web analytics

From around the world

ಪ್ರವೀಣ್ ತಾವ್ರೊ, ಕುಲ್ಶೇಕರ್
             
+971 50 7554105
ತುಮ್ಚ್ಯಾ ಗಮನಾಕ್:
Best be viewed in 1366 X 768 screen resolution and in Google Chrome

ಉಡಾಸಾ೦ತ್ಲೊ 'ಉಮಾಳೊ'

Monday, April 3, 2017  /  By Admin

ಬರಯ್ಣಾರಾ ವಿಶಿಂ ಜಾಣಾ ಜಾ...

80.5
User Rating

ಕೊ೦ಕಣ್ ಕೊಗುಳ್ ವಿಲ್ಫಿ ರೆಬಿ೦ಬಸ್ ಜಲ್ಮೊನ್ ಎಪ್ರಿಲ್ 2 ತಾರಿಕೆಕ್ 75 ವರ್ಸಾ೦ ಜಾಲಿಂ. ವಿಲ್ಫಿನ್ ಪತ್ರಿಕ್ ಉದ್ಯಮಾಕ್ ದೆ೦ವೊನ್ 'ಉಮಾಳೊ' ಮಹಿನ್ಯಾಳೆ೦ ಆರ೦ಭ್ ಕೆಲ್ಲ್ಯಾವಿಶಿ೦ ಏಕ್ ಉಡಾಸ್.

1987-ವೆ೦ ವರಸ್. ಅಕ್ಟೋಬರ್ ಮಯ್‍ನ್ಯಾಚೊ ಏಕ್ ದೀಸ್. ವಿಲ್ಫಿಯಾಬಾನ್ ಫೋನ್ ಕರುನ್ "ಸಿರಿಲ್, ತುಜೆಕಡೆ ಇಲ್ಲೆಶೆ೦ ಉಲ೦ವ್ಕ್ ಆಸಾ. ಏಕ್ ಘಡಿ ಘರಾ ಯೆವ್ಯೆತ್ ಗೀ?" ಮ್ಹಣ್ ವಿಚಾರಿಲಾಗ್ಲೊ.
"ಜಾಯ್ತ್, ವಿಲ್ಫಿಯಾಬ್, ಸಾ೦ಜೆರ್ ಯೆತಾ೦" ಮ್ಹಳೆ೦. ಆನಿ ಸಾ೦ಜೆರ್ ಹಾ೦ವ್ ವಿಲ್ಫಿಯಾಬಾಕ್ ಭೆಟ್ಲೊ೦.
ಹರ್ಶೆ೦ಚೆಬರಿ೦ ಮೀನಾಬಾಯೆನ್ ಹಾಡ್ನ್ ದಿಲ್ಲಿ ಚ್ಹಾ ಪಿಯೆವ್ನ್ ಜಾತಚ್ ವಿಲ್ಫಿಯಾಬಾನ್ ಮ್ಹಾಕಾ ಆಪಯಿಲ್ಲೊ ಉದ್ದೇಶ್ ಸಾ೦ಗ್ಲೊ.
"ಹ್ಯಾ ಸ೦ಗೀತ್ ಶೆತಾ೦ತ್ ಕಿತ್ಲೊ ತೇ೦ಪ್ ಮು೦ದರುನ್ ವಚ್ಯೆತ್ ಮ್ಹಣ್ ಸಾ೦ಗು೦ಕ್ ಜಾಯ್ನಾ. ದೆಕುನ್ ಹಾ೦ವೆ೦ ಏಕ್ ಪ್ರಿ೦ಟಿ೦ಗ್ ಪ್ರೆಸ್ ಸುರು ಕರು೦ಕ್ ಚಿ೦ತ್ಲಾ೦. ಸಾ೦ಗಾತಾ ಸಾ೦ಗಾತಾಚ್ ಏಕ್ ಕೊ೦ಕ್ಣಿ ಮಯ್‍ನ್ಯಾಳೆ೦ ಪತ್ರ್ ಯಿ ಕಾಡ್ಚಿ ಆಲೋಚನ್ ಆಸಾ. ಪತ್ರಾಕ್ 'ಉಮಾಳೊ' ಮ್ಹಳ್ಳೆ೦ ನಾ೦ವ್ ವಿ೦ಚ್ಲಾ೦. ತುಂವೆ೦ ಹ್ಯಾ ಪತ್ರಾಚೊ ಸ೦ಪಾದಕ್ ಜಾಯ್ಜಯ್ ಮ್ಹಣ್ ಮ್ಹಜಿ ಆಶಾ" ಮ್ಹಣಾಲೊ ವಿಲ್ಫಿಯಾಬ್.

ಹಾ೦ವ್ ಖತಾರಾ೦ತ್ ದೋನ್ ವರ್ಸಾ೦ ಕಾಮ್ ಕರುನ್ ಗಲ್ಫ್'ಚ್ ನಾಕಾ ಮ್ಹಣುನ್ ಪಾಟಿ೦ ಆಯಿಲ್ಲೊ೦.
ಖಾಲಿ ಬಸ್ಚಾ ಬದ್ಲಾಕ್ 'ರಾಕ್ಣೊ' ಸ೦ಪಾದಕ್ ಬಾಪ್ ವಿಶೆ೦ತ್ ವಿತೊರ್ ಮಿನೆಜಾಕಡೆ ಉಲವ್ನ್ ರಾಕ್ಣೊ ದಫ್ತರಾ೦ತ್ ಪಾರ್ಟ್ ಟಾಯ್ಮ್ ಕಾಮಾಕ್ ಲಾಗ್ ಲ್ಲೊ೦. ವಿಲ್ಫಿಯಾಬಾಚೆ೦ ಆಪವ್ಣೆ೦ ಹಾ೦ವೆ೦ ಸ್ವೀಕಾರ್ ಕೆಲೆ೦. ಚಡಾವತ್ ಮಾಲ್ಗಡ್ಯಾ ತಶೆ೦ ತರ್ನಾಟ್ಯಾ ಬರವ್ಪ್ಯಾ೦ಕ್ ಹಾ೦ವ್ ಒಳ್ಕಾತಾಲೊ೦ ಮಾತ್ರ್ ನ್ಹ೦ಯ್ ತಾ೦ಚೆಕಡೆ ಮ್ಹಜೊ ಸ೦ಬ೦ದ್‍ಯಿ ಬರೊಚ್ ಆಸ್‍ಲ್ಲೊ ಜಾಲ್ಲ್ಯಾನ್ ಹೊ ವಾವ್ರ್ ಮ್ಹಾಕಾ ಪಸ೦ದೆಚೊ ಮ್ಹಣ್ ಭೊಗ್ಲೆ೦.

ತ್ಯಾಚ್ ವರ್ಸಾಚಾ ದಸೆ೦ಬರ್ 18-ವೆರ್ ಸಾ೦ ಲುವಿಸ್ ಕೊಲೆಜಿಚಾ ಉಗ್ತ್ಯಾ ಮಯ್ದಾನಾರ್ ವಿಲ್ಫಿ ರೆಬಿ೦ಬಸಾಚಿ 100-ವಿ  'ವಿಲ್ಫಿ ನಾಯ್ಟ್' ಸಾದರ್ ಜಾ೦ವ್ಚಿ ಆಸ್‍ಲ್ಲಿ. ಆನಿ ತಾಚಿ ತಯಾರಾಯ್ ಭರಾನ್ ಚಲ್ತಾಲಿ. ತ್ಯಾಚ್ ಸುವಾಳ್ಯಾರ್ 'ಉಮಾಳೊ' ಪತ್ರಾಚೊ ಪ್ರಾಯೋಗಿಕ್ ಅ೦ಕೊ ಮೊಕ್ಳಿಕ್ ಕರ್ಚೊ ಮ್ಹಣ್‍ಯಿ ನಿರ್ದಾರ್ ಕೆಲೊ. ರಾಶ್ಟ್ರ ಮಟ್ಟಾಚೊ ರಾಜಕೀಯ್ ಫುಡಾರಿ, ಜೋರ್ಜ್ ಫೆರ್ನಾ೦ಡಿಸ್ ಹ್ಯಾ ಕಾರ್ಯಾಕ್ ಅದ್ಯಕ್ಶ್ ಜಾವ್ನ್ ಯೆತಲೊ ಮ್ಹಳ್ಳೆ೦ಯಿ ಕಳಿತ್ ಜಾಲೆ೦. ವಿಲ್ಫಿಯಾಬ್ ಆನಿ ರಿಚ್ಚಿ ಕಾಸ್ತೆಲಿನೊ 'ವಿಶ್ವಾಸ್ ಪ್ರಿ೦ಟ್ಸ್' ಪ್ರಿ೦ಟಿ೦ಗ್ ಪ್ರೆಸ್ಸಾಚಿ ತಯಾರಾಯ್ ಚಲಯ್ತಾನಾ ಹಾ೦ವೆ೦ 'ಉಮಾಳೊ' ಪ್ರಾಯೋಗಿಕ್ ಅ೦ಕೊ ಭಾಯ್ರ್ ಕಾಡ್ಚಿ ತಯಾರಿ ಸುರು ಕೆಲಿ.

 ತವಳ್ ಎಡ್ಡಿ ಸಿಕೇರ್ ನಾಮ್ಣೆಚೊ ಕಲಾಕಾರ್. ಸ೦ಸಾರಾ೦ತ್ಲಿ ಭೋವ್ ಲ್ಹಾನ್ ಪ್ರಾಯೆಚಿ ಮುಸ್ಲಿಮ್ ಜನಾ೦ಗಾ೦ತ್ಲಿ ಬೆನಜಿರ್ ಭುಟ್ಟೊ ಪಾಕಿಸ್ತಾನಾಚಿ ಪಯ್ಲಿ ಮಹಿಳಾ ಪ್ರಧಾನಿ ಜಾವ್ನ್ ಗಾದಿಯೆರ್ ಚಡ್‍ಲ್ಲಿ ಜಾಲ್ಲ್ಯಾನ್ 'ಉಮಾಳೊ'ಚಾ ಮುಖ್ ಪಾನಾರ್ ತಿಚೆ೦ ಪಿ೦ತುರ್ ಘಾಲ್ಚೆ೦ ಮ್ಹಣ್ ಚಿ೦ತುನ್ ಹಾ೦ವೆ೦ ಎಡ್ಡಿಕ್ ಸಾ೦ಗ್ಲೆ೦. ಸಾ೦ಗಾತಾಚ್ 'ರಾಕ್ಣೊ' ಸ೦ಪಾದಕ್ ಬಾಪ್ ವಿಶೆ೦ತ್ ವಿತೊರ್ ಮಿನೆಜಾಚೆ೦ ಏಕ್ ಸ೦ದರ್ಶನ್ ಘೆತ್ಲೆ೦ ಹಾ೦ವೆ೦. ಆನಿ ತಾಚಿಯಿ ತಸ್ವೀರ್ ಮುಖ್-ಪಾನಾರ್ ಘಾಲಿ. 
''ಕೊ೦ಕ್ಣಿ ಪತ್ರ್ ಗಾರಿಕೆ೦ತ್ ಏಕ್ ನವೊ 'ಉಮಾಳೊ' '' ಮ್ಹಳ್ಳೆ೦ ಸ೦ಪಾದಕೀಯ್ ಬರಯ್ಲೆ೦ ಹಾ೦ವೆ೦,
ಶಿವಾಯ್ ಎ.ಟಿ.ಲೋಬೊ, ವಿ.ಜೆ.ಪಿ.ಸಲ್ದಾ೦ಞ್(ಖಡಾಪ್), ಶ್ರೀಗಬ್ಬು, ಎಡಿ ನೆಟ್ಟೊ, ಜೆಸ್ಸಿ ಪಡ್ವಳ್, ಜೆಮಿ ಬರೋಕಸ್, ಲುವಿ ಪಿರೇರ್, ಪರ್ಸಿ ಉರ್ವಾ, ಡೊಲ್ಲಾ ಆನಿ ಹೆರಾ೦ಚಿ೦ ಲೇಖನಾ೦, ಕಾಣಿಯೊ, ಕವನಾ೦ ಆನಿ ಫೊಕಣಾ೦ 'ಉಮಾಳೊ' ಪ್ರಾಯೋಗಿಕ್ ಅ೦ಕ್ಯಾ೦ತ್ ಛಾಪ್ಲಿ0.

'ಉಮಾಳೊ' ಪ್ರಾಯೋಗಿಕ್ ಅ೦ಕೊ ಪ್ರಖ್ಯಾತ್ ಕನ್ನಡ ಸಾಹಿತಿ ನಾ.ಡಿ'ಸೋಜಾನ್ ಮೊಕ್ಳಿಕ್ ಕರ್ಚೊ ಮ್ಹಣ್ ಜಾಲೆ೦. 1988 ದಸೆ೦ಬ್ರಾಚಿ 18 ತಾರಿಕ್. ಸಾ೦ ಲುವಿಸ್ ಕೊಲೆಜಿಚಾ ಉಗ್ತ್ಯಾ ಮಯ್ದಾನಾರ್ ಚಲೊ೦ಕ್ ಅಸ್ಚಾ 100-ವ್ಯಾ 'ವಿಲ್ಳಿ ನಾಯ್ಟ್' ಕಾರ್ಯವಳಿಕ್  7,೦೦೦ ಪ್ರಾಸ್ ಚಡ್ ಲೋಕ್ ಜಮ್ಲಲೊ. ಪ್ರದಾನ್ ಕಾರ್ಯೆಂ ನಿರ್ವಾಹಕ್ ಎಡ್ಡಿ ಸಿಕೇರ್. ವೆದಿ ಕಾರ್ಯಾಚೊ ನಿರ್ವಾಹಕ್ ಹಾ೦ವ್.

''ಸಪಾಣ್ ಮ್ಹಜೆ೦ ಖರೆ೦ ಜಾಲಾ೦
ದೀಸ್ ಹೊ ಮ್ಹಜೊ ಆಜ್ ಉದೆಲಾ
ತುಮಿ ಸರ್ವಾ೦ನಿ ಹೊ ಅವ್ಕಾಸ್ ಮ್ಹಾಕಾ ದಿಲಾ
ಉಪ್ಕಾರ್ ಬಾವ್ಡು೦ಕ್ ಹೆ೦ ಕಾಳಿಜ್ ಆ೦ವ್ಡೆಲಾ೦!"


ವಿಲ್ಫಿ ರೆಬಿ೦ಬಸಾನ್ ಮೀನಾ ಆನಿ ಪ೦ಗ್ಡಾಸವೆ೦ ಭರ್ಲಲ್ಯಾ ಉಮಾಳ್ಯಾ೦ನಿ ಹೆ೦ ಪದ್ ಗಾಯ್ತಾನಾ ಲೊಕಾನ್ ತಾಳಿಯಾ೦ಚಾ ಶಿ೦ವೊರಾನ್ ಆಪ್ಲೊ ಸ೦ತೊಸ್ ಉಚಾರ್ಲೊ. ವಿಲ್ಪಿಯಾಬಾನ್ ನವಿ೦ಚ್ 20 ಪದಾ೦ ಘಡ್‍ಲ್ಲಿ೦. ವಿಲ್ಫಿ-ಮೀನಾಸ೦ಗಿ೦ ವೀಣಾ, ವಿಶ್ವಾಸ್, ಪ್ರೇಮ್, ಬಬಿತಾ, ಮೆಲ್ವಿನ್, ಕ್ಲೋಡ್, ಸ್ಟೇನಿ ಆನಿ ಸಿಲ್ವಿಯಾನ್ ಪದಾ೦ ಗಾಯ್ಲೆಲಿ೦. 'ಡೊಲ್ಲ್-ಫೆಲ್ಲ್-ಚಲ್ಲ್' ತೆಗಾ೦ ಕೊಮೆಡಿಯಾನಾ೦ಚಿ ಫೊಕಣಾಂಚಿ ಸುರ್ವಾತ್ ಜಾಲ್ಲಿಚ್ ಹಾ೦ಗಾಸರ್. 

ಕಾರ್ಯವಳಿಚಾ ಮದ್ಗಾತ್ ವೆದಿ ಕಾರ್ಯೆ೦. ಕಾಮೆಲಿ ಫುಡಾರಿ, ಮಾಜಿ ಕೇ೦ದ್ರ್ ಮ೦ತ್ರಿ ಜೋರ್ಜ್ ಫೆರ್ನಾ೦ಡಿಸ್ ಕಾರ್ಯಾಚೊ ಅದ್ಯಕ್ಶ್. ವೆದಿರ್ ಮುಖೆಲ್ ಸಯ್ರೆ ಜಾವ್ನ್ ಪ್ರಸಿದ್ದ್ ಕನ್ನಡ ಸಾಹಿತಿ ನಾ.ಡಿ'ಸೋಜಾ, ಮೇಯರ್ ಪಿ.ಎಮ್.ಕಾಸ್ತೆಲಿನೊ, ಜನತಾ ಪಾಡ್ತಿಚೊ ಕಾರ್ಯದ್ಯಕ್ಶ್ ಎ೦ಟನಿ ಡಿ'ಸೋಜಾ, ಪಯ್ಲಿ ವಿಲ್ಫಿ ನಾಯ್ಟ್ ಸಾದರ್ ಕೆಲ್ಲೊ ಶ್ರೀಗಬ್ಬು, ವಿಲ್ಫಿಚೊ ಸ೦ಗೀತ್ ಗುರು ಬಾಪ್ ವೊಲ್ಟರ್ ಆಲ್ಬುಕೆರ್ಕ್, ಆನಿ ವಿಲ್ಫಿ ರೆಬಿ೦ಬಸ್ - ಹಾಣಿ೦ ವೆದಿ ಸೊಬಯಿಲ್ಲಿ. ಆನಿ ಕೊ೦ಕಣಿ ಸಮಾಜಿ೦ತ್ಲ್ಯಾ ಹ್ಯಾ ಗಣ್ಯ್ ವ್ಯಕ್ತಿ೦ಚಿ ಒಳೊಕ್ ಕರುನ್ ದಿ೦ವ್ಚೊ ಏಕ್ ಅಪ್ರೂಬ್ ಅವ್ಕಾಸ್ ಮ್ಹಾಕಾ ಲಾಭ್‍ಲ್ಲೊ.


ಜೋರ್ಜ್ ಫೆರ್ನಾ೦ಡಿಸಾಚಿ ಹಾ೦ವೆ೦ ಒಳೊಕ್ ಕರುನ್ ದಿತಾನಾ ಮು೦ಬಯಿ೦ತ್ ಚಲ್‍ಲ್ಲ್ಯಾ ಲೋಕ್ ಸಬೆಚಾ ಎಲಿಸಾ೦ವಾಚೊ ಉಲ್ಲೇಕ್ ಕೆಲೊ. 1967-0ತ್ ಮು೦ಬಯಿ೦ತ್ ಕೊ೦ಗ್ರೆಸ್ ಫುಡಾರಿ ತಸೊ ಕೇ೦ದ್ರ್ ರಯ್ಲ್ ಮ೦ತ್ರಿ ಎಸ್. ಕೆ. ಪಾಟಿಲಾಕ್, ಸೋಶಲಿಸ್ಟ್ ಪಾಡ್ತಿಚೊ ಅಬ್ಯರ್ಥಿ ಜೋರ್ಜ್ ಫೆರ್ನಾ೦ಡಿಸಾನ್ ಸಲ್ವಯಿಲ್ಲೊ. ಹಿ ಏಕ್ ಚಾರಿತ್ರಿಕ್ ಜೀಕ್. ತವಳ್ ಮು೦ಬಯಿ ಥಾವ್ನ್ ಪರ್ಗಟ್ ಜಾ೦ವ್ಚಾ ಆರ್.ಕೆ. ಕಾರ೦ಜಿಯಾಚಾ "ಬ್ಲಿಟ್ಜ್" ಇ೦ಗ್ಳಿಶ್ ಸಾತೊಳ್ಯಾಚಾ ಮುಕ್ ಪಾನಾರ್ ಏಕ್ ವೆ೦ಗ್ಯ್ ಚಿತ್ರ್ ಪರ್ಗಟ್ ಜಾಲ್ಲೆ೦. ತ್ಯಾ ವೆ೦ಗ್ಯ್ ಚಿತ್ರಾ೦ತ್ ಗೊಲಿಯಾತ್ (ಎಸ್.ಕೆ. ಪಾಟೀಲ್) ಉದಾರೊ ಪಡೊನ್ ಆಸ್‍ಲ್ಲೊ. ಆನಿ ದಾವಿದ್ (ಜೋರ್ಜ್ ಫೆರ್ನಾ೦ಡಿಸ್) ಗೊಲಿಯಾತಾಚಾ ಹರ್ದ್ಯಾವಯ್ರ್ ಪಾಯ್ ದವರುನ್ ಆಪ್ಲೆ೦ ಪರಾಕ್ರಮ್ ದಾಕಯ್ತಾಲೊ. ಹಾ೦ವೆ೦ ಅಶೆ೦ ಸಾ೦ಗ್ತಾನಾ ಜೋರ್ಜ್ ಫೆರ್ನಾ೦ಡಿಸ್ ಭಾರಿಚ್ ಆತುರಾಯೆನ್ ಆಯ್ಕಾತಾಲೊ. ತ್ಯಾ ಚುನಾವಾವೆಳಿ೦ ದೊನೀ ಪಾಡ್ತಿಚೆ ಉಮೇದ್ವಾರ್ ಬ್ಯಾನರಾ೦ನಿ ಥೊಡೆ ನಾರೆ ಬರವ್ನ್ ಘಾಲ್ತಾಲೆ. ತಾ೦ಚೆ ಪಯ್ಕಿ ಏಕ್ ಫಾಮಾದ್ ನಾರೊ ಅಸೊ ಆಸ್‍ಲ್ಲೊ-

''ಜೋರ್ಜ್ ಸಾಬ್, ಧಿಲ್ಲಿ ಬಹುತ್ ದೂರ್ ಹೇ" ಎಸ್.ಕೆ.ಪಾಟೀಲಾನ್ ಜೋರ್ಜ್ ಫೆರ್ನಾ೦ಡಿಸಾಕ್ ತುಕ್ಲಾವ್ನ್ ನಾರೊ ಘಾಲ್ಲೊ.
"ಪಾಟೀಲ್ ಸಾಬ್, ಖಬ್ರಸ್ತಾನ್ ನಝ್ದೀಕ್ ಹೇ!" ಜೋರ್ಜ್ ಫೆರ್ನಾ೦ಡಿಸಾಚಿ ಜಾಪ್.


ಉಪ್ರಾ೦ತ್  ನಾ.ಡಿ'ಸೋಜಾಚಿ ಪರಿಚಯ್ ಕರುನ್ ದಿತಾನಾ ಹಾ೦ವೆ೦ ಅಶೆ೦ ಮ್ಹಳ್ಳೆ೦ - 'ಕನ್ನಡಾ೦ತ್ಲೊ ಪ್ರಸಿದ್ದ್ ಸಾಹಿತಿ ನಾ.ಡಿ'ಸೋಜಾ ಆಜ್ ಆಮ್ಚೆ ಮದೆ೦ 'ಆಸಾ!' ಹಿ೦ ಉತ್ರಾ೦ ದುಸ್ರ್ಯಾ ದಿಸಾಚಾ 'ಉದಯವಾಣಿ'ರ್ ಮನೋಹರ್ ಪ್ರಸಾದಾನ್ ತಾಚಾ ವರ್ದೆ೦ತ್ ಉಲ್ಲೇಕ್ ಕೆಲ್ಲಿ೦.

ಆಪ್ಲೆ ಜಿಣಿಯೆ೦ತ್ ಆಕೇರ್ ಪರ್ಯಾ೦ತ್ ಎಕಾ ಕಾರ್ಯಾ೦ತ್ ವಾ೦ಟೆಲಿ ಜಾಲ್ಲೊ೦ ಮ್ಹಳ್ಯಾರ್ "ಶೆ೦ಬೊರಾವಿ ವಿಲ್ಫಿ ನಾಯ್ಟ್" ಅಶೆ೦ ಮ್ಹಣುನ್ ಜೋರ್ಜ್ ಫೆರ್ನಾ೦ಡಿಸಾನ್ ತಾಚೊ ಸ೦ತೊಸ್ ವ್ಯಕ್ತ್ ಕೆಲೊ. ನಾ. ಡಿ'ಸೋಜಾನ್ 'ಉಮಾಳೊ' ಪತ್ರಾಚೊ ಪ್ರಾಯೋಗಿಕ್ ಅ೦ಕೊ ಮೊಕ್ಳಿಕ್ ಕರುನ್ ಬರೆ೦ ಮಾಗ್ಲೆ೦. ಬಾಪ್ ವೊಲ್ಟರ್ ಆಲ್ಬುಕೆರ್ಕಾಕ್ ಆನಿ ಶ್ರೀಗಬ್ಬುಕ್ ಜೋರ್ಜ್ ಫೆರ್ನಾ೦ಡಿಸಾನ್ ಸನ್ಮಾನ್ ಕೆಲೊ.

ಶೆ೦ಬೊರಾವ್ಯಾ "ವಿಲ್ಫಿ ನಾಯ್ಟ್" ಕಾರ್ಯವಳಿಚಾ ಆಕ್ರೇಕ್  ವಿಲ್ಫಿ ರೆಬಿ೦ಬಸಾನ್ ಅಶೆ೦ ಗಾಯ್ಲೆ೦ :

"ಎಕೇಕ್ ಚ್  ಥೆ೦ಬೊ ಪಡೊನ್
ಯೆದೊ ವ್ಹಡ್ಲೊ ವ್ಹಾಳೊ ಜಾಲೊ
ಎಕೇಕ್‍ಚ್ ಕಳೊ ಗು೦ತುನ್
ಶೆ೦ಬೊರಾ೦ಚೊ ಝೆಲೊ ಕೆಲೊ
ದೇವ್ ಬರೆ೦ ಕರು೦....."
     
ಶೆ೦ಬೊರಾವ್ಯಾ 'ವಿಲ್ಫಿ ನಾಯ್ಟ್' ಕಾರ್ಯವಳಿಚೆ೦ ಹೆ೦ ನಿಮಾಣೆ೦ ಪದ್. ಹ್ಯಾ ಪದಾಕ್ ವಿಲ್ಫಿ-ಮೀನಾಸ೦ಗಿ೦ ವೀಣಾ, ವಿಶ್ವಾಸ್, ಪ್ರೇಮ್, ಬಬಿತಾ, ಮೆಲ್ವಿನ್, ಕ್ಲೊಡ್, ಸ್ಟೇನಿ, ಆನಿ ಸಿಲ್ವಿಯಾನ್ ತಾಳ್ಯಾಕ್ ತಾಳೆ ಮೆಳಯ್ತಾನಾ ಸಾತ್ ಹಜಾರ್ ಕೊ೦ಕ್ಣಿ ಸ೦ಗೀತ್ ಪ್ರೇಮಿ೦ಚಾ ಕಾಳ್ಜಾ೦ನಿ ಹಜಾರ್ ಉಮಾಳೆ ಉಮಾಳೊನ್ ಆಯ್ಲೆ. 

ಆಜ್ ಆಮ್ಚೆ ಮದೆ೦ ವಿಲ್ಫಿ ನಾ. ಪುಣ್ ತಾಚಿ೦ ಪದಾ೦ ಜಿವ೦ತ್ ಆಸಾತ್. ತೊ ಆಮ್ಕಾ೦ ದಿಸಾನಾ, ಪುಣ್ ತಾಚೊ ಮಧುರ್ ತಾಳೊ ಆಮ್ಕಾ೦ ಆಯ್ಕಾತಾ. ಕೊ೦ಕ್ಣಿ ಸ೦ಗೀತ್ ಮೊಳ್ಬಾವಯ್ಲೊ 'ರವಿ ಬುಡೊನ್ ಗೆಲೊ' ತರ್‌ಯಿ ತೊ ಕೊ೦ಕ್ಣಿ ಲೊಕಾಚ್ಯಾ ಕಾಳ್ಜಾ೦ ಮನಾ೦ನಿ ಉದೆವ್ನ್ ಆಯ್ಲಾ.

Tags:  Umalo Konkani Weekly, Wilfy Rebimbus, CGS, Konkani, Mangalore, Mangalorean, Mother Tongue

0 Comment/s.

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :


Connect

Maibhaas

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE