From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಪೇಜರ್, ಮೊಬಾಯ್ಲ್ ಆನಿ ವಾಟ್ಸಪ್
Thursday, May 10, 2018
ತೀಸ್-ಪಾಂತ್ತೀಸ್ ವರ್ಸಾಂ ಆದಿಂ ಗಲ್ಫಾಂತ್ ಕಾಮ್ ಕರ್ನ್ ಆಸ್‌ಲ್ಲ್ಯಾಂಕಡೆ 'ಪೇಜರ್' ಮ್ಹಳ್ಳೆಂ ಏಕ್ ಲ್ಹಾನ್ ಸಾಧನ್ ಆಸ್ತಾಲೆಂ. ತೆಂ ಪೆಂಕ್ಟಾಕಡೆ ಬೆಲ್ಟಾಕ್ ಖುಂವಯ್ತಾಲೆ - ವ್ಹಡ್ಲಿಮಾಯ್ನ್ ಪಾನ್ಪೊಡಿಚಿ ಪೊತಿ ಖುಂವಯಿಲ್ಲೆಬರಿಂ. ಪೇಜರ್ ಫಕತ್ 'ಬ್ಲೀಪ್' ಆವಾಜ್ ದಿತಾಲೆಂ. ಆನಿ ಆವಾಜ್ ಆಯ್ಕತಚ್ ಪೇಜರಾಂತ್ಲೆಂ ನಂಬರ್ ಪಳೆವ್ನ್ ಫೋನ್ ಕರ್ತಾಲೆ. ಥೊಡ್ಯಾ ವರ್ಸಾಂನಿ 'ಪೇಜರ್' ಸಾಸ್ಣಾಚ್ಯಾ ವಿಶೆವಾಕ್ ಗೆಲೆಂ.
ಉಪ್ರಾಂತ್ ಪೇಜರಾಚಾ ಜಾಗ್ಯಾರ್ ಮೇಜರ್ ಜಾವ್ನ್ 'ಮೊಬಾಯ್ಲ್' ಆಯ್ಲೆಂ. ಮೊಬಾಯ್ಲ್ ಗರ್ಜೆಚೆಂ ಆನಿ ಮರ್ಜೆಚೆಂ ತಶೆಂ ಜಾಲೆಂ. ಪಯ್ಣ್ ಕರ್ತಾನಾ, ಆಫೀಸಾಂತ್ ಆಸ್ತಾನಾ, ಹೆಣೆಂ ತೆಣೆಂ ಭೊಂವ್ತಾನಾ ಮೊಬಾಯ್ಲ್ ಉಪ್ಯೋಗ್ ಕರುಂಕ್ ಸಲೀಸ್ ಜಾಲೆಂ. ಮೊಬಾಯ್ಲಾದ್ವಾರಿಂ ಚ್ಯಾಟಿಂಗ್, ಮೀಟಿಂಗ್, ಡೇಟಿಂಗ್ ಆನಿ ಲವಿಂಗ್ ಸುರು ಜಾಲೆಂ. ತರ್ನೆಂ ತಶೆಂ ಪರ್ನೆಂ ಜನಾಂಗ್ ಮೊಬಾಯ್ಲಾಚಾ ಮೊಗಾರ್'ಚ್ ಪಡ್ಲೆಂ. ಥೊಡ್ಯಾ ದಾದ್ಲ್ಯಾಂನಿ ತಾಂಚೆ ಬಾಯ್ಲೆಪ್ರಾಸ್ ಚಡ್ ಮೋಗ್ ತಾಂಚಾ ಮೊಬಾಯ್ಲಾಂಚೊ ಆನಿ ಮೊಬಾಯ್ಲಾಂದ್ವಾರಿಂ ಹೆರ್ ಸೊಬಿತ್ ಬಾಯ್ಲಾಂಚೊ ಕೆಲೊ. ಮೊಬಾಯ್ಲಾವರ್ವಿಂ ಸತಾ ಪ್ರಾಸ್ ಚಡ್ ಫಟಿ ಆಶಾರ್ ಪಾಶಾರ್ ಜಾತಾತ್. ಮೊಬಾಯ್ಲ್ ರಿಸೀವ್ ಕೆಲ್ಲೊ ವ್ಯಕ್ತಿ ಘರಾಚ್ ಆಸ್ಲ್ಯಾರ್'ಯೀ ಆಪುಣ್ ಭಾಯ್ರ್ ಆಸಾಂ ಮ್ಹಣ್ ಬಂಡಲ್ ಮಾರ್ತಾ. ಗಾಂವಾಂತ್ ಆಸ್ಲ್ಯಾರ್'ಯೀ ಗಾಂವಾ ಥಾವ್ನ್ ಭಾಯ್ರ್ ಆಸಾಂ ಮ್ಹಣ್ತಾ. ರಿಣಾಗಾರಾಂ ಥಾವ್ನ್ ತತ್ಕಾಲಿಕ್ ಚುಕಾರಿ ಮಾರುಂಕ್ ಮೊಬಾಯ್ಲ್ ಏಕ್ ಉತ್ತೀಮ್ ಆನಿ ಗರ್ಜೆಚೆಂ ಸಾಧನ್.
ಗಾಂವಾಂತ್ ಥೊಡ್ಯಾಂನಿ ಮೊಬಾಯ್ಲಾರ್ ಹಾತ್ ಭಾಸ್ ಕರ್ನ್ ಉಲಯ್ತಾನಾ ತಾಂಕಾಂ ಪಳೆವ್ನ್ ಥೊಡೆ ವಿಜ್ಮಿತ್ ಪಾವ್‌ಲ್ಲೆ - ಹೆ ಕಾಂಯ್ ತಾಂಚಾ ಪುರ್ವಜಾಂಚಾ ಆತ್ಮ್ಯಾಂಕಡೆ ಉಲಯ್ತಾತ್ ಕೊಣ್ಣಾ ಮ್ಹಣ್!
ಸುರ್ವೆರ್ ಸುರ್ವೆರ್ ಥೊಡ್ಯಾಂಕ್ ಮೊಬಾಯ್ಲಾಂಚೊ ಭಾರಿಚ್ ಆಂಗಾಲಾಪ್. ನವಿಂ ನವಿಂ ಮೊಬಾಯ್ಲಾಂ, ನವಿಂ ನವಿಂ ಮೊಡೆಲಾಂ ಮ್ಹಣ್ತಾನಾ, ಯುವಜಣಾಂ ಪಿಶಿಂಚ್ ಜಾತಾಲಿಂ. ಕೊಲೆಜಿಕ್ ವೆತಾನಾಂಯಿ ಮೊಬಾಯ್ಲಾಂ ವ್ಹರ್ತಾಲಿಂ ಆನಿ ಮೊಬಾಯ್ಲಾರ್'ಚ್ ಲೋವ್ ಲೋವ್ 'ಲವ್ ಚ್ಯಾಟ್' ಕರ್ತಾಲಿಂ. ಪಾರ್ಕಾಂಕ್, ಬೀಚಾಂಕ್, ಫಿಲ್ಮಾಂಕ್, ಆಯ್ಸ್ ಕ್ರೀಮ್ ಪಾರ್ಲರಾಂಕ್ ವೆಚೆಂ, ಪಬ್ಬಾಕ್ ವೆಚೆಂ ಇತ್ಯಾದಿ ಮೊಬಾಯ್ಲಾರ್'ಚ್ ಫಿಕ್ಸ್ ಜಾತಾಲೆಂ.
ಥೊಡ್ಯಾ ಭುರ್ಗ್ಯಾಂಕ್ ತಾಂಚಾ ಆವಯ್-ಬಾಪಾಯ್ನಿ ಸಾತ್ವೆ ಕ್ಲಾಸಿಂತ್‌ಚ್ ಮೊಬಾಯ್ಲ್ ಘೆವ್ನ್ ದೀವ್ನ್ ಬಡಾಯ್ ಕೊಚ್ಚಿಲ್ಲಿಯಿ ಆಸಾ. ಭುರ್ಗಿಂ ನಾಪಾಸ್ ಜಾತಾನಾ ಮಾತ್ರ್ ಮೊಬಾಯ್ಲಾಂಕ್ ಶಿರಾಪ್ ಘಾಲ್ಲೊಯಿ ಆಸಾ.
ಹಾವ್ಜ್ ವಾಯ್ಫ್ ಆನಿ ಹಾವ್ಜ್ ಹಸ್ಭೆಂಡಾಕಡೆ ಹಳ್ತಾಚೆಂ ಮೊಬಾಯ್ಲ್ ಆಸ್ಲ್ಯಾರ್, ತಾಂಚಾ ಹಾವ್ಜ್ ಮೇಡಾಕಡೆ ಲೇಟೆಸ್ಟ್, ತೆಂಯಿ ತಾಚಾ ಲೇಟೆಸ್ಟ್ ಬೋಯ್ ಫ್ರೆಂಡಾನ್ ಮೊಗಾಚಿ ಕಾಣಿಕ್ ಜಾವ್ನ್ ದಿಲ್ಲೆಂ.
ಆಜಾಕಾಲ್, ಐ ಫೋನ್, ಐ ಪ್ಯಾಡ್, ಟ್ಯಾಬ್ ಆನಿ ಸ್ಮಾರ್ಟ್ ಫೊನಾಂ ನಾತ್‌ಲ್ಲಿಂ ಭುರ್ಗಿಂ ಆನಿ ತರ್ನಾಟಿಂ ಪಳೆಂವ್ಕ್ ಮೆಳ್ಚಿಂನಾಂತ್. ಆದಿಂ ಮಿಸಾಕ್ ವೆತಾನಾ ಭುರ್ಗ್ಯಾಂಚಾ ಹಾತಾಂನಿ ದೊತೊರ್ನಿಚೆ ಬೂಕ್ ಆಸ್ತಾಲೆ. ಪುಣ್ ಆಯ್ಚಾ ಸ್ಮಾರ್ಟ್ ಭುರ್ಗ್ಯಾಂಚಾ ಹಾತಾಂನಿ ಸ್ಮಾರ್ಟ್ ಫೊನಾಂ ಆನಿ ತ್ಯಾ ಫೊನಾಂನಿ ವಾಟ್ಸಪಾಚಿಂ ಉಡ್ಕಣಾಂ!
ಹ್ಯಾ ದಿಸಾಂನಿ ಹಾವ್ಜ್ ಮೇಡ್, ಸರ್ವೆಂಟ್ ವಾ ಘರ್ ಕಾಮಾಕ್ ಚೆಡ್ವಾಂ ಮೆಳೊಂಕ್ ಭಾರಿಚ್ ಕಷ್ಟ್. ಅಚಾನಕ್ ಕೊಣ್‌ಯಿ ಪಾದ್ರ್ಯಾಬಾಚ್ಯಾ ವಾ ಸಿಸ್ಟರಿಚಾ ಒಳ್ಕಿರ್ ಕೊಣ್‌ತರೀ ಎಕ್ಲೆಂ ಮೆಳ್ಳೆಂ ತರ್ ತಾಚೆಕಡೆ ಸ್ಮಾರ್ಟ್ ಫೋನ್ ಆಸಾ ಜಾಲ್ಯಾರ್ ಪಡ್ಚಾ! ವಾಟ್ಸಪ್ಪಾರ್ ತಾಚ್ಯಾ ಬೊಯ್‌ಫ್ರೆಂಡಾಚ್ಯೊ ಫೊಟೊ, ತಾಣೆಂ ಸಾಂಗಾತಾ ಮೆಳೊನ್ ವೇಳ್ ಪಾಶಾರ್ ಕೆಲ್ಲಿಂ ಪಾರ್ಕಾಂ, ಹೊಟೆಲಾಂ, ಆಯ್ಸ್ ಕ್ರೀಮ್ ಪಾರ್ಲರಾಂ, ಬೀಚಾಂ... ಇತ್ಯಾದಿಂಚ್ಯೊ ಫೊಟೊ ಆಸ್ತಾತ್. ಆನಿ ಹೆ ಫೊಟೆ ತವಳ್ ತವಳ್ ಬದಲ್ತಾತ್. ತ್ರಿಬಲ್ ತಲಾಕ್ ದೀನಾಸ್ತಾನಾಂಚ್ ತಲಕ್ ಆನಿ ಕೊಂಬ್ಲೊ ಬದಲ್ಚೊ ಆಸ್ತಾ.
ಮ್ಹಾಕಾ ಕಿತೆಂಗೀ ವಾಟ್ಸಪ್ ಮ್ಹಳ್ಯಾರ್ ಎಕಾ ಥರಾಚಿ ಅಲರ್ಜಿ! ಹಾಂವ್ ಆಜೂನ್ ಆದ್ಲೆಂಚ್ ಮ್ಹಜಾ ಮೊಗಾಚೆಂ 'ನೋಕಿಯಾ' ಬಲ್ಸಾಂತ್ ದವೊರ್ನ್ ಭೊಂವ್ತಾಂ. ಥೊಡ್ಯಾ ವರ್ಸಾಂ ಆದಿಂ ಕಾಮಾ ಥಾವ್ನ್ ನಿವೃತ್ ಜಾಲ್ಲೊ ಹಾಂವ್ 'ಹಾವ್ಜ್ ಹಸ್ಬೆಂಡ್' ಜಾವ್ನ್ ಘರಾ ಭಿತರ್ಲಿಂ ತಶೆಂ ಘರಾ ಭಾಯ್ಲಿಂ ಕಾಮಾಂ ಕರ್ನ್ ಆಸಾ. ಖಂಚೇಂಯಿ ಕಾಮ್ ಕರುಂಕ್ ಹಾಂವ್ ತಯಾರ್ ಪುಣ್ ಮಾಸ್ಳಿ ಮಾರ್ಕೆಟಿಕ್ ವಚೊನ್ ಮಾಸ್ಳಿ ಮೊಲಾಂವ್ಚಿ ಮ್ಹಳ್ಯಾರ್ ಎಕಾ ಥರಾಚಿ ಪುಲ್ಗತ್ರ್'ಚ್ ಸಯ್. ಮೊಗೊರ್ಲ್ಯಾಂಕಡೆ ಮಾಸ್ಳಿ ಮೊಲಾವ್ನ್ ವಾರ್ಜಿ ಕರ್ತಾನಾ ಅರ್ದೊ ಜೀವ್ ಜಾತಾ. ಆನಿ ತಿ ಮಾಸ್ಳಿ ವ್ಹರುನ್ ಘರಾ ಬಾಯ್ಲೆಕ್ ದಾಕೊವ್ನ್ ತಿಚಾ ತೊಂಡಾಂತ್ಲ್ಯೊ ಸೊಬಿತ್ ಚಾರ್ ಗಾಳಿ ಆಯ್ಕಾತಾನಾ ಮ್ಹಜಿ ತಕ್ಲಿ ಫೆಸ್ತಾ ಸಾಂತೆಂತ್ಲ್ಯಾ ಗಿರ್ಗಿಟೆಬರಿಂ ಗಿರ್ ಘುಂವ್ತಾ.
''ಆಜ್ ಕಾಲ್ ದುಸ್ರ್ಯಾ, ತಿಸ್ರ್ಯಾ ಕ್ಲಾಸಿಂತ್ ಶಿಕ್ಚಾ ಭುರ್ಗ್ಯಾಂಕಡೆ ಸಯ್ತ್ ವಾಟ್ಸಪ್ ಆಸಾ, ಆನಿ ತುಂ ಏಕ್ ಕೊಂಕ್ಣಿ ಲೇಖಕ್ ಜಾವ್ನ್ ತುಜೆಕಡೆ ಆಜೂನ್ ವಾಟ್ಸಪ್ ನಾ ಮ್ಹಳ್ಯಾರ್?'' ಮ್ಹಜ್ಯಾ ಥೊಡ್ಯಾ ಇಶ್ಟಾಂ ಮಿತ್ರಾಂನಿ ಮ್ಹಾಕಾ ಸವಾಲ್ ಕೆಲ್ಲೆಂ ಆಸಾ. ಆನಿ ಹ್ಯಾ ಸ್ಮಾರ್ಟ್ ಫೊನಾಂನಿ ಕಿತ್ಲಿಂ ಪೂರಾ ಮೊಡೆಲಾಂ, ಕಿತ್ಲಿಂ ಸಕ್ಕಡ್ ನವೆಂಸಾಂವಾಂ? ಖಂಚೆಂ ಘೆಂವ್ಚೆಂ, ಖಂಚೆಂ ಸೊಡ್ಚೆಂ ಮ್ಹಳ್ಳೆಂಚ್ ಏಕ್ ವೊದ್ದುವೊರಾಂಟ್ ಮ್ಹಜೆ ಮತಿಂತ್. ಹೆಂ ವಾಟ್ಸಪ್ ಘೆವ್ನ್ ಕಸ್ರಿಚ್ಯಾ ಪಾನಾಕ್ ಚುನೊ ಸಾರಯಿಲ್ಲೆಬರಿಂ ಬೊಟಾನ್ ಟಚ್ ಸ್ಕ್ರೀನ್ ಆಪ್ಡುಂಕ್ ಮ್ಹಾಕಾ ಕಿತೆಶೆಂ ಭೊಗ್ತಾಲೆಂ.
ಮಾಗಿರ್ ಏಕ್ ದೀಸ್ ಮನ್ ಘಟ್ ಕರುನ್ ಏಕ್ ಸ್ಮಾರ್ಟ್ ಫೋನ್ ಘೆತ್ಲೆಂಚ್. ಆತಾಂ ವಾಟ್ಸಪ್ ಆಯಿಲ್ಲ್ಯಾ ಉಪ್ರಾಂತ್ ಮ್ಹಜೆಂ ಮೊಗಾಚೆಂ ನೊಕಿಯಾ ಕೊನ್ಶಾಂತ್ ಪಡ್ಲಾಂ.
ಆತಾಂ ವಾಟ್ಸಪ್ಪಾಚೆಂ ಪಿಶೆಂ ಮ್ಹಾಕಾಯಿ ಸುರು ಜಾಲಾಂ. ಆತಾಂ ಮಾರ್ಕೆಟಿಕ್ ವೆತಾನಾ ಹಾಂವೆಂ ಮ್ಹಜೆಂ ಸ್ಮಾರ್ಟ್ ಫೋನ್ ವ್ಹರ್ಚೆಂ, ಮೊಗೊರ್ಲ್ಯಾಸಂಗಿಂ ಉಬೊ ರಾವೊನ್ ಸೆಲ್ಫಿ ಕಾಡುಂಕ್ ನ್ಹಯ್, ಬಗಾರ್ ಮೊಬಾಯ್ಲಾರ್ ಮಾಸ್ಳೆಚ್ಯೊ ಸೊಬಿತ್ ಫೊಟೊ ಕ್ಲಿಕ್ ಕರುನ್ ಮ್ಹಜಾ ಸಾತ್ವ್ಯಾ ಸಾಕ್ರಾಮೆಂತಾಚಾ ವಾಟ್ಸಪ್ಪಾಕ್ ಧಾಡುಂಕ್. ತಿಣೆ ಮಾಸ್ಳೆಚೊ ಗಾತ್ರ್, ದೊಳ್ಯಾಂಚೊ ರಂಗ್, ಖೊವ್ಳಾಂ, ಶಿಮ್ಟಿ ಇತ್ಯಾದಿ ಪಳೆವ್ನ್ ಗ್ರೀನ್ ಸಿಗ್ನಲ್ ದಿಲ್ಯಾ ಉಪ್ರಾಂತ್'ಚ್ ಹಾಂವೆಂ ಮಾಸ್ಳಿ ಮೊಲಾಕ್ ಘೆಂವ್ಚಿ. ಆಯ್ಲೆವಾರ್ ಮೊಗೊರ್ಲಿಂ ಸಯ್ತ್ ''ಕ್ರೆಡಿಟ್ ಕಾರ್ಡ್ ಇಜ್ಜಾ, ಪೊರ್ಬುಲೇ?'' ಮ್ಹಣ್ ಸವಾಲ್ ಕರುನ್ ಆಪುಣ್‌ಯಿ 'ಕ್ಯಾಶ್‌ಲೆಸ್' ಬಿಸ್ನೆಸ್ ಕರ್ತಾಂ ಮ್ಹಳ್ಳೆಂ ಪರೋಕ್ಷ್ ರಿತಿನ್ ಜಾಗಯ್ತಾನಾ ಹಾಂವೆಂ ಮ್ಹಜೊ 'ಕೇಸ್ ಲೆಸ್' ಮಾಂಡ್ಡೊ ಖೊರ್ಪುಂಚೊ.
ಹ್ಯಾ ವಾಟ್ಸಪ್ಪಾ ಧರ್ಮಾನ್ ಮನ್ಶಾ ಸಂಬಂಧ್ ಬೆಳ್ಶೆಲ್ಯಾತ್. ಥೊಡ್ಯಾ ವರ್ಸಾಂ ಆದಿಂ ಘರಾಂನಿ ವೋಲ್, ಕುಮ್ಗಾರ್, ಜುಬ್ಲೆವ್, ಬರ್ಥ್ ಡೇ, ಖರಾರ್, ಕಾಜಾರ್, ಫುಲಾಂ ಮಾಳ್ಛೆಂ ಆನಿ ಹೆರ್ ಶುಭ್ ಕಾರ್ಯಿಂ ಆಸ್ಲ್ಯಾರ್ ಕುಟ್ಮಾಚ್ಯಾಂಕ್, ಸಯ್ರ್ಯಾ ಧಯ್ರ್ಯಾಂಕ್ ಆನಿ ಇಶ್ಟಾಂ ಮಿತ್ರಾಂಕ್ ಘರಾ ಬಾಗ್ಲಾರ್ ವಚೊನ್ ಆಮಂತ್ರಣ್ ಪತ್ರಾಂ ದೀವ್ನ್ ಮಾನಾನ್ ಆನಿ ಮೊಗಾನ್ ಆಪಯ್ತಾಲೆ, ಆತಾಂ ಘರಾಂನಿ ಜಾಂವ್ಚ್ಯಾ ಕಾಜಾರಾಂ ಸೊಭಾಣಾಂಕ್ ಜಾಂವ್, ಹೆರ್ ಶುಭ್ ಕಾರ್ಯಾಂಕ್ ಜಾಂವ್, ಆಮಂತ್ರಣ್ ಪತ್ರಾಂ ವೆಚಿಂ ಶೀದಾ ವಾಟ್ಸಪ್ಪಾಕ್, ಆಯ್ಲೆವಾರ್ ಚಡಾವತ್ ಕಾಜಾರಾಂ ಸೊಭಾಣಾಂಕ್, ವೋಲ್ ವಾ ಪಯ್ಲ್ಯಾ ಕುಮ್ಗಾರಾಂಕ್ ಆಯೆರ್ ವಾ ಕಾಣಿಕೊ ನಾಂತ್. ಆಸ್‌ಲ್ಲ್ಯೊ ತರ್ ದೋನ್ ಹಜಾರ್ ರುಪಯ್ ನೊಟಾಚಿ ಫೊಟೊ ಕಾಡ್ನ್ ವಾಟ್ಸಪ್ಪಾರ್ ವ್ಹಕ್ಲೆ-ನೊವ್ರ್ಯಾಕ್ ಧಾಡ್ತೆ ಕೊಣ್ಣಾ!
ವೆಳಾ ಕಾಳಾ ತೆಕಿದ್ ಮನಿಸ್ ಬದಲ್ತಾ ತಾಚಿ ಚಾಲ್ ಚಮ್ಕಾಣ್, ಉಲೊವ್ಣೆಂಯಿ ಬದಲ್ತಾ. ಥೊಡ್ಯಾ ವರ್ಸಾಂ ಆದಿಂ ದೋಗ್ ಜಣ್ ಅಚಾನಕ್ ಭೆಟ್‌ಲ್ಲ್ಯಾವೆಳಿಂ, ''ತುಂ ಕಸೊ ಆಸಾಯ್? ಬಾಯ್ಲ್ ಭುರ್ಗಿಂ ಕಶಿಂ ಆಸಾತ್?'' ಮ್ಹಣ್ ವಿಚಾರ್ತಾಲೆ. ಥೊಡ್ಯಾ ವರ್ಸಾಂ ಉಪ್ರಾಂತ್ ಪರತ್ ಭೆಟ್ತಾನಾ ''ಶುಗರ್ ಕಿತ್ಲಿ? ಬಿಪಿ ಕಿತ್ಲಿ? ಕೊಲೊಸ್ಟ್ರೊಲ್ ಕಿತ್ಲೆಂ?'' ಮ್ಹಣ್ ಸವಾಲ್ ಕರ್ತಾತ್. ಪುಣ್ ಆಜ್‌ಕಾಲ್ ಕೊಣ್ ತರೀ ಸಾಂಗಾತಾ ಮೆಳ್ತಾನಾ, ''ತುಜೆ ಕಡೇ ವಾಟ್ಸಪ್ ಆಸಾಗೀ? ಮೊಬಾಯ್ಲ್ ಖಂಚೆಂ?'' ಮ್ಹಣ್ ವಿಚಾರ್ತಾತ್. ಹ್ಯಾ ಕಾಳಾರ್ ವಾಟ್ಸಪ್ ನಾತ್‌ಲ್ಲೊ ಮನಿಸ್ ಗುಜ್ಯಾಕ್ ಭರ್ಶಿಕ್ ಘಾಲುಂಕ್‌ಯಿ ಉಪ್ಕಾರ್ನಾ ಮ್ಹಳ್ಳೆಂ ಚಿಂತಪ್.
ಆದ್ಲ್ಯಾ ಭುರ್ಗ್ಯಾಂಚ್ಯಾ ಹಾತಾಂನಿ ಚಾಲ್ತಿಂ ಮಾಗ್ಣಿಂ ವಾ ಮಗ್ಗಿ ಬೂಕ್ ಆಸ್ತಾಲೆ. ಆತಾಂಚ್ಯಾ ಭುರ್ಗ್ಯಾಂಚ್ಯಾ ಹಾತಾಂನಿ ತೀಸ್, ಚಾಳೀಸ್ ವಾ ಪನ್ನಾಸ್ ಹಜಾರ್ ರುಪ್ಯಾಂಚಿಂ ಸ್ಮಾರ್ಟ್ ಮೊಬಾಯ್ಲ್ ಫೊನಾಂ. ಆದಿಂ ಹೈಸ್ಕೂಲಾಂತ್ ಶಿಕ್ತಾನಾ ಚಲೆ-ಚಲಿಯೊ ಎಕಾಮೆಕಾ ಲವ್‌ಲೆಟರಾಂ ಬರವ್ನ್ ಮೋಗ್ ಕರ್ತಾಲಿಂ. ಪುಣ್ ಆತಾಂಚಿ ಪಿಳ್ಗಿ ಪ್ರಾಯ್ಮರಿ ಇಸ್ಕೊಲಾಂತ್ ಶಿಕ್ತಾನಾಂಚ್ ಮೊಬಾಯ್ಲಾದ್ವಾರಿಂ ಮೋಗ್ ಕರ್ತಾತ್ ಆನಿ ಬೀಚಾಂ, ಬಿಗ್ ಸಿನೆಮಾ, ಸಿಟಿ ಸೆಂಟರ್, ಐಸ್ ಕ್ರೀಮ್ ಪಾರ್ಲರಾಂ ಇತ್ಯಾದಿ ಮೆಜುನ್ ವಾಟ್ಸಪ್ಪಾರ್ ಸೆಲ್ಫಿ ಕಾಡುನ್ ಸರ್ಗ್ ದೆಕ್ತಾತ್. ಸೆಲ್ಫಿ ಪಿಡಾ ತರ್ನಾಟ್ಯಾಂಕ್ ಮಾತ್ರ್ ನ್ಹಂಯ್ ಪನ್ನಾಸ್, ಸಾಟ್, ಸತ್ತರ್ ವರ್ಸಾಂಚಾ ಥೊಡ್ಯಾ ಪಿರಾಯೆಸ್ತಾಂಕ್‌ಯಿ ಆಸಾ.
ತಾಣಿಂ ಭುರ್ಗ್ಯಾಂ ಬಾಳಾಂ ಸಂಗಿಂ ಆನಿ ನಾತ್ರಾ ಸಂಗಿಂ ಹೊಟೆಲಾಂನಿ ವಾ ರೆಸ್ಟೊರಾಂನಿ ಸೆಂವ್‌ಲ್ಲೆಂ, ಪಿಯೆಲ್ಲೆಂ, ಖೆಲ್ಲೆಂ ಆನಿ ಜೆವ್‌ಲ್ಲೆಂ ಸಕ್ಕಡ್ ಫೇಸ್ ಬುಕಾರ್ ಪಳೆಂವ್ಕ್ ಆನಿ ವಾಚುಂಕ್ ಮೆಳ್ತಾ. ತ್ಯಾ ಶಿವಾಯ್ ತಾಣಿಂ ಮಂಗ್ಳುರ್ ಥಾವ್ನ್ ಬೆಂಗ್ಳುರ್ ವಾ ಚಿಕ್ಕ್ ಮಗ್ಳೂರಾಕ್ ಪಯ್ಣ್ ಕೆಲ್ಯಾರ್ ತಿಯೀ ಮಾಹೆತ್ ಆನಿ ಫೊಟೊ ಫೇಸ್‌ಬುಕಾರ್ ದಾಕಲ್ ಜಾತಾತ್.
ಆಜ್‌ಕಾಲ್ ಮಂಗ್ಳುರಾಂತ್ ಮಾಡಾರ್ ಚಡೊನ್ ನಾರ್ಲ್ ಕಾಡ್ತೆಲ್ಯಾಂಚೊ ಸಂಕೊ ದೆಂವೊನ್ ಆಯ್ಲಾ - ರಾನಾಂತ್ ವಾಗಾಂಚೊ ಸಂಕೊ ದೆಂವೊನ್ ಆಯಿಲ್ಲೆಬರಿಂ. ದೆಕುನ್ ಜಾವ್ಯೆತ್ ಮಾಡಾರ್ ಚಡೊನ್ ನಾರ್ಲ್ ಕಾಡ್ಚೆ ಸ್ಪೆಶಲಿಸ್ಟ್ ಎಕಾ ಮಾಡಾಕ್ ಶೆಂಬೊರ್ ರುಪಯ್ ಘೆತಾತ್. ತಾಚೆವಯ್ರ್ ತಾಣಿಂ ಏಕ್ ಬೊಂಡೊ ತಾಸುನ್ ಪಿಯೆಲ್ಯಾರೀ ದೊಳೆ ಧಾಂಪುನ್ ಚುಪ್ ಬಸ್ಚೆ ತಸಲಿ ಪರಿಗತ್. ಥೊಡೆ ಜಣ್ ಮಾಡಾರ್ ಚಡೊನ್ ವಾಟ್ಸಪ್ಪಾರ್ ನಾರ್ಲ್ಯಾಂಚ್ಯಾ ಶಿಮ್ಟ್ಯಾಂಚಿ ಫೊಟೊ ಧಾಡ್ತಾತ್ ಆನಿ ಖಂಚೆ ಪೂರಾ ನಾರ್ಲ್ ಕಾಡಿಜೆ ಮ್ಹಣ್ ವಿಚಾರ್ತಾತ್. ಘರ್ಚಾ ಧನಿಯಾಚಿ ವ ಧನಿನೆಚಿ ಜಾಪ್ ಆಯ್ಲ್ಯಾ ಉಪ್ರಾಂತ್ ನಾರ್ಲ್ ಕಾಡ್ತಾತ್.
ಎದೊಳ್ ಪರ್ಯಾಂತ್ ಆಮ್ಚ್ಯಾ ಸಮುದಾಯಾಂತ್ ಕಾಜಾರ್ ಜಾಂವ್ಚಿಂ ವ್ಹೊಕಾಲ್-ನೊವ್ರೊ ಆನಿ ತಾಂಚಾ ಘರ್ಚಿಂ ಸಾಂಗಾತಾ ವಚೊನ್ ಸಾಡೊ, ಧರ್ಮಾ ಸಾಡೊ, ಸಾಡ್ಯಾ ವಯ್ಲೆಂ ಆನಿ ಹೆರ್ ಸಾಡಿಯೊ ಆನಿ ವಸ್ತುರಾಂ ಘೆತಾಲಿಂ. ಫುಡ್ಲ್ಯಾ ದಿಸಾಂನಿ ಕಾಂಯ್ ವಾಟ್ಸಪ್ಪಾರ್'ಚ್ ಸಾಡೊ ಆನಿ ಹೆರ್ ಸಾಡಿಯಾಂಚೆ ಫೊಟೊ ಧಾಡುನ್ ಎಕಾಮೆಕಾ ಕಮೆಂಟ್ಸ್ ಆಶಾರ್ ಪಾಶಾರ್ ಕರುನ್ ಆನ್‌ಲಾಯ್ನಿರ್'ಚ್ ಆರ್ಡರ್ ದೀಂವ್ಕ್ ಫುರೊ.
ಆತಾಂಚಾ ಇವೆಂಟ್ ಮೆನೆಜರಾಂಕ್, ಕೆಟರಿಂಗ್ ವಾಲ್ಯಾಂಕ್, ಮ್ಯೂಸಿಕ್ ಗ್ರೂಪಾಂಕ್, ಬ್ಯಾಕ್ ಡ್ರೊಪ್ ಕರ್ತೆಲ್ಯಾಂಕ್, ಕಾರ್ಯೆಂ ನಿರ್ವಹಕಾಂಕ್ ಆನಿ ಟೋಸ್ಟ್ ಮಾಸ್ಟರಾಂಕ್ ವಾಟ್ಸಪ್ ಮ್ಹಸ್ತು ಉಪ್ಕಾರ್ತಾ. ಥೊಡೆ ಕಾರ್ಯೆಂ ನಿರ್ವಾಹಕ್ ಆಪ್ಣೆಂ ಚಲವ್ನ್ ವ್ಹೆಲ್ಲ್ಯಾ ಕಾಜಾರಾಂ ಸೊಭಾಣಾಂಚ್ಯೊ, ವೊಲಾಂಚ್ಯೊ, ಪಯ್ಲ್ಯಾ ಕುಮ್ಗಾರಾಂಚ್ಯೊ, ಜಲ್ಮಾ ದಿಸಾಂಚ್ಯೊ, ಜುಬ್ಲೆವಾಂಚ್ಯೊ, ಬಾಯ್ಲಾ ನಾಚಾಚ್ಯೊ ವಾ ಹೆರ್ ಕಾರ್ಯಾಂಚ್ಯೊ ಫೊಟೊ ಫೇಸ್‌ಬುಕಾರ್ ಘಾಲುನ್ ಧಾರಾಳ್ 'ಕಮೆಂಟ್ಸ್' ಆನಿ 'ಲೈಕ್' ಜೊಡ್ತಾತ್.
ಹ್ಯಾ ಕಾಳಾರ್ ಕಾಜಾರಾಂ ಸೊಭಾಣಾಂಕ್ ವಾ ಹೆರ್ ಕಾರ್ಯಾಂಕ್ ವಿಡಿಯೊಗ್ರಾಫರ್ ಆನಿ ಫೊಟೊಗ್ರಾಫರಾಂಚಿ ಗರ್ಜ್ ನಾ. ನೊವ್ರ್ಯಾಚ್ಯಾ ದೆಡ್ಯಾಕಡೆಂ ಆನಿ ವ್ಹೊಕ್ಲೆಚಾ ದೆಡಿಯೆಕಡೆ ಮಾತ್ರ್ ನ್ಹಯ್ ಸಂಭ್ರಮಾಕ್ ಹಾಜರ್ ಜಾಲ್ಲ್ಯಾ ಚಡಾವತ್ ಸಕ್ಟಾಂಕಡೆ ವಾಟ್ಸಪ್ ಆಸ್ತಾ. ಆನಿ ತಾಣೆಂ ಕ್ಲಿಕ್ ಕೆಲ್ಲ್ಯೊ ಫೊಟೊ ಖಿಣಾ ಭಿತರ್ ಸಂಸಾರಾಚಾ ಕೊನ್ಶಾ ಕೊನ್ಶಾಕ್ ಪಾವ್ತಾತ್.
ಬೋವ್ ಬೆಜಾರಾಯೆಚಿ ಗಜಾಲ್ ಮ್ಹಳ್ಯಾರ್ ರಸ್ತ್ಯಾರ್ ಅವ್ಘಡಾಂ ಘಡ್ತಾನಾ, ಘರಾಂಕ್ ವ ಬಾಂಧ್ಪಾಂಕ್ ಉಜೊ ಪೆಟ್ತಾನಾ ಜಮೊ ಜಾಲ್ಲೊ ಲೋಕ್ ವಾಟ್ಸಪ್ಪಾರ್ ಫೊಟೊ ಆನಿ ವಿಡಿಯೊ ಕಾಡ್ತಾ ಶಿವಾಯ್ ಆವ್ಘಡಾಂಕ್ ಸಾಂಪಡ್ಲೆಲ್ಯಾಂಚೆ ಕುಮ್ಕೆಕ್ ಜಾಂವ್, ಉಜೊ ಪಾಲ್ವಂವ್ಕ್ ಜಾಂವ್ ವಚಾನಾಂತ್. ಮೋರ್ನ್ ಫೊಂಡಾಂತ್ ದೆಂವಯ್ತಚ್ ಏಕ್ ಮೂಟ್ ಮಾತಿ ಘಾಲ್ಚ್ಯಾ ಬದ್ಲಾಕ್ ವಾಟ್ಸಪ್ಪಾರ್ ಫೊಟೊ ವ ವಿಡಿಯೊ ಕಾಡ್ತಾತ್!
ಫುಡ್ಲ್ಯಾ ದಿಸಾಂನಿ ಕುಮ್ಸಾರಾಂ ಆನಿ ಪ್ರಾಚಿತ್‌ಯಿ ವಾಟ್ಸಪ್ಪಾದ್ವಾರಿಂ ಅದಲ್-ಬದಲ್ ಜಾಂವ್ಕ್ ಪುರೊ. ಎದೊಳ್‌ಚ್ ಥೊಡ್ಯಾ ಧಾರ್ಮಿಕ್ ಟಿವಿ ಚಾನೆಲಾಂನಿ, ಆಮೊರಿ, ತೇರ್ಸ್, ನೊವೆನಾಂ, ಖುರ್ಸಾವಾಟ್, ಮಾಗ್ಣಿಂ, ವೊರೆಸಾಂವಾಂ, ರೆತಿರ್, ಆರಾಧಾನಾಂ, ಮಿಸಾಂ, ಸೆರ್ಮಾಂವ್... ಇತ್ಯಾದಿ ಪ್ರಸಾರ್ ಜಾತೇ ಆಸಾತ್. ಥೊಡಿಂ ಮಾಲ್ಘಡಿಂ ಮನ್ಶಾಂ ಘರಾ ಥಾವ್ನ್೦ಚ್ ಮಿಸಾಂ ಭೆಟಯ್ತಾತ್ ಆನಿ ಮಾಗ್ಣ್ಯಾ ವೊರೆಸಾಂವಾಂನಿ ವಾಂಟೆಲಿ ಜಾತಾತ್.
ಆಜ್ ವಿಗ್ಯಾನ್ ಆನಿ ತಂತ್ರ್ ಗಿನ್ಯಾನ್ ಇತ್ಲೆಂ ವಾಡೊನ್ ಆನಿ ಚಡೊನ್ ಆಯ್ಲಾಂಕಿ, ಫುಡ್ಲ್ಯಾ ದಿಸಾಂನಿ ಮರಣ್ ಪಾವ್‌ಲ್ಲೆ ವ್ಯಕ್ತಿ ಆಪುಣ್ ಸಾಸ್ಣಾಚೊ ವಿಶೆವ್ ಘೆವ್ನ್ ಆಸ್ಚೆ ಸುವಾತೆಚ್ಯೊ ಸೊಭಿತ್ ಫೊಟೊ ಕಾಡುನ್ ತಾಂಚಾ ಕುಟ್ಮಾ ಸಾಂದ್ಯಾಂಚ್ಯಾ ವಾಟ್ಸಪ್ಪಾಂಕ್ ಧಾಡುಂಕ್ ಪುರೊ!
Tags:
Pager, Mobile, Whatsapp, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
2/27/2021 ಹೆರೊಲ್ಪಿಯುಸ್: ಏಕ್ ಅವ್ಚಿತ್ ಭೆಟ್...
-
12/20/2020 ಯುವಜಣಾಂಕ್ ಪ್ರೇರಣ್ - ಜೆಸ್ಸಿಕಾ ಆನ್ನಾ ಲಿಝಾ...
-
12/6/2020 ಆಸ್ತ್ ........
-
11/25/2020 ಭಾರತಾಚಿಂ ಖಬ್ರೆ ಟಿವಿ ಚಾನೆಲಾಂ ಮರಣ್ ಪಾವ್ಲ್ಯ...
-
11/9/2020 ನಾಂವ್ ಬದಲ್ಲ್ಯಾನ್ ಗಾಂವ್ ಬದಲ್ನಾಂ...!...
-
10/17/2020 ಮಂಗ್ಳುರ್‌ಚೊ ಖ್ಯಾತ್ ಗ್ರಾಫೊಲೊಜಿಸ್ಟ್, ಸ್ಟೇ&...
-
-
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.