From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಬಾಯ್ಲಾಂಚಿ ಭಾಸ್....
Monday, July 17, 2017ಬರಯ್ಣಾರಾ ವಿಶಿಂ ಜಾಣಾ ಜಾ...
'ಬಾಯ್ಲಾಚಿಂ ಭಾಸ್' ಮ್ಹಣ್ತಾನಾ, ಗುಸ್ಪಡ್ನಾಕಾತ್. ಉತ್ಪತ್ತಿ ಪುಸ್ತಕಾಂತ್ ವಾಚುಂಕ್ ಮೆಳ್ಚ್ಯಾ, ಮನ್ಶಾಪುತಾಂನಿ ಏಕ್ ಜಾವ್ನ್ ಬುರುಜ್ ಬಾಂಧ್ತಾನಾ, ಬಾಬೆಲಾಂತ್ ಕಾಂಯ್ ದೆವಾನ್ ಬಾಯ್ಲಾಂಕ್ ವೆಗ್ಳಿಚ್ ಬಾಸ್ ರಚ್ಲಿಗಾಯ್ ಮ್ಹಣ್ ಚಿಂತಿನಾಕಾತ್, ಚಿಂತ್ಲ್ಯಾರೀ, ಬಾಯ್ಲಾಂಕ್ ಕಿತ್ಯಾಕ್ ವೆಗ್ಳ್ಯಾಚ್ ಗಾಂವಾಂತ್ ಶಿಂಪ್ಡೊಂವ್ಕ್ ನಾ ಮ್ಹಣ್ ಶಿಣ್ ಉಚಾರಿನಾಕಾತ್. ಬಾಯ್ಲಾಂಕ್ ತಾಂಚಿಚ್ ಮ್ಹಳ್ಳಿ ಭಾಸ್ ಆಸಾ.....!!! ದಾದ್ಲ್ಯಾಂಕ್ ತಿ ಸಮ್ಜುಂಕ್ ಇಲ್ಲೆ ಕಷ್ಟ್ ...!! ಪೂಣ್ ತಿ ವೆಗ್ಳಿ ನೈಂ, ಭಾಸ್ ಏಕ್‌ಚ್ ಪೂಣ್ ತಾಣಿ ಉಲಂವ್ಚಿ ಶೈಲಿ ಆನಿ ರೀತ್ ವೆಗ್ಳಿ, ತಿತ್ಲೆಂಚ್!
ಎಕಾ ಕಾಳಾರ್ ಸುಮೇರಿಯನ್ ಬಾಯ್ಲಾಂ 'ಎಮಿಸಲ್' ಮ್ಹಳ್ಳಿ ಭಾಸ್ ಜಾಣಾ ಆಸ್‌ಲ್ಲಿಂ ಖಂಯ್! ಹಿ ಭಾಸ್ ಸಮಾಜೆಂತ್ ಚಾಲ್ತೆರ್ ಆಸ್ಚ್ಯಾ ಬಾಷೆ ಥಾವ್ನ್ ವೆಗ್ಳಿ ಆನಿ ಬಾಯ್ಲಾಂಕ್ ಮಾತ್!!! ತಿ ಥಂಯ್ಸರ್‍'ಚ್ ಮಾಯಾಗ್ ಜಾಲ್ಲಿ ಬರೆಂ ಜಾಲೆಂ, ನಾ ತರ್, ಆಯ್ತಾರಾ ಶೆರ್ಮಾಂವಾ ವೆಳಿಂ ಭುರ್ಗ್ಯಾಂಕ್ ಪಳೆಂವ್ಕ್ ಮ್ಹಳ್ಳೆಂ ನೀಬ್ ಘೇವ್ನ್, ಇಗರ್ಜೆಚ್ಯಾ ಪೊರ್ಟಿಕೊಂತ್ ಜಾಂವ್ಚ್ಯಾ ಬಾಯ್ಲಾಂಚ್ಯೊ ಗಜಾಲಿ, ಆನಿ ಭುರ್ಗ್ಯಾಂಕ್ ದೊತೊರ್ನಿಕ್ ಆಪೊವ್ನ್ ಹಾಡ್ನ್ ಇಗರ್ಜೆಚ್ಯಾ ಮೆಟಾನಿಂ ಬಸೊನ್ ಹ್ಯಾ ಬಾಯ್ಲಾಂನಿ ಕಾಡ್ಚ್ಯಾ ಸಂಸಾರಿ ಖಬ್ರ್ಯಾಂಕ್ ಚೊರ‍್ಯಾಂ ಚೊರ‍್ಯಾಂ ಕಾನ್ ದಿಂವ್ಚ್ಯಾಂ ದಾದ್ಲ್ಯಾಂನಿ ಕಾಂಯ್ ಬಾರಾಂತ್ ಬಸೊನ್ ಹಿ ಭಾಸ್ ಶಿಕಜೆ ಆಸ್‍ಲ್ಲಿ ಕೊಣ್ಣಾ....!!!
ಎಕುಣ್ತೀಸ್ ವರ್ಸಾಂಚಿ ಜಿಣಿ ಹಾಂವೆಂ ಸಂಪಯ್ಲಿ, ಎದೊಳ್ ಬಾಯ್ಲಾಂಚ್ಯಾ ಘಾಸಾಂಕ್ ಸಾಂಪ್ಡಾನಾಸ್ತಾಂ ಸುಶೆಗಾತ್ ಆಸಾಂ ತರ್‌ಯೀ ಆಯ್ಲೆವಾರ್ ಮ್ಹಜ್ಯಾ ಕಟ್ಟ್ಯಾಂತ್ ರಿಗ್‌ಲ್ಲ್ಯಾ ಹ್ಯಾ ವಿಷಯಾಚೆರ್ ಕಾಂಯ್ ತರ್‌ಯೀ ದೋನ್ ಸಬ್ದ್ ಬರಯಾಂ ಮ್ಹಣ್ ಭೊಗ್ಲೆಂ. ಬರಂವ್ಕ್ ಕಶೆಂಯ್ ಬರವ್ಯೆತ್ ಪೂಣ್........... ಹೊ ವಿಷಯ್ ಇಲ್ಲೊ ಸೂಕ್ಷ್ಮ್ ಜಾಲ್ಲ್ಯಾನ್ ಮುಕ್ಲೆಂ ಚಿಂತುನ್(?) ಇಲ್ಲೆಂ ಗಾಳ್ನ್, ಪೀಳ್ನ್ ಲಿಕ್ಲಾ. ವಾಚ್ಪಾಚಿ ಆನಿ ಬರವ್ಣೆಚಿ ಪಿಸಾಯ್ ಆಸ್‌ಲ್ಲ್ಯಾ ಮ್ಹಾಕಾ, ಜಾಯ್ತ್ಯಾ ಮಾನೇಸ್ತಾಂನಿ ಸ್ತ್ರೀಯಾಂಕ್ ಯಾ ಬಾಯ್ಲಾಂಕ್ ಉಲ್ಲೇಖ್ ಕರ್ನ್ ಬರಯಿಲ್ಲೆಂ ಹಾಸ್ಯ್ ವಾಸ್ಚೆಂ ಮ್ಹಳ್ಯಾರ್ ಭಾರಿಚ್ ಖುಶಿ. ಹೆಂ ಸ್ವತಂತ್ರ್ ಕಾಂಯ್ ಮ್ಹಾಕಾ ಥೊಡೊ ತೇಂಪ್ ಮಾತ್ ಕೊಣ್ಣಾ!!! ಅಂಕ್ವಾರ್ ಆಸ್ತಾನಾ ವ್ಹಡ್ನಾ... ಉಪ್ರಾಂತ್ ಕಾಂಯ್ ಅಸಲಿ ಪಿಸಾಯ್ ಉಗ್ತಾಡಾಕ್ ಆಯ್ಲಿ ತರ್ ಖುಶಿಯೆ ಸಂಗಿಂ ಮಿಶಿಯೊಯಿ ಹುಮ್ಟುನ್ ಕಾಡಿಜೆ ಪಡ್ತಿತ್! ಅಶೆಂ ಆಯ್ಲೆವಾರ್ ಎಕಾ ಅವ್ಜಿತ್ ಘಡಿಯೆ ಹಾಂವೆಂ ವಾಚ್‌ಲ್ಲ್ಯಾ ಎಕಾ ಹಾಸ್ಯ್ ಲೇಕಾನಾಚೊ ಉಲ್ಲೇಖ್ ಕೆಲೊ....... ಅಯ್ಯೋ....!! ಮಾಲಾಮತಿ, ಎಕ್ಲೆಂ ತರ್ಕಾಕ್ ದೆಂವ್ಲೆಂ ಮ್ಹಣ್ತಾಂ. ಗುಸ್ಪೊಡ್ ಗೊಂದೊಳ್ ಜಾವ್ನ್ ಮ್ಹಜ್ಯಾ ಹಾಡಾಂಚ್ಯೊ ಖಿಳಿಯೊ ನಿಕ್ಳೊಂವ್ಚ್ಯಾ ಪಯ್ಲೆಂ ಹಾಂವ್ ನಿಕ್ಳಲೊಂ. ಪೂಣ್ ತಾಣೆ ಘಟ್ಟ್ ತಾಳ್ಯಾನ್ ಬೊಬಾಟ್‌ಲ್ಲೆಂ ಉತರ್ ಮ್ಹಾಕಾ ಪರತ್ ಪರತ್ ಧೊಸುಂಕ್ ಲಾಗ್ಲೆಂ "ತುಮ್ಕಾಂ ಕಿತೆಂ ಕಳಿತ್, ಬಾಯ್ಲಾಂಚಿ ಭಾಸ್!?"
ತರ್ ಆತಾಂ ಬಾಯ್ಲಾಂಕ್ ವೆಗ್ಳಿಚ್ ಭಾಸ್ ಆಸಾಗೀ?? ಹ್ಯಾ ಸವಾಲಾಚ್ಯೆ ಸೊಧ್ನೆರ್ ಹಾಂವ್ ಪಡ್‌ಲ್ಲೊಂ. ಪೂಣ್ ಕೊಣಾಲಾಗಿಂ ವಿಚಾರುಂ?? ಪಪ್ಪಲಾಗಿಂ ವಿಚಾರುಂ ಯಾ ಸಂಸಾರಾಚ್ಯೊ ಗಜಾಲಿ ಖಾಂದಾರ್ ಘೆವುನ್, ಆಯ್ತಾರಾಚ್ಯಾ ಮಿಸಾ ಪಯ್ಲೆಂ, ಬಾಯ್ಲಾಂಚ್ಯಾ ಪಾತ್ಕಾಚೆಂ ವೊಜೆಂ ಆಯ್ಕೊಂವ್ಚ್ಯಾ ವಿಗಾರಾಲಾಗಿಂ .....??? ಸ್ತ್ರೀಯಾಲಾಗಿಂಚ್ ವಿಚಾರುಂ?? ಪೂಣ್ ಮಾಜ್ರಾಚ್ಯಾ ಗೊಮ್ಟ್ಯಾಕ್ ಘಾಂಟ್ ಬಾಂದ್ಚೆಂ ಧಯ್ರ್ ಕಶೆಂ ಆಪ್ಣಾಂವ್.....? ಸವಾಂಲಾಂಚೊ ಸಲಾದ್ ಸಂಗಿಂ ಜವಾಬ್ ಜಾಯ್ಜಯ್ ಮ್ಹಳ್ಳೆಂ ಹಟ್. ಆಯ್ಚ್ಯಾ ಕಾಳಾರ್ ಸವಾಲಾಂಕ್ ಜಾಪಿ ಸೊದ್ಚೆಂ ತಿತ್ಲೆಂ ಕಾಂಯ್ ಕಶ್ಟಾಂಚೆಂ ನಂಯ್. ತರ್ ಹ್ಯಾ ಬಾಯ್ಲಾಂಕ್ ಕಶೆಂ ಸಮ್ಜವ್ಯೆತ್ ಆನಿ ತಾಂಚಿಂ ಉತ್ರಾಂ ಕಶೆಂ ಸಮ್ಜುನ್ ಘೆವ್ಯೆತ್ ಮ್ಹಳ್ಳೆಂ ಹಾಂವೆಂಯ್ ಸೊಧುನ್ ಕಾಡ್ಲೆಂ...! ಪೂಣ್ ಹೆಂ ಸಾಧ್ಯ್‌ಗೀ ಮ್ಹಳ್ಳಿ ಸತ್ ಗಜಾಲ್ ನಖ್ಖಿ ಕರುಂಕ್ ಮಾಕಾಯೀ ವರ್ಸಾಂ ಲಾಗ್ತಿತ್.
ಹ್ಯಾ ಸವಾಲಾಕ್ ಜಾಪ್ ಸೊಧುಂಕ್ ಮುಕಾರ್ ಸರ್'ಲ್ಲೊ ಹಾಂವ್ ಕಾಂಯ್ ಪಯ್ಲೊ ನ್ಹಂಯ್, ಮ್ಹಜ್ಯಾ ಪಯ್ಲೆಂ ದುಸ್ರೆಯಿ ಆಸಾತ್ ಮ್ಹಳ್ಳಿ ಗಜಾಲ್ ಸಮ್ಜಲಿ. ಜಾಯ್ತೆ ಜಣಾಂನಿ ಜಾಪಿಚ್ಯಾ ಸೊಧ್ನೆರ್ ಮಾತ್ಯಾಚೆ ಕೇಸ್ ಹೊಗ್ಡಾಯಿಲ್ಲೆ, ಝಡ್‌ಲ್ಲೆ ಯಾ ತಾಂಚ್ಯಾ ಬಾಯ್ಲಾನಿಂಚ್ ಹುಮ್ಟುನ್ ಕಾಡ್‌ಲ್ಲೆ??? ಹೊ ವಿಶಯ್ ವೈಯುಕ್ತಿಕ್ ಜಾಲ್ಲ್ಯಾನ್ ತರ್ಕಾಕ್ ನಾಕಾ... ಪುಣ್ ಮುಕ್ಲ್ಯಾ ದಿಸಾಂನಿ ಮ್ಹಜ್ಯಾ ತಾಳ್ವೆರ್ ಚಾರ್ ಕೇಸ್ ಉರ್ಲ್ಯಾರ್ ಫುರೊ!
1975 ಇಸ್ವೆಂತ್ ಕ್ಯಾಲಿಫೋರ್ನಿಯಾಚ್ಯಾ ವಿಶ್ವ್‌ವಿದ್ಯಾನಿಲಯಾಂತ್ ಭಾಶೆ ಶಾಸ್ತ್ರಾಚಿ ಪ್ರೊಫೆಸರ್ ರೋಬಿನ್ ಲಕೊಫ್ ಹಿಣೆಂ, ಬಾಯ್ಲಾಂ ಉಲಯ್ತಾನಾ ಕಶೆಂ ಉಲಯ್ತಾತ್ ಆನಿ ತಾಂಚ್ಯಾ ಬಾಶೆಚಿಂ ಲಕ್ಷಣಾಂ ಕಸಲಿಂ ಮ್ಹಣ್ ಧಾ ಅಂಶ್ ಮಂಡನ್ ಕೆಲೆ. ಕಾಂಯ್ ತಿ ದಾದ್ಲ್ಯಾಂಚೆ ಕಶ್ಟ್ ಸಮ್ಜಲಿ ಮ್ಹಣ್ ಚಿಂತಾ. ಆಮ್ಚಿ ಪಾಪ್ ಬಿರ್ಮತ್ ಚಿಂತುನ್ ತಿಣೆ ಕಾಂಯ್ ಥೊಡೊ ವಾವ್ರ್ ಕೆಲೊ. ತಿಣೆ ಸಾಂಗ್ಲೆಂ ಮ್ಹಣ್ ಆಮ್ಚಿಂ ಬಾಯ್ಲಾಂ ಆಯ್ಕತಿತ್ ?!!! ಥೊಡಿಂ ತಿಜ್ಯಾ ತತ್ವಾಂಕ್‌ಚ್ ಸವಾಲ್ ಉಡೊಂವ್ಕ್ ಲಾಗ್ಲಿಂ. ತಿಕಾ ತಿಚ್ಯಾಚ್ ಜಾತಿಚ್ಯಾ ಬಾಯ್ಲಾಂಕ್ ಸಮ್ಜುನ್ ಹಿಂ ಸೂತ್ರಾಂ ಮಂಡನ್ ಕರುಂಕ್ ಸುಲಭ್ ದಿಸ್ಲೆಂ ಜಾಯ್ಜಯ್..!! ಪುನ್ಯಾನ್ ತಿಣೆ ಚಾಳೀಸ್ ವರ್ಸಾಂ ಆದಿಂ ಕಾಮ್ ಕೆಲ್ಲ್ಯಾನ್ ಜಾಲೆಂ. ಅತಾಂಚ್ಯಾ ಕಾಳಾರ್ ಕೆಲ್ಲೆಂ ತರ್ ತಿಚ್ಯಾ ತತ್ವಂ ಸಂಗಿಂ ತಿಕಾಯ್ ಧುಳ್ ಖಾಯ್ಜೆ ಪಡ್ತೆಂ.
ಆಶೆಂ ಮ್ಹಣ್ತಾನಾ ಬಾಯ್ಲಾಂಕ್ ಸಮ್ಜುಚೆಂ ತಿತ್ಲೆಂ ಸುಲಭಾಯೆಚೆಂ ನಂಯ್ ಮ್ಹಣ್ ಕಳ್ಳೆಂ. ಹೊ ಸಬಾರಾಂಚೊ ವಾದ್!!!. ತಾಂಕಾ ಪೊಳೆ, ತಾಂಚೆಂ ಪೊಳೆ, ತಾಚೆಂ ಕಾಪಡ್ ಪೊಳೆ, ತಾಂಚೆ ಘರ್ ಪೊಳೆ, ತಾಂಚಿ ಮರ್ಜಿ ಪೊಳೆ ........ ಆಮ್ಕಾಂ ಕಾಲೆಂ ಆಸಾ? ಆಮ್ಚೆ ಕಡೆಂ ಕಾಲೆಂ ಆಸಾ? ಆಮ್ಗೆರ್ ಕೆದಾಳಾ ಯೇಂವ್ಕ್?... ಮ್ಹಣ್ ಆಪ್ಣಾಚ್ಯಾ ಬಾಯ್ಲೆನ್ ಸದಾಂ ಸವಾಲಾಂ ಉಡಾಯ್ತಾನಾ ಚುಕವ್ನ್ ಏಕ್ ಪಾವ್ಟಿಂ ಪುಣಿ 'ತಾಜ್ಯಾ ಬಾಯ್ಲೆಕ್ ಪೊಳೆ' ಮ್ಹಣ್ ಆಮಿಂ ಸಾಂಗ್ಲೆಂ ತರ್ ಜಾಲೆಂ... ಮುಕ್ಲೆಂ ಸಾಂಗ್ಚೆಂ ಗರ್ಜ್ ನಾ ಮ್ಹಣ್ ಚಿಂತಾ. ಘರ್ಚ್ಯಾ ಕುಜ್ನಾಂತ್ ಹಾರ್ ಬಾರ್ ಸಾಂಬಾಳ್ಚ್ಯಾ ಬಾಯ್ಲೆನ್, ಅಪ್ಲೊ ದಾದ್ಲೊ ಸಕಾಳಿಂ ಕಾಮಾಕ್ ವೆತಾನಾ 'ತೆಂ ನಾ', 'ಹೆಂ ನಾಂ', 'ತೆಂ ಹಾಡ್', 'ಹೆಂ ಹಾಡ್'... ಮ್ಹಣ್ ಹಾಣೆಂ ಖಾಡ್ ತಾಸ್ತಾನಾ ಸಾಂಗ್‌ಲ್ಲಿ ಆಮ್ಟಾನ್ ಮಿರ್ಸಾಂಗೆಚಿ ಲದಿನ್, ಹಜಾರ್ ರಾಟವಳಿಂನಿ ಮೆತೆರ್ ಆಸ್ಚ್ಯಾ ದಾದ್ಲ್ಯಾಚ್ಯಾ ಉಡಾಸಾಂತ್ ಸಾಂಜ್ ಜಾತಾನಾ ಉರ್ಚಿ ಅರ್ದಿಚ್ ಸಾಂಜೆರ್ ಕಾಮಾಚ್ಯಾ ಪುರಾಸಾಣೆನ್ ಯೆತಾನಾ, ವಿಸ್ರುನ್ ಗೆಲ್ಲ್ಯಾಕ್, ಬಾಯ್ಲೆಚಿ ಝಡ್ತಿ, ಕುಮ್ಸಾರ್ ಆನಿ ಉಪ್ರಾಂತ್ ಪ್ರಾಚಿತ್ ಸಯ್ತ್! ನಿದೊಂಕ್ ವೆತಾ ಮ್ಹಣಾಸರ್ ಮಾತ್!!! ಪತಿಣ್, ಬಾಯ್ಲ್, ಘರ್ಕಾರ್ನ್, ಯೆಜ್ಮಾನ್ ಜಾವ್ನಾಸ್ಚ್ಯಾ ತಿಕಾ ಬಾಳ್, ಭಾಂಗಾರ್, ಪುತ್ತು, ಹೆರ್ ಕಿತೆಂ ಕಿತೆಂ.......... ಮ್ಹಣ್ ವೊಲಾಯ್ಲಾಂ. ಸಂಗಿಂ ಸಬ್ದ್-ಸಬ್ದಾಂಕ್, ಉತ್ರಾಂ-ಉತ್ರಾಂಕ್ ಪೂರ್ವ್ ಪ್ರತ್ಯಯ್ ಜಾವ್ನ್ 'ಬಾ' ಆನಿ 'ಮಾ' ಸೆರ್ವತಾ. ಸಾಂಗಾತ್ಯಾಂ ಥಂಯ್ ಆಸ್ಚೊ ಮೋಗ್ ವ್ಯಕ್ತ್ ಕರ್ಚೆಂ ಹೆಂ ಏಕ್ ಸುಲಭ್ ವಿಧಾನ್. ಏಕ್ ಸಾಂಗ್ಣಿ ಆಸಾ ಹಜಾರ್ ನಾಂವಾಂ, ರೂಪ್ ಏಕ್‌ಚ್. ಪೂಣ್ ಥೊಡಿಂ ಘಡಿತಾಂ ಹ್ಯಾ ಸಾಂಗ್ಣೆಕ್ ತಾಳ್ ಪಡ್ತೆನಾಂತ್ ಮ್ಹಣ್ ಆಯ್ಕಲಾಂ. ಕಾಂಯ್ ವಿವಿಂಗಡ್ ನಾಂವಾಂ ಸಂಗಿಂ ವಿವಿಂಗಡ್ ರುಪಾಂ ಮೆಳುನ್ ವೆಗ್ಳ್ಯಾಚ್ ರಿತಿನ್ ಆಕ್ರಮಣ್ ಜಾವ್ನ್ ಆಸಾಗೀ ಮ್ಹಣ್ ಸಮ್ಜನಾ.
ಆಮಿಂ ಉಲಂವ್ಚಿ ಭಾಸ್ ಜಾತ್, ಗಾಂವ್, ಪ್ರಾಂತ್ಯ್, ರಾಜ್ಯ್, ದೇಶಾಚೆರ್ ಹೊಂದೊನ್ ಆಸಾ. ಲೋಕ್ ವಿವಿಂಗಡ್ ಭಾಸ್ ಉಲಯ್ತಾತ್. ದಾದ್ಲ್ಯಾಂಕ್ ವಿಂಗಡ್ ಆನಿ ಬಾಯ್ಲಾಂಕ್ ವಿಂಗಡ್ ಮ್ಹಳ್ಳಿ ಭಾಸ್ ನಾ. ತಿ ಜಲ್ಮನಾತ್‌ಲ್ಲ್ಯಾರ್‌ಚ್ ಬರೆಂ. ವೈಜ್ಞಾನಿಕ್ ಸತಾ ಪರ್ಮಾಣೆಂ ದಾದ್ಲ್ಯಾಂಚಿ ಭಾಸ್ ದಾದ್ಲೊ ಸಮ್ಜತಾ ತರ್ ಬಾಯ್ಲಾಂಚಿ ಭಾಸ್ ಬಾಯ್ಲಾಂಕ್ ಮಾತ್ ಸಮ್ಜತಾ. ದೆಕುನ್ ಜಾಯ್ಜಯ್ ಕಾರ್ಯಾಂಕ್ ಯಾ ಇತರ್ ಸಂದರ್ಭಾಂನಿ ಲೋಕ್ ಜಮ್ತಾನಾ ಬಾಯ್ಲಾಂಚೊ ವಿಂಗಡ್ ಪಂಗಡ್ ಆನಿ ದಾದ್ಲ್ಯಾಂಚೆ ವಿಂಗಡ್ ಪಂಗಡ್ ಪಳೆಂವ್ಕ್ ಮೆಳ್ತಾತ್. ಪ್ರೊಫೆಸರ್ ರೋಬಿನ್ ಲಕೊಫ್ ಹಿಣೆಂ ಸಾಂಗ್ಚೆ ಪರ್ಮಾಣೆಂ ಅಶೆಂ ಉಲಂವ್ಕ್ ಸಂಗಿಂ ಮೆಳ್ಚ್ಯಾ ಬಾಯ್ಲಾಂ ಕಡೆ ತರ್ಕಾಕ್ ಜಾಯ್ತೆ ವಿಷಯ್ ಆಸ್ತಾತ್ ಖಂಯ್. ತಿಂ ಉಲಯ್ತಾನಾ ಕೆದಾಳಾಯ್ ತಾಂಚೆಂ.... ಹಾಂಚೆಂ... ತಾಂಗೆರ್.... ಹಾಂಗೆರ್... ಮ್ಹಳ್ಯಾರ್ ತ್ಯಾ ಪಂಗ್ಡಾಂತ್ ನಾತ್‌ಲ್ಲ್ಯಾ ಹೆರಾಂ ವಿಶ್ಯಾಂತ್ ಚಡ್ ಉಲಯ್ತಾತ್ ಖಂಯ್. "ಆಳೆಯಾ ಸೆರ್ಪಿನಾ ತ್ಯಾ ಮೆರಿಚಿ ಧುವ್ ಮಾಪ್ಳ್ಯಾ ಸಾಂಗಾತಾ ಧಾವ್ಲಾಂ ಖಂಯ್..........!!! ಇನಾಸಾಚ್ಯಾ ಧುವೆಕ್ ಕಾಜಾರ್ ಜಾವ್ನ್ ಸ ಮಹಿನೆ ಜಾಲೆ ಮಾತ್, ಸಾತ್ವೊ ಮಹಿನೊ ಮ್ಹಣ್ ಗುರ್ವಾರಿಕ್ ಧಾಡ್ಲಾಂ ಖಂಯ್...!!!!! ಲಾದ್ರುಚೊ ಪೂತ್ ಸದಾಂಯ್ ತ್ಯಾ ಸುಗುಣ ಕರ್ ಆಸ್ತಾ ಖಂಯ್.......!!!" ಇತ್ಲೆಂ ಸರ್ವ್ ಉಲಯಿಲ್ಲ್ಯಾ ಉಪ್ರಾಂತ್ ಮಾಗಿರ್ ವೊಕ್ಕಾಣೆ... ''ಆಮ್ಕಾಂ ಕಿತ್ಯಾಕ್ ತಾಂಚಿ ಹಾಂಚಿ ಖಬರ್..... ಸಾಂಗ್‍ಲ್ಲ್ಯಾಬರಿಂ ಅಂದ್ರಾಮಾಚಿ ಧುವ್ ಆತಾಂ ಘೊವಾ ಒಟ್ಟುಕ್ ರಾವ್ತಾಗೀ?" ಖಬ್ರಾಳೆಂ ಕಾರ್ಮಿಣ್ ಗುಟ್ ಫಡ್ತಾನಾ ಸೆರ್ಪಿನ್ ಕಾರ್ಮಿಣಾಚಿ ಸೊಭಾಯ್ ವರ್ಣಿತಾ. "ತುಜೆಂ ಕಾಪಡ್ ಕಿತ್ಲೆಂ ಸೊಭಿತ್ ಆಸಾ ಸಾಯ್ಬಿಣಿ ಖಂಯ್ ಘೆತ್‌ಲ್ಲೆಂ, ಬ್ಲೌಸ್ ಬರೀ ಡೀಪ್ ಶಿಂವಯ್ಲ್ಯಾಯ್, ಸೊಭಿತ್ ದಿಸ್ತಾ.....!!!". ಅಶೆಂ ಸಂಗಿಂ ಮೆಳ್‌ಲ್ಲ್ಯಾ ಬಾಯ್ಲಾಂ ಥಂಯ್ ಜಾಯ್ತೆ ವಿಷಯ್ ತರ್ಕಾಕ್ ಆಯ್ಲೆ ತರ್‌ಯೀ ತೆ ವಿಚಾರ್ ಅಂತ್ಯ್ ನಾತ್‌ಲ್ಲ್ಯಾ ತರ್ಕಾಚೆ ಜಾವ್ನಾಸ್ತಾತ್ ಮ್ಹಣ್ ಮ್ಹಣ್ತಾ ಪ್ರೊಪೆಸರ್ ರೋಬಿನ್ ಲಕೊಫ್. ಅಶೆಂ ಸಂಗಿಂ ಮೆಳೊನ್ ಜಾಲ್ಲ್ಯಾ ಜುಂತಾಚೊ ಅಸರ್ ಘರಾ ಮಾತ್ರ್ ಖಂಡಿತ್ ಪಡ್ತಾ ಆಸ್ತಾಲೊ. ನಾ ತರ್ ಇತ್ಲೆ ಸರ್ವ್ ದಾದ್ಲೆ ಹ್ಯಾ ಬಾಯ್ಲಾಂಕ್ ಕಶೆಂ ಸಮ್ಜುಂಚೆ ಮ್ಹಳ್ಲ್ಯಾ ವಿಷಯಾಚೆರ್ ತಕ್ಲಿ ಧಾಡಯ್ತೆಗೀ??!!
ಕುಟಾಮ್ ಮ್ಹಣ್ತಾನಾ ಸ್ತ್ರೀಯೆಚೊ ಪಾತ್ರ್ ಪ್ತಮುಖ್ ಜಾವ್ನಾಸ್ತಾ. ಸ್ತ್ರೀ ಧೈರಾಧೀಕ್. ದಾದ್ಲೊ ಕುಟ್ಮಾ ಥಾವ್ನ್ ಪಯ್ಸ್ ಜಾಲೊ ಯಾ ಅಂತರ್ಲೊ ತರೀ ಸ್ತ್ರೀ ಆಪ್ಲೆಂ ಘರ್ ಸಾಂಬಾಳ್ತಾ. ಬಾಯ್ಲಾಂನಿ ದಾದ್ಲ್ಯಾ ವರ್ನಿಂ ಇಲ್ಲೆಂ ಚಡ್ ಉಲಂವ್ಚೆಂ ಜಾಲ್ಲ್ಯಾನ್ ಜಾಯ್ಜಯ್ ಬಾಯ್ಲಾಂ ವಿಶಿಂ ಜಾಯ್ತೆಂ ಬರಯ್ಲಾಂ ಆನಿ ವಾಚುಂಕ್ ಮೆಳ್ತಾ. ತಾಂಚೆ ಗೂಣ್ ನಡ್ತೆಂ, ಜೀವನ್ ಶೈಲಿ ವೆಗ್ಳಿಚ್. ತಾಂಚೆ ಧ್ಯಾನ್ ವೆಗ್ಳ್ಯಾಚ್ ಸಂಗ್ತಿಂಚೆರ್. ತಿಂ ತಿಂ ಸಂಗಿಂ ಮೆಳ್ತಾನಾ ತಾಂಚೊ ಸಂಸಾರ್‌ಚ್ ವೆಗ್ಳೊ. ಸೊಭಾಯೆಕ್ ಆನಿ ಸೊಭಾಯೆಚ್ಯಾ ಸಂಗ್ತಿಂಚೆರ್ ತಾಂಕಾಂ ಪಿಸಾಯ್ ಚಡ್. ಅಶೆಂ ಮ್ಹಣ್ತಾನಾ ಆಪ್ಲ್ಯಾಪಣಾಕ್ ತಿಂ ಸೊಡುನ್ ದೀನಾಂತ್. ಆಪ್ಲ್ಯಾ ಕುಟ್ಮಾಕ್ ಸಮಾಜೆಂತ್ ವಯ್ರ್ ಹಾಡಿಜಯ್. ಆಪ್ಣೆಂಯ್ ಹೆರಾಂ ಬರಿಂ ಸೊಭಾಜಯ್. ಆಪ್ಣಾಕೆರ್ ನವ್ಯೊ ನವ್ಯೊ ವಸ್ತು ಯೇಜಯ್ ಮ್ಹಳ್ಳಿ ಆಶಾ. ಕಿತ್ಯಾಕ್ ತಿಂ ಆಶಾವಾದಿ ಜಾವ್ನಾಸ್ತಾತ್ ಖಂಯ್. ತೆಂ ಬರೆಂಚ್ ಮ್ಹಣುಯಾಂ, ಪೂಣ್ ಜಾಯ್ತ್ಯಾ ದಾದ್ಲ್ಯಾಂನಿ ಆಪ್ಣಾಚ್ಯಾ ಆಶಾವಾದಿ ಬಾಯ್ಲಾಂಚಿ ತಾನ್ ಭಾಗಂವ್ಕ್ ವಚೊನ್ ಆಪ್ಲ್ಯಾ ಜಿವಾಚಿಚ್ ಆಶಾ ಹೊಗ್ಡಾಯ್ಲ್ಯಾಮೂ. ಹಾಂಕಾಂ ಕಾಲೆಂ ಮ್ಹಣ್ಚೆಂ!! ಪುಣ್ ಏಕ್ ಮಾತ್ ಸತ್, ಏಕ್ ಸ್ತ್ರೀ ಘರ್ ಘಡುಂಕ್‍ಯೀ ಸಕ್ತಾ, ಮೊಡುಂಕ್‍ಯೀ ಸಕ್ತಾ!!
ಮ್ಹಜ್ಯಾ ಕಟ್ಟ್ಯಾಂತ್ ರಿಗ್‌ಲ್ಲ್ಯಾ ಸವಾಲಾಚಿ ಜಾಪ್ ತುಮ್ಕಾಂಯೀ ಕಳ್ಳಿ ಜಾಂವ್ಕ್ ಪುರೊ. ಬಾಯ್ಲಾಂಕ್ ಆನಿ ದಾದ್ಲ್ಯಾಂಕ್ ಮ್ಹಣ್ ವಿಂಗಡ್ ಭಾಸ್ ನಾ. ಸಂಸಾರಿಂ ಏಕ್ ಕುಟಾಮ್ ಬಾಂಧುನ್ ಹಾಡಿಜಯ್ ತರ್ ದಾದ್ಲ್ಯಾಚೊ ಪಾತ್ರ್ ಕಿತ್ಲೊ ಆಸಾಗೀ ತಿತ್ಲೊಚ್ ಬಾಯ್ಲೆಚೊಯ್ ಆಸಾಜಯ್. ಜೊಕ್ತ್ಯಾ ವೆಳಾರ್ ಫಾವೊತೊ ನಿರ್ಧಾರ್ ಘೆಂವ್ಚೊ ಅಧಿಕಾರ್ ದೊಗಾಂಯ್ಕೀ ಆಸಾಜಯ್. ಕುಟಾಮ್ ಬಾಂಧುನ್ ಹಾಡ್ಚ್ಯಾ ವಾವ್ರಾಂತ್ ತಾಣಿಂ ತಾಂಚಿಂ ಮುಳಾವಿಂ ಹಕ್ಕಾಂ ಸಮ್ಜುನ್ ಘೇಜಯ್. ತವಳ್ ಮಾತ್ ಏಕ್ ದೆಕಿವಂತ್ ಕುಟಾಮ್ ರೂಪಿತ್ ಕರ್ಯೆತ್. 'ತೆಂ ಮ್ಹಾಕಾ ಸಮ್ಜನಾ' ಯಾ 'ತೊ ಮ್ಹಾಕಾ ಸಮ್ಜನಾ' ಮ್ಹಣ್ ಸದಾಂ ಎಕಾ ಮೆಕಾ ದುರ್ಸೊನ್ ರಾವ್ಲ್ಯಾರ್ ತೆಂ ಕುಟಾಮ್ ಲೊಕಾಚ್ಯಾ ತೊಂಡಾಂತ್ ಫಕತ್ ಪಾಡ್ ಉಲೊವ್ಣ್ಯಾಕ್ ಇಡೆಂ ಕರ್ನ್ ದಿತಾ. ಆಮ್ಚಿ ಭಾಸ್ ವೆಗ್ಳಿ ನೈಂ, ಆಮ್ಚಿ ಸಂಸ್ಕ್ರತಿ ಏಕ್ ಜಾಲ್ಲ್ಯಾನ್ ಜೆವ್ಣಾಂತ್-ಖಾಣಾಂತ್-ನೆಸ್ಣಾಂತ್ ಫರಕ್ ನಾ. ಆಮ್ಕಾಂ ಏಕ್ ದೇವ್. ತರೀ ಘೊವಾ ಬಾಯ್ಲೆಂ ಮಧೆಂ ಮನಾಸ್ತಾಪ್. ಬಾಯ್ಲೆಚಿ ಭಾಸ್ ಘೊವಾಕ್ ಸಮ್ಜನಾ ಆನಿ ಘೊವಾಚಿ ಬಾಯ್ಲೆಕ್......!! ಹಾಂಚಿಂ ಭಾಸ್ ಎಕಾಮೆಕಾಕ್ ಸಮ್ಜುಂಕ್ ಮುಕಾರ್ ಪಡ್ಚೊ ಕೊಡ್ತಿಚೊ ವಕೀಲ್.. ಉಪ್ರಾಂತ್ ಕೇಜ್ ಆನಿ ಡೈವೊರ್ಸ್...!!!!. ಜರ್ ಎಕಾ ಸಂಬಂಧಾಂತ್ 'ಸಮ್ಜಣಿ' ನಾ ತರ್ ಅಶೆಂ ಘಡೊಂಕ್ ಸಾಧ್ಯ್. ಎಕಾಮೆಕಾ ಸಮ್ಜುನ್, ಭರ್ವಾಶ್ಯಾಚೆಂ ವಾತವರಣ್ ಘರಾಂತ್ ರಚ್ಲೆಂ ತರ್ ತೆಂ ಘರಾಣೆಂ ಬರ‍್ಯಾ ಉಲವ್ಣ್ಯಾಕ್ ಪ್ರೇರಣ್ ದಿತೆಲೆಂ. ಹಾಂಗಸರ್ 'ಸಮ್ಜಣಿ' ಮ್ಹಳ್ಳೊ ಸಬ್ದ್ ಚಡ್ ಮಹತ್ವಚೊ ಜಾವ್ನಾಸಾ. ಎಕಾಮೆಕಾ ಸಮ್ಜುನ್ ರಾವ್ಲ್ಯಾರ್ ತಾಚ್ಯಾಕೀ ಉತ್ತೀಮ್ ದುಸ್ರೆಂ ನಾಕಾ. ಸಮ್ಜಣೆಕ್ ಮಿಕ್ವೊನ್ ಭಾಸ್ ನಾ. ಎಕಾಮೆಕಾಚ್ಯಾ ಸಮ್ಜಣಿಂತ್ ಭಾಸ್ ಏಕ್ ಜಾತಾ, ಕುಟಾಮ್ ಏಕ್ ಜಾತಾ, ಜಿಣಿ ಏಕ್ ಜಾತಾ. ತುಮ್ಚೆ ಆನಿ ಮ್ಹಜೆಂ ಜೀವಿತ್ ಅಶೆಂಚ್ ಜಾಂವ್ದಿ ಮ್ಹಣ್ ಹಾಂವ್ ಆಶೆತಾಂ.
Tags:
Sannu Niddodi, Women Language, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
2/27/2021 ಹೆರೊಲ್ಪಿಯುಸ್: ಏಕ್ ಅವ್ಚಿತ್ ಭೆಟ್...
-
12/20/2020 ಯುವಜಣಾಂಕ್ ಪ್ರೇರಣ್ - ಜೆಸ್ಸಿಕಾ ಆನ್ನಾ ಲಿಝಾ...
-
12/6/2020 ಆಸ್ತ್ ........
-
11/25/2020 ಭಾರತಾಚಿಂ ಖಬ್ರೆ ಟಿವಿ ಚಾನೆಲಾಂ ಮರಣ್ ಪಾವ್ಲ್ಯ...
-
11/9/2020 ನಾಂವ್ ಬದಲ್ಲ್ಯಾನ್ ಗಾಂವ್ ಬದಲ್ನಾಂ...!...
-
10/17/2020 ಮಂಗ್ಳುರ್‌ಚೊ ಖ್ಯಾತ್ ಗ್ರಾಫೊಲೊಜಿಸ್ಟ್, ಸ್ಟೇ&...
-
-
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
2 Comment/s.
Very nice article.. you have explained the real life scenarios in a very beautiful manner. Keep going.... God Bless You.
Very Nice and interesting article. People should know their hidden facts. You have been doing a good Job uplifting Konkani language, culture, tradition and educating people through these type of articles.