From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಬೋತ್ಲ್...
Sunday, September 2, 2018
ಬೋತ್ಲ್ ಖಂಚಿ? ಜ್ಯೂಸಾಚಿ, ಸೊಡಾಲೆಮನಾಚಿ, ಸಿರ್ಕಾಚಿ. ತೆಲಾಚಿ, ಟೊನಿಕಾಚಿ, ದೂದಾಚಿ, ಒಕ್ತಾಚಿ ವ ಉದ್ಕಾಚಿ? ಅರೆ ಬಾಬಾ, 'ತಿ' ಬೊತ್ಲ್ ಬಿಲ್ಕುಲ್ ನ್ಹಯ್! ಹಾಂವೆಂ ಸಾಂಗ್ಚಿ ಬೋತ್ಲ್ ಸೊರ್‍ಯಾಚಿ!!! ಬೊತ್ಲೆಚಿ ಇಷ್ಟಾಗತ್ ಕರ್ನ್, ಉಪ್ರಾಂತ್ ಬೊತ್ಲೆಚೊ ಗುಲಾಮ್ ಜಾವ್ನ್, ನಿರಂತರ್ ಬೊತ್ಲೆಕಡೆಂ ಝುಜ್ ಮಾಂಡುನ್, ಜಿಣಿ ಪಿಡ್ಡ್ಯಾರ್ ಕೆಲ್ಲ್ಯಾ, ಜೀವನಾಂತ್ ಸಲ್ವಣಿ ಜೊಡ್‌ಲ್ಲ್ಯಾ ಸಬಾರಾಂಚಿ ಕಾಣಿ ಹಾಂವ್ ಪಳೆವ್ನ್, ಆಯ್ಕೊನ್ ಜಾಣಾಂ. ತಾಂತ್ಲ್ಯೊ ಥೊಡ್ಯೊ ಗಜಾಲಿ ಹಾಂವ್ ಸಾಂಗುಂಕ್ ಆಶೆತಾಂ.
ಸೊರ್‍ಯಾನಿಮ್ತಿಂ ಜಾಂವ್ಚ್ಯಾ ಅನಾಹುತಾಂ ವರ್ವಿಂ ಕಿತೆಂ ಸರ್ವ್ ಘಡ್ಲಾಂ ಮ್ಹಳ್ಳ್ಯಾವಿಶಿಂ ಕಿತ್ಲೆಂ ಬರಯ್ಲ್ಯಾರೀ ಲೋಕ್ ಎಕಾ ಕಾನಾಂತ್ ಆಯ್ಕೊನ್ ಆನ್ಯೇಕಾ ಕಾನಾ ಥಾವ್ನ್ ಭಾಯ್ರ್ ಸೊಡ್ತಾತ್. ಪಿಯೆಂವ್ಚೊ ಪಿಯೆತಾಚ್! ಸೊರೊ ಖಂಚೊಯೀ ಜಾಂವ್ದಿ - ವಿಸ್ಕಿ, ಬ್ರಾಂಡಿ, ವೊಡ್ಕಾ, ರಮ್, ಜಿನ್, ಬಿಯರ್.... ಹಾಂತುನ್ 'ಈಥೈಲ್ ಆಲ್ಕೋಹೊಲ್' ಮ್ಹಳ್ಳಿ ರಾಸಾಯನಿಕ್ ವಸ್ತ್ ಆಸಾ. ಹಿ ವಸ್ತ್ ಲಿವರಾಕ್ ಏಕ್ ಮಾರೆಕಾರ್ ವೀಕ್ ಜಾವ್ನಾಸಾ. ಅಮಾಲ್ ಪೀವನ್ ಕೆಲ್ಲ್ಯಾ ವರ್ವಿಂ ಖಂತ್ ಬೆಜಾರಾಯ್ ಪಯ್ಸ್ ಕರ್ತಾ, ಮತಿಕ್ ಸೊಂತೊಸ್ ದಿತಾ, ಜಿರ್ವಣ್ ಕರ್ತಾ, ನೀದ್ ಬರಿ ಹಾಡ್ತಾ, ರಗತ್ ಪಾತಳ್ ಕರ್ತಾ ಮ್ಹಣ್ ಚಿಂತ್ಚೆಂ ಬಿಲ್ಕುಲ್ ಚಾಲಾಕಿಚೆಂ ಜಾವ್ನಾಸಾ.
ಜಾಯ್ತ್ಯಾಂಕ್ ಅಮಾಲ್ ಪಿಯೊಣ್ಯಾಚಿ ಸಂವಯ್ ಜಾಲ್ಲಿ ಆಸ್ತಾ. ಥೊಡೆ ಹಳ್ತಾರ್ ಮಿತಿರ್ ಪಿಯೆತಾತ್ ತರ್ ಹೆರ್ ಥೊಡೆ ಮಾತ್ಯಾರ್ ವೊತುಲ್ಲ್ಯಾಭಾಶೆನ್ ಘಟ್ಟ್ ಪಿಯೆತಾತ್. ಮಿತಿರ್ ಪಿಯೆತೆಲ್ಯಾಂಕ್ ಚಡ್ ಬಾಧಕ್ ಜಾಯ್ನಾ. ಥೊಡೆ ದಾಕ್ತೆರ್ ದಿಸಾಕ್ ಏಕ್ ಪೆಗ್ಗ್ ಸುಶೆಗಾಯೆನ್ ಮಾರ್ನ್ ನಿದೊಂಕ್ ಸಲಹಾ ದಿತಾತ್. ಅಮೇರಿಕನ್ ಫೌಂಡೇಶನಾಚ್ಯಾ ಸೂಚವ್ಣೆ ಪ್ರಕಾರ್, ದಾದ್ಲ್ಯಾಂನಿ ದೋನ್ ಡ್ರಿಂಕ್ಸ್ ದಿಸಾಕ್ ತಶೆಂ ಏಕ್ ಬೊತ್ಲ್ ಬಿಯರ್ ಪಿಯೆಲ್ಲ್ಯಾಂತ್ ತಿತ್ಲೆಂ ಬಾಧಕ್ ನಾ ಮ್ಹಣ್ತಾ. ಸ್ತ್ರೀಯಾಂನಿ ದಾದ್ಲ್ಯಾಂಪ್ರಾಸ್ ಅರ್ಧಿ ಸೆವ್ಯೆತ್. ಕುಡಿಚೆಂ ವಜನ್ ಚಡ್ಚೆಂ ತಿತ್ಲೆಂ ಕ್ಯಾಲೊರಿ ಅಮಾಲ್ ಪಿಯೊಣ್ಯಾಂತ್ ನಾ. ಪುಣ್ ಅಮಾಲ್ ಪೀವನ್ ಪಿಯೆತಾನಾ ತೆಲಾಂತ್ ಭಾಜ್‌ಲ್ಲಿಂ ಮಾಸಾಂ, ಹೆರ್ ಪಾಕ್ವಾನಾಂ, ಚಿಪ್ಸ್..... ಕುಡಿಚೆಂ ವಜನ್ ಚಡಯ್ತಾತ್ ಆನಿ ಪೋಟ್ ವಾಡೊಂಕ್ ಕಾರಣ್ ಜಾತಾತ್.
ಡಯಾಬಿಟಿಸ್ ಸಮಸ್ಸೊ ಆಸ್‌ಲ್ಲ್ಯಾಂನಿ ನಿರಾಳ್ ಪೊಟಾಚೆರ್ ಅಮಾಲ್ ಸೆಂವ್ಚೆಂ ನ್ಹಯ್. ತಶೆಂಚ್ ಸಂವಯ್ ಆಸ್‌ಲ್ಲ್ಯಾಂನಿ ಮಿತಿರ್ ಘೇಂವ್ಕ್ ಜಾಯ್. ಚಡಿತ್ ಜಾಲ್ಯಾರ್ ಗ್ಲುಕೋಸಾಚೊ ಪ್ರಮಾಣ್ ಉಣೊ ಜಾವ್ನ್, ಮತ್ ಚುಕೊಂಕ್ ಸಾಧ್ಯ್ ಆಸಾ. ಸೊರೊ ಪಿಯೆಂವ್ಚ್ಯಾ ವೆಳಾರ್ ದರಬಸ್ತ್ ಉದಾಕ್ ಸೇಂವ್ಕ್ ಜಾಯ್.
ಲ್ಹಾನ್ ಪಾಂಚ್ ಮಹಿನ್ಯಾಚೊ ಲೊನಾಚೊ ಪೂತ್ ರಡ್ಚೆಂ ರಾವಯ್ನಾತ್‌ಲ್ಲೊ. ಸುಮಾರ್ ದೋನ್ ತೀನ್ ಮಹಿನ್ಯಾಂ ಥಾವ್ನ್ ಭುರ್ಗ್ಯಾಪಿಡೆಚೊ ಆಯುರ್ವೇದಿಕ್ ಗುಳಿಯೊ, ಗಾಂವ್ಚ್ಯಾ ಇಲ್ಲ್ಯಾ ಕಾಜುಚ್ಯಾ ಸೊರ್‍ಯಾಂತ್ ಭರ್ಸುನ್ ಲೊನಾನ್ ದಿಲ್ಯಾರ್ ಪಿಲ್ಕಾಟ್ ರಡಾನಾತ್‌ಲ್ಲೊ! ಭುರ್ಗ್ಯಾಪಿಡೆಚ್ಯಾ ದಾಕ್ತೆರಾನ್ ತಪಾಸುನ್ ಪಿಡಾ ಕಿತೆಂಯೀ ನಾ ಮ್ಹಳ್ಳೆಂ. ಪುಣ್ ಲೊನಾ ಪಾತ್ಯೆಲೆಂ ನಾ. ಗುಳಿಯೊ ಸೊರ್‍ಯಾಂತ್ ಭರ್ಸುನ್ ದಿಂವ್ಚೆಂ ರಾವಂವ್ಕ್ ನಾ. ಥೊಡ್ಯಾ ದಿಸಾ ನಂತರ್, ಮುಂಬಯ್ ಗೆಲ್ಲ್ಯಾ ಕಡೆಂ ದುಸ್ರ್ಯಾ ವ್ಹಡ್ಲ್ಯಾ ದಾಕ್ತೆರಾ ಕಡೆಂ ಭುರ್ಗ್ಯಾಕ್ ದಾಕಯ್ಲೆಂ. ಭುರ್ಗ್ಯಾಕ್ ಸೊರ್‍ಯಾಚೆರ್ 'ಹೊಂದ್ವೊಣ್ ರಾವ್ಚೆಂ' (dependency) ಆಯ್ಲಾ ಮ್ಹಳ್ಳೆಂ ಆಯ್ಕೊನ್ ಲೊನಾಕ್ ತಲ್ಮಟ್ಯಾಕ್ ಮಾರ್‌ಲ್ಲ್ಯಾ ಭಾಶೆನ್ ಜಾಲೆಂ!
ಬಾಳಾಂತ್ ಜಾಲ್ಲಿ ಎಲಿಜ್ ಬಾಯ್, ದೋನ್ ಬೊತ್ಲಿ 'ಡಾಕ್ಟರ್ ಬ್ರಾಂಡಿ' ಸದಾಂನೀತ್, ರಾತಿಂ ಜೆವ್ತಾನಾ ವ ನಿದ್ಚ್ಯಾ ಪಯ್ಲೆಂ ಒಕತ್ ಸೆವ್‌ಲ್ಲ್ಯಾ ಭಾಶೆನ್ ಪಿಯೆತಾಲಿ ಆನಿ ತಿಕಾ ಹಾಂತುನ್ ಜಿವಾಕ್ ಬೊರೆಂ ಜಾತಾ ಮ್ಹಳ್ಳೆಂ ಪಾತ್ಯೆಣಿ ಥೊಡ್ಯಾಂನಿ ದಿಲ್ಲಿ! ಹಿ ಸಂವಯ್ ಸದಾಂನೀತ್ ಮುಕಾರ್ಸುನ್ ವರ್ನ್, ಮುಕ್ಲ್ಯಾ ಮಹಿನ್ಯಾಂತ್‌ಯೀ ಸೊರೊ ನಾಸ್ತಾನಾ ರಾತ್ ಪಾಶಾರ್ ಕರುಂಕ್ ಕಷ್ಟ್ ಜಾಲೆಂ. ಸೊರೊ ಒಕತ್ ಮ್ಹಳ್ಳೆಂ ಚಿಂತಪ್ ತಿಕಾ ಆಸ್‌ಲ್ಲೆಂ. ಬೊತ್ಲ್ರೊ ಘರಾಂತ್ ಚಡ್ಲ್ಯೊ. ಎಲಿಜ್ ಬಾಯ್ ಸವ್ಕಾಸ್ ತಿಕಾ ಕಳನಾಸ್ತಾನಾಂಚ್ ಸೊರ್‍ಯಾಚಿ ಗುಲಾಮ್ ಜಾಲ್ಲಿ. ಪಾರ್ಗಾಂವಾಂತ್ ಥಾವ್ನ್ ಗಾಂವಾಕ್ ಆಯಿಲ್ಲೊ ಘೊವ್ ಬಾಯ್ಲೆಚೆ ಆವ್ತಾರ್ ಪಳೆವ್ನ್ ಶೆರ್ಮೆವ್ನ್ ಗೆಲೊ.
ಲಿಲ್ಲಿಚಾ ಘರಾಂತ್ ಆಯ್ತಾರಾಚೆಂ ದುಕ್ರಾಮಾಸ್ ಚುಕಾನಾತ್‌ಲ್ಲೆಂ. ಪೂತ್ ಜೊಸ್ಸಿಕ್ ದುಕ್ರಾಮಾಸ್ ಮ್ಹಳ್ಯಾರ್ ಜೀವ್. ಹೆರ್ ಮಾಸಾಂ ತಿತ್ಲೆಂ ಖಾಯ್ನಾತ್‌ಲ್ಲೊ. ಥೆಂಬೊ ಭರ್ ಪಿಯೆಲ್ಯಾರ್ ದುಕ್ರಾಮಾಸ್ ಜಿರೊಂಕ್ ಬರೆಂ ಮ್ಹಣ್ ಲಿಲ್ಲಿ ಪಾತ್ಯೆತಾಲಿ. ಆನಿ ಇಲ್ಲೆಂ ಇಲ್ಲೆಂ ಪಿಯೆತೆಲಿ. ಹೆಂ 'ಜಿರ್ವಣೆಚೆ ಒಕತ್' ಸವ್ಕಾಸ್ ಪುತಾಕ್ ಕಳ್ಳೆಂ ಆನಿ ಚೊರ್‍ಯಾಂ ಪಯ್ಲೆಂ ಗಮ್ಮತೆಕ್ ಮ್ಹಣ್ ಉದಾಕ್ ಭರ್ಸುಮ್ ಪಿಯೆಂವ್ಕ್ ಸುರು ಕೆಲೆಂ. ಆನಿ ಬೊತ್ಲೆಕ್ ಇಲ್ಲೆಂ ಉದಾಕ್ ಭರ್ಸುನ್ ದವ್ರುಂಕ್ ವಿಸ್ರಾಲೊನಾ. ಹೆಂ ಆವಯ್ಲ್ಯಾ ಗಮನಾಕ್ ಗೆಲೆಂನಾ. ನವ್ಯಾ-ಧವ್ಯಾ ಕ್ಲಾಸಿಂತ್ ಆಸ್ತಾನಾ ಆವಯ್ಚ್ಯಾ ಪರ್ಸಿಂತ್ಲೆಂ ನೋಟ್ ಕಾಡ್ನ್ ಬಾರಾಕ್ ವಚೊನ್ ಬಿಯೆರ್ ಪಿಯೆತೆನಾಂಯೀ ಆವಯ್ಕ್ ತಿತ್ಲೆಂ ಕಳ್ಳೆಂ ನಾ. ಗಲ್ಪಾಥಾವ್ನ್ ಘೊವ್ ದರಬಸ್ತ್ ಪಯ್ಶೆ ಧಾಡ್ತಲೊ ಜಾಲ್ಲ್ಯಾನ್ ಲಿಲ್ಲಿನ್ ತಿತ್ಲೆಂ ಗುಮಾನ್ ದಿಲೆಂ ನಾ. ಆನಿ ಜೊಸ್ಸಿ ಹೆಂ ಬರೆಂ ಕರ್ನ್ ಜಾಣಾ ಆಸ್‌ಲ್ಲೊ. ಆನಿ ಸವ್ಕಾಸ್ ಜೊಸ್ಸಿ ಆವಯ್ಚ್ಯಾ ಸಲ್ಗೆನ್ಂಚ್ ಅಮಾಲಿ ಜಾವ್ನ್ ಬದ್ಲಾತಾನಾ ಲಿಲ್ಲಿಚ್ಯಾ ಮಾತ್ಯಾರ್ ಮೊಳಾಬ್ ಕೊಸ್ಳಾಲ್ಲೆಂ!
ಮಾರ್ಸೆಲಾಕ್ ಎಕ್ಲೊಚ್ ಪೂತ್. ಮಾರ್ಸೆಲಾಕ್ ಸದಾಂನೀತ್ ಇಲ್ಲೆಂ 'ಮಾರ್ಚಿ' ಸಂವಯ್ ಆಸ್‌ಲ್ಲಿ. ಆಪುಣ್ ಗ್ಲಾಸಾಂತ್ ಪಿಯೆತಾನಾ, ಲಾಗಿಂ ಆಸ್ಚ್ಯಾ ಪುತಾಕ್‌ಯೀ ಇಲ್ಲೆಂ ಚಾಕಯ್ತಾಲೊ. ಪುತಾನ್ ಏಕ್ ಲ್ಹಾನ್ ಘೊಟ್ ಮಾರ್ನ್ ಮುಸ್ಕಾರ್ ಏಕ್ ಥರ್ ಕರ್ತಾನಾ ತಾಕಾಯೀ ಖುಶಿ ಜಾತಾಲಿ. ಹಿ ಸಂವಯ್ ಮುಕಾರ್ಸುನ್ ಗೆಲಿ. ಧಾಕ್ಟುಲ್ಯಾಚ್ಯಾ ಮೆಂದ್ವಾಂತ್ ಸೊರ್‍ಯಾಚಿ ರೂಚ್ ಖಂಚೊನ್ ಗೆಲ್ಲಿ. ಭುರ್ಗ್ಯಾನ್, ಸೊರೊ ಏಕ್ ಗಮ್ಮತಾಯೆಚೆಂ ಪೀವನ್, ತಾಂತುನ್ ಪಾಡ್ ಕಿತೆಂಚ್ ನಾ ಮ್ಹಳ್ಳೆಂ ಸಲೀಸಾಯೆಚೆಂ ಚಿಂತಪ್ ಘಟ್ಟ್ ಕರ್ನ್ ಸೊಡ್‌ಲ್ಲೆಂ! ಭುರ್ಗೊ ವ್ಹಡ್ ಜಾತಾನಾ, ಪಯ್ಲೆಂ ಬಿಯರ್ ಆನಿ ಉಪ್ರಾಂತ್ ಸೊರೊ ಕಿತೆಂಚ್ ಭ್ಯೆಂ ಭಿರಾಂತ್ ನಾಸ್ತಾನ್ ಸೇಂವ್ಕ್ ಲಾಗ್ಲೊ. ಪರಿಣಾಮ್ ಜಾವ್ನ್ ಭುರ್ಗೊ ವೀಸ್ ವರ್ಸಾಂಚೊ ಜಾತಾನಾ ಪರಿಪೂರ್ಣ್ ಅಮಾಲಿ ಜಾವ್ನ್ ಬದ್ಲಾಲ್ಲೊ. ಘರ್ಚೆಂ ವಾತಾವರಣ್ಂಚ್ ಭುರ್ಗ್ಯಾಕ್ ಸೊರೊ ಪಿಯೆಂವ್ಕ್ ಪ್ರೇರಿತ್ ಕರ್ನ್, ತಾಕಾ ಅಮಾಲಿ ಜಾವ್ನ್ ಬದ್ಲಾಯ್ಲೆಂ!
ಸೊರೊ ಸರ್ಕಾರಿ ಜಾಂವ್ ವ ಇಂಗ್ಲೀಶ್, ಅಮಾಲ್ ಸೆಂವ್ತೆಲ್ಯಾಂಕ್ ಅಮಾಲಿ ಕರ್ತಾ. ಅಮಾಲಿ ಮನ್ಶ್ಯಾ ವರ್ವಿಂ ಜಾಂವ್ಚೆ ತಿತ್ಲಿಂ ಅನಾಹುತಾಂ, ಮೊರ್ನಾಂ, ಅವ್ಘಡಾಂ ಹೆರ್ ಖಂಚಾಯೀ ಕಾರಣಾಂನಿ ಜಾಯ್ನಾಂತ್. ಸೊರೊ ಪಿಯೆನಾ ಜಾಲ್ಯಾರ್ ಜಿರ್ವಣ್ ಜಾಯ್ನಾ ಮ್ಹಳ್ಳಿ ಥೊಡ್ಯಾಂಚಿ ಅಭಿಪ್ರಾಯ್. ಖಂಚಾಯೀ ಕಾರಣಾನ್ ಸೊರೊ ಜಿರ್ವಣ್ ಚಡಯ್ನಾ. ನಿರಾಳ್ ಪೊಟಾಕ್ ಸೊರೊ ಪಿಯೆಲ್ಲ್ಯಾಚ್ಯಾ ಪೊಟಾಭಿತರ್ ''ಗ್ಯಾಸ್ಟ್ರಯ್ಟೀಸ್'' ಮ್ಹಳ್ಳಿ ಖಾಣಾಕೊಶಾಚಿ ಹುಲೊಪಾಚಿ ಪಿಡಾ ಸುರು ಜಾತಾ. ದುಕ್ರಾಮಾಸ್ ಜಿರೊಂಕ್ ಸೊರೊ ಬರೊ ನ್ಹಯ್... ಬದ್ಲ್ಯಾಕ್ ಇಲ್ಲೆಂ ಚಲಾ ವ ದೈಹಿಕ್ ರಿತಿನ್ ಖಂಚೆಯೀ ಕಾಮ್ ಕರಾ. ಖೆಲ್ಲೆಂ ಬರೆಂ ಜಿರ್ವಣ್ ಜಾತಾ.
ಲ್ಹಾನ್ ಪ್ರಾಯೆರ್ ಸೊರೊ ಪಿಯೆಂವ್ಕ್ ಸುರು ಕರ್ನ್, ಸೊರ್‍ಯಾಚೊ ಅಮಾಲಿ ಜಾಲ್ಯಾರ್, ಸೊರ್‍ಯಾಚೊ ಥೊಡೊ ಭಾಗ್ ಲಿವರಾಂತ್ ಭರ್ಸುನ್ ತೆಂ ಪಾಡ್ ಜಾತಾ. ಅಶೆಂ ಪಾಡ್ ಜಾಲ್ಲೆಂ ಲಿವರ್, ಪರ್ತುನ್ ಆದ್ಲ್ಯಾ ಸ್ಥಿತೆಕ್ ಯೇನಾಸ್ತಾಂ, 'ಸಿರೋಸಿಸ್' ಮ್ಹಳ್ಳ್ಯಾ ಪಿಡೆನ್ ವ್ಹರ್ನ್ ಪಾಯ್ತಾ. ಹಿ ಪಿಡಾ ಕ್ಯಾನ್ಸರಾ ಭಾಶೆನ್! ಹಾಕಾ ಚಿಕಿತ್ಸಾ ಲಾಭಾನಾ. ಲಿವರ್ ಪಿಡೇಸ್ತ್ ರಗಾತ್ ವೊಂಕುಂಕ್ ಸುರು ಕರ್ತಾತ್. ಆನಿ ಮೊರ್ನಾಕ್ ಹೆಂ ಏಕ್ ಪ್ರಮುಕ್ ಕಾರಣ್ ಜಾತಾ.
ಲ್ಹಾನ್ ಭುರ್ಗ್ಯಾಂಕ್ ಸೊರ್‍ಯಾಂತ್ ಆಯುರ್ವೇದಿಕ್ ಗುಳಿಯೊ ದೀಂವ್ಕ್ ನಜೊ. ಅಮಾಲಾನ್ ಭುರ್ಗಿಂ ರಡ್ಚೆಂ ರಾವಯ್ತಾತ್ ಜಾಂವ್ಕ್ ಫುರೊ. ಪುಣ್ ಭುರ್ಗೆಂ ಕಿತ್ಯಾಕ್ ರಡ್ತಾ ತೆಂ ಸೊಧುನ್ ಕಾಡಿಜಾಯ್! ಬಾಳ್ಶ್ಯಾಕ್ ಸೊರ್‍ಯಾಚೆಂ ಅಂಶ್ ಪಡ್ಲ್ಯಾರ್ ಖಾಣಾಕೋಶಾಕ್ ಹುಲೊಪ್ ಯೇವ್ನ್ ಮುಕಾರ್ ಲಿವರಾಕ್ ಬಾಧಕ್ ಜಾಯ್ತ್.
ಅಮಾಲ್ ಸೆವ್‌ಲ್ಲ್ಯಾ ವರ್ವಿಂ ಯೆಂವ್ಚಿ ನೀದ್ ಮೆಂದ್ವಾಕ್ ಫಾವೊತೊ ಸುಶೆಗ್ ದೀನಾ. ಸೊರೊ ಪಿಯೆನಾಸ್ತಾಂ ಯೆಂವ್ಚಿ ನೀದ್ ಉಣ್ಯಾ ಆವ್ದೆಚಿ ತರೀ ಮೆಂದ್ವಾಕ್ ಬರಿ. ಟಾಯ್ಟ್ ಜಾವ್ನ್ 9-10 ವೊರಾಂ ನಿದ್ಚೆ ಪ್ರಾಸ್, ಪಿಯೆನಾಸ್ತಾಂ ಪಾಂಚ್ ವೊರಾಂ ನಿದ್ಚೆಂ ಅಧಿಕ್ ಬೊರೆಂ.
ಬಾಂಳ್ತಿಕ್ ಶೆಳ್ ಜಾತಾ ಮ್ಹಣೊನ್ ಒಕತ್ ಜಾವ್ನ್ ಸೊರೊ ದಿಲ್ಯಾರ್ ಫುಡೆಂ ತಾಂಕಾಂ ಪಿಯೆಂವ್ಚ್ಯಾಕ್ ಪ್ರೇರಣ್ ಕೆಲ್ಲ್ಯಾಪರಿಂ ಜಾತಾ. ಶೆಳಿಕ್ ಸೊರೊ ಒಕತ್ ನ್ಹಯ್.
ಆನಿ ಆಮ್ಚ್ಯಾ ಮಂಗ್ಳುರೀ ಕ್ರೀಸ್ತಾಂವಾಂಕ್ ಸೊರೊ ನಾಸ್ತಾನಾ ಜಾಯ್ನಾ ಮ್ಹಳ್ಳೆಂ ಚಿಂತಪ್ ಆಸಾ. ಸೊರೊ ಪಿಯೆನಾತ್‌ಲ್ಲೊ 'ಗಾಂಧಿ' ಮ್ಹಳ್ಳ್ಯಾ ಮಸ್ಕರ್‍ಯಾಂಕ್ ಬಲಿ ಜಾತಾ. ಆಮ್ಚೆಂ ಘರ್ಚೆಂ ವಾತಾವರಣ್ ಭುರ್ಗ್ಯಾಂಕ್ ಸೊರೊ ಪಿಯೆಂವ್ಕ್ ಪ್ರೇರಿತ್ ಕರ್ತಾತ್. ಫೆಸ್ತಾಂ ಪರ್ಬೆ ವೆಳಾರ್ ಬಿಯರ್ ಪಿಯೆಂವ್ಕ್ ಥೊಡ್ಯಾ ಘರಾಂನಿ ತಾಂಚಿ ವ್ಹಡಿಲಾಂಚ್ ಪ್ರೋತ್ಸಾಹ್ ದಿತಾತ್. ಅಶೆಂ ಭುರ್ಗ್ಯಾಂಕ್ ಸೊರೊ ಮ್ಹಣ್ಚೆಂ ಏಕ್ ಗಮ್ಮತಾಯೆಚೆಂ ಪೀವನ್ ಮ್ಹಳ್ಳೆಂ ಚಿಂತಪ್ ಉದೆತಾ... ಆನಿ ಹೆಂಚ್ಕ್ ಮುಕಾರ್ ಥೊಡ್ಯಾಂಕ್ ಅಮಾಲಿ ಜಾವ್ನ್ ರೂಪಿತ್ ಕರ್ತಾ.... ಅಮಾಲಿ ಜಾಲ್ಲ್ಯಾಂಕ್ ತಿಂಚ್ ವ್ಹಡಿಲಾಂ, ಘರ್ಚಿಂ ಆನಿ ಸಮಾಜ್ ನಾಕಾರ್ತಾ. ದೆಕುನ್ ಏಕ್ ಸಾಂಗ್ಣಿ ಆಸಾ, 'ಸೊರೊ ಇಲ್ಲೊ ಜಿವಾಕ್ ಬರೊ, ಪುಣ್ ಲಗಾಡ್ ಕಾಡುಂಕ್‌ಯೀ ಫುರೊ!' ಖಂಚೆಯೀ ಜಾಂವ್, ಮೀತ್ ಮಿಕ್ವಾಲ್ಲೆಂ ಜಿವಾಕ್ ಬರೆಂ ನ್ಹಯ್. ಜಾಂವ್ದಿ ತೆಂ ಗೊಡ್ಶೆಂ ವ ಸೊರೊ! ಮುಕ್ಲ್ಯಾ ದಿಸಾಂನಿ ಘರಾಂತ್ ಹಾಡ್ಚ್ಯಾ ಹ್ಯಾ 'ಬೊತ್ಲೆ' ವಿಶಿಂ ಚತ್ರಾಯ್ ದವರಾ!!!
Tags:
Alcoholic, AA, Alcohol Bottle, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
2/27/2021 ಹೆರೊಲ್ಪಿಯುಸ್: ಏಕ್ ಅವ್ಚಿತ್ ಭೆಟ್...
-
12/20/2020 ಯುವಜಣಾಂಕ್ ಪ್ರೇರಣ್ - ಜೆಸ್ಸಿಕಾ ಆನ್ನಾ ಲಿಝಾ...
-
12/6/2020 ಆಸ್ತ್ ........
-
11/25/2020 ಭಾರತಾಚಿಂ ಖಬ್ರೆ ಟಿವಿ ಚಾನೆಲಾಂ ಮರಣ್ ಪಾವ್ಲ್ಯ...
-
11/9/2020 ನಾಂವ್ ಬದಲ್ಲ್ಯಾನ್ ಗಾಂವ್ ಬದಲ್ನಾಂ...!...
-
10/17/2020 ಮಂಗ್ಳುರ್‌ಚೊ ಖ್ಯಾತ್ ಗ್ರಾಫೊಲೊಜಿಸ್ಟ್, ಸ್ಟೇ&...
-
-
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.