From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಡೋರ್ ಡೆಲಿವರಿ (Door Delivery)
Tuesday, March 27, 2018
ಆಜ್‌ಕಾಲ್ ಹೊ ಸಬ್ದ್ ಕಾಂಯ್ ಅಪರಿಚಿತ್ ನ್ಹಯ್, ಪುಣ್ ಎಕಾ ತೆಂಪಾರ್ ಹ್ಯಾ ಸಬ್ದಾಚೊ ವಾಪರ್ ನಾತ್‌ಲ್ಲೊಚ್ ಯಾ ಆಸ್ಲ್ಯಾರೀ ತಾಚೊ ವಾಪರ್ ಭಾರಿಚ್ಚ್ ಉಣೊ ಆನಿ ಹ್ಯಾ ವಾಕ್ಯಾಚೊ ವಾಪಾರ್ ಭೋವ್ ಥೊಡ್ಯಾಂಕ್, ಚಡ್ ಕರುನ್ ವೆಪಾರಿಸ್ತಾಂಕ್ ಯಾ ಆಮದ್-ರಫ್ತ್ ಕರ್ಚ್ಯಾಂಕ್ ಮಾತ್ರ್ ಕಳಿತ್ ಆಸ್ತಾಲೊ. ಮ್ಹಾಕಾ ಪರಿಚಯ್ ಜಾಲ್ಲಿ ಜೆನ್ನಾ ಹಾಂವ್ ವಿದೇಶಾಂತ್ ಎಕಾ ಕಂಪ್ಣೆಂತ್ 'ಟೆಂಡರ್ ಡಿಪಾರ್ಟ್'ಮೆಂಟಾಂತ್ ನವ್ಕರೆಕ್ ಲಾಗ್‌ಲ್ಲ್ಯಾ ತವಳ್‌ಥಾವ್ನ್. ಹಿ ನವ್ಕರಿ ಮ್ಹಾಕಾ ಗಾಂಟಾಲ್ಲಿ ಮ್ಹಜ್ಯಾ ಮಾವ್ಳ್ಯಾಚ್ಯಾ ಶಿಫಾರಾಸೆನ್ ಆನಿ ಹಜಾರೊ ಗಾಳಿ ಆನಿ ಧಮ್ಕ್ಯೊ ಖೆಲ್ಯಾ ಉಪ್ರಾಂತ್. ''ಬಿ.ಕೊಮ್ ಶಿಕ್ಲಾ ಖಂಯ್ ಆನಿ ಎಕ್ ಡಿಗ್ರಿ ಪರ್ಯಾಂತ್ ಹಾಕಾ ಆಸಾ ಪುಣ್ ಡೋರ್ ಡೆಲಿವರಿ, C&F, FOB ಇತ್ಯಾದಿ ಕಮರ್ಶಿಯಲ್ ಸಬ್ದ್ ಹಾಕಾ ಕಳಿತ್‌ನಾಂತ್. ಕೊಣಾ ಕೊಣಾಚೆ ಪಾಂಯ್ ಧರುನ್ ಚಾರ್ ಮ್ಹಯ್‌ನೆ ಥಾವ್ನ್ ಬೆಕಾರ್ ಆಸ್ಚ್ಯಾ ಹಾಕಾ ನವ್ಕರಿ ಲಾಗಯ್ಲಿ ಪುಣ್ ಕಂಪೆನಿಂತ್ ಹೊ ಕಿತೆಂ ಕರಿತ್, ಕಾಂಯ್ ಕರಿತ್ ಯಾ ಶೆಣ್ ಘಾಲಿತ್ ಆನಿ ಮ್ಹಜಿ ಮರ್ಯಾದ್ ಕಾಡಿತ್ ಮ್ಹಳ್ಳೆಂ ಪಳೆಂವ್ಕ್ ಆಸಾ...''
ಅಶೆಂ ತೊ ಮ್ಹಾಕಾ ವಯುಕ್ತಿಕ್ ಆನಿ ಮಾನಸಿಕ್ ರಿತಿರ್ ಸೊಲ್ತಾನಾ ಸರ್ವ್ ಗಿಳುನ್ ಮೊನೊ ಜಾಲೊಂ ಕಿತ್ಯಾಕ್ ತಾಣೆ ಸಾಂಗ್ಚ್ಯಾಂತ್ ಖರೊಕರ್ ಸತ್ ಆಸ್‌ಲ್ಲೆಂ. ಪುಣ್ ಎಕಾ ದಿಸಾ ಹ್ಯಾಚ್ ನವ್ಕರೆಂತ್ 'ಟೆಂಡರ್ ಡಿಪಾರ್ಟ್'ಮೆಂಟಾಚೊ ಮುಕೆಲಿ ಜಾಲ್ಲಿ ಯಶ್‌ಸ್ವಿ ಮ್ಹಜಿ ಖಾಸ್ಕಿ. ವಹಿವಾಟಿಕ್ ಸಂಸಾರಾಂತ್ ಹೆಂ ವಾಕ್ಯೆಂ ಸರ್ವ್ ಸಾಮಾನ್ಯ್ ಮ್ಹಣ್ ಮ್ಹಾಕಾ ಕಳಿತ್ ಜಾತಾನಾ ಹಾಂವ್ ಜಾಂಟೊ ಜಾಲ್ಲೊಂ ಆನಿ ನೆಂಟೆ ಆಸ್‌ಲ್ಲ್ಯಾಂಕ್ ತಾಬೆಂತ್ ಧರ್ಚಿ ಸಕತ್ ಮ್ಹಜೆ ಥಂಯ್ ಉದೆಲ್ಲಿ ಆನಿ ಜುನೆಲ್ಲಿ. ಮಾವ್ಳ್ಯಾನ್ ದಿಲ್ಲ್ಯೊ ಧಮ್ಕ್ಯೊ ಆಜ್ ಉಪ್ಕಾರಾಕ್ ಪಡ್‌ಲ್ಲ್ಯೊ ಆನಿ ಆತಾಂಯ್ ಪಡ್ತಾತ್ ಕಿತ್ಯಾಕ್ ಆಜ್‌ಕಾಲ್ ಭಂವ್ತಿಂ ಪಳೆತಾನಾ ಪ್ರಗತಿಪರ್ ಆಮ್ಚ್ಯಾ ವಯ್‌ವಾಟಿ ಭಾರತಾಂತ್ ಕಮರ್ಶಿಯಲ್ ಭಾಸೆಂತ್ ಅಸಲೆ ಸಬ್ಡ್ ಆನಿ ವಾಕ್ಯಾಂ ಸರ್ವ್ ಸಾಮಾನ್ಯ್ ಜಾವ್ನ್ ಗೆಲ್ಯಾಂತ್ ಕಿ ಘರ್ ದಾರಾರ್ ತಾರ್ಲೆ ವಿಕುಂಕ್ ಯೆಂವ್ಚ್ಯಾ ಮೊಗ್ರಾಂಕ್ ಪರ್ಯಾಂತ್ 'ಡೋರ್ ಡೆಲಿವರಿ' ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚೊ ಅರ್ಥ್ ವಿವರಾವ್ನ್ ಸಾಂಗಾಜೆ ಮ್ಹಣ್ ನಾ.
ಪುಣ್ ಎಕ್ ಕಾಳ್ ಆಸ್‌ಲ್ಲೊ ಜೆನ್ನಾ ಖಂಯ್ ಅಪ್ರೂಬ್ ಎಕ್ ಮೊಗೊರ್ ಘರ್‌ದಾರಾರ್ ನುಸ್ತೆಂ ಘೆವ್ನ್ ವಿಕ್ರಾಪಾಕ್ ಯೆತಾಲೊ. ಚಡ್ ಕರುನ್ ಮ್ಹಜ್ಯಾ ಉಡಾಸಾಂತ್ ಯೆತಾ ಧೆಂಕ್ಳೆ ಮಾಡಾ-ಚುಡೆತಿಂಕ್ ಶಿಂವೊನ್ ವಿಕ್ರಾಪಾಕ್ ಹಾಡುನ್ ಡೋರ್ ಡೆಲಿವರಿ ಕರ್ಚ್ಯಾ ತುಕ್ರಾಕ್ ಪರ್ಯಾಂತ್ ಹ್ಯಾ ವಾಕ್ಯಾ ಚೊ ಅರ್ಥ್ ಕಳಿತ್ ಆಸಾ. ಪುಣ್ ಭಾರತಾಚಿ ಆನಿ ಸಗ್ಳ್ಯಾ ಸಂಸಾರಾಚಿ ಪ್ರಗತಿ ಇತ್ಲ್ಯಾರ್‌ಚ್ ರಾವಲ್ಲಿ ನಾ. ಆಜ್ ಕಾಲ್ ಸರ್ವಾಂಕ್ ಡೋರ್ ಡೆಲಿವರಿ - ಮ್ಹಳ್ಯಾರ್ ಸಾಮಾಗ್ರ್ಯೊ ಘರಾ ದಾರಾರ್ ಪಾವಿತ್ ಜಾಂವ್ಚೆಂ ಸರ್ವಿಸ್ ಜಾಯ್. ಅರ್ಥಾತ್, ''ತುಂ ಹಾಂಗಾಯೆ, ಆಮಿ ತುಜೆಥಂಯ್ ಯೆನಾಂವ್, ಕಿತ್ಯಾಕ್ ಆಮ್ಕಾ ಡೋರ್ ಡೆಲಿವರಿಚಿ ಸವ್ಲತಾ ದಿಂವ್ಚೆ ವಿಕ್ಪಿ ಜಾಯ್ತೆ ಆಸಾತ್''. ಬರೆಂಚ್, ಹಿ ಪ್ರಗತಿ ಭಾರಿಚ್ಚ್‌ಬರಿ. ಹಾಂಗಾಸರ್ ಅರ್ಥಾಭರಿತ್ ಕೂಸ್ ಆನಿ ಮಾರ್‌ಖಾಂವ್ಚಿ ಕೂಸ್ ಮ್ಹಣ್ಜೆ ನಷ್ಟಾಕ್ ವಳಗ್ ಕರ್ಚಿ ಕೂಸ್ (ಹಾಸ್ಯ್‌ಬರಿತ್) ಹಾಂಚೆರ್ ದೀಷ್ಟ್ ಚರಯ್ಲ್ಯಾರ್ ಹ್ಯಾ ಲೇಖನಾಕ್ ಕಾಂಯ್ ಸೊಬ್ ಯೆತಾ ನ್ಹಯ್ ತರ್ ಹ್ಯಾ ಎಡ್ವಿನಾಚೆಂ ಚಿಂತಪ್ ಕಾಂಯ್ ದಾಡ್ಡ್‌ ಜಾಲಾಂ ಮ್ಹಣ್ ಮ್ಹಜೆ ಶಾಣೆ ವಾಚ್ಪಿ ಚಿಂತಿತ್. ಸುರ್ವೆಚ್ಯಾ ಸುರ್ವೆರ್ ಎಕ್ ದಾಕ್ಲೊ ಹಾಂವ್ ತುಮ್ಕಾಂ ದಿತಾಂ ಜೊ ಮ್ಹಾಕಾ ಮ್ಹಜ್ಯಾ ಆಜ್ಯಾನ್ ಭಾರಿಚ್ಚ್ ರಂಗೀನ್ ಕರುನ್ ಸಾಂಗ್‌ಲ್ಲೊ ಉಡಾಸ್ ಮ್ಹಾಕಾ ಆಸಾ. ಹೊ ಉಡಾಸ್ ಆನಿ ಹೆರ್, ಹಾಂವ್ ಮಾಂಡಿಯೆ ವಯ್ಲ್ಯೊ ಕಥಾ ಮ್ಹಳ್ಳ್ಯಾ ಸಂಗ್ರಹಾಂತ್ ಖ್ಹೊವವ್ನ್ ದವರಿಜೆ ಮ್ಹಣ್ ಯೆವ್ಜಣ್ ಕರಿತ್ತ್ ಆಸಾಂ ಪುಣ್ ತಿ ವೇಳ್‌ಘಡಿ ಆನಿಕೀ ಯೆಂವ್ಕ್ ನಾ ಮ್ಹಳ್ಳೆಪರಿಂ ದಿಸ್ತಾ. ಆಸುಂ.
ಕಥಾ ಆಸಾ ಅಶಿ: ಎಕಾ ದೈನಂದಿಕಾಂತ್ ಎಕ್ ಜಾಯ್ರಾತ್ ಅಶೆಂ ಆಯ್ಲೆಂಕಿ, 'ಫಕತ್ ಧಾ ರುಪಯ್ ಎಮ್.ಒ ಕರುನ್ ಧಾಡ್ಲ್ಯಾರ್ ತುಮ್ಕಾಂ ಎಕ್ ಹಜಾರ್ ವಸ್ತು ದಾರಾರ್ ಯೇವ್ನ್ ಪಾವಿತ್ ಜಾತೆಲ್ಯೊ...' ಕೊಣಾಕ್ ನಾಕಾ ಜಾಲಾ ಹೊ ವಯ್ವಾಟ್? ತವಳ್ ಧಾ ರುಪಯ್ ಮ್ಹಳ್ಯಾರ್ ವ್ಹಡ್ಲೆಂ ಐವಜ್ ತರಿ ಪುಣ್ ಸಬಾರ್ ಜಣ್ ಹ್ಯಾ ಗರಿಯೆಕ್ ಸಾಂಪಡ್ಲೆ ಆನಿ ತ್ಯಾ ಪಯ್ಕಿಂ ಮ್ಹಜೊ ಆಜೊ ಎಕ್ಲೊ ಖಂಯ್. ತೊ ಕಾಂಯ್ ವಯ್‌ವಾಟಿ ನ್ಹಯ್, ಭುರ್ಗ್ಯಾಂಚ್ಯಾ ಮೊಗಾನ್ ದೀಸ್ ಸಾರ್ಚೊ ಮನಿಸ್ ಆನಿ ಕಾಂಯ್ ತರಿ ಉರ್ಲೆ ತವಳ್ ಚಾಲು ಆಸ್ಚ್ಯಾ (ಮೈಸೂರ್‌ಥಾವ್ನ್ ಪ್ರಗಟಿತ್) 'ಯೇಸು ಕ್ರಿಸ್ತನ ದೂತ' ಕನ್ನಡ ಕಡ್ತಿಲೆಕ್ ವರ್ಗಣಿ ಬಾಂಧ್ಚೊ ಭಕ್ತಿಕ್. ತಾಣೆ ಧಾ ರುಪಯ್ ಬಾಂಧ್ಲೆ; ಹೆಂ ಆಪ್ಣಾಚೆಂ ಕರ್ತುಬ್ ತಾಣೆ ಮ್ಹಾಕಾ ಮಾತ್ರ್ ಸಾಂಗ್ಲೆಂ ಆನಿ ಇತ್ಲ್ಯಾ ಆತುರಾಯೆನ್ ಪಾರ್ಸೆಲ್ ಯೆಂವ್ಚ್ಯಾಕ್ ರಾಕೊನ್ ರಾವ್ಲೊ. ಹಾಂವ್‌ಯಿ ರಾಕೊನ್ ರಾವ್ಲೊಂ ಎಕ್ ಹಜಾರ್ ವಸ್ತುಂ ಮಧೆಂ ಮ್ಹಾಕಾ ಕಾಂಯ್ ತರಿ ಮೆಳ್ಟೆಲೆಂ ಮ್ಹಳ್ಳ್ಯಾ ಆಂವ್ಡ್ಯಾನ್.
ಪಾರ್ಸೆಲ್ ಆಯ್ಲೆಂ ಆನಿ ಮ್ಹಜ್ಯಾ ಆಜ್ಯಾನ್ ಭಾರಿಚ್ ದವ್ಲತೇನ್ ಘರ್ಚ್ಯಾ ಸರ್ವಾಂಕ್ ಕಳಯ್ಲೆಂ; ಆತಾಂ ಭಿರಾಂತ್ ನಾತ್‌ಲ್ಲಿ ಮ್ಹಣ್ ನ್ಹಯ್, ತಾಕಾ ಲಾಗುನ್. ಧಾ ರುಪಿಯಾಂಕ್ ಎಕ್ ಹಜಾರ್ ವಸ್ತು? ಪುಣ್ ಪಾರ್ಸೆಲ್ ಪಳೆತಾನಾ ಕಾಂಯ್ ವ್ಹಡ್ ನಾತ್‌ಲ್ಲೆಂ, ಕಾಂಯ್ ಆಮ್ಚ್ಯಾ ಮೆಸ್ತ್ರಿನ್ 'ಚೋಕ್' ದವರ್ಚ್ಯಾ ಕಂಡ್ಡ್ಯಾ ಗಾತ್ರಾಚೊ. ಮ್ಹಾಕಾ ಜಬ್ಬೊರ್ ದುಬಾವ್ ಜಾಲೊ, ತಸೊಚ್ಚ್ ಮ್ಹಜ್ಯಾ ಆಜ್ಯಾಕ್‌ಯಿ ಆಸ್ತೊಲೊ. ''ಮ್ಹಾಕಾ ಹಾಣಿ ಪುಣಿ ಶೆಂಡಿ ಲಾಂವ್ಕ್ ನಾ-ಮೂ-ರೆ, ಬಾಬು?'' ತಾಣೆ ವಿಚಾರ್‌ಲ್ಲೆ ಮ್ಹಾಕಾ ದೊಳೆ ಮೊಡುನ್. ಮ್ಹಜೊ ಆಜೊ ಕಸೊಯಿ ಎಕ್ ಹಾಸ್ಯಾಂಗಾರ್ ಆನಿ ತಾಚೆ ಥಾವ್ನ್ ಹಾಂವ್ ಎಕ್ ಹಾಸ್ಯ್ ಪ್ರಧಾನ್ ಜಿಣಿಯೆಚಿಂ ಲಿಸಾಂವಾಂ ಶಿಕ್ಲಾಂ ಆನಿ ಜಿಣಿಚೊ ಬಂಡ್ವಾಳ್ ಕಸಲೊ ಮ್ಹಳ್ಳೆಂಯಿ ಜಾಣಾಂ ಜಾಲ್ಲೊಂ.
ಪಾರ್ಸೆಲ್ ಬೊಕ್ಸ್ ಉಗ್ತೊ ಜಾಲೊ. ಬೊಕ್ಸಾ ಭಿತರ್ ಎಕ್ ಬೊಕ್ಸ್, ಸೊಬಿತ್ ರ್‍ಯಾಪ್ಪ್‌ರಾಂತ್ ಪ್ಯಾಕ್ ಜಾಲ್ಲೊ. ಹ್ಯಾ ಬೊಕ್ಸಾಂತ್ ಎಕ್ ಹಜಾರ್ ಚೋಕ್ ಸೊಡ್ಯಾಂ ದೋನ್ ಕಾಟ್ ಪುತ್ತು ಶೆಟಿಚ್ಯೊ ಬೀಡಿಯೊ ಸಂಪ್ಚೆ ತಿತ್ಲೆ ಜಾಗೊಯಿ ನಾತ್‌ಲ್ಲೊ. ತರಿ ಪುಣ್ ಆಶಾವಾದಿ ಆಜ್ಯಾನ್ ತೆಂ ರ್‍ಯಾಪ್ಪ್‌ರ್ ಪಿಂಜ್ಲೆಂ ಆನಿ ಬೊಕ್ಸಾ ಭಿತರ್ಲೊ ಬೊಕ್ಸ್‌ಯಿ ಉಸಯ್ಲೊ. ಕಿತೆಂ ದಿಷ್ಟಿಕ್ ಪಡ್ಲೆಂ? ಫಳ್ಪಳೀತ್ ಪಿನ್ನಿಂಚೊ (ಗುಂಡು ಸೂಜಿಂಚೊ) ಎಕ್ ಕಾಟ್ ಆನಿ ಎಕ್ ಚೀಟ್ - 'ಹಾಂತುಂ ಭರ್ತಿ ಎಕ್ ಹಜಾರ್ ಪಿನ್ನಿ ಆಸಾತ್. ಕಾಂಯ್ ಉಣೆ ಪಡ್ಲ್ಯಾರ್ ಆಮಿ ಮುಫ್ತ್ ಪಾವಿತ್ ಕರ್ತೆಲ್ಯಾಂವ್ !'
ಹಾಚ್ಯಾಕಿ ವರ್ತೆಂ ಆನಿ ವ್ಹಡ್ ಶೆಂಡಿ ಕಾತ್ರಾಪ್ ಆಸಾ? ಖಂಚ್ಯಾ ವಕೀಲಾ ಕಡೆನ್ ವೆತಾಯ್? ಎಕ್ ಹಜಾರ್ ವಸ್ತು ಮ್ಹಳ್ಯಾರ್ ಎಕ್ ಹಜಾರ್ ವಸ್ತು ಆಸಾತ್, ನವ್ಯೊಚ್ಚ್, ಡೋರ್ ಡೆಲಿವರಿ ಜಾಲ್ಯಾ ಆನಿ ಫಿರ್ಯಾದೆಕ್ ಕಸಲೊಚ್ಚ್ ಇಂಬು ನಾ. ಶೆಂಡಿ ಲಾಗ್ಚೊ ಉದ್ದೇಶ್ ಜ್ಯಾರಿ ಜಾಲಾ. ಆನಿ ಕಿತೆಂ ಜಾಯ್ ತುಕಾ ಧಾ ರುಪಿಯಾಂಕ್? ಅಸಲ್ಯಾ ಧಖ್ಯಾಕ್ ಸಬಾರ್ ಜಣ್ ಪಡ್ಲ್ಯಾತ್ ಆಸ್ತೆಲೆ, ಪಡ್ಲ್ಯಾತ್ ಆನಿ ಪಡ್ತೆಚ್ ಆಸಾತ್. ಹ್ಯಾ ಮಧೆಂ ಹಾಂವ್‌ಯಿ ಎಕ್ಲೊಂ ಮ್ಹಣ್ ಸಾಂಗೊಂಕ್ ಮ್ಹಾಕಾ 'ಗರ್ವ್' ಭೊಗ್ತಾ. ಹಾಂವ್ ಮ್ಹಾಕಾಚ್ಚ್ ವ್ಹಡ್ಲೊ ತೀಸ್‌ಮಾರ್ ಖಾನ್ ಮ್ಹಣ್ ಸಮ್ಜಾತಾಲೊಂ ಪುಣ್ ಮ್ಹಜ್ಯಾ ಪಿಸಾಯೆಕ್ ಲಾಗುನ್ ಅಸಲ್ಯಾ ಪಿಂಜ್ರ್ಯಾಕ್ ಭಕೀಕ್ ಪಡ್‌ಲ್ಲಿ (victimized) ಕಾಣಿ ವಿವರಿನ್ ತರ್ ತುಮ್ಕಾಂ ಮ್ಹಜಿ ಬಿರ್ಮೊತ್ ದಿಸ್ತೆಲಿ, ಹಾಸೊಯಿ ಯೆತೊಲೊ. ಹಿ ಪರಿಗತ್ ಆನಿ ನಿರಾಶಾ ಮ್ಹಜ್ಯಾ ಪಿಸಾಯೆಕ್ ಲಾಗುನ್ ಆಯಿಲ್ಲಿ ಆನಿ ತಿ ಪಿಸಾಯ್ ಜಾವ್ನಾಸಾ ಸಿನೆಮಾ, ಜಿ ಆತಾಂಯಿ ಜ್ಯಾರಿ ಆಸಾ ಆನಿ ದಿಸಾಕ್ ಎಕ್ ಫಿಲ್ಮ್ ಪಳೆನಾ ತರ್ ಮ್ಹಾಕಾ ನೀದ್ ಪಡಾನಾ. ದೆಕುನ್ ರಾತಿಚ್ಯಾ ನೋವ್ ಘಂಟ್ಯಾ ಥಾವ್ನ್ ಕೊಣಾಚೆಂಯಿ ಫೋನ್ ಆಯ್ಲೆಂ ತರ್ ಹಾಂವ್ ಚಿಡ್ತಾಂ. ಹ್ಯೆ ಪಿಸಾಯೆ ವಿಶಾಂತ್ ಜಾಣಾಂ ಆಸ್‌ಲ್ಲೆ ನೋವ್ ಘಂಟ್ಯಾ ಉಪ್ರಾಂತ್ ಚತ್ರಾಯಿ ಜಾತಾತ್ ಆನಿ ಮ್ಹಾಕಾ 'ಧೊಶಿ'ನಾಂತ್ ಮ್ಹಣ್ ಹಾಂವ್ ಜಾಣಾಂ. ಆಸುಂ.
ಹಿ ಶೆಂಡಿ ಕಾಪ್ಣೆಚಿ ಕಥಾ ಎಕಾ ದಿಸಾಳ್ಯಾ ಥಾವ್ನ್ ಸುರು ಜಾತಾ, ಅಶಿ :
ತ್ಯಾ ದಿಸಾಳ್ಯಾರ್ ಸದಾಂನೀತ್ ಮ್ಹಳ್ಳೆಪರಿ ಹೆಂ ಜಾಯ್ರಾತ್ ಛಾಪುನ್ ಯೆತಾಲೆಂ: ಘರಾ ಬಸುನ್ಂಚ್ ತುಮ್ಚ್ಯಾ ಮೊಗಾಚಿಂ ಚಿತ್ರಾಂ ಪಳೆಯಾ! ಆಜ್‌ಚ್ಚ್ ಹಾಡಯಾ ಹೋಮ್ ಪ್ರೊಜೆಕ್ಟರ್. 35mm ಹೋಮ್ ಪ್ರೊಜೆಕ್ಟರ್ ಹಾಡಯಾ. ತುಮ್ಕಾಂ ಮೆಳ್ತೆಲೊ ಎಕ್ ಪ್ರೊಜೆಕ್ಟರ್, ದೊನ್ಶಿಂ ಫುಟ್ ಲಾಂಬಾಯೆಚೆಂ ಎಕ್ ಫಿಲ್ಮ್, ಪಡ್ದೊ, ಎಕ್ ಬಲ್ಬ್, ಆನಿ ತುಮ್ಚ್ಯಾ ಪಸಂದೆಚೆ ಫಿಲ್ಮ್. ಸರ್ವ್ ಫಕತ್ 80 ರುಪಿಯಾಂಕ್. ಆಜ್‌ಚ್ಚ್ ತಲಬ್ ಕರಾ ಆನಿ ತುಮ್ಚ್ಯಾ ಪಸಂದೆಚೆಂ ಫಿಲ್ಮ್ ಘರಾಂತ್‌ಚ್ಚ್ ಸುಶೆಗಾಂತ್ ಬಸುನ್ ಪಳೆಯಾ. ಪ್ರೊಜೆಕ್ಟರ್ ತುಮ್ಕಾಂ ಡೋರ್ ಡೆಲಿವರಿ ಜಾವ್ನ್ ಪಾವಿತ್ ಜಾತೊಲೊ, ಕಸಲೆಚ್ ಚಡಿತ್ ಚಾರ್ಜ್ ನಾಂತ್!
ಮ್ಹಜಿ ಆತುರಾಯ್ ಇತ್ಲಿ ಜುನೆಲಿಕಿ ಹಾಂವೆಂ ಮಾಮ್ಮಿಕ್ ಗುರ್ಮಾಂ ಘಾಲಿಂ ಆನಿ ಹೊ ಪ್ರೊಜೆಕ್ಟರ್ ಹಾಡಯಾಂ ಮ್ಹಣ್ ತಿಕಾ ಮಂತ್ರಾಂ ಘಾಲಿಂ. ತಿಕಾಯಿ ಫಿಲ್ಮಾಂಚೆಂ ಪಿಶೆಂ ಆಸ್‌ಲ್ಲೆಂ ಆನಿ ಥೊಡ್ಯಾ ದಿಸಾಂಚ್ಯಾ ಸತತ್ ಪ್ರೇತನಾನ್ ತಿಣೆ ಮ್ಹಜ್ಯಾ ಗ್ರಾಣ್ಯಾನ್ ಕುವೇತಾಂತ್ ಆಸ್‌ಲ್ಲ್ಯಾ ಆಪ್ಲೆ ಭಯ್ಣಿಕ್ ಬರವ್ನ್ ಘಾಲ್ನ್ ಪ್ರೊಜೆಕ್ಟರಾಕ್ ಒರ್ಡರ್ ಕೆಲೊ. ಮ್ಹಜ್ಯಾ ಸಂತೊಸಾಕ್ ಗಡ್‌ಚ್ ನಾ. ವಳ್ಕಿಚ್ಯಾ ಸರ್ವಾಂಕ್ ಹಾಂವೆಂ ಕಳಯ್ಲೆಂ ಆನಿ 'ಕೊಣೆಂಯಿ ಫಿಲ್ಮ್ ಪಳೆಂವ್ಕ್ ಸಿನೆಮಾ ಥಿಯೆಟರಾಕ್ ವಚಾಜೆ ಮ್ಹಳ್ಳಿ ಗರಜ್ ನಾ, ಹಾಂವ್ ತುಮ್ಕಾಂ ತಾರೀಕ್ ಕಳಯ್ತಾಂ ಆನಿ ತುಮಿಂ ಯೆವ್ನ್ ಧರ್ಮಾರ್ಥ್ ಫಿಲ್ಮ್ ಪಳೆಯಾ.'
ಪ್ರೊಜೆಕ್ಟರಾಚ್ಯಾ ಡೋರ್ ಡೆಲಿವರಿಚಿ ತಾರಿಕ್ ಲಾಗಿಂ ಯೆತಾ ಯೆತಾಂ ಮ್ಹಜಿ ಆತುರಾಯ್ ಚಡ್ಲಿ ಆನಿ ರಾತಿಚೆಂ ನೀದ್ ಪಡಾನಾ ಜಾಲಿ. ಸಿನೆಮಾಚೊ ಪಡ್ದೊ ಖಂಯ್ ಶಿರ್ಕಾಂವ್ಚೊ, ಕಾಳೊಕ್ ಕಸೊ ಕರ್ಚೊ ಇತ್ಯಾದಿಚಿ ತಯಾರಾಯ್ ಹಾಂವೆಂ ಕೆಲಿ ಆನಿ ಮ್ಹಜೊ ಸೆಜಾರಿ ಆನಿ ಮಿತ್ರ್ ಡೊಲ್ಫಿ ಹಾಚೆ ಮಜತೀನ್ ಮ್ಹಜೆಂ ಫಿಲ್ಮ್ ಥಿಯೆಟರ್ ತಯಾರ್ ಜಾಲೆಂ ಆನಿ ಸದಾಂಯಿ ಪ್ರೊಜೆಕ್ಟರಾಕ್ ರಾಕೊನ್ ರಾಂವ್ಚೆಂ ರೂಟೀನ್ ಜಾವ್ನ್ ಗೆಲೆಂ. ಸದಾಂನೀತ್ ಪೋಸ್ಟ್‌ಮೆನಾಲಾಗಿಂ 'ಆಯ್ಲಾ ಗಿ, ಆಯ್ಲಾಗಿ' ಮ್ಹಣ್ ವಿಚಾರ್ಚೆಂ. ತಾಕಾಚ್ (ಪೋಸ್ಟ್‌ಮೆನಾಕ್) ವಿರಾರಾಯೆಚೆಂ ಜಾತಾನಾ ಪ್ರೊಜೆಕ್ಟರಾಚೊ ಬೊಕ್ಸ್ ಆಯ್ಲೊ. ಭಾರಿಚ್ಚ್. ಸೊಭಿತ್ ಬೊಕ್ಸ್, ಭಾಯ್ರ್, ಬೊಕ್ಸಾಚೆರ್ ಪ್ರೊಜೆಕ್ಟರಾಚೆಂ ಚಿತ್ರ್ ಆನಿ ಥೊಡ್ಯಾ ಭುರ್ಗ್ಯಾಂನಿ ಎಕ್ ಮೇಳ್ ಜಾವ್ನ್ ಸಿನೆಮಾ ಪಳೆಂವ್ಚೆಂ ರಂಗೀನ್ ದೃಶ್ಯ್, ಕೊಣಾಯ್ಕಿ ಪಿಶಾರ್ ಘಾಲ್ಚೆಂ ತಸಲೆಂ. ಕಾಂಪ್ಚ್ಯಾ ಹಾತಾಂನಿ ಹಾಂವೆಂ ಬೊಕ್ಸ್ ಉಸಯ್ಲೊ. ನಿಳ್ಶಾ ರಂಗಾಚೊ ಪ್ರೊಜೆಕ್ಟರ್ - ಸರ್ವ್ ಸಾಮಾಗ್ರ್ಯೊ ತಾಕಾ ಆಸ್‌ಲ್ಲ್ಯೊ, ಎಕ್ ರೀಲ್, ಫಿಲ್ಮ್, ಪಡ್ದೊ, ಬಲ್ಬ್, ಹೋಲ್ಡರ್ ಆನಿ ಸರ್ವ್... ಎಕಾ ಹೋಮ್ ಥಿಯೆಟರಾಕ್ ಜಾಯ್ ಆಸ್ಚ್ಯೊ ಸರ್ವ್ ಸಾಮಾಗ್ರ್ಯೊ ಆಸ್‌ಲ್ಲ್ಯೊ ಪುಣ್ ಪ್ರೊಜೆಕ್ಟರ್ ಚಲಂವ್ಕ್ ಮಾತ್ರ್ ಮೋಟ್‌ರ್ ನಾತ್‌ಲ್ಲೊ, ಫಿಲ್ಮ್ ಶಿರ್ಕಾಯ್ಲ್ಯಾ ಉಪ್ರಾಂತ್ ಎಕಾ ಹಾತಾಳ್ಯಾನ್ ಘುಂವ್ಡಾವ್ನ್ ತೊ ಚಾಲು ಕರಿಜಾಯ್ ಆಸ್‌ಲ್ಲೊ. ಕಾಂಯ್ ನ್ಹಜೊ.
ಹಾಂವೆಂ ಲಾಯ್ಟ್ ಬಂದ್ ಕೆಲೆ, ಕುಡಾಂತ್ ಕಾಳೊಕ್ ಕೆಲೊ ಆನಿ ಬಲ್ಪ್ ಪೆಟವ್ನ್ ಪಳೆಲೆಂ, ಪಡ್ದ್ಯಾಚೆರ್ ಚಿತ್ರ್ ಪಡ್ತಾ. ಬಚಾವ್, ಚಿಂತ್ಲೆಂ ಹಾಂವೆಂ. ಮಾಮ್ಮಿ ಮಾರ್ಕೆಟಿಕ್ ಗೆಲ್ಲಿ, ಬರ್‍ಯಾಕ್‌ಚ್ ಪಡ್ಲೆಂ. ಹಾಂವೆಂ ಹಾತಾಳೊ ಘುಂವ್ಡಾಯ್ತಾನಾ ಕಿಟಿಕಿಟಿ ಕರುನ್ ಪಡ್ದ್ಯಾರ್ ಚಿತ್ರ್ ಪಡ್ಲೆಂ ಪುಣ್ ಕಿತೆಂ ಸಾಂಗ್ಚೆಂ, ಚಿತ್ರ್ ಪಡ್ದ್ಯಾಚೆರ್ ಚಾಲುಚ್ಚ್ ಜಾಯ್ನಾ. ಎಕ್‌ಚ್ ದೃಶ್ಯ್ ಘುಂವೊನ್೦ಚ್ ಆಸಾ, ಕಸಲೆಂಚ್ ಚಲನ್ ತ್ಯಾ ಫಿಲ್ಮಾಕ್ ನಾ, ಸೌಂಡ್ ಕಸೊಯಿ ನಾ ಮ್ಹಣ್ಯಾಂ. ದೊನ್ಶಿಂ ಫುಟಿಂಚ್ಯಾ ಫಿಲ್ಮಾಂತ್ ಕಸಲೆಂಚ್ ದೃಶ್ಯ್ ಬದ್ಲಾಲ್ಲೆಂ ನಾ, ನವೆಸಾಂವ್ ಆಯಿಲ್ಲೆಂ ನಾ. ಹಾಂವ್ ರಡೊಂಕ್‌ಚ್ ಜಾಲೊಂ. ಮ್ಹಜ್ಯಾ ಸೆಜಾರಾ ಪೊಲಿಟೆಕ್ನಿಕ್ ಶಿಕ್ಚೊ ಎಕ್ಲೊ ಚಲೊ ಆಸ್‌ಲ್ಲೊ, ತಾಕಾ ಆಪಯ್ಲೊ. ತಾಣೆ ಸತತ್ ಪ್ರೇತನ್ ಕರುನ್ ಪ್ರೊಜೆಕ್ಟರ್ ಚಾಲು ಕೆಲೊ ಪುಣ್ ಕಸಲೊಚ್ಚ್ ಫಾಯ್ದೊ ನಾ. 'ತುಕಾ ತ್ಯಾ ಕಂಪೆನಿನ್ ಡಬ್ಬೊ ಧಾಡ್ಲಾ' ತಾಣೆ ತೀರ್ಪ್ ದಿಲೆಂ. ಹಾಂವ್ ರಡ್ಲೊಂಚ್.
ತಿತ್ಲ್ಯಾರ್ ಮಾರ್ಕೆಟಿಕ್ ಗೆಲ್ಲಿ ಮ್ಹಜಿ ಮಾಮ್ಮಿ ಘರಾ ಆಯ್ಲಿ ಆನಿ ಥೊಡ್ಯಾ ಮಿನುಟಾಂಕ್ ಸರ್ವಾಂಚೆಂ ಗಮನ್ ಪ್ರೊಜೆಕ್ಟರಾ ವಯ್ಲೆಂ ಉಟೊನ್ ಮಾಮ್ಮಿನ್ ಹಾಡ್‌ಲ್ಲ್ಯಾ ಮಾಸ್ಳೆಚೆರ್ ಬಸ್ಲೆಂ ಆನಿ ಹಾಂವ್ ಸದ್ದ್ಯಾಕ್ ಬಚಾವ್ ಜಾಲೊಂ ಪುಣ್ ಚಡ್ ವೆಳಾಕ್ ನ್ಹಯ್. ಅಂಕಲಾನ್ ಆನಿ ಆಂಟಿನ್ ಆನಿ ಮ್ಹಜ್ಯಾ ಕಜನಾಂನಿ ಕೆಲ್ಲ್ಯಾ ಪ್ರೇತನಾಂತ್ ತ್ಯಾ ಡೋರ್ ಡೆಲಿವರಿ ಕಂಪೆನಿನ್ ಮ್ಹಜಿ ಶೆಂಡಿ ಆಪುರ್ಬಾಯೆನ್ ಕಾಪ್ಲ್ಯಾ ಮ್ಹಳ್ಳಿ ಖರಿ ಗಜಾಲ್ ಮ್ಹಜ್ಯಾ ಗಮನಾಕ್ ಯೆತಾನಾ ಹಾಂವ್ ಪರಿಪೂರ್ಣ್ ಗಳೊನ್ ಗೆಲ್ಲೊಂ. ಮಾಮ್ಮಿನ್ ಮ್ಹಾಕಾ ಚಡ್ ಜರಯ್ಲೆ ನಾ ಇತ್ಲೆಂ ಮ್ಹಳೆಂ ಕಿ, ''ತುಜ್ಯಾ ಆಂಟಿ ಲಾಗಿಂ ಪಯ್ಶೆ ಆಸ್‌ಲ್ಲ್ಯಾನ್ ತುಜ್ಯಾ ಪಿಶೆಂಪಣಾಕ್ ಅವ್ಕಾಸ್ ಲಾಬ್ಲೊ ನಾತರ್ ಸಾಟ್ ಸತ್ತರ್ ರುಪಿಯಾಂಕ್ ತುಕಾ ಪ್ರೊಜೆಕ್ಟರ್ ಮೆಳ್ಟಾ? ಆನಿ ಪುಣಿ ಹೆಂ ಪಿಶೆಂಪಣ್ ಸಾಂಡ್; ಜಾಯ್ ತರ್ ಹಫ್ತ್ಯಾಕ್ ಎಕ್ ಸಿನೆಮಾ ಪಳೆಂವ್ಕ್ ಹಾಂವ್ ತುಕಾ ಟಿಕೆಟಿಚೊ ಖರ್ಚ್ ದಿತಾಂ...''
ಅಶೆಂ ಆತಾಂಯಿ ಘಡ್ತಾ ಆನಿ ಘಡೊನ್ಂಚ್ ಆಸಾ. ಡೋರ್ ಡೆಲಿವರಿ ಮ್ಹಳ್ಳ್ಯಾ ಪಾಸಾಂತ್ ಸಬಾರ್ ಜಣ್, ಚಡ್ ಕರುನ್ ಸ್ತ್ರೀಯೊ ಸಾಂಪಡ್ತಾತ್. ಡೋರ್ ಡೆಲಿವರಿ ಮ್ಹಳ್ಳೆ ಹೆ ದೋನ್ ಸಬ್ದ್ ಕಸಲೆಂ 'ಮ್ಯಾಜಿಕ್' ಕರ್ತಾತ್ ಮ್ಹಳ್ಳಿ ಸಂಗತ್ ಸಬಾರಾಂಚ್ಯಾ ಮತಿಕ್ ವಚಾನಾ ಯಾ ಸಮ್ಜಾನಾ. ಹೆಂ ಮ್ಯಾಜಿಕ್ ಭಾರಿಚ್ಚ್ ಅಪಾಯಾಚೆಂ ಕಿತ್ಯಾಕ್ ಎಕ್ ಪಾವ್ಟಿಂ ಹಾಡ್‌ಯಿಲ್ಲ್ಯೊ ಸಾಮಾಗ್ರ್ಯೊ ಪಾಟಿಂ ಧಾಡುಂಕ್ ಆಸ್ಚೆ ಅವ್ಕಾಸ್ ಭಾರಿಚ್ ಉಣೆಂ ಕಿತ್ಯಾಕ್ ಹ್ಯೊ ಕಂಪೆನಿ ತಾಂಚೊ ವಿಳಾಸ್ ಸಾರ್ಕೊ ದೀನಾಂತ್. ದಿಲ್ಲೊ ಎಕ್ ವಿಳಾಸ್ ಆಸ್ಲ್ಯಾರಿ ತೊ ಬನಾವಟಿ.
ಪುಣ್ ಆತಾಂ ಪರಿಗತ್ ಸುಧಾರ್ಲ್ಯಾ. ಡೋರ್ ಡೆಲಿವರಿ ಆನಿ ಸಾಮಾಗ್ರ್ಯೊ ವಾಪಸ್ ಕರ್ಚಿ ಸವ್ಲತಾ ಪ್ರತಿಷ್ಟಿತ್ ಕಂಪೆನಿ ದಿತಾತ್ ಆನಿ ಗಿರಾಯ್ಕಾಂಕ್ ಶೆಂಡಿಲಾಂವ್ಚಿ ಪರಿಗತ್ ಯೆಂವ್ಚಿ ಭಾರಿಚ್ ಉಣಿ, ಕಿತ್ಯಾಕ್ ಆಜ್‌ಕಾಲ್ಚೊ ವಯ್ವಾಟ್ ಚಡಾವತ್ ಅಸಲ್ಯಾ ಕಂಪೆನಿಂಚ್ಯಾ ಆಧಾರಾರ್‌ಚ್ ಚಲ್ತಾತ್ ಆನಿ ಎಕಾ ಕಂಪೆನಿನ್ ಧಗೊ ಕೆಲ್ಯಾರ್ ಖಬರ್ ಘಡ್ಯೆ ಬಿತರ್ ಪ್ರಸರ್‍ತಾ ಆನಿ ಸಹಜ್ ಜಾವ್ನ್ ತ್ಯಾ ಕಂಪೆನಿಚೆರ್ ಗಿರಾಯ್ಕಾಂಕ್ ಆಸ್ಚೊ ಭರ್ವಸೊ ಘಡಿಯೆ ಬಿತರ್ ಪಿಗ್ಳಾತಾ. ತರಿ, ಸಾವ್ದಾನ್, ಚತ್ರಾಯ್ ಸಾಂಬಾಳಾ, ಪಾತ್ಯೆಣಿ ದವರ್ತಾನಾ ಚತ್ರಾಯಿತ್ ಜಾಯಾ ಡೋರ್ ಡೆಲಿವರಿ ಮ್ಹಣ್ ಪಾಸಾಂತ್ ಸಾಂಪಡ್ನಾಕಾತ್. ಸಾವ್ದಾನ್!
Tags:
Door Delivery, Edwin JF Dsouza, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/18/2021 ಕೆನಡಾಂತ್ 'ನವೊ ಭರ್ವಸೊ' ನವೆಂ ಪದ್...
-
-
2/27/2021 ಹೆರೊಲ್ಪಿಯುಸ್: ಏಕ್ ಅವ್ಚಿತ್ ಭೆಟ್...
-
12/20/2020 ಯುವಜಣಾಂಕ್ ಪ್ರೇರಣ್ - ಜೆಸ್ಸಿಕಾ ಆನ್ನಾ ಲಿಝಾ...
-
12/6/2020 ಆಸ್ತ್ ........
-
11/25/2020 ಭಾರತಾಚಿಂ ಖಬ್ರೆ ಟಿವಿ ಚಾನೆಲಾಂ ಮರಣ್ ಪಾವ್ಲ್ಯ...
-
11/9/2020 ನಾಂವ್ ಬದಲ್ಲ್ಯಾನ್ ಗಾಂವ್ ಬದಲ್ನಾಂ...!...
-
10/17/2020 ಮಂಗ್ಳುರ್‌ಚೊ ಖ್ಯಾತ್ ಗ್ರಾಫೊಲೊಜಿಸ್ಟ್, ಸ್ಟೇ&...
-
-
-
12/18/2021 ಕೆನಡಾಂತ್ 'ನವೊ ಭರ್ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.