From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಕಾರ್ಪೋರೇಟ್ ಜಿಣಿ, ಕುಟ್ಮಾಚಿ ಕಾಣಿ.......!!!
Wednesday, June 21, 2017ಬರಯ್ಣಾರಾ ವಿಶಿಂ ಜಾಣಾ ಜಾ...
ಏಕ್ ಕಾಳ್ ಆಸ್‌ಲ್ಲೊ, ಮಸ್ತು ವರ್ಸಾಂ ಆದ್ಲಿ ಗಜಾಲ್ ನಹಿಂ...!! ಚಡುಣೆ ಪಾವುಣ್ಶೆಂ - ಶೆಂಭರ್ ವರ್ಸಾಂಚಿ ಆದ್ಲಿ ಗಜಾಲ್. ತಿ ಶೆತಾಂ ಮದ್ಲಿ ಜಿಣಿ. ಘರ್ಚೊ ಯೆಜ್ಮಾನ್ ಶಿಕ್ಪಿ ನೈಂ ತರ್‌ಯೀ ಜಾಣ್ತೊ, ಕುಟ್ಮಾಚಿ ಜವಾಬ್ದಾರಿ ಸಾಂಬಾಳ್ಚ್ಯಾಂತ್ ತೊ ಶಾಣೊ. ಆಪ್ಲ್ಯಾ ಭುರ್ಗ್ಯಾಂಕ್ ದೇವ್ ಭಿರಾಂತಿನ್ ಆನಿ ಫಾವೊತ್ಯಾ ಮಾರ್ಗದರ್ಶನಾನ್ ವಾಡೊಂವ್ಚ್ಯಾಕ್ ಪ್ರವೀಣ್. ಎಕಾ ಘರಾಂತ್ ಆಟ್, ಧಾ, ಬಾರಾ, ಚೊವ್ದಾ ಅಶೆಂ ಭುರ್ಗ್ಯಾಂಚಿಚ್ ರಾಸ್. ಪಾಟ್ಲ್ಯಾಕ್, ಫುಡ್ಲೊ ಆಧಾರ್ ತರ್ ಸರ್ವಾಂಕ್ ಮಾಲ್ಘಡೊ ಮುಖೆಲಿ. ಸಗ್ಳೆಂ ಕುಟಮ್ ಸಂಗಿಂ ಮೆಳೊನ್, ಸಕಾಳಿಂಚಿ - ಸಾಂಜೆಚಿಂ ಮಾಗ್ಣಿಂ, ಜೆವಾಣ್ ಸಾಂಗಾತಾ, ಮಾತ್ರ್ ನೈಂ ಪೆಂಟೆಕ್, ಫೆಸ್ತಾಂ - ಪರ್ಬೆಕ್, ಸಂಭ್ರಮಿಕ್ ಮಿಸಾಂಕ್ ಸರ್ವಾಂನಿ ಸಾಂಗಾತಾಚ್ ವೆಚೆಂ. ಹ್ಯಾ ಮಧೆಂ ಕುಟ್ಮಾಂತ್ ಏಕ್ ಪುಣೀ ದೇವ್ ಆಪೊವ್ಣ್ಯಾಚೆಂ ಭಾಗ್. ಘರಾಂತ್ ಆಸ್‌ಲ್ಲ್ಯಾ ಭುರ್ಗ್ಯಾಂಕ್ ಆವಯ್ ಬಾಪಯ್ಚೊ ಮೋಗ್ ಚುಕಾನಾತ್‌ಲ್ಲೊ. ಬಾಳ್ಶೆಂ ವಾಡೊನ್, ಪ್ರಾಯೆಕ್ ಪಾವ್ತಾ ಮ್ಹಣಾಸರ್ ವ್ಹಡಿಲಾಂಚೊ ಮೋಗ್ ಆನಿ ಜಿಣ್ಯೆಕ್ ಜಾಯ್ ತಸಲೆಂ ಜೊಕ್ತೆಂ ಲಿಸಾಂವ್ ಮೆಳ್ತಾಲೆಂ. ಅಶೆಂ ಆಸ್ತಾಂ ಆವಯ್ ಬಾಪುಯ್ ಸಂಗಿಂ ವಾಡ್‌ಲ್ಲಿಂ ಭುರ್ಗಿಂ ಘರಾಂತ್ಲಿ ಹರ್ಯೇಕ್ ಕಾಮಾಂ ಶಿಕ್ತಾಲಿಂ. ಕೃಷೆಂತ್ ತಿಂ ಜೊಕ್ತಿ ಜಾಣ್ವಾಯ್ ಆಪ್ಣಾಯ್ತಲಿಂ. ಲಾನ್ಪಣಿಂಚ್ ಜವಾಬ್ದಾರಿ ಹಾತಿಂ ಮೆಳ್ತಾಲಿ ಜಾಲ್ಲ್ಯಾನ್ ಏಕ್ ಜೊಕ್ತೆಂ ಕುಟಾಮ್ ರೂಪಿತ್ ಕರುಂಕ್ ತಿ ಪಾವ್ತಾಲಿಂ.......... ಹಿ ಕಾಣಿ ನೈಂ, ಆಮ್ಚಿಂ ವ್ಹಡಿಲಾಂ ಜಿಯೆಲ್ಲಿ ಜಿಣಿ.
