:: www.maibhaas.com - ಯುವಜಣಾಂಕ್ ಪ್ರೇರಣ್ - ಜೆಸ್ಸಿಕಾ ಆನ್ನಾ ಲಿಝಾ ::

ತುಮ್ಚ್ಯಾ ಗಮನಾಕ್:

Best be viewed in 1366 X 768 screen resolution and in Google Chrome

ಯುವಜಣಾಂಕ್ ಪ್ರೇರಣ್ - ಜೆಸ್ಸಿಕಾ ಆನ್ನಾ ಲಿಝಾ

Sunday, December 20, 2020 / By Admin

ಬರಯ್ಣಾರಾ ವಿಶಿಂ ಜಾಣಾ ಜಾ...

12/20/2020
ಸಿಜ್ಯೆಸ್, ತಾಕೊಡೆ

'ಸಿಜ್ಯೆಸ್ ತಾಕೊಡೆ' ಮ್ಹಳ್ಳೆಂ ನಾಂವ್ ಆಯ್ಕತಾನಾಂಚ್ ತೊಂಡಾರ್ ಹಾಸೊ ಉದೆತಾತ್... ಕಾರಣ್ ಸಿಜ್ಯೆಸಾಚಿಂ ಬರ್ಪಾಂ. ಕೊಂಕ್ಣಿ ಸಾಹಿತ್ಯಾಂತ್ ಆಸ್ಚಾ ಭೋವ್ ಥೊಡ್ಯಾ ಹಾಸ್ಯ್ ಸಾಹಿತಿಂ ಪಯ್ಕಿ ಸಿಜ್ಯೆಸ್ ಎಕ್ಲೊ ಆನಿ ತಾಚಿಂ ಬರ್ಪಾಂ ವಾಚುನ್ ಹಾಸೊಂಕ್ ಕಳಿತ್ ನಾತ್‌ಲ್ಲೆ ಸಯ್ತ್ ಹಾಸೊಂಕ್ ಶಿಕ್ತಾತ್. 'ಸಿಜ್ಯೆಸ್ ತಾಕೊಡೆ' ನಾಂವಾರ್ ಪಾಟ್ಲ್ಯಾ ಚಡುಣೆಂ ಪಾಂಚ್ ಧಾಕ್ಡ್ಯಾಂಥಾವ್ನ್ ಕೊಂಕ್ಣಿ ಸಾಹಿತಿಕ್/ಪತ್ರಿಕೋದ್ಯಮ್ ಶೆತಾಂತ್ ಭಂವೊನ್, ಚಲೊನ್, ಧಾಂವೊನ್, ಪಿಕೊನ್ ಗೆಲ್ಲೊ ಮಾನೆಸ್ತ್ ಸಿರಿಲ್ ಜಿ. ಸಿಕ್ವೇರಾ ಏಕ್ ಖರೊ ಕಲಾಕಾರ್ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ. ಆಪ್ಲ್ಯಾ ಜಿಣ್ಯೆಂತ್ ಕಸಲೀಂಯಿ/ಕಿತ್ಲೀಂಯಿ ಕಷ್ಟ್ ಅನ್ವಾರಾಂ ಆಯ್ಲ್ಯಾರ್‌ಯಿ ತಿಂ ತೊ ಭೊಗುನ್, ಸದಾಂ ಆಪ್ಲ್ಯಾ ಬರ್ಪಾಂನಿ ತೊ ವಾಚ್ಪ್ಯಾಂಕ್ ಹಾಸಂವ್ಕ್ ಪ್ರೇತನ್ ಕರ್ತಾ. ಹೆಂ ಕರುಂಕ್ ಸಾದ್ಯಾಂಕ್ ಖಂಡಿತ್ ಜಾವ್ನ್ ಅಸಾಧ್ಯ್. ಸಾಹಿತ್ಯಾಚಾ ಚಡ್ತಾವ್ ಪ್ರಕಾರಾಂನಿ ಹೆಳ್‌ಲ್ಲೊ ಸಿಜ್ಯೆಸ್ ಅಜೂನ್ ತೊಚ್ ಕೊಂಕ್ಣೆಚೊ ಮೋಗ್ ಆಪ್ಲ್ಯಾ ಕಾಳ್ಜಾಂತ್ ಭರ್ನ್ ಘೆತ್‌ಲ್ಲೊ ಆನಿ ಹೊಚ್ ಮೋಗ್ ಆಸ್ಚಾ ಹೆರಾಂಕ್ ಹುಮೆದೆಚಿಂ ಪಾಕಾಂ ಲಾಂವ್ಚೊ ಏಕ್ ಅಪ್ರೂಪ್ ಸಾಹಿತಿ ಜಾವ್ನಾಸಾ.

80.5

User Rating

ಆಮ್ಚಾ ಫಿರ್‍ಗಜಿಂನಿ ವಿವಿದ್ ದೆಣ್ಯಾಂ ತಾಲೆಂತಾಂನಿ ಭರ್‌ಲ್ಲಿಂ ಸಬಾರ್ ಭುರ್‍ಗಿಂ, ಯುವಜಣಾಂ ಆಸಾತ್. ತಾಂಚೆಪಯ್ಕಿ ಥೊಡ್ಯಾಂಕ್ ಪ್ರಚಾರ್ ವ ಪಬ್ಲಿಸಿಟಿ ಮೆಳ್ತಾ. ಪುಣ್ ಥೊಡಿಂ ಜಣಾಂ ಪಾನಾಂ ಪಾಟ್ಲ್ಯಾ ಫಳಾಂಪರಿಂ ಲಿಪೊನ್ ಆಸ್ತಾತ್. ಅಸಲೆಂ ಏಕ್ ಅಪೂರ್ವ್ ನೆಕೆತ್ರ್ ವಾಲೆನ್ಸಿಯಾ ಫಿರ್‍ಗಜಿಂತ್ ಆಸಾ. ತಾಚೆಂ ನಾಂವ್ ಜೆಸ್ಸಿಕಾ ಆನ್ನಾ ಲೀಝಾ ಕ್ರಾಸ್ತಾ. 1994 ಫೆಬ್ರೆರ್ 18ವೆರ್ ವಾಲೆನ್ಸಿಯಾಂತ್ ತಾಚೊ ಜಲ್ಮ್ ಜಾಲೊ. ವಿವಿದ್ ದೆಣ್ಯಾಂ ತಾಲೆಂತಾಂನಿ ಭರ್‍ಲಲಿ ಯುವಕಿ ತೆಂ. ಶಿಕ್ಪಾಂತ್ ಜಾಂವ್, ಸಂಗೀತಾಂತ್ ಜಾಂವ್, ನಿಟ್ಟಿಂಗ್, ಕ್ರೋಶಾಚೆಂ ವೊಳಾಪ್ ಇತ್ಯಾದಿಂನಿ ತೆಂ ಭಾರಿಚ್ ಹುಶಾರ್.

ಶಿಕಪ್ :

ಜೆಸ್ಸಿಕಾ ಲ್ಹಾನ್ ಥಾವ್ನ್‌ಯಿ ಶಿಕ್ಪಾಂತ್ ಆನಿ ಪಾಠೇತರ್ ಚಟುವಟಿಕೆಂನಿ ಮುಕಾರ್. ಜೆಪ್ಪುಚಾ ಜೆರೊಸಾ ಹೈಸ್ಕೂಲಾಂತ್ ಧಾವಿ ಸಂಪಯಿಲ್ಲ್ಯಾ ತಾಣೆಂ ಬೆಂದುರ್‌ಚಾ ಸಾಂತ್ ಆಗ್ನೆಸ್ ಕೊಲೆಜಿಂತ್ ಪಿಯುಸಿ ಕೆಲೆಂ. ಸಾಂ. ಲುವಿಸ್ ಕೊಲೆಜಿಂತ್ ಬಿ.ಕೊಮ್. ಪದ್ವಿ ಜೊಡ್ತಚ್ ವಾಮಂಜೂರ್‌ಚಾ ಸಾಂ ಜುಜೆ ಇಂಜಿನಿಯರಿಂಗ್ ಕೊಲೆಜಿಂತ್ ಎಮ್.ಬಿ.ಎ. ಪದ್ಯುತ್ತರ್ ಶಿಕ್ಪಾಂತ್ ಡಿಸ್ಟಿಂಕ್ಶನ್ ಜೊಡುನ್ ತೆಂ ಉತ್ತೀರ್ಣ್ ಜಾಲೆಂ.

ಸಂಗೀತ್ :

ಜೆಸ್ಸಿಕಾಕ್ ಸಂಗೀತಾ ಥಂಯ್ ವಿಶೇಸ್ ವೋಡ್ ಆನಿ ಮೋಗ್. 2007-೦ತ್ ಸಾತ್ವೆ ಕ್ಲಾಸಿಂತ್ ಶಿಕೊನ್ ಆಸ್ತಾನಾ ತವಳ್‌ಚೊ ವಿಗಾರ್ ಬಾಪ್ ಪಾವ್ಲ್ ಪಿಂಟೊನ್ ಜೆಸ್ಸಿಕಾಕ್ ಕೊಯರಾಂತ್ ಭರ್‍ತಿ ಕರುನ್ ಪ್ರೋತ್ಸಾವ್ ದಿಲೊ ಮ್ಹಣ್ ತೆಂ ಉಪ್ಕಾರಿ ಮನಾನ್ ಉಡಾಸ್ ಕಾಡ್ತಾ. ತೆಂ ತವಳ್ ಥಾವ್ನ್ ಆಜೂನ್ ಪರ್‍ಯಾಂತ್ ವಾಲೆನ್ಸಿಯಾ ಸಾಂ. ವಿಶೆಂತ್ ಫೆರೆರ್ ದೇವ್ ಮಂದಿರಾಚಾ ಕೊಯರಾಂತ್ ಕೀಬೋರ್ಡ್ ಖೆಳೊನ್ ನಿಸ್ವಾರ್‍ಥಿ ಸೆವಾ ದೀವ್ನ್ ಆಸಾ..

ಉಪ್ರಾಂತ್ ಆಯಿಲ್ಲೊ ವಿಗಾರ್ ಬಾಪ್ ಬೊನಾವೆಂಚರ್ ನಜ್ರೆತಾನ್ ಆಪ್ಣಾಕ್ ಕೊಯರಾಂತ್ ತಶೆಂ ಸಂಗೀತಾಂತ್ ಧಾರಾಳ್ ಉತ್ತೇಜನ್ ದಿಲಾಂ ಮ್ಹಣ್ತಾ ಜೆಸ್ಸಿಕಾ. ತಾಚಾ ಉಪ್ರಾಂತ್ಲೊ ವಿಗಾರ್ ಬಾಪ್ ಜೇಮ್ಸ್ ಡಿಸೊಜಾನ್‌ಯಿ ತಾಕಾ ಪ್ರೋತ್ಸಾವ್ ದಿಲಾ. ಆತಾಂಚೊ ವಿಗಾರ್ ಬಾಪ್ ರೊಕಿ ಡೆಸಾ ಥಾವ್ನ್ ಆಪ್ಣಾಕ್ ಪಾಟಿಂಬೊ ಆನಿ ಸಹಕಾರ್ ಮೆಳೊನ್ ಆಸಾ ಮ್ಹಣ್ತಾ ಆಯ್ಲೆವಾರ್ ವಾಲೆನ್ಸಿಯಾ ಕೊಯರಾಚೆಂ ಕಾರ್‍ಯದರ್‍ಶಿ ಜಾವ್ನ್ ವಿಂಚುನ್ ಆಯಿಲ್ಲೆಂ ಜೆಸ್ಸಿಕಾ.

ಜೆಸ್ಸಿಕಾ ಶಹರಾ ಭಾಯ್ಲ್ಯಾ ರೆಸ್ಪೆರಾಂಚಾ ಮಿಸಾಂಕ್ ವ ಹೆರ್ ಕಸಲ್ಯಾಯಿ ಸಂಭ್ರಮಿಕ್ ಕಾರ್‍ಯಾಂಕ್ ಕೊಯರಾಚಿ ಮಾಂಡಾವಳ್ ಕರ್‍ತಾ. ಖಂಯ್ಸರ್‌ಯಿ ಕೊಯರ್ ವ ಸಂಗೀತಾಚಿ ತರ್‍ಬೆತಿ ಆಸ್ಲ್ಯಾರ್ ತೆಂ ಚುಕನಾಸ್ತಾಂ ಹಾಜರ್ ಜಾತಾ.

ಸಂಗೀತ್ ತರ್‍ಬೆತ್‌ದಾರ್ನ್ :

2013-oತ್ ಜೆಸ್ಸಿಕಾ, ಟ್ರಿನಿಟಿ ಕೊಲೆಜ್ ಆಫ್ ಮ್ಯೂಸಿಕ್ ಲಂಡನ್, ಹಾಣಿಂ ಚಲೊಂವ್ಚಾ ಕೀ ಬೋರ್ಡ್ ಪರೀಕ್ಶೆಂತ್ ಶೀದಾ ಪಾಂಚ್ವೆ ಗ್ರೇಡಿಕ್ ಬಸುನ್ ಉತ್ತೀರ್ಣ್ ಜಾಲೆಂ. ಕೀ ಬೊರ್‍ಡಾ ಶಿವಾಯ್ ತೆಂ ಗಿಟಾರ್ ಖೆಳ್ತಾ ಆನಿ ಪಿರ್‍ಲುಕ್ (ಫ್ಲೂಟ್) ಫುಂಕ್ತಾ.

ಜೆಸ್ಸಿಕಾನ್ ಕೆಂಬ್ರಿಜ್ ಸ್ಕೂಲ್ ನೀರ್‍ಮಾರ್‍ಗ, ವಿಬ್‌ಗ್ಯೋರ್ ಸ್ಕೂಲ್ ಕೂಳೂರ್ ಹಾಂಗಾಸರ್ ವಿದ್ಯಾರ್‍ಥಿಂಕ್ ಸಂಗೀತಾಂತ್ ತರ್‍ಬೆತಿ ದಿಲ್ಯಾ. ಪಾಟ್ಲ್ಯಾ ಧಾ ವರ್‍ಸಾಂ ಥಾವ್ನ್ ತೆಂ ಆಪ್ಲ್ಯಾ ಘರಾ ಸಂಗೀತ್ ಕ್ಲಾಸಿ ಚಲಯ್ತಾ. ಹ್ಯಾ ಕ್ಲಾಸಿಂಕ್ ಸಬಾರ್ ಭುರ್‍ಗಿಂ ಹಾಜರ್ ಜಾತಾತ್. ತಾಚೆಕಡೆ ಸಂಗೀತ್ ಶಿಕ್‌ಲ್ಲಿಂ ಸಬಾರ್ ಭುರ್‍ಗಿಂ ಆಜ್ ಇಗರ್‍ಜಿಚಾ ಆನಿ ಹೆರ್ ಸಂಗೀತ್ ಕಾರ್‍ಯವಳಿಂನಿ ಭಾಗ್ ಘೆತಾತ್. ಜೆಸ್ಸಿಕಾ ಘರಾಂನಿ ವಚೊನ್‌ಯಿ ಭುರ್‍ಗ್ಯಾಂಕ್ ಸಂಗೀತ್ ಶಿಕಯ್ತಾ.

ಹವ್ಯಾಸ್ :

ಕೊಲೆಜಿಕ್ ವೆತಾನಾ ರಜೆಚಾ ದಿಸಾಂನಿ ವೇಳ್ ವಿಬಾಡ್ಚಾ ಬದ್ಲಾಕ್ ಜೆಸ್ಸಿಕಾನ್ ಬ್ಯೂಟಿಶಿಯನಾಚೊ ಕೋರ್ಸ್ ಕೆಲಾ. ಆತಾಂಯಿ ತೆಂ ವೇಳ್ ಮೆಳ್ತಾನಾ ತಾಚಾ ವಳ್ಕಿಚಾ ಎಕಾ ಬ್ಯೂಟಿ ಪಾರ್‍ಲರಾಂತ್ ತೆಂ ಕುಮಕ್ ಕರುಂಕ್ ವೆತಾ ಖಂಯ್.

ಜೆಸ್ಸಿಕಾಕ್ ನಿಟ್ಟಿಂಗ್ ಆನಿ ಕ್ರೊಶೆಚಾ ಕಾಮಾಂತ್ ವಿಶೇಸ್ ಆಸಕ್ತ್. ಕೊರೊನಾ ಪಿಡೆಕ್ ಲಾಗೊನ್ ಲೋಕ್‌ಡೌನ್ ಜಾತಾನಾ ತೆಂ ವೊಗೆಂ ಬಸ್ಲೆಂ ನಾ. ತಾಣೆಂ ನಿಟ್ಟಿಂಗ್ ಆನಿ ಕ್ರೊಶೆಂತ್ ವಿವಿದ್ ವಿನ್ಯಾಸಾಂಚೆಂ ಕಾಮ್ ಸುರು ಕೆಲೆಂ. ತಾಣೆಂ ಘರಾಚ್ ತಯಾರ್ ಕೆಲ್ಲ್ಯೊ ವಸ್ತು ಆಸಾತ್ : ಶೊಲಾಂ, ಕಾನಾಚ್ಯೊ ಮುದಿಯೊ, ಫುಲಾಂಚೆ ಬುಕ್ಕೆ, ಬೇಬಿ ಕ್ಯಾಪ್, ಬೇಬಿ ಬೂಟಿಸ್, ಬೇಬಿ ಸೆಟ್ಟಾಂ, ಬೇಬಿ ಬ್ಲ್ಯಾಂಕೆಟ್, ಬಾವ್ತಿಜ್ಮಾಚ್ಯೊ ಬ್ಲ್ಯಾಂಕೆಟ್, ಬೇಬಿ ಸ್ಲಿಪ್ಪರಾಂ, ಬೇಬಿ ಮಂಕಿ ಕ್ಯಾಪ್ ಸ್ವೆಟ್ಟರಾಂ, ಮಫ್ಲರಾಂ, ಬೆಗಾಂ, ಪರ್ಸ್, ಸಾಡಿಯೆ ಬೊರ್‍ಡರ್ ವಿನ್ಯಾಸ್, ಟೇಬಲ್ ಕ್ಲೊತ್, ಡೋಲ್ಸ್, ಸಾಂತಾಕ್ಲೊಸ್ ತೊಪಿಯೊ, ಕ್ರಿಸ್‌ಮಸ್ ಸ್ಟೊಕಿನ್, ಕ್ರಿಸ್‌ಮಸ್ ಡೆಕೊರ್, ಮಾಸ್ಕ್ ಇತ್ಯಾದಿ ತಯಾರ್ ಕರುನ್ ಫೇಸ್‌ಬುಕಾ ಮಾರಿಫತ್ ವಿಕ್ರಾಪಾಕ್ ಘಾಲ್ಯಾಂತ್ ತಾಣೆಂ. ಸ್ಥಳೀಯ್ ಆನಿ ವಿದೇಶಾಂತ್ಲ್ಯಾ ಸಬಾರ್ ಜಣಾಂನಿ ತ್ಯೊ ಮೊಲಾಕ್ ಘೆವ್ನ್ ಬರೊಚ್ ಆಧಾರ್, ಉತ್ತೇಜನ್ ದೀವ್ನ್ ಹೊಗ್ಳಿಕ್ ಉಚಾರ್‍ಲ್ಯಾ ಮ್ಹಣ್ತಾ ಜೆಸ್ಸಿಕಾ.

ಜೆಸ್ಸಿಕಾ ಘರ್ ಸಾಂಬಾಳ್ಚಾಂತ್ ಆನಿ ಸಜೊಂವ್ಚಾಂತ್‌ಯಿ ಹುಶಾರ್. ಆಪ್ಣಾಕ್ ಸರ್ವ್ ಸಂಗ್ತಿಂನಿ ಆಪ್ಲಿ ಮಾಮ್ಮಿ ಜೆಸಿಂತಾ, ಆಜೊ ಆನಿ ಆಜಿ ಪ್ರೋತ್ಸಾವ್ ಆನಿ ಸಹಕಾರ್ ದಿತಾತ್ ಮ್ಹಣ್ತಾ ಜೆಸ್ಸಿಕಾ. ಜೆಸ್ಸಿಕಾ ಮೊಗಾಳ್ ಆನಿ ಮಯ್ಪಾಸಿ. ದೆವಾನ್ ತಾಕಾ ವಿವಿದ್ ದೆಣ್ಯಾಂ ತಾಲೆಂತಾಂನಿ ನೆಟಯ್ಲಾಂ ತರೀ ತೆಂ ಭೋವ್ ಖಾಲ್ತೆಂ ಆನಿ ಸಾಧೆಂ. ಮಾಲ್ಗಡ್ಯಾ ಆನಿ ತರ್‍ನಾಟ್ಯಾ ಸಾಂದ್ಯಾಂಕ್ ಸಾಂಗಾತಾ ಘೆವ್ನ್ ಭೋವ್ ಆಪುರ್‍ಬಾಯೆನ್ ತೆಂ ಕೊಯರ್ ಚಲಯ್ತಾ. ಹರ್ ಏಕ್ ಪಾಚ್ಟಿಂ ಎಕ್ಲ್ಯಾ ದೊಗಾಂನಿಂಚ್ ಕೀರ್‍ತನ್ ಗಾಂವ್ಚಾ ಬದ್ಲಾಕ್, ಜೆಸ್ಸಿಕಾ ನವ್ಯಾಂಕ್, ಪ್ರತ್ಯೇಕ್ ಜಾವ್ನ್ ಯುವಜಣಾಂಕ್ ತರ್‍ಬೆತಿ ದೀವ್ನ್ ಕೀರ್‍ತನ್ ಗಾಂವ್ಕ್ ಅವ್ಕಾಸ್ ಕರ್ನ್ ದಿತಾ. ಹ್ಯಾವರ್‍ವಿಂ ನವ್ಯಾಂಕ್ ಪ್ರೋತ್ಸಾವ್ ಆನಿ ಪಾಟಿಂಬೊ ದಿಲ್ಲ್ಯಾಪರಿಂ ಜಾತಾ. ಪಾಟ್ಲ್ಯಾ 13 ವರ್‍ಸಾಂನಿ ವಾಲೆನ್ಸಿಯಾ ಸಾಂ. ವಿಶೆಂತ್ ಫೆರೆರ್ ಇಗರ್‍ಜಿಚಾ ಕೊಯರಾಂತ್ ಖಳನಾಸ್ತಾಂ, ವೊಳನಾಸ್ತಾಂ ಸೆವಾ ದೀವ್ನ್ ಆಯಿಲ್ಲೆಂ ಜೆಸ್ಸಿಕಾ, ಆಯ್ಲೆವಾರ್ ವಾಲೆನ್ಸಿಯಾ ಇಗರ್‍ಜಿಚಾ ಕೊಯರಾಚೆಂ ಕಾರ್‍ಯದರ್‍ಶಿ ಜಾವ್ನ್ ವಿಂಚುನ್ ಆಯ್ಲಾಂ. ಆತಾಂಚೊ ವಿಗಾರ್ ಬಾಪ್ ರೊಕಿ ಡೆಸಾ ಆನಿ ಸಹಾಯಕ್ ವಿಗಾರ್ ಬಾಪ್ ಲ್ಯಾನ್ಸಿ ಡಿಸೋಜಾ ಆಪ್ಣಾಕ್ ಸಂಪೂರ್ಣ್ ಸಹಕಾರ್ ಆನಿ ಪ್ರೋತ್ಸಾವ್ ದಿತಾತ್ ಮ್ಹಣ್ತಾ ಜೆಸ್ಸಿಕಾ.

ಯುವಜಣಾಂಕ್ ಪ್ರೇರಣ್ :

ಆಮ್ಚಾ ಸಮುದಾಯಾಂತ್ ಜೆಸ್ಸಿಕಾ ತಸಲಿಂ ವಿವಿದ್ ದೆಣ್ಯಾಂ ತಾಲೆಂತಾಂನಿ ಭರ್‍ಲೆಲಿಂ ಸಬಾರ್ ಯುವಜಣಾಂ ಆಸಾತ್. ತಾಂಕಾಂಯಿ ಪ್ರೋತ್ಸಾವ್ ಆನಿ ಪಾಟಿಂಬೊ ಮೆಳುಂಕ್ ಜಾಯ್. ಒಟ್ಟಾರೆ ಜೆಸ್ಸಿಕಾ ಆನ್ನಾ ಲಿಝಾ ಆಯ್ಚಾ ಯುವಜಣಾಂಕ್ ಏಕ್ ಪ್ರೇರಣ್ ಆನಿ ಸ್ಪೂರ್‍ತಿ ಜಾವ್ನಾಸಾ ಮ್ಹಣ್ಯೆತ್.