web analytics

From around the world

ಪ್ರವೀಣ್ ತಾವ್ರೊ, ಕುಲ್ಶೇಕರ್
             
+971 50 7554105
ತುಮ್ಚ್ಯಾ ಗಮನಾಕ್:
Best be viewed in 1366 X 768 screen resolution and in Google Chrome

ವೊವಿಯೊ: ರೋಸ್ ಲಾಯ್ತಾನಾ

Thursday, July 14, 2016  /  Courtesy Sambardo
1. ಆಫ್ರೊಸಾಚ್ಯೆ ಬಸಿಯೆ, ಭಾಂಗಾರಾಚೊ ಬೊವರ್, ರೊಸಾಕ್ ಬಸ್ಲಾ ಕುಂವರ್ ಆಮ್ಚೊ ವರೆತ್ ರಾಯ್.  
2. ಆಪ್ರೊಸ್ ರೋಸ್ ಕಾಡ್ಲಾ, ಸರ್ವಯ್ ಸುಂರ್ಗಾರುನ್, ರೊಸಾಕ್ ಬಸ್ಲ್ಯಾ ಕುಂವರ್‍ನ್, ಆಮ್ಚಿ ಹೊಕಾಲ್ ಬಾಯ್.  
3. ದಿಂಬಿ ಆಮಿ ಘಾಲ್ಯಾಂ, ಸಾಂತಾ ಕುರ್‍ಹು ಕಾಡ್ಯಾಂ, ಕುರ್ಪಾ ಆಮಿ ಮಾಗ್ಯಾಂ, ಆಮ್ಚಾ ಜೆಜುಲಾಗಿಂ.  
4. ಪಯ್ಲಿ ಸಾಂತಾ ಕುರ್‍ಹ್, ದುಸ್ರೆಂ ಕೆಲಾಂ ತೆಸಾಂವ್, ಜೆಜುಚೆಂ ಬೆಸಾಂವ್, ಆಮ್ಚಾ ಹೊಕುಲೆಕ್(ವರೆತಾಕ್.)  
5. ಬೆಸಾಂವ್ ಮಾಗೊನ್, ಹೊಕಾಲ್ ಬಸ್ಲ್ಯಾ ಬಾಂಕಾ, ದೀಷ್ಟ್ ಲಾವ್ನ್ ಸರ್ಗಾ, ಜೆಜು ಮರಿಯೆಚೆರ್.  
6. ಕಾನಿ ಘಾಲೆಂ ತೆಲ್, ಕಪೊಲಿಂ ಕಾಡ್ಲೊ ಖುರಿಸ್, ಸರ್ಗಿಂಚೊ ಜೆಜು ಕ್ರಿಸ್ತ್, ಹೊಕ್ಲೆಕ್(ವರೆತಾಕ್) ಬೆಸಾಂವ್ ದೀತ್.  
7. ಕಾನಿ ತಾಳ್ವೆ ತೆಲ್ ಘಾಲ್ನ್, ಬಸಯಾ ಬಾಂಕಾ, ಪಯ್ಲೊ ಮಾನ್ ತುಕಾ, ಸರ್ಗಿಂಚಾ ಬಾಪಾ.  
8. ಕಾನಿ ತಾಳ್ವೆ ತೆಲ್ ಘಾಲ್ಚ್, ದವರ್ಲೆಂ ಮುಣಿಯೆ, ಬೆಸಾಂವ್ ದಿ ರಾಣಿಯೆ, ಸರ್ಗಿಂಚ್ಯೆ ವಿರ್ಜಾ ಮರಿಯೆ.  
9. ಆಕಾಶಿ ಮಾಡ್, ನಾರ್ಲ್ ಖುಬ್ಯಾರ್, ತೆಲಾಚೊ ಖುರಿಸ್, ಹೊಕ್ಲೆಚಾ(ವರೆತಾಚಾ) ಕಪಲಾರ್.  
10. ಆಕಾಶಿಂ ಮೊಡ್ ಮ್ಹಣ್, ಧರ್ಣಿಕ್ ಜಾಲ್ಯಾ ಶೆಳ್, ಸಿಕೆರಿಗೆಲ್ಯೆ ಚಲಿಯೆಕ್(ಚಲ್ಯಾಕ್), ಕಾನಿ ಮಾತ್ಯಾಕ್ ತೆಲ್.  
11. ಆಲ್ಯಾಚಾ ದೊಸಿ, ಸಾಕ್ರಿಚೆಂ ಮೆಲ್, ಪಾಂಚ್ ಥೆಂಬೆ ತೆಲ್, ಹೊಕ್ಲೆಚಾ(ವರೆತಾಚಾ) ಕಪಾಲಾರ್.  
12. ಕಾನಿ ತಾಳ್ವೆ ತೆಲ್ ಘಾಲ್ನ್, ಸರ್ವಯ್ ಆಂಗ್‌ಯೀ ದೆಂವ್ಲೆಂ, ಆಪುರ್ಬಾಯೆಚೆಂ ಬಾವ್ಲೆಂ, ಆಮ್ಚಿ ಹೊಕಾಲ್ ಬಾಯ್.  
13. ಕಾನಿ ತಾಳ್ವೆಕ್ ತೆಲ್ ಘಾಲ್ನ್, ಜೆಜುಕ್ ಮಾರ್‍ಯಾಂ ಉಲೊ, ಆಪುರ್ಬಾಯೆಚೊ ಚಲೊ ಆಮ್ಚೊ ವರೆತ್ ಬಾಬ್.  
14. ಶೆಣ್ ಕೊಯ್ರ್ ಕಾಡ್ನ್, ನಿತಳ್ ಜಾಲೆಂ ನೆಲ್, ವ್ಹೊವ್ಳ್ಯಾಂಕ್ ಘಾಲೆಂ ತೆಲ್, ಆಮ್ಚಾ ಯಜ್ಮಾನೆನ್.  
15. ಆಂಕ್ವಾರ್ ಮಾಂಯ್ ಫೊಡಿ ನಾರ್ಲ್, ಮರಿ ಮಾಗ್ದಾಲೆನ್ ಕಾಂತಿ ಕಾಯಿ, ಜೆಜು ಮರಿ ಮಾಂಯ್, ತೆಗಿ ರೋಸ್ ಲಾಯ್.  
16. ಮಾಡ್ತ್ ಫೊಡಿ ನಾರ್ಲ್ ಮ್ಹಣ್, ಮೊರ್ನೆಲ್ ಫೊಡಿ ಕಾಯಿ, ಸಾಂತ್ ಇಜಬೆಲಿ ಸಯ್ತ್, ಚೊವ್ಗಿ ರೋಸ್ ಲಾಯ್.  
17. ಆಫ್ರೊಸಾಚ್ಯೆ ಬಸಿಯೆ, ಮುಯಾಂಚ್ಯೊ ಹಾರಿ, ಆಯಾವೊ ನಾರಿ, ಚೊವ್ಗಿ ರೋಸ್ ಲಾಯ್.  
18. ಆಫ್ರೊಸ್ ರೊಸ್ ಕಾಡ್ಲಾ, ಕೊಣಾಕ್ ಸಾಂಗೊನ್, ರಜಾ ಮಾಗೊನ್, ಆಮ್ಚಾ ಜೆಜುಲಾಗಿಂ.  
19. ರೋಸ್ ಕಾಡ್ಲಾ, ಬಾಂಯಿಚಾ ಉದ್ಕಾನ್, ಮಾಯೆಚಾ ಪುತ್ರಾನ್, ರೊಸಾಕ್ ಬೆಸಾಂವ್ ದಿಲಾಂ.  
20. ಆಫ್ರೊಸ್ ರೋಸ್ ಕಾಡ್ನ್, ದವರ್‍ಲಾ ಬಸಿಯೆ, ಜೆಜುಚ್ಯೆ ಖುಶಿಯೆ, ಯಜ್ಮಾನಿನ್ ರೋಸ್ ಕಾಡ್ಲಾ.  
21. ಸಕಾಳಿಂ ಮಾಳ್ಳಿಂ ಫುಲಾಂ, ಸಾಂಜೆರ್ ಬಾವೊಲಿಂ, ಆಲ್ಮಾಂ ಪಾವೊಲಿಂ, ಹ್ಯಾ ರೊಸಾಲಾಗಿಂ.  
22. ಆಫ್ರೊಸ್ ರೋಸ್, ಯಜ್ಮಾನಿಚಾ ಕಾಂಕ್ಣಾ, ದಾಕ್ ಜಾಲ್ಯಾ ಪಟ್ಣಾ, ಹಾಂಗಾ ರೋಸ್ ಮ್ಹಣೊನ್.  
23. ಆಫ್ರೊಸ್ ರೋಸ್ ಕಾಡ್ಲಾ, ದೆಡಾ ವೊಳ್ಯಾಚೊ, ಉಬೊ ರಾವೊನ್ ಪಳೆತಾ, ಪೂತ್ ಮರಿಯೆಚೊ.  
24. ರೋಸ್ ಕಾಡ್ತ್ಯಾ ಯಜ್ಮಾನಿ, ಮನಿಂ ಧರ್‍ಲಾಂ ತೆಸಾಂವ್, ದಿ ಮಾಯೆ ಬೆಸಾಂವ್, ಸಾಯ್ಬಿಣಿ ಕೊಸೆಸಾಂವ್.  
25. ಕೊಸೆಸ್ ಮಾಯ್ ಸಯ್ರಿ, ರುಜಾಯ್ ಮಾಯ್ ಘರ್‍ಚಿ, ತಿಣೆಂ ಕುರ್ಪಾ ದಿಂವ್ಚಿ, ಆಮ್ಚಾ ಹೊಕುಲೆಕ್(ವರೆತಾಕ್)  
26. ಹ್ಯಾ ಘರ್‍ಚೊ ಯಜ್ಮಾನಿ, ಖಂಯ್ ಗಾ ಗೆಲಾ, ಚೆರೆಲಾ ಸಯ್ತ್, ರುಜಾಯ್ ಮಾಂಯ್ಕ್ ಹಾಡುಂಕ್ ಗೆಲಾ.  
27. ರುಜಾಯ್ ಮಾಯ್ ಯೆತಾ, ವಾಟ್ ಝಾಡಯಾ, ಝಗರ್ ಪಾಟೊಳೆಂ ಸೊಡಯಾ, ತಿಚ್ಯೆ ಪಾಂಯ್ ವಾಟೆ.  
28. ರುಜಾಯ್ ಮಾಯ್ ಆಯ್ಲಿ, ಸಾಮ್ಕ್ಯಾ ಮಾರ್ಗಾನ್, ಲೊಬಾಂಗೆಲ್ಯಾ ವರ್ಗಾನ್, ತಿಕಾ ಬಸ್ಕಾ ದಿಯಾ.  
29. ಆಫ್ರೊಸಾಚಿ ವಾಟ್ಲಿ, ಕಾಸ್ಗರಾನ್ ಪೆಟ್ಲಿ, ರುಜಾಯ್ ಮಾಯ್ ಭೆಟ್ಲಿ, ಹ್ಯಾ ರೊಸಾಲಾಗಿಂ.  
30. ಆಡ್ಯಾರ್ ನಾರ್ಲ್, ತೆಮೆಟೆರ್ ಕಾರ್ವೊ, ಪವಿತ್ರ್ ಆತ್ಮೊ ಪಾರ್ವೊ, ಹೊಕ್ಲೆಚಾ ಭುಜಾಂ ವಯ್ರ್.  
31. ಆಫ್ರೊಸ್ ಹಾಡ್ನ್ ದವರ್‍ಲಾ ವಾಟ್ಲೆಂತ್, ವರೆತ್ ರೊಸಾಕ್ ಬಸ್ಲಾ(ಹೊಕಾಲ್ ರೊಸಾಕ್ ಬಸ್ಲ್ಯಾ), ಮಧೆಂ ಮಾಟ್ವಾಂತ್.  
32. ಆಂಬ್ಯಾ ತುಜೆಂ ಲೊಣ್ಚೆಂ, ಆಲ್ಯಾ ತುಜಿ ದೊಸ್, ಆಫ್ರೊಸಾಚೊ ರೊಸ್, ಯಜ್ಮಾನಿನ್ ತಯಾರ್ ಕೆಲಾ.  
33. ಕಾನಿ ತಾಳ್ವೆ ತೆಲ್ ಘಾಲ್ನ್, ತಾಳು ಫಾಂಕಯಾ, ಸೊಭಾಗ್ಯಾಂಕ್ ಆಪಯಾ, ಹ್ಯಾಯೀ ರೊಸಾಲಾಗಿಂ.  
34. ಕಾಜಾರಾಚಾ ಮಾಟ್ವಾಕ್, ಶಿರೊತಿಗಿ ಪಾನ್, ಪಯ್ಲೊ ದಿಯಾ ಮಾನ್, ವಾಡ್ಯಾಚಾ ಗುರ್ಕಾರಾಕ್.  
35. ರುಜಾಯ್ ಮಾಯೆ, ಕಿತೆಂ ತುಂ ಪಯ್ಸ್, ಕದೆಲ್ ಘೆವ್ನ್ ಬಸ್, ಹ್ಯಾ ರೊಸಾಲಾಗಿಂ.  
36. ರುಜಾಯ್ ಮಾಯೆ, ಹಾತಿಂ ತಿಚಾ ಧವೆಂ, ಕದೆಲ್ ದಿಲಾಂ ನವೆಂ, ಮಾಯೆ ಸಿಯಾಸಾನಿ.  
37. ರುಜಾಯ್ ಮಾಯ್ ಆಯ್ಲಿ, ವೊಣ್ಕಾಲಿ ದಾರಾ, ಮಾನ್ವಾಲಿ ಫರಾ, ಆಮ್ಚಾ ಯಜ್ಮಾನ್ಯಾಚಾ.  
38. ಆಲ್ತಾರಿ ವಯ್ಲಿ ಕಾಲ್ಸ್, ದೆಣೆಂ ಲಾವ್ನ್ ಕಾಡ್ಲ್ಯಾ, ಬಾಳ್ಶಾ ಸಯ್ತ್ ಆಯ್ಲ್ಯಾ, ಆಮ್ಚಿ ರುಜಾಯ್ ಮಾಯ್.  
39. ಯಜ್ಮಾನ್ ಬಾಯೆ, ಭಾರಿ ತುಜೆಂ ಶುದ್ಧ್, ಮಿನಿನ್ ಜೆಜುನ್ ಖುದ್ಧ್, ಹಾಂಗಾ ಯೆತಾಂ ಮ್ಹಳಾಂ.  
40. ಹ್ಯಾವಿ ಮಾಟ್ವಾಂತ್, ಕೊಯ್ರ್ ಭೋವ್ ಜಾಲೊ, ಫುಲಾಂ ಸಿಂಪಿತ್ತ್ ಆಯ್ಲೊ, ಆಂಚೊ ಮಿನಿನ್ ಜೆಜು.  
41. ಕಾಜಾರಾಚಾ ಘರಾ, ಲೋಕ್‌ಗಿ ರಯ್ತ್, ಕೊಸೆಸ್ ಮಾಯೆ ಸಯ್ತ್, ಜೆಜುನ್ ಯೆತಾಂ ಮ್ಹಳಾಂ.  
42. ಶಿರೊತಿ ದವರುನ್, ಶಿರೊತೆರ್ ವಾಡ್ಲೆಂ ಶಿತ್, ಯಜ್ಮಾನ್ಯಾಚೆಂ ಚೀತ್, ಸಾಂ ಜುಜೆ ವಯ್ರ್.  
43. ಮಾಟವ್ ಝಾಡುನ್, ಉಡಯ್ಲಾ ಕೊಯ್ರ್, ಸಾಂ ಜುಜೆನ್ ದಿಲಾಂ ಧಯ್ರ್, ಆಮ್ಚಾ ಯಜ್ಮಾನಿಕ್(ಯಜ್ಮಾನ್ಯಾಕ್).  
44. ಬಾಂಯ್ಚಾ ಬಾಂಧಾರ್, ಬಾಂಧ್ಚೆಂ ಬಾಂಧುಂ ಗೊರುಂ, ಆರ್ಥಿನ್ ಕಾಜಾರ್ ಕರುಂ, ಆಮ್ಚೊ ಯಜ್ಮಾನಿ.  
45. ಕಾಜಾರಾಚಾ ಘರಾ, ಜುನೆಲಾಂ ಸೊಡ್ಲಿಂ ವಾರ್‍ಯಾ, ಶಿಂತಿರ್ ನಾ ಥರ್‍ಯಾ, ಆಮ್ಚಾ ಯಜ್ಮಾನ್ಯಾಚೆಂ.  
46. ಏಕ್ ಪಯ್ಸೊ ದಿಲಾ, ಸುತಾಕ್ ಆನಿ ಸುವಿಯೆಕ್, ಮಾಲ್ಘಡ್ಯೆ ಧುವೆಕ್, ಯಜ್ಮಾನಿ ಕಾಜಾರ್ ಕಾಡ್ತಾ.  
47. ಧಾ ಪಯ್ಶೆ ದಿಲ್ಯಾತ್, ಸುವಿಯೆಕ್ ಆನಿ ಸುತಾಕ್, ಮಾಲ್ಘಡ್ಯಾ ಪುತಾಕ್, ಯೆಜ್ಮಾನಿ ಕಾಜಾರ್ ಕಾಡ್ತಾ.  
48. ಪಾದ್ರಿ ಮೀಸ್ ಸಾಂಗ್ತಾ, ಜೆಜು ಮರಿಯೆ ವಯ್ರ್, ತಾಣಿಂ ದಿಲಾಂ ಧಯ್ರ್ ಆಮ್ಚಾ ಹೊಕುಲೆಕ್(ವರೆತಾಕ್).  
49. ಯಜ್ಮಾನಿ ರಾಯಾ, ಕಿತೆಂ ತುಜೆಂ ಚೀತ್, ಹಾಚಾಕ್‌ಯೀ ವರ್ತೆಂ, ಸಾಂತ್ ಆಂತೊನ್ ಬಾಪ್ ದೀತ್.  
50. ರುಪಿಯಾಚ್ಯೆ ವಾಟ್ಲ್ಯೆ, ಭಾಂಗಾರಾಚೆ ಕೆಸ್, ಮೊಗಾಚೊ ರೋಸ್, ತುಜಾ ಮಾಯ್ ಬಾಪಾಚೊ.  
51. ದೆವಾ ಬಾಪಾ ದೆವಾ ಪುತ್ರಾ, ದೆವಾ ಪವಿತ್ರ್ ಆತ್ಮ್ಯಾ, ಕುರ್ಪೆಚಾ ದಿಸಾ, ಯಜ್ಮಾನ್ ರೋಸ್ ಲಾಯ್ತಾ.  
52. ಆಪ್ರೊಸಾಚಿ ಬಸಿ, ದಾವಿಗೀ ಉಜ್ವಿ, ಪಯ್ಲೊ ರೋಸ್ ಲಾಯ್ತಾ, ಹೊಕ್ಲ್ಯೆ(ವರೆತಾ) ಆವಯ್ ತುಜಿ.  
53. ನಂಡೆನ್ ಘಾಲಾಂ ಲೊಣ್ಚೆಂ, ಜಾವ್ ಘಾಲ್ತಾ ದೊಸ್, ಆವಯ್ ಪುಸ್ತಾ ರೋಸ್, ಹೊಕ್ಲೆ(ವರೆತಾ) ನೀಟ್ ಬಸ್.  
54. ಆಪ್ರೊಸ್ ರೋಸ್, ನಿಡ್ಲಾ ವಯ್ಲ್ಯಾನ್ ಗಳಯ್ತ್, ಸರ್ಗಿಂ ಥಾವ್ನ್ ಪಳೆಯ್ತ್, ಹೊಕ್ಲ್ಯೆ(ವರೆತಾ) ಆವಯ್(ಆಜಿ) ತುಜಿ.  
55. ಹ್ಯಾವಿ ಮಾಟ್ವಾಂತ್, ಬಾಪ್ಲೆ ತುಜೆ ಮ್ಹಾಲ್, ತುಜಾ ಬಾಪಾಯ್ಚ್ಯಾ ಖಾಲ್, ಬಾಪ್ಲ್ಯೊ ರೋಸ್ ಲಾಯ್ತಾ.  
56. ಬಾಪ್ಲ್ಯೊ(ಮಾವ್ಳೊ) ರೋಸ್ ಲಾಯ್ತಾ, ಮನಾಂತ್ ಕಿತೆಂ ಚಿಂತ್ತಾ, ಬರೆಪಣ್ ಮಾಗ್ತಾಂ, ತುಜಾ ಕಾಜಾರಾಕ್.  
57. ಭಾತಾಚ್ಯೆ ರಾಶಿರ್, ಬಸೊನ್ ಆಸಾ ಕಾವ್ಳೊ, ಮುಂಡಾಸ್‌ಗಾರ್(ಉರ್ಮಾಲ್‌ಗಾರ್) ಮಾವ್ಳೊ, ಆತಾಂ ರೋಸ್ ಲಾಯ್ತಾ.  
58. ಆಮ್ಚಾ ಘರಾಂತ್, ಮಾಂಯ್ ಆಮ್ಚಿ ಮ್ಹಾಲ್, ಮಾಂಯ್ಚ್ಯೆ ಖಾಲ್, ಹಾಂವ್ ರೋಸ್ ಲಾಯ್ತಾಂ.  
59. ಹಾತಾಂತ್ ಬೂಲ್, ಚಿಮ್ಟೆಂತ್ ಪೂಡ್, ಗುಲೊಬಾಚೆಂ ಫುಲ್, ಆಮ್ಚಿ ಹೊಕಾಲ್ ಬಾಯ್.  
60. ಮೆಜ್ ಆಲ್ಮಾರ್ ಘಡ್ನ್, ಮೆಜಾರ್ ದವರ್‍ಲಿಆಲ್ಕಿ, ಸರ್ವ್ ಆಂಗಾನ್ ಸಾರ್ಕಿ, ಆಮ್ಚಿ ಹೊಕಾಲ್ ಬಾಯ್.  
61. ಮೊಣಿಯೆರ್ ಕಳೊ, ಹಾತಾಂತ್ ವಾವ್ಳಿ, ಚಂದ್ರೆಮಾಚಿ ಸಾವ್ಳಿ, ಆಮ್ಚಿ ಹೊಕಾಲ್ ಬಾಯ್.  
62. ಆಮ್ಚಾ ಘರಾ ಮುಖಾರ್, ರಸ್ಬಾಳ್ಯಾ ಕೆಳ್ಯಾಚೆಂ ಬೊಂಡ್, ರಶಿಂ ತೊಂಡ್, ಆಮ್ಚ್ಯೆ ಹೊಕುಲೆಚೆಂ.  
63. ದೊವಾ ವರ್ನಿ ಧವಿ, ಚಂದ್ರಾ ವರ್ನಿ ತಾಂಬ್ಡಿ, ಎಕಾ ನೆಕೆತ್ರಾ ಸಾಂಗ್ಡಿ, ಆಮ್ಚಿ ಹೊಕಾಲ್ ಬಾಯ್.  
64. ಗುಲೊಬಾಚ್ಯಾ ರುಕಾ, ತಾಳ್ವೆರ್ ಫುಲ್ಲಾ ಬೊಂಗೊ, ಉಜ್ವಾಡಾಚೊ ಖಾಂಬೊ, ಆಮ್ಚಿ ಹೊಕಾಲ್ ಬಾಯ್(ಆಮ್ಚೊ ವರೆತ್ ರಾಯ್).  
65. ಹಾತಾಂತ್‌ಲೊ ಲಿಂಬೊ, ಉಡವಿಲಾ ದರ್ಯೊ, ರುಪಾನ್ ದಿಸ್ತಾ ಸುರ್ಯೊ, ಆಮ್ಚಿ ಹೊಕಾಲ್ ಬಾಯ್(ಆಮ್ಚೊ ವರೆತ್ ಬಾಬ್).  
66. ಉದೆ ಉದೆ ದಿಸಾ, ಉದೆತಾನಾ ತಾಂಬ್ಡೊ, ಚಂದ್ರೆಮಾಚೊ ಆರ್ಸೊ, ಆಮ್ಚಿ ಹೊಕಾಲ್ ಬಾಯ್(ಆಮ್ಚೊ ವರೆತ್ ಬಾಬ್).  
67. ಯಜ್ಮಾನ್ ಬಾಯೆ, ಪಯ್ಲೆಂ ತುಜೆಂ ಫಳ್, ಗುಲೊಬಾಚೆಂ ಫುಲ್, ಆಮ್ಚಿ ಹೊಕಾಲ್ ಬಾಯ್.  
68. ಆದಾಳ್ಳಲೆಂ ಬೊಟ್, ಉಸಾಳ್ಳಲಿ ಕಾತ್, ಬೆಂಜಾರಾಚಿ ವಾತ್, ಆಮ್ಚಿ ಹೊಕಾಲ್ ಬಾಯ್.  
69. ರೊಸಾಚಾ ವಾನಾ, ಘಾಟ್ನೊ ಜಾಲೊ ಭೊವ್, ಆಒಗ್ ತರ್‌ಯೀ ಮೊವ್, ಆಮ್ಚ್ಯೆ ಹೊಕುಲೆಚೆಂ.  
70. ವೊಡಾಚೆಂ ಫಳ್, ಕಾವ್ಳ್ಯಾಚೆಂ ಕಜೆಂ, ಬಿರ್ಮತೆಚೆಂ ವೊಜೆಂ, ಆಮ್ಚಿ ಹೊಕಾಲ್ ಬಾಯ್.  
71. ಶೆಜಾರ್‍ಯಾ ಇಷ್ಟಾಕ್, ಆಜ್‌ಚ್ ಜಾಲಾ ಚೆರ್ಕೊ, ಆಂಗಾನ್ ಬಳ್ವಂತ್ ಸಾರ್ಕೊ, ಆಮ್ಚೊ ವರೆತ್ ಬಾಬ್.  
72. ವಾಡ್ಯಾಂತ್ಲೆ ಮಾನೆಸ್ತ್, ಆಯ್ಲ್ಯಾತ್ ಹಾಂಗಾ ಸಮೆಸ್ತ್, ಪಳೆಂವ್ಕ್ ದಿಸ್ತಾ ರುಪೆಸ್ತ್, ಆಮ್ಚೊ ವರೆತ್ ಬಾಬ್.  
73. ಆಮ್ಚಾ ಮಾಡಾರ್, ಆಸಾ ಏಕ್ ಖುಬೊ, ಘಟ್‌ಮುಟ್ ಉಭೊ, ಆಮ್ಚೊ ವರೆತ್ ಬಾಬ್.  
74. ಯಜ್ಮಾನ್ ಬಾಯೆ, ಮೊಗ್ ತುಜೊ ಗುಪಿತ್, ಆಸಾ ಕಿತ್ಲೊ ಸೊಭಿತ್, ಆಮ್ಚೊ ವರೆತ್ ಬಾಬ್.  
75. ಆಲ್ಯಾಚ್ಯೆ ವೊಳಿರ್, ಜಿರ್‍ಯಾಚೆಂ ಪಾಳ್, ಆಪುರ್ಬಾಯೆಚೆಂ ಬಾಳ್, ಆಮ್ಚೊ ವರೆತ್ ಬಾಬ್(ಆಮ್ಚಿ ಹೊಕಾಲ್ ಬಾಯ್).  
76. ಆಮ್ಚ್ಯೆ ವ್ಹಾಳ್ನೆಕ್, ಕಾಡ್ಲಿ ಕಲಯ್, ಚಂದ್ರೆಮಾಚಿ ಸೊಭಾಯ್, ಆಮ್ಚಾ ವರೆತಾಕ್(ಆಮ್ಚ್ಯೆ ಹೊಕುಲೆಕ್).  
77. ತೆಣೆಂ ಕೊಣ್ ಯೆತಾ, ತಾಂಬ್ಡ್ಯೆ ಕೊಬಾಯೆಚೊ, ಭುರ್ಗ್ಯಾ ಸೊಭಾಯೆಚೊ, ಆಮ್ಚೊ ವರೆತ್ ಬಾಬ್.  
78. ಫುಲಾ ಭಿತರ್ ಫುಲ್, ಗುಲೊಬ್ ಝಾಡಾಚೆಂ, ಕುಟಾಮ್ ವ್ಡಡಾಂಚೆಂ, ಆಮ್ಚ್ಯೆ ಹೊಕುಲೆಚೆಂ(ಆಮ್ಚ್ಯಾ ವರೆತಾಚೆಂ).  
79. ಹೆಂ ಘರ್ ಸೊಭಾನಾ ಮ್ಹಣೊನ್, ಖುರ್ಸಾಕ್ ಆಯ್ಲಾಂ ಪಾನ್, ಪಯ್ಲೊ ದಿಲಾ ಮಾನ್, ಯಜ್ಮಾನಿನ್ ದಾಯಿಜ್ಯಾಂಕ್.  
80. ಯಜ್ಮಾನಿಚ್ಯಾ ಉಂಬ್ರಾರ್, ಕಿರ್ಲಾತ್ ಘಾಲ್ಯಾತ್ ವಾಂಯ್ಗಿನಿ, ಆಪಯ್ ಯಜ್ಮಾನಿ, ತುಜಾ ದಾಯಿಜ್ಯಾಂಕ್.  
81. ಗೊಂವಾಂಚೊ ಉಂಡೊ, ತುಪಾನ್ ತಾಪಯ್ಲಾ, ಮೊಗಾನ್ ಆಪಯ್ಲಾಂ, ಯಜ್ಮಾನಿನ್ ದಾಯಿಜ್ಯಾಂಕ್.  
82. ಆದಾಳ್ಳಲೆಂ ಬೊಟ್, ಲಾಗ್‌ಲ್ಲೆಂ ಪಾಳಾ, ಭಿಯೆನಾಕಾ ಮ್ಹಣ್ತಾ, ಬಾಳಾ, ಹೊಕ್ಲೆ ಬಾಪುಯ್ ತುಜೊ.  
83. ಆಪ್ರೊಸಾಚ್ಯೆ ವಾಟ್ಲ್ಯೆ, ಮೊತಿಯಾಂಚೊ ಘೊಸ್, ಮೊಗಾಚೊ ರೋಸ್, ಹೊಕ್ಲೆ(ವರೆತಾ) ಬಾಪಾಯಿಚೊ.  
84. ಬಕ್ರ್ಯಾಚಾ ಮಾಸಾ, ರೊಸಾಚೆ ಪೊಳೆ, ಬಾಪಾಯ್ನ್ ಕೆಲ್ಲೊ ಉಪ್ಕಾರ್, ಘಾಲ್ಯಾ ಚಿಂತುನ್ ಪಳೆ.  
85. ಪಾವ್ಸ್‌ಚ್ ಯೆವ್ನ್, ಉದಾಕ್ ಜಾಲೆಂ ವ್ಹಾಳಾ, ಕಷ್ಟ್ ಪಾವ್ಲೊ ಬಾಳಾ, ಹೊಕ್ಲೆ(ವರೆತಾ) ಬಾಪುಯ್ ತುಜೊ.  
86. ಹ್ಯಾವಿ ಕಾಜಾರಾಕ್, ಕಿತೆಂ ಜಾಲಾ ನಷ್ಟ್, ಭೊವ್ ಜಾಲೆ ಕಷ್ಟ್, ಹೊಕ್ಲೆ(ವರೆತಾ) ಬಾಪಾಯ್ಕ್ ತುಜಾ).  
87. ಬಾರೀಕ್ ರೇಂವ್, ಕಾಗ್ದಾರ್ ವಾರಯ್ಲಿ, ಕಾತ್ ಝರಯ್ಲಿ, ಹೊಕ್ಲೆ(ವರೆತಾ) ಬಾಪಾಯ್ನ್ ತುಜಾ.  
88. ಪಯ್ಶಾನ್ ಜೊಡ್‌ಲ್ಲೆಂ, ರುಪಿಯಾನ್ ಪುಂಜಾಯ್ಲೆಂ, ಧುವೆಚಾ(ಪುತಾಚಾ) ಕಾಜಾರಾಕ್, ಬಾಪಾಯ್ಕ್ ಖರ್ಚೊನ್ ಗೆಲೆ.  
89. ತಳೆಂ ಸುಕ್‌ಲ್ಲೆಂ, ಸಾಳಾಕ್ ಬಾವ್ಡೆಂ ಜಾಲೆಂ, ತಳ್ಹಾತಾಚ್ಯೆ ಸಾವ್ಳ್ಯೆ, ಬಾಪಾಯ್ನ್ ವಾಡಯ್ಲೆಂ.  
90. ಆಮ್ಚೊ ಯಜ್ಮಾನಿ, ನ್ಹೆಸ್ಲಾ ಚಕ್ರಾಚೆಂ ಪುಡ್ವೆಂ, ಸುರೆ ಸೊರ್‍ಯಾಚೆಂ ಕುರ್ವೆಂ, ಹೊಕ್ಲೆ(ವರೆತಾ) ಬಾಪುಯ್ ತುಜೊ.  
91. ಆಯಿಲ್ಲ್ಯಾ ಸಯ್ರ್ಯಾಂಕ್, ಪಾಟಿಂ ಕರಿನಾಕಾ, ಸೊರೊ(ಜೆವಾಣ್) ದಿಲ್ಯಾ ಶಿವಾಯ್, ಬಾಪಾಯ್ಕ್ ಧಾಡಿನಾಕಾ.  
92. ಆಮ್ಚಾ ಘರಾ ಮುಖಾರ್, ಚಿರ್‍ಯಾಂಚೊ ದೊರೊ, ರಿಣಾಚೊ ಭರೊ, ಹೊಕ್ಲೆ ಬಾಪಾಯ್ಕ್ ತುಜಾ.  
93. ಇತ್ಲೆಂ ಸಗ್ಳೆಂ ಆಸೊನ್ ಹೊಕ್ಲೆ, ಆತಾಂ ಕಿತೆಂ ಉಣೆಂ, ಬಾಪುಯ್ ನಾತ್‌ಲ್ಲೆಂ ತುಜೆಂ ದುಬ್ಳೆಂ ಜಿಣೆಂ.  
94. ಬಾಪಯ್ ನಾ ಮ್ಹಣ್ ಹೊಕ್ಲೆ, ನಾಕಾ ಕರುಂಕ್ ಚಿಂತ್ತಾ, ಫುಲಾ ಸಾಂಗ್ಡೊ ಮಾನ್, ತುಕಾ ಭಾವ್ ದಿತಾ.  
95. ಯಜ್ಮಾನ್ಯಾಚಾ ಘರಾ ಮುಖಾರ್, ಆಸಾ ಪಾಗೊರ್, ವ್ಹಡ್ ಆಸಾ ಆಧಾರ್, ಹೊಕ್ಲೆ ಬಾಪಾಯಿಚೊ.  
96. ಪಾಂಯಾಕ್ ಘಾಲಿನಾ ವ್ಹಾಣ್, ಪೊಟಾಕ್ ಖೆಲೆಂನಾ ಅನ್, ಅಶೆಂ ಕೆಲೆಂ ಧನ್, ಹೊಕ್ಲೆ ಬಾಪಾಯ್ನ್ ತುಜಾ.  
97. ಸಕಾಳಿಂ ಕಾಡ್ಲೆಂ ದೂದ್, ಸಾಂಜೆರ್ ಜಾಲೆಂ ಧಂಯ್, ಸಕ್ಕಡ್ ಲೋಕ್ ಆಸಾ, ಹೊಕ್ಲೆ(ವರೆತಾ) ಬಾಪುಯ್ ಖಂಯ್?  
98. ಸರ್ಗಿಂಚಾ ಬಾಂಯ್ಕ್, ಭಾಂಗಾರಾಚೆಂ ಧಾಪ್ಣೆಂ, ವೆಗ್ಗಿಂ ಆಯ್ಲೆಂ ಆಪವ್ಣೆಂ, ಹೊಕ್ಲೆ ಬಾಪಾಯ್ಕ್ ತುಜಾ.  
99. ಸರ್ಗಾರ್ ಆಸ್‌ಲ್ಲ್ಯಾ ಬಾಪಾಯ್ಕ್, ಕಸ್ಲಿ ತುಕಾ ತಾನ್, ಪೂತ್ ದೀತ್ ದಾನ್, ತುಕಾ ಒಫಿಸ್ ಮೀಸ್.  
100. ಧಾಂವ್ತೊ ಘೊಡೊ, ಬಾಂಧಿವಿಲಾ ಪಾಳಾ, ಭಿಯೆನಾಕಾ ಬಾಳಾ, ತುಕಾ ದೇವ್ ಆಸಾ.  
101. ಆದಾಳ್ಳಲೆಂ ಬೊಟ್, ಲಾಗ್‌ಲ್ಲೆಂ ಪಾಳಾ, ಭಿಯೆನಾಕಾ ಮ್ಹಣ್ತಾ ಬಾಳಾ, ಹೊಕ್ಲ್ಯೆ ಆವಯ್ ತುಜಿ.  
102. ವರ್ಸಾಂ ಭರ್ಲಿಂ ಮ್ಹಣೊನ್, ಬಾಪುಯ್ ಕಾಡ್ತಾ ಕಾಜಾರ್, ಪಾಟಿಂ ನಾ ಆಧಾರ್, ಹೊಕ್ಲ್ಯೆ ಆವಯ್ಕ್ ತುಜಾ.  
103. ರಸ್ಯಾಚಾ ರಾಂದ್ನಿ, ಕಟ್ಟ್ಯಾಂಚೊ ಫೊಗ್, ವಿಸ್ರನಾಕಾ ಮೋಗ್, ಹೊಕ್ಲ್ಯೆ(ವರೆತಾ) ಆವಯ್‌ಚೊ.  
104. ರಸ್ಯಾಚಾ ರಾಂದ್ನಿ, ಲಾಯ್ಲಿಂ ಶಿರ್ಪುಟಾಂ, ವಯ್ರ್ ಪಡ್ಲಿಂ ಹಾಡ್ಕುಟಾಂ, ಹೊಕ್ಲ್ಯೆ(ವರೆತಾ) ಆವಯಿಚಿಂ.  
105. ಬಾಪಾಯ್ನ್ ವಾಡಯ್ಲಾಂ, ಕಾಣಿಗೀ ಕೇಸಿಂ, ಆವಯ್ನ್ ವಾಡಯ್ಲಾಂ, ತುಕಾ ಉಂಡಿಯಾಂ ಘಾಸಿಂ.  
106. ಸಕಾಳಿಂ ಉಠೊನ್, ಘೊಡ್ಯಾಕ್ ಕೆಲೆಂ ಮಾಲಿಸ್, ಆವಯ್ ಬಾಪಾಯ್ಚೆಂ ಕಾಳಿಜ್, ಆಮ್ಚಿ ಹೊಕಾಲ್ ಬಾಯ್.  
107. ಆಮ್ಚಾ ಘರಾ ಮುಖಾರ್, ಕೆಂಳ್ಬ್ಯಾನ್ ಘಾಲಾ ಮೊಕೊ, ಧುವೆಕ್ ಕಾಜಾರ್ ಮ್ಹಣುನ್, ಆವಯ್ಕ್ ಲಾಗ್ಲಾ ಧಖೊ.  
108. ಸಕಾಳಿಂ ಉಠೊನ್, ಆಂಬ್ಯಾ ಮುಳಾಂತ್ ವಿಂಚ್, ಬಿರ್ಮೊತ್ ಚೀಂತ್, ತುಜ್ಯೆ ಆವಯಿಚಿ.  
109. ಭಿತರ್ ಘಾಲ್ಲಿ ಮಾಂದ್ರಿ, ಭಾಯ್ರ್ ವೊಡಿನಾಕಾ, ಕಾಜಾರ್ ಜಾಲೊಂ ಮ್ಹಣ್, ಆವಯ್ಕ್ ಸೊಡಿನಾಕಾ.  
110. ಹೊಕ್ಲೆಗೆ ಬಾಯೆ, ಗಳ್ಯಾಂತ್ ತುಜಾ ಬೆಂತಿಣ್, ಆವಯ್ ಭರ್‍ಲ್ಯಾ ಖಂತಿನ್, ಧುವೆಕ್ ಕಾಜಾರ್ ಮ್ಹಣ್.  
111. ಮೆಜ್ ಆಲ್ಮಾರ್ ಕರುನ್, ಮೆಜಾರ್ ದವರ್‍ಲಾ ಗಲಾಸ್, ಸರ್ಗಾರ್ ಜಾಲಾ ಉಲ್ಲಾಸ್, ತುಜ್ಯೆ ಆವಯಿಕ್(ಆಜಿಯೆಕ್).  
112. ಸರ್ಗಿಂಚ್ಯಾ ಬಾಂಯ್ಕ್, ಆಡ್ ಘಾಲಾ ರೂಕ್, ಏಕ್ ಗಳಯ್ ದೂಖ್, ಹೊಕ್ಲ್ಯೆ ಆವಯ್ಕ್(ಆಜಿಯೆಕ್) ತುಜಾ.  
113. ಚೊವ್ಗ್ ಜಣ್ ಭಾವ್ ಹೊಕ್ಲೆ,ಕಪಾಲಾಚೆ ತಿಳೆ, ಕುಳಾರಾಚ್ಯೆ ವಾಟೆ, ಫಾಲ್ಯಾ ಜಳಯ್ ದಿವೆ.  
114. ವ್ಹಡ್ಲೊ ಭಾವ್ ದಿವೊ ಹೊಕ್ಲೆ, ಧಾಕ್ಟೊ ಭಾವ್ ಥಾಟ್,ತ್ಯಾ ದಿವ್ಯಾಂತ್ಲಿ ವಾತ್, ಆಮ್ಚಿ ಹೊಕಾಲ್ ಬಾಯ್.  
115. ಗೊಟ್ಯಾಂತ್ಲಿಂ ಗೊರ್‍ವಾಂ, ಆಂಬುಡ್ಲಿಂ ರಾನಾ, ಭಾವ್ ಯೆನಾ ಫುಡೆಂ(ಆಯಿಲ್ಲೊಚ್), ಚೆಂಬು ಬುಡಯ್ ರಾಂದ್ನಾ.  
116. ಆಯಿಲ್ಲ್ಯಾ ಸಯ್ರ್ಯಾಂಕ್, ಪಾಟಿಂ ಕರಿನಾಕಾ, ಜೆವಾಣ್ ಕೆಲ್ಯಾ ಶಿವಾಯ್ ಭಾವಾಂಕ್ ಧಾಡಿನಾಕಾ.  
117. ಆಂಕ್ವಾರ್ ಚೆಡ್ವಾಚ್ಯೆ ಬಾಜ್ವ್ಯೆಕ್, ಲಾಯ್ಲ್ಯಾ ಆಲ್ಪಿನ್, ಭಾವಾಂಚಿ ರಾಂದ್ಪಿಣ್, ಆಮ್ಚಿ ಹೊಕಾಲ್ ಬಾಯ್.  
118. ಮಾಂದ್ರಿ ಕೊವ್ಳುನ್, ಮಾಂದ್ರೆಚೊ ಕೆಲೊ ಕೊವ್ಳೊ, ಮಾನಾಚೊ ವ್ಹೊವ್ಳೊ, ಭಾವ್ ಪರ್ಗಾಂವಾಂತ್ ಉರ್‍ಲೊ.  
119. ಬಕ್ರ್ಯಾಚಾ ಮಾಸಾಂತ್ಲೆಂ, ವಿಂಚುನ್ ಕಾಡ್ ಹಾಡ್, ಭಾವ್ ಯೆನಾ ಜಾಲ್ಯಾರ್, ಫೊಟೊ ಕಾಡ್ನ್ ಧಾಡ್.  
120. ದಾಮಾಸ್ಕಾಚ್ಯೆ ಸತ್ರೆಕ್, ಭಾಂಗಾರಾಚ್ಯೊ ಗಳ್ಯೊ, ಸತ್ರೆಥಳಾ ರಾಣಿಯೊ, ವರೆತಾ ಭಯ್ಣಿ ತುಜ್ಯೊ.  
121. ಮಾಡಾಚಿ ಚುಡೆತಿ, ಕಾನಾಚಿ ಕೊವ್ಳಿ, ಮಾನಾಚಿ ವ್ಹೊವ್ಳಿ, ಭಯ್ಣ್ ಪರ್ಗಾಂವಾಂತ್ ಉರ್‍ಲಿ.  
122. ಮೂಟ್‌ಭರ್ ಕೆಸ್, ಪಾಟ್‌ಭರ್ ಪಾಣಿ, ಖಂಯ್ ವೆತಾಯ್ ಭಯ್ಣಿ, ಆಮ್ಚ್ಯೆ ಸಂಗಾತಿಣ್.  
123. ಜಿಲ್ಲಿಕ್ ಕಾಜಾರ್ ಮ್ಹಣೊನ್, ವಿಲ್ಲಿ ಜಾಲೊ ರಾಗಾರ್, ಫುಡೆಂ ಕರ್‍ಯಾಂ ಕಾಜಾರ್, ಬೆಂಡಾ ತೊಂಬೊರಾನ್.  
124. ಹ್ಯಾ ಮಾಟ್ವಾಕ್, ವಾಂಕ್ಡಿ ತಿಂಕ್ಡಿ ಕಾಂಬ್, ಜೀಭ್ ಆಸಾ ಲಾಂಬ್, ತುಜಾ ಭಯ್ಣಿಂಚಿ.  
125. ಯಜ್ಮಾನ್ ಬಾಯೆ, ಕಿತ್ಯಾಕ್‌ಗೆ ವೊಗಿ, ಆಪಯ್ಗೆ ಘುಗಿ, ತುಜಾ ದಾಯ್ಜ್ಯಾಂಕ್.  
126. ಆಯಿಲ್ಲ್ಯಾ ಸಯ್ರ್ಯಾಂಕ್, ಬರೆ ಮ್ಹಣೊನ್ ಹೊಗಳ್, ಸೆಜಾರಿ ಮೊಗಾಳ್, ತುಜಾ ಗುಣಾಖಾಲ್.   
127. ಆಮ್ಚಾ ಘರಾ ವಯ್ಲ್ಯಾನ್, ಉಬೊನ್ ಗೆಲಿ ಘೊಣ್, ಮೆಳೊಂಕ್ ನಾ ದೋಣ್, ಯಜ್ಮಾನ್ಯಾಚಾ ದಾಯ್ಜ್ಯಾಂಕ್.   
128. ಪುತ್ತೂರ್‍ಚ್ಯೆ ಪೆಂಟೆಂತ್, ವಿಕುಂಕ್ ಘಾಲಾಂ ಜಿರೆಂ, ಸಗ್ಳೆಂ ಆಯ್ಲ್ಯಾಂ ಭಿರೆಂ, ವರೆತಾ ಕುಟಾಂಬ್ ತುಜೆಂ.  
129. ಕಾಜಾರಾಚಾ ಘರಾ, ಬೊತ್ಲಿ ಧಾಡ್ಲ್ಯಾತ್ ಸೊರ್‍ಯಾ, ದೊಗಾಂ ಚೊವ್ಗಾಂ ಮೆಳೊನ್, ತಾಂಚೆಂ ಕಾರ್ಯೆಂ ಕರ್‍ಯಾಂ.  
130. ಕಾಜಾರ್ ಕಾಜಾರ್‍ಯಾಂಕ್, ಮುದಿ ಆಂವ್ಕಾರ್‍ಯಾಂಕ್, ಆಶಿ ಅರ್ಥ್ ಆಸ್ಲಿ, ಆಮ್ಕಾಂ ಸೆಜಾರ್‍ಯಾಂಕ್.  
131. ಮಿಲಾವಾಚಾ ಕೊಯ್ತುಲಾಕ್, ಚಿಂಚೆಚೆಂ ಥೊರುಂ, ಸಯ್ರಿಕ್ ಕೆಲ್ಲ್ಯಾ ಮ್ಹಾಲ್ಯಾಕ್, ದೇವ್ ಬರೆಂ ಕರುಂ.  
132. ಯಜ್ಮಾನಿಚಾ ಹಾತಾಂತ್, ಭಾಂಗಾರಾಚೊ ಚುಡೊ, ಸಗ್ಳೊ ಭರ್‍ಲಾ ವಾಡೊ, ಹ್ಯಾ ಮಾಟ್ವಾಂತ್.  
133. ವ್ಹಾಣೆಚೊ ಪಾಂಯ್, ಪಾಜೆರ್ ನಿಸರ್‍ಲೊ, ದಾಯ್ಜ್ಯಾಂಕ್ ಆಪಂವ್ಕ್, ಯಜ್ಮಾನಿ ವಿಸರ್‍ಲೊ.  
134. ರಾನಾಂತ್ಲೆಂ ಚಿತಾಳ್, ರಾನಾಂತ್ ಭೊಂವಾತ್, ಮನಾಂತ್ ರಡಾತ್, ಆಮ್ಚಿ ಹೊಕಾಲ್ ಬಾಯ್.  
135. ಹೊಕಾಲ್ ಆಮ್ಚಿ ಬಾಯ್, ಮಿರಿಂ ಧಾಡಾಯ್ತಾಲಿ, ಕಾಜಾರ್ ಜಾಯ್ನಾಂ ಮ್ಹಣೊನ್, ಆಮ್ಕಾಂ ಹೆಡಾಯ್ತಾಲಿ.  
136. ಆಕಾಶಿಂ ತಾಳ್ವೆಂ, ಫುಲ್ಲೆಂ ವೊವಾಳ್, ಮನ್ ಮೊವಾಳ್, ಆಮ್ಚ್ಯೆ ಹೊಕುಲೆಚೆಂ.  
137. ಸಕಾಳಿಂ ಆಯಿಲ್ಲೆಂ ವ್ಹೊರಾಣ್, ಸಾಂಜೆರ್ ರಾವ್ತಲೆಂ, ಉಲ್ಯಾ ಸಬ್ದಾಕ್ ಪಾವ್ತಲೆಂ, ಆಮ್ಚಿ ಹೊಕಾಲ್ ಬಾಯ್.  
138. ಸಕ್ಕಡ್ ಕಾಮ್ ಕರ್‍ನ್, ಮಾಗಿರ್ ಚಿಕ್ಕೆ ಬಸ್, ಮಾಂಯ್ ಮಾಂವಾಲಾಗಿಂ ವಿಚಾರ್ನ್, ಕುಳಾರಾ ಯೇವ್ನ್ ವಚ್.  
139. ಗಾಗಾ ಮ್ಹಳ್ಯಾರ್, ಗಾಜಂವ್ ಕಿತೆಂ ಹಾಂವ್, ಸಾಂಗ್ಯಾತ್ ಮ್ಹಜೆಂ ನಾಂವ್, ಭರ್‍ಶಾತ್ ಸಗ್ಳೊ ಗಾಂವ್.  
140. ಆಮ್ಚಾ ಹಿತ್ಲಾಂತ್ಲ್ಯಾನ್, ಉಡೊನ್ ಗೆಲೊ ಸೊಸೊ, ಉತ್ರಾಂ ಫುಡೆಂ ಹಾಸೊ, ಆಮ್ಚ್ಯೆ ಹೊಕುಲೆಕ್.  
141. ಕಂರ್ಬಾಳ್ಯಾಚೆಂ ಪಾಳ್, ಧಾವೆ-ಧಾವಿಂ, ಹೊಕ್ಲೆಚೆಂ ಗೋತ್ರ್ ಆಸಾ, ಗಾಂವಾನ್ ಗಾಂವಿಂ.  
142. ಕಾಜಾರ್ ಜಾಲೊಯ್ ಮ್ಹಣ್ ವರೆತಾ, ವ್ಹಡ್‌ಚ್ ಜಾಯ್ನಾಕಾ, ಕುಟ್ಮಾಕ್ ಸಾಂಡುನ್, ಫಾಲ್ಯಾ ಚಲಾನಾಕಾ.  
143. ಮೂಗ್‌ಚ್ ಫೊಡ್ನ್, ಮುಗಾಚಿ ಕೆಲಿ ದಾಳ್, ಕುಟ್ಮಾಕ್ ಮೊಗಾಳ್, ಆಮ್ಚೊ ವರೆತ್ ಬಾಬ್,  
144. ಗೊಂಯ್ಚೊ ಗೊಂಯ್ಕಾರ್, ಭುಂಯ್ಚೊ ಭುಂಯ್ಕಾರ್, ದುಬಾಯ್ಚೊ ಸಾವ್ಕಾರ್, ಆಮ್ಚೊ ವರೆತ್ ಬಾಬ್.  
145. ವೀಸ್ ವರ್ಸಾಂ ಭರ್‍ಲಿಂ, ವರೆತಾ ತುಜಾ ಆಂಗಿಂ, ಆಜ್ ಜಾಲಿ ಖುಶಿ, ತುಕಾ ಕಾಜಾರಾಚಿ.  
146. ವೊರ್ನಾಚಾ ಮಾಂಡ್ಯಾಕ್, ಧಾಂಪ್ಲೊ ಬಾವಾಡೊ, ಲಾಗಿಂ ಮಾಂವಾಡೊ, ಸದಾಂ ವಚನಾಕಾ.  
147. ಆಮ್ಚಾ ಹಿತ್ಲಾಂತ್, ವಾಂಕ್ಡಿ-ತಿಂಕ್ಡಿ ವಾಟ್, ಉಜ್ವೊ ದಿ ಹಾತ್, ಫಾಲ್ಯಾ ರೆಸ್ಪೆರಾಕ್.  
148. ಇಗರ್ಜೆಚಾ ವೊಡ್ತಾಂತ್, ಫುಲ್ಲಿ ತಿ ದಾಂವ್, ವಿಗಾರ್ ವಿಚಾರಿತ್ ನಾಂವ್, ತುಜೆಂ ಕಿತೆಂ ಮ್ಹಣ್.  
149. ಕಾಜಾರಾಚಾ ಘರಾ, ಶಿತ್ ಕಾಡುಂಕ್ ಕಾಂಟಿ, ಮಿರಣ್ ಮಾರಿತ್ ಘಾಂಟಿ, ತುಜಾ ರೆಸ್ಪೆರಾಕ್.  
150. ಬಾಪಾಯ್ನ್ ಬಾಂದ್ಲೆಂ ಘರ್, ಆಚಾರ್‍ಯಾನ್ ಘಡ್ಲೆಂ ದಾರ್, ಸಂಕ್ಟಾಂಕ್ ಬರೆಂ ಮಾಗೊನ್, ಫಾಲ್ಯಾಂ ಭಾಯ್ರ್ ಸರ್.  
151. ವರ್ಲಾಚಾ ಪೊಂತಾ, ಬಾಂದ್ಲ್ಯಾ ಏಕ್ ರುವಿ, ಮಾಣ್ಕುಲಿ ವೊವಿ, ಮ್ಹಜಿ ಹೊಗ್ಡಾಯಿಲಿ.  
152. ಕೊಡ್ಯಾಳ್ ಥಾವ್ನ್ ಆಯ್ಲಿಂ, ಉಡುಪಿ ಯೇವ್ನ್ ಪಾವ್ಲಿಂ, ಯಜ್ಮಾನಿಚಾ ಆಪವ್ಣ್ಯಾಕ್, ಹಾಂಗಾ ಯೆವ್ನ್ ಪಾವ್ಲಿಂ.  
153. ಮಾಣಿರ್ ಸೊಡ್ಲೆ ಕೆಸ್, ಕೆಸಾಂಕ್ ಮಾಳ್ಳಿಂ ಫುಲಾಂ, ಯಜ್ಮಾನಿನ್ ಉತಾರ್ ದಿಲಾಂ, ಗಮ್ಮತ್ ಕರ್‍ತಾಂ ಮ್ಹಳಾಂ.  
154. ಪಾವ್ಸ್‌ಚ್ ಆಯ್ಲೊ, ಇತ್ಲೊಗೀ ತಿತ್ಲೊ, ಉಂದಿರ್ ಮುತ್ಲೊ, ವ್ಹೊವ್ಳ್ಯಾಂಚಾ ಮಾತ್ಯಾ ವಯ್ರ್.  
155. ರೊಸಾಚ್ಯೆ ವಾಟ್ಲ್ಯೆ, ಸಾಕ್ರಿಚೆಂ ಮೆಲ್, ಉಂದಿರ್ ಮುತ್ಲೊ ನ್ಹಯ್, ಯಜ್ಮಾನೆನ್ ಘಾಲೆಂ ತೆಲ್.  
156. ಸೊಪ್ಯಾರ್ ಘಾಲ್ಲಿಂ ಪಾನಾಂ, ಹಾತಾಂತ್ ಧರುಂಕ್ ಯೆನಾ, ಏಕ್‌ಯೀ ವೊವಿ ನೆಣಾ, ಆಮ್ಚಿ ಯಜ್ಮಾನ್.  
157. ಆಮ್ಚಾ ಗಾದ್ಯಾಂತ್, ಭಾತ್ ಬರೇಂ ಪಿಕ್ತಾ, ಮಾಯ್‌ಭಾಸ್ ಸೈಟ್ ಪಳೆವ್ನ್, ಯಜ್ಮಾನ್ ವೊವಿಯೊ ಶಿಕ್ತಾ.  
158. ಹೊಕ್ಲೆಚಿ ಭಯ್ಣ್, ನಾಂವ್ ಕಿತೆಂ ಮಾಡ್ತಿನ್, ಯಜ್ಮಾನಿಚ್ಯೆ ಪಾಡ್ತಿನ್, ಹಾಂವ್ ವೊರಿಯೊ ಮ್ಹಣ್ತಾಂ.  
159. ಧಾಂವ್ತೊ ಘೊಡೊ, ಬಿದಿರ್ ಉಬೊ ಕೆಲೊ, ಧೆಡ್ಯಾಂಕ್ ಸೊಧಿತ್ತ್ ಗೆಲೊ, ವರೆತ್ ಇಸ್ಕೊಲಾಕ್.  
160. ವರೆತಾ ಬಾಬಾ, ಹಾತ್ ತುಜೆ ಗೊರೆ, ಧೆಡೆ ಸೊದ್ ಬರೆ, ತುಕಾ ಸಾಂಗಾತಾಕ್.  
161. ವರೆತಾ ಬಾಬಾ, ಪಾಂಯ್ ತುಜೆ ವೊಳ್ತಿತ್, ಕುಟ್ಮಾ ಭಿತರ್, ತುಕಾ ಧೆಡೆ ಮೆಳ್ತಿತ್.  
162. ವರೆತಾ ಬಾಬಾ, ದೊಡ್ತೆ ಕೆಲ್ಯಾತ್ ಘೊಡೆ, ಬಾರಾ ಕಾಣ್ಘೆ ಧೆಡೆ, ತುಜ್ಯೆ ಪ್ರಾಯೆಚೆ.  
163. ಕಾನಾಂಕ್ ಲಾಯ್ಲೆಂ ವೊಕ್ಲ್, ದೊಳ್ಯಾಂಕ್ ಆಯ್ಲಿ ದೀಷ್ಟ್, ಸಮೆಸ್ತಾಂಚೊ ಈಷ್ಟ್, ಆಮ್ಚೊ ವರೆತ್ ಬಾಬ್.  
164. ಆಯಿಲ್ಲೆಂ ತಾರುಂ, ಆದಾಳ್ಳೆಂ ಚಿಕ್ಲಾ, ಹಾತ್ ದಿವ್ನ್ ಉಕ್ಲಾ, ಆಮ್ಚಾ ವರೆತಾಕ್.  
165. ವರೆತಾ ಬಾಬಾ, ಮಾತ್ಯಾರ್ ತುಜಾ ಚೆಪೆಂ, ಬಾರಾ ಭಕ್ತಾಂ ಮಧೆಂ, ಫಾಲ್ಯಾಂ ರೆಸ್ಪೆರ್ ತುಜೆಂ.  
166. ಆಮ್ಸಾಣ್ ಮಿರ್ಸಾಂಗ್, ವಾಟುಂಕ್ ವಾನ್, ದೊಡೊ ದೀ ಮಾನ್, ವರೆತಾ ಮಿವ್ಣ್ಯಾಂಕ್ ತುಜಾ.  
167. ರೊಸಾಕ್ ನಾ ನಾರ್ಲ್ ಮ್ಹಣ್, ಯಜ್ಮಾನಿ ಚಡ್ಲೊ ಮಾಡಾರ್, ಧರ್‍ಲೆಂ ತಾಚಾ ಖಾಡಾಂಕ್ , ಕಾಯಿಂ ಹುಂಬ್ಲ್ಯಾಂನಿ.  
168. ಕಾಂಡಿ ಬೊಂಡಿ ಖಾವ್ನ್, ತಾಳ್ಯಾಂತ್ ಯೆತಾ ಕಣ್ಕಣೆಂ, ಮಾಂವಾಡ್ಯಾಚೆಂ ಆಣ್ಕಾಣೆಂ, ವರೆತಾ ಆಯ್ಕಾನಾಕಾ.  
169. ಹಾಡಾಕ್ ಮಾರೊಂಕ್ ಕೊಯ್ತೊ, ಮಾಸಾಕ್ ಘಾಲುಂಕ್ ಶಿರ್ಕೊ, ಮುಖಾರಿಂ ಜಾಂವ್ ಚೆರ್ಕೊ, ಆಮ್ಚಾ ವರೆತಾಕ್.  
170. ರುಜಾಯ್ ಮಾರ್‍ಲಿ ಘಾಂಟ್, ಮಿಲಾರ್ ಜಾಲೆಂ ಠಾಂವ್, ಚೆರ್ಕೊ ಜಾಲ್ಯಾರ್ ಜಾಂವ್, ಫಿಲ್ಯಾದ್ ಜೊಡ್ತಾಂ ಹಾಂವ್.  
171. ಸಳ್‌ದಾಳಿಚೆಂ, ವೊರ್ನ್ ಮುಗಾಚೆಂ, ಯಜ್ಮಾನ್ ಜೆವಾಣ್ ಕರ್‍ತಾ, ಅಮೃತಾಚೆಂ.  
172. ಸಕಾಳಿಂ ಉಠೊನ್, ತೊಂಡ್ ಧು ಝರಿ, ಮಿಲಾರ್‍ಚೊ ವಿಗಾರ್, ತುಜೆಂ ರೆಸ್ಪೆರ್ ಕರಿಂ.  
173. ಸೊಭಾಗಿಣಿ ಮಾಯೆ, ಯೆಗೆ ತುಂ ವೆಗ್ಗಿಂ, ಕಾಜಾರ್ ಆಯ್ಲೆಂ ಲಾಗಿಂ, ತುಜಾ ಫಿಲ್ಯಾದಾಕ್.  
174. ಸಕಾಳಿಂ ಉಠೊನ್, ಸಾರೊಣ್ ಘಾಲ್ಯಾ ಉಂಬ್ರಿಂ, ದೀಷ್ಟ್ ಘಾಲ್ ದೊಂಗ್ರಿಂ, ತುಜಾ ಕುಳಾರಿಂಕ್.  
175. ಸಕಾಳಿಂ ಉಠೊನ್, ಕೆಸ್ ವೊಳಾಯ್ತಾಲೆಂ, ವಾಟ್ ಪಳಯ್ತಾಲೆಂ, ಆಮ್ಚಿ ಹೊಕಲ್ ಬಾಯ್.  
176. ಹ್ಯಾ ಕಾಜಾರಾಕ್, ಬ್ಯಾಂಡ್ ತೊಂಬೊರ್, ವಿಸ್ರನಾಕಾ ಹುಂಬೊರ್, ತುಜ್ಯೆ ಕುಳಾರಿಂಚೊ.  
177. ಉದಾಕ್ ತಾಪವ್ನ್, ಜಾಲೆಂ ಖರ್ ಕಿಲೊ, ಸಿಕೇರಿಗೆಲೊ ಚಲೊ, ಆತಾಂ ನ್ಹಾಂವ್ಕ್ ವೆತಾ.  
178. ತಾಂಬ್ಯಾಚ್ಯೆ ಭಾಣಿಂ, ಉದಾಕ್ ತಾಪಯ್ಲಾಂ, ನ್ಹಾಂವ್ಕ್ ಆಪಯ್ಲಾಂ, ಆಮ್ಚಾ ವರೆತಾಕ್(ಹೊಕುಲೆಕ್).  
179. ದರ್ಯಾಚಾ ಲ್ಹಾರಾ, ಸತ್ರಿ ಫುಲಯ್ ಮೋರಾ, ನ್ಹಾಂವ್ಕ್ ಆಪವ್ನ್ ವ್ಹರಾ, ಆಮ್ಚಾ ವರೆತಾಕ್(ಹೊಕುಲೆಕ್).  
180. ವೊವಿಯೊ ಮ್ಹಳ್ಳಿಂ ವ್ಹೊವ್ಳಿಂ, ಹೊಕ್ಲೆಕ್ ನ್ಹಾಣಂವ್ಕ್ ವಚಾ, ಹೆರಾಂ ಜೆವ್ಣಾಕ್ ಬಸಾ, ರಾತ್ ಮಧ್ಯಾನ್ ಜಾತಾ.

Tags:  konkani culture, Konkani, Mangalore, Mangalorean, Mother Tongue

Connect

Maibhaas

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE