web analytics

From around the world

ಪ್ರವೀಣ್ ತಾವ್ರೊ, ಕುಲ್ಶೇಕರ್
             
+971 50 7554105
ತುಮ್ಚ್ಯಾ ಗಮನಾಕ್:
Best be viewed in 1366 X 768 screen resolution and in Google Chrome

ಮೊ೦ತಿ ಫೆಸ್ತ್ - ಗೊ೦ಯಾ೦ತ್ ಆನಿ ಮ೦ಗ್ಳುರಾ೦ತ್

Wednesday, September 6, 2017  /  By Admin

ಬರಯ್ಣಾರಾ ವಿಶಿಂ ಜಾಣಾ ಜಾ...

80.5
User Rating

ಆಖ್ಖ್ಯಾ ಸ೦ಸಾರಾ೦ತ್ ಶಿ೦ಪಡ್ಲೆಲ್ಯಾ ಕೆನರಾ ಮುಳಾಚ್ಯಾ ಮ೦ಗ್ಳುರಿ ಕೊ೦ಕ್ಣಿ ಕ್ರಿಸ್ತಾ೦ವ್ ಕುಟ್ಮಾ೦ನಿ, ಸಾ೦ಗಾತಾ ಮೆಳೊನ್ ಆಚರಣ್ ಕರ್ಚೆಂ ಕುಟ್ಮಾಚೆ೦ ಫೆಸ್ತ್ ಜಾವ್ನಾಸಾ - 'ಮೊ೦ತಿ ಫೆಸ್ತ್'. ಹ್ಯಾ ಫೆಸ್ತಾಚೆ೦ ಆಚರಣ್ ಆರ೦ಭ್ ಜಾಲ್ಲೆವಿಶಿ೦ ಕೊ೦ಕ್ಣಿ ಬರೊವ್ಪ್ಯಾ೦  ಮದೆ೦ ವಿವಿಧ್ ಅಭಿಪ್ರಾಯೊ ಆಸಾತ್. ಪುಣ್ ಹ್ಯೆ ವಿಶಿ೦ ಅಧ್ಯಯನ್ ಚಲಯಿಲ್ಲೊ ಭಾಶೆ ವಿಗ್ಯಾನಿ ಆನಿ ಸ೦ಸೊಧಕ್ ಜೆಜ್ವಿತ್ ಯಾಜಕ್ ದೊ| ಬಾಪ್ ಪ್ರತಾಪ್ ನಾಯ್ಕ್ ಗೊ೦ಯ್, ಆಪ್ಲ್ಯಾ ಲೇಖನಾ೦ತ್ ಮೊ೦ತಿ ಫೆಸ್ತಾಚ್ಯೆ ಸುರ್ವಾತೆವಿಶಿ೦ ಅಧಿಕೃತ್ ಮಾಹೆತ್ ದಿತಾ.

ಇತಿಹಾಸಾ ಪರ್ಮಾಣೆ 1510-೦ತ್ ಪುಡ್ತುಗೆಜಾ೦ನಿ ಗೊ೦ಯ್ ಶಹರ್ ಸ್ವಾದೀನ್ ಕರುನ್ ಭಾರತಾ೦ತ್ ಆಪ್ಲೆ೦ ರಾಜ್ ಸ್ಥಾಪನ್ ಕೆಲೆ೦.1521-೦ತ್ ಪೊರ್ತುಗಲಾ ಥಾವ್ನ್ ಭಾಯ್ರ್ ಸರ್‌ಲ್ಲೆ ಥೊಡೆ ಫ್ರಾನ್ಸಿಸ್ಕನ್ ಫ್ರಾದ್ ಮ೦ಗ್ಳುರಾಕ್ ಪಾವ್ಲೆ. ಆನಿ ತೀನ್ ಸುವಾತೆ೦ನಿ ತಾಣಿ೦ ತೀನ್ ಇಗರ್ಜ್ಯೊ ಬಾ೦ದ್ಲ್ಯೊ. ಪಯ್ಲಿ ರುಜಾರ್ ಮಾಯೆಚಿ ಇಗರ್ಜ್ ಬೊಳಾರ್, ದುಸ್ರಿ ಮೆರ್ಸಿನ್ ಮಾಯೆಚಿ ಇಗರ್ಜ್ ಉಳ್ಳಾಲ್ ಆನಿ ತಿಸ್ರಿ ಸಾ೦. ಫ್ರಾನ್ಸಿಸ್ ಆಸಿಸಿಚಿ ಇಗರ್ಜ್, ಫರ೦ಗಿಪೆಟ್. 1526-೦ತ್ ಹಾ೦ಗಾಸರ್ ತಾ೦ಚೊ ಮೊಠ್ ವಾ  ಕೊ೦ವೆ೦ತ್ ಬಾ೦ಧ್ಲೊ ಮ್ಹಣ್ ಆಮ್ಕಾ೦ ಇತಿಹಾಸಾ೦ತ್ ವಾಚು೦ಕ್ ಮೆಳ್ತಾ. ಹ್ಯಾ ಕಾಳಾರ್ ದಕ್ಶಿಣ್ ಕನ್ನಡ ಜಿಲ್ಲ್ಯಾ೦ತ್ ಕ್ರಿಸ್ತಾ೦ವ್ ಭಾವಾಡ್ತಾ ಸ೦ಗಿ೦ ಸಾ೦. ಫ್ರಾನ್ಸಿಸ್ ಆಸಿಸಾಚಿ ಭಕ್ತ್‌ಯಿ ವಿಸ್ತಾರ್ಲಿ. 1658 ಮ್ಹಣಾಸರ್ ಕಾಪುಚಿನ್ ಫ್ರಾದ್ ಫರ೦ಗಿಪೆಟೆ೦ತ್ ವಸ್ತಿ ಕರ್ನ್ ಆಸ್‌ಲ್ಲೆ ಮ್ಹಣ್ ಥೊಡ್ಯಾ೦ಚಿ ಅಭಿಪ್ರಾಯ್. ಕೆನರಾ ಜಿಲ್ಲ್ಯಾ೦ತ್ ಪುಡ್ತುಗೆಜಾ೦ಚೆ೦ ಬಳ್ ಉಣೆ೦ ಜಾವ್ನ್ ಯೆತಾನಾ ಕಾಪುಚಿನ್ ಫ್ರಾದಿ೦ಚೊ ಸ೦ಕೊಯಿ ದೆ೦ವೊನ್ ಆಯ್ಲೊ. 1660 ಥಾವ್ನ್ 1762 ಪರ್ಯಾ೦ತ್ ಇತಿಹಾಸಾಚಾ ಪಾನಾ೦ನಿ ಕಾಪುಚಿನ್ ಫ್ರಾದಿ೦ಚೊ ಉಲ್ಲೇಕ್ ನಾ.

ತವಳ್ ಮೊ೦ತೆ ಮರಿಯಾನೊ ದೊ೦ಗ್ರಾರ್ ಕೋಣ್ ವಸ್ತಿ ಕರುನ್ ಆಸ್‌ಲ್ಲೆ ಮ್ಹಳ್ಳ್ಯಾಕ್‌ಯಿ ಸ್ಪಶ್ಟ್ ಮಾಹೆತ್ ಮೆಳಾನಾ. ಗೊ೦ಯಾ೦ ಥಾವ್ನ್ ಮ೦ಗ್ಳುರಾಕ್ ಆಯಿಲ್ಲೆ ಫ್ರಾನ್ಸಿಸ್ಕನ್ ಫ್ರಾದ್, ಪಾಟಿ೦ ಗೊ೦ಯಾ೦ಕ್ ಗೆಲ್ಯಾ ಉಪ್ರಾ೦ತ್ ಗೊ೦ಯ್ಚೆಚ್ ಸ್ಥಳಿಕ್ ಪಾದ್ರಿ ಕೆನರಾಕ್ ಆಯ್ಲೆ. 1660 ಥಾವ್ನ್ 1782 ಮ್ಹಣಾಸರ್ ಕೆನರಾ ಜಿಲ್ಲ್ಯಾ೦ತ್ಲ್ಯಾ ಚಡುಣೆ 29 ಪ್ರಮುಕ್ ಫಿರ್ಗಜಿ೦ನಿ ಗೊ೦ಯ್ಕಾರ್ ಪಾದ್ರಿ ವಿಗಾರ್ ಜಾವ್ನಾಸ್‌ಲ್ಲೆ.

ಬಾಪ್ ಜೊಕಿಮ್ ಮಿರಾ೦ದ್

ತ್ಯಾ ಕಾಳಾರ್  ಕೆನರಾ೦ತ್ಲ್ಯಾ  ಪ್ರಮುಕ್ ಫಿರ್ಗಜಾ೦ ಪಯ್ಕಿ ಒಮ್ಜೂರ್ ಫಿರ್ಗಜ್‌ಯಿ ಏಕ್. ಪಾದ್ರೆ ಜೊಕಿಮ್ ಮಿರಾ೦ದ್ ಮ್ಹಳ್ಳೊ ಭಕ್ತಿವ೦ತ್ ಗೊ೦ಯ್ಕಾರ್ ಯಾಜಕ್ ಒಮ್ಜೂರ್ ಫಿರ್ಗಜಿಚೊ ವಿಗಾರ್. 1763-೦ತ್ ತಾಣೆ೦ ಮೊ೦ತೆ ಮರಿಯಾನೊ ದೊ೦ಗ್ರಾರ್ ಏಕ್ ಸೆಮಿನರಿ ಆರ೦ಭ್ ಕೆಲಿ. 'ಮೊ೦ತೆ ಮರಿಯಾನೊ' ಮ್ಹಳ್ಯಾರ್ 'ಮರಿಯೆಚೊ ದೊ೦ಗೊರ್' ಮ್ಹಳ್ಳೊ ಅರ್ಥ್. ಪುಡ್ತುಗೆಜಾ೦ನಿ ತಯಾರ್ ಕೆಲ್ಲಿ ಲಗ್‌ಬಗ್ ಸಾಡೆಚಾರ್ಶಿ೦ ವರ್ಸಾ೦ ಆದ್ಲಿ ಆಸಿಸಿಚಾ ಸಾ೦. ಫ್ರಾನ್ಸಿಸಾಚಿ ರುಕಾಡಾಚಿ ಇಮಾಜ್ ಆಜೂನ್ ಮೊ೦ತೆ ಮರಿಯಾನೊ ಕೊವೆ೦ತಾ೦ತ್ ಸುರಕ್ಶಿತ್ ಆಸಾ.

ಬಾಪ್ ಜೊಕಿಮ್ ಮಿರಾ೦ದ್ ಹೈದರ್ ಆಲಿಚೊ ಈಶ್ಟ್ ಜಾಲ್ಲ್ಯಾನ್ ತಾಚೊ ಸೇನಾಧಿಕಾರಿ ಆನಿ ಶಿಪಾಯ್ ಝುಜಾ೦ತ್ ಜೀಕ್ ಮೆಳ್ಚೆ ಖಾತಿರ್ ಫರ೦ಗಿಪೆಟ್ ಮರಿಯೆಚಾ ಇಮಾಜಿಲಾಗಿ೦ ಮಾಗ್ತಾಲೆ, ಫುಲಾ೦ ಭೆಟಯ್ತಾಲೆ ಆನಿ ವಾತಿ ಪೆಟಯ್ತಾಲೆ.

ಬಾಪ್ ಜೊಕಿಮ್ ಮಿರಾ೦ದ್ ಏಕ್ ದೆಣ್ಯಾವ೦ತ್ ಕವಿ, ಸ೦ಗೀತ್‌ಗಾರ್, ಭಕ್ತಿಕ್ ಗಿತಾ೦ ರಚ್ಪಿ ಆನಿ ಗಾವ್ಪಿ ಮ್ಹಣ್ಚಾಕ್ ತಾಣೆ೦ ರಚ್‌ಲ್ಲಿ೦ ಬೋವ್ ಸೊಭಿತ್ ಕ೦ತಾರಾ೦ಚ್ ಸಾಕ್ಸ್. ತಾಣೆ೦ ರಚ್ಲಲ್ಯಾ ಲೊಕಾಮೊಗಾಳ್ ಕ೦ತಾರಾ೦ ಪಯ್ಕಿ ಪ್ರಮುಕ್ ಆಸಾತ್ - 'ಸಕ್ಕಡ್ ಸಾ೦ಗಾತಾ ಮೆಳ್ಯಾ೦', 'ಮರಿಯೆಕ್ ಹೊಗೊಳ್ಸಿಯಾ೦', 'ರಿಗ್ಲೊ ಜೆಜು ಮೊಳ್ಯಾ೦ತ್', 'ಪಾಪಿಯಾ  ನಿರ್ಭಾಗ್ಯಾ', 'ಉಟಾ ಉಟಾ ಪ್ರಾಣಿಯಾ', 'ಸರ್ಗಿ೦ ಥಾವ್ನ್' ಆನಿ ಹೆರ್ ಅಮರ್ ಕ೦ತಾರಾ೦ ಘಡ್‌ಲ್ಲಿ ಕೀರ್ತ್ ಆನಿ ಮಾನ್ ಫಾವೊ ತ್ಯಾ ಭಾಗೆವ೦ತ್ ಫ್ರಾದ್ ಜೊಕಿಮ್ ಮಿರಾ೦ದ್ ಬಾಪಾಕ್. 'ಶೆ೦ಬೊರ್ ಕ೦ತಿಗೊ' ಬುಕಾ೦ತ್ ತಾಚಿ೦ ಸಬಾರ್ ಕ೦ತಾರಾ೦ ಆಸಾತ್.

ಮ೦ಗ್ಳುರಾ೦ತ್ಲಿ ಪಯ್ಲಿ ಸೆಮಿನರಿ ತಿ. ಮೊ೦ತೆ ಮರಿಯಾನೊ ದೊ೦ಗ್ರಾರ್ ಸಾ೦. ಫ್ರಾನ್ಸಿಸ್ ಆಸಿಸಿಚೆ೦ ಭಕ್ತಿಪಣ್ ಪರ್ತ್ಯಾನ್ ಜಿವಾಳ್ ಜಾಲೆ೦. ಪುಣ್ ಭೋವ್ ಬೆಜಾರಾಯೆಚಿ ಗಜಾಲ್ ಕಿತೆ೦ಗೀ ಮ್ಹಳ್ಯಾರ್ ಫಕತ್ ಧಾ ವರ್ಸಾ೦ ಭಿತರ್ ಸೆಮಿನರಿ ಧಾ೦ಪ್ಚಿ ಪಡ್ಲಿ. ಹಾಕಾ ಪ್ರಮುಕ್ ಕಾರಣ್ ಮ್ಹಳ್ಯಾರ್ ಕೆನರಾ ಜಿಲ್ಲೊ ಟಿಪ್ಪು ಸುಲ್ತಾನಾಚಾ ಸ್ವಾಧೀನ್ ಜಾಲ್ಲೊ. ತೊ ಕ್ರಿಸ್ತಾ೦ವಾ೦ಕ್ ವಿರೋಧಿ ಜಾಲ್ಲ್ಯಾನ್ ಸೆಮಿನರಿ ಚಲ೦ವ್ಕ್ ಸಾದ್ಯ್ ನಾ ಮ್ಹಣ್ ಕಳ್ಳೆ೦.

ಬಾಪ್ ಜೊಕಿಮ್ ಆನಿ ಹೈದರ್ ಆಲಿ

1763-೦ತ್ ಹೈದರ್ ಆಲಿನ್ ಬಿದನೂರ್ ರಾಜ್ಯಾವಯ್ರ್ ಜೀಕ್ ಆಪ್ಣಾಯ್ತಾನಾ ಬಾಪ್ ಜೊಕಿಮ್ ಮಿರಾ೦ದ್ ಫರ೦ಗಿಪೆಟ್‌ಚೊ ವಿಗಾರ್. ಹೈದರ್ ಆಲಿ ಆಪುಣ್ ಝುಜಾಕ್ ದೆ೦ವ್ತಾನಾ ಆಪ್ಲ್ಯಾ ಸೈನಾಚಾ ಜಯ್ತಾ ಖಾತಿರ್ ಬಾಪ್ ಜೊಕಿಮ್ ಮಿರಾ೦ದಾಕಡೆ ಮಾಗ್ಣ್ಯಾಚೊ ಆಧಾರ್ ಮಾಗ್ತಾಲೊ ಆನಿ ಉಪ್ಕಾರಿ ಮನಾನ್ ಆ೦ಗವ್ಣೆಚ್ಯೊ ಕಾಣಿಕೊ ದಿತಾಲೊ ಖ೦ಯ್. ತಾಚೆ ಶಿಪಾಯ್ ಮೊ೦ತೆ ಮರಿಯಾನೊ೦ತ್ ಆಸ್‌ಲ್ಲ್ಯಾ ಮರಿಯೆಚಾ ಇಮಾಜಿ ಮುಕಾರ್ ರಾವೊನ್ ಝುಜಾ೦ತ್ ಜೀಕ್ ಮೆಳ್ಚೆ ಪಾಸತ್ ವಾತಿ ಜಳವ್ನ್ ಭಕ್ತಿಪಣಾನ್ ಮಾಗ್ತಾಲೆ ಖ೦ಯ್. 1945-೦ತ್ ಮರಿಯೆಚಿ ತಿ ಇಮಾಜ್ ಕೊವೆ೦ತಾಚಾ ಗೆಟಿಲಾಗಿ೦ ಪ್ರತಿಶ್ಟಾಪಿತ್ ಕೆಲ್ಲಿ ತಿ ಆಜೂನ್ ಥ೦ಯ್ಸರ್ ಆಸಾ.

ಬಾಳೊಕ್ ಮರಿಯೆಚಿ ಇಮಾಜ್  

ಧಾಕ್ಟುಲ್ಯಾ ಗ್ಲಾಸಾಚಾ ಪೆಟೆ೦ತ್ ಆಸ್ಚಿ ಬಾಳೊಕ್ ಮರಿಯೆಚಿ ಸೊಭಿತ್ ಇಮಾಜ್ ಇಟೆಲಿ ಥಾವ್ನ್ ಆಯಿಲ್ಲಿ, ತಿ ನೆಲ್ಲ್ಯಾಡಿಚಾ ಎಕಾ ಮಲೆಯಾಳಿ ಕುಟ್ಮಾಚಾ ಘರಾ೦ತ್ ಆಸ್‌ಲ್ಲಿ. ಹಿ ಇಮಾಜ್ ಖ೦ಚ್ಯಾಯಿ ಎಕಾ ಇಗರ್ಜೆಕ್ ದೀ೦ವ್ಕ್ ತಾ೦ಕಾ೦ ಮನ್ ಆಸ್‌ಲ್ಲೆ೦. ಹೆ೦ ಆಯ್ಕಾಲ್ಲ್ಯಾ ಎಕಾ ಕೊ೦ಕ್ಣಿ ಕಥೊಲಿಕ್ ಕುಟ್ಮಾನ್, ಹರ್ ಎಕಾ ಆಯ್ತಾರಾ ಮೊ೦ತಿ ಮಾಯೆಚೆ೦ ನೊವೆನ್ ಚಲ್ಚಾ ಮೊ೦ತೆ ಮರಿಯಾನೊ ಕೊವೆ೦ತಾಕ್ ತಿ ಇಮಾಜ್ ಪಾವ೦ವ್ಕ್ ಸಲಹಾ ದಿಲಿ. ಅಶೆ೦ ತಿ ಇಮಾಜ್ ಫರ೦ಗಿಪೆಟ್ ಪಾವ್ಲಿ. ಆನಿ ಆತಾ೦ ಇಗರ್ಜೆ ಸಾಮ್ಕಾರ್‌ಚ್ ಬಾಳೊಕ್ ಮರಿಯೆಚಾ ಮಾನಾಕ್ ಲ್ಹಾನ್‌ಶೆ೦ ಏಕ್ ಕೊಪೆಲ್ ಬಾ೦ಧುನ್ ಬಾಳೊಕ್ ಮರಿಯೆಚಿ ಇಮಾಜ್ ಥ೦ಯ್ಸರ್ ಪ್ರತಿಸ್ಠಾಪನ್ ಕೆಲ್ಯಾ.

ಮೊ೦ತಿ ಫೆಸ್ತಾಚಿ ಸುರ್ವಾತ್

ಅಖ್ಖ್ಯಾ ಸ೦ಸಾರಾ೦ತ್ ಶಿ೦ಪಡ್ಲೆಲ್ಯಾ  ಕೆನರಾ ಮುಳಾಚ್ಯಾ ಮ೦ಗ್ಳುರಿ ಕೊ೦ಕ್ಣಿ ಕಥೊಲಿಕ್ ಕುಟ್ಮಾ೦ನಿ ಸಾ೦ಗಾತಾ ಮೆಳೊನ್ ಆಚರಣ್ ಕರ್ಚೆಂ ಕುಟ್ಮಾಚೆ೦ ಫೆಸ್ತ್ ಜಾವ್ನಾಸಾ - 'ಮೊ೦ತಿ ಫೆಸ್ತ್'. ಹ್ಯಾ ಫೆಸ್ತಾಚೆ೦ ಆಚರಣ್ ಆರ೦ಭ್ ಜಾಲ್ಲೆವಿಶಿ೦ ಕೊ೦ಕ್ಣಿ ಬರೊವ್ಪ್ಯಾ೦  ಮದೆ೦ ವಿವಿಧ್ ಅಭಿಪ್ರಾಯೊ ಆಸಾತ್. ಪುಣ್ ಹ್ಯೆ ವಿಶಿ೦ ಅಧ್ಯಾಯನ್  ಚಲಯಿಲ್ಲೊ ಭಾಶೆ ವಿಗ್ಯಾನಿ ಆನಿ ಸ೦ಸೊದಕ್  ಜೆಜ್ವಿತ್ ಯಾಜಕ್ ದೊ| ಬಾಪ್ ಪ್ರತಾಪ್ ನಾಯ್ಕ್ ಗೊ೦ಯ್, ಆಪ್ಲ್ಯಾ ಲೇಖನಾ೦ತ್ ಅಶೆ೦ ಬರಯ್ತಾ :

1552 ಮಾಯ್ ಮಹಿನ್ಯಾಚಾ 6 ತಾರಿಕೆರ್ ಸಾ೦. ಫ್ರಾನ್ಸಿಸ್ ಸಾವೆರ್ ಪರ್ನ್ಯಾ ಗೊ೦ಯಾ೦ತ್ ಪಾವ್ಲೊ. ತಾಚಾ ಪಾಟ್ಲ್ಯಾನ್ ಹೆರ್ ಜೆಜ್ವಿತ್ ಆಯ್ಲೆ. 1552೦ತ್ ಡಚ್ಚ್ ದೇಶಾಚೊ ಫಾಮಾದ್ ಜೆಜ್ವಿತ್ ಬಾಪ್ ಗಾಸ್ಪಾರ್ ಬಾರ್ಡೆವುಸ್ (1515-1553) ಗೊ೦ಯಾ೦ತ್ ಪಾವ್ಲೊ. ಫ್ರಾನ್ಸಿಸ್ ಸಾವೆರಾನ್, ಗಾಸ್ಪಾರ್ ಬಾರ್ಡೆವುಸಾಕ್ ಸಾ೦. ಪಾವ್ಲು ಕೊಲೆಜಿಚೊ ರೆಕ್ತೊರ್ ಆನಿ ಉದೆ೦ತಿಚ್ಯಾ ಜೆಜ್ವಿತ್ ಪ್ರಾ೦ತ್ಯಾಚೊ ಉಪ ಪ್ರಾ೦ತಿಕ್ ವ್ಹಡಿಲ್ ಮ್ಹಣ್ ನೆಮ್ಲೊ. 1553 ಒಕ್ತೊಬರ್ 18ವೆರ್ ಬಾಪ್ ಗಾಸ್ಪಾರ್ ಬಾರ್ಡೆವುಸ್ ಗೊ೦ಯಾ೦ತ್ ಸರ್ಲೊ. ಪುಣ್ ತಾಚಾ ಆದಿ೦ ತಾಣೆ ಸಾಂ. ಪಾವ್ಲು ಕೊಲೆಜಿ೦ತ್ ಸ೦ಗೀತ್ ಶಿಕೊ೦ವ್ಚಿ ವ್ಯವಸ್ಥಾ ಕೆಲಿ, ಲಿತುರ್ಜಿಂತ್ ಜಿವ್ಸಾಣ್ ಭರ್ಲಿ ಆನಿ ಮೊ೦ತಿ ಫೆಸ್ತಾಕ್ ಭುರ್ಗ್ಯಾಂನಿ, ಸಾಯ್ಬಿಣ್ ಮಾಯೆಕ್ ಫುಲಾ೦ ಉಡೊ೦ವ್ಚಿ ರೀತ್ ಸುರು ಕೆಲಿ. ಹಾಚೆ ಪುರಾವೆ ತಾಣೆ ರೊಮಾ೦ತ್ ಆಸ್ಲೆಲ್ಯಾ ಆಪ್ಲ್ಯಾ ಜೆಜ್ವಿತ್ ಶ್ರೇಶ್ಟ್ ವ್ಹಡಿಲಾಕ್ ಬರಯ್ಲೆಲ್ಯಾ ಪತ್ರಾ೦ನಿ ಮೆಳ್ತಾತ್.

ಗೊ೦ಯಾ೦ತ್ ಮೊ೦ತಿ ಫೆಸ್ತ್

ಮೊ೦ತಿ ಫೆಸ್ತಾಚಿ ಸುರ್ವಾತ್ ಗೊ೦ಯಾ೦ತ್ ಅಶಿ ಜಾಲಿ :   
ಗೊ೦ಯಾ೦ತ್ ಶ್ರಾವಣ್ ಮಹಿನೊ ಸ೦ಪ್ತಚ್ ಭಾದ್ರಪದ್ ಮಹಿನೊ (ಸುಮಾರ್ ಆಗೊಸ್ತ್-ಸಪ್ತೆ೦ಬರ್ ಮಹಿನ್ಯಾ೦ನಿ) ಸುರು ಜಾತಾ. ಭಾದ್ರಪದ್ ಮಹಿನ್ಯಾಚಾ ಚವ್ತ್ಯಾ ದಿಸಾ ಹಿ೦ದು ಲೋಕ್ ಚವತ್ (ಚಾವ್ತಿ) ಪರಬ್ ಆಚರಣ್ ಕರ್ತಾತ್. ಹಿ ಕುಟ್ಮಾಚಿ ಪರಬ್ ಜಾಲ್ಲ್ಯಾನ್  ಪರ್ಗಾಂವಾ೦ತ್ ಆಸ್‌ಲ್ಲಿ೦ ಆಪ್ಲ್ಯಾ ಮೂಳ್ ಗಾ೦ವಾ೦ತ್ ಯೆತಾತ್ ಆನಿ ಗಾ೦ವಾ೦ತ್ ಆಸ್ಚಾ ಆಪ್ಲ್ಯಾ ಕುಟ್ಮಾ ಸಾ೦ಗಾತಾ ಹಿ ಪರಬ್ ವ್ಹಡಾ ಸ೦ತೊಸಾನ್ ಆನಿ ದಬಾಜ್ಯಾನ್ ಆಚರಣ್ ಕರ್ತಾತ್. ಹ್ಯೆ ಪರ್ಬೆ ವೆಳಾರ್ ಹಿ೦ದು ಲೋಕ್ ಆಪ್ಲ್ಯಾ ಘರಾ೦ನಿ ಗಣೇಶಾಚಿ ಮೂರ್ತಿ ಬಸಯ್ತಾತ್ ಆನಿ ಸದಾ೦ ಮೂರ್ತಿ ಮುಕಾರ್ ಗಾ೦ವ್ಚಿ೦ ತಾಜಾ ಫುಲಾ೦ ದವರ್ತಾತ್ ಆನಿ ಪುಜಾ ಕರ್ತಾತ್.

ಹಿ ಪರಬ್ ದೇಡ್, 3, 5, 7, 9 ವಾ 11 ದೀಸ್ ಆಸ್ತಾ. ಘರಾ೦ತ್ ಗಣೇಶಾಚಿ ಮೂರ್ತಿ ಆಸಾಸರ್ ವಿವಿಧ್ ಪ್ರಕಾರಾ೦ಚೆ೦ ತರಕಾರಿಚೆಂ ಜೆವಣ್ ಆನಿ ಗೊಡ್ಶೆ೦ ಖಾಣ್ ಕರ್ತಾತ್. ಹ್ಯೆ ಪರ್ಬೆ ವೆಳಾರ್ ಏಕ್ ದೀಸ್ ಹಿ೦ದು ಲೋಕ್  'ನವೆ೦' ಜೆವ್ತಾ. ಹ್ಯಾ ದಿಸಾ೦ನಿ ಜೆವಣ್ ಕೆ೦ಳ್ಬ್ಯಾಚಾ ಪಾನಾರ್ ವಾ ಹೆರ್ ಖೊಲ್ಯಾಚೆರ್ ಜೆವ್ತಾತ್. ಪರ್ಬೆಚಾ ದಿಸಾ೦ನಿ ಹಿ೦ದು ಲೋಕ್ ಮಾಸ್ ಮಾಸ್ಳಿ ಘರಾ೦ತ್ ಹಾಡಿನಾ೦ತ್ ವಾ ಖಾಯ್ನಾ೦ತ್.

16ವ್ಯಾ ಶೆಕ್ಡ್ಯಾ೦ತ್ ಗೊ೦ಯ್ಚ್ಯಾ ತಿಸ್ವಾಡಿ೦ತ್ ಜೆಜ್ವಿತಾ೦ನಿ ಆನಿ ಹೆರ್ ಧಾರ್ಮಿಕಾ೦ನಿ ಕ್ರಿಸ್ತಾ೦ವ್ ಧರ್ಮ್ ಪಸರ್ಲೊ. ಆತಾ೦ಚ್ಯಾ ಪರ್ನ್ಯಾ ಗೊ೦ಯಾ೦ತ್ ದೊ೦ಗ್ರಾರ್ 1516ವ್ಯಾ ವರ್ಸಾ, ಆಫೊನ್ಸೊ ಆಲ್ಬುಕೆರ್ಕ್ ಹಾಣೆ ಸಾಯ್ಬಿಣಿಚಾ ಮಾನಾಕ್ ದೊ೦ಗ್ರಾಚೆ ಆಮ್ಚೆ ಮಾಯೆಚೆ೦ ಕೊಪೆಲ್ (Capela de Nossa Senhora de Monte) ಬಾ೦ಧ್ಲೆಂ. ಪುರ್ತುಗೆಜ್ ಭಾಶೆ೦ತ್ 'ಮೊ೦ತೆ' ಮ್ಹಳ್ಯಾರ್ ದೊ೦ಗೊರ್. ಹೆ೦ ಕೊಪೆಲ್ ಆಜೂನ್ ಆಸಾ.

ಆದಿ೦ ಥ೦ಯ್ಸರ್ ಸಪ್ತೆ೦ಬರಾಚಾ 8 ತಾರಿಕೆರ್ ಮೊ೦ತಿ ಸಾಯ್ಬಿಣಿಚೆ೦ ಫೆಸ್ತ್ ಜಾತಾಲೆ೦. ಆತಾ೦ ತೆ೦ ಫೆಸ್ತ್ 8 ತಾರಿಕೆ ಉಪ್ರಾ೦ತ್ ಯೆ೦ವ್ಚ್ಯಾ ಆಯ್ತಾರಾ ಕರ್ತಾತ್. ಸ೦ಸಾರ್‌ಭರ್ ಸಪ್ತೆ೦ಬರ್ 8 ತಾರಿಕೆರ್ ಸಾಯ್ಬಿಣಿಚಾ ಜಲ್ಮಾಚೆ೦ ಫೆಸ್ತ್ ಕರ್ತಾನಾ, ತ್ಯಾ ಫೆಸ್ತಾಕ್ ಗೊ೦ಯಾ೦ತ್ 'ಮೊ೦ತಿ ಸಾಯ್ಬಿಣೆಚೆ೦ ಫೆಸ್ತ್' ಹೆ೦ ನಾ೦ವ್ ಆಯ್ಲೆ೦.

ತಿಸ್ವಾಡಿ೦ತ್ಲೊ ಹಿ೦ದು ಆನಿ ಮುಸ್ಲಿಮ್ ಲೋಕ್  ಕ್ರಿಸ್ತಾ೦ವ್ ಜಾತಚ್ 1552ವ್ಯಾ ವರ್ಸಾ ಫಾ. ಬಾಲ್ತಜಾರಾನ್ ಮೊ೦ತಿ ಫೆಸ್ತಾಚ್ಯಾ ನೊವೆನಾವೆಳಾರ್ ಸಾಯ್ಬಿಣಿಚಾ ಮಾನಾಕ್ ಫುಲಾ೦ ಎಕ್ಟಾ೦ಯ್ ಕರು೦ಕ್ ಕ್ರಿಸ್ತಾ೦ವ್ ಭುರ್ಗ್ಯಾಂಕ್ ಸಾ೦ಗ್ಲೆ೦ ಆನಿ ಫುಲಾ೦ ಉಡೊ೦ವ್ಚಿ ರೀತ್ ಶಿಕಯ್ಲಿ. ಪುಣ್ ಆತಾ೦ ಭುರ್ಗ್ಯಾಂನಿ ಆನಿ ವ್ಹಡಾ೦ನಿ ಫುಲಾ೦ ಹಾಡುನ್ ತಿ೦ ಸಾಯ್ಬಿಣಿಚ್ಯಾ ಇಮಾಜಿ ಮುಕಾರ್ ದವರ್ಚಿ ರೀತ್ ಕಾ೦ಯ್ ಇಗರ್ಜಿಂನಿ ಸುರು ಜಾಲ್ಯಾ.

ವಿವಿಧ್ ಕಾರಣಾ೦ಕ್ ಲಾಗುನ್ ಗೊ೦ಯ್‌ಚೊ ಕ್ರಿಸ್ತಾ೦ವ್ ಲೋಕ್ 16, 17, 18 ಆನಿ 19 ಶೆಕ್ಡ್ಯಾ೦ನಿ ಕೆನರಾ೦ತ್ ವಸ್ತಿ ಕರು೦ಕ್ ಗೆಲೊ. ಸ್ಥಳೀಯ್ ಇತಿಹಾಸಾ ಪರ್ಮಾಣೆ ಸತ್ರಾವ್ಯಾ ಶೆಕ್ಡ್ಯಾ೦ತ್ ಮ್ಹಣ್ಜೆ  ಚಡುಣೆ 300 ವರ್ಸಾ೦ ಆದಿ೦ ಬಾಪ್ ಜೊಕಿಮ್ ಮಿರಾ೦ದಾನ್ ಮೊ೦ತೆ ಮರಿಯಾನೊ ಕೊವೆ೦ತಾ೦ತ್ ಮೊ೦ತಿ ಫೆಸ್ತ್ ಆಚರಣಾಚಿ ಸುರ್ವಾತ್ ಕೆಲ್ಲಿ. ಸಪ್ತೆ೦ಬ್ರಾ೦ತ್ ಹಿ೦ದೂ ಲೋಕ್ 'ಗಣೇಶ ಚತುರ್ಥಿ'(ಚೌತಿ) ಫೆಸ್ತ್ ಆಚರ್ಸಿತಾತ್. ತ್ಯಾ ದಿಸಾ೦ನಿ ತೆ ಮಾಸ್ ಮಾಸ್ಳಿ ಖಾಯ್ನಾ೦ತ್. ಹ್ಯಾ ಫೆಸ್ತಾವರ್ವಿ೦ ಪ್ರೇರಿತ್ ಜಾಲ್ಲ್ಯಾ ಬಾಪ್ ಜೊಕಿಮ್ ಮಿರಾ೦ದಾನ್ ಸಪ್ತೆ೦ಬರ್ 8 ತಾರಿಕೆರ್ ಯೆ೦ವ್ಚಾ ಬಾಳೊಕ್ ಮರಿಯೆಚಾ ಫೆಸ್ತಾಕ್ ತಯಾರಿ ಜಾವ್ನ್ ನೋವ್ ದಿಸಾ೦ಚೆ೦ ನೊವೆನ್ ಆರ೦ಭ್ ಕೆಲೆ೦. ಆನಿ ಫೆಸ್ತಾ ದಿಸಾ 'ನವೆ೦' ಬೆ೦ಜಾರ್ ಕರುನ್ ಘರಾ೦ನಿ ಕುಟ್ಮಾಸ೦ಗಿ೦ ನವೆ೦ ಜೆ೦ವ್ಚಿ ರಿವಾಜ್ ಚಾಲು ಕೆಲಿ. ಬೆ೦ಜಾರ್ ಕೆಲ್ಲೆ೦ 'ನವೆ೦' (ಕಣ್ಶಿ) ಘರಾ ಭಿತರ್ ಹಾಡ್ತಾನಾ ಆಮ್ಚಿ೦ ಪುರ್ವಜಾ೦ ಘರಾ ಭಿತರ್ ಕಸ್ಲೆ೦ಚ್ ಮಾಸ್, ಮಾಸ್ಳೆಚೆ೦ ನಿಸ್ತೆ೦ ದವರಿನಾತ್‌ಲ್ಲಿ೦. ಆನಿ ಫೆಸ್ತಾ ದೀಸ್ ಸ೦ಪೂರ್ಣ್ ರಾ೦ದ್ವಯೆಚೆ೦ ಜೆವಣ್ ಜೆ೦ವ್ಚೊ ಸ೦ಪ್ರದಾಯ್ ಸುರು ಜಾಲೊ. ಮೊ೦ತೆ ಮರಿಯಾನೊ೦ತ್ ಹ್ಯಾ ಫೆಸ್ತಾಚಿ ಸುರ್ವಾತ್ ಜಾಲ್ಲ್ಯಾನ್ ಹಾಕಾ 'ಮೊ೦ತಿ ಫೆಸ್ತ್' ಮ್ಹಳ್ಳೆ೦ ನಾ೦ವ್ ಪಡ್ಲೆ೦ ಜಾವ್ಯೆತ್.

ತ್ಯೆ ದಿಸಾಂನಿ ಗೊ೦ಯ್‌ಚ್ಯೆ ಆರ್ಚ್ ದಿಯೆಸೆಜಿಖಾಲ್ ಆಮ್ಚೊ ಕೆನರಾ ಮುಳಾಚೊ ಲೋಕ್ ಆಸ್‍ಲ್ಲೊ. ಗೊ೦ಯ್ಚೆ ಪಾದ್ರಿ ಯೇವ್ನ್ ಲೊಕಾಚಿ ಆತ್ಮಿಕ್ ಸೆವಾ ಕರ್ತಾಲೆ. ಥ೦ಯ್ಸರ್ ತಾಣಿ೦ ಮೊ೦ತಿ ಫೆಸ್ತ್ ಆಚರಣ್ ಕರ್ತಾನಾ ಥೊಡಿ ಬದ್ಲಾವಣ್ ಕೆಲಿ. ಕಣ್ಶೊ ಬೆ೦ಜಾರ್ ಕರುನ್ ನವೆ೦ ಜೆ೦ವ್ಚಿ ರೀತ್, ಆನಿ ಕೊಬು ವಾ೦ಟ್ಚಿ ರೀತ್ ಸುರು ಕೆಲಿ. 19ವ್ಯಾ ಶೆಕ್ಡ್ಯಾ೦ತ್ ಇಟೆಲಿ ಥಾವ್ನ್ ಮ೦ಗ್ಳುರ್ ಶಹರಾಕ್ ಆಯ್ಲೆಲಿ  'Maria Bambina' (ಮರಿಯಾ ಭುರ್ಗ್ಯಾಂಚಿ) ಇಮಾಜ್ ಫುಲಾ೦ ಉಡಯ್ತಾನಾ ದವರ್ಚಿ ಚಾಲ್ ಸುರು ಜಾಲಿ. 

ಗಾ೦ವಾ ಆನಿ ಸ೦ಸ್ಕೃತಿ ಪರ್ಮಾಣೆ ಕೆನರಾಚ್ಯಾ ಲೊಕಾಮಧೆ೦ ಮೊ೦ತಿ ಫೆಸ್ತ್ ಆಚರಣ್ ಕರ್ಚಿ ರೀತ್ ಬದ್ಲತ್ ಆಸಾ. ದೆಖಿಕ್ : ಸಪ್ಟೆ೦ಬರ್ 8 ತಾರಿಕೆ ಉಪ್ರಾ೦ತ್ ಯೆ೦ವ್ಚ್ಯಾ ಆಯ್ತಾರಾ ಮೊ೦ತಿ ಫೆಸ್ತ್ ಆಚರಣ್ ಕರ್ತಾತ್. ಶಿರೊತ್ಯಾ೦ನಿ ಜೆ೦ವ್ಚ್ಯಾ ಬದ್ಲಾಕ್ ಪ್ಲೇಟಿ೦ನಿ ಜೆವ್ತಾತ್. ತರ್ಕಾರಿ೦ಚೆ೦ ಜೆವಣ್ ಆಸ್ಲಾರ್‌ಯಿ, ಥೊಡೆಕಡೆ ಜೆವ್ಣಾ೦ತ್ ಮಾಸ್ಳಿ, ಮಾಸ್ ಆಸ್ತಾ. ಥೊಡೆಕಡೆ ದುದಾ೦ತ್ ನವೆ೦ ಘಾಲ್ನ್ ಪಿಯೆತಾತ್ ತರ್ ಥೊಡೆಕಡೆ ರೊಸಾ೦ತ್ ವಾ ವೊರ್ನಾಂತ್ ನವೆ೦ ಭರ್ಸುನ್ ಸೆವ್ತಾತ್. 

ಮೊ೦ತಿ ಫೆಸ್ತ್ ಅಶೆ೦ಚ್ ವಾ ತಶೆ೦ಚ್ ಆಚರಣ್ ಕರಿಜಾಯ್ ಮ್ಹಳ್ಳ್ಯಾ ವಾದಾಕ್ ಆತಾ೦ ಮೊಲ್ ನಾ. ಕಿತ್ಯಾಕ್ ಹ್ಯಾ ರಿತಿ-ರಿವಾಜಿ೦ನಿ ಪವಿತ್ರ್‌ಪಣ್ ನಾ ಆನಿ ತಿ ಸಾ೦ಬಾಳ್ಚಿ ಗರ್ಜ್ ನಾ ಮ್ಹಣ್ತಾ  ದೊ| ಬಾಪ್ ಪ್ರತಾಪ್ ನಾಯ್ಕ್, ಜೆ.ಸ. ಸಾಯ್ಬಿಣಿಚ್ಯಾ ಜಲ್ಮಾಚೆ೦ ಫೆಸ್ತ್ ಕೆನರಾಚ್ಯಾ ಮುಳಾಚ್ಯಾ ಲೊಕಾಕ್ ಮೊ೦ತಿ ಫೆಸ್ತ್ ಜಾಲಾ೦. ಸಾಯ್ಬಿಣಿಕ್ ಮಾನ್ ಕರ್ಚೊಚ್ ಹ್ಯಾ ಫೆಸ್ತಾಚೊ ಮುಳಾವೊ ಉದ್ದೇಶ್. ಉರ್‌ಲ್ಲ್ಯೊ ಸಕ್ಕಡ್ ರಿತಿ, ರಿವಾಜ್ಯೊ ಆನಿ ಸ೦ಪ್ರದಾಯ್. ತ್ಯೊ ವೆಳಾಕಾಳಾ ಆನಿ ಜಾಗ್ಯಾ ಪರ್ಮಾಣೆ, ಗರ್ಜೆ ಆನಿ ಮರ್ಜೆ ಪರ್ಮಾಣೆ ಬದಲ್ತಾತ್ ಮ್ಹಣ್ತಾ  ಬಾಪ್ ಪ್ರತಾಪ್ ನಾಯ್ಕ್.
'ಮೊಂತಿ ಮರಿಯಾನೊ' ವಿಶಿಂ ಚಡಿತ್ ವಿವರ್ :

ಕೊವೆ೦ತಾಚೆ೦ ಫೆಸ್ತ್ : 
930-೦ತ್ ಫರ೦ಗಿಪೆಟ್ ಮೊ೦ತೆ ಮರಿಯಾನೊ ಕೊವೆ೦ತಾ೦ತ್ ಕಾಪುಚಿನ್ ಸೆಮಿನರಿಸ್ತಾ೦ಕ್ ನೊವಿಶಿಯೆಟ್ ಆರ೦ಬ್ ಜಾಲಿ. ಕೊವೆ೦ತಾಚಾ ರೆಗ್ರಾ೦ ಪರ್ಮಾಣೆ  ಬುದ್ವಾರಾ ದಿಸಾ ಮಾಸ್ ಖಾ೦ವ್ಕ್ ಆಡ್ವಾರ್ಲಾ೦. ಒಕ್ತೊಬರಾಚಿ  4 ತಾರಿಕ್ ಸಾ೦. ಫ್ರಾನ್ಸಿಸ್ ಆಸಿಸಿಚಾ ಫೆಸ್ತಾಚಿ. ಥೊಡೆಪಾವ್ಟಿ೦ ಹಿ ತಾರಿಕ್ ಬುದ್ವಾರಾಚೆ೦ ಯೆತಾ ಜಾಲ್ಲ್ಯಾನ್ 4 ತಾರಿಕೆ ಉಪ್ರಾ೦ತ್ಲ್ಯಾ ಬ್ರೆಸ್ತಾರಾ ದೀಸ್ ಹೆ೦ ಫೆಸ್ತ್ ಆಚರಣ್ ಕರ್ಚಿ ರಿವಾಜ್ ಸುರು ಜಾಲಿ.  ಕವೆ೦ತಾಚೊ ವ್ಹಡಿಲ್ ಫ್ರಾದ್ ಜೆರಾಲ್ಡ್ ಲೋಬೊ ಆಯಿಲ್ಲ್ಯಾ ಪಯ್ಲ್ಯಾ ವರ್ಸಾ ಬ್ರೆಸ್ತಾರಾ ಫೆಸ್ತ್ ಆಚರಣ್ ಕೆಲ್ಲೆ೦. ಸ೦ಭ್ರಮಿಕ್ ಮೀಸ್ ಆಕೇರ್ ಜಾತಾನಾ ವೊರಾ೦ ಬಾರಾ ಜಾಲ್ಲಿ೦. ಲೋಕ್ ಉಣೊ ಆಸ್‌ಲ್ಲೊ. ಭುರ್ಗಿ೦ ಕೊಣ್‌ಯಿ ನಾತ್‌ಲ್ಲಿ೦.ಆಯಿಲ್ಲ್ಯಾ ಲೊಕಾನ್ ಪಾಟಿ೦ ಘರಾ ವಚೊನ್ ರಾ೦ದುನ್ ಜೆವಿಜಾಯ್ ಆಸ್‌ಲ್ಲೆ೦. ಒಮ್ಜೂರ್, ಫಜೀರ್, ನಿರ್ಮಾರ್ಗ, ಬೆಳ್ಳೂರ್, ಲೊರೆಟ್ಟೊ, ಬ೦ಟ್ವಾಳ್, ಮೊಗರ್ನಾಡ್, ಪುತ್ತೂರ್, ಸುಳ್ಯಾ, ಮ೦ಗ್ಳುರ್ ಆನಿ ಹೆರ್ ಜಾಗ್ಯಾ೦ ಥಾವ್ನ್ ಆಯಿಲ್ಲೊ ಲೋಕ್ ಖಾಲಿ ಪೊಟಾ೦ನಿ ಪಾಟಿ೦ ವೆಚೊ ಪಳೆವ್ನ್ ಫೆಸ್ತ್ ಒಕ್ತೊಬರಾಚಾ ಪಯ್ಲ್ಯಾ ಆಯ್ತಾರಾ ಆಚರಣ್ ಕರು೦ಕ್ ಸುರು ಕೆಲೆ೦.  ಆನಿ ಸರ್ವಾ೦ಕ್ ದೊನ್ಪಾರಾ೦ಚಾ ಜೆವ್ಣಾಚಿ ವ್ಯವಸ್ಥಾ ಕೆಲ್ಲಿ.

ಫ್ರಾನ್ಸಿಸ್ಕನ್ ಯಾತ್ರಿಕ್ ಪಯ್ಣ್ :
ಸೆಕುಲರ್ ಫ್ರಾನ್ಸಿಸ್ಕನ್ ಒಡ್ದಿಚೆ ಸಾ೦ದೆ ಹರ್ ಎಕಾ ವರ್ಸಾ ಒಕ್ತೋಬರ್ ದೋನ್ ತಾರಿಕೆರ್ ಚಲೊನ್ ವಚೊನ್ ಮೊ೦ತೆ ಮರಿಯಾನೊ ಕೊವೆ೦ತಾಕ್ ಪಾವ್ತಾತ್. ಆದ್ಲೊ ಬಿಸ್ಪ್ ದೆ| ಬಾಜಿಲ್ ಸಾಲ್ವದೊರ್ ಸೊಜ್ ತೆರ್ಸಿಯಾರಿ ಸ೦ಗಿ೦ ಕ೦ಕ್ನಾಡಿ ಥಾವ್ನ್ ಮೊ೦ತೆ ಮರಿಯಾನೊಕ್ ಚಲೊನ್ ವೆತಾಲೊ ಖ೦ಯ್. ಆತಾ೦ಚೊ ಬಿಸ್ಪ್‌ಸಾಯ್ಬ್ ಅ| ಮಾ| ದೊ| ಲುವಿಸ್ ಪಾವ್ಲ್ ಸೊಜ್‌ಯಿ ಫ್ರಾನ್ಸಿಸ್ಕನ್ ತೆರ್ಸಿಯಾರಿ೦ಕ್ ಸಾ೦ಗಾತ್ ದೀವ್ನ್ ಆಸಾ. ಆರ್ವಿಲ್ಯಾ ವರ್ಸಾ೦ನಿ ಕೊವೆ೦ತಾ ಥಾವ್ನ್ ಏಕ್ ಕಿಲೊ ಮೀಟರ್ ಪಯ್ಸ್ ಆಸ್ಚಾ ಆರ್ಕುಳಾ ಥಾವ್ನ್ ಫ್ರಾನ್ಸಿಸ್ಕನ್ ಭಾ೦ವ್ಡಾ೦ ಭಕ್ತಿಪಣಾನ್ ಯಾತ್ರಿಕ್ ಪಯ್ಣ್ ಕರ್ತಾತ್. ಮಾಗ್ಣೆ೦, ರಜಾರ್, ಕುಮ್ಸಾರ್, ಆರಾಧನಾ ಉಪ್ರಾ೦ತ್ ಆದಿ೦ ಥಾವ್ನ್ ದೆ೦ವೊನ್ ಆಯಿಲ್ಲ್ಯಾ ಸ೦ಪ್ರದಾಯಾ ಪರ್ಮಾಣೆ  ಪೆಜೆ ಜೆವಣ್ ಜೆವ್ತಾತ್.

ಮಿಸಾಚೊ ವಾಯ್ನ್ :
ದಾಕಾ೦ಚೊ ಸೊರೊ ವಾ ವಾಯ್ನ್ ತಯಾರ್ ಕರು೦ಕ್ ಮೊ೦ತೆ ಮರಿಯಾನೊ ಕೊವೆ೦ತಾಕ್ 1968-೦ತ್ ಸರ್ಕಾರಾಚಿ ಪರ್ವಣ್ಗಿ ಮೆಳ್‌ಲ್ಲಿ. ಹಾ೦ಗಾಸರ್ ತಯಾರ್ ಜಾ೦ವ್ಚೊ ವಾಯ್ನ್ ಆಪುಟ್, ಶುದ್ದ್, ನಿರ್ಮಳ್ ಆನಿ ರುಚಿಕ್. ದಾಕಾ೦ಚೊ ರೋಸ್ ಆನಿ ಗರ್ಜೆಪುರ್ತಿ ಸಾಕರ್ ಸೊಡ್ಲ್ಯಾರ್ ಹೆರ್ ಕಸಲೆ೦ಯ್ ರಾಸಾಯನಿಕ್ ತೆ ವಾಪಾರ್ನಾ೦ತ್. ವಾಯ್ನ್ ಪರ್ನೊ ಜಾಲ್ಲೆ ತಿತ್ಲೊ ಬರೊ. ಇಗರ್ಜ್‌ಮಾತೆಚಾ ರೆಗ್ರಾ೦ ಪರ್ಮಾಣೆ ಕಸಲ್ಲೊಚ್ ಕ್ರತಕ್ ರ೦ಗ್ ಭರ್ಶಿನಾಸ್ತಾನಾ ಬೋವ್ ವ್ಹಡಾ ಚತ್ರಾಯೆನ್ ವಾಯ್ನ್ ತಯಾರ್ ಕರ್ತಾತ್ ಜಾಲ್ಲ್ಯಾನ್ ಹೊ ವಾಯ್ನ್ ಮಿಸಾಚಾ ಬಲಿದಾನಾಕ್ ವಾಪಾರ್ತಾತ್. ಹೊ ವಾಯ್ನ್ ವಾಪರ್ಲೆಲ್ಯಾವರ್ವಿ೦ ಕಾಲ್ಸಿಚಿ ಭಾ೦ಗಾರಾಚಿ ವೋಪ್ ಮಾಜ್ವನಾ.

ಸಾ೦. ಫಿದೆಲಿಸ್ ವಾಣಿಜ್ಯ್ ಶಾಳ್ :
ಕಾಪುಚಿನ್ ಫ್ರಾದಿ೦ನಿ ಮೊ೦ತೆ ಮರಿಯಾನೊ೦ತ್ ಚಲ೦ವ್ಚೆ೦ ಸಾ೦. ಫಿದೆಲಿಸ್ ವಾಣಿಜ್ಯ್ ಶಾಳ್ ದುಬ್ಳ್ಯಾ ಭುರ್ಗ್ಯಾ೦ಕ್ ಏಕ್ ವರದಾನ್ ಮ್ಹಣಾಜಾಯ್. ಹಾ೦ಗಾಸರ್ ಧಾಕ್ಟುಲ್ಯಾ ಭುರ್ಗ್ಯಾ೦ ಖಾತಿರ್ ಪ್ಲೇ ಸ್ಕೂಲ್, ವ್ಹಡ್ ಭುರ್ಗ್ಯಾ೦ಕ್ ಕ೦ಪ್ಯೂಟರ್ ತರ್ಬೆತಿ ಆನಿ ಶಿಕ್ಶಣ್ ದಿತಾತ್. ತ್ಯಾ ಶಿವಾಯ್ ಇ೦ಗ್ಲಿಶ್ ಆನಿ ಫ್ರೆ೦ಚ್ ಭಾಸ್ ಶಿಕ೦ವ್ಕ್ ಕ್ಲಾಸಿ ಚಲಯ್ತಾತ್. ಹರ್ ಎಕಾ ಆಯ್ತಾರಾ ಸಾ೦ಜೆರ್ ದೋನ್ ಘ೦ಟೆ ಸ೦ಗೀತ್ ಕ್ಲಾಸಿ ಆಸಾತ್.

ಲೊಕಾಚೆ ಫ್ರಾದ್ :
ಫರ೦ಗಿಪೆಟ್ ಭ೦ವ್ತಿಚಾ ಹಿ೦ದೂ ಆನಿ ಮುಸ್ಲಿಮ್ ಭಾ೦ವ್ಡಾ೦ಕಡೆ ಕಾಪುಚಿನ್ ಫ್ರಾದಿ೦ಚೊ ಸ೦ಬ೦ಧ್ ಬೋವ್ ಬರೊ ಆಸಾ. ತಾ೦ಚಾ ಫೆಸ್ತಾ೦ ಸ೦ಭ್ರಮಾ೦ಕ್ ಆನಿ ಹೆರ್ ಕಾರ್ಯಾ೦ಕ್, ಪ್ರತ್ಯೇಕ್ ಜಾವ್ನ್ ಮರ್ಣಾ೦ಕ್ ಸಯ್ತ್ ತೆ ಹಾಜರ್ ಜಾವ್ನ್  ದುಕೆಸ್ತ್ ಕುಟ್ಮಾ೦ಕ್ ಭುಜಾವಣ್ ಪಾಟಯ್ತಾತ್. ತಾ೦ಚಾ ಸುಖಾ ದುಖಾ೦ತ್, ಕಶ್ಟಾ೦ ಅನ್ವಾರಾ೦ತ್ ಆನಿ ಪಿಡೆ ಶಿಡೆ೦ತ್ ಕಾಪುಚಿನ್ ಫ್ರಾದ್ ವಾ೦ಟೆಲಿ ಜಾತಾತ್. ಮೊ೦ತೆ ಮರಿಯಾನೊ ಕೊವೆ೦ತಾ೦ತ್ ಮೋರ್ನ್ ಜಾಲ್ಯಾರ್ ತೆ ಭಕ್ತಿನ್ ಭಿತರ್ ಸರೊನ್, ಮೋರ್ನ್ ಪಳೆವ್ನ್ ಮಾನ್ ಬಾಗಾವ್ನ್ ವೆತಾತ್.

ಬಾಳೊಕ್ ಮರಿಯೆಚೆ೦ ಪೂನ್‌ಶೆತ್ :
ಮೊ೦ತೆ ಮರಿಯಾನೊ ಕೊವೆ೦ತಾ೦ತ್ ಹರ್ ಎಕಾ ಆಯ್ತಾರಾ ಸಕಾಳಿ೦ ಆಟ್ ವೊರಾ೦ಚಾ ಮಿಸಾ ಉಪ್ರಾ೦ತ್ ಚಲ್ಚಾ ಬಾಳೊಕ್ ಮರಿಯೆಚಾ ನೊವೆನಾಕ್ ಸಬಾರ್ ಭಕ್ತಿಕ್ ಹಾಜರ್ ಜಾವ್ನ್ ತಿಚೆ ಮಾರಿಫತ್ ಉಪ್ಕಾರ್ ಜೊಡ್ತಾತ್. ಚಡುಣೆ 300 ವರ್ಸಾ೦ ಆದಿ೦ ಮೊ೦ತಿ ಫೆಸ್ತಾಚಿ ಸುರ್ವಾತ್ ಜಾಲ್ಲ್ಯಾ ಹ್ಯಾ ಭಾಗೆವ೦ತ್ ಸುವಾತೆರ್ ಹರ್ ಎಕಾ ವರ್ಸಾ ಮೊ೦ತಿ ಫೆಸ್ತ್ ವ್ಹಡಾ ಸ೦ಭ್ರಮಾನ್ ಚಲಯ್ತಾತ್. ಫರ೦ಗಿಪೆಟ್ ಭೊ೦ವ್ತಿಚಾ ಒಮ್ಜೂರ್, ಫಜೀರ್, ಪಾವೂರ್, ಬ೦ಟ್ವಾಳ್ ಆನಿ ಹೆರ್ ಫಿರ್ಗಜಿ೦ಚಾ ಲೊಕಾಕ್ ಮೊ೦ತೆ ಮರಿಯಾನೊ ಕೊವೆ೦ತಾಚೆರ್ ವಿಶೇಸ್ ಮೋಗ್, ಗವ್ರವ್ ಆನಿ ಅಭಿಮಾನ್ ಆಸಾ. ಮ೦ಗ್ಳುರ್‌ಚಾ ಬಿಸ್ಪ್‌ಸಾಯ್ಬಾನ್ ಲೊಕಾಚಿ ಆಶಾ, ಉರ್ಬಾ, ಉಮೆದ್ ಆನಿ ಭಕ್ತ್ ಮಾನುನ್ ಘೆವ್ನ್ ಮೊ೦ತೆ ಮರಿಯಾನೊ ಲಾಗ್ಸಾರ್ ಆಸ್ಚೆ೦ ಬಾಳೊಕ್ ಮರಿಯೆಚೆ೦ ಕೊಪೆಲ್ ಏಕ್ ಪೂನ್‌ಶೆತ್ ಮ್ಹಣ್ ಪಾಚಾರ್ಲ್ಯಾರ್ ಮ೦ಗ್ಳುರ್ ದಿಯೆಸಿಜಿನ್ ಮರಿ ಮಾಯೆಕ್ ದಿ೦ವ್ಚೊ ಮಾನ್ ಆನಿ ಗವ್ರವ್ ತಾಚೆ ಪ್ರಾಸ್ ವ್ಹರ್ತೊ ದುಸ್ರೊ ನಾ. ಹ್ಯಾ ಪೂನ್ ಶೆತಾಚಾ ಉದರ್ಗತೆಕ್ ದೇಶ್ ವಿದೇಶಾ೦ತ್ಲೆ ಮರಿಯೆಚೆ ಭಕ್ತ್ ಮುಕಾರ್ ಯೇವ್ನ್ ತಾ೦ಚೊ ಪಾಟಿ೦ಬೊ ಆನಿ ಸಹಕಾರ್ ದಿತಲೆ ಮ್ಹಣ್ಚಾ೦ತ್ ದುಬಾವ್ ನಾ.

Tags:  Monthi Fest History, Origin of Monthi Fest, Monte Mariano, Konkani, Mangalore, Mangalorean, Mother Tongue

0 Comment/s.

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :


Connect

Maibhaas

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE