತಶೆಂಚ್ ದೂಪದ ಕಟ್ಟೆ ಥಾವ್ನ್ ಇಗರ್ಜೆಕ್ ಯೆಂವ್ಚೆ ರಸ್ತೆ ರೂಂದ್ ಆನಿ ಬರೆ ಕೆಲ್ಯಾತ್.
* ಇಗರ್ಜೆಚ್ಯೆ ಉಜ್ವ್ಯೆ ವಾಟೆನ್ ಎದೊಳ್‌ಚ್ ಮಾತಿ ಕಾಡುನ್ ಭಕ್ತಿಕಾಂಕ್ ಸೊಂಪೆಪಣಿಂ ಹೆಣೆಂತೆಣೆಂ ವಚುಂಕ್ ಜಾಯ್ತಿ ಸುವಾತ್ ಆಸಾ ಕೆಲ್ಯಾ.
* ಪುಷ್ಕರಣೆಕ್ ಆನಿ ಇಗರ್ಜೆ ಭಿತರ್ ಕೊಪೆಲ್ಮಾರಾಕ್ ನವೆಂ ರೂಪ್ ದಿಲಾಂ ಆನಿ ಯಾತ್ರಿಕಾಂ ಥಂಯ್ ಚಡ್ ಭಕ್ತ್ ಉಬ್ಜಶಿ ಕರುಂಕ್ ಪಳೆಲಾಂ.
* ಇಗರ್ಜೆಚ್ಯಾ ವಠಾರಾಕ್ ರಿಗ್ಚ್ಯೆ ದಾವ್ಯೆ ವಾಟೆನ್ ಭಕ್ತಿಕಾಂಕ್ ಕುಡಿಚ್ಯೊ ಗರ್ಜೊ ಸುದಾರ್ಸುಂಚ್ಯೆ ಖಾತಿರ್ 40+40 ಕಾಕುಸ್ ಬಾಂದ್ಚೆಂ ಯೋಜನ್ ಆಕೆರಿಚ್ಯಾ ಪಾಂವ್ಡ್ಯಾರ್ ಆಸಾ.
* 'ಯಾತ್ರಿಕ್ ನಿವಾಸ್' ಯೋಜನ್ ಚಾಲು ಆಸಾ. ಭಕ್ತಿಕಾಂಚ್ಯಾ ವಾಪರಾ ಖಾತಿರ್ ಧರ್ಣ್ ಆನಿ ತೀನ್ ಮಾಳಿಯಾಂಚೆಂ ಹೆಂ ಬಾಂದಪ್ ಉಬೆಂ ಜಾವ್ನ್ ಆಸಾ. ತಾಂತುಂ ಏಕ್ ಮಾಳಯ್ ಕುಮ್ಸಾರಾಂ ಖಾತಿರ್, ಏಕ್ 58 ಕುಡಾಂ ಆಸುನ್ ಭಕ್ತಿಕಾಂಕ್ ವಸ್ಥೆ ಖಾತಿರ್, ಏಕ್ ಹೊಲ್. ಸಗ್ಳ್ಯಾ ಬಾಂದ್ಪಾಕ್ ತೀನ್ ಶಿಡಿಯೊ ಆನಿ ದೋನ್ ಲಿಫ್ಟ್ ಅಶಿ ಮಾಂಡಾವಳ್ ಆಸಾ. ಬಾಂದ್ಪಾಕ್ ಬೆಸ್‍ಮೆಂಟ್ ಆಸುನ್ ತಾಂತುಂ ವಾಹನಾಂ ರಾವೊಂವ್ಕ್ ಸುವಾತ್, ಕ್ಯಾಂಟಿನ್ ಆನಿ ಸಾಂ. ಲೊರೆಸಾ ವಿಶಿಂ ಕಳೊಂವ್ಚೆಂ ಮ್ಯೂಸಿಯಮ್ ಆಸ್ತೆಲೆಂ.
ಸಾಂ ಲೊರೆಸ್ ರಗ್ತ್ ಸಾಕ್ಶಿ-ಬಸಿಲಿಕಾ
ಸಾಂ ಲೊರೆಸಾಚೆಂ ಭಕ್ತಿಪಣ್ ಸಗ್ಳ್ಯಾ ಸಂಸಾರಾರ್ ನಾಂವಾಡ್ಲಾಂ. ತೊ ಸುರ್ವಿಲ್ಯೆ ಪವಿತ್ರ್ ಸಭೆಚೊ (ಪಾಪಾ ಸಿಕ್ಸ್‌ಟಸ್ ದುಸ್ರ್ಯಾನ್ ನೆಮ್ಲಲೊ) ಉರ್ಬೆಸ್ತ್, ನಾಂವಾಡ್ದಿಕ್ ಪ್ರಧಾನ್ ಸೆವಕ್ ಆನಿ ಕ್ರಿಸ್ತಾ ಪಾಸತ್ ಆಪ್ಲೊ ಜೀವ್ ದಿಲ್ಲೊ ರಗ್ತ್ ಸಾಕ್ಶಿ. ರೊಮಾಚ್ಯೆ ಪವಿತ್ರ್ ಸಭೆಚ್ಯೆ ಆಸ್ತ್-ಬದ್ಕಾಚಿ ಜವಾಬ್ದಾರಿ ಪಳೆವ್ನ್ ಆಸ್ಲಲ್ಯಾ ತಾಣೆಂ ಆಪ್ಲ್ಯಾ ಹೆರ್ ಸಕ್ಕಡ್ ಜವಾಬ್ದಾರೆಚ್ಯಾ ವಾವ್ರಾ ಸವೆಂ ದುಬ್ಳ್ಯಾ-ಧಾಕ್ಟ್ಯಾಂಕ್ ತಾಂಚ್ಯೆ ಅಸಹಾಯಕೆತೆಂತ್ ಭುಜಾವಣ್ ಆನಿ ಧಯ್ರ್ ದಿಲೆಂ. ತಾಂಕಾಂ ಜಾಯ್ ತಿತ್ಲೆಂ ಖಾಣ್ ಜೆವಣ್ ಆನಿ ಕುಮಕ್ ದಿವ್ನ್ ತೊ ಸರ್ವಾಂಚ್ಯೆ ಮೆಚ್ವಣೆಕ್ ಆನಿ ಮೊಗಾಕ್ ಪಾತ್ರ್ ಜಾಲೊ.
ರೊಮಾಂತ್ 257 ವರ್ಸಾಂ ಕ್ರಿಸ್ತಾಂವಾಂ ವಿರೊಧ್ ಆಸ್ಲ‌ಲ್ಯೆ ದಗ್ದಣೆಂತ್ ಲೊರೆಸಾಕ್‌ಯಿ ಬಂಧೆಂತ್ ಘಾಲೊ. ತೊ ರೊಮಾಚ್ಯೆ ಪವಿತ್ರ್ ಸಭೆಚೆಂ ಆಡಳ್ತೆಂ ಪಳೆತಾಲೊ ದೆಕುನ್ ತಾಣೆಂ ಪವಿತ್ರ್ ಸಭೆಚೆಂ ಭಂಡಾರ್, ದಿರ್ವಿಂ, ಗ್ರೆಸ್ತ್‌ಕಾಯ್ ಆನಿ ಆಸ್ತ್ ಬದಿಕ್ ಸರ್ಕಾರಾಕ್ ಸಮರ್ಪಿಜೆ ಮ್ಹಳ್ಳ್ಯೆ ರೊಮಾಚ್ಯಾ ಆಡಳ್ತ್ಯಾ ಅಧಿಕಾರಿ ಹುಕ್ಮೆಕ್ ಲಾಗುನ್ ತಾಕಾ ತೀನ್ ದಿಸಾಂಚಿ ಸುಟ್ಕಾ ಮೆಳ್ಳಿ. ತ್ಯಾ ವೆಳಾ ಭಿತರ್ ತಾಣೆಂ ಪವಿತ್ರ್ ಸಭೆಂತ್ ಆಸ್ಲಲಿಂ ಸಕ್ಕಡ್ ದಿರ್ವಿಂ ದುಬ್ಳ್ಯಾಂಕ್ ವಾಂಟ್ಲಿಂ. ತಿಸ್ರ್ಯಾ ದಿಸಾ ರೊಮ್ ಶೆರಾಂತ್ಲ್ಯಾ ಸರ್ವ್ ಥೊಂಟ್ಯಾಂಕ್, ಅಂದ್ಳ್ಯಾಂಕ್, ಪಾಂಗ್ಳ್ಯಾಂಕ್, ಭೆರ್ಯಾಂಕ್ ಆನಿ ಸಕ್ಕಡ್ ಗತ್ ಆಧಾರ್ ನಾತ್ಲಲ್ಯಾ ದುಬ್ಳ್ಯಾ ಧಾಕ್ಟ್ಯಾಂಕ್ ಜಮೊ ಕರುನ್ ತಾಂಕಾಂ ಪುರ್ಶ್ಯಾಂವಾರ್ ಹಾಡುನ್ ರೊಮಾಚ್ಯಾ ಅಧಿಕಾರಿಂ ಹುಜಿರ್ ತೊ ಉಬೊ ಜಾಲೊ "ಹೆ ದುಬ್ಳೆಚ್ ಪವಿತ್ರ್ ಸಭೆಚಿ ಆಸ್ತ್" ಮ್ಹಣ್ ಸಾಂಗ್ಲೆಂ.
ಲೊರೆಸಾಚೆಂ ತಾರಿಪಾಂಚೆಂ ಹೆಂ ವರ್ತನ್ ಆನಿ ಉತ್ರಾಂ ಆಯ್ಕಲ್ಲ್ಯಾ ಆನಿ ಫಸ್ವುನ್ ಪಡ್ಲಲ್ಯಾ ತ್ಯಾ ಅಧಿಕಾರಿಂನಿ ದಿಲ್ಲ್ಯೆ ಹುಕ್ಮೆಕ್ ಲಾಗುನ್ ತಾಕಾ 258 ಅಗೊಸ್ತ್ 10 ವೆರ್ ಹುನ್ ಕಾಯ್ಲಿರ್ ಭಾಜುನ್ ಮಾರ್ಲೊ. ಸಮಾಧಾನಾನ್, ಸೊಸ್ಣಿಕಾಯೆನ್ ಆನಿ ಅಮ್ರುಕೊ ಹಾಸೊ ದಿವ್ನ್ ತಾಣೆಂ ಪ್ರಾಣ್ ಕೆಲೊ. ದುಬ್ಳ್ಯಾಂಕ್ ಗ್ರೆಸ್ತ್ ಕರುಂಕ್ ಗೆಲ್ಲೊ ಲೊರೆಸ್ ಪವಿತ್ರ್ ಸಭೆಂತ್ ನಾಂವಾಡ್ದಿಕ್ ರಗ್ತ್ ಸಾಕ್ಶಿ ಜಾಲ್ಲೊ ಆಸಾ.
1759 ವರ್ಸಾ ಕಾರ್ಕಳ್ ಲಾಗ್ಶಿಲ್ಯಾ ಅತ್ತುರಾಂತ್ ಹ್ಯಾ ರಗ್ತ್‌ಸಾಕ್ಶಿ ಸಾಂ ಲೊರೆಸಾಚ್ಯಾ ಮಾನಾಕ್ ಅಜಾಪಿ ರಿತಿರ್ ಭಕ್ತಿಪಣ್ ಸುರು ಜಾಲೆಂ ಆನಿ ಉಪ್ರಾಂತ್ ದೆವಾಳ್ ಉಬೆಂ ಜಾಲೆಂ. ವರ್ಸಾಂ ಉಬ್ತಾನಾ ಹಾಂಗಾ ವೆವೆಗ್ಳಿ ವಾಡಾವಳ್ ಆನಿ ಬದ್ಲಾವಣ್ ಜಾಲ್ಲಿ ಆಸಾ.
ಕಾರ್ಕಳ್ ಅತ್ತೂರಾಂತ್ಲ್ಯಾ ಸಾಂ ಲೊರೆಸಾಕ್ ಸಮರ್ಪಿಲ್ಲ್ಯೆ ಇಗರ್ಜೆಕ್ 2016 ಎಪ್ರಿಲ್ 26ವೆರ್ ವಾತಿಕನಾ ಥಾವ್ನ್ ಧಾಕ್ಟಿ (ಮೈನರ್) ಬಸಿಲಿಕಾ ಸ್ಥಾನ್‌ಮಾನ್ ಮೆಳ್ಳಾಂ. ಹ್ಯೆ ವರ್ವಿಂ ಕರ್ನಾಟಕಾಂತ್ ಆತಾಂ ಬೆಂಗ್ಳುರ್ಚ್ಯಾ ಸೈಂಟ್ ಮೇರಿಸ್ ಬಸಿಲಿಕಾ ಉಪ್ರಾಂತ್ ದುಸ್ರಿ ಬಸಿಲಿಕಾ ಆನಿ ಭಾರತಾಂತ್ಲ್ಯಾ 22 ಬಸಿಲಿಕಾಂ ಪಯ್ಕಿ ಏಕ್ ಮ್ಹಳ್ಳ್ಯಾ ಪಾಂವ್ಡ್ಯಾರ್ ಹಿ ಇಗರ್ಜ್ ಸೊಬ್ತಾ. ಹೆರ್ ಬಸಿಲಿಕಾಂ ಬರಿಂ ಹಾಂಗಾಯ್ ಚಲ್ಚ್ಯೆ ಲಿತುರ್ಜಿ-ಮಾಗ್ಣೆಂ-ಆರಾಧನ್ ಆನಿ ಹೆರ್ ದೇವ್‍ಸ್ತುತಿಕ್ ಚಡ್ ಮಹತ್ವ್ ಮೆಳ್ತಾ.
1759 ವರ್ಸಾ ಅಜಾಪಿ ರಿತಿನ್ ಸುರ್ವಾತ್ ಜಾವ್ನ್ ಸಾಂ ಲೊರೆಸಾಚ್ಯಾ ನಾಂವಾನ್ ಆನಿ ವಿನತೆನ್ ಲಾಗ್ಶಿಲ್ಯಾ ತಶೆಂ ಪಯ್ಶಿಲ್ಯಾ ಸರ್ವ್ ಧರ್ಮಾಂಚ್ಯಾ ಲೊಕಾಕ್ ಆಪ್ಣಾಶಿಂ ವೊಡ್ಚ್ಯಾ ಹ್ಯಾ ಧರ್ಮ್‌ಕೆಂದ್ರಾಕ್ ಆತಾಂ ಹೊ ಉಂಚ್ಲೊ ದರ್ಜೊ ಫಾವೊ ಜಾಲಾ. ಥಳಾವ್ಯಾ ಪಾಂವ್ಡ್ಯಾರ್ ಹಾಚಿ ಪರ್ಗಟ್ಣಿ ಆನಿ ಸಮರ್ಪಣಾಚೆಂ ಕಾರ್ಯೆಂ ಪೂನ್‌ಶೆತಾಂತ್ ಅಗೊಸ್ತ್ ಪಯ್ಲೆರ್ ಚಲ್ತಲೆಂ. ಉಡುಪಿ ದಿಯೆಸೆಜಿ ಖಾಲ್ ಆಸ್ಚ್ಯಾ ಹ್ಯಾ ಕೆಂದ್ರಾಂಚಿ ವಾರ್ಷಿಕ್ ಪರಬ್ ಹರೆಕಾ ಜನೆರಾಚ್ಯಾ ನಿಮಾಣ್ಯಾ ಹಫ್ತ್ಯಾಂತ್ ಚಲ್ತಾ.
(ಕುರ್ಪಾ: ರಾಕ್ಣೊ ಹಫ್ತ್ಯಾಳೆಂ)
Tags:
St. Lawrence Attur, Minor Basilica, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
2/27/2021 ಹೆರೊಲ್ಪಿಯುಸ್: ಏಕ್ ಅವ್ಚಿತ್ ಭೆಟ್...
-
12/20/2020 ಯುವಜಣಾಂಕ್ ಪ್ರೇರಣ್ - ಜೆಸ್ಸಿಕಾ ಆನ್ನಾ ಲಿಝಾ...
-
12/6/2020 ಆಸ್ತ್ ........
-
11/25/2020 ಭಾರತಾಚಿಂ ಖಬ್ರೆ ಟಿವಿ ಚಾನೆಲಾಂ ಮರಣ್ ಪಾವ್ಲ್ಯ...
-
11/9/2020 ನಾಂವ್ ಬದಲ್ಲ್ಯಾನ್ ಗಾಂವ್ ಬದಲ್ನಾಂ...!...
-
10/17/2020 ಮಂಗ್ಳುರ್‌ಚೊ ಖ್ಯಾತ್ ಗ್ರಾಫೊಲೊಜಿಸ್ಟ್, ಸ್ಟೇ&...
-
-
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.