web analytics

From around the world

ಪ್ರವೀಣ್ ತಾವ್ರೊ, ಕುಲ್ಶೇಕರ್
             
+971 50 7554105
ತುಮ್ಚ್ಯಾ ಗಮನಾಕ್:
Best be viewed in 1366 X 768 screen resolution and in Google Chrome

ಉಣಿ ಜಾಂವ್ಚಿಂ ಚೆಡ್ವಾಂ ಭುರ್ಗಿಂ...!!!

Sunday, June 11, 2017  /  By Admin

ಬರಯ್ಣಾರಾ ವಿಶಿಂ ಜಾಣಾ ಜಾ...

80.5
User Rating

ಲೇಕನಾಚೊ ಸಾರಾಂಶ್: 

ಆಮ್ಚ್ಯಾ ದೇಶಾಂತ್, ರಾಜ್ಯಾಂತ್ ಆನಿ ಜಿಲ್ಲ್ಯಾಂತ್ ಚೆಡ್ವಾಂ ಭುರ್ಗಿಂ ಉಣಿ ಜಾವ್ನ್ ಅಸಾತ್. ಉಡ್ಪಿಂತ್ 2001 ಇಸ್ವೆಂತ್  0-6 ವರ್ಸಾಂ ಸಕಯ್ಲ್ಯಾ ಭುರ್ಗ್ಯಾಂಚೊ ಲಿಂಗ್ ಅನುಪಾತ್ (1000 ಚಲ್ಯಾಂಕ್ - ಚಲಿಯೊ) 958 ಥಾವ್ನ್ 2011ಕ್ ಯೆತಾನಾ 953ಕ್ ದೆಂವ್ಲಾ ಅನಿ ಹೊ ಅನುಪಾತ್ ಪಾಟ್ಲ್ಯಾ 60 ವರ್ಸಾಂನಿ ಕನಿಷ್ಟ್. ದ.ಕ.-೦ತ್ ಹ್ಯಾ ವೆಳಾರ್ ಸಂಖೊ 952 ಥಾವ್ನ್ 947ಕ್ ದೆಂವ್ಲಾ ಆನಿ ಮಂಗಳೂರು ನಗರ ಸಭೆಂತ್ ಹೆಂ ಅನುಪಾತ್ 930 ಜಾವ್ನ್ ಅಸಾ. ಚೆಡುಂ ಭುರ್ಗೆಂ ನಾಕಾ ಮ್ಹಳ್ಳೆಂ ವಿಕಾಳ್ ವಾರೆಂ ಉಡ್ಪಿ ಅನಿ ಮಂಗ್ಳೂರಾಕ್ ಪಾವ್ಲಾಂ. ದ.ಕ. ಆನಿ ಉಡ್ಪಿ ಜಿಲ್ಲಾ ಪಂಚಾಯಾತ್ ಅನಿ ನಗರ ಸಭೆಂನಿ ಹ್ಯಾ ವಿಶಿಂ ಚರ್ಚಾ ಜಾಲ್ಯಾ ಅನಿ ಸೆಮಿನಾರಾಂ ಜಾಲ್ಯಾಂತ್. ಹ್ಯಾ ವಿಶಿಂ ಏಕ್ ಲೇಕನ್. 

ಆಮ್ಚ್ಯಾ ದೇಶಾಂತ್, ರಾಜ್ಯಾಂತ್ ಅನಿ  ಜಿಲ್ಲ್ಯಾಂತ್ ಉಣಿ ಜಾಂವ್ಚಿಂ ಚೆಡ್ವಾಂ ಭುರ್ಗಿಂ :

ಆಮ್ಚ್ಯಾ ದೇಶಾಂತ್  ಸ್ತ್ರೀಯಾಂಕ್ ದೇವಿಚೆಂ ಸ್ಥಾನ್ ಅಸಾ, ಗವ್ರವ್ ಅಸಾ ಮ್ಹಣ್ತಾತ್. ಪ್ರಾಚೀನ್ ವೈದಿಕ್ ಕಾಳಾರ್ ತಿಕಾ ಪೂಜಾ ಕರ್ಚೆಂ ಹಕ್ಕ್ ಅಸ್ಲಲೆಂ ಖಂಯ್. ಪೂಣ್ ಖರಿ ಗಜಾಲ್ ವೆಗ್ಳಿಚ್ಚ್ ಅಸಾ. ಹಾಂಗಾ ದೇವ್ ಅನಿ ಚಡಾವತ್ ದೇವಿ ಮ್ಹಳ್ಯಾರ್ ಸ್ತ್ರೀಯೊ. ಪೂಣ್ ಸ್ತ್ರೀಯಾಂಕ್ ಸ್ಥಾನ್ ಮಾನ್ ನಾ ಮಾತ್ರ್ ನ್ಹಯ್, ತಿಣೆ ಜಲ್ಮೊಂವ್ಚೆಂ ಸಯ್ತ್ ಸೊಸುವ್ನ್ ವ್ಹರಿನಾಂತ್. ದೇಶಾಕ್ ಸ್ವತಂತ್ರ್ ಲಾಭ್‍ಲ್ಲ್ಯಾ ಉಪ್ರಾಂತ್ ಶಿಕಾಪ್ ಚಡ್ಲಾಂ, ಆರ್ಥಿಕ್ ಸುಧಾರಣ್ ಜಾಲಾಂ, ಸಂವಿಧಾನಾನ್ ಸ್ತ್ರೀಯಾಂಕ್ ಸಮಾನ್ ಹಕ್ಕಾಂ ದಿಲ್ಯಾಂತ್ ಜಾಲ್ಯಾರೀ ಸ್ತ್ರೀಯಾಂಕ್ ಪಳಂವ್ಚಿ ದೀಷ್ಟ್ ಬದ್ಲೊಂವ್ಕ್ ನಾ. ಹಾಕಾ ದಾಖ್ಲೊ ಅಮ್ಚ್ಯಾ ದೇಶಾಂತ್, ರಾಜ್ಯಾಂತ್ ಅನಿ  ಜಿಲ್ಲ್ಯಾಂತ್ ಉಣಿ ಜಾಂವ್ಚಿಂ ಚೆಡ್ವಾಂ ಭುರ್ಗಿಂ ಆನಿ ಸ್ತ್ರೀಯೊ. ದಾಖ್ಲ್ಯಾಕ್. ಉಡ್ಪಿಂತ್ 2001 ಇಸ್ವೆಂತ್  0-6 ವರ್ಸಾಂ ಸಕಯ್ಲ್ಯಾ ಭುರ್ಗ್ಯಾಂಚೊ ಲಿಂಗ್ ಅನುಪಾತ್ (1000 ಚಲ್ಯಾಂಕ್ - ಚಲಿಯೊ) 958 ಥಾವ್ನ್ 2011ಕ್ ಯೆತಾನಾ 953ಕ್ ದೆಂವ್ಲಾ ಅನಿ ಹೊ ಅನುಪಾತ್ ಪಾಟ್ಲ್ಯಾ 60 ವರ್ಸಾಂನಿ ಕನಿಷ್ಟ್. ಹಾಕಾ ಕಾರಣ್ ಅನಿ ಪರಿಹಾರ್ ಸೊಧ್ಚಿ ಗರ್ಜ್ ಅಸಾ.

ದೇಶ್ ಅನಿ ರಾಜ್ಯ್ ಹಂತಾರ್ ಲಿಂಗ್ ಅನುಪಾತ್ (1000 ದಾದ್ಲ್ಯಾಂಕ್\ಸ್ತ್ರಿಯೊ) :

ಭಾರಾತ್ ದೇಶ್ ಆನಿ ವಿವಿದ್ ರಾಜ್ಯಾಂನಿ 1000 ಪುರುಷಾಂಕ್ (male) ಸಮಾ ಜಾವ್ನ್ ಕಿತ್ಲ್ಯೊ ಸ್ತ್ರೀಯೊ (female) ಅಸಾತ್, ಹಾಕಾ ಲಿಂಗ್ ಅನುಪಾತ್ ಮ್ಹಣ್ತಾತ್ ತೆಂ 2001 ಅನಿ 2011 ಖಾನೇಶ್ಮಾರಿ ಪ್ರಕಾರ್ ತಾಕ್ಡೊ 1 ಕಲಮ್ 2 ಅನಿ 3 ಹಾಂತುಂ ದಿಲಾಂ. ಭಾರಾತ್ ದೇಶ್ ಹಂತಾರ್ 2001 ಇಸ್ವೆಂತ್ 1000 ದಾದ್ಲ್ಯಾಂಕ್ 933 ಸ್ತ್ರೀಯೊ ಅಸ್ಲಲ್ಯೊ ತರ್, 2011 ಇಸ್ವೆಂತ್ ಹೊ ಸಂಖೊ 940 ಜಾಲಾ ಮ್ಹಳ್ಯಾರ್ 7 ಅಂಕ್ಡೆ ಚಡ್ ಜಾಲ್ಯಾತ್. ಹಾಕಾ ಕಾರಣ್ ಸ್ತ್ರೀಯಾಂಚೆ ಸರಾಸರಿ ಆವ್ಕ್ ಚಡ್ ಜಾಲ್ಯಾ ಶಿವಾಯ್ ದುಸ್ರೆಂ ಕಾರಣ್ ನಾ, ಕಿತ್ಯಾಕ್ ಹ್ಯೆಚ್ಚ್ ವೆಳಾರ್ 6 ವರ್ಸಾಂ ಸಕಯ್ಲ್ಯಾ ಚೆಡ್ವಾಂ ಭುರ್ಗ್ಯಾಂಚೆಂ ಅನುಪಾತ್ 2011 ಇಸ್ವೆಂತ್ 914ಕ್ ದೆಂವ್ಲಾಂ ಹೆಂ ಪಾಟ್ಲ್ಯಾ 100 ವರ್ಸಾಂನಿ ಕನಿಷ್ಟ್ ಜಾವ್ನ್ ಅಸಾ. 

ಹ್ಯಾಚ್ಚ್ ತಾಕ್ಡೆಂತ್ ಥೊಡ್ಯಾ ರಾಜ್ಯಾಂಚಿ ಮಾಹೆತ್ ದಿಲ್ಯಾ. ಕೇರಳ ಆನಿ ಪಾಂಡಿಚೇರಿ ರಾಜ್ಯಾಂನಿ ಮಾತ್ರ್ ಸ್ತ್ರೀಯೊ ದಾದ್ಲ್ಯಾಂ ಪ್ರಾಸ್ ಚಡ್ ಅಸಾತ್. ಡೆಲ್ಲಿಂತ್ ಹೊ ಸಂಖೊ ಕೇವಲ್ 866 ಅಸೊನ್ ನಿಮಾಣ್ಯಾ ಜಾಗ್ಯಾರ್ ಅಸಾ ಅನಿ ಹಾಂಗಾ 10 ವರ್ಸಾಂ ಸ್ತ್ರೀ ಮುಖೆಲ್ ಮಂತ್ರಿ ಜಾವ್ನ್ ಅಸ್‍ಲ್ಲಿ. ಉಪ್ರಾಂತ್ಲೆಂ ಸ್ಥಾನ್ ಹರಿಯಾಣ (877) ಆನಿ ಪಂಜಾಬ್( 893) ಹ್ಯಾ ರಾಜ್ಯಾಂಕ್ ವೆತಾ. ಕರ್ನಾಟಕಾಂತ್ 2001 ಇಸ್ವೆಂತ್ 1000 ದಾದ್ಲ್ಯಾಂಕ್ 965 ಸ್ತ್ರೀಯೊ ಅಸ್ಲಲ್ಯೊ ಅನಿ ಹೊ ಸಂಖೊ 2011 ಇಸ್ವೆಂತ್ ಸುಧಾರಣ್ ಜಾವ್ನ್ 968 ಜಾಲಾ. ಹಾಕಾಯಿ ಕಾರಣ್ ಸ್ತ್ರೀಯಾಂಚೆ ಸರಾಸರಿ ಆವ್ಕ್ ಚಡ್ ಕಿತ್ಯಾಕ್ ಹಾಂಗಾಯಿ 6 ವರ್ಸಾಂ ಸಕಾಯ್ಲ್ಯಾ ಚೆಡ್ವಾಂ ಭುರ್ಗ್ಯಾಂಚೆಂ ಅನುಪಾತ್ ಉಣೆ ಜಾಲಾಂ. 

ದೇಶ್ ಅನಿ ರಾಜ್ಯ್ ಹಂತಾರ್ 6 ವರ್ಸಾಂ ಸಕಯ್ಲ್ಯಾ ಭುರ್ಗ್ಯಾಂಚೆಂ ಲಿಂಗ್ ಅನುಪಾತ್ (1000 ಚಲ್ಯಾಂಕ್ - ಚಲಿಯೊ) :

ಭಾರಾತ್ ದೇಶ್ ಅನಿ ವಿವಿಧ್ ರಾಜ್ಯಾಂನಿ 6 ವರ್ಸಾಂ ಸಕಯ್ಲ್ಯಾ 1000 ಚೆಡ್ಯಾಂಕ್ ಸಮಾ ಜಾವ್ನ್ ಕಿತ್ಲ್ಯೊ ಚಲಿಯೊ ಅಸಾತ್ ತೆಂ 2001 ಅನಿ 2011 ಖಾನೇಶ್ಮಾರಿ ಪ್ರಕಾರ್ ತಾಕ್ಡೊ 1 ಕಲಮ್ 4 ಅನಿ 5, ಹಾಂತುಂ ದಿಲಾಂ. ಭಾರಾತ್ ದೇಶ್ ಹಂತಾರ್ 2011 ಇಸ್ವೆಂತ್ ಹೊ ಸಂಖೊ 914 ಜಾಲಾ ಅನಿ ಹೊ ಪಾಟ್ಲ್ಯಾ 100 ವರ್ಸಾಂನಿ ಕನಿಶ್ಟ್ ಜಾವ್ನ್ ಅಸಾ. 2001 ಇಸ್ವೆಂತ್ ಹೊ ಅಂಕ್ಡೊ 927 ಜಾವ್ನ್ ಅಸ್‍ಲ್ಲೊ. ಹಿಂ ಭುರ್ಗಿಂ ತರ್ನಾಟಿಂ ಜಾತಾನಾ ದೇಶಾಚಿ ಪರಿಗತ್ ಚಿಂತುನ್ ಪಳೆಂವ್ಚಿ ಗರ್ಜ್ ಅಸಾ. ಮಿಜೋರಾಮ್ ಅನಿ ಮೇಘಾಲಯಾ ರಾಜ್ಯಾಂನಿ ಮಾತ್ರ್ ಹೊ ಅನುಪಾತ್ ಇಲ್ಲೊಸೊ ಬರೊ ಅಸಾ. ಅನ್ಯೆಕ್ ಭರ್ವಶ್ಯಾಚಿ ಖಬರ್ ಮ್ಹಳ್ಯಾರ್, ಪಂಜಾಬಾಂತ್ 2001 ಇಸ್ವೆಂತ್ ಹೊ ಅನುಪಾತ್ 798 ಥಾವ್ನ್ 2011 ಇಸ್ವೆಕ್ ಯೆತಾನಾ 846ಕ್ ಚಡ್ಲಾ ಅನಿ ಹರಿಯಾಣಾಂತ್ 819 ಥಾವ್ನ್ 830ಕ್ ವಾಡ್ಲಾ. ಉರ್‍ಲ್ಲ್ಯಾ ಸರ್ವ್ ರಾಜ್ಯಾಂನಿ ಚಲಿಯಾಂಚೊ ಸಂಖೊ ದೆವ್ಲಾ.  

ಕರ್ನಾಟಕ ರಾಜ್ಯ್ ಹಂತಾರ್ ಲಿಂಗ್ ಅನುಪಾತ್ (1000 ದಾದ್ಲ್ಯಾಂಕ್ - ಸ್ತ್ರೀಯೊ) :

ಕರ್ನಾಟಕಾಂತ್ 2001 ಇಸ್ವೆಂತ್ 1000 ದಾದ್ಲ್ಯಾಂಕ್ 965 ಸ್ತ್ರೀಯೊ ಅಸ್‍ಲ್ಲ್ಯೊ ಅನಿ ಹೊ ಸಂಖೊ 2011 ಇಸ್ವೆಂತ್ ಸುಧಾರಣ್ ಜಾವ್ನ್ 968 ಜಾಲ್ಯಾ. ಕರ್ನಾಟಕಾಂತ್ ಅತ್ಯಧಿಕ್ ಚಡ್ ಅನಿ ಅತೀ ಉಣೊ ಲಿಂಗ್ ಅನುಪತ್ ಅಸ್ಲೆಲ್ಯಾ ಜಿಲ್ಲ್ಯಾಂಚೊ ವಿವರ್ ತಾಕ್ಡೊ  2 ಹಾಂತುನ್ ದಿಲಾ. ಅತ್ಯಧಿಕ್ ಚಡ್  ಲಿಂಗ್ ಅನುಪಾತ್ ಅಸ್ಲೆಲ್ಯಾ ಜಿಲ್ಲ್ಯಾಂ ಪಂಯ್ಕಿಂ ದ.ಕ. ಪಯ್ಲ್ಯಾ ಸ್ಥಾನಾರ್ ಆನಿ ಉಡ್ಪಿ ದುಸ್ರ್ಯಾ ಸ್ಥಾನಾರ್ ಅಸಾ ಅನಿ ಹೊ ಸಂಖೊ 1000 ಚಾಕೀ ಚಡ್ ಅಸಾ. ಹೊ ಅನುಪಾತ್  ದ.ಕ.೦ತ್ 1094 ಅನಿ ಉಡ್ಪಿಂತ್ 1020 ಜಾವ್ನ್ ಆಸಾ. ತಿ ಗಜಾಲ್ ಸಂತೊಸಾಚಿ ಮ್ಹಣ್ ಭೊಗ್ಲ್ಯಾರೀ 6 ವರ್ಸಾಂ ಸಕಯ್ಲ್ಯಾ ಚೆಡ್ವಾಂ ಭುರ್ಗ್ಯಾಂಚೊ ಸಂಖೊ ಪಾಟ್ಲ್ಯಾ 60 ವರ್ಸಾಂನಿ ಅತೀ ಉಣೊ ಜಾವ್ನ್ ಅಸಾ ಮ್ಹಳ್ಳಿ ಭಿರಾಂತಿಚಿ ಸಂಗತ್. ಕೊಡಗುಂತ್ ಅನುಪಾತ್ 1019 ಅಸೊವ್ನ್ ತೊ ಜಿಲ್ಲೊ ತಿಸ್ರ್ಯಾ ಸ್ಥಾನಾರ್ ಅಸಾ.  

ನಿಮಾಣೆಂ ಅಸಾ ಬೆಂಗ್ಳೂರು ಅನಿ ಹಾಂಗಾ ಅನುಪಾತ್ ಕೇವಲ್ 916. 946 ಅನುಪಾತ್ ಅಸ್‍ಲ್ಲೆಂ ಬೆಂಗಳುರು ಗ್ರಾಮಾಂತರ್ ದುಸ್ರ್ಯಾ ಅನಿ 950 ಅನುಪಾತ್ ಅಸ್‍ಲ್ಲೆಂ ಹಾವೇರಿ ತಿಸ್ರ್ಯಾ ಸ್ಥಾನಾರ್ ಅಸಾತ್. 

ಕರ್ನಾಟಕ ರಾಜ್ಯ್ ಹಂತಾರ್  6 ವರ್ಸಾಂ ಸಕಯ್ಲ್ಯಾ ಭುರ್ಗ್ಯಾಂಚೆಂ ಲಿಂಗ್ ಅನುಪಾತ್ (1000 ಚಲ್ಯಾಂಕ್ - ಚಲಿಯೊ) :

ಕರ್ನಾಟಕ ರಾಜ್ಯ್ ಹಂತಾರ್ 6 ವರ್ಸಾಂ ಸಕಯ್ಲ್ಯಾ ಭುರ್ಗ್ಯಾಂಚೆಂ ಲಿಂಗ್ ಅನುಪಾತ್ (1000 ಚಲ್ಯಾಂಕ್ - ಚಲಿಯೊ),  2001 ಇಸ್ವೆಂತ್ 946 ಅಸ್‍ಲ್ಲೆಂ ಅನಿ 2011 ಖಾನೇಶ್ಮಾರಿ ಪ್ರಕಾರ್ 943ಕ್ ದೆಂವ್ಲಾಂ ತೆಂ ತಾಕ್ಡೊ 1 ಕಲಮ್ 4 ಅನಿ 5, ಹಾಂತುಂ ಪಳವ್ಯೆತ್. ಹೆಂ ಪಾಟ್ಲ್ಯಾ 60 ವರ್ಸಾಂನಿ ಕನಿಶ್ಟ್ ಜಾವ್ನ್ ಅಸಾ ಅನಿ ಹ್ಯೆಚ್ಚ್ ವೆಳಾರ್ ಜೆರಾಲ್ ಅನುಪಾತ್ ಪಾಟ್ಲ್ಯಾ 60 ವರ್ಸಾಂನಿ ಗರಿಶ್ಟ್. ಹಾಂಗಾ ಅತಾಂ ಪ್ರಾಯೇಸ್ತ್ ಸ್ತ್ರೀಯಾಂಚೊ ಸಂಖೊ ಚಡ್ಲಾ ಅನಿ ಚೆಡ್ವಾಂಚೊ ಸಂಖೊ ದೆಂವ್ಲಾ. ಅತ್ಯಧಿಕ್ ಚಡ್ ಅನಿ ಅತೀ ಉಣೊ ಭುರ್ಗ್ಯಾಂಚೆಂ ಲಿಂಗ್ ಅನುಪಾತ್ ಅಸ್ಲೆಲ್ಯಾ ಜಿಲ್ಲ್ಯಾಂಚೊ ವಿವರ್ ತಾಕ್ಡೊ 3 ಹಾಂತುನ್ ದಿಲಾ.

ಅತ್ಯಧಿಕ್ ಚಡ್ ಲಿಂಗ್ ಅನುಪಾತ್ ಅಸ್ಲೆಲ್ಯಾ ಜಿಲ್ಲ್ಯಾಂ ಪಂಯ್ಕಿಂ ಪಯ್ಲ್ಯಾ ಸ್ಥಾನಾರ್ ಕೊಡಗು ಅನಿ  ದುಸ್ರ್ಯಾ ಸ್ಥಾನಾರ್ ಹಾಸನ್ ಅಸಾ. ಕೊಡಗು ಜೆರಾಲ್ ಲಿಂಗ್ ಅನುಪಾತಾಂತೀ ತಿಸ್ರ್ಯಾ ಜಾಗ್ಯಾರ್ ಅಸಾ. ದ.ಕ. ಅನಿ ಉಡ್ಪಿ ಪ್ರಾಸ್ ಕೊಡಗು ಸ್ತ್ರೀ ಅನಿ ಚೆಡ್ವಾಂ ಭುರ್ಗ್ಯಾಂ ವಿಶಿಂ ಮುಕಾರ್ ಅಸಾ. ಭುರ್ಗ್ಯಾಂಚೆಂ ಲಿಂಗ್ ಅನುಪಾತಾಂತ್ ನಿಮಾಣೊ ಜಾಗೊ ಬಿಜಪುರಾಕ್ ವೆತಾ. 

ಉಡ್ಪಿ ಅನಿ ದ.ಕ. ಜಿಲ್ಲ್ಯಾಂನಿ ಲಿಂಗ್ ಅನುಪಾತ್ (1000 ದಾದ್ಲ್ಯಾಂಕ್\ಸ್ತ್ರಿಯೊ)  ಅನಿ 0-6 ವರ್ಸಾಂ ಸಕಯ್ಲ್ಯಾ ಭುರ್ಗ್ಯಾಂಚೆಂ ಲಿಂಗ್ ಅನುಪಾತ್ (1000 ಚಲ್ಯಾಂಕ್-ಚಲಿಯೊ) :

ಅತ್ಯಧಿಕ್ ಚಡ್ ಲಿಂಗ್ ಅನುಪಾತ್ ಅಸ್ಲೆಲ್ಯಾ ಜಿಲ್ಲ್ಯಾಂ ಪಂಯ್ಕಿಂ ದ.ಕ, ಪಯ್ಲ್ಯಾ ಸ್ಥಾನಾರ್ ಅನಿ ಉಡ್ಪಿ ದುಸ್ರ್ಯಾ ಸ್ಥಾನಾರ್ ಅಸಾ ಅನಿ ಹೊ ಸಂಖೊ 1000ಚಾಕೀ ಚಡ್ ಅಸಾ. ಹೊ ಅನುಪಾತ್  ದ.ಕ.೦ತ್ 1093 ಅನಿ ಉಡ್ಪಿಂತ್ 1018 ಜಾವ್ನ್ ಆಸಾ. ಪೂಣ್ ಹ್ಯೆಚ್ಚ್ ಜಿಲ್ಲೆ , 0-6 ವರ್ಸಾಣ್ ಸಕಯ್ಲ್ಯಾ ಭುರ್ಗ್ಯಾಂಚೆಂ ಲಿಂಗ್ ಅನುಪಾತಾಂತ್ ಸುರ್ವಿಲ್ಯಾ 10 ಸ್ಥಾನಾಂನಿ ಸಯ್ತ್ ನಾಂತ್. ಉಡ್ಪಿಂತ್ 2001 ಇಸ್ವೆಂತ್ 0-6 ವರ್ಸಾಂ ಸಕಯ್ಲ್ಯಾ ಭುರ್ಗ್ಯಾಂಚೊ ಲಿಂಗ್ ಅನುಪಾತ್ (1000 ಚಲ್ಯಾಂಕ್ - ಚಲಿಯೊ) 958 ಥಾವ್ನ್ 2011ಕ್ ಯೆತಾನಾ 953ಕ್ ದೆಂವ್ಲಾಂ ಅನಿ ಹೆಂ ಪಾಟ್ಲ್ಯಾ 60 ವರ್ಸಾಂನಿ ಕನಿಶ್ಟ್. ದ.ಕ.೦ತ್ ಹ್ಯಾ ವೆಳಾರ್ ಸಂಖೊ 952 ಥಾವ್ನ್ 947ಕ್ ದೆಂವ್ಲಾಂ ಆನಿ ಮಂಗಳೂರು ನಗರ ಸಭೆಂತ್ ಹೆಂ ಅನುಪಾತ್ 930 ಜಾವ್ನ್ ಅಸಾ. ಚೆಡುಂ ಭುರ್ಗೆಂ ನಾಕಾ ಮ್ಹಳ್ಳೆಂ ವಿಕಾಳ್ ವಾರೆಂ ಉಡ್ಪಿ ಅನಿ ಮಂಗ್ಳೂರಾಕ್ ಪಾವ್ಲಾಂ. 

ಚೆಡ್ವಾಂ ಭುರ್ಗ್ಯಾಂಚೊ ಸಂಖೊ ಕಿತ್ಯಾಕ್ ದೆಂವ್ತಾ?

ಹ್ಯಾ ಸವಾಲಾಂಕ್ ಥೊಡ್ಯೊ ಜೆರಾಲ್ ಜಾಪಿ ಸರ್ವಾಂಕ್ ಕಳಿತ್ ಅಸಾತ್. ಚಲಿಯಾಂಚೆರ್ ಚಡೊವ್ನ್ ಯೆಂವ್ಚೆ ಅತ್ಯಾಚಾರ್, ತಾಂಚ್ಯಾ ಕಾಜಾರಾಕ್ ಅಸ್ಚಿ ಆರ್ಥಿಕ್ ಅನಿ ಇತರ್ ಅಡ್ಕಳಿ, ಚಲಿ ದುಸ್ರ್ಯಾ ಘರಾ ವೆಚಿ ಮ್ಹಳ್ಳೆಂ ಚಿಂತಾಪ್ ಥೊಡಿಂ ಕಾರಣಾಂ ತರ್ ಚೆಡ್ವಾ ವರ್ವಿಂ ಆರ್ಥಿಕ್ ಲಾಭ್ ನಾ ಮ್ಹಳ್ಳೆಂ ಚಿಂತಾಪ್, ವ್ಹಡಿಲಾಂಕ್ ಚೆಡುಂ ಭುರ್ಗೆಂ ನಾಕಾ ಮ್ಹಣೊಂವ್ಕ್ ಕಾರಾಣ್ ಜಾಲಾಂ. ಚಲ್ಯಾ ವರ್ವಿಂ ಆರ್ಥಿಕ್ ಲಾಭ್ ಅಸಾ, ದೋತ್ ಅನಿ ದೆಣೆ ಹಾಡ್ತಾ, ಮುಕಾರ್ ಆಪ್ಣಾಚಿ ಚಾಕ್ರಿ ಕರ್ತಾ, ಆಪ್ಲಿ ಸಂತತ್ ಅನಿ ನಾಂವ್ ಮುಂದರುನ್ ವ್ಹರ್ತಾ ಮ್ಹಳ್ಳೆಂ ಚಿಂತಪ್ ಅಸಾ. ಹ್ಯೆ ಶಿವಾಯ್ ಹಿಂದು ಧರ್ಮಾಂತ್ ಮೊರ್ನಾಚಿ ಕ್ರಿಯಾ ಕರುಂಕ್ ಪೂತ್ ಜಾಯ್. ಹ್ಯಾ ಚಿಂತ್ಪಾಕ್ ಸಮಾ ಜಾವ್ನ್ ಭುರ್ಗ್ಯಾಚೊ ಲಿಂಗ್ ಸೊಧುನ್ ಕಾಡ್ಚಿಂ ಅನಿ ನಾಕಾ ಜಾಲ್ಯಾರ್ ಭ್ರೂಣ್ ನಾಸ್ ಕರ್ಚಿಂ ಕ್ಲಿನಿಕಾಂ ಧಾರಾಳ್ ಅಸಾತ್. ಶಿಕ್ಪಿ ಲೋಕ್‌ಚ್ಚ್ ಹಾಚೊ ಚಡ್ ಉಪ್ಯೋಗ್ ಕರ್ತಾ. ಲಿಂಗ್ ಸೊಧುನ್ ಕಾಡ್ಚ್ಯಾ ವಿಶಿಂ ಕಾನೂನ್ ಅಸ್ಲ್ಯಾರೀ ತೆಂ ಪೇಪರಾರ್ ಮಾತ್ರ್ ಅಸಾ. ಚೆಡ್ವಾಂ ಬಾಳ್ಶಿಂ ಜೀವಂತ್ ಉರ್ಚೊ ಪ್ರಮಾಣ್ ಉಣೊ ಕಿತ್ಯಾಕ್ ತಾಂಚ್ಯಾ ಭಲಾಯ್ಕೆ ವಿಶಿಂ ವ್ಹಡಿಲಾಂ ಚಡ್ ಗುಮಾನ್ ದೀನಾಂತ್. ಕುಟ್ಮಾಕ್ ಏಕ್ ಭುರ್ಗೆಂ ಚಿಂತಪ್ ಅನ್ಯೇಕ್ ಕಾರಣ್ ಕಿತ್ಯಾಕ್ ತವಳ್ ತಾಂಕಾ ಚೆರ್ಕೊಚ್ ಜಾಯ್. ಅಪ್ರೂಪ್ ಕುಟ್ಮಾಂನಿ ಮಾತ್ರ್ ಏಕ್ ಭುರ್ಗೆಂ ಅಸೊವ್ನ್ ತೆಂ ಚೆಡುಂ ಜಾವ್ನ್ ಆಸ್ತಾ. 

ಹ್ಯಾ ಸಮಸ್ಯಾಕ್ ಪರಿಹಾರ್ ಕಿತೆಂ?

ಪಂಜಾಬ್ ಆನಿ ಹರಿಯಾಣಾಚಿ ದೇಖ್ ಕಾಣ್ಘೆವ್ನ್, ಚೆಡುಂ ಭುರ್ಗ್ಯಾಂಚೊ ಸಂಖೊ ಉಣೊ ಜಾಲ್ಯಾರ್, ಜಾಂವ್ಚ್ಯಾ ವಾಯ್ಟ್ ಪರಿಣಾಮಾಂ ವಿಶಿಂ ಜಾಗ್ರತಿ, ಏಕ್ ವಾಟ್. ಲಿಂಗ್ ಸೊದುನ್ ಕಾಡ್ಚಿಂ ಅನಿ ಭುರ್ಗೆಂ ನಾಕಾ ಜಾಲ್ಯಾರ್ ಭ್ರೂಣ್ ನಾಸ್ ಕರ್ಚೆಂ - ಹ್ಯಾ ವಿಶಿಂ ಅಸ್ಚಿಂ ಕಾನೂನಾಂ ಕಾರ್ಯಾ ರೂಪಾಕ್ ಹಾಡಿಜಾಯ್.  ಸಂವಿಧಾನಾನ್ ಆನಿ ಕಾನೂನಾನ್ ದಿಲ್ಲಿಂ ಹಕ್ಕಾಂ ಅನಿ ಸಮಾನತಾ - ಹರ್ಯೇಕ್ ವರ್ತುಲಾಂತ್ ಜಾರಿ ಜಾತೀತ್ ತರ್ ಚೆಡ್ವಾಂ ಭುರ್ಗ್ಯಾಂಕ್ ವ್ಹಡಿಲಾಂ ಸ್ವಾಗತ್ ಕರ್ತಿತ್. ಚೆಡ್ವಾಂ ಭುರ್ಗ್ಯಾಂಚೆರ್ ಜಾಂವ್ಚ್ಯಾ ಅತ್ಯಾಚಾರಾಂಚೆರ್ ನಿಯಂತ್ರಣ್ ಹಾಡುನ್ ಅತ್ಯಚಾರಿಂಕ್ ವೆಗಿಂ ಖಠಿಣ್ ಶಿಕ್ಶಾ ಜಾಲ್ಯಾರ್ ವ್ಹಡಿಲಾಂಕ್ ಚೆಡ್ವಾಂ ಭುರ್ಗ್ಯಾಂಕ್ ವಾಗೊಂವ್ಕ್ ಧಯ್ರ್ ಮೆಳ್ತಲೆಂ. ಕುಟ್ಮಾಂತ್ ದೋನ್ ವಾ ತೀನ್ ಭುರ್ಗಿಂ ಅಸ್ಲ್ಯಾರ್ ಥಂಯ್ ಚೆಡ್ವಾ ಭುರ್ಗ್ಯಾಂಕ್ ಸ್ವಾಗತ್ ಅಸ್ತಾಲೊ. ವ್ಹಡಿಲಾಂನಿ ಚೆಡ್ವಾಂ ಅನಿ ಚೆರ್ಕ್ಯಾಂ ಮಧೆಂ ಕರ್ಚೊ ತಫಾವತ್ ಚೂಕ್ ಮ್ಹಳ್ಳೆಂ ವ್ಹಡಿಲಾಂಕ್ ಭೊಗಾತ್ ಜಾಲ್ಯಾರ್, ಭುರ್ಗಿಂ ದೆವಾಚೆಂ ದೆಣೆಂ ಮ್ಹಣ್ ಸ್ವೀಕಾರ್ ಕರಿಶೆಂ ಜಾಗ್ರತಿ ಹಾಡಾಯ್ಲ್ಯಾರ್ ಅನಿ ಸಮಾಜೆನ್ ಚಲ್ಯಾಂಕ್ ಅನಿ ಚಲಿಯಾಂಕ್  ಸಮಾನ್ ದಿಷ್ಟಿನ್ ದೆಕ್ಲ್ಯಾರ್ ಹೊ ಸಮಸ್ಸೊ ಪರಿಹಾರ್ ಜಾಯ್ತ್. 

Tags:  Gerald Pinto, Girls Raio, Konkani, Mangalore, Mangalorean, Mother Tongue

0 Comment/s.

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :


Connect

Maibhaas

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE