From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಕೊಂಕ್ಣಿ ಕಾತೊಲಿಕಾಂಚೆಂ ಖರಾರ್
Monday, July 9, 2018
ಕೆನರಾ ಕೊಂಕಣಿ ಕಾಥೊಲಿಕಾಂಚೆ ಲಗ್ನಾ ಸಂಪ್ರದಾಯ್ - 2 :
ಖರಾರ್ ಕಾಜಾರಾ ಪಯ್ಲೊ ಸಂಭ್ರಮ್. ಹೊಕ್ಲೆ-ನವ್ರ್ಯಾಚಿ ಸಯ್ರಿಕ್ ಘಟ್ ಜಾಲಿ ತರ್ ಲಗಿನ್ ಜಾಂವ್ಕ್ ಒಪ್ವೊನ್ ಘೆವ್ನ್ ರೆಸ್ಪೆರಾಕ್ ವೆಚ್ಯಾ ಪಯ್ಲೆಂ ಹೊಕಲ್ ಆನಿ ನವ್ರೊ ಸುರ್ವಿಲಿ ಭಾಸಾಭಾಸ್ ಚಲಯ್ಲ್ಯಾ ಉಪ್ರಾಂತ್ ಲೊಕಾ ಮುಕಾರ್ ಆಪ್ಣಾಚಿ ಲಗ್ನಾಚಿ ಖುಶಿ ದಾಕವ್ನ್ ಎಕಾಮೆಕಾ ಬರ್ಪಿಂ ಉತಾರ್ ದಿಂವ್ಚ್ಯಾಚೊ ಸಂಭ್ರಮ್ಂಚ್ ಖರಾರ್. ಹೊಕ್ಲೆ ಆನಿ ನವ್ರ್ಯಾ ಮದೆಂ ಜಾಂವ್ಚೊ ಏಕ್ ಸೊಲ್ಲೊ. ಖರಾರಾಚೆಂ ದಸ್ತಾವೇಜ್ ಲಗ್ನ್ ಜಾಂವ್ಕ್ ಆಸ್ಚ್ಯಾ ಚೆಡ್ಯಾ-ಚೆಡ್ವಾನ್ ಭರುಂಕ್ ಆಸ್ತಾ, ತಾಂತು ನಾಂವ್, ಬಾಪಾಯ್ಚೆಂ ನಾಂವ್, ಜಲ್ಮಾ ತಾರಿಕ್, ಬಾಪ್ತಿಜ್ಮಾಚಿ ತಾರಿಕ್, ವಿಳಾಸ್, ಬಾಪ್ತಿಜ್ಮ್ ಮೆಳ್‌ಲ್ಲಿ ಫಿರ್ಗಜ್ ಭರುನ್ 'ವಯ್ರ್ ದಿಲ್ಲ್ಯಾ ನಾಂವಾಂಚಿಂ ಆನಿ ವಿಳಾಸಾಚಿಂ ಆಮಿ, ಎಕಾಮೆಕಾ ಲಾಗಿಂ ಲಗ್ನಾಚ್ಯಾ ಭೆಸಾಂತ್ ಎಕ್ವಟ್ತೆಲ್ಯಾಂವ್ ಮ್ಹಣ್ ಉತಾರ್ ಭಾಸ್ ದಿತಾಂವ್, ಲಗ್ನಾಚ್ಯಾ ದಿಸಾಕ್ ವಾಯ್ದೊ ..... ಮಹಿನೆ. ಹಿ ಪರ್ಗಟ್ ಭಾಸ್ ಆಮ್ಚ್ಯೆಚ್ ಸ್ವಂತ್ ಖುಶೆನ್ ಆಮಿ ದಿಂವ್ಚಿ ಜಾವ್ನಾಸಾ' - ಮ್ಹಣ್ ದಸ್ಕತ್ ಕರುನ್, ದಸ್ಕತ್ ಕೆಲ್ಲಿ ತಾರಿಕ್ ಕಾಣ್ಸುಂಕ್ ಆಸಾ ಆನಿ ಚೆಡ್ಯಾಚ್ಯಾ ತಶೆಂ ಚೆಡ್ವಾಚ್ಯಾ ತರ್ಫೆನ್ ಎಕೆಕ್ಲ್ಯಾನ್ ಸಾಕ್ಸ್ ಜಾವ್ನ್ ಆಪ್ಲೆಂ ನಾಂವ್ ಆನಿ ವಿಳಾಸ್ ಬರವ್ನ್ ದಸ್ಕತ್ ಕರುಂಕ್ ಆಸಾ.
ಆದಿಂ ವ್ಹಡ್ ಭಾವ್ ವಾ ಭಯ್ಣ್ ಆಪ್ಣಾಂಕ್ ಲ್ಹಾನ್ ಭಾವ್/ಭಯ್ಣ್ ಆಸಾ ತರ್ ತಾಂಚ್ಯೆಕೀ ಪಯ್ಲೆಂ ಕಾಜಾರ್ ಜಾಯ್ನಾತ್‌ಲ್ಲಿಂ. ಹ್ಯಾ ಕಾರಣಾನ್ ಆಪ್ಣಾ ಪಾಟ್ಲ್ಯಾಕ್ ಸಯ್ರಿಕ್ ಘಡುನ್ ಯೆಂವ್ಕ್ ನಾ ತರ್ ವ್ಹಡ್ ಭಾವ್/ಭಯ್ಣ್ ಸಬಾರ್ ತೇಂಪ್ ಆಂಕ್ವಾರ್ ಉರ್ತಾಲಿಂ.
ಖರಾರಾ ವೆಳಾರ್ ಮುದಿಯೆಚೊ ಉಪೇಗ್ ಪುರಾತನ್ ಸಂಪ್ರದಾಯ್ ಆನಿ ಲಗಿನ್ ಜಾಂವ್ಚ್ಯಾ ಹೊಕ್ಲೆ-ನವ್ರ್ಯಾನ್ ಎಕಾಮೆಕಾ ಕೆಲ್ಲ್ಯಾ ಸೊಲ್ಲ್ಯಾಚಿ ಮ್ಹೊರ್! ಹ್ಯಾ ಮುದಿಯೆಕ್ 'ಭಾಸಾವ್ಣೆಚೆಂ ರೋದ್' ಮ್ಹಣ್ತಾಲೆ. ತಿ ಮುಕ್ಲ್ಯಾ ಕಾಜಾರಿ ಜಿವಿತಾ ಖಾತಿರ್ ಕೆಲ್ಲ್ಯಾ ಸೊಲ್ಲ್ಯಾಚೊ ಸಂಕೇತ್. ಮುದಿಯೊ ಆಗ್ಮೆಂತಾನ್ ಬೆಂಜಾರ್ ಕರ್ತಾಲೆ. ಮೂಳ್ ಕ್ರೀಸ್ತಾಂವಾಂ ಮದೆಂ ಹೊಕಲ್ ಆಪ್ಣಾ ಲಾಗಿಂ ಲಗಿನ್ ಜಾಂವ್ಕ್ ಆಸ್ಚ್ಯಾ ನವ್ರ್ಯಾಚ್ಯಾ ಬೊಟಾಕ್ ಖರಾರಾಚಿ ಮುದಿ ಘಾಲಿನಾತ್‌ಲ್ಲಿ, ನವ್ರೊ ಮಾತ್ರ್ ಹೊಕ್ಲೆಚ್ಯಾ ಬೊಟಾಕ್ ಶಿರ್ಕಾಯ್ತಾಲೊ. ಉಪ್ರಾಂತ್ಲ್ಯಾ ವರ್ಸಾಂನಿ ಹೊಕ್ಲೆ-ನವ್ರ್ಯಾ ದೊಗಾಂಯ್ನಿ ಮುದಿಯೊ ಬದ್ಲುಂಕ್ ಸುರು ಕೆಲೆಂ. ಎಕಾಮೆಕಾಚ್ಯಾ ಬೊಟಾಚೆಂ ಜೋಕ್ ಕಳಿತ್ ನಾ ತರ್ ಹೊಕ್ಲೆಚಿ ಮುದಿ ಹೊಕಲ್‌ಚ್ ಆನಿ ನವ್ರ್ಯಾಚಿ ಮುದಿ ನವ್ರೊಚ್ ಕರಯ್ತಾಲೊ. ಖರಾರಾಕ್ ಯಾಜಕ್ ಯೇನಾ ತರ್ ಮುದಿ ಪಯ್ಲಿಚ್ ಬೆಂಜಾರ್ ಕರವ್ನ್ ಹಾಡ್ತಾಲೆ ಆನಿ ಖರಾರಾ ದಿಸಾ ತ್ಯೊ ಘರಾ ಭಿತರ್ ಸರ್ತಚ್ ಪಯ್ಲೆಂಚ್ ಬದ್ಲಯ್ತಾಲಿಂ. ತ್ಯೊ ಸರ್ವಾಂ ಮುಕಾರ್ ಎಕಾಮೆಕಾಚ್ಯಾ ದಾವ್ಯಾ ಹಾತಾಚ್ಯಾ ಚವ್ತ್ಯಾ ಬೊಟಾಕ್ ಶಿರ್ಕಾಂವ್ಕ್ ಆಸ್ಲ್ಯೊ. ಹ್ಯೊ ಮೊಗಾ ಮುದಿಯೊ ಎಕಾಮೆಕಾಕ್ ಜಿವಿತ್ ಭರ್ ಸಮರ್ಪಣಾಚೆಂ ಪ್ರತೀಕ್. ಮುದಿ ಎಕಾ ಚಲಿಯೆಕ್ ತಾಚ್ಯಾ ನವ್ರ್ಯಾ ಸಂಗಿಂ ಬಂದನ್ ಘಡ್ತಾ ಆನಿ ತಿಕಾ ನವ್ರ್ಯಾ ಖಾಲ್ ಜೀಣ್ ಭರ್ ಖಾಲ್ ಜಾವ್ನ್ ಜಿಯೆಂವ್ಕ್ ಸಾಕ್ಸ್ ದಿತಾ. ಮುದಿ ಎಕಾ ಚಲ್ಯಾಕ್ ಆಪ್ಲ್ಯಾ ಹೊಕ್ಲೆಕ್ ತಿಚ್ಯಾ ಜಿವಿತಾ ಪರ್ಯಾಂತ್ ರಾಕುನ್ ವ್ಹರುಂಕ್, ಸಾಂಬಾಳುಂಕ್ ಆನಿ ರಕ್ಶಣ್ ದೀಂವ್ಕ್ ಉಗ್ಡಾಸ್ ಕರ್ತಾ.
ಬೋವ್ ಆದ್ಲ್ಯಾ ಕೆನರಾ ರಿವಾಜೆ ಪರ್ಮಾಣೆಂ ಖರಾರ್ ಹೊಕ್ಲೆಚ್ಯಾ ಫಿರ್ಗಜೆಂತ್ ವಿಗಾರಾಚ್ಯಾ ಘರಾ ಆಸ್ತಾಲೆಂ. ನವ್ರ್ಯಾ ಆನಿ ಹೊಕ್ಲೆಗೆಲ್ಯಾ ದೊನೀ ಘರ್ಚ್ಯಾಂನಿಂ ಪಾನ್-ಫೊಡ್ ವ್ಹರುಂಕ್ ಆಸ್‌ಲ್ಲಿ. ಯಾಜಕ್ ಖರಾರಾಚೆಂ ದಸ್ತಾವೇಜ್ ಬರಯ್ತಾಲೊ, ತಾಕಾ ದೊಗಾಂಚಿ ಸಾಕ್ಸ್ ಆಸ್ತಾಲಿ. ಉಪ್ರಾಂತ್ ಘರ್ಚ್ಯಾ ಮುಕೇಲ್ ದಾದ್ಲ್ಯಾಂನಿಂ ಪಾನ್-ಫೊಡ್ ಅದ್ಲಿ-ಬದ್ಲಿ ಕರುಂಕ್ ಆಸ್‌ಲ್ಲಿ. ಉಪ್ರಾಂತ್ಲ್ಯಾ ವರ್ಸಾಂನಿಂ ಖರಾರ್ ಹೊಕ್ಲೆಚ್ಯಾ ಘರಾ ಚಲುಂಕ್ ಲಾಗ್ಲೆಂ. ಯಾಜಕ್ ಯೇನಾಸ್ಲೊ, ಬದ್ಲಾಕ್ ಖರಾರಾಚೆಂ ದಸ್ತಾವೇಜ್ ಆಪಾಪ್ಲ್ಯಾ ಫಿರ್ಗಜೆಚ್ಯಾ ವಿಗಾರಾ ಥಾವ್ನ್ ವ್ಹರ್ನ್ ಹೊಕ್ಲೆ ಘರಾ ಬರಂವ್ಚೆಂ ಆನಿ ತೆಂ ಅದಲ್-ಬದಲ್ ಕರ್ಚೆಂ. ಗುರ್ಕಾರ್ ದಸ್ತಾವೆಜಾಂ ಬರಯ್ತಾಲೊ. ಥೊಡ್ಯಾ ಕಡೆನ್ ಕುಟ್ಮಾ ಲಾಗಿಂ ಚಡ್ ಸಳಾವಳ್ ಆಸ್‌ಲ್ಲೊ ಫಿರ್ಗಜೆಚೊ ವಿಗಾರ್ ಹೊಕ್ಲೆಚ್ಯಾ ಘರಾ ಯೆತಾಲೊ. ಆತಾ'ತಾಂ ಚೆಡೊ-ಚೆಡುಂ ಎಕಾಮೆಕಾ ಪಸಂದ್ ಕರುನ್ ಲಗ್ನಾಕ್ ಒಪ್ಪಿಗಿ ದಿತಾತ್. ಖಂಯ್, ಕೆದಾಳಾ, ಕಶೆಂ ಮ್ಹಣ್ ತಿಂಚ್ ಇತ್ಯರ್ತ್ ಕರ್ತಾತ್ ಆನಿ ವ್ಹಡಿಲಾಂನಿಂ ಫಕತ್ 'ಹುಂ' ಕರ್ಚೆಂ. ಆತಾಂ ಫಕತ್ 'ಫೊರ್ಮ್ಸ್' ದಸ್ಕತ್ ಕರುನ್ ಎಕಾಮೆಕಾ ಬದ್ಲಯ್ತಾತ್. ಥೊಡಿಂ ಲ್ಹಾನ್‌ಶಿ ಪಾರ್ಟಿ ಕರುನ್ ಸಂಭ್ರಮ್ತಾತ್. ಥೊಡ್ಯಾಂಚೆಂ ಖರಾರ್ ಬರವ್ನ್ ಜಾಲಾಂ ಮ್ಹಣ್ ಕುಟ್ಮಾಚ್ಯಾಂಕ್ ಸಯ್ತ್ ಕಳಿತ್ ಆಸಾನಾ!
ಹಿಂದೂ ರಿವಾಜೆಂ ಪ್ರಕಾರ್ ಸಯ್ರಿಕ್ ಘಟ್ ಜಾತಚ್ ಹೊಕ್ಲೆ-ನವ್ರ್ಯಾಚೆಂ 'ನಿಶ್ಚಯ' ದೊನೀ ಪಾಡ್ತಿಂಚ್ಯಾ ಧಾ-ಧಾ ಜಣಾಂ ಸಾಮ್ಕಾರ್ ಹೊಕ್ಲೆಚ್ಯಾ ಘರಾ ಚಲ್ತಾ. ಹೊಕಲ್ ನವ್ರ್ಯಾಕ್ ಭಾಂಗ್ರಾಳಿ ಮುದಿ ಘಾಲ್ತಾ ತರ್ ನವ್ರೊ ಹೊಕ್ಲೆಕ್ ಕಾಪಾಡ್ ಇನಾಮ್ ದಿತಾ. ಥೊಡ್ಯಾ ಕಡೆನ್ ಹಿಂದೂ ಹೊಕಲ್-ನವ್ರೊ ಖರಾರಾ ದಿಸಾ ಎಕಾಮೆಕಾ ಮುದಿ ದಿತಾತ್. ತಿ ತಾಣಿಂ ಮರಣ್ ಪರ್ಯಾಂತ್ ಬೊಟಾಕ್ ಘಾಲುಂಕ್ ಆಸ್ತಾ. ಲಗ್ನಾ ವೆಳಾರ್ ತಿಂ ಮುದಿ ಬದ್ಲಯ್ನಾಂತ್. ಹಿಂದ್ವಾಂಚ್ಯಾ ಸಯ್ರಿಕ್ ನಿಶ್ಚಯ್ ಜಾಂವ್ಚ್ಯಾ ದಿಸಾ 'ವೀಳ್ಯ ಶಾಸ್ತ್ರ' ಆಸ್ತಾ.
ಥೊಡೆ ಖರಾರ್ ಮ್ಹಳ್ಯಾರ್ 'ಮುದಿ' ಮ್ಹಣ್ತಾತ್. ಮುದಿ ಮ್ಹಳ್ಯಾರ್ 'ಮೊಗಾಚೆಂ ಬೊಳೆಂ'. ರೋಮನ್ ಲೊಕಾ ಮದೆಂ ಎಕಾಮೆಕಾ ಮುದಿ ಶಿರ್ಕಾಂವ್ಚಿ ರಿವಾಜ್ ಕಾಂಯ್ ಕ್ರಿಸ್ತ್ ಪೂರ್ವ್ 4800 ವರ್ಸಾಂ ಪುರ್ವಿಂಯ್ ಆಸ್‌ಲ್ಲಿ. ಸಾಸ್ರಾಂ ಥಾವ್ನ್ಂಚ್ ಮುದಿ ದಾವ್ಯಾ ಹಾತಾಚ್ಯಾ ಚವ್ತ್ಯಾ ಬೊಟಾಕ್ ಘಾಲ್ತಾಲೆ. ಹಾಕಾ 'ಮುದಿಯೆ ಬೋಟ್' ಮ್ಹಣ್ತಾಲಿಂ. ಗ್ರೀಕ್ ಆನಿ ರೋಮನ್ ಪಾತ್ಯೆಣೆ ಪ್ರಕಾರ್ ಏಕ್ ಪ್ರಮುಖ್ ರಗ್ತಾ-ಶಿರ್ ('ವೆನಾ ಆಮೊರಿಸ್' ವಾ 'ಮೊಗಾಚಿ ಶಿರ್') ಹ್ಯಾ ಬೊಟಾ ಥಾವ್ನ್ ಶೀದಾ ಕಾಳ್ಜಾಕ್ ವೆತಾ. ಜುದೆವಾಂನಿ ಹಾಚೆಂ ನಕಲ್ ಕಾಡ್ಲೆಂ ಆನಿ ಹೊಕ್ಲೆ-ನವ್ರ್ಯಾಚ್ಯಾ ಮೊಗಾಚೊ ಬಾಂಧ್ ಶಾಬೀತ್ ಆನಿ ಥಿರ್ ಕರ್ಚ್ಯಾಕ್ ಚವ್ತ್ಯಾ ಬೊಟಾಕ್ ಮುದಿ ಶಿರ್ಕಾಂವ್ಕ್ ಲಾಗ್ಲೆ. ಆಮಿ ಆತಾಂ ವಾಪಾರ್ಚಿ ತಿ ಭಾಂಗ್ರಾಳಿ ಮುದಿ ಆಂಗ್ಲೊ-ಸಾಕ್ಸೊನ್ ಲೊಕಾಚ್ಯಾ ರಿವಾಜೆಂ ಥಾವ್ನ್ ಆಯ್ಲ್ಯಾ. ಆಶಿ ಶಿರ್ಕಾಯಿಲ್ಲಿ ಮುದಿ 'ಆಪ್ಲ್ಯಾ ದೊಗಾಂಯ್ಚ್ಯಾ ಎಕಾಮೆಕಾಚ್ಯಾ ಎಕ್ವಟಾಕ್ ಭಾಯ್ಲೊ ಘುರ್ತ್ ಜಾವ್ನ್ ಏಕ್ ಸಾಕ್ಸ್ ಜಾವ್ನಾಸಾ' ಮ್ಹಣ್ ಪಾತ್ಯೆತಾತ್. ಮುದಿಯೆಚೆಂ ಉರುಟ್ ರೋದ್ ಮೊಗಾಕ್, ಪಾತ್ಯೆಣೆಕ್, ಥಿರಾಸಾಣೆಕ್ ಆನಿ ಏಕ್ವಟಾಕ್ ಸಂಕೇತ್. ಹೊಕ್ಲೆ ನವ್ರ್ಯಾನ್ ಎಕಾಮೆಕಾ ಥಂಯ್ ವಿಶ್ವಾಸ್, ಪಾತ್ಯೆಣಿ, ಮೋಗ್, ಭರ್ವಸೊ ದವರ್ತಾಂ - ಮ್ಹಣ್ ದಾಕಂವ್ಚಿ ನಿಶಾನಿ. ಹ್ಯಾ ಮೊಗಾಚ್ಯಾ ರೊದಾಕ್ ಪ್ರಾರಂಭ್ ನಾ, ಅಂತ್ಯ್‌ಯೀ ನಾ - ಬಗಾರ್ ಶಾಸ್ವತ್.
ಮುದಿ ಶಿರ್ಕಾಯ್ಲ್ಯಾ ಉಪ್ರಾಂತ್ ಆಯಿಲ್ಲ್ಯಾ ಸಯ್ರ್ಯಾಂಕ್ ಹೊಕ್ಲೆಗೆರ್ ಗಡ್ದ್ ಜೆವಣ್ ಆಸ್ತಾಲೆಂ. ಖರಾರ್ ಸಾಂಜೆರ್ 4 ವರಾರ್‌ಶೆಂ ದವರ್ಲೆಂ ತರ್ 'ಪಾರ್ಟಿ' ಆಸ್ತಾಲಿ, ಜೆವಣ್ ಆಸಾನಾಸ್ಲೆಂ. ಹ್ಯಾ ಖರಾರಾಕ್ 6 ಮಯ್ನ್ಯಾಂಚೊ ವಾಯ್ದೊ ಆಸ್ತಾಲೊ. ಸ ಮಯ್ನ್ಯಾಂಚ್ಯಾ ಹ್ಯಾ ಆವ್ದೆಂತ್ ತಿಂ ಎಕಾಮೆಕಾ ಕಾಜಾರ್ ಜಾಂವ್ಚೊ ನಿರ್ದಾರ್ ಘಟ್ ಕರ್ತಾಲಿಂ ವಾ ಮನ್ ನಾ ತರ್ ಖರಾರ್ ಪಾಟಿಂ ಕಾಡ್ತಾಲಿಂ. ಜರ್ ಖರಾರ್ ಚೆಡ್ಯಾನ್ ಪಾಟಿಂ ಕಾಡ್ಲೆಂ ತರ್ ತಾಣೆಂ ವಾ ತಾಚ್ಯಾ ಬಾಪಾಯ್ನ್ ಹೊಕ್ಲೆಕ್ ದುಡ್ವಾ ರುಪಾರ್ ದಂಡ್ ದೀಂವ್ಕ್ ಆಸ್ಲೆಂ. ತಶೆಂಚ್ ಚೆಡ್ವಾನ್ ಪಾಟಿಂ ಕಾಡ್ಲ್ಯಾರ್ ತಾಚ್ಯಾ ಬಾಪಾಯ್ನ್ ನವ್ರ್ಯಾಕ್ ದುಡು ದೀಜೆ ಆಸ್ಲೊ. 6 ಮಯ್ನ್ಯಾಂ ಭಿತರ್ ಕಾಜಾರ್ ಜಾಲೆಂ ನಾ ತರ್ ಸಯ್ರಿಕ್ ತುಟಯಿಲ್ಲ್ಯಾ ಪಾಡ್ತಿಚ್ಯಾಂನಿಂ ಜುಲ್ಮಾನ್ ಭರುಂಕ್ ಆಸ್‌ಲ್ಲೊ.
ಆದಿಂ ಚೆಡೊ ಆಪ್ಲ್ಯಾ ಮಾಂ-ಬಾಪಾಕ್ ತಶೆಂ ಹೆರ್ ವ್ಹಡಿಲಾಂಕ್, ವಾಡ್ಯಾಚ್ಯಾ ಗುರ್ಕಾರಾಕ್ ಆನಿ ಸಯ್ರಿಕೆಚ್ಯಾ ಮ್ಹಾಲ್ಯಾಕ್ ಘೆವ್ನ್ ಹೊಕ್ಲೆಚ್ಯಾ ಫಿರ್ಗಜೆಕ್ ವಾ ಹಿಂದೂ ರಿವಾಜೆ ಪ್ರಕಾರ್ ಹೊಕ್ಲೆಚ್ಯಾ ಘರಾಚ್ ಖರಾರಾಕ್ ವೆತಾಲೊ. ಹೊಕ್ಲೆಗೆಲಿಂ ಖಾಸ್ ಕುಟ್ಮಾಚಿಂ ವ್ಹಡಿಲಾಂ ಆಸ್ತಾಲಿಂ. ಸಯ್ರ್ಯಾಂಕ್ ಪಾನ್-ಫೊಡ್ ಮಾನ್ ಆಸ್ತಾಲೊ. ಖರಾರಾ ವೆಳಾರ್ ನವ್ರ್ಯಾ ಗೆಲಿಂ ಭಾಯ್ರ್ ಆಂಗ್ಣಾಂತ್ ಘಾಲ್ಲ್ಯಾ ಮಾಟ್ವಾಂತ್ ವಾ ಸೊಪ್ಯಾರ್ ಬಸುನ್ ಆಸ್ತಾನಾ, ಹೊಕ್ಲೆಗೆಲಿಂ ಆನಿ ಘರ್ಚಿಂ ಸಯ್ರಿಂ ಭಾಯ್ರ್ ಝಳ್ಕಾನಾಸ್ಲಿಂ. ತಾಣಿಂ ಜನೆಲಾಂತ್ಲ್ಯಾನ್ ತಿಳ್ಚೆಂ ಆಸ್ಲೆಂ. ನವ್ರೊ ಭಾಯ್ರ್ ಸೊಪ್ಯಾರ್ ವಾ ಆಂಗ್ಣಾಂತ್ ಕೆಲ್ಲ್ಯಾ ಸಾವ್ಳೆಂತ್ ಬಸ್ತಾಲೊ ಆನಿ ಹಿಂ ಭಿತರ್ ಥಾವ್ನ್ ತಾಚೆಂ ಮಾಪ್ ಕಾಡ್ನ್ 'ಕಿಸ್ಕ್' ಕರ್ನ್ ನವ್ರ್ಯಾಕ್ ಆಯ್ಕಾನಾಶೆಂ ತೊಂಡಾಕ್ ಹಾತ್ ಆಡ್ ಧರ್ನ್ ಹಾಸ್ತಾಲಿಂ. ಹೊಕ್ಲೆಕ್ ಭಯ್ಣಿಂ, ಮಾವ್ಶ್ಯೊ, ಆಕಯೊ, ವೊನಿಯೊ ಕಾಪಾಡ್ ನ್ಹೆಸವ್ನ್, ಫುಲಾಂ ಮಾಳವ್ನ್ ಭಾಯ್ರ್ ಹಾಡ್ಲ್ಯಾ ಉಪ್ರಾಂತ್ ಮಾಗ್ಣೆಂ ಜಾತಚ್ ಘರಾ ಆಯಿಲ್ಲೊ ಯಾಜಕ್ ಮುದಿ ಬೆಂಜಾರ್ ಕರ್ತಾಲೊ. ಯಾಜಕ್ ದೆವಾ ಕಡೆನ್ ಮುದಿಯಾಂಚೆರ್ ಆಶಿರ್ವಾದ್ ಘಾಲುನ್ ತ್ಯೊ ಪವಿತ್ರ್ ಕರುಂಕ್ ಮಾಗ್ತಾಲೊ. ತಿಂ ದೊಗಾಂಯ್ ವೆಗಿಂಚ್ ಲಗ್ನಾ ಸಂಸ್ಕಾರಾಂತ್ ಎಕ್ವಟಿತ್ ಜಾವ್ನ್ ಸಂತೊಸ್ಬರಿತ್ ಜಿಣಿ ಜಿಯೆಂವ್ಕ್ ಫಾವೊ ಕರ್ - ಮ್ಹಣ್ ಪ್ರಾರ್ಥಿತಾಲೊ. ಥೊಡೆ ಕಡೆನ್ ಚಲಿ ಕಾಪಾಡ್ ನ್ಹೆಸುನ್ ಭಾಯ್ರ್ ಯೆತಾನಾ ಟ್ರೇಯಾಂತ್ ಶರ್ಬತಾಚೆ ವಾ ಹೆರ್ ಕಸಲ್ಯಾಯ್ ಪೀವನಾಚೆ ಗ್ಲಾಸ್ ಘೆವ್ನ್ ಯೆತಾಲೆಂ, ಆಪ್ಲೊ ಮಾನ್ ಧರ್ಣಿರ್ ಖಂಚವ್ನ್ ಚೊರ್‍ಯಾಂ ನವ್ರ್ಯಾಚೆರ್ ಖಿಣಾಚಿ ದೀಷ್ಟ್ ಘಾಲುನ್ ಗ್ಲಾಸ್ ವೊಡ್ಡಾಯ್ತಾಲೆಂ. ತಾಣೆಂ ಆಪ್ಣಾಚ್ಯಾ ಜಿಣ್ಯೆ ಸಾಂಗಾತ್ಯಾಕ್ ಸಾರ್ಕೆಂ ಪಳಯ್ಜೆ ತರ್ ಭಿತರ್ ವಚುನ್ ಬಾಗ್ಲಾ ಆಡೊಸಾಕ್ ವಾ ಜನೆಲಾ ಇಡ್ಯಾಂತ್ ಥಾವ್ನ್ಂಚ್ ತಿಳಿಜೆ ಆಸ್‌ಲ್ಲೆಂ.
ಪಾನ್-ಫೊಡಿಚಿ ಬೊಶಿಯೀ ಮಾನ್ ದೀವ್ನ್ ದೊನೀ ಘರಾಣ್ಯಾಂಚೆ ವ್ಹಡಿಲ್ ಬದ್ಲವ್ನ್ ಘೆತಾಲೆ. ನವ್ರೊ ಜಾಂವ್ಕ್ ಆಸ್ಚೊ ಆಪ್ಲ್ಯಾ ಲಗಿನ್ ಜಾಂವ್ಚ್ಯಾ ಚಲಿಯೆಕ್ ಕಾಪಾಡ್ ದಿತಾಲೊ. ಹೊಕಲ್ ನವ್ರ್ಯಾನ್ ದಿಲ್ಲೆಂ ಕಾಪಾಡ್ ನ್ಹೆಸುನ್ ಭಾಯ್ರ್ ಯೇವ್ನ್ ಬಸ್ತಾಲೆಂ. ನವ್ರೊ ಹೊಕ್ಲೆಕ್ ಇನಾಮ್ ಜಾವ್ನ್ ಬಾಜ್ವೆಚೆಂ ಲುಗಟ್, ಕೋಂತ್, ಬೆಂತಿಣ್, ದೊತೊರ್ನಿಚೆಂ ಪುಸ್ತಕ್ (ಲ್ಹಾನ್ ಸಾಂಗಾತಿ, ಜೆಜುಚೊ ಕುರೊವ್, ಮರಿಯೆಚೊ ಮಯ್ನೊ, ಮರಿಯೆಚೊ ಝೆಲೊ, ಚಾಲ್ತಿಂ ಮಾಗ್ಣಿಂ), ಬಾರಾ ಹಾತ್-ತುವಾಲೆ, ಸತ್ರಿ, ಶೃಂಗಾರಾಚ್ಯೊ ವಸ್ತು, ಹೇಂಡ್-ಬೇಗ್ ..... ಇನಾಮ್ ಜಾವ್ನ್ ದಿತಾಲೊ. ಉಪ್ರಾಂತ್ಲ್ಯಾ ವರ್ಸಾಂನಿ ಹೊಕ್ಲೆಕ್ ಕಾಪಾಡ್, ವೋಚ್, ಸೆಂಟ್, ಕ್ರೀಮ್, ಪಾವ್ಡರ್, 'ಮೇಕ್‌ಅಪ್ ಸೆಟ್' ದೀಂವ್ಕ್ ಸುರು ಕೆಲೆಂ. ಆತಾ'ತಾಂ ಭಾಂಗ್ರಾಳೆ ನಗ್ ದಿತಾತ್.
ಯಾಜಕ್ ಯೇನಾ ತರ್ ಮುದಿ ಪಯ್ಲಿಚ್ ಬೆಂಜಾರ್ ಕರವ್ನ್ ಹಾಡ್ತಾಲೆ. ಲಗಿನ್ ಜಾಂವ್ಕ್ ಆಸ್ಚಿಂ ಹೊಕಲ್ ಆನಿ ನವ್ರೊ ಎಕಾಮೆಕಾ ಬೊಟಾಕ್ ಖರಾರಾಚಿ ಮುದಿ ಅದಲ್ ಬದಲ್ ಕರ್ತಾಲಿಂ. ಖರಾರಾಚಿ ಮುದಿ ಬೊಟಾಕ್ ಶಿರ್ಕಾಯಿಲ್ಲಿ ತಿ ಮರ್ತಾ ಪರ್ಯಾಂತ್ ಕಾಡಿನಾಸ್ಲಿಂ. ಉಪ್ರಾಂತ್ ಹೊ ಮಾನ್ ರೆಸ್ಪೆರಾಚ್ಯಾ ಮುದಿಯೆಕ್ ಮೆಳ್ಳೊ. ರೆಸ್ಪೆರಾಚಿ ಮುದಿ ಚವ್ತ್ಯಾ ಮುದಿಯೆ ಬೊಟಾಕ್ ಘಾಲ್ತಾನಾ ಖರಾರಾಚಿ ಮುದಿ ಉಜ್ವ್ಯಾ ಹಾತಾಚ್ಯಾ ಬೊಟಾಕ್ ಘಾಲಿಲಾಗ್ಲೆ. ನಂತರ್ ತಿ ಪಾಟಿಂ ದಾವ್ಯಾ ಹಾತಾಕ್‌ಚ್ ವಚೊನ್ ತಿಸ್ರ್ಯಾ ಬೊಟಾಕ್ ಬದ್ಲುನ್ ಆಯ್ಲಿ. 'ಹ್ಯೊ ದೊನಿ ಸಾಂಗಾತಾ ಆಸ್ಲ್ಯಾರ್ ಮೊಗಾ ಬಾಂದ್ ಥಿರ್ ಉರ್ತಾ' ಮ್ಹಣ್ ಪಾತ್ಯೆಣಿ! ಥೊಡ್ಯಾಂನಿ ಖರಾರಾಚಿ ಮುದಿ ಉಜ್ವ್ಯಾ ಹಾತಾಚ್ಯಾ ಚವ್ತ್ಯಾ ಬೊಟಾಕ್‌ಚ್ ಉರವ್ನ್ ಘೆಂವ್ಕ್ ಸುರು ಕೆಲಾಂ.
ಖಾಸ್ ಕುಟ್ಮಾಚ್ಯಾಂಕ್ ಖರಾರಾಕ್ ಆಪಂವ್ಕ್ ನಾ ತರ್ ಮರ್ತಾ ಪರ್ಯಾಂತ್ ಶಿಣ್ ದವರ್ತಾಲೆ! ಪೂಣ್ ಆಜ್ ಕಾಲ್ ಥೊಡಿಂ ರೊಸಾ ದಿಸಾಚ್ ಖರಾರ್ ಘಡ್ತಾತ್. ರೆಸ್ಪೆರಾಕ್ ವೆಚ್ಯಾ ದಿಸಾಚ್ ರೋಸ್ ಪುಸ್ತಾತ್! ಥೊಡೆ ಕಡೆನ್ ಖರಾರ್ ಫಕತ್ ಪತ್ರ್ರಾರ್ ದಸ್ಕತ್ ವೊಡುನ್ ಚಲ್ತಾ. ಥೊಡಿಂ ಹೊಲಾಂನಿ ದವರ್ತಾತ್ ತರ್ ಥೊಡಿಂ ಘರಾ ಆಂಗ್ಣಾಂತ್. ಥೊಡ್ಯಾ ಕಾರ್ಯ ನಿರ್ವಾಹಕಾಂನಿ ಹೊಕ್ಲೆಕ್ ನವ್ರ್ಯಾಚ್ಯಾ ಉಜ್ವ್ಯಾ ಕುಶಿಕ್ ರಾವಂವ್ಕ್ ಸುರು ಕೆಲಾಂ ಆನಿ ಮುದಿ ಬದ್ಲಿ ಕೆಲ್ಯಾ ಉಪ್ರಾಂತ್‌ಚ್ ತಿಕಾ ದಾವ್ಯಾಕ್ ಕೂಸ್ ಬದ್ಲಯ್ತಾತ್. ಪುರಾತನ್ ಪಾತ್ಯೆಣೆ ಪ್ರಕಾರ್ ಖರಾರ್ ಚಲ್ತಾನಾ ಘಡ್ಗಡೊ ಆವಾಜ್ಲೊ ತರ್ ತೆಂ ಸರ್ವೆಸ್ವರಾಚೆಂ ಆಶಿರ್ವಾದ್ ಮ್ಹಣ್ ಮಾನ್ತಾಲೆ. ದೆಕುನ್ ಖರಾರಾ ವೆಳಾರ್ ಘಡ್ಗಡ್ಯಾ ಆವಾಜಾಚ್ಯೊ ಗರ್ನಾಳಿ ಫುಟವ್ನ್ ಹೊಕ್ಲೆ-ನವ್ರ್ಯಾಚೆರ್ ದೆವಾಚಿಂ ಬೆಸಾಂವಾಂ ವೊತಯ್ತಾತ್.
ದಸ್ಕತ್ ಕೆಲ್ಲೆಂ ಖರಾರಾಚೆಂ ದಸ್ತಾವೇಜ್ ಹೊಕ್ಲೆನ್ ಆಪ್ಲ್ಯಾ ಫಿರ್ಗಜೆ ವಿಗಾರಾಕ್ ಆನಿ ನವ್ರ್ಯಾನ್ ಆಪ್ಲ್ಯಾ ಫಿರ್ಗಜೆ ವಿಗಾರಾಕ್ ದೀಂವ್ಕ್ ಆಸ್ಲೆಂ. ತಾಂತಾಂಚ್ಯಾ ಫಿರ್ಗಜೆಂತ್ ಯಾಜಕ್ ಕಾಜಾರಾಚಿ ದೊತೊರ್ನ್ ಶಿಕಯ್ತಾಲೊ. ರೆಸ್ಪೆರ್ ಚಡ್ತಾವ್ ಹೊಕ್ಲೆಚ್ಯಾ ಫಿರ್ಗಜೆಂತ್ ಆಸ್ತಾಲೆಂ ದೆಕುನ್ ನವ್ರ್ಯಾನ್ ರೆಸ್ಪೆರಾಕ್ ಯೆತಾನಾ ರೆಸ್ಪೆರ್ ಕರ್ಚ್ಯಾ ಯಾಜಕಾಕ್ ಆಪ್ಲ್ಯಾ ಫಿರ್ಗಜೆ ವಿಗಾರಾ ಥಾವ್ನ್ ಚೀಟ್ ವ್ಹರುನ್ ದೀಜೆ ಆಸ್ಲಿ. ವಿಗಾರ್ ಹಿ ಚೀಟ್ ಬಂದ್ ಲಕೊಟ್ಯಾಂತ್ ಧಾಡುನ್ ದಿತಾ, ತಿ ಹಾಡಿನಾ ತರ್ ರೆಸ್ಪೆರ್ ಕರುಂಕ್ ಯಾಜಕ್ ಆಯ್ಕಾನಾಸ್ಲೆ. ಕ್ರೀಸ್ತಾಂವ್ ಯಾಜಕ್ ಇಗರ್ಜೆಂತ್ ತೀನ್ ಆಯ್ತಾರಾನಿಂ ಚೆಡ್ಯಾ-ಚೆಡ್ವಾಚಿ ಲಗ್ನ್ ಜಾಂವ್ಕ್ ಆಸ್ಚಿ ಖುಶಿ ಪರ್ಗಟ್ ಕರುನ್ ಸಾಂಗ್ತಾಲೊ ಆನಿ "ಕೊಣಾಯ್ಚಿಯ್ ಆಡ್ಕಳ್ ಆಸಾ ತರ್ ಇಗರ್ಜೆಚ್ಯಾ ವ್ಹಡಿಲಾಂಕ್ ಕಳಂವ್ಕ್ ತುಮ್ಕಾಂ ಕಾಯ್ದೊ ಆಸಾ" - ಮ್ಹಣ್ ಆಲ್ತಾರಿರ್ ರಾವುನ್ ಪರ್ಗಟ್ತಾಲೊ. ಆತಾಂಯ್ ಹ್ಯೊ ತೀನ್ ಚಿಟಿ ವಾಚ್ಚಿ ರಿವಾಜ್ ಆಸಾ, ಪೂಣ್ ಥೊಡ್ಯಾ ಸಂದರ್ಭಾಂನಿ ಕಾರಣಾಂ ವರ್ವಿಂ ಫಕತ್ ಏಕ್ ಚೀಟ್ ವಾಚ್ತಾತ್.
ಪುರಾತನ್ ಸಂಪ್ರದಾಯೆಂ ಪ್ರಕಾರ್ ಖರಾರ್ ಜಾಲ್ಯಾ ನಂತರ್ ಲಗ್ನ್ ಜಾತಾ ಪರ್ಯಾಂತ್ 'ರಾಕವ್ಣೆಚೊ ವೇಳ್' ಮ್ಹಣ್ ಆಸ್ತಾಲೊ. ಲಗ್ನ್ ಜಾಯ್ಜೆ ತರ್ 'ಲಾಯ್ಸನ್ಸ್' ಗರ್ಜ್ ಆಸ್‌ಲ್ಲೆಂ. ಖರಾರ್ ಜಾಲ್ಯಾ ಉಪ್ರಾಂತ್ ಚೆಡ್ವಾಕ್ ತಾಚ್ಯಾ ಆವಯ್-ಬಾಪಾಯ್ಚ್ಯಾ ಘರಾ ಅಧಿಕಾರ್ ವಾ ಹಕ್ಕ್ ಆಸಾನಾಸ್‌ಲ್ಲೆಂ. ಆತಾಂ ಖರಾರಾ ನಂತರ್ ದುಸ್ರ್ಯಾಚ್ ದಿಸಾ ಥಾವ್ನ್ ಹೊಕ್ಲೆಕ್ ಘೆವ್ನ್ ನವ್ರೊ ಶಹರಾಂನಿ ಭೊಂವ್ಡಿ ಮಾರ್ತಾ!
ಭಾರತೀಯ್ ಕಾತೊಲಿಕ್ ಭಿಸ್ಪಾ ಮಂಡಳೆನ್ ಲಗ್ನ್ ಜಾತಲ್ಯಾ ಹರ್ ಎಕಾ ಜೊಡ್ಯಾಕ್ 'ಲಗ್ನಾ ಜಿಣಿಯೆಚ್ಯಾ ತಯಾರಾಯೆಚ್ಯಾ' ಶಿಬಿರಾಕ್ ಖಡ್ಡಾಯ್ ಜಾವ್ನ್ ಹಾಜರ್ ಜಾಂವ್ಕ್ ಆದೇಶ್ ದಿಲಾ. ಹೊಕ್ಲೆ-ನವ್ರ್ಯಾನ್ ಸಾಂಗಾತಾ ಶಿಬಿರಾಕ್ ಹಾಜರ್ ಜಾಂವ್ಕ್ ಆಸಾ. ಸುಖಿ ಕಾಜಾರಿ ಜಿವಿತಾ ವಿಶಿಂ ಸಮ್ಜುಂಕ್ ಕಾಜಾರಾಚ್ಯಾ 2 ಮಹಿನ್ಯಾ ಆದಿಂ ತರ್ಬೆತಿ ಜೊಡ್ಲ್ಯಾರ್ ಬರೆಂ.. ಹಿ ತರ್ಬೆತಿ ಸನ್ವಾರಾ ಆನಿ ಆಯ್ತಾರಾ ಆಸ್ತಾ. ಮಂಗ್ಳೂರಾಂತ್ ದಿಯೆಸೆಜಿಚೆಂ 'ಶಾಂತಿ ಕಿರಣ್ ಕುಟ್ಮಾ ಜಿಣ್ಯೆ ಸೆವಾ ಕೇಂದ್ರ್' ತಶೆಂ ಉಡುಪಿ ದಿಯೆಸೆಜಿಂತ್ 'ಜಿವಿತ್ ಕುಟ್ಮಾ ಜಿಣ್ಯೆ ಸೆವಾ ಕೇಂದ್ರ್' ದೋನ್ ದಿಸಾಂಚೆಂ ಶಿಬಿರ್ ಚಲಯ್ತಾ.
--------------------------------------------------
ಕೆನರಾ ಕೊಂಕಣಿ ಕಾಥೊಲಿಕಾಂಚೊ ಲಗ್ನಾ ಸಂಪ್ರದಾಯ್ - ಹಾಕಾ ಸಂಬಂಧ್ ಜಾಲ್ಲಿಂ ಪಯ್ಲ್ಯಾಂಚಿ ಲೇಕನಾಂ :
ಯೆದೊಳ್ಚಿಂ ಲೇಕನಾಂ :
ಕಥಾ/ವಿಡಂಬನಾಂ :
ಕವಿತಾ :
Tags:
Herolpius, Mudi, Mangalorean Wedding, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/18/2021 ಕೆನಡಾಂತ್ 'ನವೊ ಭರ್ವಸೊ' ನವೆಂ ಪದ್...
-
-
2/27/2021 ಹೆರೊಲ್ಪಿಯುಸ್: ಏಕ್ ಅವ್ಚಿತ್ ಭೆಟ್...
-
12/20/2020 ಯುವಜಣಾಂಕ್ ಪ್ರೇರಣ್ - ಜೆಸ್ಸಿಕಾ ಆನ್ನಾ ಲಿಝಾ...
-
12/6/2020 ಆಸ್ತ್ ........
-
11/25/2020 ಭಾರತಾಚಿಂ ಖಬ್ರೆ ಟಿವಿ ಚಾನೆಲಾಂ ಮರಣ್ ಪಾವ್ಲ್ಯ...
-
11/9/2020 ನಾಂವ್ ಬದಲ್ಲ್ಯಾನ್ ಗಾಂವ್ ಬದಲ್ನಾಂ...!...
-
10/17/2020 ಮಂಗ್ಳುರ್‌ಚೊ ಖ್ಯಾತ್ ಗ್ರಾಫೊಲೊಜಿಸ್ಟ್, ಸ್ಟೇ&...
-
-
-
12/18/2021 ಕೆನಡಾಂತ್ 'ನವೊ ಭರ್ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.