From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಸಾಂಗಾತಾ ಮೆಳೊನ್ ಹಾಸ್ಯಾಂ
Monday, July 3, 2017
ಏಕ್ ಕಾಳ್ ಆಸ್‌ಲ್ಲೊ, ಪರಿಸರಾಂತ್ ಲಾಫಿಂಗ್ ಕ್ಲಬ್ಸ್ ಮ್ಹಳ್ಳಿಂ ನಾತ್‌ಲ್ಲಿಂಚ್, ಕಿತ್ಯಾಕ್ ಮ್ಹಳ್ಯಾರ್ ಸಾಂಗಾತಾ ಮೆಳೊನ್ ಹಾಸ್ಚೆಂ ಮ್ಹಳ್ಯಾರ್ ಕಿತೆಂ ಆನಿ ಕಿತ್ಯಾಕ್ ಮ್ಹಳ್ಳೆಂ ಚಿಂತಾಪ್‌ಚ್ ನಾತ್‌ಲ್ಲೆಂ. ತವಳ್ ಗಾಂಟೆಲ್ಲಿ ಮುಖಮಳಾಂ, ಅಡ್ಚಾಲ್ಲಿಂ ದಾಡಾಮಾ, ಗಾಂಟಿ ಪಡ್‌ಲ್ಲೊ ಭಂವ್ರೊ ಪಳೆಂವ್ಕ್ ಮೆಳಾನಾತ್‌ಲ್ಲೊ. ಕಿತ್ಯಾಕ್ ಮ್ಹಳ್ಯಾರ್, ಮನಿಸ್ ಮ್ಹಳ್ಳೆಂ ಜನಾಂಗ್ ಸಂಸಾರಾಚ್ಯಾ ಲ್ಹಾನ್ ಸಂಗ್ತಿಂನಿ, ಲ್ಹಾನ್ ಸವ್ಲತಾಯೆಂನಿ ಧಾದೊಸ್ ಜಾತಾಲೆಂ. ಭುರ್ಗಿಂ, ಎಕಾ ಸೈಕಲಾಚ್ಯಾ ಟಯರಾಕ್‌ಚ್ ಗಾಡಿ ಕರುನ್ ಎಕೆ ಬೊಡಿಯೆನ್ ತಾಕಾ ಧಾಂವ್ಡಾಯ್ತಾನಾ ತ್ಯಾ ಭುರ್ಗ್ಯಾ ಪಾಟ್ಲಾನ್ ಸ-ಸಾತ್ ಭುರ್ಗಿಂ ಸಂತೊಸಾನ್ ಉಡ್ಕಣಾಂ ಮಾರುನ್ ಧಾಂವ್ತಾಲಿಂ; ಬಿಡಾರಾ ಭಿತರ್ ತರ್, ವಾನಾಚೆ ದೆಗೆನ್ ಆಸ್ಚಿ ಮಣಯಿಚ್ಚ್ ತಾಂಚಿ ಬಂಡಿ ಜಾತಾಲಿ; ತಾಚೆರ್ ಬಸುನ್ 'ಬಬ್ಬೊಯಿ, ಗಾಡಿ ಬಂತು' ಮ್ಹಣ್ ಕುಲೆ ವೊಡುನ್ ಕುಕಾರ್‍ಯೊ ಘಾಲ್ಚಾ ಭುರ್ಗ್ಯಾಂಚಿಂ ಮುಖಮಳಾಂ ಆತಾಂಯಿ ಮ್ಹಜ್ಯಾ ಉಡಾಸಾಂತ್ ಆಸಾತ್.
ಮ್ಹಾಕಾ ಪಂದ್ರಾ-ಸೊಳಾ ಜಾತಾನಾ ಮ್ಹಜಿ ಆಜಿ ಎಕೇಕ್ ಪಾವ್ಟಿಂ ವಿಚಾರ್ತಾಲಿ. 'ಕಿತೆಂ-ರೆ ಪುತಾ, ಬಾಬು? ತುಜೆಂ ಮುಸ್ಕಾರ್ ಪುಸ್ಕೆಲಾಂ? ಏಕ್ ಮೂಟ್ ತಾಂದುಳ್ ಉಡಯ್ಲಾರ್ ಏಕ್ ಕಾಂಟ್ ಲಾಯೊ ಜಾತಿತ್...' ತಿಚ್ಯಾ ಉತ್ರಾಂಚೊ ಮತ್ಲಬ್ ತವಳ್ ಮ್ಹಾಕಾ ಸಮ್ಜಾಲ್ಲೊ ನಾ, ಪೂಣ್ ಆತಾಂ, ಚಾರ್ ವಾಂಟ್ಯಾಂನಿ ಪ್ರಾಯ್ ಜಾತಾನಾ, ತರ್ನ್ಯಾ ಜನಾಂಗಾಕ್ ಪಳೆತಾನಾ, ತಿಚ್ಯಾ ಉತ್ರಾಂಚೊ ನಾಂಗೊರ್ ಮ್ಹಜ್ಯಾ ತಾಳ್ಯಾಕ್ ಶಿರ್ಕಾತಾ, ಗರಿಯೆಚ್ಯಾ ಪೊಂತಾಕ್ ಆಸ್ಚೆಂ ಕೊಕ್ಕೆಂ ಮಾಸ್ಳೆಚ್ಯಾ ಗಳ್ಯಾಕ್ ಶಿರ್ಕಾಲ್ಲೆಪರಿಂ.
ಆನಿ ಹಾಂವ್ ಉಸ್ಮಡ್ತಾಂ, ವಿಚಾರ್ನ್ ಮ್ಹಾಕಾಚ್, ಖಂಯ್ ಗೆಲಿ ತಿ ಪ್ರಾಯ್.., ತಿ ವರ್ಸಾಂ,.. ಹಾಸೊನ್ ಖೆಳೊನ್ ಜಿಯೆಂವ್ಚಿ? ಕಿತ್ಯಾಕ್ ಗಾಂಟಾಲ್ಯಾಂತ್ ಆಮ್ಚಿಂ ಶಿಂತಿದಾಂ? ಹ್ಯಾ ಸವಾಲಾಕ್ ಜಾಪಿ ಸೊದ್ಚೊ ತರ್ ಕಷ್ಟ್‌ನಾಂತ್, ಜಾಪಿ ಆಮ್ಚೆ ಲಾಗಿಂಚ್ ಆಸಾತ್. ಪೂಣ್ ಕಿತ್ಯಾಕ್ ಆಮಿ ಕೆದಳಾರಿ ಸಂತೊಸ್‌ಭರಿತ್ ಆಸಾಜೆ, ಸಾಂಗಾತಾ ಮೆಳೊನ್ ಹಾಸಾಜೆ, ಜಿಣಿಯೆಂತ್ಲಿಂ ಹಾಸ್ಯಾಭರಿತ್ ಖಿಣಾಂ ಸಕಾಳಿಂಚೆ ಧುಂವ್ರೆಪರಿಂ ಉಬೊಂಕ್ ಸೊಡುಂಕ್ ನಜೊ ಮ್ಹಳ್ಳೆಂ ಪ್ರೇತನ್ ಹಾಂಗಾಸರ್ ಚಲ್ಲಾಂ.
ಆಂಜ್ ಭಡ್ವೆ ಕಿತ್ಯಾಕ್ ಉಬೊಂಕ್ ಸಕ್ತಾತ್? ಮ್ಹಣ್ ಜಿ.ಕೆ.ಚೆಸ್ಟರ್‌ಟನ್ ಹಾಚೆ ಲಾಗಿಂ ಕೊಣೆಂಗಿ ವಿಚಾರ್ಲೆಂ. ಕಿತ್ಯಾಕ್ ಮ್ಹಳ್ಯಾರ್ ತೆ ಆಂಜ್ ಭಡ್ವೆ ತಾಂಕಾಂಚ್ ಹಾಳೂ ಮತಿಚೆ, ಆನಿಕಿ ಚಡಿತಾಯೆನ್ ಹಾಳ್ವಾಯೆಚ್ಯಾ ಕಾಳ್ಜಾಚೆ ಮ್ಹಣ್ ಸಮ್ಜಾತಾತ್, ದೆಕುನ್. ಪವಿತ್ರ್ ಖುರಾನಾಂತ್ ಸಯ್ತ್ ಮ್ಹಳಾಂ. 'ಆಪ್ಲಾ ಸಾಂಗೊಡ್ಯಾಂಕ್ ಹಾಸಯ್ತಾ ತೊ ಖಂಡಿತ್ ಜಾವ್ನ್ ಜನ್ನತ್ ಜೊಡ್ತಾ!'
ಪೂಣ್ ಆತಾಂ ಆಮಿ, ಹ್ಯಾ ಉದ್ದೇಶಾನ್ ಯಾ ಹೆರ್ - ಮಾನಸಿಕ್, ದೈಹಿಕ್ ಭಲಾಯ್ಕೆ ಖಾತಿರ್ - ಪುಣಿ ಲಾಫಿಂಕ್ ಕ್ಲಬ್ಸ್ ಗರ್ಜೆಚಿಂ ಮ್ಹಣ್ ಸಮ್ಜಾಲ್ಯಾಂವ್. ಕಿತೆಂ ಘಡ್ತಾ ಹ್ಯಾ ಲಾಫಿಂಗ್ ಕ್ಲಬ್ಬಾಂನಿ? ಲೊಕಾಚೊ ಏಕ್ ಲ್ಹಾನ್ ಜಮೊ ಹಾತ್-ಪಾಂಯ್, ಉಡವ್ನ್, ಬಡವ್ನ್, ಹರ್ದಿಂ ಪೆಟೊನ್ ಅರ್ಥ್ ನಾತ್‌ಲ್ಲೊ ಹಾಸೊ ಹಾಸ್ತಾತ್. ಪಳೆತೆಲ್ಯಾಂಕ್ ಏಕ್ ಪಿಸಾಂಟ್‌ಪಣ್ ಕಶೆಂ ದಿಸ್ತಾ ಪುಣ್ ಅಸಲ್ಯಾ ಆತರ್ವಣಾಂಚೆ ಫಾಯ್ದೆ ಧಾರಾಳ್ ಆಸಾತ್, ಮ್ಹಣ್ತಾತ್ ವಯ್ಜ್ ಆನಿ ಸಾಯ್ಕಿಯಾಟ್ರಿಸ್ಟ್. ಹಾಂವ್ ಇತ್ಲೆಂಚ್ ಮ್ಹಣ್ತಾಂ, ಪ್ರಸ್ತುತ್ - ಆಮಿ ಹಾಸೊಂಕ್ ವಿಸ್ರಾಲ್ಯಾಂವ್.
ಆಮಿ ವಿಸ್ರಾಲ್ಯಾಂವ್? ಖಂಡಿತ್ ವ್ಹಯ್. ಪೂಣ್ ಆಮಿ ಸರ್ವ್ ಇಂಟೆಲೆಕ್ಚುವಲ್ಸ್, ನಾಟಕಾಂತ್ ಆಸ್ಚಿ ಸಿಲ್ಲಿ ಕೊಮೆಡಿ, ದೊಡೆ ಅರ್ಥಾಂಚಿ ಉತ್ರಾಂ ಆಯ್ಕೊನ್ ಆಮಿ ಹಾಸಾಜೆ? ಟಿ.ವಿ.ಚೆರ್ ಯೆಂವ್ಚಿಂ ಸ್ಟುಪಿಡ್ ಸೀರಿಯಲಾಂ ಪಳೆವ್ನ್ ಹಾಸಾಜೆ? ಆಮಿ ಗಂಭೀರ್ ಮನಿಸ್ ಆನಿ ಸಂಸಾರಾಂತ್ಲೊ ಗಂಭೀರ್ ಸಂಗ್ತಿ ಮಾತ್ರ್ ಆಮ್ಕಾಂ ಆವಡ್ತಾತ್. ಕಸಲ್ಯೊ ಗಂಭೀರ್ ಸಂಗ್ತಿ? ಫಾಲ್ಯಾಂಚೊ ಸುರ್ಯೊ ತುಮಿಂಚ್ ಉದೆಸೊ ಕರ್ಚೊ? ಗಿಮಾಂತ್ ಗರ್ಮಿ ಆನಿ ಹಿಂವಾಳಾಂತ್ ಬರಫ್ ತುಮಿಂಚ್ ಹಾಡಯ್ತಾತ್? ರುಕಾ-ರಾನಾಂ ಮಧ್ಯಾನ್ ಶಿಲೊಣ್ಯೊ ಘಾಲ್ನ್ ವ್ಹಾಳ್ಚೆಂ ವಾರೆಂ ತುಮಿಂಚ್ ಉಬ್ಜಯ್ತಾತ್? ಹಿಚ್ ತುಮ್ಚಿ ಗಂಭೀರ್ ಜವಾಬ್ದಾರಿ? ಚಂದ್ರ್-ಸುರ್ಯೊ-ನೆಕೆತ್ರಾಂ ಆನಿ ಗಿರುಂಕ್ ತುಮಿಂಚ್ ಚಲಯ್ತಾತ್? ಪೂಣ್ ಹಿಂ ಸರ್ವ್ ಕಾಮಾಂ ಆಮ್ಚಾ ರಚ್ಣಾರಾನ್ ಕರುನ್ ಸಂಪಯ್ಲಾಂತ್ ಆನಿ ಥಿರಾಯ್ಲಾಂತ್ ನ್ಹಯ್?
ಕೆ.ಜಿ. ಕ್ಲಾಸಿಂತ್ ಶಿಕ್ಚೆಂ ಆಮ್ಚೆಂ ಬಾಳ್ ದಿಸಾಕ್ ತಿನ್ಶಿಂ ಪಾವ್ಟಿಂ ಪುಣೀ ಹಾಸ್ತಾ ಮ್ಹಳ್ಳೊ ನತೀಜೊ ಎಕಾ ಸಂಸೊಧಾನ್ ದಿಲಾ. ಪೂಣ್ ಆಮಿ ವ್ಹಡಾಂ, ಕಷ್ಟಾಂನಿ, ಎಕಾ --ದಿಸಾಕ್ ಸತ್ರಾ ಪಾವ್ಟಿಂ ಮಾತ್ರ್ ಹಾಸ್ತಾಂವ್. ಕಿತ್ಯಾಕ್ ಅಶೆಂ? ಕಿತ್ಯಾಕ್ ಮ್ಹಳ್ಯಾರ್, ಆಮಿ ಪರಿಪಿಕಾಯ್ ಉತರ್ಲ್ಯಾಂವ್ (We are mature individuals) ಆನಿ ಪ್ರಾಯೆಕ್ ಪಾವ್ಲಾಂವ್. ಆತಾಂ ಹಾಸ್ಚೆಂ ಕಿತ್ಯಾಕ್? ಆಮ್ಕಾಂ ಪ್ರಾಯ್ ಜಾಯಿತ್ ಯೆತಾ. ಹ್ಯೊ ಜಾಪಿ ತಯಾರ್ ಆಸಾತ್ ಮ್ಹಣ್ತಾ ಬರವ್ಪಿ ಚಕ್ ಗಲ್ಲೊಝಿ - ಆಮಿ ಹಾಸ್ಚೆಂ ರಾವಯಿಲ್ಲಾ ನ್ ಆಮಿ ಪ್ರಾಯೆಸ್ತ್ ಜಾವ್ನ್ ಯೆತಾಂವ್.
ಜಿಣಿಯೆಚೊ ಸ್ವಾದ್ ಚಾಕೊಂಕ್ ಆಮ್ಕಾಂ ರಚ್ಣಾರಾನ್ ದಿಲ್ಲಿಂ ಪಂಚೇಂದ್ರಿಯಾಂ ಪಾವಾನಾಂತ್. ಏಕ್ ಸ-ವೆಂ ಜ್ಞಾನ್ ಆಮ್ಕಾಂ ಜಾಯ್ - ಹಾಸ್ಯಾಚೊ ವೊಸೊ ಯಾ Sense of humor. ಹೊ ವೊಸೊ ಆಸ್ಚೊ ಮ್ಹಳ್ಯಾರ್ ಫಕತ್ ಹಾಸ್ಯಾ-ಫೊಕಾಣಾಂಚೆರ್ ಹಾಸ್ಚೊ ನ್ಹಯ್. ಆಜ್ ಕಾಲ್ ಆಮ್ಚಾ ಟಿ.ವಿ.ಚೆರ್ ಯೆತಾತ್ ಥೊಡಿಂ ಕಾರ್ಯಕ್ರಮಾಂ. ಹಾಂತುಂ ಪಾತ್ರ್ ಘೆಂವ್ಚೆ ಖಾತಿರ್ ಮಾಂಚಿಯೆರ್ ಯೆತೆಲ್ಯಾಂಚಿ ಆತರ್ವಣಾಂ ಆಯ್ಕೊನ್-ಪಳೆವ್ನ್ ಖಳ್ಮಿತ್‌ನಾಸ್ತಾಂ ಹಾಸ್ಚೆ ವರಯ್ಣಾರ್ ಆಸಾತ್. ಎಕೇಕ್ ಪಾವ್ಟಿಂ ಭೊಗ್ತಾ ಮ್ಹಾಕಾ, ಹಾಂಚ್ಯಾ ಸಿಸ್ಟಮಾಂತ್ ಏಕ್ ಹಾಸ್ಚೆಂ ಮೆಶಿನ್ ಬಸಯ್ಲಾಂ, ಅಶೆಂ. ಕಿತ್ಯಾಕ್ ಮ್ಹಳ್ಯಾರ್ ತಾಂಚ್ಯಾ ಹಾಸ್ಯಾಕ್ ಅರ್ಥ್ ನಾ, Because these fools are paid to laugh. ಅಸಲ್ಯಾ ಹಾಸ್ಯಾಚ್ಯಾ ವೊಸ್ಯಾ ವಿಷ್ಯಾಂತ್ ಹಾಂವ್ ಉಲಯ್ನಾ. ಹಾಸ್ಯಾಚೊ ವೊಸೊ ಮ್ಹಳ್ಯಾರ್ ಆಮ್ಕಾಂ ಆಮ್ಚೆರ್‌ಚ್ ಹಾಸ್ಚಿ, ಆಮ್ಚಾ ಕರ್ತುಬಾಂಚೆರ್, ಆಮ್ಚಾ ನಿಸ್ರೊಣೆಂಚೆರ್ ಹಾಸ್ಚಿ ತಾಂಕ್ ಆಸಾ? ಮ್ಹಜೊ ಆಜೊ ಕೆದಳಾಯಿ ಮ್ಹಣ್ತಾಲೊ - 'ವ್ಹಯ್‌ರೆ ಬಾಬು, ಪುಸ್ಕೆಕ್ ಪಾಸ್ ಘಾಲ್ಚಿಂ ಕಾಮಾಂ ಬಿಲ್ಕುಲ್ ಕರಿನಾಕಾ-ರೆ,..' ಮ್ಹಣ್. ತವಳ್ ಹಾಂವ್ ಚಿಡ್ತಾಲೊಂ ಆನಿ ಮ್ಹಣ್ತಾಲೊಂ - 'ಕಸಲೆಂ ಘಾಣ್ಕುರೆಂ ಉಲವ್ಣೆ, ಆಬಾ?'
ಪೂಣ್ ಆತಾಂ, ಹಾಂವೆಂ ಕೆಲ್ಲಾ ಸಬಾರ್ ಕರ್ತುಂಬಾಂಚೆರ್ ಮ್ಹಾಕಾಚ್ ಖೂಬ್ ಹಾಸೊ ಯೆತಾತ್ ಆನಿ ಎಕೇಕ್ ಪಾವ್ಟಿಂ ಲಜ್‌ಯಿ ಭೊಗ್ತಾ. ಲಜ್ ಉಬ್ಜಾಯಿಲ್ಲಿ ಪರಿಗತ್ ಪರತ್ ಉಬ್ಜಾತ್ ತರ್ ಹಾಂವ್ ಖಂಡಿತ್ ಜಾವ್ನ್ ಶಾಣೆಪಣಿ ಕಾಮ್ ಕರ್ತಲೊಂ, ಅಶೆಂ ಹಾಂವ್ ಆತಾಂ ಚಿಂತಾಂ. ಪೂಣ್ ತಸಲಿ ಕಸಲಿಯಿ ಪರಿಗತ್ ಪರತ್ ಉದೆನಾ.
ಏಕ್ ಧಾಕ್ಲೊ ದಿತಾಂ, ಮ್ಹಜೆಚ್ ಜಿಣಿಯೆಂತ್ಲೊ: ಹಾಂವ್ ಚವ್ದಾ ವರ್ಸಾಂಚೊ ಆಸ್ತಾನಾ ಎಕೆ ರಾತಿಂ ಮ್ಹಜಿ ಆಜಿ ಗಡಿಸ್ ಜಾಲಿ. ಫಾಂತ್ಯಾಚಿ ಚಾರ್ ಜಾತಾನಾ, ದಾಕ್ತೆರಾಕ್ ಆಪಯ್ಜೆಚ್ ಮ್ಹಣ್ ಜಾಲೆಂ. ಆಮ್ಚಾ ಕುಟ್ಮಾಚೊ ಫಿಜಿಶಿಯನ್ (ಆತಾಂ ದಿವಂಗತ್) ಡೊ| ಎಮ್.ಡಿ.ಅಡಪ್ಪಾ. ತಾಕಾ ಫೋನ್ ಕರ್ಯಾಂ ಮ್ಹಳ್ಯಾರ್ ಭಾಯ್ರ್ ಶಿರಾಂಧಾರಿಂಚೊ ಪಾವ್ಸ್ ವೊತ್ತಾ ಆನಿ ಟೆಲಿಫೋನ್ ಕಾಮ್ ಕರಿನಾ. ಘರಾಂತ್ ಆಸ್ಚೊ ತರ್ನಾಟೊ ಹಾಂವ್ಂಚ್ ಆನಿ ಮ್ಹಾಕಾ ಸತ್ರಿ ಘೆವ್ನ್ ವಚಾಜೆ ಪಡ್ಲೆಂ. ಹಾಂವ್ ಕಾಂಯ್ ವ್ಹಡ್ಲೊ ಧಯ್ರಾದಿಕ್ ನ್ಹಯ್, ಆತಾಂಯಿ ಘಡ್ಗಡೊ-ಝಗ್ಲಾಣ್ಯಾಕ್ ಭಿಯೆಂವ್ಚೊ ಧಯ್ರಾದಿಕ್. ರಿಕ್ಶಾ, ಕಾರ್ ಯಾ ವಿಮಾನ್ ಜಾಯ್ ತರ್ ಭಾಡ್ಯಾಕ್ ಘೆ ಪೂಣ್ ಅಡಪ್ಪಾಕ್ ಆಪವ್ನ್ ಹಾಡ್ - ಹುಕುಮ್ ದಿಲ್ಲಿ ಮ್ಹಜ್ಯಾ ಘರ್ಚ್ಯಾಂನಿ.
ಕಂಕನಾಡಿ ಪಾವ್ತಾನಾ, ಕೊಣಾ ಬಾವ್ಡಾಚಿ ಏಕ್ ಟೆಕ್ಸಿ ಉಬಿ ಆಸಾ, ಪುಣ್ ಚಾಲಕ್ ನೀದ್ ಕಾಡ್ತಾ. ಪತಿಣೆನ್ ಕಾಂಯ್ ಕಟ್ಪಟ್ ಕರುನ್, ಭಾಯ್ರ್ ವಚ್ ಆನಿ ಟೆಕ್ಸೆಂತ್‌ಚ್ ನಿದೆ ಮ್ಹಣ್ ಲೊಟುನ್ ಘಾಲ್ಲೊ ಕೊಣ್ಣಾ. ನಮೃತೆನ್ ವಿಚಾರ್ಲೆಂ, ಯೆತಾರ್-ರೆ ಬಾಬಾ? ಯೆನಾ ಮ್ಹಣಾಲೊ. ಚಡಿತ್ ಭಾಡ್ಯಾಚಿ ಆಮಿಷ್ ತಾಕಾ ದಾಕಯ್ಲಿ. ಆಕ್ರೇಕ್ ವೊಪ್ಲೊ. ಪಾಂಡೇಶ್ವರ್ (ಡೊಕ್ಟರಾಚೊ ಬೊಂಗ್ಲೊ ಥಂಯ್ ಆಸ್‌ಲ್ಲೊ) ಭಾಯ್ರ್ ಸರ್ಲ್ಯಾಂವ್. ಡೊಕ್ಟರ್ ಖಿಣಾ ಭಿತರ್ ತಯಾರ್ ಜಾಲೊ (ತಾಚೆ ಪಿಳ್ಗೆರ್ ಆಶೀರ್ವಾದ್ ಪಡೊಂ. ತವಳ್ ಸ್ಪೆಶಲಿಸ್ಟ್ ಡೊಕ್ಟರ್ ನಾತ್‌ಲ್ಲೆ, ಆಸ್ಚೆ ಸರ್ವ್ ಡೊಕ್ಟರ್ ಮನ್ಶಾಪಣಾಂತ್ ಸ್ಪೆಶಲಿಸ್ಟ್). ಘರಾ ಆಯ್ಲೊ, ಮ್ಹಜೆ ಆಜಿಯೆಕ್ ತಪಾಸ್ಲೆಂ ಆನಿ Do the needful doctor ಮ್ಹಳ್ಳೆಂ ತೆಂ ತಾಣೆ ಕೆಲೆಂ.
ತೆಣೆ ಘರಾ ಅಶೆಂ ಜಾತಾನಾ, ಫಾಂತ್ಯಾಚ್ಯಾ ಚಾರ್ ವರಾಂಚೆರ್ ಕಂಕನಾಡಿ ಪರ್ಯಾಂತ್ (ಘಡ್ಗಡ್ಯಾ-ಝಗ್ಲಾಣ್ಯಾ-ಪಾವ್ಸಾ ಮಧೆಂ ತರಿ) ವಚುನ್ ಟೆಕ್ಸಿ ಹಾಸಿಲ್ ಕರುನ್ ಡೊಕ್ಟರಾಕ್ ಘರಾ ಹಾಡ್‌ಲ್ಲಾ ಸಾಹಸಿ ಎಡ್ವಿನ್ ಜೆ.ಎಫ್.ಡಿಸೊಜಾನ್ ಟೆಕ್ಸಿ ಭಾಡೆಂ ದೀವ್ನ್ ಸೊಡ್ಲಿ! ಡೊಕ್ಟರಾಚೆಂ ಕಾಮ್ ಜಾವ್ನ್ ತೊ ಪಾಟಿಂ ವಚುಂಕ್ ಭಾಯ್ರ್ ಸರ್ತಾನಾ....ಸತ್ರಿ ಆಸಾ, ಹಾತಾಂತ್ ಲಾಂಟಾನ್ ಆಸಾ (ಆಮ್ಚಾ ಘರಾಕ್ ಎಕಾ ಕಾಳೊಕಿ ವೊಣಿಂತ್ಲಾ ನ್ ವಚಾಜೆ ಪಡ್ತಾಲೆಂ ಆನಿ ತ್ಯಾ ವೊಣಿಂತ್ Open drainage system ಜ್ಯಾರಿ ಆಸ್‌ಲ್ಲಿ ಜಾಲ್ಲಾ ನ್ ಪಾಂಯ್ ಹೆವ್ಶಿನ್ ತೆವ್ಶಿನ್ ಪಡ್ಲಾ ರ್ ಮೆಳೊಪಾಚೆ ಕಾಳೆಚ್ಚ್ ಸೊಕ್ಸ್ ಫುಕಟ್ ಮೆಳ್ತಾಲೆ) ಪುಣ್ ಟೆಕ್ಸಿ ಖಂಯ್ ಆಸಾ? ದೊತೊರ್‌ಬಾಬಾಕ್ ತಾಚ್ಯಾ ಬಂಗ್ಲಾ ಕ್ ಪಾಟಿಂ ಪಾವಂವ್ಕ್ ಆಸಾ ಮ್ಹಳ್ಳೆಂ ಹಾಂವ್ ವಿಸ್ರಾಲ್ಲೊಂ!
ಸ-ವ್ಯಾ ಕ್ಲಾಸಿಂತ್ ಹಾಂವ್ ಆಸ್ತಾನಾ ಕನ್ನಡ ನೋಟ್ಸ್ ಬುಕ್ ಹಾಡುಂಕ್ ನಾ ಮ್ಹಣ್, ಮೆಸ್ತ್ರಿಚೆ ಭಿಯಾನ್, ಎಕಾ ಧಮ್ಮಾನ್ ಸಾಂ.ಲುವಿಸ್ ಥಾವ್ನ್ ಧಾಂವಾಂಧಾಂವಿ ಘರಾ ಯೆವ್ನ್ ಮ್ಹಜ್ಯಾ ಬುಕಾಂಚ್ಯಾ ದಾಳ್ಯಾಂತ್ಲೊ ಬೂಕ್ ಘೆವ್ನ್ ಪಾಟಿಂ ಧಾಂವ್ ಮಾರ್‌ಲ್ಲೊಂ ಹಾಂವ್ - ಪೂಣ್ ದಾಳ್ಯಾಂತ್ಲೊ ಕಾಡ್‌ಲ್ಲೊ ಬೂಕ್ ಮಾತ್ರ್ ಹಿಂದಿ ನೋಟ್ಸಾಂಚೊ! ಮೆಸ್ತ್ರಿನ್ ಮ್ಹಜೊ ಆವ್ತಾರ್, ದೊಳ್ಯಾಂತ್ಲಿಂ ದುಕಾಂ ಆನಿ ಘಾಮಾನ್ ಭಿಜಲ್ಲೆಂ ಶರ್ಟ್ ಪಳೆವ್ನ್ ಮ್ಹಾಕಾ ಭೊಗ್ಸುನ್ ಉದಾಕ್ ಪಿಯೆಂವ್ಕ್ ಧಾಡ್‌ಲ್ಲೊ. ತಿತ್ಲೊ ಗ್ರೇಟ್ ನ್ಹಯ್ ಹಾಂವ್?
ಹೆಂ ಏಕ್ ಘಡಿತ್ ಮ್ಹಾಕಾ ಜಿಣಿಯೆಂತ್ ಸಬಾರ್ ಪಾವ್ಟಿಂ ಜಾಗಯ್ತಾ ಆನಿ ಸಾಂಗ್ತಾ - ಹೇಯ್ ಮಿಸ್ಟರ್, ತುಂ, ತುವೆಂ ಚಿಂತ್ಚೆಪರಿಂ ಆನಿ ಹೆರಾಂನಿ ಚಿಂತ್ಚೆಪರಿಂ ಸ್ಮಾರ್ಟ್‌ಯಿ ನ್ಹಯ್, ಇಂಟೆಲೆಕ್ಚುವಲ್‌ಯಿ ನ್ಹಯ್. ಆನಿ ಮ್ಹಾಕಾ ಲಜೆ ಸಾಂಗಾತಾ ಹಾಸೊ ಯೆತಾತ್. ಹೊಚ್ಚ್ ಮ್ಹಜೊ Sense of humor.
ಹಾಸ್ಯಾಚೊ ವೊಸೊ ಮ್ಹಳ್ಯಾರ್ ಕಿತೆಂ? ಚಿಂತಿನಾಸ್ತಾನಾ ಹಾಸ್ಚೆಂ ಯಾ ಪಿಶ್ಯಾಂಪರಿಂ ಹಾಸ್ಚೆಂ? ದೋನ್‌ಯಿ ನ್ಹಯ್. ಹಾಸೊವಪಾಚಿ ಕಳಾಶಿ (Humour) ಘಾಯ್ ಕರಿತ್ ಪೂಣ್ ತಿ ಘಾಯಾಂಕ್ ಗೂಣ್‌ಯಿ ಕರ್ತಾ; ಹೊ ವೊಸೊ ಗುನ್ಯಾಂವ್ಕಾರ್ ಕರ್ತಾ ಪೂಣ್ ಭೊಗ್ಸಿತಾ; ಹೊ ವೊಸೊ ಭಿತರ್ಲಿ ವಾಡಾವಳ್ ಕರ್ತಾ. ಅಮೆರಿಕನ್ ಹಾಸೊವ್ಪಿ (Humourist) ಜೇಮ್ಸ್ ಥರ್ಬರ್ ಅಶೆಂ ವಿವರಿತಾ: ಆಪ್ಲಾ ಚುರ್‌ಚುರಿತ್ ಉಲವ್ಣಾ ನ್ ಹೆರಾಂಚ್ಯೊ ಚೆಷ್ಟಾಯೊ ತೊ ಕರ್ತಾ ತಶೆಂ ದಿಸಾತ್. ಪೂಣ್ ಎಕ್ಲೊ ಜೊ ಚಾಲಿಂ-ರಿತಿಂಚೆರ್ ಚಾಬೂಕ್ ಮಾರ್ತಾ (Satirist) ಸಗ್ಳಾ ಸಂಸಾರಾಚ್ಯೊಚ್ಚ್ ಚೆಷ್ಟಾಯೊ ಕರ್ತಾ ಮ್ಹಣ್ ದಿಸ್ತಾ ತರಿ, ತೊ ಪ್ರಥಮ್ ಜಾವ್ನ್ ಆಪ್ಣಾಚ್ಯೊಚ್ ಚೆಷ್ಟಾಯೊ ಕರ್ತಾ ಆನಿ ಅಶೆಂ ಕರ್ತಾನಾ ತೊ ಸಂಸಾರಾಚ್ಯಾ ರಿತಿಂ-ಚಾಲಿಂಚೊ ಎಕ್ಲೊ ಜಾತಾ ಪೂಣ್ ಎಕ್ಸುರೊ ಜಾಯ್ನಾ. ಹೆರಾಂಕ್ ತೊ ಪಿಸುಡ್ನಾ ಪೂಣ್ ತಾಂಚೊ ಖರೊ ರಂಗ್ ದಾಕವ್ನ್ ದಿತಾ ಆನಿ ಆಪ್ಣಾಕ್‌ಯಿ ಭೊಗ್ಸಿನಾ. ಕಿತ್ಯಾಕ್ ಮ್ಹಳ್ಯಾರ್ ಹಾಸ್ಯಾಚ್ಯಾ ವೊಸ್ಯಾಚಿ ಝರ್, ದೂಕ್, ದಬಾವ್ ಆನಿ ಕಷ್ಟಾಂ ಖಾಂಚಿಂತ್ಲಾನ್ ಉಬ್ಜಾತಾ. ಸೊಕ್ರೆಟಿಸಾನ್ ಮ್ಹಳಾಂ: ಫೊಕಾಣಾಂ ಆನಿ ಹಾಸ್ಯ್ ಕಷ್ಟಾಂ-ದುಕಾಂಚ್ಯಾ ಭೋವ್ ಲಾಗ್ಶಿಲ್ಯಾನ್ ಆಸಾತ್, ಜಶೆಂ ಉಜ್ವಾಡ್ ಆನಿ ಸಾವ್ಳಿ ಆಸಾ ತಶೆಂ. ದೆಕುನ್ ಜಾಯ್ಜೆ, ವಿಲ್ಲಿಯಮ್ ಜೇಮ್ಸ್ ಮ್ಹಣ್ತಾ: ಆಮಿ ಖುಶ್ ಆಸಾಂವ್ ಮ್ಹಣ್ ದಾಕಂವ್ಚೆ ಖಾತಿರ್ ಆಮಿ ಹಾಸಾನಾಂವ್ ಪೂಣ್ ಹಾಸ್‌ಲ್ಲಾ ನ್ ಆಮಿ ಖುಶ್ ಆಸಾಂವ್!
ಹ್ಯಾ ಲೇಖನಾಂತ್ ಹಾಂವೆಂ ಯೆದೊಳ್‍ಚ್ ಉಲ್ಲೇಕ್ ಕೆಲ್ಲೊ ಚಕ್ ಗಾಲ್ಲೊಝಿ ಮ್ಹಣ್ತಾ: ಮೊಡಾಂನಿ ಕಾಂಳ್ಬೆಲ್ಲಾ ಆಗಸಾಕ್ ಪಳೆತಾನಾ ಪಾವ್ಸ್ ಯೆತಾ ಮ್ಹಳ್ಳೆಂ ಖಚಿತ್ ಜಾತಾ ವ್ಹಯ್. ಪೂಣ್ ಅಸಲ್ಯಾ ವಾತಾವರಣಾಂತ್ ಮ್ಹಜ್ಯಾ ಆಮಿಗಾಂ ಸಾಂಗಾತಾ ಚಲೊನ್ ವೆತಾನಾ ಪಾವ್ಸಾಚ್ಯೊ ಶೆಣಿಯೊ ಪಡೊಂಕ್ ಸುರು ಜಾಲ್ಯೊ ಮ್ಹಣ್ ಮ್ಹಾಕಾ ಮಾತ್ರ್ ಪಯಿಲ್ಲೆಂ ಕಳಿತ್ ಜಾತಾ. ಕಶೆಂ ಮ್ಹಣ್ ವಿಚಾರ್ತಾತ್? ಕಿತ್ಯಾಕ್ ಮ್ಹಜ್ಯಾ ಬೊಡಾಚೆರ್ ಎಕ್‌ಚ್ ಎಕ್ ಕೇಸ್ ನಾ - ಹಾಂವ್ ಖಡ್ಡೊ!
Tags:
Laughing Club, Laugh, Humour, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
2/27/2021 ಹೆರೊಲ್ಪಿಯುಸ್: ಏಕ್ ಅವ್ಚಿತ್ ಭೆಟ್...
-
12/20/2020 ಯುವಜಣಾಂಕ್ ಪ್ರೇರಣ್ - ಜೆಸ್ಸಿಕಾ ಆನ್ನಾ ಲಿಝಾ...
-
12/6/2020 ಆಸ್ತ್ ........
-
11/25/2020 ಭಾರತಾಚಿಂ ಖಬ್ರೆ ಟಿವಿ ಚಾನೆಲಾಂ ಮರಣ್ ಪಾವ್ಲ್ಯ...
-
11/9/2020 ನಾಂವ್ ಬದಲ್ಲ್ಯಾನ್ ಗಾಂವ್ ಬದಲ್ನಾಂ...!...
-
10/17/2020 ಮಂಗ್ಳುರ್‌ಚೊ ಖ್ಯಾತ್ ಗ್ರಾಫೊಲೊಜಿಸ್ಟ್, ಸ್ಟೇ&...
-
-
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.