From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಜಿವಿತಾಕ್ ನವೊ ರಂಗ್ ದಿಂವ್ಚೆಂ ಫೆಸ್ತ್ 'ಹೋಳಿ'
Saturday, March 11, 2017
ಭಾರತಾಂತ್ ಸುರ್ವಿಲ್ಯಾ ದಿಸಾಂ ಥಾವ್ನ್ ಫೆಸ್ತಾಂಕ್ ಕೆದಿಂಕ್‌ಚ್ ಬರ್ಗಾಲ್ ನಾ. ದಿಸಾಕ್ ಏಕೇಕ್ ಮ್ಹಳ್ಯಾರೀ ತಿನ್ಶಾಂ ವಯ್ರ್ ಫೆಸ್ತಾಂ ಭಾರತಾಂತ್ ಆಚರಣ್ ಕರ್ತಾತ್. ವಿವಿಧ್ ಸಂಸ್ಕೃತಿಚ್ಯಾ, ಜಾತಿ ಕಾತಿಂಚ್ಯಾ ಆನಿ ಪ್ರದೇಶಾಂಚ್ಯಾ ಮಿಲನಾಂತ್ ಹಜಾರ್ ನಮುನ್ಯೆಚೆ ಸೊಭಿತ್ ರಿತಿ, ರಿವಾಜಿ, ಆಚರಣ್, ಜೀಣ್ಯೆರೀತ್, ಖಾಣ್, ಜೆವಾಣ್, ಭಾಸ್, ಸಾಹಿತ್ಯ್ ಸುಂದರ್ ರಿತಿನ್ ಭಾರತಾಕ್ ಥಿಕಾಂ ಭಾಸೆನ್ ಸೊಭ್ ದಿತಾತ್. ತಾಂತುನ್ ರಂಗೀನ್ ಫೆಸ್ತ್ ಮ್ಹಣ್ ನಾಂವಾಡ್ಲೆಲೆ೦ ಹೋಳಿಯೀ ಏಕ್ ಆಪುರ್ಬಾಯೆಚೆಂ ಫೆಸ್ತ್. ಮಾರ್ಚ್ ಮಹಿನ್ಯಾಂತ್ ಪುನ್ವೆಚ್ಯಾ ದುಸ್ರ್ಯಾ ದಿಸಾ ಹೆಂ ಫೆಸ್ತ್ ಆಚರಣ್ ಕರ್ತಾತ್. ವಿವಿಧ್ ಪ್ರದೇಶಾಂತ್ ವಿವಿಧ್ ಕಾಣ್ಯೊ ಹ್ಯಾ ಫೆಸ್ತಾ ಬಾಬ್ತೆನ್ ಚಾಲ್ತೆರ್ ಆಸಾತ್. 'ಗುಲಾಲ್' ಆನಿ ಹೆರ್ ನಮುನ್ಯೆಚಾ ರಂಗಾಳ್ ಪಿಟೊ ಘಾಲ್ಲೆಂ ಉದಕ್ ಎಕಾಮೆಕಾಚ್ಯಾ ಆಂಗಾರ್ ಘಾಲ್ತಾನಾ, ಥೊಡ್ಯಾಂಚ್ಯಾ ತೊಂಡಾರ್ ಪೊಕ್ರಿಪಣಾಚೊ ಹಾಸೊ ಉದೆತಾತ್ ತರ್ ಆನಿ ಥೊಡ್ಯಾಂಕ್ ಪ್ರತೀಕಾರಾಚೊ ದಾವ್.
ವ್ಹಡಾಂ ಆಪ್ಲ್ಯಾ ದಿಸ್ಪಡ್ತ್ಯಾ ಜಿಣ್ಯೆಚ್ಯಾ ಧಾಂವ್ಣೆಂತ್ ಪುರೊ ಜಾವ್ನ್ ರೀಚಾರ್ಜ್ ಜಾಂವ್ಕ್ ಅಪೇಕ್ಷಿತಾತ್ ತರ್, ಯುವಜಣಾಂ 'ಗರಿ' ಘಾಳುಂಕ್ ಪೆಚಾಡ್ತಾತ್ ಆನಿ ಲ್ಹಾನಾಂ ಪೊಕ್ರಿಪಣಾಂತ್ ಸಂತೊಸ್ ಜೊಡ್ತಾತ್. ಅಶೆಂ ವ್ಹಡಾಂ, ಯುವಜಣಾಂ ಆನಿ ಭುರ್ಗಿಂ ಸಮೇಸ್ತಾಂನಿ ಖುಶೆನ್, ಮಜೆನ್ ಆನಿ ಉಲ್ಲಾಸಾನ್ ಭಾಗ್ ಘೆಂವ್ಚೆ ಫೆಸ್ತ್ ಜಾವ್ನಾಸಾ ಹೋಳಿ. ರ೦ಗಾ೦ಚ್ಯಾ ಉದ್ಕಾಂತ್, ಮನ್ಶಾಂಚಿ ಮ್ಹೆಳಿಂ ಪಾತ್ಕಾಂ ಧುವ್ನ್ ವೊಸೊಂದಿತ್, ಹೆರಾಂಚ್ಯಾ ಗಮಾನಾಕ್ ತಾಂಚ್ಯಾ ಪಾತ್ಕಾಂಚಿ ಜಡಾಯ್ ದಿಷ್ಟಿಕ್ ಪಡ್ಚಿ ನಾಕಾ ಮ್ಹಣ್ಚಿ ಆಶಾ ಹ್ಯಾ ಆಚರಣಾಂತ್ ಮೆತೆರ್ ಆಸಾ.
ಹೋಳಿ ಆಚರಣಾಚೆಂ ಸುರ್ವಾತ್ ಕಶೆಂ ಜಾಲೆಂ?
'ಗರುಡ ಪುರಾಣ' ಮ್ಹಳ್ಳ್ಯಾ ಸಂಸ್ಕೃತ್ ಭಾಸೆಚ್ಯಾ ಪುರಾಣಾಂತೀ ಹ್ಯಾ ಫೆಸ್ತಾಚೊ ಉಲ್ಲೇಕ್ ಆಸಾ. ಕಾಳಿದಾಸ ಆಪ್ಲ್ಯಾ ಗ್ರಂಥಾಂತ್ ಹ್ಯಾ ಫೆಸ್ತಾಕ್ 'ಮದನೋತ್ಸವ' ಮ್ಹಣೊನ್ ಆಪಯ್ಲಾಂ. ವಿವಿಧ್ ಕಾಣ್ಯೊ ಹ್ಯಾ ಆಚರಣಾ ವಯ್ರ್ ಚಾಲ್ತೆರ್ ಆಸಾತ್ ತರೀಯೀ, ಹಿ ಸಕಯ್ಲಿ ಕಾಣಿ ಚಡಿತ್ ಅರ್ಥ್ ದಿತಾ. ಪುರಾಣಾಂತ್, ಹಿರಣ್ಯಕಶಿಪು ಮ್ಹಳ್ಳ್ಯಾ ಪಾಡ್, ರಾಕ್ಕೊಸಾಚೆಂ ನಾಂವ್ ವಾಚುಂಕ್ ಮೆಳ್ತಾ. ತಾಕಾ ಪ್ರಹ್ಲಾದ ಮ್ಹಳ್ಳೊ ದೇವ್ ಭಿರಾಂತಿಚೊ ಭುರ್ಗೊ ಜಲ್ಮಾತಾ. ಭುರ್ಗೊ ಪ್ರಹ್ಲಾದ ವಿಷ್ಣುಚೊ ವ್ಹಡ್ಲೊ ಭಕ್ತ್ ಆನಿ ದೇವ್ ಭಿರಾಂತೆಚೊ. ಪುಣ್ ಹಿರಣ್ಯಕಶಿಪುಕ್ ಹೆಂ ಬರೆಂ ದಿಸಾನಾ. ಬಾಪುಯ್ ಪುತಾಕ್ ಜಾಯ್ತೆಂ ಸಾಂಗ್ತಾ ಜಾಲ್ಯಾರ್‌ಯ್, ಪ್ರಹ್ಲಾದಾಚಿ ದೇವ್ ಭಕ್ತ್ ಅಖ೦ಡ್. ಹಿರಣ್ಯಕಶಿಪು ರಾಗಾರ್ ಜಾತಾ ಆನಿ ಪುತಾಕ್ ಲಗಾಡ್ ಕಾಡುಂಕ್ ಜಾಯ್ತ್ಯೊ ವಾಟೊ ಸೊಧ್ತಾ. ಪುಣ್ ವಿಷ್ಣುಚೆ೦ ಬೆಸಾ೦ವ್ ಆಸ್‌ಲ್ಲೊ ಭುರ್ಗೊ ಪ್ರಹ್ಲಾದ್ ಹರ್ಯೆಕ್ ಪಾವ್ಟಿಂ ವಾಂಚೊನ್ ಉರ್ತಾ. ನಿಮಾಣೆಂ ಹಿರಣ್ಯಕಶಿಪು ಆಪ್ಲಿ ಭಯ್ಣ್, ಹೋಳಿಕಾ ಮ್ಹಳ್ಳ್ಯಾ ರಾಕ್ಶಿಣೆಕ್ ಆಪವ್ನ್ ಪ್ರಹ್ಲಾದಾಕ್ ಲಗಾಡ್ ಕಾಡುಂಕ್ ಹುಕುಮ್ ದಿತಾ. ಹೋಳಿಕಾಚೆಂ ದೆಣೆಂ ಜಾವ್ನಾಸ್‌ಲ್ಲೆಂಗೀ, ತಾಕಾ ಖಂಚಾಯೀ ರಿತಿಚೊ ಉಜೊ ಲಾಗಾನಾ. ಹೋಳಿಕಾ ಹೆಂಚ್ ದೆಣೆಂ ವಾಪಾರು೦ಕ್ ಚಿಂತಾ. ವ್ಹಡ್ಲೊ ಉಜೊ ಪೆಟೊಂವ್ಕ್ ಆಪ್ಲಾ ಕಾಮೆಲ್ಯಾಂಕ್ ತೆಂ ತಾಕಿದ್ ದಿತಾ. ಆನಿ ತ್ಯಾ ಉಜ್ಯಾಂತ್, ಆಪ್ಲೊ ಭಾಚೊ ಪ್ರಹ್ಲಾದಾಕ್ ಘೆವ್ನ್ ರಿಗ್ತಾ. ಪುಣ್ ಘಡ್ತಾ ದುಸ್ರೆಂಚ್. ಆಪ್ಲೊ ಭಕ್ತ್ ಪ್ರಹ್ಲಾದಾಕ್ ದೇವ್ ರಾಕ್ತಾ. ಹೋಳಿಕಾ ಹುಲ್ಪೊನ್ ವೆತಾ ಜಾಲ್ಯಾರ್ ಪ್ರಹ್ಲಾದ್ ಕಿತೆಂಚ್ ಅನ್ವಾರ್ ನಾಸ್ತಾಂ ಉಜ್ಯಾ ಥಾವ್ನ್ ಪಾಶಾರ್ ಜಾವ್ನ್ ಶಾಬಿತ್ ಉರ್ತಾ. ಹೋಳಿಕಾಕ್ ಅಶೆಂ ಬೆಸಾಂವ್ ಆಸ್‍ಲ್ಲೆಂಗೀ, ತೆಂ ಎಕ್ಲೆಂ ಉಜ್ಯಾಂತ್ ರಿಗ್ಲ್ಯಾರ್ ಮಾತ್ರ್ ಲಾಸೊಂಕ್ ಸಾಧ್ಯ್ ನಾತ್‍ಲ್ಲೆಂ, ಪುಣ್ ಭಾಚೊ ಪ್ರಹ್ಲಾದಾಕ್ ಆಪ್ಲ್ಯಾ ಉಸ್ಕ್ಯಾರ್ ಕಾಣ್ಘೆವ್ನ್ ಉಜ್ಯಾಂತ್ ರಿಗ್ತಾ ದೆಕುನ್ ತೆಂ ನಾಸ್ ಜಾತಾ. ಪುಣ್ ಮೊರ್ಚ್ಯಾ ಪಯ್ಲೆಂ, ಹೋಳಿಕಾ ಪ್ರಹ್ಲಾದಾಲಾಗಿಂ ಭೊಗ್ಸಾಣೆಂ ಮಾಗ್ತಾ. ಪ್ರಹ್ಲಾದ್ 'ವರ್ಸಾಂತ್ ಏಕ್ ಪಾವ್ಟಿಂ ಸರ್ವಾಂ ತುಜೊ ಉಡಾಸ್ ಕಾಡ್ಚ್ಯಾ ಬರಿಂ ಜಾಂವ್ ಆನಿ ತುಜೆಂ ನಾಂವ್ ಅಮರ್ ಜಾಂವ್!' ತಾಕಾ ಆಶ್ವಾಸನ್ ದಿತಾ ಆನಿ ತ್ಯೆಚ್ ಉಡಾಸಾ ಖಾತಿರ್ 'ಹೋಳಿ' ಫೆಸ್ತ್ ಆಚರ್ಸಿತಾತ್ ಮ್ಹಳ್ಳಿ ಏಕ್ ಪಾತ್ಯೆಣಿ.
ಪುಣ್ ಆಮ್ಚ್ಯಾ ದಕ್ಷಿಣ್ ಭಾರತಾಚಿ ಪಾತ್ಯೆಣಿ ಇಲ್ಲಿ ವೆಗ್ಳಿ ಆಸಾ. ಹಾಂಗಾಸರ್ ಕಾಣಿ ಅಶಿ ಆಸಾ. ಮೊಗಾಚೊ ಆ೦ಜ್ ಕಾಮ ಗರ್ವಿ ಜಾವ್ನಾಸ್ತಾಂ. ಮನಿಸ್ ಆನಿ ಮನ್ಜಾತಿಂಕ್ ತೊ ಆಪ್ಲ್ಯಾ ಧೊಣ್ವೆ೦ತ್ ಉಪಾದ್ರ್ ದಿತಚ್ ಆಸ್ತಾ. ತಪಸ್ಸ್ಯಾ ಕರುಂಕ್ ಬೊಸ್‌ಲ್ಲ್ಯಾ ಶಿವಾಕ್‌ಯೀ ಹೊ ತೀರ್ ಸೊಡ್ತಾ. ಶಿವಾಕ್ ರಾಗ್ ಯೆತಾ ಆನಿ ಆಪ್ಲೊ ತಿಸ್ರೊ ದೊಳೊ ಉಗ್ತೊ ಕರ್ತಾ. ಕಾಮ ಹುಲ್ಪೊನ್ ವೆತಾ. ಪುಣ್ ಕಾಮಾಚಿ ಪತಿಣ್ ರತಿ ಶಿವಲಾಗಿಂ ಯೇವ್ನ್ ಭೊಗ್ಸಾಣೆ ಮಾಗ್ತಾ. ಶಿವ ತಾಚೆಂ ಮಾಗ್ಣೆಂ ಆಯ್ಕಾತಾ ಆನಿ ರತಿಕ್ ಆಪ್ಲ್ಯಾ ಪತಿಕ್ ಕಾಮಕ್ ಪಳೆಂವ್ಕ್ ಸಾಧ್ಯ್ ಆಸ್ಚ್ಯಾ ಬರಿಂ ಕರ್ತಾ. ಪುಣ್ ಪುನರ್ ಜಿವಂತ್ಪಣ್ ಜಾಲ್ಲ್ಯಾ ಕಾಮಾಕ್ ಆ೦ಗ್/ದೈಹಿಕ್ ಜೀವ್ ಆಸಾನಾ.
ಪುಣ್ ಏಕ್ ಮಾತ್ರ್ ಖಂಡಿತ್, ಹೋಳಿ ಮ್ಹಣ್ತಾನಾ ದೋನ್ ಭಾಯ್ಲೆ ಘುರ್ತ್ ಉಗ್ಡಾಸಾಕ್ ಯೆತಾತ್. ಏಕ್, ಹೋಳಿಚ್ಯಾ ಪಯ್ಲ್ಯಾ ದಿಸಾಚ್ಯಾ ಸಾಂಜೆರ್ ಪೆಟಂವ್ಚೊ ಉಜೊ ಆನಿ ದುಸ್ರೆಂ ವೆವೆಗ್ಳೆ ರ೦ಗ್. ಉಜ್ಯಾಚೆಂ ಆಚರಣ್ ಮನ್ಶಾಂಚಿ ಪಾತ್ಕಾಂ, ಹ೦ಕಾರ್ ಲಾಸ್ಚೊ ಘುರ್ತ್ ತರ್, ರ೦ಗ್ ಜಿವಿತಾಕ್ ನವೊ ಅರ್ಥ್ ದಿಂವ್ಚೆ, ಎಕಾಮೆಕಾ ಮೊಗಾನ್, ಸುಖಾನ್ ಆನಿ ಸಮೃದ್ಧೆನ್ ಜಿಯೆಂವ್ಚೆ ಕುರು. ಕಿತ್ಲೆ೦ ವಿ೦ಚ್ಣಾರ್ ಚಿ೦ತಾಪ್! ಫಕತ್ ಆಮ್ಚ್ಯಾ ಭಾರತಾಂತ್ ಮಾತ್ರ್ ಅಸಲಿಂ ಫೆಸ್ತಾಂ, ಅರ್ಥಾಭರಿತ್ ರಿತಿನ್ ಆಚರಣ್ ಜಾತಾತ್.
ಪುಣ್ ಬೊಂಬಯ್ ವ ವ್ಹಡ್ಲ್ಯಾ ಶ್ಹರಾ೦ನಿ೦ ವಸ್ತಿ ಕರ್ನ್ ಆಸ್‌ಲ್ಲ್ಯಾಂಕ್ 'ಹೋಳಿ' ಮ್ಹಣ್ತಾನಾ, ಆಂಗಾರ್ ಘಾಮ್ ದೆಂವ್ತಾ, ಮುಸ್ಕಾರಾರ್ ಕಾಳ್ಬಾಣ್ ಮಾ೦ಡ್ತಾ. ಕಿತ್ಯಾಕ್?
'ಹೋಳಿ' ಫೆಸ್ತಾಚ್ಯಾ ನಿಬಾನ್ ಕರ್‍ಚಿಂ ಅತರ್ವಣಾಂ, ಮನ್ಶಾಂಕ್ ಭ್ಯೆಂ ಹಾಡುಂಕ್ ಲಾಗ್ಲ್ಯಾಂತ್. ಪೊಸ್ಕಾಟ್ಯಾನಿ೦ ಭುರ್ಶೆಂ ಉದಾಕ್ ಘಾಲ್ನ್ ಟ್ರೇನ್ ಆನಿ ಬಸ್ಸಾಂತ್ ಪಯ್ಣ್ ಕರ್‍ತೆಲ್ಯಾಂಚೆರ್ ಉಡಂವ್ಚೆಂ, ಉದ್ಕಾಕ್ ಕೆಮಿಕಲ್ ಭರ್ಸೊನ್ ದುಸ್ರ್ಯಾಂಚ್ಯಾ ಆಂಗಾರ್ ವೊತ್ಚೆಂ, ಘರಾಂತ್ ಫೊರ್ಸಾನ್ ರಿಗೊನ್ ಹಜಾರಾಂನಿ ಖರ್ಚಿಲ್ಲಿ೦ ಪಿ೦ತುರಾ೦ ವಿಭಾಡ್ಚೆಂ, ಆದ್ಲ್ಯಾ ವರ್ಸಾ೦ಚೊ ಕಾ೦ಯ್ ರಾಗ್ ಆಸ್ಲ್ಯಾರ್ ಫಾರಿಕ್ಪಣ್ ಘೆಂವ್ಚೆ... ಪಟ್ಟಿ ಲಾಂಬಾತ್ತ್ ವೆತಾ. ಮನಿಸ್ ಚಡಿತ್ ಶಿಕ್‌ಲ್ಲ್ಯಾ ತಿತ್ಲೆಂ ಬೊರ್‍ಯಾ ನಡ್ತ್ಯಾಚೊ ಜಾಂವ್ಚೆ ಸೋಡ್ನ್ ಮನ್ಜಾತ್ ಕಿತ್ಯಾಕ್ ಜಾತಾ? ಏಕ್ ಪವಿತ್ರ್ ಆಚರಣಾಚೆಂ ಮಹತ್ವ್, ಅಶೆಂ ಕಿತ್ಯಾಕ್ ಹೊಗ್ಡಾಯ್ತಾ?
ಹೋಳಿ ವರ್ಸಾನ್ ವರ್ಸಾ ಚಡಿತ್ ಲೊಕಾಮೊಗಾಳ್ ಜಾತೇ ಆಸಾ. ದಕ್ಶಿಣ್ ಭಾರತಾಂತ್ ಹಾಚೆಂ ಆಚರಣ್ ತಿತ್ಲೆಂ ಪಳೆಂವ್ಕ್ ಮೆಳಾನಾ ಜಾಲ್ಯಾರ್‌ಯೀ, ಉತ್ತರ್ ಭಾರತಾಂತ್ ಭಾರಿಚ್ ಗದ್ದಳಾಯೆನ್ ಆಚರಣ್ ಕರ್ತಾತ್. ಕೃಷ್ಣಾ ಆನಿ ರಾಧೆಚ್ಯಾ ಮೊಗಾಕ್ ಸಂಬಂಧ್ ಜಾಲ್ಲ್ಯೊಯೀ ಜಾಯ್ತ್ಯೊ ಕಾಣ್ಯೊ ಹ್ಯಾ ಫೆಸ್ತಾಚ್ಯಾ ಆಚರಣಾಂತ್ ಆಯ್ಕೊಂಕ್ ಮೆಳ್ತಾತ್. ಮಥುರಾಂತ್ ಹಾಚೆಂ ಆಚರಣ್ ವಿಶೇಶ್ ರಿತಿನ್ ಚಲ್ತಾ. ಥೊಡ್ಯಾ ವರ್ಸಾಂ ಥಾವ್ನ್, ಭಾರತಾ ಥಾವ್ನ್ ಭಾಯ್ರ್ ಆಸ್‌ಲ್ಲ್ಯಾ ಗಾಂವಾಂತ್‌ಯೀ ಥಂಯ್ಚೊ ಲೋಕ್ ಹೋಳಿ ಆಚರಣ್ ಕರ್ತಾತ್.
ರಂಗ್ ಶಿಂಪ್ಡೊನ್, ಜಿವಿತಾಂತ್ ರಂಗ್ ಭರ್‍ಚೆಂ ಹೆಂ ಫೆಸ್ತ್, ಸರ್ವಾಂಚೆಂ ಮೊಗಾಚೆಂ ಜಾಂವ್. ವ್ಹಡಾಂಕ್ ಖುಶಾಲಾಯ್ ದೀಂವ್, ಯುವಜಣಾಂಕ್ ಮೋಗ್ ದೀಂವ್ ಆನಿ ಲ್ಹಾನಾಂಕ್ ಸಂತೊಸ್ ದೀಂವ್. ಜೈ ಹೋಳಿಕಾ!!!
Tags:
Holi, Indian Colour Festival, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
2/27/2021 ಹೆರೊಲ್ಪಿಯುಸ್: ಏಕ್ ಅವ್ಚಿತ್ ಭೆಟ್...
-
12/20/2020 ಯುವಜಣಾಂಕ್ ಪ್ರೇರಣ್ - ಜೆಸ್ಸಿಕಾ ಆನ್ನಾ ಲಿಝಾ...
-
12/6/2020 ಆಸ್ತ್ ........
-
11/25/2020 ಭಾರತಾಚಿಂ ಖಬ್ರೆ ಟಿವಿ ಚಾನೆಲಾಂ ಮರಣ್ ಪಾವ್ಲ್ಯ...
-
11/9/2020 ನಾಂವ್ ಬದಲ್ಲ್ಯಾನ್ ಗಾಂವ್ ಬದಲ್ನಾಂ...!...
-
10/17/2020 ಮಂಗ್ಳುರ್‌ಚೊ ಖ್ಯಾತ್ ಗ್ರಾಫೊಲೊಜಿಸ್ಟ್, ಸ್ಟೇ&...
-
-
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.