From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಭುರ್ಗ್ಯಾಂಕ್ ಉರವ್ಣಿ ಕರುಂಕ್ ಶಿಕಂವ್ಚೆಂ ಕಶೆಂ?
Monday, May 29, 2017
ಆಯ್ಚ್ಯಾ ಕಾಳಾರ್ ಭುರ್ಗ್ಯಾಂಚ್ಯಾ ಆನಿ ಯುವಜಣಾಂಚ್ಯಾ ಮತಿಂತ್ ಉರವ್ಣೆಚೆಂ ಬಿಂ ಘಾಲ್ಚೆಂ ವ್ಹಡ್ಲೆಂ ಪಂಥಾಹ್ವಾನ್ ಜಾಂವ್ಕ್ ಪಾವ್ಲಾಂ. ಭುರ್ಗ್ಯಾಂನಿ ಸುಲಭಾಯೆನ್ ದುಡು ಖುರ್ಚುಂಚೊ ಪಳೆತಾನಾ ಆನಿ ತಾಣಿಂ ಕರ್ಚೊ ವಿಬಾಢ್ ಪಳೆತಾನಾ ತಾಂಕಾಂ ದುಡ್ವಾಚೆಂ ಮೋಲ್ ಕಿತೆಂ ತೆಂ ಕಳಿತ್ ನಾ ತಶೆಂ ಭೊಗ್ತಾ. ಹಾಕಾ ಪ್ರಮುಕ್ ಕಾರಣ್ ವ್ಹಡಿಲಾಂಚಿ ಬೇಜವಾಬ್ದಾರಿ. ವ್ಹಡಿಲಾಂ ಸಲೀಸಾಯೆನ್ ದುಡು ಖರ್ಚಿತಾನಾ ಭುರ್ಗಿಂ ತೆಂ ಪಳೆತಾತ್ ಆನಿ ತೆಂಚ್ ಶಿಕ್ತಾತ್. ದುಡು ಖರ್ಚ್ ಕರ್ತಾನಾ ವ್ಹಡಿಲಾಂನಿ ಏಕ್ ವ್ಯವಸ್ಥಿತ್ ರೀತ್ ಸಾಂಬಾಳುನ್ ಸದಿಳ್ ರಿತಿನ್ ಖರ್ಚಿನಾಸ್ತಾನಾ ರಾವ್ಲ್ಯಾರ್ ಭುರ್ಗಿಂಯ್ ದುಡ್ವಾಚಿ ಗರ್ಜ್ ಆನಿ ಮೋಲ್ ಸಮ್ಜಾತಾತ್. ಚಡಾವತ್ ವ್ಹಡಿಲಾಂ ಚಿಂತಾತ್‍ಗೀ, ಮ್ಹಜೆಂ ಭುರ್ಗೊ/ಭುರ್ಗೆಂ ಜೊಡುಂಕ್ ಲಾಗ್ತಾನಾ ಆಪಾಪಿಂಚ್ ತಾಕಾ ದುಡ್ವಾಚಿ ಜವಾಬ್ದಾರಿ ಯೆತಲಿ ಮ್ಹಣ್. ಹೆಂ ಚಿಂತಾಪ್ ಸಾರ್ಕೆಂ ನ್ಹಯ್. ಆಜ್‍ಕಾಲ್ ವ್ಹಡಿಲಾಂಲಾಗಿಂ ಭುರ್ಗ್ಯಾಂಖಾತಿರ್ ವೇಳ್ ನಾ, ಪುಣ್ ದುಡು ಆಸಾ. ತ್ಯಾ ದುಡ್ವಾನ್ ಭುರ್ಗ್ಯಾಂಕ್ ಖೆಳ್ಚ್ಯೊ ವಸ್ತು, ಮೊಬಾಯ್ಲಾಂ, ಕಂಪ್ಯೂಟರ್ ಗೇಮ್ಸ್... ಇತ್ಯಾದಿ ದೀವ್ನ್ ಭುರ್ಗ್ಯಾಂಕ್ ಬಿಝಿ ದವರುಂಕ್ ಪಳೆಂವ್ಚೆಂ ದಿಸ್ತಾ. ಹಿ ಸವಯ್ ಮುಕಾರ್ಸುನ್ ಯೆತಾನಾ ಭುರ್ಗಿಂ ವೇಳ್ ಆನಿ ದುಡು ವಿಬಾಢ್ ಕರುಂಕ್ ಸಲೀಸಾಯೆನ್ ಶಿಕ್ತಾತ್.
ಲ್ಹಾನ್ ಥಾವ್ನ್ ಭುರ್ಗ್ಯಾಂಕ್ ವ್ಹಡಿಲಾಂ ಜರ್ ತಾಣಿಂ ವಿಚಾರ್'ಲ್ಲೆಂ, ತಾಚಿ ಗರ್ಜ್ ನಾಸ್ತಾನಾ ದಿತಾತ್, ವ್ಹಡ್ ಜಾತಾನಾ ತಾಣಿಂ ವಿಚಾರ್'ಲ್ಲೆಂ ನೆಗಾರ್ ಕೆಲ್ಯಾರ್ ತಿಂ ಉಚಾಂಬಳ್ ಜಾತಾತ್. ಭುರ್ಗ್ಯಾಂನಿ ಆಪ್ಲ್ಯಾ ಇಶ್ಟಾಂಲಾಗಿಂ ಆಸ್ಚೆ ತಸಲ್ಯೊ ವಾ ತಾಚ್ಯೆವರ್ನಿಂ ಊಂಚ್ ವಸ್ತುಂಕ್ ಆಶೆಂವ್ಚೆಂ ಸಹಜ್. ಪುಣ್ ಭುರ್ಗ್ಯಾಂಕ್ ಪಯ್ಶಾಂಚೆಂ ಮೋಲ್ ಆನಿ ಜವಾಬ್ದಾರಿ ಶಿಕಯ್ಲ್ಯಾರ್ ಹ್ಯೊ ಆಶಾ ಭುರ್ಗಿಂಚ್ ಜಿರಂವ್ಕ್ ಸಕ್ತಾತ್. ಭುರ್ಗ್ಯಾಂಕ್ ವಿಚಾರ್'ಲ್ಲೆ ಕೂಡ್ಲೆ ವಸ್ತು ಆನಿ ದುಡು ಮೆಳ್ಳ್ಯಾರ್ ತಾಂಕಾಂ ತ್ಯಾಗಾಚಿ ಆನಿ ಉರವ್ಣೆಚಿ ಸವಯ್ ಜಾಯ್ನಾ.
ಪಯ್ಲ್ಯಾನ್ ಪಯ್ಲೆಂ, ವ್ಹಡಿಲಾಂನಿ ಭುರ್ಗ್ಯಾಂಕ್ ಜಿಯೆಂವ್ಚಾ ಖಾತಿರ್, ಕುಟ್ಮಾಚಾ ಖರ್ಚಾ ಖಾತಿರ್ ತಿಂ ಕಿತ್ಲೆ ಕಶ್ಟ್ ಕಾಡ್ತಾತ್ ಮ್ಹಳ್ಳೆಂ ಸಾಂಗ್ಚಿ ಆನಿ ಸಮ್ಜಂವ್ಚಿ ಗರ್ಜ್ ಆಸಾ. ''ಭುರ್ಗ್ಯಾಂಕ್ ಕಿತೆಂ ಸಮ್ಜತಾ?'' ಮ್ಹಣ್ ಸಾಂಗಾನಾಸ್ತಾನಾ ರಾಂವ್ಚೆಂ ನ್ಹಯ್. ಭುರ್ಗ್ಯಾಂಚ್ಯೆ ಚಂಚಲ್ ಮತಿಂತ್ ಸಾರ್ಕೆಂ ಘುಸ್ಚೆಖಾತಿರ್ ಏಕ್ ಪಾವ್ಟಿಂ ನ್ಹಂಯ್, ಶೆಂಬೊರ್ ಪಾವ್ಟಿಂ, ತೆದಾಳಾ ತೆದಾಳಾ ಹ್ಯಾ ವಿಶಿಂ ತಾಂಚ್ಯೆ ಮತಿಂತ್ ಘಾಲ್ಚಿ ಗರ್ಜ್ ಆಸಾ.
ಭುರ್ಗ್ಯಾಂಚ್ಯೆ ಮತಿಚೆರ್ ಸಬಾರ್ ಸಂಗ್ತಿಂ ವೆಗ್ಗಿಂ ಪ್ರಭಾವ್ ಘಾಲ್ತಾತ್ ಆನಿ ತಾಂಚಿ ಮತ್ ಚಂಚಲ್ ಕರ್ತಾತ್. ಆಜ್‍ಕಾಲ್ ಚಡಾವತ್ ವ್ಹಡಿಲಾಂಲಾಗಿಂ ಬೆಂಕಾಚಿಂ ಎಟಿಎಮ್ (ATM) ಕಾರ್ಡಾಂ ಆಸಾತ್ ಜಾಲ್ಲ್ಯಾನ್, ಕಾರ್ಡ್ ಘಾಲ್ಲ್ಯಾ ತಕ್ಷಣ್ ನೋಟ್ ಆಪಾಪಿಂಚ್ ಯೆತಾತ್ ಮ್ಹಣ್ ಭುರ್ಗಿಂ ಚಿಂತಾತ್. ಸೂಪರ್ ಮಾರ್ಕೆಟಿ ಚಡೊನ್ ಯೆಂವ್ಚ್ಯಾ ಹ್ಯಾ ಕಾಳಾರ್ ಕ್ರೆಡಿಟ್ ಕಾರ್ಡ್ ದಿಲ್ಲ್ಯಾ ತಕ್ಷಣ್ ವಸ್ತು ಆಪಾಪಿಂಚ್ ಮೆಳ್ತಾತ್ ಮ್ಹಣ್ ಭುರ್ಗಿಂ ಚಿಂತಾತ್. ಧುವ್ 'ನವೆಂಚ್ ಜೀನ್ಸ್ ಜಾಯ್' ಮ್ಹಣ್ತಾನಾ ಜರ್ ಮಮ್ಮಾ 'ಪಯ್ಶೆ ನಾಂತ್' ಮ್ಹಣತ್ ತರ್, ''ಕ್ರೆಡಿಟ್ ಕಾರ್ಡ್ ಆಸಾನೇ ಮಮ್ಮಾ!'' ಮ್ಹಣ್ ತಕ್ಷಣ್ ಜಾಪ್ ಯೆತಾ. ಟಿ.ವಿ.ರ್ ಆನಿ ಮಾಧ್ಯಮಾಂನಿ ಯೆಂವ್ಚಿಂ ಜಾಯ್ರಾತಾಂತ್ ಭುರ್ಗ್ಯಾಂಚೆಂ ಗುಮಾನ್ ವೊಡ್ಚೊ ಮತ್ಲಬ್ ಆಸ್ತಾ. ದುಕಾನಾಂನಿ ಪಯ್ಶೆ ಫಾರಿಕ್ ಕರ್ಚಾ ಕಾಂವ್ಟರಾ ಲಾಗಿಂಚ್ ಚಿಪ್ಸ್ ಪೆಕೆಟಿಂಕ್ ಉಮ್ಕಾಳಾಯ್ತಾತ್. ನವೆಂ ಮೋಬಾಯ್ಲ್, ನವೆಂ ವಸ್ತುರ್, ನವಿಂ ಫಾಸ್ಟ್ ಖಾಣಾಂ, ಖೆಳಾ ವಸ್ತು... ಅಶೆಂ ಭುರ್ಗ್ಯಾಂಕ್ ಆಶಾ ಉಬ್ಜಯ್ತಾತ್. ಪುಣ್ ಹ್ಯೆ ವಸ್ತು ಚಡಿತ್ ಆವ್ದೆಕ್ ಬಾಳ್ವನಾ... ನವೆಂ ವೆಗ್ಗಿಂಚ್ ಪರ್ನೆಂ ಜಾತಾ ಆನಿ ಮುಲ್ಯಾಕ್ ಪಡ್ತಾ. ಇಶ್ಟಾಂನಿ ನವೆಂ ಘೆತಾನಾ ಆಪ್ಣಾಕ್‍ಯೀ ನವೆಂ ಜಾಯ್ ಮ್ಹಣ್ ಭುರ್ಗ್ಯಾಕ್ ಭೊಗ್ಚೆಂ ಸಹಜ್‍ಚ್. ನಾಂ ತರ್ ಉಣೆಪಣ್ ಭೊಗ್ತಾ. ಲ್ಹಾನ್ ಭುರ್ಗಿಂ ಸಳ್ ಕರ್ತಾನಾ, ವ್ಹಡ್ ಭುರ್ಗಿಂ ಹಟ್ ಕರ್ತಾನಾ ವ್ಹಡಿಲಾಂನಿ ತಾಂಕಾಂ ಮೊಗಾನ್ ಆನಿ ಶಾಣೆಪಣಾನ್ ಕುಟ್ಮಾಚ್ಯಾ ಆರ್ಥಿಕ್ ಪರಿಗತೆಚಿ ವಳಕ್, ಪಯ್ಶಾಂಚೆಂ ಮೋಲ್, ವಸ್ತುಂಚ್ಯಾ ಗರ್ಜೆವಿಶಿಂ ಸಮ್ಜಣಿ ಆನಿ ಫಾಲ್ಯಾಂಖಾತಿರ್ ಉರಂವ್ಚೆಂ ಕಿತ್ಯಾಕ್ ಮ್ಹಣ್ ಸಮ್ಜಣಿ ದಿಂವ್ಚಿ ಗರ್ಜ್ ಆಸಾ.
ಸಬಾರಾಂಕ್ ಆಮ್ಕಾಂ ಖಂಡಿತ್ ಭೊಗ್ತಾ, ಜರ್ ಆಮ್ಕಾಂ ಲ್ಹಾನ್ ಥಾವ್ನ್ ಪಯ್ಶೆ ಉರಂವ್ಚೆಂ ಶಿಕಾಪ್ ಮೆಳ್‍ಲ್ಲೆಂ ತರ್ ಕಿತ್ಲೆಂ ಬರೆಂ ಆಸ್‍ಲ್ಲೆಂ ಮ್ಹಣೊನ್. ವಿನಿಯೋಗಾಚೊ ವಾಟೊ ಪಯ್ಲೆಂಚ್ ಸಾಂಗ್ತೆಲೆ ಆಸ್‍ಲ್ಲೆ ತರ್ ಕಿತ್ಲೆಂ ಬರೆಂ ಆಸ್‍ಲ್ಲೆಂ ಮ್ಹಣ್. ಪುಣ್ ಆಮ್ಚ್ಯಾ ವ್ಹಡಿಲಾಂಕ್ ಹೆಂ ಶಿಕಪ್ ದೀಂವ್ಕ್ ತಿತ್ಲೆಂ ಸಲೀಸ್ ನಾತ್‍ಲ್ಲೆಂ.
ಭುರ್ಗ್ಯಾಂಕ್ ಹೆಂ ದುಡ್ವಾ ಶಿಕಾಪ್ ಕೆದಾಳಾ ಸುರು ಕರ್ಚೆಂ ಮ್ಹಳ್ಳೆಂ ಏಕ್ ಸವಾಲ್ ವ್ಹಡಿಲಾಂಕ್ ಉಬ್ಜೊಂಚೆಂ ಸಹಜ್. ಮ್ಹಜ್ಯೆ ಅಭಿಪ್ರಾಯೆ ಪರ್ಮಾಣೆ ಜೆದ್ನಾಂ ಭುರ್ಗೆಂ ದುಕಾನಾಂತ್ ಕಸಲಿಯ್ ವಸ್ತ್ 'ಮ್ಹಾಕಾ ಜಾಯ್...' ಮ್ಹಣ್ ವಿಚಾರುಂಕ್ ಲಾಗ್ತಾ, ತೆದ್ನಾಂ ತಾಕಾ ಹೆಂ ಶಿಕಪ್ ದೀಂವ್ಕ್ ಸುರು ಕರುಂಕ್ ಜೊಕ್ತೊ ವೇಳ್ ಮ್ಹಣ್ ಸಮ್ಜವ್ಯೆತ್.
ಭುರ್ಗ್ಯಾಂಕ್ ದುಡ್ವಾಚೆಂ ಶಿಕಪ್ ಆನಿ ಜವಾಬ್ದಾರಿ ಕಶಿ ಶಿಕವ್ಯೆತ್?
1. ಭುರ್ಗ್ಯಾಂಕ್ ಮೊಗಾನ್ ಕುಟ್ಮಾಚಾ ಆರ್ಥಿಕ್ ಸ್ಥಿತೆಚಿ ವಳಕ್ ಕರ್ನ್ ದಿಂವ್ಚಿ ಗರ್ಜ್ ಆಸಾ. ಎಕಾ ಸುಪರ್ ಮಾರ್ಕೆಟಿಂತ್ ಏಕ್ 6 ವರ್ಸಾಂಚೊ ಭುರ್ಗೊ ಆವಯ್ ಲಾಗಿಂ 500 ರುಪ್ಯಾಂಚೆಂ ಖೆಳ್ಚೆಂ ಕಾರ್ ಘೇವ್ನ್ ದೀಂವ್ಕ್ ಸಳ್ ಕರ್ತಾಲೊ. ತೆದಾಳಾ ತಾಚಿ ಆವಯ್ ಮ್ಹಣಾಲಿ, ''ಹೆಂ ಕಾರ್ ಘೆತ್ಲ್ಯಾರ್ ಆಮ್ಕಾಂ ದೋನ್ ದೀಸ್ ಮೆಮ್ಮೆ ಖಾಂವ್ಕ್ ಜಾಯ್ನಾ...'' ಭುರ್ಗ್ಯಾನ್ ಹಟ್ ಸವ್ಕಾಸ್ ರಾವಯ್ಲೆಂ. ಭುರ್ಗೊ ಘರಾ ಸರ್ವಾಂಕ್ ಮೆಮ್ಮೆ ಮೆಳ್ಚೆ ಖಾತಿರ್ ಉಣ್ಯಾ ಮೊಲಾಚೆಂ ಕಾರ್ ಘೆಂವ್ಚಾಕ್ ಒಪ್ಲೊ. ಅಶೆಂ ಶಾಣೆಪಣಾನ್ ಆಪ್ಲ್ಯಾ ಆರ್ಥಿಕ್ ಸ್ಥಿತೆಚಿ ವಳಕ್ ಕರ್ನ್ ದಿಂವ್ಚಿ ಗರ್ಜ್ ಆಸಾ.
2. ಕುಟ್ಮಾಚೊ ಆದಾಯ್ - ಖರ್ಚಾವಿಷ್ಯಾಂತ್ ಭುರ್ಗ್ಯಾಂಲಾಗಿಂ ಉಲಂವ್ಚೆಂ. ವ್ಹಡಾ ಭುರ್ಗ್ಯಾಂಕ್ ತವಳ್ ಹಾಂತುಳ್ನ್ ಆಸ್‍ಲ್ಲೆ ತಿತ್ಲೆಂ ಮಾತ್ರ್ ಪಾಯ್ ಸೊಡ್ಯೆತ್ ಮ್ಹಣ್ ವೆಗ್ಗಿಂ ಸಮ್ಜಾತಾ. ಭುರ್ಗ್ಯಾಂ ಮುಕಾರ್ ದುಡ್ವಾಚ್ಯೊ ಗಜಾಲಿ ಉಲಂವ್ಕ್ ನಜೊ ಮ್ಹಣ್ ಚಿಂತ್ಚಿಂ ವ್ಹಡಿಲಾಂ ಚಡ್ ಆಸಾತ್. ಆತಾಂಚ್ಯಾ ಕಾಲಾರ್ ಅಶೆಂ ಚಿಂತ್ಲ್ಯಾರ್ ಭುರ್ಗಿಂ ವ್ಹಡಿಲಾಂಲಾಗಿಂ ದರಬಸ್ತ್ ದುಡು ಆಸಾ ಮ್ಹಣ್ ಚಿಂತಾತ್ ಆನಿ ಖರ್ಚಿತಾತ್. ತಶೆಂ ಜಾಲ್ಲ್ಯಾನ್ ಭುರ್ಗ್ಯಾಂಕ್ ದುಡ್ವಾಚ್ಯಾ ಗಜಾಲಿಂನಿ ವಾಂಟೆಲಿ ಕೆಲ್ಯಾರ್ ಬರೆಂ. ಲ್ಹಾನ್ ಭುರ್ಗ್ಯಾಂಕೀ ತಾಂಚೊ ಲ್ಹಾನ್ ಖರ್ಚ್ ಕುಟ್ಮಾಚಾ ಆರ್ಥಿಕ್ ಲೆಕಾಚಾರಾಂತ್ ಮೆಳವ್ನ್ ದುಡ್ವಾ ಗಜಾಲಿಂನಿ ಶಾಮೀಲ್ ಕರ್ಯೆತ್. ಆರ್ಥಿಕ್ ಗಜಾಲಿ ಖುಶಾಲ್ಭರಿತ್ ಕರ್ನ್ ಭುರ್ಗ್ಯಾಂಕ್ ಜವಾಬ್ದಾರಿ ಶಿಕವ್ಯೆತ್.
3. ಭುರ್ಗ್ಯಾಂಕ್ ಪಯ್ಶೆ ಉರಂವ್ಚೆ ಕಿತ್ಯಾಕ್ ಮ್ಹಣ್ ಸಮ್ಜಂವ್ಕ್ ಜಾಯ್. 500 ರುಪ್ಯಾಂಚೆಂ ಖೆಳ್ಚೆಂ ಕಾರ್ ಹಾಡ್ಚೆಖಾತಿರ್ ಪಯ್ಶೆ ಕಶೆ ಉರಂವ್ಚೆಂ ಮ್ಹಣ್ ಚಾಲಾಕೆನ್ 5 ವರ್ಸಾಂಚಾ ಭುರ್ಗ್ಯಾಕ್ ಶಿಕವ್ಯೆತ್. ಏಕ್ ಧ್ಯೇಯ್ ಆನಿ ತೊ ಧ್ಯೇಯ್ ಕಾರ್ಯಾಗತ್ ಕರ್ಚಿ ವಿದ್ಯಾ ಭುರ್ಗ್ಯಾಂಕ್ ಲ್ಹಾನ್ ಪ್ರಾಯೆರ್'ಚ್ ಸಮ್ಜವ್ಯೆತ್. ಹೆಂ ಶಿಕಂವ್ಚೆಖಾತಿರ್, ಪಾಂಚ್ ವರ್ಸಾಂಚಾ ಪ್ರಾಯೆರ್'ಚ್ ಏಕ್ ಉರವ್ಣೆಚೊ ಡಬ್ಬೊ ಭುರ್ಗ್ಯಾಂಕ್ ದಿಂವ್ಚೊ ಆನಿ ತಾಂತುಂ ನಾಣಿಂ ಉರಂವ್ಕ್ ಶಿಕಂವ್ಚೆಂ. ಭುರ್ಗ್ಯಾಂಕ್ ಹಾಂತುಂ ಮಜಾ ಭೊಗ್ತಾ. ಪುಣ್ ಉರವ್ಣೆಚೆಂ ಲಿಸಾಂಚ್ ತಾಂಕಾಂ ವೆಗ್ಗಿಂ ಮಜೆನ್ ಸಮ್ಜಾತಾ.
4. ಭುರ್ಗ್ಯಾಂಕ್ ತಾಣಿಂ ವಿಚಾರ್ಲ್ಯಾ ವೆಳಿಂ ಪಯ್ಶೆ ದಿಂವ್ಚ್ಯಾಕ್‍ಯಿ, ವ್ಹಡಾ ಭುರ್ಗ್ಯಾಂಕ್ ತಾಂಚ್ಯಾ ಹಪ್ತ್ಯಾಚಾ ಖರ್ಚಾಕ್ ಮ್ಹಣ್ ಇತ್ಲೆಚ್ ಪಯ್ಶೆ ಮ್ಹಳ್ಳೆಪರಿಂ (allowance) ದಿವ್ಯೆತ್. ಅಶೆಂ ಕೆಲ್ಲ್ಯಾನ್ ಖರ್ಚಾಕ್ ಏಕ್ ಗಡ್ ಪಡ್ತಾ ಆನಿ ಭುರ್ಗ್ಯಾಂಕ್ ಚತ್ರಾಯೆನ್ ಖರ್ಚುಂಕ್ ಜವಾಬ್ದಾರಿ ಮೆಳ್ತಾ. ಖರ್ಚ್ ಕಾಡ್ನ್ ಹ್ಯೆಚ್ ಪಯ್ಶಾಂಥಾವ್ನ್ ತಿಂ ಉರಂವ್ಕ್ ಆಪಾಪಿಂಚ್ ಶಿಕ್ತಾತ್. ಪಯ್ಶಾಂಚೆಂ ಮೋಲ್ ತಾಂಕಾಂ ಕಳಿತ್ ಜಾತಾ. ಪಯ್ಶಾಂಚೆಂ ಮೋಲ್ ಶಿಕಯ್ತಾನಾ ಭುರ್ಗ್ಯಾಂನಿ ಸುರಾತಿ ಜಾಯ್ನಾಶೆಂ ಪಳೆಂವ್ಕ್ ಜಾಯ್. ತಾಣಿಂ ಉರಯಿಲ್ಲ್ಯಾ ಪಯ್ಶಾಂತ್ಲೊ ಥೊಡೊ ವಾಂಟೊ ದಾನ್ ದೀಂವ್ಕ್, ಕಾಣಿಕ್ ದೀಂವ್ಕ್ ಆನಿ ಇಷ್ಟಾಂಕ್ ಇನಾಮಾಂ ದೀಂವ್ಕ್ ಶಿಕವ್ಯೆತ್.
5. ಭುರ್ಗಿಂ ವ್ಹಡ್ ಜಾತಾನಾ - 7 ವರ್ಸಾಂ ಪ್ರಾಯೆರ್ ಭುರ್ಗ್ಯಾಂಚ್ಯಾಚ್ ನಾಂವಾರ್ ಬ್ಯಾಂಕ್ ಖಾತೊ ಆಸಾ ಕರ್ಯೆತ್. ಭುರ್ಗ್ಯಾಂಕ್‍ಚ್ ಬ್ಯಾಂಕಾಕ್ ಆಪವ್ನ್ ವ್ಹರ್ನ್ ಹೆಂ ಎಕಾಂವ್ಟ್ ಉಗ್ತೆಂ ಕರ್ಚೆಂ. ತಾಂಕಾಂ ತೆದ್ನಾಂ ಆಸಕ್ತ್ ಉಬ್ಜತಾ ಆನಿ ಹೆಮ್ಮೆ ಭೊಗ್ತಾ. ವ್ಹಡಾ ಭುರ್ಗ್ಯಾಂಕ್ ಬ್ಯಾಂಕಾಂತ್ ಪಯ್ಶೆ ಉರಂವ್ಕ್ ಮಾಹೆತ್ ಮೆಳ್ತಾ. ಡೆಪೊಸಿಟ್ ಆನಿ ವಾಡ್ ಮ್ಹಳ್ಯಾರ್ ಕಿತೆಂ ತೆಂ ಕಳ್ತಾ... ಉರವ್ಣಿ ಕೆಲ್ಲ್ಯಾ ವರ್ವಿಂ ದುಡು ಕಶೆಂ ವಾಡ್ತಾ ಮ್ಹಣ್ ಸಮ್ಜಾತಾ.
6. ಭುರ್ಗ್ಯಾಂಕ್ ಚತ್ರಾಯೆನ್ ಖರ್ಚ್ ಕರುಂಕ್ ಶಿಕಂವ್ಚೆಖಾತಿರ್ ಥೊಡೆಪಾವ್ಟಿಂ ಭುರ್ಗ್ಯಾಂಕ್ ಆಪವ್ನ್, ಎಲೆಕ್ಟ್ರಿಸಿಟಿ ಬಿಲ್, ಟೆಲಿಫೋನ್ ಬಿಲ್ ಇತ್ಯಾದಿ ಭರುಂಕ್ ಶಿಕವ್ಯೆತ್. ತಾಂಚೆ ಕರ್ನಾಂ ದುಕಾನಾಥಾವ್ನ್ ವಸ್ತು ಹಾಡವ್ಯೆತ್. ದುಕಾನಾಂನಿ, ಸುಪರ್ ಮಾರ್ಕೆಟೆಂನಿ ತಾಂಕಾಂ ಮೊಲಾಂ ಬರಯಿಲ್ಲಿಂ ಪಳೆಂವ್ಕ್ ಆನಿ ವಸ್ತು ಘೆಂವ್ಚೊ ನಿರ್ದಾರ್ ಕಶೆಂ ಕರ್ಚೆಂ ತೆಂ ಶಿಕವ್ಯೆತ್. ಗರ್ಜೆಚಾ ವಸ್ತುಂಚಿಂ ಮೊಲಾಂ ತಾಣಿಂ ಪಳೆಂವ್ಚೆಪರಿಂ ಕರ್ಯೆತಾ.
ಭುರ್ಗ್ಯಾಂಕ್ ದುಡ್ವಾ ಶಿಕಪ್ ದಿಂವ್ಚೆಖಾತಿರ್ ವ್ಹಡಿಲ್ಹಾಂನಿಯೀ ಚಡ್ ಸಮ್ಜಣಿ, ವಿಶಾಲ್ ಮನ್ ಆನಿ ಸೊಸ್ಣಿಕಾಯ್ ಸಾಂಬಾಳ್ಚಿ ಗರ್ಜ್ ಆಸಾ. ಘರಾ ಥಾವ್ನ್೦ಚ್ ಭುರ್ಗ್ಯಾಂಕ್ ದಿಂವ್ಚೆಂ ಹೆಂ ಕಡ್ಡಾಯೆಚೆಂ 'ಶಿಕಪ್' ಮ್ಹಣ್ ವ್ಹಡಿಲಾಂನಿ ಮತಿಂತ್ ಘೇಂವ್ಕ್ ಜಾಯ್. ತೆದ್ನಾಂ ವ್ಹಡಿಲಾಂಚಿ ಪರ್ಸ್ ಜಡ್ ಉರಾತ್ ಆನಿ ಭುರ್ಗ್ಯಾಂಚೊ ಫುಡಾರ್ ಬರೊ ಜಾಯ್ತ್.
Tags:
Andrew Dcunha, Daiji, Children Saving Money, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
2/27/2021 ಹೆರೊಲ್ಪಿಯುಸ್: ಏಕ್ ಅವ್ಚಿತ್ ಭೆಟ್...
-
12/20/2020 ಯುವಜಣಾಂಕ್ ಪ್ರೇರಣ್ - ಜೆಸ್ಸಿಕಾ ಆನ್ನಾ ಲಿಝಾ...
-
12/6/2020 ಆಸ್ತ್ ........
-
11/25/2020 ಭಾರತಾಚಿಂ ಖಬ್ರೆ ಟಿವಿ ಚಾನೆಲಾಂ ಮರಣ್ ಪಾವ್ಲ್ಯ...
-
11/9/2020 ನಾಂವ್ ಬದಲ್ಲ್ಯಾನ್ ಗಾಂವ್ ಬದಲ್ನಾಂ...!...
-
10/17/2020 ಮಂಗ್ಳುರ್‌ಚೊ ಖ್ಯಾತ್ ಗ್ರಾಫೊಲೊಜಿಸ್ಟ್, ಸ್ಟೇ&...
-
-
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.