From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಕೊರೊನಾ - ದಾಯ್ಜಿವರ್ಲ್ಡ್ ಟಿವಿಚೆಂ ವಿಂಚ್ಣಾರ್ ಮಿಸಾಂವ್
Monday, May 25, 2020
ಕೊರೊನಾ ವೈರಸಾನ್ ಆಮ್ಕಾಂ ಜಾಯ್ತಿಂ ಲಿಸಾಂವಾಂ ಶಿಕಯ್ಲಿಂ. ಲೊಕ್‌ಡಾವ್ನಾ ಸಂದರ್‍ಭಾರ್ ಆಮ್ಚ್ಯಾ ಸೆಜಾರಾ, ಆಮ್ಚೆ ಭೊವಾರಿಂ, ಆಮ್ಚ್ಯಾ ವಾಡ್ಯಾಂತ್, ಫಿರ್‍ಗಜಿಂತ್ ಆನಿ ಹೆರ್ ಜಾಗ್ಯಾಂನಿ ಲೋಕ್ ಕಶ್ಟಾಂಕ್ ಸಾಂಪಡ್ಲಲ್ಯಾ ವೆಳಾರ್ ಜಾತ್, ಕಾತ್ ಆನಿ ಧರ್ಮ್ ಪಳೆನಾಸ್ತಾಂ ಸಬಾರ್ ಫಿರ್‍ಗಜ್ ಯಾಜಕಾಂನಿ, ವಿವಿದ್ ಧಾರ್‍ಮಿಕ್ ಮೆಳಾಂಚ್ಯಾ ಫ್ರಾದಿಂನಿ ಆನಿ ಧಾರ್‍ಮಿಕ್ ಭಯ್ಣಿಂನಿ, ವಿವಿದ್ ಸಂಘ್ ಸಂಸ್ಥ್ಯಾಂನಿ, ಬೆಸರ್‍ಕಾರಿ ಸಂಘಟನಾಂನಿ ಲೊಕಾಚ್ಯಾ ಗರ್‍ಜಾಂಕ್ ಪಾವ್‌ಲ್ಲೆಂ ತೆಂ ಪಳೆತಾನಾ, ಸರ್ವ್ ಧರ್‍ಮಾಂ ಪ್ರಾಸ್ ಶ್ರೇಶ್ಟ್ ಧರ್ಮ್ ಮನ್ಶಾಪಣ್ ಮ್ಹಣ್ ರುಜು ಜಾಲೆಂ.
ಆಮ್ಚ್ಯಾ ಭೊಂವಾರಿಂ ವಿವಿದ್ ಸಮುದಾಯಾಂನಿ ಚಲ್ಚ್ಯಾ ಕಾಜಾರಾಚ್ಯಾ ವ ಹೆರ್ ವ್ಹಡ್ ವ್ಹಡ್ ಸಂಭ್ರಮಿಕ್ ಕಾರ್‍ಯಾಚಾ ಬುಫೆ ಜೆವ್ಣಾಂನಿ, ಪ್ರತ್ಯೇಕ್ ಜಾವ್ನ್ ಆಮ್ಚ್ಯಾ ಮಂಗ್ಳುರಿ ಕೊಂಕ್ಣಿ ಕಥೊಲಿಕ್ ಸಮುದಾಯಾಚ್ಯಾ ಕಾಜಾರಾಂ ಸೊಭಾಣಾಂನಿ, ವೋಲ್, ಕುಮ್ಗಾರ್, ಜುಬ್ಲೆವ್ ಆನಿ ಹೆರ್ ಸಂಬ್ರಮಾಂನಿ ಖಾಣಾಂ ಜೆವ್ಣಾಂಚೊ ವಿಭಾಡ್ ಕೆಲ್ಲ್ಯಾ ಆನಿ ಅರ್‍ದೆಂ ಜೇವ್ನ್ ಉರ್‌ಲ್ಲೆಂ ಕಚ್ರ್ಯಾ ಡಬ್ಬ್ಯಾಕ್ ಉಡಯಿಲ್ಲ್ಯಾ ಆಮ್ಕಾಂ, ಖಂಡಿತ್ ಜಾವ್ನ್ ಹ್ಯಾ ಕಶ್ಟಾಂಚಾ ಕಾಳಾರ್ ಏಕ್ ಉಂಡಿ ಶಿತಾಚೊ ವ ಏಕ್ ದೋಯ್ ಪೆಜೇ-ನಿಸಾಚೊಚೊ ಉಗ್ಡಾಸ್ ಆಯ್ಲೊ. ಆನಿ ಆಮಿ ಜಿಣಿಭರ್ ವಿಸ್ರೊಂಕ್ ನಜೊ ತಸಲೆಂ ಲಿಸಾಂವ್ ದೆವಾನ್ ಆನಿ ಪ್ರಕೃತೆನ್ ಆಮ್ಕಾಂ ಶಿಕಯ್ಲೆಂ. ಮನ್ಶಾ ಥಂಯ್ ಆಸ್ಚೊ ಹಂಕಾರ್, ವ್ಹಡ್ಪಣ್, ದವ್ಲತ್, ದರ್‍ಬಾರ್, ದಳ್ಬಾರ್, ಮಿಜಾಸ್ಕಿ ಆನಿ ಗಿರೆಸ್ತ್‌ಕಾಯ್ ಕೊರೊನಾ ವೈರಸಾ (ಕೊವಿದ್ - 19) ತಸಲ್ಯಾ ಮಹಾಮಾರಿ ಮುಕಾರ್ ಕಾಸಾಕ್‌ಯಿ ಉಪ್ಕಾರನಾ ವ ಫಾಯ್ದ್ಯಾಕ್ ಪಡನಾ ಮ್ಹಳ್ಳೆಂ ರುಜು ಜಾಲೆಂ. ಸಾಂಗಾತಾಚ್ ಮನ್ಶಾಪಣಾಚೆಂ ಮೋಲ್ ಆನಿ ಮಹತ್ವ್ ಕಳಿತ್ ಜಾಲೆಂ. ಮನ್ಶಾಪಣ್ ಆನಿ ಕ್ರಿಸ್ತಾಂವ್‌ಪಣ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಆಮ್ಕಾಂ ರೂಪ್‌ರೂಪ್ ಪಳೆಂವ್ಕ್ ಆನಿ ಭೊಗುಂಕ್ ಮೆಳ್ಳೆಂ.
ಸಮಾಜಿಕ್ ಜವಾಬ್ದಾರಿ :
ಎಕಾ ಮಾದ್ಯಮಾಚಿ ಸಮಾಜಿಕ್ ಜವಾಬ್ದಾರಿ ಕಿತೆಂ ಮ್ಹಳ್ಳೆಂ ಹ್ಯಾ ಎಕಾ ಘಡಿತಾವರ್‍ವಿಂ ಕಳಿತ್ ಜಾತಾ.
ತಲಪಾಡಿಲಾಗಿಂ ಶಿವಮೊಗ್ಗಾ ಜಿಲ್ಲ್ಯಾಚಾ ಶಿಕಾರಿಪುರ ತಾಲೂಕಾಚೆ ಸಬಾರ್ ಕಾಮೆಲಿ ಕಶ್ಟಾಂತ್ ಸಾಂಪ್ಡಲ್ಲೆ. ತಾಂಚೆಪಯ್ಕಿ ಎಕ್ಲಿ ಗರ್‍ಬೆಸ್ತ್ ಸ್ತ್ರೀಯಿ ಆಸ್‌ಲ್ಲಿ. ತಾಂಕಾಂ ಗಾಂವಾಕ್ ವಚೊಂಕ್ ಜಾಯ್ ಆಸ್‌ಲ್ಲೆಂ. ಪುಣ್ ಸಾದ್ಯ್ ನಾತ್‌ಲ್ಲೆಂ. ಅಸಲಿ ಪರಿಸ್ಥಿತಿ ಸಮ್ಜಲ್ಲ್ಯಾ ದಾಯ್ಜಿವರ್ಲ್ಡ್ ಟಿವಿನ್ ಹೊ ವಿಶಯ್ ಸಂಬಂದ್ ಜಾಲ್ಲ್ಯಾಂ ವ್ಯಕ್ತಿಂ ಮಾರಿಫತ್ ಮುಕೆಲ್ ಮಂತ್ರಿ ಯಡಿಯೂರಪ್ಪಾಚಾ ಗುಮಾನಾಕ್ ಹಾಡ್ಲೊ. ತಾಣೆಂ ತಕ್ಶಣ್ ಜಿಲ್ಲಾಡಳಿತಾ ಮುಕಾಂತ್ರ್ ಬಸ್ಸಾಚಿ ವಿಲೆವರಿ ಕರುನ್ ತ್ಯಾ ಕಾಮೆಲ್ಯಾಂಕ್ ತಾಂಚಾ ಗಾಂವಾಕ್ ಪಾವಯ್ಶೆಂ ಕೆಲೆಂ.
ಬರೆ ಸಾಮಾರಿಯಾಗಾರ್ :
ಬೆಂಗ್ಳುರ್‌ಚಾ ಜೆಜ್ವಿತ್ ವಿದ್ಯಾ ಸಂಸ್ಥ್ಯಾಂನಿ 43 ಹಜಾರಾಂ ವಯ್ರ್ ಗರ್‍ಜೆವಂತ್ ಕುಟ್ಮಾಂಕ್ ಮಜತ್ ಕೆಲ್ಯಾ. ಹಿ ಗಜಾಲ್ ಸಮ್ಜಲ್ಲ್ಯಾ ಮುಕೆಲ್ ಮಂತ್ರಿ ಯಡಿಯೂರಪ್ಪಾನ್ ಜೆಜ್ವಿತ್ ಪ್ರೊವಿನ್ಶಿಯಲಾಕ್ ಉಪ್ಕಾರ್ ಬಾವ್ಡುನ್ ಪತ್ರ್ ಬರಯ್ಲಾಂ.
ಕಾರ್‍ಕಳ್ ಅತ್ತೂರ್ ಸಾಂ. ಲೊರೆಸಾಚ್ಯಾ ಪೂನ್ ಶೆತಾಲಾಗ್ಸಾರ್ ಆಸ್ಚಾ ಬಾಂದ್ಪಾಂನಿ ಮುಂಬಯಿಥಾವ್ನ್ ಆಯಿಲ್ಲ್ಯಾ ಚಡುಣೆ 50 ಜಣಾಂಕ್ ಕ್ವಾರಂಟೈನಾಕ್ ಘಾಲಾಂ. ಆನಿ ತಾಂಕಾಂ ಸರ್‍ವಾಂಕ್ ಖಾಣಾ-ಜೆವ್ಣಾಚಿ ವಿಲೆವರಿ ಕೆಲ್ಯಾ.
ಲಗ್‌ಬಗ್ 400 ಕಾಮೆಲಿ ಲೋಕ್ ರಯ್ಲಾರ್ ಬಿಹಾರ್, ಜಾರ್‍ಖಂಡ್, ಗೊರಖ್‌ಪುರ್ ಪಯ್ಣ್ ಕರ್‍ಚಾಖಾತಿರ್ ಮಂಗ್ಳುರ್ ಶ್ಹರಾಂತ್ ಜಮ್‌ಲ್ಲೆ. ತಾಂಕಾಂ ರುಜಾಯ್ ಕಾಥೆದ್ರಾಲಾಚ್ಯಾ ವಿದ್ಯಾ ಸಂಸ್ಥ್ಯಾಚಾ ಹೊಲಾಂನಿ ಆನಿ ಕುಡಾಂನಿ ವಸ್ತೆಚಿ ಆನಿ ಖಾಣಾ-ಜೆವ್ಣಾಚಿ ವಿಲೆವರಿ ಕೆಲ್ಯಾ.
ಅಧಿಕಾರಿಂಕಡೆ ಸಂವಾದ್ :
ವೊಲ್ಟರ್ ನಂದಳಿಕೆನ್ ಮಂಗ್ಳುರ್‌ಚೊ ಪೊಲಿಸ್ ಕಮೀಶನರ್ ಡೊ| ಹರ್ಷ ಆನಿ ಹೆರ್ ಅಧಿಕಾರಿಂಲಾಗಿಂ ಲೊಕ್‌ಡಾವ್ನಾ ಸಂಬಂದಿಂ ಸಂವಾದ್ ಚಲಯ್ಲಾ. ಗಲ್ಫಾಂತ್ ವಾವುರ್ನ್ ಆಸ್ಚಾ ಆಮ್ಚಾ ಕನ್ನಡಿಗಾಂಚೆ ಕಶ್ಟ್ ಆನಿ ಸಮಸ್ಯಾ ಸಮ್ಜೊನ್ ಘೆವ್ನ್ ಸರ್‍ಕಾರಾಚಾ ಸಮೊರ್ ದವೊರುನ್ ತಾಂಕಾಂ ಜೊಕ್ತೊ ಪರಿಹಾರ್ ಲಾಬೊಂವ್ಚೆಂ ಪ್ರಯತನ್ ಕೆಲಾಂ.
ಗಿರಾಯ್ಕಾಂಕ್ ಮೆಸ್ಕಮ್ ಥಾವ್ನ್ ಅಧಿಕ್ ಮಾಪಾಚಿಂ ಬಿಲ್ಲಾಂವಿಶಿಂ ದುರಾಂ ಆಯಿಲ್ಲ್ಯಾವೆಳಾರ್ ದಾಯ್ಜಿವರ್ಲ್ಡ್ ಟಿವಿನ್ ಮೆಸ್ಕಮ್ ಆಡಳ್ತ್ಯಾ ನಿರ್‍ದೇಶಕಾಕಡೆ ಸಂವಾದ್ ಚಲೊವ್ನ್ ಪರಿಹಾರ್ ಸೊದುನ್ ದಿಂವ್ಚೆಂ ಪ್ರಯತನ್ ಕೆಲಾಂ.
ಮನೋರಂಜನ್ :
ಲೊಕ್‌ಡಾವ್ನಾವೆಳಿಂ ಘರಾಚ್ ಬಸೊನ್ ಉಬ್ಗೊಣ್ ಆಯಿಲ್ಲ್ಯಾ ಲೊಕಾಚಾ ವೊಂಟಾಂಚೆರ್ ಇಲ್ಲೊಸೊ ಹಾಸೊ ಹಾಡೊಂವ್ಚೆ ಖಾತಿರ್ ದಾಯ್ಜಿವರ್ಲ್ಡ್ ಟಿವಿರ್ 'ಕೊರೊನಾ ಗೆಲ್ಲೋಣ' ಮ್ಹಳ್ಳೆಂ ಕಾರ್‍ಯಕ್ರಮ್ ದಿಸ್ಪೊಡ್ತೆಂ ಪ್ರಸಾರ್ ಜಾಲೆಂ. ಹಾಂತುಂ ತುಳು ನಾಟಕ್ ಆನಿ ಸಿನೆಮಾ ಶೆತಾಂತ್ಲೆ ಲೊಕಾಮೊಗಾಳ್ ಹಾಸ್ಯ್ ಕಲಾಕಾರ್ - ಅರವಿಂದ ಬೋಳಾರ್, ದೇವ್‌ದಾಸ್ ಕಾಪಿಕಾಡ್, ನವೀನ್ ಡಿ.ಪಡೀಲ್, ಭೋಜರಾಜ್ ವಾಮಂಜೂರ್, ರೂಪೇಶ್ ಶೆಟ್ಟಿ, ಅರ್ಜುನ್ ಕಾಪಿಕಾಡ್, ಪಟ್ಲ ಸತೀಶ್ ಶೆಟ್ಟಿ(ಯಕ್ಶಗಾನ), ಸತೀಶ್ ಬಂದಲೆ, ದಿನೇಶ್ ಅತ್ತಾವರ್, ಉಮೇಶ್ ಮಿಜಾರ್, ಮೆಜಿಶಿಯನ್ ಕುದ್ರೋಳಿ ಗಣೇಶ್, ಮಿಮಿಕ್ರಿ ಕಲಾಕಾರ್ ಶರಣ್ ಕೈಕಂಬ, ಹಿತೇಶ್ ಕಾಪಿನಡ್ಕ, ಸ್ಟೇಂಡ್ ಅಪ್ ಕೊಮೆಡಿಯನ್ ಆರ್‌ಜೆ ಆರ್‍ಪಿತ್, ಫಿಲ್ಮ್ ನಟಿ ಚಿರಶ್ರೀ ಅಂಚನ್, ಸಂಗೀತ್ ಜೊಡೆಂ ಪ್ರಕಾಶ್ ಮಹದೇವನ್ ಆನಿ ರೂಪಾ ಪ್ರಕಾಶ್, ಮೈಮ್ ರಾಮದಾಸ್ ಆನಿ ಹೆರ್ ಕಲಾಕಾರಾಂಕ್ ಆಪೊವ್ನ್ ವೊಲ್ಟರ್ ನಂದಳಿಕೆನ್ ದಾಯ್ಜಿವರ್ಲ್ಡ್ ಟೀವಿರ್ ತಾಂಚೆಕರ್‍ನಾ ಸುರ್‍ಸುರ್ ಕಾಡಿಯೊ ಪೆಟೊವ್ನ್,ಮಾಲೆಪಟಾಕ್ಯೊ ಫುಟೊವ್ನ್ ಮಿಮಿಕ್ರಿ, ಲೊಕ್‌ವೆದ್ ಆನಿ ಹೆರ್ ಪದಾಂ-ಸಂಗೀತಾಚೆಂ ಮನೋರಂಜನ್ ದಿಂವ್ಚೆಂ ಪ್ರಯತನ್ ಕೆಲಾಂ.
ಅಧ್ಯಾತ್ಮಿಕ್ ವಿಚಾರ್, ಧ್ಯಾನ್, ಉಪಾಸನಾ ಆನಿ ಮನ್ಶಾ ಮೊಲಾಂಚಾ ಶಿಕ್ಶಣಾಕ್ ನಾಂವಾಡ್ಲಲಿ ಬ್ರಹ್ಮಕುಮಾರಿ ವಿಶ್ವೇಶ್ವರಿ ಹಿಣೆಂ, ಫುಡ್ಲ್ಯಾ ದಿಸಾಂನಿ ಆಮಿ ಕೊರೊನಾಸಂಗಿಂ ಕಶೆಂ ಜಿಯೆಜಾಯ್ ಮ್ಹಳ್ಳೆವಿಶಿಂ ಥೊಡೆಂ ಮಾರ್ಗ್‌ದರ್‍ಶನ್ ದಿಲೆಂ.
ತುಳು, ಕೊಂಕ್ಣಿ ಫಿಲ್ಮಾಂ :
ಘರಾಭಿತರ್‌ಚ್ ಬಸೊನ್ ಆಸ್ಚಾ ಲೊಕಾಚಿ ಬೆಜಾರಾಯ್ ಆನಿ ಉಬ್ಗಣ್ ಪಯ್ಸ್ ಕರ್‍ಚಾ ಖಾತಿರ್ ದಾಯ್ಜಿವರ್ಲ್ಡ್ ಟಿವಿರ್ 'ಚಾಲಿ ಪೋಲಿಲು', 'ದಬಕ್ಕ್ ದಬಾ ಐಸಾ', 'ಬೊಳ್ಳಿ ತೋಟ', 'ಕುಡ್ಲ ಕೆಫೆ', 'ಎಕ್ಕಸಕ' ಆನಿ ಹೆರ್ ತುಳು ಫಿಲ್ಮಾಂ, ಶಿವಾಯ್ ಪ್ರದೀಪ್ ಬರ್‍ಬೋಜಾ ಪಾಲಡ್ಕ ಹಾಚೆಂ 'ಏಕ್ ಆಸ್ಲ್ಯಾರ್ ಏಕ್ ನಾ' ಕೊಂಕ್ಣಿ ಫಿಲ್ಮ್ ಪ್ರಸಾರ್ ಕೆಲೆಂ.
ಕೊರೊನಾ ಸೊಜೆರ್ :
ಡೊ| ಎಡ್ವರ್ಡ್ ನಜ್ರೆತ್, ಡೊ| ಸಂದೀಪ್ ರೈ ಆನಿ ಕೆರೊಲಿನ್ ಡಿಸೋಜಾನ್ ದಾಯ್ಜಿವರ್ಲ್ಡ್ ಟಿವಿಚ್ಯಾ ವೀಕ್ಶಕಾಂಲಾಗಿಂ ಕೋವಿಡ್ - 19 ವಿಶಿಂ ಸಂವಾದ್ ಚಲೊವ್ನ್ ಗರ್‍ಜೆಚಿ ಮಾಹೆತ್ ವಾಂಟುನ್ ಘೆತ್ಲ್ಯಾ.
ಹಾಂಗಾಸರ್ ಆಮಿ ವಿಶೇಸ್ ಥರಾನ್ ಉಲ್ಲೇಕ್ ಕರುಂಕ್ ಜಾಯ್ ಕೋವಿಡ್ -19 ಆನಿ ಹೆರ್ ಆಸ್ಪತ್ರೆಂತ್ಲ್ಯಾ ದಾಕ್ತೆರಾಂಚೊ, ನರ್‍ಸಾಂಚೊ ಆನಿ ವೈದ್ಯಕೀಯ್ ಶಿಬಂದೆಚೊ. ಪೊಲಿಸಾಂನಿ ದೀಸ್-ರಾತ್ ಮ್ಹಳ್ಳೆಬರಿಂ ವಾವ್ರ್ ಕೆಲಾ. ಕುಟ್ಮಾಂ ಥಾವ್ನ್ ಪಯ್ಸ್ ಆಸೊನ್ ವೈದ್ಯಕೀಯ್ ಆನಿ ಪೊಲಿಸ್ ಶಿಬಂದೆನ್ ಕೆಲ್ಲೊ ನಿಸ್ವಾರ್‍ಥಿ ವಾವ್ರ್ ಆನಿ ತ್ಯಾಗ್ ವರ್‍ಣುಂಕ್ ಸಾದ್ಯ್‌ನಾತ್‌ಲ್ಲ್ಯಾ ತಸಲೊ. ಹೆ ಜಾವ್ನಾಸಾತ್ 'ಕೊರೊನಾ ಸೊಜೆರ್'. ಅಸಲ್ಯಾ ಧಯ್ರಾದಿಕ್ 'ಕೊರೊನಾ ಸೊಜೆರಾಂನಿ', 'ಆಶಾ' ಕಾರ್‍ಯಕರ್‍ತಾಂನಿ ಆನಿ ಸಮಾಜಿಕ್ ವಾವ್ರಾಡ್ಯಾಂನಿ ಕೆಲ್ಲೊ ವಾವ್ರ್ ವಿಶೇಸ್ ರಿತಿಚೊ. ಲೊಕಾಚ್ಯಾ ವಾಂಟ್ಯಾಕ್ ಸಂಸಾರಾಂತ್ಲೆ 'ರಾಕಣ್ ಭೊಡ್ವೆ' ತೆ. ತಾಂಚೆರ್ ಆನಿ ತಾಂಚ್ಯಾ ಕುಟ್ಮಾಂಚೆರ್ ದೆವಾಚಾ ವಿಂಚ್ಣಾರ್ ಬೆಸಾಂವಾಂಚೊ ಶಿಂವೊರ್ ಪಡುಂದಿ. ಎಕಾ ಮಾದ್ಯಮಾಚಿ ಜವಾಬ್ದಾರಿ ಆನಿ ಮಿಸಾಂವ್, ಸಾಂಗಾತಾಚ್ ಖರೆಂ ಕ್ರಿಸ್ತಾಂವ್‌ಪಣ್ ಆನಿ ಮನ್ಶಾಪಣ್ ಕಿತೆಂ ಮ್ಹಣ್ ದಾಕೊವ್ನ್ ದಿಲ್ಲ್ಯಾ ದಾಯ್ಜಿವರ್ಲ್ಡ್ ಮಾದ್ಯಮಾಚೊ ಪ್ರದಾನ್ ಸಂಪಾದಕ್ ವೊಲ್ಟರ್ ನಂದಳಿಕೆಕ್ ತಾಚಾ ಶಿಬಂದೆಕ್ ಆನಿ ಹ್ಯಾ ಮಿಸಾಂವಾಂತ್ ವಾಂಟೆಲಿ ಜಾಲ್ಲ್ಯಾ ಸರ್‍ವಾಂಕ್ ಅಖ್ಖ್ಯಾ ಸಮಾಜೆ ತರ್‍ಫೆನ್ ದೇವ್ ಬರೆಂ ಕರುಂ ಮ್ಹಣ್ಯಾಂ. ಗರ್‍ಜೆವಂತಾಂಕ್, ಪಿಡೆಸ್ತಾಂಕ್ ಆನಿ ಭುಕೆಲ್ಲ್ಯಾಂಕ್ ಪಾಂವ್ಚ್ಯಾ ಹ್ಯಾ ಮಿಸಾಂವಾಂತ್ ವಾಂಟೆಲಿ ಜಾಲ್ಲ್ಯಾಂಕ್ ಮೆಳ್‌ಲ್ಲಿ ತೊ ಸಂತೊಸ್, ತೃಪ್ತಿ ಆನಿ ಧಾದೊಸ್ಕಾಯ್ ತಾಂಕಾಂ ಮಾತ್ರ್ ಕಳಿತ್.
ನಾಂವಾಖಾತಿರ್ :
ಹ್ಯಾ ಮದೆಂ ಕಾಂಯ್ ಥೊಡ್ಯಾಂನಿ ಫ್ಲೆಕ್ಸಾಂ ಘಾಲ್ನ್, ಗ್ರೋಸರಿ ಕಿಟ್ಸಾಂಚೆರ್ ಆಪ್ಲಿಂ ವ ಆಪ್ಲ್ಯಾ ರಾಜಕೀಯ್ ಪಾಡ್ತಿಚಿಂ, ಸಂಘಟನಾಂಚಿಂ ನಾಂವಾಂ ಛಾಪುನ್ ಗರ್‍ಜೆವಂತಾಂಕ್ ಕಿಟ್ಸ್ ವಾಂಟ್ತಾನಾ ಆನಿ ಜೆವಣ್ ದಿತಾನಾ ಫೊಟೊ ಕಾಡ್ನ್ ಮಾದ್ಯಮಾಂನಿ ಪ್ರಚಾರ್ ಜೊಡ್‌ಲ್ಲೊಯಿ ಆಸಾ. ಥೊಡ್ಯಾ ವಾವ್ರಾಡ್ಯಾಂನಿ ಆಪ್ಣಾಚಾ ವಳ್ಕಿಚ್ಯಾಂಕ್ ದೊದೋನ್, ತಿತೀನ್ ಕಿಟ್ಸ್ ದಿಲ್ಲಿಂಯಿ ಆಸಾತ್. ಗರ್ಜ್ ನಾತ್‌ಲ್ಲ್ಯಾ ಥೊಡ್ಯಾಂನಿ ಫುಂಕ್ಯಾಕ್ ಮೆಳ್ತಾ ಮ್ಹಣ್ ಗ್ರೋಸರಿ ಕಿಟ್ಸ್ ಘೆತ್‌ಲ್ಲೆಯಿ ಆಸಾತ್.
ಸರ್‍ವೇ ಜನ: ಸುಖಿನೋ ಭವಂತು :
ದಾಯ್ಜಿವರ್ಲ್ಡ್ ಟಿವಿನ್ ಕೆಲ್ಲೆಂ ಆನಿ ಏಕ್ ಭೋವ್ ಬರೆಂ ಕಾಮ್ ಮ್ಹಳ್ಯಾರ್ ಹಿಂದು, ಮುಸ್ಲಿಮ್ ಆನಿ ಕ್ರಿಸ್ತಾಂವ್ ಮುಕೆಲ್ಯಾಂಕ್ ಆಪೊವ್ನ್ ತಾಂಕಾಂ ಲೊಕಾಕಡೆ ಸಂವಾದ್ ಚಲೊಂವ್ಕ್ ಅವ್ಕಾಸ್ ಕರ್ನ್ ದಿಲ್ಲೊ. ತಾಂಚೆಪಯ್ಕಿ ಥೊಡೆ ಪ್ರಮುಕ್ ಆಸಾತ್ - ಶ್ರೀ ವಿದ್ಯಾ ಪ್ರಸನ್ನ ತೀರ್ಥ ಸ್ವಾಮೀಜಿ (ಕುಕ್ಕೆ ಸುಬ್ರಹ್ಮಣ್ಯ ಮಠ್), ಶ್ರೀ ರಾಜಶೇಖರಾನಂದ ಸ್ವಾಮೀಜಿ (ವಜ್ರದೇಹಿ ಮಠ್, ಗುರ್‍ಪುರ್), ಶ್ರೀ ಹರಿನಾರಾಯಣ ಅಸ್ರಣ್ಣ (ದುರ್ಗಾ ಪರಮೇಶ್ವರಿ ದೆವಾಳ್, ಕಟೀಲ್), ಮೌಲನಾ ಯು.ಕೆ. ಆಬ್ದುಲ್ ಆಜೀಝ್ ದಾರಿಮಿ (ಇಮಾಮ್, ಚೊಕ್ಕಬೆಟ್ಟು ಮಸೀದ್) ಆನಿ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ (ಬಿಸ್ಪ್, ಮಂಗ್ಳುರ್ ದಿಯೆಸೆಜ್).
ಹ್ಯಾ ವಿವಿದ್ ಧರ್‍ಮಾಂಚ್ಯಾ ಮುಕೆಲ್ಯಾಂಕಡೆ ವಿವಿದ್ ಧರ್‍ಮಾಂಚ್ಯಾ ಲೊಕಾನ್ ವ್ಹಡಾ ಉಮೆದಿನ್ ಸಂವಾದ್ ಚಲಯ್ಲೊ. ಆಮ್ಚೊ ಬಿಸ್ಪ್ ಪೀಟರ್ ಪಾವ್ಲ್ ಸಲ್ಡಾನ್ಹಾನ್ ಪ್ರಸ್ತುತ್ ಕಾಳಾಕ್ ಗರ್ಜ್ ಆಸ್ಚ್ಯಾ 'ಬಂಧುತ್ವ' (ಭಾವ್ ಬಾಂದವ್ಪಣ್) ವಿಶಿಂ ಆಪ್ಲೆ ವಿಚಾರ್ ಹೆರಾಂಸಂಗಿಂ ವಾಂಟುನ್ ಘೆತ್ಲೆ. ಸಿಒಡಿಪಿ ಸಂಸ್ಥ್ಯಾನ್, ಮಂಗ್ಳುರ್ ದಿಯೆಸಿಜಿಚ್ಯಾ 124 ಫಿರ್‍ಗಜಿಂಚ್ಯಾ ವಿಗಾರಾಂನಿ ಆನಿ ಸಂಗಟನಾಂನಿ ಗರ್‍ಜೆವಂತಾಂಕ್ ಕುಮ್ಕೆಚೊ ಹಾತ್ ದಿಲ್ಲ್ಯಾವಿಶಿಂ ವಿವರ್ ದಿಲೊ. ಹ್ಯಾವಿಶಿಂ ಕಸ್ಲೊಚ್ ಪ್ರಚಾರ್ ವ ಫೊಟೊ ಘಾಲುನ್ ಪಬ್ಲಿಸಿಟಿ ದೀಂವ್ಕ್‌ನಾ ಮ್ಹಳೆಂ ತಾಂಣಿಂ.
'ದಾಯ್ಜಿವರ್ಲ್ಡ್' ಬಿಗ್ ಇಂಪ್ಯಾಕ್ಟ್ :
ದುಬಾಯ್ ಥಾವ್ನ್ ಮಂಗ್ಳುರಾಕ್ ಪಯ್ಲೆಂ ಫ್ಲಾಯ್ಟ್ ಮೇ 12ವೆರ್ ರಾತಿಚ್ಯಾ 10 ವೊರಾರ್ ಪಾವ್ಲೆಂ. ಹ್ಯಾ ಫ್ಲಾಯ್ಟಾರ್ 176 ಜಣಾಂ ಪಯ್ಣಾರಿ ಆಸ್ಲಿಂ. ತಾಂಚೆಮದೆಂ ಚಡುಣೆಂ 37 ಜಣಾಂ ಗರ್‍ಭೆಸ್ತ್ ಸ್ತ್ರೀಯೊ, 80 ವರ್‍ಸಾಂ ವಯ್ಲಿಂ ಪ್ರಾಯ್ವಂತಾಂ ಆನಿ ಭುರ್‍ಗಿಂ ಆಸ್‌ಲ್ಲಿಂ. ಪುಣ್ ಏರ್‌ಪೊರ್‍ಟಾಂತ್ ಕಸಲಿಚ್ ಸುವಿದಾ, ಸವ್ಲತಾಯೊ ನಾತ್‌ಲ್ಲ್ಯೊ ಖಂಯ್. ಪಯ್ಣಾರ್‍ಯಾಂ ಮದ್ಲ್ಯಾ ಸ್ವೀಟಿ ಆನಿ ಲಿನ್ಸಿಯಾ ಮ್ಹಳ್ಯಾ ದೊಗಾಂ ತರ್‍ನಾಟ್ಯಾ ಸ್ತ್ರೀಯಾಂನಿ ದಾಯ್ಜಿವರ್ಲ್ಡ್ ಟೀವಿಕ್ ಫೋನ್ ಕರ್ನ್ ಆಪ್ಣಾಸಂಗಿಂ ಹೆರಾಂನಿ ಭೊಗ್‌ಲ್ಲಿ ಇಜಾ ಆನಿ ಸಂಕಶ್ಟ್ ವಿವರುನ್ ಸಾಂಗ್ಲೆ. ಏರ್‌ಪೋರ್ಟಾಂತ್ ಪಿಯೆಂವ್ಚಾ ಉದ್ಕಾಚಿ ಜಾಂವ್, ಜೆವ್ಣಾಚಿ ಜಾಂವ್ ವಿಲೆವರಿ ಕರುಂಕ್ ನಾತ್‌ಲ್ಲಿ ಖಂಯ್. ರಾತಿಂ 2.30 ವೊರಾರ್ ತಾಂಕಾಂ ಕ್ವಾರಂಟೈನ್ ಪರಿಕ್ಶೆಕ್ ಧಾಡ್‌ಲ್ಲೆಂ ಖಂಯ್. ಉಪ್ರಾಂತ್ ಹೊಟೆಲಾಕ್ ಪಾವ್ತಾನಾ ಫಾಂತ್ಯಾಚಿಂ 4.30 ವೊರಾಂ ಖಂಯ್. ಏರ್ ಪೊರ್‍ಟಾಂತ್ ತಾಂಚಿ ಲಗೇಜ್ ಉಕ್ಲುಂಕ್ ಕೊಣೆಂಯಿ ಕುಮೊಕ್ ಕೆಲಿ ನಾ ಖಂಯ್. ಥಂಯ್ಸರ್ ಗುಸ್ಪೊಡ್ ಗೊಂದೊಳ್ ಆನಿ ಅವ್ಯವಸ್ಥಾ ಉಟೊನ್ ದಿಸ್ತಾಲಿ. ಥಂಯ್ಸರ್ ಮನ್ಶಾಪಣ್ ನಾತ್‌ಲ್ಲೆಂ. ಏರ್‌ಪೊರ್‍ಟಾಚೆ ವಾವ್ರಾಡಿ ಜಾಂವ್, ಪೊಲಿಸ್ ಜಾಂವ್ ಪಯ್ಣಾರ್‍ಯಾಂಕ್ ಕುಮೊಕ್ ಕರಿನಾತ್‌ಲ್ಲೆ. ಪಯ್ಣಾರ್‍ಯಾಂಕ್ ಹೊಟೆಲಾಂಕ್ ಆಪೊವ್ನ್ ವ್ಹೆಲ್ಲ್ಯಾ ಥೊಡ್ಯಾ ಬಸ್ಸಾಂಚೆ ಡ್ರಾಯ್ವರ್ ಪಯ್ಣಾರ್‍ಯಾಂಚಾ ವಿನೊವ್ಣೆಕ್‌ಯಿ ಕಾನ್ ದಿನಾತ್‌ಲ್ಲೆ ಖಂಯ್.
ವೊಲ್ಟರ್ ನಂದಳಿಕೆನ್ ಏರ್‌ಪೊರ್‍ಟಾಚ್ಯಾ ನಿರ್‍ದೇಶಕಾಕ್ ಫೋನ್ ಕರ್ನ್ ಥಂಯ್ಚ್ಯಾ ಅವ್ಯವಸ್ಥಾವಿಶಿಂ ತಾಚ್ಯಾ ಗುಮಾನಾಕ್ ಹಾಡ್ಚೆಂ ಪ್ರಯತನ್ ಕೆಲೆಂ ತರೀ ತೊ ನಿರ್‍ದೇಶಕ್ ವೆವೆಗ್ಳಿಂ ನಿಬಾಂ, ಕಾರಣಾಂ ದೀವ್ನ್ ಉಲೊಂವ್ಕ್ ಲಾಗ್ಲೊ. ದಾಯ್ಜಿವರ್ಲ್ಡ್ ಮಾದ್ಯಮಾನ್ ಹೊ ಗಂಭೀರ್ ವಿಶಯ್ ಜಿಲ್ಲಾದಿಕಾರಿಚಾ ಗುಮಾನಾಕ್ ಹಾಡ್ಲೊ. ಜಿಲ್ಲಾಧಿಕಾರಿನ್ ಏರ್‌ಪೊರ್‍ಟಾಚ್ಯಾ ನಿರ್‍ದೇಶಕಾಕ್ ಆನಿ ಹೆರ್ ವಿಬಾಗಾಂಚ್ಯಾ ಅದಿಕಾರಿಂಕ್ ಆಪೊವ್ನ್ ಮೀಟಿಂಗ್ ಚಲೊವ್ನ್, ಹ್ಯಾಫುಡೆಂ ಅಶೆಂ ಘಡನಾಶೆಂ ಚತ್ರಾಯ್ ಘೆಜಾಯ್ ಮ್ಹಣ್ ಸಾಂಗ್ಲಾಂ. ಹಾಂಗಾಸರ್ ಆಮ್ಕಾಂ ಕಳಿತ್ ಜಾತಾ ಎಕಾ ಮಾದ್ಯಮಾಚಿ ಸಮಾಜಿಕ್ ಜವಾಬ್ದಾರಿ ಕಸಲಿಗೀ ಮ್ಹಳ್ಳೆಂ, ಶಿವಾಯ್ ಮಾದ್ಯಮಾಚಿ ತಾಂಕ್, ಬಳ್, ಪ್ರಭಾವ್ ಆನಿ ಪರಿಣಾಮ್.
ಲಿಸಾಂವ್ ಆನಿ ಮಿಸಾಂವ್ :
ವೊಲ್ಟರ್ ನಂದಳಿಕೆಚಾ ಮುಕೆಲ್ಪಣಾರ್ ದಾಯ್ಜಿವರ್ಲ್ಡ್ ಟಿವಿನ್ ಏಕ್ ವಿಶಿಶ್ಟ್, ವಿಂಚ್ಣಾರ್ ತಶೆಂಚ್ ಫಳಾದಿಕ್ ಮಿಸಾಂವ್ ಚಲೊನ್ ವ್ಹರುನ್ ಲೊಕಾಂಚ್ಯಾ ಕಶ್ಟಾಂಕ್ ಸ್ಪಂದನ್ ಕರುನ್ ತಾಂಕಾಂ ಧಯ್ರ್ ಆನಿ ಆಧಾರ್ ದಿಂವ್ಚೆಂ ಪ್ರಯತನ್ ಕೆಲಾಂ. ಆನಿ ತಾಂತುಂ ತೆ ಯಶಸ್ವಿ ಜಾಲ್ಯಾತ್.
ಒಟ್ಟಾರೆ ಕೊರೊನಾ ವೈರಸ್ ಮ್ಹಳ್ಳೆ ಮಹಾಮಾರಿನ್ ಮನ್ಶಾಕುಳಾಕ್ ಜಾಯ್ತಿಂ ಲಿಸಾಂವಾಂ ಶಿಕಯ್ಲ್ಯಾಂತ್ ಮ್ಹಳ್ಳೆಂ ಖಂಡಿತ್. ಕೊರೊನಾ ವೈರಸಾವಿಶಿಂ ಲೊಕಾಕ್ ಸಮ್ಜೊಣಿ ಆನಿ ಸಮುದಾಯಾಂ ಥಂಯ್ ಜಾಗೃತಿ ಉಟೊವ್ನ್, ಜಾತ್ - ಕಾತ್ - ಧರ್ಮ್ - ಭಾಸ್ ಆನಿ ಸಂಸ್ಕೃತಿ ಮ್ಹಳ್ಳೊ ಭೇದ್‌ಬಾವ್ ನಾಸ್ತಾಂ ಸಕ್ಕಡ್ ಲೊಕಾಕ್ ಎಕಾಚ್ ಮಾಟ್ವಾಂತ್ ಸಾಂಗಾತಾ ಹಾಡ್‌ಲ್ಲ್ಯಾ ದಾಯ್ಜಿವರ್ಲ್ಡ್ ಟಿವಿ ಪಂಗ್ಡಾಕ್, ಬರ್‍ಯಾ ಸಾಮಾರಿಯಾಗಾರಾಂಕ್ ಆನಿ ಕೊರೊನಾ ಸೊಜೆರಾಂಕ್ ಆಮಿ ಚೆಪೆಂ ಉಕೊಲ್ನ್ ಮಾನ್ ಬಾಗಾಂವ್ಕ್ ಫಾವೊ.
Tags:
Corona, Daijiworld TV Impact, Walter Nandalike, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
2/27/2021 ಹೆರೊಲ್ಪಿಯುಸ್: ಏಕ್ ಅವ್ಚಿತ್ ಭೆಟ್...
-
12/20/2020 ಯುವಜಣಾಂಕ್ ಪ್ರೇರಣ್ - ಜೆಸ್ಸಿಕಾ ಆನ್ನಾ ಲಿಝಾ...
-
12/6/2020 ಆಸ್ತ್ ........
-
11/25/2020 ಭಾರತಾಚಿಂ ಖಬ್ರೆ ಟಿವಿ ಚಾನೆಲಾಂ ಮರಣ್ ಪಾವ್ಲ್ಯ...
-
11/9/2020 ನಾಂವ್ ಬದಲ್ಲ್ಯಾನ್ ಗಾಂವ್ ಬದಲ್ನಾಂ...!...
-
10/17/2020 ಮಂಗ್ಳುರ್‌ಚೊ ಖ್ಯಾತ್ ಗ್ರಾಫೊಲೊಜಿಸ್ಟ್, ಸ್ಟೇ&...
-
-
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.