From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಸೊಭಾಯ್ ಪಾವ್ಸಾಚಿ
Tuesday, June 14, 2016
ಭಾರತಾ ವಿಶಿಂ ಉಲಯ್ತಾನಾ ಏಕ್ ಸಾಮಾನ್ಯ್ ಉತಾರ್ ಮನ್ಶಾಚ್ಯಾ ತೊಂಡಾಂತ್ ವ್ಹಾಳ್ತಾ, 'ಕಾಶ್ಮೀರಾ ಥಾವ್ನ್ ಕನ್ಯಾಕುಮಾರಿ ಪರ್ಯಾಂತ್' ಮ್ಹಣ್. ವ್ಹಯ್, ಭಾರತ್ ಏಕ್ ವಿಶಾಲ್ ದೇಶ್. ಮಸ್ತಕಾರ್ ಆಪ್ಲ್ಯಾ ಸೊಭಾಯೆನ್ ಭರ್॑ಲ್ಲೊ, ಸಂಸಾರಾಂತ್‍ಚ್ ಸರ್ಗ್ ಮ್ಹಣ್ ನಾಂವಾಡ್‍ಲ್ಲೊ ಕಾಶ್ಮೀರ್ ಪ್ರಾಂತ್ಯ್ ಆನಿ ಹ್ಯಾ ವಿಶಾಲ್ ದೇಶಾಕ್ ರಾಕ್ಚೊ ಹಿಮಾಲಯಾ ಪರ್ವತ್ ಆಸಾ ತರ್, ದಕ್ಷಿಣಾಂತ್ ಭಾರತಾ ಮಾಂಯ್ಚಿಂ ಚರಣಾಂ ಹಿಂದ್ ಮಹಾ ಸಾಗೊರಾಚ್ಯಾ ಉದ್ಕಾಂತ್ ಥಳ್ಚಳ್ಚಿಂ ದಿಸ್ತಾತ್. ಅಸಲಿ ಸೊಭಾಯ್ ಸಂಸಾರಾಂತ್ಲ್ಯಾ ದುಸ್ರ್ಯಾ ಖಂಚಾಯೀ ರಾಷ್ಟ್ರಾಚ್ಯಾ ನಶೀಬಾಂತ್ ನಾಂಚ್ ಮ್ಹಣ್ ಸಾಂಗ್ಯೆತ್. ಹಿ ಭಾರತಾಚಿ ಭೌಗೋಳಿಕ್ ತಸ್ವೀರ್.
ಪುಣ್ ಭಾರತ್ ಮಾಂಯ್ಚ್ಯಾ ಪಾಸ್ಳೆಕ್ ಭಿಜಂವ್ಚ್ಯಾ ಪಯ್ಲ್ಯಾ ಪಾವ್ಸಾಚಿ ಕಾಣಿ ವೆಗ್ಳಿಚ್. ಹ್ಯಾ ಪಯ್ಲ್ಯಾ ಪಾವ್ಸಾ ವಿಶಿಂ ಕಾಂಯ್ ಉಲಂವ್ಕ್ ಆಸಾ ತರ್, ಉಲವ್ಣೆಂ ಸುರು ಜಾತಾ - 'ಕನ್ಯಾಕುಮಾರಿ ಥಾವ್ನ್ ಕೈಲಾಸ್ ಪರ್ಯಾಂತ್!' ಭಾರತಾಂತ್ ಪ್ರವೇಶ್ ಜಾಂವ್ಚ್ಯಾ ಪಯ್ಲ್ಯಾ ಪಾವ್ಸಾಚೆಂ ಪಯ್ಣ್ ಕನ್ಯಾಕುಮಾರಿ ಥಾವ್ನ್ ಸುರು ಜಾವ್ನ್ ಹಿಮಾಲಯಾಂತ್ ವಚೊನ್ ಸಂಪ್ತಾ. ಪಯ್ಲ್ಯಾ ಪಾವ್ಸಾಚೊ ಮೊಡಾಂ ಝೆಲೊ ಹಿಮಾಲಯಾಚ್ಯಾ ಗೌರಿಶಂಕರ್ ಶಿಖರಾಚ್ಯಾ ಗಳ್ಯಾಂತ್ ವಚೊನ್ ಪಾವ್ಲೊ ತರ್, ಹೆಂ ಲಾಂಬ್ ಪಯ್ಣ್ ಸಾರ್ಥಕ್ ಮ್ಹಣ್ ಅರ್ಥ್. ಆನಿ ಹಾಚೊ ಮಹತ್ವ್ ಎವರೆಸ್ಟ್ ಶಿಖರಾಚೆರ್ ಜಯ್ತ್ ವ್ಹೆಲ್ಲ್ಯಾ ತಿತ್ಲೊಚ್ ಜಾವ್ನಾಸ್ತಾ ಮ್ಹಣ್ ಸಬಾರಾಂಚಿ ಅಭಿಪ್ರಾಯ್!
ಭೌಗೋಳಿಕ್ ಲೆಕಾ ಪ್ರಮಾನೆ ಸಾಂಗ್ಚೆಂ ತರ್, ಆಮ್ಚ್ಯಾ ಭುಂಯ್ನ್ ದಕ್ಷಿಣಾಥಾವ್ನ್ ಉತ್ತರ್ ಕುಶಿಂ ಆಪ್ಲಿ ದಿಶಾ ಬದ್ಲುಂಚಿ ಪರಿಸ್ಥಿತಿ. ಹ್ಯಾ ಭೌಗೋಳಿಕ್ ಬದ್ಲಾವಣೆಚ್ಯಾ ಸಂದರ್ಭಾರ್ ಸೂರ್ಯಾಚಿಂ ಕೀರ್ಣಾಂ ಸೀದಾ ದಕ್ಷಿಣ್ ವೃತ್ತಾರ್ ಆಸ್‍ಲ್ಲ್ಯಾ ಸಾಗೊರಾಂಚೆರ್ ಪಡೊನ್ ಸಾಗೊರ್ ಹುನ್ ಜಾಂವ್ಕ್ ಸುರು ಜಾತಾತ್. ಹ್ಯಾ ಬದ್ಲಾವಣೆಚೊ ಅನ್ಭೋಗ್ ಆಮ್ಕಾಂಯೀ ಸವ್ಕಾಸ್ ಕಳೊನ್ ಯೆತಾ. ದೀಪಾವಳಿ ಸಂದರ್ಭಾರ್ ಝಳ್ಕೊಂಚೆಂ ತೆಂ ಸಾಮಾನ್ಯ್ ಥಂಡ್ ಆನಿ ಧಗ್ ಮಿಶ್ರಿತ್ ವಾತಾವರಣ್ ಮಾರ್ಚ್ ಎಪ್ರಿಲ್ ಮಹಿನೊ ಯೆತಾನಾ ಸವ್ಕಾಸ್ ಬದ್ಲಾತಾ ಆನಿ ಧಗ್ ಮನ್ಶಾಕ್ ಧೊಸುಂಕ್ ಸುರು ಕರ್ತಾ. ಹಿ ಪ್ರಕ್ರಿಯಾ ಪಯ್ಲಿ ದಕ್ಷಿಣ್ ಭಾರತಾಂತ್ ಸುರು ಜಾತಾ ಆನಿ ಉತ್ತರಾ ಕುಶಿಂ ಆಪ್ಲೆಂ ಪಯ್ಣ್ ಮುಂದರ್ಸಿತಾ. ತಶೆಂ ಮ್ಹಳ್ಳ್ಯಾರ್ ದಕ್ಷಿಣ್ ಭಾರತಾಚ್ಯಾ ಲೊಕಾಕ್ ಗಿಮೆ ದೀಸ್ ತರ್ ಉತ್ತರ್ ಭಾರತಾಚ್ಯಾ ಲೊಕಾ ಖಾತಿರ್ ಕಠೀಣ್ ಧಗಿಚೆ ದೀಸ್!
ದಕ್ಷಿಣ್ ಗೋಲಾರ್ಧಾಚ್ಯಾ ಸಾಗೊರಾ ವಯ್ರ್ ಆಯ್ತಿಂ ಜಾಲ್ಲ್ಯಾ ಪಾವ್ಸಾ ಮೊಡಾಂಕ್ ಕರಾವಳಿ ಕುಶಿಂ ಯೇಂವ್ಕ್ ಕುಮೊಕ್ ಕರ್ತಾ. ಗಿಮೆ ದಿಸಾನಿಂ ಭೌಗೋಳಿಕ್ ಬದ್ಲಾವಣೆ ನಿಮ್ತಿಂ ವ್ಹಾಳೊಂಕ್ ಲಾಗ್ಚೆಂ ವಾರೆಂ, ಪಶ್ಚಿಮ್ ಥಾವ್ನ್ ಪೂರ್ವ್ ಕುಶಿಂ ವ್ಹಾಳೊಂಕ್ ಲಾಗ್ತಾ ಆನಿ ಆಬ್ಳೆ ಹೆಂಚ್ ವಾರೆಂ, ದರ್ಯಾವಯ್ಲಿಂ ಮೊಡಾಂ, ಧರ್ನಿ ಕುಶಿಂ ಆಪ್ಲೆಂ ಪಯ್ಣ್ ಸುರು ಕರುಂಕ್ ಕುಮೊಕ್ ಕರ್ತಾತ್. ಪ್ರಕೃತೆಕ್ ಜಿವಾಳ್ ಕರುಂಕ್, ಭಾರತಾ ವಯ್ರ್ ಪಾವ್ಸ್ ಹಾಡುಂಕ್, ಸಗ್ಳ್ಯಾ ಧರ್ನಿಕ್ ಪಾಚ್ವ್ಯಾವರ್ಣಾನ್ ರಂಗಂವ್ಕ್ ಹೆಂಚ್ ವಾರೆಂ ಪ್ರಮುಖ್ ಪಾತ್ರ್ ಖೆಳ್ತಾ.
ಧಗ್ ಚಡ್ಲಿ ಮ್ಹಣ್ತಾನಾ ಹಾಚೊ ಪ್ರಭಾವ್ ಧರ್ನಿಚೆರ್ ತಶೆಂಚ್ ದರ್ಯಾಚೆರ್ ಸಮಾಸಮ್ ಪಡ್ತಾ. ಎಕಾ ಕುಶಿ ಧರ್ನ್ ತಾಪ್ತಾನಾ ದುಸ್ರ್ಯಾ ಕುಶಿಂ ದರ್ಯೊಯೀ ತಾಪ್ತಾ. ಧರ್ನ್ ತಾಪ್‍ಲ್ಲ್ಯಾ ಸಂದರ್ಭಾರ್ ಧರ್ನಿ ವಯ್ಲೆಂ ವಾರೆಂ ಫುಲ್ತಾ ತಶೆಂ ಹಾಳು ಜಾತಾ. ಆನಿ ಆಕಾಸಾ ಕುಶಿಂ ವ್ಹಾಳೊಂಕ್ ಸುರು ಜಾತಾ. ತ್ಯಾ ಸಂದರ್ಭಾರ್ ಆಕಾಸಾಚೆರ್ ಏಕ್ ರಿಕ್ತ್ ಸ್ಥಾನ್ ಉಬ್ಜಾತಾ. ಹೆಂ ರಿಕ್ತ್ ಸ್ಥಾನ್ ಭರುನ್ ಘೇಂವ್ಕ್ ಆಮ್ಚಿ ಭುಮಿ ದರ್ಯಾ ಕುಶಿ ಥಾವ್ನ್ ವ್ಹಾಳೊನ್ ಯೆಂವ್ಚ್ಯಾ ಮೊಡಾಂಕ್ ಆಪ್ಣಾ ಥಂಯ್ ಆಕರ್ಶಿತ್ ಕರ್ತಾ. ಅಶೆಂ ಧಗಿ ನಿಮ್ತಿಂ ದರ್ಯೊ ಮೊಡಾಂಕ್ ಜಲ್ಮ್ ದಿತಾ. ಧರ್ನಿ ವಯ್ಲೆಂ ರಿಕ್ತ್ ಸ್ಥಾನ್ ಮೊಡಾಂಕ್ ಧರ್ನಿ ಕುಶಿಂ ಆಕರ್ಶಿತ್ ಕರ್ತಾ ಆನಿ ಹಿ ಭೌಗೋಳಿಕ್ ಪ್ರಕ್ರಿಯಾ ಪಾವ್ಸಾ ರುಪಾರ್ ಸಂಪೂರ್ಣ್ ಭಾರತಾಕ್ ಭಿಜೊನ್ ಸೊಡ್ತಾ. ಅಶೆಂ ಭಾರತಾಚೊ ದಕ್ಷಿಣ್ ಭಾಗ್ ಕನ್ಯಾಕುಮಾರಿ ಪ್ರದೇಶಾ ಥಾವ್ನ್ ಸುರು ಜಾಲ್ಲೆಂ, ಹೆಂ ಪಾವ್ಸಾ ಮೊಡಾಂಚೆಂ ಪಯ್ಣ್ ಉತ್ತರ್ ಭಾರತಾಚ್ಯಾ ಹಿಮಾಲಯಾ ಪ್ರದೇಶಾಕ್ ಪಾವ್‍ಲ್ಲೆಂಚ್ ಭಾರತ್ ಮಾಂಯ್ಚ್ಯಾ ಅದೃಷ್ಟಾಚಿಂ ದಾರಾಂ ಉಗ್ತಿಂ ಜಾತಾತ್.
ಕೇರಳಾಚ್ಯಾ ತಡಿರ್ ಥಾವ್ನ್ ಅರುಣಾಚಲ್ ಪ್ರದೇಶಾಚ್ಯಾ ಅಂತಿಮ್ ಪೊಂತಾರ್ (ಹಿಮಾಲಯಾಚ್ಯಾ ದೊಂಗ್ರಾರ್) ಪಾವೊಂಕ್ ಹ್ಯಾ ಮೊಡಾಂಕ್ ದೇಡ್ ಮಹಿನೊ ಲಾಗ್ತಾ. ಹಾಂಗಾಸರ್ ದಿಲ್ಲ್ಯೊ ಹ್ಯೊ ಸರ್ವ್ ಸಂಗ್ತಿ ಆಜ್ ಆಮಿ ಟಿ.ವಿ. ಮುಕಾಂತ್ರ್ ರೂಪ್ ರೂಪ್ ಪಳೆವ್ನ್ ಆಸಾಂವ್. ಸಾಮಾನ್ಯ್ ಜಾವ್ನ್ ಜೂನ್ ಪಯ್ಲೆಂಚ್ ಅರಬಿ ದರ್ಯಾಂತ್ ಉಟ್‍ಲ್ಲ್ಯಾಮೊಡಾಂಕ್ ಬೊಂಬಯ್ ಶಹರಾಲಾಗಿಂ ಪಾವೊಂಕ್ ಧಾ ದೀಸ್ ಲಾಗ್ತಾತ್. ದಿಲ್ಲಿ ಪಾವೊಂಕ್ 29 ದೀಸ್ ಆನಿ ಹಿಮಾಲಯಾ ಕುಶಿಂ ಅಸ್ಸಾಂ ಆನಿ ಅರುಣಾಚಲ್ ಪ್ರದೇಶಾಕ್ ಪಾವೊಂಕ್ 45 ದೀಸ್. ಹೆ 45 ದೀಸ್ ಪೂರ್ಣ್ ಜಾತಾಸ್ತಾನಾ, ಸಗ್ಳೊ ಭಾರತ್ ವರ್ಸಾಚ್ಯಾ ಪಯ್ಲ್ಯಾ ಪಾವ್ಸಾಚೊ ಸಂಪೂರ್ಣ್ ಅನ್ಭೋಗ್ ಜೊಡ್ತಾ. ಭುಂಯ್ ಪಾಚ್ವ್ಯಾ ವರ್ಣಾನ್ ಸೊಭೊಂಕ್ ಲಾಗ್ತಾ. ಏಕ್ ನವೊ ಉತ್ಸಾಹ್ , ಉಲ್ಲಾಸ್ ಸಗ್ಳ್ಯಾನಿತ್ಲ್ಯಾಕ್ ಪಳೆಂವ್ಕ್ ಮೆಳ್ತಾ.
ಹರ್ಯೆಕಾ ವರ್ಸಾ ಭಾರತಾಚೊ ಹವಾಮಾನ್ ಇಲಾಖೊ, ದರ್ಯಾಚಿ ದಾವ್, ವಾರೆಂ ಆನಿ ಹಿಂವೆಚಿ ಪರಿಸ್ಥಿತಿ ಹ್ಯಾ ವಿಶಿಂ ಮಾಹೆತ್ ಎಕ್ಟಾಂಯ್ ಕರ್ನ್, ಲೇಕ್ ಘಾಲ್ನ್, ಮುಂಗಡ್‍ಚ್ ಲೊಕಾಕ್ ಪಾವ್ಸಾ ವಿಶಿಂ ಕಳಯ್ತಾ. ಹ್ಯಾ ವರ್ಸಾಯೀ ತಾಣಿಂ ಯೆದೊಳ್‍ಚ್ ಆಮ್ಕಾಂ ಕಳವ್ನ್ ಜಾಲಾಂ.ತಾಣಿಂ ಕಳಯಿಲ್ಲ್ಯಾ ಪ್ರಮಾಣೆಂ ಹ್ಯಾ ವರ್ಸಾ ಆಮ್ಕಾಂ ಬರೊ ಪಾವ್ಸ್ ಆಸಾ ಮ್ಹಳ್ಳಿ ಬರಿ ಖಬಾರ್ ದೀವ್ನ್ ಸಕ್ಡಾಂಕ್, ಪ್ರತ್ಯೇಕ್ ಜಾವ್ನ್ ರೈತಾಂಕ್ ಧಯ್ರ್ ದಿಲಾಂ, ಧಾದೊಶಿ ಕೆಲಾಂ.
ಖರೆಂಚ್ ಸಾಂಗ್ಚೆಂ ತರ್, ಭಾರತಾಚಿ ಆರ್ಥಿಕ್ ಪರಿಸ್ಥಿತಿ, ಆಮ್ಕಾಂ ಮೆಳ್ಚ್ಯಾ ಪಾವ್ಸಾಚೆರ್ ಹೊಂದೊನ್ ಆಸಾ. ಹೆಂ ಸರಾಸರ್ ಸತ್ ಜಾವ್ನಾಸಾ. ಭಾರತಾಕ್ ಯೆಂವ್ಚೊ ಪಯ್ಲೊ ಪಾವ್ಸ್ ಹಾಚೆಂ ಪ್ರಮಾಣ್, ಸಗ್ಳ್ಯಾ ವರ್ಸಾಚ್ಯಾ ಪಾವ್ಸಾಚೆಂ 80% ಜಾವ್ನಾಸಾ. ಪಾವ್ಸೊ ಬರೊ ಪಡ್ಲೊ ತರ್, ಸರ್ವಾಂಚ್ಯಾ ತೊಂಡಾಚೊ ಜಿನೊಸ್‍ಚ್ ವೆಗ್ಳೊ, ರೈತ್ ಖುಶ್ ತರ್ ಸರ್ವಾಂ ಧಾದೊಶಿ! ಕಾರಣ್, ಭಾರತಾಚ್ಯಾ ಆದಾಯಾಚೊ ಕಾಲ್ದೊ ವಾಂಟೊ ರೈತಾಚಾ ಮ್ಹಿನತೆಚೆರ್ ಹೊಂದೊನ್ ಆಸ್ತಾ. ರೈತ್ ಘಟ್ ಜಾತಾನಾ ಹೆರ್ ಉದ್ಯಮ್‍ಯೀ ವಿಕಸಿತ್ ಜಾತಾತ್.
6.3 ಲಾಖಾಂ ವಯ್ರ್ ಆಸ್‍ಲ್ಲ್ಯಾ ಆಮ್ಚ್ಯಾ ಹಳ್ಳೆಂಕ್ ವರ್ಸಾಚೊ ಪಯ್ಲೊ ಪಾವ್ಸ್ ಖರೊ ದೇವ್! ಹ್ಯಾ ಹಳ್ಳೆಂನಿ ಸದಾಂಚ್ ಲೋಕ್ ಸಂತೊಸ್ ಭರಿತ್ ಆಸೊಂದಿತ್ ಮ್ಹಣ್ ಭಾರತಾಂತ್ ವಾವುರ್ಚ್ಯೊ ಬಹುರಾಷ್ಟ್ರೀಯ್ ಕಂಪೆನಿ ರಾತ್ ಆನಿ ದೀಸ್ ಮಾಗೊನ್ ಆಸ್ತಾತ್ ಖಂಯ್. ಕಾರಣ್, ಹಳ್ಳೆಂತ್ಲೊ ರೈತ್ ಆರ್ಥಿಕ್ ಮಟ್ಟಾರ್ ಬಳ್ವಂತ್ ಜಾಲ್ಯಾರ್, ಬಹುರಾಷ್ಟ್ರೀಯ್ ಕಂಪೆನಿಂಕ್ ಹ್ಯಾ ರೈತಾಂ ಥಾವ್ನ್॑ಚ್ ಆದಾಯಾಚಿ ವಾಟ್ ಉಗ್ತಿ ಜಾತಾ ಖಂಯ್.
ಪಾಟ್ಲ್ಯಾ ವರ್ಸಾಂನಿ ಭಾರತಾಚ್ಯಾ ಸರ್ವ್ ಜಾಗ್ಯಾಂನಿ ಜಾಯ್ ಪುರ್ತೊ ಪಾವ್ಸ್ ಯೇನಾತ್‍ಲ್ಲ್ಯಾ ವರ್ವಿಂ, ಸಕ್ಡಾಂ ವರ್ನಿಂ ಚಡ್ ನಿರಾಶಾ ಹ್ಯಾ ಬಹುರಾಷ್ಟ್ರೀಯ್ ಕಂಪೆನಿಂಕ್ ಭೊಗ್ಲ್ಯಾ. ಹವಾಮಾನ್ ಇಲಾಖೆನ್ ಹ್ಯಾ ವರ್ಸಾ ಪಾವ್ಸಾ ವಿಶಿಂ ಆಶಾದಾಯಕ್ ಮಾಹೆತ್ ದಿಲ್ಯಾ, ಹಾಕಾ ಆಮಿ ಸ್ವಾಗತ್ ಸಾಂಗ್ಯಾಂ. ಜರ್ ಪಾವ್ಸ್ ಬರೊ ಆಯ್ಲೊ ಹ್ಯಾ ವರ್ಸಾಚೆಂ ಮೊಂತಿ ಮಾಯೆಚೆಂ ಫೆಸ್ತ್ ಆಮಿ ಗದ್ದಾಳಾಯೆನ್ ಆಚರಣ್ ಕರ್ಯಾಂ.
ಪಾವ್ಸಾ ಕಾಳಾಚ್ಯಾ ಸಮಸ್ಯಾಂಕ್ ಸಂಪೆ ಪರಿಹಾರ್:
ಪಾವ್ಸಾಳ್ಯಾ ದಿಸಾಂನಿ ಆಮ್ಕಾಂ ಗರ್ಜ್ ನಾ ಮ್ಹಣ್ ಭೊಗ್ಚ್ಯಾ ವಸ್ತುಂಕ್ ಗಿಮೆ ದಿಸಾನಿಂಚ್ ವೊತಾಕ್ ಸುಕೊವ್ನ್, ನಿತಳ್ ಕರ್ನ್, ವೊರೆ ವಿಂಗಡ್ ಜಾಗ್ಯಾರ್ ದವರ್ಲ್ಯಾರ್ ಬೋವ್ ಬರೆಂ. ದೃಶ್ಟಾಂತಾಕ್, ವಾಚುನ್ ಕೊನ್ಶಾರ್ ಉಡಯಿಲ್ಲಿಂ ಪೆಪರಾಂ, ಪರ್ನೆ ಬೂಕ್, ಕಾಗ್ದಾಂ... ಇತ್ಯಾದಿ. ಪಾವ್ಸಾಳ್ಯಾ ದಿಸಾಂನಿ ಹ್ಯೊ ವಸ್ತು ಶೆಳ್ ವೋಡ್ನ್ ಘೆತಾತ್ ಜಾಲ್ಲ್ಯಾ ನಿಮ್ತಿಂ ತಾಂಚೆ ಥಾವ್ನ್ ಏಕ್ ವಿಶೇಸ್ ಘಾಣ್ ಯೇಂವ್ಕ್ ಸುರು ಜಾತಾ. ಹೆಂ ಆಡಾಂವ್ಕ್ ಸುಕ್‍ಲ್ಲ್ಯಾ ಬೆವಾ ಪಾಲ್ಯಾಚೊ ಪಿಟೊ ಯಾ ಕರ್ಪೂರಾಚೊ ಪಿಟೊ ಹ್ಯಾ ವಸ್ತುಂ ಸಾಂಗಾತಾ ದವರ್ಲ್ಯಾರ್ ಹಿ ಘಾಣ್ ಸುಲಭಾಯೆನ್ ಆಡಾವ್ಯೆತ್.
ಪಾವ್ಸಾಳ್ಯಾ ದಿಸಾಂನಿ ಪಾಂಯಾಂಕ್ ಮ್ಹೆಳಿ ಮಾತಿ, ಕಿಚಡ್, ಮ್ಹೆಳೆಂ ಉದಾಕ್ ಲಾಗ್‍ಲ್ಲ್ಯಾ ವೆಳಾರ್ ಪಾಂಯ್ ಮ್ಹೆಳೆ ಜಾತಾತ್. ದಾರಾ ಬಾಗ್ಲಾರ್ ಆಮಿ ಪಯ್ಲೆಂಚ್ ಏಕ್ ಉದ್ಕಾಚಿ ಬಾಲ್ದಿ ಆನಿ ಪಾಂಯ್ ಪುಸುಂಕ್ ದಾಟ್ ಲುಗ್ಟಾಚಿ (ಗೊಣಿಯೆಚಿ) ವ್ಯವಸ್ಥಾ ಕೆಲಿ ತರ್, ಘರಾ ಭಿತರ್ ರಿಗ್ಚ್ಯಾ ಪಯ್ಲೆಂ ಪಾಂಯ್ ಧುವ್ನ್ ನಿತಳ್ ಜಾವ್ನ್ ಭಿತರ್ ಯೆವ್ಯೆತ್ ಆನಿ ಘಡ್ಯೆ ಘಡ್ಯೆ ಧರ್ನ್ ಪುಸ್ಚೆಂ ಆಡಾವ್ಯೆತ್.
ಪಾವ್ಸಾಳ್ಯಾ ದಿಸಾಚಿ ಆನ್ಯೇಕ್ ವಿಶೇಸ್ ಕರಂದಾಯ್ ಜಾವ್ನಾಸಾ ವಸ್ತುರ್ ಸುಕಾನಾಸ್ತಾಂ ಉರ್ಚೆಂ. ಹ್ಯಾ ಸಮಸ್ಯಾ ಥಾವ್ನ್ ಬಚಾವ್ ಜಾಂವ್ಕ್ ಸಂಪಿ ವಾಟ್ ಜಾವ್ನಾಸಾ ಕಾಟನಾಚಿಂ ಪಾತಳ್ ವಸ್ತುರಾಂ ನೆಸ್ಚಿಂ. ಹಿಂ ವಸ್ತುರಾಂ ಸುಕೊಂಕ್ ವಾರೆಂ ಪಾವ್ತಾ. ಸಿಂಥೆಟಿಕ್ ವಸ್ತುರಾಂ ಪಾವ್ಸಾಳ್ಯಾ ದಿಸಾಂನಿ ಜಾತಾತಿತ್ಲಿಂ ಪಯ್ಸ್ ದವರ್ಚಿಂಚ್ ಬರೆಂ.
ಘಾಲ್ಲ್ಯಾ ವಸ್ತುರಾಂಚಿ ಹಿ ಸಮಸ್ಯಾ ತರ್, ಕಬಾಟಾಂನಿ, ಪೆಟೆಂನಿ, ದವರ್ಲೆಲ್ಯಾ ವಸ್ತುರಾಂಕ್‍ಯೀ ಪಾವ್ಸಾಳ್ಯಾ ದಿಸಾಂನಿ ಬರ್ಕತ್ ನಾ. ಹಾಂಗಾಸರ್ ವಸ್ತುರಾಂ ದವರ್ಲ್ಯಾ ಕಡೆನ್‍ಂಚ್ ಫಂಗಸ್ ಮಾಂಡುನ್ ಘಾಣ್ ಯೇಂವ್ಕ್ ಸುರು ಜಾತಾತ್. ದೆಕುನ್ ಗಿಮೆ ದಿಸಾನಿಂಚ್ ವ ವೋತ್ ಪಡ್‍ಲ್ಲ್ಯಾ ತೆದ್ನಾಂ, ವಸ್ತುರ್ ಬರೆಂ ಕರ್ನ್ ವೊತಾಕ್ ಸುಕೊವ್ನ್ ಭಿತರ್ ದವರ್ಲ್ಯಾರ್ ಅಸಲೆ ಸಮಸ್ಯೆ ಉಣೆಂ ಜಾತಾತ್.
ಟ್ರಂಕ್, ಪೆಟ್ಯೊ (ಆಸಾತ್ ತರ್), ಹಾಂತುನ್ ವಸ್ತುರಾಂ ದವರ್ತಾನಾಂ, ಪಂದಾಕ್ ಕಸಲೆಂಯೀ ತರೀ ಪರ್ನೆ ಲುಗಾಟ್ (ವೋಲ್ ವ ಲುಂಗಿ) ದವರ್ನ್ ತಾಚ್ಯಾ ಇಡ್ಯಾಂನಿ ಕರ್ಪೂರ್ ದವರ್ಲ್ಯಾರ್ ಘಾಣ್ ಪಯ್ಸ್ ಧಾಂವ್ತಾ. ವಸ್ತುರ್ ಪರ್ಮಳಿಕ್ ಉರ್ತಾ. ಅಶೆಂಚ್ ಆಮಿ ನಿದ್ಚ್ಯಾ ಗಜ್ಡೆ ಪೊಂದಾ ಕರ್ಪೂರ್ ದವರ್ಲ್ಯಾರ್ ಯಾ ಧುಂಪಾಚೊ ಧುವರ್ ಸೊಡ್ಲ್ಯಾರ್ ಘಾಣ್ ಘರಾಂತ್ಲಿ ಭಾಯ್ರ್ ವಚೊನ್ ಘರಾಂತ್ ಥಂಡಾಯ್ ಉಣಿ ಜಾತಾ ಆನಿ ಜಾಳಾರಿಂಚ್ಯೊ ಧೊಶಿಯೀ ಉಣ್ಯೊ ಜಾತಾತ್. ಲ್ಹಾನ್ ಭುರ್ಗಿಂ ಆಸ್‍ಲ್ಲಿಂ ಕಪ್ರೂರ್ ಉಪ್ಯೋಗ್ ಕರ್ತಾನಾ, ಚತ್ರಾಯ್ ಸಾಂಬಾಳಾ!
ಜರ್ ಘರ್ಚಿ ವೊಣೊದ್ ಪಾವ್ಸಾಚ್ಯಾ ಉದ್ಕಾ ನಿಮ್ತಿಂ ಭಿಜೊನ್ ಶೆಳ್ ಯೆಂವ್ಚಿ ದಿಸ್ತಾ ಜಾಲ್ಯಾರ್, ಮೀಟ್ ಲಾಯಿಲ್ಲ್ಯಾ ಕಾಗ್ದಾನ್ ಪುಸುನ್ ಕಾಡಿಜೆ. ಉಪ್ರಾಂತ್ ಚುನೊ ವೊಡಿಜೆ. ತೆದ್ನಾಂ ವೊಣ್ತಿರ್ ಶೆಳ್ ಯೆಂವ್ಚಿ ಉಣಿ ಜಾತಾ.
ವ್ಹಾಣೊ, ಪರ್ಸ್, ಚಾಂಬ್ದ್ಯಾಚೆಂ ಬ್ಯಾಗ್, ಬೆಲ್ಟ್, ಫಾಯ್ಲ್ - ವೋತ್ ಯೆತಾನಾ ವೊತಾಕ್ ದವರಿಜೆ. ತಿಂ ನಿತಳ್ ದಿಸಾಜೆ ತರ್ ತಾಕಾ ಇಲ್ಲೆಂ ನಾರ್ಲಾ ತೇಲ್ ಲಾಯ್ಲ್ಯಾರ್ ಬರೆಂ. ಸಾಂಗಾತಾಚ್ ಹ್ಯಾ ವಸ್ತುಂ ಭಿತರ್ ಲಂವ್ಗಾಂ ಘಾಲ್ಯಾರ್, ಕಿಡಿ ಇತ್ಯಾದಿಂಕ್ ಭಿತರ್ ರಿಗೊಂಕ್ ಆವ್ಕಾಸ್ ಮೆಳಾನಾ.
ಪಾವ್ಸಾಳ್ಯಾ ದಿಸಾಂನಿ ಪಿಯಾವ್, ಲೊಸುಣ್ ಹಾಕಾ ಮುಂಗೆ ಯೆಂವ್ಚೆ ಸಾಮಾನ್ಯ್. ಹೆಂ ಆಡಾಂವ್ಕ್ ಸಂಪೊ ಉಪಾಯ್, ಹ್ಯೊ ವಸ್ತು ಉದ್ಕಾಚಿ ಶೆಳ್ ನಾತ್‍ಲ್ಲ್ಯಾ ಜಾಗ್ಯಾರ್ ದವ್ರಿಜೆ. ಆದಿಂ ರಾಂದೊಣ್ ಆಸ್‍ಲ್ಲ್ಯಾ ಕಡೆಂ ಉತ್ವಾರ್ ಹ್ಯೊ ವಸ್ತು ದವರ್ತಾಲೆ. ಹಿ ಏಕ್ ಉತ್ತೀಮ್ ರೀತ್‍ಯೀ ಜಾವ್ನಾಸ್‍ಲ್ಲಿ.
ಸುರಿ, ಕಾತರ್, ಕೊಯ್ತಿ ಯಾ ಲೊಂಕ್ಡಾಚ್ಯೊ ಕಸಲ್ಯೊಯೀ ವಸ್ತು ಪಾವ್ಸಾಳ್ಯಾ ದಿಸಾಂನಿ ಮಾತಿ ಖಾಂವ್ಚ್ಯೊ ಏಕ್ ಸಾಮಾನ್ಯ್ ವಿಷಯ್. ಹೆಂ ಆಡಾಂವ್ಕ್ ಹ್ಯಾ ವಸ್ತುಂಚೊ ಉಪ್ಯೋಗ್ ಜಾಲ್ಯಾ ಉಪ್ರಾಂತ್, ತ್ಯೊ ಧುವ್ನ್, ಸುಕ್ಯಾ ವಸ್ತುರಾಂತ್ ಬರೆಂ ಕರ್ನ್ ಪುಸುನ್, ತಾಕಾ ಇಲ್ಲೆಂ ತೇಲ್ ಲಾವ್ನ್ ದವರ್ಲ್ಯಾರ್ ಮಾತಿ ಖಾಂವ್ಚೆ ರಗ್ಳೆ ಆಸಾನಾಂತ್.
ಪಾವ್ಸಾಂತ್ ದಾರಾಂ, ಬಾಗ್ಲಾಂ ಫುಗ್ಚಿಂ, ಬಿಜಾಕ್ರ್ಯಾಂನಿ ಆವಾಜ್ ಯೆಂವ್ಚೊ, ಹೆಂ ಹರ್ಯೆಕಾ ಘರಾಂನಿ ಆಮ್ಕಾಂ ಪಳೆಂವ್ಕ್ ಮೆಳ್ತಾ. ಹೆಂ ಆಡಾಂವ್ಕ್ ಇಲ್ಲೆಂ ಚಿಮ್ಣೆ ತೇಲ್ ಯಾ ಭುಂಯ್‍ಚಣ್ಯಾಚೆಂ ತೇಲ್ ಬಾಗ್ಲಾಂ, ದಾರಾಂಕ್, ಬಿಜಾಕ್ರ್ಯಾಂಕ್ ಪುಸ್ಲ್ಯಾರ್, ಹೆ ತೊಂದ್ರೆ ಮಾಯಾಗ್ ಜಾತಾತ್.
ತುಳಸಿ ಪಾನಾಂ, ಕಸ್ರಿ ಪಾನಾಂ, ಸುಕಿ ಸುಂಠ್, ಮಿರ್ಸಾಂಗ್, ಹಳದ್, ಮ್ಹೊಂವ್... ಹ್ಯೊ ವಸ್ತು ಶೆಳಿನ್, ತಾಪಾನ್ ಕಷ್ಟಾತೆಲ್ಯಾಂಕ್ ತುರ್ತ್ ಪರಿಹಾರ್ ದೀಂವ್ಕ್ ಸಕ್ತಾತ್. ಹ್ಯಾ ವಿಶಿಂ ಘರ್ಚ್ಯಾ ಸ್ತ್ರೀಯಾಂನಿ ಇಲ್ಲಿ ಮಾಹೆತ್ ಆಪ್ಣಾವ್ನ್ ಘೆತ್ಲ್ಯಾರ್ ಚಡ್ ಬರೆಂ.
ಪಾವ್ಸಾಳೆ ದೀಸ್ ಆನಿ ಸರ್ಕಾರಾಚಿ ವೀಜ್ ವ್ಯವಸ್ಥಾ ಹಾಂಚ್ಯಾ ಮದ್ಲೊ ಸಂಬಂಧ್ 'ಚಾಡ್ಡೆ ದೋಸ್ತ್' ಮ್ಹಳ್ಳ್ಯಾಪರಿಂ. ಏಕ್ ಜೋರ್ ವಾರೆಂ ಆಯ್ಲೆಂ, ಗಡ್ಗಡೊ ಆಯ್ಲೊ ವ ಝಗ್ಲಾಣೆಂ ಮಾರ್ಲೆಂ ತರ್, ಕರೆಂಟ್ ನಪಂಯ್ಚ್! ತ್ಯೆ ದೆಕುನ್, ಘರಾಂತ್ ಆಮಿ ವಾತಿ, ಗ್ಯಾಸ್ ಲಾಯ್ಟ್, ಎಮರ್ಜೆನ್ಸಿ ಲಾಯ್ಟ್ ... ಇತ್ಯಾದಿ ಸದಾಂಚ್ ತಯಾರ್ ದವರಿಜೆ.
ಇಲ್ಲೆಂ ನಾರ್ಲಾಚೆಂ ತೇಲ್, ಕರ್ಪೂರ್, ಥೊಡಿಂ ತುಳಸಿಂ ಪಾನಾಂ, ಥೊಡ್ಯಾ ಉದ್ಕಾಂತ್ ಸಿಜವ್ನ್, ನಿವೊವ್ನ್ ಬಾಟ್ಲೆಂತ್ ಭರ್ನ್ ದವರಾ. ಶೆಳ್ ಜಾಲ್ಲ್ಯಾ ಸಂದರ್ಭಾರ್ ಹೆಂ ಇಲ್ಲೆಶೆಂ ಹುನ್ ಕರ್ನ್ ಕಪಾಲಾಕ್, ಆಂಗಾಕ್ ಪುಸ್ಲ್ಯಾರ್, ಜಾಯ್ತೆಂ ಬರೆಂಪಣ್ ಲಾಬ್ತಾ.
ಅಧಾರ್: ವಿವಿಧ್ ಮುಳಾಂ ಥಾವ್ನ್ ಆನಿ ಕಾಣಿಕ್
Tags:
Rain, Monsoon, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
2/27/2021 ಹೆರೊಲ್ಪಿಯುಸ್: ಏಕ್ ಅವ್ಚಿತ್ ಭೆಟ್...
-
12/20/2020 ಯುವಜಣಾಂಕ್ ಪ್ರೇರಣ್ - ಜೆಸ್ಸಿಕಾ ಆನ್ನಾ ಲಿಝಾ...
-
12/6/2020 ಆಸ್ತ್ ........
-
11/25/2020 ಭಾರತಾಚಿಂ ಖಬ್ರೆ ಟಿವಿ ಚಾನೆಲಾಂ ಮರಣ್ ಪಾವ್ಲ್ಯ...
-
11/9/2020 ನಾಂವ್ ಬದಲ್ಲ್ಯಾನ್ ಗಾಂವ್ ಬದಲ್ನಾಂ...!...
-
10/17/2020 ಮಂಗ್ಳುರ್‌ಚೊ ಖ್ಯಾತ್ ಗ್ರಾಫೊಲೊಜಿಸ್ಟ್, ಸ್ಟೇ&...
-
-
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
3 Comment/s.
Very good article... more than that very very creative. Thanks to maibhas...
The reality of olden days rainy season.The people were sincere,lovable and God fearing.The rain was blessing to the humanity.Those days are a history for the present and future generation.I was blessed to see the wonderful rainy season at my child hood.Thanks so much for high light this natural article,God bless you for your service to humanity through your literature skill and gift of talent. Mark Denis D'souza
The reality of olden days rainy season.The people were sincere,lovable and God fearing.The rain was blessing to the humanity.Those days are a history for the present and future generation.I was blessed to see the wonderful rainy season at my child hood.Thanks so much for high light this natural article,God bless you for your service to humanity through your literature skill and gift of talent. Mark Denis D'souza