From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಫಾಂತ್ಯಾಫರಾಚೆಂ ಆವ್ಘಡ್
Sunday, July 9, 2017
ನಿದೆಂತ್ ಜೋರಾನ್ ಘೊರೆತಾಲೊ ಅಲೋಕ್. ಖಾಟ್ಯೆರ್ ಬಗ್ಲೆನ್ ತಾಚಿ ಬಾಯ್ಲ್ ಮಾಲಿನಿ ಪಾಟ್ ಕರ್ನ್ ನಿದ್‍ಲ್ಲಿ. ಬಹುಶಾ ಘೊರೆಂವ್ಚೊ ಆವಾಜ್ ತಿಕಾ ಧೊಸ್ತಾಲೊ ಜಾಯ್ಜಾಯಿ. ಖಾಟ್ಯೆಚಾ ಸಕ್ಲಾ ತಾಚೆಂ ಎಕ್ಲೆಂಚ್ ಧುವ್ ಚೊವ್ದಾ ವರ್ಸಾಂಚೆಂ ಮುನ್ನಿ ನಿದ್ರಾವಶ್ಯ್ ಸ್ಥಿತೆರ್ ಆ‍ಸ್‍ಲ್ಲೆಂ. ಮಧ್ಯಾನ್ ರಾತ್ ಉತ್ರೊನ್ ವೇಳ್ ಫಾಂತ್ಯಾಕ್ ಲಾಗಿಂ ಸರ್ತಾಲೊ.
ತೆಂ ದೃಶ್ಯ್ ತಾಚೆ ಸಪ್ಣಾಂತ್ ಪರತ್ ಪರತ್ ಭೆಟ್ ಕರ್ನ್ ತಾಕಾ ಆವಾಕ್ಕ್ ಕರ್ತಾಲೆಂ. ರೆಸ್ಟೊರೆಂಟಾಂತ್ ರಾಕ್ವಲ್ಯಾಚೆಂ ಕಾಮ್ ಕರ್ಚೊ ತೊ ನೈಟ್-ಡ್ಯೂಟೆರ್ ಆಸ್ಲ್ಲೊ. ತ್ಯಾ ರಾತಿಂಯಿಂ ಮಧ್ಯಾನ್ ಪಾಶಾರ್ ಜಾವ್ನ್ ವೇಳ್ ತೀನ್ ವೊರಾಂ ಉತ್ರಾಲ್ಲಿಂ ಮಾತ್ರ್. ಕದೆಲಾರ್ ಜೆಮೆಂವ್ಚಾ ಅಲೋಕಾಕ್ ಆವಾಜಾನ್ ಚುರುಕ್ ಕೆಲ್ಲೊ. ಲಾಗ್ಸಾರ್ ವಾಹನ್ ಅಪ್ಟಾಲ್ಲೊ ಫಟ್ಪಟೊ ನಾದ್. ತೊ ಉಟೊನ್ ರಸ್ತ್ಯಾ ತೆವ್ಶಿನ್ ಧಾಂವ್‍ಲ್ಲೊ. ಏಕ್ ಆವ್ಗಾಡ್ ಘಡ್ಲಾಂ ಮ್ಹಣ್ ತಾಕಾ ಖಚಿತ್ ಜಾಲ್ಲೆಂ.
ರಸ್ತ್ಯಾಚಾ ತೆವ್ಶಿಲ್ಯಾನ್ ಏಕ್ ಬೇಕರಿ ಆಸ್‍ಲ್ಲಿ. ಬೇಕರಿ ಭಾಯ್ರ್ ಫುಟ್‍ಪಾತಿರ್ ಥೊಡೆ ನಿದೊನ್ ರಾತ್ ಪಾಶಾರ್ ಕರ್ಚೆಂ ತಾಣೆ ಆದಿಂ ಪಳೆಯಿಲ್ಲೆಂ. ತೆಂ ದೃಶ್ಯ್ ಆವ್ಚಿತ್ ಆತಾಂ ಅಸ್ತವೆಸ್ಥ್ ಜಾವ್ನ್ ಬೊಬಾಟ್ ಆನಿ ವಿಳಾಪಾಚೆಂ ಕೇಂದ್ರ್ ಜಾಲ್ಲೆಂ. ಪಾಟಿಂ ಫುಡೆಂ ಪಳೆಯ್ನಾಸ್ತಾನಾ ಆವ್ಗಾಡಾಚಾ ಘಟನಾ ಸ್ಥಳಾಲಾಗಿಂ ತೊ ಧಾಂವ್‍ಲ್ಲೊ. ಏಕ್ ಧೊವೆಂ SUV ವಾಹನ್ ರಸ್ತೊ ಸೊಡ್ನ್ ಫುಟ್‍ಪಾತಿಚೆರ್ ಪಾವ್‍ಲ್ಲೆಂ. ಫುಟ್‍ಪಾತಿರ್ ನಿದೊನ್ ಆಸ್ಚಾ ಮನ್ಶಾಂಚಾ ಆಂಗಾಚೆರ್ ಚಡೊನ್ ಬೇಕರಿಚಾ ಶಟರಾಕ್ ಅಪ್ಟಾಲ್ಲೆಂ. ಚಾರ್-ಪಾಂಚ್ ಜೀವ್ ವಾಹನಾಚಾ ಪಂದಾಕ್ ಸಾಂಪ್ಡಾಲ್ಲೆ. ರಗತ್ ಪಾಜಾರೊಂಕ್ ಲಾಗ್‍ಲ್ಲೆಂ. ತೆಂ ರಡ್ಣೆ ಆನಿ ಹಾಕ್‍ಬೊಬ್ ಪಳೆವ್ನ್ ತೊ ನರ್ವಸ್ ಜಾಲ್ಲೊ.
ಅಲೋಕ್ ವಾಹನಾಲಾಗಿಂ ಪಾವ್ತಾನಾ ಚಾಲಕಾಚಾ ಬಸ್ಕೆ ಥಾವ್ನ್ ದೆಂವ್ಚಾ ಮನ್ಶಾಚೆಂ ಮುಕಮಳ್ ವೀಜ್ ದಿವ್ಯಾಚಾ ಉಜ್ವಾಡಾಕ್ ತಾಣೆ ಸಾರ್ಕೆಂ ಪಳೆಯಿಲ್ಲೆಂ. ಚಾಲಕಾಚಾ ಬಸ್ಕೆ ಥಾವ್ನ್ ದೆಂವ್‍ಲ್ಲೊ ಮನಿಸ್ ಥಿರಾರ್ ನಾತ್‍ಲ್ಲೊ. ಆಮಾಲ್ ಸೇವನ್ ಕೆಲ್ಲ್ಯಾ ಜಿನ್ಸಿಂ ಲಕ್ತಾಲೊ. ತಾಚೆ ಜಿನೊಸಾಂತ್ ಗಿರೇಸ್ತ್ ಆನಿ ವಿಲಾಸಿ ಛಾಯಾ ಪ್ರತಿಫಲನ್ ಜಾತಾಲಿ. ಬಗ್ಲೆಚಾ ಬಸ್ಕೆ ಥಾವ್ನ್ ಭಾಯ್ರ್ ಆಯಿಲ್ಲ್ಯಾ ತಾಚೆ ಸಾಂಗಾತ್ಯಾನ್ ತಾಕಾ ಸಾಂಬಾಳ್ಳೊ. ಲಕ್ಚಾ ಗಿರೇಸ್ತ್ ಮನ್ಶಾಕ್ ದೆಕ್ತಾನಾ ತೊ ಪರಿಚಿತ್ ಮಣ್ಚೆ ಭೊಗಾಪ್ ಅಲೋಕಾಚಾ ಮತಿಂತ್ ಉದೆಲೆಂ ತರೀ ತಾಚಿ ಪರಿಚಯಿ ಜಾಲಿ ನಾ. ಪಾಟ್ಲೆ ಬಸ್ಕೆ ಥಾವ್ನ್ ಆನ್ಯೇಕ್ ವೆಕ್ತಿ ಘಾಬ್ರೆವ್ನ್ ದೆಂವ್ಲೊ. ತಾಣೆ ಸೆಲ್ ಫೋನಾರ್ ಮಟ್ವೆಂ ಸಂಭಾಷಣ್ ಕೆಲೆಂ.
ಗಲಾಟೊ ಜೋರ್ ಜಾತಾನಾ ಬೇಕರಿಂತ್ ನಿದೊನ್ ಆಸ್ಚಾ ಕರ್ಮಾಚಾರಿಂಕ್ ಜಾಗ್ ಜಾಲಿ. ತಾಣಿಂ ದಾರ್ ಉಘಡ್ಲೆಂ. ವಾಹನಾಚಾ ಪಂದಾಕ್ ಸಾಂಪ್ಡೊನ್ ದಡ್ಬಡ್ಚಾ ನಿರ್ಗತಿಕಾಂಚಾ ಮಜತೆಕ್ ತೆ ಮುಕಾರ್ ಸರ್ಲೆ. ತಿತ್ಲ್ತಾರ್ ಬೇಕರಿಚಾ ಏಕಾ ಕರ್ಮಾಚಾರಿನ್ ವಾಹನಾ ಥಾವ್ನ್ ದೆಂವೊನ್ ಲಕ್ಚಾ ಗಿರೇಸ್ತ್ ವೆಕ್ತಿಚಿ ವಳಕ್ ಧರ್ಲಿ.
"ತೊ ಶರ್ಮಾನ್. ವ್ಹಡ್ಲೊ ಗಾವ್ಪಿ." ಕರ್ಮಾಚಾರಿನ್ ಪ್ರಗಟ್ ಕೆಲೆಂ.
"ವ್ಹಯ್, ಹೆಂ ಶರ್ಮಾನಾಚೆಂ ವಾಹನ್." ದುಸ್ರ್ಯಾಂನಿ ಆವೇಶಾನ್ ತಕ್ಲಿ ಹಾಲಯ್ಲಿ ಆನಿ ಶರ್ಮಾನಾಚಾ ಭಂವ್ತಿಂ ವೆಡೊ ಘಾಲೊ. ಪ್ರತಿಷ್ಟಿತ್ ಗಾವ್ಪ್ಯಾಚಾ ಸಾಂಗಾತ್ಯಾನ್ ಶರ್ಮಾನಾಕ್ ಸಾಮಾನ್ಯ್ ಲೊಕಾ ಥಾವ್ನ್ ಅಲಗ್ ಕರ್ಚೆಂ ಪ್ರೇತನ್ ಕೆಲೆಂ ತರೀ ತೊ ಸಫಲ್ ಜಾಲೊನಾ.
"ಸೊರ್‍ಯಾಚಿ ಘಾಣ್ ಯೆತಾ. ಹೊ ಟೈಟ್ ಜಾಲಾ." ಕೋಣೆಂಗಿ ನಕ್ಲಾಂ ಕೆಲಿಂ.
"ಹಾಕಾ ಸೊಡಿನಾಕಾತ್. ಹಾಚೆ ವಾಹನಾನ್ ಪಾಪಾರ್‍ಯಾಂಕ್ ಮಾರ್ಲಾ." ಆನ್ಯೆಕ್ಲೊ ಮ್ಹಣಾಲೊ.
ಶರ್ಮಾನಾಚೆಂ ನಾಂವ್ ಕಾಡ್ತಾನಾ ಅಲೋಕಾಚಾ ಮತಿಂತ್ ಉಜ್ವಾಡ್ ಪೆಟ್ಲೊ. ಖಂಯ್ಸರ್‍‍ಗಿ ದೆಕ್ಲಾಂ ಮಣ್ಚೆಂ ಭೊಗಾಪ್ ಹೆಂಚ್ ಕಾರಣ್. ನಾಂವಾಡ್ದಿಕ್ ಆನಿ ಗಿರೇಸ್ತ್ ಶರ್ಮಾನಾಚೆಂ ನಾಂವ್ ಆಖ್ಖ್ಯಾ ದೇಶಾಂತ್ ಪರಿಚಿತ್. ತಾಚೆ ಸುಮಧುರ್ ತಾಳ್ಯಾನ್ ಯುವ ಜನಾಂಗಾಕ್ ಪಿಶ್ಯಾರ್ ಘಾಲ್ಲೆಂ. ಇಸ್ತಿಹಾರಾಚೆಂ ಹೋರ್ಡಿಂಗ್, ಪೋಸ್ಟರಾಂ ಆನಿ ಖಬ್ರೆ ಪತ್ರಾಂನಿ ತಾಚಿ ಝಳಕ್ ಅತೀ ಸಾಮಾನ್ಯ್. ಸಿನೆಮಾಂ ನಟಿಂ ಸಂಗಿಂ ತಾಚಿಂ ಪ್ರೇಮ್ ಪ್ರಕರಣಾಂ ಛಾಪ್ಯಾಚೊ ಜಾಗೊ ಭರ್ತಾಲಿಂ. ಶರ್ಮಾನ್ ಕೊರೋಡಾಂನಿ ಜೊಡ್ತಾ ಮ್ಹಣ್ ಲೋಕ್ ಸಾಂಗ್ತಾಲೊ. ತಾಚೆರ್ ಏಕ್ ದೀಷ್ಟ್ ಘಾಲುಂಕ್ ಸಾಮಾನ್ಯ್ ಲೋಕ್ ಸಪ್ಣೆತಾಲೊ.
ತೊ ಶರ್ಮಾನ್ ಫಾಂತ್ಯಾಫರಾರ್ ಏಕಾ ಆವ್ಗಾಡ್ ಜಾಗ್ಯಾರ್.... ತೇಂಯಿ ಆಮಾಲಿ ಸ್ಥಿತೆರ್!
ಮುಕ್ಲಿಂ ಬಾರಾ-ಪಂದ್ರಾ ಮಿನುಟಾಂ ವಿಶೇಸ್ ಗೊಂದೊಳಾಂತ್ ಪಾಶಾರ್ ಜಾಲಿಂ. ತಿತ್ಲ್ಯಾರ್ ಏಕ್ ಕಾರ್ ವೇಗಾನ್ ಯೇವ್ನ್ ಥಂಯ್ಸರ್ ರಾವ್ಲೆಂ. ಕಾರಾ ಥಾವ್ನ್ ದೋಗ್ ವೆಕ್ತಿ ದೆಂವ್ಲೆ. ತೆ ಶರ್ಮಾನಾಚಾ ಭಾವಾ ಪರಿಂ ದಿಸ್ತಾಲೆ. ತಾಣಿ ಜಮೊ ಶಿಂದುನ್ ಶರ್ಮಾನಾಕ್ ಸ್ವತಂತ್ರ್ ಕೆಲೊ. ಪರಿಗತ್ ಅರ್ಥ್ ಕರ್ಚ್ಯಾ ಭಿತರ್ ಶರ್ಮಾನಾಕ್ ಕಾರಾರ್ ಘಾಲ್ನ್ ತೆ ಥಂಯ್ ಥಾವ್ನ್ ಮಾಯಾಗ್ ಜಾಲೆ. ಉಪ್ರಾಂತ್ ಪೋಲಿಸ್ ಆನಿ ಅಂಬುಲೆನ್ಸಾಚೆ ಯೆಣೆ ಜಾಲೆಂ. ಪೋಲಿಸಾಂನಿ ಧೊವೆಂ SUV ವಾಹನ್ ಆಪ್ಲೆ ತಾಬೆನ್ ಘೆತ್ಲೆಂ. ಆವ್ಗಾಡಾಂತ್ ಜಕ್ಮಿ ಜಾಲ್ಲ್ಯಾ ನಿರ್ಗತಿಕಾಂತ್ ಆಸ್ಪತ್ರೆಕ್ ಸಾಗ್ಸಿಲೆಂ. ಹ್ಯಾ ಪಯ್ಕಿ ಎಕ್ಲೊ ಆಸ್ಪತ್ರೆಕ್ ಪಾಂವ್ಚಾ ಪಯ್ಲೆಂ ಮೆಲೊ ಮ್ಹಣ್ ಎಕಾ ದೀಸಾ ನಂತರ್ ವಾರ್ತಾ ಪತ್ರಾಂನಿ ಖಬರ್ ಘಾಜಯಿಲ್ಲಿ.
ಖಬ್ರೆ ಪತ್ರಾಂನಿ ಆನಿ ಟಿವಿ ಚಾನೆಲಾಂನಿ ಹಿ ಸಳ್ಸಳಿ ಖಬರ್ ಖಳಾನಾಸ್ತಾನಾ ಪ್ರಸಾರ್ಲಿ.
ಸೊರೊ ಪಿಯೊನ್ ವಾಹನ್ ಚಲಯಿಲ್ಲೊ ದೇಶಾಚೊ 'ಹಾರ್ಟ್-ತ್ರೊಬ್' ಶರ್ಮಾನ್ ಆವ್ಗಾಡ್ ಜಾತಾಚ್ ಜಾಗ್ಯಾ ಥಾವ್ನ್ ಘಾಯೆಲ್ಲ್ಯಾ ನಿರ್ಗತಿಂಕಾಂಚಿ ಮಜತ್ ಕರಿನಾಸ್ತಾನಾ ಪರಾರಿ ಜಾಲ್ಲೊ ಮ್ಹಣ್ಚಾ ವಿಷಯಾಚೆರ್ ತರ್ಕ್ ಚಲ್ಲೆಂ. ಪೋಲಿಸ್ ಅಧಿಕಾರಿಂನಿ ಕಾನೂನಿ ಕ್ರಮ್ ಘೆತ್ಲೆಂ. ಲಿಪ್‍ಲ್ಲ್ಯಾ ಶರ್ಮಾನಾಕ್ ಪೋಲಿಸಾಂನಿ ಕೈದ್ ಕೆಲ್ಲೊ. ತಜ್ವೀಜ್ ಕರ್ತಾನಾ ತಾಚೆ ರಗ್ತಾಂತ್ ವ್ಹಡ್ ಪ್ರಮಾಣಾನ್ ಆಮಾಲಾಚೊ ಅಂಶ್ ಆಸ್ಲ್ಲೊ ಮ್ಹಣ್ ರುಜು ಜಾಲ್ಲೆಂ.
ಕಸೊಲೊಗಿ ಆವಾಜ್ ಆಯ್ಕಾಲ್ಲೆ ಜಿನ್ಸಿಂ ಅಲೋಕಾಕ್ ಭೊಗ್ಲೆಂ. ತೊ ದಡ್ಬಡೊನ್ ದೊಳೆ ಸೊಡ್ನ್ ಉಟೊನ್ ಬೊಸ್ಲೊ.
"ಕಿತೆಂ ಜಾಲೆಂ?" ಮಾಲಿನಿಕ್ ಜಾಗ್ ಜಾಲಿ.
"ಕೋಣೆಂಗಿ ದಾರಾಕ್ ಠೊಕೆ ಮಾ‍ರ್‌ಲ್ಲೊ ಆವಾಜ್ ಆಯ್ಕಾಲೊ." ಅಲೋಕಾಚಿ ನೀದ್ ಸುಟ್‍ಲ್ಲಿ.
"ಪಾಟ್ಲೆ ಬಾರಾ ವರ್ಸಾಂ ಥಾವ್ನ್ ಖೊಟ್ಯಾ ಸಪ್ಣಾಂನಿ ತುಕಾ ಲಾಚಾರ್ ಕೆಲಾ." ಮಾಲಿನಿ ಫುರ್ಪುರ್ಲಿ. "ತುಜೆ ಸಂಗಿಂ ಆಮ್ಚಿ ಜಿಣಿಂಯಿ ತುಂವೆಂ ದೆಸ್ವಾಟ್ ಕೆಲ್ಯಾಯಿ. ತುಕಾ ಏಕ್‍ಚ್ ಜೋಪ್. ಇತ್ಲೊ ಭಿಯೆತಾಯಿ ತರ್ ತ್ಯಾ ಬಳ್ವಂತ್ ಮನ್ಶಾ ವಿರೋಧ್ ಸಾಕ್ಸ್ ದಿಂವ್ಚಿ ತುಕಾ ಕಿತ್ಯಾಕ್ ಗಿರಾಂತ್?"
ಅಲೋಕಾನ್ ಜಾಪ್ ದಿಲಿನಾ. ಬಾಯ್ಲೆಚಾ ಸವಾಲಾಕ್ ತಾಚೆಲಾಗಿಂ ಜಾಪ್ ನಾತ್‍ಲ್ಲಿ. ಫಾಂತ್ಯಾಫರಾಚೆಂ ಆವ್ಗಾಡ್ 2002 ಇಸ್ವೆಚಾ ಸಪ್ಟೆಂಬರ್ ಮಹಿನ್ಯಾಂತ್ ಘಡ್‍ಲ್ಲೆಂ. ಆತಾಂ 2014 ಇಸ್ವೆಚೊ ಜುಲೈ ಮಹಿನೊ. ಮಳ್ಯಾರ್ ಬಾರಾ ವರ್ಸಾಂ ಉತ್ರಾಲ್ಲಿಂ. ತವಳ್ ತಾಚೆಂ ಎಕ್ಲೆಂಚ್ ಧುವ್ ಮುನ್ನಿ ದೋನ್ ವರ್ಸಾಂಚೆಂ. ಆತಾಂ ಮುನ್ನಿಕ್ ಚೊವ್ದಾ ವರ್ಸಾಂ. ಬೇಕರಿ ಮುಕ್ಲ್ಯಾ ರೆಸ್ಟೊರೆಂಟಾಂತ್ ರಾಕ್ವಲ್ಯಾಚೆಂ ಕಾಮ್ ಕರ್ನ್ ಆಸ್ತಾನಾ ಘಡ್‍ಲ್ಲ್ಯಾ ಹ್ಯಾ ಆವ್ಗಾಡಾನ್ ಅಲೋಕ್ ಆನಿ ತಾಚೆ ಕುಟ್ಮಾಚಿ ಜಿಣಿ ಬದ್ಲಾಲ್ಲಿ. ಹೆಂ ಆವ್ಗಾಡ್ ಘಡ್ತಾನಾ ಚಾಲಕಾಚಾ ಬಗ್ಲೆಚಾ ಬಸ್ಕೆರ್ ಸರ್ಕಾರಿ ಅಂಗರಕ್ಷಕ್ ಇಂದರ್ ಆನಿ ಪಾಟ್ಲೆ ಬಸ್ಕೆರ್ ಉದೆವ್ನ್ ಯೆಂವ್ಚೊ ನಟ್ ವಿಮಲ್ ಆಸ್‍ಲ್ಲೆ ಮ್ಹಣ್ ಉಪ್ರಾಂತ್ ಕಳಿತ್ ಜಾಲ್ಲೆಂ.
ಪೋಲಿಸ್ ಅಧಿಕಾರಿ ಗಜೇಂದ್ರಾಚಾ ಉತ್ರಾಂಕ್ ಪಾಳೊ ದೀವ್ನ್ ತಾಣೆ ಕಾನೂನ್ ಆನಿ ನೀತಿಚಿ ಮಜತ್ ಕೆಲ್ಲಿ. ಹ್ಯಾ ಭಯಾನಕ್ ಆವ್ಗಾಡಾಂತ್ ಎಕ್ಲೊ ಮರಣ್ ಪಾವ್‍ಲ್ಲೊ ಆನಿ ಹೆರ್ ಚಾರ್ ಘಾಯೆಲ್ಲೆ. ವಾಹನಾ ಪಂದಾಕ್ ಜಕ್ಮಿ ಜಾಲ್ಲ್ಯಾಂಕ್ ಭಾಯ್ರ್ ಕಾಡುಂಕ್ 'ಕ್ರೇನಾಚಿ' ವಿಲೇವಾರಿ ಕರ್ನ್ ಆವ್ಗಾಡಾಚೆಂ ವಾಹನ್ ಉಕಲ್ನ್ ಪಯ್ಸ್ ಕೆಲ್ಲೆಂ.
ಶರ್ಮಾನಾಚೊ ಈಷ್ಟ್ ವಿಮಲ್, ಸರ್ಕಾರಿ ಅಂಗರಕ್ಷಕ್ ಇಂದರ್ ಆನಿ ಅಲೋಕಾಚಾ ಸ್ಟೇಟ್‍ಮೆಂಟಾಂನಿ ಎಕ್ ಉಲ್ಲೇಕ್ ಸಾಮಾನ್ಯ್ ಜಾಲ್ಲೊ. ತೇಗಾಂಯ್ನಿ ಚಾಲಕಾಚಾ ಬಸ್ಕೆರ್ ಶರ್ಮಾನ್ ಆಸ್ಲ್ಲೊ ಮ್ಹಣ್ ವಾಕ್ಮೂಲ್ ದಿಲ್ಲೆಂ. ಹ್ಯಾ 'ಹೈ-ಪ್ರೊಫಾಯ್ಲ್' ಕೇಜಿಂತ್ ದೇಶಾ ಭಿತರ್ ಮಾತ್ರ್ ನಯ್ ವಿದೇಶಿ ಮಿಡಿಯಾನ್ ಸಮೇತ್ ಆಸಕ್ತ್ ದಾಕಯಿಲ್ಲಿ. ಸೊರೊ ಪಿಯೆವ್ನ್ ಲೈಸನ್ಸ್ ನಾಸ್ತಾನಾ ವಾಹನ್ ಚಲವ್ನ್ ದುರ್ಘಟನ್ ಜಾಗ್ಯಾ ಥಾವ್ನ್ ಧಾಂವ್‍ಲ್ಲ್ಯಾ ಶರ್ಮಾನಾಕ್ ಖಂಡಿತ್ ಜಾವ್ನ್ ಫಾವೊತಿ ಶಿಕ್ಷಾ ಮೆಳ್ತೆಲಿ ಮ್ಹಣ್ ಲೋಕ್ ಪಾತ್ಯೆಲ್ಲೊ.
ಸತಾಚಿ ಕೂಸ್ ಘೆತ್‍ಲ್ಲ್ಯಾ ಅಲೋಕಾಕ್ ಪಯ್ಶೆವಂತ್ ಆನಿ ಪ್ರತಿಷ್ಟಿತ್ ಮನ್ಶಾಂ ವಿರೋಧ್ ಹ್ಯಾ ಸಮಾಜೆಂತ್ ಝುಜ್ಚೆಂ ಕಿತ್ಲ್ಯಾ ಖತಾರ್ನಾಕ್ ಮಣ್ಚೆಂ ಸತ್ ಸವ್ಕಾಸ್ ಸಮ್ಜೊಂಕ್ ಲಾಗ್ಲೆಂ. ಶರ್ಮಾನಾ ವಿರೋಧ್ ತೊ ಸಾಕ್ಸ್ ದೀಂವ್ಕ್ ತಯಾರ್ ಜಾಲಾ ಮಣ್ಚಿ ಖಬರ್ ಪತ್ರಾಂನಿ ಫಾಯ್ಸ್ ಜಾಲ್ಲೆ ದೋನ್ ದೀಸಾಂನಿ ಮವಾಲಿ ತಾಚೆ ಪಾಟಿಕ್ ಲಾಗ್ಲೆ. ತಾಚೆ ಮೊಬಯ್ಲಾರ್ ಭೆಷ್ಟಾವ್ನ್ ಅಪರಿಚಿತ್ ಕೊಲಾಂ ಯೆಂವ್ಕ್ ಲಾಗ್‍ಲ್ಲಿಂ. ಮಧ್ಯಾನ್ ರಾತಿಂ ದಾರ್-ಜನೆಲಾಂಕ್ ಫಾತೊರ್ ಅಪ್ಟಾಲ್ಲೆ. ಸ್ಟೇಟ್‍ಮೆಂಟ್ ಪಾಟಿಂ ಕಾಡಿನಾ ತರ್ ಬಾಯ್ಲ್ ಆನಿ ಧುವೆಚಾ ತೋಂಡಾಚೆರ್ ಆಸಿಡ್ ಉಡಯ್ತಾಂ ಮಣ್ಚೊ ಧಮ್ಕಿ ಮೆಳ್ಳ್ಯೊ.
ಅಲೋಕಾನ್ ತಾಕಾ ಆನಿ ತಾಚೆ ಕುಟ್ಮಾಕ್ ರಿಸ್ಕೆರ್ ಘಾಲ್ಲೆಂ. ತಾಂಚಿ ಜಿಣಿ ಅಸುರಕ್ಷಿತ್ ಜಾಲ್ಲಿ. ಪೋಲಿಸ್ ಅಧಿಕಾರಿ ಗಜೇಂದ್ರಾಚಾ ಉಲ್ಯಾ ಪರ್ಮಾಣೆ ತಾಣೆ ಘರಾಂ ಬದ್ಲಿಲಿಂ, ಕಾಮಾಂ ಬದ್ಲಿಲಿಂ ಆನಿ ನವಿಂ ಮೊಬಯ್ಲ್ ನಂಬ್ರಾಂ ಘೆತ್ಲಿಂ. ಸರ್ವ್ ತಾತ್ಕಲಿಕ್. ಥೊಡ್ಯಾಚ್ ಮಹಿನ್ಯಾಂನಿ ಹೆ ಬೇನಾಮಿ ಆಗುಂತಕ್ ತಾಚೊ ಪಾತ್ತೊ ಧರ್ನ್ ಪರತ್ ಧಮ್ಕಿ ದಿತಾಲೆ. ಘಡಿತಾಂಚಿ ಹಿ ಶಿಂಕಳ್ ಚಲೊನ್ ಗೆಲಿ.
ಹ್ಯಾ ಗೊಟಾಳ್ಯಾಂತ್ ಏಕ್ ಸಂಗತ್ ತಾಕಾ ಸಮ್ಜಾಲಿನಾ. ಶರ್ಮಾನಾ ವಿರೋಧ್ ತೊ ಪ್ರಮುಕ್ ಸಾಕ್ಸ್ ತರೀ ಜಾಯ್ತೊ ತೇಂಪ್ ಕೋಡ್ತಿಂತ್ ಹಾಜರ್ ಜಾಂವ್ಕ್ ತಾಕಾ ಉಲೊ ಯೇಂವ್ಕ್ ನಾತ್‍ಲ್ಲೊ. ಪ್ರೊಜಿಕ್ಯೂಶನಾಚಾ ಸವಾಲಾಂಕ್ ಜಾಪಿ ದಿಂವ್ಚೊ ಆವ್ಕಾಸ್ ತಾಕಾ ಫಾವೊ ಜಾಲೊ ನಾ. ಇತ್ಲೆಂಚ್ ನಯ್. ಬಾಕಿಚೊ ದೋನ್ ಪ್ರಧಾನ್ ಸಾಕ್ಷಿ ಸ್ವಾಭಾವಿಕ್ ಥರಾನ್ ಮಾಯಾಗ್ ಜಾಲ್ಲ್ಯೊ. ಶರ್ಮಾನಾಚೊ ಈಷ್ಟ್ ಕಲಾಕರ್ ವಿಮಲ್ ಅಪ್ಲಿ ವೃತ್ತಿ ಸೊಡ್ನ್ ಇಂಗ್ಲೆಂಡಾಕ್ ಗೆಲೊ ಆನಿ ಪರತ್ ಪಾಟಿಂ ಆಯ್ಲೊನಾ. ಸರ್ಕಾರಿ ಅಂಗರಕ್ಷಕ್ ಇಂದರ್ ಸೊರ್‍ಯಾಚೊ ಗುಲಾಮ್ ಜಾವ್ನ್ 2007 ಇಸ್ವೆಂತ್ ಟಿಬಿಕ್ ಬಲಿ ಜಾವ್ನ್ ಅಂತರ್‌ಲ್ಲೊ.
ಆತಾಂ ಜೀವಂತ್ ಆಸ್ಚಾ ಪಯ್ಕಿ ಪ್ರಮುಕ್ ಸಾಕ್ಸ್ ಜಾಂವ್ಕ್ ಪಾವ್ಲೊ ಅಲೋಕ್. ಫಾಲ್ಯಾಂ ಕೋಡ್ತಿಂತ್ ವಿಚಾರಣ್ ಅಸ್ತೆಲೆಂ ಆನಿ ಅಲೋಕಾನ್ ಹಾಜರ್ ಜಾಂವ್ಚೆಂ ಅವಶ್ಯ್ ಮ್ಹಣ್ ಇನ್ಸ್'ಪೆಕ್ಟರ್ ಗಜೇಂದ್ರಾನ್ ಹಫ್ತ್ಯಾ ಆದಿಂ ತಿಳ್ಸಿಲ್ಲೆಂ. ಭಿಯೆಂವ್ಚಿ ಗರ್ಜ್ ನಾ, ಪೋಲಿಸ್ ರಕ್ಷಣ್ ಆಸ್ತೆಲೆಂ ಮ್ಹಣ್ ತಾಕಾ ಧೈರ್ ದಿಲ್ಲೆಂ.
ದಿಸ್ಪಟಿ ಜಿಣಿ ಅಸುರಕ್ಷಿತ್ ಜಾಲ್ಲೆ ಉಪ್ರಾಂತ್ ಧುವೆಕ್ ಇಸ್ಕಾಲಾಕ್ ಪಾವೊನ್ ಪಾಟಿಂ ಹಾಡ್ಚಿ ಜವಾಬ್ದಾರಿ ತಾಣೆ ಖುದ್ದ್ ಘೆತ್‍ಲ್ಲಿ. ತ್ಯಾಚ್ ಇಸ್ಕಾಲಾಂತ್ ತೊ ಹೆಲ್ಪರಾಚೆಂ ಕಾಮ್ ಕರ್ತಾಲೊ. ಆಟ್ ವೊರಾಂಚೆರ್ ಮಾಲಿನಿನ್ ದಿಲ್ಲೊ ನಾಸ್ಟೊ ಕರ್ನ್ ಬಾಪಯ್ ಆನಿ ಧುವ್ ಇಸ್ಕಾಲಾಕ್ ವೊಚೊಂಕ್ ತಯಾರ್ ಜಾಲ್ಲಿಂ. ತಿತ್ಲ್ಯಾರ್ ತಾಚಾ ಮೊಬಯ್ಲ್ ಫೊನಾಚಿ ಕಾಂಪಿಣ್ ವಾಜ್ಲಿ. ಅಪರಿಚಿತ್ ನಂಬರ್ ಪಳೆವ್ನ್ ತೊ ಕಾವ್ಜೆಲೊ.
"ಹಲೊ..." ಅಲೋಕ್ ಪಿಂರ್ಗಾಲೊ.
"ವಳಕ್ ಮೆಳ್ಳಿಗಿ?" ಕರ್ಕಸ್ ಸ್ವರ್. "ತುಜೆಂ ನವೆಂ ನಂಬರ್ ಆನಿ ನವ್ಯಾ ಠಿಕಾಣ್ಯಾಚೊ ವಿಳಾಸ್ ಆಮಿ ಸೊಧುನ್ ಕಾಡ್ಲಾ."
"ಕೋಣ್ ತುಂ?"
"ತೆಂ ಗರ್ಜೆಚೆಂ ನಯ್." ತೆವ್ಶಿಲೊ ಜೋರಾನ್ ಮ್ಹಣಾಲೊ. "ತುಂ ಕೋಣ್ ಮ್ಹಣ್ ಆಮಿ ಜಾಣಾಂವ್. ಫಾಲ್ಯಾಂ ಕೋಡ್ತಿಕ್ ಗೆಲೊಯಿ ತರ್ ತುಜಿ ಧುವ್, ಬಾಯ್ಲ್ ಆನಿ ತುಜಾ ಜಿಣ್ಯೆಚೆಂ ದಿ ಎಂಡ್ ಜಾತೆಲೆಂ. ತಿತ್ಲೆಂ ಉಡಾಸ್ ದವರ್."
ಜಾಪಿಕ್ ರಾಕಾನಾಸ್ತಾನಾ ಲಾಯ್ನ್ ಮೆಕ್ಳಿ ಜಾಲಿ. ದುಸ್ಮಾನಾಂನಿ ತಾಚೊ ಪಾತ್ತೊ ಪರತ್ ಧರ್‍‍ಲ್ಲೊ. ಅಲೋಕ್ ಉಬೊ ರಾವ್‍ಲ್ಲ್ಯಾ ಜಾಗ್ಯಾರ್ ಅಪ್ಸೊಚ್ ಘಾಮೆಲೊ.
ಹೆಂ ಪಯ್ಲ್ಯಾ ಪಾವ್ಟಿಂ ನಯ್. ಪಾಟ್ಲ್ಯಾ ಬಾರಾ ವರ್ಸಾಂ ಥಾವ್ನ್ ಜಾಯ್ತೆ ಪಾವ್ಟಿಂ ಅಸಲಿ ಧಮ್ಕಿ ಅಯ್ಕೊನ್ ಆಕಾಂತಾನ್ ತಾಚೊ ರಗ್ತಾ ವತ್ತಡ್ ಚಡ್‍ಲ್ಲೊ. ಆಜ್ ಪರತ್ ತಾಕಾ ಮೆಂದು ಚಿಮ್ಟ್ಯಾಂತ್ ಸಾಂಪ್ಡಾಲ್ಲೆ ಜಿನ್ಸಿಂ ದೂಕ್ ಉದೆಲಿ. ತಾಣೆ ತುರಂತ್ ಫೋನಾರ್ ಇನ್ಸ್'ಪೆಕ್ಟರ್ ಗಜೆಂದ್ರಾಕ್ ವರ್ದಿ ಪಾಟಯ್ಲಿ.
"ತುಕಾ ಲಿಪವ್ನ್ ಶಾಬೀತ್ ದವರ್ಚೆಂ ಜಾಯ್ತೆಂ ಪ್ರೇತನ್ ಹಾಂವೆಂ ಕೆಲೆಂ." ಗಜೇಂದ್ರ್ ಸುಸ್ಕಾರ್ಲೊ. "ಆಮ್ಚಾ ಡಿಪಾರ್ಟ್‍ಮೆಂಟಾ ಭಿತರ್ ಜಾಯ್ತೆ ಗದ್ದಾರ್ ಆಸಾತ್. ಕಿತೆಂ ಕರ್ಚೆಂ ಸಾಂಗ್? ತುಜೊ ಪಾತ್ತೊ ದುಸ್ಮಾನಾಕ್ ಕಳಿತ್ ಕರ್ತಾತ್."
"ಪರತ್ ಘರ್ ಬದ್ಲಿಜಾಯಿ ಮಣ್ತಾಯಿ ತುಂ? ಫಾಲ್ಯಾಂ ಕೋಡ್ತಿಂತ್ ಹಾಜರ್ ಜಾಂವ್ಕ್ ಆಸಾ ಮ್ಹಣ್ ತುಂವೆಂ ಮಾಕಾ ಸಾಂಗ್‍ಲ್ಲೆಂಯಿ. ಮಾಕಾ ಕೋಡ್ತಿ ಪರ್ಯಾಂತ್ ಪಾವೊಂಕ್ ಸೊಡ್ತೆಲೆ‍ಮೂ? ಮಜಾ ಕುಟ್ಮಾಚೆರ್ ಹಲ್ಲೊ ಕೆಲೊ ತರ್ ಕಿತೆಂ ಕರ್ಚೆಂ?" ಅಲೋಕಾಚೊ ಸ್ವರ್ ಭಿಯಾನ್ ಕಾಂಪ್ಲೊ.
"ತುಂ ಭಿಯೆನಾಕಾ. ಆಜ್ ಸಕಾಳಿಂ ಮಾಕಾ ಹೋಮ್ ಮಿನಿಸ್ಟರಾ ಸಂಗಿಂ ಮೀಟಿಂಗ್ ಆಸಾ. ಪರಿಹಾರ್ ಖಂಡಿತ್ ಮೆಳ್ತೊಲೊ." ಇನ್ಸ್'ಪೆಕ್ಟರ್ ಗಜೇಂದ್ರಾನ್ ತಾಕಾ ಆಶ್ವಾಸಾನ್ ದಿಲೆಂ. "ಜಮಾತ್ ಜಾತಚ್ ಹಾಂವ್ ತುಕಾ ದನ್ಪರಾಂ ಭಿತರ್ ಇಸ್ಕಾಲಾಕ್ ಯೇವ್ನ್ ಮೆಳ್ತೊಲೊಂ."
ಅಪುಣ್ ಸಾಂಜೆರ್ ಘರಾ ಯೆತಾ ಪರ್ಯಾಂತ್ ದಾರ್ ಉಗ್ತೆಂ ಕರಿನಾಕಾ ಮಣ್ ಬಾಯ್ಲೆಕ್ ಆದೇಶ್ ದೀವ್ನ್ ಧುವೆ ಸಂಗಿಂ ಅಲೋಕ್ ಇಸ್ಕಾಲಾಕ್ ಚಲ್ಲೊ. ಕೋಣ್‍ಯಿಂ ಪಾಟ್ಲಾವ್ ಕರ್ತಾತ್ ಮಣ್ಚಾ ಖಂತಿನ್ ತಾಣೆ ವಾಟೆರ್ ಪಾಟಿಂ-ಮುಕಾರ್ ನದರ್ ಭಂವ್ಡಾಯ್ಲಿ. ವಾಟೆರ್ ಉಬೆಂ ಆಸ್ಚಾ ಪರ್ಕ್ಯಾಂಕ್ ತಾಣೆ ದುಬಾವಾನ್ ದೆಕ್ಲೆಂ. ಶರ್ಮಾನಾ ವಿರೋಧ್ ಸಾಕ್ಸ್ ದಿಂವ್ಚೊ ನಿರ್ದಾರ್ ಘೇವ್ನ್ ಅಪುಣ್ ಜಿಣ್ಯೆಂತ್ ಖಂಡಿತ್ ಫಸ್ಲಾಂ ಮ್ಹಣ್ ತಾಕಾ ಸ್ಪಷ್ಟ್ ಜಾಲ್ಲೆಂ.
ದೇಶಾಚಾ ಕಾನೂನಾಚಿ ಮಜತ್ ಕರ್ಚಿ ಅಪ್ಣಾಕ್ ಕಿತ್ಯಾಕ್ ಗರ್ಜ್ ಆಸ್‍ಲ್ಲಿ?
ದನ್ಪರಾಂ ಆಡೇಜ್ ವೊರಾಂಚೆರ್ ಇನ್ಸ್'ಪೆಕ್ಟರ್ ಗಜೇಂದ್ರಾಚೆಂ ಯೆಣೆಂ ಜಾಲೆಂ. ಇಸ್ಕಾಲಾಚಾ ಕ್ಯಾಂಟಿನಾಂತ್ ತಾಣಿಂ ಸಾಂಗಾತಾ ಚಾ ಘೆತ್ಲಿ.
"ಹ್ಯಾ ಫುಡೆಂ ತುಂವೆಂ ಟೆನ್ಶನ್ ಕರ್ಚಿ ಗರ್ಜ್ ನಾ." ಇನ್ಸ್'ಪೆಕ್ಟರ್ ಹಾಸೊನ್ ಮ್ಹಣಾಲೊ. "ತುಂ ಫಿಕಿರ್ ಕರಿನಾಕಾ. ಸರ್ವ್ ಸಮಾ ಜಾತೆಲೆಂ."
"ಮ್ಹಳ್ಯಾರ್?" ಅಲೋಕಾಚಾ ಕಪಾಲಾರ್ ಮಿರಿಯೊ ಚರ್ಲ್ಯೊ.
"ಕಾಲ್ ರಾತಿಂ ಶರ್ಮಾನ್ ಆನಿ ತಾಚೆ ವಕೀಲಾಂಚೆಂ ಮೀಟಿಂಗ್ ಹೊಮ್ ಮಿನಿಸ್ಟರಾ ಸಂಗಿಂ ಫೈವ್ ಸ್ಟಾರ್ ಹೊಟೆಲಾಂತ್ ಜಾಲೆಂ." ಇನ್ಸ್'ಪೆಕ್ಟರಾನ್ ವಿವರ್ ದಿಲೊ. "ಸರ್ಕಾರಾಚಾ ಪಾರ್ಟಿ ಫಂಡಾಕ್ ವಡ್ಲೊ ಐವಜ್ ದೀಂವ್ಕ್ ಶರ್ಮಾನ್ ತಯಾರ್ ಜಾಲಾ. ಮುಕೇಲ್ ಮಂತ್ರಿಚೊ ತಾಕಾ ಪಾಟಿಂಬೊ ಆಸಾ. ಇಲ್ಲೆಶೆ ಮಾಕಾಯಿ ಮೆಳ್ತೆಲೆ. ತುಜಾ ವಾಂಟ್ಯಾಕ್ ಥೊಡೆ ಲಾಕ್ ಯೆತೆಲೆ. ಭಾಡ್ಯಾಚಾ ಮವಾಲ್ಯಾಂಚೊ ಧೊಶಿ ಬಂದ್ ಜಾತೆಲ್ಯೊ."
"ಹಾಂವೆಂ ಪಯ್ಶೆ ವಿಚಾರುಂಕ್ ನಾಂತ್. ಮಾಕಾ ಕಿತ್ಯಾಕ್?" ಅಲೋಕ್ ಅರ್ಥ್ ಕರುಂಕ್ ಕಷ್ಟಾಲೊ.
"ಬಾರಾ ವರ್ಸಾಂ ಪರ್ಯಾಂತ್ ದುಸ್ಮಾನಾ ಥಾವ್ನ್ ಚುಕೊನ್ ಕಾಮಾಂ ಆನಿ ಘರಾಂ ಬದ್ಲುನ್ ತುಂವೆ ದೀಸ್ ಕಾಡ್ಲೆಯಿ." ಇನ್ಸ್'ಪೆಕ್ಟರಾನ್ ತಾಕಾ ಸಮ್ಜಾಯ್ಲೆಂ. "ಆತಾಂ ಆಕಾಸಾ ಥಾವ್ನ್ ದುಡ್ವಾಚೊ ಇಲ್ಲೊಸೊ ಪಾವ್ಸ್ ಪಡ್ತಾನಾ ಆರಾಂವ್ಚಾಂತ್ ಕಿತೆಂಚ್ ಚೂಕ್ ನಾ. ಫಾಲ್ಯಾಂ ಕೋಡ್ತಿಂತ್ ತುಜೆಂ ಪರ್ನೆಂ ಸ್ಟೇಟ್‍ಮೆಂಟ್ ತುಂ ಪಾಟಿಂ ಕಾಡ್ತೊಲೊಯಿ. ತಾಂತುಂ ಚೂಕಿ ಜಾಲ್ಯಾತ್ ಮ್ಹಣ್ ಸಾಂಗ್ಲ್ಯಾರ್ ಜಾಲೆಂ. ಬಾಕಿಚೆಂ ಹಾಂವ್ ಪಳೆವ್ನ್ ಘೆತಾಂ."
"ಮಳ್ಯಾರ್ ಸೊರೊ ಪಿಯೆವ್ನ್ ಲೈಸನ್ಸ್ ನಾಸ್ತಾನಾ ವಾಹನ್ ಚಲವ್ನ್ ಎಕ್ಲ್ಯಾಕ್ ಲಗಾಡ್ ಕಾಡ್ನ್ ಚಾರ್ ಜಣಾಂಕ್ ಜಕ್ಮಿ ಕೆಲ್ಲ್ಯಾ ಶರ್ಮಾನಾಕ್ ಸಜಾ ಜಾಂವ್ಚಿ ನಾ?" ಅಲೋಕ್ ಪಾತ್ಯೆಂವ್ಕ್ ಕಷ್ಟಾಲೊ.
"ತುಂ ಚಡ್ ಚಿಂತಿನಾಕಾ." ಇನ್ಸ್'ಪೆಕ್ಟರ್ ಗಜೇಂದ್ರಾನ್ ತಾಕಾ ಸಲಹಾ ದಿಲಿ. "ಬಾರಾ ವರ್ಸಾಂ ತುಂವೆಂ ಮಿನತ್ ಕಾಡ್ಲಿಯಿ. ಆತಾಂ ಫಳ್ ಮೆಳ್ಚೊ ಸಂದ್ರಾಪ್ ಉದೆಲಾ."
**********************************
ಶರ್ಮಾನಾಕ್ ಅಪ್ರಾಧಿ ಮ್ಹಣ್ ಸೆಶನ್ಸ್ ಕೋಡ್ತಿನ್ ದಿಲ್ಲೆಂ ತೀರ್ಪ್ ದೋನ್ ದಿಸಾಂ ಭಿತರ್ ಹೈ-ಕೋಡ್ತಿನ್ ಸ್ಥಗಿತ್ ಕರ್ನ್ ಅಪ್ರಾಧ್ಯಾಕ್ ಜಾಮಿನೆರ್ ಸುಟ್ಕಾ ದಿಲ್ಲಿ. ದೇಶಾಚಾ ಚರಿತ್ರೆಂತ್ ಸೆಶನ್ಸ್ ಕೋಡ್ತಿನ್ ದಿಲ್ಲ್ಯಾ ಫೈಸಲಾಚಿ ಪ್ರತಿ ನಾಸ್ತಾನಾ ತುರಂತ್ ವಿಚಾರಣ್ ಕರ್ನ್ ಹೈಕೋಡ್ತಿನ್ ಧಾಕ್ಲೊ ರಚ್‍ಲ್ಲೊ. ಕಾನೂನಾಚಿ ಖೆಳ್ಕುಳಾಂ ಜಾಲ್ಲಿಂ. ದೇಶಾಚಾ ಸರ್ವ್ ಖಬ್ರೆ ಚಾನೆಲಾಂನಿ ಹ್ಯಾ ಫಟ್ಕಿರ್‍ಯಾ ನಾಟಕಾಚೊ ಭರ್ಪೂರ್ ಪ್ರಸಾರ್ ಕೆಲ್ಲೊ.
ಇಸ್ಕಾಲಾಚಾ ದಫ್ತರಾಂತ್ಲ್ಯಾ ಟಿವಿರ್ ಪ್ರಸಾರ್ ಜಾಂವ್ಚಿ ಖಬರ್ ಅಲೋಕಾನ್ ಅಪಾಲಿಪಾ ದೆಕ್‍ಲ್ಲಿ. ಅಲೋಕಾನ್ ಆಪ್ಲೆಂ ಸ್ಟೇಟ್‍ಮೆಂಟ್ ಬದ್ಲುನ್ ಪ್ರತಿರೋಧ್ ಕರ್ತಾನಾ ದುಡು ಘೆವ್ನ್ ಸಾಕ್ಷಿನ್ ಶರ್ಮಾನಾಕ್ ಉಪ್ಕಾರ್ ಕೆಲಾ ಮಣ್ ಮೀಡಿಯಾನ್ ಆನಿ ಸಾಮಾನ್ಯ್ ಲೊಕಾನ್ ದುಬಾವ್ ಉಚಾರ್‌ಲ್ಲೊ. ನೀತಿಚೆಂ ಉಲ್ಲಂಘನ್ ತಾಣೆ ಕೆಲ್ಲೆಂ ಖರೆಂ. ಪುಣ್ ಇನ್ಸ್'ಪೆಕ್ಟರ್ ಗಜೇಂದ್ರಾನ್ ದಿಲ್ಲೊ ದುಡ್ವಾಚೊ ಪರಿಹಾರ್ ತಾಣೆ ಘೆಂವ್ಕ್ ನಾತ್‍ಲ್ಲೊ. ದುಡ್ವಾಚಾ ಬೊಳಾನ್ ಪ್ರಭಾವಿತ್ ಮನ್ಶಾನ್ ಅಪ್ರಾಧ್ ಕರ್ನ್ ಚುಕಾರಿ ಘೆತ್‍ಲ್ಲಿ.
ಬಾರಾ ವರ್ಸಾಂಚಾ ನಿರಂತರ್ ಧೊಶಿಂ ಥಾವ್ನ್ ಸುಟ್ಕಾ ಆಶೆವ್ನ್ ತಾಣೆ ಸತ್ ಲಿಪಯಿಲ್ಲೆಂ. ಆತಾಂ ಆವ್ಚಿತ್ ವಿಚಿತ್ರ್ ಬಾಂಧ್ಪಾಸ್ ತಾಕಾ ಧೊಸುಂಕ್ ಲಾಗ್ಲೆ. ಬಾರಾ ವರ್ಸಾಂ ಆದ್ಲ್ಯಾ ಫಾಂತ್ಯಾಫರಾಚೆಂ ಆವ್ಗಾಡಾಚಾ ದುರ್ಘಟನಾಕ್ ಸಾಂಪ್ಡಾಲ್ಲ್ಯಾ ನಿರ್ಗತಿಕಾಂಚಾ ಹುಜ್ರಿಂ ಶರ್ಮಾನಾ ಪ್ರಾಸ್ ವಡ್ಲೊ ಅಪ್ರಾಧಿ ಅಪುಣ್ ಮಣ್ಚಾ ಕಾಂತವ್ಣೆನ್ ತೊ ಹತಾಶ್ ಜಾಲೊ.
Tags:
Stan Ageira, Car Accident, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/24/2020 ಉದೆಂತಿಚೆಂ ನೆಕೆತ್ರ್...
-
11/28/2020 ಚೂಕಿ ತಿದ್ವಿನಾ ಜಾಲ್ಯಾರ್!...
-
11/4/2020 ಅನಿವಾಸಿ ರಾಯ್...
-
10/23/2020 ಘಾಣ್...
-
-
9/13/2020 ರಾತ್ ಪಾಳಿ...
-
6/18/2018 ವೆಚಿಕ್ ಪುತಾಚೊ ದಾಟ್ಟು...
-
11/12/2017 ನ್ಯೂ ಐನ್‌ಸ್ಟೀನ್...
-
9/7/2017 ಮ್ಹಜ್ಯಾ ಮೊಗಾಚೆಂ ಮೆಲ್ಬಾ...
-
8/29/2017 ಕೊಲ್‍ಗರ್ಲ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
2 Comment/s.
ಭಾರಿಚ್ ಅಪುರ್ಬಾಯೆನ್ ಬೊರೈಲಾಯ್. ಅಭಿನನ್ದನ್ ತುಕಾ ಸ್ತೆನ್ ಅಗೆರಾ.
Really thrilling story. i liked it.