From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಸಂಸಾರಾಂತ್ಲೆಂ ಬೋವ್ ಮಾರೆಕಾರ್ ವೀಕ್ 'ಗೊಸಿಪ್ ಮ್ಹಳ್ಳೆಂ ಭಯೋತ್ಪಾದನ್'
Sunday, January 8, 2017
''ಸಕಯ್ಲ್ಯಾ ವಾಡ್ಯಾಚ್ಯಾ ಸಿಂತಿ ವಿಷ್ಯಾಂತ್ ಆಯ್ಕಾಲೆಂಯ್‍ವೇ ತುಂವೆಂ? ಕಾಜಾರ್ ಜಾವ್ನ್ ನವ್ರೊ ಗಲ್ಫಾಕ್ ಗೆಲಾ. ಹಾಚ್ಯಾ ಘರಾಕ್ ತರ್ನಾಟ್ಯಾಂಚಿ ಲಾಯ್ನ್'ಚ್ ಲಾಗ್ಲ್ಯಾ ಖಂಯ್. ಇಶ್ಯಪ್ಪಾ... ಕಸಲಿ ಲಜ್! ಇಲ್ಲಿಶಿ ಮಾನ್ ಮರ್ಯಾದ್ ಪುಣಿ ಆಸಜೆ...''
''ಗುರ್ಕಾರಾಚಿ ಧುವ್ ಶಮ್ಮಿಕ್ ಏಕ್‍ಯಿ ಸಯ್ರಿಕ್ ಲಾಗನಾ. ಸಯ್ರಿಕ್ ಲಾಗ್ಚಿ ತರೀ ಕಶಿ? ಎದೊಳ್‍ಚ್ಚ್ ಗಾಂವ್ಚ್ಯಾ ಸಕ್ಕಡ್ ತರ್ನಾಟ್ಯಾಂಲಾಗಿಂ ಚಂಗಾಯ್ ಚಲ್ತಾ. ತಾಚೆಲಾಗಿಂ ಕೋಣ್ ಕಾಜಾರ್ ಜಾಯ್ತ್?''
''ಆಮ್ಚೊ ನವೊ ವಿಗಾರ್, ಸ್ತ್ರೀಯಾಂಚೊ ಪಾಲಂವ್ ಪಳೆಲ್ಲೆಂಚ್ ಜೀವ್ ಜಾತಾ. ಕಸಲೊ ಪಾದ್ರಿಗೀ?!''
''ವ್ಹಡಿಲಾನ್ ತಾಚ್ಯೆವಿಶಿಂ ಕ್ರಮ್ ಘೆಂವ್ಚೆಂ ತರೀ ಕಶೆಂ? ಮಹಿನ್ಯಾ ಮಹಿನ್ಯಾಕ್ ತಾಚ್ಯೆ ಥಾವ್ನ್ ವ್ಹಡಿಲಾಕ್ ಥಯ್ಲಿ ಪಾವಿತ್ ಜಾತಾ ಖಂಯ್!''
''ತಾಕಾ ಭುರ್ಗಿಂ ಜಾಂವ್ಚಿಂ ಮ್ಹಳ್ಯಾರ್'ಯೀ ಕಶೆಂ? ಕಾಜಾರಾ ಆದಿಂ ಕಸಲಿಂ ಪೂರಾ ಖೆಸ್ತಾಂವಾಂ ಆಧಾರ್ಲ್ಯಾಂತ್ ಕೊಣ್ಣಾ?''
ಹ್ಯೊ ಥೊಡ್ಯೊ ವಿಕಾಚ್ಯೊ ಗುಳಿಯೊ, ಮನ್ಶ್ಯಾಕ್ ವಳ್ವಳಾವ್ನ್ ಲಗಾಡ್ ಕಾಡ್ಚಿ ಸಕತ್ ಆಸ್ಚ್ಯೊ ಹೆಂ ವೀಕ್ ವಾಂಟ್ಚೆಂ ಸಾಧನ್ ಮನ್ಶ್ಯಾಚಿ ಜೀಬ್ ಆನಿ ಹ್ಯಾ ವಿಕಾಚೆಂ ಮೂಳ್ ಮನ್ಶ್ಯಾಚೆಂ ಮನ್ ಆನಿ ಕಾಳಿಜ್. ಕೋಣ್‍ಯಿ ಹಾಂತುಂ ಥಾವ್ನ್ ಮುಕ್ತ್ ಜಾಲ್ಲೊ ನಾ. ಧಾರ್ಮಿಕ್ ತಶೆಂ ಲಾಯಿಕ್, ದಾದ್ಲೊ ಆನಿ ಸ್ತ್ರೀ, ಗ್ರೇಸ್ತ್ ಆನಿ ದುಬ್ಳೊ, ಶಿಕ್ಪಿ ಆನಿ ಅಶಿಕ್ಪಿ ಹರ್ಯೆಕ್ಲೊ ಕೆದಾಳಾ ನ್ಹಯ್ ತರ್ ಕೆದಾಳಾ ವೀಕ್ ವಾಂಟ್ಚ್ಯಾಂತ್ ಭಾಗಿದಾರ್ ಜಾಲಾ ಆನಿ ಹೆರಾಂನಿ ವಾಂಟ್‍ಲ್ಲ್ಯಾ ವಿಕಾಕ್ ಬಲಿ ಜಾಲಾ.
'ಖಬ್ರೊ ಕರ್ಚೆಂ' ವಾ ಸರ್ವಾಂಕ್ ಸಮ್ಜೊಂಚೆಂ ಇಂಗ್ಲೀಷ್ ಉತಾರ್ 'ಗೊಸಿಪ್' ಕರ್ಚೆಂ ಬೋವ್ಶಾ ಹ್ಯಾ ಸಂಸಾರಾಂತ್ಲೆಂ ಬೋವ್ ಮಾರೆಕಾರ್ ವೀಕ್. ಸಾದೆಂ ವೀಕ್ ಮನ್ಶ್ಯಾಕ್ ದೈಹಿಕ್ ರಿತಿರ್ ನಾಸ್ ಕರ್ತಾ ತರ್, ಹೆಂ ವೀಕ್ ಮನ್ಶ್ಯಾಚೆಂ ವ್ಯಕ್ತಿತ್ವ್, ಚರಿತ್ರಾ, ಆನಿ ತಾಚ್ಯೆಸಂವೆಂ ತಾಚೆಂ ಅಸ್ತಿತ್ವ್'ಚ್ ನಾಸ್ ಕರುಂಕ್ ಸಕ್ತಾ.
'ಗೊಸಿಪ್' ಮನ್ಶ್ಯಾಕ್ ಕಠೀಣ್ ವಾಯ್ಟ್ ಕರ್ತಾ:
ಎಕಾ ಶಿಕೊಣ್‍ದಾರಾನ್ ಆಪ್ಲ್ಯಾ ಆಯ್ಕೊವ್ಪ್ಯಾಂ ಹುಜಿರ್ ಏಕ್ ವಾತ್ ಧರ್ಲಿ. ದುಸ್ರ್ಯಾ ಹಾತಾನ್ ಬೊಲ್ಸಾಂತ್ಲಿಂ ಕಾಡಿಯಾಂ ಪೇಟ್ ಕಾಡ್ನ್, ಏಕ್ ಕಾಡಿ ಪೆಟವ್ನ್ ತಿ ವಾತ್ ಜಳಯ್ಲಿ. ಲೋಕ್ ಥಂಡ್ ಆಸ್ಲೊ. ಶಿಕೊಣ್‍ದಾರಾನ್ ಪರತ್ ಬೊಲ್ಸಾಕ್ ಹಾತ್ ಘಾಲ್ನ್ ದೋನ್ ಹಜಾರ್ ರುಪ್ಯಾಂಚೊ ನೋಟ್ ಭಾಯ್ರ್ ಕಾಡ್ನ್ ''ಹಾಂವ್ ಆತಾಂ ಹೊ ನೋಟ್ ಪೆಟವ್ನ್, ತಾಂತುಂ ಹಿ ವಾತ್ ಜಳಯ್ತಾಂ'' ಮ್ಹಣಾಲೊ. ಲೊಕಾನ್ ಪ್ರತಿಭಟನ್ ದಾಕಯ್ಲೆಂ. ''ಹಾಚಿ ತಕ್ಲಿ ಫಿರ್ವಲ್ಯಾ ಜಾಯ್ಜೆ'' ಮ್ಹಣಾಲೊ. ''ಮ್ಹಜಿ ತಕ್ಲಿ ಫಿರ್ವಲ್ಯಾ ಮ್ಹಣ್ತಾತ್? ಮ್ಹಾಕಾ ದೋನ್ ಹಜಾರ್ ರುಪ್ಯಾಂಚೆಂ ಮೋಲ್ ಕಳಿತ್ ನಾ ಮ್ಹಣ್ತಾತ್?'' ತಾಣೆ ಸವಾಲ್ ಕೆಲೆಂ. ''ತರ್ ಹೆಂ ಆಯ್ಕಾ: ಹಾಂವ್ ಆನಿ ಪೀಟರ್ ಜೆವ್ಣಾವೆಳಾರ್ ಸಾಂಗಾತಾ ಮೆಳೊನ್ ಉಲಯ್ಲ್ಯಾಂವ್ ಮ್ಹಣ್ ಚಿಂತ್ಯಾಂ. ಆಮಿ ದೊಗಾಂನಿ ಮೆಳೊನ್ ಪಾವ್ಲುವಿಶಿಂ ವಾಯ್ಟ್ ಉಲಯ್ಲ್ಯಾಂವ್, ಖಬ್ರೊ ಉಲಯ್ಲ್ಯಾಂವ್. ಪಾವ್ಲುಚೆಂ ಬರೆಂ ನಾಂವ್ ಆನಿ ಚರಿತ್ರಾ ನಾಸ್ ಕೆಲ್ಲೆಂ ಆಮ್ಚೆಂ ಕೃತ್ಯೆಂ ದೋನ್ ಹಜಾರ್ ರುಪಯ್ ಜಳಯಿಲ್ಲ್ಯಾಚ್ಯಾಕೀ ವಾಯ್ಟ್ ನ್ಹಯ್? ಪಾವ್ಲುಚೆಂ ಬರೆಂ ನಾಂವ್ ಹಜಾರಾಂಚ್ಯಾ ಹಜಾರ್ ರುಪ್ಯಾಂಚ್ಯಾಕೀ ಚಡಿತ್ ಮೊಲಾಧಿಕ್...'' ತರ್ ಪೆಲ್ಯಾವಿಶಿಂ ಆಮಿ ಕಿತ್ಯಾಕ್ ಖಬ್ರೊ ಕರ್ತಾಂವ್?
ಪೆಲ್ಯಾಚೆಂ ಬರೆಂ ನಾಂವ್ ದಿರ್ವ್ಯಾಚ್ಯಾಕೀ ಚಡಿತ್ ಮೊಲಾಧಿಕ್ ಆನಿ ಸಾಂಭಾಳ್ನ್ ದವರ್ಚೆ ತಸಲೆಂ.
'ಗೊಸಿಪಾ'ಚೊ ವಿಕಾಳ್ ಪ್ರಭಾವ್ ವಾಡೊನ್‍ಚ್ಚ್ ವೆತಾ:
ಖಬ್ರಾಳೊ ವೆಕ್ತಿ ಖಬ್ರೊ ವಾಡವ್ನ್'ಚ್ಚ್ ವೆತಾ ಆನಿ ತಾಚ್ಯೆ ಆಯ್ಕೊವ್ಪಿ ತಿ ಖಬರ್ ವಿಸ್ತಾರಾಂವ್ಚಿಂ ಸಾಧನಾಂ ಜಾತಾತ್. ಹಿ ವಾಡಾವಳ್ ಎಕ್ ಥಾವ್ನ್ ದೋನ್, ದೋನ್ ಥಾವ್ನ್ ಚಾರ್, ಚಾರ್ ಥಾವ್ನ್ ಆಟ್, ಆಟ್ ಥಾವ್ನ್ ಸೊಳಾ... ಹ್ಯಾ ಪ್ರಮಾಣಾರ್ ವಾಡೊನ್ ಉಜ್ಯಾಬರಿಂ ವಿಸ್ತಾರ್ತಾ. ಖಬ್ರೊ ಆಯ್ಕಾಲ್ಲೊ ಹರ್ಯೆಕ್ಲೊ, ತೆ ಖಬ್ರೆಕ್ ಪಾಕಾಂ-ಪಾಕಾಟೆ ಮೆಳವ್ನ್ ಚಡಿತ್ 'ರೊಸಾಳ್' ಕರ್ನ್ ವಾಂಟ್ತಾ. ಖಬ್ರೊ ಆಯ್ಕಂಕ್ ಆಸಕ್ತ್ ದಾಕಂವ್ಚೊ, ತ್ಯೊ ಪ್ರಸಾರ್ ಕರುಂಕ್‍ಯೀ ಉತ್ಸುಕ್ ಆಸ್ತಾ. ಅಶೆಂ, ಚಿಂತುಂಕ್ ಜಾಯ್ನಾ ತಸಲ್ಯಾ ಪ್ರಂಆಣಾರ್ ಖಬ್ರೊ ವಿಸ್ತಾರ್ತಾತ್.
'ಗೊಸಿಪಾ'ನ್ ಕೆಲ್ಲೆಂ ವಾಯ್ಟ್ ಪುಸುನ್ ಕಾಡುಂಕ್ ಅಸಾಧ್ಯ್ :
ಎಕಾ ಶಿಕೊಣ್‍ದಾರಾನ್ ಗೊಸಿಪಾಚ್ಯಾ ವಾಯ್ಟಾವಿಶಿಂ ಅಶೆಂ ಶಿಕವ್ಣ್ ದಿಲಿ - 'ತುಮಿಂ ಎಕೆ ಕೊಂಬ್ಯೆಚಿಂ ಪಾಕಾಂ ಎಕೆಕ್‍ಚ್ ಬುಡ್ಡುನ್ ವಾಟೆರ್ ಘಾಲಿತ್ತ್ ಏಕ್ ಕಿಲೋಮೀಟರ್ ಚಲಾ. ಉಪ್ರಾಂತ್ ಎಕೆಕ್‍ಚ್ಚ್ ಪಾಕ್ ವಿಂಚಿತ್ತ್ ಪಾಟಿಂ ಚಲುನ್ ಯೆಯಾ. ಬುಡ್ಡಿಲ್ಲ್ಯಾ ಪಾಕಾಂಪಯ್ಕಿ ಕಿತ್ಲಿಂ ಪಾಕಾಂ ವಿಂಚುಂಕ್ ತುಮಿ ಸಕ್ತೆಲ್ಯಾತ್? ಸಬಾರ್ ಪಾಕಾಂ ಹೆಣೆ ತೆಣೆ ಶಿಂಪಡ್ನ್ ಹಾತಾಕ್ ಮೆಳ್ಚಿಂನಾಂತ್. ಹೆರ್ ಪಾಕಾಂ ವಾರೆಂ ಯೇವ್ನ್ ಪಯ್ಸ್ ಉಬೊನ್ ವಚುನ್ ತುಮ್ಚೆ ದಿಷ್ಟಿಭಾಯ್ರ್ ಜಾವ್ನ್ ಆಸ್ತೆಲಿಂ. ಹೆರಾಂವಿಶಿಂ ಕೆಲ್ಲ್ಯೊ ಖಬ್ರೊ ಆನಿ ತಾಂಚೆನಿಮ್ತಿಂ ಜಾಲ್ಲೆಂ ವಾಯ್ಟ್ ಪುಸುನ್ ಕಾಡುಂಕ್ ಅಸಾಧ್ಯ್. ಪೆಟಯಿಲ್ಲೊ ಉಜೊ ಪಾಲ್ವಂವ್ಕ್ ಜಾಯ್ನಾ.'
'ಗೊಸಿಪ್' ಕೆಲ್ಲೊಚ್ ವೆಕ್ತಿ ಮಾನ್ ಹೊಗ್ಡಾಯ್ತಾ :
ಕೊಣಾವಿಶ್ಯಾಂತ್ ಖಬ್ರೊ ಕೆಲ್ಯಾತ್, ತೊ ವ್ಯಕ್ತಿ ಮಾತ್ರ್ ನ್ಹಯ್, ಖಬ್ರೊ ಕೆಲ್ಲೊ ವೆಕ್ತಿಯಿ ಆಪ್ಲೊ ಗೌರವ್ ಹೊಗ್ಡಾಯ್ತಾ. ಖಬ್ರೊ ಕರ್ಚೊ ವೆಕ್ತಿ 'ವಿಕಾಳ್ ಜಿಬೆಚೊ ಮನಿಸ್' ಮ್ಹಣ್ ತಾಚ್ಯೆ ಆಯ್ಕೊವ್ಪಿ ತಕ್ಷಣ್ ಸಮ್ಜಾತೆಲೆ. ಹ್ಯಾ ಕಾರಣಾಂನಿಮ್ತಿಂ ಖಬ್ರಾಳ್ಯಾ ವೆಕ್ತಿಂಕ್ ಥೊಡೆ ಆಯ್ಕಾತಾತ್ ತರೀ, ಹಕೀಕತೆಂತ್ ತಾಂಕಾಂ ಈಷ್ಟ್'ಚ್ಚ್ ಆಸಾನಾಂತ್. ತಾಂಕಾಂ ಕೊಣ್‍ಚ್ಚ್ ಪಾತ್ಯೆನಾಂತ್. ತೆ ಎಕ್ಸುರೆ ಕುದ್ರೆ ಜಾವ್ನಾಸ್ತಾತ್. ಹರ್ಯೆಕ್ಲೊ ವಿಶ್ವಾಸಿ ಮಿತ್ರಾಂಚ್ಯೆ ಸೊಧ್ನೆರ್ ಆಸ್ತಾ. ಆಪ್ಣಾಚೆಂ ನಾಂವ್ ಪಾಡ್ ಕರ್ಚ್ಯಾ ಖಬ್ರಾಳ್ಯಾ ಆನಿ ವಿಕಾಳ್ ಜಿಬೆಚ್ಯಾ ವ್ಯಕ್ತಿಂಕ್ ನ್ಹಯ್!
'ಖಬ್ರಾಳ್ಯಾ' ವ್ಯಕ್ತಿಚಿ ಮತ್ ವಿಕಾಳ್ ಆನಿ ಅಸ್ವಸ್ಥ್ ಜಾತಾ :
ಖಂಚಿಯಿ ವಾಯ್ಟ್ ಸಂವಯ್ ಪಯ್ಲ್ಯಾನ್ ಪಯ್ಲೆಂ ತಿ ಸವಯ್ ಆಸ್‍ಲ್ಲೆ ವೆಕ್ತಿಕ್‍ಚ್ಚ್ ಬಾಧಕ್ ಕರ್ತಾ. ಜಶೆಂ ಅಮಾಲ್ ಆನಿ ಮಾದಕ್ ವಕ್ತಾಂ ಸೇವನ್, ರಾಗ್, ಮೊಸೊರ್ ಆನಿ ಹಗೆಂ, ಖಬ್ರಾಳ್ಯಾ ವ್ಯಕ್ತಿಚೆಂ ಮನ್ ರುಣಾತ್ಮಕ್ ಚಿಂತ್ನಾಂನಿ ಭರೊನ್, ಬರೆಂಪಣ್ ತಾಕಾ ದಿಸನಾ. 'ಗೊಸಿಪ್' ತಾಚ್ಯೆ ಮತಿಕ್ ರುಚಿಚೆಂ ಖಾಣ್ ಜಾತಾ. ಅಶೆಂ, ಜಾತಾನಾ, ಮೋಗ್ ಆನಿ ಬರೆಂ ಉಲೊಣೆಂ ತಾಚ್ಯೆಥಾವ್ನ್ ಪಯ್ಸ್ ವೆತಾತ್.
ಮನಿಸ್ ಕಿತ್ಯಾಕ್ ಖಬ್ರಾಳೊ ಜಾತಾ?
1. ಹೆರಾಂ ಥಂಯ್ ಗೌರವ್ ನಾಸ್ತಾಂ : ಸ್ವಾರ್ಥ್ ಮೊಗಾಚ್ಯಾಕೀ ಸಲೀಸಾಯೆನ್ ಮನ್ಶ್ಯಾಂಕ್ ಯೆತಾ. ಹೆರಾಂಚಿ ದೂಕ್ ತಾಕಾ ಭೊಗನಾ. ಆಪ್ಣಾಚ್ಯೆ ಬರೆಂ ಚಿಂತ್ತಾನಾ, ಹೆರಾಂಚೆಂ ಬರೆಂ ನಾಂವ್ ಸಾಂಬಾಳಿಜೆ ಮ್ಹಳ್ಳೆಂ ಚಿಂತಾಪ್ ಮನ್ಶ್ಯಾಕ್ ಯೇನಾ. ಸಮಡ್ತಿಚ್ಯಾ ವರ್ತುಲಾಂತ್‍ಚ್ಚ್ ರುಲಿ-ರೆಗ್ರೊ ವಿಶ್ವಾಸ್ಪಣಾನ್ ಪಾಳಿಜೆ ಮ್ಹಣ್ ಚಿಂತ್ಚೆ ತಿತ್ಲೆಂ, ಹೆರಾಂಚೆಂ ಬರೆಂ ನಾಂವ್ ಸಾಂಬಾಳಿಜೆ ಮ್ಹಳ್ಳೆಂ ಚಿಂತಾಪ್ ಯೇನಾ.
2. ಹೆರಾಂ ಥಾವ್ನ್ ಶಿಕ್‍ಲ್ಲಿ ವಾಯ್ಟ್ ಸವಯ್ : ಮನಿಸ್ ಹೆರಾಂ ಥಾವ್ನ್ ಬೊರ್ಯಾ ಸವಯಾಂಚ್ಯಾಕೀ ವಾಯ್ಟ್ ಸವಯೊ ಸಲೀಸಾಯೆನ್ ಶಿಕ್ತಾ. ಹೆರಾಂ ವಿಶ್ಯಾಂತ್ ಬರೆಂ ಉಲಂವ್ಚ್ಯಾಕೀ ಚಡ್ ಸಲೀಸಾಯೆನ್ ವಾಯ್ಟ್ ಉಲಂವ್ಕ್ ಹೆರಾಂ ಥಾವ್ನ್ ತೊ ಶಿಕ್ತಾ. ಎಕ್ಲ್ಯಾಚ್ಯಾ ಘರಾಂತ್, ಸಾಂದ್ಯಾಂಥಂಯ್ ಖಬ್ರೊ ಉಲಂವ್ಚಿ ವಾಯ್ಟ್ ಸವಯ್ ಆಸಾ ತರ್, ಹೆರ್'ಯಿ ಸಲೀಸಾಯೆನ್ ತಿ ಶಿಕ್ತಾತ್. ಹಿ ಶಿಂಕಳ್ ತುಟಂವ್ಕ್ ಧಯ್ರ್ ಆನಿ ಸಮ್ಹಣಿ ಗರ್ಜ್ ಆಸಾ.
3. ಬೊರ್ಯಾ ಸವಯಾಂಚೊ ಅಭಾವ್ : 'ಆಳ್ಶ್ಯಾಂಚಿ ಮತ್ ದೆಂವ್ಚಾರಾಚೆಂ ಠಾಣೆಂ' ಮ್ಹಳ್ಳೆಬರಿ, ಕಸಲ್ಯಾಯ್ ವಾವ್ರಾಕ್ ಹಾತ್ ಲಾಯ್ನಾಸ್ತಾಂ ಆಳ್ಸಾಯೆನ್ ದೀಸ್ ಸಾರ್ಚ್ಯಾಂಕ್ 'ಗೊಸಿಪಾ'ಚೊ ದೆಂವ್ಚಾರ್ ಬೋವ್ ಲಾಗಿಂ. ಕೊಣಾವಿಶ್ಯಾಂತ್ ಕಿತೆಂ ಚಿಂತ್ಚೆಂ ಆನಿ ಕಿತೆಂ ಉಲಂವ್ಚೆಂ ಮ್ಹಳ್ಳೆಂ ತಾಂಚ್ಯೆ ತಕ್ಲೆಂತ್ ಘುಂವೊನ್ ಆಸ್ತಾ. ಬದ್ಲಾಕ್, ನವ್ಯೊ ಸಂಗ್ತಿಂ ಶಿಕೊಂಕ್ ಆಸಕ್ತ್, ಬರ್ಯೊ ಸಂವಯೊ, ಹವ್ಯಾಸ್ ಆಸ್ಲ್ಯಾರ್, ಮತ್ ರಿತಿ ದವ್ರುಂಕ್ ವೇಳ್ ಆಸಾನಾ.
'ಲ್ಹಾನ್ ಮನಿಸ್ ಲೊಕಾವಿಶ್ಯಾಂತ್ ಉಲಯ್ತಾತ್, ಸಾಧಾರಣ್ ಮನಿಸ್ ಘಡಿತಾಂ ವಿಶ್ಯಾಂತ್ ಉಲಯ್ತಾತ್, ಮಹಾನ್ ಮನಿಸ್ ಸಂಗ್ತಿಂ ವಿಶ್ಯಾಂತ್ ಉಲಯ್ತಾತ್' ಮ್ಹಳ್ಳಿ ಸಾಂಗ್ಣಿ ಬೋವ್ ಖರಿ. ಮನ್ಶ್ಯಾಚೆಂ ಮನ್ ಆನಿ ಕಾಳಿಜ್ ವಿಸ್ತಾರ್ ತರ್, ಭಂವ್ತಣಿ ದಿಸ್ಪಡ್ತೆಂ ಭುಕೆನ್ ಆನಿ ಪಿಡೆನ್ ಮೊರ್ಚ್ಯಾ ಮನ್ಶ್ಯಾವಿಶ್ಯಾಂತ್ ತೊ ಚಿಂತಾ. ಸಾಧಾರ್ಣ್ ಚಿಂತ್ಪಾಚೊ ತರ್, ಕ್ರಿಕೆಟ್, ಸಿನೇಮಾ ವಾ ಹವ್ಯಾ ವಿಶ್ಯಾಂತ್ ಚಿಂತಾ. ಲ್ಹಾನ್ ಚಿಂತ್ಪಾಚೊ ತರ್, ಹೆರ್ ಕಿತೆಂ ಕರ್ತಾತ್, ಕೋಣ್ ಖಂಯ್ ವೆತಾತ್, ಕೊಣೆ ಕಿತೆಂ ಮೊಲಾಯ್ಲಾಂ... ಇತ್ಯಾದಿ ಕಿರ್ಕೊಳ್ ಸಂಗ್ತಿಂ ವಿಶ್ಯಾಂತ್‍ಚ್ಚ್ ಸದಾಂ ಚಿಂತಾತ್.
4. ಆಪ್ಣಾಚ್ಯೊ ಚುಕಿ ಲಿಪೊನ್ ದವ್ರುಂಕ್ ಪ್ರೇತನ್ : ಕೊಣಾಥಂಯ್ ಹೆರಾಂ ಥಾವ್ನ್ ಲಿಪಂವ್ಕ್ ಜಾಯ್ತಿಂ ಪಾತ್ಕಾಂ ಆಸಾತ್, ತೆ ಸದಾಂ ಹೆರಾಂ ಕುಶಿನ್ ಬೋಟ್ ಜೊಕುನ್‍ಚ್ಚ್ ಆಸ್ತಾತ್. ಮಾತ್ರ್ ನ್ಹಯ್, ತಾಂಚೆವಿಷ್ಯಾಂತ್ ಖಬ್ರೊ ಕರ್ತಾತ್. ಏಕ್ ಮನಿಸ್ ಹೆರಾಂ ವಿಷ್ಯಾಂತ್ ಉಲಂವ್ಚಿ ರೀತ್ ಪಳೆವ್ನ್ ತ್ಯೆ ವೆಕ್ತಿಚೊ ಗೂಣ್ ಪಾರ್ಕಿಯೆತ್.
ರುಣಾತ್ಮಕ್ ಉಲವ್ಣೆಂ ಗರ್ಜ್ ಆಸಾ
'ಠೀಕಾ ಕರ್ಚೆಂ ಹಕ್ಕ್ ಆಸ್ಚೆಂ, ಕೊಣಾಲಾಗಿಂ ಮೋಗ್ ಕರ್ಚೆಂ ಕಾಳಿಜ್ ಆಸಾ ತಾಕಾ ಮಾತ್ರ್' ಮ್ಹಣ್ತಾಲೊ ಅಬ್ರಾಹಾಮ್ ಲಿಂಕನ್. ಹೆರಾಂ ವಿಶ್ಯಾಂತ್ ಉಲಂವ್ಚೆಂ ತಾಂಚ್ಯಾ ಬರೆಂಪಣಾಖಾತಿರ್ ಜಾಲ್ಯಾರ್, ತ್ಯಾ ಉಲೊವ್ಣ್ಯಾಂತ್ ಕಾಂಯ್ಚ್ ಬಾಧಕ್ ನಾ. ಹೆಂ ಉಲವ್ಣೆಂ ಹೆ ಪರಿಂ ವಾಪರ್ಯೆತ್ :
1. ಆಮ್ಚೆ ತಾಬೆನ್ ಆಸ್‍ಲ್ಲ್ಯಾಂಕ್ ತಿದ್ವುಂಕ್ : ಆವಯ್ - ಬಾಪಂಯ್ನಿ ಆಪ್ಲ್ಯಾ ಭುರ್ಗ್ಯಾಂಚ್ಯೆ ಭಲಾಯ್ಕೆಭರಿತ್ ವಾಡಾವಳಿ ದಿಶೆನ್ ತಾಂಕಾಂ ತಿದ್ವುಂಚಿ ಗರ್ಜ್ ಆಸಾ. ತಿಂ ಭುರ್ಗ್ಯಾಂಚಿ ಠೀಕಾ ಕರಿನಾಸ್ತಾಂ, ತಾಂಕಾಂ ತಿದ್ವಿನಾಸ್ತಾಂ ರಾವ್ತಿತ್ ತರ್, ಆಪ್ಲೆ ಜವಾಬ್ದಾರೆಂತ್ ಚುಕೊನ್ ಪಡ್ತಾತ್. ಆವಯ್ - ಬಾಪಾಯ್ನ್, ವ್ಹಡಿಲಾಂನಿ ಭುರ್ಗ್ಯಾಂಚ್ಯಾ ಬರೆಂಪಣಾಖಾತಿರ್ ತಾಂಚ್ಯಾ ಚುಕಿಂ ವಿಷ್ಯಾಂತ್ ಉಲಂವ್ಚೆಂ 'ಗೊಸಿಪ್' ನ್ಹಯ್.
2. ಘಡೊನ್ ಆಸ್ಚ್ಯೊ ಚುಕಿ ಫಾವೊ ತ್ಯಾ ಅಧಿಕಾರಿಂಕ್ ಕಳಂವ್ಕ್ : ಸಮಾಜಿಂತ್ ವಾಯ್ಟ್ (ಹಿಂಸಾ, ಚೊರಿ, ಮೋಸ್... ಇತ್ಯಾದಿ) ಘಡ್ತಾನಾ, ತೆಂ ಫಾವೊ ತ್ಯಾ ಅಧಿಕಾರಿಂಕ್ ಕಳಂವ್ಚೆಂ ಹರ್ಯೆಕಾ ನಾಗರಿಕಾಚಿ ಜವಾಬ್ದಾರಿ. ಭುರ್ಗ್ಯಾಂಕ್ ಇಸ್ಕೊಲಾಂತ್ ವಾ ಭಾಯ್ರ್ ಶೋಷಣ್ ಲಾಬ್ತಾ ತರ್, ಕ್ರಮ್ ಘೆಂವ್ಕ್ ಸಂಬಂಧಿತ್ ವ್ಯಕ್ತಿಂ ವಿರೋಧ್ ಫಾವೊತ್ಯಾ ಅಧಿಕಾರಿಂಕ್ ದೂರ್ ದಿಂವ್ಚೆಂ 'ಗೊಸಿಪ್' ನ್ಹಯ್.
3. ಸಾರ್ವ್‍ಜಣಿಕ್ ವ್ಯಕ್ತಿಂಕ್ ನಿಯಂತ್ರಣಾರ್ ದವ್ರುಂಕ್ : ರಾಜ್‍ಕಾರಣಿ, ಸರ್ಕಾರಿ ಅಧಿಕಾರಿ ಆನಿ ಹೆರ್ ನಾಗರಿಕ್ ಸೆವೆಚಿ ಜವಾಬ್ದಾರಿ ಆಸ್‍ಲ್ಲೆ ಮನಿಸ್ ಆಪ್ಲೆ ಜವಾಬ್ದಾರೆಂತ್ ಚುಕೊನ್ ಪಡ್ತಾನಾ, ತಾಂಚ್ಯೆ ವಿರೋಧ್ ಠೀಕಾ ಕರ್ನ್ ಉಂಚ್ಲ್ಯಾ ಅಧಿಕಾರಿಂಕ್ ದೂರ್ ದಿಂವ್ಚಿ ಗರ್ಜ್ ಆಸಾ. ಗರ್ಜ್ ಪಡ್ಲ್ಯಾರ್ ತಸಲ್ಯಾಂಚ್ಯಾ ವಾಯ್ಟ್ ಕೃತ್ಯಾಂ ವಿರೋಧ್ ಮಾಧ್ಯಮಾಂನಿ ಪರ್ಗಟ್ ಕರ್ಚಿ ಗರ್ಜ್ ಪಡ್ತಾ. ಅಶೆಂ ಕರ್ಚೆಂ ಪರ್ಜೆರಾಜಾಕ್ ಬೋವ್ ಫಳಾದಾಯೆಕ್. ಹೆಂ 'ಗೊಸಿಪ್' ನ್ಹಯ್.
ಖಬ್ರೊ ಕರ್ಚ್ಯಾ ವಾಯ್ಟಾಥಾವ್ನ್ ಸುಟ್ಕಾ ಜೊಡುಂಕ್ ಪ್ರೇತನ್ ಗರ್ಜೆಚೆಂ. ಹೆರಾಂ ವಿಶ್ಯಾಂತ್ ವಾಯ್ಟ್ ಉಲಯ್ತಾನಾ, ಆಪುಣ್ ಕಿತೆಂ ಕರ್ನ್ ಆಸಾ ಮ್ಹಳ್ಳೆಂ ಚಿಂತಾಪ್ ಮತಿಕ್ ಯೇಜೆ. ತ್ಯೆ ವರ್ವಿಂ ಜಾಂವ್ಚೊ ನಷ್ಟ್ ಸಮ್ಜಜೆ. ಹೆರಾಂಥಂಯ್ ಏಕ್ ಅವ್ಗುಣ್ ಆಸಾ ತರ್, ನೊವೊದ್ ಆನಿ ನೋವ್ ಬರೆ ಗೂಣ್ ಆಸಾತ್ ಮ್ಹಳ್ಳೆಂ ಸಮ್ಜುನ್, ಬರ್ಯಾ ಸಂಗ್ತಿಂ ಕುಶಿನ್ ಗುಮಾನ್ ವ್ಹರ್ನ್, ತ್ಯಾ ಸಂಗ್ತಿಂಖಾತಿರ್ ಪೆಲ್ಯಾಕ್ ಶಾಭಾಸ್ಕಿ ದೀಜೆ. ಆಮಿ ಹೆರಾಂಚಿ ಠೀಕಾ ಕರ್ನ್ ಖಬ್ರೊ ಕೆಲ್ಲೆ ಬರಿಂ, ಹೆರಾಂನಿ ಆಮ್ಚೆ ವಿಶ್ಯಾಂತ್ ಖಬ್ರೊ ಕೆಲ್ಯಾರ್ ಆಮ್ಕಾಂ ಕಿತೆಂ ಭೊಗತ್? ಗೊಸಿಪಾವಿಶ್ಯಾಂತ್ ಪಾಪಾ ಫ್ರಾನ್ಸಿಸಾಚಿಂ ಉತ್ರಾಂ ಬೋವ್ ಕಠೀಣ್ ಆಸಾತ್ : ''ಗೊಸಿಪ್ ಎಕೆ ರಿತಿಚೆಂ ಭಯೋತ್ಪಾದನ್ ಜಾವ್ನಾಸಾ, ಜೆಂ ಉತ್ರಾಂದ್ವಾರಿಂ ಕರ್ಚೆಂ ಭಯೋತ್ಪಾದನ್. ಖಬ್ರೊ ಕರ್ಚೊ ವೆಕ್ತಿ ಏಕ್ ಮಾರೆಕಾರ್ ಬೊಂಬ್ ಲೊಕಾಮಧೆಂ ಉಡವ್ನ್, ಆಪ್ಣಾನ್ ಪೊಳಾಫಳ್ ಘೆಂವ್ಚೆ ವೆಕ್ತಿ ಸಾರ್ಕೊ...''
ಕುರ್ಪಾ: ಉಜ್ವಾಡ್ ಪಂದ್ರಾಳೆ ಆನಿ ವಿವಿಧ್ ಆಧಾರಾನ್
Tags:
Gossip, Gossiping, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
2/27/2021 ಹೆರೊಲ್ಪಿಯುಸ್: ಏಕ್ ಅವ್ಚಿತ್ ಭೆಟ್...
-
12/20/2020 ಯುವಜಣಾಂಕ್ ಪ್ರೇರಣ್ - ಜೆಸ್ಸಿಕಾ ಆನ್ನಾ ಲಿಝಾ...
-
12/6/2020 ಆಸ್ತ್ ........
-
11/25/2020 ಭಾರತಾಚಿಂ ಖಬ್ರೆ ಟಿವಿ ಚಾನೆಲಾಂ ಮರಣ್ ಪಾವ್ಲ್ಯ...
-
11/9/2020 ನಾಂವ್ ಬದಲ್ಲ್ಯಾನ್ ಗಾಂವ್ ಬದಲ್ನಾಂ...!...
-
10/17/2020 ಮಂಗ್ಳುರ್‌ಚೊ ಖ್ಯಾತ್ ಗ್ರಾಫೊಲೊಜಿಸ್ಟ್, ಸ್ಟೇ&...
-
-
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.