web analytics

From around the world

ಪ್ರವೀಣ್ ತಾವ್ರೊ, ಕುಲ್ಶೇಕರ್
             
+971 50 7554105
ತುಮ್ಚ್ಯಾ ಗಮನಾಕ್:
Best be viewed in 1366 X 768 screen resolution and in Google Chrome

ಆಮ್ಚೆಂ ಕಾಜಾರ್ - ಸುಖಾ-ದುಖಾಂತ್, ಪಿಡೆ-ಶಿಡೆಂತ್, ಎಕಾಮೆಕಾ ಆಧಾರ್

Monday, April 18, 2016  /  By Admin

ಬರಯ್ಣಾರಾ ವಿಶಿಂ ಜಾಣಾ ಜಾ...

80.5
User Rating
(ಅನ್ಭೋಗ್ ಲೇಖನ್)
ಥೊಡ್ಯಾ ಮಹಿನ್ಯಾಂ ಆದಿಂ 'ದಾಯ್ಜಿವರ್ಲ್ಡ್' ಟೀವಿರ್ ಮ್ಹಜೊ ಆಪ್ತ್ ಮಿತ್ರ್ ಆನಿ 'ದಾಯ್ಜಿವರ್ಲ್ಡ್' ಇಂಗ್ಲಿಶ್ ಸಾತೊಳ್ಯಾಚೊ ಪ್ರಧಾನ್ ಸಂಪಾದಕ್ ಹೇಮಾಚಾರ್ಯ ಹಾಣೆಂ, 'ಕಾಲ್, ಆಜ್ ಆನಿ ಫಾಲ್ಯಾಂ' ಕಾರ್ಯಕ್ರಮಾಂತ್ ಆಮ್ಚ್ಯಾ ಮಂಗ್ಳುರಿ ಕೊಂಕ್ಣಿ ಕಥೊಲಿಕ್ ಸಮುದಾಯಾಂತ್ಲ್ಯಾ ಕಾಜಾರಾಂ-ಸೊಭಾಣಾಂಚ್ಯಾ ಸಂಭ್ರಮಾಂವಿಶಿಂ ಮ್ಹಜೆಕಡೆ ಏಕ್ ಸಂವಾದ್ ಚಲಯಿಲ್ಲೊ. ತ್ಯಾ ಸಂವಾದಾಂತ್ಲೆ ತಶೆಂಚ್ ಹೆರ್ ಥೊಡೆ ಪ್ರಮುಕ್ ವಿಶಯ್ ಹಾಂಗಾಸರ್ ದಿಲ್ಯಾತ್ - ಸಿಜ್ಯೆಸ್ ತಾಕೊಡೆ

ಹೇಮ: ಸಿಜ್ಯೆಸ್, ಆಮಿ ಆಜ್ ಉಲಂವ್ಕ್ ಆಸ್ಚೊ ವಿಶಯ್ 'ಆಮ್ಚಿಂ ಕಾಜಾರಾಂ ಆನಿ ಆಮ್ಚಿಂ ಸೊಭಾಣಾಂ'.  ಆತಾಂ ಮ್ಹಾಕಾ ಹೆಂ ಸಾಂಗ್ ತುಜ್ಯಾ ಕಾಜಾರಾಕ್ ಕಿತ್ಲಿ ಪ್ರಾಯ್ ಜಾಲಿ?
ಸಿಜ್ಯೆಸ್: ದೆವಾಚ್ಯೆ ಕುರ್ಪೆನ್ ಸಿಲ್ವಿಲಾಗಿಂ ಜಾಲ್ಲ್ಯಾ ಮ್ಹಜ್ಯಾ ಕಾಜಾರಾಕ್ ಹ್ಯೆಚ್ ಎಪ್ರಿಲ್ ಸತ್ತಾವೀಸ್ ತಾರಿಕೆರ್ ಪಾಂತ್ತೀಸ್ ವರ್ಸಾಂ ಭರ್ತಾತ್.
ಹೇಮ: ಹಾಂವ್ ಜಾಣಾಂ, ತುಂ ಆನಿ ಸಿಲ್ವಿ ಮೊಗಾರ್ ಪಡುನ್ ಕಾಜಾರ್ ಜಾಲ್ಲ್ಯಾತ್. ತುಮಿ ಧಾಂವುನ್ ವಚುನ್ ಕಾಜಾರ್ ಜಾಲ್ಲ್ಯಾತ್, ಅಶೆಂಯ್ ಹಾಂವೆಂ ಆಯ್ಕಾಲ್ಲೆಂ....?
ಸಿಜ್ಯೆಸ್: ಪೂರಾ ಫಟಿ! ತುಂಯಿ ಪಾಟೆನಾತ್ಲಿಂ ರೈಲಾಂ ಸೊಡ್ಚ್ಯಾಂತ್ ಕಾಂಯ್ ಪಾಟಿಂ ನಾಂಯ್! ಆಮ್ಕಾಂ ಧಾಂವುನ್ ವಚುನ್ ಕಾಜಾರ್ ಜಾಂವ್ಚಿ ಪರಿಸ್ಥಿತಿ ಉದೆಂವ್ಕ್ ನಾ. ಕಾರಣ್ ಆಮ್ಚ್ಯಾ ಕಾಜಾರಾಕ್ ಆಮ್ಚ್ಯಾ ದೊನ್೦ಯಿ ಕುಟ್ಮಾಂಚಿ ಜಾಂವ್, ಹೆರ್ ಕೊಣಾಯ್ಚಿ ಜಾಂವ್ ಆಡ್ಕಳ್ ನಾಸ್‍ಲ್ಲಿ. ಸಿಲ್ವಿ ಬೆಂದುರ್ ಫಿರ್ಗಜೆಚೆಂ ಆನಿ ಹಾಂವ್ ತಾಕೊಡೆಚೊ. ಸುರ್ವೆರ್ ಆಮ್ಚಿ ವಳಕ್ ಜಾಲಿ. ಸವ್ಕಾಸ್ ಆಮ್ಕಾಂ ಲವೇರಿಯಾ ತಾಪಾಚೊ ಕುಲ್ಕುಲೊ ಸುರು ಜಾಲೊ. ತವಳ್ ಹಾಂವ್ 'ರಾಕ್ಣೊ' ಆಫಿಸಾಂತ್ ವಾವುರ್ತಾಲೊಂ ಜಾಲ್ಲ್ಯಾನ್ ಬೆಸಾಂವಾಂ ಆನಿ  
ಇಂದುಲ್ಜೆನ್ಸಾಂ ಧಾರಾಳ್ ಮೆಳ್ತಾಲಿಂ. ಪುಣ್ ಸಾಂಬಾಳ್, 'ಅನ್ಯಭಾಗ್ಯ'ಕ್ ಮಾತ್ರ್ ಪಾಂವ್ಚೆ ತಿತ್ಲೊ! ಮ್ಹಾಕಾ 'ಪೆಪೆರೆ ಪೆಪೆ ಢುಮ್' ಜಾಂವ್ಕ್ 'ಮ್ಯಾಟರ್ ಆಫ್ ಮನಿ'ಚೆಂ ಸವಾಲ್ ಧೊಸ್ತಾಲೆಂ ತರ್‍ಯೀ, 'ಮಾತ್ರಿಮೊನಿ' ಸಾಕ್ರಾಮೆಂತ್ ಸ್ವೀಕಾರ್ ಕರ್ಚೆ ಥಂಯ್ ಆಮಿಂ ಫುಡೆಂ ಸರ್‍ಲ್ಯಾಂವ್. ಆಮ್ಚೆಂ ರೆಸ್ಪೆರ್ ತಾಕೊಡೆ ಇಗರ್ಜೆಂತ್ ಜಾಯ್ಜಾಯ್ ಮ್ಹಳ್ಳಿ ಮ್ಹಜಿ ಆಶಾ ಆಸ್‍ಲ್ಲಿ,. ತ್ಯೆ ದೆಕುನ್ ಮ್ಹಜೊ ಮಿತ್ರ್ ಆನಿ ತವಳ್‍ಚೊ ಸೈಕಲ್ ಚಾಂಪಿಯನ್ ಆನಿ ಫಾಮಾದ್ ಲೇಡಿಸ್ ಡ್ರೆಸ್ ಮೇಕರ್ ನೊರ್ಬರ್ಟ್ ಡಿ'ಸೋಜಾಚ್ಯಾ ಧವ್ಯಾ ಫಿಯೆಟ್ ಗಾಡಿಯೆರ್ (MYG 3AA3) ಬಸುನ್ ಆಮಿ ತಾಕೊಡೆ ಇಗರ್ಜೆಕ್ ರೆಸ್ಪೆರಾಕ್ ಗೆಲ್ಲ್ಯಾಂವ್.
ಸಿಲ್ವಿಚೊ ಬಾಪ್ಲ್ಯೊ ಬೆಂಗ್ಳುರ್ ದಿಯೆಸಿಜಿಚೊ ಯಾಜಕ್ ಬಾಪ್ ಗ್ರೇಶನ್ ರಾಸ್ಕಿನ್ಹಾನ್(ಆತಾಂ ದೆವಾದಿನ್) ಆಮ್ಚೆಂ ರೆಸ್ಪೆರ್ ಕೆಲ್ಲೆಂ. ಬೋ. ಮಾ. ಬಾಪ್ ಸ್ಟೇನಿ ಬಿ. ಲೋಬೊನ್ (ಆತಾಂ ಕಲ್ಯಾಣ್ಪುರ್ ಮಿಲಾಗ್ರಿಸ್ ಕಾಥೆದ್ರಾಲಾಚೊ ರೆಕ್ಟರ್) ಆಪುರ್ಬಾಯೆಚೊ ಸೆರ್ಮಾಂವ್ ಸಾಂಗ್‍ಲ್ಲೊ. 'ಹ್ಯಾಂಡಲ್ ವಿದ್ ಕೇರ್' ಮ್ಹಣ್ ತಾಣೆಂ ದಿಲ್ಲೊ ಸಂದೇಶ್ ಮ್ಹಾಕಾ ಆಜೂನ್ ಉಗ್ಡಾಸ್ ಆಸಾ. ರುಜಾಯ್‍ಚ್ಯಾ ದೆ| ಡೆನಿಸ್ ಫೆರ್ನಾಂಡಿಸಾನ್ ವಾಚಪ್ ವಾಚ್‍ಲ್ಲೆಂ.
ರೆಸ್ಪೆರಾ ಉಪ್ರಾಂತ್ ಆಮ್ಚ್ಯಾ ಘರ್ಚ್ಯಾ ಆಂಗ್ಣಾಂತ್ ಘಾಲ್ಲ್ಯಾ ಮಾಟ್ವಾಂತ್ ಚಲ್‍ಲ್ಲ್ಯಾ ಸಂಭ್ರಮಾಕ್ ಲೊಕಾಮೊಗಾಳ್ ಯುವ ಮುಕೆಲಿ ಆನಿ ತೆವ್ಳ್ಯಾ ಪತ್ರಾಂಚೊ (ಮಿತ್ರ್, ಝೆಲೊ, ಕಾಣಿಕ್) ಸಂಪಾದಕ್ ಆಸ್ಟಿನ್ ಡಿ'ಸೋಜಾ ಪ್ರಭು ಕಾರ್ಯೆಂ ನಿರ್ವಾಹಕ್. 'ರಾಕ್ಣೊ' ಸಂಪಾದಕ್ ಬಾಪ್ ಮಾರ್ಕ್ ವಾಲ್ಡರಾನ್ ಆನಿ ಫಿರ್ಗಜ್ ಗೊವ್ಳಿಕ್ ಮಂಡಳಿಚೊ ಉಪಾಧ್ಯಕ್ಷ್ ಗ್ರೆಗರಿ ಮೆಂಡಿಸಾನ್ ಭಲಾಯ್ಕಿ ಮಾಗ್‍ಲ್ಲಿ. ತಾಕೊಡೆಚೆಂ ಲೊಕಾಮೊಗಾಳ್ ಹೊಲಿಕ್ರೊಸ್ ಬ್ರಾಸ್ ಬ್ಯಾಂಡ್ ಆಸ್‍ಲ್ಲೆಂ. ಬೆಂದುರ್‍ಚೆ ಫಾಮಾದ್ ಸಂಗೀತ್‍ಗಾರ್ ಪಿಂಟೊ ಭಾವ್ - ವಿವಿಯನ್, ಮರ್ವಿನ್, ಜೊಸ್ವಿನ್ ಸಂಗಿಂ ಕ್ರಿಸ್ಟಿ, ಗಾವ್ಪಿ ಕ್ಲೊಡಿ ಆನಿ ಹೆರ್ ಹಾಜರ್ ಆಸ್‍ಲ್ಲೆ. ಹ್ಯಾ ವರ್ವಿಂ ಮಾಟ್ವಾಂತ್ ಬೀಟ್ ಗ್ರೂಪ್ ಆನಿ ಬ್ರಾಸ್ ಬ್ಯಾಂಡಾಚೆಂ ಜುಗಲ್‍ಬಂದಿ ಸುರು ಜಾಲ್ಲೆಂ. ಮೂಡ್‍ಬಿದ್ರಿ ಫೊಟೊ ಸೆಂಟರಾಚೊ ಫಾಮಾದ್ ಫೊಟೊಗ್ರಾಫರ್ ಲೋಬೊ ಕೆಮರಾ ಘೆವ್ನ್ ಮಾಟ್ವಾಂತ್ ಉಬೊ ಆಸ್‍ಲ್ಲೊ. ಲೇಖಕ್ ಡೊಲ್ಫಿ ಕಾಸ್ಸಿಯಾಸಂಗಿಂ ಆಗ್ನೆಲ್ ರುಜೇರಿಯೊ ಆನಿ ಎಡ್ವಿನ್ ಫೆರ್ನಾಂಡಿಸ್‍ಯಿ ಆಯಿಲ್ಲೆ.
ಹಾಂವೆಂ ಮಾತ್ರ್ ಆಮ್ಚ್ಯಾ ಲಗ್ನಾಚಿಂ ಆಮಂತ್ರಣ್ ಪತ್ರಾಂ ನಾಟಕಾಚಿಂ ಹ್ಯಾಂಡ್ ಬಿಲ್ಲಾಂ ವಾಂಟ್‍ಲ್ಲೆಬರಿ ವಾಂಟ್‍ಲ್ಲಿಂ. ದಲಿತ್ (ಹರಿಜನ್ ಆನಿ ಮ್ಹಾರ್) ಕುಟ್ಮಾಂಕ್‍ಯಿ ಆಮಂತ್ರಣ್ ಪತ್ರಾಂ ದಿಲ್ಲಿಂ. ಬೋವ್‍ಶಾ ಹೆಂ ಆಮ್ಚ್ಯಾ ಗಾಂವ್ಚ್ಯಾ ಚರಿತ್ರೆಂತ್ ಪಯ್ಲೆ ಪಾವ್ಟಿಂ! ಆಯ್ತಾರಾಚೊ ದೀಸ್ ಜಾಲ್ಲ್ಯಾನ್ ಹಜಾರಾಂ ವಯ್ರ್ ಲೋಕ್. ತವಳ್ ಕೆಟರಿಂಗ್ ನಾಸ್‍ಲ್ಲೆಂ. ಗಾಂವ್ಚೆ ಆನಿ ಸೆಜಾರ್ಚೆ ಭೋವ್ ಬರೆ ರಾಂದ್ಪಿ ಆಸ್‍ಲ್ಲೆ. ಘರಾಚ್ ದುಕೊರ್ ಮಾರ್ನ್ ಜೆವಣ್ ತಯಾರ್ ಕೆಲ್ಲೆಂ. ಆಂಗ್ಣಾಂತ್ ಮಾಡಿಯಾಂಚ್ಯೊ ಪಂಗ್ತ್ಯೊ ಘಾಲ್ನ್ ಶಿರೊತ್ಯಾಂನಿ ಜೆವಣ್ ವಾಡ್‍ಲ್ಲೆಂ. ನಿಮಾಣ್ಯಾ ಪಂಗ್ತಿರ್ ದಲಿತಾಂಕ್ ಬಸೊವ್ನ್ ಜೆವಣ್ ದಿಲ್ಲೆಂ. ಸಕ್ಡಾಂಚೆಂ ಜೆವಣ್ ಜಾತಚ್ ಆಮಿ ಜೆವ್ಣಾಕ್ ಬಸ್ಲ್ಯಾಂವ್. ರಾಂದ್‍ಲ್ಲೆಂ ದುಕ್ರಾಮಾಸ್ ಖಾಲಿ ಜಾಲ್ಲ್ಯಾನ್ ಆಮ್ಕಾಂ, ಹೊಕ್ಲೆ-ನೊವ್ರ್ಯಾಕ್ ಆನಿ ಮ್ಹಜ್ಯಾ ಥೊಡ್ಯಾ ಖಾಸ್ ಮಿತ್ರಾಂಕ್, ಶಿತ್-ಲೊಣ್ಚೆಂ ಆನಿ ಕುವಾಳ್ಯಾಚೊ ಸಾರ್!  ಮ್ಹಜ್ಯಾ ಥೊಡ್ಯಾ ಸಯ್ರ್ಯಾಂನಿ, ಕುಟ್ಮಾಚ್ಯಾಂನಿ, ಶೆಜಾರ್ಚ್ಯಾ, ವಾಡ್ಯಾಚ್ಯಾ ಆನಿ ಫಿರ್ಗಜೆಚ್ಯಾ ಥೊಡ್ಯಾಂನಿ, ಪ್ರತ್ಯೇಕ್ ಜಾವ್ನ್ ಮ್ಹಜ್ಯಾ ಥೊಡ್ಯಾ ಖಾಸ್ ಇಶ್ಟಾಂ ಮಿತ್ರಾಂನಿ ಮೊಸ್ತು ಸಹಕಾರ್ ದಿಲ್ಲೊ. ಹಫ್ತ್ಯಾ ಆದಿಂಚ್ ಆಂಗ್ಣಾಂತ್ ಮಾಡಿಯೊ ಪೂರ್ನ್ ಮೊಡ್ಲಾಂಚೊ ಮಾಟೊವ್ ಘಾಲ್ಲೊ ಆನಿ ಇಂದಾ ತಾಳಿಯಾಂನಿ ಸುಂರ್ಗಾರಾಯಿಲ್ಲೊ. ವಾವುರ್ಲೆಲ್ಯಾಂಕ್ ಸಾಂಜೆರ್ ಜೆವಣ್. ಆಪುಟ್ ಕಂಟ್ರಿ ಸೊರೊ ಆನಿ ಗೋಳಿ ಸೊಡಾ. ಟೆಲಿಗ್ರಾಮಾಂ ದೀಂವ್ಕ್ ಆಯಿಲ್ಲೊ ಕೊಂಕ್ಣೊ ಪಾಂಡು ಮಾಮ್ ಸಯ್ತ್ ಸಾಂಜೆಚ್ಯಾ ಪೀವನಾಕ್ ಆನಿ ಸಹಭೋಜನಾಕ್ ಹಾಜರ್ ಜಾಲ್ಲೊ!
ಆಮ್ಕಾಂ ಆಯಿಲ್ಲ್ಯಾ ಆಯೆರಾಚೊ (ನಗ್ದಿ) ಐವಜ್ ರು. 3510. ಕ್ರೀಸ್ತಾಂವ್ ವೊವ್ಳ್ಯಾಂ ಥಾವ್ನ್ ರು. 5, 10, 15, 25, 50 & 100 - ಅಶೆಂ ಆಯಿಲ್ಲೆ ಆಸಾತ್. ಹಿಂದು ವೊವ್ಳ್ಯಾಂ ಥಾವ್ನ್ ರು. 2, 3, 5, 10 & 25 - ಅಶೆಂ ಆಯ್ಲ್ಯಾತ್. ದೆ. ಸಾಯ್ಮನ್ ರಾಸ್ಕಿಂಜ್ ಆನಿ ದೆ. ಫೆಲಿಕ್ಸ್ ಪಾವ್ಲ್ ನೊರೆಂಜ್ ಹಾಣಿಂ ಮನಿಯೋರ್ಡರಾ ಮುಕಾಂತ್ರ್ ಆಯೆರ್ ಧಾಡ್‍ಲ್ಲೊ.
ಆಮ್ಕಾಂ ಆಯಿಲ್ಲ್ಯಾ ಟೆಲಿಗ್ರಾಮಾಂಚೊ ಸಂಕೊ - 46. ಹಾಂಚೆಪಯ್ಕಿ ಥೊಡಿಂ ಪ್ರಮುಕ್: ಮಂಗ್ಳುರ್ಚೊ ಬಿಸ್ಪ್ ದೆ. ಬಾಜಿಲ್ ಸಾಲ್ವದೊರ್ ಸೊಜ್, ಬಾಪ್ ಕಿಲ್ಫರ್ಡ್ ಡಿಸೋಜಾ, ಭಯ್ಣ್ ಡೊರೀನ್ ಆನಿ ಬರ್ಥಾ ಲೋಬೊ (ಸಿಒಡಿಪಿ), ಬಾಪ್ ದಯಾನಂದ ಪ್ರಭು, ಬಾಪ್ ಆಲ್ಫ್ರೆಡ್ ಮೆಂಡೊನ್ಸಾ, ಬಾಪ್ ಜೊನ್ ಕುನ್ಹಾ, ಭಯ್ಣ್ ಗ್ಲೋರಿಯಾ, ಭಯ್ಣ್ ಫಿಲು ಕಾರ್ಡೋಜಾ - ಬೆಂಗ್ಳುರ್, ಬಾಪ್ ವಿಕ್ಟರ್ ಕ್ರಾಸ್ತಾ - ಹಲ್ಗಾ, ಬಾಪ್ ವಿಕ್ಟರ್ ನೊರೊನ್ಹಾ - ಮೈಸೂರ್, ಎಮಿಯಾರ್ ಮುಂಬಯಿ, ಗ್ರೆಗರಿ ಮಿನೇಜಸ್ ಆನಿ ಕುಟಮ್ - ವಾಲೆನ್ಸಿಯಾ, ವಿಕ್ಟರ್ ಆಲ್ವಾರಿಸ್ ಕುಲ್ಶೇಕರ್, ಪೀಟರೀಟಾ ವಾಲೆನ್ಸಿಯಾ, ಬಾಪ್ ಮುಕ್ತಿ ಪ್ರಕಾಶ್, ಭಯ್ಣ್ ಮರೀನಾ, ಭಯ್ಣ್ ಹಿಲೇರಿಯಾ, ಮೊನ್ಸಿ. ಜೆ.ಬಿ. ಆಲ್ವಾರಿಸ್, ಎ.ಎಕ್ಸ್. ಪತ್ರಾವೊ - ಮಸ್ಕತ್, ಎಚ್.ಆರ್. ಆಳ್ವ - ಪಾಂಗ್ಳಾ, ಆವಿಲ್ ರಸ್ಕಿನ್ಹಾ - ಕುಲ್ಶೇಕರ್, ಕಾರ್ಮೆಲಿಟಾ ಗೋವಿಯಸ್ (ಶುಭಾಶಯ್ ಕಾರ್ಡ್), ಸ್ಟೇನ್ ಅಗೇರಾ - ಮುಲ್ಕಿ, ಜಯಶ್ರೀ (ಆಕಾಶವಾಣಿ) ಆನಿ ಹೆರ್.

ಹೇಮ: ತು ತ್ಯಾ ಕಾಳಾರ್ ಏಕ್ ಪ್ರಖ್ಯಾತ್ ಕಾರ್ಯೆಂ ನಿರ್ವಾಹಕ್‍ಯಿ ವ್ಹಯ್. ಜಾಯ್ತೆ ಭಲಾಯ್ಕೆಚೆ ಗ್ಲಾಸ್‍ಯಿ ತುಂವೆಂ ಉಕಲ್ಲ್ಯಾಯ್. ಪುಣ್ ತ್ಯಾ ಕಾಳಾರ್ ಆನಿ ಹ್ಯಾ ಕಾಳಾರ್ ಆಮ್ಚ್ಯಾ ಕಾಜಾರಾಚ್ಯಾ ಸಂಭ್ರಮಾ ವಿಶಯಾಂತ್ ಕಸಲಿ ಬದ್ಲಾವಣ್ ತುಕಾ ದಿಸ್ತಾ?
ಸಿಜ್ಯೆಸ್: ತ್ಯಾ ಕಾಳಾರ್ ಲೊಕಾಚಿ ಆರ್ಥಿಕ್ ಪರಿಸ್ಥಿತಿ ಆಯ್ಚೆಬರಿ ನಾಸ್‍ಲ್ಲಿ. ಹಾಂವ್ ಪಯ್ಲೆಂ ಪಾವ್ಟಿಂ ಕಾರ್‍ಯೆಂ ನಿರ್ವಾಹಕ್ ಜಾಲ್ಲೊ - 1978೦ತ್ ಹಂಪನ್‍ಕಟ್ಟಾ ಕಥೊಲಿಕ್ ಕ್ಲಬ್ಬಾಂತ್ ಚಲ್‍ಲ್ಲ್ಯಾ ಕೊಂಕ್ಣಿ ನಾಟಕಿಸ್ತ್, ಪತ್ರಿಕ್ ಉದ್ಯಮಿ ಡೊಲ್ಫಿ ಕಾಸ್ಸಿಯಾ ಆನಿ ಕ್ಲಾರಾ, ಹಾಂಚ್ಯಾ ಕಾಜಾರಾಕ್, ಸೂಟ್ ಮಾರುಂಕ್ ನಾ. ಪ್ಯಾಂಟ್-ಶರ್ಟಾರ್ ಕಾರ್ಯೆಂ ಚಲಯಿಲ್ಲೆಂ. ತವಳ್ ಪಯ್ಶ್ಯಾಂಚೊ ಮತ್ಲಬ್ ನಾಸ್‍ಲ್ಲೊ. ಮೋಗ್, ಮಯ್ಪಾಸ್ ಆನಿ ಇಶ್ಟಾಗತೆಕ್ ಆಮಿ ಮಾನ್ ದಿತಾಲ್ಯಾಂವ್. ಮಂಗ್ಳುರಾಂತ್ ಸುರ್ವಿಲ್ಯಾ ವರ್ಸಾಂನಿ ಕಾರ್ಯೆಂ ನಿರ್ವಾಹಕಾಂಕ್ ಸಂಭಾವನ್ ದಿಂವ್ಚಿ ಸವಯ್ ನಾಸ್‍ಲ್ಲಿ. ಜೆವ್ಲಾಯ್ಗೀ ಮ್ಹಣ್ ಕೊಣ್‍ಯಿ ವಿಚಾರಿನಾತ್‍ಲ್ಲಿಂ. ಎಕಾ ಥರಾಚಿ ಸಮಾಜ್ ಸೆವಾ ತಿ.
ತವಳ್ ಮಾನೆಸ್ತ್ ಎರಿಕ್ ಒಝೇರಿಯೊನ್ ವುಡ್‍ಲ್ಯಾಂಡ್ಸ್ ಹೊಟೆಲಾಂತ್ ಎಮ್ಸಿಂಚಿ ಏಕ್ ಜಮಾತ್ ಆಪಯ್ಲಿ. ಸಬಾರ್ ಎಮ್ಸಿ ತ್ಯಾ ಜಮಾತೆಕ್ ಹಾಜರ್ ಜಾಲ್ಲೆ. ಆನಿ ಮುಕಾರ್ ಕೊಣೆಂಯಿ ಫುಂಕ್ಯಾಕ್ ಕಾರ್ಯೆಂ ಚಲಯ್ನಾಯೆ. ಕಾಜಾರಾಚ್ಯಾ ಕಾರ್ಯಾಕ್ ರು. 150, ರೋಸ್, ವೊಲ್, ಕುಮ್ಗಾರ್ ಆನಿ ಹೆರ್ ಕಾರ್ಯಾಂಕ್ ರು, 100 ಮ್ಹಣ್ ದರ್ ಠರಾಯ್ಲಿ. ಕಾರ್ಯೆಂ ನಿರ್ವಾಹಣ್ ಕೆಲ್ಲ್ಯಾ ಮ್ಹಾಕಾ ಪಯ್ಲೆಂ ಪಾವ್ಟಿಂ ಕವರಾಂತ್ 150 ರುಪಯ್ ಘಾಲ್ನ್ ದಿಲ್ಲೊ ಆಸಾ ಪ್ರಸ್ತುತ್ ಬೆಂಗ್ಳುರಾಂತ್ ಜಡ್ಜ್ ಜಾವ್ನಾಸ್ಚೊ ಭೋವ್ ಮಾನೆಸ್ತ್ ಮೈಕಲ್ ಡಿಕುನ್ಹಾ ಹಾಣೆಂ, ತಾಚ್ಯಾ ಭಯ್ಣಿಚೆಂ ಲಗ್ನ್, ಬಾಪ್ ಮಾರ್ಕ್ ವಾಲ್ಡರಾಚ್ಯಾ ಭಾವಾಕಡೆ ಜಾಲ್ಲ್ಯಾ ಸಂದರ್ಭಾರ್.
ಜೆನ್ನಾಂ ಗಲ್ಫಾಚೊ ದುಡು ಹ್ಯಾ ಗಾಂವಾಕ್ ವ್ಹಾಳುಂಕ್ ಸುರು ಕೆಲೊ, ತೆನ್ನಾಂ ಆಮ್ಚ್ಯಾ ಲೊಕಾಚಿ ಆರ್ಥಿಕ್ ಪರಿಸ್ಥಿತಿ ಸುಧಾರ್‍ಲಿ. ಸಹಜ್ ಜಾವ್ನ್ ಥೊಡ್ಯಾಂಚಿ ಮಿಜಾಸ್ಕಿ, ದವ್ಲತ್ ಆನಿ ದರ್ಬಾರ್ ವಾಡ್ಲೆಂ. ಕಾಜಾರಾಂ ಮಾತ್ರ್ ನ್ಹಯ್, ವೋಲ್, ಕುಮ್ಗಾರ್, ಖರಾರ್ ಆನಿ ಹೆರ್ ಕಾರ್ಯಾಂಚೆಂ ರೂಪ್‍ಚ್ ಬದ್ಲಾಲೆಂ. ಹ್ಯಾ ವರ್ವಿಂ ಆಮ್ಚ್ಯಾ ಕೊಂಕ್ಣಿ ಕಥೊಲಿಕ್ ಸಮುದಾಯಾಂತ್ಲ್ಯಾ ಸೊಭಿತ್ ರಿತಿ, ರಿವಾಜಿಂಕ್, ಸಂಸ್ಕೃತಿ ಆನಿ ಸಂಪ್ರದಾಯಾಂಕ್ ಕುರಾಡ್ ಪಡ್ಲಿ.

ಹೇಮ: ಆದಿಂ ದೊಗಾಂ ವ್ಯಕ್ತಿಂಕ್ ವಿಶಿಸ್ಟ್ ಮಾನ್ ಮೆಳ್ತಾಲೊ, ಸೈರಿಕೆಚ್ಯಾ ಮಾಲ್ಯಾಕ್ ಆನಿ ವಾಡ್ಯಾಚ್ಯಾ ಗುರ್ಕಾರಾಕ್. ಪುಣ್ ಆಯ್ಚ್ಯಾ ಜನಾಂಗಾನ್ ಹ್ಯಾ ದೊಗಾಂಕ್‍ಯಿ ಜೊಬ್‍ಲೆಸ್ ಕೆಲಾಂ ಮ್ಹಳ್ಳಿ ಬದ್ಲಾಮ್ ಆಯ್ಕುಂಕ್ ಮೆಳ್ತಾ. ತುಂ ಕಿತೆಂ ಮ್ಹಣ್ತಾಯ್?
ಸಿಜ್ಯೆಸ್: ಸಯ್ರಿಕೆಚೆ ಮ್ಹಾಲೆ ವಾ ಮ್ಹಾಲಿಣಿ ಜೊಬ್‍ಲೆಸ್ ಜಾಂವ್ಕ್ ನಾಂತ್, ಇಲ್ಲಿಶಿಂ ಹಾಯ್-ಫಾಯ್ ಜಾಲ್ಯಾಂತ್. ಆತಾಂ ತಾಂಕಾಂ ಮ್ಯಾಚ್ ಮೇಕರ್ಸ್ ಮ್ಹಣ್ತಾತ್ ಆನಿ ಮ್ಯಾಚ್ ಮೇಕಿಂಗ್ ವಾ ಮ್ಯಾಚ್ ಫಿಕ್ಸಿಂಗ್‍ಯಿ ಏಕ್ ಬರೆಂ ಉದ್ಯಮ್.
ಪುಣ್ ಬಿರ್ಮೊತ್ ಗುರ್ಕಾರಾಂಚಿ. ಅಸಲೊ ಏಕ್ ಮನಿಸ್ ಆಪ್ಲ್ಯಾ ವಾಡ್ಯಾಂತ್ ಜಿಯೆತಾ ಮ್ಹಣ್ ಸಾದ್ಯಾ ಆನಿ ಮಧ್ಯಮ್ ವರ್ಗಾಚ್ಯಾ ಲೊಕಾಕ್ ಕಳಿತ್ ಆಸ್ತಾ. ಪುಣ್ ಥೊಡೆ ಗ್ರೇಸ್ತ್, ಗುರ್ಕಾರಾಂಕ್ ಕ್ಯಾರ್ ಕರಿನಾಂತ್ ಮ್ಹಳ್ಳೆಂ ಹೆಣೆಂ ತೆಣೆಂ ಆಯ್ಕುಂಕ್ ಮೆಳ್ತಾ. ಗುರ್ಕಾರ್ ಕಸಲೊಯಿ ಪ್ರತಿಫಳ್ ಆಶೆನಾಸ್ತಾಂ ವಾಡ್ಯಾಚ್ಯಾ ಲೊಕಾಕ್ ನಿಸ್ವಾರ್ಥಿ ಸೆವಾ ದಿತಾ. ತಾಕಾ ಮೆಳ್ಚೆಂ ಎಕ್‍ಚ್ ಭಾಗ್ ಮ್ಹಳ್ಯಾರ್ ವರ್ಸಾಕ್ ಏಕ್ ಪಾವ್ಟಿಂ ನಿಮಾಣ್ಯಾ ಬ್ರೇಸ್ತಾರಾ ಆಪೊಸ್ತಲಾಂಚ್ಯಾ ಜಾಗ್ಯಾರ್ ತಾಂಕಾಂ ಬಸವ್ನ್ ವಿಗಾರ್ ತಾಚ್ಯಾ ಉಜ್ವ್ಯಾ ಪಾಯಾಚೆಂ ಏಕ್ ಬೋಟ್ ಧುತಾ. ಮಾಗಿರ್ ಏಕ್ ಉಂಡೊ ದಿತಾ, ತಿತ್ಲೆಂಚ್. ತೊ ಬಾವ್ಡೊ ವಾಡ್ಯಾಂತ್ ಮೋರ್ನ್ ಜಾಲ್ಯಾರ್ ಪಾದ್ರ್ಯಾಬಾಕ್ ಸಾಂಗುಂಕ್, ಮೊಂತಿ ಫೆಸ್ತಾಕ್ ಭಾತಾಚ್ಯೊ ಕಣ್ಶೊ ವ್ಹಾವಂವ್ಕ್, ಆನಿ ವಾಡ್ಯಾಂತ್ಲ್ಯಾ ರೊಸಾಕ್ ವಿಗಾರ್ ಆನಿ ಕಾಜಿತೊರ್ ಯೇನಾತ್ಲ್ಯಾರ್ ಆಮೊರಿ ಶಿಕೊಂವ್ಕ್ ಮಾತ್ರ್. ಉಪ್ರಾಂತ್ ತಾಚ್ಯಾ ಜಾಗ್ಯಾರ್ ಶೇರ್ವಾನಿ ನ್ಹೆಸ್‍ಲ್ಲೊ ಎಮ್ಸಿ ಉಬೊ ಜಾತಾ.

ಹೇಮ: ಸೈರಿಕೆಚ್ಯಾ ಮಾಲ್ಯಾಚೊ ಆನಿ ವಾಡ್ಯಾಚ್ಯಾ ಗುರ್ಕಾರಾಚೊ ಜಾಗೊ ಇವೆಂಟ್ ಮೆನೆಜ್‍ಮೆಂಟಾಚ್ಯಾಂನಿ, ಕೆಟರಿಂಗ್ ವಾಲ್ಯಾಂನಿ ಆನಿ ಫೊಟೊಗ್ರಾಫಾರಾನ್ ಘೆತ್ಲಾ. ಅಶೆಂ ಸಾಂಗ್ಲೆಲೆಂ ಆಯ್ಕುಂಕ್ ಮೆಳ್ತಾ. ಕಿತ್ಲ್ಯಾ ಮಟ್ಟಾಕ್ ಸತ್?
ಸಿಜ್ಯೆಸ್: ವೆಳಾ ಕಾಳಾ ಪರ್ಮಾಣೆ ಬದ್ಲಾವಣ್ ಘಡ್ಚಿ ಸಹಜ್. ಮಾಯ್‍ಗಾಂವಾ ಥಾವ್ನ್ ಪಯ್ಸ್ ಆಸ್‍ಲ್ಲ್ಯಾಂಕ್ ಇವೆಂಟ್ ಮೆನೆಜ್‍ಮೆಂಟಾಚಿ ಗರ್ಜ್ ಪಡ್ತಾ. ತೆ ಇವೆಂಟ್ ಮೆನೆಜರ್, ತ್ಯಾ ತ್ಯಾ ಪಾಡ್ತಿಕ್ ಕಶೆಂ ಜಾಯ್, ಕಿತೆಂ ಜಾಯ್ ತಶೆಂ ಕಾರ್ಯೆಂ ಸೊಬಿತ್ ಥರಾನ್ ಮಾಂಡುನ್ ಹಾಡ್ತಾತ್. ಅಸಲಿಂ ವ್ಹಡ್ ಮಟ್ಟಾಚಿಂ ಕಾರ್ಯಿಂ ಸೈರಿಕೆಚ್ಯಾ ಮಾಲ್ಯಾಂನಿ ಜಾಂವ್, ಗುರ್ಕಾರಾಂನಿ ಜಾಂವ್ ಮಾಂಡುನ್ ಹಾಡುಂಕ್ ಜಾಯ್ನಾ. ತ್ಯಾ ಕಾಮಾಂತ್ ವೃತ್ತಿಪರತಾ ವಾ ಪ್ರೊಫೆಶನಲಿಸಂ ಗರ್ಜ್.

ಹೇಮ: ತುಂ ಏಕ್ ಕಾರ್ಯೆಂ ನಿರ್ವಾಹಕ್ ಜಾವ್ನ್, ಏಕ್ ಕಾರ್ಯೆಂ ಮಾಂಡುನ್ ಹಾಡುಂಕ್ ಕಾಜಾರ್ ಜಾಂವ್ಚ್ಯಾ ನೊವ್ರ್ಯಾಚ್ಯಾ ವಾ ಹೊಕ್ಲೆಚ್ಯಾ ಕುಟ್ಮಾಲಾಗಿಂ ಏಕ್ ಸೊಲ್ಲೊ ಕರ್ತಾಯ್. ಕಸಲ್ಯೊ ಸರ್ವ್ ಸಂಗ್ತಿ ಮತಿಂತ್ ಘೆತಾಯ್, ಎಕ್ ಕಾರ್ಯೆಂ ಆಮ್ಚ್ಯಾ ಸಮಾಜಾಚ್ಯಾ ರಿತಿರಿವಾಜಿಂ ಭಿತರ್‍ ಆಸಾಜೆ ಮ್ಹಳ್ಳೊ ತುಜೊ ಉದ್ದೇಶ್ ಆಸ್ತಾಗೀ?
ಸಿಜ್ಯೆಸ್: ಆತಾಂಚ್ಯಾ ಕಾಳಾರ್ ಕಾರ್ಯೆಂ ನಿರ್ವಾಹಕ್ ಹೊಕ್ಲೆ-ನೊವ್ರ್ಯಾಚ್ಯಾ ಕುಟ್ಮಾಂಕ್ ಭೆಟುನ್ ತಾಂಚ್ಯಾ ಕಾರ್ಯಾವಿಶಿಂ ಮೀಟಿಂಗಾಂ ಚಲಯ್ತಾತ್. ಆನಿ ತಾಂಕಾಂ ಪಸಂದ್ ಜಾಂವ್ಚೆ ಪರ್ಮಾಣೆ ಕಾರ್ಯೆಂ ಚಲಯ್ತಾತ್. ಥೊಡೆ ಬೊಂಬಯ್‍ಚ್ಯಾ ಕಾಜಾರಾಂಚ್ಯೊ ವಿಡಿಯೊ ಪಳೆವ್ನ್ ಬ್ರಾಯ್ಡಲ್ ಮಾರ್ಚ್ ಆನಿ ಹೆರ್ ನಾಚ್ ಸೂಚಯ್ತಾತ್. ಆಮ್ಚ್ಯಾ ಕಾಳಾರ್ ಹೆಂ ಪೂರಾ ನಾಸ್‍ಲ್ಲೆಂ. ವಿಡಿಯೊ, ಯೂ ಟ್ಯೂಬ್ ವಾ ವಾಟ್ಸಪ್ ಮ್ಹಳ್ಳಿಂ ಜಿಂಗ್ರಿಪಿಸಾಂವಾಂ ನಾಸ್‍ಲ್ಲಿಂ. ತವಳ್ ಆಮಿ ಆಮ್ಕಾಂ ಜಾಯ್ ತಶೆಂ ಕಾರ್ಯೆಂ ಚಲಯ್ತಾಲ್ಯಾಂವ್. ಪುಣ್ ಆತಾಂ ತಾಂಕಾಂ ಜಾಯ್ ಜಾಲ್ಲೆ ಪರ್ಮಾಣೆ ಚಲಯ್ಜೆ ಪಡ್ತಾ.

ಹೇಮ: ಆಮ್ಚಿಂ ಚಡ್ತಾವ್ ಕ್ರೀಸ್ತಾಂವಾಂಚಿಂ ಕಾಜಾರಾಂ ಆಮ್ಚ್ಯೊ ರಿತಿ-ರಿವಾಜಿಂಚ್ಯಾಕ್‍ಯಿ ಚಡ್ ಪಾಶ್ಚಾತ್ಯ್ ರಿವಾಜಿಂ ಪರ್ಮಾಣೆ ಚಲ್ತಾತ್. ನ್ಹೆಸಣ್ ಧರ್ಲೆಲೆಂ, ಭಾಸ್ ಧರ್ಲೆಲಿ, ಆಟ್ ನೇಟ್ ಧರ್ಲೆಲೆ, ಸಂಗೀತ್ ಆನಿ ನಾಚ್ ಧರ್ಲೆಲೆ, ಭಲಾಯ್ಕಿ ಮಾಗ್ಚಿ ರೀತ್ ಆನಿ ಹೊಕ್ಲೆ-ನೊವ್ರ್ಯಾನ್ ಆರಾವ್ನ್ ಧರ್ನ್ ಕೀಸ್ ಮಾರ್ಚೆಂ ಪರ್ಯಾಂತ್ ಪಾಶ್ಚಾತ್ಯ್ ರಿವಾಜಿಂಚೆಂ ಅನುಕರಣ್ ಮ್ಹಣ್ ಆಮಿ ಜಾಣಾಂವ್. ಹ್ಯಾ ಸಂಗ್ತಿಂಕ್ ಕಿತ್ಲ್ಯಾ ಮಟ್ಟಾಕ್ ಬದ್ಲಾವಣ್ ಗರ್ಜ್ ಆನಿ ತಿ ಬದ್ಲಾವಣ್ ಹಾಡ್ಯೆತ್ ಮ್ಹಣ್ ತುಕಾ ಭೊಗ್ತಾ?
ಸಿಜ್ಯೆಸ್: ಹಿ ಬದ್ಲಾವಣ್ ಸವ್ಕಾಸ್ ಜಾಂವ್ಚಿ. ಪಾಶ್ಚಾತ್ಯ್ ರಿತಿ-ರಿವಾಜಿಂಚೊ ಕಾಂಠಾಳೊ ಯೆತಾನಾ ಆಮ್ಚೊ ಲೋಕ್ ಆಮ್ಚಾ ಸೊಬಿತ್ ಆನಿ ಆಪುರ್ಬಾಯೆಚ್ಯಾ ರಿವಾಜಿಂಕ್ ಪಾಟಿಂ ವೆತಲೊ. ಥೊಡ್ಯಾ ವರ್ಸಾಂ ಆದಿಂ ಮಾಂಡ್ ಸೊಬಾಣ್ ಸಂಸ್ಥ್ಯಾನ್ ಮಾಟೊವ್ ಸೊಬಾಣಾ ದ್ವಾರಿಂ ಏಕ್ ಬದ್ಲಾವಣ್ ಹಾಡುಂಕ್ ಪ್ರಯತನ್ ಕೆಲ್ಲೆಂ.

ಹೇಮ: ಆಮ್ಚ್ಯಾ ಆದ್ಲ್ಯಾ ಎಕಾ ಸಂವಾದಾಂತ್ ಮಾನಾಚೊ ಸಯ್ರೊ ಜಾವ್ನ್ ಆಯ್ಲೆಲ್ಯಾ ಪ್ರಖ್ಯಾತ್ ಹಾಸ್ಯಾಂಗಾರ್ ಆನಿ ಕಾರ್ಯೆಂ ನಿರ್ವಾಹಕಾನ್ ಸಾಂಗ್ಲೆಂ ಕೀ ಆಮ್ಚೆ ಕಾರ್ಯೆಂ ನಿರ್ವಾಹಕ್ ಫಕತ್  ಮೂಕ್ ಪ್ರೇಕ್ಷಕ್. ತಾಂಚೆಂ ವರ್ವಿಂ ಕಸಲಿಂಯಿ ಬದ್ಲಾವಣ್ ಹಾಡುಂಕ್ ಸಾಧ್ಯ್ ನಾ. ತಶೆಂ ಕಾಂಯ್ ಸಾಂಗ್ಲ್ಯಾರ್ ತಸಲ್ಯಾಂಕ್ ಬಹಿಷ್ಕಾರ್ ಘಾಲ್ತಾತ್. ತುಕಾ ಕಶೆಂ ಭಗ್ತಾ?
ಸಿಜ್ಯೆಸ್: ತಾಣೆಂ ಸಾಂಗ್‍ಲ್ಲ್ಯಾಂತ್ ಸತ್ ಆಸಾ. ಕಾರ್ಯೆಂ ನಿರ್ವಾಹಕಾಚೆಂ ಕಾಮ್ ಮ್ಹಳ್ಳ್ಯಾರ್ 'ಪಂಡಿ ಬೇಲೆ, ಪಾಡಿ ನುಪ್ಪು' (ಸಾಂಗ್‍ಲ್ಲೆಂ ಕಾಮ್ ವಾಡ್‍ಲ್ಲೆಂ ಶಿತ್) ಮ್ಹಳ್ಳೆಬರಿಂ. ತಾಣಿಂ ಪಾರ್ಟಿನ್ ಸಾಂಗ್‍ಲ್ಲೆಂ ಆಯ್ಕಾಜೆ ಪಡ್ತಾ. ಕೊಣೆ ಕೊಣಾಕ್ ಬಹಿಷ್ಕಾರ್ ಘಾಲ್ಚೊ? ತೊ ಕಾಳ್ ಯೆದೊಳ್ ಯೇಂವ್ಕ್ ನಾ. ಆನಿ ಸ್ವಾಭಿಮಾನ್ ಆಸ್ಚೆ ಎಮ್ಸಿ ಕೊಣಾಕ್‍ಯಿ ತಕ್ಲಿ ಬಾಗಾಯ್ನಾಂತ್.

ಹೇಮ: ಥೊಡ್ಯಾ ಮಹಿನ್ಯಾಂ ಆದಿಂ 'ರಾಕ್ಣೊ' ಪತ್ರಾಚೆರ್ ತುಂವೆಂ ಎಕ್ ಬರೊಚ್ ಸಂವಾದ್ ಉಟಯ್ಲೊಯ್, ಆಮಿ ಆಮ್ಚ್ಯಾ ಕಾಜಾರಾ ಸೊಭಾಣಾಂಕ್ ಗರ್ಜೆವಿಣೆಂ ಖರ್ಚುಂಚ್ಯಾ ದುಡ್ವಾ ವಿಶ್ಯಾಂತ್, ಲೆಕಾವರ್ತೆಂ ರುಸುಮ್ ಘೆಂವ್ಚ್ಯಾ ಕಾರ್ಯನಿರ್ವಾಹಕಾಂ ವಿಶ್ಯಾಂತ್, ತಾಚೆ ಉಪ್ರಾಂತ್ ಜಾಯ್ತ್ಯಾಂನಿ ತುಜ್ಯಾ ಅಭಿಪ್ರಾಯೆಕ್ ಹೊಗಳ್ಸಿಲೆಂ, ಥೊಡ್ಯಾಂನಿ ತುಜ್ಯಾ ಅಭಿಪ್ರಾಯೆಚೆಂ ಖಂಡನ್ ಕೆಲೆಂ. ತುಕಾ ಭೊಗ್ತಾಗೀ ತುಂ ಅರಣ್ಯಾಂತ್ಲೊ ಅಸ್ಕತ್ ತಾಳೊ ವಾ ತುಜ್ಯಾ ಭಗ್ಣಾಂಕ್‍ಯಿ ಸ್ಪಂದನ್ ಕರ್ತೆಲೆ ಆಸಾತ್ ಮ್ಹಣೊನ್?
ಸಿಜ್ಯೆಸ್: ಬಾಪ್ ಮುಕ್ತಿ ಪ್ರಕಾಶಾನ್ 'ಸ್ತ್ರೀಯೊ ಆನಿ ಕುಟ್ಮಾ ಸುಧಾರಣ್ ಸಮಿತಿ'ಚ್ಯಾ ಆಶ್ರಯಾಖಾಲ್ ಬಿಸ್ಪಾಚ್ಯಾ ನಿವಾಸಾಂತ್ ಆನಿ ವಾಲೆನ್ಸಿಯಾ ಹೊಲಾಂತ್ ಆಮ್ಚ್ಯಾ ಕಾಜಾರಾಂ ಸೊಬಾಣಾಂ ವಿಶಿಂ ದೋನ್ ಪರಿಸಂವಾದ್ ಆಸಾ ಕೆಲ್ಲೆ. ಪಯ್ಲ್ಯಾ ಪರಿಸಂವಾದಾಕ್ ಮಂಗ್ಳುರಾಂತ್ಲೆ ಚಡಾವತ್ ಕಾರ್ಯೆಂ ನಿರ್ವಾಹಕ್ ಹಾಜರ್ ಜಾಲ್ಲೆ. ದುಸ್ರ್ಯಾ ಪರಿಸಂವಾದಾಂಕ್ ಎಪಿಸ್ಕೋಪಲ್ ವಾರಾಡ್ಯಾಚ್ಯಾ ಸಕ್ಕಡ್ ಫಿರ್ಗಜಿಂಚೆ ಗುರ್ಕಾರ್ ಆನಿ ಗುರ್ಕಾರ್‍ನಿಂ ಹಾಜರ್ ಜಾಲ್ಲಿಂ. ವಕೀಲ್ ಎಂ.ಪಿ. ನೊರೊನ್ಹಾ, ಡೊ. ಕಾರ್ಮೆಲಿಟಾ ಡಿ'ಸೋಜಾ  ಆನಿ ಮಾನೆಸ್ತ್ ಜೋರ್ಜ್ ಕಾಸ್ತೆಲಿನೊ ಹಾಂಚಿಂ ಉಲೊವ್ಪಾಂ ಆಸ್‍ಲ್ಲಿಂ. ಮಾಗಿರ್ ಪರಿಸಂವಾದ್ ಹಾಂಗಾಸರ್ ಲೊಕಾ ಥಾವ್ನ್ ಆಯ್ಕುಂಕ್ ಮೆಳ್‍ಲ್ಲ್ಯಾ ವಿಶಯಾಂ ವಯ್ರ್ ಹಾಂವೆಂ ರಾಕ್ಣೊರ್ ಲೇಕನ್ ಬರಯಿಲ್ಲೆಂ.
ಬರಂವ್ಚೆಂ ಕಾಮ್ ಮ್ಹಜೆಂ, ಘೆಂವ್ಚೆಂ ವಾ ಸೊಡ್ಚೆಂ ಲೊಕಾಚೆಂ. ಮ್ಹಜೆಂ ಲೇಕನ್ ಗುಡ್ಯಾಕ್ ಮಾತಿ ವ್ಹಾವಯಿಲ್ಲೆಬರಿ ಜಾಂವ್ಕ್ ಪುರೊ. ಪುಣ್ ಹಾಂವೆಂ ಮಾತ್ರ್ ಕಾಳೊಕಾಂತ್ ವಾತಿ ಪೆಟಂವ್ಚೆಂ ಪ್ರಯತನ್ ಕೆಲಾಂ.