ಸಂಸಾರಾರ್ ಬದ್ಲಾವಣ್ ಜಾವ್ನ್ ಆಯ್ಲಿ. ಶಿಕ್ಪಾಂತ್, ತಂತ್ರ್‌ಜ್ಞಾನಾಂತ್ ಆನಿ ಇತರ್ ಕ್ಷೇತ್ರಾಂನಿ ಅರ್ವಿಲ್ಯಾ ವರ್ಸಾಂನಿ ಕ್ರಾಂತಿಚ್ ಜಾಲಿ. ಹರ್ಯೆಕಾ ಕಾಮಾಂನಿ, ಚಾಲ್ತ್ಯಾ ಜಿಣಿಯೆಚ್ಯಾ ಹರ್ಯೆಕ್ ಮೆಟಾಂನಿ, ಸಂಸಾರಾರ್ ವಾಟಾ ವಾಟಾಂನಿಂ ತಾಂತ್ರಿಕತಾ ದಿಸೊನ್ ಆಯ್ಲಿ. ಮನಿಸ್ ಶಿಕ್ಲೊ, ಕೃಷಿ ಭುಂಯ್ ಸೊಡ್ನ್ ತೊ ಉಬ್ಲೊ. ಕುಟ್ಮಾ ಥಾವ್ನ್ ತೊ ನಾ ನಾ ಕಾರಾಣಾಂಕ್ ಲಾನ್ಪಣಾರ್ ಥಾವ್ನ್‌ಚ್ ಮೆಕ್ಳೊ ಜಾಲೊ. ಜೊಡಿಕ್ ಮಾತ್ರ್ ನೈಂ, ಆಪ್ಲ್ಯಾ ಶಿಕ್ಪಾಕೀ ತೊ ಪಯ್ಸ್ ಪಾವ್ಲೊ. ಸಂಸಾರಾರ್ ಜಾಲ್ಲಿ ಹಿ ಕ್ರಾಂತಿ ಬರಿಚ್. ಆಜ್ ಸಕ್ಕಡೀ ಸುಲಭ್ ಜಾಲಾಂ, ಪೂಣ್ ಕುಟ್ಮಾ ಜಿವಿತ್ ಮಾತ್ರ್ ಕಶ್ಟಾಂಚೆಂ ಜಾಲಾಂ.
ಉಂಚ್ಲೆಂ ಶಿಕಾಪ್ ಜೊಡ್ಲಲೊ, ವಿವಿಧ್ ಕ್ಷೇತ್ರಾಂನಿ ವಾವ್ರುಂಕ್ ಪಾವ್ಲೊ, ಮ್ಹಣ್ತಾನಾ ಕೃಷೆಚೊ ಜಾಗೊ ಪಡಿಲ್ ಪಡ್ಲೊ. ಆಪ್ಲೆಂ ವೈಯುಕ್ತಿಕ್ ಜಿವಿತ್ ಮಾತ್ರ್ ಪ್ರಮುಕ್ ಜಾಲೆಂ. ಮನ್ಶಾಚ್ಯಾ ಹರ್ಯೆಕಾ ಮೆಟಾಂನಿ ದುಡ್ವಾನ್ ಪಯ್ಲೊ ಪಾತ್ರ್ ಘೆತ್ಲೊ. ಶಿಕ್ಪಿ ಮನಿಸ್ ವಿಜ್ಞಾನ್, ಸಂಶೋಧನ್, ವೈಧ್ಯಕೀಯ್ ಅಸಲ್ಯಾ ಕ್ಸೇತ್ರಾಂನಿ ಭರ್ಸಲೊ ಆನಿ ಆಪ್ಣಾಕ್‌ಚ್ ವಿಸ್ರಾಲೊ. ಹ್ಯಾ ಸಂಸಾರಾಕ್ 'ಕಾರ್ಪೊರೇಟ್ ವರ್ಲ್ಡ್' ಮ್ಹಣ್ ವೊಲಾಯ್ತಾನಾ ಮನ್ಶಾ ಜಿಣಿಯೆಕೀ 'ಕಾರ್ಪೊರೇಟ್ ಲೈಫ್' ಮ್ಹಣ್ ನಾಂವ್ ಪಡ್ಲೆಂ. ಕುಟ್ಮಾಂ ವಿಂಗಡ್ ಜಾಲಿಂ. ಕುಟ್ಮಾಂನಿಂ ಭುರ್ಗ್ಯಾಂಚೊ ಸಂಕೊ ಉಣೊ ಜಾಲೊ. ಎಕ್ ಪುರೊ, ಚುಕ್ಲ್ಯಾರ್ ದೊಗಾಂ ಮ್ಹಳ್ಳೆಂ ಚಿಂತಪ್ ಆಯ್ಲೆಂ. ಪೂಣ್ ಹೆಂ 'ಕಾರ್ಪೊರೇಟ್' ಜಿವಿತ್ ತಾಣೆ ಬಾಂದುನ್ ಹಾಡ್ಚ್ಯಾ ಫುಡಾರಾಚೆರ್ ಜಾಯ್ತ್ಯಾ ವಾಟಾಂನಿಂ ಮಾರೆಕಾರ್ ಜಾಂವ್ಕ್ ಪಾವ್ಲೆಂ. ಕಿತ್ಲೆಶ್ಯಾ ಕುಟ್ಮಾಂನಿಂ ಜಲ್ಮ್ ದಿಲ್ಲ್ಯಾ ಆವಯ್-ಬಾಪಯ್ಕ್ ಪ್ರಾಯ್ವಂತ್ ಆಸ್ರ್ಯಾಚೆಂ ಬಾಗ್ ಫಾವೊ ಜಾಲೆಂ, ಹಜಾರೊಂ ನೆಣ್ತ್ಯಾ ಬಾಳಾಂಚೊ ಭುಂಯ್ ಪಡ್ಚ್ಯಾ ಆದಿಂಚ್ ಸಂಹಾರ್ ಜಾಲೊ. ಪ್ರಾಯೆಕ್ ಪಾಂವ್ಚ್ಯಾ ಫುಡೆಂಚ್ ಭುರ್ಗ್ಯಾಂನಿ ಆಡ್ ವಾಟ್ಯೊ ವಿಂಚ್ಲ್ಯೊ. ಇತ್ಲೆಂ ಮಾತ್ರ್ ನೈಂ ಆಸ್ತಾಂ ಸಂಶೋಧನಾಂತ್ ಆನಿ ತಾಂತ್ರಿ ಕತೆಂತ್ ಜಾಲ್ಲ್ಯಾ ಬದ್ಲಾವಣೆನ್, 'ಇನ್‌ಸ್ಟ್ಯಾಂಟ್ ಫುಡ್ಸ್' ಆನಿ 'ರೆಡಿ ಮೇಡ್ ಫುಡ್ಸ್' ಮ್ಹಣ್ ಜಾಯ್ತಿಂ ಖಾಣಾಂ, ಪಕ್ವಾನಾಂ ವಿಕ್ರ್ಯಾಕ್ ಪಡ್ಲಿಂ. ಕಾರ್ಪೊರೇಟ್ ಜಿವಿತಾಂತ್ ವೆಳಾಚೊ ಅಭಾವ್ ಜಾಲ್ಲ್ಯಾನ್ ಅಸಲಿಂ ಖಾಣಾಂ ಘರಾಂತ್ ಭಿತರ್ ಸರ್ಲಿಂ ಆನಿ ಮನ್ಶಾಚ್ಯಾ ಕುಡಿಚೆರ್ ವಾಯ್ಟ್ ಪ್ರಬಾವ್ ಘಾಲುನ್ ನಾ ನಾ ಥರಾಂಚ್ಯಾ ಪಿಡೆಂಕ್ ಇಡೆಂ ದೀಂವ್ಕ್ ಪಾವ್ಲಿಂ. ಆಜ್ ಕಿತ್ಲಿಶಿಂ ಜಣಾಂ ನವ್ಯಾ ನವ್ಯಾ ಮಾರೆಕಾರ್ ಪಿಡೆನ್ ವಳ್ವಳ್ತಾತ್.
ಪಾಟ್ಲ್ಯಾ ದಿಸಾನಿಂ ಎಕಾ ಕುಟ್ಮಾಚಿ ಭೆಟ್ ಕರುಂಕ್ ಹಾಂವ್ ಪಾವ್ಲೊಂ. ಭೋವ್ ಅಪುರ್ಬಾಯೆಚೆಂ ಮಂಗ್ಳುರಿ ಕ್ರೀಸ್ತಾಂವಾಂಚೆಂ ಘರಾಣೆಂ. ದೋನ್ ಚೆರ್ಕ್ಯಾ ಭುರ್ಗ್ಯಾಂ ಸಂಗಿಂ ದುಬೈಂತ್ ತಾಂಚಿ ವಸ್ತಿ. ತಿಂ ದೊಗಾಂಯ್ ನಾಂವಾಡ್ದಿಕ್ ಕಂಪ್ಣೆಂತ್ ಕಾಮ್ ಕರ್ತಾತ್. ಸಕಾಳ್ ಜಾತಾನಾ ಘರ್ ಸೊಡ್‌ಲ್ಲಿಂ ತಿಂ ಸಾಂಜೆರ್ ಕಾಳೊಕ್ ಪಡ್‍ಲ್ಲ್ಯಾ ಉಪ್ರಾಂತ್‌ ಪಾಟಿಂ ಪಾವ್ತಾತ್. ದೊಗಾಂ ಚೆರ್ಕ್ಯಾಂಕ್ ಗಾಂವಾಂತ್ ಥಾವ್ನ್ ಆಪವ್ನ್ ಹಾಡ್‌ಲ್ಲಿ ನವ್ಕಾರ್ನ್(ಅಕ್ಕಾ) ಸಾಂಬಾಳ್ತಾ. ತ್ಯಾ ದಿಸಾ ಅಚಾನಕ್ ಜಾವ್ನ್ ಚಾರ್ ವರ್ಸಾಂಚ್ಯಾ ಚೆರ್ಕ್ಯಾ ಲಾಗಿಂ ಹಾಂವೆಂ ಸವಾಲ್ ಕೆಲೆಂ. 'ಘರ್ ಸೊಭಿತ್ ಆಸಾ, ಕೊಣಾಚೆಂ ಪುತಾ?' ತಾಜಿ ಜಾಪ್ 'ಅಕ್ಕಾಚೆಂ'(ಘರ್ ಕಾಮಾಚಿ ಸ್ತ್ರೀ). ತ್ಯಾ ಚೆರ್ಕ್ಯಾಂಕ್ ಅಕ್ಕಾಚಿ ವಳೊಕ್ ಚಡ್ ಆನಿ ತಾಣಿಂ ಆಸ್ಚೆಂ ಅಕ್ಕಾ ಸಂಗಿಂಚ್. ಬಾಪಯ್ನ್ ಕುಟ್ಮಾ ಸಂಗಿಂ ಆಸ್ಚೆಂ ಬೋವ್ ಉಣೆ. ಆಜ್ ಅಮೇರಿಕಾ, ಫಾಲ್ಯಾಂ ಯುರೋಪ್ ಆನಿ ಪೊರ್ವಾಂ ಆಸ್ಟ್ರೇಲಿಯಾ ಮ್ಹಣ್ ತಾಜಿ ಭಂವ್ಡಿ. ಜಾಂವ್ಕ್ ಪುರೊ. ಏಕ್ ಲ್ಹಾನ್ ಆನಿ ನೆಣ್ತಿ ಜಾಪ್ ತ್ಯಾ ಚೆರ್ಕ್ಯಾಚಿ. ಪೂಣ್ ಚಿಂತಿಜಾಯ್ ಜಾಲ್ಲೊ ವಿಷಯ್. ತ್ಯಾ ಭುರ್ಗ್ಯಾಂಕ್ಕ್ ಆವಯ್ ಬಾಪಯ್ಚೊ ಸಾಂಗಾತ್ ನಾ. ತಾಂಚೊ ಮೋಗ್ ತ್ಯಾ ಭುರ್ಗ್ಯಾಂಕ್ ನಾ. ಹೆಂ ಏಕ್ ದೃಷ್ಟಾಂತ್ ಮಾತ್. ಕಾಮ್, ದುಡು ಮ್ಹಣ್ ಆಪ್ಲೆಂಪಣ್ ವಿಸ್ರುನ್, ಕುಟ್ಮಾ ಜಿವಿತಾಕ್ ಬಗ್ಲೆಕ್ ದವರ್ನ್ ಘೆಂವ್ಚಿಂ ಕುಟ್ಮಾ ಸಂಸಾರಾಂತ್ ಜಾಯ್ತಿಂ ಆಸಾತ್
ಕಾರ್ಪೋರೇಟ್ ಸಂಸಾರಾಂತ್ ವಾವ್ರಾರ್ ಆಸ್ಚ್ಯಾಂಕ್ ಅಪ್ರೂಪ್ ವರ್ಸಾಕ್ ಏಕ್ ಪಾವ್ಟಿಂ, ಮಹಿನ್ಯಾಚಿ ತರೀ ರಜಾ ಮೆಳ್ತಾ, ಆಪ್ಲ್ಯಾ ಕುಟ್ಮಾ ಸಂಗಿಂ ಮೆಳ್ಚ್ಯಾಕ್. ಪೂಣ್ ಆಜ್ ಹಿ ರಜಾ ದಫ್ತರಾಚ್ಯಾ ವಿರಾರಾಯೆನ್‌ಚ್ ಪಾಶಾರ್ ಜಾತಾ. ಸಂಪರ್ಕ್ ಮಾಧ್ಯಮಾಂತ್ ಕ್ರಾಂತಿ ಜಾಲ್ಯಾ ಆಸ್ತಾಂ, ಮನಿಸ್ ಖಂಯ್ಸರ್ ಆಸ್ಲ್ಯಾರ್‌ಯೀ ತಾಚಿ ವಿರಾರಾಯ್ ಉಣಿ ಜಾಂವ್ಕ್ ಆಯ್ಕನಾ. ಅಸಲ್ಯಾ ಸಂಧಿಗ್ಧ್ ವಾತಾವಾರಣಾಂತ್ ಆಜ್ ಆಮ್ಚೆಂ ಜಿಣೆಂ ಚಲ್ತಾ. ದಿಸಾಚ್ಯಾ ಚೊವೀಸ್ ವರಾಂಯೀ ಕಾಮಾಂತ್ ಆನಿ ವ್ಯವಹಾರಾಂತ್ ಮಗ್ನ್ ಆಸ್ಚ್ಯಾ ಆಮ್ಚ್ಯಾ ಮತಿಕ್ ಸುಶೆಗ್ ಮೆಳಾನಾ. ಆಯ್ಲೆವಾರ್ ಕೆಲ್ಲ್ಯಾ ಸಂಶೋಧನಾಂತ್ ಅಸಲಿ ಜಿಣಿ ಜಾಯ್ತ್ಯಾ ಪಿಡೆಂಕ್ ಆನಿಂ ಮೊರ್ನಾಂಕ್ ಕಾರಣ್ ಜಾತಾ ಮ್ಹಣ್ ಕಳೊನ್ ಆಯ್ಲಾಂ. ಮೆಂದ್ವಾಕ್ ಆನಿ ಕುಡಿಕ್ ವಿರಾಮ್ ನಾಸ್ತಾಂ ಕರ್ಚೆಂ ಕಾಮ್ ಕಾಳ್ಜಾ ಪಿಡೆಕ್, ಪೊಪ್ಸಾಚ್ಯೆ ಪಿಡೆಕ್, ಮತಿಚ್ಯಾ ವಿರಾರಾಯೆಕ್ ಆನಿ ದಬಾವಕ್, ಶಿರಾಂಚ್ಯಾ ಅಸ್ಕತ್ಕಾಯೆಕ್ ಕಾರಣ್ ಜಾತಾ. ಸಬಾರಾಂನಿ ಮತಿಚ್ಯಾ ದಬಾವಾಕ್ ವಳಗ್ ಜಾವ್ನ್ ಜೀವ್ಘಾತ್ ಕೆಲ್ಲೆಂ ಎದೊಳ್‌ಚ್ ಆಮಿಂ ಆಯ್ಕಲಾಂ. ಆಮ್ಚೆಂ ಕಾಮ್, ವ್ಯವಹಾರ್ 24X7 ಚಲಂವ್ದಿಂ ಪುಣ್ ತಾಜೆ ಬರಾಬರ್ ಆಮ್ಚಿ ಜಿಣಿ ನೈಂ.
ಕಾಮ್ ಆನಿ ಕುಟಾಮ್ ಹಾಚೆ ಮಧೆಂ ಸಮತೋಲನ್ ಸಾಂಬಾಳ್ಚೆಂ ಗರ್ಜೆಚೆಂ. ಆಜ್ ಆಮ್ಚೆಂ ಹರ‍್ಯೇಕ್ಲ್ಯಾಚೆಂ ಜಿವಿತ್ ಕಾಮ್ ಆನಿ ಕುಟ್ಮಾ ಜಿವಿತಾ ಮಧೆಂ ಅಡ್ಚಲಾಂ. ಜಾಯ್ತ್ಯೊ ಆಶಾ, ಆಕಾಂಕ್ಷಾ, ಸ್ವಪ್ಣಾಂ ಕಾರ್ಯಾಗತ್ ಕರುಂಕ್ ಪೆಚಾಡ್ನ್ ಆಸಾಂವ್. ನವ್ಯೊ ದಿಶಾ ಮುಕಾರ್ ದವರುನ್ ಜಿಣೆ ಚಮ್ಕಾತಾನಾ, ಕುಟ್ಮಾ ಥಾವ್ನ್ ವಿಂಗಡ್ ರಾವ್ಚೆಂ ಅನಿವಾರ್ಯ್ ಜಾಲಾಂ. ಆಧುನಿಕ್ ಸ್ಪರ್ಧಾತ್ಮಕ್ ಯುಗಾಂತ್ ಜಿಯೆತಾನಾ ಕುಟ್ಮಾ ಜಿಣ್ಯೆಕ್ ಹೊಂದೊನ್ ರಾಂವ್ಚೆಂ ಕಷ್ಟಾಂಚೆಂ ಜಾಲಾಂ. ಆಜ್ ಉದ್ಯಾಮಾಂಚೆಂ ಜಾಗತೀಕರಣ್ ಜಾಲಾಂ. ಬಜಾರಾಂತ್ ಸ್ಪರ್ಧೊ ಚಡ್ಲಾ. ಸ್ತ್ರೀಯಾಂಚೆಂ ಹಾಜರ್ಪಣ್ ಹರ್ಯೇಕ್ ಕ್ಷೇತ್ರಾಂನಿಂ ಮೆಳ್ಳಾಂ. ಆರ್ಥಿಕತೆಂತ್ ಸುಧಾರಣ್ ಜಾಲಾಂ. ದಫ್ತಾರಾಂನಿ ಕರ್ಚ್ಯಾ ಕಾರ್ಯಾವಳೆಂತ್ ಬದ್ಲಾವಣ್ ಜಾಲ್ಯಾ. ದೀಸ್ ಆನಿ ರಾತ್ ಏಕ್ ಜಾಲ್ಯಾ ಮ್ಹಳ್ಯಾರ್ ಚೂಕ್ ಜಾಂವ್ಚಿ ನಾ. ಆಮ್ಚ್ಯಾ ಕುಟ್ಮಾ ಜಿವಿತಾಚೆರ್ ಹಾಜೊ ಪ್ರಭಾವ್ ದೊಡ್ತ್ಯಾನ್ ಪಡ್ಲಾ. ಜೆವ್ಣಾ ಖಾಣಾಂತ್ ಫರಕ್ ಪಡ್ಲಾ, ಕುಡಿಕ್ ವ್ಯಾಯಾಮ್ ನಾ ಜಾಲಾಂ. ಜಾಯ್ತ್ಯಾ ಪಿಡೆಂಕ್ ಆನಿ ಸಮಸ್ಸ್ಯಾಂಕ್ ಆಮಿಂಚ್ ಆಹ್ವಾನ್ ದಿಲಾಂ. ಕಾಜಾರಿ ಜಿವಿತಾಂತ್ ಸಂತೃಪ್ತಿ ಉಣಿ ಜಾಂವ್ಕ್ ಪಾವ್ಲ್ಯಾ. ಕುಟ್ಮಾಂನಿ ಭುರ್ಗ್ಯಾಂಚೆಂ ಜಲ್ಮಾ ಪ್ರಮಾಣ್ ಕೊಸಾಳ್ಳಾಂ. ಕುಟಮ್ ಸಾಂಬಾಳ್ಚ್ಯಾಂತ್ ಆವಯ್ ಬಾಪಯ್ಚೊ ಪಾತ್ರ್ ಉಣೆ ಜಾಲಾ. ವಾಡೊನ್ ಯೆಂವ್ಚ್ಯಾ ಭುರ್ಗ್ಯಾಂಕ್ ಬರೆಂ ವಾಯ್ಟಾಚಿ ಸಮ್ಜಣಿ ನಾಸ್ತಾಂ ಯುವಜಣಾಂ ಥಂಯ್ ವಾಯ್ಟ್ ಕರ್ನ್ಯೊ ದಿಸೊನ್ ಆಯ್ಲ್ಯಾತ್. ಸಮಾಜೆಂತ್ ಮೆತೆರ‍್ಪಣ್ ಉಣೆಂ ಜಾಂವ್ಕ್ ಪಾವ್ಲಾಂ, ಆಮ್ಚ್ಯಾ ಜಿಣ್ಯೆ ಶೈಲೆಚೊ ವಿನಾಸ್‍ಚ್ ಜಾಲಾ. ಆಮ್ಚ್ಯಾ ಸಂಸ್ಕ್ರತೆಚಿಂ ಮೌಲ್ಯಂ ಕುಟ್ಮಾಂತ್ ವಾಂಟುನ್ ಘೆಂವ್ಕ್ ಆವ್ಕಾಸ್ ನಾ ಜಾಲಾ. ಅಸಲ್ಯಾ ಪರಿಸರಾಂತ್ ವಾಡ್‌ಲ್ಲ್ಯಾ ಭುರ್ಗ್ಯಾಂಕ್ಕ್ ಕುಟ್ಮಾ ಜಿವಿತ್ ಮ್ಹಳ್ಳ್ಯಾ ಸಬ್ಡಾಚೊ ಆರ್ಥ್ ಸಮ್ಜನಾ ಜಾಲಾ.
ಕಾಮ್, ಕುಟಾಮ್ ಆನಿ ವೈಯುಕ್ತಿಕ್ ಜಿಣಿ ಎಕಾಮೆಕಾಕ್ ಪೂರಕ್ ಜಾವ್ನ್ ಆಸಾಜಯ್ ಆಸ್ತಾಂ ಹಾಂಚೆ ಮಧೆಂ ಸಂಘರ್ಷ್ ಘಡೊಂಕ್ ನಜೊ. ಜಾಯ್ತ್ಯಾ ಜಣಾಂನಿ ಆಜ್ ತಾಂಚ್ಯಾ ವಾವ್ರಾಂತ್ ಆನಿ ವ್ಯವಹಾರಾಂತ್ ಜೀಕ್ ಆಪ್ಣಾಯ್ಲ್ಯಾ ಪೂಣ್ ಕುಟ್ಮಾ ಜಿವಿತಾಂತ್ ಆನಿ ವೈಯುಕ್ತಿಕ್ ಜಿಣಿಯೆಂತ್ ಸಲ್ವಣಿ ದೆಕ್ಲ್ಯಾ ತರ್ ಆನಿ ಥೊಡ್ಯಾನಿಂ ಕುಟ್ಮಾ ಜಿವಿತಾಕ್ ಆನಿ ವೈಯುಕ್ತಿಕ್ ಜಿಣಿಯೆಕ್ ಚಡ್ ವೇಳ್ ದೀವ್ನ್ ಕಾಮಾಂತ್ ಸಲ್ವಣಿ ದೆಕ್ಲ್ಯಾ. ಜಿಣೆಯೆಚ್ಯಾ ಎಕಾ ವಾಟೆರ್ ಜೀಕ್ ಆನಿ ಆನ್ಯೆಕಾ ಪೋಂತಾರ್ ಸಲ್ವಣಿ ತರ್ ಹ್ಯಾ ಜಿಣ್ಯೆಕ್ ಖರೊ ಆರ್ಥ್ ಮೆಳಾನಾ. ಹರ್ಯೆಕ್ಲ್ಯಾಚ್ಯಾ ಭವಿಷ್ಯಾಂತ್, ಕುಟ್ಮಾಚೊ ಸಂತೊಸ್ ಆನಿ ಏಕ್ ಮರ್ಯಾದಿಚೆಂ ಯಾ ಸಭ್ಯತೆಚೆಂ ವೈಯುಕ್ತಿಕ್ ಜಿವಿತ್ ಪಯ್ಲೆಂ ಸ್ಥಾನ್ ಘೆತಾ. ಕಾಮ್, ಕುಟಾಮ್ ಆನಿ ವೈಯುಕ್ತಿಕ್ ಜಿಣಿ ಆಮ್ಚ್ಯಾ ಪ್ರಭಾವಂತ್ ಹಾಡ್ನ್, ಹಾಂಚೆಂ ಮಧೆಂ ಸಮತೋಲನ್ ಸಾಂಬಾಳ್ಚೆಂ ಆಮಿಂ ಚಿಂತ್ಚ್ಯಾ ಬರಿಂ ಸುಲಾಭಾಯೆಚೆಂ ನೈಂ. ಪೂಣ್ ಹ್ಯಾ ದಿಶೆನ್ ಏಕ್ ಜೊಕ್ತೆಂ ಮೇಟ್ ಕಾಡುನ್ ಪ್ರಯತ್ನ್ ಕೆಲೆಂ ತರ್ ಖಂಡಿತ್ ಜಾವ್ನ್ ಮುಕ್ಲ್ಯಾ ಜಿವಿತಾಚೆರ್ ಏಕ್ ಬರೊ ಪ್ರಭಾವ್ ದಿಸೊನ್ ಯೇತ್ ಆನಿ ಏಕ್ ಯಶಸ್ವಿ ಕುಟಮ್ ರೂಪಿತ್ ಕರುಂಕ್ ಸಾದ್ಯ್ ಜಾಯ್ತ್.
Tags:
Sannu Niddodi, Olden Days, Corporate Life, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
2/27/2021 ಹೆರೊಲ್ಪಿಯುಸ್: ಏಕ್ ಅವ್ಚಿತ್ ಭೆಟ್...
-
12/20/2020 ಯುವಜಣಾಂಕ್ ಪ್ರೇರಣ್ - ಜೆಸ್ಸಿಕಾ ಆನ್ನಾ ಲಿಝಾ...
-
12/6/2020 ಆಸ್ತ್ ........
-
11/25/2020 ಭಾರತಾಚಿಂ ಖಬ್ರೆ ಟಿವಿ ಚಾನೆಲಾಂ ಮರಣ್ ಪಾವ್ಲ್ಯ...
-
11/9/2020 ನಾಂವ್ ಬದಲ್ಲ್ಯಾನ್ ಗಾಂವ್ ಬದಲ್ನಾಂ...!...
-
10/17/2020 ಮಂಗ್ಳುರ್‌ಚೊ ಖ್ಯಾತ್ ಗ್ರಾಫೊಲೊಜಿಸ್ಟ್, ಸ್ಟೇ&...
-
-
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
1 Comment/s.
One of the best article..the way you explained the reality was fantastic..... hope people will think twice about this... Thank You.