:: ಮಾಯ್ ಭಾಸ್ - MAIBHAAS.COM - A Konkani Web Portal Never Ever Before::

1. ಸುರ್ವಿಲೆಂ ಗೀತ್ : ಸಕ್ಕಡ್ ಸಾಂಗಾತಾ ಮೆಳ್ಯಾಂ

ಸಕ್ಕಡ್ ಸಾಂಗಾತಾ ಮೆಳ್ಯಾಂ

ಸಕ್ಕಡ್ ಲಾಗಿಂ ಸರ್ಯಾಂ

ಆಮ್ಚೆ ತಾಳೆ ಏಕ್ ಕರ್ಯಾಂ

ಮರಿಯೆಕ್ ಹೊಗಳ್ಸಿಯಾಂ

ವೊಡ್ತಾಂ ಹಿತ್ಲಾಂನಿ ಸೊಧ್ಯಾಂ

ಫುಲಾಂ ಎಕ್ಟಾಂಯ್ ಕರ್ಯಾಂ

ತಾಂಚೊ ಏಕ್ ಮುಕುಟ್ ಗುಂತ್ಯಾಂ

ಆನಿ ಮಾಯೆಕ್ ದಿವ್ಯಾಂ

ಫಾಲ್ಯಾಂ ಭಿತರ್ ಬಾವ್ತಲಿಂ

ಹಿಂ ಶಿಂವ್ತಿಂ ಆಬೊಲಿಂ

ಫುಲಾಂ ತರ್ ಖಂಯ್ ಮೆಳ್ತಾಲಿಂ

ಮರಿಯೆಕ್ ಫಾವೊ ಜಾಲ್ಲಿಂ

ತುಜೆಂ ಕಾಳಿಜ್ ತಿಕಾ ದಿ

''ಪುತಾ ಹೆಂ ದಿ'' ಖಂಯ್ ತಿ

ಕರ್ತಾ ಆಪುರ್ಬಾಯ್ ಮಾಂಯ್ ಮ್ಹಜಿ

ಹ್ಯಾ ಸೊಭಿತ್ ಫುಲಾಂಚಿ

ದರ್ಯಾಂತ್ ಮಾಯೆ ಪಯ್ಣ್ ಕರ್ತಾಂವ್

ಬುಡ್ಚ್ಯಾ ಮಾಸ್ಯಾಂತ್ ಆಸಾಂವ್

ಮಾಯ್ ತುಜೊ ಆಧಾರ್ ಮಾಗ್ತಾಂವ್

ಆನಿ ದೈರ್ಯಾನ್ ರಾವ್ತಾಂವ್

ತುಂ ಸುಕ್ರು ಸಂತೊಸಾಚೊ

ಧಾಡ್ ತರ್ ಉಜ್ವಾಡ್ ತುಜೊ

ಆಮ್ಕಾಂ ಧಾಂಪ್ಚ್ಯಾ ಮೊಡಾಂಚೊ

ಕಾಳೊಕ್ ಪಯ್ಸ್ ಧಾಂವ್ಡಾಂವ್ಚೊ

ವಾಡೊಂ ಚಡೊಂ ತುಜೆಂ ನಾಂವ್

ತುಜಿ ಭಕ್ತ್ ಉದಾರ್ ಜಾಂವ್

ಮೆಳೊಂ ಮಾಂಯ್ ತುಜೆಂ ಬೆಸಾಂವ್

ಭಾಗಿ ಜಾಂವ್ ಆಮ್ಚೊ ಗಾಂವ್

2. ಪ್ರಸ್ತಾವನ್ :

ಆಖ್ಖ್ಯಾ ಸ೦ಸಾರಾ೦ತ್ ಶಿ೦ಪಡ್ಲೆಲ್ಯಾ ಕೆನರಾ ಮುಳಾಚ್ಯಾ ಮ೦ಗ್ಳುರಿ ಕೊ೦ಕ್ಣಿ ಕ್ರಿಸ್ತಾ೦ವ್ ಕುಟ್ಮಾ೦ನಿ, ಸಾ೦ಗಾತಾ ಮೆಳೊನ್ ಆಚರಣ್ ಕರ್ಚೆಂ ಕುಟ್ಮಾಚೆ೦ ಫೆಸ್ತ್ ಜಾವ್ನಾಸಾ - 'ಮೊ೦ತಿ ಫೆಸ್ತ್'. ಆಗೋಸ್ತ್ ಮಹಿನೊ ಆಕೇರ್ ಜಾವ್ನ್ ಸಪ್ತೆಂಬರ್ ಸುರ್ವಾತ್ ಜಾತಾನಾ , ಪಾಚ್ವ್ಯಾ ಕಾಪ್ಡಾರ್ ಸೊಭ್ಚಿ ಪ್ರಥ್ವಿ ಪ್ರಫುಲ್ಲಿತ್ ಜಾವ್ನಾಸ್ತಾನಾ ಆಮ್ಚೊ ಮಂಗ್ಳೂರಿ ಮುಳಾಚೊ ಕೊಂಕ್ಣಿ ಕಥೊಲಿಕ್ ಲೋಕ್ ಉಲ್ಲಾಸಾನ್ ಭರ್ತಾ ಆನಿ ಪ್ರತ್ಯೇಕ್ ಜಾವ್ನ್ ಭುರ್ಗಿಂ. ಕಿತ್ಯಾಕ್ ಮ್ಹಳ್ಳ್ಯಾರ್ ತಾಂಚ್ಯಾ ಆನಿ ಆಮಾ ಸರ್ವಾಂಚ್ಯಾ ಮೊಗಾಳಿ ಮೊಂತಿ ಮಾಯೆಕ್ ಫುಲಾಂ ಆರ್ಪುಂಚ್ಯಾ ಸಾಂಗಾತಾ, ತಿಚ್ಯಾ ಮಾನಾಕ್ ನೊವೆನ್ ಆರಂಭ್ ಜಾತಾ. ಕಾಂಯ್ ಆಮ್ಚೊ ಉಗ್ಡಾಸ್ ಥೊಡ್ಯಾ ವರ್ಸಾಂಕ್ ಪಾಟಿಂ ವ್ಹೆಲ್ಯಾರ್, ಫುಲಾಂ ಉಡೊಂವ್ಚ್ಯಾ ಪಾಸೊತ್ ಭುರ್ಗ್ಯಾಂ ಮಧೆಂ ಸ್ಪರ್ಧೆಚ್ ಚಲ್ತಾಲೆ. ನಮೂನ್ಯಾ ನಮೂನ್ಯಾಚಿಂ ಫುಲಾಂ ಜಮೊ ಕರುನ್ ತಿಂ ಮರ್ಯೆಕ್ ಆರ್ಪುಂಚಿ ಸೊಭಾಯ್‍ಚ್ ದುಸ್ರಿ ಆಸ್‍ಲ್ಲಿ. ತಾಚ್ಯಾ ಉಪ್ರಾಂತ್ ಫೆಸ್ತಾಚೊ ದೀಸ್ ಕುಟ್ಮಾಚೊ ದೀಸ್. ಕುಟ್ಮಾಂ ಮದೆಂ ಕಿತೆಂಯ್ ಮನಸ್ತಾಪ್ ಆಸ್ಲ್ಯಾರಿ ತ್ಯಾ ಎಕಾ ದಿಸಾಕ್ ತರೀ ವಿಸ್ರೋನ್ ಸಾಂಗಾತಾ ಬಸೊನ್ ನೊವೆಂ ಜೆಂವ್ಚಿ ಎಕ್ ಭವ್ಯ್ ಪರಂಪರಾ ಆಮ್ಚೆ ಮಧೆಂ ಆಸ್‌ಲ್ಲಿ, ಆನಿ ಆತಾಂಯೀ ಆಸಾ. ಫೆಸ್ತಾ ದಿಸಾ ತರೀ ರಾಂದ್ವಯೆ ಲಾಗೊನ್ ಎಕಾಮೆಕಾಚ್ಯಾ ಘರಾಂನಿ ಸ್ಪರ್ಧೆಚ್ ಜಾತಾಲೆ.

ಪುಣ್ ದಿಸ್ ಪಾಸಾರುನ್ ಗೆಲ್ಲ್ಯಾಬರಿಂ ಆಮ್ಚೊ ಲೋಕ್ ಶಹರಾ ತೆವ್ಶಿನ್ ಪರ್ತಾಲ್ಲ್ಯಾ ವರ್ವಿಂ ಹಳ್ತಾರ್ ಮೊಂತಿ ಫೆಸ್ತಾಚೊ ಮಹತ್ವ್ ಉಣೆಂ ಜಾಯ್ತ್ ಆಯ್ಲೊ. ಲೋಕಾಕ್ ಹಳ್ತಾರ್ ಸಂಸ್ಕ್ರತೆಚಿ ವಿಸರ್ ಪಡೊಂಕ್ ಲಾಗ್ಲಿ! ಪುಣ್ ಹಾಕಾ ಆಪ್ವಾದ್ ಮ್ಹಳ್ಳ್ಯಾಬರಿಂ ವಿವಿದ್ ಶಹರಾಂಕ್ ತಶೆಂಚ್ ವಿದೇಶಾಕ್ ಪಾವ್‍ಲ್ಲೆ ಕೆನರಾ ಮುಳಾಚೆ ಕೊಂಕ್ಣಿ ಕ್ರಿಸ್ತಾಂವ್, ಪುರ್ತ್ಯಾ ಮಾಪಾಕ್ ನಹಿಂ ತರೀ ಥೊಡ್ಯಾ ಮಾಪಾನ್ ಹೆಂ ಆಮ್ಚ್ಯಾ ಭವ್ಯ್ ಸಂಸ್ಕ್ರತೆಚೆಂ ಆಚರಣ್ ಆಜೂನಿ ಜಿವಾಳ್ ದವರುನ್ ಆಸಾತ್.

ಬದ್ಲಾವಣ್ ಆನಿ ನವೀಕರಣ್ ಹರ್ಯೆಕ್ ಸಂಗ್ತಿಂನಿ ರಿಗ್‍ಲ್ಲ್ಯಾ ವರ್ವಿಂ, ಭಾಸ್ ಆನಿ ಸಂಸ್ಕೃತೆ ವಯ್ರ್ ಯೀ ಜರೂರ್ ಜಾಲಿ. ಪುಣ್ ತಶೆಂ ಮ್ಹಣ್ ಬದ್ಲಾವಣೆಕ್ ಆಡಂವ್ಕ್ ಜಾಯ್ನಾ, ಆನಿ ಸಂಸ್ಕೃತೆಕ್ ಸೊಡುಂಕ್ ಜಾಯ್ನಾ. ನವೀಕರಣ್ - ಸಂಸ್ಕೃತಿ ಜಿವಾಳ್ ದವ್ರುಂಕ್ ಕಶೆಂ ವಾಪರಿಯೇತ್ ಮ್ಹಳ್ಳೆಂ ಚಿಂತುನ್ ತ್ಯೆ ದಿಶೆನ್ ಪ್ರಯತನ್ ಕರ್ಚೆಂ ಗರ್ಜೆಚೆಂ ಜಾವ್ನಾಸಾ.

3. ಗೀತ್ : ಮರಿಯೆಕ್ ಹೊಗೊಳ್ಸಿಯಾಂ

ಮರಿಯೆಕ್ ಹೊಗೊಳ್ಸಿಯಾಂ

ತಿಕಾತಾಂ ವರ್ಣಿಯಾಂ

ಗಾಯನ್ ತಿಚೆಂ ಚಡೊಂ

ಸರ್ಗಾ ರಾಜ್ ತೆಂ ಭರೊಂ

ಮರಿಯೆಕ್ ಹೊಗಳ್ಸಿಯಾಂ

ಹೊಗಳ್ಸಿಯಾಂ ಮರಿಯೆಕ್

ತುಂ ಗೆ ಫುಲ್ ಪರ್ಮಳಿಕ್

ಭೊವ್ ಸೊಭಿತ್ ಪರ್ಜಳಿಕ್

ಪೆಟಯ್ ಮಾಯೆ ಉಜೊ

ಜೆಜುಚ್ಯಾ ಮೊಗಾಚೊ

ಸರ್ಗಿಂಚಾ ದಿಸಾಚೊ

ಆವ್ರೊರ್ ತುಂ ಘನಾಚೊ

ದಿಸ್ ತುಕಾ ಮಾನ್ ದಿತಾ

ಚಂದ್ರ್ ಮಾಯೆ ವರ್ಣಿತಾ

ಸೊಸ್ಣಿಕಾಯ್ ಖಾಲ್ತೆಂಪಣ್

ಮಾಗೊನ್ ದಿ ನಿಸ್ಕಳ್‌ಪಣ್

ಉಪ್ಕಾರ್ ಮಾಯೆ ಮಾಗ್ತಾಂವ್

ಭರ್ವಾಶ್ಯಾನ್ ಪರತ್ತಾಂವ್

4. ಪ್ರಾರ್ಥನ್ :

ಮರಿ, ಆಮ್ಚಿ ಮೊಗಾಳ್ ಮಾಯ್. ಸರ್ಗಿಂಚಾ ಬಾಪಾ, ತುಜೆ ಅಗಣಿತ್ ಜಾಣ್ವಾಯೆನ್ ಮರ್ಯೆಕ್ ತುವೆಂ ತುಜಾ ಪುತಾಚಿ ಆವಯ್ ಜಾವ್ನ್ ವಿಂಚುನ್ ಕಾಡ್ಲಿಯ್ ಆನಿ ತಿಕಾ ಸರ್ವ್ ಕುರ್ಪೆ ದೆಣ್ಯಾಂನಿ ನೆಟಯ್ಲಿಯ್. ತಿಚ್ಯಾ ಜಿಣ್ಯೆಂತ್ ಎಕಾಮೆಕಾಚೆ ಗರ್ಜೆಕ್ ತಿ ಪಾವ್ಲಿ, ಕುಟ್ಮಾಕ್ ಸಮ್ಜುಂಕ್ ಸಕ್ಲಿ. ತಶೆಂಚ್ ಆಮ್ಕಾಂಯೀ ಎಕಾಮೆಕಾಚ್ಯೆ ಗರ್ಜೆಕ್ ಪಾವ್ಚೆಂ ಬರೆಂ ಮನ್ ದೀ. ತುಂವೆಂ ಧಾಡ್‍ಲ್ಲ್ಯಾ ಪಾವ್ಸಾವರ್ವಿಂ ಆನಿ ವೊತ್‍ಲ್ಲ್ಯಾ ಆಶೀರ್ವಾದಾಂನಿ ಆಮ್ಚೆ ಶೆತಾಂನಿ ಜಾಲ್ಲೆಂ ಹೆಂ ನವೆಂ ಭಾತ್ ತುಕಾ ಭೆಟಯ್ತಾಂಯ್. ತುಜ್ಯಾ ಶೆಳಿಯಾಂಕ್ ಆಮ್ಕಾಂ ಸದಾಂಚ್ ರಾಕೊನ್ ವ್ಹರ್. ಮರಿ ಮಾಯೆಚ್ಯಾ ಭಕ್ತಿನ್ ಆಮ್ಚಿ ಕುಟ್ಮಾಂ ಭರುಂಕ್ ತುಜೊ ಆಧಾರ್ ದೀ. ಮರಿ ಮಾಯೆಚ್ಯಾ ಮಜತೆನ್ ಭಾಗೆವಂತ್ ಕುಟಾಮ್ ರುತಾಂ ಜಾಲೆಂ. ಆಜ್, ತಿಕಾ ಆಮಿ ಮಾನ್ ಭೆಟಯ್ತಾನಾ, ಆಮ್ಚೆ ಕುಟಾಮ್ ತುಕಾ ಸಮರ್ಪುನ್ ದಿತಾಂವ್. ಕುಟ್ಮಾಚ್ಯಾ ಸರ್ವ್ ಸಾಂದ್ಯಾಂಕ್ ತುಂ ಆಶೀರ್ವದಿತ್ ಕರ್.

5. ದೆವಾಚೆಂ ಉತರ್

ಲೂಕ್ 1: 46-55

46. ತವಳ್ ಮರಿ ಮ್ಹಣಾಲಾಗ್ಲಿ:

47. ಮ್ಹಜೊ ಜೀವ್ ಸರ್ವೆಸ್ಪರಾಚಿ ವ್ಹಡ್ವಿಕ್ ಗಾತಾ, ಮ್ಹಜೊ ಆತ್ಮೊ ದೆವಾ ಮ್ಹಜ್ಯಾ ತಾರಕಾ ಥಂಯ್ ಸಂತೊಸಾನ್ ಉಡ್ತಾ.

48. ಕಿತ್ಯಾಕ್, ಅಪ್ಲೇ ಕಿರ್ಕೊಳ್ ಚರಣ್‌ದಾಸಿಚೆರ್ ತಾಣೆಂ ದಯಾದೀಷ್ಟ್ ಘಾಲಿ. ದೆಕುನ್ ಹ್ಯಾ ಫುಡಾಂ ಸರ್ವ್ ಸಂತತಿ ಮ್ಹಾಕಾ ಸದೆಂವ್ ಮ್ಹಣುನ್ ಪಾಚಾರ್ತಲ್ಯೊ.

49. ಕಿತ್ಯಾಕ್ ಸಕ್ತಿವಂತಾನ್ ಮ್ಹಜೇ ಪಾಸತ್ ವಿಚಿತ್ರ್ ಕಾಮಾಂ ಕೆಲ್ಯಾಂತ್, ಭಾಗೆವಂತ್ ತಾಚೆಂ ನಾಂವ್.

50. ಆಪ್ಣಾಕ್ ಭಿಯೆತಲ್ಯಾಂಚೆರ್ ದಾಖಯ್ತಾ ತೊ ಕಾಕುಳ್ತ್, ಸಂತತೇ ಥಾವ್ನ್ ಸಂತತೇ ಪರ್ಯಾನ್,

51. ಆಪ್ಲ್ಯಾ ಬಾವ್ಳ್ಯಾನ್ ತಾಣೆಂ ಬಳ್ ದಾಕಯ್ಲ್ಯಾಂ, ಆಪ್ಲ್ಯಾ ಕಾಳ್ಜಾಂತ್ ವ್ಹಡ್ಪಣ್ ಚಿಂತ್ತಲ್ಯಾ ಗರ್ವ್ಯಾಂಕ್ ತಾಣೆಂ ಧುಸ್ಪಟಾಯ್ಲ್ಯಾತ್.

52. ಪದ್ವೆದಾರಾಂಕ್ ಊಂಚಾಸನಾಂ ಥಾವ್ನ್ ತಾಣೆಂ ಸಕ್ಲಾ ಘಾಲ್ಯಾತ್ ಆನಿ ಕಿರ್ಕೊಳಾಂಕ್ ಊಂಚ್ ಉಬಾರ್‍ಲ್ಯಾತ್.

53. ಭುಕೆಲ್ಲ್ಯಾಂಕ್ ತಾಣೆಂ ಬರ್‍ಯಾ ವಸ್ತುಂನಿ ಭರ್‍ಲ್ಯಾತ್ ಆನಿ ಗ್ರೆಸ್ತಾಂಕ್ ರಿತ್ಯಾ ಹಾತಾಂನಿ ಪಾಟಿಂ ಧಾಡ್ಲ್ಯಾತ್.

54. ಆಮ್ಚ್ಯಾ ಪುರ್ವಜಾಂಕ್ ದಿಲ್ಲೇ ಭಾಸಾವ್ಣೆಕ್ ತಾಣೆಂ ಪಾಳೊ ದಿಲೊ ಆನಿ ಇಸ್ರಾಯೆಲಾಕ್, ಆಪ್ಲ್ಯಾ ಚಾಕ್ರಾಕ್ ತೊ ಆಧಾರ್ ದೀವ್ನ್ ಆಯ್ಲೊ.

55. ಉಗ್ಡಾಸ್ ತಾಣೆಂ ದವರ್ನ್ ದಾಖಯ್ಲಿ ದಯಾ ಅಬ್ರಾಹಾಮಾಕ್ ಆನಿ ತಾಚೇ ಸಂತತೆಕ್ ಸದಾಂಕಾಳ್.

6. ನಿಯಾಳ್ :

ಮೊಂತಿ ಸಾಯ್ಭಿಣಿಚೆಂ ಫೆಸ್ತ್, ಕುಟ್ಮಾ ಫೆಸ್ತ್ ಆನಿ ಮೊಂತಿ ಸಾಯ್ಬಿಣ್ ಹ್ಯೆ ಫೆಸ್ತಾ ದ್ವಾರಿಂ ಆಮ್ಚ್ಯಾ ಕುಟ್ಮಾಂಕ್ ಎಕ್ವಟಾಯ್ತಾ. ಕಶೆಂ ಸುರ್ವಿಲ್ಲ್ಯಾ ಕ್ರಿಸ್ತಾಂವಾಂಕ್ ಮರಿ ಎಕ್ವಟಾಚೊ ಸಂಕೇತ್ ಜಾಲಿ, ತಶೆಂ ಆಜ್ ಮೊಂತಿ ಸಾಯ್ಬಿಣ್ ಆಮ್ಕಾಂ ಸರ್ವಾಂಕ್ ಆಮ್ಚ್ಯಾ ಕುಟ್ಮಾಂತ್ ಎಕ್ವಟಾಯ್ತಾ. ಮರಿ ದೇವ್ ಪುತಾಚಿ ಆವಯ್ ತರೀ, ಆಮ್ಚೆ ಪರಿಂಚ್ ಏಕ್ ಕುಟ್ಮಾಂತ್ ಜಲ್ಮಲ್ಲಿ ಆನಿ ವ್ಹಡ್ ಜಾಲ್ಲಿ. ಸಾಂ. ಜೊಕಿಮ್ ಆನಿ ಆನ್ನಾಚಿ ಧುವ್ ಜಾವ್ನ್, ಜುಜೆಚಿ ಪತಿಣ್ ಜಾವ್ನ್, ಜೆಜುಚಿ ಆವಯ್ ಜಾವ್ನ್, ಎಲಿಜಾಬೆತಿಚಿ ಸಂಬಂಧಿಣ್ ಜಾವ್ನ್, ಆನಿ ಕಾನಾ ಶೆರಾಚಾ ಮಾಟ್ವಾಂತ್ ಯಜ್ಮಾನಾಚಿ ಖಂತ್ ಸಮ್ಜವ್ನ್, ದೆವಾಕ್ ಆನಿ ತಾಚಾ ಲೊಕಾಕ್ ಮಾನ್ವಲ್ಲಿ ವರ್ತಿ ಸ್ತ್ರೀ ತಿ.

ಖುರ್ಸಾರ್ ಥಾವ್ನ್ ಜೆಜುನ್, ಮರ್ಯೆಕ್ ಆಮ್ಚಿ ಆವಯ್ ಜಾವ್ನ್ ಆಮ್ಕಾಂ ಕರ್ನ್ ದಿಲ್ಯಾ. ಆಜ್ ಆಮಿ ತಿಚೊ ಜಲ್ಮಾ ದಿವಸ್ ಸಂಭ್ರಮ್ತಾನಾ ಆಮಿ ತಿಚಿಂ ಭುರ್ಗಿಂ ಮ್ಹಳ್ಳೆಂ ಚಿಂತಪ್ ಮತಿಂತ್ ಹಾಡ್ಯಾಂ ಆನಿ ತಿಚಿ ದೇಕ್ ಘೇವ್ನ್ ಆಮ್ಚಿ ಜಿಣಿ ಅರ್ಥಾಭರಿತ್ ಕರ್ಯಾಂ. ಹ್ಯಾ ಸಂಸಾರಿಂ ಧುವ್, ಆವಯ್, ಪತಿಣ್ ಆನಿ ಘರ್‍'ದಾರ್ ಸಾಂಬಾಳ್ಚಿ ಸ್ತ್ರೀ ಜಾವ್ನ್ ಜಿಯೆಲ್ಲಿ ಮರಿ ಆಮ್ಚ್ಯಾ ಸರ್ವ್ ಕುಟ್ಮಾಂಕ್ ಆದರ್ಶ್. ದುರ್ಬಳ್ಕಾಯೆಂತ್ ತೃಪ್ತಿ, ಕಷ್ಟಾಂತ್ ಧಾಯ್ರಾಧಿಕ್, ದುಕಾಂತ್ ಸೊಸ್ಣಿಕ್, ಅಸಹಾಯಕ್ ಪರಿಸ್ಥಿತೆಂತ್ ಧಯ್ರಾಧಿಕ್ - ಅಸಲ್ಯಾ ಸುಗುಣಾಂನಿ ನೆಟಯಿಲ್ಲಿ ಮರಿ ಆಮ್ಕಾಂ ಏಕ್ ಮೇಲ್‍ಫಾಂಕ್ತ್. ದೆಕುನ್ ಆಜ್ ಆಮಿ ತಿಕಾ ನಮಾನ್ ಕರ್ಯಾಂ ಆನಿ ಆಮ್ಚಿಂ ಕುಟ್ಮಾಂ ಸಂತೊಸಾಚಿಂ, ಸಮಾಧಾನೆಚಿಂ, ಮಾಯಾಮೊಗಾಚಿಂ, ಭಾವಾರ್ಥಾಚಿಂ ಆನಿ ಭರ್ವಶ್ಯಾಚಿಂ ಮಂದಿರಾಂ ಜಾಂವ್ಕ್ ತಿಚ್ಯೆ ಮುಕಾಂತ್ರ್ ದೆವಾಚೆ ಮಜತ್ ಮಾಗ್ಯಾಂ.

7. ಪ್ರಾರ್ಥನಾಂ :

ಏಕ್ ಕುಟಾಮ್ ಜಾವ್ನ್ ಆಮಿಂ ಹಾಂಗಾಸರ್ ಜಮ್ಲ್ಯಾಂವ್ ಆನಿ ಮರಿಯೆ ಮುಕಾರ್ ಆಮ್ಚಿಂ ಸರ್ವ್ ಮಾಗ್ಣಿಂ, ಪ್ರಾರ್ಥನಾಂ ಆಮಿಂ ದವರ್ಯಾಂ.

- ಆಮ್ಚ್ಯಾ ಧಾರ್ಮಿಕ್ ಮುಕೆಲ್ಯಾಂನಿ ಮರಿಯೆಚಿ ದೇಕ್ ಘೇವ್ನ್, ತಾಂಚಿ ಜಿಣಿ ತುಜೆ ಆನಿ ಪೆಲ್ಯಾಚೆ ಸೆವೆಂತ್ ಸಮರ್ಪಿತ್ ಕರುಂಕ್ ತುಜೆಲಾಗಿಂ ಮಾಗ್ತಾಂವ್.