ಹೇಮ: ಕಾಜಾರಾಚೊ ವೇಳ್ ಮಟ್ವೊ ಜಾಲೊ. ಡ್ಯಾನ್ಸ್ ಕರುಂಕ್ ವೇಳ್ ಮೆಳ್ಳೊನಾ. ಹೊಲಾಚ್ಯಾ ಮೆನೆಜರಾನ್ ಬೆಲ್ಲ್ ಮಾರ್ಲಿ ಮ್ಹಳ್ಳೆಂ ರುದಾನ್ ಆಯ್ಕುಂಕ್ ಮೆಳ್ತಾ... ಕಾಜಾರಾಚಿ ದೊತೊರ್ನ್, ಕಿತ್ಲಿ ಗರ್ಜ್ ಆನಿ ಸಕಾಳಿಕ್? ಪೈಶೆ ದಿಲ್ಯಾರ್ ಮಾಫಿ ಆಸಾ ಮ್ಹಣ್ ಆಯ್ಕಾಲಾಂ.... ದುಬ್ಳ್ಯಾಂಚೆಂ ರೆಸ್ಪೆರ್ ಕರುಂಕ್ ಕಾಜಿತೊರ್, ಗ್ರೇಸ್ತಾಂಗೆಲ್ಯಾ ಕಾಜಾರಾಂಕ್ ಬಿಸ್ಪ್ ಯೆತಾ ಮ್ಹಳ್ಳೊ ಅಪವಾದ್ ಆಯ್ಕುಂಕ್ ಮೆಳ್ತಾ. ಕಿತ್ಲ್ಯಾ ಮಟ್ಟಾಕ್ ಆಮ್ಚಿ ಪವಿತ್ರ್ ಸಭಾ 'ಕೆಪಿಟಲಿಸ್ಟಿಕ್' ಜಾಲ್ಯಾ ಮ್ಹಣ್ ತುಕಾ ಭಗ್ತಾ? ಕೊಂಕಣ್ ಕೊಗುಳ್ ವಿಲ್ಫಿನ್‍ಯಿ ಹ್ಯೆ ವಿಶ್ಯಾಂತ್ ಪ್ರಸ್ತಾವ್ ಕಾಡ್ಲೊಲೊ ಆಸಾ. ತುಜ್ಯಾ ನದ್ರೆಂತ್ ಎಕ್ ಸಾದೆಂ ಕಾಜಾರ್, ಜೆಂ ಆಮ್ಚೆ ರೀತ್ ರಿವಾಜಿಂಕ್ ತಾಳ್ ಪಡ್ಚೆ. ತಸಲೆಂ ಎಕ್ ಕಾಜಾರ್ ತುವೆಂ ಪಳಯಿಲ್ಲೆಂ ಆಸಾ?
ಸಿಜ್ಯೆಸ್: ಆತಾಂಚಿಂ ತರ್ನಾಟಿಂ ಕಾಜಾರಾ ಆದಿಂಚ್ ಉಬಿ ದೊತೊರ್ನ್ ಶಿಕ್ತಾತ್ ಜಾಲ್ಲ್ಯಾನ್ ತಾಂಕಾಂ ದೊತೊರ್ನೆಚಿ ಗರ್ಜ್ ನಾ. ಪುಣ್ ಲಗ್ನಾಚ್ಯಾ ಸಂಸ್ಕಾರಾವಿಶಿಂ, ಬರೆಂ ಕುಟಮ್ ಬಾಂದುನ್ ಹಾಡ್ಚೆವಿಶಿಂ ತಾಂಕಾಂ ಮಾರ್ಗ್‍ದರ್ಶನ್ ದಿತಾತ್. ಡೊ. ಎಡ್ವರ್ಡ್ ನಜ್ರೆತ್ ಆನಿ ಹೆರ್ ಎಕಾ ದಿಸಾಚೆಂ ಪ್ರೀ-ಕ್ಯಾನಾ ಕೊನ್ಫರೆನ್ಸ್ ಚಲವ್ನ್ ವರ್ತಾತ್. ಪಯ್ಶೆ ದಿಲ್ಯಾರ್ ಸರ್ಟಿಫಿಕೆಟ್ ದಿತಾತ್ ಮ್ಹಳ್ಳೆವಿಶಿಂ ಮ್ಹಾಕಾ ಖಬಾರ್ ನಾ. ಮ್ಹಜ್ಯಾ ಚಿಂತ್ಪಾ ಪರ್ಮಾಣೆ ರೆಸ್ಪೆರ್ ಕಾಜಿತೊರಾನ್ ಕೆಲ್ಯಾರ್‍ಯಿ ಎಕ್‍ಚ್, ವಿಗಾರಾನ್ ಕೆಲ್ಯಾರ್‍ಯೀ ಎಕ್‍ಚ್. ಥೊಡ್ಯಾಂಕ್ ಬಿಸ್ಪಾಕ್ ಆಪವ್ನ್ ರೆಸ್ಪೆರ್ ಕರವ್ನ್ ಲೊಕಾಕ್ ದಾಕಂವ್ಚೆಂ ವ್ಹಡ್ಪಣ್ ಆಸ್ತಾ. ಮಾಗಿರ್ ಥೊಡೆ ರೆಸ್ಪೆರಾಕ್ ಧಾ-ಬಾರಾ ವಾ ವೀಸ್-ಪಂಚ್ವೀಸ್ ಜಣ್ ಪಾದ್ರ್ಯಾಬಾಂಕ್ ಆಪಯ್ತಾತ್, ಎಕ್ಲೊ ವಾ ಚಡಿತ್ ಬಿಸ್ಪ್ ಆಸ್ತಾತ್. ಆನಿ ಬಿಸ್ಪಾನ್ ರೆಸ್ಪೆರ್ ಕೆಲ್ಲಿಂ ಜೊಡಿಂ ಡೈವೊರ್ಸ್ ಜಾಯ್ನಾಂತ್ ಮ್ಹಳ್ಳಿ ಖಂಚಿ ಗ್ಯಾರಂಟಿ?!
ಆಮ್ಚಿ ಪವಿತ್ರ್ ಸಭಾ ಮನ್ಶಾನಿಂಚ್ ಬಾಂದ್‍ಲ್ಲಿ. ತಿ ಕಾಂಯ್ ಸರ್ಗಿಂ ಥಾವ್ನ್ ಭುಂಯ್ ಪಡುಂಕ್ ನಾ. ಅಶೆಂ ಮ್ಹಣ್ತಚ್ ಹಾಂಗಾಸರ್‍ಯೀ ದುಡು, ವೆಪಾರ್, ವಯ್ವಟಾಚೊ ಮನೋಭಾವ್ ಸಹಜ್ ಜಾವ್ನ್ ಆಸ್ತಾ. ಎಕ್‍ಚ್ ಆಮಿ ತಾಂಚೆ ಸಾಂಗಾತಾ ಎಡ್ಜಸ್ಟ್ ಕರ್ನ್ ವಚಾಜೆ. ನಾ ತರ್ ದೊಳೆ ಧಾಂಪುನ್ ವಗೆಚ್ ಬಸುಂಕ್ ಜಾಯ್.
ಮಾಂಡ್ ಸೊಭಾಣಾಚ್ಯಾ 'ಮಾಟೊವ್ ಸೊಬಾಣಾ' ಖಾಲ್ ಥೊಡಿಂ ಜೊಡಿಂ ಆಮ್ಚಾ ಸಮುದಾಯಾಚ್ಯಾ ಸೊಬಿತ್ ರಿತಿ-ರಿವಾಜಿಂ ಪರ್ಮಾಣೆ ಸಾದೆಂ ಕಾಜಾರ್ ಜಾಲ್ಯಾಂತ್. ಪುಣ್ ತ್ಯಾ ಕಾಜಾರಾಂಕ್ ಹಾಜರ್ ಜಾಂವ್ಚೊ ಅವ್ಕಾಸ್ ಮ್ಹಾಕಾ ಲಾಬುಂಕ್ ನಾ. ತವಳ್‍ಚೊ ಯುವಮುಕೆಲಿ ಎಚ್.ಆರ್. ಆಳ್ವ - ಆಕಾಶ್‍ವಾಣಿಚಿ ಕನ್ಸೆಪ್ಟಾ ಫೆರ್ನಾಂಡೀಸ್, ಸ್ಟೇನಿ ಆಲ್ವರಿಸ್ - ಸೀಮಾ, ವಿತೊರಿ ಕಾರ್ಕಳ್ - ಸರಿತಾ, ಅನಿಲ್ ಡಿಕುನ್ಹಾ - ಐರಿನ್ ರೆಬೆಲ್ಲೊ, ಪ್ರವೀಣ್ ತಾವ್ರೊ - ರೆನಿಟಾ ಆನಿ ಹೆರ್ ಥೊಡಿಂ ಆದ್ಲೆ ಸಂಪ್ರದಾಯ್, ರಿತಿ-ರಿವಾಜಿಂ ಪರ್ಮಾಣೆ ಸಾದಿಂ ಕಾಜಾರಾಂ ಜಾಲ್ಯಾಂತ್. ತ್ಯೆ ಶಿವಾಯ್ ಆನಿಕ್‍ಯಿ ಥೊಡಿಂ ನವ್ಯಾ ಚಿಂತ್ಪಾಚಿಂ ಜೊಡಿಂ ಸಾದೆಂ ಕಾಜಾರ್ ಜಾಲ್ಲಿಂ ಆಸಾತ್. ಆಮ್ಚ್ಯಾ ಸಮಾಜಾಂತ್ ಹಜಾರಾಂಚ್ಯಾ ವಾ ಲಾಖಾಂಚ್ಯಾ ಖರ್ಚಾರ್ ಕಾಜಾರ್ ಜಾಲ್ಲಿಂಯಿ ಆಸಾತ್, ಕರೊಡಾಂಚ್ಯಾ ಖರ್ಚಾರ್ ಕಾಜಾರ್ ಜಾಲ್ಲಿಂಯಿ ಆಮಿ ಪಳೆತಾಂವ್. ಪುಣ್ ಕಾಜಾರ್ ಕಿತ್ಲೆಂ ಗಡ್ಡ್, ಸಂಭ್ರಮಾನ್, ಗದ್ದಾಳಾಯೆನ್ ಜಾಲೆಂ ಮ್ಹಳ್ಳೆಂ ಗರ್ಜೆಚೆಂ ನ್ಹಯ್, ಬಗರ್ ತೆಂ ಕಾಜಾರ್ ಆಕೇರ್ ಪರ್ಯಾಂತ್ ಬಾಳ್ವೊಂಚೆಂ ಭೋವ್ ಗರ್ಜೆಚೆಂ. ಲೋಕ್ ತಾಂತಾಂಚ್ಯಾ ತಾಂಕಿ ಪರ್ಮಾಣೆ ದುಡು ಖರ್ಚಿತಾ. ತಿ ತಾಂಚಿ ಖುಶಿ, ತಾಂಚಿ ಮರ್ಜಿ ಆನಿ ತಾಂಚೆ ಪಯ್ಶೆ. ಹ್ಯಾ ಕಾಳಾರ್ ಕಾಜಾರ್ ಕಿತ್ಲ್ಯಾ ಲಾಖಾಂಚಾ ವಾ ಕೊರೊಡಾಂಚ್ಯಾ ಖರ್ಚಾಚೆಂ ಮ್ಹಣ್ಚೆ ಪ್ರಾಸ್, ಕಿತ್ಲ್ಯಾ ಸುಖಾಳ್ ವರ್ಸಾಂಚೆಂ ಮ್ಹಳ್ಳೆಂ ಭೋವ್ ಗರ್ಜೆಚೆಂ.
ಆಮ್ಚ್ಯಾ ಕಾಜಾರಾವಿಶಿಂ ನಿಮಾಣೆಂ ಏಕ್ ಉತರ್ ಸಾಂಗ್ಚೆಂ ತರ್ - ಆಮಿ ಜೊಡ್ಲಿನಾ ಜಾವ್ಯೆತ್ ದುಡ್ವಾಚಿ ಗ್ರೇಸ್ತ್ ಕಾಯ್, ಪುಣ್ ದೆವಾನ್ ದಿಲ್ಯಾ ಆಮ್ಕಾಂ ಶಾಂತಿ, ಸಂತೊಸ್ ಆನಿ ಸವಸ್ತ್ ಕಾಯ್! ಸುಖಾಳ್ ನೀದ್‍ಯಿ ಪಡ್ತಾ, ನಿದೆಂತ್ ರಂಗಾಳ್ ಸಪ್ಣಾಂಯಿ ಪಡ್ತಾತ್! ತಿತ್ಲೆಂಚ್ ಪುರೊ.


ಆಮ್ಚ್ಯಾ ಲಗ್ನಾಕ್ ಬರೆ೦ ಮಾಗೊನ್ ಥೊಡ್ಯಾ ಕೊ೦ಕ್ಣಿ ಪತ್ರಾ೦ನಿ ಪರ್ಗಟ್‌ಲ್ಲೆ ಶುಭಾಶಯ್ ಅಶೆ ಆಸಾತ್:

ರಾಕ್ಣೊ ಕುಟ್ಮಾಚಿ ಖಬರ್ : ಸಿಜ್ಯೆಸಾಕ್ ಕಾಜಾರ್ ಜಾಲೆ೦
'ರಾಕ್ಣೊ'ಚೊ ಸಹಾಯಕ್ ಸ೦ಪಾದಕ್ ಆನಿ ಕೊ೦ಕ್ಣಿ ಬರೊವ್ಪಿ ಶ್ರೀ ಸಿರಿಲ್ ಜಿ. ಸಿಕ್ವೇರಾ,  ಎಪ್ರಿಲ್ 27ವೆರ್ ಬೆ೦ದುರ್ ಫಿರ್ಗಜಿಚ್ಯಾ  ಸಿಲ್ವಿಯಾ ರಾಸ್ಕೀನ್ಹಾಲಾಗಿ೦  ಕಾಜಾರ್  ಜಾಲೊ. ತಾಕೊಡೆ ಇಗರ್ಜಿ೦ತ್ ವ್ಹಕ್ಲೆಚೊ ಬಾಪ್ಲ್ಯೊ  ಬಾಪ್ ಗ್ರೇಶಿಯನ್ ರಾಸ್ಕೀನ್ಹಾನ್ ರೆಸ್ಪೆರ್ ಕೆಲ್ಯಾ ಉಪ್ರಾ೦ತ್ ಸಿಜ್ಯೆಸಾಚಾ ಘರಾ ಹೆರ್ ಕಾರ್ಯೆ೦ ಆಸ್‌ಲ್ಲೆ೦. ಸ೦ಪಾದಕ್ ಬಾಪ್ ಮಾರ್ಕ್ ವಾಲ್ಡರಾನ್ ವ್ಹಕ್ಲೆ-ನೊವ್ರ್ಯಾಚಿ ಭಲಾಯ್ಕಿ ಮಾಗ್ಲಿ. ಶ್ರೀ ಓಸ್ಟಿನ್ ಡಿಸೋಜಾ ಪ್ರಭುನ್ ಕಾರ್ಯಾಚೆ೦  ಯಜ್ಮಾನ್‌ಪಣ್ ಪಳೆಲೆ೦. ರಾಕ್ಣೊ ಸಿಜ್ಯೆಸಾಕ್ ಆನಿ ಸಿಲ್ವಿಕ್ ಸುಖಾ ಸ೦ತೊಸಾಚೆ೦ ಲಾ೦ಬ್ ಆನಿ ಫಳಾದಿಕ್ ಕಾಜಾರಿ ಜಿವಿತ್ ಮಾಗ್ತಾ.
- ಬಾಪ್ ಮಾರ್ಕ್ ವಾಲ್ಡರ್
'ರಾಕ್ಣೊ' ಸ೦ಪಾದಕ್,ಸ೦ಪಾದಕೀಯ್ ಮ೦ಡಳಿ ಆನಿ ರಾಕ್ಣೊ ಶಿಬ೦ದಿ

ಲಗ್ನಾ  ಸ೦ದೇಶ್
ಕೊ೦ಕಣಿ೦ತ್ಲೊ ಉರ್ಭೆಸ್ತ್ ತಶೆ೦ ಫಾ೦ಕಿವೊ೦ತ್ ಲೇಖಕ್ ಶ್ರೀ ಸಿಜ್ಯೆಸ್ ತಾಕೊಡೆ ಹ್ಯಾಚ್ ಎಪ್ರಿಲ್ 27, 1980 ವೆರ್ ಸಕಾಳಿ೦ 9.30 ವೊರಾರ್ ತಾಕೊಡೆ ಭಾಗೆವೊ೦ತ್ ಖುರ್ಸಾಚ್ಯಾ ದೆವಾಳಾ೦ತ್, ಮ೦ಗ್ಳುರ್‌ಚ್ಯಾ ಸಿಲ್ವಿಯಾ ರಾಸ್ಕೀನ್ಹಾಲಾಗಿ೦ ಪವಿತ್ರ್ ಲಗ್ನಾ ಬಾ೦ದಾ೦ತ್ ಎಕ್ವೊಟ್ಚ್ಯಾ ಸ೦ದರ್ಭಾರ್ ತಾಕಾ ಸರ್ವ್ ಜಯ್ತ್ ಮಾಗೊನ್ ತಾಚ್ಯಾ ಲಗ್ನಾ ಜಿಣಿಯೆ೦ತ್ ಆನಿಕೀ ಚಡ್ ಸಾಹಿತಿಕ್ ಉರ್ಭಾ ವಾಡೊ೦ ಆನಿ ಚಡೊ೦ ಮ್ಹಣ್ ಆಶೆತಾ೦ವ್. ಸಿಜ್ಯೆಸ್ 'ಪಯ್ಣಾರಿ' ವಾಚ್ಪ್ಯಾ೦ಕ್ ಭೋವ್ ವಳ್ಕಿಚೊ. ತಾಚೆ ಸಬಾರ್ ವಿನೋದ್ ಆನಿ ಲೇಖನಾ೦ 'ಪಯ್ಣಾರಿ'ರ್ ಫಾಯ್ಸ್ ಜಾ೦ವ್ಚ್ಯಾಸವೆ೦ 'ಡೊನ್ ಕ್ವಿಕ್ಸೊಟ್' ಮ್ಹಳ್ಳಿ ತಾಣೆ ಅನುವಾದ್ ಕೆಲ್ಲಿ ಕಾದ೦ಬರಿ ಸಾ೦ಕಳ್ ಕಾಣಿಯೆ ರುಪಾರ್ ಪರ್ಗಟ್ ಜಾಲ್ಯಾ.
- ಪಿ.ಡಿಸೋಜಾ, 'ಪಯ್ಣಾರಿ' ಸ೦ಪಾದಕ್ ಆನಿ ಸ೦ಪಾದಕೀಯ್ ಮ೦ಡಳಿ

ಸಿಜ್ಯೆಸ್ ಸಿಲ್ವಿಯಾ, ಆಮ್ಚೆ ತುರೆ ಘೆಯಾ
ಎಪ್ರಿಲಾಚೆ 27ವೆರ್ ಸಕಾಳಿ೦ ಕೊ೦ಕ್ಣಿ ಸಾಹಿತಿ, ಫುಗೆಟ್ಯಾ೦ಚೊ, ಫೊಕಣಾ೦ಚೊ, ಸುರ್ಸುರ್ಯಾ೦ಚೊ ರಚ್ನಾರ್, ಸಿಜ್ಯೆಸ್, ಮ೦ಗ್ಳುರ್‌ಚ್ಯಾ ಸಿಲ್ವಿಯಾ ರಾಸ್ಕೀನ್ಹಾಲಾಗಿ೦ ಲಗ್ನಾ೦ತ್ ಎಕ್ವೊಟ್ಲೊ. ಹ್ಯಾ ಸ೦ದರ್ಭಾಚೊ ಸ೦ತೊಸ್, 'ಸಾ೦ಕಳ್'  ಪತ್ರಾಚೊ ಸ೦ಪಾದಕ್, ಮ೦ಡಳಿ, ಆನಿ ಸಿಜ್ಯೆಸಾಚೆ ಅಭಿಮಾನಿ ಹ್ಯಾ ಮುಕಾ೦ತ್ರ್ ಪಾಚಾರ್ತಾತ್. ತಾ೦ಚಿ ಜೀಣ್ ಜಾ೦ವ್ ಸುಮಧುರ್, ಸಮ್ರದ್ದಿ, ಸುಲಲಿತ್, ಸುವಿಶಾಲ್ ಅನಿ ಸುಸು೦ದರ್. ತಾ೦ಚೊ ಮೋಗ್ ಜಾ೦ವ್ ವಿಶ್ವಾಸಿ, ಯಶಸ್ವಿ, ತೇಜಸ್ವಿ ಆನಿ ಪ್ರಜ್ವಲಿತ್. ತಾ೦ಚೆ೦ ಭವಿಶ್ಯ್ ಜಾ೦ವ್ ಸುಖಾಳ್, ರಾಯಾಳ್, ಪ್ರಜ್ವಳ್ ಆನಿ ಸುಖಿ ಸದಾ೦ಕಾಳ್.  
- ಹೇಮಾಚಾರ್ಯ,  'ಸಾ೦ಕಳ್' ಸ೦ಪಾದಕ್ ಆನಿ ಮ೦ಡಳಿ

Tags:  CGS Taccode, Konkani Humour, Vinod, Comedy, Wedding, Konkani, Mangalore, Mangalorean, Mother Tongue

1 Comment/s.

  1. Austin Prabhu, Chicago
    ಮೊಗಾಳ್ ಸಿಜ್ಯೆಸ್: ಹೇಮಾಚಾರ್ಯಾ ಮುಖಿಂ ತುಜೆಂ ಲಗ್ನಾ ಕಥನ್ ವಾಚುನ್ ಭಾರಿಚ್ ಖುಶಿ ಜಾಲಿ; ತುಮ್ಕಾಂ ದೊಗಾಂಯ್ಕಿ ದೇವ್ ಬರೆಂ ಕರುಂ. ತುಜ್ಯಾ ಲಗ್ನಾಂತ್ ಹಾಂವೆಂಯ್ ಏಕ್ ಲ್ಹಾನ್‍ಸೊ ಪಾತ್ರ್ - ಕಾರ್ಯೆಂ ನಿರ್ವಾಹಕ್ ಜಾವ್ನ್ ಘೆಂವ್ಕ್ ಅವ್ಕಾಸ್ ದಿಲ್ಲ್ಯಾ ತುಕಾ ಹ್ಯಾ ಸರ್ವ್ ವರ್ಸಾಂ ಉಪ್ರಾಂತ್ ಪರತ್ ಧನ್ಯವಾದ್. ತೆ ಆದ್ಲೆ ಉಡಾಸ್ ವಾಚ್ತಾಂ-ವಾಚ್ತಾಂ ಮತಿಕ್ ಏಕಾ ಥರಾಚೆಂ ಸಮಾಧಾನ್ ಮೆಳ್ಟಾ, ಸಂತೋಸ್ ಜಾತಾ ಆನಿ ಉಲ್ಲಾಸ್ ಭೊಗ್ತಾ. ಸಿಲ್ವಿಕ್ ಆನಿ ತುಕಾ ದೊಗಾಂಯ್ಕಿ ಪೊಟ್ಲುನ್ ಧರುನ್ ಮ್ಹಜೆ ಉಮೆ ಧಾಡ್ಟಾಂ ಏಪ್ರಿಲ್ ಸತ್ತಾವೀಸ್ ತಾರಿಕೆಕ್. ಆಮಿ ದೊಗಾಂನಿಂಯ್ ಹಾತಿಂ ವಿಶೇಷ್ ಪಯ್ಶೆ ನಾಸ್ಲೆ ತರೀ ಕೊಂಕ್ಣೆಚೊ ಬರೊಚ್ ವಾವ್ರ್ ಕೆಲೊ ಏಕಾ ರೈತಾನ್ ದೀಸ್ ಆನಿ ರಾತ್ ಮ್ಹಣ್ ಲೆಖಿನಾಸ್ತಾಂ ಘಳೊನ್, ಆಂಗಾಚೊ ಘಾಮ್ ಪಿಳುನ್ ಆಪ್ಲೆಂ ಕುಟಾಮ್ ಪೊಸ್ಚೆಪರಿಂ. ಲಾಂಬ್ ಜಿಯೊಂ ತುಮ್ಚೊ ಮೋಗ್; ಆಜ್ ರಾತಿಂ ಲೈಟ್ ಬಂಧ್ ಕರ್ ಆನಿ ಸಿಲ್ವಿಚ್ಯಾ ಉಸ್ಕ್ಯಾರ್ ಬಸ್. ಉಪ್ರಾಂತ್ ಕಿತೆಂ ಜಾಲೆಂ ತೆಂ ಮ್ಹಾಕಾ ವ್ಹಳೂ ಸಾಂಗ್. ತುಜ್ಯಾ ವೀಜ್‍ಪತ್ರಾಕ್ ರಾಕೊನ್ ರಾವ್ತಾಂ. ಬರೆಂ ತರ್ ಮೋಗ್ ಆಸೊಂ, ಸದಾಂಚ್ ಖಾಲ್ತೊ ಮಿತ್ರ್, -ಆಸ್ಟಿನ್ ಪ್ರಭು, ಚಿಕಾಗೊ

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :


Connect

Maibhaas

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE