web analytics

From around the world

ಪ್ರವೀಣ್ ತಾವ್ರೊ, ಕುಲ್ಶೇಕರ್
             
+971 50 7554105
ತುಮ್ಚ್ಯಾ ಗಮನಾಕ್:
Best be viewed in 1366 X 768 screen resolution and in Google Chrome

ಬೊಟಾಕ್ ಮುದಿ ಘಾಲ್ಚಿ

Wednesday, September 27, 2017  /  By Admin

ಬರಯ್ಣಾರಾ ವಿಶಿಂ ಜಾಣಾ ಜಾ...

80.5
User Rating

ಕೆನರಾ ಕೊಂಕಣಿ ಕಾಥೊಲಿಕಾಂಚೆ ಲಗ್ನಾ ಸಂಪ್ರದಾಯ್ - 3 :

ಮುದಿ ಮ್ಹಳ್ಯಾರ್ 'ಮೊಗಾಚೆಂ ಬೊಳೆಂ'. ರೋಮನ್ ಲೊಕಾ ಮದೆಂ ಎಕಾಮೆಕಾ ಮುದಿ ಶಿರ್ಕಾಂವ್ಚಿ ರಿವಾಜ್ ಕಾಂಯ್ ಕ್ರಿಸ್ತ್ ಪೂರ್ವ್ 4800 ವರ್ಸಾ ಪುರ್ವಿಂಯ್ ಆಸ್‌ಲ್ಲಿ. ಹಿ ಪದ್ದತ್ ಸಬಾರ್ ರಾಷ್ಟ್ರಾಂಚೊ ಲೋಕ್ ಪಾಳ್ತಾಲೊ. ಸಾಸ್ರಾಂ ಥಾವ್ನ್ಂಚ್ ಮುದಿ ದಾವ್ಯಾ ಹಾತಾಚ್ಯಾ ಚವ್ತ್ಯಾ ಬೊಟಾಕ್ ಘಾಲ್ತಾಲೆ. ಹಾಕಾ 'ಮುದಿಯೆ ಬೋಟ್' ಮ್ಹಣ್ತಾಲಿಂ. ಗ್ರೀಕ್ ಆನಿ ರೋಮನ್ ಪಾತ್ಯೆಣೆ ಪ್ರಕಾರ್ ಏಕ್ ಪ್ರಮುಖ್ ರಗ್ತಾ-ಶಿರ್ ಹ್ಯಾ ಬೊಟಾ ಥಾವ್ನ್ ಶೀದಾ ಕಾಳ್ಜಾಕ್ ವೆತಾ ಖಂಯ್. ಹಾಕಾ 'ವೆನಾ ಆಮೊರಿಸ್' ಮ್ಹಳ್ಯಾರ್ 'ಮೊಗಾಚಿ ಶಿರ್' ಮ್ಹಣ್ತಾತ್. ಜುದೆವಾಂನಿ ಹಾಚೆಂ ನಕಲ್ ಕಾಡ್ಲೆಂ ಆನಿ ಹೊಕ್ಲೆ-ನವ್ರ್ಯಾಚ್ಯಾ ಮೊಗಾಚೊ ಬಾಂಧ್ ಶಾಬೀತ್ ಆನಿ ಥಿರ್ ಕರ್ಚ್ಯಾಕ್ ಮುದ್ಯೆಕ್ ಮಹತ್ವ್ ದೀವ್ನ್ ಚವ್ತ್ಯಾ ಬೊಟಾಕ್ ತಿ ಶಿರ್ಕಾಂವ್ಕ್ ಲಾಗ್ಲೆ. ಉಕ್ರೇನ್, ಪೊಲೇಂಡ್ ಆನಿ ಜರ್ಮನಿಂತ್ ಉಜ್ವ್ಯಾ ಹಾತಾಚ್ಯಾ ಬೊಟಾಕ್ ಘಾಲ್ತಾತ್. ಆಮಿ ಆತಾಂ ವಾಪಾರ್ಚಿ ತಿ ಭಾಂಗ್ರಾಳಿ ಮುದಿ ಆಂಗ್ಲೊ-ಸಾಕ್ಸೊನ್ ಲೊಕಾಚ್ಯಾ ರಿವಾಜೆಂ ಥಾವ್ನ್ ಆಯ್ಲ್ಯಾ. ರೋಮನ್ ಸ್ತ್ರೀಯೊ ಲ್ಹಾನ್ ಚಾವಿಯಾಂಕ್ ಮುದಿ ಶಿರ್ಕಾವ್ನ್ 'ಆಪ್ಲ್ಯಾ ಪತಿಕ್ ಆಪ್ಣೆಂ ಮುಟಿಂತ್ ದವರ್ಲಾಂ' ಮ್ಹಣ್ ಸರ್ವಾಂಕ್ ದಾಕಯ್ತಾಲ್ಯೊ! ಕ್ರಿಸ್ತೀ ಲೋಕ್ ಕಾಜಾರ್ ಜಾಲ್ಯಾರ್ ಮುದಿ ಘಾಲ್ತಾಲೊ ಆನಿ ಅಶಿ ಪತಿ-ಪತಿಣೆನ್ ಶಿರ್ಕಾಯಿಲ್ಲಿ ಮುದಿ 'ಆಪ್ಲ್ಯಾ ದೊಗಾಂಯ್ಚ್ಯಾ ಎಕಾಮೆಕಾಚ್ಯಾ ಎಕ್ವಟಾಕ್ ಭಾಯ್ಲೊ ಘುರ್ತ್ ಜಾವ್ನ್ ಏಕ್ ಸಾಕ್ಸ್ ಜಾವ್ನಾಸಾ' ಮ್ಹಣ್ ಪಾತ್ಯೆತಾಲೆ. ಮದ್ಲ್ಯಾ ಕಾಳಾರ್ ಇಂಗ್ಲೆಂಡಾಂತ್ ರಾಯ್ ನಿಮಾಣ್ಯಾ ಸುಕ್ರಾರಾ, ಲೊಕಾಕ್ ರುಪ್ಯಾಚೆಂ ನಾಣೆಂ ದಿತಾಲೊ, ತಾಚೆ ಥಾವ್ನ್ ಲೋಕ್ ಮುದಿ ಕರುನ್ ತಿ ಏಕ್ ಅಪೂರ್ವ್ ಮೊಗಾ ನಿಶಾನಿ ಜಾವ್ನ್ ವಾಪರ್ತಾಲೆ. ಇಜಿಪ್ತಾಂತ್‌ಯೀ ಮುದಿ ಶಿರ್ಕಾಂವ್ಚಿ ರೀತ್ ಬೋವ್‌ಚ್ ಪುರಾತನ್. ಮುದಿಯೆಚೆಂ ಉರುಟ್ ರೋದ್ ಮೊಗಾಕ್, ಪಾತ್ಯೆಣೆಕ್, ಥಿರಾಸಾಣೆಕ್ ಆನಿ ಎಕ್ವಟಾಕ್ ಸಂಕೇತ್. ಹ್ಯಾ ಮೊಗಾಚ್ಯಾ ರೊದಾಕ್ ಪ್ರಾರಂಭ್ ನಾ, ಅಂತ್ಯ್‌ಯೀ ನಾ - ಬಗಾರ್ ಶಾಶ್ವತ್. ಗ್ರೀಕ್ ಲೊಕಾನ್ ಹಿಚ್ ರಿವಾಜ್ ಹಳೂ ರಿತಿರ್ ಬದ್ಲಾವ್ನ್ ಘೆವ್ನ್ ಝುಜಾಂತ್ ಜಿಕ್‌ಲ್ಲ್ಯಾ ಸೊಜೆರಾಂಕ್ 'ಬ್ರೇಸ್‌ಲೆಟ್' ರುಪಾರ್ ಲ್ಹಾನ್ ಬೊಳೆಂ ವಾ ಕಾಂಕಾಣ್ ಇನಾಮ್ ಜಾವ್ನ್ ದೀಂವ್ಕ್ ಸುರು ಕೆಲೆಂ. ಆಶೆಂ ಹೊಕ್ಲೆಕ್ ಮೊಗಾ ನಿಶಾನಿ ಜಾವ್ನ್ ಮುದಿ ಘಾಲ್ಲೆ ಪರಿಂ ಗ್ರೀಕ್ ಯುವಕ್ ವೀರತೆಚೊ ಘುರ್ತ್ ಜಾವ್ನ್ ಬೊಳೆಂ ಘಾಲ್ತಾಲೆ. ಆತಾಂಯ್ ಸಿಖ್ ಸಮೂದಾಯೆಚೆ 'ಖಡಾ' ಮ್ಹಳ್ಳೆಂ ರುಪ್ಯಾ-ಭಾಂಗಾರಾ-ತಾಂಬ್ಯಾಚೆಂ ಬೊಳೆಂ ಹಾತಾಕ್ ಘಾಲುನ್ ವೀರತೆಚೊ ಸಂಕೇತ್ ದಾಕಯ್ತಾತ್.

ಪಾಪ್ ಸಾಯ್ಬ್ ಆಪ್ಲ್ಯಾ ಉಜ್ವ್ಯಾ ಹಾತಾಚ್ಯಾ ತಿಸ್ರ್ಯಾ ಬೊಟಾಕ್ ಮುದಿ ನ್ಹೆಸ್ತಾ, ಹಾಕಾ 'ಸಾಂ. ಪೆದ್ರುಚಿ ಮುದಿ' ತಶೆಂ 'ಪಾಗ್ತೆಲ್ಯಾಚಿ ಮುದಿ' ಮ್ಹಣ್ತಾತ್. ಕಾಡ್ದಿನಲ್ ಆನಿ ಭಿಸ್ಪ್ ಉಜ್ವ್ಯಾ ಹಾತಾಚ್ಯಾ ತಿಸ್ರ್ಯಾ ಬೊಟಾಕ್ ಮುದಿ ಘಾಲ್ತಾತ್ ಆನಿ ತೆ ಇಗರ್ಜ್ ಮಾತೆ ಕಡೆನ್ ಲಗಿನ್ ಜಾಲ್ಯಾಂವ್ ಮ್ಹಣ್ ಉಗ್ತ್ಯಾನ್ ಪಾಚಾರ್ತಾತ್. 'ಎಪಿಸ್ಕೊಪಲ್' ಮುದಿ ಕಾಡ್ದಿನಲಾಂಕ್ ಪಾಪ್ ಸಾಯ್ಬಾನ್ ನ್ಹೆಸಂವ್ಚಿ ತರ್ ಭಿಸ್ಪಾಂಕ್ ಕಾಡ್ದಿನಲ್ ಮುದಿ ನ್ಹೆಸಯ್ತಾತ್. ಬಿಸ್ಪಾಚ್ಯಾ ಹಾತಾಚ್ಯಾ ಬೊಟಾಚಿ ಮುದಿ ದಿಯೆಸೆಜಿಚೊ ಧರ್ಮಾಧ್ಯಕ್ಸ್ ಆಪ್ಲ್ಯಾ ದಿಯೆಸೆಜಿ ಕಡೆನ್ ಲಗ್ನ್ ಜಾಲಾ ಮ್ಹಳ್ಳ್ಯಾಚೆಂ ಪ್ರತೀಕ್. ಕ್ರಿಸ್ತೀ ಭಾವಾಡ್ತಿ ಬಿಸ್ಪಾಚ್ಯಾ ಮುದಿಯೆಚೊ ಉಮೊ ಘೆವ್ನ್ ಗೌರವ್ ದಾಕಯ್ತಾತ್ ಆನಿ ತೊ ಆಮ್ಚೊ ಆತ್ಮೀಕ್ ಬಾಪಯ್ ಮ್ಹಣ್ ಮಾನ್ ಕರ್ತಾತ್. ಆಶೆಂ ಉಮೊ ಘೆತ್‌ಲ್ಲ್ಯಾಂಕ್ ಇಂದುಲ್ಜೆನ್ಸ್‌ಯೀ ಲಾಬ್ತಾ.  

ಆಮ್ಕಾಂ ಕೆನರಾ ಕೊಂಕ್ಣಿ ಕಾಥೊಲಿಕಾಂಕ್ ಮುದಿ ಘಾಲ್ಚಿ ಮ್ಹಳ್ಯಾರ್ ಹೊಕ್ಲೆ ನವ್ರ್ಯಾನ್ 'ಎಕಾಮೆಕಾ ಥಂಯ್ ವಿಶ್ವಾಸ್, ಪಾತ್ಯೆಣಿ, ಮೋಗ್, ಭರ್ವಸೊ ದವರ್ತಾಂ' ಮ್ಹಣ್ ದಾಕಂವ್ಚಿ ನಿಶಾನಿ. ಖರಾರಾ ವೆಳಾರ್ ಮುದಿಯೆಚೊ ಉಪೇಗ್ ಪುರಾತನ್ ಸಂಪ್ರದಾಯ್ ಆನಿ ಲಗಿನ್ ಜಾಂವ್ಚ್ಯಾ ಹೊಕ್ಲೆ-ನವ್ರ್ಯಾನ್ ಎಕಾಮೆಕಾ ಕೆಲ್ಲ್ಯಾ ಸೊಲ್ಲ್ಯಾಚಿ ಮ್ಹೊರ್! ಹ್ಯಾ ಮುದಿಯೆಕ್ 'ಭಾಸಾವ್ಣೆಚೆಂ ರೋದ್' ಮ್ಹಣ್ತಾಲೆ. ತಿ ಮುಕ್ಲ್ಯಾ ಕಾಜಾರಿ ಜಿವಿತಾ ಖಾತಿರ್ ಕೆಲ್ಲ್ಯಾ ಸೊಲ್ಲ್ಯಾಚೊ ಸಂಕೇತ್. ಕ್ರೀಸ್ತಾಂವ್ ಸಮಾಜೆಂತ್ ಆದಿಂ ಖರಾರಾ ದಿಸಾ ನವ್ರೊ ಮಾತ್ರ್ ಹೊಕ್ಲೆಕ್ ಮುದಿ ದಿತಾಲೊ. ತಿ ಭಾಂಗಾರಾಚಿ, ರುಪ್ಯಾಚಿ ವಾ ಪ್ಲಾಟಿನಮ್ ಆಸ್ತಾಲಿ. ಮೂಳ್ ಕ್ರೀಸ್ತಾಂವಾಂ ಮದೆಂ ಹೊಕಲ್ ಆಪ್ಣಾಲಾಗಿಂ ಲಗಿನ್ ಜಾಂವ್ಕ್ ಆಸ್ಚ್ಯಾ ನವ್ರ್ಯಾಚ್ಯಾ ಬೊಟಾಕ್ ಖರಾರಾಚಿ ಮುದಿ ಘಾಲಿನಾತ್‌ಲ್ಲಿ, ನವ್ರೊ ಮಾತ್ರ್ ಹೊಕ್ಲೆಚ್ಯಾ ಬೊಟಾಕ್ ಶಿರ್ಕಾಯ್ತಾಲೊ! ಉಪ್ರಾಂತ್ಲ್ಯಾ ವರ್ಸಾಂನಿ ಹೊಕ್ಲೆ-ನವ್ರ್ಯಾ ದೊಗಾಂಯ್ನಿ ಮುದಿಯೊ ಬದ್ಲುಂಕ್ ಸುರು ಕೆಲೆಂ. ಎಕಾಮೆಕಾಚ್ಯಾ ಬೊಟಾಚೆಂ ಜೋಕ್ ಕಳಿತ್ ನಾ ತರ್ ಹೊಕ್ಲೆಚಿ ಮುದಿ ಹೊಕಲ್‌ಚ್ ಆನಿ ನವ್ರ್ಯಾಚಿ ಮುದಿ ನವ್ರೊಚ್ ಕರಯ್ತಾಲೊ ಆನಿ ಖರಾರಾ ದಿಸಾ ತ್ಯೊ ಘರಾ ಭಿತರ್ ಸರ್ತಚ್ ಪಯ್ಲೆಂಚ್ ಬದ್ಲಯ್ತಾಲಿಂ. ತ್ಯೊ ಸರ್ವಾಂ ಮುಕಾರ್ ಎಕಾಮೆಕಾಚ್ಯಾ ದಾವ್ಯಾ ಹಾತಾಚ್ಯಾ ಚವ್ತ್ಯಾ ಬೊಟಾಕ್ ಶಿರ್ಕಾಂವ್ಕ್ ಆಸ್‍ಲ್ಲ್ಯೊ. ಮುದಿಯೊ ಪವಿತ್ರ್ ಉದ್ಕಾನ್ - ಆಗ್ಮೆಂತಾನ್ ಬೆಂಜಾರ್ ಕರ್ತಾಲೆ. ಖರಾರಾಕ್ ಯಾಜಕ್ ಯೇನಾ ತರ್ ಮುದಿ ಪಯ್ಲಿಚ್ ಬೆಂಜಾರ್ ಕರವ್ನ್ ಹಾಡ್ತಾಲೆ ಆನಿ ಲಗಿನ್ ಜಾಂವ್ಕ್ ಆಸ್ಚಿಂ ಹೊಕಲ್ ಆನಿ ನವ್ರೊ ಎಕಾಮೆಕಾ ಬೊಟಾಕ್ ಖರಾರಾಚಿ ಮುದಿ ಅದಲ್ ಬದಲ್ ಕರ್ತಾಲಿಂ.  

ಪಯ್ಲೆಂ ಖರಾರಾಚಿ ಮುದಿ ಬೊಟಾಕ್ ಶಿರ್ಕಾಯಿಲ್ಲಿ ತಿ ಮೊರ್ತಾ ಪರ್ಯಾಂತ್ ಕಾಡಿನಾತ್‍ಲ್ಲಿಂ. ಉಪ್ರಾಂತ್ ಹೊ ಮಾನ್ ರೆಸ್ಪೆರಾಚ್ಯಾ ಮುದಿಯೆಕ್ ಮೆಳ್ಳೊ. ರೆಸ್ಪೆರಾಚಿ ಮುದಿ ಚವ್ತ್ಯಾ ಮುದಿಯೆ ಬೊಟಾಕ್ ಘಾಲ್ತಾನಾ ಖರಾರಾಚಿ ಮುದಿ ಉಜ್ವ್ಯಾ ಹಾತಾಚ್ಯಾ ಬೊಟಾಕ್ ಘಾಲಿಲಾಗ್ಲೆ. ನಂತರ್ ತಿ ಪಾಟಿಂ ದಾವ್ಯಾ ಹಾತಾಕ್‌ಚ್ ವಚೊನ್ ತಿಸ್ರ್ಯಾ ಬೊಟಾಕ್ ಬದ್ಲೊನ್ ಆಯ್ಲಿ. 'ಹ್ಯೊ ದೊನಿ ಸಾಂಗಾತಾ ಆಸ್ಲ್ಯಾರ್ ಮೊಗಾ ಬಾಂದ್ ಥಿರ್ ಉರ್ತಾ' ಮ್ಹಣ್ ಆಮ್ಚೊ ಲೋಕ್ ಪಾತ್ಯೆತಾ! ಪೂಣ್ ಥೊಡೆ ಪಾವ್ಟಿಂ ಥಿರ್ ಉರ್ಚೊ ಮಾತ್ರ್ ದುಬಾವಾಚೊ. ಥೊಡ್ಯಾಂನಿ ಖರಾರಾಚಿ ಮುದಿ ಉಜ್ವ್ಯಾ ಹಾತಾಚ್ಯಾ ಚವ್ತ್ಯಾ ಬೊಟಾಕ್‌ಚ್ ಉರವ್ನ್ ಘೆಂವ್ಕ್ ಸುರು ಕೆಲಾಂ. ಆಶೆಂ ಕೆಲ್ಲಿಂ ಹೊಕಲ್ ನವ್ರೊ 'ಎಕಾಮೆಕಾ ಥಂಯ್ ಬೆವಿಶ್ವಾಸಿ' ಮ್ಹಣ್ ದುಬಾವ್ತಾತ್! 

ಆದಿಂ ರೆಸ್ವೆರಾ ವೆಳಾರೀ ನವ್ರೊ ಮಾತ್ರ್ ಹೊಕ್ಲೆಚ್ಯಾ ಬೊಟಾಕ್ ಮುದಿ ಘಾಲ್ತಾಲೊ. ನವ್ರ್ಯಾಕ್ ಹೊಕ್ಲೆಚ್ಯಾ ಆವಯ್ನ್ ಮಾಟ್ವಾಂತ್ ಮುದಿ ಶಿಂವ್ಚಿ ಆಸ್‌ಲ್ಲಿ. ರೆಸ್ಪೆರಾಚ್ಯಾ ಮಿಸಾ ವೆಳಾರ್ ರೆಸ್ಪೆರಾಚಿ ಮುದಿ ಹೊಕ್ಲೆ ನವ್ರ್ಯಾನ್ ಅದಲ್ ಬದಲ್ ಕರುನ್ ನ್ಹೆಸ್ಚ್ಯಾ ಪಯ್ಲೆಂ ಯಾಜಕ್ ತ್ಯೊ ಬೆಂಜಾರ್ ಕರುನ್ ತಾಂಚೆರ್ ಸರ್ವೆಸ್ಪರಾಚೆಂ ಬೆಸಾಂವ್ ಘಾಲುನ್ ತ್ಯೊ ಆಶಿರ್ವಾದಿತ್ ಕರ್ತಾ. ತ್ಯೊ 'ತಾಂಚ್ಯಾ ಮೊಗಾ ಆನಿ ವಿಶ್ವಾಸಾಚಿಂ ಖುಣಾಂ' - ಮ್ಹಣ್ ಎಕಾಮೆಕಾಕ್ ದಿಂವ್ಚ್ಯಾಕ್ 'ತಾಂಚೆರ್ ಆಶಿರ್ವಾದ್ ಘಾಲುಂ' ಮ್ಹಣ್ತಾ. ತಿಂ ಎಕಾಮೆಕಾಚೆಂ ನಾಂವ್ ಕಾಡುನ್ ''ಘೆ ಹಿ ಮುದಿ. ಮ್ಹಜ್ಯಾ ಮೊಗಾಚಿ ಆನಿ ವಿಶ್ವಾಸಿಪಣಾಚಿಂ ಖುಣಾಂ ಮ್ಹಣ್ ಹಿ ಮುದಿ ತುಕಾ ದಿತಾಂ, ಬಾಪಾಚೆ ಆನಿ ಪುತಾಚೆ ಆನಿ ಪವಿತ್ರ್ ಆತ್ಮ್ಯಾಚೆ ನಾಂವಿಂ'' - ಮ್ಹಣೊನ್ ನವ್ರೊ ಹೊಕ್ಲೆಚ್ಯಾ ತಶೆಂ ಹೊಕಲ್ ನವ್ರ್ಯಾಚ್ಯಾ ಎಕಾಮೆಕಾಚ್ಯಾ ದಾವ್ಯಾ ಹಾತಾಚ್ಯಾ ಚವ್ತ್ಯಾ ಬೊಟಾಕ್ ಶಿರ್ಕಾಯ್ತಾನಾ ಭಾಸಾವ್ಣಿ ಕರ್ತಾತ್. 

ಆಮ್ಚ್ಯಾ ಪ್ರೊತೆಸ್ತಾಂತ್ ಭಾಂವ್ಡಾಂಚ್ಯಾ ಲಗ್ನಾ ವೆಳಾರ್ ದೇವ್ ಮಂದಿರಾಂತ್ ಪ್ರಾರ್ಥನ್ ಚಲ್ತಾ. ಪ್ರೊತೆಸ್ತಾಂತ್ ಕುಟ್ಮಾಂನಿ ಖರಾರಾ ವೆಳಾರ್ ತಶೆಂ ಇಗರ್ಜೆಂತ್ ರೆಸ್ಪೆರಾ ವೆಳಾರ್ 'ಅಯ್ಯ' ವಾ 'ಪಾಸ್ತೆರ್' ಮ್ಹಣ್ಚೊ ಯಾಜಕ್ ಆಪ್ಣಾ ಸಾಮ್ಕಾರ್ ಹೊಕ್ಲೆಕ್ ಆನಿ ನವ್ರ್ಯಾಕ್ ಮುದಿ ಅದಲ್ ಬದಲ್ ಶಿರ್ಕಾಂವ್ಕ್ ಸಾಂಗ್ತಾ. ಎಕಾಮೆಕಾ ಭಾಸ್ ದೀವ್ನ್ ಜಾತಚ್ ಕರಿಯಮಣಿ ಆನಿ ಮುದಿಯೊ ಬೆಂಜಾರ್ ಕರ್ತಾನಾ ಪಾಸ್ತರ್, ''ಕುರ್ಪೆಚ್ಯಾ ಬಾಪಾ, ಹಿಂ ತುಂ ಆಶಿರ್ವಾದಿತ್ ಕರ್, ಹಿಂ ದಿಂವ್ಚಿಂ ಆನಿ ವಾಪರ್ಚಿಂ ದೊಗಾಂಯ್ ನಿರಂತರ್ ಎಕಾಮೆಕಾಕ್ ವಿಶ್ವಾಸ್ ದವರ್ನ್ ಜೀವ್ ಆಸ್ತಾ ಪರ್ಯಾಂತ್ ಮೊಗಾನ್ ಆನಿ ಎಕ್ವಟಾನ್ ಜಿಯೆಂವ್ಕ್ ಫಾವೊ ಕರ್ ಮ್ಹಣ್ ಪ್ರಭು ಜೆಜು ಕ್ರೀಸ್ತಾ ಮುಕಾಂತ್ರ್ ತುಜೆಲಾಗಿಂ ಪ್ರಾರ್ಥಿತಾಂ, ಆಮೆನ್'' - ಮ್ಹಣ್ತಾ. ಉಪ್ರಾಂತ್ ನವ್ರೊ ಕರಿಯಮಣಿ ನ್ಹೆಸವ್ನ್, ಮುದಿ ಶಿರ್ಕಾವ್ನ್ ''ನಿರಂತರ್ ವಿಶ್ವಾಸ್ ತಶೆಂ ನಿತಳ್ ಮೊಗಾಚಿ ನಿಶಾನಿ ಜಾವ್ನ್ ಹಿ ಕರಿಯಮಣಿ ಆನಿ ಮುದಿ ತುಕಾ ದಿತಾಂ ಆನಿ ಮ್ಹಜ್ಯಾ ಕುಡಿ ಥಾವ್ನ್ ತುಕಾ ಸನ್ಮಾನ್ ಕರ್ತಾಂ'' - ಮ್ಹಣ್ ಸಾಂಗ್ತಾ. ತಶೆಂಚ್ ಹೊಕಲ್ ನವ್ರ್ಯಾಚ್ಯಾ ಬೊಟಾಕ್ ಮುದಿ ಘಾಲುನ್ ''ನಿರಂತರ್ ವಿಶ್ವಾಸ್ ತಶೆಂ ನಿತಳ್ ಮೊಗಾಚಿ ನಿಶಾನಿ ಜಾವ್ನ್ ಹಿ ಮುದಿ ತುಕಾ ದಿತಾಂ ಆನಿ ಮ್ಹಜ್ಯಾ ಕುಡಿ ಥಾವ್ನ್ ತುಕಾ ಸನ್ಮಾನ್ ಕರ್ತಾಂ'' - ಮ್ಹಣ್ತಾ. ಚರ್ಚ್ ಓಫ್ ಇಂಗ್ಲೆಡಾಚೆ ''ಹ್ಯಾ ಮುದಿಯೆ ಸಂಗಿಂ ಹಾಂವ್ ತುಜೆ ಕಡೆನ್ ಲಗಿನ್ ಜಾತಾಂ, ಮ್ಹಜ್ಯಾ ಕುಡಿ ಥಾವ್ನ್ ಹಾಂವ್ ತುಜೆಂ ಆರಾಧನ್ ಕರ್ತಾಂ ಆನಿ ಸರ್ವ್ ಮ್ಹಜ್ಯಾ ಸಂಸಾರಿಕ್ ವಸ್ತುಂ ಸಂಗಿಂ ಹಾಂವ್ ತುಕಾ ಮ್ಹಜೆಂ ಕರುನ್ ಘೆತಾಂ ... '' ಮ್ಹಣ್ ಭಾಸಾವ್ಣಿ ಕರ್ತಾತ್. 

ಹಿಂದೂ ರಿವಾಜೆಂ ಪ್ರಕಾರ್ ಸಯ್ರಿಕ್ ಘಟ್ ಜಾತಚ್ ಹೊಕ್ಲೆ-ನವ್ರ್ಯಾಚೆಂ 'ನಿಶ್ಚಯ' ದೊನೀ ಪಾಡ್ತಿಂಚ್ಯಾ ಧಾ-ಧಾ ಜಾಣಾಂ ಸಾಮ್ಕಾರ್ ಹೊಕ್ಲೆಚ್ಯಾ ಘರಾ ಚಲ್ತಾ. ಹೊಕಲ್ ನವ್ರ್ಯಾಕ್ ಭಾಂಗ್ರಾಳಿ ಮುದಿ ಘಾಲ್ತಾ ತರ್ ನವ್ರೊ ಹೊಕ್ಲೆಕ್ ಕಾಪಾಡ್ ಇನಾಮ್ ದಿತಾ. ಥೊಡ್ಯಾ ಕಡೆನ್ ಹಿಂದೂ ಹೊಕಲ್-ನವ್ರೊ ಖರಾರಾ ದಿಸಾ ಎಕಾಮೆಕಾ ಮುದಿ ದಿತಾತ್. ತಿ ತಾಣಿಂ ಮರಣ್ ಪರ್ಯಾಂತ್ ಬೊಟಾಕ್ ಘಾಲುಂಕ್ ಆಸ್ತಾ. ಲಗ್ನಾ ವೆಳಾರ್ ತಿಂ ಮುದಿ ಬದ್ಲಯ್ನಾಂತ್. ಹಿಂದ್ವಾಂ ಮದೆಂ ಲಗಿನ್ ಜಾಯ್ನಾತ್‌ಲ್ಲಿಂಯ್, ಚಡ್ತಾವ್ ಚೆಡೆ-ದಾದ್ಲೆ ಏಕ್ ಪುಣೀ ಮುದಿ ಶಿರ್ಕಾವ್ನ್ ಆಸ್ತಾತ್. ತಾಕಾ ಮದೆಂ ತಾಂಚ್ಯಾ ಜಲ್ಮಾ-ಗೃಹಾಚ್ಯಾ ರಂಗಾಚೊ ಫಾತರ್ ಆಸ್ತಾ. ಆಜ್‌ಕಾಲ್ ಅಸಲೆ ಫಾತರ್ ಚಡ್ತಾವ್ ನಕ್ಲಿ ಆಸ್ತಾತ್. ಹೆ ಫಾತರ್ ಆಸ್‌ಲ್ಲಿ ಮುದಿ ನ್ಹೆಸ್ಲ್ಯಾರ್ ತಾಂಚೆಂ ಭವಿಷ್ಯ್ ಬರೆಂ ಜಾತಾ, ಮರಣ್ ಪಯ್ಸ್ ಧಾಂವ್ತಾ, ದುಡ್ವಾನ್ ಗ್ರೇಸ್ತ್‌ಕಾಯ್ ಲಾಭ್ತಾ, ಪಿಡಾ-ಶಿಡಾ ಯೇನಾಸ್ತಾಂ ಭಲಾಯ್ಕಿ ಬರಿ ಉರ್ತಾ, ಆಶೆಲ್ಲೆಂ ಮೆಳ್ತಾ ಆನಿ ಮೆಲ್ಯಾ ನಂತರ್ 'ಮೋಕ್ಶ' ಪ್ರಾಪ್ತ್ ಜಾತಾ ಮ್ಹಣ್ ಪಾತ್ಯೆತಾತ್. ಥೊಡೆ ತರ್ನಾಟೆ ಜ್ಯೋತಿಷಿ ಲಾಗಿಂ ವಚೊನ್ ಫಾತ್ರಾಚೊ ರಂಗ್ ವಿಚಾರುನ್ ರುಪ್ಯಾಚ್ಯಾ ವಾ ಭಾಂಗಾರಾಚ್ಯಾ ಮುದಿಯೆಕ್ ಬಸಯ್ತಾತ್ ಆನಿ ಆಪ್ಣೆಂ ಆಶೆಲ್ಲಿ ಚಲಿ ಪತಿಣ್ ಜಾವ್ನ್ ಮೆಳ್ತಾ ಮ್ಹಣ್‌ಯೀ ಪಾತ್ಯೆಣೆನ್ ರಂಗೀನ್ ಫಾತರ್ ಆಸ್‌ಲ್ಲಿ ಮುದಿ ನ್ಹೆಸ್ತಾತ್. 

ಥೊಡೆ ಕಡೆನ್ ಹಿ ಮುದಿ ವಜ್ರಾಚಿ ಆಸ್ತಾ! ಪಯಿಲ್ಲಿ 'ಡಾಯ್ಮಂಡ್ ರಿಂಗ್' 1477 ವರ್ಸಾ ಎಕ್ಲ್ಯಾ ನವ್ರ್ಯಾನ್ ಆಪ್ಲ್ಯಾ ಹೊಕ್ಲೆಕ್ ನ್ಹೆಸಯಿಲ್ಲಿ. ರೆಸ್ಪೆರಾಚಿ ಮುದಿ ಅದಲ್ ಬದಲ್ ಕರ್ಚಿ ಸಾಂಪ್ರದಾಯಿಕ್ ರಿವಾಜ್ ಆಮ್ಕಾಂ ರೊಮಾಗಾರಾಂ ಥಾವ್ನ್ ಮೆಳ್ಳ್ಯಾ. ಕಾತೊಲಿಕ್ ಪವಿತ್ರ್ ಸಭೆನ್ ತಿ ಅಧಿಕೃತ್ ಥರಾನ್ ಮಾನುನ್ ಘೆತ್‌ಲ್ಲಿಯೀ ಜಾವ್ನಾಸಾ. ಮುದಿಯೊ ಎಕಾಮೆಕಾಚ್ಯಾ ಬೊಟಾಂಕ್ ಶಿರ್ಕಾಯ್ತಾನಾ ಇಗರ್ಜೆಚ್ಯೊ ಘಾಂಟಿ ಮಾರ್ತಾಲೆ, ಪಟಾಕಿ ಫುಟಯ್ತಾಲೆ ವಾ ಗರ್ನಾಳಿ ಫೊಡ್ತಾಲೆ ಆನಿ ಹೊಕ್ಲೆ ನವ್ರ್ಯಾಚೆಂ ಲಗಿನ್ ಜಾಲೆಂ ಮ್ಹಣ್ ಸಂಸಾರಾಕ್ ಆಯ್ಕಾಶೆಂ ಕರ್ತಾಲೆ. ಹಿ ಮುದಿ ಹೊಕ್ಲೆಚ್ಯಾ ಬೊಟಾಕ್ ಆಪ್ಲೊ ಪತಿ ಜಿವಂತ್ ಆಸ್ತಾ ವರೇಗ್ ಘಾಲುನ್ ಆಸಾಜೆ, ತಶೆಂಚ್ ನವ್ರ್ಯಾಚ್ಯಾ ಬೊಟಾಕ್ ಶಿರ್ಕಾಯಿಲ್ಲಿ ತಿ ಆಪ್ಲಿ ಪತಿಣ್ ಮೊರ್ತಾ ಪರ್ಯಾಂತ್ ಕಾಡುಂಕ್ ನಜೊ ಮ್ಹಳ್ಳೊ ಖಡಾಕಡ್ ಸಂಪ್ರದಾಯ್ ಆಸ್‌ಲ್ಲೊ. 

ಹ್ಯೊ ಮೊಗಾ ಮುದಿಯೊ ಎಕಾಮೆಕಾಕ್ ಜಿವಿತ್ ಭರ್ ಸಮರ್ಪಣಾಚೆಂ ಪ್ರತೀಕ್. ಮುದಿ ಎಕಾ ಚಲಿಯೆಕ್ ತಾಚ್ಯಾ ನವ್ರ್ಯಾ ಸಂಗಿಂ ಬಂದನ್ ಘಡ್ತಾ ಆನಿ ತಿಕಾ ನವ್ರ್ಯಾ ಖಾಲ್ ಜೀಣ್ ಭರ್ ಖಾಲ್ ಜಾವ್ನ್ ಜಿಯೆಂವ್ಕ್ ಸಾಕ್ಸ್ ದಿತಾ. ಮುದಿ ಎಕಾ ಚಲ್ಯಾಕ್ ಆಪ್ಲ್ಯಾ ಹೊಕ್ಲೆಕ್ ತಿಚ್ಯಾ ಜಿವಿತಾ ಪರ್ಯಾಂತ್ ರಾಕೊನ್ ವ್ಹರೊಂಕ್, ಸಾಂಬಾಳುಂಕ್ ಆನಿ ರಕ್ಶಣ್ ದೀಂವ್ಕ್ ಉಗ್ಡಾಸ್ ಕರ್ತಾ. ಪ್ರಾಣ್ ಗೆಲ್ಲೊಚ್ ಲಾಗ್ಶಿಲ್ಯಾನಿ ಮೊಡ್ಯಾಚ್ಯಾ ಬೊಟಾ ಥಾವ್ನ್ ಮುದಿ ನಿಕ್ಳಾಂವ್ಚೆಂ - ತೆಂ ಮಾತ್ರ್ ಭಾಂಗಾರ್ ಕಾಂಯ್ ಫೊಂಡಾಕ್ ಪಾವತ್ ಮ್ಹಳ್ಳ್ಯಾ ಅಪಧಯ್ರಾನ್! ಆಜ್‌ಕಾಲ್ ಆಸ್ಪತ್ರೆಕ್ ದಾಖಲ್ ಕರ್ತಾನಾಂಯ್ ಮುದಿ ನಿಕ್ಳಾಯ್ತಾತ್, ನಾ ತರ್ ಪಿಡೆಸ್ತ್ ಬರೊ ಜಾವ್ನ್ ಘರಾ ಆಯ್ಲ್ಯಾರಿ  ತಿ ಪಾಟಿಂ ಯೇನಾಸ್ತಾಂ ಕೊಣಾ ಎಕ್ಲ್ಯಾಚ್ಯಾ ಬೊಲ್ಸಾಕ್ ವೆತಾ!

ಆದಿಂ ಆಮ್ಚ್ಯಾ ಕೆನರಾ ಕೊಂಕ್ಣಿ ಕಾಥೊಲಿಕಾಂಚ್ಯಾ ಲಗ್ನಾ ಸಮಾರಂಭಾ ವೆಳಾರ್ ಸೊವ್ಯಾರ್ ಬಸ್‌ಲ್ಲ್ಯಾ ಕಡೆನ್ ನವ್ರ್ಯಾಚಿ ಮಾಂಯ್ ತಿಚ್ಯಾ ನಂಡಾಂಕ್, ಜಾವೆಂಕ್ ಆನಿ ಭಯ್ಣಿಂಕ್ ಸಾಂಗಾತಾ ಘೆವ್ನ್ ನವ್ರ್ಯಾಕ್ ಮುದಿಯೊ ಶಿಂವ್ತಾಲಿ. ಸಾಸುಮಾಂಯ್ ನವ್ರ್ಯಾಕ್ ಭಾಂಗ್ರಾಚಿ ಮುದಿ ದಿತಾಲಿ. ರೆಸ್ಪೆರಾ ವೆಳಾರ್ ಹೊಕಲ್ ತಾಕಾ ಮುದಿ ದೀನಾತ್‌ಲ್ಲಿ ಜಾಲ್ಲ್ಯಾನ್ ಮಾಂಯ್ನ್ ದಿಲ್ಲಿ ಮುದಿಚ್ ತಾಚಿ ಕಾಜಾರಾಚಿ ಮುದಿ ಜಾವ್ನಾಸ್ತಾಲಿ. ಉಪ್ರಾಂತ್ ಪಾಗುರ್ ಮಾಂಯೊಂ ಕಸ್ರಿಂತ್ ಬಾಂದ್‌ಲ್ಲಿ ರುಪ್ಯಾಚಿ ಮುದಿ ವಾ ಪಾವ್ಲಿ ನವ್ರ್ಯಾಕ್ ದಿತಾಲಿಂ. ನವ್ರೊ ಹಾತಿಂ ರಸ್ಮಾಚೊ ಲೇಸ್ ಸೊಡವ್ನ್ ತಾಂತು ತ್ಯೊ ಘೆತಾಲೊ. ''ವ್ಹರೆತಾಕ್ 12 ಭಾಂಗಾರಾಚ್ಯೊ ಆನಿ 12 ರುಪ್ಯಾಚ್ಯೊ ಮುದಿಯೊ ಮೆಳ್ಳ್ಯಾತ್'' ಮ್ಹಣ್ ವೇರ್ಸ್ ಗಾಯ್ತಾಲಿಂ. ಸಬಾರ್ ಕಾಜಾರಾಚ್ಯಾ ಸಾಲಾಂನಿ ಆತಾಂಯ್ 'ಮುದಿ ಶಿಂವ್ಚಿ' ರಿವಾಜ್ ಪಾಳುನ್ ಆಸಾತ್. ನವ್ರೊ ಧೆಡ್ಯಾ ಸಂಗಿಂ ಉಬೊ ರಾವ್ತಾ ಆನಿ ಸಾಸುಮಾಂಯ್ ತಾಕಾ ಆಶಿರ್ವಾದ್ ದೀವ್ನ್ ಭಾಂಗಾರಾಚಿ ಮುದಿ ನ್ಹೆಸಯ್ತಾ. ತಿಚ್ಯಾ ಪಾಟ್ಲ್ಯಾನ್ ಹೆರ್ ಪಾಗುರ್ ಮಾಂಯೊಂ, ಪೊಣ್ಜ್ಯೊ ಮಾಂಯೊಯೀ ನವ್ರ್ಯಾಕ್ ಬೆಸಾಂವ್ ದೀವ್ನ್ ಕಸರ್ ಗುಟ್ಲಾವ್ನ್ ಹಾಡ್‌ಲ್ಲಿ ಭಾಂಗಾರಾ ಮುದಿ ವಾ ಮುದಿಯಾಂ ಬದ್ಲಾಕ್ ರುಪ್ಯಾಂಚೆ ನೋಟ್ ಅರ್ಪಿತಾತ್. ಪಾಸೊಡಿ ಆಯೆರ್‌ಯೀ ಕರ್ತಾತ್. ಕಸರ್ ನಾ ತರ್ ಖಾಲಿಚ್ ಪಾಂಚ್ ಥಾವ್ನ್ ದೋನ್ ಹಜಾರ್ ರುಪ್ಯಾಂಚೆ ನೋಟ್ ದವರ್ನ್ ಮುದಿ ಶಿಂವ್ತಾತ್. ಕಸ್ರಿಂತ್ ಗುಟ್ಲಾಯಿಲ್ಲೊ ನೋಟ್ ಮುದಿ ಶಿಂವ್ಚ್ಯಾ ನಿಬಾನ್ ನವ್ರೊ ಘೆತಾ ಆನಿ ಧೆಡ್ಯಾ ಕಡೆನ್ ದಿತಾ. ಧೆಡೊ ತ್ಯೊ ಧವ್ಯಾ ತುವಾಲ್ಯಾಂತ್ ಆಪ್ಣಾವ್ನ್ ಘೆತಾ (ಸ್ವೀಕಾರ್ ಕರ್ತಾ!) ಆನಿ ಆಪ್ಲ್ಯಾ ಕೊಟಾಚ್ಯಾ ಬೊಲ್ಸಾಂತ್ ಚೆಪ್ತಾ. ಸರ್ವಾಂನಿ ಮುದಿ ಶಿಂವೊನ್ ಜಾಲ್ಯಾ ಉಪ್ರಾಂತ್ ಎಮ್.ಸಿ. ಧೆಡಿಯೆಕ್ ಧೆಡ್ಯಾಚ್ಯಾ ಬೊಲ್ಸಾಕ್ ಹಾತ್ ಘಾಲುನ್ ಮುಟ್‌ಭರ್ ಕಾಡುಂಕ್ ಆವ್ಕಾಸ್ ಕರುನ್ ದಿತಾ. ಧೆಡಿ ಕಶೆಂ ಪುಣೀ ಉರ್ಡೊನ್ ಮೂಟ್‌ಭರ್ ಕಾಡ್ತಾ. ತಿಚ್ಯಾ ಹಾತಾಕ್ ಮೆಳ್‌ಲ್ಲೆ ತಾಕಾ, ಉರುಲ್ಲೆ ಧೆಡ್ಯಾಕ್! ಹೆಂ ಮಂಗ್ಳೂರ್‌ಗಾರಾಂಚೆಂ ನವೆಸಾಂವಾಚೆಂ ಆಚರಣ್! 

--------------------------------------------------

ಕೆನರಾ ಕೊಂಕಣಿ ಕಾಥೊಲಿಕಾಂಚೊ ಲಗ್ನಾ ಸಂಪ್ರದಾಯ್ - ಹಾಕಾ ಸಂಬಂಧ್ ಜಾಲ್ಲಿಂ ಪಯ್ಲ್ಯಾಂಚಿ ಲೇಕನಾಂ  :

ಯೆದೊಳ್ಚಿಂ ಲೇಕನಾಂ  :

ಕಥಾ/ವಿಡಂಬನಾಂ  :

ಕವಿತಾ  :

Tags:  Canara Catholics Wedding ring, Mudi, Konkani, Mangalore, Mangalorean, Mother Tongue

0 Comment/s.

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :


Connect

Maibhaas

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE