From around the world

ಪ್ರವೀಣ್ ತಾವ್ರೊ, ಕುಲ್ಶೇಕರ್
             
+971 50 7554105
ತುಮ್ಚ್ಯಾ ಗಮನಾಕ್:
Best be viewed in 1366 X 768 screen resolution and in Google Chrome
You are here:   /  ಸಾಹಿತ್ಯ್ - ಖಭ್ರ್ಯೊ

'ಕೊಂಕಣಿ ಎಕ್ವಟ್' - ಮುಂಬಂಯ್ತ್ ಕೊಂಕಣಿ ಮಹಾ-ಸಹಮಿಲನ್

Wednesday, January 11, 2017  /  By Admin

ಮುಂಬಯ್ ಶಹರಾಂತ್ ಕೊಂಕ್ಣಿ ಭಾಷೆಚಿ ಸೆವಾ ಕರ್ಚ್ಯಾ ಇರಾದ್ಯಾನ್ ಸಭಾರ್ ಸಂಘ್ ಸಂಸ್ಥೆ ಉದೆಲೆ ಆನಿ ಹಾಂತ್ಲೆ ಥೊಡೆ ಮಾಯಾಕ್ ಜಾವ್ನ್ ಗೆಲೆ. ಫಿರ್ಗಜ್ ಮಟ್ಟಾರ್ ಉಬೆ ಜಾಲ್ಲೆ ಸಂಘ್ ಆಪಾಪ್ಲ್ಯಾ ತಾಂಕಿ ಪ್ರಮಾಣೆ ಕೊಂಕ್ಣಿ ಭಾಷೆಚ್ಯಾ ವಿಕಾಸಾ ಖಾತಿರ್ ವಾವ್ರ್ ಕರ್ನ್ ಆಸಾತ್ ತಿ ಸಂತೊಸಾಚಿ ಗಜಾಲ್.

ವ್ಹಡ್ ಮಟ್ಟಾರ್ ಕೊಂಕ್ಣಿ ಕಾರ್ಯಿಂ ಮಾಂಡುನ್ ಹಾಡ್ಚ್ಯಾ ಇರಾದ್ಯಾನ್ ಮುಂಬಯ್ ನಗರಾಂತ್ಲ್ಯಾ ಸಕ್ಕಡ್ ಕೊಂಕ್ಣಿ ಸಂಸ್ಥ್ಯಾಂಕ್ ಏಕ್ ಬೊಂದೆರಾ ಸಕಯ್ಲ್ ಸಾಂಗಾತಾ ಹಾಡ್ಚೊ ವಾವ್ರ್ ಸುರ್ವಾತ್ ಜಾಲಾ ಮಾತ್ರ್ ನ್ಹಯ್ ಯಶಸ್ವಿ ಮೆಳೊಂಕ್ ಲಾಗ್ಲ್ಯಾ.

ಹರ್ಯೆಕ್ ಲೇಖಕ್ ಆಪ್ಲಿಂ ಪುಸ್ತಕಾಂ ಪ್ರಕಟ್ ಕರುಂಕ್ ಆಶೆತಾ. ಹೆಂ ಕಾಮ್ ಭಾರಿಚ್ ಕಷ್ಟಾಂಚೆಂ ಆನಿ ಖರ್ಚಾಚೆಂ ದೆಕುನ್ ಸ್ವತಃ ಕರುಂಕ್ ಜಾಯ್ನಾ. ಆನಿ ಹೆರ್ ಕೊಣೀ ಸುಲಭಾಯೆನ್ ಮುಖಾರ್ ಸರಾನಾಂತ್. ಕಿತ್ಯಾಕ್ ಮ್ಹಳ್ಯಾರ್ ವ್ಹಡ್ ದುಡ್ವಾಚಿ ಗರ್ಜ್ ಆಸ್ತಾ. ಪುಸ್ತಕಾಂ ವಿಕುನ್ ಲಾಭ್ ಕರುಂಕ್ ಜಾತಾ ಮ್ಹಣ್ ಚಿಂತ್ಚೆಂ ಭೆಷ್ಟೆಂ! ಅಸಲ್ಯಾ ಪರಿಸ್ಥಿತೆಂತ್ ಆಪ್ಲ್ಯಾ ಬೊಲ್ಸಾಂತ್ಲೆ ಪಯ್ಸೆ ಘಾಲ್ನ್, ನಷ್ಟ್ ಭಗುನ್ ಫಕತ್ ಕೊಂಕ್ಣಿ ಭಾಷೆಚ್ಯಾ ಮೊಗಾನ್ ವಲ್ಲಿ ಕ್ವಾಡ್ರಸಾನ್ ಆಪ್ಲ್ಯಾ ಆಶಾವಾದಿ ಪ್ರಕಾಶನಾ ಮಾರಿಫಾತ್ ಪ್ರಕಟ್ ಕೆಲ್ಲಿಂ ಚಡ್ತಾವ್ ಪುಸ್ತಕಾಂ ಹೆರಾಂಚಿಂ. 2002 ಥಾವ್ನ್ 2008 ಪರ್ಯಾಂತ್ ಪ್ರಕಟ್ ಕೆಲ್ಲ್ಯಾ ಸತ್ತಾವೀಸ್ ಬುಕಾಂನಿ ಮಟ್ವ್ಯೊ ಕಾಣ್ಯೊಂ, ಅನುವಾದ್, ಅದ್ಯಯನ್, ಕವಿತಾ ಜಮೆ, ಕಾದಂಬರಿ ಆನಿ ಲೇಖನಾಂ ಆಟಾಪುನ್ ಆಸಾತ್. ದಾಯ್ಜ್.ಕೊಮ್ ಜಾಳಿ ಸುವಾತೆ ಮಾರಿಫಾತ್ ಸಭಾರ್ ನವ್ಯಾ ಕವಿಂಕ್, ಬರಯ್ಣಾರಾಂಕ್ ಪ್ರೊತ್ಸಾಹ್ ದಿಲಾ ತಿ ವಿಂಗಡ್ ಗಜಾಲ್. 

ಥೊಡೊ ತೇಂಪ್ ಖಾಸ್ಗಿ ಕಾರಣಾಂಕ್ ಲಾಗೊನ್ ಕೊಂಕ್ಣಿ ಸಾಹಿತಿಕ್ ವಾವ್ರಾ ಥಾವ್ನ್ ವಿಶೆವ್ ಘೆತಲ್ಲ್ಯಾ ವಲ್ಲಿ ಕ್ವಾಡ್ರಸಾನ್ ಮುಂಬಂಯ್ತ್ ಸರ್ವ್ ಕೊಂಕ್ಣಿ ಅಭಿಮಾನಿಂಕ್ ಎಕ್ಟಾಂಯ್ ಕರ್ನ್ ಆಶಾವಾದಿ.ಕೊಮ್ ಮುಖಾಂತ್ರ್ ಡಿಜಿಟಲ್ ಕೊಂಕ್ಣಿ ವಾವ್ರ್ ಮುಕಾರುನ್ ವರ್ಚೆಂ ಕಾಮ್ ಹಾತಿಂ ಘೆತ್ಲಾಂ. ಸಾಂಗಾತಾಚ್ ವೆವೆಗ್ಳೆ ಪಾಂಚ್ ಬೂಕ್ ಪ್ರಕಟ್ಣೆಚೊ ವಾವ್ರ್ ಕರ್ನ್ ಆಸೊನ್, ವೆಗಿಂಚ್ ಮುಂಬಯಾಂತ್ ಏಕ್ ಸಹ ಮಿಲನಾ ವೆಳಾರ್ ಮೊಕ್ಳಿಕ್ ಕರ್ಚಿ ಯೆವ್ಜಣ್ ತಯಾರ್ ಕೆಲ್ಯಾ. ಹರ್ಯೆಕ್ ಕೊಂಕ್ಣಿ ಲೇಖಕಾಕ್, ವಾವ್ರಾಡ್ಯಾಕ್, ಅಭಿಮಾನಿಕ್ ಕೊಂಕ್ಣಿ ಸಾಮಾಜಿಚ್ಯಾ ಮುಕಾರ್ ಹಾಡುಂಕ್ ತೊ ಆಶೆತಾ. ಸರ್ವ್ ಕೊಂಕ್ಣಿ ಸಂಸ್ಥ್ಯಾಂಕ್ ಸಾಂಗಾತಾ ಹಾಡ್ನ್ ಎಕಾಮೆಕಾ ಪಾಟಿಂಬೊ ದೀವ್ನ್ ಕೊಂಕ್ಣಿ ಲೇಖಕ್, ಸಂಗೀತ್ಕಾರ್, ಕಲಾಕಾರ್ ಆನಿ ನಾಟಕಿಸ್ತಾಕ್ ಪ್ರೊತ್ಸಾಹ್ ದಿಂವ್ಚೊ ಇರಾದೊ ಮತಿಂತ್ ದವರ್ನ್ ವಲ್ಲಿ ಕ್ವಾಡ್ರಸ್ ರಾತ್ ಆನಿ ದೀಸ್ ಏಕ್ ಕರ್ನ್ ವಾವ್ರ್ ಕರ್ನ್ ಆಸಾ. ಮುಂಬಯ್ ಥಾವ್ನ್ ಪ್ರಕಾಶಿತ್ ಕುಟಾಮ್ ಆನಿ ದಿವೊ ಪತ್ರಾಂಚ್ಯಾ ಸಂಪಾದಕಾಂನಿ ಸಹಕಾರ್ ಭಾಸಾಯ್ಲಾ.

ಕೊಂಕ್ಣಿ ವಾವ್ರ್ ಕರ್ತೆಲ್ಯಾಂಕ್ ಪ್ರೊತ್ಸಾಹ್ ದಿಂವ್ಚೊ, ತಾಂಕಾಂ ಪರ್ಗಟ್ ಮಾನ್ ಕರ್ಚೊ ಇರಾದೊ ಮತಿಂತ್ ದವರ್ನ್ ಮುಂಬಂಯ್ತ್ ಆಸ್ಚ್ಯಾ ಸರ್ವ್ ಕೊಂಕ್ಣಿ ಸಂಸ್ಥ್ಯಾಂಕ್, ಕಲಾಕರಾಂಕ್, ಲೇಖಕಾಂಕ್, ಪ್ರಕಾಶಕಾಂಕ್, ನಾಟಕಿಸ್ತಾಂಕ್ ಎಕ್ವಾಟಾವ್ನ್ ತಾಣಿ ಕೆಲ್ಲ್ಯಾ ಕೊಂಕ್ಣಿ ವಾವ್ರಾಚೊ ವಿವರ್ ಆಟಾಪ್ಚೊ ಪಯ್ಣಾರಿ ವಿಶೇಸ್ ಆಂಕೊ ಪ್ರಕಟ್ ಕರ್ಚಿ ತಯಾರಾಯ್ ಚಲೊನ್ ಆಸಾ. ಸುಮಾರ್ ಪಂದ್ರಾ ಕೊಂಕ್ಣಿ ಸಂಸ್ಥ್ಯಾಂನಿ ಸಹಕಾರ್ ಭಾಸಾಯ್ಲಾ. ಯೆಂವ್ಚ್ಯಾ ಫೆಬ್ರೆರ್ 25 ವೆರ್ ಠರಾಯ್ಲೆಲ್ಯಾ ಸಹ ಮಿಲನಾಂತ್ ಹೊ ವಿಶೇಸ್ ಆಂಕೊ ಮೊಕ್ಳಿಕ್ ಜಾತಲೊ. ಹ್ಯಾಚ್ ಸಂದರ್ಭಾರ್ ವಿವಿಧ್ ಕ್ಷೇತ್ರಾಂನಿ ನಿರಂತರ್ ಕೊಂಕ್ಣಿ ವಾವ್ರ್ ಕೆಲ್ಲ್ಯಾ ಸುಮಾರ್ ಧಾ ಜಣಾಂಕ್ ಆನಿ ಸರ್ವ್ ಕೊಂಕ್ಣಿ ಸಂಸ್ಥ್ಯಾಂಚ್ಯಾ ಮುಖೆಲ್ಯಾಂಕ್ ಯಾ ಪ್ರತಿನಿಧಿಂಕ್ ಪರ್ಗಟ್ ಮಾನ್ ಕರ್ಚೆ ಬರಾಬರ್ ತಾಂಚಿ ಆನಿ ತಾಂಚ್ಯಾ ಸಂಸ್ಥ್ಯಾಂಚಿ ವಳಕ್ ತಸ್ವೀರೆಂ ಸವೆಂ ವಿಶೇಸ್ ಆಂಕ್ಯಾಂತ್ ಪ್ರಕಟ್ ಕರ್ಚಿ ಯೆವ್ಜಣ್ ಆಸಾ ಮ್ಹಣ್ತಾ ವಲ್ಲಿ ಕ್ವಾಡ್ರಸ್. 

ಆಶಾವಾದಿ ಪ್ರಕಾಶನಾನ್ ಪ್ರಕಟ್ ಕೆಲ್ಲ್ಯಾ ಸತ್ತಾವೀಸ್ ಪುಸ್ತಾಕಾಂಚ್ಯಾ ಬರ್ಪ್ಯಾಂಚಿಂ ನಾಂವಾಂ ಅಶಿಂ ಆಸಾತ್: ಜೊರ್ಜಿ ಪೀಂತ್ ಆಯ್ಕೊಳ್, ಆಂಡ್ರ್ಯೂ ಎಲ್. ಡಿಕುನ್ಹಾ, ಎಚ್ಚೆಮ್ ಪೆರ್ನಾಳ್, ಜೆಮ್ಮಾ ಪಡೀಲ್, ರೊನಾಲ್ಡ್ ಒಲಿವೆರಾ, ಅನಿಲ್ ಪೆರ್ನಾಲ್, ಸಿಜ್ಯೆಸ್ ತಾಕೊಡೆ ಆನಿ ಮೆಲ್ವಿನ್ ಪಿಂಟೊ ನಿರುಡೆ. ಹ್ಯಾ ಆವ್ದೆಂತ್ ಪ್ರಕಟ್ ಜಾಲ್ಲೆಂ ಆನ್ಯೇಕ್ ಪುಸ್ತಕ್ ಜಾವ್ನಾಸಾ 'ಮೊತಿಯಾಂ ಆನಿ ತಾರಾಂ'. ಹ್ಯಾ ಪುಸ್ತಕಾಚೆಂ ಪ್ರಸ್ತಾವನ್ ಕೇಂದ್ರ್ ಸಾಹಿತ್ಯ್ ಪುರಾಸ್ಕಾರ್ ವಿಜೇತ್ ದೆವಾಧಿನ್ ಜೆ. ಬಿ. ಮೊರಾಯಸ್ ಹಾಣೆ ಬರಯ್ಲಾಂ. ಹ್ಯಾ ಕವಿತಾ ಜಮ್ಯಾಂತ್ ಆರ್ಥರ್ ರೋಶನ್ ಪಿರೇರಾ (ಒಮ್ಜೂರ್), ದಿನೇಶ್ ಕೊರೆಯಾ (ಪೆರ್ನಾಳ್), ಜೊನ್ ಕೊರೆಯಾ (ಬೊಂದೆಲ್), ಮೆಲ್ವಿನ್ ಜೆ. ವಾಸ್ (ಕೆಲರಾಯ್), ರೋಬರ್ಟ್ ಫೆರ್ನಾಡಿಸ್ (ಉದ್ಯಾವಾರ್), ವಿನ್ಸಿ ಪಿಂಟೊ (ಆಂಜೆಲೊರ್), ಆಸ್ಟಿನ್ ಡಿಸೋಜಾ (ನಂತೂರ್), ಸಿಜ್ಯೆಸ್ ತಾಕೊಡೆ, ಎಮ್. ಪಿ. ರೊಡ್ರಿಗಸ್, ವಲ್ಲಿ ವಗ್ಗ, ವಿಲ್ಫಿ ರೆಬಿಂಬಸ್ (ಕೊಂಕಣ್ ಕೊಗುಳ್) ಹಾಂಚ್ಯೊ ಆಪುರ್ಬಾಯೆಚ್ಯೊ ಕವಿತಾ ಆಸಾತ್. 


ನವೆಂಬ್ರ್ 27, 2016 ವೆರ್ ಮಿರಾರೋಡ್ ಜಮ್ಲೆಲ್ಯಾ ಕೊಂಕ್ಣಿ ಅಭಿಮಾನಿಂಚ್ಯಾ ಮಹತ್ವಾಚ್ಯಾ ಸಭೆಕ್, ನವಿ ಮುಂಬಯ್ (ಕೊಂಕಣ್), ಠಾಣೆ, ಜೆರಿಮೆರಿ, ಮಲಾಡ್, ಮಾಲ್ವಾಣಿ, ಕಾಂದಿವಲಿ, ಬೊರಿವಲಿ, ಮಿರಾರೊಡ್ (ಸಾಂ ಜುಜೆ ಕೊಂಕ್ಣಿ ಸಂಸ್ಥೊ), ಭಯಂದರ್, ವಸಯ್, ವಿರಾರ್, ಸಾಂ. ಪೆದ್ರು ಕೊಂಕ್ಣಿ ಸಂಸ್ಥೊ-ಬಾರ್ಕೂರ್, ನಾಯ್ಗಾಂವ್ ಇತ್ಯಾದಿ ಕೊಂಕ್ಣಿ ಸಂಸ್ಥ್ಯಾಂಚೆಂ ಪ್ರತಿನಿಧಿತ್ವ್ ಹಾಣಿ ಕೆಲ್ಲೆಂ: ಹೆನ್ರಿ ಡಿಸಿಲ್ವಾ, ರಿಚಾರ್ಡ್ ಡಿಸೋಜ್, ಲ್ಯಾನ್ಸಿ ಪಿಂಟೊ, ಜೊಸೆಫ್ ಪತ್ರಾವೊ, ಲುವಿಸ್ ಕುಲಾಸೊ, ಕ್ರಿಸ್ಟೋಫರ್ ಡಿಸೋಜ್, ತಿಮೊತಿ ಡಿಸೋಜ್, ಜೊನ್ ಮಸ್ಕರೇನ್ಹಸ್, ಫೆಲಿಕ್ಸ್ ಡಿಸೋಜ್, ವಲೇರಿಯನ್ ಪಾಯ್ಸ್, ಚಾರ್ಲ್ಸ್ ಸಲ್ಡಾನ್ಹಾ, ಜೊಸೆಫ್ ಡಿಸೋಜ್, ಬಾಯ್ ಗ್ಲೆಂಡಾ ಅಲ್ಮೇಡಾ, ಬಾಯ್ ಹೆಲೆನ್ ನೊರೊನ್ಹಾ, ಬಾಯ್ ಸೊಫಿಯಾ ಡೆಸಾ, ಹಿಲರಿ ಡಿಸಿಲ್ವಾ, ಅರುಣ್ ನೊರೊನ್ಹಾ, ಲೊರೆನ್ಸ್ ಮಥಾಯಸ್, ಜೊರ್ಜ್ ಸಿಕ್ವೇರಾ, ರೆಜಿನಾಲ್ಡ್ ಸಾಂತುಮಾಯೆರ್, ಎಡ್ವರ್ಡ್ ಗೋಮ್ಸ್, ಐವನ್ ರೆಬೆಲ್ಲೊ ಆನಿ ವಲ್ಲಿ ಕ್ವಾಡ್ರಸ್. 

ಹ್ಯಾ ಸಹಮಿಲನಾಚೆ ಉದ್ದೇಶ್ ಆನಿ ಇರಾದೊ ಹ್ಯೆ ಪರಿಂ ಆಸಾ:

ಉದ್ದೇಶ್: ಕೊಂಕ್ಣಿ ಭಾಸೆಕ್ ಪಾಟಿಂಬೊ ಕರ್ಚ್ಯಾ ಇರಾದ್ಯಾನ್ ಕೊಂಕ್ಣಿ ಸಾಹಿತ್ಯಾಚೊ ವಾವ್ರ್ ಕರುಂಕ್, ತಶೆಂಚ್ ಕೊಂಕ್ಣೆಂತ್ಲ್ಯಾ ಹೆರ್ ಶೆತಾಂನಿ (ಸಂಗೀತ್, ಮಾಂಚಿ, ಸಂಸ್ಥೊ) ವಾವ್ರ್ ಕೆಲ್ಲ್ಯಾ ಕರ್ತೆಲ್ಯಾಂಕ್ ಮಾನ್/ಪಾಟಿಂಬೊ ದಿಂವ್ಚ್ಯಾ, ತಶೆಂಚ್ ಉರ್ಭೆವಂತ್ ತಾಲೆಂತಾಂಕ್ ಪ್ರೋತ್ಸಾಹ್ ದಿಂವ್ಚ್ಯಾ ಇರಾದ್ಯಾನ್, ಮುಂಬಯಾಂತ್ಲ್ಯಾ ಸರ್ವ್ ಕೊಂಕ್ಣಿ ಮೋಗಿಂಕ್ ಎಕಾಮೆಕಾ ಲಾಗಿಂ ಹಾಡ್ಚ್ಯಾ, ತಶೆಂಚ್ ವೆವೆಗ್ಳ್ಯಾ ಸಂಸ್ಥ್ಯಾಂನಿ ಆಸ್ಚ್ಯಾ ತಾಲೆಂತಾಂಕ್ ಅಪ್ಲಿ ಪ್ರತಿಭಾ ಹೆರ್ ಕೊಂಕ್ಣಿ ಲೊಕಾಂನಿ ವ್ಹಳ್ಕಾಶೆಂ ಕರ್ಚ್ಯಾ ಇರಾದ್ಯಾನ್ ಆಸಾ ಕೆಲ್ಲಿ ವೆದಿ ಮಾತ್ರ್. ಹ್ಯಾ ಮಿಸಾಂವಾಂತ್ ಆಮ್ಕಾಂ ಕೊಂಕ್ಣೆಚ್ಯಾ ಬರ್ಯಾ ಫುಡಾರಾಚಿ ನದರ್ ಆಸ್ಚ್ಯಾ ಸರ್ವಾಂಚಿ ಗರ್ಜ್ ಆಸಾ, ಆಮಿ 'ಎಕ್ವಟಿತ್' ರಿತಿನ್ ವಾವ್ರ್ ಕರುಂಕ್ ಸಾಧ್ಯ್ ಆಸ್ಚಿಂ ಕಾರಾಣಾಂ ಸೊಧ್ಯಾಂ ಶಿವಾಯ್ 'ಮೊಡ್ಚಿಂ ನಿಬಾಂ' ನಾಕಾತ್. ಹೆಂ ಕಸಲೆಂಯ್ ಸಂಚಾಲನ್ ನ್ಹಯ್, ಹಾಂಗಾಸರ್ ಕಸಲೆಚ್ಚ್ ಹುದ್ದೆ ನಾಂತ್, ಪುಣ್ ಮುಂಬಯಾಂತ್ಲ್ಯಾ ಸರ್ವ್ ಕೊಂಕ್ಣಿ ಸಂಸ್ಥ್ಯಾಂಕ್ ಹ್ಯಾ ಮಿಸಾಂವಾಂತ್ ವಾಂಟೆಲಿ ಕರುನ್ ಆಮಿ ಎಕ್ವಟಿತ್ ರಿತಿನ್ ವರ್ಸಾಕ್ ಏಕ್ ಪಾವ್ಟಿಂ ತರೀ ಎಕಾಮೆಕಾ ಸಾಂಗಾತಾ ಮೆಳುಂಕ್, ಕೊಂಕ್ಣಿ ವಾವ್ರ್ ಕೆಲ್ಲೊ ಕೊಣ್ಯೀ ಕಶ್ಟಾಂತ್ ಆಸಾ ತರ್ ತಸಲ್ಯಾಕ್ ಕುಮೊಕ್ ಕರುಂಕ್, ತಶೆಂಚ್ ಆಮ್ಚೊ ಬಾಂಧವ್ಪಣ್ ಜಾಗೊ ದವರುಂಕ್ ಆಸಾ ಕೆಲ್ಲಿ ವೆದಿ. 

ಇರಾದೊ: ಮುಂಬಯಾಂತ್ ಕೊಂಕ್ಣಿ ಭಾಸೆಖಾತಿರ್ ಹೆರ್ ಶೆತಾಂನಿ ವಾವ್ರ್ ಕರ್ತೆಲ್ಯಾಂವಿಶಿಂ; (ಸಂಸ್ಥೆ, ವಾವ್ರ್) ತಾಲೆಂತಾವಿಶಿಂ ಸವಿಸ್ತಾರ್ ಮಾಹೆತ್ ಆಟಾಪ್ಚೊ ಅಂಕೊ 'ಪಯ್ಣಾರಿ ವಿಶೇಸ್ ಅಂಕೊ' ಆನಿ ಪಾಂಚ್ ಕೊಂಕ್ಣಿ ಬುಕಾಂಚೆಂ ಕಾಮ್ ಆಮಿ ಸುರು ಕೆಲ್ಲೆಂ ಪೊಂತಾಕ್ ಪಾವಂವ್ಕ್ ಆಸಾ, ಆನಿ ಹ್ಯಾ ಪಾಂಚ್ ಬುಕಾಂಚ್ಯಾ ವಿಖ್ರ್ಯಾಚೊ ಸರ್ವ್ ಆದಾಯ್ ಕಸ್ಟಾಂತ್ ಆಸ್ಚ್ಯಾ ಸಾಹಿತಿಚ್ಯಾ ಕುಮ್ಕೆಕ್ ದಿಂವ್ಚೆಂ ಆಮ್ಚೆಂ ಮಿಸಾಂವ್ ಜಾವ್ನಾಸಾ. ಮುಂಬಯಾಂತ್ ಆಸ್ಚ್ಯಾ ಹೆರ್ ತಾಲೆಂತ್ವಂತ್ ಸಾಹಿತಿ/ಕವಿಂಚೆ ಬೂಕ್ ಪರ್ಗಟ್ಣೆಕ್ ಲಾಗುನ್ ವಾವ್ರ್ ಕರುಂಕ್ ಆಸಾ. ಹ್ಯಾ ಸರ್ವ್ ಯೆವ್ಜಣೆಕ್ ಪೊಂತಾಕ್ ಪಾವಂವ್ಚ್ಯಾ ಇರಾದ್ಯಾನ್ 'ಪಯ್ಣಾರಿ ವಿಶೇಷ್ ಅಂಕೊ; ಎಕ್ವಟ್' ಕಾಡುಂಕ್ ಮೆಟಾಂ ಕಾಡ್ಲ್ಯಾಂತ್. ಹೊ ವಿಶೇಷ್ ಅಂಕೊ ತಶೆಂಚ್ ಕೊಂಕ್ಣಿ ಬುಕಾಂಚೆಂ ಉಗ್ತಾವಣ್ ಕರ್ಚ್ಯಾ ಸಂಧರ್ಭಾರ್ ಸಾಹಿತ್ಯಾಶಿವಾಯ್ ಹೆರ್ ಶೆತಾಂನಿ ಪರ್ಜಳ್ಚ್ಯಾ ಕೊಂಕ್ಣಿ ತಾಲೆಂತಾಕ್/ಪ್ರತಿಭೆಕ್ ಉಜ್ವಾಡಾಕ್ ಹಾಡ್ಚೆಂಚ್ ಆಮ್ಚೆಂ ಪ್ರೇತನ್. ಆನಿ ಹೆಂ ಸಾಂಸ್ಕೃತಿಕ್ ಕಾರ್ಯೆಂ ಆಮಿ ಸ್ಥಾನಿಕ್ ಸಂಸ್ಥ್ಯಾಸವೆಂ ಮೆಳುನ್, ತಶೆಂಚ್ ಹ್ಯಾ ಮಿಸಾಂವಾಂತ್ ವಾಂಟೆಲಿ ಜಾಂವ್ಕ್ ಆಸ್ಚ್ಯಾ ಹೆರ್ ಸರ್ವ್ ಸಂಸ್ಥ್ಯಾಂಚೊ ಆಧಾರ್ ಘೆವ್ನ್ ಭೋವ್ ಅಪುರ್ಭಾಯೆನ್ ಸಾದರ್ ಕರ್ಚಿ ಯೆವ್ಜಣ್.

'ಕೊಂಕ್ಣಿ ಎಕ್ವಟ್' ಸಹಮಿಲನಾಕ್ www.maibhaas.com ಸರ್ವ್ ಬೊರೆಂ ಮಾಗ್ತಾಂ.

- ಭಾತ್ಮಿ: ವೀರ್ ಸೇನ್ ನಕ್ರೆ. 

Tags:  Konkani EkvoT, Konkani, Mangalore, Mangalorean, Mother Tongue

2 Comment/s.

  1. Walter Lasrado, Nakre/Malad-400095
    ಆಸ್ಟಿನ್ ಬಾಬ್, ತುಕಾ ದೇವ್ ಬರೆಂ ಕರುಂ. -ವೀರ್'ಸೇನ್, ನಕ್ರೆ.
  2. Austin Prabhu, Chicago
    ಹ್ಯಾ ಮಹಾನ್ ಕಾರ್ಯಾಕ್ ಸರ್ವ್ ಯಶ್ ಆಶೇತಾಂ. ಲಾಂಬ್ ಜಿಯೊಂ ಕೊಂಕಣಿ! -ಆಸ್ಟಿನ್ ಪ್ರಭು, ಚಿಕಾಗೊ

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :


Connect

Maibhaas

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE