:: ಮಾಯ್ ಭಾಸ್ - MAIBHAAS.COM - A Konkani Web Portal Never Ever Before::

1.ಆರ್ಕ್ ವಿಯೊಲ್ ದೆರಾಂತ್ ಆನಿ ರೆಬೆಕ್ ಕಂತಾರ್ ಸಾಲಾಂತ್, ಆನಿ ಉಜ್ವಾಡ್ ಫಾಂಕ್ಲಾ, ಘರಾಂತ್ ದೊಗಾಂಯ್ ಆಂಕ್ವಾರ್‍ಯಾಂಚೊ.

2.ಭಾಯ್ಲ್ಯಾನ್ ಆಯ್ಲಾ ವ್ಹೊರ್ ಆನಿ ದರ್ಣಿಕ್ ಜಾಲಾ ಭಾರ್, ಆನಿ ಪಯ್ಲೊ ನಮಸ್ಕಾರ್, ತುಕಾ ಸರ್ಗಿಂಚಾ ದೆವಾ ಬಾಪಾ.

3.ದುಸ್ರಿ ಆಮ್ಚಾ ಬಾಪಾ ಆನಿ ತಿಸ್ರಿ ನಮಾನ್ ಮರಿ, ಆನಿ ಬೆಸಾಂವ್ ದಿಂವ್ಕ್ ಯೆತಾ ಸರ್ಗಿಂಚೆ ವಿರ್ಜಾ ಮರಿ.

4.ಆಯ್ಲೊ ದೇವ್ ಬಾಪ್ ಆನಿ ನ್ಹೆಸ್ಲೊ ಸುವರ್ಣ್ ಕಾಪ್, ಬೆಸಾಂವ್ ದೀಂವ್ಕ್, ಯೆತಾ ಸರ್ಗಿಂಚೊ ದೇವ್ ಬಾಪ್.

5.ಭಾಯ್ಲ್ಯಾನ್ ಆಯ್ಲೊ ವ್ಹೊರ್ ಆನಿ ಯಜ್ಮಾನ್ ಜಾಲ್ಯಾ ಖುಶಿ, ಆನಿ ಮುಖಾರ್ ದಾಡ್ಲ್ಯಾ, ಬಶಿ ಸಾಂಪ್ಯಾಂ ದುಂಪ್ಯಾಲಾಂಚಿ.

6.ಘರ್‍ಚೆಗೆ ಘರ್‍ಕಾರ್‍ನಿ ಆನಿ ಭಾಯ್ರ್ ಯೆವ್ನ್ ಪಳೆ, ಆನಿ ಪೂತ್ ಸುನ್, ಆಯ್ಲ್ಯಾಂತ್ ತುಜೆ ದೊನಿ ದೊಳೆ.

7.ಭಾಯ್ಲ್ಯಾನ್ ಆಯ್ಲೆಂ ತಾರುಂ ಆನಿ ತಾರ್ವಾರ್ ಆಯ್ಲಿಂ ಬುಲಾಂ, ಆಂಜಾ ನಿಂವಿಂ, ಫುಲಾಂ ವ್ಹೊರಾಕ್ ಉಡಯಿಲಿಂ.

8.ಭಾಯ್ಲ್ಯಾನ್ ಆಯ್ಲೊ ವ್ಹೊರ್ ಆನಿ ಪಳೆಂವ್ಕ್ ಆಯ್ಲೆ ಚಲೆ, ಆನಿ ಆಂಜಾಂನಿವಿಂ, ಕಳೆ ವ್ಹೊರಾಕ್ ಉಡಯಿಲೆ.

9.ಪಯ್ಸ್ ತಾವ್ನ್ ಆಯ್ಲ್ಯಾಂವ್ ಆನಿ ಹಾಂಗಾ ಯೆವ್ನ್ ಪಾವ್ಲ್ಯಾಂವ್, ಆನಿ ಆತಾಂ ದಿಯಾ, ಲಾಂಪ್ಯಾಂವ್ ಆಮ್ಚಾ ವ್ಹೊರಾಣಾಕ್.

10.ವ್ಹೊರ್ ಯೆಂವ್ಚ್ಯೆ ವಾಟೆ ಆನಿ ಆಸ್‌ಲ್ಲೊ ಆಮ್ಕಾಂ ಸಾಂಕವ್, ಆನಿ ತಸೊ ಜಾಲೊ, ತಡವ್ ಆಮ್ಚಾ ವ್ಹೊರಾಣಾಕ್.

11.ವ್ಹೊರ್ ಯೆಂವ್ಚೆ ವಾಟೆ ಆನಿ ಆಸ್ಲೊ ಏಕ್ ಖೆಳ್, ಆನಿ ತಸೊ ಜಾಲೊ, ವೇಳ್ ಆಮ್ಚಾ ವ್ಹೊರಾಣಾಕ್.

12.ಭಾಯ್ಲ್ಯಾನ್ ಆಯ್ಲೊ ವ್ಹೊರ್ ಆನಿ ಪಾಂಯ್ ಆಮ್ಚೆ ವೊಳ್ಳೆ, ಆನಿ ಆತಾಂ ಸೊಡಯಾ, ಕೊವ್ಳೆ ತುಮ್ಚಾ ಮಾಂದ್ರ್ಯಾಂಚೆ.

13.ವ್ಹೊರ್ ಪಾವ್ಲಾ ಆದ್ರಾರ್ ಆನಿ ಘಾಂಟಿ ಜಾಲ್ಯೊ ಚಬ್ಕಾರ್, ವ್ಹಡ್ ಮಾಗ್ತಾ, ಉಪ್ಕಾರ್ ವ್ಹೊರಾಣ್ ಭಿತರ್ ಸರೊಂಕ್.

14.ವಿವಾ ವಿವಾ ವಿವಾ ಆನಿ ವಿವಾ ಸಾಂತ್ ಆಂತೊನಿ, ಆನಿ ತುಜಿ ಆಲ್ತಾರ್, ಸೊಭೊಂ ಶಿಂವ್ತ್ಯಾಂ ಮೊಗ್ರ್ಯಾಂನಿ.

15.ಭಾಯ್ಲ್ಯಾನ್ ಆಯ್ಲೊ ವ್ಹೊರ್ ಆನಿ ಹಾಂಗಾ ವೊಡ್ಲಾ ತಾಂಬು, ಆನಿ ಆತಾಂ ದಿಯಾ, ಚೆಂಬು ತುಮ್ಚಾ ಪಾನಿಯಾಂಚೊ.

ವೇರ್ಸ್: ವ್ಹೊರ್ ಭಿತರ್ ಕಾಣ್ಘೆತಾನಾ - ಭಾಯ್ಲ್ಯಾನ್